𑄷𑄸. 𑄘𑄴𑄤𑄧𑄘𑄥𑄟𑄤𑄉𑄴𑄉𑄮

𑄷. 𑄎𑄬𑄚𑄴𑄖𑄖𑄴𑄗𑄬𑄢𑄉𑄧𑄗𑄧

𑄷𑄷𑄷. ‘‘𑄘𑄪𑄛𑄴𑄛𑄝𑄴𑄝𑄎𑄴𑄎𑄁 𑄤𑄬 𑄘𑄪𑄢𑄙𑄨𑄤𑄧𑄥𑄧 𑄉𑄬𑄦𑄧, 𑄙𑄟𑄴𑄟𑄮 𑄉𑄟𑄴𑄞𑄩𑄢𑄮 𑄘𑄪𑄢𑄙𑄨𑄉𑄟𑄧 𑄞𑄮𑄉𑄧;

𑄇𑄨𑄌𑄴𑄍𑄧 𑄤𑄪𑄖𑄴𑄖𑄨 𑄚𑄮 𑄄𑄖𑄢𑄩𑄖𑄢𑄬𑄚𑄬𑄤, 𑄡𑄪𑄖𑄴𑄖𑄁 𑄌𑄨𑄚𑄴𑄖𑄬𑄖𑄪𑄁 𑄥𑄖𑄖𑄟𑄚𑄨𑄌𑄴𑄌𑄖’’𑄚𑄴𑄖𑄨.

… 𑄎𑄬𑄚𑄴𑄖𑄮 𑄗𑄬𑄢𑄮….

𑄸. 𑄤𑄌𑄴𑄍𑄉𑄮𑄖𑄴𑄖𑄖𑄴𑄗𑄬𑄢𑄉𑄧𑄗𑄧

𑄷𑄷𑄸. ‘‘𑄖𑄬𑄤𑄨𑄎𑄴𑄎𑄮𑄦𑄁 𑄟𑄦𑄧𑄏𑄧𑄡𑄩, 𑄌𑄬𑄖𑄮𑄥𑄟𑄗𑄇𑄮𑄤𑄨𑄘𑄮;

𑄥𑄘𑄖𑄴𑄗𑄮 𑄟𑄬 𑄃𑄚𑄪𑄛𑄴𑄛𑄖𑄴𑄖𑄮, 𑄇𑄖𑄁 𑄝𑄪𑄘𑄴𑄙𑄥𑄴𑄥 𑄥𑄧𑄥𑄚’’𑄚𑄴𑄖𑄨.

… 𑄤𑄌𑄴𑄍𑄉𑄮𑄖𑄴𑄖𑄮 𑄗𑄬𑄢𑄮….

𑄹. 𑄤𑄚𑄤𑄌𑄴𑄍𑄖𑄴𑄗𑄬𑄢𑄉𑄧𑄗𑄧

𑄷𑄷𑄹. ‘‘𑄃𑄌𑄴𑄍𑄮𑄘𑄨𑄇𑄧 𑄛𑄪𑄗𑄪𑄥𑄨𑄣𑄧,𑄉𑄮𑄚𑄋𑄴𑄉𑄪𑄣𑄟𑄨𑄉𑄧𑄡𑄪𑄖𑄧;

𑄃𑄟𑄴𑄝𑄪𑄥𑄬𑄤𑄧𑄣𑄥𑄐𑄴𑄍𑄚𑄴𑄚𑄧, 𑄖𑄬 𑄥𑄬𑄣𑄧 𑄢𑄟𑄡𑄚𑄴𑄖𑄨 𑄟’’𑄚𑄴𑄖𑄨.

… 𑄤𑄚𑄤𑄌𑄴𑄍𑄮 𑄗𑄬𑄢𑄮….

𑄺. 𑄃𑄙𑄨𑄟𑄪𑄖𑄴𑄖𑄖𑄴𑄗𑄬𑄢𑄉𑄧𑄗𑄧

𑄷𑄷𑄺. ‘‘𑄇𑄧𑄡𑄘𑄪𑄑𑄴𑄒𑄪𑄣𑄴𑄣𑄉𑄢𑄪𑄚𑄮, 𑄦𑄨𑄡𑄴𑄡𑄟𑄧𑄚𑄟𑄴𑄦𑄨 [𑄦𑄩𑄡𑄟𑄧𑄚𑄟𑄴𑄦𑄨 (𑄥𑄩.)] 𑄎𑄩𑄤𑄨𑄖𑄬;

𑄥𑄢𑄩𑄢𑄥𑄪𑄈𑄉𑄨𑄘𑄴𑄙𑄥𑄴𑄥, 𑄇𑄪𑄖𑄮 𑄥𑄟𑄕𑄥𑄧𑄙𑄪𑄖𑄧’’𑄖𑄨.

… 𑄃𑄙𑄨𑄟𑄪𑄖𑄴𑄖𑄮 𑄗𑄬𑄢𑄮….

𑄻. 𑄟𑄦𑄧𑄚𑄧𑄟𑄖𑄴𑄗𑄬𑄢𑄉𑄧𑄗𑄧

𑄷𑄷𑄻. ‘‘𑄆𑄥𑄧𑄤𑄦𑄨𑄡𑄴𑄡𑄥𑄬 𑄛𑄝𑄴𑄝𑄖𑄬𑄚, 𑄝𑄦𑄪𑄇𑄪𑄑𑄎𑄥𑄣𑄴𑄣𑄇𑄨𑄇𑄬𑄚 [𑄥𑄣𑄴𑄣𑄇𑄨𑄖𑄬𑄚 (𑄥𑄩.), 𑄥𑄣𑄴𑄣𑄢𑄨𑄇𑄬𑄚 (𑄥𑄴𑄡𑄧.)];

𑄚𑄬𑄥𑄧𑄘𑄇𑄬𑄚 𑄉𑄨𑄢𑄨𑄚𑄧, 𑄡𑄥𑄥𑄴𑄥𑄨𑄚𑄧 𑄛𑄢𑄨𑄌𑄴𑄍𑄘𑄬𑄚𑄧’’𑄖𑄨.

… 𑄟𑄦𑄧𑄚𑄧𑄟𑄮 𑄗𑄬𑄢𑄮….

𑄼. 𑄛𑄧𑄢𑄧𑄛𑄢𑄨𑄡𑄖𑄴𑄗𑄬𑄢𑄉𑄧𑄗𑄧

𑄷𑄷𑄼. ‘‘𑄍𑄜𑄥𑄴𑄥𑄧𑄡𑄖𑄚𑄬 𑄦𑄨𑄖𑄴𑄤𑄧, 𑄉𑄪𑄖𑄴𑄖𑄘𑄴𑄤𑄧𑄢𑄮 𑄥𑄪𑄥𑄁𑄤𑄪𑄖𑄮;

𑄃𑄊𑄟𑄫𑄣𑄁 𑄤𑄟𑄨𑄖𑄴𑄤𑄧𑄚, 𑄛𑄖𑄴𑄖𑄮 𑄟𑄬 𑄃𑄂𑄥𑄤𑄇𑄴𑄈𑄡𑄮’’𑄖𑄨.

… 𑄛𑄧𑄢𑄧𑄛𑄢𑄨𑄡𑄮 [𑄛𑄧𑄢𑄧𑄥𑄢𑄨𑄡𑄮 (𑄥𑄩.), 𑄛𑄧𑄢𑄁𑄛𑄢𑄨𑄡𑄮 (𑄇.)] 𑄗𑄬𑄢𑄮 ….

𑄽. 𑄡𑄥𑄖𑄴𑄗𑄬𑄢𑄉𑄧𑄗𑄧

𑄷𑄷𑄽. ‘‘𑄥𑄪𑄤𑄨𑄣𑄨𑄖𑄴𑄖𑄮 𑄥𑄪𑄤𑄥𑄚𑄮,𑄥𑄝𑄴𑄝𑄧𑄞𑄢𑄕𑄞𑄫𑄥𑄨𑄖𑄮;

𑄖𑄨𑄥𑄴𑄥𑄮 𑄤𑄨𑄎𑄴𑄎𑄧 𑄃𑄎𑄴𑄏𑄉𑄟𑄨𑄁, 𑄇𑄖𑄁 𑄝𑄪𑄘𑄴𑄙𑄥𑄴𑄥 𑄥𑄧𑄥𑄚’’𑄚𑄴𑄖𑄨.

… 𑄡𑄥𑄮 𑄗𑄬𑄢𑄮….

𑄾. 𑄇𑄨𑄟𑄨𑄣𑄖𑄴𑄗𑄬𑄢𑄉𑄧𑄗𑄧

𑄷𑄷𑄾. ‘‘𑄃𑄞𑄨𑄥𑄖𑄴𑄖𑄮𑄤 𑄚𑄨𑄛𑄖𑄖𑄨, 𑄤𑄡𑄮 𑄢𑄫𑄛𑄁 𑄃𑄐𑄴𑄐𑄟𑄨𑄤 𑄖𑄗𑄬𑄤 𑄥𑄚𑄴𑄖𑄁;

𑄖𑄥𑄴𑄥𑄬𑄤 𑄥𑄖𑄮 𑄃𑄤𑄨𑄛𑄴𑄛𑄤𑄥𑄖𑄮, 𑄃𑄐𑄴𑄐𑄥𑄴𑄥𑄬𑄤 𑄥𑄢𑄧𑄟𑄨 𑄃𑄖𑄴𑄖𑄧𑄚’’𑄚𑄴𑄖𑄨.

… 𑄇𑄨𑄟𑄨𑄣𑄮 [𑄇𑄨𑄟𑄴𑄝𑄨𑄣𑄮 (𑄥𑄩. 𑄥𑄴𑄡𑄧.)] 𑄗𑄬𑄢𑄮….

𑄿. 𑄤𑄎𑄴𑄎𑄨𑄛𑄪𑄖𑄴𑄖𑄖𑄴𑄗𑄬𑄢𑄉𑄧𑄗𑄧

𑄷𑄷𑄿. ‘‘𑄢𑄪𑄇𑄴𑄈𑄟𑄫𑄣𑄉𑄦𑄚𑄁 𑄛𑄥𑄇𑄴𑄇𑄨𑄡, 𑄚𑄨𑄝𑄴𑄝𑄧𑄚𑄁 𑄦𑄘𑄡𑄥𑄴𑄟𑄨𑄁 𑄃𑄮𑄛𑄨𑄡;

𑄏𑄧𑄡 𑄉𑄮𑄖𑄟 𑄟𑄧 𑄌 𑄛𑄟𑄧𑄘𑄮, 𑄇𑄨𑄁 𑄖𑄬 𑄝𑄨𑅄𑄨𑄝𑄨𑅄𑄨𑄇𑄧 𑄇𑄢𑄨𑄥𑄴𑄥𑄖𑄩’’𑄖𑄨.

… 𑄤𑄎𑄴𑄎𑄨𑄛𑄪𑄖𑄴𑄖𑄮 𑄗𑄬𑄢𑄮….

𑄷𑄶. 𑄄𑄥𑄨𑄘𑄖𑄴𑄖𑄖𑄴𑄗𑄬𑄢𑄉𑄧𑄗𑄧

𑄷𑄸𑄶. ‘‘𑄛𑄐𑄴𑄌𑄇𑄴𑄈𑄚𑄴𑄙𑄧 𑄛𑄢𑄨𑄐𑄴𑄐𑄧𑄖𑄧, 𑄖𑄨𑄑𑄴𑄒𑄚𑄴𑄖𑄨 𑄍𑄨𑄚𑄴𑄚𑄟𑄫𑄣𑄇𑄧;

𑄘𑄪𑄇𑄴𑄈𑄇𑄴𑄈𑄡𑄮 𑄃𑄚𑄪𑄛𑄴𑄛𑄖𑄴𑄖𑄮,𑄛𑄖𑄴𑄖𑄮 𑄟𑄬 𑄃𑄂𑄥𑄤𑄇𑄴𑄈𑄡𑄮’’𑄖𑄨.

… 𑄄𑄥𑄨𑄘𑄖𑄴𑄖𑄮 𑄗𑄬𑄢𑄮….

𑄤𑄉𑄴𑄉𑄮 𑄘𑄴𑄤𑄧𑄘𑄥𑄟𑄮 𑄚𑄨𑄑𑄴𑄒𑄨𑄖𑄮.

𑄖𑄥𑄴𑄥𑄪𑄘𑄴𑄘𑄧𑄚𑄁 –

𑄎𑄬𑄚𑄴𑄖𑄮 𑄌 𑄤𑄌𑄴𑄍𑄉𑄮𑄖𑄴𑄖𑄮 𑄌, 𑄤𑄌𑄴𑄍𑄮 𑄌 𑄤𑄚𑄥𑄤𑄴𑄦𑄡𑄮;

𑄃𑄙𑄨𑄟𑄪𑄖𑄴𑄖𑄮 𑄟𑄦𑄧𑄚𑄧𑄟𑄮, 𑄛𑄧𑄢𑄧𑄛𑄢𑄨𑄡𑄮 𑄡𑄥𑄮𑄛𑄨 𑄌;

𑄇𑄨𑄟𑄨𑄣𑄮 𑄤𑄎𑄴𑄎𑄨𑄛𑄪𑄖𑄴𑄖𑄮 𑄌, 𑄄𑄥𑄨𑄘𑄖𑄴𑄖𑄮 𑄟𑄦𑄧𑄡𑄥𑄮𑄖𑄨.

𑄆𑄇𑄇𑄚𑄨𑄛𑄧𑄖𑄮 𑄚𑄨𑄑𑄴𑄒𑄨𑄖𑄮.