3. пат̣хамаупанисасуттам̣

3. [а. ни. 5.24; 11.3] ‘‘дуссӣласса, бхиккхаве, сӣлавипаннасса хатӯпанисо хоти авиппат̣иса̄ро; авиппат̣иса̄ре асати авиппат̣иса̄равипаннасса хатӯпанисам̣ хоти па̄моджджам̣; па̄модждже асати па̄моджджавипаннасса хатӯпаниса̄ хоти пӣти; пӣтийа̄ асати пӣтивипаннасса хатӯпаниса̄ хоти пассаддхи; пассаддхийа̄ асати пассаддхивипаннасса хатӯпанисам̣ хоти сукхам̣; сукхе асати сукхавипаннасса хатӯпанисо хоти самма̄сама̄дхи; самма̄сама̄дхимхи асати самма̄сама̄дхивипаннасса хатӯпанисам̣ хоти йатха̄бхӯтан̃а̄н̣адассанам̣; йатха̄бхӯтан̃а̄н̣адассане асати йатха̄бхӯтан̃а̄н̣адассанавипаннасса хатӯпанисо хоти ниббида̄вира̄го; ниббида̄вира̄ге асати ниббида̄вира̄гавипаннасса хатӯпанисам̣ хоти вимуттин̃а̄н̣адассанам̣. сеййатха̄пи, бхиккхаве, руккхо са̄кха̄пала̄савипанно. тасса папат̣ика̄пи на па̄рипӯрим̣ гаччхати, тачопи… пхеггупи… са̄ропи на па̄рипӯрим̣ гаччхати. евамевам̣ кхо, бхиккхаве, дуссӣласса сӣлавипаннасса хатӯпанисо хоти авиппат̣иса̄ро; авиппат̣иса̄ре асати авиппат̣иса̄равипаннасса хатӯпанисам̣ хоти…пе… вимуттин̃а̄н̣адассанам̣.

‘‘сӣлавато, бхиккхаве, сӣласампаннасса упанисасампанно хоти авиппат̣иса̄ро; авиппат̣иса̄ре сати авиппат̣иса̄расампаннасса упанисасампаннам̣ хоти па̄моджджам̣; па̄модждже сати па̄моджджасампаннасса упанисасампанна̄ хоти пӣти; пӣтийа̄ сати пӣтисампаннасса упанисасампанна̄ хоти пассаддхи; пассаддхийа̄ сати пассаддхисампаннасса упанисасампаннам̣ хоти сукхам̣; сукхе сати сукхасампаннасса упанисасампанно хоти самма̄сама̄дхи; самма̄сама̄дхимхи сати самма̄сама̄дхисампаннасса упанисасампаннам̣ хоти йатха̄бхӯтан̃а̄н̣адассанам̣; йатха̄бхӯтан̃а̄н̣адассане сати йатха̄бхӯтан̃а̄н̣адассанасампаннасса упанисасампанно хоти ниббида̄вира̄го; ниббида̄вира̄ге сати ниббида̄вира̄гасампаннасса упанисасампаннам̣ хоти вимуттин̃а̄н̣адассанам̣. сеййатха̄пи, бхиккхаве, руккхо са̄кха̄пала̄сасампанно. тасса папат̣ика̄пи па̄рипӯрим̣ гаччхати, тачопи… пхеггупи… са̄ропи па̄рипӯрим̣ гаччхати. евамевам̣ кхо, бхиккхаве, сӣлавато сӣласампаннасса упанисасампанно хоти авиппат̣иса̄ро; авиппат̣иса̄ре сати авиппат̣иса̄расампаннасса упанисасампаннам̣ хоти…пе… вимуттин̃а̄н̣адассана’’нти. татийам̣.