9. аран̃н̃асуттам̣

262. ‘‘чатӯхи, бхиккхаве, дхаммехи саманна̄гато бхиккху на̄лам̣ аран̃н̃аванаппаттха̄ни панта̄ни сена̄сана̄ни пат̣исевитум̣. катамехи чатӯхи? ка̄мавитаккена, бйа̄па̄давитаккена, вихим̣са̄витаккена, дуппан̃н̃о хоти джал̣о еламӯго – имехи кхо, бхиккхаве, чатӯхи дхаммехи саманна̄гато бхиккху на̄лам̣ аран̃н̃аванаппаттха̄ни панта̄ни сена̄сана̄ни пат̣исевитум̣.

‘‘чатӯхи, бхиккхаве, дхаммехи саманна̄гато бхиккху алам̣ аран̃н̃аванаппаттха̄ни панта̄ни сена̄сана̄ни пат̣исевитум̣. катамехи чатӯхи? неккхаммавитаккена, абйа̄па̄давитаккена, авихим̣са̄витаккена, пан̃н̃ава̄ хоти аджал̣о анеламӯго – имехи кхо, бхиккхаве, чатӯхи дхаммехи саманна̄гато бхиккху алам̣ аран̃н̃аванаппаттха̄ни панта̄ни сена̄сана̄ни пат̣исевиту’’нти. навамам̣.