9. ниббида̄суттам̣

69. ‘‘пан̃чиме, бхиккхаве, дхамма̄ бха̄вита̄ бахулӣката̄ екантаниббида̄йа вира̄га̄йа ниродха̄йа упасама̄йа абхин̃н̃а̄йа самбодха̄йа нибба̄на̄йа сам̣ваттанти.

‘‘катаме пан̃ча? идха, бхиккхаве, бхиккху асубха̄нупассӣ ка̄йе вихарати, а̄ха̄ре пат̣икӯласан̃н̃ӣ, саббалоке анабхиратасан̃н̃ӣ [анабхиратисан̃н̃ӣ (ка.) а. ни. 5.121-122, 303-304 пасситаббам̣], саббасан̇кха̄ресу аничча̄нупассӣ, маран̣асан̃н̃а̄ кхо панасса аджджхаттам̣ сӯпат̣т̣хита̄ хоти. име кхо, бхиккхаве, пан̃ча дхамма̄ бха̄вита̄ бахулӣката̄ екантаниббида̄йа вира̄га̄йа ниродха̄йа упасама̄йа абхин̃н̃а̄йа самбодха̄йа нибба̄на̄йа сам̣ваттантӣ’’ти. навамам̣.