1. париса̄суттам̣

211. ‘‘чатта̄роме, бхиккхаве, парисадӯсана̄. катаме чатта̄ро? бхиккху, бхиккхаве [идха бхиккхаве бхиккху (пӣ. ка.)], дуссӣло па̄падхаммо парисадӯсано; бхиккхунӣ, бхиккхаве, дуссӣла̄ па̄падхамма̄ парисадӯсана̄; упа̄сако, бхиккхаве, дуссӣло па̄падхаммо парисадӯсано; упа̄сика̄, бхиккхаве, дуссӣла̄ па̄падхамма̄ парисадӯсана̄. име кхо, бхиккхаве, чатта̄ро парисадӯсана̄.

‘‘чатта̄роме, бхиккхаве, парисасобхана̄. катаме чатта̄ро? бхиккху, бхиккхаве, сӣлава̄ калйа̄н̣адхаммо парисасобхано; бхиккхунӣ, бхиккхаве, сӣлаватӣ калйа̄н̣адхамма̄ парисасобхана̄; упа̄сако, бхиккхаве, сӣлава̄ калйа̄н̣адхаммо парисасобхано; упа̄сика̄, бхиккхаве, сӣлаватӣ калйа̄н̣адхамма̄ парисасобхана̄. име кхо, бхиккхаве, чатта̄ро парисасобхана̄’’ти. пат̣хамам̣.