𑄺. 𑄟𑄋𑄴𑄉𑄣𑄥𑄪𑄖𑄴𑄖𑄁

𑄆𑄤𑄁 𑄟𑄬 𑄥𑄪𑄖𑄁 – 𑄆𑄇𑄁 𑄥𑄟𑄡𑄁 𑄞𑄉𑄤𑄧 𑄥𑄧𑄤𑄖𑄴𑄗𑄨𑄡𑄁 𑄤𑄨𑄦𑄢𑄖𑄨 𑄎𑄬𑄖𑄤𑄚𑄬 𑄃𑄚𑄧𑄗𑄛𑄨𑄕𑄴𑄓𑄨𑄇𑄥𑄴𑄥 𑄃𑄂𑄢𑄧𑄟𑄬. 𑄃𑄗 𑄈𑄮 𑄃𑄐𑄴𑄐𑄖𑄢𑄧 𑄘𑄬𑄤𑄖𑄧 𑄃𑄞𑄨𑄇𑄴𑄇𑄚𑄴𑄖𑄧𑄡 𑄢𑄖𑄴𑄖𑄨𑄡𑄧 𑄃𑄞𑄨𑄇𑄴𑄇𑄚𑄴𑄖𑄤𑄕𑄴𑄕𑄧 𑄇𑄬𑄤𑄣𑄇𑄛𑄴𑄛𑄁 𑄎𑄬𑄖𑄤𑄚𑄁 𑄃𑄮𑄞𑄧𑄥𑄬𑄖𑄴𑄤𑄧 𑄡𑄬𑄚 𑄞𑄉𑄤𑄧 𑄖𑄬𑄚𑄪𑄛𑄥𑄋𑄴𑄇𑄟𑄨; 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄞𑄉𑄤𑄚𑄴𑄖𑄁 𑄃𑄞𑄨𑄤𑄧𑄘𑄬𑄖𑄴𑄤𑄧 𑄆𑄇𑄟𑄚𑄴𑄖𑄁 𑄃𑄑𑄴𑄒𑄧𑄥𑄨. 𑄆𑄇𑄟𑄚𑄴𑄖𑄁 𑄒𑄨𑄖𑄧 𑄈𑄮 𑄥𑄧 𑄘𑄬𑄤𑄖𑄧 𑄞𑄉𑄤𑄚𑄴𑄖𑄁 𑄉𑄧𑄗𑄧𑄡 𑄃𑄎𑄴𑄏𑄞𑄧𑄥𑄨 –

𑄸𑄼𑄷. ‘‘𑄝𑄦𑄫 𑄘𑄬𑄤𑄧 𑄟𑄚𑄪𑄥𑄴𑄥𑄧 𑄌, 𑄟𑄋𑄴𑄉𑄣𑄧𑄚𑄨 𑄃𑄌𑄨𑄚𑄴𑄖𑄡𑄪𑄁;

𑄃𑄂𑄇𑄋𑄴𑄈𑄟𑄧𑄚𑄧 𑄥𑄮𑄖𑄴𑄗𑄧𑄚𑄁, 𑄝𑄴𑄢𑄫𑄦𑄨 𑄟𑄋𑄴𑄉𑄣𑄟𑄪𑄖𑄴𑄖𑄟𑄁’’.

𑄸𑄼𑄸. ‘‘𑄃𑄥𑄬𑄤𑄚𑄧 𑄌 𑄝𑄧𑄣𑄧𑄚𑄁, 𑄛𑄕𑄴𑄓𑄨𑄖𑄧𑄚𑄐𑄴𑄌 𑄥𑄬𑄤𑄚𑄧;

𑄛𑄫𑄎𑄧 𑄌 𑄛𑄫𑄎𑄚𑄬𑄡𑄴𑄡𑄧𑄚𑄁 [𑄛𑄫𑄎𑄚𑄩𑄡𑄧𑄚𑄁 (𑄥𑄩. 𑄥𑄴𑄡𑄧. 𑄇𑄁. 𑄛𑄩.)], 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄹. ‘‘𑄛𑄖𑄨𑄢𑄫𑄛𑄘𑄬𑄥𑄤𑄧𑄥𑄮 𑄌, 𑄛𑄪𑄝𑄴𑄝𑄬 𑄌 𑄇𑄖𑄛𑄪𑄐𑄴𑄐𑄖𑄧;

𑄃𑄖𑄴𑄖𑄥𑄟𑄴𑄟𑄧𑄛𑄕𑄨𑄙𑄨 [𑄃𑄖𑄴𑄖𑄥𑄟𑄴𑄟𑄧𑄛𑄕𑄩𑄙𑄩 (𑄇𑄖𑄴𑄗𑄌𑄨)] 𑄌, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄺. ‘‘𑄝𑄧𑄦𑄪𑄥𑄌𑄴𑄌𑄐𑄴𑄌 𑄥𑄨𑄛𑄴𑄛𑄐𑄴𑄌, 𑄤𑄨𑄚𑄡𑄮 𑄌 𑄥𑄪𑄥𑄨𑄇𑄴𑄈𑄨𑄖𑄮;

𑄥𑄪𑄞𑄧𑄥𑄨𑄖𑄧 𑄌 𑄡𑄧 𑄤𑄧𑄌𑄧, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄻. ‘‘𑄟𑄧𑄖𑄧𑄛𑄨𑄖𑄪 𑄅𑄛𑄑𑄴𑄒𑄧𑄚𑄁, 𑄛𑄪𑄖𑄴𑄖𑄘𑄧𑄢𑄥𑄴𑄥 𑄥𑄋𑄴𑄉𑄦𑄮;

𑄃𑄚𑄧𑄇𑄪𑄣𑄧 𑄌 𑄇𑄟𑄴𑄟𑄚𑄴𑄖𑄧, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄼. ‘‘𑄘𑄧𑄚𑄐𑄴𑄌 𑄙𑄟𑄴𑄟𑄌𑄢𑄨𑄡𑄧 𑄌, 𑄐𑄧𑄖𑄇𑄧𑄚𑄐𑄴𑄌 𑄥𑄋𑄴𑄉𑄦𑄮;

𑄃𑄚𑄤𑄎𑄴𑄎𑄧𑄚𑄨 𑄇𑄟𑄴𑄟𑄧𑄚𑄨, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄽. ‘‘𑄃𑄂𑄢𑄖𑄩 𑄤𑄨𑄢𑄖𑄩 𑄛𑄧𑄛𑄧, 𑄟𑄎𑄴𑄎𑄛𑄧𑄚𑄧 𑄌 𑄥𑄁𑄡𑄟𑄮;

𑄃𑄛𑄴𑄛𑄟𑄧𑄘𑄮 𑄌 𑄙𑄟𑄴𑄟𑄬𑄥𑄪, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄾. ‘‘𑄉𑄧𑄢𑄤𑄮 𑄌 𑄚𑄨𑄤𑄧𑄖𑄮 𑄌, 𑄥𑄚𑄴𑄖𑄪𑄑𑄴𑄒𑄨 𑄌 𑄇𑄖𑄐𑄴𑄐𑄪𑄖𑄧;

𑄇𑄧𑄣𑄬𑄚 𑄙𑄟𑄴𑄟𑄥𑄴𑄥𑄤𑄚𑄁 [𑄙𑄟𑄴𑄟𑄥𑄤𑄕𑄁 (𑄇𑄖𑄴𑄗𑄌𑄨), 𑄙𑄟𑄴𑄟𑄥𑄤𑄚𑄁 (𑄥𑄩. 𑄇.)], 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄼𑄿. ‘‘𑄈𑄚𑄴𑄖𑄩 𑄌 𑄥𑄮𑄤𑄌𑄥𑄴𑄥𑄖𑄧, 𑄥𑄟𑄕𑄧𑄚𑄐𑄴𑄌 𑄘𑄥𑄴𑄥𑄚𑄁;

𑄇𑄧𑄣𑄬𑄚 𑄙𑄟𑄴𑄟𑄥𑄧𑄇𑄌𑄴𑄍𑄧, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄽𑄶. ‘‘𑄖𑄛𑄮 𑄌 𑄝𑄴𑄢𑄦𑄴𑄟𑄌𑄢𑄨𑄡𑄐𑄴𑄌, 𑄃𑄢𑄨𑄡𑄥𑄌𑄴𑄌𑄧𑄚 𑄘𑄥𑄴𑄥𑄚𑄁;

𑄚𑄨𑄝𑄴𑄝𑄧𑄚𑄥𑄌𑄴𑄍𑄨𑄇𑄨𑄢𑄨𑄡𑄧 𑄌, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄽𑄷. ‘‘𑄜𑄪𑄑𑄴𑄒𑄥𑄴𑄥 𑄣𑄮𑄇𑄙𑄟𑄴𑄟𑄬𑄦𑄨, 𑄌𑄨𑄖𑄴𑄖𑄁 𑄡𑄥𑄴𑄥 𑄚 𑄇𑄟𑄴𑄛𑄖𑄨;

𑄃𑄥𑄮𑄇𑄁 𑄤𑄨𑄢𑄎𑄁 𑄈𑄬𑄟𑄁, 𑄆𑄖𑄁 𑄟𑄋𑄴𑄉𑄣𑄟𑄪𑄖𑄴𑄖𑄟𑄁.

𑄸𑄽𑄸. ‘‘𑄆𑄖𑄧𑄘𑄨𑄥𑄧𑄚𑄨 𑄇𑄖𑄴𑄤𑄧𑄚, 𑄥𑄝𑄴𑄝𑄖𑄴𑄗𑄟𑄛𑄢𑄧𑄎𑄨𑄖𑄧;

𑄥𑄝𑄴𑄝𑄖𑄴𑄗 𑄥𑄮𑄖𑄴𑄗𑄨𑄁 𑄉𑄌𑄴𑄍𑄚𑄴𑄖𑄨, 𑄖𑄁 𑄖𑄬𑄥𑄁 𑄟𑄋𑄴𑄉𑄣𑄟𑄪𑄖𑄴𑄖𑄟’’𑄚𑄴𑄖𑄨.

𑄟𑄋𑄴𑄉𑄣𑄥𑄪𑄖𑄴𑄖𑄁 𑄌𑄖𑄪𑄖𑄴𑄗𑄁 𑄚𑄨𑄑𑄴𑄒𑄨𑄖𑄁.