2. дит̣т̣хисуттам̣

222. ‘‘чатӯхи, бхиккхаве, дхаммехи саманна̄гато ба̄ло абйатто асаппурисо кхатам̣ упахатам̣ атта̄нам̣ парихарати, са̄ваджджо ча хоти са̄нуваджджо ча вин̃н̃ӯнам̣; бахун̃ча апун̃н̃ам̣ пасавати. катамехи чатӯхи? ка̄йадуччаритена, вачӣдуччаритена, манодуччаритена, миччха̄дит̣т̣хийа̄ – имехи кхо, бхиккхаве, чатӯхи дхаммехи саманна̄гато ба̄ло абйатто асаппурисо кхатам̣ упахатам̣ атта̄нам̣ парихарати, са̄ваджджо ча хоти са̄нуваджджо ча вин̃н̃ӯнам̣, бахун̃ча апун̃н̃ам̣ пасавати.

‘‘чатӯхи, бхиккхаве, дхаммехи саманна̄гато пан̣д̣ито вийатто саппурисо аккхатам̣ анупахатам̣ атта̄нам̣ парихарати, анаваджджо ча хоти анануваджджо вин̃н̃ӯнам̣, бахун̃ча пун̃н̃ам̣ пасавати. катамехи чатӯхи? ка̄йасучаритена, вачӣсучаритена, маносучаритена, самма̄дит̣т̣хийа̄ – имехи кхо, бхиккхаве, чатӯхи дхаммехи саманна̄гато пан̣д̣ито вийатто саппурисо аккхатам̣ анупахатам̣ атта̄нам̣ парихарати, анаваджджо ча хоти анануваджджо вин̃н̃ӯнам̣; бахун̃ча пун̃н̃ам̣ пасаватӣ’’ти. дутийам̣.