(21) 1. саппурисавагго

1. сиккха̄падасуттам̣

201. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча; саппурисан̃ча, саппурисена саппурисатаран̃ча. там̣ сун̣а̄тха, са̄дхукам̣ манаси каротха; бха̄сисса̄мӣ’’ти. ‘‘евам̣, бханте’’ти кхо те бхиккхӯ бхагавато паччассосум̣. бхагава̄ етадавоча –

‘‘катамо ча, бхиккхаве, асаппурисо? идха, бхиккхаве, екаччо па̄н̣а̄типа̄тӣ хоти, адинна̄да̄йӣ хоти, ка̄месумиччха̄ча̄рӣ хоти, муса̄ва̄дӣ хоти, сура̄мерайамаджджапама̄дат̣т̣ха̄йӣ хоти. айам̣ вуччати, бхиккхаве, асаппурисо.

‘‘катамо ча, бхиккхаве, асаппурисена асаппурисатаро? идха, бхиккхаве, екаччо аттана̄ ча па̄н̣а̄типа̄тӣ хоти, паран̃ча па̄н̣а̄типа̄те сама̄дапети; аттана̄ ча адинна̄да̄йӣ хоти, паран̃ча адинна̄да̄не сама̄дапети; аттана̄ ча ка̄месумиччха̄ча̄рӣ хоти, паран̃ча ка̄месумиччха̄ча̄ре сама̄дапети; аттана̄ ча муса̄ва̄дӣ хоти, паран̃ча муса̄ва̄де сама̄дапети; аттана̄ ча сура̄мерайамаджджапама̄дат̣т̣ха̄йӣ хоти, паран̃ча сура̄мерайамаджджапама̄дат̣т̣ха̄не сама̄дапети. айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо па̄н̣а̄типа̄та̄ пат̣ивирато хоти, адинна̄да̄на̄ пат̣ивирато хоти, ка̄месумиччха̄ча̄ра̄ пат̣ивирато хоти, муса̄ва̄да̄ пат̣ивирато хоти, сура̄мерайамаджджапама̄дат̣т̣ха̄на̄ пат̣ивирато хоти. айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха, бхиккхаве, екаччо аттана̄ ча па̄н̣а̄типа̄та̄ пат̣ивирато хоти, паран̃ча па̄н̣а̄типа̄та̄ вераман̣ийа̄ сама̄дапети; аттана̄ ча адинна̄да̄на̄ пат̣ивирато хоти, паран̃ча адинна̄да̄на̄ вераман̣ийа̄ сама̄дапети; аттана̄ ча ка̄месумиччха̄ча̄ра̄ пат̣ивирато хоти, паран̃ча ка̄месумиччха̄ча̄ра̄ вераман̣ийа̄ сама̄дапети; аттана̄ ча муса̄ва̄да̄ пат̣ивирато хоти, паран̃ча муса̄ва̄да̄ вераман̣ийа̄ сама̄дапети; аттана̄ ча сура̄мерайамаджджапама̄дат̣т̣ха̄на̄ пат̣ивирато хоти, паран̃ча сура̄мерайамаджджапама̄дат̣т̣ха̄на̄ вераман̣ийа̄ сама̄дапети. айам̣ вуччати, бхиккхаве, саппурисена саппурисатаро’’ти [пу. па. 135]. пат̣хамам̣.

2. ассаддхасуттам̣

202. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча; саппурисан̃ча, саппурисена саппурисатаран̃ча. там̣ сун̣а̄тха…пе….

‘‘катамо ча, бхиккхаве, асаппурисо? идха, бхиккхаве, екаччо ассаддхо хоти, ахирико хоти, аноттаппӣ хоти, аппассуто хоти, кусӣто хоти, мут̣т̣хассати хоти, дуппан̃н̃о хоти. айам̣ вуччати, бхиккхаве, асаппурисо.

‘‘катамо ча, бхиккхаве, асаппурисена асаппурисатаро? идха, бхиккхаве, екаччо аттана̄ ча ассаддхо хоти, паран̃ча ассаддхийе [асаддха̄йа (ка.)] сама̄дапети; аттана̄ ча ахирико хоти, паран̃ча ахириката̄йа сама̄дапети; аттана̄ ча аноттаппӣ хоти, паран̃ча аноттаппе сама̄дапети; аттана̄ ча аппассуто хоти, паран̃ча аппассуте сама̄дапети; аттана̄ ча кусӣто хоти, паран̃ча косадждже сама̄дапети; аттана̄ ча мут̣т̣хассати хоти, паран̃ча мут̣т̣хассачче [мут̣т̣хасачче (сӣ. сйа̄. кам̣. пӣ.)] сама̄дапети; аттана̄ ча дуппан̃н̃о хоти, паран̃ча дуппан̃н̃ата̄йа сама̄дапети. айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо саддхо хоти, хирима̄ хоти, оттаппӣ хоти, бахуссуто хоти, а̄раддхавӣрийо хоти, сатима̄ хоти, пан̃н̃ава̄ хоти. айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха, бхиккхаве, екаччо аттана̄ ча саддха̄сампанно хоти, паран̃ча саддха̄сампада̄йа сама̄дапети; аттана̄ ча хирима̄ хоти, паран̃ча хиримата̄йа [хирисампада̄йа (ка.)] сама̄дапети; аттана̄ ча оттаппӣ хоти, паран̃ча оттаппе сама̄дапети; аттана̄ ча бахуссуто хоти, паран̃ча ба̄хусачче сама̄дапети; аттана̄ ча а̄раддхавӣрийо хоти, паран̃ча вӣрийа̄рамбхе сама̄дапети; аттана̄ ча упат̣т̣хитассати хоти, паран̃ча сатиупат̣т̣ха̄не [сатипат̣т̣ха̄не (сӣ. сйа̄. кам̣. пӣ.)] сама̄дапети; аттана̄ ча пан̃н̃а̄сампанно хоти, паран̃ча пан̃н̃а̄сампада̄йа сама̄дапети. айам̣ вуччати, бхиккхаве, саппурисена саппурисатаро’’ти. дутийам̣.

3. саттакаммасуттам̣

203. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча; саппурисан̃ча, саппурисена саппурисатаран̃ча. там̣ сун̣а̄тха…пе….

‘‘катамо ча, бхиккхаве, асаппурисо? идха, бхиккхаве, екаччо па̄н̣а̄типа̄тӣ хоти, адинна̄да̄йӣ хоти, ка̄месумиччха̄ча̄рӣ хоти, муса̄ва̄дӣ хоти, писун̣ава̄чо хоти, пхарусава̄чо хоти, сампхаппала̄пӣ хоти. айам̣ вуччати, бхиккхаве, асаппурисо.

‘‘катамо ча, бхиккхаве, асаппурисена асаппурисатаро? идха, бхиккхаве, екаччо аттана̄ ча па̄н̣а̄типа̄тӣ хоти, паран̃ча па̄н̣а̄типа̄те сама̄дапети; аттана̄ ча адинна̄да̄йӣ хоти, паран̃ча адинна̄да̄не сама̄дапети; аттана̄ ча ка̄месумиччха̄ча̄рӣ хоти, паран̃ча ка̄месумиччха̄ча̄ре сама̄дапети; аттана̄ ча муса̄ва̄дӣ хоти, паран̃ча муса̄ва̄де сама̄дапети; аттана̄ ча писун̣ава̄чо хоти, паран̃ча писун̣а̄йа ва̄ча̄йа сама̄дапети; аттана̄ ча пхарусава̄чо хоти, паран̃ча пхаруса̄йа ва̄ча̄йа сама̄дапети; аттана̄ ча сампхаппала̄пӣ хоти, паран̃ча сампхаппала̄пе сама̄дапети. айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо па̄н̣а̄типа̄та̄ пат̣ивирато хоти, адинна̄да̄на̄ пат̣ивирато хоти, ка̄месумиччха̄ча̄ра̄ пат̣ивирато хоти, муса̄ва̄да̄ пат̣ивирато хоти, писун̣а̄йа ва̄ча̄йа пат̣ивирато хоти, пхаруса̄йа ва̄ча̄йа пат̣ивирато, хоти, сампхаппала̄па̄ пат̣ивирато хоти. айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха бхиккхаве, екаччо аттана̄ ча па̄н̣а̄типа̄та̄ пат̣ивирато хоти, паран̃ча па̄н̣а̄типа̄та̄ вераман̣ийа̄ сама̄дапети; аттана̄ ча адинна̄да̄на̄ пат̣ивирато хоти, паран̃ча адинна̄да̄на̄ вераман̣ийа̄ сама̄дапети; аттана̄ ча ка̄месумиччха̄ча̄ра̄ пат̣ивирато хоти, паран̃ча ка̄месумиччха̄ча̄ра̄ вераман̣ийа̄ сама̄дапети; аттана̄ ча муса̄ва̄да̄ пат̣ивирато хоти, паран̃ча муса̄ва̄да̄ вераман̣ийа̄ сама̄дапети; аттана̄ ча писун̣а̄йа ва̄ча̄йа пат̣ивирато хоти, паран̃ча писун̣а̄йа ва̄ча̄йа вераман̣ийа̄ сама̄дапети; аттана̄ ча пхаруса̄йа ва̄ча̄йа пат̣ивирато хоти, паран̃ча пхаруса̄йа ва̄ча̄йа вераман̣ийа̄ сама̄дапети; аттана̄ ча сампхаппала̄па̄ пат̣ивирато хоти, паран̃ча сампхаппала̄па̄ вераман̣ийа̄ сама̄дапети. айам̣ вуччати, бхиккхаве, саппурисена саппурисатаро’’ти. татийам̣.

4. дасакаммасуттам̣

204. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча; саппурисан̃ча, саппурисена саппурисатаран̃ча. там̣ сун̣а̄тха…пе….

‘‘катамо ча, бхиккхаве, асаппурисо? идха, бхиккхаве, екаччо па̄н̣а̄типа̄тӣ хоти, адинна̄да̄йӣ хоти, ка̄месумиччха̄ча̄рӣ хоти, муса̄ва̄дӣ хоти, писун̣ава̄чо хоти, пхарусава̄чо хоти, сампхаппала̄пӣ хоти, абхиджджха̄лу хоти, бйа̄панначитто хоти, миччха̄дит̣т̣хико хоти. айам̣ вуччати, бхиккхаве, асаппурисо.

‘‘катамо ча, бхиккхаве, асаппурисена асаппурисатаро? идха, бхиккхаве, екаччо аттана̄ ча па̄н̣а̄типа̄тӣ хоти, паран̃ча па̄н̣а̄типа̄те сама̄дапети…пе… аттана̄ ча абхиджджха̄лу хоти, паран̃ча абхиджджха̄йа сама̄дапети; аттана̄ ча бйа̄панначитто хоти, паран̃ча бйа̄па̄де сама̄дапети, аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети. айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо па̄н̣а̄типа̄та̄ пат̣ивирато хоти…пе… анабхиджджха̄лу хоти, абйа̄панначитто хоти, самма̄дит̣т̣хико хоти. айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха, бхиккхаве, екаччо аттана̄ ча па̄н̣а̄типа̄та̄ пат̣ивирато хоти, паран̃ча па̄н̣а̄типа̄та̄ вераман̣ийа̄ сама̄дапети…пе… аттана̄ ча анабхиджджха̄лу хоти, паран̃ча анабхиджджха̄йа сама̄дапети; аттана̄ ча абйа̄панначитто хоти, паран̃ча абйа̄па̄де сама̄дапети; аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети. айам̣ вуччати, бхиккхаве, саппурисена саппурисатаро’’ти. чатуттхам̣.

5. ат̣т̣хан̇гикасуттам̣

205. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча; саппурисан̃ча, саппурисена саппурисатаран̃ча. там̣ сун̣а̄тха…пе….

‘‘катамо ча, бхиккхаве, асаппурисо? идха, бхиккхаве, екаччо миччха̄дит̣т̣хико хоти, миччха̄сан̇каппо хоти, миччха̄ва̄чо хоти, миччха̄камманто хоти, миччха̄а̄джӣво хоти, миччха̄ва̄йа̄мо хоти, миччха̄сати хоти, миччха̄сама̄дхи хоти. айам̣ вуччати, бхиккхаве, асаппурисо.

‘‘катамо ча, бхиккхаве, асаппурисена асаппурисатаро? идха бхиккхаве, екаччо аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети; аттана̄ ча миччха̄сан̇каппо хоти, паран̃ча миччха̄сан̇каппе сама̄дапети; аттана̄ ча миччха̄ва̄чо хоти, паран̃ча миччха̄ва̄ча̄йа сама̄дапети; аттана̄ ча миччха̄камманто хоти, паран̃ча миччха̄камманте сама̄дапети; аттана̄ ча миччха̄а̄джӣво хоти, паран̃ча миччха̄а̄джӣве сама̄дапети; аттана̄ ча миччха̄ва̄йа̄мо хоти, паран̃ча миччха̄ва̄йа̄ме сама̄дапети; аттана̄ ча миччха̄сати хоти, паран̃ча миччха̄сатийа̄ сама̄дапети; аттана̄ ча миччха̄сама̄дхи хоти, паран̃ча миччха̄сама̄дхимхи сама̄дапети. айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо самма̄дит̣т̣хико хоти, самма̄сан̇каппо хоти, самма̄ва̄чо хоти, самма̄камманто хоти, самма̄а̄джӣво хоти, самма̄ва̄йа̄мо хоти, самма̄сати хоти, самма̄сама̄дхи хоти. айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха, бхиккхаве, екаччо аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети; аттана̄ ча самма̄сан̇каппо хоти, паран̃ча самма̄сан̇каппе сама̄дапети; аттана̄ ча самма̄ва̄чо хоти, паран̃ча самма̄ва̄ча̄йа сама̄дапети; аттана̄ ча самма̄камманто хоти, паран̃ча самма̄камманте сама̄дапети; аттана̄ ча самма̄а̄джӣво хоти, паран̃ча самма̄а̄джӣве сама̄дапети; аттана̄ ча самма̄ва̄йа̄мо хоти, паран̃ча самма̄ва̄йа̄ме сама̄дапети; аттана̄ ча самма̄сати хоти, паран̃ча самма̄сатийа̄ сама̄дапети; аттана̄ ча самма̄сама̄дхи хоти, паран̃ча самма̄сама̄дхимхи сама̄дапети. айам̣ вуччати, бхиккхаве, саппурисена саппурисатаро’’ти. пан̃чамам̣.

6. дасамаггасуттам̣

206. ‘‘асаппурисан̃ча во, бхиккхаве, десесса̄ми, асаппурисена асаппурисатаран̃ча; саппурисан̃ча, саппурисена саппурисатаран̃ча. там̣ сун̣а̄тха…пе….

‘‘катамо ча, бхиккхаве, асаппурисо? идха, бхиккхаве, екаччо миччха̄дит̣т̣хико хоти …пе… миччха̄н̃а̄н̣ӣ хоти, миччха̄вимутти хоти. айам̣ вуччати, бхиккхаве, асаппурисо.

‘‘катамо ча, бхиккхаве, асаппурисена асаппурисатаро? идха, бхиккхаве, екаччо аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети…пе… аттана̄ ча миччха̄н̃а̄н̣ӣ хоти, паран̃ча миччха̄н̃а̄н̣е сама̄дапети; аттана̄ ча миччха̄вимутти хоти, паран̃ча миччха̄вимуттийа̄ сама̄дапети. айам̣ вуччати, бхиккхаве, асаппурисена асаппурисатаро.

‘‘катамо ча, бхиккхаве, саппурисо? идха, бхиккхаве, екаччо самма̄дит̣т̣хико хоти…пе… самма̄н̃а̄н̣ӣ хоти, самма̄вимутти хоти. айам̣ вуччати, бхиккхаве, саппурисо.

‘‘катамо ча, бхиккхаве, саппурисена саппурисатаро? идха, бхиккхаве, екаччо аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети…пе… аттана̄ ча самма̄н̃а̄н̣ӣ хоти, паран̃ча самма̄н̃а̄н̣е сама̄дапети; аттана̄ ча самма̄вимутти хоти, паран̃ча самма̄вимуттийа̄ сама̄дапети. айам̣ вуччати, бхиккхаве, саппурисена саппурисатаро’’ти. чхат̣т̣хам̣.

7. пат̣хамапа̄падхаммасуттам̣

207. ‘‘па̄пан̃ча во, бхиккхаве, десесса̄ми, па̄пена па̄патаран̃ча; калйа̄н̣ан̃ча, калйа̄н̣ена калйа̄н̣атаран̃ча. там̣ сун̣а̄тха…пе….

‘‘катамо ча, бхиккхаве, па̄по? идха, бхиккхаве, екаччо па̄н̣а̄типа̄тӣ хоти…пе… миччха̄дит̣т̣хико хоти. айам̣ вуччати, бхиккхаве, па̄по.

‘‘катамо ча, бхиккхаве, па̄пена па̄патаро? идха, бхиккхаве, екаччо аттана̄ ча па̄н̣а̄типа̄тӣ хоти, паран̃ча па̄н̣а̄типа̄те сама̄дапети…пе… аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети. айам̣ вуччати, бхиккхаве, па̄пена па̄патаро.

‘‘катамо ча, бхиккхаве, калйа̄н̣о? идха, бхиккхаве, екаччо па̄н̣а̄типа̄та̄ пат̣ивирато хоти…пе… самма̄дит̣т̣хико хоти. айам̣ вуччати, бхиккхаве, калйа̄н̣о.

‘‘катамо ча, бхиккхаве, калйа̄н̣ена калйа̄н̣атаро? идха, бхиккхаве, екаччо аттана̄ ча па̄н̣а̄типа̄та̄ пат̣ивирато хоти, паран̃ча па̄н̣а̄типа̄та̄ вераман̣ийа̄ сама̄дапети…пе… аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети. айам̣ вуччати, бхиккхаве, калйа̄н̣ена калйа̄н̣атаро’’ти. саттамам̣.

8. дутийапа̄падхаммасуттам̣

208. ‘‘па̄пан̃ча во, бхиккхаве, десесса̄ми, па̄пена па̄патаран̃ча; калйа̄н̣ан̃ча, калйа̄н̣ена калйа̄н̣атаран̃ча. там̣ сун̣а̄тха, са̄дхукам̣ манасикаротха; бха̄сисса̄мӣ’’ти. евам̣…пе… етадавоча –

‘‘катамо ча, бхиккхаве, па̄по? идха, бхиккхаве, екаччо миччха̄дит̣т̣хико хоти…пе… миччха̄н̃а̄н̣ӣ хоти, миччха̄вимутти хоти. айам̣ вуччати, бхиккхаве, па̄по.

‘‘катамо ча, бхиккхаве, па̄пена па̄патаро? идха, бхиккхаве, екаччо аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети…пе… аттана̄ ча миччха̄н̃а̄н̣ӣ хоти, паран̃ча миччха̄н̃а̄н̣е сама̄дапети; аттана̄ ча миччха̄вимутти хоти, паран̃ча миччха̄вимуттийа̄ сама̄дапети. айам̣ вуччати, бхиккхаве, па̄пена па̄патаро.

‘‘катамо ча, бхиккхаве, калйа̄н̣о? идха, бхиккхаве, екаччо самма̄дит̣т̣хико хоти …пе… самма̄н̃а̄н̣ӣ хоти, самма̄вимутти хоти. айам̣ вуччати, бхиккхаве, калйа̄н̣о.

‘‘катамо ча, бхиккхаве, калйа̄н̣ена калйа̄н̣атаро? идха, бхиккхаве, екаччо аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети…пе… аттана̄ ча самма̄н̃а̄н̣ӣ хоти, паран̃ча самма̄н̃а̄н̣е сама̄дапети; аттана̄ ча самма̄вимутти хоти, паран̃ча самма̄вимуттийа̄ сама̄дапети. айам̣ вуччати, бхиккхаве, калйа̄н̣ена калйа̄н̣атаро’’ти. ат̣т̣хамам̣.

9. татийапа̄падхаммасуттам̣

209. ‘‘па̄падхамман̃ча во, бхиккхаве, десесса̄ми, па̄падхаммена па̄падхамматаран̃ча; калйа̄н̣адхамман̃ча, калйа̄н̣адхаммена калйа̄н̣адхамматаран̃ча. там̣ сун̣а̄тха…пе….

‘‘катамо ча, бхиккхаве, па̄падхаммо? идха, бхиккхаве, екаччо па̄н̣а̄типа̄тӣ хоти…пе… миччха̄дит̣т̣хико хоти. айам̣ вуччати, бхиккхаве, па̄падхаммо.

‘‘катамо ча, бхиккхаве, па̄падхаммена па̄падхамматаро? идха бхиккхаве, екаччо аттана̄ ча па̄н̣а̄типа̄тӣ хоти, паран̃ча па̄н̣а̄типа̄те сама̄дапети…пе… аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети. айам̣ вуччати, бхиккхаве, па̄падхаммена па̄падхамматаро.

‘‘катамо ча, бхиккхаве, калйа̄н̣адхаммо? идха, бхиккхаве, екаччо па̄н̣а̄типа̄та̄ пат̣ивирато хоти…пе… самма̄дит̣т̣хико хоти. айам̣ вуччати, бхиккхаве, калйа̄н̣адхаммо.

‘‘катамо ча, бхиккхаве, калйа̄н̣адхаммена калйа̄н̣адхамматаро? идха, бхиккхаве, екаччо аттана̄ ча па̄н̣а̄типа̄та̄ пат̣ивирато хоти, паран̃ча па̄н̣а̄типа̄та̄ вераман̣ийа̄ сама̄дапети…пе… аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети. айам̣ вуччати, бхиккхаве, калйа̄н̣адхаммена калйа̄н̣адхамматаро’’ти. навамам̣.

10. чатуттхапа̄падхаммасуттам̣

210. ‘‘па̄падхамман̃ча во, бхиккхаве, десесса̄ми, па̄падхаммена па̄падхамматаран̃ча; калйа̄н̣адхамман̃ча, калйа̄н̣адхаммена калйа̄н̣адхамматаран̃ча. там̣ сун̣а̄тха…пе….

‘‘катамо ча, бхиккхаве, па̄падхаммо? идха, бхиккхаве, екаччо миччха̄дит̣т̣хико хоти…пе… миччха̄н̃а̄н̣ӣ хоти, миччха̄вимутти хоти. айам̣ вуччати, бхиккхаве, па̄падхаммо.

‘‘катамо ча, бхиккхаве, па̄падхаммена па̄падхамматаро? идха, бхиккхаве, екаччо аттана̄ ча миччха̄дит̣т̣хико хоти, паран̃ча миччха̄дит̣т̣хийа̄ сама̄дапети…пе… аттана̄ ча миччха̄н̃а̄н̣ӣ хоти, паран̃ча миччха̄н̃а̄н̣е сама̄дапети; аттана̄ ча миччха̄вимутти хоти, паран̃ча миччха̄вимуттийа̄ сама̄дапети. айам̣ вуччати, бхиккхаве, па̄падхаммена па̄падхамматаро.

‘‘катамо ча, бхиккхаве, калйа̄н̣адхаммо? идха, бхиккхаве, екаччо самма̄дит̣т̣хико хоти…пе… самма̄н̃а̄н̣ӣ хоти, самма̄вимутти хоти. айам̣ вуччати, бхиккхаве, калйа̄н̣адхаммо.

‘‘катамо ча, бхиккхаве, калйа̄н̣адхаммена калйа̄н̣адхамматаро? идха, бхиккхаве, екаччо аттана̄ ча самма̄дит̣т̣хико хоти, паран̃ча самма̄дит̣т̣хийа̄ сама̄дапети…пе… аттана̄ ча самма̄н̃а̄н̣ӣ хоти, паран̃ча самма̄н̃а̄н̣е сама̄дапети; аттана̄ ча самма̄вимутти хоти, паран̃ча самма̄вимуттийа̄ сама̄дапети. айам̣ вуччати, бхиккхаве, калйа̄н̣адхаммена калйа̄н̣адхамматаро’’ти. дасамам̣.

саппурисавагго пат̣хамо.