𑄚𑄟𑄮 𑄖𑄥𑄴𑄥 𑄞𑄉𑄤𑄖𑄮 𑄃𑄢𑄦𑄖𑄮 𑄥𑄟𑄴𑄟𑄧𑄥𑄟𑄴𑄝𑄪𑄘𑄴𑄙𑄥𑄴𑄥

𑄟𑄎𑄴𑄏𑄨𑄟𑄚𑄨𑄇𑄧𑄡𑄬

𑄅𑄛𑄢𑄨𑄛𑄕𑄴𑄕𑄧𑄥-𑄃𑄑𑄴𑄒𑄇𑄗𑄧

𑄷. 𑄘𑄬𑄤𑄘𑄦𑄤𑄉𑄴𑄉𑄮

𑄷. 𑄘𑄬𑄤𑄘𑄦𑄥𑄪𑄖𑄴𑄖𑄤𑄕𑄴𑄕𑄚𑄧

𑄷. 𑄆𑄤𑄁 𑄟𑄬 𑄥𑄪𑄖𑄚𑄴𑄖𑄨 𑄘𑄬𑄤𑄘𑄦𑄥𑄪𑄖𑄴𑄖𑄁. 𑄖𑄖𑄴𑄗 𑄘𑄬𑄤𑄘𑄦𑄁 𑄚𑄧𑄟𑄧𑄖𑄨 𑄘𑄬𑄤𑄧 𑄤𑄪𑄌𑄴𑄌𑄚𑄴𑄖𑄨 𑄢𑄧𑄎𑄧𑄚𑄮, 𑄖𑄖𑄴𑄗 𑄌 𑄥𑄇𑄴𑄡𑄢𑄧𑄎𑄫𑄚𑄁 𑄟𑄋𑄴𑄉𑄣𑄛𑄮𑄇𑄴𑄈𑄢𑄕𑄩 𑄃𑄦𑄮𑄥𑄨 𑄛𑄧𑄥𑄧𑄘𑄨𑄇𑄧 𑄃𑄂𑄢𑄇𑄴𑄈𑄥𑄟𑄴𑄛𑄚𑄴𑄚𑄧, 𑄥𑄧 𑄘𑄬𑄤𑄧𑄚𑄁 𑄘𑄦𑄖𑄴𑄖𑄧 ‘‘𑄘𑄬𑄤𑄘𑄦’’𑄚𑄴𑄖𑄨 𑄛𑄐𑄴𑄐𑄧𑄡𑄨𑄖𑄴𑄗. 𑄖𑄘𑄪𑄛𑄧𑄘𑄧𑄡 𑄥𑄮𑄛𑄨 𑄚𑄨𑄉𑄟𑄮 𑄘𑄬𑄤𑄘𑄦𑄚𑄴𑄖𑄴𑄤𑄬𑄤 𑄥𑄋𑄴𑄈𑄁 𑄉𑄖𑄮. 𑄞𑄉𑄤𑄧 𑄖𑄁 𑄚𑄨𑄉𑄟𑄁 𑄚𑄨𑄥𑄴𑄥𑄧𑄡 𑄣𑄪𑄟𑄴𑄝𑄨𑄚𑄨𑄤𑄚𑄬 𑄤𑄨𑄦𑄢𑄖𑄨. 𑄥𑄝𑄴𑄝𑄁 𑄖𑄁 𑄛𑄪𑄝𑄴𑄝𑄬𑄇𑄖𑄦𑄬𑄖𑄫𑄖𑄨 𑄛𑄪𑄝𑄴𑄝𑄬 𑄇𑄖𑄇𑄟𑄴𑄟𑄛𑄌𑄴𑄌𑄡𑄧. 𑄄𑄟𑄨𑄚𑄧 𑄇𑄟𑄴𑄟𑄤𑄬𑄘𑄚𑄐𑄴𑄌 𑄇𑄨𑄢𑄨𑄡𑄤𑄬𑄘𑄚𑄐𑄴𑄌 𑄛𑄑𑄨𑄇𑄴𑄈𑄨𑄛𑄨𑄖𑄴𑄤𑄧 𑄆𑄇𑄁 𑄤𑄨𑄛𑄧𑄇𑄤𑄬𑄘𑄚𑄟𑄬𑄤 𑄥𑄟𑄴𑄛𑄑𑄨𑄌𑄴𑄍𑄚𑄴𑄖𑄩𑄖𑄨 𑄘𑄥𑄴𑄥𑄬𑄖𑄨. 𑄆𑄤𑄁 𑄤𑄧𑄘𑄨𑄚𑄮, 𑄞𑄨𑄇𑄴𑄈𑄤𑄬, 𑄚𑄨𑄉𑄕𑄴𑄒𑄧𑄖𑄨 𑄄𑄟𑄨𑄚𑄧 𑄛𑄪𑄝𑄴𑄝𑄬 𑄃𑄚𑄨𑄡𑄟𑄬𑄖𑄴𑄤𑄧 𑄤𑄪𑄖𑄴𑄖𑄁 𑄚𑄨𑄡𑄟𑄬𑄖𑄴𑄤𑄧 𑄘𑄥𑄴𑄥𑄬𑄖𑄨.

𑄃𑄦𑄪𑄤𑄟𑄴𑄦𑄬𑄤 𑄟𑄡𑄚𑄴𑄖𑄨 𑄄𑄘𑄁 𑄞𑄉𑄤𑄧 𑄖𑄬𑄥𑄁 𑄃𑄎𑄧𑄚𑄚𑄞𑄧𑄤𑄁 𑄎𑄧𑄚𑄚𑄴𑄖𑄮𑄤 𑄇𑄬𑄤𑄣𑄁 𑄇𑄣𑄨𑄥𑄧𑄥𑄚𑄁 𑄃𑄂𑄢𑄮𑄛𑄬𑄖𑄪𑄇𑄧𑄟𑄮 𑄛𑄪𑄌𑄴𑄍𑄖𑄨. 𑄡𑄬 𑄦𑄨 ‘‘𑄟𑄡𑄁 𑄃𑄦𑄪𑄤𑄟𑄴𑄦𑄧’’𑄖𑄨𑄛𑄨 𑄚 𑄎𑄧𑄚𑄚𑄴𑄖𑄨, 𑄖𑄬 𑄇𑄗𑄁 𑄇𑄟𑄴𑄟𑄥𑄴𑄥 𑄇𑄖𑄞𑄧𑄤𑄁 𑄤𑄧 𑄃𑄇𑄖𑄞𑄧𑄤𑄁 𑄤𑄧 𑄎𑄧𑄚𑄨𑄥𑄴𑄥𑄚𑄴𑄖𑄨. 𑄅𑄖𑄴𑄖𑄢𑄨𑄛𑄪𑄌𑄴𑄍𑄧𑄡𑄛𑄨 𑄆𑄥𑄬𑄤 𑄚𑄡𑄮.

𑄸. 𑄆𑄤𑄁 𑄥𑄚𑄴𑄖𑄬𑄖𑄨 𑄌𑄫𑅄𑄘𑄪𑄇𑄴𑄈𑄇𑄴𑄈𑄚𑄴𑄙𑄬 (𑄟. 𑄚𑄨. 𑄷.𑄷𑄽𑄿-𑄷𑄾𑄶) 𑄟𑄦𑄧𑄚𑄨𑄉𑄕𑄴𑄒𑄥𑄴𑄥 𑄤𑄌𑄚𑄬 𑄥𑄌𑄴𑄌𑄬 𑄥𑄚𑄴𑄖𑄬𑄖𑄨 𑄃𑄖𑄴𑄗𑄮, 𑄄𑄙 𑄛𑄚 𑄆𑄖𑄴𑄖𑄇𑄥𑄴𑄥 𑄒𑄧𑄚𑄥𑄴𑄥 𑄖𑄪𑄟𑄴𑄦𑄧𑄇𑄁 𑄃𑄎𑄧𑄚𑄚𑄞𑄧𑄤𑄬 𑄥𑄚𑄴𑄖𑄬𑄖𑄨 𑄃𑄖𑄴𑄗𑄮. 𑄚 𑄇𑄣𑄴𑄣𑄚𑄴𑄖𑄨 𑄚 𑄡𑄪𑄖𑄴𑄖𑄁.

𑄹. 𑄉𑄧𑅄𑄴𑄦𑄫𑄛𑄣𑄬𑄛𑄚𑄬𑄚𑄧𑄖𑄨 𑄝𑄦𑄣𑄫𑄛𑄣𑄬𑄛𑄚𑄬𑄚, 𑄛𑄪𑄚𑄛𑄴𑄛𑄪𑄚𑄁 𑄤𑄨𑄥𑄢𑄐𑄴𑄎𑄨𑄖𑄬𑄚, 𑄚 𑄛𑄚 𑄈𑄣𑄨𑄡𑄧 𑄣𑄨𑄖𑄴𑄖𑄬𑄚 𑄤𑄨𑄡. 𑄆𑄥𑄚𑄨𑄡𑄧𑄖𑄨 𑄆𑄥𑄚𑄨𑄥𑄣𑄧𑄇𑄧𑄡 𑄃𑄚𑄴𑄖𑄟𑄥𑄮 𑄚𑄚𑄴𑄖𑄇𑄤𑄑𑄴𑄑𑄨𑄡𑄧𑄛𑄨. 𑄆𑄥𑄬𑄡𑄴𑄡𑄧𑄖𑄨 𑄉𑄟𑄴𑄞𑄩𑄢𑄁 𑄤𑄧 𑄅𑄖𑄴𑄖𑄧𑄚𑄁 𑄤𑄧𑄖𑄨 𑄤𑄩𑄟𑄁𑄥𑄬𑄡𑄴𑄡. 𑄃𑄉𑄘𑄋𑄴𑄉𑄧𑄢𑄚𑄴𑄖𑄨 𑄏𑄧𑄟𑄦𑄢𑄩𑄖𑄇𑄥𑄴𑄥 𑄤𑄧 𑄃𑄂𑄟𑄣𑄇𑄥𑄴𑄥 𑄤𑄧 𑄌𑄪𑄕𑄴𑄕𑄁. 𑄃𑄮𑄘𑄦𑄬𑄡𑄴𑄡𑄧𑄖𑄨 𑄛𑄇𑄴𑄈𑄨𑄛𑄬𑄡𑄴𑄡. 𑄃𑄢𑄮𑄉𑄮𑄖𑄨𑄃𑄂𑄘𑄨 𑄟𑄧𑄉𑄕𑄴𑄓𑄨𑄡𑄥𑄪𑄖𑄴𑄖𑄬 (𑄟. 𑄚𑄨. 𑄸.𑄸𑄷𑄹) 𑄤𑄪𑄖𑄴𑄖𑄟𑄬𑄤.

𑄆𑄤𑄟𑄬𑄤 𑄈𑄮𑄖𑄨 𑄆𑄖𑄴𑄗 𑄄𑄘𑄁 𑄃𑄮𑄛𑄟𑄴𑄟𑄥𑄁𑄥𑄚𑄴𑄘𑄚𑄁, 𑄥𑄣𑄴𑄣𑄬𑄚 𑄤𑄨𑄘𑄴𑄙𑄥𑄴𑄥 𑄦𑄨 𑄤𑄨𑄘𑄴𑄙𑄇𑄧𑄣𑄬 𑄤𑄬𑄘𑄚𑄧𑄡 𑄛𑄧𑄇𑄑𑄇𑄧𑄣𑄮 𑄤𑄨𑄡 𑄄𑄟𑄬𑄥𑄁 ‘‘𑄟𑄡𑄁 𑄛𑄪𑄝𑄴𑄝𑄬 𑄃𑄦𑄪𑄤𑄟𑄴𑄦𑄧 𑄤𑄧 𑄚𑄮 𑄤𑄧, 𑄛𑄧𑄛𑄇𑄟𑄴𑄟𑄁 𑄃𑄇𑄢𑄟𑄴𑄦𑄧 𑄤𑄧 𑄚𑄮 𑄤𑄧, 𑄆𑄤𑄢𑄫𑄛𑄁 𑄤𑄧 𑄛𑄧𑄛𑄁 𑄇𑄢𑄟𑄴𑄦𑄧’’𑄖𑄨 𑄎𑄧𑄚𑄚𑄇𑄧𑄣𑄮 𑄥𑄨𑄡𑄧. 𑄤𑄕𑄟𑄪𑄈𑄥𑄴𑄥 𑄛𑄢𑄨𑄇𑄚𑄴𑄖𑄚𑄧𑄘𑄩𑄥𑄪 𑄌𑄖𑄫𑄥𑄪 𑄇𑄧𑄣𑄬𑄥𑄪 𑄤𑄬𑄘𑄚𑄧𑄡 𑄛𑄧𑄇𑄑𑄇𑄧𑄣𑄮 𑄤𑄨𑄡 ‘‘𑄆𑄖𑄴𑄖𑄇𑄁 𑄤𑄧 𑄚𑄮 𑄘𑄪𑄇𑄴𑄈𑄁 𑄚𑄨𑄎𑄴𑄎𑄨𑄕𑄴𑄕𑄁, 𑄆𑄖𑄴𑄖𑄇𑄬 𑄤𑄧 𑄚𑄨𑄎𑄴𑄎𑄨𑄕𑄴𑄕𑄬 𑄥𑄝𑄴𑄝𑄟𑄬𑄤 𑄘𑄪𑄇𑄴𑄈𑄁 𑄚𑄨𑄎𑄴𑄎𑄨𑄕𑄴𑄕𑄁 𑄞𑄤𑄨𑄥𑄴𑄥𑄖𑄨, 𑄥𑄪𑄘𑄴𑄙𑄚𑄴𑄖𑄬 𑄛𑄖𑄨𑄑𑄴𑄒𑄨𑄖𑄧 𑄚𑄧𑄟 𑄞𑄤𑄨𑄥𑄴𑄥𑄧𑄟𑄧’’𑄖𑄨 𑄎𑄧𑄚𑄚𑄇𑄧𑄣𑄮 𑄥𑄨𑄡𑄧. 𑄃𑄛𑄢𑄞𑄧𑄉𑄬 𑄜𑄧𑄥𑄪𑄞𑄧𑄤𑄎𑄧𑄚𑄚𑄇𑄧𑄣𑄮 𑄤𑄨𑄡 𑄘𑄨𑄑𑄴𑄒𑄬𑄤 𑄙𑄟𑄴𑄟𑄬 𑄃𑄇𑄪𑄥𑄣𑄧𑄚𑄁 𑄙𑄟𑄴𑄟𑄧𑄚𑄁 𑄛𑄦𑄧𑄚𑄧𑄡 𑄇𑄪𑄥𑄣𑄧𑄚𑄁 𑄙𑄟𑄴𑄟𑄧𑄚𑄁 𑄅𑄛𑄥𑄟𑄴𑄛𑄘𑄧𑄡 𑄎𑄧𑄚𑄚𑄇𑄧𑄣𑄮 𑄥𑄨𑄡𑄧. 𑄆𑄤𑄟𑄬𑄖𑄴𑄗 𑄆𑄇𑄧𑄡 𑄅𑄛𑄟𑄧𑄡 𑄖𑄡𑄮 𑄃𑄖𑄴𑄗𑄧, 𑄌𑄖𑄫𑄦𑄨 𑄅𑄛𑄟𑄧𑄦𑄨 𑄆𑄇𑄮 𑄃𑄖𑄴𑄗𑄮 𑄛𑄢𑄨𑄘𑄩𑄛𑄨𑄖𑄮.

𑄺. 𑄄𑄟𑄬 𑄛𑄚 𑄖𑄖𑄮 𑄆𑄇𑄟𑄴𑄛𑄨 𑄚 𑄎𑄧𑄚𑄚𑄴𑄖𑄨, 𑄤𑄨𑄢𑄎𑄴𑄏𑄨𑄖𑄴𑄤𑄧 𑄉𑄖𑄬 𑄥𑄣𑄴𑄣𑄬 𑄃𑄤𑄨𑄘𑄴𑄙𑄮𑄤 ‘‘𑄤𑄨𑄘𑄴𑄙𑄮𑄥𑄨 𑄟𑄡𑄧’’𑄖𑄨 𑄛𑄌𑄴𑄌𑄖𑄴𑄗𑄨𑄇𑄥𑄴𑄥 𑄤𑄌𑄚𑄛𑄴𑄛𑄟𑄧𑄕𑄬𑄚𑄬𑄤 ‘‘𑄤𑄨𑄘𑄴𑄙𑄮𑄥𑄴𑄟𑄩’’𑄖𑄨 𑄥𑄐𑄴𑄐𑄁 𑄅𑄛𑄴𑄛𑄧𑄘𑄬𑄖𑄴𑄤𑄧 𑄘𑄪𑄇𑄴𑄈𑄛𑄴𑄛𑄖𑄴𑄖𑄛𑄪𑄢𑄨𑄥𑄮 𑄤𑄨𑄡 𑄇𑄬𑄤𑄣𑄁 𑄟𑄦𑄧𑄚𑄨𑄉𑄕𑄴𑄒𑄥𑄴𑄥 𑄤𑄌𑄚𑄛𑄴𑄛𑄟𑄧𑄕𑄬𑄚 𑄥𑄝𑄴𑄝𑄟𑄬𑄖𑄁 𑄥𑄘𑄴𑄘𑄦𑄚𑄴𑄖𑄧 𑄆𑄤𑄁 𑄥𑄣𑄴𑄣𑄮𑄛𑄟𑄧𑄡 𑄞𑄉𑄤𑄖𑄧 𑄚𑄨𑄉𑄴𑄉𑄦𑄨𑄖𑄧 𑄛𑄌𑄴𑄌𑄧𑄦𑄢𑄨𑄖𑄪𑄁 𑄃𑄥𑄇𑄴𑄇𑄮𑄚𑄴𑄖𑄧 𑄡𑄗𑄧 𑄚𑄧𑄟 𑄘𑄪𑄝𑄴𑄝𑄣𑄮 𑄥𑄪𑄚𑄈𑄮 𑄟𑄨𑄉𑄁 𑄅𑄑𑄴𑄒𑄧𑄛𑄬𑄖𑄴𑄤𑄧 𑄥𑄧𑄟𑄨𑄇𑄥𑄴𑄥 𑄃𑄞𑄨𑄟𑄪𑄈𑄁 𑄇𑄢𑄨𑄖𑄴𑄤𑄧 𑄃𑄖𑄴𑄖𑄚𑄧 𑄃𑄮𑄥𑄇𑄴𑄇𑄖𑄨, 𑄆𑄤𑄁 𑄟𑄦𑄧𑄚𑄨𑄉𑄕𑄴𑄒𑄥𑄴𑄥 𑄟𑄖𑄴𑄗𑄇𑄬 𑄤𑄧𑄘𑄁 𑄛𑄇𑄴𑄈𑄨𑄛𑄚𑄴𑄖𑄧 𑄚𑄨𑄉𑄕𑄴𑄒𑄮, 𑄃𑄂𑄤𑄪𑄥𑄮𑄖𑄨𑄃𑄂𑄘𑄩𑄟𑄧𑄦𑄁𑄥𑄪.

𑄻. 𑄃𑄗 𑄚𑄬 𑄞𑄉𑄤𑄧 𑄥𑄧𑄌𑄢𑄨𑄡𑄇𑄬 𑄚𑄨𑄉𑄴𑄉𑄕𑄴𑄦𑄚𑄴𑄖𑄮 𑄛𑄐𑄴𑄌 𑄈𑄮 𑄄𑄟𑄬𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄢𑄧𑄡𑄥𑄴𑄟𑄚𑄴𑄖𑄧𑄚𑄚𑄴𑄖𑄨 𑄖𑄬𑄥𑄪 𑄛𑄐𑄴𑄌𑄥𑄪 𑄙𑄟𑄴𑄟𑄬𑄥𑄪 𑄃𑄂𑄡𑄥𑄴𑄟𑄚𑄴𑄖𑄧𑄚𑄁. 𑄇𑄧 𑄃𑄖𑄩𑄖𑄁𑄥𑄬 𑄥𑄖𑄴𑄗𑄢𑄨 𑄥𑄘𑄴𑄙𑄧𑄖𑄨 𑄃𑄖𑄩𑄖𑄁𑄥𑄤𑄧𑄘𑄨𑄟𑄴𑄦𑄨 𑄥𑄖𑄴𑄗𑄢𑄨 𑄇𑄧 𑄥𑄘𑄴𑄙𑄧. 𑄡𑄧 𑄃𑄖𑄩𑄖𑄤𑄧𑄘𑄁 𑄥𑄘𑄴𑄘𑄦𑄚𑄴𑄖𑄧𑄚𑄁 𑄖𑄪𑄟𑄴𑄦𑄧𑄇𑄁 𑄟𑄦𑄧𑄚𑄨𑄉𑄕𑄴𑄒𑄥𑄴𑄥 𑄥𑄘𑄴𑄙𑄧, 𑄥𑄧 𑄇𑄖𑄟𑄧? 𑄇𑄨𑄁 𑄞𑄫𑄖𑄖𑄴𑄗𑄧 𑄃𑄞𑄫𑄖𑄖𑄴𑄗𑄧, 𑄞𑄫𑄖𑄤𑄨𑄛𑄧𑄇𑄧 𑄃𑄞𑄫𑄖𑄤𑄨𑄛𑄧𑄇𑄧𑄖𑄨 𑄛𑄪𑄌𑄴𑄍𑄖𑄨. 𑄥𑄬𑄥𑄛𑄘𑄬𑄥𑄪𑄛𑄨 𑄆𑄥𑄬𑄤 𑄚𑄡𑄮. 𑄥𑄦𑄙𑄟𑄴𑄟𑄨𑄇𑄚𑄴𑄖𑄨 𑄥𑄦𑄬𑄖𑄪𑄇𑄁 𑄥𑄇𑄧𑄢𑄕𑄁. 𑄤𑄧𑄘𑄛𑄑𑄨𑄦𑄧𑄢𑄚𑄴𑄖𑄨 𑄛𑄌𑄴𑄌𑄧𑄉𑄟𑄚𑄇𑄤𑄧𑄘𑄁. 𑄆𑄖𑄴𑄖𑄧𑄤𑄖𑄧 𑄖𑄬𑄥𑄁 ‘‘𑄃𑄛𑄚𑄬𑄗 𑄥𑄘𑄴𑄙𑄁, 𑄥𑄝𑄴𑄝𑄘𑄪𑄝𑄴𑄝𑄣𑄧 𑄆𑄥𑄧’’𑄖𑄨 𑄥𑄘𑄴𑄙𑄧𑄍𑄬𑄘𑄇𑄤𑄧𑄘𑄁 𑄚𑄧𑄟 𑄘𑄥𑄴𑄥𑄬𑄖𑄨.

𑄼. 𑄃𑄤𑄨𑄎𑄴𑄎𑄧 𑄃𑄐𑄴𑄐𑄧𑄕𑄧𑄖𑄨 𑄃𑄤𑄨𑄎𑄴𑄎𑄧𑄡 𑄃𑄐𑄴𑄐𑄧𑄕𑄬𑄚. 𑄥𑄟𑄴𑄟𑄮𑄦𑄧𑄖𑄨 𑄥𑄟𑄴𑄟𑄮𑄦𑄬𑄚. 𑄤𑄨𑄛𑄌𑄴𑄌𑄬𑄗𑄧𑄖𑄨 𑄤𑄨𑄛𑄢𑄩𑄖𑄖𑄮 𑄥𑄘𑄴𑄘𑄦𑄗, 𑄤𑄨𑄛𑄣𑄴𑄣𑄧𑄥𑄉𑄴𑄉𑄧𑄦𑄁 𑄤𑄧 𑄉𑄕𑄴𑄦𑄗𑄧𑄖𑄨 𑄃𑄖𑄴𑄗𑄮.

𑄽. 𑄘𑄨𑄑𑄴𑄒𑄙𑄟𑄴𑄟𑄤𑄬𑄘𑄚𑄩𑄡𑄚𑄴𑄖𑄨 𑄄𑄟𑄥𑄴𑄟𑄨𑄁𑄡𑄬𑄤 𑄃𑄖𑄴𑄖𑄞𑄧𑄤𑄬 𑄤𑄨𑄛𑄧𑄇𑄘𑄧𑄡𑄇𑄁. 𑄅𑄛𑄇𑄴𑄇𑄟𑄬𑄚𑄧𑄖𑄨 𑄛𑄡𑄮𑄉𑄬𑄚. 𑄛𑄙𑄧𑄚𑄬𑄚𑄧𑄖𑄨 𑄤𑄩𑄢𑄨𑄡𑄬𑄚. 𑄥𑄟𑄴𑄛𑄢𑄧𑄡𑄤𑄬𑄘𑄚𑄩𑄡𑄚𑄴𑄖𑄨 𑄘𑄪𑄖𑄨𑄡𑄬 𑄤𑄧 𑄖𑄖𑄨𑄡𑄬 𑄤𑄧 𑄃𑄖𑄴𑄖𑄞𑄧𑄤𑄬 𑄤𑄨𑄛𑄧𑄇𑄘𑄧𑄡𑄇𑄁. 𑄥𑄪𑄈𑄤𑄬𑄘𑄚𑄩𑄡𑄚𑄴𑄖𑄨 𑄄𑄑𑄴𑄒𑄧𑄢𑄟𑄴𑄟𑄕𑄤𑄨𑄛𑄧𑄇𑄘𑄧𑄡𑄇𑄁 𑄇𑄪𑄥𑄣𑄇𑄟𑄴𑄟𑄁. 𑄤𑄨𑄛𑄢𑄩𑄖𑄁 𑄘𑄪𑄇𑄴𑄈𑄤𑄬𑄘𑄚𑄩𑄡𑄁. 𑄛𑄢𑄨𑄛𑄇𑄴𑄇𑄤𑄬𑄘𑄚𑄩𑄡𑄚𑄴𑄖𑄨 𑄛𑄢𑄨𑄛𑄇𑄴𑄇𑄬 𑄚𑄨𑄛𑄴𑄜𑄚𑄴𑄚𑄬 𑄃𑄖𑄴𑄖𑄞𑄧𑄤𑄬 𑄤𑄬𑄘𑄚𑄩𑄡𑄁, 𑄘𑄨𑄑𑄴𑄒𑄙𑄟𑄴𑄟𑄤𑄬𑄘𑄚𑄩𑄡𑄥𑄴𑄥𑄬𑄤𑄬𑄖𑄁 𑄃𑄙𑄨𑄤𑄌𑄚𑄁. 𑄃𑄛𑄢𑄨𑄛𑄇𑄴𑄇𑄤𑄬𑄘𑄚𑄩𑄡𑄚𑄴𑄖𑄨 𑄃𑄛𑄢𑄨𑄛𑄇𑄴𑄇𑄬 𑄃𑄖𑄴𑄖𑄞𑄧𑄤𑄬 𑄤𑄬𑄘𑄚𑄩𑄡𑄁, 𑄥𑄟𑄴𑄛𑄢𑄧𑄡𑄤𑄬𑄘𑄚𑄩𑄡𑄥𑄴𑄥𑄬𑄤𑄬𑄖𑄁 𑄃𑄙𑄨𑄤𑄌𑄚𑄁. 𑄆𑄤𑄁 𑄥𑄚𑄴𑄖𑄬𑄛𑄨 𑄃𑄡𑄟𑄬𑄖𑄴𑄗 𑄤𑄨𑄥𑄬𑄥𑄮 – 𑄡𑄁 𑄛𑄒𑄟𑄤𑄡𑄬 𑄇𑄖𑄁 𑄛𑄒𑄟𑄤𑄡𑄬 𑄤𑄧 𑄟𑄎𑄴𑄏𑄨𑄟𑄤𑄡𑄬 𑄤𑄧 𑄛𑄌𑄴𑄍𑄨𑄟𑄤𑄡𑄬 𑄤𑄧 𑄤𑄨𑄛𑄧𑄇𑄁 𑄘𑄬𑄖𑄨, 𑄟𑄎𑄴𑄏𑄨𑄟𑄤𑄡𑄬 𑄇𑄖𑄁 𑄟𑄎𑄴𑄏𑄨𑄟𑄤𑄡𑄬 𑄤𑄧 𑄛𑄌𑄴𑄍𑄨𑄟𑄤𑄡𑄬 𑄤𑄧 𑄤𑄨𑄛𑄧𑄇𑄁 𑄘𑄬𑄖𑄨, 𑄛𑄌𑄴𑄍𑄨𑄟𑄤𑄡𑄬 𑄇𑄖𑄁 𑄖𑄖𑄴𑄗𑄬𑄤 𑄤𑄨𑄛𑄧𑄇𑄁 𑄘𑄬𑄖𑄨, 𑄖𑄁 𑄘𑄨𑄑𑄴𑄒𑄙𑄟𑄴𑄟𑄤𑄬𑄘𑄚𑄩𑄡𑄁 𑄚𑄧𑄟. 𑄡𑄁 𑄛𑄚 𑄥𑄖𑄴𑄖𑄘𑄨𑄤𑄥𑄝𑄴𑄞𑄚𑄴𑄖𑄢𑄬 𑄤𑄨𑄛𑄧𑄇𑄁 𑄘𑄬𑄖𑄨, 𑄖𑄁 𑄛𑄢𑄨𑄛𑄇𑄴𑄇𑄤𑄬𑄘𑄚𑄩𑄡𑄁 𑄚𑄧𑄟. 𑄖𑄁 𑄇𑄪𑄥𑄣𑄟𑄴𑄛𑄨 𑄦𑄮𑄖𑄨 𑄃𑄇𑄪𑄥𑄣𑄟𑄴𑄛𑄨.

𑄖𑄖𑄴𑄢𑄨𑄟𑄧𑄚𑄨 𑄤𑄖𑄴𑄗𑄫𑄚𑄨 – 𑄛𑄪𑄕𑄴𑄕𑄮 𑄚𑄧𑄟 𑄇𑄨𑄢 𑄘𑄪𑄉𑄴𑄉𑄖𑄟𑄚𑄪𑄥𑄴𑄥𑄮 𑄢𑄧𑄎𑄉𑄦𑄬 𑄥𑄪𑄟𑄚𑄥𑄬𑄑𑄴𑄒𑄨𑄁 𑄚𑄨𑄥𑄴𑄥𑄧𑄡 𑄤𑄥𑄖𑄨. 𑄖𑄟𑄬𑄚𑄁 𑄆𑄇𑄘𑄨𑄤𑄥𑄁 𑄚𑄉𑄢𑄟𑄴𑄦𑄨 𑄚𑄇𑄴𑄈𑄖𑄴𑄖𑄬 𑄥𑄋𑄴𑄊𑄪𑄑𑄴𑄒𑄬 𑄥𑄬𑄑𑄴𑄒𑄨 𑄃𑄂𑄦 – ‘‘𑄥𑄌𑄬 𑄃𑄎𑄴𑄎 𑄇𑄥𑄨𑄥𑄴𑄥𑄥𑄨, 𑄘𑄴𑄤𑄬 𑄌 𑄉𑄮𑄕𑄬 𑄚𑄋𑄴𑄉𑄣𑄐𑄴𑄌 𑄣𑄞𑄨𑄥𑄴𑄥𑄥𑄨. 𑄇𑄨𑄁 𑄚𑄇𑄴𑄈𑄖𑄴𑄖𑄁 𑄇𑄩𑅄𑄨𑄥𑄴𑄥𑄥𑄨, 𑄇𑄥𑄨𑄥𑄴𑄥𑄥𑄩’’𑄖𑄨. 𑄇𑄨𑄁 𑄟𑄬 𑄚𑄇𑄴𑄈𑄖𑄴𑄖𑄬𑄚, 𑄇𑄥𑄨𑄥𑄴𑄥𑄧𑄟𑄩𑄖𑄨? 𑄖𑄬𑄚 𑄦𑄨 𑄡𑄬 𑄉𑄮𑄕𑄬 𑄄𑄌𑄴𑄍𑄥𑄨, 𑄖𑄬 𑄉𑄦𑄬𑄖𑄴𑄤𑄧 𑄇𑄥𑄧𑄦𑄩𑄖𑄨. 𑄥𑄮 𑄇𑄥𑄨𑄖𑄪𑄁 𑄉𑄖𑄮. 𑄖𑄁 𑄘𑄨𑄤𑄥𑄁 𑄥𑄧𑄢𑄨𑄛𑄪𑄖𑄴𑄖𑄖𑄴𑄗𑄬𑄢𑄮 𑄚𑄨𑄢𑄮𑄙𑄧 𑄤𑄪𑄑𑄴𑄒𑄧𑄡 ‘‘𑄇𑄥𑄴𑄥 𑄥𑄋𑄴𑄉𑄦𑄁 𑄇𑄢𑄮𑄟𑄩’’𑄖𑄨? 𑄃𑄂𑄤𑄎𑄴𑄎𑄚𑄴𑄖𑄮 𑄛𑄪𑄕𑄴𑄕𑄁 𑄘𑄨𑄥𑄴𑄤𑄧 𑄛𑄖𑄴𑄖𑄌𑄩𑄤𑄢𑄁 𑄃𑄂𑄘𑄧𑄡 𑄖𑄥𑄴𑄥 𑄇𑄥𑄚𑄑𑄴𑄒𑄧𑄚𑄁 𑄉𑄖𑄮. 𑄛𑄪𑄕𑄴𑄕𑄮 𑄇𑄥𑄨𑄁 𑄒𑄛𑄬𑄖𑄴𑄤𑄧 𑄗𑄬𑄢𑄥𑄴𑄥 𑄘𑄚𑄴𑄖𑄇𑄑𑄴𑄒𑄁 𑄘𑄖𑄴𑄤𑄧 𑄟𑄪𑄈𑄮𑄘𑄇𑄁 𑄃𑄘𑄧𑄥𑄨. 𑄗𑄬𑄢𑄮 𑄥𑄢𑄩𑄢𑄁 𑄛𑄑𑄨𑄎𑄉𑄴𑄉𑄨𑄖𑄴𑄤𑄧 𑄇𑄟𑄴𑄟𑄚𑄴𑄖𑄥𑄴𑄥 𑄃𑄤𑄨𑄘𑄫𑄢𑄬 𑄚𑄨𑄥𑄩𑄘𑄨 𑄞𑄖𑄴𑄖𑄧𑄞𑄨𑄦𑄧𑄢𑄁 𑄃𑄮𑄣𑄮𑄇𑄬𑄚𑄴𑄖𑄮. 𑄃𑄗𑄥𑄴𑄥 𑄞𑄢𑄨𑄡𑄁 𑄞𑄖𑄴𑄖𑄁 𑄃𑄂𑄦𑄢𑄚𑄴𑄖𑄨𑄁 𑄘𑄨𑄥𑄴𑄤𑄧 𑄃𑄚𑄴𑄖𑄢𑄧𑄟𑄉𑄴𑄉𑄬𑄡𑄬𑄤 𑄃𑄖𑄴𑄖𑄧𑄚𑄁 𑄘𑄥𑄴𑄥𑄬𑄥𑄨.

𑄥𑄧 𑄥𑄧𑄟𑄨𑄇𑄥𑄴𑄥 𑄃𑄂𑄦𑄑𑄞𑄖𑄴𑄖𑄁 𑄗𑄬𑄢𑄥𑄴𑄥 𑄛𑄖𑄴𑄖𑄬 𑄛𑄇𑄴𑄈𑄨𑄛𑄨𑄖𑄴𑄤𑄧 𑄛𑄪𑄚 𑄉𑄚𑄴𑄖𑄴𑄤𑄧 𑄃𑄐𑄴𑄐𑄁 𑄞𑄖𑄴𑄖𑄁 𑄥𑄟𑄴𑄛𑄧𑄘𑄬𑄖𑄴𑄤𑄧 𑄘𑄨𑄤𑄧 𑄃𑄉𑄟𑄧𑄥𑄨. 𑄛𑄪𑄕𑄴𑄕𑄮 𑄆𑄇𑄤𑄧𑄢𑄁 𑄇𑄥𑄨𑄖𑄴𑄤𑄧 𑄚𑄨𑄥𑄩𑄘𑄨. 𑄥𑄧𑄛𑄨 𑄞𑄖𑄴𑄖𑄁 𑄉𑄦𑄬𑄖𑄴𑄤𑄧 𑄃𑄂𑄉𑄌𑄴𑄍𑄚𑄴𑄖𑄩 𑄃𑄂𑄦 – ‘‘𑄥𑄧𑄟𑄨 𑄛𑄧𑄖𑄮𑄤 𑄖𑄬 𑄞𑄖𑄴𑄖𑄁 𑄃𑄂𑄦𑄢𑄨𑄡𑄨𑄖𑄴𑄗, 𑄃𑄚𑄴𑄖𑄢𑄧𑄟𑄉𑄴𑄉𑄬 𑄛𑄚 𑄥𑄧𑄢𑄨𑄛𑄪𑄖𑄴𑄖𑄖𑄴𑄗𑄬𑄢𑄁 𑄘𑄨𑄥𑄴𑄤𑄧 𑄖𑄁 𑄖𑄥𑄴𑄥 𑄘𑄖𑄴𑄤𑄧 𑄃𑄐𑄴𑄐𑄁 𑄛𑄌𑄨𑄖𑄴𑄤𑄧 𑄃𑄂𑄦𑄢𑄚𑄴𑄖𑄨𑄡𑄧 𑄟𑄬 𑄅𑄥𑄴𑄥𑄫𑄢𑄮 𑄎𑄧𑄖𑄮, 𑄟𑄧 𑄇𑄪𑄎𑄴𑄏𑄨 𑄥𑄧𑄟𑄩’’𑄖𑄨. 𑄞𑄘𑄴𑄘𑄇𑄁 𑄖𑄬 𑄞𑄘𑄴𑄘𑄬 𑄇𑄖𑄁, 𑄟𑄡𑄧 𑄗𑄬𑄢𑄥𑄴𑄥 𑄛𑄧𑄖𑄮𑄤 𑄘𑄚𑄴𑄖𑄇𑄑𑄴𑄒𑄐𑄴𑄌 𑄟𑄪𑄈𑄮𑄘𑄇𑄐𑄴𑄌 𑄘𑄨𑄚𑄴𑄚𑄁, 𑄃𑄟𑄴𑄦𑄧𑄇𑄁𑄡𑄬𑄤𑄧𑄚𑄬𑄚 𑄛𑄨𑄕𑄴𑄓𑄛𑄧𑄖𑄮𑄛𑄨 𑄛𑄢𑄨𑄞𑄪𑄖𑄴𑄖𑄮, 𑄃𑄎𑄴𑄎 𑄗𑄬𑄢𑄬𑄚 𑄇𑄖𑄥𑄟𑄕𑄙𑄟𑄴𑄟𑄥𑄴𑄥 𑄟𑄡𑄁 𑄞𑄧𑄉𑄨𑄚𑄮 𑄎𑄧𑄖𑄧𑄖𑄨 𑄌𑄨𑄖𑄴𑄖𑄁 𑄛𑄥𑄧𑄘𑄬𑄥𑄨. 𑄆𑄇𑄤𑄧𑄢𑄁 𑄇𑄥𑄨𑄖𑄑𑄴𑄒𑄧𑄚𑄁 𑄥𑄪𑄤𑄕𑄴𑄕𑄟𑄬𑄤 𑄃𑄦𑄮𑄥𑄨. 𑄥𑄮 𑄞𑄪𑄐𑄴𑄎𑄨𑄖𑄴𑄤𑄧 𑄇𑄥𑄨𑄖𑄑𑄴𑄒𑄧𑄚𑄁 𑄃𑄮𑄣𑄮𑄇𑄬𑄚𑄴𑄖𑄮 𑄤𑄨𑄎𑄴𑄎𑄮𑄖𑄟𑄧𑄚𑄁 𑄘𑄨𑄥𑄴𑄤𑄧 𑄅𑄑𑄴𑄒𑄧𑄡 𑄡𑄑𑄴𑄒𑄨𑄡𑄧 𑄛𑄦𑄢𑄨𑄖𑄴𑄤𑄧 𑄢𑄖𑄴𑄖𑄥𑄪𑄤𑄕𑄴𑄕𑄞𑄧𑄤𑄁 𑄎𑄧𑄚𑄨𑄖𑄴𑄤𑄧 ‘‘𑄢𑄐𑄴𑄐𑄮 𑄃𑄇𑄗𑄬𑄖𑄴𑄤𑄧 𑄛𑄢𑄨𑄞𑄪𑄐𑄴𑄎𑄨𑄖𑄪𑄁 𑄚 𑄥𑄇𑄴𑄇𑄧’’𑄖𑄨 𑄉𑄚𑄴𑄖𑄴𑄤𑄧 𑄢𑄐𑄴𑄐𑄮 𑄃𑄂𑄢𑄮𑄌𑄬𑄥𑄨. 𑄢𑄧𑄎𑄧 𑄖𑄁 𑄥𑄝𑄴𑄝𑄁 𑄥𑄇𑄑𑄬𑄦𑄨 𑄃𑄂𑄦𑄢𑄧𑄛𑄬𑄖𑄴𑄤𑄧 𑄢𑄧𑄎𑄋𑄴𑄉𑄕𑄬 𑄢𑄧𑄥𑄨𑄁 𑄇𑄧𑄢𑄬𑄖𑄴𑄤𑄧 ‘‘𑄇𑄥𑄴𑄥𑄨𑄟𑄥𑄴𑄟𑄨𑄁 𑄚𑄉𑄢𑄬 𑄆𑄖𑄴𑄖𑄇𑄁 𑄥𑄪𑄤𑄕𑄴𑄕𑄁 𑄃𑄖𑄴𑄗𑄩’’𑄖𑄨 𑄛𑄪𑄌𑄴𑄍𑄨. 𑄇𑄥𑄴𑄥𑄌𑄨 𑄚𑄖𑄴𑄗𑄩𑄖𑄨 𑄌 𑄤𑄪𑄖𑄴𑄖𑄬 𑄥𑄬𑄑𑄴𑄒𑄨𑄑𑄴𑄒𑄧𑄚𑄟𑄥𑄴𑄥 𑄃𑄘𑄧𑄥𑄨. 𑄥𑄮 𑄛𑄪𑄕𑄴𑄕𑄥𑄬𑄑𑄴𑄒𑄨 𑄚𑄧𑄟 𑄎𑄧𑄖𑄮.

𑄃𑄛𑄢𑄟𑄴𑄛𑄨 𑄤𑄖𑄴𑄗𑄪 – 𑄖𑄥𑄴𑄟𑄨𑄁𑄡𑄬𑄤 𑄢𑄧𑄎𑄉𑄦𑄬 𑄇𑄧𑅄𑄤𑄬𑅄𑄨𑄡𑄮 𑄚𑄧𑄟 𑄘𑄪𑄉𑄴𑄉𑄖𑄮 𑄃𑄖𑄴𑄗𑄨. 𑄖𑄥𑄴𑄥 𑄞𑄢𑄨𑄡𑄧 𑄛𑄕𑄴𑄕𑄟𑄴𑄝𑄨𑄣𑄡𑄧𑄉𑄪𑄁 𑄛𑄌𑄨. 𑄟𑄦𑄧𑄇𑄥𑄴𑄥𑄛𑄖𑄴𑄗𑄬𑄢𑄮 𑄚𑄨𑄢𑄮𑄙𑄧 𑄤𑄪𑄑𑄴𑄒𑄧𑄡 ‘‘𑄇𑄥𑄴𑄥 𑄥𑄋𑄴𑄉𑄦𑄁 𑄇𑄢𑄮𑄟𑄩’’𑄖𑄨 𑄃𑄂𑄤𑄎𑄴𑄎𑄚𑄴𑄖𑄮 𑄖𑄁 𑄘𑄨𑄥𑄴𑄤𑄧 𑄉𑄚𑄴𑄖𑄴𑄤𑄧 𑄉𑄬𑄦𑄘𑄴𑄤𑄧𑄢𑄬 𑄃𑄑𑄴𑄒𑄧𑄥𑄨. 𑄥𑄧 𑄛𑄖𑄴𑄖𑄁 𑄉𑄦𑄬𑄖𑄴𑄤𑄧 𑄥𑄝𑄴𑄝𑄁 𑄖𑄖𑄴𑄗 𑄛𑄇𑄴𑄈𑄨𑄛𑄨𑄖𑄴𑄤𑄧 𑄗𑄬𑄢𑄥𑄴𑄥 𑄃𑄘𑄧𑄥𑄨, 𑄗𑄬𑄢𑄮 𑄤𑄨𑄦𑄧𑄢𑄁 𑄉𑄚𑄴𑄖𑄴𑄤𑄧 𑄥𑄖𑄴𑄗𑄪 𑄅𑄛𑄚𑄧𑄟𑄬𑄥𑄨. 𑄥𑄖𑄴𑄗𑄧 𑄃𑄖𑄴𑄖𑄚𑄮 𑄡𑄧𑄛𑄚𑄟𑄖𑄴𑄖𑄁 𑄉𑄕𑄴𑄦𑄨, 𑄥𑄬𑄥𑄁 𑄛𑄐𑄴𑄌𑄚𑄴𑄚𑄁 𑄞𑄨𑄇𑄴𑄈𑄪𑄥𑄖𑄧𑄚𑄁 𑄛𑄦𑄮𑄥𑄨. 𑄇𑄧𑅄𑄤𑅄𑄨𑄡𑄮𑄛𑄨 𑄖𑄁 𑄒𑄧𑄚𑄁 𑄛𑄖𑄴𑄖𑄮 𑄌𑄫𑅄𑄇𑄁 𑄣𑄞𑄨. 𑄟𑄦𑄧𑄇𑄥𑄴𑄥𑄛𑄮 𑄥𑄖𑄴𑄗𑄧𑄢𑄁 𑄇𑄧𑅄𑄤𑅄𑄨𑄡𑄥𑄴𑄥 𑄤𑄨𑄛𑄧𑄇𑄁 𑄛𑄪𑄌𑄴𑄍𑄨. 𑄥𑄖𑄴𑄗𑄧 ‘‘𑄄𑄖𑄮 𑄥𑄖𑄴𑄖𑄟𑄬 𑄘𑄨𑄤𑄥𑄬 𑄥𑄬𑄑𑄴𑄒𑄨𑄌𑄴𑄍𑄖𑄴𑄖𑄁 𑄣𑄞𑄨𑄥𑄴𑄥𑄖𑄩’’𑄖𑄨 𑄃𑄂𑄦. 𑄇𑄧𑅄𑄤𑅄𑄨𑄡𑄮 𑄖𑄁 𑄇𑄗𑄁 𑄥𑄪𑄖𑄴𑄤𑄧 𑄉𑄚𑄴𑄖𑄴𑄤𑄧 𑄞𑄢𑄨𑄡𑄧𑄡 𑄃𑄂𑄢𑄮𑄌𑄬𑄥𑄨.

𑄖𑄘𑄧 𑄌 𑄢𑄧𑄎𑄧 𑄚𑄉𑄢𑄁 𑄃𑄚𑄪𑄥𑄐𑄴𑄌𑄢𑄚𑄴𑄖𑄮 𑄝𑄦𑄨𑄚𑄉𑄢𑄬 𑄎𑄩𑄤𑄥𑄫𑄣𑄬 𑄚𑄨𑄥𑄨𑄚𑄴𑄚𑄁 𑄛𑄪𑄢𑄨𑄥𑄁 𑄃𑄘𑄴𑄘𑄥. 𑄛𑄪𑄢𑄨𑄥𑄮 𑄢𑄧𑄎𑄧𑄚𑄁 𑄘𑄨𑄥𑄴𑄤𑄧 𑄅𑄌𑄴𑄌𑄧𑄥𑄘𑄴𑄘𑄁 𑄃𑄇𑄧𑄥𑄨 ‘‘𑄖𑄪𑄟𑄴𑄦𑄧𑄇𑄁 𑄟𑄬 𑄞𑄪𑄐𑄴𑄎𑄚𑄞𑄖𑄴𑄖𑄁 𑄛𑄦𑄨𑄕𑄗 𑄘𑄬𑄤𑄧’’𑄖𑄨. 𑄢𑄧𑄎𑄧 ‘‘𑄛𑄬𑄥𑄬𑄥𑄴𑄥𑄧𑄟𑄩’’𑄖𑄨 𑄤𑄖𑄴𑄤𑄧 𑄥𑄧𑄡𑄟𑄧𑄥𑄞𑄖𑄴𑄖𑄬 𑄅𑄛𑄚𑄩𑄖𑄬 𑄥𑄢𑄨𑄖𑄴𑄤𑄧 ‘‘𑄄𑄟𑄁 𑄦𑄢𑄨𑄖𑄪𑄁 𑄥𑄟𑄖𑄴𑄗𑄁 𑄎𑄧𑄚𑄧𑄗𑄧’’𑄖𑄨 𑄃𑄂𑄦, 𑄚𑄉𑄢𑄬 𑄥𑄦𑄥𑄴𑄥𑄞𑄕𑄴𑄓𑄨𑄇𑄁 𑄌𑄧𑄢𑄬𑄥𑄪𑄁. 𑄖𑄖𑄨𑄡𑄤𑄧𑄢𑄬 𑄇𑄧𑅄𑄤𑅄𑄨𑄡𑄥𑄴𑄥 𑄞𑄢𑄨𑄡𑄧 𑄃𑄉𑄴𑄉𑄦𑄬𑄥𑄨. 𑄃𑄗 𑄚𑄁 𑄢𑄐𑄴𑄐𑄮 𑄘𑄥𑄴𑄥𑄬𑄥𑄪𑄁, 𑄥𑄧 𑄛𑄪𑄢𑄨𑄥𑄤𑄬𑄥𑄁 𑄉𑄦𑄬𑄖𑄴𑄤𑄧 𑄛𑄐𑄴𑄌𑄧𑄤𑄪𑄙𑄥𑄚𑄴𑄚𑄘𑄴𑄙𑄧 𑄞𑄖𑄴𑄖𑄛𑄧𑄖𑄨𑄁 𑄉𑄦𑄬𑄖𑄴𑄤𑄧 𑄚𑄉𑄢𑄧 𑄚𑄨𑄇𑄴𑄈𑄟𑄨. 𑄝𑄦𑄨𑄚𑄉𑄢𑄬 𑄖𑄧𑄣𑄬 𑄃𑄙𑄨𑄤𑄖𑄴𑄗𑄮 𑄘𑄩𑄊𑄖𑄧𑄣𑄮 𑄚𑄧𑄟 𑄡𑄇𑄴𑄈𑄮 𑄖𑄁 𑄢𑄪𑄇𑄴𑄈𑄟𑄫𑄣𑄬𑄚 𑄉𑄌𑄴𑄍𑄚𑄴𑄖𑄨𑄁 𑄘𑄨𑄥𑄴𑄤𑄧 ‘‘𑄖𑄨𑄑𑄴𑄒 𑄖𑄨𑄑𑄴𑄒 𑄞𑄇𑄴𑄈𑄮𑄥𑄨 𑄟𑄬’’𑄖𑄨 𑄃𑄂𑄦. 𑄚𑄧𑄦𑄁 𑄖𑄤 𑄞𑄇𑄴𑄈𑄮, 𑄢𑄧𑄎𑄘𑄫𑄖𑄮 𑄃𑄦𑄚𑄴𑄖𑄨. 𑄇𑄖𑄴𑄗 𑄉𑄌𑄴𑄍𑄥𑄩𑄖𑄨. 𑄎𑄩𑄤𑄥𑄫𑄣𑄬 𑄚𑄨𑄥𑄨𑄚𑄴𑄚𑄥𑄴𑄥 𑄛𑄪𑄢𑄨𑄥𑄥𑄴𑄥 𑄥𑄚𑄴𑄖𑄨𑄇𑄚𑄴𑄖𑄨. 𑄟𑄟𑄛𑄨 𑄆𑄇𑄁 𑄥𑄧𑄥𑄚𑄁 𑄦𑄢𑄨𑄖𑄪𑄁 𑄥𑄇𑄴𑄈𑄨𑄥𑄴𑄥𑄥𑄩𑄖𑄨. 𑄃𑄂𑄟 𑄥𑄇𑄴𑄈𑄨𑄥𑄴𑄥𑄧𑄟𑄩𑄖𑄨. ‘‘𑄘𑄩𑄊𑄖𑄧𑄣𑄥𑄴𑄥 𑄞𑄢𑄨𑄡𑄧 𑄥𑄪𑄟𑄚𑄘𑄬𑄤𑄢𑄧𑄎𑄙𑄩𑄖𑄧 𑄇𑄧𑅄𑄩 𑄛𑄪𑄖𑄴𑄖𑄁 𑄤𑄨𑄎𑄧𑄖𑄧’’𑄖𑄨 𑄃𑄂𑄢𑄮𑄌𑄬𑄡𑄴𑄡𑄧𑄥𑄨. 𑄄𑄟𑄥𑄴𑄟𑄨𑄁 𑄖𑄧𑄣𑄟𑄫𑄣𑄬 𑄥𑄖𑄴𑄖 𑄚𑄨𑄙𑄨𑄇𑄪𑄟𑄴𑄞𑄨𑄡𑄮 𑄃𑄖𑄴𑄗𑄨, 𑄖𑄧 𑄖𑄴𑄤𑄁 𑄉𑄕𑄴𑄦𑄬𑄡𑄴𑄡𑄧𑄥𑄩𑄖𑄨. 𑄥𑄧 ‘‘𑄘𑄩𑄊𑄖𑄧𑄣𑄥𑄴𑄥 𑄞𑄢𑄨𑄡𑄧 𑄥𑄪𑄟𑄚𑄘𑄬𑄤𑄢𑄧𑄎𑄙𑄩𑄖𑄧 𑄇𑄧𑅄𑄩 𑄛𑄪𑄖𑄴𑄖𑄁 𑄤𑄨𑄎𑄧𑄖𑄧’’𑄖𑄨 𑄅𑄉𑄴𑄊𑄮𑄥𑄬𑄚𑄴𑄖𑄩 𑄃𑄉𑄟𑄧𑄥𑄨.

𑄥𑄪𑄟𑄚𑄘𑄬𑄤𑄮 𑄡𑄇𑄴𑄈𑄥𑄟𑄧𑄉𑄟𑄬 𑄚𑄨𑄥𑄨𑄚𑄴𑄚𑄮 𑄥𑄪𑄖𑄴𑄤𑄧 ‘‘𑄆𑄇𑄮 𑄟𑄚𑄪𑄥𑄴𑄥𑄮 𑄃𑄟𑄴𑄦𑄧𑄇𑄁 𑄛𑄨𑄡𑄛𑄤𑄖𑄴𑄖𑄨𑄁 𑄃𑄂𑄦𑄢𑄖𑄨, 𑄛𑄇𑄴𑄇𑄮𑄥𑄗 𑄚’’𑄚𑄴𑄖𑄨 𑄥𑄧𑄥𑄚𑄁 𑄥𑄪𑄖𑄴𑄤𑄧 𑄛𑄥𑄚𑄴𑄚𑄮 ‘‘𑄄𑄟𑄥𑄴𑄥 𑄢𑄪𑄇𑄴𑄈𑄥𑄴𑄥 𑄛𑄢𑄨𑄟𑄕𑄴𑄓𑄣𑄌𑄴𑄍𑄧𑄡𑄧𑄡 𑄜𑄢𑄕𑄑𑄴𑄒𑄧𑄚𑄬 𑄚𑄨𑄙𑄨𑄇𑄪𑄟𑄴𑄞𑄨𑄡𑄮 𑄖𑄪𑄡𑄴𑄦𑄁 𑄘𑄟𑄴𑄟𑄩’’𑄖𑄨 𑄃𑄂𑄦. 𑄎𑄩𑄤𑄥𑄫𑄣𑄬 𑄚𑄨𑄥𑄨𑄚𑄴𑄚𑄛𑄪𑄢𑄨𑄥𑄮 𑄞𑄖𑄴𑄖𑄁 𑄞𑄪𑄐𑄴𑄎𑄨𑄖𑄴𑄤𑄧 𑄟𑄪𑄈𑄛𑄪𑄐𑄴𑄍𑄚𑄇𑄧𑄣𑄬 𑄄𑄖𑄴𑄗𑄨𑄜𑄥𑄴𑄥𑄮𑄖𑄨 𑄐𑄖𑄴𑄤𑄧 𑄌𑄫𑅄𑄧𑄡 𑄓𑄁𑄥𑄨, 𑄥𑄧 𑄃𑄥𑄨𑄚𑄧 𑄃𑄖𑄴𑄖𑄚𑄮 𑄌𑄫𑅄𑄁 𑄍𑄨𑄚𑄴𑄘𑄨𑄖𑄴𑄤𑄧 𑄢𑄐𑄴𑄐𑄮 𑄥𑄚𑄴𑄖𑄨𑄇𑄁𑄡𑄬𑄤 𑄉𑄖𑄧. 𑄢𑄧𑄎𑄧 𑄞𑄖𑄴𑄖𑄞𑄮𑄎𑄨𑄖𑄞𑄧𑄤𑄮 𑄇𑄗𑄁 𑄎𑄧𑄚𑄨𑄖𑄝𑄴𑄝𑄮𑄖𑄨? 𑄌𑄫𑅄𑄥𑄐𑄴𑄐𑄧𑄡𑄧𑄖𑄨 𑄤𑄖𑄴𑄤𑄧 𑄢𑄐𑄴𑄐𑄮 𑄃𑄂𑄌𑄨𑄇𑄴𑄈𑄨𑄖𑄴𑄤𑄧 𑄖𑄁 𑄙𑄚𑄁 𑄃𑄂𑄦𑄢𑄧𑄛𑄬𑄥𑄨. 𑄢𑄧𑄎𑄧 𑄃𑄐𑄴𑄐𑄥𑄴𑄥 𑄆𑄖𑄴𑄖𑄇𑄁 𑄙𑄚𑄁 𑄚𑄧𑄟 𑄃𑄖𑄴𑄗𑄩𑄖𑄨. 𑄚𑄖𑄴𑄗𑄨 𑄘𑄬𑄤𑄧𑄖𑄨. 𑄢𑄧𑄎𑄧 𑄖𑄥𑄴𑄥𑄧 𑄛𑄖𑄨𑄁 𑄖𑄥𑄴𑄟𑄨𑄁 𑄚𑄉𑄢𑄬 𑄙𑄚𑄥𑄬𑄑𑄴𑄒𑄨𑄁 𑄃𑄇𑄧𑄥𑄨. 𑄟𑄣𑄴𑄣𑄨𑄇𑄧𑄡𑄛𑄨 𑄘𑄬𑄤𑄨𑄡𑄧 𑄤𑄖𑄴𑄗𑄪 𑄇𑄗𑄬𑄖𑄝𑄴𑄝𑄁. 𑄄𑄟𑄧𑄚𑄨 𑄖𑄧𑄤 𑄇𑄪𑄥𑄣𑄇𑄟𑄴𑄟𑄬 𑄤𑄖𑄴𑄗𑄫𑄚𑄨.

𑄚𑄚𑄴𑄘𑄟𑄧𑄕𑄤𑄇𑄮 𑄛𑄚 𑄅𑄛𑄴𑄛𑄣𑄤𑄕𑄴𑄕𑄧𑄡 𑄗𑄬𑄢𑄨𑄡𑄧 𑄤𑄨𑄛𑄴𑄛𑄑𑄨𑄛𑄎𑄴𑄎𑄨, 𑄖𑄥𑄴𑄥 𑄟𑄐𑄴𑄌𑄖𑄮 𑄅𑄑𑄴𑄒𑄧𑄡 𑄚𑄨𑄇𑄴𑄈𑄟𑄨𑄖𑄴𑄤𑄧 𑄉𑄌𑄴𑄍𑄚𑄴𑄖𑄥𑄴𑄥 𑄟𑄦𑄧𑄛𑄗𑄤𑄩 𑄞𑄨𑄎𑄴𑄎𑄨𑄖𑄴𑄤𑄧 𑄃𑄮𑄇𑄧𑄥𑄟𑄘𑄧𑄥𑄨, 𑄖𑄖𑄴𑄗𑄬𑄤 𑄟𑄦𑄧𑄚𑄢𑄇𑄁 𑄛𑄤𑄨𑄑𑄴𑄒𑄮. 𑄚𑄚𑄴𑄘𑄮𑄛𑄨 𑄉𑄮𑄊𑄧𑄖𑄇𑄮 𑄛𑄕𑄴𑄕𑄧𑄥 𑄤𑄥𑄴𑄥𑄧𑄚𑄨 𑄉𑄮𑄊𑄧𑄖𑄇𑄇𑄟𑄴𑄟𑄁 𑄇𑄖𑄴𑄤𑄧 𑄆𑄇𑄘𑄨𑄤𑄥𑄁 𑄞𑄮𑄎𑄚𑄇𑄧𑄣𑄬 𑄟𑄁𑄥𑄁 𑄃𑄣𑄞𑄚𑄴𑄖𑄮 𑄆𑄇𑄥𑄴𑄥 𑄎𑄩𑄤𑄟𑄧𑄚𑄇𑄉𑄮𑄕𑄥𑄴𑄥 𑄎𑄨𑄤𑄴𑄦𑄁 𑄍𑄨𑄚𑄴𑄘𑄨𑄖𑄴𑄤𑄧 𑄃𑄋𑄴𑄉𑄧𑄢𑄬𑄥𑄪 𑄛𑄌𑄧𑄛𑄬𑄖𑄴𑄤𑄧 𑄈𑄧𑄘𑄨𑄖𑄪𑄁 𑄃𑄂𑄢𑄘𑄴𑄙𑄮. 𑄃𑄗𑄥𑄴𑄥 𑄎𑄨𑄤𑄴𑄦𑄧 𑄟𑄫𑄣𑄬 𑄍𑄨𑄎𑄴𑄎𑄨𑄖𑄴𑄤𑄧 𑄞𑄖𑄴𑄖𑄛𑄧𑄖𑄨𑄡𑄁𑄡𑄬𑄤 𑄛𑄖𑄨𑄖𑄧, 𑄥𑄮 𑄤𑄨𑄢𑄤𑄚𑄴𑄖𑄮 𑄇𑄧𑄣𑄁 𑄇𑄖𑄴𑄤𑄧 𑄚𑄨𑄢𑄡𑄬 𑄚𑄨𑄝𑄴𑄝𑄖𑄴𑄖𑄨. 𑄚𑄚𑄴𑄘𑄮𑄛𑄨 𑄡𑄇𑄴𑄈𑄮 𑄃𑄐𑄴𑄐𑄬𑄚 𑄡𑄇𑄴𑄈𑄬𑄚 𑄥𑄘𑄴𑄙𑄨𑄁 𑄃𑄂𑄇𑄧𑄥𑄬𑄚 𑄉𑄌𑄴𑄍𑄚𑄴𑄖𑄮 𑄥𑄧𑄢𑄨𑄛𑄪𑄖𑄴𑄖𑄖𑄴𑄗𑄬𑄢𑄁 𑄚𑄤𑄮𑄢𑄮𑄛𑄨𑄖𑄬𑄦𑄨 𑄇𑄬𑄥𑄬𑄦𑄨 𑄢𑄖𑄴𑄖𑄨𑄞𑄧𑄉𑄬 𑄃𑄝𑄴𑄞𑄮𑄇𑄧𑄥𑄬 𑄚𑄨𑄥𑄨𑄚𑄴𑄚𑄁 𑄘𑄨𑄥𑄴𑄤𑄧 𑄥𑄩𑄥𑄬 𑄛𑄦𑄢𑄨𑄖𑄪𑄇𑄧𑄟𑄮 𑄄𑄖𑄢𑄥𑄴𑄥 𑄡𑄇𑄴𑄈𑄥𑄴𑄥 𑄃𑄂𑄢𑄮𑄌𑄬𑄖𑄴𑄤𑄧 𑄖𑄬𑄚 𑄤𑄧𑄢𑄨𑄡𑄟𑄧𑄚𑄮𑄛𑄨 𑄛𑄦𑄧𑄢𑄁 𑄘𑄖𑄴𑄤𑄧 𑄓𑄡𑄴𑄦𑄧𑄟𑄨 𑄓𑄡𑄴𑄦𑄧𑄟𑄩𑄖𑄨 𑄤𑄨𑄢𑄤𑄚𑄴𑄖𑄮 𑄖𑄥𑄴𑄟𑄨𑄁𑄡𑄬𑄤 𑄒𑄧𑄚𑄬 𑄞𑄫𑄟𑄨𑄁 𑄛𑄤𑄨𑄥𑄨𑄖𑄴𑄤𑄧 𑄟𑄦𑄧𑄚𑄨𑄢𑄡𑄬 𑄚𑄨𑄝𑄴𑄝𑄖𑄴𑄖𑄮𑄖𑄨 𑄄𑄟𑄧𑄚𑄨 𑄃𑄇𑄪𑄥𑄣𑄇𑄟𑄴𑄟𑄬 𑄤𑄖𑄴𑄗𑄫𑄚𑄨.

𑄡𑄁 𑄛𑄚 𑄃𑄚𑄴𑄖𑄟𑄥𑄮 𑄟𑄢𑄕𑄥𑄚𑄴𑄖𑄨𑄇𑄬𑄛𑄨 𑄇𑄖𑄁 𑄇𑄟𑄴𑄟𑄁 𑄞𑄤𑄚𑄴𑄖𑄢𑄬 𑄤𑄨𑄛𑄧𑄇𑄁 𑄘𑄬𑄖𑄨, 𑄖𑄁 𑄥𑄝𑄴𑄝𑄁 𑄥𑄟𑄴𑄛𑄢𑄧𑄡𑄤𑄬𑄘𑄚𑄩𑄡𑄁 𑄚𑄧𑄟. 𑄖𑄖𑄴𑄗 𑄡𑄮 𑄃𑄛𑄢𑄨𑄦𑄩𑄚𑄥𑄴𑄥 𑄏𑄧𑄚𑄥𑄴𑄥 𑄤𑄨𑄛𑄧𑄇𑄮 𑄚𑄨𑄝𑄴𑄝𑄖𑄴𑄖𑄨𑄥𑄴𑄥𑄖𑄨, 𑄥𑄮 𑄄𑄙 𑄚𑄨𑄝𑄴𑄝𑄖𑄴𑄖𑄨𑄖𑄤𑄨𑄛𑄧𑄇𑄮𑄖𑄨 𑄤𑄪𑄖𑄴𑄖𑄮. 𑄖𑄥𑄴𑄥 𑄟𑄫𑄣𑄞𑄫𑄖𑄁 𑄇𑄟𑄴𑄟𑄁 𑄚𑄬𑄤 𑄘𑄨𑄑𑄴𑄒𑄙𑄟𑄴𑄟𑄤𑄬𑄘𑄚𑄩𑄡𑄁 𑄚 𑄥𑄟𑄴𑄛𑄢𑄧𑄡𑄤𑄬𑄘𑄚𑄩𑄡𑄚𑄴𑄖𑄨, 𑄚 𑄤𑄨𑄌𑄧𑄢𑄨𑄖𑄁, 𑄇𑄨𑄐𑄴𑄌𑄧𑄛𑄨 𑄚 𑄤𑄨𑄌𑄧𑄢𑄨𑄖𑄁, 𑄥𑄟𑄴𑄛𑄢𑄧𑄡𑄤𑄬𑄘𑄚𑄩𑄡𑄟𑄬𑄤 𑄛𑄚𑄬𑄖𑄚𑄴𑄖𑄨 𑄤𑄬𑄘𑄨𑄖𑄝𑄴𑄝𑄁. 𑄡𑄮 𑄛𑄒𑄟𑄟𑄉𑄴𑄉𑄧𑄘𑄩𑄚𑄁 𑄞𑄤𑄚𑄴𑄖𑄢𑄬 𑄜𑄣𑄥𑄟𑄧𑄛𑄖𑄴𑄖𑄨𑄤𑄨𑄛𑄧𑄇𑄮, 𑄥𑄮 𑄄𑄙 𑄚𑄨𑄝𑄴𑄝𑄖𑄴𑄖𑄨𑄖𑄉𑄪𑄕𑄮𑄖𑄴𑄤𑄬𑄤 𑄤𑄪𑄖𑄴𑄖𑄮. 𑄇𑄨𑄐𑄴𑄌𑄧𑄛𑄨 𑄆𑄤𑄁 𑄤𑄪𑄖𑄴𑄖𑄮, 𑄟𑄉𑄴𑄉𑄇𑄟𑄴𑄟𑄁 𑄛𑄚 𑄛𑄢𑄨𑄛𑄇𑄴𑄇𑄤𑄬𑄘𑄚𑄩𑄡𑄚𑄴𑄖𑄨 𑄤𑄬𑄘𑄨𑄖𑄝𑄴𑄝𑄁. 𑄟𑄉𑄴𑄉𑄌𑄬𑄖𑄚𑄧𑄡𑄬𑄤 𑄦𑄨 𑄥𑄝𑄴𑄝𑄣𑄦𑄪𑄁 𑄜𑄣𑄘𑄧𑄡𑄨𑄇𑄧 𑄃𑄚𑄚𑄴𑄖𑄢𑄜𑄣𑄖𑄴𑄖𑄧𑄖𑄨.

𑄾. 𑄝𑄦𑄪𑄤𑄬𑄘𑄚𑄩𑄡𑄚𑄴𑄖𑄨 𑄥𑄐𑄴𑄐𑄧𑄞𑄤𑄫𑄛𑄉𑄁. 𑄃𑄛𑄴𑄛𑄤𑄬𑄘𑄚𑄩𑄡𑄚𑄴𑄖𑄨 𑄃𑄥𑄐𑄴𑄐𑄧𑄞𑄤𑄫𑄛𑄉𑄁. 𑄥𑄤𑄬𑄘𑄚𑄩𑄡𑄚𑄴𑄖𑄨 𑄥𑄤𑄨𑄛𑄧𑄇𑄁 𑄇𑄟𑄴𑄟𑄁. 𑄃𑄤𑄬𑄘𑄚𑄩𑄡𑄚𑄴𑄖𑄨 𑄃𑄤𑄨𑄛𑄧𑄇𑄁 𑄇𑄟𑄴𑄟𑄁. 𑄆𑄤𑄁 𑄥𑄚𑄴𑄖𑄬𑄖𑄨 𑄄𑄟𑄬𑄥𑄁 𑄘𑄨𑄑𑄴𑄒𑄙𑄟𑄴𑄟𑄤𑄬𑄘𑄚𑄩𑄡𑄧𑄘𑄩𑄚𑄁 𑄇𑄟𑄴𑄟𑄧𑄚𑄁 𑄅𑄛𑄇𑄴𑄇𑄟𑄬𑄚 𑄥𑄟𑄴𑄛𑄢𑄧𑄡𑄤𑄬𑄘𑄚𑄩𑄡𑄧𑄘𑄨 𑄞𑄧𑄤𑄇𑄧𑄢𑄕𑄥𑄴𑄥 𑄃𑄣𑄧𑄞𑄬 𑄥𑄖𑄨. 𑄃𑄜𑄣𑄮𑄖𑄨 𑄚𑄨𑄛𑄴𑄜𑄣𑄮 𑄚𑄨𑄢𑄖𑄴𑄗𑄇𑄮𑄖𑄨. 𑄆𑄖𑄴𑄖𑄧𑄤𑄖𑄧 𑄃𑄚𑄨𑄡𑄴𑄡𑄧𑄚𑄨𑄇𑄥𑄧𑄥𑄚𑄬 𑄛𑄡𑄮𑄉𑄥𑄴𑄥 𑄃𑄜𑄣𑄖𑄁 𑄘𑄥𑄴𑄥𑄬𑄖𑄴𑄤𑄧 𑄛𑄙𑄧𑄚𑄌𑄴𑄍𑄬𑄘𑄇𑄤𑄧𑄘𑄮 𑄚𑄧𑄟 𑄘𑄥𑄴𑄥𑄨𑄖𑄮𑄖𑄨 𑄤𑄬𑄘𑄨𑄖𑄝𑄴𑄝𑄮. 𑄥𑄦𑄙𑄟𑄴𑄟𑄨𑄇𑄧 𑄤𑄧𑄘𑄧𑄚𑄪𑄤𑄧𑄘𑄧𑄖𑄨 𑄛𑄢𑄬𑄦𑄨 𑄤𑄪𑄖𑄴𑄖𑄇𑄧𑄢𑄕𑄬𑄚 𑄥𑄇𑄧𑄢𑄕𑄧 𑄦𑄪𑄖𑄴𑄤𑄧 𑄚𑄨𑄉𑄕𑄴𑄒𑄧𑄚𑄁 𑄤𑄧𑄘𑄧 𑄌 𑄃𑄚𑄪𑄤𑄧𑄘𑄧 𑄌. 𑄉𑄧𑄢𑄡𑄴𑄦𑄁 𑄒𑄧𑄚𑄁 𑄃𑄂𑄉𑄌𑄴𑄍𑄚𑄴𑄖𑄩𑄖𑄨 𑄤𑄨𑄐𑄴𑄐𑄫𑄦𑄨 𑄉𑄢𑄦𑄨𑄖𑄝𑄴𑄝𑄁 𑄇𑄧𑄢𑄕𑄁 𑄃𑄂𑄉𑄌𑄴𑄍𑄚𑄴𑄖𑄨. ‘‘𑄤𑄧𑄘𑄧𑄚𑄪𑄛𑄴𑄛𑄖𑄴𑄖𑄧 𑄉𑄧𑄢𑄡𑄴𑄦𑄑𑄴𑄒𑄧𑄚𑄧’’𑄖𑄨𑄛𑄨 𑄛𑄧𑄒𑄮. 𑄖𑄥𑄴𑄥𑄖𑄴𑄗𑄮 – 𑄛𑄢𑄬𑄦𑄨 𑄤𑄪𑄖𑄴𑄖𑄬𑄚 𑄇𑄧𑄢𑄕𑄬𑄚 𑄥𑄇𑄧𑄢𑄕𑄧 𑄚𑄨𑄉𑄕𑄴𑄒𑄧𑄚𑄁 𑄤𑄧𑄘𑄁 𑄃𑄚𑄪𑄛𑄴𑄛𑄖𑄴𑄖𑄧 𑄖𑄁 𑄤𑄧𑄘𑄁 𑄥𑄮𑄥𑄬𑄚𑄴𑄖𑄧 𑄟𑄨𑄣𑄧𑄛𑄬𑄚𑄴𑄖𑄧 𑄘𑄪𑄇𑄴𑄇𑄑𑄇𑄟𑄴𑄟𑄇𑄧𑄢𑄨𑄚𑄮𑄖𑄨𑄃𑄂𑄘𑄡𑄮 𑄘𑄥 𑄉𑄧𑄢𑄡𑄴𑄦𑄑𑄴𑄒𑄧𑄚𑄧 𑄃𑄂𑄉𑄌𑄴𑄍𑄚𑄴𑄖𑄨.

𑄿. 𑄥𑄋𑄴𑄉𑄖𑄨𑄞𑄧𑄤𑄦𑄬𑄖𑄫𑄖𑄨 𑄚𑄨𑄡𑄖𑄨𑄞𑄧𑄤𑄇𑄧𑄢𑄕𑄧. 𑄛𑄧𑄛𑄥𑄋𑄴𑄉𑄖𑄨𑄇𑄧𑄖𑄨 𑄛𑄧𑄛𑄚𑄨𑄡𑄖𑄨𑄚𑄮. 𑄃𑄞𑄨𑄎𑄧𑄖𑄨𑄦𑄬𑄖𑄫𑄖𑄨 𑄍𑅄𑄞𑄨𑄎𑄧𑄖𑄨𑄦𑄬𑄖𑄪.

𑄷𑄶. 𑄆𑄤𑄁 𑄚𑄨𑄉𑄕𑄴𑄒𑄧𑄚𑄁 𑄅𑄛𑄇𑄴𑄇𑄟𑄥𑄴𑄥 𑄃𑄜𑄣𑄖𑄁 𑄘𑄥𑄴𑄥𑄬𑄖𑄴𑄤𑄧 𑄄𑄘𑄧𑄚𑄨 𑄚𑄨𑄡𑄴𑄡𑄧𑄚𑄨𑄇𑄥𑄧𑄥𑄚𑄬 𑄅𑄛𑄇𑄴𑄇𑄟𑄥𑄴𑄥 𑄤𑄩𑄢𑄨𑄡𑄥𑄴𑄥 𑄌 𑄥𑄜𑄣𑄖𑄁 𑄘𑄥𑄴𑄥𑄬𑄖𑄪𑄁 𑄇𑄗𑄐𑄴𑄌, 𑄞𑄨𑄇𑄴𑄈𑄤𑄬𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄃𑄚𑄘𑄴𑄙𑄞𑄫𑄖𑄚𑄴𑄖𑄨 𑄃𑄚𑄙𑄨𑄞𑄫𑄖𑄁. 𑄘𑄪𑄇𑄴𑄈𑄬𑄚 𑄃𑄚𑄙𑄨𑄞𑄫𑄖𑄮 𑄚𑄧𑄟 𑄟𑄚𑄪𑄥𑄴𑄥𑄖𑄴𑄖𑄞𑄧𑄤𑄮 𑄤𑄪𑄌𑄴𑄌𑄖𑄨, 𑄚 𑄖𑄁 𑄃𑄘𑄴𑄙𑄞𑄧𑄤𑄬𑄖𑄨 𑄚𑄧𑄞𑄨𑄞𑄤𑄖𑄩𑄖𑄨 𑄃𑄖𑄴𑄗𑄮. 𑄖𑄟𑄴𑄛𑄨 𑄚𑄧𑄚𑄛𑄴𑄛𑄇𑄧𑄢𑄧𑄡 𑄘𑄪𑄇𑄴𑄇𑄢𑄇𑄧𑄢𑄨𑄇𑄧𑄡 𑄛𑄡𑄮𑄎𑄬𑄚𑄴𑄖𑄮 𑄘𑄪𑄇𑄴𑄈𑄬𑄚 𑄃𑄘𑄴𑄙𑄞𑄧𑄤𑄬𑄖𑄨 𑄚𑄧𑄟. 𑄡𑄬 𑄛𑄚 𑄥𑄧𑄥𑄚𑄬 𑄛𑄝𑄴𑄝𑄎𑄨𑄖𑄴𑄤𑄧 𑄃𑄂𑄢𑄐𑄴𑄐𑄇𑄧 𑄤𑄧 𑄦𑄮𑄚𑄴𑄖𑄨 𑄢𑄪𑄇𑄴𑄈𑄟𑄫𑄣𑄨𑄇𑄧𑄘𑄡𑄮 𑄤𑄧, 𑄖𑄬 𑄘𑄪𑄇𑄴𑄈𑄬𑄚 𑄚 𑄃𑄘𑄴𑄙𑄞𑄧𑄤𑄬𑄚𑄴𑄖𑄨 𑄚𑄧𑄟. 𑄚𑄨𑄡𑄴𑄡𑄧𑄚𑄨𑄇𑄥𑄧𑄥𑄚𑄥𑄴𑄟𑄨𑄐𑄴𑄦𑄨 𑄤𑄩𑄢𑄨𑄡𑄁 𑄥𑄟𑄴𑄟𑄧𑄤𑄧𑄡𑄧𑄟𑄮 𑄚𑄧𑄟 𑄦𑄮𑄖𑄨.

𑄗𑄬𑄢𑄮 𑄛𑄚𑄧𑄦 – 𑄡𑄮 𑄄𑄥𑄴𑄥𑄢𑄇𑄪𑄣𑄬 𑄚𑄨𑄝𑄴𑄝𑄖𑄴𑄖𑄮 𑄥𑄖𑄴𑄖𑄤𑄥𑄴𑄥𑄨𑄇𑄮 𑄦𑄪𑄖𑄴𑄤𑄧 𑄃𑄣𑄋𑄴𑄇𑄖𑄛𑄴𑄛𑄑𑄨𑄡𑄖𑄴𑄖𑄮 𑄛𑄨𑄖𑄪𑄃𑄋𑄴𑄇𑄬 𑄚𑄨𑄥𑄨𑄚𑄴𑄚𑄮 𑄊𑄢𑄬 𑄞𑄖𑄴𑄖𑄇𑄨𑄌𑄴𑄌𑄁 𑄇𑄖𑄴𑄤𑄧 𑄚𑄨𑄥𑄨𑄚𑄴𑄚𑄬𑄚 𑄞𑄨𑄇𑄴𑄈𑄪𑄥𑄋𑄴𑄊𑄬𑄚 𑄃𑄚𑄪𑄟𑄮𑄘𑄚𑄧𑄡 𑄇𑄢𑄨𑄡𑄟𑄧𑄚𑄧𑄡 𑄖𑄨𑄥𑄴𑄥𑄮 𑄥𑄟𑄴𑄛𑄖𑄴𑄖𑄨𑄡𑄮 𑄘𑄥𑄴𑄥𑄬𑄖𑄴𑄤𑄧 𑄥𑄌𑄴𑄌𑄬𑄥𑄪 𑄛𑄇𑄧𑄥𑄨𑄖𑄬𑄥𑄪 𑄃𑄢𑄦𑄖𑄴𑄖𑄁 𑄛𑄧𑄛𑄪𑄕𑄧𑄖𑄨, 𑄟𑄧𑄖𑄧𑄛𑄨𑄖𑄫𑄦𑄨 𑄤𑄧 ‘‘𑄛𑄝𑄴𑄝𑄎𑄨𑄥𑄴𑄥𑄥𑄨 𑄖𑄧𑄖𑄧’’𑄖𑄨 𑄤𑄪𑄖𑄴𑄖𑄮 ‘‘𑄃𑄂𑄟 𑄛𑄝𑄴𑄝𑄎𑄨𑄥𑄴𑄥𑄧𑄟𑄩’’𑄖𑄨 𑄤𑄖𑄴𑄤𑄧 𑄚𑄴𑄦𑄧𑄛𑄬𑄖𑄴𑄤𑄧 𑄃𑄣𑄋𑄴𑄇𑄢𑄨𑄖𑄴𑄤𑄧 𑄤𑄨𑄦𑄧𑄢𑄁 𑄚𑄩𑄖𑄮 𑄖𑄌𑄛𑄐𑄴𑄌𑄇𑄁 𑄅𑄉𑄴𑄉𑄕𑄴𑄦𑄨𑄖𑄴𑄤𑄧 𑄚𑄨𑄥𑄨𑄚𑄴𑄚𑄮 𑄇𑄬𑄥𑄬𑄥𑄪 𑄃𑄮𑄦𑄧𑄢𑄨𑄡𑄟𑄧𑄚𑄬𑄥𑄪 𑄈𑄪𑄢𑄉𑄴𑄉𑄬𑄡𑄬𑄤 𑄃𑄢𑄦𑄖𑄴𑄖𑄁 𑄛𑄧𑄛𑄪𑄕𑄧𑄖𑄨, 𑄚𑄤𑄛𑄝𑄴𑄝𑄎𑄨𑄖𑄮 𑄤𑄧 𑄛𑄚 𑄟𑄚𑄮𑄥𑄨𑄣𑄧𑄖𑄬𑄣𑄟𑄇𑄴𑄈𑄨𑄖𑄬𑄚 𑄥𑄩𑄥𑄬𑄚 𑄛𑄪𑄚𑄘𑄨𑄤𑄥𑄬 𑄟𑄧𑄖𑄧𑄛𑄨𑄖𑄫𑄦𑄨 𑄛𑄬𑄥𑄨𑄖𑄁 𑄇𑄧𑄎𑄞𑄖𑄴𑄖𑄁 𑄞𑄪𑄐𑄴𑄎𑄨𑄖𑄴𑄤𑄧 𑄤𑄨𑄦𑄧𑄢𑄬 𑄚𑄨𑄥𑄨𑄚𑄴𑄚𑄮𑄤 𑄃𑄢𑄦𑄖𑄴𑄖𑄁 𑄛𑄧𑄛𑄪𑄕𑄧𑄖𑄨, 𑄃𑄡𑄁 𑄚 𑄘𑄪𑄇𑄴𑄈𑄬𑄚 𑄃𑄖𑄴𑄖𑄧𑄚𑄁 𑄃𑄘𑄴𑄙𑄞𑄧𑄤𑄬𑄖𑄨 𑄚𑄧𑄟. 𑄃𑄡𑄁 𑄛𑄚 𑄅𑄇𑄴𑄇𑄑𑄴𑄒𑄥𑄇𑄴𑄇𑄧𑄢𑄮. 𑄡𑄮 𑄘𑄧𑄥𑄨𑄇𑄪𑄌𑄴𑄍𑄨𑄡𑄁 𑄚𑄨𑄝𑄴𑄝𑄖𑄴𑄖𑄮 𑄃𑄚𑄴𑄖𑄟𑄥𑄮 𑄢𑄎𑄖𑄟𑄪𑄘𑄴𑄘𑄨𑄇𑄟𑄴𑄛𑄨 𑄛𑄨𑅄𑄚𑄴𑄙𑄨𑄖𑄴𑄤𑄧 𑄉𑄮𑄢𑄇𑄛𑄨𑄡𑄋𑄴𑄉𑄪𑄟𑄖𑄴𑄖𑄬𑄚𑄧𑄛𑄨 𑄥𑄢𑄩𑄢𑄁 𑄤𑄨𑄣𑄨𑄟𑄴𑄛𑄬𑄖𑄴𑄤𑄧 ‘‘𑄛𑄝𑄴𑄝𑄧𑄎𑄬𑄗 𑄚’’𑄚𑄴𑄖𑄨 𑄚𑄩𑄖𑄮 𑄈𑄪𑄢𑄉𑄴𑄉𑄬 𑄤𑄧 𑄛𑄪𑄚𑄘𑄨𑄤𑄥𑄬 𑄤𑄧 𑄃𑄢𑄦𑄖𑄴𑄖𑄁 𑄛𑄧𑄛𑄪𑄕𑄧𑄖𑄨, 𑄃𑄡𑄟𑄴𑄛𑄨 𑄚 𑄃𑄚𑄘𑄴𑄙𑄞𑄫𑄖𑄁 𑄃𑄖𑄴𑄖𑄧𑄚𑄁 𑄘𑄪𑄇𑄴𑄈𑄬𑄚 𑄃𑄘𑄴𑄙𑄞𑄧𑄤𑄬𑄖𑄨 𑄚𑄧𑄟.

𑄙𑄟𑄴𑄟𑄨𑄇𑄁 𑄥𑄪𑄈𑄁 𑄚𑄧𑄟 𑄥𑄋𑄴𑄊𑄖𑄮 𑄤𑄧 𑄉𑄕𑄖𑄮 𑄤𑄧 𑄅𑄛𑄴𑄛𑄚𑄴𑄚𑄁 𑄌𑄖𑄪𑄛𑄌𑄴𑄌𑄡𑄥𑄪𑄈𑄁. 𑄃𑄚𑄙𑄨𑄟𑄪𑄌𑄴𑄍𑄨𑄖𑄮𑄖𑄨 𑄖𑄕𑄴𑄦𑄧𑄟𑄪𑄌𑄴𑄍𑄚𑄧𑄡 𑄃𑄟𑄪𑄌𑄴𑄍𑄨𑄖𑄮. 𑄙𑄟𑄴𑄟𑄨𑄇𑄐𑄴𑄦𑄨 𑄥𑄪𑄈𑄁 𑄚 𑄛𑄢𑄨𑄌𑄴𑄌𑄎𑄧𑄟𑄩𑄖𑄨 𑄚 𑄖𑄖𑄴𑄗 𑄉𑄬𑄙𑄮 𑄇𑄧𑄖𑄝𑄴𑄝𑄮. 𑄥𑄋𑄴𑄊𑄖𑄮 𑄦𑄨 𑄅𑄛𑄴𑄛𑄚𑄴𑄚𑄁 𑄥𑄣𑄧𑄇𑄞𑄖𑄴𑄖𑄁 𑄤𑄧 𑄤𑄥𑄴𑄥𑄧𑄤𑄧𑄥𑄨𑄇𑄁 𑄤𑄧 ‘‘𑄄𑄘𑄟𑄖𑄴𑄗𑄁 𑄆𑄖’’𑄚𑄴𑄖𑄨 𑄛𑄢𑄨𑄌𑄴𑄍𑄨𑄚𑄴𑄘𑄨𑄖𑄴𑄤𑄧 𑄥𑄋𑄴𑄊𑄟𑄎𑄴𑄏𑄬 𑄞𑄨𑄇𑄴𑄈𑄫𑄚𑄁 𑄃𑄚𑄴𑄖𑄢𑄬 𑄛𑄢𑄨𑄞𑄪𑄐𑄴𑄎𑄚𑄴𑄖𑄮 𑄛𑄖𑄴𑄖𑄚𑄴𑄖𑄢𑄬 𑄛𑄘𑄪𑄟𑄁 𑄤𑄨𑄡 𑄥𑄩𑄣𑄥𑄟𑄧𑄙𑄨𑄤𑄨𑄛𑄥𑄴𑄥𑄚𑄧𑄟𑄉𑄴𑄉𑄜𑄣𑄬𑄦𑄨 𑄤𑄓𑄴𑄔𑄖𑄨. 𑄄𑄟𑄥𑄴𑄥𑄧𑄖𑄨 𑄛𑄌𑄴𑄌𑄪𑄛𑄴𑄛𑄚𑄴𑄚𑄧𑄚𑄁 𑄛𑄐𑄴𑄌𑄚𑄴𑄚𑄁 𑄈𑄚𑄴𑄙𑄧𑄚𑄁 𑄟𑄫𑄣𑄞𑄫𑄖𑄥𑄴𑄥. 𑄘𑄪𑄇𑄴𑄈𑄚𑄨𑄘𑄧𑄚𑄥𑄴𑄥𑄧𑄖𑄨 𑄖𑄕𑄴𑄦𑄧𑄡. 𑄥𑄧 𑄦𑄨 𑄛𑄐𑄴𑄌𑄇𑄴𑄈𑄚𑄴𑄙𑄘𑄪𑄇𑄴𑄈𑄥𑄴𑄥 𑄚𑄨𑄘𑄧𑄚𑄁. 𑄥𑄋𑄴𑄈𑄧𑄢𑄁 𑄛𑄘𑄦𑄖𑄮𑄖𑄨 𑄥𑄟𑄴𑄛𑄡𑄮𑄉𑄤𑄩𑄢𑄨𑄡𑄁 𑄇𑄢𑄮𑄚𑄴𑄖𑄥𑄴𑄥. 𑄤𑄨𑄢𑄧𑄉𑄮 𑄦𑄮𑄖𑄩𑄖𑄨 𑄟𑄉𑄴𑄉𑄬𑄚 𑄤𑄨𑄢𑄧𑄉𑄮 𑄦𑄮𑄖𑄨. 𑄄𑄘𑄁 𑄤𑄪𑄖𑄴𑄖𑄁 𑄦𑄮𑄖𑄨 ‘‘𑄥𑄋𑄴𑄈𑄧𑄢𑄛𑄙𑄧𑄚𑄬𑄚 𑄟𑄬 𑄄𑄟𑄥𑄴𑄥 𑄘𑄪𑄇𑄴𑄈𑄚𑄨𑄘𑄧𑄚𑄥𑄴𑄥 𑄤𑄨𑄢𑄧𑄉𑄮 𑄦𑄮𑄖𑄩’’𑄖𑄨 𑄆𑄤𑄁 𑄛𑄎𑄧𑄚𑄧𑄖𑄩𑄖𑄨 𑄄𑄟𑄨𑄚𑄧 𑄥𑄪𑄈𑄧𑄛𑄑𑄨𑄛𑄘𑄧 𑄈𑄨𑄛𑄴𑄛𑄧𑄞𑄨𑄐𑄴𑄐𑄧 𑄇𑄗𑄨𑄖𑄧. 𑄘𑄪𑄖𑄨𑄡𑄤𑄧𑄢𑄬𑄚 𑄖𑄥𑄴𑄥 𑄥𑄟𑄴𑄛𑄡𑄮𑄉𑄤𑄩𑄢𑄨𑄡𑄥𑄴𑄥 𑄟𑄎𑄴𑄏𑄖𑄴𑄖𑄖𑄧𑄇𑄧𑄢𑄮 𑄇𑄗𑄨𑄖𑄮. 𑄥𑄮 𑄡𑄥𑄴𑄥 𑄦𑄨 𑄈𑄴𑄤𑄧𑄥𑄴𑄥𑄧𑄖𑄨 𑄆𑄖𑄴𑄗 𑄃𑄡𑄁 𑄥𑄋𑄴𑄈𑄬𑄛𑄖𑄴𑄗𑄮 – 𑄥𑄮 𑄛𑄪𑄉𑄴𑄉𑄣𑄮 𑄡𑄥𑄴𑄥 𑄘𑄪𑄇𑄴𑄈𑄚𑄨𑄘𑄧𑄚𑄥𑄴𑄥 𑄥𑄋𑄴𑄈𑄧𑄢𑄛𑄙𑄧𑄚𑄬𑄚 𑄤𑄨𑄢𑄧𑄉𑄮 𑄦𑄮𑄖𑄨, 𑄥𑄋𑄴𑄈𑄧𑄢𑄁 𑄖𑄖𑄴𑄗 𑄛𑄘𑄦𑄖𑄨, 𑄟𑄉𑄴𑄉𑄛𑄙𑄧𑄚𑄬𑄚 𑄛𑄘𑄦𑄖𑄨. 𑄡𑄥𑄴𑄥 𑄛𑄚 𑄘𑄪𑄇𑄴𑄈𑄚𑄨𑄘𑄧𑄚𑄥𑄴𑄥 𑄃𑄎𑄴𑄏𑄪𑄛𑄬𑄇𑄴𑄈𑄖𑄮 𑄅𑄛𑄬𑄇𑄴𑄈𑄁 𑄞𑄧𑄤𑄬𑄚𑄴𑄖𑄥𑄴𑄥 𑄤𑄨𑄢𑄧𑄉𑄮 𑄦𑄮𑄖𑄨, 𑄅𑄛𑄬𑄇𑄴𑄈𑄁 𑄖𑄖𑄴𑄗 𑄞𑄧𑄤𑄬𑄖𑄨, 𑄟𑄉𑄴𑄉𑄞𑄧𑄤𑄚𑄧𑄡 𑄞𑄧𑄤𑄬𑄖𑄨. 𑄖𑄥𑄴𑄥𑄧𑄖𑄨 𑄖𑄥𑄴𑄥 𑄛𑄪𑄉𑄴𑄉𑄣𑄥𑄴𑄥.

𑄷𑄷. 𑄛𑄑𑄨𑄝𑄘𑄴𑄙𑄌𑄨𑄖𑄴𑄖𑄮𑄖𑄨 𑄍𑄚𑄴𑄘𑄢𑄧𑄉𑄬𑄚 𑄝𑄘𑄴𑄙𑄌𑄨𑄖𑄴𑄖𑄮. 𑄖𑄨𑄝𑄴𑄝𑄌𑄴𑄍𑄚𑄴𑄘𑄮𑄖𑄨 𑄝𑄦𑄣𑄌𑄴𑄍𑄚𑄴𑄘𑄮. 𑄖𑄨𑄝𑄴𑄝𑄧𑄛𑄬𑄇𑄴𑄈𑄮𑄖𑄨 𑄝𑄦𑄣𑄛𑄖𑄴𑄗𑄚𑄮. 𑄥𑄚𑄴𑄖𑄨𑄑𑄴𑄒𑄚𑄴𑄖𑄨𑄚𑄴𑄖𑄨 𑄆𑄇𑄖𑄮 𑄖𑄨𑄑𑄴𑄒𑄚𑄴𑄖𑄨𑄁. 𑄥𑄐𑄴𑄎𑄉𑄴𑄊𑄚𑄴𑄖𑄨𑄚𑄴𑄖𑄨 𑄟𑄦𑄧𑄦𑄥𑄨𑄖𑄁 𑄦𑄥𑄟𑄧𑄚𑄁. 𑄥𑄁𑄦𑄥𑄚𑄴𑄖𑄨𑄚𑄴𑄖𑄨 𑄥𑄨𑄖𑄁 𑄇𑄪𑄢𑄪𑄟𑄧𑄚𑄁.

𑄆𑄤𑄟𑄬𑄤 𑄈𑄮, 𑄞𑄨𑄇𑄴𑄈𑄤𑄬𑄖𑄨 𑄆𑄖𑄴𑄗 𑄄𑄘𑄁 𑄃𑄮𑄛𑄟𑄴𑄟𑄤𑄨𑄞𑄧𑄤𑄚𑄁 – 𑄆𑄇𑄮 𑄦𑄨 𑄛𑄪𑄢𑄨𑄥𑄮 𑄆𑄇𑄨𑄥𑄴𑄥𑄧 𑄄𑄖𑄴𑄗𑄨𑄡𑄧 𑄥𑄧𑄢𑄖𑄴𑄖𑄮 𑄊𑄧𑄥𑄌𑄴𑄍𑄧𑄘𑄚𑄟𑄧𑄣𑄧𑄣𑄋𑄴𑄇𑄧𑄢𑄧𑄘𑄩𑄚𑄨 𑄘𑄖𑄴𑄤𑄧 𑄊𑄢𑄬 𑄤𑄧𑄥𑄬𑄖𑄨. 𑄥𑄧 𑄖𑄁 𑄃𑄖𑄨𑄌𑄢𑄨𑄖𑄴𑄤𑄧 𑄃𑄐𑄴𑄐𑄁 𑄥𑄬𑄤𑄖𑄨. 𑄥𑄮 ‘‘𑄚𑄫𑄚 𑄃𑄦𑄁 𑄃𑄥𑄴𑄥𑄧 𑄃𑄚𑄪𑄢𑄫𑄛𑄁 𑄥𑄇𑄴𑄇𑄧𑄢𑄁 𑄚 𑄇𑄢𑄮𑄟𑄩’’𑄖𑄨 𑄥𑄇𑄴𑄇𑄧𑄢𑄁 𑄤𑄓𑄴𑄔𑄬𑄥𑄨. 𑄥𑄧 𑄞𑄨𑄡𑄴𑄡𑄮𑄥𑄮𑄟𑄖𑄴𑄖𑄧𑄡 𑄃𑄖𑄨𑄌𑄢𑄖𑄨𑄡𑄬𑄤. 𑄥𑄮 – ‘‘𑄃𑄡𑄁 𑄥𑄇𑄴𑄇𑄢𑄨𑄡𑄟𑄧𑄚𑄧𑄛𑄨 𑄃𑄖𑄨𑄌𑄢𑄖𑄬𑄤, 𑄊𑄢𑄬 𑄟𑄬 𑄤𑄥𑄟𑄧𑄚𑄧 𑄃𑄚𑄖𑄴𑄗𑄟𑄴𑄛𑄨 𑄇𑄢𑄬𑄡𑄴𑄡, 𑄚𑄩𑄦𑄢𑄧𑄟𑄨 𑄚’’𑄚𑄴𑄖𑄨 𑄛𑄢𑄨𑄥𑄟𑄎𑄴𑄏𑄬 𑄃𑄣𑄁𑄤𑄌𑄚𑄩𑄡𑄁 𑄇𑄖𑄴𑄤𑄧 ‘‘𑄟𑄧 𑄛𑄪𑄚 𑄉𑄬𑄦𑄁 𑄛𑄧𑄤𑄨𑄥𑄩’’𑄖𑄨 𑄤𑄨𑄥𑄴𑄥𑄎𑄴𑄎𑄬𑄥𑄨. 𑄥𑄧 𑄇𑄬𑄚𑄌𑄨 𑄅𑄛𑄧𑄡𑄬𑄚 𑄖𑄬𑄚 𑄥𑄘𑄴𑄙𑄨𑄁 𑄥𑄚𑄴𑄗𑄤𑄁 𑄇𑄧𑄖𑄪𑄁 𑄃𑄥𑄇𑄴𑄇𑄮𑄚𑄴𑄖𑄩 𑄚𑄑𑄚𑄌𑄴𑄌𑄇𑄧𑄘𑄩𑄦𑄨 𑄥𑄘𑄴𑄙𑄨𑄁 𑄤𑄨𑄌𑄢𑄖𑄨. 𑄖𑄥𑄴𑄥 𑄛𑄪𑄢𑄨𑄥𑄥𑄴𑄥 𑄖𑄁 𑄘𑄨𑄥𑄴𑄤𑄧 𑄚𑄬𑄤 𑄅𑄛𑄴𑄛𑄎𑄴𑄎𑄖𑄨 𑄘𑄮𑄟𑄚𑄥𑄴𑄥𑄁, 𑄥𑄮𑄟𑄚𑄥𑄴𑄥𑄁 𑄛𑄚 𑄅𑄛𑄴𑄛𑄎𑄴𑄎𑄖𑄨.

𑄖𑄖𑄴𑄗 𑄛𑄪𑄢𑄨𑄥𑄥𑄴𑄥 𑄄𑄖𑄴𑄗𑄨𑄡𑄧 𑄥𑄧𑄢𑄖𑄴𑄖𑄇𑄧𑄣𑄮 𑄤𑄨𑄡 𑄄𑄟𑄥𑄴𑄥 𑄞𑄨𑄇𑄴𑄈𑄪𑄚𑄮 𑄃𑄖𑄴𑄖𑄞𑄧𑄤𑄬 𑄃𑄂𑄣𑄡𑄮. 𑄊𑄧𑄥𑄌𑄴𑄍𑄧𑄘𑄚𑄧𑄘𑄩𑄚𑄨 𑄘𑄖𑄴𑄤𑄧 𑄊𑄢𑄬 𑄤𑄥𑄧𑄛𑄚𑄇𑄧𑄣𑄮 𑄤𑄨𑄡 𑄃𑄖𑄴𑄖𑄞𑄧𑄤𑄥𑄴𑄥 𑄛𑄑𑄨𑄎𑄉𑄴𑄉𑄚𑄇𑄧𑄣𑄮. 𑄖𑄥𑄴𑄥𑄧 𑄃𑄖𑄨𑄌𑄢𑄕𑄇𑄧𑄣𑄮 𑄤𑄨𑄡 𑄎𑄉𑄴𑄉𑄨𑄡𑄟𑄧𑄚𑄥𑄴𑄥𑄬𑄤 𑄃𑄖𑄴𑄖𑄞𑄧𑄤𑄥𑄴𑄥 𑄛𑄨𑄖𑄴𑄖𑄛𑄇𑄮𑄛𑄧𑄘𑄩𑄚𑄁 𑄤𑄥𑄬𑄚 𑄥𑄧𑄝𑄧𑄙𑄖𑄧. ‘‘𑄃𑄖𑄴𑄖𑄚𑄮 𑄃𑄚𑄪𑄢𑄫𑄛𑄁 𑄥𑄇𑄴𑄇𑄧𑄢𑄁 𑄃𑄣𑄞𑄚𑄴𑄖𑄩 𑄃𑄖𑄨𑄌𑄢𑄖𑄩’’𑄖𑄨 𑄥𑄣𑄴𑄣𑄇𑄴𑄈𑄬𑄖𑄴𑄤𑄧 𑄥𑄇𑄴𑄇𑄧𑄢𑄤𑄓𑄴𑄔𑄚𑄁 𑄤𑄨𑄡 ‘‘𑄞𑄬𑄥𑄎𑄴𑄎𑄁 𑄃𑄣𑄞𑄚𑄴𑄖𑄮 𑄆𑄤𑄁 𑄦𑄮𑄖𑄩’’𑄖𑄨 𑄥𑄣𑄴𑄣𑄇𑄴𑄈𑄬𑄖𑄴𑄤𑄧 𑄞𑄬𑄥𑄎𑄴𑄎𑄇𑄢𑄕𑄇𑄧𑄣𑄮. 𑄥𑄇𑄴𑄇𑄧𑄢𑄬 𑄤𑄓𑄴𑄔𑄨𑄖𑄬𑄛𑄨 𑄛𑄪𑄚 𑄃𑄖𑄨𑄌𑄢𑄕𑄁 𑄤𑄨𑄡 𑄛𑄨𑄖𑄴𑄖𑄧𑄘𑄩𑄥𑄪 𑄆𑄇𑄥𑄴𑄥 𑄞𑄬𑄥𑄎𑄴𑄎𑄬 𑄇𑄢𑄨𑄡𑄟𑄧𑄚𑄬 𑄥𑄬𑄥𑄧𑄚𑄁 𑄛𑄇𑄮𑄛𑄤𑄥𑄬𑄚 𑄛𑄪𑄚 𑄥𑄧𑄝𑄧𑄙𑄖𑄧. 𑄛𑄢𑄨𑄥𑄟𑄎𑄴𑄏𑄬 𑄃𑄣𑄁𑄤𑄌𑄚𑄩𑄡𑄁 𑄇𑄖𑄴𑄤𑄧 𑄉𑄬𑄦𑄧 𑄚𑄨𑄇𑄴𑄇𑄓𑄴𑄔𑄚𑄁 𑄤𑄨𑄡 ‘‘𑄄𑄘𑄧𑄚𑄨 𑄖𑄬 𑄚𑄧𑄦𑄁 𑄘𑄧𑄥𑄮 𑄚 𑄇𑄟𑄴𑄟𑄇𑄢𑄮, 𑄃𑄚𑄟𑄖𑄉𑄴𑄉𑄬 𑄥𑄁𑄥𑄧𑄢𑄬 𑄖𑄁𑄡𑄬𑄤 𑄅𑄛𑄑𑄴𑄒𑄦𑄚𑄴𑄖𑄮 𑄤𑄨𑄌𑄢𑄨𑄁, 𑄇𑄮 𑄟𑄬 𑄖𑄡𑄧 𑄃𑄖𑄴𑄗𑄮, 𑄍𑄨𑄎𑄴𑄎 𑄤𑄧 𑄞𑄨𑄎𑄴𑄎 𑄤𑄧’’𑄖𑄨 𑄖𑄥𑄴𑄟𑄨𑄁 𑄃𑄚𑄛𑄬𑄇𑄴𑄈𑄖𑄁 𑄃𑄂𑄛𑄎𑄴𑄎𑄨𑄖𑄴𑄤𑄧 𑄤𑄩𑄢𑄨𑄡𑄁 𑄗𑄨𑄢𑄁 𑄇𑄖𑄴𑄤𑄧 𑄟𑄉𑄴𑄉𑄬𑄚 𑄇𑄨𑄣𑄬𑄥𑄥𑄟𑄪𑄉𑄴𑄊𑄧𑄖𑄚𑄁. 𑄚𑄑𑄚𑄌𑄴𑄌𑄇𑄧𑄘𑄩𑄦𑄨 𑄚𑄌𑄴𑄌𑄟𑄧𑄚𑄁 𑄤𑄨𑄌𑄢𑄚𑄴𑄖𑄨𑄁 𑄘𑄨𑄥𑄴𑄤𑄧 𑄡𑄗𑄧 𑄖𑄥𑄴𑄥 𑄛𑄪𑄢𑄨𑄥𑄥𑄴𑄥 𑄘𑄮𑄟𑄚𑄥𑄴𑄥𑄁 𑄚 𑄅𑄛𑄴𑄛𑄎𑄴𑄎𑄖𑄨, 𑄥𑄮𑄟𑄚𑄥𑄴𑄥𑄟𑄬𑄤 𑄅𑄛𑄴𑄛𑄎𑄴𑄎𑄖𑄨, 𑄆𑄤𑄟𑄬𑄤 𑄄𑄟𑄥𑄴𑄥 𑄞𑄨𑄇𑄴𑄈𑄪𑄚𑄮 𑄃𑄢𑄦𑄖𑄴𑄖𑄁 𑄛𑄖𑄴𑄖𑄥𑄴𑄥 𑄛𑄨𑄖𑄴𑄖𑄛𑄇𑄮𑄛𑄧𑄘𑄩𑄚𑄁 𑄤𑄥𑄬𑄚 𑄃𑄂𑄝𑄧𑄙𑄨𑄇𑄁 𑄃𑄖𑄴𑄖𑄞𑄧𑄤𑄁 𑄘𑄨𑄥𑄴𑄤𑄧 𑄘𑄮𑄟𑄚𑄥𑄴𑄥𑄁 𑄚 𑄅𑄛𑄴𑄛𑄎𑄴𑄎𑄖𑄨, ‘‘𑄟𑄪𑄌𑄴𑄌𑄨𑄥𑄴𑄥𑄧𑄟𑄨 𑄤𑄖 𑄈𑄚𑄴𑄙𑄛𑄢𑄨𑄦𑄧𑄢𑄘𑄪𑄇𑄴𑄈𑄖𑄮’’𑄖𑄨 𑄥𑄮𑄟𑄚𑄥𑄴𑄥𑄟𑄬𑄤 𑄅𑄛𑄴𑄛𑄎𑄴𑄎𑄖𑄩𑄖𑄨. 𑄃𑄡𑄁 𑄛𑄚 𑄅𑄛𑄟𑄧 ‘‘𑄛𑄑𑄨𑄝𑄘𑄴𑄙𑄌𑄨𑄖𑄴𑄖𑄥𑄴𑄥 𑄘𑄮𑄟𑄚𑄥𑄴𑄥𑄁 𑄅𑄛𑄴𑄛𑄎𑄴𑄎𑄖𑄨, 𑄃𑄛𑄴𑄛𑄑𑄨𑄝𑄘𑄴𑄙𑄌𑄨𑄖𑄴𑄖𑄥𑄴𑄥 𑄚𑄖𑄴𑄗𑄬𑄖𑄚𑄴𑄖𑄨 𑄐𑄖𑄴𑄤𑄧 𑄄𑄖𑄴𑄗𑄨𑄡𑄧 𑄍𑄚𑄴𑄘𑄢𑄧𑄉𑄁 𑄛𑄎𑄦𑄖𑄨, 𑄆𑄤𑄟𑄡𑄁 𑄞𑄨𑄇𑄴𑄈𑄪 𑄥𑄋𑄴𑄈𑄧𑄢𑄁 𑄤𑄧 𑄛𑄘𑄦𑄚𑄴𑄖𑄥𑄴𑄥 𑄅𑄛𑄬𑄇𑄴𑄈𑄁 𑄤𑄧 𑄞𑄧𑄤𑄬𑄚𑄴𑄖𑄥𑄴𑄥 𑄘𑄪𑄇𑄴𑄈𑄚𑄨𑄘𑄧𑄚𑄁 𑄛𑄦𑄩𑄡𑄖𑄨, 𑄚𑄮 𑄃𑄐𑄴𑄐𑄗𑄧𑄖𑄨 𑄐𑄖𑄴𑄤𑄧 𑄖𑄘𑄪𑄞𑄡𑄁 𑄥𑄟𑄴𑄛𑄧𑄘𑄬𑄚𑄴𑄖𑄮 𑄘𑄪𑄇𑄴𑄈𑄚𑄨𑄘𑄧𑄚𑄁 𑄛𑄎𑄦𑄖𑄩’’𑄖𑄨 𑄆𑄖𑄟𑄖𑄴𑄗𑄁 𑄤𑄨𑄞𑄧𑄤𑄬𑄖𑄪𑄁 𑄃𑄂𑄉𑄖𑄧𑄖𑄨 𑄤𑄬𑄘𑄨𑄖𑄝𑄴𑄝𑄧.

𑄷𑄸. 𑄡𑄗𑄧 𑄥𑄪𑄈𑄁 𑄈𑄮 𑄟𑄬 𑄤𑄨𑄦𑄢𑄖𑄮𑄖𑄨 𑄡𑄬𑄚 𑄥𑄪𑄈𑄬𑄚 𑄤𑄨𑄦𑄢𑄨𑄖𑄪𑄁 𑄄𑄌𑄴𑄍𑄧𑄟𑄨 𑄖𑄬𑄚, 𑄟𑄬 𑄤𑄨𑄦𑄢𑄖𑄮. 𑄛𑄘𑄦𑄖𑄮𑄖𑄨 𑄛𑄬𑄥𑄬𑄚𑄴𑄖𑄥𑄴𑄥. 𑄆𑄖𑄴𑄗 𑄌 𑄡𑄥𑄴𑄥 𑄥𑄪𑄈𑄧 𑄛𑄑𑄨𑄛𑄘𑄧 𑄃𑄥𑄛𑄴𑄛𑄧𑄡𑄧, 𑄥𑄪𑄈𑄪𑄟𑄌𑄩𑄤𑄢𑄧𑄚𑄨 𑄙𑄧𑄢𑄬𑄚𑄴𑄖𑄥𑄴𑄥 𑄛𑄧𑄥𑄧𑄘𑄨𑄇𑄬 𑄥𑄬𑄚𑄧𑄥𑄚𑄬 𑄤𑄥𑄚𑄴𑄖𑄥𑄴𑄥 𑄌𑄨𑄖𑄴𑄖𑄁 𑄤𑄨𑄇𑄴𑄈𑄨𑄛𑄖𑄨, 𑄘𑄪𑄇𑄴𑄈𑄧 𑄛𑄑𑄨𑄛𑄘𑄧 𑄥𑄛𑄴𑄛𑄧𑄡𑄧, 𑄍𑄨𑄚𑄴𑄚𑄞𑄨𑄚𑄴𑄚𑄧𑄚𑄨 𑄗𑄫𑄣𑄌𑄩𑄤𑄢𑄧𑄚𑄨 𑄙𑄧𑄢𑄬𑄚𑄴𑄖𑄥𑄴𑄥 𑄥𑄪𑄥𑄧𑄚𑄢𑄪𑄇𑄴𑄈𑄟𑄫𑄣𑄧𑄘𑄩𑄥𑄪 𑄤𑄥𑄚𑄴𑄖𑄥𑄴𑄥 𑄌𑄨𑄖𑄴𑄖𑄁 𑄆𑄇𑄉𑄴𑄉𑄁 𑄦𑄮𑄖𑄨, 𑄖𑄁 𑄥𑄚𑄴𑄙𑄧𑄡𑄬𑄖𑄁 𑄤𑄪𑄖𑄴𑄖𑄁.

𑄆𑄤𑄟𑄬𑄤 𑄈𑄮𑄖𑄨 𑄆𑄖𑄴𑄗 𑄄𑄘𑄁 𑄃𑄮𑄛𑄟𑄴𑄟𑄥𑄁𑄥𑄚𑄴𑄘𑄚𑄁, 𑄅𑄥𑄪𑄇𑄧𑄢𑄮 𑄤𑄨𑄡 𑄦𑄨 𑄎𑄧𑄖𑄨𑄎𑄢𑄧𑄟𑄢𑄕𑄞𑄩𑄖𑄮 𑄡𑄮𑄉𑄩 𑄘𑄑𑄴𑄒𑄝𑄴𑄝𑄮, 𑄤𑄋𑄴𑄇𑄇𑄪𑄑𑄨𑄣𑄎𑄨𑄟𑄴𑄦𑄖𑄬𑄎𑄚𑄁 𑄤𑄨𑄡 𑄤𑄋𑄴𑄇𑄇𑄪𑄑𑄨𑄣𑄎𑄨𑄟𑄴𑄦𑄌𑄨𑄖𑄴𑄖𑄁, 𑄘𑄴𑄤𑄬 𑄃𑄣𑄧𑄖𑄧 𑄤𑄨𑄡 𑄇𑄧𑄡𑄨𑄇𑄌𑄬𑄖𑄥𑄨𑄇𑄤𑄩𑄢𑄨𑄡𑄁, 𑄖𑄬𑄎𑄚𑄁 𑄅𑄎𑄪𑄁 𑄇𑄢𑄮𑄚𑄴𑄖𑄥𑄴𑄥 𑄇𑄐𑄴𑄎𑄨𑄇𑄖𑄬𑄣𑄁 𑄤𑄨𑄡 𑄥𑄘𑄴𑄙𑄧, 𑄚𑄟𑄚𑄘𑄕𑄴𑄓𑄇𑄮 𑄤𑄨𑄡 𑄣𑄮𑄇𑄪𑄖𑄴𑄖𑄢𑄟𑄉𑄴𑄉𑄮, 𑄅𑄥𑄴𑄥𑄪𑄇𑄧𑄢𑄥𑄴𑄥 𑄤𑄋𑄴𑄇𑄇𑄪𑄑𑄨𑄣𑄎𑄨𑄟𑄴𑄦𑄖𑄬𑄎𑄚𑄁 𑄇𑄐𑄴𑄎𑄨𑄇𑄖𑄬𑄣𑄬𑄚 𑄥𑄨𑄚𑄬𑄦𑄬𑄖𑄴𑄤𑄧 𑄃𑄣𑄧𑄖𑄬𑄥𑄪 𑄖𑄧𑄛𑄬𑄖𑄴𑄤𑄧 𑄚𑄟𑄚𑄘𑄕𑄴𑄓𑄇𑄬𑄚 𑄅𑄎𑄪𑄇𑄢𑄕𑄁 𑄤𑄨𑄡 𑄄𑄟𑄥𑄴𑄥 𑄞𑄨𑄇𑄴𑄈𑄪𑄚𑄮 𑄤𑄋𑄴𑄇𑄇𑄪𑄑𑄨𑄣𑄎𑄨𑄟𑄴𑄦𑄌𑄨𑄖𑄴𑄖𑄁 𑄥𑄘𑄴𑄙𑄧𑄡 𑄥𑄨𑄚𑄬𑄦𑄬𑄖𑄴𑄤𑄧 𑄇𑄧𑄡𑄨𑄇𑄌𑄬𑄖𑄥𑄨𑄇𑄤𑄩𑄢𑄨𑄡𑄬𑄚 𑄖𑄧𑄛𑄬𑄖𑄴𑄤𑄧 𑄣𑄮𑄇𑄪𑄖𑄴𑄖𑄢𑄟𑄉𑄴𑄉𑄬𑄚 𑄅𑄎𑄪𑄇𑄢𑄕𑄁, 𑄅𑄥𑄪𑄇𑄧𑄢𑄥𑄴𑄥𑄬𑄤 𑄆𑄤𑄁 𑄅𑄎𑄪𑄇𑄖𑄬𑄚 𑄖𑄬𑄎𑄚𑄬𑄚 𑄥𑄛𑄖𑄴𑄖𑄁 𑄤𑄨𑄎𑄴𑄏𑄨𑄖𑄴𑄤𑄧 𑄥𑄟𑄴𑄛𑄖𑄴𑄖𑄨𑄃𑄚𑄪𑄞𑄤𑄚𑄁 𑄤𑄨𑄡 𑄄𑄟𑄥𑄴𑄥 𑄡𑄮𑄉𑄨𑄚𑄮 𑄖𑄗𑄧 𑄅𑄎𑄪𑄇𑄖𑄬𑄚 𑄌𑄨𑄖𑄴𑄖𑄬𑄚 𑄇𑄨𑄣𑄬𑄥𑄉𑄕𑄁 𑄤𑄨𑄎𑄴𑄏𑄨𑄖𑄴𑄤𑄧 𑄛𑄧𑄥𑄧𑄘𑄨𑄇𑄬 𑄥𑄬𑄚𑄧𑄥𑄚𑄬 𑄚𑄨𑄢𑄮𑄙𑄤𑄢𑄖𑄣𑄉𑄖𑄥𑄴𑄥 𑄜𑄣𑄥𑄟𑄧𑄛𑄖𑄴𑄖𑄨𑄥𑄪𑄈𑄧𑄚𑄪𑄞𑄤𑄚𑄁 𑄘𑄑𑄴𑄒𑄝𑄴𑄝𑄁. 𑄄𑄙 𑄖𑄗𑄧𑄉𑄖𑄮 𑄥𑄪𑄈𑄧𑄛𑄑𑄨𑄛𑄘𑄧𑄈𑄨𑄛𑄴𑄛𑄧𑄞𑄨𑄐𑄴𑄐𑄞𑄨𑄇𑄴𑄈𑄪𑄚𑄮, 𑄘𑄪𑄇𑄴𑄈𑄧𑄛𑄑𑄨𑄛𑄘𑄧𑄘𑄚𑄴𑄙𑄧𑄞𑄨𑄐𑄴𑄐𑄞𑄨𑄇𑄴𑄈𑄪𑄚𑄮 𑄌 𑄛𑄑𑄨𑄛𑄖𑄴𑄖𑄨𑄡𑄮 𑄇𑄗𑄨𑄖𑄧, 𑄄𑄖𑄢𑄬𑄥𑄁 𑄘𑄴𑄤𑄨𑄚𑄴𑄚𑄁 𑄚 𑄇𑄗𑄨𑄖𑄧, 𑄖𑄧 𑄇𑄗𑄬𑄖𑄪𑄁 𑄄𑄟𑄁 𑄘𑄬𑄥𑄚𑄁 𑄃𑄂𑄢𑄞𑄨. 𑄄𑄟𑄧𑄥𑄪 𑄤𑄧 𑄘𑄴𑄤𑄩𑄥𑄪 𑄇𑄗𑄨𑄖𑄧𑄥𑄪 𑄄𑄖𑄢𑄧𑄛𑄨 𑄇𑄗𑄨𑄖𑄧𑄤 𑄦𑄮𑄚𑄴𑄖𑄨, 𑄃𑄂𑄉𑄟𑄚𑄩𑄡𑄛𑄑𑄨𑄛𑄘𑄧 𑄛𑄚 𑄚 𑄇𑄗𑄨𑄖𑄧, 𑄖𑄁 𑄇𑄗𑄬𑄖𑄪𑄁 𑄄𑄟𑄁 𑄘𑄬𑄥𑄚𑄁 𑄃𑄂𑄢𑄞𑄨. 𑄥𑄦𑄧𑄉𑄟𑄚𑄩𑄡𑄧𑄛𑄨 𑄤𑄧 𑄛𑄑𑄨𑄛𑄘𑄧 𑄇𑄗𑄨𑄖𑄧𑄤, 𑄃𑄘𑄥𑄴𑄥𑄨𑄖𑄁 𑄛𑄚 𑄆𑄇𑄁 𑄝𑄪𑄘𑄴𑄙𑄪𑄛𑄴𑄛𑄧𑄘𑄁 𑄘𑄥𑄴𑄥𑄬𑄖𑄴𑄤𑄧 𑄆𑄇𑄥𑄴𑄥 𑄇𑄪𑄣𑄛𑄪𑄖𑄴𑄖𑄥𑄴𑄥 𑄚𑄨𑄇𑄴𑄈𑄟𑄚𑄘𑄬𑄥𑄚𑄁 𑄃𑄢𑄦𑄖𑄴𑄖𑄬𑄚 𑄤𑄨𑄚𑄨𑄤𑄑𑄴𑄑𑄬𑄥𑄴𑄥𑄧𑄟𑄩𑄖𑄨 𑄘𑄥𑄴𑄥𑄬𑄖𑄪𑄁 𑄄𑄟𑄁 𑄘𑄬𑄥𑄚𑄁 𑄃𑄂𑄢𑄞𑄨. 𑄥𑄬𑄥𑄁 𑄥𑄝𑄴𑄝𑄖𑄴𑄗 𑄅𑄖𑄴𑄖𑄧𑄚𑄟𑄬𑄤𑄧𑄖𑄨.

𑄛𑄛𑄐𑄴𑄌𑄥𑄫𑄘𑄚𑄨𑄡𑄧 𑄟𑄎𑄴𑄏𑄨𑄟𑄚𑄨𑄇𑄧𑄡𑄑𑄴𑄒𑄇𑄗𑄧𑄡

𑄘𑄬𑄤𑄘𑄦𑄥𑄪𑄖𑄴𑄖𑄤𑄕𑄴𑄕𑄚𑄧 𑄚𑄨𑄑𑄴𑄒𑄨𑄖𑄧.

𑄸. 𑄛𑄐𑄴𑄌𑄖𑄴𑄖𑄡𑄥𑄪𑄖𑄴𑄖𑄤𑄕𑄴𑄕𑄚𑄧

𑄸𑄷. 𑄆𑄤𑄁 𑄟𑄬 𑄥𑄪𑄖𑄚𑄴𑄖𑄨 𑄛𑄐𑄴𑄌𑄖𑄴𑄖𑄡𑄥𑄪𑄖𑄴𑄖𑄁. 𑄖𑄖𑄴𑄗 𑄆𑄇𑄬𑄖𑄨 𑄆𑄇𑄌𑄴𑄌𑄬. 𑄥𑄟𑄕𑄝𑄴𑄢𑄧𑄦𑄴𑄟𑄕𑄧𑄖𑄨 𑄛𑄢𑄨𑄝𑄴𑄝𑄎𑄪𑄛𑄉𑄖𑄞𑄧𑄤𑄬𑄚 𑄥𑄟𑄕𑄧 𑄎𑄧𑄖𑄨𑄡𑄧 𑄝𑄴𑄢𑄧𑄦𑄴𑄟𑄕𑄧, 𑄣𑄮𑄇𑄬𑄚 𑄤𑄧 𑄥𑄟𑄕𑄧𑄖𑄨 𑄌 𑄝𑄴𑄢𑄧𑄦𑄴𑄟𑄕𑄧𑄖𑄨 𑄌 𑄆𑄤𑄁 𑄥𑄟𑄴𑄟𑄖𑄧. 𑄃𑄛𑄢𑄚𑄴𑄖𑄁 𑄇𑄛𑄴𑄛𑄬𑄖𑄴𑄤𑄧 𑄤𑄨𑄇𑄛𑄴𑄛𑄬𑄖𑄴𑄤𑄧 𑄉𑄕𑄴𑄦𑄚𑄴𑄖𑄩𑄖𑄨 𑄃𑄛𑄢𑄚𑄴𑄖𑄇𑄛𑄴𑄛𑄨𑄇𑄧. 𑄃𑄛𑄢𑄚𑄴𑄖𑄇𑄛𑄴𑄛𑄮 𑄤𑄧 𑄆𑄖𑄬𑄥𑄁 𑄃𑄖𑄴𑄗𑄩𑄖𑄨𑄛𑄨 𑄃𑄛𑄢𑄚𑄴𑄖𑄇𑄛𑄴𑄛𑄨𑄇𑄧. 𑄆𑄖𑄴𑄗 𑄌 𑄃𑄚𑄴𑄖𑄮𑄖𑄨 ‘‘𑄥𑄇𑄴𑄇𑄧𑄡𑄮 𑄈𑄮, 𑄃𑄂𑄤𑄪𑄥𑄮, 𑄆𑄇𑄮 𑄃𑄚𑄴𑄖𑄮’’𑄖𑄨𑄃𑄂𑄘𑄩𑄥𑄪 (𑄃. 𑄚𑄨. 𑄼.𑄼𑄷) 𑄤𑄨𑄡 𑄄𑄙 𑄇𑄮𑄑𑄴𑄒𑄧𑄥𑄮 𑄃𑄙𑄨𑄛𑄴𑄛𑄬𑄖𑄮. 𑄇𑄛𑄴𑄛𑄮𑄖𑄨 𑄖𑄕𑄴𑄦𑄧𑄘𑄨𑄑𑄴𑄒𑄨𑄡𑄮. 𑄤𑄪𑄖𑄴𑄖𑄟𑄴𑄛𑄨 𑄌𑄬𑄖𑄁 ‘‘𑄇𑄛𑄴𑄛𑄮𑄖𑄨 𑄅𑄘𑄴𑄘𑄧𑄚𑄖𑄮 𑄘𑄴𑄤𑄬 𑄇𑄛𑄴𑄛𑄧 𑄖𑄕𑄴𑄦𑄧𑄇𑄛𑄴𑄛𑄮 𑄌 𑄘𑄨𑄑𑄴𑄒𑄨𑄇𑄛𑄴𑄛𑄮 𑄌𑄧’’𑄖𑄨. 𑄖𑄥𑄴𑄟𑄧 𑄖𑄕𑄴𑄦𑄧𑄘𑄨𑄑𑄴𑄒𑄨𑄤𑄥𑄬𑄚 𑄃𑄚𑄧𑄉𑄖𑄁 𑄈𑄚𑄴𑄙𑄇𑄮𑄑𑄴𑄒𑄧𑄥𑄁 𑄇𑄛𑄴𑄛𑄬𑄖𑄴𑄤𑄧 𑄒𑄨𑄖𑄧𑄖𑄨 𑄃𑄛𑄢𑄚𑄴𑄖𑄇𑄛𑄴𑄛𑄨𑄇𑄧𑄖𑄨 𑄆𑄤𑄟𑄬𑄖𑄴𑄗 𑄃𑄖𑄴𑄗𑄮 𑄘𑄑𑄴𑄒𑄝𑄴𑄝𑄮. 𑄖𑄬𑄥𑄁 𑄆𑄤𑄁 𑄃𑄛𑄢𑄚𑄴𑄖𑄁 𑄇𑄛𑄴𑄛𑄬𑄖𑄴𑄤𑄧 𑄒𑄨𑄖𑄧𑄚𑄁 𑄛𑄪𑄚𑄛𑄴𑄛𑄪𑄚𑄁 𑄅𑄛𑄴𑄛𑄎𑄴𑄎𑄚𑄤𑄥𑄬𑄚 𑄃𑄛𑄢𑄚𑄴𑄖𑄟𑄬𑄤 𑄃𑄚𑄪𑄉𑄖𑄧 𑄘𑄨𑄑𑄴𑄒𑄩𑄖𑄨 𑄃𑄛𑄢𑄚𑄴𑄖𑄧𑄚𑄪𑄘𑄨𑄑𑄴𑄒𑄨𑄚𑄮. 𑄖𑄬 𑄆𑄤𑄁𑄘𑄨𑄑𑄴𑄒𑄨𑄚𑄮 𑄖𑄁 𑄃𑄛𑄢𑄚𑄴𑄖𑄁 𑄃𑄂𑄢𑄝𑄴𑄞 𑄃𑄂𑄉𑄟𑄴𑄟 𑄛𑄑𑄨𑄌𑄴𑄌 𑄃𑄐𑄴𑄐𑄟𑄴𑄛𑄨 𑄎𑄚𑄁 𑄘𑄨𑄑𑄴𑄒𑄨𑄉𑄖𑄨𑄇𑄁 𑄇𑄢𑄮𑄚𑄴𑄖𑄧 𑄃𑄚𑄬𑄇𑄤𑄨𑄦𑄨𑄖𑄧𑄚𑄨 𑄃𑄙𑄨𑄤𑄪𑄖𑄴𑄖𑄨𑄛𑄘𑄧𑄚𑄨 𑄃𑄞𑄨𑄤𑄘𑄚𑄴𑄖𑄨. 𑄃𑄚𑄬𑄇𑄤𑄨𑄦𑄨𑄖𑄧𑄚𑄩𑄖𑄨 𑄃𑄚𑄬𑄇𑄤𑄨𑄙𑄧𑄚𑄨. 𑄃𑄙𑄨𑄤𑄪𑄖𑄴𑄖𑄨𑄛𑄘𑄧𑄚𑄩𑄖𑄨 𑄃𑄙𑄨𑄤𑄌𑄚𑄛𑄘𑄧𑄚𑄨. 𑄃𑄗 𑄤𑄧 𑄞𑄫𑄖𑄟𑄖𑄴𑄗𑄁 𑄃𑄙𑄨𑄞𑄤𑄨𑄖𑄴𑄤𑄧 𑄡𑄗𑄧𑄥𑄞𑄧𑄤𑄖𑄮 𑄃𑄉𑄴𑄉𑄦𑄬𑄖𑄴𑄤𑄧 𑄤𑄖𑄴𑄖𑄚𑄖𑄮 𑄃𑄙𑄨𑄤𑄪𑄖𑄴𑄖𑄨𑄡𑄮𑄖𑄨 𑄘𑄨𑄑𑄴𑄒𑄨𑄡𑄮 𑄤𑄪𑄌𑄴𑄌𑄚𑄴𑄖𑄨, 𑄃𑄙𑄨𑄤𑄪𑄖𑄴𑄖𑄩𑄚𑄁 𑄛𑄘𑄧𑄚𑄨 𑄃𑄙𑄨𑄤𑄪𑄖𑄴𑄖𑄨𑄛𑄘𑄧𑄚𑄨, 𑄘𑄨𑄑𑄴𑄒𑄨𑄘𑄩𑄛𑄇𑄧𑄚𑄨 𑄤𑄌𑄚𑄧𑄚𑄩𑄖𑄨 𑄃𑄖𑄴𑄗𑄮.

𑄥𑄐𑄴𑄐𑄩𑄖𑄨 𑄥𑄐𑄴𑄐𑄧𑄥𑄟𑄋𑄴𑄉𑄩. 𑄃𑄢𑄮𑄉𑄮𑄖𑄨 𑄚𑄨𑄌𑄴𑄌𑄮. 𑄄𑄖𑄴𑄗𑄬𑄇𑄬𑄖𑄨 𑄄𑄖𑄴𑄗𑄁 𑄆𑄇𑄬, 𑄆𑄤𑄟𑄬𑄇𑄬𑄖𑄨 𑄃𑄖𑄴𑄗𑄮. 𑄄𑄟𑄨𑄚𑄧 𑄥𑄮𑅄𑄥 𑄥𑄐𑄴𑄐𑄩𑄤𑄧𑄘𑄧 𑄇𑄗𑄨𑄖𑄧, 𑄃𑄥𑄐𑄴𑄐𑄩𑄖𑄨 𑄄𑄟𑄨𑄚𑄧 𑄃𑄑𑄴𑄒 𑄃𑄥𑄐𑄴𑄐𑄩𑄤𑄧𑄘𑄧, 𑄚𑄬𑄤𑄥𑄐𑄴𑄐𑄩𑄚𑄧𑄥𑄐𑄴𑄐𑄩𑄖𑄨 𑄄𑄟𑄨𑄚𑄧 𑄃𑄑𑄴𑄒 𑄚𑄬𑄤𑄥𑄐𑄴𑄐𑄩𑄚𑄧𑄥𑄐𑄴𑄐𑄩𑄤𑄧𑄘𑄧, 𑄥𑄖𑄮 𑄤𑄧 𑄛𑄚 𑄥𑄖𑄴𑄖𑄥𑄴𑄥𑄧𑄖𑄨 𑄄𑄟𑄨𑄚𑄧 𑄥𑄖𑄴𑄖 𑄅𑄌𑄴𑄍𑄬𑄘𑄤𑄧𑄘𑄧. 𑄖𑄖𑄴𑄗 𑄥𑄖𑄮𑄖𑄨 𑄤𑄨𑄎𑄴𑄎𑄟𑄧𑄚𑄥𑄴𑄥. 𑄅𑄌𑄴𑄍𑄬𑄘𑄚𑄴𑄖𑄨 𑄅𑄛𑄌𑄴𑄍𑄬𑄘𑄁. 𑄤𑄨𑄚𑄧𑄥𑄚𑄴𑄖𑄨 𑄃𑄘𑄥𑄴𑄥𑄚𑄁. 𑄤𑄨𑄞𑄤𑄚𑄴𑄖𑄨 𑄞𑄤𑄤𑄨𑄉𑄟𑄁. 𑄥𑄝𑄴𑄝𑄧𑄚𑄬𑄖𑄧𑄚𑄨 𑄃𑄐𑄴𑄐𑄟𑄐𑄴𑄐𑄤𑄬𑄤𑄌𑄚𑄧𑄚𑄬𑄤. 𑄘𑄨𑄑𑄴𑄒𑄙𑄟𑄴𑄟𑄚𑄨𑄝𑄴𑄝𑄧𑄚𑄁 𑄤𑄧𑄖𑄨 𑄄𑄟𑄨𑄚𑄧 𑄛𑄐𑄴𑄌 𑄘𑄨𑄑𑄴𑄒𑄙𑄟𑄴𑄟𑄚𑄨𑄝𑄴𑄝𑄧𑄚𑄤𑄧𑄘𑄧 𑄇𑄗𑄨𑄖𑄧. 𑄖𑄖𑄴𑄗 𑄘𑄨𑄑𑄴𑄒𑄙𑄟𑄴𑄟𑄮𑄖𑄨 𑄛𑄌𑄴𑄌𑄇𑄴𑄈𑄙𑄟𑄴𑄟𑄮 𑄤𑄪𑄌𑄴𑄌𑄖𑄨, 𑄖𑄖𑄴𑄗 𑄖𑄖𑄴𑄗 𑄛𑄑𑄨𑄣𑄘𑄴𑄙𑄃𑄖𑄴𑄖𑄞𑄧𑄤𑄥𑄴𑄥𑄬𑄖𑄁 𑄃𑄙𑄨𑄤𑄌𑄚𑄁. 𑄘𑄨𑄑𑄴𑄒𑄙𑄟𑄴𑄟𑄬 𑄚𑄨𑄝𑄴𑄝𑄧𑄚𑄁 𑄘𑄨𑄑𑄴𑄒𑄙𑄟𑄴𑄟𑄚𑄨𑄝𑄴𑄝𑄧𑄚𑄁, 𑄄𑄟𑄥𑄴𑄟𑄨𑄁𑄡𑄬𑄤 𑄃𑄖𑄴𑄖𑄞𑄧𑄤𑄬 𑄘𑄪𑄇𑄴𑄈𑄤𑄫𑄛𑄥𑄟𑄚𑄴𑄖𑄨 𑄃𑄖𑄴𑄗𑄮. 𑄥𑄚𑄴𑄖𑄁 𑄤𑄧𑄖𑄨 𑄥𑄐𑄴𑄐𑄩𑄖𑄨𑄃𑄂𑄘𑄨𑄤𑄥𑄬𑄚 𑄖𑄩𑄦𑄧𑄇𑄧𑄢𑄬𑄦𑄨 𑄥𑄚𑄴𑄖𑄁. 𑄖𑄩𑄕𑄨 𑄦𑄮𑄚𑄴𑄖𑄩𑄖𑄨 𑄥𑄐𑄴𑄐𑄩 𑄃𑄖𑄴𑄖𑄧𑄖𑄨𑄃𑄂𑄘𑄩𑄚𑄨 𑄥𑄚𑄴𑄖𑄃𑄖𑄴𑄖𑄤𑄥𑄬𑄚 𑄆𑄇𑄁, 𑄄𑄖𑄢𑄧𑄚𑄨 𑄘𑄴𑄤𑄬𑄖𑄨 𑄆𑄤𑄁 𑄖𑄩𑄕𑄨.

𑄸𑄸. 𑄢𑄫𑄛𑄨𑄁 𑄤𑄧𑄖𑄨 𑄇𑄢𑄎𑄢𑄫𑄛𑄬𑄚 𑄤𑄧 𑄇𑄥𑄨𑄕𑄢𑄫𑄛𑄬𑄚 𑄤𑄧 𑄢𑄫𑄛𑄨𑄁. 𑄖𑄖𑄴𑄗 𑄣𑄧𑄞𑄩 𑄇𑄥𑄨𑄕𑄢𑄫𑄛𑄁 𑄃𑄖𑄴𑄖𑄧𑄖𑄨 𑄉𑄕𑄴𑄦𑄧𑄖𑄨, 𑄖𑄇𑄴𑄇𑄩 𑄅𑄞𑄮𑄛𑄨 𑄢𑄫𑄛𑄧𑄚𑄨 𑄉𑄕𑄴𑄦𑄧𑄖𑄨𑄡𑄬𑄤. 𑄃𑄢𑄫𑄛𑄨𑄚𑄴𑄖𑄨 𑄃𑄢𑄫𑄛𑄥𑄟𑄧𑄛𑄖𑄴𑄖𑄨𑄚𑄨𑄟𑄨𑄖𑄴𑄖𑄁 𑄤𑄧, 𑄒𑄛𑄬𑄖𑄴𑄤𑄧 𑄥𑄐𑄴𑄐𑄧𑄇𑄴𑄈𑄚𑄴𑄙𑄁 𑄥𑄬𑄥𑄃𑄢𑄫𑄛𑄙𑄟𑄴𑄟𑄬 𑄤𑄧 𑄃𑄖𑄴𑄖𑄧𑄖𑄨 𑄛𑄐𑄴𑄐𑄛𑄬𑄚𑄴𑄖𑄧 𑄣𑄧𑄞𑄨𑄚𑄮𑄛𑄨 𑄖𑄇𑄴𑄇𑄨𑄇𑄧𑄛𑄨 𑄆𑄤𑄁 𑄛𑄐𑄴𑄐𑄛𑄬𑄚𑄴𑄖𑄨. 𑄖𑄖𑄨𑄡𑄘𑄨𑄑𑄴𑄒𑄨 𑄛𑄚 𑄟𑄨𑄥𑄴𑄥𑄇𑄉𑄧𑄦𑄤𑄥𑄬𑄚 𑄛𑄤𑄖𑄴𑄖𑄧, 𑄌𑄖𑄪𑄖𑄴𑄗𑄧 𑄖𑄇𑄴𑄇𑄉𑄧𑄦𑄬𑄚𑄬𑄤. 𑄘𑄪𑄖𑄨𑄡𑄌𑄖𑄪𑄇𑄴𑄇𑄬 𑄛𑄒𑄟𑄘𑄨𑄑𑄴𑄒𑄨 𑄥𑄟𑄧𑄛𑄚𑄴𑄚𑄇𑄤𑄧𑄢𑄬𑄚 𑄇𑄗𑄨𑄖𑄧, 𑄘𑄪𑄖𑄨𑄡𑄘𑄨𑄑𑄴𑄒𑄨 𑄃𑄥𑄟𑄧𑄛𑄚𑄴𑄚𑄇𑄤𑄧𑄢𑄬𑄚, 𑄖𑄖𑄨𑄡𑄘𑄨𑄑𑄴𑄒𑄨 𑄥𑄪𑄛𑄴𑄛𑄟𑄖𑄴𑄖𑄬𑄚 𑄤𑄧 𑄥𑄢𑄧𑄤𑄟𑄖𑄴𑄖𑄬𑄚 𑄤𑄧 𑄇𑄥𑄨𑄕𑄛𑄢𑄨𑄇𑄟𑄴𑄟𑄤𑄥𑄬𑄚, 𑄌𑄖𑄪𑄖𑄴𑄗𑄘𑄨𑄑𑄴𑄒𑄨 𑄤𑄨𑄛𑄪𑄣𑄇𑄥𑄨𑄕𑄤𑄥𑄬𑄚 𑄇𑄗𑄨𑄖𑄧𑄖𑄨 𑄤𑄬𑄘𑄨𑄖𑄝𑄴𑄝𑄧.

𑄆𑄖𑄁 𑄤𑄧 𑄛𑄚𑄬𑄇𑄬𑄥𑄁 𑄅𑄛𑄧𑄖𑄨𑄤𑄖𑄴𑄖𑄖𑄚𑄴𑄖𑄨 𑄥𑄐𑄴𑄐𑄩𑄖𑄨𑄛𑄘𑄬𑄚 𑄥𑄋𑄴𑄈𑄬𑄛𑄖𑄮 𑄤𑄪𑄖𑄴𑄖𑄁 𑄥𑄐𑄴𑄐𑄧𑄥𑄖𑄴𑄖𑄇𑄁 𑄃𑄖𑄨𑄇𑄴𑄇𑄚𑄴𑄖𑄧𑄚𑄚𑄴𑄖𑄨 𑄃𑄖𑄴𑄗𑄮. 𑄃𑄛𑄢𑄬 𑄃𑄑𑄴𑄒𑄇𑄚𑄴𑄖𑄨 𑄤𑄘𑄚𑄴𑄖𑄨. 𑄖𑄘𑄪𑄞𑄡𑄁 𑄛𑄢𑄖𑄮 𑄃𑄂𑄤𑄨𑄞𑄤𑄨𑄥𑄴𑄥𑄖𑄨. 𑄃𑄡𑄁 𑄛𑄚𑄬𑄖𑄴𑄗 𑄥𑄋𑄴𑄈𑄬𑄛𑄖𑄴𑄗𑄮 – 𑄇𑄬𑄌𑄨 𑄦𑄨 𑄆𑄖𑄧 𑄥𑄖𑄴𑄖 𑄤𑄧 𑄃𑄑𑄴𑄒 𑄤𑄧 𑄥𑄐𑄴𑄐𑄧 𑄥𑄟𑄖𑄨𑄇𑄴𑄇𑄟𑄨𑄖𑄪𑄁 𑄥𑄇𑄴𑄇𑄮𑄚𑄴𑄖𑄨, 𑄇𑄬𑄌𑄨 𑄛𑄚 𑄚 𑄥𑄇𑄴𑄇𑄮𑄚𑄴𑄖𑄨. 𑄖𑄖𑄴𑄗 𑄡𑄬 𑄥𑄇𑄴𑄇𑄮𑄚𑄴𑄖𑄨, 𑄖𑄬𑄤 𑄉𑄦𑄨𑄖𑄧. 𑄖𑄬𑄥𑄁 𑄛𑄚 𑄆𑄇𑄬𑄥𑄁 𑄅𑄛𑄧𑄖𑄨𑄤𑄖𑄴𑄖𑄖𑄁 𑄃𑄖𑄨𑄇𑄴𑄇𑄟𑄨𑄖𑄪𑄁 𑄥𑄇𑄴𑄇𑄮𑄚𑄴𑄖𑄧𑄚𑄁 𑄡𑄗𑄧𑄛𑄨 𑄚𑄧𑄟 𑄉𑄋𑄴𑄉𑄁 𑄅𑄖𑄴𑄖𑄨𑄕𑄴𑄕𑄬𑄥𑄪 𑄟𑄚𑄪𑄥𑄴𑄥𑄬𑄥𑄪 𑄆𑄇𑄮 𑄘𑄩𑄊𑄤𑄧𑄛𑄨𑄁 𑄉𑄚𑄴𑄖𑄴𑄤𑄧 𑄖𑄨𑄑𑄴𑄒𑄬𑄡𑄴𑄡, 𑄆𑄇𑄮 𑄖𑄖𑄮 𑄛𑄢𑄁 𑄟𑄦𑄧𑄉𑄧𑄟𑄁; 𑄆𑄤𑄟𑄬𑄤 𑄆𑄇𑄬 𑄤𑄨𑄐𑄴𑄐𑄧𑄕𑄐𑄴𑄌𑄧𑄡𑄖𑄚𑄁 𑄃𑄛𑄴𑄛𑄟𑄧𑄕𑄁 𑄃𑄂𑄚𑄬𑄐𑄴𑄎𑄚𑄴𑄖𑄨 𑄤𑄖𑄴𑄤𑄧 𑄖𑄨𑄑𑄴𑄒𑄚𑄴𑄖𑄨, 𑄆𑄇𑄬 𑄃𑄂𑄇𑄨𑄐𑄴𑄌𑄐𑄴𑄐𑄧𑄡𑄖𑄚𑄁. 𑄖𑄖𑄴𑄗 𑄤𑄨𑄐𑄴𑄐𑄧𑄕𑄐𑄴𑄌𑄧𑄡𑄖𑄚𑄁 𑄖𑄧𑄤 𑄘𑄥𑄴𑄥𑄬𑄖𑄪𑄁 𑄤𑄨𑄐𑄴𑄐𑄧𑄕𑄇𑄥𑄨𑄕𑄟𑄬𑄇𑄬𑄖𑄨 𑄤𑄪𑄖𑄴𑄖𑄁. 𑄛𑄢𑄖𑄮 ‘‘𑄃𑄂𑄇𑄨𑄐𑄴𑄌𑄐𑄴𑄐𑄧𑄡𑄖𑄚𑄟𑄬𑄇𑄬’’𑄖𑄨 𑄤𑄇𑄴𑄈𑄖𑄨. 𑄖𑄡𑄨𑄘𑄚𑄴𑄖𑄨 𑄖𑄁 𑄄𑄘𑄁 𑄘𑄨𑄑𑄴𑄒𑄨𑄉𑄖𑄐𑄴𑄌 𑄘𑄨𑄑𑄴𑄒𑄨𑄛𑄌𑄴𑄌𑄡𑄐𑄴𑄌 𑄘𑄨𑄑𑄴𑄒𑄧𑄢𑄟𑄴𑄟𑄕𑄐𑄴𑄌. 𑄖𑄗𑄧𑄉𑄖𑄮 𑄃𑄞𑄨𑄎𑄧𑄚𑄧𑄖𑄩𑄖𑄨. 𑄄𑄟𑄨𑄚𑄧 𑄛𑄌𑄴𑄌𑄡𑄬𑄚 𑄄𑄘𑄁 𑄚𑄧𑄟 𑄘𑄥𑄴𑄥𑄚𑄁 𑄉𑄦𑄨𑄖𑄚𑄴𑄖𑄨 𑄃𑄞𑄨𑄤𑄨𑄥𑄨𑄑𑄴𑄒𑄬𑄚 𑄐𑄧𑄕𑄬𑄚 𑄎𑄧𑄚𑄧𑄖𑄨.

𑄄𑄘𑄧𑄚𑄨 𑄖𑄘𑄬𑄤 𑄤𑄨𑄖𑄴𑄗𑄧𑄢𑄬𑄚𑄴𑄖𑄮 𑄡𑄬 𑄈𑄮 𑄖𑄬 𑄞𑄮𑄚𑄴𑄖𑄮𑄖𑄨𑄃𑄂𑄘𑄨𑄟𑄧𑄦. 𑄡𑄧 𑄤𑄧 𑄛𑄚 𑄆𑄖𑄧𑄥𑄁 𑄥𑄐𑄴𑄐𑄧𑄚𑄚𑄴𑄖𑄨 𑄡𑄧 𑄤𑄧 𑄛𑄚 𑄆𑄖𑄧𑄥𑄁 ‘‘𑄡𑄘𑄨 𑄢𑄫𑄛𑄥𑄐𑄴𑄐𑄧𑄚’’𑄚𑄴𑄖𑄨 𑄆𑄤𑄁 𑄤𑄪𑄖𑄴𑄖𑄥𑄐𑄴𑄐𑄧𑄚𑄁. 𑄛𑄢𑄨𑄥𑄪𑄘𑄴𑄙𑄧𑄖𑄨 𑄚𑄨𑄢𑄪𑄛𑄇𑄴𑄇𑄨𑄣𑄬𑄥𑄧. 𑄛𑄢𑄟𑄧𑄖𑄨 𑄅𑄖𑄴𑄖𑄟𑄧. 𑄃𑄉𑄴𑄉𑄧𑄖𑄨 𑄥𑄬𑄑𑄴𑄒𑄧. 𑄃𑄚𑄪𑄖𑄴𑄖𑄢𑄨𑄡𑄧 𑄃𑄇𑄴𑄈𑄧𑄡𑄖𑄩𑄖𑄨 𑄃𑄥𑄘𑄨𑄥𑄧 𑄇𑄗𑄩𑄡𑄖𑄨. 𑄡𑄘𑄨 𑄢𑄫𑄛𑄥𑄐𑄴𑄐𑄧𑄚𑄚𑄴𑄖𑄨 𑄄𑄟𑄨𑄚𑄧 𑄌𑄖𑄥𑄴𑄥𑄮 𑄢𑄫𑄛𑄧𑄤𑄌𑄢𑄥𑄐𑄴𑄐𑄧 𑄇𑄗𑄨𑄖𑄧. 𑄡𑄘𑄨 𑄃𑄢𑄫𑄛𑄥𑄐𑄴𑄐𑄧𑄚𑄚𑄴𑄖𑄨 𑄄𑄟𑄨𑄚𑄧 𑄃𑄂𑄇𑄧𑄥𑄧𑄚𑄐𑄴𑄌𑄧𑄡𑄖𑄚𑄤𑄨𑄐𑄴𑄐𑄧𑄕𑄐𑄴𑄌𑄧𑄡𑄖𑄚𑄥𑄐𑄴𑄐𑄧. 𑄄𑄖𑄢𑄬𑄦𑄨 𑄛𑄚 𑄘𑄴𑄤𑄩𑄦𑄨 𑄛𑄘𑄬𑄦𑄨 𑄥𑄟𑄧𑄛𑄚𑄴𑄚𑄇𑄤𑄧𑄢𑄮 𑄌 𑄃𑄥𑄟𑄧𑄛𑄚𑄴𑄚𑄇𑄤𑄧𑄢𑄮 𑄌 𑄇𑄗𑄨𑄖𑄮𑄖𑄨 𑄆𑄤𑄟𑄬𑄖𑄧 𑄇𑄮𑄑𑄴𑄒𑄧𑄥𑄖𑄮 𑄃𑄑𑄴𑄒, 𑄃𑄖𑄴𑄗𑄖𑄮 𑄛𑄚 𑄥𑄖𑄴𑄖 𑄥𑄐𑄴𑄐𑄧 𑄦𑄮𑄚𑄴𑄖𑄨. 𑄥𑄟𑄧𑄛𑄚𑄴𑄚𑄇𑄤𑄧𑄢𑄮 𑄦𑄨 𑄛𑄪𑄢𑄨𑄟𑄧𑄦𑄨 𑄍𑄦𑄨𑄥𑄋𑄴𑄉𑄦𑄨𑄖𑄮𑄡𑄬𑄤. 𑄖𑄡𑄨𑄘𑄁 𑄥𑄋𑄴𑄈𑄖𑄚𑄴𑄖𑄨 𑄖𑄁 𑄄𑄘𑄁 𑄥𑄝𑄴𑄝𑄟𑄴𑄛𑄨 𑄥𑄐𑄴𑄐𑄧𑄉𑄖𑄁 𑄥𑄘𑄴𑄙𑄨𑄁 𑄘𑄨𑄑𑄴𑄒𑄨𑄉𑄖𑄬𑄚 𑄥𑄋𑄴𑄈𑄖𑄁 𑄛𑄌𑄴𑄌𑄡𑄬𑄦𑄨 𑄥𑄟𑄧𑄉𑄚𑄴𑄖𑄴𑄤𑄧 𑄇𑄖𑄁. 𑄃𑄮𑅄𑄧𑄢𑄨𑄇𑄚𑄴𑄖𑄨 𑄥𑄋𑄴𑄈𑄖𑄖𑄴𑄖𑄧𑄤 𑄃𑄮𑅄𑄧𑄢𑄨𑄇𑄁. 𑄃𑄖𑄴𑄗𑄨 𑄈𑄮 𑄛𑄚 𑄥𑄋𑄴𑄈𑄧𑄢𑄧𑄚𑄁 𑄚𑄨𑄢𑄮𑄙𑄮𑄖𑄨 𑄆𑄖𑄬𑄥𑄁 𑄛𑄚 𑄥𑄋𑄴𑄈𑄖𑄚𑄴𑄖𑄨 𑄤𑄪𑄖𑄴𑄖𑄧𑄚𑄁 𑄥𑄋𑄴𑄈𑄧𑄢𑄧𑄚𑄁 𑄚𑄨𑄢𑄮𑄙𑄥𑄋𑄴𑄈𑄧𑄖𑄁 𑄚𑄨𑄝𑄴𑄝𑄧𑄚𑄁 𑄚𑄧𑄟 𑄃𑄖𑄴𑄗𑄨. 𑄃𑄖𑄴𑄗𑄬𑄖𑄚𑄴𑄖𑄨 𑄄𑄖𑄨 𑄤𑄨𑄘𑄨𑄖𑄴𑄤𑄧𑄖𑄨 𑄖𑄁 𑄈𑄮 𑄛𑄚 𑄚𑄨𑄝𑄴𑄝𑄧𑄚𑄁 ‘‘𑄃𑄖𑄴𑄗𑄨 𑄆𑄖’’𑄚𑄴𑄖𑄨 𑄆𑄤𑄁 𑄎𑄧𑄚𑄨𑄖𑄴𑄤𑄧. 𑄖𑄥𑄴𑄥 𑄚𑄨𑄥𑄴𑄥𑄢𑄕𑄘𑄥𑄴𑄥𑄧𑄤𑄩𑄖𑄨 𑄖𑄥𑄴𑄥 𑄥𑄋𑄴𑄈𑄖𑄥𑄴𑄥 𑄚𑄨𑄥𑄴𑄥𑄢𑄕𑄘𑄥𑄴𑄥𑄩 𑄚𑄨𑄝𑄴𑄝𑄧𑄚𑄘𑄥𑄴𑄥𑄩. 𑄖𑄗𑄧𑄉𑄖𑄮 𑄖𑄘𑄪𑄛𑄧𑄖𑄨𑄤𑄖𑄴𑄖𑄮𑄖𑄨 𑄖𑄁 𑄥𑄋𑄴𑄈𑄖𑄁 𑄃𑄖𑄨𑄇𑄴𑄇𑄚𑄴𑄖𑄮 𑄥𑄟𑄖𑄨𑄇𑄴𑄇𑄚𑄴𑄖𑄮𑄖𑄨 𑄃𑄖𑄴𑄗𑄮.

𑄸𑄹. 𑄖𑄖𑄴𑄢𑄧𑄖𑄨 𑄖𑄬𑄥𑄪 𑄃𑄑𑄴𑄒𑄥𑄪 𑄃𑄥𑄐𑄴𑄐𑄩𑄤𑄧𑄘𑄬𑄥𑄪. 𑄢𑄫𑄛𑄨𑄁 𑄤𑄧𑄖𑄨𑄃𑄂𑄘𑄩𑄚𑄨 𑄥𑄐𑄴𑄐𑄩𑄤𑄧𑄘𑄬 𑄤𑄪𑄖𑄴𑄖𑄚𑄡𑄬𑄚𑄬𑄤 𑄤𑄬𑄘𑄨𑄖𑄝𑄴𑄝𑄧𑄚𑄨. 𑄃𑄡𑄐𑄴𑄌 𑄡𑄥𑄴𑄟𑄧 𑄃𑄥𑄐𑄴𑄐𑄩𑄤𑄧𑄘𑄮, 𑄖𑄥𑄴𑄟𑄧 𑄄𑄙 𑄘𑄪𑄖𑄨𑄡𑄌𑄖𑄪𑄇𑄴𑄇𑄁 𑄚 𑄤𑄪𑄖𑄴𑄖𑄁. 𑄛𑄑𑄨𑄇𑄴𑄇𑄮𑄥𑄚𑄴𑄖𑄩𑄖𑄨 𑄛𑄑𑄨𑄝𑄧𑄦𑄚𑄴𑄖𑄨 𑄛𑄑𑄨𑄥𑄬𑄙𑄬𑄚𑄴𑄖𑄨. 𑄥𑄐𑄴𑄐𑄧 𑄢𑄮𑄉𑄮𑄖𑄨𑄃𑄂𑄘𑄩𑄥𑄪 𑄃𑄂𑄝𑄧𑄙𑄑𑄴𑄒𑄬𑄚 𑄢𑄮𑄉𑄮, 𑄥𑄘𑄮𑄥𑄑𑄴𑄒𑄬𑄚 𑄉𑄕𑄴𑄓𑄮, 𑄃𑄚𑄪𑄛𑄤𑄨𑄑𑄴𑄒𑄑𑄴𑄒𑄬𑄚 𑄥𑄣𑄴𑄣𑄁. 𑄃𑄂𑄉𑄖𑄨𑄁 𑄤𑄧 𑄉𑄖𑄨𑄁 𑄤𑄧𑄖𑄨𑄃𑄂𑄘𑄩𑄥𑄪 𑄛𑄑𑄨𑄥𑄚𑄴𑄙𑄨𑄤𑄥𑄬𑄚 𑄃𑄂𑄉𑄖𑄨𑄁, 𑄌𑄪𑄖𑄨𑄤𑄥𑄬𑄚 𑄉𑄖𑄨𑄁, 𑄌𑄤𑄚𑄤𑄥𑄬𑄚 𑄌𑄪𑄖𑄨𑄁, 𑄅𑄛𑄛𑄎𑄴𑄎𑄚𑄤𑄥𑄬𑄚 𑄅𑄛𑄛𑄖𑄴𑄖𑄨𑄁, 𑄛𑄪𑄚𑄛𑄴𑄛𑄪𑄚𑄁 𑄅𑄛𑄴𑄛𑄎𑄴𑄎𑄨𑄖𑄴𑄤𑄧 𑄃𑄛𑄢𑄧𑄛𑄢𑄁 𑄤𑄓𑄴𑄔𑄚𑄤𑄥𑄬𑄚 𑄤𑄪𑄓𑄴𑄔𑄨𑄁 𑄤𑄨𑄢𑄫𑅄𑄴𑄦𑄨𑄁 𑄤𑄬𑄛𑄪𑄣𑄴𑄣𑄁. 𑄇𑄧𑄟𑄐𑄴𑄌 𑄌𑄖𑄪𑄤𑄮𑄇𑄧𑄢𑄞𑄤𑄬 𑄢𑄫𑄛𑄁 𑄤𑄨𑄚𑄧𑄛𑄨 𑄤𑄨𑄐𑄴𑄐𑄧𑄕𑄥𑄴𑄥 𑄛𑄤𑄖𑄴𑄖𑄨 𑄃𑄖𑄴𑄗𑄨, 𑄥𑄬𑄥𑄬 𑄛𑄚 𑄖𑄡𑄮 𑄈𑄚𑄴𑄙𑄬 𑄤𑄨𑄚𑄧 𑄚𑄖𑄴𑄗𑄨. 𑄃𑄡𑄁 𑄛𑄚 𑄛𑄐𑄴𑄦𑄮 𑄛𑄐𑄴𑄌𑄤𑄮𑄇𑄧𑄢𑄞𑄤𑄤𑄥𑄬𑄚 𑄇𑄗𑄨𑄖𑄮. 𑄛𑄐𑄴𑄌𑄤𑄮𑄇𑄧𑄢𑄬 𑄦𑄨 𑄆𑄖𑄴𑄖𑄇𑄬 𑄈𑄚𑄴𑄙𑄬 𑄤𑄨𑄚𑄧 𑄤𑄨𑄐𑄴𑄐𑄧𑄕𑄥𑄴𑄥 𑄛𑄤𑄖𑄴𑄖𑄨 𑄚𑄧𑄟 𑄚𑄖𑄴𑄗𑄨. 𑄤𑄨𑄖𑄕𑄴𑄓𑄤𑄧𑄘𑄩 𑄛𑄚𑄬𑄖𑄴𑄗 ‘‘𑄃𑄐𑄴𑄐𑄖𑄴𑄢 𑄢𑄫𑄛𑄧𑄖𑄨𑄃𑄂𑄘𑄨𑄤𑄌𑄚𑄖𑄮 𑄃𑄢𑄫𑄛𑄞𑄤𑄬𑄛𑄨 𑄢𑄫𑄛𑄁, 𑄃𑄥𑄐𑄴𑄐𑄧𑄞𑄤𑄬 𑄌 𑄤𑄨𑄐𑄴𑄐𑄧𑄕𑄁 𑄃𑄖𑄴𑄗𑄨, 𑄖𑄗𑄧 𑄚𑄨𑄢𑄮𑄙𑄥𑄟𑄧𑄛𑄚𑄴𑄚𑄥𑄴𑄥𑄧’’𑄖𑄨 𑄤𑄘𑄖𑄨. 𑄥𑄮 𑄤𑄖𑄴𑄖𑄝𑄴𑄝𑄮 – 𑄝𑄴𑄡𑄐𑄴𑄎𑄚𑄌𑄴𑄍𑄧𑄡𑄧𑄡 𑄌𑄬 𑄃𑄖𑄴𑄗𑄁 𑄛𑄑𑄨𑄝𑄧𑄦𑄥𑄨, 𑄃𑄂𑄉𑄖𑄨𑄁 𑄤𑄧𑄖𑄨𑄃𑄂𑄘𑄨𑄤𑄌𑄚𑄖𑄮 𑄖𑄁 𑄤𑄨𑄐𑄴𑄐𑄧𑄕𑄁 𑄛𑄇𑄴𑄈𑄨𑄘𑄴𑄤𑄨𑄛𑄘𑄌𑄖𑄪𑄛𑄴𑄛𑄘𑄧 𑄤𑄨𑄡 𑄅𑄛𑄴𑄛𑄖𑄨𑄖𑄴𑄤𑄧𑄛𑄨 𑄉𑄌𑄴𑄍𑄖𑄨, 𑄛𑄘𑄥𑄧𑄛𑄨 𑄉𑄌𑄴𑄍𑄖𑄨, 𑄉𑄮𑄤𑄨𑄥𑄧𑄕𑄤𑄣𑄴𑄣𑄨𑄃𑄂𑄘𑄩𑄚𑄨 𑄤𑄨𑄡 𑄌 𑄤𑄓𑄴𑄔𑄖𑄩𑄖𑄨 𑄃𑄂𑄛𑄎𑄴𑄎𑄖𑄨. 𑄡𑄬 𑄌 𑄞𑄉𑄤𑄖𑄧 𑄃𑄚𑄬𑄇𑄥𑄖𑄬𑄥𑄪 𑄥𑄪𑄖𑄴𑄖𑄬𑄥𑄪 𑄖𑄡𑄮 𑄞𑄤𑄧 𑄤𑄪𑄖𑄴𑄖𑄧, 𑄖𑄬 𑄃𑄢𑄫𑄛𑄞𑄤𑄥𑄴𑄥 𑄃𑄞𑄧𑄤𑄧 𑄘𑄴𑄤𑄬𑄤 𑄃𑄂𑄛𑄎𑄴𑄎𑄚𑄴𑄖𑄨. 𑄖𑄥𑄴𑄟𑄧 𑄟𑄧 𑄆𑄤𑄁 𑄃𑄤𑄌, 𑄡𑄗𑄧 𑄤𑄪𑄖𑄴𑄖𑄟𑄖𑄴𑄗𑄁 𑄙𑄧𑄢𑄬𑄦𑄩𑄖𑄨.

𑄸𑄺. 𑄖𑄖𑄴𑄢𑄧𑄖𑄨 𑄃𑄑𑄴𑄒𑄥𑄪 𑄚𑄬𑄤𑄥𑄐𑄴𑄐𑄩𑄚𑄧𑄥𑄐𑄴𑄐𑄩𑄤𑄧𑄘𑄬𑄥𑄪 𑄞𑄪𑄟𑄴𑄟𑄁. 𑄄𑄙𑄧𑄛𑄨 𑄢𑄫𑄛𑄨𑄁 𑄤𑄧𑄖𑄨𑄃𑄂𑄘𑄩𑄚𑄨 𑄤𑄪𑄖𑄴𑄖𑄚𑄡𑄬𑄚𑄬𑄤 𑄤𑄬𑄘𑄨𑄖𑄝𑄴𑄝𑄧𑄚𑄨. 𑄃𑄥𑄐𑄴𑄐𑄧 𑄥𑄟𑄴𑄟𑄮𑄦𑄮𑄖𑄨 𑄚𑄨𑄥𑄴𑄥𑄐𑄴𑄐𑄞𑄧𑄤𑄮 𑄚𑄧𑄟𑄬𑄥 𑄥𑄟𑄴𑄟𑄮𑄦𑄑𑄴𑄒𑄧𑄚𑄁. 𑄡𑄮 𑄦𑄨 𑄇𑄨𑄐𑄴𑄌𑄨 𑄚 𑄎𑄧𑄚𑄧𑄖𑄨, 𑄖𑄁 𑄃𑄥𑄐𑄴𑄐𑄩 𑄆𑄥𑄮𑄖𑄨 𑄤𑄘𑄚𑄴𑄖𑄨. 𑄘𑄨𑄑𑄴𑄒𑄥𑄪𑄖𑄟𑄪𑄖𑄤𑄨𑄐𑄴𑄐𑄧𑄖𑄝𑄴𑄝𑄥𑄋𑄴𑄈𑄧𑄢𑄟𑄖𑄴𑄖𑄬𑄚𑄧𑄖𑄨 𑄘𑄨𑄑𑄴𑄒𑄤𑄨𑄐𑄴𑄐𑄧𑄖𑄝𑄴𑄝𑄟𑄖𑄴𑄖𑄬𑄚 𑄥𑄪𑄖𑄤𑄨𑄐𑄴𑄐𑄧𑄖𑄝𑄴𑄝𑄟𑄖𑄴𑄖𑄬𑄚 𑄟𑄪𑄖𑄤𑄨𑄐𑄴𑄐𑄧𑄖𑄝𑄴𑄝𑄟𑄖𑄴𑄖𑄬𑄚. 𑄆𑄖𑄴𑄗 𑄌 𑄤𑄨𑄎𑄧𑄚𑄧𑄖𑄩𑄖𑄨 𑄤𑄨𑄐𑄴𑄐𑄧𑄖𑄝𑄴𑄝𑄁, 𑄘𑄨𑄑𑄴𑄒𑄥𑄪𑄖𑄟𑄪𑄖𑄤𑄨𑄐𑄴𑄐𑄧𑄖𑄝𑄴𑄝𑄟𑄖𑄴𑄖𑄬𑄚 𑄛𑄐𑄴𑄌𑄘𑄴𑄤𑄧𑄢𑄨𑄇𑄥𑄐𑄴𑄐𑄧𑄛𑄤𑄖𑄴𑄖𑄨𑄟𑄖𑄴𑄖𑄬𑄚𑄧𑄖𑄨 𑄃𑄡𑄐𑄴𑄦𑄨 𑄆𑄖𑄴𑄗 𑄃𑄖𑄴𑄗𑄮. 𑄥𑄋𑄴𑄈𑄧𑄢𑄟𑄖𑄴𑄖𑄬𑄚𑄧𑄖𑄨 𑄃𑄮𑅄𑄧𑄢𑄨𑄇𑄥𑄋𑄴𑄈𑄧𑄢𑄛𑄤𑄖𑄴𑄖𑄨𑄟𑄖𑄴𑄖𑄬𑄚𑄧𑄖𑄨 𑄃𑄖𑄴𑄗𑄮. 𑄆𑄖𑄥𑄴𑄥 𑄃𑄂𑄡𑄖𑄚𑄥𑄴𑄥𑄧𑄖𑄨 𑄆𑄖𑄥𑄴𑄥 𑄚𑄬𑄤𑄥𑄐𑄴𑄐𑄧𑄚𑄧𑄥𑄐𑄴𑄐𑄧𑄡𑄖𑄚𑄥𑄴𑄥. 𑄅𑄛𑄥𑄟𑄴𑄛𑄘𑄚𑄴𑄖𑄨 𑄛𑄑𑄨𑄣𑄧𑄞𑄁. 𑄝𑄴𑄡𑄥𑄚𑄁 𑄦𑄬𑄖𑄚𑄴𑄖𑄨 𑄤𑄨𑄚𑄧𑄥𑄮 𑄦𑄬𑄥, 𑄤𑄪𑄑𑄴𑄒𑄧𑄚𑄁 𑄦𑄬𑄖𑄚𑄴𑄖𑄨 𑄃𑄖𑄴𑄗𑄮. 𑄛𑄐𑄴𑄌𑄘𑄴𑄤𑄧𑄢𑄨𑄇𑄥𑄐𑄴𑄐𑄧𑄛𑄤𑄖𑄴𑄖𑄐𑄴𑄦𑄨 𑄃𑄮𑅄𑄧𑄢𑄨𑄇𑄥𑄋𑄴𑄈𑄧𑄢𑄛𑄤𑄖𑄴𑄖𑄁 𑄤𑄧 𑄃𑄛𑄴𑄛𑄤𑄖𑄴𑄖𑄁 𑄇𑄖𑄴𑄤𑄧 𑄖𑄁 𑄥𑄟𑄧𑄛𑄎𑄴𑄎𑄨𑄖𑄝𑄴𑄝𑄁. 𑄖𑄥𑄴𑄥 𑄛𑄚 𑄛𑄤𑄖𑄴𑄖𑄬𑄚 𑄖𑄖𑄮 𑄤𑄪𑄑𑄴𑄒𑄧𑄚𑄁 𑄦𑄮𑄖𑄩𑄖𑄨 𑄘𑄥𑄴𑄥𑄬𑄖𑄨. 𑄥𑄋𑄴𑄈𑄧𑄢𑄥𑄟𑄧𑄛𑄖𑄴𑄖𑄨𑄛𑄖𑄴𑄖𑄝𑄴𑄝𑄟𑄇𑄴𑄈𑄧𑄡𑄖𑄩𑄖𑄨 𑄃𑄮𑅄𑄧𑄢𑄨𑄇𑄥𑄋𑄴𑄈𑄧𑄢𑄛𑄤𑄖𑄴𑄖𑄨𑄡𑄧 𑄛𑄖𑄴𑄖𑄝𑄴𑄝𑄚𑄴𑄖𑄨 𑄚 𑄃𑄇𑄴𑄈𑄧𑄡𑄖𑄨. 𑄥𑄋𑄴𑄈𑄧𑄢𑄧𑄤𑄥𑄬𑄥𑄥𑄟𑄧𑄛𑄖𑄴𑄖𑄨𑄛𑄖𑄴𑄖𑄝𑄴𑄝𑄚𑄴𑄖𑄨 𑄥𑄋𑄴𑄈𑄧𑄢𑄧𑄚𑄁𑄡𑄬𑄤 𑄃𑄤𑄥𑄬𑄥𑄧 𑄞𑄧𑄤𑄚𑄧𑄤𑄥𑄬𑄚 𑄥𑄝𑄴𑄝𑄥𑄪𑄈𑄪𑄟𑄞𑄧𑄤𑄁 𑄛𑄖𑄴𑄖𑄧 𑄥𑄋𑄴𑄈𑄧𑄢𑄧, 𑄖𑄬𑄥𑄁 𑄛𑄤𑄖𑄴𑄖𑄨𑄡𑄧 𑄆𑄖𑄁 𑄛𑄖𑄴𑄖𑄝𑄴𑄝𑄚𑄴𑄖𑄨 𑄃𑄖𑄴𑄗𑄮. 𑄆𑄤𑄢𑄫𑄛𑄬𑄥𑄪 𑄦𑄨 𑄥𑄋𑄴𑄈𑄧𑄢𑄬𑄥𑄪 𑄛𑄤𑄖𑄴𑄖𑄬𑄥𑄪 𑄆𑄖𑄁 𑄛𑄖𑄴𑄖𑄝𑄴𑄝𑄁 𑄚𑄧𑄟 𑄦𑄮𑄖𑄨. 𑄖𑄡𑄨𑄘𑄚𑄴𑄖𑄨 𑄖𑄁 𑄄𑄘𑄁 𑄆𑄖𑄁 𑄥𑄪𑄈𑄪𑄟𑄟𑄴𑄛𑄨 𑄥𑄟𑄧𑄚𑄁 𑄥𑄋𑄴𑄈𑄖𑄁 𑄥𑄋𑄴𑄈𑄖𑄖𑄴𑄖𑄧 𑄌 𑄃𑄮𑅄𑄧𑄢𑄨𑄇𑄁.

𑄸𑄻. 𑄖𑄖𑄴𑄢𑄧𑄖𑄨 𑄥𑄖𑄴𑄖𑄥𑄪 𑄅𑄌𑄴𑄍𑄬𑄘𑄤𑄧𑄘𑄬𑄥𑄪 𑄞𑄪𑄟𑄴𑄟𑄁. 𑄅𑄘𑄴𑄙𑄁 𑄥𑄢𑄚𑄴𑄖𑄨 𑄅𑄘𑄴𑄙𑄁 𑄤𑄪𑄌𑄴𑄌𑄖𑄨 𑄃𑄚𑄧𑄉𑄖𑄥𑄁𑄥𑄧𑄢𑄤𑄧𑄘𑄮, 𑄃𑄚𑄧𑄉𑄖𑄁 𑄥𑄁𑄥𑄧𑄢𑄤𑄧𑄘𑄁 𑄥𑄢𑄚𑄴𑄖𑄩𑄖𑄨 𑄃𑄖𑄴𑄗𑄮. 𑄃𑄂𑄥𑄖𑄴𑄖𑄨𑄁𑄡𑄬𑄤 𑄃𑄞𑄨𑄤𑄘𑄚𑄴𑄖𑄨 𑄣𑄉𑄴𑄉𑄚𑄇𑄁𑄡𑄬𑄤 𑄤𑄘𑄚𑄴𑄖𑄨. ‘‘𑄃𑄂𑄥𑄖𑄴𑄖’’𑄚𑄴𑄖𑄨𑄛𑄨 𑄛𑄧𑄒𑄮, 𑄖𑄕𑄴𑄦𑄁𑄡𑄬𑄤 𑄤𑄘𑄚𑄴𑄖𑄩𑄖𑄨 𑄃𑄖𑄴𑄗𑄮. 𑄄𑄖𑄨 𑄛𑄬𑄌𑄴𑄌 𑄞𑄤𑄨𑄥𑄴𑄥𑄧𑄟𑄧𑄖𑄨 𑄆𑄤𑄁 𑄛𑄬𑄌𑄴𑄌 𑄞𑄤𑄨𑄥𑄴𑄥𑄧𑄟. 𑄈𑄖𑄴𑄖𑄨𑄡𑄧 𑄞𑄤𑄨𑄥𑄴𑄥𑄧𑄟, 𑄝𑄴𑄢𑄧𑄦𑄴𑄟𑄕𑄧 𑄞𑄤𑄨𑄥𑄴𑄥𑄧𑄟𑄧𑄖𑄨 𑄆𑄤𑄟𑄬𑄖𑄴𑄗 𑄚𑄡𑄮 𑄚𑄬𑄖𑄝𑄴𑄝𑄮. 𑄤𑄧𑄕𑄨𑄎𑄫𑄛𑄟𑄧 𑄟𑄐𑄴𑄐𑄬𑄖𑄨 𑄤𑄧𑄕𑄨𑄎𑄫𑄛𑄟𑄧 𑄤𑄨𑄡 𑄤𑄧𑄕𑄨𑄎𑄛𑄑𑄨𑄞𑄧𑄉𑄧 𑄤𑄧𑄕𑄨𑄎𑄥𑄘𑄨𑄥𑄧 𑄟𑄡𑄴𑄦𑄁 𑄅𑄛𑄑𑄴𑄒𑄦𑄚𑄴𑄖𑄨. 𑄥𑄇𑄴𑄇𑄧𑄡𑄞𑄡𑄧𑄖𑄨 𑄥𑄇𑄴𑄇𑄧𑄡𑄥𑄴𑄥 𑄞𑄡𑄧. 𑄖𑄬 𑄦𑄨 𑄡𑄗𑄬𑄤 ‘‘𑄌𑄖𑄴𑄖𑄧𑄢𑄮 𑄈𑄮, 𑄟𑄦𑄧𑄢𑄧𑄎, 𑄃𑄞𑄡𑄥𑄴𑄥 𑄞𑄧𑄡𑄚𑄴𑄖𑄨. 𑄇𑄖𑄟𑄬 𑄌𑄖𑄴𑄖𑄧𑄢𑄮? 𑄉𑄕𑄴𑄓𑄪𑄛𑄴𑄛𑄧𑄘𑄮 𑄈𑄮, 𑄟𑄦𑄧𑄢𑄧𑄎, 𑄞𑄡𑄧 𑄛𑄗𑄤𑄨𑄁 𑄚 𑄈𑄧𑄘𑄖𑄨 ‘𑄟𑄧 𑄛𑄗𑄤𑄩 𑄈𑄨𑄡𑄩’𑄖𑄨, 𑄇𑄮𑄚𑄴𑄖𑄮 𑄈𑄮, 𑄟𑄦𑄧𑄢𑄧𑄎, 𑄆𑄇𑄛𑄧𑄘𑄬𑄚 𑄖𑄨𑄑𑄴𑄒𑄖𑄨 ‘𑄟𑄧 𑄛𑄗𑄤𑄩 𑄃𑄮𑄥𑄩𑄘𑄩’𑄖𑄨, 𑄇𑄨𑄇𑄩 𑄈𑄮, 𑄟𑄦𑄧𑄢𑄧𑄎, 𑄅𑄖𑄴𑄖𑄧𑄚𑄧 𑄥𑄬𑄖𑄨 ‘𑄟𑄧 𑄃𑄟𑄴𑄞𑄧 𑄅𑄚𑄴𑄘𑄴𑄢𑄨𑄡𑄩’𑄖𑄨, 𑄝𑄴𑄢𑄧𑄦𑄴𑄟𑄕𑄙𑄟𑄴𑄟𑄨𑄇𑄮 𑄈𑄮, 𑄟𑄦𑄧𑄢𑄧𑄎, 𑄝𑄴𑄢𑄦𑄴𑄟𑄌𑄢𑄨𑄡𑄁 𑄚 𑄌𑄢𑄖𑄨 ‘𑄟𑄧 𑄣𑄮𑄇𑄮 𑄅𑄌𑄴𑄍𑄨𑄎𑄴𑄎𑄩’𑄖𑄨 𑄄𑄟𑄬 𑄌𑄖𑄴𑄖𑄧𑄢𑄮 𑄃𑄞𑄡𑄥𑄴𑄥 𑄞𑄧𑄡𑄚𑄴𑄖𑄨, 𑄆𑄤𑄁 𑄥𑄇𑄴𑄇𑄧𑄡𑄥𑄴𑄥 𑄞𑄧𑄡𑄚𑄴𑄖𑄨’’. 𑄥𑄇𑄴𑄇𑄧𑄡𑄛𑄢𑄨𑄎𑄬𑄉𑄪𑄌𑄴𑄍𑄧𑄖𑄨 𑄖𑄟𑄬𑄤 𑄖𑄬𑄞𑄫𑄟𑄇𑄥𑄋𑄴𑄈𑄧𑄖𑄁 𑄥𑄇𑄴𑄇𑄧𑄡𑄁 𑄛𑄢𑄨𑄎𑄨𑄉𑄪𑄌𑄴𑄍𑄟𑄧𑄚𑄧. 𑄥𑄧 𑄉𑄘𑄴𑄘𑄪𑄣𑄝𑄘𑄴𑄙𑄮𑄖𑄨 𑄘𑄕𑄴𑄓𑄇𑄬 𑄢𑄎𑄴𑄎𑄪𑄁 𑄛𑄤𑄬𑄥𑄬𑄖𑄴𑄤𑄧 𑄝𑄘𑄴𑄙𑄥𑄪𑄚𑄈𑄮. 𑄆𑄤𑄟𑄬𑄤𑄨𑄟𑄬𑄖𑄨 𑄆𑄖𑄴𑄗 𑄘𑅄𑄴𑄦𑄖𑄴𑄗𑄟𑄴𑄞𑄮 𑄤𑄨𑄡 𑄈𑄩𑄣𑄮 𑄤𑄨𑄡 𑄌 𑄖𑄬𑄞𑄫𑄟𑄇𑄙𑄟𑄴𑄟𑄥𑄋𑄴𑄈𑄧𑄖𑄮 𑄥𑄇𑄴𑄇𑄧𑄡𑄮 𑄘𑄑𑄴𑄒𑄝𑄴𑄝𑄮, 𑄥𑄧 𑄤𑄨𑄡 𑄘𑄨𑄑𑄴𑄒𑄨𑄉𑄖𑄨𑄇𑄮, 𑄘𑄕𑄴𑄓𑄇𑄮 𑄤𑄨𑄡 𑄘𑄨𑄑𑄴𑄒𑄨, 𑄢𑄎𑄴𑄎𑄪 𑄤𑄨𑄡 𑄖𑄕𑄴𑄦𑄧, 𑄉𑄘𑄴𑄘𑄪𑄣𑄬𑄚 𑄝𑄚𑄴𑄙𑄨𑄖𑄴𑄤𑄧 𑄗𑄟𑄴𑄞𑄬 𑄤𑄧 𑄈𑄩𑄣𑄬 𑄤𑄧 𑄅𑄛𑄚𑄨𑄝𑄘𑄴𑄙𑄥𑄪𑄚𑄈𑄥𑄴𑄥 𑄃𑄖𑄴𑄖𑄚𑄮 𑄙𑄟𑄴𑄟𑄖𑄧𑄡 𑄍𑄨𑄚𑄴𑄘𑄨𑄖𑄴𑄤𑄧 𑄉𑄚𑄴𑄖𑄪𑄁 𑄃𑄥𑄟𑄖𑄴𑄗𑄥𑄴𑄥 𑄃𑄚𑄪𑄛𑄢𑄨𑄙𑄧𑄤𑄚𑄁 𑄤𑄨𑄡 𑄘𑄨𑄑𑄴𑄒𑄨𑄉𑄖𑄨𑄇𑄥𑄴𑄥 𑄘𑄨𑄑𑄴𑄒𑄨𑄘𑄕𑄴𑄓𑄇𑄬 𑄛𑄤𑄬𑄥𑄨𑄖𑄧𑄡 𑄖𑄕𑄴𑄦𑄧𑄢𑄎𑄴𑄎𑄪𑄡𑄧 𑄝𑄚𑄴𑄙𑄨𑄖𑄴𑄤𑄧 𑄥𑄇𑄴𑄇𑄧𑄡𑄬 𑄅𑄛𑄚𑄨𑄝𑄘𑄴𑄙𑄥𑄴𑄥 𑄃𑄚𑄪𑄛𑄢𑄨𑄙𑄧𑄤𑄚𑄁 𑄤𑄬𑄘𑄨𑄖𑄝𑄴𑄝𑄁.

𑄸𑄼. 𑄄𑄟𑄧𑄚𑄬𑄤 𑄛𑄐𑄴𑄌𑄧𑄡𑄖𑄚𑄧𑄚𑄩𑄖𑄨 𑄄𑄟𑄧𑄚𑄬𑄤 𑄛𑄐𑄴𑄌 𑄇𑄧𑄢𑄕𑄧𑄚𑄨. 𑄄𑄖𑄨 𑄟𑄧𑄖𑄨𑄇𑄁 𑄒𑄛𑄬𑄚𑄴𑄖𑄬𑄚𑄛𑄨 𑄛𑄐𑄴𑄌𑄬𑄤 𑄒𑄛𑄨𑄖𑄧𑄚𑄨, 𑄚𑄨𑄉𑄟𑄬𑄚𑄴𑄖𑄬𑄚𑄛𑄨 𑄛𑄐𑄴𑄌𑄬𑄤 𑄚𑄨𑄉𑄟𑄨𑄖𑄧𑄚𑄨, 𑄞𑄧𑄎𑄬𑄚𑄴𑄖𑄬𑄚 𑄛𑄚 𑄌𑄖𑄴𑄖𑄧𑄢𑄨 𑄞𑄧𑄎𑄨𑄖𑄧𑄚𑄨. 𑄘𑄨𑄑𑄴𑄒𑄙𑄟𑄴𑄟𑄚𑄨𑄝𑄴𑄝𑄧𑄚𑄁 𑄇𑄪𑄦𑄨𑄁 𑄛𑄤𑄨𑄑𑄴𑄒𑄚𑄴𑄖𑄨. 𑄆𑄇𑄖𑄴𑄖𑄚𑄧𑄚𑄖𑄴𑄖𑄤𑄥𑄬𑄚 𑄘𑄴𑄤𑄩𑄥𑄪 𑄛𑄘𑄬𑄥𑄪 𑄛𑄤𑄨𑄑𑄴𑄒𑄚𑄴𑄖𑄨 𑄤𑄬𑄘𑄨𑄖𑄝𑄴𑄝𑄁.

𑄸𑄽. 𑄆𑄤𑄐𑄴𑄌 𑄌𑄖𑄪𑄌𑄖𑄴𑄖𑄧𑄣𑄩𑄥 𑄃𑄛𑄢𑄚𑄴𑄖𑄇𑄛𑄴𑄛𑄨𑄇𑄬 𑄘𑄥𑄴𑄥𑄬𑄖𑄴𑄤𑄧 𑄄𑄘𑄧𑄚𑄨 𑄃𑄑𑄴𑄒𑄧𑄢𑄥 𑄛𑄪𑄝𑄴𑄝𑄚𑄴𑄖𑄇𑄛𑄴𑄛𑄨𑄇𑄬 𑄘𑄥𑄴𑄥𑄬𑄖𑄪𑄁 𑄥𑄚𑄴𑄖𑄨, 𑄞𑄨𑄇𑄴𑄈𑄤𑄬𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄃𑄖𑄩𑄖𑄇𑄮𑄑𑄴𑄒𑄧𑄥𑄥𑄋𑄴𑄈𑄧𑄖𑄁 𑄛𑄪𑄝𑄴𑄝𑄚𑄴𑄖𑄁 𑄇𑄛𑄴𑄛𑄬𑄖𑄴𑄤𑄧 𑄤𑄨𑄇𑄛𑄴𑄛𑄬𑄖𑄴𑄤𑄧 𑄉𑄕𑄴𑄦𑄚𑄴𑄖𑄩𑄖𑄨 𑄛𑄪𑄝𑄴𑄝𑄚𑄴𑄖𑄇𑄛𑄴𑄛𑄨𑄇𑄧. 𑄛𑄪𑄝𑄴𑄝𑄚𑄴𑄖𑄇𑄛𑄴𑄛𑄮 𑄤𑄧 𑄆𑄖𑄬𑄥𑄁 𑄃𑄖𑄴𑄗𑄩𑄖𑄨 𑄛𑄪𑄝𑄴𑄝𑄚𑄴𑄖𑄇𑄛𑄴𑄛𑄨𑄇𑄧. 𑄆𑄤𑄁 𑄥𑄬𑄥𑄟𑄴𑄛𑄨 𑄛𑄪𑄝𑄴𑄝𑄬 𑄤𑄪𑄖𑄴𑄖𑄛𑄴𑄛𑄇𑄧𑄢𑄁 𑄤𑄪𑄖𑄴𑄖𑄚𑄡𑄬𑄚𑄬𑄤 𑄤𑄬𑄘𑄨𑄖𑄝𑄴𑄝𑄁. 𑄥𑄥𑄴𑄥𑄖𑄮 𑄃𑄖𑄴𑄖𑄧 𑄌 𑄣𑄮𑄇𑄮 𑄌𑄧𑄖𑄨 𑄢𑄫𑄛𑄧𑄘𑄩𑄥𑄪 𑄃𑄐𑄴𑄐𑄖𑄢𑄁 𑄃𑄖𑄴𑄖𑄧𑄖𑄨 𑄌 𑄣𑄮𑄇𑄮𑄖𑄨 𑄌 𑄉𑄦𑄬𑄖𑄴𑄤𑄧 𑄥𑄥𑄴𑄥𑄖𑄮 𑄃𑄟𑄢𑄮 𑄚𑄨𑄌𑄴𑄌𑄮 𑄙𑄪𑄤𑄮𑄖𑄨 𑄃𑄞𑄨𑄤𑄘𑄚𑄴𑄖𑄨. 𑄡𑄗𑄧𑄦 ‘‘𑄢𑄫𑄛𑄁 𑄃𑄖𑄴𑄖𑄧 𑄌𑄬𑄤 𑄣𑄮𑄇𑄮 𑄌 𑄥𑄥𑄴𑄥𑄖𑄮 𑄌𑄧𑄖𑄨 𑄃𑄖𑄴𑄖𑄧𑄚𑄐𑄴𑄌 𑄣𑄮𑄇𑄐𑄴𑄌 𑄛𑄐𑄴𑄐𑄛𑄬𑄚𑄴𑄖𑄩’’𑄖𑄨 𑄤𑄨𑄖𑄴𑄗𑄧𑄢𑄮. 𑄃𑄥𑄥𑄴𑄥𑄖𑄧𑄘𑄩𑄥𑄪𑄛𑄨 𑄆𑄥𑄬𑄤 𑄚𑄡𑄮. 𑄆𑄖𑄴𑄗 𑄌 𑄛𑄒𑄟𑄤𑄧𑄘𑄬𑄚 𑄌𑄖𑄴𑄖𑄧𑄢𑄮 𑄥𑄥𑄴𑄥𑄖𑄤𑄧𑄘𑄧 𑄤𑄪𑄖𑄴𑄖𑄧, 𑄘𑄪𑄖𑄨𑄡𑄤𑄧𑄘𑄬𑄚 𑄥𑄖𑄴𑄖 𑄅𑄌𑄴𑄍𑄬𑄘𑄤𑄧𑄘𑄧.

𑄚𑄚𑄪 𑄌𑄬𑄖𑄬 𑄦𑄬𑄑𑄴𑄒𑄧 𑄃𑄂𑄉𑄖𑄧, 𑄄𑄙 𑄇𑄥𑄴𑄟𑄧 𑄛𑄪𑄚 𑄉𑄦𑄨𑄖𑄧𑄖𑄨. 𑄦𑄬𑄑𑄴𑄒𑄧 𑄖𑄖𑄴𑄗 𑄖𑄖𑄴𑄗 𑄟𑄖𑄮 𑄖𑄖𑄴𑄗 𑄖𑄖𑄴𑄗𑄬𑄤 𑄅𑄌𑄴𑄍𑄨𑄎𑄴𑄎𑄖𑄩𑄖𑄨 𑄘𑄥𑄴𑄥𑄚𑄖𑄴𑄗𑄁 𑄃𑄂𑄉𑄖𑄧. 𑄄𑄙 𑄛𑄚 𑄛𑄪𑄝𑄴𑄝𑄬𑄚𑄨𑄤𑄧𑄥𑄣𑄧𑄞𑄩 𑄘𑄨𑄑𑄴𑄒𑄨𑄉𑄖𑄨𑄇𑄮 𑄃𑄖𑄩𑄖𑄁 𑄛𑄥𑄴𑄥𑄖𑄨, 𑄚 𑄃𑄚𑄧𑄉𑄖𑄁, 𑄖𑄥𑄴𑄥 𑄆𑄤𑄁 𑄦𑄮𑄖𑄨 ‘‘𑄛𑄪𑄝𑄴𑄝𑄚𑄴𑄖𑄖𑄮 𑄃𑄂𑄉𑄖𑄮 𑄃𑄖𑄴𑄖𑄧 𑄄𑄙𑄬𑄤 𑄅𑄌𑄴𑄍𑄨𑄎𑄴𑄎𑄖𑄨, 𑄄𑄖𑄮 𑄛𑄢𑄁 𑄚 𑄉𑄌𑄴𑄍𑄖𑄩’’𑄖𑄨 𑄄𑄟𑄥𑄴𑄥𑄖𑄴𑄗𑄥𑄴𑄥 𑄘𑄥𑄴𑄥𑄚𑄖𑄴𑄗𑄁 𑄉𑄦𑄨𑄖𑄧. 𑄖𑄖𑄨𑄡𑄤𑄧𑄘𑄬𑄚 𑄌𑄖𑄴𑄖𑄧𑄢𑄮 𑄆𑄇𑄌𑄴𑄌𑄥𑄥𑄴𑄥𑄖𑄤𑄧𑄘𑄧 𑄤𑄪𑄖𑄴𑄖𑄧, 𑄌𑄖𑄪𑄖𑄴𑄗𑄤𑄧𑄘𑄬𑄚 𑄌𑄖𑄴𑄖𑄧𑄢𑄮 𑄃𑄟𑄢𑄧𑄤𑄨𑄇𑄴𑄈𑄬𑄛𑄨𑄇𑄧 𑄤𑄪𑄖𑄴𑄖𑄧. 𑄃𑄚𑄴𑄖𑄤𑄧𑄖𑄨 𑄥𑄛𑄢𑄨𑄡𑄚𑄴𑄖𑄮 𑄛𑄢𑄨𑄌𑄴𑄍𑄨𑄚𑄴𑄚𑄮 𑄛𑄢𑄨𑄤𑄑𑄪𑄟𑄮. 𑄃𑄤𑄓𑄴𑄔𑄨𑄖𑄇𑄥𑄨𑄕𑄥𑄴𑄥 𑄖𑄁 𑄇𑄥𑄨𑄕𑄁 𑄃𑄖𑄴𑄖𑄧𑄖𑄨 𑄌 𑄣𑄮𑄇𑄮𑄖𑄨 𑄌 𑄉𑄦𑄬𑄖𑄴𑄤𑄧 𑄆𑄤𑄁 𑄦𑄮𑄖𑄨. 𑄘𑄪𑄖𑄨𑄡𑄤𑄧𑄘𑄮 𑄤𑄓𑄴𑄔𑄨𑄖𑄇𑄥𑄨𑄕𑄥𑄴𑄥 𑄤𑄥𑄬𑄚 𑄤𑄪𑄖𑄴𑄖𑄮, 𑄖𑄖𑄨𑄡𑄤𑄧𑄘𑄮 𑄖𑄨𑄢𑄨𑄡𑄁 𑄤𑄓𑄴𑄔𑄬𑄖𑄴𑄤𑄧 𑄅𑄘𑄴𑄙𑄟𑄙𑄮 𑄃𑄤𑄓𑄴𑄔𑄨𑄖𑄇𑄥𑄨𑄕𑄥𑄴𑄥, 𑄌𑄖𑄪𑄖𑄴𑄗𑄤𑄧𑄘𑄮 𑄖𑄇𑄴𑄇𑄨𑄤𑄥𑄬𑄚 𑄤𑄪𑄖𑄴𑄖𑄮. 𑄃𑄚𑄚𑄴𑄖𑄢𑄌𑄖𑄪𑄇𑄴𑄇𑄁 𑄦𑄬𑄑𑄴𑄒𑄧 𑄤𑄪𑄖𑄴𑄖𑄚𑄡𑄟𑄬𑄤.

𑄆𑄇𑄚𑄴𑄖𑄥𑄪𑄈𑄩𑄖𑄨 𑄚𑄨𑄢𑄚𑄴𑄖𑄢𑄥𑄪𑄈𑄩. 𑄃𑄡𑄁 𑄘𑄨𑄑𑄴𑄒𑄨 𑄣𑄧𑄞𑄩𑄎𑄧𑄖𑄨𑄥𑄴𑄥𑄢𑄖𑄇𑄴𑄇𑄩𑄚𑄁 𑄤𑄥𑄬𑄚 𑄅𑄛𑄴𑄛𑄎𑄴𑄎𑄖𑄨. 𑄣𑄧𑄞𑄨𑄚𑄮 𑄦𑄨 𑄛𑄪𑄝𑄴𑄝𑄬𑄚𑄨𑄤𑄧𑄥𑄐𑄧𑄕𑄬𑄚 𑄈𑄖𑄴𑄖𑄨𑄡𑄧𑄘𑄨𑄇𑄪𑄣𑄬 𑄆𑄇𑄚𑄴𑄖𑄥𑄪𑄈𑄟𑄬𑄤 𑄃𑄖𑄴𑄖𑄚𑄮 𑄎𑄧𑄖𑄨𑄁 𑄃𑄚𑄪𑄥𑄴𑄥𑄢𑄚𑄴𑄖𑄥𑄴𑄥 𑄆𑄤𑄁 𑄘𑄨𑄑𑄴𑄒𑄨 𑄅𑄛𑄴𑄛𑄎𑄴𑄎𑄖𑄨. 𑄖𑄗𑄧 𑄎𑄧𑄖𑄨𑄥𑄴𑄥𑄢𑄥𑄴𑄥 𑄛𑄌𑄴𑄌𑄪𑄛𑄴𑄛𑄚𑄴𑄚𑄁 𑄥𑄪𑄈𑄟𑄚𑄪𑄞𑄤𑄖𑄮 𑄃𑄖𑄩𑄖𑄧𑄥𑄪 𑄥𑄖𑄴𑄖𑄥𑄪 𑄎𑄧𑄖𑄩𑄥𑄪 𑄖𑄧𑄘𑄨𑄥𑄟𑄬𑄤 𑄃𑄖𑄴𑄖𑄞𑄧𑄤𑄁 𑄃𑄚𑄪𑄥𑄴𑄥𑄢𑄚𑄴𑄖𑄥𑄴𑄥. 𑄖𑄇𑄴𑄇𑄨𑄥𑄴𑄥 𑄛𑄚 𑄄𑄙 𑄥𑄪𑄈𑄥𑄟𑄋𑄴𑄉𑄨𑄚𑄮 ‘‘𑄃𑄖𑄩𑄖𑄬𑄛𑄧𑄦𑄁 𑄆𑄤𑄟𑄬𑄤 𑄃𑄦𑄮𑄥𑄨’’𑄚𑄴𑄖𑄨 𑄖𑄇𑄴𑄇𑄬𑄚𑄬𑄤 𑄅𑄛𑄴𑄛𑄎𑄴𑄎𑄖𑄨.

𑄆𑄇𑄚𑄴𑄖𑄘𑄪𑄇𑄴𑄈𑄩𑄖𑄨 𑄃𑄡𑄁 𑄘𑄨𑄑𑄴𑄒𑄨 𑄣𑄧𑄞𑄨𑄚𑄮 𑄚𑄪𑄛𑄴𑄛𑄎𑄴𑄎𑄖𑄨. 𑄥𑄮 𑄦𑄨 𑄆𑄇𑄚𑄴𑄖𑄬𑄚𑄬𑄤 𑄄𑄙 𑄏𑄧𑄚𑄥𑄪𑄈𑄬𑄚 𑄥𑄪𑄈𑄩 𑄦𑄮𑄖𑄨. 𑄄𑄙 𑄘𑄪𑄇𑄴𑄈𑄬𑄚 𑄜𑄪𑄑𑄴𑄒𑄥𑄴𑄥 𑄛𑄚 𑄎𑄧𑄖𑄨𑄥𑄴𑄥𑄢𑄥𑄴𑄥 𑄖𑄇𑄴𑄇𑄨𑄥𑄴𑄥𑄬𑄤 𑄌 𑄥𑄧 𑄅𑄛𑄴𑄛𑄎𑄴𑄎𑄖𑄨. 𑄖𑄖𑄨𑄡𑄧 𑄄𑄙 𑄤𑄮𑄇𑄨𑄕𑄴𑄕𑄥𑄪𑄈𑄘𑄪𑄇𑄴𑄈𑄧𑄚𑄁 𑄥𑄝𑄴𑄝𑄬𑄥𑄟𑄴𑄛𑄨 𑄖𑄬𑄥𑄁 𑄅𑄛𑄴𑄛𑄎𑄴𑄎𑄖𑄨, 𑄖𑄗𑄧 𑄌𑄖𑄪𑄖𑄴𑄗𑄧 𑄘𑄨𑄑𑄴𑄒𑄨. 𑄣𑄧𑄞𑄨𑄚𑄮 𑄦𑄨 𑄄𑄘𑄧𑄚𑄨 𑄌𑄖𑄪𑄖𑄴𑄗𑄎𑄴𑄏𑄧𑄚𑄤𑄥𑄬𑄚 𑄃𑄘𑄪𑄇𑄴𑄈𑄟𑄥𑄪𑄈𑄥𑄴𑄥, 𑄛𑄪𑄝𑄴𑄝𑄬 𑄌𑄖𑄪𑄖𑄴𑄗𑄎𑄴𑄏𑄧𑄚𑄨𑄇𑄟𑄬𑄤 𑄝𑄴𑄢𑄦𑄴𑄟𑄣𑄮𑄇𑄁 𑄃𑄚𑄪𑄥𑄴𑄥𑄢𑄚𑄴𑄖𑄥𑄴𑄥. 𑄎𑄧𑄖𑄨𑄥𑄴𑄥𑄢𑄥𑄴𑄥𑄧𑄛𑄨 𑄛𑄌𑄴𑄌𑄪𑄛𑄴𑄛𑄚𑄴𑄚𑄬 𑄟𑄎𑄴𑄏𑄖𑄴𑄖𑄥𑄴𑄥, 𑄃𑄚𑄪𑄥𑄴𑄥𑄢𑄚𑄴𑄖𑄥𑄴𑄥𑄧𑄛𑄨 𑄟𑄎𑄴𑄏𑄖𑄴𑄖𑄞𑄫𑄖𑄑𑄴𑄒𑄧𑄚𑄟𑄬𑄤 𑄃𑄚𑄪𑄥𑄴𑄥𑄢𑄚𑄴𑄖𑄥𑄴𑄥, 𑄖𑄇𑄴𑄇𑄨𑄚𑄮𑄛𑄨 𑄛𑄌𑄴𑄌𑄪𑄛𑄴𑄛𑄚𑄴𑄚𑄬 𑄟𑄎𑄴𑄏𑄖𑄴𑄖𑄥𑄴𑄥, 𑄃𑄖𑄩𑄖𑄬𑄛𑄨 𑄆𑄤𑄁 𑄞𑄤𑄨𑄥𑄴𑄥𑄖𑄩𑄖𑄨 𑄖𑄇𑄴𑄇𑄬𑄚𑄬𑄤 𑄉𑄕𑄴𑄦𑄚𑄴𑄖𑄥𑄴𑄥 𑄆𑄥𑄧 𑄘𑄨𑄑𑄴𑄒𑄨 𑄅𑄛𑄴𑄛𑄎𑄴𑄎𑄖𑄨. 𑄆𑄖𑄴𑄖𑄧𑄤𑄖𑄧 𑄌𑄖𑄴𑄖𑄧𑄢𑄮 𑄥𑄥𑄴𑄥𑄖𑄤𑄧𑄘𑄧, 𑄌𑄖𑄴𑄖𑄧𑄢𑄮 𑄆𑄇𑄌𑄴𑄌𑄥𑄥𑄴𑄥𑄖𑄨𑄇𑄧, 𑄌𑄖𑄴𑄖𑄧𑄢𑄮 𑄃𑄚𑄴𑄖𑄧𑄚𑄚𑄴𑄖𑄨𑄇𑄧, 𑄌𑄖𑄴𑄖𑄧𑄢𑄮 𑄃𑄟𑄢𑄧𑄤𑄨𑄇𑄴𑄈𑄬𑄛𑄨𑄇𑄧, 𑄘𑄴𑄤𑄬 𑄃𑄙𑄨𑄌𑄴𑄌-𑄥𑄟𑄪𑄛𑄴𑄛𑄚𑄴𑄚𑄨𑄇𑄧𑄖𑄨 𑄃𑄑𑄴𑄒𑄧𑄢𑄥𑄛𑄨 𑄛𑄪𑄝𑄴𑄝𑄚𑄴𑄖𑄇𑄛𑄴𑄛𑄨𑄇𑄧 𑄇𑄗𑄨𑄖𑄧 𑄦𑄮𑄚𑄴𑄖𑄨.

𑄸𑄾. 𑄄𑄘𑄧𑄚𑄨 𑄘𑄨𑄑𑄴𑄒𑄪𑄘𑄴𑄙𑄧𑄢𑄁 𑄅𑄘𑄴𑄙𑄢𑄚𑄴𑄖𑄮 𑄖𑄖𑄴𑄢, 𑄞𑄨𑄇𑄴𑄈𑄤𑄬𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄛𑄌𑄴𑄌𑄖𑄴𑄖𑄁𑄡𑄬𑄤 𑄐𑄧𑄕𑄚𑄴𑄖𑄨 𑄛𑄌𑄴𑄌𑄇𑄴𑄈𑄐𑄧𑄕𑄁. 𑄛𑄢𑄨𑄥𑄪𑄘𑄴𑄙𑄚𑄴𑄖𑄨 𑄚𑄨𑄢𑄪𑄛𑄇𑄴𑄇𑄨𑄣𑄬𑄥𑄁. 𑄛𑄢𑄨𑄡𑄮𑄘𑄧𑄖𑄚𑄴𑄖𑄨 𑄛𑄞𑄥𑄴𑄥𑄢𑄁. 𑄥𑄝𑄴𑄝𑄛𑄘𑄬𑄦𑄨 𑄤𑄨𑄛𑄥𑄴𑄥𑄚𑄧𑄐𑄧𑄕𑄁𑄡𑄬𑄤 𑄇𑄗𑄨𑄖𑄁. 𑄥𑄘𑄴𑄙𑄧𑄘𑄡𑄮 𑄦𑄨 𑄛𑄐𑄴𑄌 𑄙𑄟𑄴𑄟𑄧 𑄝𑄧𑄦𑄨𑄢𑄥𑄟𑄡𑄥𑄴𑄟𑄨𑄟𑄴𑄛𑄨 𑄦𑄮𑄚𑄴𑄖𑄨, 𑄤𑄨𑄛𑄥𑄴𑄥𑄚𑄧𑄐𑄧𑄕𑄁 𑄥𑄧𑄥𑄚𑄥𑄴𑄟𑄨𑄁𑄡𑄬𑄤. 𑄖𑄖𑄴𑄗 𑄐𑄧𑄕𑄞𑄧𑄉𑄟𑄖𑄴𑄖𑄟𑄬𑄤 𑄛𑄢𑄨𑄡𑄮𑄘𑄛𑄬𑄚𑄴𑄖𑄩𑄖𑄨 𑄟𑄡𑄟𑄨𑄘𑄁 𑄎𑄧𑄚𑄧𑄟𑄧𑄖𑄨 𑄆𑄤𑄁 𑄖𑄖𑄴𑄗 𑄐𑄧𑄕𑄇𑄮𑄑𑄴𑄒𑄧𑄥𑄁 𑄃𑄮𑄖𑄧𑄢𑄬𑄚𑄴𑄖𑄨𑄡𑄬𑄤. 𑄅𑄛𑄧𑄘𑄧𑄚𑄟𑄇𑄴𑄈𑄧𑄡𑄖𑄩𑄖𑄨 𑄚 𑄖𑄁 𑄐𑄧𑄕𑄁, 𑄟𑄨𑄌𑄴𑄍𑄧𑄘𑄥𑄴𑄥𑄚𑄁 𑄚𑄧𑄟𑄬𑄖𑄁, 𑄖𑄥𑄴𑄟𑄧 𑄖𑄘𑄛𑄨 𑄖𑄬𑄥𑄁 𑄞𑄤𑄚𑄴𑄖𑄧𑄚𑄁 𑄘𑄨𑄑𑄴𑄒𑄪𑄛𑄧𑄘𑄧𑄚𑄁 𑄃𑄇𑄴𑄈𑄧𑄡𑄖𑄩𑄖𑄨 𑄃𑄖𑄴𑄗𑄮. 𑄃𑄗𑄧𑄛𑄨 𑄖𑄁 𑄎𑄧𑄚𑄚𑄟𑄖𑄴𑄖𑄣𑄇𑄴𑄈𑄕𑄖𑄴𑄖𑄧 𑄐𑄧𑄕𑄞𑄧𑄉𑄟𑄖𑄴𑄖𑄟𑄬𑄤, 𑄖𑄗𑄧𑄛𑄨 𑄖𑄥𑄴𑄥 𑄘𑄥𑄴𑄥𑄚𑄥𑄴𑄥 𑄃𑄚𑄪𑄛𑄧𑄖𑄨𑄤𑄖𑄴𑄖𑄚𑄖𑄮 𑄅𑄛𑄧𑄘𑄧𑄚𑄛𑄌𑄴𑄌𑄡𑄖𑄮 𑄌 𑄅𑄛𑄧𑄘𑄧𑄚𑄟𑄬𑄤. 𑄖𑄘𑄪𑄛𑄧𑄖𑄨𑄤𑄖𑄴𑄖𑄮𑄖𑄨 𑄖𑄁 𑄘𑄨𑄑𑄴𑄒𑄨𑄁 𑄃𑄖𑄨𑄇𑄴𑄇𑄚𑄴𑄖𑄮. 𑄆𑄖𑄴𑄖𑄧𑄤𑄖𑄧 𑄌𑄖𑄴𑄖𑄧𑄢𑄮 𑄥𑄥𑄴𑄥𑄖𑄤𑄧𑄘𑄧, 𑄌𑄖𑄴𑄖𑄧𑄢𑄮 𑄆𑄇𑄌𑄴𑄌𑄥𑄥𑄴𑄥𑄖𑄨𑄇𑄧, 𑄌𑄖𑄴𑄖𑄧𑄢𑄮 𑄃𑄚𑄴𑄖𑄧𑄚𑄚𑄴𑄖𑄨𑄇𑄧, 𑄌𑄖𑄴𑄖𑄧𑄢𑄮 𑄃𑄟𑄢𑄧𑄤𑄨𑄇𑄴𑄈𑄬𑄛𑄨𑄇𑄧, 𑄘𑄴𑄤𑄬 𑄃𑄙𑄨𑄌𑄴𑄌𑄥𑄟𑄪𑄛𑄴𑄛𑄚𑄴𑄚𑄨𑄇𑄧, 𑄥𑄮𑅄𑄥 𑄥𑄐𑄴𑄐𑄩𑄤𑄧𑄘𑄧, 𑄃𑄑𑄴𑄒 𑄃𑄥𑄐𑄴𑄐𑄩𑄤𑄧𑄘𑄧, 𑄃𑄑𑄴𑄒 𑄚𑄬𑄤𑄥𑄐𑄴𑄐𑄩𑄚𑄧𑄥𑄐𑄴𑄐𑄩𑄤𑄧𑄘𑄧, 𑄥𑄖𑄴𑄖 𑄅𑄌𑄴𑄍𑄬𑄘𑄤𑄧𑄘𑄧, 𑄛𑄐𑄴𑄌 𑄘𑄨𑄑𑄴𑄒𑄙𑄟𑄴𑄟𑄚𑄨𑄝𑄴𑄝𑄧𑄚𑄤𑄧𑄘𑄧𑄖𑄨 𑄝𑄴𑄢𑄦𑄴𑄟𑄎𑄧𑄣𑄬 𑄃𑄂𑄉𑄖𑄧 𑄘𑄴𑄤𑄧𑄥𑄑𑄴𑄒𑄨𑄛𑄨 𑄘𑄨𑄑𑄴𑄒𑄨𑄡𑄮 𑄇𑄗𑄨𑄖𑄧 𑄦𑄮𑄚𑄴𑄖𑄨. 𑄝𑄴𑄢𑄦𑄴𑄟𑄎𑄧𑄣𑄬 𑄛𑄚 𑄇𑄗𑄨𑄖𑄬 𑄄𑄘𑄁 𑄥𑄪𑄖𑄴𑄖𑄁 𑄃𑄇𑄗𑄨𑄖𑄟𑄬𑄤 𑄦𑄮𑄖𑄨. 𑄇𑄥𑄴𑄟𑄧? 𑄄𑄙 𑄖𑄖𑄮 𑄃𑄖𑄨𑄢𑄬𑄇𑄧𑄡 𑄥𑄇𑄴𑄇𑄧𑄡𑄘𑄨𑄑𑄴𑄒𑄨𑄡𑄧 𑄃𑄂𑄉𑄖𑄖𑄴𑄖𑄧. 𑄄𑄟𑄥𑄴𑄟𑄨𑄁 𑄛𑄚 𑄇𑄗𑄨𑄖𑄬 𑄝𑄴𑄢𑄦𑄴𑄟𑄎𑄧𑄣𑄁 𑄇𑄗𑄨𑄖𑄟𑄬𑄤 𑄦𑄮𑄖𑄨.

𑄹𑄶. 𑄄𑄘𑄧𑄚𑄨 𑄄𑄟𑄧 𑄘𑄴𑄤𑄧𑄥𑄑𑄴𑄒𑄨 𑄘𑄨𑄑𑄴𑄒𑄨𑄡𑄮 𑄅𑄛𑄴𑄛𑄎𑄴𑄎𑄟𑄧𑄚𑄧 𑄥𑄇𑄴𑄇𑄧𑄡𑄘𑄨𑄑𑄴𑄒𑄨𑄛𑄟𑄪𑄈𑄬𑄚𑄬𑄤 𑄅𑄛𑄴𑄛𑄎𑄴𑄎𑄚𑄴𑄖𑄩𑄖𑄨 𑄘𑄥𑄴𑄥𑄬𑄖𑄪𑄁 𑄄𑄙, 𑄞𑄨𑄇𑄴𑄈𑄤𑄬, 𑄆𑄇𑄌𑄴𑄌𑄮𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄛𑄑𑄨𑄚𑄨𑄥𑄴𑄥𑄉𑄴𑄉𑄧𑄖𑄨 𑄛𑄢𑄨𑄌𑄴𑄌𑄧𑄉𑄬𑄚. 𑄇𑄧𑄟𑄥𑄁𑄡𑄮𑄎𑄚𑄧𑄚𑄁 𑄃𑄚𑄙𑄨𑄑𑄴𑄒𑄧𑄚𑄧𑄖𑄨 𑄛𑄐𑄴𑄌𑄇𑄧𑄟𑄉𑄪𑄕𑄖𑄕𑄴𑄦𑄧𑄚𑄁 𑄚𑄨𑄥𑄴𑄥𑄑𑄴𑄒𑄖𑄴𑄖𑄧. 𑄛𑄤𑄨𑄤𑄬𑄇𑄁 𑄛𑄩𑄖𑄨𑄚𑄴𑄖𑄨 𑄥𑄛𑄴𑄛𑄩𑄖𑄨𑄇𑄎𑄴𑄏𑄧𑄚𑄘𑄴𑄤𑄡𑄛𑄩𑄖𑄨𑄁. 𑄚𑄨𑄢𑄪𑄎𑄴𑄏𑄖𑄩𑄖𑄨 𑄏𑄧𑄚𑄚𑄨𑄢𑄮𑄙𑄬𑄚 𑄚𑄨𑄢𑄪𑄎𑄴𑄏𑄖𑄨. 𑄥𑄟𑄧𑄛𑄖𑄴𑄖𑄨𑄖𑄮 𑄛𑄚 𑄤𑄪𑄑𑄴𑄒𑄨𑄖𑄥𑄴𑄥 𑄚𑄨𑄢𑄪𑄘𑄴𑄙𑄧 𑄚𑄧𑄟 𑄦𑄮𑄖𑄨. 𑄡𑄗𑄬𑄤 𑄦𑄨 ‘‘𑄃𑄘𑄪𑄇𑄴𑄈𑄟𑄥𑄪𑄈𑄧𑄡 𑄤𑄬𑄘𑄚𑄧𑄡 𑄚𑄨𑄢𑄮𑄙𑄧 𑄅𑄛𑄴𑄛𑄎𑄴𑄎𑄖𑄨 𑄚𑄨𑄢𑄧𑄟𑄨𑄥𑄁 𑄥𑄪𑄈𑄁, 𑄚𑄨𑄢𑄧𑄟𑄨𑄥𑄥𑄪𑄈𑄥𑄴𑄥 𑄚𑄨𑄢𑄮𑄙𑄧 𑄅𑄛𑄴𑄛𑄎𑄴𑄎𑄖𑄨 𑄃𑄘𑄪𑄇𑄴𑄈𑄟𑄥𑄪𑄈𑄧 𑄤𑄬𑄘𑄚𑄧’’𑄖𑄨 𑄆𑄖𑄴𑄗 𑄚 𑄃𑄡𑄟𑄖𑄴𑄗𑄮 𑄦𑄮𑄖𑄨 – 𑄌𑄖𑄪𑄖𑄴𑄗𑄎𑄴𑄏𑄧𑄚𑄚𑄨𑄢𑄮𑄙𑄧 𑄖𑄖𑄨𑄡𑄎𑄴𑄏𑄧𑄚𑄁 𑄅𑄛𑄥𑄟𑄴𑄛𑄎𑄴𑄎 𑄤𑄨𑄦𑄢𑄖𑄩𑄖𑄨. 𑄃𑄡𑄁 𑄛𑄚𑄬𑄖𑄴𑄗 𑄃𑄖𑄴𑄗𑄮 – 𑄌𑄖𑄪𑄖𑄴𑄗𑄎𑄴𑄏𑄧𑄚𑄧 𑄤𑄪𑄑𑄴𑄒𑄧𑄡 𑄖𑄖𑄨𑄡𑄁 𑄏𑄧𑄚𑄁 𑄥𑄟𑄧𑄛𑄎𑄴𑄎𑄖𑄨, 𑄖𑄖𑄨𑄡𑄎𑄴𑄏𑄧𑄚𑄧 𑄤𑄪𑄑𑄴𑄒𑄧𑄡 𑄌𑄖𑄪𑄖𑄴𑄗𑄁 𑄏𑄧𑄚𑄁 𑄥𑄟𑄧𑄛𑄎𑄴𑄎𑄖𑄩𑄖𑄨, 𑄆𑄤𑄁𑄥𑄟𑄴𑄛𑄘𑄟𑄨𑄘𑄁 𑄤𑄬𑄘𑄨𑄖𑄝𑄴𑄝𑄁. 𑄅𑄛𑄴𑄛𑄎𑄴𑄎𑄖𑄨 𑄘𑄮𑄟𑄚𑄥𑄴𑄥𑄚𑄴𑄖𑄨 𑄦𑄩𑄚𑄎𑄴𑄏𑄧𑄚𑄛𑄢𑄨𑄡𑄧𑄘𑄧𑄚𑄇𑄘𑄮𑄟𑄚𑄥𑄴𑄥𑄁. 𑄥𑄟𑄧𑄛𑄖𑄴𑄖𑄨𑄖𑄮 𑄤𑄪𑄑𑄴𑄒𑄨𑄖𑄌𑄨𑄖𑄴𑄖𑄥𑄴𑄥 𑄛𑄚 𑄇𑄟𑄴𑄟𑄚𑄩𑄡𑄞𑄧𑄤𑄮 𑄇𑄗𑄨𑄖𑄮.

𑄛𑄤𑄨𑄤𑄬𑄇𑄧 𑄛𑄩𑄖𑄩𑄖𑄨 𑄥𑄧 𑄆𑄤 𑄏𑄧𑄚𑄘𑄴𑄤𑄡𑄛𑄩𑄖𑄨. 𑄡𑄁 𑄍𑄧𑄡𑄧 𑄎𑄦𑄖𑄩𑄖𑄨 𑄡𑄁 𑄒𑄧𑄚𑄁 𑄍𑄧𑄡𑄧 𑄎𑄦𑄖𑄨. 𑄇𑄨𑄁 𑄤𑄪𑄖𑄴𑄖𑄁 𑄦𑄮𑄖𑄨? 𑄡𑄥𑄴𑄟𑄨𑄁 𑄒𑄧𑄚𑄬 𑄍𑄧𑄡𑄧 𑄃𑄖𑄴𑄗𑄨, 𑄖𑄥𑄴𑄟𑄨𑄁 𑄃𑄂𑄖𑄛𑄮 𑄚𑄖𑄴𑄗𑄨. 𑄡𑄥𑄴𑄟𑄨𑄁 𑄃𑄂𑄖𑄛𑄮 𑄃𑄖𑄴𑄗𑄨, 𑄖𑄥𑄴𑄟𑄨𑄁 𑄍𑄧𑄡𑄧 𑄚𑄖𑄴𑄗𑄩𑄖𑄨.

𑄹𑄷. 𑄚𑄨𑄢𑄧𑄟𑄨𑄥𑄁 𑄥𑄪𑄈𑄚𑄴𑄖𑄨 𑄖𑄖𑄨𑄡𑄎𑄴𑄏𑄧𑄚𑄥𑄪𑄈𑄁.

𑄹𑄸. 𑄃𑄘𑄪𑄇𑄴𑄈𑄟𑄥𑄪𑄈𑄚𑄴𑄖𑄨 𑄌𑄖𑄪𑄖𑄴𑄗𑄎𑄴𑄏𑄧𑄚𑄤𑄬𑄘𑄚𑄁.

𑄹𑄹. 𑄃𑄚𑄪𑄛𑄧𑄘𑄧𑄚𑄮𑄦𑄟𑄥𑄴𑄟𑄩𑄖𑄨 𑄚𑄨𑄉𑄴𑄉𑄦𑄕𑄮 𑄃𑄦𑄟𑄥𑄴𑄟𑄨. 𑄚𑄨𑄝𑄴𑄝𑄧𑄚𑄥𑄛𑄴𑄛𑄧𑄡𑄚𑄴𑄖𑄨 𑄚𑄨𑄝𑄴𑄝𑄧𑄚𑄥𑄴𑄥 𑄥𑄛𑄴𑄛𑄧𑄡𑄁 𑄅𑄛𑄇𑄧𑄢𑄞𑄫𑄖𑄁. 𑄚𑄚𑄪 𑄌 𑄟𑄉𑄴𑄉𑄘𑄥𑄴𑄥𑄚𑄁 𑄚𑄧𑄟 𑄥𑄝𑄴𑄝𑄖𑄴𑄗 𑄚𑄨𑄇𑄚𑄴𑄖𑄨𑄡𑄧 𑄥𑄪𑄇𑄴𑄈𑄧𑄛𑄨𑄖𑄧𑄡 𑄅𑄛𑄴𑄛𑄎𑄴𑄎𑄖𑄨, 𑄇𑄗𑄟𑄬𑄖𑄁 𑄚𑄨𑄝𑄴𑄝𑄧𑄚𑄥𑄴𑄥 𑄅𑄛𑄇𑄧𑄢𑄛𑄑𑄨𑄛𑄘𑄧 𑄚𑄧𑄟 𑄎𑄧𑄖𑄚𑄴𑄖𑄨, 𑄥𑄝𑄴𑄝𑄖𑄴𑄗 𑄃𑄚𑄪𑄛𑄧𑄘𑄨𑄡𑄚𑄤𑄥𑄬𑄚 𑄃𑄉𑄴𑄉𑄕𑄴𑄦𑄚𑄤𑄥𑄬𑄚 𑄅𑄛𑄇𑄧𑄢𑄛𑄑𑄨𑄛𑄘𑄧 𑄚𑄧𑄟 𑄎𑄧𑄖𑄁. 𑄃𑄞𑄨𑄤𑄘𑄖𑄩𑄖𑄨 𑄃𑄞𑄨𑄟𑄧𑄚𑄬𑄚 𑄅𑄛𑄤𑄘𑄖𑄨. 𑄛𑄪𑄝𑄴𑄝𑄚𑄴𑄖𑄧𑄚𑄪𑄘𑄨𑄑𑄴𑄒𑄨𑄚𑄴𑄖𑄨 𑄃𑄑𑄴𑄒𑄧𑄢𑄥𑄤𑄨𑄙𑄟𑄴𑄛𑄨 𑄛𑄪𑄝𑄴𑄝𑄚𑄴𑄖𑄧𑄚𑄪𑄘𑄨𑄑𑄴𑄒𑄨𑄁. 𑄃𑄛𑄢𑄚𑄴𑄖𑄧𑄚𑄪𑄘𑄨𑄑𑄴𑄒𑄨𑄚𑄴𑄖𑄨 𑄌𑄖𑄪𑄌𑄖𑄴𑄖𑄧𑄢𑄩𑄥𑄤𑄨𑄙𑄟𑄴𑄛𑄨 𑄃𑄛𑄢𑄚𑄴𑄖𑄧𑄚𑄪𑄘𑄨𑄑𑄴𑄒𑄨𑄁. 𑄅𑄛𑄧𑄘𑄧𑄚𑄟𑄇𑄴𑄈𑄧𑄡𑄖𑄩𑄖𑄨 𑄃𑄦𑄟𑄥𑄴𑄟𑄩𑄖𑄨 𑄉𑄦𑄕𑄥𑄴𑄥 𑄥𑄇𑄴𑄇𑄧𑄡𑄘𑄨𑄑𑄴𑄒𑄨𑄛𑄢𑄨𑄡𑄧𑄛𑄚𑄴𑄚𑄖𑄴𑄖𑄧 𑄘𑄨𑄑𑄴𑄒𑄪𑄛𑄧𑄘𑄧𑄚𑄁 𑄃𑄇𑄴𑄈𑄧𑄡𑄖𑄨.

𑄥𑄚𑄴𑄖𑄨𑄤𑄢𑄛𑄘𑄚𑄴𑄖𑄨 𑄤𑄫𑄛𑄥𑄚𑄴𑄖𑄇𑄨𑄣𑄬𑄥𑄖𑄴𑄖𑄧 𑄥𑄚𑄴𑄖𑄁 𑄅𑄖𑄴𑄖𑄟𑄛𑄘𑄁. 𑄍𑄚𑄴𑄚𑄁 𑄜𑄥𑄴𑄥𑄧𑄡𑄖𑄚𑄧𑄚𑄚𑄴𑄖𑄨 𑄞𑄉𑄤𑄖𑄧 ‘‘𑄡𑄖𑄴𑄗 𑄌𑄇𑄴𑄈𑄪 𑄌 𑄚𑄨𑄢𑄪𑄎𑄴𑄏𑄖𑄨 𑄢𑄫𑄛𑄥𑄐𑄴𑄐𑄧 𑄌 𑄚𑄨𑄢𑄪𑄎𑄴𑄏𑄖𑄨 𑄥𑄮 𑄃𑄂𑄡𑄖𑄚𑄮 𑄤𑄬𑄘𑄨𑄖𑄝𑄴𑄝𑄮’’𑄖𑄨 𑄆𑄖𑄴𑄗 𑄘𑄴𑄤𑄨𑄚𑄴𑄚𑄁 𑄃𑄂𑄡𑄖𑄚𑄧𑄚𑄁 𑄛𑄑𑄨𑄇𑄴𑄈𑄬𑄛𑄬𑄚 𑄚𑄨𑄝𑄴𑄝𑄧𑄚𑄁 𑄘𑄥𑄴𑄥𑄨𑄖𑄁.

‘‘𑄡𑄖𑄴𑄗 𑄃𑄂𑄛𑄮 𑄌 𑄛𑄗𑄤𑄩, 𑄖𑄬𑄎𑄮 𑄤𑄧𑄡𑄮 𑄚 𑄉𑄧𑄙𑄖𑄨;

𑄃𑄖𑄮 𑄥𑄢𑄧 𑄚𑄨𑄤𑄖𑄴𑄖𑄚𑄴𑄖𑄨, 𑄆𑄖𑄴𑄗 𑄤𑄑𑄴𑄑𑄁 𑄚 𑄤𑄖𑄴𑄖𑄖𑄨;

𑄆𑄖𑄴𑄗 𑄚𑄧𑄟𑄐𑄴𑄌 𑄢𑄫𑄛𑄐𑄴𑄌, 𑄃𑄥𑄬𑄥𑄁 𑄅𑄛𑄢𑄪𑄎𑄴𑄏𑄖𑄩’’𑄖𑄨. (𑄥𑄁. 𑄚𑄨. 𑄷.𑄸𑄽) –

𑄆𑄖𑄴𑄗 𑄛𑄚 𑄥𑄋𑄴𑄈𑄧𑄢𑄛𑄑𑄨𑄇𑄴𑄈𑄬𑄛𑄬𑄚 𑄚𑄨𑄝𑄴𑄝𑄧𑄚𑄁 𑄘𑄥𑄴𑄥𑄨𑄖𑄁.

‘‘𑄇𑄖𑄴𑄗 𑄃𑄂𑄛𑄮 𑄌 𑄛𑄗𑄤𑄩, 𑄖𑄬𑄎𑄮 𑄤𑄧𑄡𑄮 𑄚 𑄉𑄧𑄙𑄖𑄨;

𑄇𑄖𑄴𑄗 𑄘𑄩𑄊𑄐𑄴𑄌 𑄢𑄥𑄴𑄥𑄐𑄴𑄌, 𑄃𑄕𑄪𑄁 𑄗𑄫𑄣𑄁 𑄥𑄪𑄞𑄧𑄥𑄪𑄞𑄁;

𑄇𑄖𑄴𑄗 𑄚𑄧𑄟𑄐𑄴𑄌 𑄢𑄫𑄛𑄐𑄴𑄌, 𑄃𑄥𑄬𑄥𑄁 𑄅𑄛𑄢𑄪𑄎𑄴𑄏𑄖𑄩’’𑄖𑄨. (𑄘𑄩. 𑄚𑄨. 𑄷.𑄺𑄿𑄾);

𑄖𑄖𑄴𑄢 𑄤𑄬𑄡𑄴𑄡𑄧𑄇𑄢𑄕𑄁 𑄞𑄤𑄖𑄨 –

‘‘𑄤𑄨𑄐𑄴𑄐𑄧𑄕𑄁 𑄃𑄚𑄨𑄘𑄥𑄴𑄥𑄚𑄁, 𑄃𑄚𑄚𑄴𑄖𑄁 𑄥𑄝𑄴𑄝𑄖𑄮 𑄛𑄞’’𑄚𑄴𑄖𑄨 –

𑄆𑄖𑄴𑄗 𑄥𑄋𑄴𑄈𑄧𑄢𑄛𑄑𑄨𑄇𑄴𑄈𑄬𑄛𑄬𑄚 𑄚𑄨𑄝𑄴𑄝𑄧𑄚𑄁 𑄘𑄥𑄴𑄥𑄨𑄖𑄁. 𑄄𑄟𑄥𑄴𑄟𑄨𑄁 𑄛𑄚 𑄥𑄪𑄖𑄴𑄖𑄬 𑄍𑄃𑄂𑄡𑄖𑄚𑄛𑄑𑄨𑄇𑄴𑄈𑄬𑄛𑄬𑄚 𑄘𑄥𑄴𑄥𑄨𑄖𑄁. 𑄃𑄐𑄴𑄐𑄖𑄴𑄗 𑄌 𑄃𑄚𑄪𑄛𑄧𑄘𑄧𑄤𑄨𑄟𑄮𑄇𑄴𑄈𑄮𑄖𑄨 𑄚𑄨𑄝𑄴𑄝𑄧𑄚𑄟𑄬𑄤 𑄘𑄥𑄴𑄥𑄨𑄖𑄁, 𑄄𑄙 𑄛𑄚 𑄃𑄢𑄦𑄖𑄴𑄖𑄜𑄣𑄥𑄟𑄧𑄛𑄖𑄴𑄖𑄨. 𑄥𑄬𑄥𑄁 𑄥𑄝𑄴𑄝𑄖𑄴𑄗 𑄅𑄖𑄴𑄖𑄧𑄚𑄟𑄬𑄤𑄧𑄖𑄨.

𑄛𑄛𑄐𑄴𑄌𑄥𑄫𑄘𑄚𑄨𑄡𑄧 𑄟𑄎𑄴𑄏𑄨𑄟𑄚𑄨𑄇𑄧𑄡𑄑𑄴𑄒𑄇𑄗𑄧𑄡

𑄛𑄐𑄴𑄌𑄖𑄴𑄖𑄡𑄥𑄪𑄖𑄴𑄖𑄤𑄕𑄴𑄕𑄚𑄧 𑄚𑄨𑄑𑄴𑄒𑄨𑄖𑄧.

𑄹. 𑄇𑄨𑄚𑄴𑄖𑄨𑄥𑄪𑄖𑄴𑄖𑄤𑄕𑄴𑄕𑄚𑄧

𑄹𑄺. 𑄆𑄤𑄁 𑄟𑄬 𑄥𑄪𑄖𑄚𑄴𑄖𑄨 𑄇𑄨𑄚𑄴𑄖𑄨𑄥𑄪𑄖𑄴𑄖𑄁. 𑄖𑄖𑄴𑄗 𑄛𑄨𑄥𑄨𑄚𑄧𑄢𑄧𑄡𑄚𑄴𑄖𑄨 𑄆𑄤𑄁𑄚𑄧𑄟𑄇𑄬 𑄟𑄕𑄴𑄓𑄣𑄛𑄘𑄬𑄥𑄬. 𑄝𑄣𑄨𑄦𑄢𑄕𑄬𑄖𑄨 𑄖𑄥𑄴𑄟𑄨𑄁 𑄤𑄚𑄥𑄕𑄴𑄓𑄬 𑄞𑄫𑄖𑄧𑄚𑄁 𑄝𑄣𑄨𑄁 𑄃𑄂𑄦𑄢𑄚𑄴𑄖𑄨, 𑄖𑄥𑄴𑄟𑄧 𑄥𑄮 𑄝𑄣𑄨𑄦𑄢𑄕𑄚𑄴𑄖𑄨 𑄤𑄪𑄖𑄴𑄖𑄮. 𑄌𑄩𑄤𑄢𑄦𑄬𑄖𑄫𑄖𑄨 𑄌𑄩𑄤𑄢𑄇𑄧𑄢𑄕𑄧, 𑄌𑄩𑄤𑄢𑄁 𑄛𑄌𑄴𑄌𑄧𑄥𑄩𑄥𑄟𑄧𑄚𑄮𑄖𑄨 𑄃𑄖𑄴𑄗𑄮. 𑄄𑄖𑄨𑄞𑄤𑄧𑄞𑄤𑄦𑄬𑄖𑄫𑄖𑄨 𑄆𑄤𑄁 𑄄𑄟𑄁 𑄘𑄬𑄥𑄚𑄧𑄟𑄡𑄁 𑄛𑄪𑄐𑄴𑄐𑄇𑄨𑄢𑄨𑄡𑄤𑄖𑄴𑄗𑄪𑄁 𑄚𑄨𑄥𑄴𑄥𑄧𑄡 𑄖𑄥𑄴𑄟𑄨𑄁 𑄖𑄥𑄴𑄟𑄨𑄁 𑄞𑄤𑄬 𑄥𑄪𑄈𑄁 𑄤𑄬𑄘𑄨𑄥𑄴𑄥𑄧𑄟𑄩𑄖𑄨 𑄙𑄟𑄴𑄟𑄁 𑄘𑄬𑄥𑄬𑄖𑄩𑄖𑄨 𑄇𑄨𑄁 𑄖𑄪𑄟𑄴𑄦𑄧𑄇𑄁 𑄆𑄤𑄁 𑄦𑄮𑄖𑄩𑄖𑄨 𑄃𑄖𑄴𑄗𑄮.

𑄹𑄻. 𑄌𑄖𑄴𑄖𑄧𑄢𑄮 𑄥𑄖𑄨𑄛𑄑𑄴𑄒𑄧𑄚𑄧𑄖𑄨𑄃𑄂𑄘𑄡𑄮 𑄥𑄖𑄴𑄖𑄖𑄨𑄁𑄥 𑄝𑄮𑄙𑄨𑄛𑄇𑄴𑄈𑄨𑄡𑄙𑄟𑄴𑄟𑄧 𑄣𑄮𑄇𑄨𑄡𑄣𑄮𑄇𑄪𑄖𑄴𑄖𑄢𑄧𑄤 𑄇𑄗𑄨𑄖𑄧. 𑄖𑄖𑄴𑄗𑄧𑄖𑄨 𑄖𑄬𑄥𑄪 𑄥𑄖𑄴𑄖𑄖𑄨𑄁𑄥𑄧𑄡 𑄙𑄟𑄴𑄟𑄬𑄥𑄪. 𑄥𑄨𑄡𑄁𑄥𑄫𑄖𑄨 𑄞𑄤𑄬𑄡𑄴𑄡𑄪𑄁. 𑄃𑄞𑄨𑄙𑄟𑄴𑄟𑄬𑄖𑄨 𑄤𑄨𑄥𑄨𑄑𑄴𑄒𑄬 𑄙𑄟𑄴𑄟𑄬, 𑄄𑄟𑄬𑄥𑄪 𑄥𑄖𑄴𑄖𑄖𑄨𑄁𑄥𑄝𑄮𑄙𑄨𑄛𑄇𑄴𑄈𑄨𑄡𑄙𑄟𑄴𑄟𑄬𑄥𑄫𑄖𑄨 𑄃𑄖𑄴𑄗𑄮. 𑄖𑄖𑄴𑄢 𑄌𑄬𑄖𑄨 𑄄𑄘𑄟𑄴𑄛𑄨 𑄝𑄮𑄙𑄨𑄛𑄇𑄴𑄈𑄨𑄡𑄙𑄟𑄴𑄟𑄬𑄥𑄴𑄤𑄬𑄤 𑄞𑄪𑄟𑄴𑄟𑄁. 𑄃𑄖𑄴𑄗𑄖𑄮 𑄌𑄬𑄤 𑄚𑄧𑄚𑄁 𑄝𑄴𑄡𑄐𑄴𑄎𑄚𑄖𑄮 𑄌𑄧𑄖𑄨 𑄆𑄖𑄴𑄗 ‘‘𑄇𑄧𑄡𑄮𑄤 𑄥𑄖𑄨𑄛𑄑𑄴𑄒𑄧𑄚𑄁 𑄤𑄬𑄘𑄚𑄧𑄤 𑄥𑄖𑄨𑄛𑄑𑄴𑄒𑄧𑄚’’𑄚𑄴𑄖𑄨 𑄤𑄪𑄖𑄴𑄖𑄬 𑄃𑄖𑄴𑄗𑄖𑄮 𑄚𑄧𑄚𑄁 𑄦𑄮𑄖𑄨, ‘‘𑄥𑄖𑄨𑄛𑄑𑄴𑄒𑄧𑄚𑄧’’𑄖𑄨 𑄤𑄪𑄖𑄴𑄖𑄬 𑄛𑄚 𑄝𑄴𑄡𑄐𑄴𑄎𑄚𑄖𑄮 𑄚𑄧𑄚𑄁 𑄚𑄧𑄟 𑄦𑄮𑄖𑄨. 𑄖𑄘𑄟𑄨𑄚𑄧𑄛𑄩𑄖𑄨 𑄖𑄁 𑄖𑄪𑄟𑄴𑄦𑄬 𑄄𑄟𑄨𑄚𑄧𑄛𑄨 𑄇𑄧𑄢𑄕𑄬𑄚 𑄎𑄧𑄚𑄧𑄗𑄧𑄖𑄨 𑄃𑄖𑄴𑄗𑄐𑄴𑄌 𑄝𑄴𑄡𑄐𑄴𑄎𑄚𑄐𑄴𑄌 𑄥𑄟𑄧𑄚𑄬𑄖𑄴𑄤𑄧 𑄃𑄗𑄥𑄴𑄥 𑄌 𑄃𑄐𑄴𑄐𑄗𑄧 𑄉𑄦𑄨𑄖𑄞𑄧𑄤𑄮 𑄝𑄴𑄡𑄐𑄴𑄎𑄚𑄥𑄴𑄥 𑄌 𑄟𑄨𑄌𑄴𑄍𑄧 𑄢𑄮𑄛𑄨𑄖𑄞𑄧𑄤𑄮 𑄘𑄥𑄴𑄥𑄬𑄖𑄝𑄴𑄝𑄮. 𑄡𑄮 𑄙𑄟𑄴𑄟𑄮 𑄡𑄮 𑄤𑄨𑄚𑄡𑄮𑄖𑄨 𑄆𑄖𑄴𑄗 𑄃𑄖𑄴𑄗𑄐𑄴𑄌 𑄝𑄴𑄡𑄐𑄴𑄎𑄚𑄐𑄴𑄌 𑄤𑄨𑄐𑄴𑄐𑄧𑄛𑄚𑄇𑄧𑄢𑄕𑄟𑄬𑄤 𑄙𑄟𑄴𑄟𑄮 𑄌 𑄤𑄨𑄚𑄡𑄮 𑄌.

𑄹𑄽. 𑄃𑄖𑄴𑄗𑄖𑄮 𑄦𑄨 𑄈𑄮 𑄥𑄟𑄬𑄖𑄩𑄖𑄨 𑄥𑄖𑄨𑄡𑄬𑄤 𑄥𑄖𑄨𑄛𑄑𑄴𑄒𑄧𑄚𑄚𑄴𑄖𑄨 𑄉𑄦𑄨𑄖𑄧. 𑄝𑄴𑄡𑄐𑄴𑄎𑄚𑄖𑄮 𑄚𑄧𑄚𑄚𑄴𑄖𑄨 𑄇𑄬𑄤𑄣𑄁 𑄝𑄴𑄡𑄐𑄴𑄎𑄚𑄟𑄬𑄤 𑄥𑄖𑄨𑄛𑄑𑄴𑄒𑄧𑄚𑄮𑄖𑄨 𑄤𑄧 𑄥𑄖𑄨𑄛𑄑𑄴𑄒𑄧𑄚𑄧𑄖𑄨 𑄤𑄧 𑄟𑄨𑄌𑄴𑄍𑄧 𑄢𑄮𑄛𑄬𑄗. 𑄃𑄛𑄴𑄛𑄟𑄖𑄴𑄖𑄇𑄁 𑄈𑄮𑄖𑄨 𑄥𑄪𑄖𑄴𑄖𑄚𑄴𑄖𑄁 𑄛𑄖𑄴𑄤𑄧 𑄝𑄴𑄡𑄐𑄴𑄎𑄚𑄁 𑄃𑄛𑄴𑄛𑄟𑄖𑄴𑄖𑄇𑄁 𑄚𑄧𑄟 𑄦𑄮𑄖𑄨. 𑄛𑄢𑄨𑄖𑄴𑄖𑄟𑄖𑄴𑄖𑄁 𑄙𑄚𑄨𑄖𑄁 𑄇𑄖𑄴𑄤𑄧 𑄢𑄮𑄛𑄨𑄖𑄬𑄛𑄨 𑄦𑄨 𑄚𑄨𑄝𑄴𑄝𑄪𑄖𑄨𑄁 𑄛𑄖𑄴𑄖𑄪𑄁 𑄥𑄇𑄴𑄇𑄧 𑄦𑄮𑄖𑄨.

𑄖𑄖𑄴𑄢𑄨𑄘𑄁 𑄤𑄖𑄴𑄗𑄪 – 𑄤𑄨𑄎𑄡𑄧𑄢𑄧𑄟𑄤𑄨𑄦𑄧𑄢𑄤𑄧𑄥𑄩 𑄇𑄨𑄢𑄬𑄇𑄮 𑄈𑄩𑄕𑄧𑄥𑄤𑄖𑄴𑄗𑄬𑄢𑄮 𑄘𑄴𑄤𑄨𑄚𑄴𑄚𑄁 𑄞𑄨𑄇𑄴𑄈𑄫𑄚𑄁 𑄥𑄪𑄖𑄴𑄖𑄁 𑄃𑄂𑄦𑄢𑄨𑄖𑄴𑄤𑄧 𑄇𑄟𑄴𑄟𑄑𑄴𑄒𑄧𑄚𑄁 𑄇𑄗𑄬𑄚𑄴𑄖𑄮 – ‘‘𑄥𑄟𑄪𑄘𑄴𑄙𑄮 𑄥𑄟𑄪𑄘𑄴𑄙𑄮𑄖𑄨, 𑄞𑄨𑄇𑄴𑄈𑄤𑄬, 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄩’’𑄖𑄨 𑄙𑄚𑄨𑄖𑄁 𑄇𑄖𑄴𑄤𑄧 𑄃𑄂𑄦. 𑄆𑄇𑄮 𑄞𑄨𑄇𑄴𑄈𑄪 ‘‘𑄥𑄟𑄪𑄘𑄴𑄙𑄮 𑄚𑄧𑄟, 𑄞𑄚𑄴𑄖𑄬’’𑄖𑄨 𑄃𑄂𑄦. 𑄃𑄂𑄤𑄪𑄥𑄮, 𑄥𑄟𑄪𑄘𑄴𑄙𑄮𑄖𑄨 𑄤𑄪𑄖𑄴𑄖𑄬𑄛𑄨 𑄥𑄟𑄪𑄘𑄴𑄘𑄮𑄖𑄨 𑄤𑄪𑄖𑄴𑄖𑄬𑄛𑄨 𑄟𑄡𑄁 𑄣𑄮𑄕𑄥𑄧𑄉𑄢𑄟𑄬𑄤 𑄎𑄧𑄚𑄧𑄟, 𑄖𑄪𑄟𑄴𑄦𑄬 𑄛𑄚 𑄚𑄮 𑄃𑄖𑄴𑄗𑄉𑄤𑄬𑄥𑄇𑄧, 𑄝𑄴𑄡𑄐𑄴𑄎𑄚𑄉𑄤𑄬𑄥𑄇𑄧, 𑄉𑄌𑄴𑄍𑄗 𑄟𑄦𑄧𑄤𑄨𑄦𑄧𑄢𑄬 𑄛𑄉𑄪𑄕𑄝𑄴𑄡𑄐𑄴𑄎𑄚𑄧𑄚𑄁 𑄞𑄨𑄇𑄴𑄈𑄫𑄚𑄁 𑄥𑄚𑄴𑄖𑄨𑄇𑄬 𑄝𑄴𑄡𑄐𑄴𑄎𑄚𑄁 𑄥𑄮𑄙𑄧𑄛𑄬𑄗𑄧𑄖𑄨 𑄇𑄟𑄴𑄟𑄑𑄴𑄒𑄧𑄚𑄁 𑄃𑄇𑄗𑄬𑄖𑄴𑄤𑄧𑄤 𑄅𑄑𑄴𑄒𑄧𑄛𑄬𑄥𑄨. 𑄥𑄮 𑄃𑄛𑄢𑄞𑄧𑄉𑄬 𑄟𑄦𑄧𑄤𑄨𑄦𑄧𑄢𑄬 𑄞𑄬𑄢𑄨𑄁 𑄛𑄦𑄢𑄧𑄛𑄬𑄖𑄴𑄤𑄧 𑄞𑄨𑄇𑄴𑄈𑄪𑄥𑄋𑄴𑄊𑄥𑄴𑄥 𑄌𑄖𑄫𑄥𑄪 𑄟𑄉𑄴𑄉𑄬𑄥𑄪 𑄛𑄐𑄴𑄦𑄁 𑄇𑄗𑄬𑄖𑄴𑄤𑄧𑄤 𑄛𑄢𑄨𑄚𑄨𑄝𑄴𑄝𑄪𑄖𑄮. 𑄆𑄤𑄁 𑄥𑄪𑄖𑄴𑄖𑄚𑄴𑄖𑄁 𑄛𑄖𑄴𑄤𑄧 𑄝𑄴𑄡𑄐𑄴𑄎𑄚𑄁 𑄃𑄛𑄴𑄛𑄟𑄖𑄴𑄖𑄇𑄁 𑄚𑄧𑄟 𑄦𑄮𑄖𑄨.

𑄤𑄨𑄚𑄡𑄁 𑄛𑄚 𑄛𑄖𑄴𑄤𑄧 𑄚𑄮 𑄃𑄛𑄴𑄛𑄟𑄖𑄴𑄖𑄇𑄁. 𑄥𑄧𑄟𑄕𑄬𑄢𑄛𑄝𑄴𑄝𑄎𑄴𑄎𑄧𑄛𑄨 𑄦𑄨 𑄅𑄞𑄖𑄮𑄥𑄪𑄘𑄴𑄙𑄨𑄖𑄮 𑄤𑄑𑄴𑄑𑄖𑄨, 𑄅𑄛𑄥𑄟𑄴𑄛𑄘𑄧𑄘𑄨𑄇𑄟𑄴𑄟𑄧𑄚𑄨𑄛𑄨 𑄥𑄨𑄗𑄨𑄣𑄧𑄘𑄩𑄚𑄁 𑄙𑄚𑄨𑄖𑄧𑄘𑄨𑄇𑄢𑄕𑄟𑄖𑄴𑄖𑄬𑄚𑄬𑄤 𑄇𑄪𑄛𑄴𑄛𑄚𑄴𑄖𑄨. 𑄄𑄙 𑄛𑄚 𑄥𑄪𑄖𑄴𑄖𑄚𑄴𑄖𑄝𑄴𑄡𑄐𑄴𑄎𑄚𑄁 𑄥𑄚𑄴𑄙𑄧𑄡𑄬𑄖𑄁 𑄤𑄪𑄖𑄴𑄖𑄁.

𑄹𑄾. 𑄃𑄗 𑄌𑄖𑄪𑄖𑄴𑄗𑄤𑄧𑄢𑄬 𑄤𑄨𑄤𑄧𑄘𑄮 𑄇𑄥𑄴𑄟𑄧? 𑄥𑄐𑄴𑄐𑄧𑄡 𑄤𑄨𑄤𑄧𑄘𑄮. ‘‘𑄃𑄦𑄁 𑄥𑄖𑄨𑄟𑄬𑄤 𑄥𑄖𑄨𑄛𑄑𑄴𑄒𑄧𑄚𑄁 𑄤𑄘𑄧𑄟𑄨, 𑄃𑄡𑄁 ‘𑄇𑄧𑄡𑄮 𑄥𑄖𑄨𑄛𑄑𑄴𑄒𑄧𑄚’𑄚𑄴𑄖𑄨 𑄤𑄘𑄖𑄩’’𑄖𑄨 𑄦𑄨 𑄚𑄬𑄥𑄁 𑄥𑄐𑄴𑄐𑄧 𑄦𑄮𑄖𑄨. 𑄝𑄴𑄡𑄐𑄴𑄎𑄚𑄬𑄛𑄨 𑄆𑄥𑄬𑄤 𑄚𑄡𑄮.

𑄹𑄿. 𑄚 𑄌𑄮𑄘𑄚𑄧𑄡 𑄖𑄢𑄨𑄖𑄝𑄴𑄝𑄚𑄴𑄖𑄨 𑄚 𑄌𑄮𑄘𑄚𑄖𑄴𑄗𑄧𑄡 𑄤𑄬𑄉𑄧𑄡𑄨𑄖𑄝𑄴𑄝𑄁. 𑄆𑄇𑄌𑄴𑄌𑄮 𑄦𑄨 𑄛𑄪𑄉𑄴𑄉𑄣𑄮 ‘‘𑄚𑄣𑄧𑄑𑄬 𑄖𑄬 𑄥𑄧𑄥𑄛𑄟𑄖𑄴𑄖𑄧 𑄛𑄨𑅄𑄇𑄧’’𑄖𑄨 𑄤𑄪𑄖𑄴𑄖𑄮 ‘‘𑄟𑄡𑄴𑄦𑄁 𑄚𑄣𑄧𑄑𑄬 𑄥𑄧𑄥𑄛𑄟𑄖𑄴𑄖𑄁 𑄛𑄨𑅄𑄇𑄁 𑄛𑄥𑄴𑄥𑄥𑄨, 𑄃𑄖𑄴𑄖𑄚𑄮 𑄚𑄣𑄧𑄑𑄬 𑄖𑄧𑄣𑄛𑄇𑄴𑄇𑄟𑄖𑄴𑄖𑄁 𑄟𑄦𑄧𑄉𑄕𑄴𑄓𑄁 𑄚 𑄛𑄥𑄴𑄥𑄥𑄩’’𑄖𑄨 𑄤𑄘𑄖𑄨. 𑄖𑄥𑄴𑄟𑄧 𑄛𑄪𑄉𑄴𑄉𑄣𑄮 𑄅𑄛𑄛𑄢𑄨𑄇𑄴𑄈𑄨𑄖𑄝𑄴𑄝𑄮. 𑄃𑄘𑅄𑄴𑄦𑄘𑄨𑄑𑄴𑄒𑄩𑄖𑄨 𑄃𑄚𑄧𑄘𑄧𑄚𑄘𑄨𑄑𑄴𑄒𑄩 𑄥𑄪𑄁𑄥𑄪𑄟𑄧𑄢𑄁 𑄦𑄘𑄡𑄬 𑄛𑄇𑄴𑄈𑄨𑄛𑄚𑄴𑄖𑄮 𑄤𑄨𑄡 𑄘𑅄𑄴𑄦𑄁 𑄚 𑄉𑄕𑄴𑄦𑄧𑄖𑄨.

𑄅𑄛𑄊𑄧𑄖𑄮𑄖𑄨 𑄌𑄕𑄴𑄓𑄞𑄧𑄤𑄬𑄚 𑄤𑄕𑄊𑄑𑄴𑄑𑄨𑄖𑄥𑄴𑄥 𑄤𑄨𑄡 𑄘𑄪𑄇𑄴𑄈𑄪𑄛𑄴𑄛𑄖𑄴𑄖𑄨. 𑄥𑄪𑄛𑄴𑄛𑄑𑄨𑄚𑄨𑄥𑄴𑄥𑄉𑄴𑄉𑄩𑄖𑄨 ‘‘𑄇𑄨𑄁 𑄚𑄧𑄟 𑄃𑄦𑄁 𑄃𑄂𑄛𑄚𑄴𑄚𑄮, 𑄇𑄘𑄧 𑄃𑄂𑄛𑄚𑄴𑄚𑄮’’𑄖𑄨 𑄤𑄧 ‘‘𑄖𑄴𑄤𑄁 𑄃𑄂𑄛𑄚𑄴𑄚𑄮, 𑄖𑄤 𑄅𑄛𑄎𑄴𑄏𑄧𑄡𑄮 𑄃𑄂𑄛𑄚𑄴𑄚𑄮’’𑄖𑄨 𑄤𑄧 𑄆𑄇𑄁 𑄘𑄴𑄤𑄬 𑄤𑄧𑄢𑄬 𑄤𑄖𑄴𑄤𑄧𑄛𑄨 ‘‘𑄃𑄥𑄪𑄇𑄁 𑄚𑄧𑄟 𑄃𑄥𑄪𑄇𑄘𑄨𑄤𑄥𑄬 𑄚𑄧𑄟, 𑄞𑄚𑄴𑄖𑄬, 𑄃𑄂𑄛𑄚𑄴𑄚𑄖𑄴𑄗, 𑄥𑄕𑄨𑄇𑄁 𑄃𑄚𑄪𑄥𑄴𑄥𑄢𑄗𑄧’’𑄖𑄨 𑄥𑄢𑄨𑄖𑄴𑄤𑄧 𑄖𑄧𑄤𑄘𑄬𑄤 𑄤𑄨𑄥𑄴𑄥𑄎𑄴𑄎𑄬𑄖𑄨. 𑄤𑄨𑄦𑄬𑄥𑄧𑄖𑄨 𑄝𑄦𑄪𑄁 𑄃𑄖𑄴𑄗𑄐𑄴𑄌 𑄇𑄧𑄢𑄕𑄐𑄴𑄌 𑄃𑄂𑄦𑄢𑄚𑄴𑄖𑄥𑄴𑄥 𑄇𑄧𑄡𑄌𑄨𑄖𑄴𑄖𑄇𑄨𑄣𑄟𑄗𑄮. 𑄥𑄇𑄴𑄇𑄮𑄟𑄩𑄖𑄨 𑄆𑄤𑄢𑄫𑄛𑄮 𑄦𑄨 𑄛𑄪𑄉𑄴𑄉𑄣𑄮 𑄃𑄮𑄇𑄧𑄥𑄁 𑄇𑄧𑄢𑄬𑄖𑄴𑄤𑄧 ‘‘𑄃𑄂𑄛𑄖𑄴𑄖𑄨𑄁 𑄃𑄂𑄛𑄚𑄴𑄚𑄖𑄴𑄗, 𑄞𑄚𑄴𑄖𑄬’’𑄖𑄨 𑄤𑄪𑄖𑄴𑄖𑄮 ‘‘𑄇𑄘𑄧 𑄇𑄨𑄥𑄴𑄟𑄨𑄁 𑄤𑄖𑄴𑄗𑄪𑄥𑄴𑄟𑄨’’𑄚𑄴𑄖𑄨 𑄤𑄖𑄴𑄤𑄧 ‘‘𑄃𑄥𑄪𑄇𑄘𑄨𑄤𑄥𑄬 𑄃𑄥𑄪𑄇𑄥𑄴𑄟𑄨𑄁 𑄤𑄖𑄴𑄗𑄪𑄥𑄴𑄟𑄨’’𑄚𑄴𑄖𑄨 𑄤𑄪𑄖𑄴𑄖𑄬 ‘‘𑄚 𑄥𑄢𑄧𑄟𑄨, 𑄃𑄂𑄤𑄪𑄥𑄮’’𑄖𑄨 𑄤𑄘𑄖𑄨, 𑄖𑄖𑄮 ‘‘𑄥𑄕𑄨𑄇𑄁, 𑄞𑄚𑄴𑄖𑄬, 𑄥𑄢𑄗𑄧’’𑄖𑄨 𑄝𑄦𑄪𑄁 𑄤𑄖𑄴𑄤𑄧 𑄥𑄧𑄢𑄨𑄖𑄮 𑄥𑄢𑄨𑄖𑄴𑄤𑄧 𑄤𑄨𑄥𑄴𑄥𑄎𑄴𑄎𑄬𑄖𑄨. 𑄖𑄬𑄚𑄧𑄦 ‘‘𑄥𑄇𑄴𑄇𑄮𑄟𑄩’’𑄖𑄨. 𑄄𑄟𑄨𑄚𑄧 𑄚𑄡𑄬𑄚 𑄥𑄝𑄴𑄝𑄖𑄴𑄗 𑄃𑄖𑄴𑄗𑄮 𑄤𑄬𑄘𑄨𑄖𑄝𑄴𑄝𑄮.

𑄅𑄛𑄬𑄇𑄴𑄈𑄧 𑄚𑄧𑄖𑄨𑄟𑄐𑄴𑄐𑄨𑄖𑄝𑄴𑄝𑄧𑄖𑄨 𑄅𑄛𑄬𑄇𑄴𑄈𑄧 𑄚 𑄃𑄖𑄨𑄇𑄴𑄇𑄟𑄨𑄖𑄝𑄴𑄝𑄧, 𑄇𑄖𑄴𑄖𑄝𑄴𑄝𑄧 𑄎𑄚𑄬𑄖𑄝𑄴𑄝𑄧𑄖𑄨 𑄃𑄖𑄴𑄗𑄮. 𑄡𑄮 𑄦𑄨 𑄆𑄤𑄢𑄫𑄛𑄁 𑄛𑄪𑄉𑄴𑄉𑄣𑄁 𑄒𑄨𑄖𑄇𑄁𑄡𑄬𑄤 𑄛𑄥𑄴𑄥𑄧𑄤𑄁 𑄇𑄢𑄮𑄚𑄴𑄖𑄁 𑄘𑄨𑄥𑄴𑄤𑄧𑄛𑄨 ‘‘𑄚𑄚𑄪, 𑄃𑄂𑄤𑄪𑄥𑄮, 𑄚𑄨𑄥𑄩𑄘𑄨𑄖𑄝𑄴𑄝’’𑄚𑄴𑄖𑄨 𑄤𑄘𑄖𑄨, 𑄥𑄮 𑄅𑄛𑄬𑄇𑄴𑄈𑄁 𑄃𑄖𑄨𑄟𑄐𑄴𑄐𑄖𑄨 𑄚𑄧𑄟.

𑄺𑄶. 𑄤𑄌𑄩𑄥𑄁𑄦𑄧𑄢𑄮𑄖𑄨 𑄤𑄌𑄚𑄥𑄐𑄴𑄌𑄧𑄢𑄮. 𑄄𑄟𑄬𑄦𑄨 𑄇𑄗𑄨𑄖𑄁 𑄃𑄟𑄫𑄥𑄁 𑄃𑄚𑄴𑄖𑄢𑄁 𑄛𑄤𑄬𑄥𑄬𑄡𑄴𑄡, 𑄖𑄪𑄟𑄴𑄦𑄬 𑄄𑄟𑄬𑄦𑄨 𑄄𑄘𑄐𑄴𑄌𑄨𑄘𑄐𑄴𑄌 𑄤𑄪𑄖𑄴𑄖𑄧𑄖𑄨 𑄃𑄟𑄫𑄦𑄨 𑄇𑄗𑄨𑄖𑄁 𑄄𑄟𑄬𑄥𑄁 𑄃𑄚𑄴𑄖𑄢𑄁 𑄛𑄤𑄬𑄥𑄬𑄡𑄴𑄡𑄧𑄖𑄨 𑄃𑄖𑄴𑄗𑄮. 𑄘𑄨𑄑𑄴𑄒𑄨𑄛𑅄𑄧𑄥𑄮𑄖𑄨𑄃𑄂𑄘𑄩𑄦𑄨 𑄌𑄨𑄖𑄴𑄖𑄥𑄴𑄥 𑄃𑄚𑄧𑄢𑄧𑄙𑄚𑄨𑄡𑄞𑄧𑄤𑄮 𑄇𑄗𑄨𑄖𑄮. 𑄖𑄁 𑄎𑄧𑄚𑄟𑄧𑄚𑄮 𑄥𑄟𑄧𑄚𑄮 𑄉𑄢𑄦𑄬𑄡𑄴𑄡𑄧𑄖𑄨 𑄖𑄁 𑄥𑄖𑄴𑄗𑄧 𑄎𑄧𑄚𑄟𑄧𑄚𑄮 𑄥𑄟𑄧𑄚𑄮 𑄚𑄨𑄚𑄴𑄘𑄬𑄡𑄴𑄡 𑄃𑄟𑄴𑄦𑄬𑄖𑄨. 𑄆𑄖𑄁 𑄛𑄚𑄧𑄤𑄪𑄥𑄮, 𑄙𑄟𑄴𑄟𑄚𑄴𑄖𑄨 𑄆𑄖𑄁 𑄇𑄣𑄦𑄞𑄕𑄴𑄓𑄚𑄙𑄟𑄴𑄟𑄁.

𑄖𑄐𑄴𑄌𑄬𑄖𑄨 𑄖𑄁 𑄥𑄐𑄴𑄐𑄖𑄴𑄖𑄨𑄇𑄧𑄢𑄇𑄁 𑄞𑄨𑄇𑄴𑄈𑄪𑄁. 𑄆𑄤𑄁 𑄝𑄴𑄡𑄧𑄇𑄢𑄬𑄡𑄴𑄡𑄧𑄖𑄨 𑄟𑄡𑄧 𑄆𑄖𑄬 𑄥𑄪𑄘𑄴𑄙𑄚𑄴𑄖𑄬 𑄛𑄖𑄨𑄑𑄴𑄒𑄧𑄛𑄨𑄖𑄧𑄖𑄨 𑄃𑄤𑄖𑄴𑄤𑄧 𑄡𑄬𑄚 𑄇𑄧𑄢𑄕𑄬𑄚 𑄥𑄐𑄴𑄐𑄖𑄴𑄖𑄨 𑄇𑄖𑄧, 𑄖𑄘𑄬𑄤 𑄘𑄥𑄴𑄥𑄬𑄚𑄴𑄖𑄮 𑄆𑄤𑄁 𑄝𑄴𑄡𑄧𑄇𑄢𑄬𑄡𑄴𑄡. 𑄖𑄧𑄦𑄁 𑄙𑄟𑄴𑄟𑄁 𑄥𑄪𑄖𑄴𑄤𑄧𑄖𑄨 𑄆𑄖𑄴𑄗 𑄙𑄟𑄴𑄟𑄮𑄖𑄨 𑄥𑄧𑄢𑄕𑄩𑄡𑄙𑄟𑄴𑄟𑄮 𑄃𑄙𑄨𑄛𑄴𑄛𑄬𑄖𑄮. 𑄚 𑄌𑄬𑄤 𑄃𑄖𑄴𑄖𑄧𑄚𑄚𑄴𑄖𑄨𑄃𑄂𑄘𑄩𑄥𑄪 ‘‘𑄝𑄴𑄢𑄦𑄴𑄟𑄣𑄮𑄇𑄛𑄴𑄛𑄟𑄧𑄕𑄮 𑄦𑄬𑄥 𑄃𑄉𑄴𑄉𑄨 𑄅𑄑𑄴𑄒𑄧𑄥𑄨, 𑄇𑄮 𑄆𑄖𑄟𑄐𑄴𑄐𑄖𑄴𑄢 𑄟𑄡𑄧 𑄚𑄨𑄝𑄴𑄝𑄧𑄛𑄬𑄖𑄪𑄁 𑄥𑄟𑄖𑄴𑄗𑄮’’𑄖𑄨 𑄦𑄨 𑄤𑄘𑄚𑄴𑄖𑄮 𑄃𑄖𑄴𑄖𑄧𑄚𑄁 𑄅𑄇𑄴𑄇𑄁𑄥𑄬𑄖𑄨 𑄚𑄧𑄟. ‘‘𑄆𑄖𑄴𑄖𑄇𑄧 𑄎𑄚𑄧 𑄤𑄨𑄌𑄢𑄚𑄴𑄖𑄨, 𑄃𑄮𑄇𑄧𑄥𑄮 𑄣𑄘𑄴𑄙𑄪𑄁 𑄚 𑄥𑄇𑄴𑄇𑄧, 𑄆𑄇𑄮𑄛𑄨 𑄆𑄖𑄴𑄖𑄇𑄟𑄖𑄴𑄖𑄁 𑄚𑄨𑄝𑄴𑄝𑄧𑄛𑄬𑄖𑄪𑄁 𑄥𑄟𑄖𑄴𑄗𑄮 𑄚𑄧𑄟 𑄚𑄖𑄴𑄗𑄩’’𑄖𑄨 𑄤𑄘𑄟𑄧𑄚𑄮 𑄛𑄢𑄁 𑄤𑄟𑄴𑄞𑄬𑄖𑄨 𑄚𑄧𑄟. 𑄖𑄘𑄪𑄞𑄡𑄟𑄴𑄛𑄬𑄥 𑄚 𑄇𑄢𑄮𑄖𑄨. 𑄙𑄟𑄴𑄟𑄮 𑄛𑄚𑄬𑄖𑄴𑄗 𑄥𑄟𑄴𑄟𑄧𑄥𑄟𑄴𑄝𑄪𑄘𑄴𑄙𑄥𑄴𑄥 𑄝𑄴𑄡𑄧𑄇𑄢𑄕𑄁, 𑄖𑄬𑄥𑄁 𑄞𑄨𑄇𑄴𑄈𑄫𑄚𑄁 𑄥𑄐𑄴𑄐𑄖𑄴𑄖𑄨𑄇𑄢𑄕𑄁 𑄃𑄚𑄪𑄙𑄟𑄴𑄟𑄮, 𑄖𑄘𑄬𑄤 𑄝𑄴𑄡𑄧𑄇𑄢𑄮𑄖𑄨 𑄚𑄧𑄟. 𑄚 𑄌 𑄇𑄮𑄌𑄨 𑄥𑄦𑄙𑄟𑄴𑄟𑄨𑄇𑄮𑄖𑄨 𑄃𑄐𑄴𑄐𑄮 𑄌𑄥𑄴𑄥 𑄇𑄮𑄌𑄨 𑄥𑄦𑄬𑄖𑄪𑄇𑄮 𑄛𑄢𑄬𑄦𑄨 𑄤𑄪𑄖𑄴𑄖𑄮 𑄤𑄧𑄘𑄮 𑄤𑄧 𑄃𑄚𑄪𑄤𑄧𑄘𑄮 𑄤𑄧 𑄉𑄢𑄦𑄨𑄖𑄝𑄴𑄝𑄞𑄧𑄤𑄁 𑄃𑄂𑄉𑄌𑄴𑄍𑄚𑄴𑄖𑄮 𑄚𑄧𑄟 𑄚𑄖𑄴𑄗𑄨. 𑄥𑄬𑄥𑄁 𑄥𑄝𑄴𑄝𑄖𑄴𑄗 𑄅𑄖𑄴𑄖𑄧𑄚𑄟𑄬𑄤𑄧𑄖𑄨.

𑄛𑄛𑄐𑄴𑄌𑄥𑄫𑄘𑄚𑄨𑄡𑄧 𑄟𑄎𑄴𑄏𑄨𑄟𑄚𑄨𑄇𑄧𑄡𑄑𑄴𑄒𑄇𑄗𑄧𑄡

𑄇𑄨𑄚𑄴𑄖𑄨𑄥𑄪𑄖𑄴𑄖𑄤𑄕𑄴𑄕𑄚𑄧 𑄚𑄨𑄑𑄴𑄒𑄨𑄖𑄧.

𑄺. 𑄥𑄧𑄟𑄉𑄧𑄟𑄥𑄪𑄖𑄴𑄖𑄤𑄕𑄴𑄕𑄚𑄧

𑄺𑄷. 𑄆𑄤𑄁 𑄟𑄬 𑄥𑄪𑄖𑄚𑄴𑄖𑄨 𑄥𑄧𑄟𑄉𑄧𑄟𑄥𑄪𑄖𑄴𑄖𑄁. 𑄖𑄖𑄴𑄗 𑄥𑄧𑄟𑄉𑄧𑄟𑄬𑄖𑄨 𑄥𑄧𑄟𑄧𑄇𑄧𑄚𑄁 𑄅𑄥𑄴𑄥𑄚𑄴𑄚𑄖𑄴𑄖𑄧 𑄆𑄤𑄁𑄣𑄘𑄴𑄙𑄚𑄧𑄟𑄬 𑄉𑄧𑄟𑄬. 𑄃𑄙𑄪𑄚𑄧 𑄇𑄧𑄣𑄋𑄴𑄇𑄖𑄮𑄖𑄨 𑄥𑄟𑄴𑄛𑄖𑄨 𑄇𑄧𑄣𑄁 𑄇𑄖𑄮. 𑄘𑄴𑄤𑄬𑄙𑄨𑄇𑄎𑄧𑄖𑄧𑄖𑄨 𑄘𑄴𑄤𑄬𑄎𑄴𑄏𑄎𑄧𑄖𑄧 𑄘𑄴𑄤𑄬𑄞𑄧𑄉𑄎𑄧𑄖𑄧. 𑄞𑄕𑄴𑄓𑄚𑄧𑄘𑄩𑄥𑄪 𑄞𑄕𑄴𑄓𑄚𑄁 𑄛𑄪𑄝𑄴𑄝𑄞𑄧𑄉𑄇𑄣𑄦𑄮, 𑄖𑄁 𑄘𑄕𑄴𑄓𑄧𑄘𑄧𑄚𑄧𑄘𑄨𑄤𑄥𑄬𑄚 𑄛𑄕𑄴𑄕𑄖𑄴𑄖𑄨𑄤𑄩𑄖𑄨𑄇𑄴𑄇𑄟𑄤𑄥𑄬𑄚 𑄌 𑄤𑄘𑄴𑄙𑄨𑄖𑄁 𑄇𑄣𑄦𑄮, ‘‘𑄚 𑄖𑄴𑄤𑄁 𑄄𑄟𑄁 𑄙𑄟𑄴𑄟𑄤𑄨𑄚𑄡𑄁 𑄃𑄂𑄎𑄧𑄚𑄧𑄥𑄩’’𑄖𑄨𑄃𑄂𑄘𑄨𑄇𑄁 𑄤𑄨𑄢𑄪𑄘𑄴𑄙𑄤𑄌𑄚𑄁 𑄤𑄨𑄤𑄧𑄘𑄮. 𑄤𑄨𑄖𑄪𑄘𑄚𑄴𑄖𑄧𑄖𑄨 𑄤𑄨𑄖𑄪𑄎𑄴𑄎𑄚𑄴𑄖𑄧. 𑄥𑄦𑄨𑄖𑄁 𑄟𑄬𑄖𑄨 𑄟𑄟 𑄤𑄌𑄚𑄁 𑄃𑄖𑄴𑄗𑄥𑄁𑄦𑄨𑄖𑄁. 𑄃𑄙𑄨𑄌𑄨𑄕𑄴𑄕𑄁 𑄖𑄬 𑄤𑄨𑄛𑄢𑄧𑄤𑄖𑄴𑄖𑄚𑄴𑄖𑄨 𑄡𑄁 𑄖𑄤 𑄃𑄙𑄨𑄌𑄨𑄕𑄴𑄕𑄁 𑄌𑄨𑄢𑄇𑄧𑄣𑄥𑄬𑄤𑄚𑄤𑄥𑄬𑄚 𑄛𑄉𑄪𑄕𑄁, 𑄖𑄁 𑄟𑄟 𑄤𑄧𑄘𑄁 𑄃𑄂𑄉𑄟𑄴𑄟 𑄚𑄨𑄤𑄖𑄴𑄖𑄁. 𑄃𑄂𑄢𑄮𑄛𑄨𑄖𑄮 𑄖𑄬 𑄤𑄧𑄘𑄮𑄖𑄨 𑄖𑄪𑄡𑄴𑄦𑄁 𑄅𑄛𑄢𑄨 𑄟𑄡𑄧 𑄘𑄮𑄥𑄮 𑄃𑄂𑄢𑄮𑄛𑄨𑄖𑄮. 𑄌𑄢 𑄤𑄧𑄘𑄛𑄴𑄛𑄟𑄮𑄇𑄴𑄈𑄧𑄡𑄧𑄖𑄨 𑄞𑄖𑄴𑄖𑄛𑄪𑄑𑄁 𑄃𑄂𑄘𑄧𑄡 𑄖𑄁 𑄖𑄁 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄤𑄧𑄘𑄛𑄴𑄛𑄟𑄮𑄇𑄴𑄈𑄖𑄴𑄗𑄧𑄡 𑄅𑄖𑄴𑄖𑄢𑄨 𑄛𑄢𑄨𑄡𑄬𑄥𑄟𑄧𑄚𑄮 𑄌𑄢. 𑄚𑄨𑄝𑄴𑄝𑄬𑄒𑄬𑄦𑄨 𑄤𑄧𑄖𑄨 𑄃𑄗 𑄟𑄡𑄧 𑄃𑄂𑄢𑄮𑄛𑄨𑄖𑄤𑄧𑄘𑄖𑄮 𑄃𑄖𑄴𑄖𑄧𑄚𑄁 𑄟𑄮𑄌𑄬𑄦𑄨. 𑄥𑄌𑄬 𑄛𑄦𑄮𑄥𑄩𑄖𑄨 𑄥𑄌𑄬 𑄥𑄇𑄴𑄇𑄮𑄥𑄨. 𑄤𑄙𑄮𑄡𑄬𑄤𑄧𑄖𑄨 𑄟𑄢𑄕𑄟𑄬𑄤.

𑄚𑄧𑄑𑄛𑄪𑄖𑄴𑄖𑄨𑄡𑄬𑄥𑄫𑄖𑄨 𑄚𑄧𑄑𑄛𑄪𑄖𑄴𑄖𑄥𑄴𑄥 𑄃𑄚𑄴𑄖𑄬𑄤𑄧𑄥𑄨𑄇𑄬𑄥𑄪. 𑄚𑄨𑄝𑄴𑄝𑄨𑄚𑄴𑄚𑄢𑄫𑄛𑄧𑄖𑄨 𑄅𑄇𑄴𑄇𑄕𑄴𑄒𑄨𑄖𑄥𑄞𑄧𑄤𑄧, 𑄃𑄞𑄨𑄤𑄧𑄘𑄚𑄧𑄘𑄩𑄚𑄨 𑄚 𑄇𑄢𑄮𑄚𑄴𑄖𑄨. 𑄤𑄨𑄢𑄖𑄴𑄖𑄢𑄫𑄛𑄧𑄖𑄨 𑄤𑄨𑄉𑄖𑄛𑄬𑄟𑄧. 𑄛𑄑𑄨𑄤𑄧𑄚𑄢𑄫𑄛𑄧𑄖𑄨 𑄖𑄬𑄥𑄁 𑄚𑄨𑄛𑄌𑄴𑄌𑄇𑄨𑄢𑄨𑄡𑄖𑄮 𑄚𑄨𑄤𑄖𑄴𑄖𑄥𑄞𑄧𑄤𑄧. 𑄡𑄗𑄧 𑄖𑄚𑄴𑄖𑄨 𑄡𑄗𑄧 𑄌 𑄘𑄪𑄢𑄇𑄴𑄈𑄧𑄖𑄧𑄘𑄨𑄥𑄞𑄧𑄤𑄬 𑄙𑄟𑄴𑄟𑄤𑄨𑄚𑄡𑄬 𑄚𑄨𑄝𑄴𑄝𑄨𑄚𑄴𑄚𑄤𑄨𑄢𑄖𑄴𑄖𑄛𑄑𑄨𑄤𑄧𑄚𑄢𑄫𑄛𑄬𑄦𑄨 𑄞𑄤𑄨𑄖𑄝𑄴𑄝𑄁, 𑄖𑄗𑄬𑄤 𑄎𑄧𑄖𑄧𑄖𑄨 𑄃𑄖𑄴𑄗𑄮. 𑄘𑄪𑄢𑄇𑄴𑄈𑄧𑄖𑄬𑄖𑄨 𑄘𑄪𑄇𑄴𑄇𑄗𑄨𑄖𑄬. 𑄘𑄪𑄛𑄴𑄛𑄤𑄬𑄘𑄨𑄖𑄬𑄖𑄨 𑄘𑄪𑄤𑄨𑄐𑄴𑄐𑄧𑄛𑄨𑄖𑄬. 𑄃𑄚𑄪𑄛𑄥𑄟𑄥𑄁𑄤𑄖𑄴𑄖𑄚𑄨𑄇𑄬𑄖𑄨 𑄢𑄧𑄉𑄧𑄘𑄩𑄚𑄁 𑄅𑄛𑄥𑄟𑄁 𑄇𑄧𑄖𑄪𑄁 𑄃𑄥𑄟𑄖𑄴𑄗𑄮. 𑄞𑄨𑄚𑄴𑄚𑄗𑄫𑄛𑄬𑄖𑄨 𑄞𑄨𑄚𑄴𑄚𑄛𑄖𑄨𑄑𑄴𑄒𑄬. 𑄆𑄖𑄴𑄗 𑄦𑄨 𑄚𑄧𑄑𑄛𑄪𑄖𑄴𑄖𑄮𑄤 𑄚𑄬𑄥𑄁 𑄛𑄖𑄨𑄑𑄴𑄒𑄬𑄚 𑄗𑄫𑄛𑄮, 𑄥𑄮 𑄛𑄚 𑄞𑄨𑄚𑄴𑄚𑄮 𑄟𑄖𑄮. 𑄖𑄬𑄚 𑄤𑄪𑄖𑄴𑄖𑄁 ‘‘𑄞𑄨𑄚𑄴𑄚𑄗𑄫𑄛𑄬’’𑄖𑄨. 𑄃𑄛𑄴𑄛𑄑𑄨𑄥𑄢𑄕𑄬𑄖𑄨 𑄖𑄥𑄴𑄥𑄬𑄤 𑄃𑄞𑄧𑄤𑄬𑄚 𑄛𑄑𑄨𑄥𑄢𑄕𑄤𑄨𑄢𑄦𑄨𑄖𑄬.

𑄚𑄚𑄪 𑄌𑄧𑄡𑄁 𑄚𑄧𑄑𑄛𑄪𑄖𑄴𑄖𑄮 𑄚𑄧𑅄𑄚𑄴𑄘𑄤𑄧𑄥𑄨𑄇𑄮, 𑄥𑄮 𑄇𑄥𑄴𑄟𑄧 𑄛𑄧𑄤𑄧𑄡𑄁 𑄇𑄧𑄣𑄁𑄇𑄖𑄮𑄖𑄨. 𑄥𑄮 𑄇𑄨𑄢 𑄅𑄛𑄧𑄣𑄨𑄚𑄧 𑄉𑄦𑄛𑄖𑄨𑄚𑄧 𑄛𑄑𑄨𑄤𑄨𑄘𑄴𑄙𑄥𑄌𑄴𑄌𑄬𑄚 𑄘𑄥𑄦𑄨 𑄉𑄧𑄗𑄧𑄦𑄨 𑄞𑄧𑄥𑄨𑄖𑄬 𑄝𑄪𑄘𑄴𑄙𑄉𑄪𑄕𑄬 𑄥𑄪𑄖𑄴𑄤𑄧 𑄅𑄕𑄴𑄦𑄁 𑄣𑄮𑄦𑄨𑄖𑄁 𑄍𑄓𑄴𑄓𑄬𑄥𑄨. 𑄃𑄗 𑄚𑄁 𑄃𑄜𑄧𑄥𑄪𑄇𑄁 𑄉𑄦𑄬𑄖𑄴𑄤𑄧 𑄛𑄧𑄤𑄁 𑄃𑄉𑄟𑄁𑄥𑄪, 𑄥𑄮 𑄖𑄖𑄴𑄗 𑄇𑄧𑄣𑄟𑄇𑄧𑄥𑄨. 𑄇𑄧𑄣𑄁 𑄇𑄪𑄢𑄪𑄟𑄧𑄚𑄮 𑄌 ‘‘𑄟𑄟 𑄣𑄘𑄴𑄙𑄨 𑄃𑄚𑄨𑄡𑄴𑄡𑄧𑄚𑄨𑄇𑄧 𑄥𑄧𑄢𑄢𑄦𑄨𑄖𑄧, 𑄟𑄡𑄁 𑄖𑄧𑄤 𑄚𑄑𑄴𑄒𑄧, 𑄃𑄤𑄥𑄬𑄥𑄎𑄚𑄮 𑄟𑄧 𑄃𑄛𑄧𑄡𑄛𑄫𑄢𑄇𑄮 𑄃𑄦𑄮𑄥𑄨. 𑄥𑄌𑄬 𑄛𑄚𑄧𑄦𑄁 ‘𑄟𑄟 𑄥𑄧𑄥𑄚𑄁 𑄃𑄚𑄨𑄡𑄴𑄡𑄧𑄚𑄨𑄇’𑄚𑄴𑄖𑄨 𑄤𑄇𑄴𑄈𑄧𑄟𑄨, 𑄚 𑄥𑄘𑄴𑄘𑄦𑄨𑄥𑄴𑄥𑄚𑄴𑄖𑄨. 𑄡𑄁𑄚𑄫𑄚𑄧𑄦𑄁 𑄘𑄴𑄤𑄬𑄛𑄨 𑄎𑄚𑄬 𑄚 𑄆𑄇𑄚𑄩𑄦𑄧𑄢𑄬𑄚 𑄅𑄉𑄴𑄉𑄕𑄴𑄦𑄧𑄛𑄬𑄡𑄴𑄡𑄁, 𑄖𑄬 𑄟𑄟𑄌𑄴𑄌𑄡𑄬𑄚 𑄃𑄐𑄴𑄐𑄟𑄐𑄴𑄐𑄁 𑄤𑄨𑄤𑄘𑄨𑄥𑄴𑄥𑄚𑄴𑄖𑄨. 𑄥𑄖𑄴𑄗𑄧 𑄖𑄁 𑄤𑄨𑄤𑄧𑄘𑄁 𑄛𑄑𑄨𑄌𑄴𑄌 𑄆𑄇𑄁 𑄙𑄟𑄴𑄟𑄇𑄗𑄁 𑄇𑄗𑄬𑄥𑄴𑄥𑄖𑄨, 𑄖𑄖𑄮 𑄖𑄬 𑄥𑄧𑄥𑄚𑄥𑄴𑄥 𑄟𑄦𑄚𑄴𑄖𑄞𑄧𑄤𑄁 𑄎𑄧𑄖𑄨𑄥𑄴𑄥𑄚𑄴𑄖𑄩’’𑄖𑄨.

𑄃𑄗 𑄚𑄁 𑄆𑄇𑄮 𑄃𑄚𑄴𑄖𑄬𑄤𑄧𑄥𑄨𑄇𑄮 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄃𑄂𑄦 ‘‘𑄞𑄚𑄴𑄖𑄬, 𑄖𑄪𑄟𑄴𑄦𑄬 𑄘𑄪𑄝𑄴𑄝𑄣𑄧, 𑄟𑄡𑄴𑄦𑄁 𑄄𑄟𑄥𑄴𑄟𑄨𑄁 𑄙𑄟𑄴𑄟𑄬 𑄥𑄧𑄢𑄁 𑄃𑄂𑄌𑄨𑄇𑄴𑄈𑄗 𑄃𑄂𑄌𑄢𑄨𑄡𑄛𑄴𑄛𑄟𑄧𑄕’’𑄚𑄴𑄖𑄨. 𑄃𑄂𑄤𑄪𑄥𑄮, 𑄖𑄴𑄤𑄁 𑄟𑄟𑄌𑄴𑄌𑄡𑄬𑄚 𑄥𑄥𑄴𑄥𑄖𑄚𑄴𑄖𑄨 𑄉𑄕𑄴𑄦𑄬𑄡𑄴𑄡𑄧𑄥𑄩𑄖𑄨. 𑄃𑄛𑄢𑄮𑄛𑄨 𑄖𑄁 𑄅𑄛𑄥𑄋𑄴𑄇𑄟𑄨, 𑄖𑄁 𑄅𑄌𑄴𑄍𑄬𑄘𑄁 𑄉𑄕𑄴𑄦𑄧𑄛𑄬𑄥𑄨. 𑄆𑄤𑄁 𑄘𑄴𑄤𑄬𑄛𑄨 𑄎𑄚𑄬 𑄆𑄇𑄣𑄘𑄴𑄙𑄨𑄇𑄬 𑄃𑄇𑄖𑄴𑄤𑄧 𑄝𑄦𑄫 𑄚𑄧𑄚𑄧𑄚𑄩𑄦𑄧𑄢𑄬𑄚 𑄅𑄉𑄴𑄉𑄕𑄴𑄦𑄧𑄛𑄬𑄖𑄴𑄤𑄧 𑄇𑄧𑄣𑄟𑄇𑄧𑄥𑄨. 𑄖𑄬 𑄖𑄥𑄴𑄥 𑄥𑄢𑄩𑄢𑄇𑄨𑄌𑄴𑄌𑄁 𑄇𑄖𑄴𑄤𑄧 𑄥𑄚𑄴𑄚𑄨𑄛𑄖𑄨𑄖𑄴𑄤𑄧 𑄃𑄐𑄴𑄐𑄟𑄐𑄴𑄐𑄁 𑄛𑄪𑄌𑄴𑄍𑄨𑄁𑄥𑄪 ‘‘𑄇𑄥𑄴𑄥𑄧𑄤𑄪𑄥𑄮, 𑄃𑄂𑄌𑄢𑄨𑄡𑄮 𑄥𑄧𑄢𑄟𑄧𑄌𑄨𑄇𑄴𑄈𑄩’’𑄖𑄨? 𑄆𑄇𑄮 𑄅𑄑𑄴𑄒𑄦𑄨𑄖𑄴𑄤𑄧 𑄟𑄡𑄴𑄦𑄚𑄴𑄖𑄨 𑄃𑄂𑄦. 𑄇𑄨𑄁 𑄃𑄂𑄌𑄨𑄇𑄴𑄈𑄩𑄖𑄨? 𑄥𑄥𑄴𑄥𑄖𑄚𑄴𑄖𑄨. 𑄃𑄛𑄢𑄮 𑄖𑄁 𑄛𑄑𑄨𑄝𑄧𑄦𑄨𑄖𑄴𑄤𑄧 𑄟𑄡𑄴𑄦𑄁 𑄥𑄧𑄢𑄁 𑄃𑄂𑄌𑄨𑄇𑄴𑄈𑄩𑄖𑄨 𑄃𑄂𑄦. 𑄆𑄤𑄁 𑄥𑄝𑄴𑄝𑄬 ‘‘𑄟𑄡𑄴𑄦𑄁 𑄥𑄧𑄢𑄁 𑄃𑄂𑄌𑄨𑄇𑄴𑄈𑄨, 𑄃𑄦𑄁 𑄎𑄬𑄑𑄴𑄒𑄇𑄮’’𑄖𑄨 𑄃𑄐𑄴𑄐𑄟𑄐𑄴𑄐𑄁 𑄤𑄨𑄤𑄧𑄘𑄁 𑄤𑄓𑄴𑄔𑄬𑄖𑄴𑄤𑄧 𑄃𑄇𑄴𑄇𑄮𑄥𑄬 𑄌𑄬𑄤 𑄛𑄢𑄨𑄞𑄧𑄥𑄬 𑄌 𑄦𑄖𑄴𑄗𑄛𑄧𑄘𑄛𑄦𑄧𑄢𑄧𑄘𑄩𑄚𑄨 𑄌 𑄛𑄤𑄖𑄴𑄖𑄬𑄖𑄴𑄤𑄧 𑄆𑄇𑄟𑄉𑄴𑄉𑄬𑄚 𑄘𑄴𑄤𑄬 𑄃𑄉𑄌𑄴𑄍𑄚𑄴𑄖𑄧 𑄚𑄧𑄚𑄧𑄘𑄨𑄥𑄧𑄥𑄪 𑄛𑄇𑄴𑄇𑄟𑄨𑄁𑄥𑄪, 𑄆𑄇𑄌𑄴𑄌𑄬 𑄉𑄨𑄦𑄩 𑄃𑄦𑄬𑄥𑄪𑄁.

𑄞𑄉𑄤𑄖𑄮 𑄛𑄚 𑄙𑄢𑄟𑄧𑄚𑄇𑄧𑄣𑄬𑄛𑄨 𑄞𑄨𑄇𑄴𑄈𑄪𑄥𑄋𑄴𑄊𑄬 𑄤𑄨𑄤𑄧𑄘𑄮 𑄚 𑄅𑄛𑄴𑄛𑄎𑄴𑄎𑄨. 𑄥𑄖𑄴𑄗𑄧 𑄦𑄨 𑄖𑄬𑄥𑄁 𑄤𑄨𑄤𑄧𑄘𑄇𑄧𑄢𑄕𑄬 𑄅𑄛𑄴𑄛𑄚𑄴𑄚𑄟𑄖𑄴𑄖𑄬𑄡𑄬𑄤 𑄥𑄡𑄁 𑄤𑄧 𑄉𑄚𑄴𑄖𑄴𑄤𑄧 𑄖𑄬 𑄤𑄧 𑄞𑄨𑄇𑄴𑄈𑄫 𑄛𑄇𑄴𑄇𑄮𑄥𑄧𑄛𑄬𑄖𑄴𑄤𑄧 𑄈𑄚𑄴𑄖𑄨 𑄟𑄬𑄖𑄴𑄖𑄧 𑄛𑄑𑄨𑄥𑄋𑄴𑄈𑄧 𑄃𑄤𑄨𑄦𑄨𑄁𑄥𑄧 𑄥𑄧𑄢𑄕𑄩𑄡𑄙𑄟𑄴𑄟𑄬𑄥𑄪 𑄆𑄇𑄁 𑄇𑄧𑄢𑄕𑄁 𑄇𑄗𑄬𑄖𑄴𑄤𑄧 𑄤𑄨𑄤𑄧𑄘𑄁 𑄤𑄫𑄛𑄥𑄟𑄬𑄖𑄨. 𑄆𑄤𑄁 𑄙𑄢𑄟𑄧𑄚𑄮𑄛𑄨 𑄥𑄋𑄴𑄊𑄥𑄴𑄥 𑄛𑄖𑄨𑄑𑄴𑄒𑄧𑄤 𑄃𑄦𑄮𑄥𑄨. 𑄛𑄢𑄨𑄚𑄨𑄝𑄴𑄝𑄧𑄡𑄟𑄧𑄚𑄮𑄛𑄨 𑄃𑄤𑄨𑄤𑄧𑄘𑄇𑄧𑄢𑄕𑄁 𑄇𑄖𑄴𑄤𑄧𑄤 𑄛𑄢𑄨𑄚𑄨𑄝𑄴𑄝𑄧𑄡𑄨. 𑄞𑄉𑄤𑄖𑄧 𑄦𑄨 𑄥𑄪𑄖𑄴𑄖𑄬 𑄘𑄬𑄥𑄨𑄖𑄧 𑄌𑄖𑄴𑄖𑄧𑄢𑄮 𑄟𑄦𑄧𑄛𑄘𑄬𑄥𑄧 (𑄃. 𑄚𑄨. 𑄺.𑄷𑄾𑄶; 𑄘𑄩. 𑄚𑄨. 𑄸.𑄷𑄾𑄽) 𑄡𑄧𑄤𑄎𑄴𑄎𑄘𑄨𑄤𑄥𑄧 𑄞𑄨𑄇𑄴𑄈𑄫𑄚𑄁 𑄛𑄖𑄨𑄑𑄴𑄒𑄧 𑄌 𑄃𑄤𑄥𑄴𑄥𑄡𑄮 𑄌. 𑄖𑄗𑄧 𑄈𑄚𑄴𑄙𑄇𑄬 𑄘𑄬𑄥𑄨𑄖𑄧 𑄌𑄖𑄴𑄖𑄧𑄢𑄮 𑄟𑄦𑄧𑄛𑄘𑄬𑄥𑄧 (𑄟𑄦𑄧𑄤. 𑄹𑄶𑄻) 𑄥𑄪𑄖𑄴𑄖𑄬 𑄤𑄪𑄖𑄴𑄖𑄧𑄚𑄨 𑄌𑄖𑄴𑄖𑄧𑄢𑄨 𑄛𑄐𑄴𑄦𑄝𑄴𑄡𑄧𑄇𑄢𑄕𑄧𑄚𑄨 (𑄃. 𑄚𑄨. 𑄺.𑄺𑄸) 𑄌. 𑄖𑄬𑄚𑄬𑄤𑄧𑄦 – ‘‘𑄡𑄮 𑄤𑄮 𑄟𑄡𑄧, 𑄃𑄂𑄚𑄚𑄴𑄘, 𑄙𑄟𑄴𑄟𑄮 𑄌 𑄤𑄨𑄚𑄡𑄮 𑄌 𑄘𑄬𑄥𑄨𑄖𑄮 𑄛𑄐𑄴𑄐𑄖𑄴𑄖𑄮, 𑄥𑄮 𑄤𑄮 𑄟𑄟𑄌𑄴𑄌𑄡𑄬𑄚 𑄥𑄖𑄴𑄗𑄧’’𑄖𑄨 (𑄘𑄩. 𑄚𑄨. 𑄸.𑄸𑄷𑄼).

𑄺𑄸. 𑄃𑄗 𑄈𑄮 𑄌𑄪𑄚𑄴𑄘𑄮 𑄥𑄟𑄕𑄪𑄘𑄴𑄘𑄬𑄥𑄮𑄖𑄨 𑄃𑄡𑄁 𑄗𑄬𑄢𑄮 𑄙𑄟𑄴𑄟𑄥𑄬𑄚𑄧𑄛𑄖𑄨𑄥𑄴𑄥 𑄇𑄚𑄨𑄑𑄴𑄒𑄞𑄧𑄖𑄨𑄇𑄮. 𑄖𑄁 𑄞𑄨𑄇𑄴𑄈𑄫 𑄃𑄚𑄪𑄛𑄥𑄟𑄴𑄛𑄚𑄴𑄚𑄇𑄧𑄣𑄬 𑄌𑄪𑄚𑄴𑄘𑄮 𑄥𑄟𑄕𑄪𑄘𑄴𑄘𑄬𑄥𑄮𑄖𑄨 𑄥𑄟𑄪𑄘𑄧𑄌𑄢𑄨𑄖𑄴𑄤𑄧 𑄗𑄬𑄢𑄇𑄧𑄣𑄬𑄛𑄨 𑄖𑄗𑄬𑄤 𑄥𑄟𑄪𑄘𑄧𑄌𑄢𑄨𑄁𑄥𑄪. 𑄖𑄬𑄚 𑄤𑄪𑄖𑄴𑄖𑄁 ‘‘𑄌𑄪𑄚𑄴𑄘𑄮 𑄥𑄟𑄕𑄪𑄘𑄴𑄘𑄬𑄥𑄮’’𑄖𑄨. 𑄅𑄛𑄥𑄋𑄴𑄇𑄟𑄩𑄖𑄨 𑄇𑄥𑄴𑄟𑄧 𑄅𑄛𑄥𑄋𑄴𑄇𑄟𑄨? 𑄚𑄧𑄑𑄛𑄪𑄖𑄴𑄖𑄬 𑄇𑄨𑄢 𑄇𑄧𑄣𑄁𑄇𑄖𑄬 𑄎𑄟𑄴𑄝𑄪𑄘𑄩𑄛𑄬 𑄟𑄚𑄪𑄥𑄴𑄥𑄧 𑄖𑄖𑄴𑄗 𑄖𑄖𑄴𑄗 𑄇𑄗𑄁 𑄛𑄤𑄖𑄴𑄖𑄡𑄨𑄁𑄥𑄪 – ‘‘𑄚𑄨𑄉𑄕𑄴𑄒𑄮 𑄚𑄧𑄑𑄛𑄪𑄖𑄴𑄖𑄮 𑄆𑄇𑄮 𑄥𑄖𑄴𑄗𑄧𑄖𑄨 𑄛𑄐𑄴𑄐𑄧𑄡𑄨𑄖𑄴𑄗, 𑄖𑄥𑄴𑄥 𑄇𑄧𑄣𑄇𑄨𑄢𑄨𑄡𑄧𑄡 𑄥𑄧𑄤𑄇𑄧𑄚𑄁 𑄆𑄤𑄢𑄫𑄛𑄮 𑄤𑄨𑄤𑄧𑄘𑄮 𑄎𑄧𑄖𑄮, 𑄥𑄟𑄕𑄮 𑄛𑄚 𑄉𑄮𑄖𑄟𑄮 𑄎𑄟𑄴𑄝𑄪𑄘𑄩𑄛𑄬 𑄌𑄚𑄴𑄘𑄮 𑄤𑄨𑄡 𑄥𑄫𑄢𑄨𑄡𑄮 𑄤𑄨𑄡 𑄌 𑄛𑄧𑄇𑄑𑄮𑄡𑄬𑄤, 𑄇𑄩𑄘𑄨𑄥𑄮 𑄚𑄪 𑄈𑄮 𑄥𑄟𑄕𑄬 𑄉𑄮𑄖𑄟𑄬 𑄛𑄢𑄨𑄚𑄨𑄝𑄴𑄝𑄪𑄖𑄬 𑄥𑄧𑄤𑄇𑄧𑄚𑄁 𑄤𑄨𑄤𑄧𑄘𑄮 𑄞𑄤𑄨𑄥𑄴𑄥𑄖𑄩’’𑄖𑄨. 𑄗𑄬𑄢𑄮 𑄖𑄁 𑄇𑄗𑄁 𑄥𑄪𑄖𑄴𑄤𑄧 𑄌𑄨𑄚𑄴𑄖𑄬𑄥𑄨 – ‘‘𑄄𑄟𑄁 𑄇𑄗𑄁 𑄉𑄦𑄬𑄖𑄴𑄤𑄧 𑄘𑄥𑄝𑄣𑄥𑄴𑄥 𑄃𑄂𑄢𑄮𑄌𑄬𑄥𑄴𑄥𑄧𑄟𑄨, 𑄥𑄖𑄴𑄗𑄧 𑄌 𑄆𑄖𑄁 𑄃𑄖𑄴𑄗𑄪𑄛𑄴𑄛𑄖𑄴𑄖𑄨𑄁 𑄇𑄖𑄴𑄤𑄧 𑄆𑄇𑄁 𑄘𑄬𑄥𑄚𑄁 𑄇𑄗𑄬𑄥𑄴𑄥𑄖𑄩’’𑄖𑄨. 𑄥𑄮 𑄚𑄨𑄇𑄴𑄈𑄟𑄨𑄖𑄴𑄤𑄧 𑄡𑄬𑄚 𑄥𑄧𑄟𑄉𑄧𑄟𑄮, 𑄡𑄬𑄚𑄧𑄡𑄥𑄴𑄟𑄧 𑄃𑄂𑄚𑄚𑄴𑄘𑄮 𑄖𑄬𑄚𑄪𑄛𑄥𑄋𑄴𑄇𑄟𑄨. 𑄅𑄎𑄪𑄟𑄬𑄤 𑄞𑄉𑄤𑄖𑄮 𑄥𑄚𑄴𑄖𑄨𑄇𑄁 𑄃𑄉𑄚𑄴𑄖𑄴𑄤𑄧 𑄡𑄬𑄚𑄥𑄴𑄥 𑄅𑄛𑄎𑄴𑄏𑄧𑄡𑄮 𑄃𑄂𑄡𑄥𑄴𑄟𑄧 𑄃𑄂𑄚𑄚𑄴𑄘𑄮 𑄖𑄬𑄚𑄪𑄛𑄥𑄋𑄴𑄇𑄟𑄩𑄖𑄨 𑄃𑄖𑄴𑄗𑄮. 𑄆𑄤𑄁 𑄇𑄨𑄢𑄥𑄴𑄥 𑄃𑄦𑄮𑄥𑄨 – ‘‘𑄅𑄛𑄎𑄴𑄏𑄧𑄡𑄮 𑄟𑄬 𑄟𑄦𑄧𑄛𑄐𑄴𑄐𑄮, 𑄥𑄮 𑄄𑄟𑄁 𑄥𑄧𑄥𑄚𑄁 𑄥𑄖𑄴𑄗𑄪 𑄃𑄂𑄢𑄮𑄌𑄬𑄥𑄴𑄥𑄖𑄨, 𑄃𑄗 𑄥𑄖𑄴𑄗𑄧 𑄖𑄘𑄚𑄪𑄢𑄫𑄛𑄁 𑄙𑄟𑄴𑄟𑄁 𑄘𑄬𑄥𑄬𑄥𑄴𑄥𑄖𑄩’’𑄖𑄨. 𑄇𑄗𑄧𑄛𑄧𑄞𑄖𑄚𑄴𑄖𑄨 𑄇𑄗𑄧𑄟𑄫𑄣𑄁, 𑄟𑄫𑄣𑄐𑄴𑄦𑄨 𑄛𑄧𑄞𑄖𑄚𑄴𑄖𑄨 𑄤𑄪𑄌𑄴𑄌𑄖𑄨. 𑄡𑄗𑄧𑄦 –

‘‘𑄃𑄛𑄴𑄛𑄇𑄬𑄚𑄛𑄨 𑄟𑄬𑄙𑄧𑄤𑄩, 𑄛𑄧𑄞𑄖𑄬𑄚 𑄤𑄨𑄌𑄇𑄴𑄈𑄕𑄮;

𑄥𑄟𑄪𑄑𑄴𑄒𑄧𑄛𑄬𑄖𑄨 𑄃𑄖𑄴𑄖𑄧𑄚𑄁, 𑄃𑄕𑄪𑄁 𑄃𑄉𑄴𑄉𑄨𑄁𑄤 𑄥𑄚𑄴𑄙𑄟’’𑄚𑄴𑄖𑄨. (𑄎𑄧. 𑄸.𑄷.𑄺);

𑄘𑄥𑄴𑄥𑄚𑄧𑄡𑄧𑄖𑄨 𑄘𑄥𑄴𑄥𑄚𑄖𑄴𑄗𑄧𑄡. 𑄇𑄨𑄁 𑄛𑄚𑄨𑄟𑄨𑄚𑄧 𑄞𑄉𑄤𑄧 𑄚 𑄘𑄨𑄑𑄴𑄒𑄛𑄪𑄝𑄴𑄝𑄮𑄖𑄨? 𑄚𑄮 𑄚 𑄘𑄨𑄑𑄴𑄒𑄛𑄪𑄝𑄴𑄝𑄮, 𑄃𑄡𑄐𑄴𑄦𑄨 𑄃𑄂𑄡𑄥𑄴𑄟𑄧 𑄘𑄨𑄤𑄧 𑄚𑄤 𑄤𑄧𑄢𑄬 𑄢𑄖𑄴𑄖𑄨𑄁 𑄚𑄤 𑄤𑄧𑄢𑄬𑄖𑄨 𑄆𑄇𑄧𑄦𑄁 𑄃𑄑𑄴𑄒𑄧𑄢𑄥 𑄤𑄧𑄢𑄬 𑄅𑄛𑄑𑄴𑄒𑄧𑄚𑄟𑄬𑄤 𑄉𑄌𑄴𑄍𑄖𑄨. 𑄘𑄨𑄤𑄥𑄥𑄴𑄥 𑄛𑄚 𑄥𑄖𑄇𑄴𑄈𑄖𑄴𑄖𑄪𑄁 𑄤𑄧 𑄥𑄦𑄥𑄴𑄥𑄇𑄴𑄈𑄖𑄴𑄖𑄪𑄁 𑄤𑄧 𑄉𑄚𑄴𑄖𑄪𑄇𑄧𑄟𑄮 𑄥𑄟𑄧𑄚𑄮𑄛𑄨 𑄚 𑄃𑄇𑄧𑄢𑄕𑄧 𑄉𑄌𑄴𑄍𑄖𑄨, 𑄆𑄇𑄁 𑄛𑄐𑄴𑄦𑄪𑄘𑄴𑄙𑄧𑄢𑄁 𑄉𑄦𑄬𑄖𑄴𑄤𑄧𑄤 𑄉𑄌𑄴𑄍𑄖𑄨. 𑄥𑄮 𑄖𑄁𑄘𑄨𑄤𑄥𑄁 𑄖𑄬𑄚 𑄉𑄚𑄴𑄖𑄪𑄇𑄧𑄟𑄮 𑄆𑄤𑄟𑄧𑄦.

𑄃𑄦𑄨𑄖𑄧𑄡 𑄘𑄪𑄇𑄴𑄈𑄧𑄡 𑄘𑄬𑄤𑄟𑄚𑄪𑄥𑄴𑄥𑄧𑄚𑄚𑄴𑄖𑄨 𑄆𑄇𑄥𑄴𑄟𑄨𑄁 𑄤𑄨𑄦𑄧𑄢𑄬 𑄥𑄋𑄴𑄊𑄟𑄎𑄴𑄏𑄬 𑄅𑄛𑄴𑄛𑄚𑄴𑄚𑄮 𑄤𑄨𑄤𑄧𑄘𑄮 𑄇𑄗𑄁 𑄘𑄬𑄤𑄟𑄚𑄪𑄥𑄴𑄥𑄧𑄚𑄁 𑄃𑄦𑄨𑄖𑄧𑄡 𑄘𑄪𑄇𑄴𑄈𑄧𑄡 𑄥𑄁𑄤𑄖𑄴𑄖𑄖𑄨? 𑄇𑄮𑄥𑄟𑄴𑄝𑄇𑄇𑄴𑄈𑄚𑄴𑄙𑄇𑄬 (𑄟𑄦𑄧𑄤. 𑄺𑄻𑄷) 𑄤𑄨𑄡 𑄦𑄨 𑄘𑄴𑄤𑄩𑄥𑄪 𑄞𑄨𑄇𑄴𑄈𑄫𑄥𑄪 𑄤𑄨𑄤𑄧𑄘𑄁 𑄃𑄂𑄛𑄚𑄴𑄚𑄬𑄥𑄪 𑄖𑄥𑄴𑄟𑄨𑄁 𑄤𑄨𑄦𑄧𑄢𑄬 𑄖𑄬𑄥𑄁 𑄃𑄚𑄴𑄖𑄬𑄤𑄧𑄥𑄨𑄇𑄧 𑄤𑄨𑄤𑄘𑄚𑄴𑄖𑄨, 𑄖𑄬𑄥𑄁 𑄃𑄮𑄤𑄧𑄘𑄁 𑄉𑄕𑄴𑄦𑄚𑄴𑄖𑄮 𑄞𑄨𑄇𑄴𑄈𑄪𑄚𑄨𑄥𑄋𑄴𑄊𑄮 𑄤𑄨𑄤𑄘𑄖𑄨, 𑄖𑄖𑄮 𑄖𑄬𑄥𑄁 𑄅𑄛𑄑𑄴𑄒𑄧𑄇𑄧 𑄤𑄨𑄤𑄘𑄚𑄴𑄖𑄨, 𑄃𑄗 𑄟𑄚𑄪𑄥𑄴𑄥𑄧𑄚𑄁 𑄃𑄂𑄢𑄇𑄴𑄈𑄘𑄬𑄤𑄖𑄧 𑄘𑄴𑄤𑄬 𑄇𑄮𑄑𑄴𑄒𑄧𑄥𑄧 𑄦𑄮𑄚𑄴𑄖𑄨. 𑄖𑄖𑄴𑄗 𑄙𑄟𑄴𑄟𑄤𑄧𑄘𑄩𑄚𑄁 𑄃𑄂𑄢𑄇𑄴𑄈𑄘𑄬𑄤𑄖𑄧 𑄙𑄟𑄴𑄟𑄤𑄧𑄘𑄨𑄚𑄨𑄡𑄮 𑄦𑄮𑄚𑄴𑄖𑄨, 𑄃𑄙𑄟𑄴𑄟𑄤𑄧𑄘𑄩𑄚𑄁 𑄃𑄙𑄟𑄴𑄟𑄤𑄧𑄘𑄨𑄚𑄨𑄡𑄮 𑄦𑄮𑄚𑄴𑄖𑄨. 𑄖𑄖𑄮 𑄖𑄧𑄥𑄁 𑄃𑄂𑄢𑄇𑄴𑄈𑄘𑄬𑄤𑄖𑄧𑄚𑄁 𑄟𑄨𑄖𑄴𑄖𑄧 𑄞𑄪𑄟𑄴𑄟𑄘𑄬𑄤𑄖𑄧 𑄞𑄨𑄎𑄴𑄎𑄚𑄴𑄖𑄨. 𑄆𑄤𑄁 𑄛𑄢𑄟𑄴𑄛𑄢𑄧𑄡 𑄡𑄧𑄤 𑄝𑄴𑄢𑄦𑄴𑄟𑄣𑄮𑄇𑄧 𑄒𑄛𑄬𑄖𑄴𑄤𑄧 𑄃𑄢𑄨𑄡𑄥𑄧𑄤𑄇𑄬 𑄥𑄝𑄴𑄝𑄬 𑄘𑄬𑄤𑄟𑄚𑄪𑄥𑄴𑄥𑄧 𑄘𑄴𑄤𑄬 𑄇𑄮𑄑𑄴𑄒𑄧𑄥𑄧 𑄦𑄮𑄚𑄴𑄖𑄨. 𑄙𑄟𑄴𑄟𑄤𑄧𑄘𑄩𑄦𑄨 𑄛𑄚 𑄃𑄙𑄟𑄴𑄟𑄤𑄧𑄘𑄨𑄚𑄮𑄤 𑄝𑄦𑄪𑄖𑄢𑄧 𑄦𑄮𑄚𑄴𑄖𑄨, 𑄖𑄖𑄮 𑄡𑄁 𑄝𑄦𑄫𑄦𑄨 𑄉𑄦𑄨𑄖𑄁, 𑄖𑄁 𑄉𑄕𑄴𑄦𑄚𑄴𑄖𑄨. 𑄙𑄟𑄴𑄟𑄁 𑄤𑄨𑄥𑄴𑄥𑄎𑄴𑄎𑄬𑄖𑄴𑄤𑄧 𑄝𑄦𑄪𑄖𑄢𑄧𑄤 𑄃𑄙𑄟𑄴𑄟𑄁 𑄉𑄕𑄴𑄦𑄚𑄴𑄖𑄨. 𑄖𑄬 𑄃𑄙𑄟𑄴𑄟𑄁 𑄛𑄫𑄢𑄬𑄖𑄴𑄤𑄧 𑄤𑄨𑄦𑄢𑄚𑄴𑄖𑄧 𑄃𑄛𑄧𑄡𑄬 𑄚𑄨𑄝𑄴𑄝𑄖𑄴𑄖𑄚𑄴𑄖𑄨. 𑄆𑄤𑄁 𑄆𑄇𑄥𑄴𑄟𑄨𑄁 𑄤𑄨𑄦𑄧𑄢𑄬 𑄥𑄋𑄴𑄊𑄟𑄎𑄴𑄏𑄬 𑄅𑄛𑄴𑄛𑄚𑄴𑄚𑄮 𑄤𑄨𑄤𑄧𑄘𑄮 𑄝𑄦𑄫𑄚𑄁 𑄃𑄦𑄨𑄖𑄧𑄡 𑄘𑄪𑄇𑄴𑄈𑄧𑄡 𑄦𑄮𑄖𑄨.

𑄺𑄹. 𑄃𑄞𑄨𑄐𑄴𑄐𑄧 𑄘𑄬𑄥𑄨𑄖𑄧𑄖𑄨 𑄟𑄦𑄧𑄝𑄮𑄙𑄨𑄟𑄫𑄣𑄬 𑄚𑄨𑄥𑄨𑄚𑄴𑄚𑄬𑄚 𑄛𑄌𑄴𑄌𑄇𑄴𑄈𑄁 𑄇𑄖𑄴𑄤𑄧 𑄛𑄤𑄬𑄘𑄨𑄖𑄧. 𑄛𑄖𑄨𑄥𑄴𑄥𑄡𑄟𑄧𑄚𑄢𑄫𑄛𑄧 𑄤𑄨𑄦𑄢𑄚𑄴𑄖𑄩𑄖𑄨 𑄅𑄛𑄚𑄨𑄥𑄴𑄥𑄧𑄡 𑄤𑄨𑄦𑄢𑄚𑄴𑄖𑄨. 𑄞𑄉𑄤𑄖𑄮 𑄃𑄌𑄴𑄌𑄡𑄬𑄚𑄧𑄖𑄨 𑄆𑄖𑄢𑄦𑄨 𑄞𑄉𑄤𑄚𑄴𑄖𑄁 𑄎𑄬𑄑𑄴𑄒𑄇𑄁 𑄇𑄖𑄴𑄤𑄧 𑄥𑄉𑄧𑄢𑄤𑄧 𑄤𑄨𑄦𑄢𑄚𑄴𑄖𑄨, 𑄖𑄪𑄟𑄴𑄦𑄧𑄇𑄁, 𑄞𑄚𑄴𑄖𑄬, 𑄅𑄉𑄴𑄉𑄖𑄬𑄎𑄖𑄧𑄡 𑄘𑄪𑄢𑄧𑄥𑄘𑄖𑄧𑄡 𑄤𑄨𑄤𑄧𑄘𑄁 𑄎𑄚𑄬𑄖𑄪𑄁 𑄚 𑄥𑄇𑄴𑄇𑄮𑄚𑄴𑄖𑄨, 𑄞𑄉𑄤𑄖𑄮 𑄛𑄚 𑄃𑄌𑄴𑄌𑄡𑄬𑄚 𑄤𑄨𑄤𑄧𑄘𑄁 𑄎𑄚𑄬𑄡𑄴𑄡𑄪𑄚𑄴𑄖𑄨 𑄤𑄘𑄖𑄨. 𑄡𑄖𑄴𑄗 𑄛𑄚 𑄖𑄁 𑄤𑄨𑄤𑄧𑄘𑄁 𑄎𑄚𑄬𑄡𑄴𑄡𑄪𑄁, 𑄖𑄁 𑄘𑄥𑄴𑄥𑄬𑄚𑄴𑄖𑄮 𑄃𑄎𑄴𑄏𑄧𑄎𑄩𑄤𑄬 𑄤𑄧 𑄃𑄙𑄨𑄛𑄧𑄖𑄨𑄟𑄮𑄇𑄴𑄈𑄬 𑄤𑄧𑄖𑄨 𑄃𑄂𑄦. 𑄖𑄖𑄴𑄗 𑄃𑄎𑄴𑄏𑄧𑄎𑄩𑄤𑄬𑄖𑄨 𑄃𑄂𑄎𑄩𑄤𑄦𑄬𑄖𑄪 𑄃𑄂𑄎𑄩𑄤𑄇𑄧𑄢𑄕𑄧 – ‘‘𑄞𑄨𑄇𑄴𑄈𑄪 𑄅𑄖𑄴𑄖𑄢𑄨𑄟𑄚𑄪𑄥𑄴𑄥𑄙𑄟𑄴𑄟𑄁 𑄅𑄣𑄴𑄣𑄛𑄖𑄨 𑄃𑄂𑄛𑄖𑄴𑄖𑄨 𑄛𑄧𑄢𑄧𑄎𑄨𑄇𑄥𑄴𑄥𑄧’’𑄖𑄨𑄃𑄂𑄘𑄨𑄚𑄧 (𑄛𑄢𑄨. 𑄸𑄾𑄽) 𑄚𑄡𑄬𑄚 𑄛𑄢𑄨𑄤𑄧𑄢𑄬 𑄛𑄐𑄴𑄐𑄖𑄴𑄖𑄧𑄚𑄨 𑄍 𑄥𑄨𑄇𑄴𑄈𑄧𑄛𑄘𑄧𑄚𑄨, 𑄖𑄧𑄚𑄨 𑄒𑄛𑄬𑄖𑄴𑄤𑄧 𑄥𑄬𑄥𑄧𑄚𑄨 𑄥𑄝𑄴𑄝𑄥𑄨𑄇𑄴𑄈𑄧𑄛𑄘𑄧𑄚𑄨 𑄃𑄙𑄨𑄛𑄧𑄖𑄨𑄟𑄮𑄇𑄴𑄈𑄁 𑄚𑄧𑄟. 𑄃𑄛𑄴𑄛𑄟𑄖𑄴𑄖𑄇𑄮 𑄥𑄮 𑄃𑄂𑄚𑄚𑄴𑄘𑄧𑄖𑄨 𑄃𑄎𑄴𑄏𑄧𑄎𑄩𑄤𑄁 𑄃𑄙𑄨𑄛𑄧𑄖𑄨𑄟𑄮𑄇𑄴𑄈𑄐𑄴𑄌 𑄃𑄂𑄢𑄝𑄴𑄞 𑄅𑄛𑄴𑄛𑄚𑄴𑄚𑄤𑄨𑄤𑄧𑄘𑄮 𑄚𑄧𑄟 𑄡𑄥𑄴𑄟𑄧 𑄛𑄢𑄥𑄴𑄥 𑄇𑄗𑄧𑄡𑄛𑄨 𑄃𑄖𑄴𑄖𑄚𑄮 𑄙𑄟𑄴𑄟𑄖𑄧𑄡𑄛𑄨 𑄥𑄣𑄴𑄣𑄇𑄴𑄈𑄬𑄖𑄴𑄤𑄧 𑄥𑄪𑄛𑄴𑄛𑄎𑄦𑄮 𑄦𑄮𑄖𑄨, 𑄖𑄥𑄴𑄟𑄧 ‘‘𑄃𑄛𑄴𑄛𑄟𑄖𑄴𑄖𑄇𑄮’’𑄖𑄨 𑄤𑄪𑄖𑄴𑄖𑄮.

𑄖𑄖𑄴𑄢𑄧𑄡𑄁 𑄚𑄡𑄮 – 𑄄𑄙𑄬𑄇𑄌𑄴𑄌𑄮 ‘‘𑄚 𑄥𑄇𑄴𑄇𑄧 𑄅𑄖𑄴𑄖𑄢𑄨𑄟𑄚𑄪𑄥𑄴𑄥𑄙𑄟𑄴𑄟𑄁 𑄃𑄚𑄪𑄣𑄴𑄣𑄛𑄚𑄴𑄖𑄬𑄚 𑄇𑄨𑄐𑄴𑄌𑄨 𑄣𑄘𑄴𑄙𑄪’’𑄚𑄴𑄖𑄨𑄃𑄂𑄘𑄩𑄚𑄨 𑄌𑄨𑄚𑄴𑄖𑄬𑄖𑄴𑄤𑄧 𑄃𑄂𑄎𑄩𑄤𑄦𑄬𑄖𑄪 𑄅𑄖𑄴𑄖𑄢𑄨𑄟𑄚𑄪𑄥𑄴𑄥𑄙𑄟𑄴𑄟𑄁 𑄤𑄧 𑄅𑄣𑄴𑄣𑄛𑄖𑄨 𑄥𑄐𑄴𑄌𑄢𑄨𑄖𑄴𑄖𑄁 𑄤𑄧 𑄃𑄂𑄛𑄎𑄴𑄎𑄖𑄨, 𑄡𑄮 𑄖𑄬 𑄤𑄨𑄦𑄧𑄢𑄬 𑄤𑄥𑄖𑄨, 𑄥𑄮 𑄞𑄨𑄇𑄴𑄈𑄪 𑄃𑄢𑄦𑄧𑄖𑄨𑄃𑄂𑄘𑄨𑄚𑄧 𑄚𑄡𑄬𑄚 𑄥𑄧𑄟𑄚𑄴𑄖𑄎𑄛𑄴𑄛𑄚𑄁 𑄤𑄧 𑄇𑄢𑄮𑄖𑄨, 𑄃𑄉𑄨𑄣𑄧𑄚𑄮 𑄤𑄧 𑄃𑄖𑄴𑄖𑄚𑄮 𑄃𑄖𑄴𑄗𑄧𑄡 𑄛𑄕𑄩𑄖𑄞𑄮𑄎𑄚𑄧𑄚𑄨 𑄤𑄨𑄐𑄴𑄐𑄧𑄛𑄬𑄖𑄴𑄤𑄧 𑄞𑄪𑄐𑄴𑄎𑄖𑄨, 𑄞𑄨𑄇𑄴𑄈𑄪𑄚𑄩 𑄤𑄧 𑄛𑄚 𑄖𑄧𑄚𑄨 𑄤𑄨𑄐𑄴𑄐𑄧𑄛𑄬𑄖𑄴𑄤𑄧 𑄛𑄧𑄑𑄨𑄘𑄬𑄥𑄚𑄩𑄡𑄁 𑄃𑄂𑄛𑄎𑄴𑄎𑄖𑄨, 𑄡𑄮 𑄇𑄮𑄌𑄨 𑄘𑄪𑄇𑄴𑄇𑄑𑄤𑄖𑄴𑄗𑄪𑄇𑄁 𑄡𑄁𑄇𑄨𑄐𑄴𑄌𑄨 𑄥𑄫𑄛𑄮𑄘𑄚𑄤𑄨𑄐𑄴𑄐𑄖𑄴𑄖𑄨𑄟𑄬𑄤 𑄤𑄧 𑄇𑄢𑄮𑄖𑄨, 𑄃𑄐𑄴𑄐𑄖𑄢𑄁 𑄤𑄧 𑄛𑄚 𑄛𑄕𑄴𑄕𑄖𑄴𑄖𑄨𑄤𑄩𑄖𑄨𑄇𑄴𑄇𑄟𑄁 𑄇𑄢𑄮𑄚𑄴𑄖𑄮 𑄤𑄨𑄦𑄢𑄖𑄨, 𑄖𑄟𑄬𑄚𑄁 𑄥𑄝𑄴𑄢𑄦𑄴𑄟𑄌𑄧𑄢𑄩 𑄆𑄤𑄁 𑄥𑄐𑄴𑄎𑄧𑄚𑄚𑄴𑄖𑄨 – ‘‘𑄇𑄨𑄁 𑄄𑄟𑄥𑄴𑄥 𑄄𑄟𑄨𑄚𑄧 𑄣𑄧𑄞𑄬𑄚 𑄣𑄘𑄴𑄙𑄬𑄚, 𑄡𑄮 𑄥𑄧𑄥𑄚𑄬 𑄛𑄝𑄴𑄝𑄎𑄨𑄖𑄴𑄤𑄧 𑄟𑄨𑄌𑄴𑄍𑄧𑄎𑄩𑄤𑄬𑄚 𑄎𑄩𑄤𑄨𑄇𑄁 𑄇𑄛𑄴𑄛𑄬𑄖𑄨, 𑄛𑄕𑄴𑄕𑄖𑄴𑄖𑄨𑄤𑄩𑄖𑄨𑄇𑄴𑄇𑄟𑄁 𑄇𑄢𑄮𑄖𑄩’’𑄖𑄨. 𑄃𑄖𑄴𑄖𑄚𑄮 𑄙𑄟𑄴𑄟𑄖𑄧𑄡𑄛𑄨𑄥𑄴𑄥 𑄆𑄤𑄁 𑄦𑄮𑄖𑄨 – ‘‘𑄇𑄨𑄥𑄴𑄥 𑄟𑄡𑄴𑄦𑄁 𑄄𑄟𑄨𑄚𑄧 𑄣𑄧𑄞𑄬𑄚, 𑄡𑄴𑄤𑄧𑄦𑄁 𑄆𑄤𑄁 𑄥𑄴𑄤𑄧𑄇𑄴𑄈𑄧𑄖𑄬 𑄙𑄟𑄴𑄟𑄤𑄨𑄚𑄡𑄬 𑄛𑄝𑄴𑄝𑄎𑄨𑄖𑄴𑄤𑄧 𑄟𑄨𑄌𑄴𑄍𑄧𑄎𑄩𑄤𑄬𑄚 𑄎𑄩𑄤𑄨𑄇𑄁 𑄇𑄛𑄴𑄛𑄬𑄟𑄨, 𑄛𑄕𑄴𑄕𑄖𑄴𑄖𑄨𑄤𑄩𑄖𑄨𑄇𑄴𑄇𑄟𑄁 𑄇𑄢𑄮𑄟𑄩’’𑄖𑄨 𑄥𑄣𑄴𑄣𑄇𑄴𑄈𑄬𑄖𑄴𑄤𑄧 𑄖𑄖𑄮 𑄃𑄮𑄢𑄟𑄖𑄨. 𑄆𑄤𑄁 𑄛𑄢𑄥𑄴𑄥 𑄇𑄗𑄧𑄡𑄛𑄨 𑄃𑄖𑄴𑄖𑄚𑄮 𑄙𑄟𑄴𑄟𑄖𑄧𑄡𑄛𑄨 𑄥𑄣𑄴𑄣𑄇𑄴𑄈𑄬𑄖𑄴𑄤𑄧 𑄥𑄪𑄛𑄴𑄛𑄎𑄦𑄮 𑄦𑄮𑄖𑄨. 𑄖𑄬𑄚 𑄞𑄉𑄤𑄧 ‘‘𑄃𑄛𑄴𑄛𑄟𑄖𑄴𑄖𑄇𑄮’’𑄖𑄨 𑄃𑄂𑄦.

𑄟𑄉𑄴𑄉𑄬 𑄤𑄧 𑄦𑄨, 𑄃𑄂𑄚𑄚𑄴𑄘, 𑄛𑄑𑄨𑄛𑄘𑄧𑄡 𑄤𑄧𑄖𑄨 𑄣𑄮𑄇𑄪𑄖𑄴𑄖𑄢𑄟𑄉𑄴𑄉𑄁 𑄛𑄖𑄴𑄤𑄧 𑄤𑄨𑄤𑄧𑄘𑄮 𑄚𑄧𑄟 𑄥𑄝𑄴𑄝𑄥𑄮 𑄤𑄫𑄛𑄥𑄟𑄴𑄟𑄖𑄨, 𑄚𑄖𑄴𑄗𑄨 𑄃𑄙𑄨𑄉𑄖𑄟𑄉𑄴𑄉𑄧𑄚𑄁 𑄤𑄨𑄤𑄧𑄘𑄮. 𑄛𑄪𑄝𑄴𑄝𑄞𑄧𑄉𑄟𑄉𑄴𑄉𑄁 𑄛𑄚 𑄛𑄪𑄝𑄴𑄝𑄞𑄧𑄉𑄛𑄑𑄨𑄛𑄘𑄐𑄴𑄌 𑄥𑄚𑄴𑄙𑄧𑄡𑄬𑄖𑄁 𑄤𑄪𑄖𑄴𑄖𑄁.

𑄖𑄖𑄴𑄢𑄧𑄡𑄁 𑄚𑄡𑄮 – 𑄆𑄤𑄁 𑄞𑄨𑄇𑄴𑄈𑄪𑄁 𑄟𑄚𑄪𑄥𑄴𑄥𑄧 𑄣𑄮𑄇𑄪𑄖𑄴𑄖𑄢𑄙𑄟𑄴𑄟𑄬 𑄥𑄟𑄴𑄞𑄧𑄤𑄬𑄚𑄴𑄖𑄨. 𑄥𑄮 𑄥𑄘𑄴𑄙𑄨𑄤𑄨𑄦𑄧𑄢𑄨𑄇𑄧𑄘𑄡𑄮 𑄃𑄂𑄉𑄚𑄴𑄖𑄴𑄤𑄧 𑄤𑄚𑄴𑄘𑄨𑄖𑄴𑄤𑄧 𑄒𑄨𑄖𑄬 𑄛𑄪𑄌𑄴𑄍𑄖𑄨 ‘‘𑄇𑄨𑄁 𑄃𑄂𑄉𑄖𑄖𑄴𑄗𑄧’’𑄖𑄨. 𑄟𑄚𑄥𑄨𑄇𑄧𑄖𑄝𑄴𑄝𑄇𑄟𑄴𑄟𑄑𑄴𑄒𑄧𑄚𑄁 𑄛𑄪𑄌𑄴𑄍𑄨𑄖𑄪𑄁, 𑄞𑄚𑄴𑄖𑄬𑄖𑄨. 𑄚𑄨𑄥𑄩𑄘𑄗, 𑄈𑄕𑄬𑄚𑄬𑄤 𑄃𑄢𑄦𑄖𑄴𑄖𑄁 𑄛𑄧𑄛𑄬𑄖𑄪𑄁 𑄥𑄟𑄖𑄴𑄗𑄇𑄟𑄴𑄟𑄑𑄴𑄒𑄧𑄚𑄇𑄗𑄁 𑄃𑄂𑄌𑄨𑄇𑄴𑄈𑄨𑄥𑄴𑄥𑄧𑄟𑄩𑄖𑄨 𑄤𑄖𑄴𑄤𑄧 𑄤𑄘𑄖𑄨 – ‘‘𑄄𑄙 𑄞𑄨𑄇𑄴𑄈𑄪 𑄃𑄖𑄴𑄖𑄚𑄮 𑄤𑄥𑄚𑄑𑄴𑄒𑄧𑄚𑄁 𑄛𑄤𑄨𑄥𑄨𑄖𑄴𑄤𑄧 𑄚𑄨𑄥𑄨𑄚𑄴𑄚𑄮 𑄟𑄫𑄣𑄇𑄟𑄴𑄟𑄑𑄴𑄒𑄧𑄚𑄁 𑄟𑄚𑄥𑄨 𑄇𑄢𑄮𑄖𑄨, 𑄖𑄥𑄴𑄥 𑄖𑄁 𑄟𑄚𑄥𑄨𑄇𑄢𑄮𑄖𑄮 𑄃𑄮𑄞𑄧𑄥𑄮 𑄅𑄛𑄴𑄛𑄎𑄴𑄎𑄖𑄨. 𑄃𑄡𑄁 𑄛𑄒𑄟𑄟𑄉𑄴𑄉𑄮 𑄚𑄧𑄟. 𑄥𑄮 𑄘𑄪𑄖𑄨𑄡𑄁 𑄃𑄮𑄞𑄧𑄥𑄐𑄧𑄕𑄁 𑄚𑄨𑄝𑄴𑄝𑄖𑄴𑄖𑄬𑄖𑄨, 𑄘𑄪𑄖𑄨𑄡𑄟𑄉𑄴𑄉𑄮 𑄃𑄙𑄨𑄉𑄖𑄮 𑄦𑄮𑄖𑄨, 𑄆𑄤𑄁 𑄖𑄖𑄨𑄡𑄐𑄴𑄌 𑄌𑄖𑄪𑄖𑄴𑄗𑄐𑄴𑄌. 𑄆𑄖𑄴𑄖𑄧𑄤𑄖𑄧 𑄟𑄉𑄴𑄉𑄛𑄴𑄛𑄖𑄴𑄖𑄮 𑄌𑄬𑄤 𑄜𑄣𑄛𑄴𑄛𑄖𑄴𑄖𑄮 𑄌 𑄦𑄮𑄖𑄩’’𑄖𑄨. 𑄃𑄗 𑄖𑄬 𑄞𑄨𑄇𑄴𑄈𑄫 ‘‘𑄃𑄈𑄩𑄕𑄧𑄥𑄤𑄮 𑄚𑄧𑄟 𑄆𑄤𑄁 𑄇𑄟𑄴𑄟𑄑𑄴𑄒𑄧𑄚𑄁 𑄇𑄗𑄬𑄖𑄪𑄁 𑄚 𑄥𑄇𑄴𑄇𑄮𑄖𑄨, 𑄃𑄘𑄴𑄙𑄧𑄡𑄁 𑄈𑄩𑄕𑄧𑄥𑄤𑄮’’𑄖𑄨 𑄚𑄨𑄑𑄴𑄒𑄁 𑄉𑄌𑄴𑄍𑄚𑄴𑄖𑄨.

𑄥𑄮 𑄃𑄛𑄢𑄬𑄚 𑄥𑄟𑄡𑄬𑄚 𑄇𑄧𑄣𑄁 𑄇𑄢𑄮𑄖𑄨. 𑄥𑄟𑄚𑄴𑄖𑄧 𑄞𑄨𑄇𑄴𑄈𑄧𑄌𑄧𑄢𑄉𑄧𑄟𑄬𑄦𑄨 𑄟𑄚𑄪𑄥𑄴𑄥𑄧 𑄃𑄂𑄉𑄚𑄴𑄖𑄴𑄤𑄧 𑄛𑄪𑄌𑄴𑄍𑄚𑄴𑄖𑄨 ‘‘𑄇𑄬𑄚𑄌𑄨, 𑄞𑄚𑄴𑄖𑄬, 𑄗𑄬𑄢𑄮 𑄛𑄐𑄴𑄦𑄁 𑄛𑄪𑄌𑄴𑄍𑄨𑄖𑄮’’𑄖𑄨. 𑄅𑄛𑄧𑄥𑄇𑄧 𑄛𑄪𑄝𑄴𑄝𑄬𑄤 𑄗𑄬𑄢𑄬𑄚 𑄛𑄐𑄴𑄦𑄮 𑄇𑄗𑄨𑄖𑄮 𑄃𑄟𑄴𑄦𑄧𑄇𑄚𑄴𑄖𑄨. 𑄖𑄬 𑄛𑄪𑄛𑄴𑄜𑄟𑄕𑄴𑄓𑄛𑄁 𑄛𑄪𑄛𑄴𑄜𑄇𑄫𑄑𑄧𑄉𑄧𑄢𑄁 𑄥𑄎𑄴𑄎𑄬𑄖𑄴𑄤𑄧 𑄥𑄪𑄤𑄕𑄴𑄕𑄬𑄚 𑄃𑄇𑄴𑄈𑄨𑄛𑄨𑄙𑄧𑄚𑄟𑄪𑄈𑄛𑄨𑄙𑄧𑄚𑄧𑄘𑄨𑄁 𑄇𑄢𑄨𑄖𑄴𑄤𑄧 𑄉𑄚𑄴𑄙𑄟𑄧𑄣𑄧𑄘𑄩𑄦𑄨 𑄛𑄫𑄎𑄬𑄖𑄴𑄤𑄧 𑄥𑄖𑄴𑄖𑄧𑄦𑄁 𑄥𑄧𑄙𑄪𑄇𑄩𑅄𑄨𑄇𑄁 𑄇𑄩𑅄𑄬𑄖𑄴𑄤𑄧 𑄏𑄧𑄛𑄬𑄖𑄴𑄤𑄧 𑄃𑄑𑄴𑄒𑄩𑄚𑄨 𑄃𑄂𑄘𑄧𑄡 𑄌𑄬𑄖𑄨𑄡𑄁 𑄇𑄢𑄮𑄚𑄴𑄖𑄨. 𑄃𑄐𑄴𑄐𑄬 𑄃𑄂𑄉𑄚𑄴𑄖𑄪𑄇𑄧 𑄤𑄨𑄦𑄧𑄢𑄁 𑄃𑄂𑄉𑄚𑄴𑄖𑄴𑄤𑄧 𑄛𑄧𑄘𑄬 𑄙𑄮𑄤𑄨𑄖𑄴𑄤𑄧 ‘‘𑄟𑄦𑄧𑄗𑄬𑄢𑄁 𑄛𑄥𑄴𑄥𑄨𑄥𑄴𑄥𑄧𑄟, 𑄇𑄦𑄁, 𑄃𑄂𑄤𑄪𑄥𑄮, 𑄟𑄦𑄧𑄗𑄬𑄢𑄮’’𑄖𑄨 𑄛𑄪𑄌𑄴𑄍𑄚𑄴𑄖𑄨. 𑄛𑄢𑄨𑄚𑄨𑄝𑄴𑄝𑄪𑄖𑄮, 𑄞𑄚𑄴𑄖𑄬𑄖𑄨. 𑄘𑄪𑄇𑄴𑄇𑄢𑄁, 𑄃𑄂𑄤𑄪𑄥𑄮, 𑄗𑄬𑄢𑄬𑄚 𑄇𑄖𑄁 𑄟𑄉𑄴𑄉𑄜𑄣𑄧𑄚𑄨 𑄚𑄨𑄝𑄴𑄝𑄖𑄴𑄖𑄬𑄚𑄴𑄖𑄬𑄚, 𑄛𑄐𑄴𑄦𑄁 𑄛𑄪𑄌𑄴𑄍𑄨𑄖𑄴𑄗, 𑄃𑄂𑄤𑄪𑄥𑄮𑄖𑄨. 𑄞𑄨𑄇𑄴𑄈𑄫𑄚𑄁 𑄇𑄟𑄴𑄟𑄑𑄴𑄒𑄧𑄚𑄁 𑄇𑄗𑄬𑄚𑄴𑄖𑄮 𑄄𑄟𑄨𑄚𑄧 𑄚𑄨𑄡𑄧𑄟𑄬𑄚 𑄇𑄗𑄬𑄥𑄨, 𑄞𑄚𑄴𑄖𑄬𑄖𑄨. 𑄚 𑄆𑄥𑄮, 𑄃𑄂𑄤𑄪𑄥𑄮, 𑄟𑄉𑄴𑄉𑄮, 𑄤𑄨𑄛𑄥𑄴𑄥𑄚𑄪𑄛𑄇𑄴𑄇𑄨𑄣𑄬𑄥𑄮 𑄚𑄧𑄟𑄬𑄥, 𑄚 𑄖𑄪𑄟𑄴𑄦𑄬 𑄎𑄧𑄚𑄨𑄖𑄴𑄗, 𑄛𑄪𑄗𑄪𑄎𑄴𑄎𑄚𑄮, 𑄃𑄂𑄤𑄪𑄥𑄮, 𑄗𑄬𑄢𑄮𑄖𑄨. 𑄖𑄬 𑄇𑄣𑄦𑄁 𑄇𑄢𑄮𑄚𑄴𑄖𑄧 𑄅𑄑𑄴𑄒𑄦𑄨𑄖𑄴𑄤𑄧 ‘‘𑄥𑄇𑄣𑄤𑄨𑄦𑄧𑄢𑄬 𑄞𑄨𑄇𑄴𑄈𑄫 𑄌 𑄞𑄨𑄇𑄴𑄈𑄧𑄌𑄧𑄢𑄉𑄧𑄟𑄬𑄥𑄪 𑄟𑄚𑄪𑄥𑄴𑄥𑄧 𑄌 𑄚 𑄎𑄧𑄚𑄚𑄴𑄖𑄨, 𑄖𑄪𑄟𑄴𑄦𑄬𑄡𑄬𑄤 𑄎𑄧𑄚𑄧𑄗. 𑄇𑄖𑄢𑄟𑄉𑄴𑄉𑄬𑄚 𑄖𑄪𑄟𑄴𑄦𑄬 𑄃𑄂𑄉𑄖𑄧, 𑄇𑄨𑄁 𑄤𑄮 𑄤𑄨𑄦𑄧𑄢𑄘𑄴𑄤𑄧𑄢𑄬 𑄌𑄬𑄖𑄨𑄡𑄁 𑄚 𑄘𑄨𑄑𑄴𑄒’’𑄚𑄴𑄖𑄨. 𑄆𑄤𑄁𑄤𑄧𑄘𑄩𑄚𑄁 𑄛𑄚 𑄞𑄨𑄇𑄴𑄈𑄫𑄚𑄁 𑄥𑄖𑄁 𑄤𑄧, 𑄦𑄮𑄖𑄪 𑄥𑄦𑄥𑄴𑄥𑄁 𑄤𑄧, 𑄡𑄧𑄤 𑄖𑄁 𑄣𑄘𑄴𑄙𑄨𑄁 𑄚𑄛𑄴𑄛𑄎𑄦𑄚𑄴𑄖𑄨, 𑄥𑄉𑄴𑄉𑄮𑄛𑄨 𑄟𑄉𑄴𑄉𑄮𑄛𑄨 𑄤𑄧𑄢𑄨𑄖𑄮𑄡𑄬𑄤.

𑄃𑄛𑄢𑄮𑄛𑄨 𑄖𑄧𑄘𑄨𑄥𑄮𑄤 𑄇𑄟𑄴𑄟𑄑𑄴𑄒𑄧𑄚𑄁 𑄇𑄗𑄬𑄚𑄴𑄖𑄮 𑄆𑄤𑄁 𑄇𑄗𑄬𑄖𑄨 – 𑄌𑄨𑄖𑄴𑄖𑄬𑄚𑄬𑄤 𑄖𑄩𑄥𑄪 𑄅𑄘𑄴𑄙𑄚𑄬𑄥𑄪 𑄖𑄩𑄕𑄨 𑄇𑄛𑄣𑄴𑄣𑄧𑄚𑄨 𑄃𑄂𑄢𑄮𑄛𑄬𑄖𑄴𑄤𑄧 𑄦𑄬𑄑𑄴𑄒𑄧 𑄃𑄉𑄴𑄉𑄨𑄁 𑄇𑄖𑄴𑄤𑄧 𑄌𑄨𑄖𑄴𑄖𑄬𑄚𑄬𑄤 𑄃𑄖𑄴𑄖𑄚𑄮 𑄘𑄴𑄤𑄖𑄴𑄖𑄨𑄁𑄥𑄧𑄇𑄧𑄢𑄁 𑄅𑄛𑄴𑄛𑄧𑄑𑄬𑄖𑄴𑄤𑄧 𑄇𑄛𑄣𑄴𑄣𑄬𑄥𑄪 𑄛𑄇𑄴𑄈𑄨𑄛𑄨𑄖𑄴𑄤𑄧 𑄌𑄨𑄖𑄴𑄖𑄬𑄚𑄬𑄤 𑄘𑄕𑄴𑄓𑄇𑄬𑄚 𑄛𑄢𑄨𑄤𑄖𑄴𑄖𑄬𑄖𑄴𑄤𑄧 𑄛𑄢𑄨𑄤𑄖𑄴𑄖𑄬𑄖𑄴𑄤𑄧 𑄞𑄎𑄴𑄎𑄨𑄖𑄝𑄴𑄝𑄁, 𑄡𑄧 𑄏𑄧𑄡𑄟𑄧𑄚𑄬 𑄍𑄧𑄢𑄨𑄇𑄧 𑄦𑄮𑄖𑄨, 𑄥𑄧 𑄟𑄪𑄈𑄤𑄧𑄖𑄬𑄚 𑄛𑄣𑄧𑄥𑄬𑄖𑄝𑄴𑄝𑄧. 𑄆𑄖𑄴𑄖𑄇𑄬𑄚 𑄙𑄫𑄖𑄛𑄧𑄛𑄮 𑄚𑄧𑄟𑄬𑄥 𑄥𑄟𑄕𑄮 𑄦𑄮𑄖𑄨. 𑄥𑄬𑄥𑄁 𑄛𑄪𑄢𑄨𑄟𑄚𑄡𑄬𑄚𑄬𑄤 𑄤𑄨𑄖𑄴𑄗𑄧𑄢𑄬𑄖𑄝𑄴𑄝𑄁.

𑄃𑄛𑄢𑄮 𑄆𑄤𑄁 𑄇𑄗𑄬𑄖𑄨 – 𑄌𑄨𑄖𑄴𑄖𑄬𑄚𑄬𑄤 𑄟𑄦𑄧𑄌𑄧𑄑𑄨𑄁 𑄒𑄛𑄬𑄖𑄴𑄤𑄧 𑄟𑄖𑄴𑄗𑄪𑄁 𑄡𑄮𑄎𑄬𑄖𑄴𑄤𑄧 𑄌𑄨𑄖𑄴𑄖𑄬𑄚𑄬𑄤 𑄃𑄖𑄴𑄖𑄚𑄮 𑄘𑄴𑄤𑄖𑄴𑄖𑄨𑄁𑄥𑄧𑄇𑄧𑄢𑄁 𑄅𑄛𑄴𑄛𑄧𑄑𑄬𑄖𑄴𑄤𑄧 𑄖𑄖𑄴𑄗 𑄛𑄇𑄴𑄈𑄨𑄛𑄨𑄖𑄴𑄤𑄧 𑄟𑄖𑄴𑄗𑄪𑄁 𑄃𑄮𑄖𑄧𑄢𑄬𑄖𑄴𑄤𑄧 𑄟𑄚𑄴𑄗𑄨𑄖𑄝𑄴𑄝𑄁. 𑄟𑄗𑄨𑄡𑄟𑄧𑄚𑄁 𑄤𑄨𑄣𑄩𑄡𑄖𑄨, 𑄤𑄨𑄣𑄩𑄚𑄬 𑄅𑄛𑄢𑄨 𑄜𑄬𑄕𑄮 𑄅𑄉𑄴𑄉𑄌𑄴𑄍𑄖𑄨. 𑄥𑄮 𑄜𑄬𑄕𑄮 𑄛𑄢𑄨𑄞𑄪𑄐𑄴𑄎𑄨𑄖𑄝𑄴𑄝𑄮. 𑄆𑄖𑄴𑄖𑄧𑄤𑄖𑄧 𑄤𑄮 𑄃𑄟𑄖𑄁 𑄛𑄢𑄨𑄞𑄪𑄖𑄴𑄖𑄁 𑄚𑄧𑄟 𑄞𑄤𑄨𑄥𑄴𑄥𑄖𑄨. 𑄄𑄖𑄮 𑄛𑄢𑄁 ‘‘𑄃𑄗 𑄖𑄬 𑄞𑄨𑄇𑄴𑄈𑄫’’𑄖𑄨𑄃𑄂𑄘𑄨 𑄥𑄝𑄴𑄝𑄁 𑄛𑄪𑄢𑄨𑄟𑄚𑄡𑄬𑄚𑄬𑄤 𑄤𑄨𑄖𑄴𑄗𑄧𑄢𑄬𑄖𑄝𑄴𑄝𑄁.

𑄺𑄺. 𑄄𑄘𑄧𑄚𑄨 𑄡𑄮 𑄆𑄤𑄁 𑄤𑄨𑄤𑄧𑄘𑄮 𑄅𑄛𑄴𑄛𑄎𑄴𑄎𑄬𑄡𑄴𑄡, 𑄖𑄥𑄴𑄥 𑄟𑄫𑄣𑄁 𑄘𑄥𑄴𑄥𑄬𑄚𑄴𑄖𑄮 𑄍𑄡𑄨𑄟𑄧𑄚𑄩𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄃𑄉𑄧𑄢𑄤𑄮𑄖𑄨 𑄉𑄧𑄢𑄤𑄤𑄨𑄢𑄦𑄨𑄖𑄮. 𑄃𑄛𑄴𑄛𑄖𑄨𑄥𑄴𑄥𑄮𑄖𑄨 𑄃𑄛𑄴𑄛𑄖𑄨𑄥𑄴𑄥𑄡𑄮 𑄃𑄚𑄩𑄌𑄤𑄪𑄖𑄴𑄖𑄨. 𑄆𑄖𑄴𑄗 𑄛𑄚 𑄡𑄮 𑄞𑄨𑄇𑄴𑄈𑄪 𑄥𑄖𑄴𑄗𑄢𑄨 𑄙𑄢𑄟𑄧𑄚𑄬 𑄖𑄩𑄥𑄪 𑄇𑄧𑄣𑄬𑄥𑄪 𑄅𑄛𑄑𑄴𑄒𑄧𑄚𑄁 𑄚 𑄡𑄧𑄖𑄨, 𑄥𑄖𑄴𑄗𑄢𑄨 𑄃𑄚𑄪𑄛𑄧𑄦𑄚𑄬 𑄌𑄋𑄴𑄇𑄟𑄚𑄴𑄖𑄬 𑄥𑄅𑄛𑄧𑄦𑄚𑄮 𑄌𑄋𑄴𑄇𑄟𑄖𑄨, 𑄚𑄩𑄌𑄬 𑄌𑄋𑄴𑄇𑄟𑄬 𑄌𑄋𑄴𑄇𑄟𑄚𑄴𑄖𑄬 𑄅𑄌𑄴𑄌𑄬 𑄌𑄋𑄴𑄇𑄟𑄬 𑄌𑄋𑄴𑄇𑄟𑄖𑄨, 𑄦𑄬𑄑𑄴𑄒𑄧 𑄤𑄥𑄚𑄴𑄖𑄬 𑄅𑄛𑄢𑄨 𑄤𑄥𑄖𑄨, 𑄥𑄖𑄴𑄗𑄪 𑄘𑄥𑄴𑄥𑄚𑄑𑄴𑄒𑄧𑄚𑄬 𑄅𑄞𑄮 𑄃𑄁𑄥𑄬 𑄛𑄧𑄢𑄪𑄛𑄖𑄨, 𑄍𑄖𑄴𑄖𑄁 𑄙𑄧𑄢𑄬𑄖𑄨, 𑄅𑄛𑄧𑄦𑄚𑄁 𑄙𑄧𑄢𑄬𑄖𑄨, 𑄚𑄴𑄦𑄧𑄚𑄖𑄨𑄖𑄴𑄗𑄬 𑄅𑄌𑄴𑄌𑄧𑄢𑄁 𑄤𑄧 𑄛𑄥𑄴𑄥𑄧𑄤𑄁 𑄤𑄧 𑄇𑄢𑄮𑄖𑄨, 𑄛𑄢𑄨𑄚𑄨𑄝𑄴𑄝𑄪𑄖𑄬 𑄤𑄧 𑄛𑄚 𑄌𑄬𑄖𑄨𑄡𑄁 𑄤𑄚𑄴𑄘𑄨𑄖𑄪𑄁 𑄚 𑄉𑄌𑄴𑄍𑄖𑄨, 𑄌𑄬𑄖𑄨𑄡𑄥𑄴𑄥 𑄛𑄐𑄴𑄐𑄧𑄡𑄚𑄑𑄴𑄒𑄧𑄚𑄬 𑄥𑄖𑄴𑄗𑄪𑄘𑄥𑄴𑄥𑄚𑄑𑄴𑄒𑄧𑄚𑄬 𑄤𑄪𑄖𑄴𑄖𑄁 𑄥𑄝𑄴𑄝𑄁 𑄇𑄢𑄮𑄖𑄨, 𑄃𑄐𑄴𑄐𑄬𑄦𑄨 𑄌 𑄞𑄨𑄇𑄴𑄈𑄫𑄦𑄨 ‘‘𑄇𑄥𑄴𑄟𑄧 𑄆𑄤𑄁 𑄇𑄢𑄮𑄥𑄨, 𑄚 𑄄𑄘𑄁 𑄤𑄑𑄴𑄑𑄖𑄨, 𑄥𑄟𑄴𑄟𑄧𑄥𑄝𑄪𑄘𑄴𑄙𑄥𑄴𑄥 𑄚𑄧𑄟 𑄣𑄎𑄴𑄎𑄨𑄖𑄪𑄁 𑄤𑄑𑄴𑄑𑄖𑄩’’𑄖𑄨 𑄤𑄪𑄖𑄴𑄖𑄬 ‘‘𑄖𑄫𑄕𑄴𑄦𑄩 𑄦𑄮𑄖𑄨, 𑄇𑄨𑄁 𑄝𑄪𑄘𑄴𑄙𑄮 𑄝𑄪𑄘𑄴𑄙𑄮𑄖𑄨 𑄤𑄘𑄥𑄩’’𑄖𑄨 𑄞𑄕𑄖𑄨, 𑄃𑄡𑄁 𑄥𑄖𑄴𑄗𑄢𑄨 𑄃𑄉𑄧𑄢𑄤𑄮 𑄚𑄧𑄟.

𑄡𑄮 𑄛𑄚 𑄙𑄟𑄴𑄟𑄥𑄴𑄥𑄤𑄚𑄬 𑄥𑄋𑄴𑄊𑄪𑄑𑄴𑄒𑄬 𑄥𑄇𑄴𑄇𑄌𑄴𑄌𑄁 𑄚 𑄉𑄌𑄴𑄍𑄖𑄨, 𑄥𑄇𑄴𑄇𑄌𑄴𑄌𑄁 𑄙𑄟𑄴𑄟𑄁 𑄚 𑄥𑄪𑄕𑄧𑄖𑄨, 𑄚𑄨𑄘𑄴𑄘𑄧𑄡𑄖𑄨 𑄤𑄧 𑄥𑄣𑄴𑄣𑄛𑄬𑄚𑄴𑄖𑄮 𑄤𑄧 𑄚𑄨𑄥𑄩𑄘𑄖𑄨, 𑄥𑄇𑄴𑄇𑄌𑄴𑄌𑄁 𑄚 𑄉𑄕𑄴𑄦𑄧𑄖𑄨 𑄚 𑄙𑄧𑄢𑄬𑄖𑄨, ‘‘𑄇𑄨𑄁 𑄙𑄟𑄴𑄟𑄬 𑄃𑄉𑄧𑄢𑄤𑄁 𑄇𑄢𑄮𑄥𑄩’’𑄖𑄨 𑄤𑄪𑄖𑄴𑄖𑄬 ‘‘𑄖𑄪𑄕𑄴𑄦𑄩 𑄦𑄮𑄖𑄨, 𑄙𑄟𑄴𑄟𑄮 𑄙𑄟𑄴𑄟𑄮𑄖𑄨 𑄤𑄘𑄥𑄨, 𑄇𑄨𑄁 𑄙𑄟𑄴𑄟𑄮 𑄚𑄧𑄟𑄧’’𑄖𑄨 𑄤𑄘𑄖𑄨, 𑄃𑄡𑄁 𑄙𑄟𑄴𑄟𑄬 𑄃𑄉𑄧𑄢𑄤𑄮 𑄚𑄧𑄟.

𑄡𑄮 𑄛𑄚 𑄗𑄬𑄢𑄬𑄚 𑄞𑄨𑄇𑄴𑄈𑄪𑄚𑄧 𑄃𑄚𑄎𑄴𑄏𑄨𑄑𑄴𑄒𑄮 𑄙𑄟𑄴𑄟𑄁 𑄘𑄬𑄥𑄬𑄖𑄨, 𑄚𑄨𑄥𑄩𑄘𑄖𑄨 𑄛𑄐𑄴𑄦𑄁 𑄇𑄗𑄬𑄖𑄨, 𑄤𑄪𑄓𑄴𑄔𑄬 𑄞𑄨𑄇𑄴𑄈𑄫 𑄊𑄑𑄴𑄑𑄬𑄚𑄴𑄖𑄮 𑄉𑄌𑄴𑄍𑄖𑄨, 𑄖𑄨𑄑𑄴𑄒𑄖𑄨 𑄚𑄨𑄥𑄩𑄘𑄖𑄨, 𑄘𑄪𑄥𑄴𑄥𑄛𑄣𑄴𑄣𑄖𑄴𑄗𑄨𑄇𑄁 𑄤𑄧 𑄦𑄖𑄴𑄗𑄛𑄣𑄴𑄣𑄖𑄴𑄗𑄨𑄇𑄁 𑄤𑄧 𑄇𑄢𑄮𑄖𑄨, 𑄥𑄋𑄴𑄊𑄟𑄎𑄴𑄏𑄬 𑄅𑄞𑄮 𑄃𑄁𑄥𑄬 𑄛𑄧𑄢𑄪𑄛𑄖𑄨, 𑄍𑄖𑄴𑄖𑄪𑄛𑄧𑄦𑄚𑄁 𑄙𑄧𑄢𑄬𑄖𑄨, ‘‘𑄞𑄨𑄇𑄴𑄈𑄪𑄥𑄋𑄴𑄊𑄥𑄴𑄥 𑄣𑄎𑄴𑄎𑄨𑄖𑄪𑄁 𑄤𑄑𑄴𑄑𑄖𑄩’’𑄖𑄨 𑄤𑄪𑄖𑄴𑄖𑄬𑄛𑄨 ‘‘𑄖𑄪𑄕𑄴𑄦𑄩 𑄦𑄮𑄖𑄨, 𑄥𑄋𑄴𑄊𑄮 𑄥𑄋𑄴𑄊𑄮𑄖𑄨 𑄤𑄘𑄥𑄨, 𑄇𑄨𑄁 𑄥𑄋𑄴𑄊𑄮, 𑄟𑄨𑄉𑄥𑄋𑄴𑄊𑄮 𑄃𑄎𑄥𑄋𑄴𑄊𑄮’’𑄖𑄨𑄃𑄂𑄘𑄩𑄚𑄨 𑄤𑄘𑄖𑄨, 𑄃𑄡𑄁 𑄥𑄋𑄴𑄊𑄬 𑄃𑄉𑄧𑄢𑄤𑄮 𑄚𑄧𑄟. 𑄆𑄇𑄞𑄨𑄇𑄴𑄈𑄪𑄥𑄴𑄟𑄨𑄟𑄴𑄛𑄨 𑄦𑄨 𑄃𑄉𑄧𑄢𑄤𑄬 𑄇𑄖𑄬 𑄥𑄋𑄴𑄊𑄬 𑄇𑄖𑄮𑄡𑄬𑄤 𑄦𑄮𑄖𑄨. 𑄖𑄨𑄥𑄴𑄥𑄮 𑄥𑄨𑄇𑄴𑄈𑄧 𑄛𑄚 𑄃𑄛𑄢𑄨𑄛𑄫𑄢𑄡𑄟𑄧𑄚𑄮𑄤 𑄥𑄨𑄇𑄴𑄈𑄧𑄡 𑄚 𑄛𑄢𑄨𑄛𑄫𑄢𑄇𑄧𑄢𑄩 𑄚𑄧𑄟.

𑄃𑄎𑄴𑄏𑄖𑄴𑄖𑄁 𑄤𑄧𑄖𑄨 𑄃𑄖𑄴𑄖𑄚𑄨 𑄤𑄧 𑄃𑄖𑄴𑄖𑄚𑄮 𑄛𑄢𑄨𑄥𑄧𑄡 𑄤𑄧. 𑄝𑄧𑄦𑄨𑄘𑄴𑄙𑄧𑄖𑄨 𑄛𑄢𑄥𑄴𑄟𑄨𑄁 𑄤𑄧 𑄛𑄢𑄥𑄴𑄥 𑄛𑄢𑄨𑄥𑄧𑄡 𑄤𑄧.

𑄺𑄼. 𑄄𑄘𑄧𑄚𑄨 𑄃𑄡𑄁 𑄍 𑄒𑄧𑄚𑄧𑄚𑄨 𑄚𑄨𑄥𑄴𑄥𑄧𑄡 𑄅𑄛𑄴𑄛𑄚𑄴𑄚𑄤𑄨𑄤𑄧𑄘𑄮 𑄤𑄓𑄴𑄔𑄚𑄴𑄖𑄮 𑄡𑄧𑄚𑄨 𑄃𑄙𑄨𑄇𑄢𑄕𑄧𑄚𑄨 𑄛𑄧𑄛𑄪𑄕𑄧𑄖𑄨, 𑄖𑄧𑄚𑄨 𑄘𑄥𑄴𑄥𑄬𑄖𑄪𑄁 𑄌𑄖𑄴𑄖𑄧𑄢𑄨𑄟𑄧𑄚𑄩𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄤𑄫𑄛𑄥𑄟𑄚𑄖𑄴𑄗𑄧𑄡 𑄛𑄤𑄖𑄴𑄖𑄟𑄧𑄚𑄬𑄦𑄨 𑄥𑄟𑄗𑄬𑄦𑄨 𑄃𑄙𑄨𑄇𑄧𑄖𑄝𑄴𑄝𑄧𑄚𑄩𑄖𑄨 𑄃𑄙𑄨𑄇𑄢𑄕𑄧𑄚𑄨. 𑄤𑄨𑄤𑄧𑄘𑄮𑄤 𑄃𑄙𑄨𑄇𑄢𑄕𑄁 𑄤𑄨𑄤𑄧𑄘𑄧𑄙𑄨𑄇𑄢𑄕𑄁. 𑄄𑄖𑄢𑄬𑄥𑄪𑄛𑄨 𑄆𑄥𑄬𑄤 𑄚𑄡𑄮.

𑄄𑄘𑄧𑄚𑄨 𑄄𑄟𑄧𑄚𑄨𑄛𑄨 𑄌𑄖𑄴𑄖𑄧𑄢𑄨 𑄃𑄙𑄨𑄇𑄢𑄕𑄧𑄚𑄨 𑄛𑄖𑄴𑄤𑄧 𑄅𑄛𑄢𑄨 𑄤𑄓𑄴𑄔𑄬𑄚𑄴𑄖𑄮 𑄥𑄮 𑄤𑄨𑄤𑄧𑄘𑄮 𑄡𑄬𑄦𑄨 𑄥𑄟𑄗𑄬𑄦𑄨 𑄤𑄫𑄛𑄥𑄟𑄴𑄟𑄖𑄨, 𑄖𑄬𑄥𑄁 𑄘𑄥𑄴𑄥𑄚𑄖𑄴𑄗𑄁 𑄥𑄖𑄴𑄖 𑄈𑄮 𑄛𑄚𑄨𑄟𑄬𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄃𑄙𑄨𑄇𑄢𑄕𑄧𑄚𑄨 𑄥𑄟𑄬𑄚𑄴𑄖𑄨 𑄤𑄫𑄛𑄥𑄟𑄬𑄚𑄴𑄖𑄩𑄖𑄨 𑄃𑄙𑄨𑄇𑄢𑄕𑄥𑄟𑄗𑄧. 𑄅𑄛𑄴𑄛𑄚𑄴𑄚𑄪𑄛𑄴𑄛𑄚𑄴𑄚𑄧𑄚𑄚𑄴𑄖𑄨 𑄅𑄛𑄴𑄛𑄚𑄴𑄚𑄧𑄚𑄁 𑄅𑄛𑄴𑄛𑄚𑄴𑄚𑄧𑄚𑄁. 𑄃𑄙𑄨𑄇𑄢𑄕𑄧𑄚𑄚𑄴𑄖𑄨 𑄆𑄖𑄬𑄥𑄁 𑄤𑄨𑄤𑄧𑄘𑄧𑄙𑄨𑄇𑄢𑄕𑄧𑄘𑄩𑄚𑄁 𑄌𑄖𑄪𑄚𑄴𑄚𑄁. 𑄥𑄟𑄗𑄧𑄡 𑄤𑄫𑄛𑄥𑄟𑄧𑄡𑄧𑄖𑄨 𑄥𑄟𑄚𑄖𑄴𑄗𑄐𑄴𑄌𑄬𑄤 𑄤𑄫𑄛𑄥𑄟𑄚𑄖𑄴𑄗𑄐𑄴𑄌. 𑄥𑄟𑄴𑄟𑄪𑄈𑄧𑄤𑄨𑄚𑄡𑄮 𑄘𑄧𑄖𑄝𑄴𑄝𑄮…𑄛𑄬… 𑄖𑄨𑄕𑄤𑄖𑄴𑄗𑄧𑄢𑄇𑄮𑄖𑄨 𑄄𑄟𑄬 𑄥𑄖𑄴𑄖 𑄥𑄟𑄗𑄧 𑄘𑄧𑄖𑄝𑄴𑄝𑄧.

𑄖𑄖𑄴𑄢𑄧𑄡𑄁 𑄤𑄨𑄚𑄨𑄌𑄴𑄍𑄡𑄇𑄗𑄧 – 𑄃𑄙𑄨𑄇𑄢𑄕𑄬𑄥𑄪 𑄖𑄧𑄤 𑄙𑄟𑄴𑄟𑄮𑄖𑄨 𑄤𑄧 𑄃𑄙𑄟𑄴𑄟𑄮𑄖𑄨 𑄤𑄧𑄖𑄨 𑄃𑄑𑄴𑄒𑄧𑄢𑄥𑄦𑄨 𑄤𑄖𑄴𑄗𑄫𑄦𑄨 𑄤𑄨𑄤𑄘𑄚𑄴𑄖𑄧𑄚𑄁 𑄞𑄨𑄇𑄴𑄈𑄫𑄚𑄁 𑄡𑄮 𑄤𑄨𑄤𑄧𑄘𑄮, 𑄄𑄘𑄁 𑄤𑄨𑄤𑄧𑄘𑄧𑄙𑄨𑄇𑄢𑄕𑄁 𑄚𑄧𑄟. 𑄥𑄩𑄣𑄤𑄨𑄛𑄖𑄴𑄖𑄨𑄡𑄧 𑄤𑄧 𑄃𑄂𑄌𑄧𑄢𑄘𑄨𑄑𑄴𑄒𑄨𑄃𑄂𑄎𑄩𑄤𑄤𑄨𑄛𑄖𑄴𑄖𑄨𑄡𑄧 𑄤𑄧 𑄃𑄚𑄪𑄤𑄘𑄚𑄴𑄖𑄧𑄚𑄁 𑄡𑄮 𑄃𑄚𑄪𑄤𑄧𑄘𑄮 𑄅𑄛𑄤𑄘𑄚𑄧 𑄌𑄬𑄤 𑄌𑄮𑄘𑄚𑄧 𑄌, 𑄄𑄘𑄁 𑄃𑄚𑄪𑄤𑄧𑄘𑄧𑄙𑄨𑄇𑄢𑄕𑄁 𑄚𑄧𑄟. 𑄟𑄧𑄖𑄨𑄇𑄧𑄡𑄁 𑄃𑄂𑄉𑄖𑄧 𑄛𑄐𑄴𑄌 𑄤𑄨𑄞𑄋𑄴𑄉𑄬 𑄘𑄴𑄤𑄬𑄖𑄨 𑄥𑄖𑄴𑄖 𑄃𑄂𑄛𑄖𑄴𑄖𑄨𑄇𑄴𑄈𑄚𑄴𑄙𑄧 𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄁 𑄚𑄧𑄟. 𑄡𑄁 𑄥𑄋𑄴𑄊𑄥𑄴𑄥 𑄃𑄛𑄣𑄮𑄇𑄚𑄧𑄘𑄩𑄚𑄁 𑄌𑄖𑄪𑄚𑄴𑄚𑄁 𑄇𑄟𑄴𑄟𑄧𑄚𑄁 𑄇𑄢𑄕𑄁, 𑄄𑄘𑄁 𑄇𑄨𑄌𑄴𑄌𑄧𑄙𑄨𑄇𑄢𑄕𑄁 𑄚𑄧𑄟.

𑄖𑄖𑄴𑄗 𑄤𑄨𑄤𑄧𑄘𑄧𑄙𑄨𑄇𑄢𑄕𑄁 𑄘𑄴𑄤𑄩𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄡𑄬𑄞𑄪𑄡𑄴𑄡𑄥𑄨𑄇𑄧𑄡 𑄌. 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚𑄬𑄤 𑄥𑄟𑄴𑄟𑄟𑄧𑄚𑄁 𑄡𑄥𑄴𑄟𑄨𑄁 𑄤𑄨𑄦𑄧𑄢𑄬 𑄅𑄛𑄴𑄛𑄚𑄴𑄚𑄁, 𑄖𑄥𑄴𑄟𑄨𑄁𑄡𑄬𑄤 𑄤𑄧, 𑄃𑄐𑄴𑄐𑄖𑄴𑄗 𑄤𑄫𑄛𑄥𑄟𑄬𑄖𑄪𑄁 𑄉𑄌𑄴𑄍𑄚𑄴𑄖𑄧𑄚𑄁 𑄃𑄚𑄴𑄖𑄢𑄧𑄟𑄉𑄴𑄉𑄬 𑄤𑄧, 𑄡𑄖𑄴𑄗 𑄉𑄚𑄴𑄖𑄴𑄤𑄧 𑄥𑄋𑄴𑄊𑄥𑄴𑄥 𑄚𑄨𑄡𑄴𑄡𑄧𑄖𑄨𑄖𑄁, 𑄖𑄖𑄴𑄗 𑄥𑄋𑄴𑄊𑄬𑄚 𑄤𑄧 𑄉𑄕𑄬𑄚 𑄤𑄧 𑄤𑄫𑄛𑄥𑄟𑄬𑄖𑄪𑄁 𑄃𑄥𑄇𑄴𑄇𑄮𑄚𑄴𑄖𑄬 𑄖𑄖𑄴𑄗𑄬𑄤 𑄅𑄝𑄴𑄝𑄧𑄦𑄨𑄇𑄧𑄡 𑄥𑄟𑄴𑄟𑄖𑄛𑄪𑄉𑄴𑄉𑄣𑄬𑄦𑄨 𑄤𑄧 𑄤𑄨𑄚𑄨𑄌𑄴𑄍𑄨𑄖𑄁 𑄥𑄟𑄴𑄟𑄖𑄨. 𑄆𑄤𑄁 𑄥𑄟𑄴𑄟𑄟𑄧𑄚𑄬 𑄛𑄚 𑄖𑄥𑄴𑄟𑄨𑄁 𑄡𑄧 𑄥𑄋𑄴𑄊𑄥𑄟𑄴𑄟𑄪𑄈𑄖𑄧 𑄙𑄟𑄴𑄟𑄥𑄟𑄴𑄟𑄪𑄈𑄖𑄧, 𑄤𑄨𑄚𑄡𑄥𑄟𑄴𑄟𑄪𑄈𑄖𑄧, 𑄛𑄪𑄉𑄴𑄉𑄣𑄥𑄟𑄴𑄟𑄪𑄈𑄖𑄧, 𑄃𑄡𑄁 𑄥𑄟𑄴𑄟𑄪𑄈𑄧𑄤𑄨𑄚𑄡𑄮 𑄚𑄧𑄟.

𑄖𑄖𑄴𑄗 𑄌 𑄇𑄧𑄢𑄇𑄥𑄋𑄴𑄊𑄥𑄴𑄥 𑄥𑄧𑄟𑄉𑄴𑄉𑄨𑄤𑄥𑄬𑄚 𑄥𑄟𑄴𑄟𑄪𑄈𑄩𑄞𑄧𑄤𑄮 𑄥𑄋𑄴𑄊𑄥𑄟𑄴𑄟𑄪𑄈𑄖𑄧. 𑄥𑄟𑄬𑄖𑄝𑄴𑄝𑄥𑄴𑄥 𑄤𑄖𑄴𑄗𑄪𑄚𑄮 𑄞𑄫𑄖𑄖𑄧 𑄙𑄟𑄴𑄟𑄥𑄟𑄴𑄟𑄪𑄈𑄖𑄧. 𑄡𑄗𑄧 𑄖𑄁 𑄥𑄟𑄬𑄖𑄝𑄴𑄝𑄁, 𑄖𑄗𑄬𑄤 𑄥𑄟𑄚𑄁 𑄤𑄨𑄚𑄡𑄥𑄟𑄴𑄟𑄪𑄈𑄖𑄧. 𑄡𑄮 𑄌 𑄤𑄨𑄤𑄘𑄖𑄨, 𑄡𑄬𑄚 𑄌 𑄤𑄨𑄤𑄘𑄖𑄨, 𑄖𑄬𑄥𑄁 𑄅𑄞𑄨𑄚𑄴𑄚𑄁 𑄃𑄖𑄴𑄖𑄛𑄌𑄴𑄌𑄖𑄴𑄗𑄨𑄇𑄧𑄚𑄁 𑄥𑄟𑄴𑄟𑄪𑄈𑄩𑄞𑄧𑄤𑄮 𑄛𑄪𑄉𑄴𑄉𑄣𑄥𑄟𑄴𑄟𑄪𑄈𑄖𑄧. 𑄅𑄝𑄴𑄝𑄧𑄦𑄨𑄇𑄧𑄡 𑄤𑄫𑄛𑄥𑄟𑄬 𑄛𑄚𑄬𑄖𑄴𑄗 𑄥𑄋𑄴𑄊𑄥𑄟𑄴𑄟𑄪𑄈𑄖𑄧 𑄛𑄢𑄨𑄦𑄧𑄡𑄖𑄨. 𑄆𑄤𑄁 𑄖𑄧𑄤 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚𑄬𑄤 𑄥𑄟𑄴𑄟𑄖𑄨.

𑄥𑄌𑄬 𑄛𑄚𑄬𑄤𑄟𑄴𑄛𑄨 𑄚 𑄥𑄟𑄴𑄟𑄖𑄨, 𑄃𑄗 𑄚𑄁 𑄅𑄝𑄴𑄝𑄧𑄦𑄨𑄇𑄧𑄡 𑄥𑄟𑄴𑄟𑄖𑄧 𑄞𑄨𑄇𑄴𑄈𑄫 ‘‘𑄚 𑄟𑄡𑄁 𑄥𑄇𑄴𑄇𑄮𑄟 𑄤𑄫𑄛𑄥𑄟𑄬𑄖𑄪’’𑄚𑄴𑄖𑄨 𑄥𑄋𑄴𑄊𑄥𑄴𑄥𑄬𑄤 𑄚𑄨𑄡𑄴𑄡𑄧𑄖𑄬𑄚𑄴𑄖𑄨. 𑄖𑄖𑄮 𑄥𑄋𑄴𑄊𑄮 𑄛𑄐𑄴𑄌𑄋𑄴𑄉𑄥𑄟𑄚𑄴𑄚𑄧𑄉𑄖𑄁 𑄞𑄨𑄇𑄴𑄈𑄪𑄁 𑄥𑄣𑄧𑄇𑄉𑄴𑄉𑄧𑄦𑄇𑄁 𑄥𑄟𑄴𑄟𑄚𑄴𑄚𑄨𑄖𑄴𑄤𑄧 𑄖𑄬𑄚 𑄉𑄪𑅄𑄴𑄦𑄇𑄤𑄨𑄤𑄑𑄇𑄥𑄇𑄕𑄴𑄕𑄎𑄛𑄴𑄛𑄇𑄬𑄥𑄪 𑄖𑄩𑄥𑄪 𑄥𑄣𑄧𑄇𑄉𑄴𑄉𑄧𑄦𑄬𑄥𑄪 𑄃𑄐𑄴𑄐𑄖𑄢𑄤𑄥𑄬𑄚 𑄥𑄣𑄧𑄇𑄁 𑄉𑄧𑄦𑄬𑄖𑄴𑄤𑄧 𑄥𑄚𑄴𑄚𑄨𑄛𑄖𑄨𑄖𑄛𑄢𑄨𑄥𑄧𑄡 𑄙𑄟𑄴𑄟𑄤𑄧𑄘𑄩𑄚𑄁 𑄡𑄬𑄞𑄪𑄡𑄴𑄡𑄖𑄧𑄡 𑄡𑄗𑄧 𑄖𑄬 𑄙𑄟𑄴𑄟𑄤𑄧𑄘𑄨𑄚𑄮 𑄤𑄘𑄚𑄴𑄖𑄨, 𑄆𑄤𑄁 𑄤𑄫𑄛𑄥𑄚𑄴𑄖𑄁 𑄃𑄙𑄨𑄇𑄢𑄕𑄁 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄡𑄬𑄞𑄪𑄡𑄴𑄡𑄥𑄨𑄇𑄧𑄡 𑄌 𑄤𑄫𑄛𑄥𑄚𑄴𑄖𑄁 𑄦𑄮𑄖𑄨. 𑄖𑄖𑄴𑄗 𑄥𑄟𑄴𑄟𑄪𑄈𑄧𑄤𑄨𑄚𑄡𑄮 𑄤𑄪𑄖𑄴𑄖𑄚𑄡𑄮 𑄆𑄤. 𑄡𑄁 𑄛𑄚 𑄡𑄬𑄞𑄪𑄡𑄴𑄡𑄥𑄨𑄇𑄧𑄡 𑄇𑄟𑄴𑄟𑄥𑄴𑄥 𑄇𑄢𑄕𑄁, 𑄃𑄡𑄁 𑄡𑄬𑄞𑄪𑄡𑄴𑄡𑄥𑄨𑄇𑄧 𑄚𑄧𑄟. 𑄆𑄤𑄁 𑄤𑄨𑄤𑄧𑄘𑄧𑄙𑄨𑄇𑄢𑄕𑄁 𑄘𑄴𑄤𑄩𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨.

𑄃𑄚𑄪𑄤𑄧𑄘𑄧𑄙𑄨𑄇𑄢𑄕𑄁 𑄌𑄖𑄫𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄥𑄖𑄨𑄤𑄨𑄚𑄡𑄬𑄚 𑄌 𑄃𑄟𑄫𑅄𑄴𑄦𑄤𑄨𑄚𑄡𑄬𑄚 𑄌 𑄖𑄥𑄴𑄥𑄛𑄧𑄛𑄨𑄡𑄥𑄨𑄇𑄧𑄡 𑄌. 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚𑄬𑄤 𑄥𑄟𑄴𑄟𑄟𑄧𑄚𑄁 𑄡𑄮 𑄌 𑄃𑄚𑄪𑄤𑄘𑄖𑄨, 𑄡𑄐𑄴𑄌 𑄃𑄚𑄪𑄤𑄘𑄖𑄨, 𑄖𑄬𑄥𑄁 𑄤𑄌𑄚𑄁 𑄥𑄪𑄖𑄴𑄤𑄧, 𑄥𑄌𑄬 𑄇𑄧𑄌𑄨 𑄃𑄂𑄛𑄖𑄴𑄖𑄨 𑄚𑄖𑄴𑄗𑄨, 𑄅𑄞𑄮 𑄈𑄟𑄧𑄛𑄬𑄖𑄴𑄤𑄧, 𑄥𑄌𑄬 𑄃𑄖𑄴𑄗𑄨, 𑄃𑄡𑄁 𑄚𑄧𑄟𑄬𑄖𑄴𑄗 𑄃𑄂𑄛𑄖𑄴𑄖𑄩𑄖𑄨 𑄆𑄤𑄁 𑄤𑄨𑄚𑄨𑄌𑄴𑄍𑄨𑄖𑄁 𑄤𑄫𑄛𑄥𑄟𑄴𑄟𑄖𑄨. 𑄖𑄖𑄴𑄗 𑄥𑄟𑄴𑄟𑄪𑄈𑄧𑄤𑄨𑄚𑄡𑄣𑄇𑄴𑄈𑄕𑄁 𑄤𑄪𑄖𑄴𑄖𑄚𑄡𑄟𑄬𑄤.

𑄡𑄘𑄧 𑄛𑄚 𑄈𑄩𑄕𑄧𑄥𑄤𑄥𑄴𑄥 𑄞𑄨𑄇𑄴𑄈𑄪𑄚𑄮 𑄃𑄟𑄫𑄣𑄨𑄇𑄧𑄡 𑄥𑄩𑄣𑄤𑄨𑄛𑄖𑄴𑄖𑄨𑄡𑄧 𑄃𑄚𑄪𑄘𑄴𑄙𑄁𑄥𑄨𑄖𑄥𑄴𑄥 𑄥𑄖𑄨𑄤𑄨𑄚𑄡𑄁 𑄡𑄧𑄌𑄟𑄧𑄚𑄥𑄴𑄥 𑄥𑄋𑄴𑄊𑄮 𑄐𑄖𑄴𑄖𑄨𑄌𑄖𑄪𑄖𑄴𑄗𑄬𑄚 𑄇𑄟𑄴𑄟𑄬𑄚 𑄥𑄖𑄨𑄤𑄨𑄚𑄡𑄁 𑄘𑄬𑄖𑄨, 𑄖𑄘𑄧 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄥𑄖𑄨𑄤𑄨𑄚𑄡𑄬𑄚 𑄌 𑄤𑄫𑄛𑄥𑄚𑄴𑄖𑄁 𑄦𑄮𑄖𑄨. 𑄘𑄨𑄚𑄴𑄚𑄬 𑄛𑄚 𑄥𑄖𑄨𑄤𑄨𑄚𑄡𑄬 𑄛𑄪𑄚 𑄖𑄥𑄴𑄟𑄨𑄁 𑄛𑄪𑄉𑄴𑄉𑄣𑄬 𑄇𑄥𑄴𑄥𑄌𑄨 𑄃𑄚𑄪𑄤𑄧𑄘𑄮 𑄚 𑄢𑄪𑄦𑄖𑄨.

𑄡𑄘𑄧 𑄅𑄟𑄴𑄟𑄖𑄴𑄖𑄇𑄮 𑄞𑄨𑄇𑄴𑄈𑄪 𑄅𑄟𑄴𑄟𑄧𑄘𑄤𑄥𑄬𑄚 𑄇𑄖𑄬 𑄃𑄥𑄴𑄥𑄧𑄟𑄕𑄇𑄬 𑄃𑄎𑄴𑄏𑄧𑄌𑄧𑄢𑄬 ‘‘𑄥𑄢𑄖𑄧𑄡𑄥𑄴𑄟𑄧 𑄆𑄤𑄢𑄫𑄛𑄨𑄁 𑄃𑄂𑄛𑄖𑄴𑄖𑄨’’𑄚𑄴𑄖𑄨 𑄞𑄨𑄇𑄴𑄈𑄫𑄦𑄨 𑄤𑄪𑄌𑄴𑄌𑄟𑄧𑄚𑄮 – ‘‘𑄅𑄟𑄴𑄟𑄖𑄴𑄖𑄇𑄬𑄚 𑄟𑄬, 𑄃𑄂𑄤𑄪𑄥𑄮, 𑄆𑄖𑄁 𑄇𑄖𑄁, 𑄚𑄧𑄦𑄁 𑄖𑄁 𑄥𑄢𑄧𑄟𑄩’’𑄖𑄨 𑄞𑄕𑄚𑄴𑄖𑄮𑄛𑄨 𑄞𑄨𑄇𑄴𑄈𑄫𑄦𑄨 𑄌𑄮𑄘𑄨𑄡𑄟𑄧𑄚𑄮𑄤 𑄛𑄪𑄚 𑄃𑄌𑄮𑄘𑄚𑄖𑄴𑄗𑄧𑄡 𑄃𑄟𑄫𑅄𑄴𑄦𑄤𑄨𑄚𑄡𑄁 𑄡𑄧𑄌𑄖𑄨, 𑄥𑄋𑄴𑄊𑄮 𑄌𑄥𑄴𑄥 𑄐𑄖𑄴𑄖𑄨𑄌𑄖𑄪𑄖𑄴𑄗𑄬𑄚 𑄇𑄟𑄴𑄟𑄬𑄚 𑄃𑄟𑄫𑅄𑄴𑄦𑄤𑄨𑄚𑄡𑄁 𑄘𑄬𑄖𑄨, 𑄖𑄘𑄧 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄃𑄟𑄫𑅄𑄴𑄦𑄤𑄨𑄚𑄡𑄬𑄚 𑄌 𑄤𑄫𑄛𑄥𑄚𑄴𑄖𑄁 𑄦𑄮𑄖𑄨. 𑄘𑄨𑄚𑄴𑄚𑄬 𑄛𑄚 𑄃𑄟𑄫𑅄𑄴𑄦𑄤𑄨𑄚𑄡𑄬 𑄛𑄪𑄚 𑄖𑄥𑄴𑄟𑄨𑄁 𑄛𑄪𑄉𑄴𑄉𑄣𑄬 𑄇𑄥𑄴𑄥𑄌𑄨 𑄖𑄛𑄴𑄛𑄌𑄴𑄌𑄡𑄧 𑄃𑄚𑄪𑄤𑄧𑄘𑄮 𑄚 𑄢𑄪𑄦𑄖𑄨.

𑄡𑄘𑄧 𑄛𑄚 𑄛𑄧𑄢𑄧𑄎𑄨𑄇𑄬𑄚 𑄤𑄧 𑄛𑄧𑄢𑄧𑄎𑄨𑄇𑄥𑄧𑄟𑄚𑄴𑄖𑄬𑄚 𑄤𑄧 𑄌𑄮𑄘𑄨𑄡𑄟𑄧𑄚𑄥𑄴𑄥 𑄃𑄐𑄴𑄐𑄬𑄚𑄧𑄐𑄴𑄐𑄁 𑄛𑄑𑄨𑄌𑄢𑄖𑄮 𑄛𑄧𑄛𑄪𑄥𑄴𑄥𑄚𑄴𑄚𑄖𑄧𑄡 𑄛𑄧𑄛𑄨𑄡𑄥𑄴𑄥 𑄛𑄪𑄉𑄴𑄉𑄣𑄥𑄴𑄥 – ‘‘𑄥𑄌𑄧𑄡𑄁 𑄃𑄌𑄴𑄍𑄨𑄚𑄴𑄚𑄟𑄫𑄣𑄮 𑄞𑄤𑄨𑄥𑄴𑄥𑄖𑄨, 𑄥𑄟𑄴𑄟𑄧 𑄤𑄖𑄴𑄖𑄨𑄖𑄴𑄤𑄧 𑄃𑄮𑄥𑄧𑄢𑄕𑄁 𑄣𑄞𑄨𑄥𑄴𑄥𑄖𑄨, 𑄥𑄌𑄬 𑄍𑄨𑄚𑄴𑄚𑄟𑄫𑄣𑄮, 𑄃𑄡𑄟𑄬𑄤𑄥𑄴𑄥 𑄚𑄧𑄥𑄚𑄧 𑄞𑄤𑄨𑄥𑄴𑄥𑄖𑄩’’𑄖𑄨 𑄟𑄐𑄴𑄐𑄟𑄧𑄚𑄮 𑄥𑄋𑄴𑄊𑄮 𑄐𑄖𑄴𑄖𑄨𑄌𑄖𑄪𑄖𑄴𑄗𑄬𑄚 𑄇𑄟𑄴𑄟𑄬𑄚 𑄖𑄥𑄴𑄥𑄛𑄧𑄛𑄨𑄡𑄥𑄨𑄇𑄁 𑄇𑄢𑄮𑄖𑄨, 𑄖𑄘𑄧 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄖𑄥𑄴𑄥 𑄛𑄧𑄛𑄨𑄡𑄥𑄨𑄇𑄧𑄡 𑄌 𑄤𑄫𑄛𑄥𑄚𑄴𑄖𑄁 𑄦𑄮𑄖𑄨. 𑄆𑄤𑄁 𑄃𑄚𑄪𑄤𑄧𑄘𑄧𑄙𑄨𑄇𑄢𑄕𑄁 𑄌𑄖𑄫𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨.

𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄁 𑄖𑄩𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄛𑄑𑄨𑄐𑄴𑄐𑄧𑄖𑄇𑄢𑄕𑄬𑄚 𑄌 𑄖𑄨𑄕𑄤𑄖𑄴𑄗𑄧𑄢𑄇𑄬𑄚 𑄌. 𑄖𑄥𑄴𑄥 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚𑄬𑄤 𑄤𑄫𑄛𑄥𑄟𑄮 𑄚𑄖𑄴𑄗𑄨. 𑄡𑄘𑄧 𑄛𑄚 𑄆𑄇𑄥𑄴𑄥 𑄤𑄧 𑄞𑄨𑄇𑄴𑄈𑄪𑄚𑄮 𑄥𑄚𑄴𑄖𑄨𑄇𑄬 𑄥𑄋𑄴𑄊𑄉𑄕𑄟𑄎𑄴𑄏𑄬𑄥𑄪 𑄤𑄧 𑄞𑄨𑄇𑄴𑄈𑄪 𑄣𑄦𑄪𑄇𑄁 𑄃𑄂𑄛𑄖𑄴𑄖𑄨𑄁 𑄘𑄬𑄥𑄬𑄖𑄨, 𑄖𑄘𑄧 𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄁 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄛𑄑𑄨𑄐𑄴𑄐𑄧𑄖𑄇𑄢𑄕𑄬𑄚 𑄌 𑄤𑄫𑄛𑄥𑄟𑄴𑄟𑄖𑄨. 𑄖𑄖𑄴𑄗 𑄥𑄟𑄴𑄟𑄪𑄈𑄧𑄤𑄨𑄚𑄡𑄮 𑄖𑄧𑄤 𑄡𑄮 𑄌 𑄘𑄬𑄥𑄬𑄖𑄨, 𑄡𑄥𑄴𑄥 𑄌 𑄘𑄬𑄥𑄬𑄖𑄨, 𑄖𑄬𑄥𑄁 𑄥𑄟𑄴𑄟𑄪𑄈𑄖𑄧. 𑄥𑄬𑄥𑄁 𑄤𑄪𑄖𑄴𑄖𑄚𑄡𑄟𑄬𑄤. 𑄛𑄪𑄉𑄴𑄉𑄣𑄥𑄴𑄥 𑄌 𑄉𑄕𑄥𑄴𑄥 𑄌 𑄘𑄬𑄥𑄚𑄧𑄇𑄧𑄣𑄬 𑄥𑄋𑄴𑄊𑄥𑄟𑄴𑄟𑄪𑄈𑄖𑄧 𑄛𑄢𑄨𑄦𑄧𑄡𑄖𑄨. 𑄡𑄁 𑄛𑄚𑄬𑄖𑄴𑄗 ‘‘𑄃𑄦𑄁, 𑄞𑄚𑄴𑄖𑄬, 𑄄𑄖𑄴𑄗𑄚𑄴𑄚𑄧𑄟𑄁 𑄃𑄂𑄛𑄖𑄴𑄖𑄨𑄁 𑄃𑄛𑄚𑄴𑄚𑄮’’𑄖𑄨 𑄌, 𑄃𑄂𑄟 ‘‘𑄛𑄥𑄴𑄥𑄧𑄟𑄩’’𑄖𑄨 𑄌 𑄛𑄑𑄨𑄐𑄴𑄐𑄧𑄖𑄧𑄡 ‘‘𑄃𑄂𑄡𑄖𑄨𑄁 𑄥𑄁𑄤𑄢𑄬𑄡𑄴𑄡𑄧𑄥𑄩’’𑄖𑄨 𑄇𑄢𑄕𑄁, 𑄖𑄁 𑄛𑄑𑄨𑄐𑄴𑄐𑄧𑄖𑄇𑄢𑄕𑄁 𑄚𑄧𑄟. 𑄥𑄋𑄴𑄊𑄧𑄘𑄨𑄥𑄬𑄥𑄬 𑄛𑄢𑄨𑄤𑄧𑄥𑄧𑄘𑄨𑄡𑄧𑄌𑄚𑄧 𑄛𑄑𑄨𑄐𑄴𑄐𑄧, 𑄛𑄢𑄨𑄤𑄧𑄥𑄧𑄘𑄩𑄚𑄁 𑄘𑄧𑄚𑄁 𑄛𑄑𑄨𑄐𑄴𑄐𑄧𑄖𑄇𑄢𑄕𑄁 𑄚𑄧𑄟.

𑄘𑄴𑄤𑄬𑄛𑄇𑄴𑄈𑄎𑄧𑄖𑄧 𑄛𑄚 𑄞𑄕𑄴𑄓𑄚𑄇𑄧𑄢𑄇𑄧 𑄞𑄨𑄇𑄴𑄈𑄫 𑄝𑄦𑄪𑄁 𑄃𑄥𑄴𑄥𑄧𑄟𑄕𑄇𑄁 𑄃𑄎𑄴𑄏𑄧𑄌𑄧𑄢𑄁 𑄌𑄢𑄨𑄖𑄴𑄤𑄧 𑄛𑄪𑄚 𑄣𑄎𑄴𑄎𑄨𑄙𑄟𑄴𑄟𑄬 𑄅𑄛𑄴𑄛𑄚𑄴𑄚𑄬 ‘‘𑄥𑄌𑄬 𑄟𑄡𑄁 𑄄𑄟𑄧𑄦𑄨 𑄃𑄂𑄛𑄖𑄴𑄖𑄩𑄦𑄨 𑄃𑄐𑄴𑄐𑄟𑄐𑄴𑄐𑄁 𑄇𑄧𑄢𑄬𑄥𑄴𑄥𑄧𑄟, 𑄥𑄨𑄡𑄧𑄛𑄨 𑄖𑄁 𑄃𑄙𑄨𑄇𑄢𑄕𑄁 𑄇𑄇𑄴𑄈𑅄𑄖𑄴𑄖𑄧𑄡 𑄥𑄁𑄤𑄖𑄴𑄖𑄬𑄡𑄴𑄡𑄧’’𑄖𑄨 𑄃𑄐𑄴𑄐𑄟𑄐𑄴𑄐𑄁 𑄃𑄂𑄛𑄖𑄴𑄖𑄨𑄡𑄧 𑄇𑄧𑄢𑄧𑄛𑄚𑄬 𑄘𑄮𑄥𑄁 𑄘𑄨𑄥𑄴𑄤𑄧 𑄡𑄘𑄧 𑄖𑄨𑄕𑄤𑄖𑄴𑄗𑄧𑄢𑄇𑄇𑄟𑄴𑄟𑄁 𑄇𑄢𑄮𑄚𑄴𑄖𑄨, 𑄖𑄘𑄧 𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄁 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄖𑄨𑄕𑄤𑄖𑄴𑄗𑄧𑄢𑄇𑄬𑄚 𑄌 𑄥𑄟𑄴𑄟𑄖𑄨. 𑄖𑄖𑄴𑄢 𑄦𑄨 𑄡𑄖𑄴𑄖𑄇𑄧 𑄦𑄖𑄴𑄗𑄛𑄧𑄥𑄪𑄛𑄉𑄖𑄧 ‘‘𑄚 𑄟𑄬 𑄖𑄁 𑄈𑄟𑄖𑄩’’𑄖𑄨 𑄆𑄤𑄁 𑄘𑄨𑄑𑄴𑄒𑄧𑄤𑄨𑄇𑄟𑄴𑄟𑄁 𑄃𑄇𑄖𑄴𑄤𑄧 ‘‘𑄘𑄪𑄇𑄴𑄇𑄑𑄁 𑄇𑄟𑄴𑄟𑄁 𑄛𑄪𑄚 𑄇𑄧𑄖𑄝𑄴𑄝𑄁 𑄇𑄟𑄴𑄟’’𑄚𑄴𑄖𑄨 𑄚 𑄅𑄇𑄴𑄇𑄮𑄑𑄬𑄚𑄴𑄖𑄨, 𑄚𑄨𑄘𑄴𑄘𑄟𑄴𑄛𑄨 𑄃𑄮𑄇𑄴𑄇𑄚𑄴𑄖𑄧 𑄦𑄮𑄚𑄴𑄖𑄨, 𑄥𑄝𑄴𑄝𑄬𑄥𑄟𑄴𑄛𑄨 𑄒𑄛𑄬𑄖𑄴𑄤𑄧 𑄗𑄪𑄣𑄴𑄣𑄤𑄎𑄴𑄎𑄐𑄴𑄌 𑄉𑄨𑄦𑄨𑄛𑄑𑄨𑄥𑄁𑄡𑄪𑄖𑄴𑄖𑄐𑄴𑄌 𑄥𑄝𑄴𑄝𑄧𑄛𑄖𑄴𑄖𑄨𑄡𑄮 𑄤𑄪𑄑𑄴𑄒𑄦𑄚𑄴𑄖𑄨. 𑄆𑄤𑄁 𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄁 𑄖𑄩𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨. 𑄇𑄨𑄌𑄴𑄌𑄧𑄙𑄨𑄇𑄢𑄕𑄁 𑄆𑄇𑄬𑄚 𑄥𑄟𑄗𑄬𑄚 𑄥𑄟𑄴𑄟𑄖𑄨 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚𑄬𑄤.

𑄄𑄟𑄧𑄚𑄨 𑄌𑄖𑄴𑄖𑄧𑄢𑄨 𑄃𑄙𑄨𑄇𑄢𑄕𑄧𑄚𑄨 𑄡𑄗𑄧𑄚𑄪𑄢𑄫𑄛𑄁 𑄄𑄟𑄬𑄦𑄨 𑄥𑄖𑄴𑄖𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄚𑄴𑄖𑄨. 𑄖𑄬𑄚 𑄤𑄪𑄖𑄴𑄖𑄁 ‘‘𑄅𑄛𑄴𑄛𑄚𑄴𑄚𑄪𑄛𑄴𑄛𑄚𑄴𑄚𑄧𑄚𑄁 𑄃𑄙𑄨𑄇𑄢𑄕𑄧𑄚𑄁 𑄥𑄟𑄗𑄧𑄡 𑄤𑄫𑄛𑄥𑄟𑄧𑄡 𑄥𑄟𑄴𑄟𑄪𑄈𑄧𑄤𑄨𑄚𑄡𑄮 𑄘𑄧𑄖𑄝𑄴𑄝𑄮…𑄛𑄬… 𑄖𑄨𑄕𑄤𑄖𑄴𑄗𑄧𑄢𑄇𑄮’’𑄖𑄨. 𑄃𑄡𑄟𑄬𑄖𑄴𑄗 𑄤𑄨𑄚𑄨𑄌𑄴𑄍𑄡𑄚𑄡𑄮, 𑄤𑄨𑄖𑄴𑄗𑄧𑄢𑄮 𑄛𑄚 𑄥𑄟𑄗𑄇𑄴𑄈𑄚𑄴𑄙𑄇𑄬 (𑄌𑄫𑅄𑄤. 𑄷𑄾𑄻) 𑄃𑄂𑄉𑄖𑄮𑄡𑄬𑄤. 𑄤𑄨𑄚𑄨𑄌𑄴𑄍𑄡𑄮𑄛𑄨𑄥𑄴𑄥 𑄥𑄟𑄚𑄴𑄖𑄛𑄧𑄥𑄧𑄘𑄨𑄇𑄧𑄡 𑄤𑄪𑄖𑄴𑄖𑄮.

𑄺𑄽. 𑄡𑄮 𑄛𑄚𑄧𑄡𑄁 𑄄𑄟𑄥𑄴𑄟𑄨𑄁 𑄥𑄪𑄖𑄴𑄖𑄬 ‘‘𑄄𑄙𑄧𑄚𑄚𑄴𑄘, 𑄞𑄨𑄇𑄴𑄈𑄫 𑄤𑄨𑄤𑄘𑄚𑄴𑄖𑄩’’𑄖𑄨𑄃𑄂𑄘𑄨𑄇𑄮 𑄤𑄨𑄖𑄴𑄗𑄧𑄢𑄮 𑄤𑄪𑄖𑄴𑄖𑄮, 𑄥𑄮 𑄆𑄖𑄬𑄚 𑄚𑄡𑄬𑄚 𑄥𑄋𑄴𑄈𑄬𑄛𑄖𑄮𑄤 𑄤𑄪𑄖𑄴𑄖𑄮𑄖𑄨 𑄤𑄬𑄘𑄨𑄖𑄝𑄴𑄝𑄮. 𑄖𑄖𑄴𑄗 𑄙𑄟𑄴𑄟𑄮𑄖𑄨𑄃𑄂𑄘𑄩𑄥𑄪 𑄥𑄪𑄖𑄴𑄖𑄚𑄴𑄖𑄛𑄢𑄨𑄡𑄧𑄡𑄬𑄚 𑄖𑄧𑄤 𑄘𑄥 𑄇𑄪𑄥𑄣𑄇𑄟𑄴𑄟𑄛𑄗𑄧 𑄙𑄟𑄴𑄟𑄮, 𑄃𑄇𑄪𑄥𑄣𑄇𑄟𑄴𑄟𑄛𑄗𑄧 𑄃𑄙𑄟𑄴𑄟𑄮. 𑄖𑄗𑄧 ‘‘𑄌𑄖𑄴𑄖𑄧𑄢𑄮 𑄥𑄖𑄨𑄛𑄑𑄴𑄒𑄧𑄚𑄧’’𑄖𑄨 𑄦𑄬𑄑𑄴𑄒𑄧 𑄃𑄂𑄉𑄖𑄧 𑄥𑄖𑄴𑄖𑄖𑄨𑄁𑄥 𑄝𑄮𑄙𑄨𑄛𑄇𑄴𑄈𑄨𑄡𑄙𑄟𑄴𑄟𑄧, 𑄖𑄡𑄮 𑄥𑄖𑄨𑄛𑄑𑄴𑄒𑄧𑄚𑄧 𑄖𑄡𑄮 𑄥𑄟𑄴𑄟𑄛𑄴𑄛𑄙𑄧𑄚𑄧 𑄖𑄡𑄮 𑄄𑄘𑄴𑄙𑄨𑄛𑄧𑄘𑄧 𑄍 𑄄𑄚𑄴𑄘𑄴𑄢𑄨𑄡𑄧𑄚𑄨 𑄍 𑄝𑄣𑄧𑄚𑄨 𑄃𑄑𑄴𑄒 𑄝𑄮𑄎𑄴𑄏𑄋𑄴𑄉𑄧 𑄚𑄤𑄋𑄴𑄉𑄨𑄇𑄮 𑄟𑄉𑄴𑄉𑄮 𑄌𑄧𑄖𑄨, 𑄌𑄖𑄴𑄖𑄧𑄢𑄮 𑄅𑄛𑄧𑄘𑄧𑄚𑄧 𑄛𑄐𑄴𑄌 𑄚𑄩𑄤𑄢𑄕𑄧𑄚𑄩𑄖𑄨𑄃𑄂𑄘𑄡𑄮 𑄥𑄋𑄴𑄇𑄣𑄨𑄑𑄴𑄒𑄙𑄟𑄴𑄟𑄧 𑄌𑄧𑄖𑄨 𑄃𑄡𑄁 𑄃𑄙𑄟𑄴𑄟𑄮.

𑄖𑄖𑄴𑄗 𑄡𑄁𑄇𑄨𑄐𑄴𑄌𑄨 𑄆𑄇𑄁 𑄃𑄙𑄟𑄴𑄟𑄇𑄮𑄑𑄴𑄒𑄧𑄥𑄁 𑄉𑄦𑄬𑄖𑄴𑄤𑄧 ‘‘𑄄𑄟𑄁 𑄃𑄙𑄟𑄴𑄟𑄁 𑄙𑄟𑄴𑄟𑄮𑄖𑄨 𑄇𑄢𑄨𑄥𑄴𑄥𑄧𑄟, 𑄆𑄤𑄁 𑄃𑄟𑄴𑄦𑄧𑄇𑄁 𑄃𑄂𑄌𑄢𑄨𑄡𑄇𑄪𑄣𑄁 𑄚𑄨𑄡𑄴𑄡𑄧𑄚𑄨𑄇𑄁 𑄞𑄤𑄨𑄥𑄴𑄥𑄖𑄨, 𑄟𑄡𑄐𑄴𑄌 𑄣𑄮𑄇𑄬 𑄛𑄧𑄇𑄑𑄧 𑄞𑄤𑄨𑄥𑄴𑄥𑄧𑄟𑄧’’𑄖𑄨 𑄖𑄁 𑄃𑄙𑄟𑄴𑄟𑄁 ‘‘𑄙𑄟𑄴𑄟𑄮 𑄃𑄡’’𑄚𑄴𑄖𑄨 𑄇𑄗𑄬𑄚𑄴𑄖𑄧 𑄙𑄟𑄴𑄟𑄮𑄖𑄨 𑄤𑄨𑄤𑄘𑄚𑄴𑄖𑄨. 𑄖𑄖𑄴𑄗𑄬𑄤 𑄙𑄟𑄴𑄟𑄇𑄮𑄑𑄴𑄒𑄧𑄥𑄬𑄥𑄪 𑄆𑄇𑄁 𑄉𑄦𑄬𑄖𑄴𑄤𑄧 ‘‘𑄃𑄙𑄟𑄴𑄟𑄮 𑄃𑄡’’𑄚𑄴𑄖𑄨 𑄇𑄗𑄬𑄚𑄴𑄖𑄧 𑄃𑄙𑄟𑄴𑄟𑄮𑄖𑄨 𑄤𑄨𑄤𑄘𑄚𑄴𑄖𑄨.

𑄤𑄨𑄚𑄡𑄛𑄢𑄨𑄡𑄧𑄡𑄬𑄚 𑄛𑄚 𑄞𑄫𑄖𑄬𑄚 𑄤𑄖𑄴𑄗𑄪𑄚𑄧 𑄌𑄮𑄘𑄬𑄖𑄴𑄤𑄧 𑄥𑄧𑄢𑄬𑄖𑄴𑄤𑄧 𑄡𑄗𑄧𑄛𑄑𑄨𑄐𑄴𑄐𑄧𑄡 𑄇𑄧𑄖𑄝𑄴𑄝𑄇𑄟𑄴𑄟𑄁 𑄙𑄟𑄴𑄟𑄮 𑄚𑄧𑄟, 𑄃𑄞𑄫𑄖𑄬𑄚 𑄛𑄚 𑄤𑄖𑄴𑄗𑄪𑄚𑄧 𑄃𑄌𑄮𑄘𑄬𑄖𑄴𑄤𑄧 𑄃𑄥𑄧𑄢𑄬𑄖𑄴𑄤𑄧 𑄃𑄛𑄑𑄨𑄐𑄴𑄐𑄧𑄡 𑄇𑄖𑄝𑄴𑄝𑄇𑄟𑄴𑄟𑄁 𑄃𑄙𑄟𑄴𑄟𑄮 𑄚𑄧𑄟. 𑄖𑄬𑄥𑄪𑄛𑄨 𑄃𑄙𑄟𑄴𑄟𑄁 ‘‘𑄙𑄟𑄴𑄟𑄮 𑄃𑄡’’𑄚𑄴𑄖𑄨 𑄇𑄗𑄬𑄚𑄴𑄖𑄧 𑄙𑄟𑄴𑄟𑄮𑄖𑄨 𑄤𑄨𑄤𑄘𑄚𑄴𑄖𑄨, ‘‘𑄃𑄙𑄟𑄴𑄟𑄮 𑄃𑄡’’𑄚𑄴𑄖𑄨 𑄇𑄗𑄬𑄚𑄴𑄖𑄧 𑄃𑄙𑄟𑄴𑄟𑄮𑄖𑄨 𑄤𑄨𑄤𑄘𑄚𑄴𑄖𑄨.

𑄥𑄪𑄖𑄴𑄖𑄚𑄴𑄖𑄛𑄢𑄨𑄡𑄧𑄡𑄬𑄚 𑄛𑄚 𑄢𑄧𑄉𑄤𑄨𑄚𑄡𑄮 𑄘𑄮𑄥𑄤𑄨𑄚𑄡𑄮 𑄟𑄮𑄦𑄤𑄨𑄚𑄡𑄮 𑄥𑄁𑄤𑄢𑄮 𑄛𑄦𑄧𑄚𑄁 𑄛𑄑𑄨𑄥𑄋𑄴𑄈𑄧𑄖𑄨 𑄃𑄡𑄁 𑄤𑄨𑄚𑄡𑄮 𑄚𑄧𑄟, 𑄢𑄧𑄉𑄧𑄘𑄩𑄚𑄁 𑄃𑄤𑄨𑄚𑄡𑄮 𑄃𑄥𑄁𑄤𑄢𑄮 𑄃𑄛𑄴𑄛𑄦𑄧𑄚𑄁 𑄃𑄛𑄴𑄛𑄑𑄨𑄥𑄋𑄴𑄈𑄧𑄖𑄨 𑄃𑄡𑄁 𑄃𑄤𑄨𑄚𑄡𑄮 𑄚𑄧𑄟. 𑄤𑄨𑄚𑄡𑄛𑄢𑄨𑄡𑄧𑄡𑄬𑄚 𑄤𑄖𑄴𑄗𑄪𑄥𑄟𑄴𑄛𑄖𑄴𑄖𑄨 𑄐𑄖𑄴𑄖𑄨𑄥𑄟𑄴𑄛𑄖𑄴𑄖𑄨 𑄃𑄚𑄪𑄥𑄧𑄤𑄚𑄥𑄟𑄴𑄛𑄖𑄴𑄖𑄨 𑄥𑄩𑄟𑄥𑄟𑄴𑄛𑄖𑄨 𑄛𑄢𑄨𑄥𑄥𑄟𑄴𑄛𑄖𑄴𑄖𑄩𑄖𑄨 𑄃𑄡𑄁 𑄤𑄨𑄚𑄡𑄮 𑄚𑄧𑄟, 𑄤𑄖𑄴𑄗𑄪𑄤𑄨𑄛𑄖𑄴𑄖𑄨…𑄛𑄬… 𑄛𑄢𑄨𑄥𑄤𑄨𑄛𑄖𑄴𑄖𑄩𑄖𑄨 𑄃𑄡𑄁 𑄃𑄤𑄨𑄚𑄡𑄮 𑄚𑄧𑄟. 𑄖𑄬𑄥𑄪𑄛𑄨 𑄡𑄁𑄇𑄨𑄐𑄴𑄌𑄨 𑄃𑄤𑄨𑄚𑄡𑄁 ‘‘𑄤𑄨𑄚𑄡𑄮 𑄃𑄡’’𑄚𑄴𑄖𑄨 𑄇𑄗𑄬𑄚𑄴𑄖𑄧 𑄤𑄨𑄚𑄡𑄮𑄖𑄨 𑄤𑄨𑄤𑄘𑄚𑄴𑄖𑄨, 𑄤𑄨𑄚𑄡𑄁 𑄃𑄤𑄨𑄚𑄡𑄮𑄖𑄨 𑄇𑄗𑄬𑄚𑄴𑄖𑄧 𑄃𑄤𑄨𑄚𑄡𑄮𑄖𑄨 𑄤𑄨𑄤𑄘𑄚𑄴𑄖𑄨.

𑄙𑄟𑄴𑄟𑄚𑄬𑄖𑄴𑄖𑄨 𑄥𑄟𑄚𑄪𑄟𑄎𑄴𑄎𑄨𑄖𑄝𑄴𑄝𑄧𑄖𑄨 𑄙𑄟𑄴𑄟𑄢𑄎𑄴𑄎𑄪 𑄃𑄚𑄪𑄟𑄎𑄴𑄎𑄨𑄖𑄝𑄴𑄝𑄧 𑄐𑄧𑄕𑄬𑄚 𑄊𑄁𑄥𑄨𑄖𑄝𑄴𑄝𑄧 𑄅𑄛𑄛𑄢𑄨𑄇𑄴𑄈𑄨𑄖𑄝𑄴𑄝𑄧. 𑄥𑄧 𑄛𑄚𑄬𑄥𑄧 𑄙𑄟𑄴𑄟𑄚𑄬𑄖𑄴𑄖𑄨 ‘‘𑄄𑄖𑄨 𑄈𑄮 𑄤𑄌𑄴𑄍 𑄄𑄟𑄬 𑄘𑄥 𑄙𑄟𑄴𑄟𑄧 𑄃𑄇𑄪𑄥𑄣𑄧 𑄘𑄥 𑄙𑄟𑄴𑄟𑄧 𑄇𑄪𑄥𑄣𑄧’’𑄖𑄨 𑄆𑄤𑄁 𑄟𑄦𑄧𑄤𑄌𑄴𑄍𑄉𑄮𑄖𑄴𑄖𑄥𑄪𑄖𑄴𑄖𑄬 (𑄟. 𑄚𑄨. 𑄸.𑄷𑄿𑄺) 𑄃𑄂𑄉𑄖𑄧𑄖𑄨 𑄤𑄪𑄖𑄴𑄖𑄧. 𑄥𑄧 𑄆𑄤 𑄤𑄧 𑄦𑄮𑄖𑄪, 𑄡𑄮 𑄤𑄧 𑄄𑄙 𑄙𑄟𑄴𑄟𑄮𑄖𑄨 𑄌 𑄤𑄨𑄚𑄡𑄮 𑄌 𑄤𑄪𑄖𑄴𑄖𑄮. 𑄡𑄗𑄧 𑄖𑄖𑄴𑄗 𑄥𑄟𑄬𑄖𑄩𑄖𑄨 𑄡𑄗𑄧 𑄖𑄧𑄡 𑄙𑄟𑄴𑄟𑄚𑄬𑄖𑄴𑄖𑄨𑄡𑄧 𑄥𑄟𑄬𑄖𑄨, ‘‘𑄙𑄟𑄴𑄟𑄮 𑄙𑄟𑄴𑄟𑄮𑄤 𑄦𑄮𑄖𑄨, 𑄃𑄙𑄟𑄴𑄟𑄮 𑄃𑄙𑄟𑄴𑄟𑄮𑄤, 𑄤𑄨𑄚𑄡𑄮 𑄤𑄨𑄚𑄡𑄮𑄤 𑄦𑄮𑄖𑄨, 𑄃𑄤𑄨𑄚𑄡𑄮 𑄃𑄤𑄨𑄚𑄡𑄮𑄤’’. 𑄖𑄗𑄧 𑄖𑄚𑄴𑄖𑄨 𑄆𑄤𑄁 𑄖𑄁 𑄃𑄙𑄨𑄇𑄢𑄕𑄁 𑄤𑄫𑄛𑄥𑄟𑄬𑄖𑄝𑄴𑄝𑄁. 𑄆𑄇𑄌𑄴𑄌𑄧𑄚𑄁 𑄃𑄙𑄨𑄇𑄢𑄕𑄧𑄚𑄚𑄴𑄖𑄨 𑄄𑄙 𑄤𑄨𑄤𑄧𑄘𑄧𑄙𑄨𑄇𑄢𑄕𑄟𑄬𑄤 𑄘𑄥𑄴𑄥𑄨𑄖𑄁, 𑄥𑄟𑄴𑄟𑄪𑄈𑄧𑄤𑄨𑄚𑄡𑄮 𑄛𑄚 𑄚 𑄇𑄨𑄥𑄴𑄟𑄨𑄐𑄴𑄌𑄨 𑄃𑄙𑄨𑄇𑄢𑄕𑄬 𑄚 𑄣𑄝𑄴𑄞𑄖𑄨.

𑄺𑄾. 𑄖𑄁 𑄛𑄚𑄬𑄖𑄁 𑄡𑄥𑄴𑄟𑄧 𑄘𑄴𑄤𑄩𑄦𑄨 𑄥𑄟𑄗𑄬𑄦𑄨 𑄥𑄟𑄴𑄟𑄖𑄨 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚 𑄌 𑄡𑄬𑄞𑄪𑄡𑄴𑄡𑄥𑄨𑄇𑄧𑄡 𑄌, 𑄖𑄥𑄴𑄟𑄧 𑄦𑄬𑄑𑄴𑄒𑄧 𑄟𑄧𑄖𑄨𑄇𑄧𑄡 𑄒𑄛𑄨𑄖𑄧𑄚𑄪𑄇𑄴𑄇𑄟𑄬𑄚 𑄄𑄘𑄧𑄚𑄨 𑄥𑄖𑄨𑄤𑄨𑄚𑄡𑄥𑄴𑄥 𑄤𑄧𑄢𑄬 𑄛𑄖𑄴𑄖𑄬𑄛𑄨 𑄖𑄁 𑄃𑄤𑄖𑄴𑄤𑄧 𑄤𑄨𑄤𑄧𑄘𑄧𑄙𑄨𑄇𑄢𑄕𑄡𑄬𑄤 𑄖𑄧𑄤 𑄘𑄪𑄖𑄨𑄡𑄥𑄟𑄗𑄁 𑄘𑄥𑄴𑄥𑄬𑄚𑄴𑄖𑄮 𑄇𑄗𑄐𑄴𑄌𑄧𑄚𑄚𑄴𑄘, 𑄡𑄬𑄞𑄪𑄡𑄴𑄡𑄥𑄨𑄇𑄧𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄝𑄦𑄪𑄖𑄢𑄧𑄖𑄨 𑄃𑄚𑄴𑄖𑄟𑄥𑄮 𑄘𑄴𑄤𑄩𑄦𑄨 𑄖𑄩𑄦𑄨𑄛𑄨 𑄃𑄖𑄨𑄢𑄬𑄇𑄖𑄢𑄧. 𑄥𑄬𑄥𑄟𑄬𑄖𑄴𑄗 𑄦𑄬𑄑𑄴𑄒𑄧 𑄤𑄪𑄖𑄴𑄖𑄚𑄡𑄬𑄚𑄬𑄤 𑄤𑄬𑄘𑄨𑄖𑄝𑄴𑄝𑄁.

𑄺𑄿. 𑄄𑄘𑄧𑄚𑄨 𑄦𑄬𑄑𑄴𑄒𑄧 𑄃𑄤𑄨𑄖𑄴𑄗𑄧𑄢𑄨𑄖𑄁 𑄥𑄖𑄨𑄤𑄨𑄚𑄡𑄁 𑄃𑄂𑄘𑄨𑄁 𑄇𑄖𑄴𑄤𑄧 𑄤𑄨𑄖𑄴𑄗𑄧𑄢𑄨𑄖𑄧𑄤𑄥𑄬𑄥𑄥𑄟𑄗𑄬 𑄛𑄑𑄨𑄛𑄧𑄑𑄨𑄡𑄧 𑄤𑄨𑄖𑄴𑄗𑄧𑄢𑄬𑄖𑄪𑄁 𑄇𑄗𑄐𑄴𑄌𑄧𑄚𑄚𑄴𑄘, 𑄥𑄖𑄨𑄤𑄨𑄚𑄡𑄮𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄛𑄧𑄢𑄧𑄎𑄨𑄇𑄥𑄧𑄟𑄚𑄴𑄖𑄬𑄚 𑄤𑄧𑄖𑄨 𑄘𑄴𑄤𑄬 𑄥𑄧𑄟𑄚𑄴𑄖𑄧𑄚𑄨 𑄈𑄚𑄴𑄙𑄥𑄧𑄟𑄚𑄴𑄖𑄐𑄴𑄌 𑄃𑄂𑄛𑄖𑄴𑄖𑄨𑄥𑄧𑄟𑄚𑄴𑄖𑄐𑄴𑄌. 𑄖𑄖𑄴𑄗 𑄛𑄧𑄢𑄧𑄎𑄨𑄇𑄧𑄛𑄖𑄴𑄖𑄨𑄇𑄴𑄈𑄚𑄴𑄙𑄮 𑄥𑄋𑄴𑄊𑄧𑄘𑄨𑄥𑄬𑄥𑄧𑄛𑄖𑄴𑄖𑄨𑄇𑄴𑄈𑄚𑄴𑄙𑄮 𑄗𑄪𑄣𑄴𑄣𑄌𑄴𑄌𑄡-𑄛𑄧𑄌𑄨𑄖𑄴𑄖𑄨𑄡-𑄛𑄧𑄑𑄨𑄘𑄬𑄥𑄚𑄩𑄡-𑄘𑄪𑄇𑄴𑄇𑄑-𑄘𑄪𑄝𑄴𑄞𑄧𑄥𑄨𑄖𑄧𑄛𑄖𑄴𑄖𑄨𑄇𑄴𑄈𑄚𑄴𑄙𑄮𑄖𑄨 𑄆𑄤𑄁 𑄛𑄪𑄢𑄨𑄟𑄥𑄴𑄥 𑄛𑄌𑄴𑄍𑄨𑄟𑄈𑄚𑄴𑄙𑄁 𑄈𑄚𑄴𑄙𑄥𑄧𑄟𑄚𑄴𑄖𑄁 𑄚𑄧𑄟 𑄦𑄮𑄖𑄨. 𑄛𑄒𑄟𑄛𑄧𑄢𑄧𑄎𑄨𑄇𑄥𑄴𑄥 𑄛𑄚 𑄛𑄪𑄝𑄴𑄝𑄞𑄧𑄉𑄬 𑄘𑄪𑄇𑄴𑄇𑄑𑄁, 𑄥𑄬𑄥𑄧𑄚𑄁 𑄗𑄪𑄣𑄴𑄣𑄌𑄴𑄌𑄡𑄚𑄴𑄖𑄨 𑄄𑄘𑄁 𑄃𑄂𑄛𑄖𑄴𑄖𑄨𑄥𑄧𑄟𑄚𑄴𑄖𑄁 𑄚𑄧𑄟. 𑄖𑄖𑄴𑄗 𑄈𑄚𑄴𑄙𑄥𑄧𑄟𑄚𑄴𑄖𑄬 𑄛𑄧𑄢𑄧𑄎𑄨𑄇𑄥𑄧𑄟𑄚𑄴𑄖𑄁 𑄉𑄢𑄪𑄇𑄧𑄛𑄖𑄴𑄖𑄨 𑄚𑄧𑄟 𑄦𑄮𑄖𑄨. 𑄥𑄢𑄖𑄧𑄡𑄥𑄴𑄟𑄧𑄖𑄨 𑄥𑄢𑄖𑄪 𑄃𑄂𑄡𑄥𑄴𑄟𑄧. 𑄆𑄇𑄌𑄴𑄌𑄧𑄚𑄁 𑄃𑄙𑄨𑄇𑄢𑄕𑄧𑄚𑄚𑄴𑄖𑄨 𑄄𑄙 𑄃𑄚𑄪𑄤𑄧𑄘𑄧𑄙𑄨𑄇𑄢𑄕𑄟𑄬𑄤 𑄘𑄥𑄴𑄥𑄨𑄖𑄁.

𑄻𑄶. 𑄞𑄧𑄥𑄨𑄖𑄛𑄢𑄨𑄇𑄴𑄇𑄚𑄴𑄖𑄚𑄴𑄖𑄨 𑄤𑄧𑄌𑄧𑄡 𑄞𑄧𑄥𑄨𑄖𑄁 𑄇𑄧𑄡𑄬𑄚 𑄌 𑄛𑄢𑄨𑄇𑄴𑄇𑄚𑄴𑄖𑄁, 𑄛𑄢𑄇𑄴𑄇𑄟𑄨𑄖𑄴𑄤𑄧 𑄇𑄖𑄚𑄴𑄖𑄨 𑄃𑄖𑄴𑄗𑄮. 𑄆𑄇𑄌𑄴𑄌𑄧𑄚𑄚𑄴𑄖𑄨 𑄄𑄙𑄧𑄛𑄨 𑄃𑄚𑄪𑄤𑄧𑄘𑄧𑄙𑄨𑄇𑄢𑄕𑄟𑄬𑄤 𑄃𑄙𑄨𑄛𑄴𑄛𑄬𑄖𑄁. 𑄛𑄑𑄨𑄐𑄴𑄐𑄧𑄖𑄇𑄢𑄕𑄬 ‘‘𑄆𑄇𑄌𑄴𑄌𑄧𑄚’’𑄚𑄴𑄖𑄨 𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄁 𑄘𑄥𑄴𑄥𑄨𑄖𑄁.

𑄻𑄸. 𑄘𑄤𑄧𑄖𑄨 𑄥𑄦𑄥𑄧. 𑄢𑄤𑄧𑄖𑄨 𑄃𑄐𑄴𑄐𑄁 𑄞𑄕𑄨𑄖𑄪𑄇𑄧𑄟𑄬𑄚 𑄃𑄐𑄴𑄐𑄁 𑄤𑄪𑄖𑄴𑄖𑄁. 𑄆𑄤𑄁 𑄈𑄮, 𑄃𑄂𑄚𑄚𑄴𑄘, 𑄖𑄥𑄴𑄥𑄛𑄧𑄛𑄨𑄡𑄥𑄨𑄇𑄧 𑄦𑄮𑄖𑄩𑄖𑄨 𑄖𑄥𑄴𑄥𑄛𑄪𑄉𑄴𑄉𑄣𑄥𑄴𑄥 𑄛𑄧𑄛𑄪𑄥𑄴𑄥𑄚𑄴𑄚𑄖𑄧 𑄛𑄧𑄛𑄨𑄡𑄥𑄨𑄇𑄧 𑄦𑄮𑄖𑄨. 𑄄𑄟𑄨𑄚𑄧 𑄇𑄟𑄴𑄟𑄥𑄴𑄥 𑄤𑄖𑄴𑄗𑄪 𑄘𑄥𑄴𑄥𑄨𑄖𑄁. 𑄆𑄤𑄢𑄫𑄛𑄥𑄴𑄥 𑄦𑄨 𑄛𑄪𑄉𑄴𑄉𑄣𑄥𑄴𑄥 𑄇𑄟𑄴𑄟𑄁 𑄇𑄧𑄖𑄴𑄖𑄝𑄴𑄝𑄁. 𑄇𑄟𑄴𑄟𑄬𑄚 𑄦𑄨 𑄃𑄙𑄨𑄇𑄢𑄕𑄥𑄴𑄥 𑄤𑄫𑄛𑄥𑄟𑄮 𑄦𑄮𑄖𑄨, 𑄚 𑄛𑄪𑄉𑄴𑄉𑄣𑄥𑄴𑄥 𑄛𑄧𑄛𑄪𑄥𑄴𑄥𑄚𑄴𑄚𑄖𑄧𑄡. 𑄄𑄙𑄧𑄛𑄨 𑄌 𑄃𑄚𑄪𑄤𑄧𑄘𑄧𑄙𑄨𑄇𑄢𑄕𑄟𑄬𑄤 𑄃𑄙𑄨𑄇𑄢𑄕𑄚𑄴𑄖𑄨 𑄤𑄬𑄘𑄨𑄖𑄝𑄴𑄝𑄁.

𑄻𑄹. 𑄇𑄗𑄐𑄴𑄌𑄧𑄚𑄚𑄴𑄘, 𑄖𑄨𑄕𑄤𑄖𑄴𑄗𑄧𑄢𑄇𑄮𑄖𑄨 𑄆𑄖𑄴𑄗 𑄄𑄘𑄁 𑄇𑄟𑄴𑄟𑄁 𑄖𑄨𑄕𑄤𑄖𑄴𑄗𑄧𑄢𑄇𑄥𑄘𑄨𑄥𑄖𑄴𑄖𑄧 𑄖𑄨𑄕𑄤𑄖𑄴𑄗𑄧𑄢𑄇𑄮𑄖𑄨 𑄤𑄪𑄖𑄴𑄖𑄁. 𑄡𑄗𑄧 𑄦𑄨 𑄉𑄫𑄗𑄁 𑄤𑄧 𑄟𑄪𑄖𑄴𑄖𑄁 𑄤𑄧 𑄊𑄑𑄴𑄑𑄨𑄡𑄟𑄧𑄚𑄁 𑄘𑄪𑄉𑄴𑄉𑄚𑄴𑄙𑄖𑄧𑄡 𑄝𑄧𑄙𑄖𑄨, 𑄖𑄨𑄕𑄬𑄦𑄨 𑄃𑄤𑄖𑄴𑄗𑄢𑄨𑄖𑄴𑄤𑄧 𑄥𑄪𑄛𑄴𑄛𑄑𑄨𑄌𑄴𑄍𑄧𑄘𑄨𑄖𑄥𑄴𑄥 𑄛𑄚𑄥𑄴𑄥 𑄥𑄮 𑄉𑄚𑄴𑄙𑄮 𑄚 𑄝𑄧𑄙𑄖𑄨, 𑄆𑄤𑄟𑄬𑄤 𑄡𑄁 𑄃𑄙𑄨𑄇𑄢𑄕𑄁 𑄟𑄫𑄣𑄧𑄚𑄪𑄟𑄫𑄣𑄁 𑄉𑄚𑄴𑄖𑄴𑄤𑄧 𑄤𑄫𑄛𑄥𑄟𑄨𑄡𑄟𑄧𑄚𑄁 𑄇𑄇𑄴𑄈𑅄𑄖𑄴𑄖𑄧𑄡 𑄤𑄧𑅄𑄖𑄴𑄖𑄧𑄡 𑄞𑄬𑄘𑄧𑄡 𑄥𑄁𑄤𑄖𑄴𑄖𑄖𑄨, 𑄖𑄁 𑄄𑄟𑄨𑄚𑄧 𑄇𑄟𑄴𑄟𑄬𑄚 𑄤𑄫𑄛𑄥𑄚𑄴𑄖𑄁 𑄉𑄫𑄗𑄁 𑄤𑄨𑄡 𑄖𑄨𑄕𑄤𑄖𑄴𑄗𑄧𑄢𑄇𑄬𑄚 𑄛𑄑𑄨𑄌𑄴𑄍𑄚𑄴𑄚𑄁 𑄤𑄫𑄛𑄥𑄚𑄴𑄖𑄁 𑄦𑄮𑄖𑄩𑄖𑄨 𑄄𑄘𑄁 𑄇𑄟𑄴𑄟𑄁 𑄖𑄨𑄕𑄤𑄖𑄴𑄗𑄧𑄢𑄇𑄥𑄘𑄨𑄥𑄖𑄴𑄖𑄧 𑄖𑄨𑄕𑄤𑄖𑄴𑄗𑄧𑄢𑄇𑄮𑄖𑄨 𑄤𑄪𑄖𑄴𑄖𑄁. 𑄖𑄥𑄴𑄥 𑄄𑄙𑄧𑄚𑄚𑄴𑄘, 𑄞𑄨𑄇𑄴𑄈𑄫𑄚𑄁 𑄞𑄕𑄴𑄓𑄚𑄎𑄧𑄖𑄧𑄚𑄚𑄴𑄖𑄨𑄃𑄂𑄘𑄨𑄤𑄌𑄚𑄬𑄚 𑄃𑄂𑄇𑄧𑄢𑄟𑄖𑄴𑄖𑄟𑄬𑄤 𑄘𑄥𑄴𑄥𑄨𑄖𑄁, 𑄈𑄚𑄴𑄙𑄇𑄬 𑄃𑄂𑄉𑄖𑄧𑄡𑄬𑄤 𑄛𑄚𑄬𑄖𑄴𑄗 𑄇𑄟𑄴𑄟𑄤𑄧𑄌𑄧 𑄛𑄟𑄧𑄕𑄁. 𑄒𑄛𑄬𑄖𑄴𑄤𑄧 𑄗𑄪𑄣𑄴𑄣𑄤𑄎𑄴𑄎𑄁 𑄒𑄛𑄬𑄖𑄴𑄤𑄧 𑄉𑄨𑄦𑄨𑄛𑄑𑄨𑄥𑄁𑄡𑄪𑄖𑄴𑄖𑄚𑄴𑄖𑄨. 𑄆𑄖𑄴𑄗 𑄛𑄚 𑄗𑄪𑄣𑄴𑄣𑄤𑄎𑄴𑄎𑄚𑄴𑄖𑄨 𑄗𑄫𑄣𑄴𑄣𑄤𑄎𑄴𑄎𑄁 𑄛𑄧𑄢𑄧𑄎𑄨𑄇𑄐𑄴𑄌𑄬𑄤 𑄥𑄋𑄴𑄊𑄧𑄘𑄨𑄥𑄬𑄥𑄐𑄴𑄌. 𑄉𑄨𑄦𑄨𑄛𑄑𑄨𑄥𑄁𑄡𑄪𑄖𑄴𑄖𑄚𑄴𑄖𑄨 𑄉𑄨𑄦𑄩𑄚𑄁 𑄦𑄩𑄚𑄬𑄚 𑄈𑄪𑄁𑄥𑄚𑄤𑄟𑄴𑄞𑄚𑄙𑄟𑄴𑄟𑄨𑄇𑄛𑄑𑄨𑄥𑄴𑄥𑄤𑄬𑄥𑄪 𑄃𑄂𑄛𑄚𑄴𑄚𑄧 𑄃𑄂𑄛𑄖𑄴𑄖𑄨. 𑄃𑄙𑄨𑄇𑄢𑄕𑄧𑄚𑄚𑄴𑄖𑄨 𑄄𑄙 𑄃𑄂𑄛𑄖𑄴𑄖𑄧𑄙𑄨𑄇𑄢𑄕𑄟𑄬𑄤 𑄤𑄬𑄘𑄨𑄖𑄝𑄴𑄝𑄁. 𑄇𑄨𑄌𑄴𑄌𑄧𑄙𑄨𑄇𑄢𑄕𑄥𑄴𑄥 𑄛𑄚 𑄤𑄥𑄬𑄚 𑄄𑄙 𑄚 𑄇𑄨𑄐𑄴𑄌𑄨 𑄤𑄪𑄖𑄴𑄖𑄁. 𑄇𑄨𑄐𑄴𑄌𑄧𑄛𑄨 𑄚 𑄤𑄪𑄖𑄴𑄖𑄁, 𑄥𑄟𑄴𑄟𑄪𑄈𑄧𑄤𑄨𑄚𑄡𑄬𑄚𑄬𑄤 𑄛𑄚𑄥𑄴𑄥 𑄤𑄫𑄛𑄥𑄟𑄮 𑄦𑄮𑄖𑄩𑄖𑄨 𑄤𑄬𑄘𑄨𑄖𑄝𑄴𑄝𑄮.

𑄻𑄺. 𑄍𑄡𑄨𑄟𑄬, 𑄃𑄂𑄚𑄚𑄴𑄘, 𑄙𑄟𑄴𑄟𑄧 𑄥𑄧𑄢𑄕𑄩𑄡𑄧𑄖𑄨 𑄦𑄬𑄑𑄴𑄒𑄧 𑄇𑄣𑄦𑄤𑄥𑄬𑄚 𑄥𑄪𑄖𑄴𑄖𑄁 𑄃𑄂𑄢𑄘𑄴𑄙𑄁, 𑄅𑄛𑄢𑄨 𑄥𑄧𑄢𑄕𑄩𑄡𑄙𑄟𑄴𑄟𑄧 𑄃𑄂𑄉𑄖𑄧. 𑄄𑄖𑄨 𑄡𑄗𑄧𑄚𑄪𑄥𑄚𑄴𑄙𑄨𑄚𑄧𑄤 𑄘𑄬𑄥𑄚𑄧 𑄉𑄖𑄧 𑄦𑄮𑄖𑄨. 𑄦𑄬𑄑𑄴𑄒𑄧 𑄇𑄮𑄥𑄟𑄴𑄝𑄨𑄡𑄥𑄪𑄖𑄴𑄖𑄬 (𑄟. 𑄚𑄨. 𑄷.𑄺𑄿𑄾-𑄻𑄶𑄶) 𑄛𑄚 𑄥𑄮𑄖𑄧𑄛𑄖𑄴𑄖𑄨𑄟𑄉𑄴𑄉𑄥𑄟𑄴𑄟𑄧𑄘𑄨𑄑𑄴𑄒𑄨 𑄇𑄗𑄨𑄖𑄧, 𑄄𑄟𑄥𑄴𑄟𑄨𑄁 𑄥𑄪𑄖𑄴𑄖𑄬 𑄥𑄮𑄖𑄧𑄛𑄖𑄴𑄖𑄨𑄜𑄣𑄥𑄟𑄴𑄟𑄧𑄘𑄨𑄑𑄴𑄒𑄨 𑄤𑄪𑄖𑄴𑄖𑄧𑄖𑄨 𑄤𑄬𑄘𑄨𑄖𑄝𑄴𑄝𑄧. 𑄃𑄕𑄪𑄚𑄴𑄖𑄨 𑄃𑄛𑄴𑄛𑄥𑄧𑄤𑄎𑄴𑄎𑄁. 𑄗𑄫𑄣𑄚𑄴𑄖𑄨 𑄟𑄦𑄧𑄥𑄧𑄤𑄎𑄴𑄎𑄁. 𑄥𑄬𑄥𑄟𑄬𑄖𑄴𑄗 𑄅𑄖𑄴𑄖𑄧𑄚𑄟𑄬𑄤𑄧𑄖𑄨.

𑄛𑄛𑄐𑄴𑄌𑄥𑄫𑄘𑄚𑄨𑄡𑄧 𑄟𑄎𑄴𑄏𑄨𑄟𑄚𑄨𑄇𑄧𑄡𑄑𑄴𑄒𑄇𑄗𑄧𑄡

𑄥𑄧𑄟𑄉𑄧𑄟𑄥𑄪𑄖𑄴𑄖𑄤𑄕𑄴𑄕𑄚𑄧 𑄚𑄨𑄑𑄴𑄒𑄨𑄖𑄧.

𑄻. 𑄥𑄪𑄚𑄇𑄴𑄈𑄖𑄴𑄖𑄥𑄪𑄖𑄴𑄖𑄤𑄕𑄴𑄕𑄚𑄧

𑄻𑄻. 𑄆𑄤𑄁 𑄟𑄬 𑄥𑄪𑄖𑄚𑄴𑄖𑄨 𑄥𑄪𑄚𑄇𑄴𑄈𑄖𑄴𑄖𑄥𑄪𑄖𑄴𑄖𑄁. 𑄖𑄖𑄴𑄗 𑄃𑄐𑄴𑄐𑄧𑄖𑄨 𑄃𑄢𑄦𑄖𑄴𑄖𑄁. 𑄝𑄴𑄡𑄧𑄇𑄖𑄧𑄖𑄨 𑄈𑄩𑄕𑄧 𑄎𑄧𑄖𑄩𑄖𑄨𑄃𑄂𑄘𑄩𑄦𑄨 𑄌𑄖𑄫𑄦𑄨 𑄛𑄘𑄬𑄦𑄨 𑄇𑄗𑄨𑄖𑄧. 𑄃𑄙𑄨𑄟𑄧𑄚𑄬𑄚𑄧𑄖𑄨 𑄃𑄛𑄴𑄛𑄖𑄴𑄖𑄬 𑄛𑄖𑄴𑄖𑄥𑄐𑄴𑄐𑄨𑄚𑄮, 𑄃𑄚𑄙𑄨𑄉𑄖𑄬 𑄃𑄙𑄨𑄉𑄖𑄥𑄐𑄴𑄐𑄨𑄚𑄮 𑄦𑄪𑄖𑄴𑄤𑄧 𑄃𑄙𑄨𑄉𑄖𑄁 𑄃𑄟𑄴𑄦𑄬𑄦𑄩𑄖𑄨 𑄟𑄧𑄚𑄬𑄚 𑄝𑄴𑄡𑄧𑄇𑄢𑄨𑄁𑄥𑄪.

𑄻𑄼. 𑄆𑄤𑄐𑄴𑄌𑄬𑄖𑄴𑄗 𑄥𑄪𑄚𑄇𑄴𑄈𑄖𑄴𑄖 𑄖𑄗𑄧𑄉𑄖𑄥𑄴𑄥 𑄦𑄮𑄖𑄩𑄖𑄨 𑄥𑄪𑄚𑄇𑄴𑄈𑄖𑄴𑄖 𑄆𑄖𑄴𑄗 𑄆𑄖𑄬𑄥𑄁 𑄞𑄨𑄇𑄴𑄈𑄫𑄚𑄁 𑄛𑄐𑄴𑄦𑄝𑄴𑄡𑄧𑄇𑄢𑄕𑄬 – ‘‘𑄄𑄘𑄁 𑄒𑄧𑄚𑄁 𑄆𑄖𑄬𑄥𑄁 𑄃𑄤𑄨𑄞𑄫𑄖𑄁 𑄃𑄚𑄴𑄙𑄇𑄧𑄢𑄁, 𑄖𑄬𑄚𑄨𑄟𑄬 𑄃𑄚𑄙𑄨𑄉𑄖𑄬 𑄃𑄙𑄨𑄉𑄖𑄥𑄐𑄴𑄐𑄨𑄚𑄮, 𑄦𑄚𑄴𑄘 𑄚𑄬𑄥𑄁 𑄤𑄨𑄥𑄮𑄙𑄬𑄖𑄴𑄤𑄧 𑄛𑄧𑄇𑄑𑄁 𑄇𑄖𑄴𑄤𑄧 𑄙𑄟𑄴𑄟𑄁 𑄘𑄬𑄥𑄬𑄟𑄩’’𑄖𑄨, 𑄆𑄤𑄐𑄴𑄌 𑄖𑄗𑄧𑄉𑄖𑄥𑄴𑄥 𑄦𑄮𑄖𑄨. 𑄃𑄗 𑄌 𑄛𑄚𑄨𑄙𑄬𑄇𑄌𑄴𑄌𑄬…𑄛𑄬… 𑄖𑄥𑄴𑄥𑄛𑄨 𑄦𑄮𑄖𑄨 𑄃𑄐𑄴𑄐𑄗𑄖𑄴𑄖𑄚𑄴𑄖𑄨 𑄞𑄉𑄤𑄧 𑄛𑄑𑄨𑄛𑄚𑄴𑄚𑄇𑄧𑄚𑄁 𑄙𑄟𑄴𑄟𑄁 𑄘𑄬𑄥𑄬𑄖𑄨. 𑄡𑄖𑄴𑄗 𑄛𑄚 𑄄𑄌𑄴𑄍𑄧𑄌𑄧𑄢𑄬 𑄒𑄨𑄖𑄧 𑄆𑄇𑄌𑄴𑄌𑄬 𑄟𑄮𑄊𑄛𑄪𑄢𑄨𑄥𑄧 𑄦𑄮𑄚𑄴𑄖𑄨, 𑄖𑄖𑄴𑄢 𑄞𑄉𑄤𑄧 𑄛𑄥𑄴𑄥𑄖𑄨 – ‘‘𑄄𑄟𑄬 𑄄𑄟𑄁 𑄛𑄐𑄴𑄦𑄁 𑄅𑄉𑄴𑄉𑄦𑄬𑄖𑄴𑄤𑄧 𑄃𑄎𑄧𑄚𑄨𑄖𑄴𑄤𑄧𑄤 𑄎𑄧𑄚𑄚𑄴𑄖𑄧 𑄤𑄨𑄡 𑄃𑄛𑄴𑄛𑄖𑄴𑄖𑄬 𑄛𑄖𑄴𑄖𑄥𑄐𑄴𑄐𑄨𑄚𑄮 𑄦𑄪𑄖𑄴𑄤𑄧 𑄉𑄧𑄟𑄚𑄨𑄉𑄟𑄧𑄘𑄩𑄥𑄪 𑄤𑄨𑄥𑄬𑄤𑄟𑄧𑄚𑄧 𑄤𑄨𑄌𑄢𑄨𑄥𑄴𑄥𑄚𑄴𑄖𑄨, 𑄖𑄁 𑄚𑄬𑄥𑄁 𑄞𑄤𑄨𑄥𑄴𑄥𑄖𑄨 𑄘𑄩𑄊𑄢𑄖𑄴𑄖𑄁 𑄃𑄦𑄨𑄖𑄧𑄡 𑄘𑄪𑄇𑄴𑄈𑄧𑄡𑄧’’𑄖𑄨 𑄆𑄤𑄟𑄥𑄴𑄥𑄧𑄡𑄁 𑄄𑄌𑄴𑄍𑄧𑄌𑄧𑄢𑄬 𑄒𑄨𑄖𑄧𑄚𑄁 𑄇𑄧𑄢𑄕𑄧 𑄛𑄑𑄨𑄛𑄚𑄴𑄚𑄇𑄧𑄚𑄟𑄴𑄛𑄨 𑄃𑄖𑄴𑄗𑄧𑄡 ‘‘𑄙𑄟𑄴𑄟𑄁 𑄘𑄬𑄥𑄨𑄥𑄴𑄥𑄧𑄟𑄩’’𑄖𑄨 𑄅𑄛𑄴𑄛𑄚𑄴𑄚𑄥𑄴𑄥 𑄌𑄨𑄖𑄴𑄖𑄥𑄴𑄥 𑄃𑄐𑄴𑄐𑄗𑄧𑄞𑄧𑄤𑄮 𑄦𑄮𑄖𑄨. 𑄖𑄁 𑄥𑄚𑄴𑄙𑄧𑄡𑄬𑄖𑄁 𑄤𑄪𑄖𑄴𑄖𑄁.

𑄻𑄾. 𑄣𑄮𑄇𑄧𑄟𑄨𑄥𑄧𑄙𑄨𑄟𑄪𑄖𑄴𑄖𑄮𑄖𑄨 𑄤𑄑𑄴𑄑𑄧𑄟𑄨𑄥-𑄇𑄧𑄟𑄧𑄟𑄨𑄥-𑄣𑄮𑄇𑄧𑄟𑄨𑄥𑄞𑄫𑄖𑄬𑄥𑄪 𑄛𑄐𑄴𑄌𑄥𑄪 𑄇𑄧𑄟𑄉𑄪𑄕𑄬𑄥𑄪 𑄃𑄙𑄨𑄟𑄪𑄖𑄴𑄖𑄮 𑄖𑄚𑄴𑄚𑄨𑄚𑄴𑄚𑄮 𑄖𑄉𑄴𑄉𑄢𑄪𑄇𑄮 𑄖𑄛𑄴𑄛𑄝𑄴𑄞𑄧𑄢𑄮. 𑄖𑄛𑄴𑄛𑄖𑄨𑄢𑄫𑄛𑄩𑄖𑄨 𑄇𑄧𑄟𑄉𑄪𑄕𑄥𑄞𑄧𑄉𑄧. 𑄃𑄂𑄚𑄬𑄐𑄴𑄎𑄛𑄑𑄨𑄥𑄁𑄡𑄪𑄖𑄴𑄖𑄧𑄡𑄧𑄖𑄨 𑄃𑄂𑄚𑄬𑄐𑄴𑄎𑄥𑄟𑄧𑄛𑄖𑄴𑄖𑄨𑄛𑄑𑄨𑄥𑄁𑄡𑄪𑄖𑄴𑄖𑄧𑄡. 𑄥𑄁𑄥𑄬𑄡𑄴𑄡𑄧𑄖𑄨 𑄇𑄗𑄬𑄡𑄴𑄡. 𑄃𑄂𑄚𑄬𑄐𑄴𑄎𑄥𑄁𑄡𑄮𑄎𑄚𑄬𑄚 𑄦𑄨 𑄈𑄮 𑄤𑄨𑄥𑄁𑄡𑄪𑄖𑄴𑄖𑄮𑄖𑄨 𑄃𑄂𑄚𑄬𑄐𑄴𑄎𑄥𑄟𑄧𑄛𑄖𑄴𑄖𑄨𑄥𑄁𑄡𑄮𑄎𑄚𑄬𑄚 𑄤𑄨𑄥𑄁𑄥𑄑𑄴𑄒𑄮. 𑄣𑄮𑄇𑄧𑄟𑄨𑄥𑄧𑄙𑄨𑄟𑄪𑄖𑄴𑄖𑄮𑄖𑄨 𑄆𑄤𑄢𑄫𑄛𑄮 𑄦𑄨 𑄣𑄫𑄈𑄌𑄩𑄤𑄢𑄙𑄢𑄮 𑄟𑄖𑄴𑄖𑄨𑄇𑄧𑄛𑄖𑄴𑄖𑄁 𑄃𑄂𑄘𑄧𑄡 𑄃𑄖𑄴𑄖𑄚𑄮 𑄥𑄘𑄨𑄥𑄬𑄦𑄨 𑄇𑄖𑄨𑄛𑄡𑄬𑄦𑄨 𑄥𑄘𑄴𑄙𑄨𑄁 𑄛𑄌𑄴𑄌𑄚𑄴𑄖𑄎𑄚𑄛𑄘𑄁 𑄉𑄌𑄴𑄍𑄖𑄨, 𑄉𑄧𑄟𑄁 𑄛𑄨𑄕𑄴𑄓𑄧𑄡 𑄛𑄤𑄨𑄑𑄴𑄒𑄇𑄧𑄣𑄬 𑄟𑄚𑄪𑄥𑄴𑄥𑄧 𑄘𑄨𑄥𑄴𑄤𑄧 ‘‘𑄟𑄦𑄧𑄛𑄁𑄥𑄪𑄇𑄪𑄣𑄨𑄇𑄧 𑄃𑄂𑄉𑄖𑄧’’𑄖𑄨 𑄡𑄧𑄉𑄪𑄞𑄖𑄴𑄖𑄧𑄘𑄩𑄚𑄨 𑄥𑄟𑄴𑄛𑄧𑄘𑄬𑄖𑄴𑄤𑄧 𑄥𑄇𑄴𑄇𑄌𑄴𑄌𑄁 𑄘𑄧𑄚𑄁 𑄘𑄬𑄚𑄴𑄖𑄨, 𑄞𑄖𑄴𑄖𑄇𑄨𑄌𑄴𑄌𑄬 𑄚𑄨𑄑𑄴𑄒𑄨𑄖𑄬 𑄃𑄚𑄪𑄟𑄮𑄘𑄚𑄁 𑄥𑄪𑄖𑄴𑄤𑄧 – ‘‘𑄥𑄴𑄤𑄬𑄛𑄨, 𑄞𑄚𑄴𑄖𑄬, 𑄄𑄙𑄬𑄤 𑄛𑄨𑄕𑄴𑄓𑄧𑄡 𑄛𑄤𑄨𑄥𑄗𑄧’’𑄖𑄨 𑄤𑄘𑄚𑄴𑄖𑄨. 𑄃𑄣𑄁 𑄅𑄛𑄧𑄥𑄇𑄧, 𑄃𑄎𑄴𑄎𑄧𑄛𑄨 𑄤𑄮 𑄝𑄦𑄫𑄚𑄁 𑄘𑄨𑄚𑄴𑄚𑄚𑄴𑄖𑄨. 𑄖𑄬𑄚 𑄦𑄨, 𑄞𑄚𑄴𑄖𑄬, 𑄃𑄚𑄴𑄖𑄮𑄤𑄥𑄴𑄥𑄁 𑄄𑄙 𑄤𑄥𑄬𑄡𑄴𑄡𑄧𑄗𑄧𑄖𑄨 𑄃𑄙𑄨𑄤𑄧𑄥𑄬𑄖𑄴𑄤𑄧 𑄤𑄨𑄦𑄧𑄢𑄟𑄉𑄴𑄉𑄁 𑄛𑄪𑄌𑄴𑄍𑄨𑄖𑄴𑄤𑄧 𑄤𑄨𑄦𑄧𑄢𑄁 𑄉𑄌𑄴𑄍𑄚𑄴𑄖𑄨. 𑄖𑄖𑄴𑄗 𑄥𑄬𑄚𑄧𑄥𑄚𑄁 𑄉𑄦𑄬𑄖𑄴𑄤𑄧 𑄛𑄖𑄴𑄖𑄌𑄩𑄤𑄢𑄁 𑄛𑄑𑄨𑄥𑄧𑄟𑄬𑄚𑄴𑄖𑄨. 𑄥𑄧𑄡𑄁 𑄆𑄇𑄮 𑄃𑄂𑄤𑄧𑄥𑄨𑄇𑄮 𑄖𑄬 𑄞𑄨𑄇𑄴𑄈𑄫 𑄛𑄪𑄌𑄴𑄍𑄖𑄨 ‘‘𑄇𑄖𑄴𑄗 𑄛𑄨𑄕𑄴𑄓𑄧𑄡 𑄌𑄢𑄨𑄖𑄴𑄗𑄧’’𑄖𑄨? 𑄃𑄥𑄪𑄇𑄉𑄧𑄟𑄬𑄖𑄨. 𑄞𑄨𑄇𑄴𑄈𑄧𑄥𑄟𑄴𑄛𑄚𑄴𑄚𑄧𑄖𑄨? 𑄃𑄂𑄟 𑄆𑄤𑄢𑄫𑄛𑄧 𑄚𑄧𑄟 𑄟𑄚𑄪𑄥𑄴𑄥𑄧𑄚𑄁 𑄥𑄘𑄴𑄙𑄧 𑄦𑄮𑄖𑄨. ‘‘𑄃𑄎𑄴𑄎𑄬𑄤 𑄚𑄪 𑄈𑄮 𑄆𑄖𑄬 𑄆𑄘𑄨𑄥𑄧, 𑄚𑄨𑄌𑄴𑄌𑄟𑄴𑄛𑄨 𑄆𑄘𑄨𑄥𑄧’’𑄖𑄨? 𑄥𑄘𑄴𑄙𑄧 𑄖𑄬 𑄟𑄚𑄪𑄥𑄴𑄥𑄧 𑄚𑄨𑄌𑄴𑄌𑄟𑄴𑄛𑄨 𑄆𑄘𑄨𑄥𑄧, 𑄖𑄬 𑄚𑄨𑄥𑄴𑄥𑄧𑄡𑄬𑄤 𑄃𑄡𑄁 𑄤𑄨𑄦𑄧𑄢𑄮 𑄤𑄓𑄴𑄔𑄖𑄩𑄖𑄨. 𑄖𑄖𑄮 𑄖𑄬 𑄛𑄁𑄥𑄪𑄇𑄪𑄣𑄨𑄇𑄧 𑄛𑄪𑄚𑄛𑄴𑄛𑄪𑄚𑄁 𑄖𑄬𑄥𑄁 𑄤𑄕𑄴𑄕𑄁 𑄇𑄗𑄬𑄚𑄴𑄖𑄨, 𑄘𑄨𑄤𑄥𑄧𑄤𑄥𑄬𑄥𑄁 𑄇𑄗𑄬𑄖𑄴𑄤𑄧 𑄢𑄖𑄴𑄖𑄨𑄟𑄴𑄛𑄨 𑄇𑄗𑄬𑄚𑄴𑄖𑄨. 𑄆𑄖𑄴𑄖𑄧𑄤𑄖𑄧 𑄄𑄌𑄴𑄍𑄧𑄌𑄧𑄢𑄬 𑄒𑄨𑄖𑄥𑄴𑄥 𑄥𑄩𑄥𑄁 𑄚𑄨𑄇𑄴𑄈𑄚𑄴𑄖𑄁 𑄦𑄮𑄖𑄨 𑄅𑄘𑄢𑄁 𑄜𑄧𑄣𑄨𑄖𑄁. 𑄆𑄤𑄁 𑄣𑄮𑄇𑄧𑄟𑄨𑄥𑄧𑄙𑄨𑄟𑄪𑄖𑄴𑄖𑄮 𑄤𑄬𑄘𑄨𑄖𑄝𑄴𑄝𑄮.

𑄻𑄿. 𑄄𑄘𑄧𑄚𑄨 𑄃𑄂𑄚𑄬𑄐𑄴𑄎𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄁 𑄃𑄙𑄨𑄟𑄧𑄚𑄨𑄇𑄁 𑄘𑄥𑄴𑄥𑄬𑄚𑄴𑄖𑄮 𑄒𑄧𑄚𑄁 𑄈𑄮 𑄛𑄚𑄬𑄖𑄚𑄴𑄖𑄨𑄃𑄂𑄘𑄨𑄟𑄧𑄦. 𑄃𑄂𑄚𑄬𑄐𑄴𑄎𑄧𑄙𑄨𑄟𑄪𑄖𑄴𑄖𑄥𑄴𑄥𑄧𑄖𑄨 𑄇𑄨𑄣𑄬𑄥𑄥𑄨𑄐𑄴𑄌𑄚𑄤𑄨𑄢𑄦𑄨𑄖𑄧𑄥𑄪 𑄦𑄬𑄑𑄴𑄒𑄨𑄟𑄧𑄥𑄪 𑄍𑄥𑄪 𑄥𑄟𑄧𑄛𑄖𑄴𑄖𑄩𑄥𑄪 𑄃𑄙𑄨𑄟𑄪𑄖𑄴𑄖𑄥𑄴𑄥 𑄖𑄚𑄴𑄚𑄨𑄚𑄴𑄚𑄥𑄴𑄥 𑄖𑄉𑄴𑄉𑄢𑄪𑄚𑄮 𑄖𑄛𑄴𑄛𑄝𑄴𑄞𑄧𑄢𑄥𑄴𑄥. 𑄥𑄬 𑄛𑄤𑄪𑄖𑄴𑄖𑄬𑄖𑄨 𑄖𑄁 𑄛𑄤𑄪𑄖𑄴𑄖𑄁. 𑄍 𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄦𑄨 𑄃𑄙𑄨𑄟𑄧𑄚𑄨𑄇𑄥𑄴𑄥 𑄛𑄐𑄴𑄌𑄇𑄧𑄟𑄉𑄪𑄕𑄧𑄟𑄨𑄥𑄝𑄚𑄴𑄙𑄚𑄧 𑄛𑄖𑄨𑄖𑄛𑄕𑄴𑄓𑄪𑄛𑄣𑄧𑄥𑄮 𑄤𑄨𑄡 𑄅𑄛𑄑𑄴𑄒𑄧𑄖𑄨. 𑄖𑄬𑄚𑄬𑄖𑄁 𑄤𑄪𑄖𑄴𑄖𑄁.

𑄼𑄶. 𑄄𑄘𑄧𑄚𑄨 𑄃𑄂𑄇𑄨𑄐𑄴𑄌𑄐𑄴𑄐𑄧𑄡𑄖𑄚𑄥𑄟𑄧𑄛𑄖𑄴𑄖𑄨 𑄣𑄧𑄞𑄨𑄚𑄮 𑄃𑄙𑄨𑄟𑄧𑄚𑄨𑄇𑄥𑄴𑄥 𑄚𑄨𑄊𑄁𑄥𑄁 𑄘𑄥𑄴𑄥𑄬𑄖𑄪𑄁 𑄒𑄧𑄚𑄁 𑄈𑄮 𑄛𑄚𑄧𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄘𑄴𑄤𑄬𑄙𑄧 𑄞𑄨𑄚𑄴𑄚𑄧𑄖𑄨 𑄟𑄎𑄴𑄏𑄬 𑄞𑄨𑄚𑄴𑄚𑄧. 𑄃𑄛𑄴𑄛𑄑𑄨𑄥𑄚𑄴𑄙𑄨𑄇𑄧𑄖𑄨 𑄈𑄪𑄘𑄴𑄘𑄇𑄧 𑄟𑄪𑄑𑄴𑄒𑄨𑄛𑄧𑄥𑄧𑄕𑄟𑄖𑄴𑄖𑄧 𑄎𑄖𑄪𑄚𑄧 𑄤𑄧 𑄥𑄨𑄣𑄬𑄥𑄬𑄚 𑄤𑄧 𑄃𑄣𑄴𑄣𑄩𑄡𑄧𑄛𑄬𑄖𑄴𑄤𑄧 𑄛𑄑𑄨𑄥𑄚𑄴𑄙𑄧𑄖𑄪𑄁 𑄥𑄇𑄴𑄇𑄧. 𑄟𑄦𑄚𑄴𑄖𑄁 𑄛𑄚 𑄇𑄪𑄑𑄧𑄉𑄧𑄢𑄛𑄴𑄛𑄟𑄧𑄕𑄁 𑄥𑄚𑄴𑄙𑄧𑄡𑄬𑄖𑄁 𑄤𑄪𑄖𑄴𑄖𑄁. 𑄥𑄬 𑄞𑄨𑄚𑄴𑄚𑄬𑄖𑄨 𑄖𑄁 𑄞𑄨𑄚𑄴𑄚𑄁. 𑄅𑄛𑄢𑄨 𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄦𑄨 𑄦𑄬𑄑𑄴𑄒𑄧𑄥𑄟𑄧𑄛𑄖𑄴𑄖𑄨 𑄘𑄴𑄤𑄬𑄙𑄧𑄞𑄨𑄚𑄴𑄚𑄧 𑄥𑄬𑄣𑄧 𑄤𑄨𑄡 𑄦𑄮𑄖𑄨, 𑄖𑄁 𑄥𑄟𑄧𑄛𑄎𑄴𑄎𑄨𑄥𑄴𑄥𑄧𑄟𑄩𑄖𑄨 𑄌𑄨𑄖𑄴𑄖𑄁 𑄚 𑄅𑄛𑄴𑄛𑄎𑄴𑄎𑄖𑄨. 𑄖𑄬𑄚𑄬𑄖𑄁 𑄤𑄪𑄖𑄴𑄖𑄁.

𑄼𑄷. 𑄄𑄘𑄧𑄚𑄨 𑄚𑄬𑄤𑄥𑄐𑄴𑄐𑄧𑄚𑄧𑄥𑄐𑄴𑄐𑄧𑄡𑄖𑄚𑄣𑄧𑄞𑄨𑄚𑄮 𑄃𑄙𑄨𑄟𑄧𑄚𑄨𑄇𑄥𑄴𑄥 𑄌 𑄚𑄨𑄊𑄁𑄥𑄁 𑄘𑄥𑄴𑄥𑄬𑄚𑄴𑄖𑄮 𑄒𑄧𑄚𑄁 𑄈𑄮 𑄛𑄚𑄧𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄥𑄬 𑄤𑄚𑄴𑄖𑄬𑄖𑄨 𑄖𑄁 𑄤𑄚𑄴𑄖𑄁. 𑄃𑄑𑄴𑄒𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄦𑄨 𑄦𑄬𑄑𑄴𑄒𑄧𑄥𑄟𑄧𑄛𑄖𑄴𑄖𑄨𑄡𑄮 𑄤𑄚𑄴𑄖𑄥𑄘𑄨𑄥𑄧 𑄦𑄪𑄖𑄴𑄤𑄧 𑄅𑄛𑄑𑄴𑄒𑄦𑄚𑄴𑄖𑄨, 𑄛𑄪𑄚 𑄥𑄟𑄧𑄛𑄎𑄴𑄎𑄨𑄥𑄴𑄥𑄧𑄟𑄩𑄖𑄨 𑄌𑄨𑄖𑄴𑄖𑄁 𑄚 𑄅𑄛𑄴𑄛𑄎𑄴𑄎𑄖𑄨. 𑄖𑄬𑄚𑄬𑄖𑄁 𑄤𑄪𑄖𑄴𑄖𑄁.

𑄼𑄸. 𑄄𑄘𑄧𑄚𑄨 𑄈𑄩𑄕𑄧𑄥𑄤𑄥𑄴𑄥 𑄚𑄨𑄊𑄁𑄥𑄁 𑄘𑄥𑄴𑄥𑄬𑄚𑄴𑄖𑄮 𑄒𑄧𑄚𑄁 𑄈𑄮 𑄛𑄚𑄧𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄥𑄬 𑄅𑄌𑄴𑄍𑄨𑄚𑄴𑄚𑄟𑄫𑄣𑄬𑄖𑄨 𑄥𑄮 𑄅𑄌𑄴𑄍𑄨𑄚𑄴𑄚𑄟𑄫𑄣𑄮. 𑄅𑄛𑄢𑄨 𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄦𑄨 𑄦𑄬𑄑𑄴𑄒𑄧𑄥𑄟𑄧𑄛𑄖𑄴𑄖𑄨 𑄟𑄫𑄣𑄌𑄴𑄍𑄨𑄚𑄴𑄚𑄖𑄧𑄣𑄮 𑄤𑄨𑄡 𑄅𑄛𑄑𑄴𑄒𑄧𑄖𑄨, 𑄖𑄁 𑄥𑄟𑄧𑄛𑄎𑄴𑄎𑄨𑄥𑄴𑄥𑄧𑄟𑄩𑄖𑄨 𑄌𑄨𑄖𑄴𑄖𑄁 𑄚 𑄅𑄛𑄴𑄛𑄎𑄴𑄎𑄖𑄨. 𑄖𑄬𑄚𑄬𑄖𑄁 𑄤𑄪𑄖𑄴𑄖𑄁.

𑄼𑄹. 𑄒𑄧𑄚𑄁 𑄈𑄮 𑄛𑄚𑄧𑄖𑄨 𑄛𑄧𑄑𑄨𑄡𑄬𑄇𑄴𑄇𑄮 𑄃𑄚𑄪𑄥𑄚𑄴𑄙𑄨. 𑄦𑄬𑄑𑄴𑄒𑄧 𑄦𑄨 𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄃𑄙𑄨𑄟𑄧𑄚𑄨𑄇𑄥𑄴𑄥𑄛𑄨 𑄈𑄩𑄕𑄧𑄥𑄤𑄥𑄴𑄥𑄛𑄨 𑄚𑄨𑄊𑄁𑄥𑄮 𑄇𑄗𑄨𑄖𑄮, 𑄥𑄪𑄇𑄴𑄈𑄤𑄨𑄛𑄥𑄴𑄥𑄇𑄥𑄴𑄥 𑄛𑄚 𑄃𑄙𑄨𑄟𑄧𑄚𑄨𑄇𑄥𑄴𑄥𑄛𑄨 𑄈𑄩𑄕𑄧𑄥𑄤𑄥𑄴𑄥𑄛𑄨 𑄚 𑄇𑄗𑄨𑄖𑄮. 𑄖𑄬𑄥𑄁 𑄘𑄴𑄤𑄨𑄚𑄴𑄚𑄟𑄴𑄛𑄨 𑄚𑄨𑄊𑄁𑄥𑄁 𑄘𑄥𑄴𑄥𑄬𑄖𑄪𑄁 𑄄𑄟𑄁 𑄘𑄬𑄥𑄚𑄁 𑄃𑄂𑄢𑄞𑄨. 𑄖𑄁 𑄛𑄚 𑄛𑄑𑄨𑄇𑄴𑄈𑄨𑄖𑄴𑄖𑄁. 𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄦𑄨 𑄃𑄙𑄨𑄟𑄧𑄚𑄨𑄇𑄥𑄴𑄥 𑄚𑄨𑄊𑄁𑄥𑄬 𑄇𑄗𑄨𑄖𑄬 𑄥𑄪𑄇𑄴𑄈𑄤𑄨𑄛𑄥𑄴𑄥𑄇𑄥𑄴𑄥𑄛𑄨 𑄃𑄙𑄨𑄟𑄧𑄚𑄨𑄇𑄥𑄴𑄥 𑄇𑄗𑄨𑄖𑄮𑄤 𑄦𑄮𑄖𑄨, 𑄥𑄟𑄧𑄛𑄖𑄴𑄖𑄨𑄣𑄧𑄞𑄨𑄚𑄮 𑄌 𑄈𑄩𑄕𑄧𑄥𑄤𑄥𑄴𑄥 𑄇𑄗𑄨𑄖𑄬 𑄥𑄪𑄇𑄴𑄈𑄤𑄨𑄛𑄥𑄴𑄥𑄇𑄈𑄩𑄕𑄧𑄥𑄤𑄥𑄴𑄥 𑄇𑄗𑄨𑄖𑄮𑄤 𑄦𑄮𑄖𑄨. 𑄆𑄖𑄬𑄥𑄁 𑄛𑄚 𑄘𑄴𑄤𑄨𑄚𑄴𑄚𑄁 𑄞𑄨𑄇𑄴𑄈𑄫𑄚𑄁 𑄥𑄛𑄴𑄛𑄧𑄡𑄧𑄥𑄛𑄴𑄛𑄧𑄡𑄁 𑄇𑄗𑄬𑄖𑄪𑄁 𑄄𑄟𑄁 𑄘𑄬𑄥𑄚𑄁 𑄃𑄂𑄢𑄞𑄨.

𑄖𑄖𑄴𑄗 𑄥𑄨𑄡𑄧 – 𑄛𑄪𑄗𑄪𑄎𑄴𑄎𑄚𑄥𑄴𑄥 𑄖𑄧𑄤 𑄃𑄂𑄢𑄟𑄴𑄟𑄕𑄁 𑄃𑄥𑄛𑄴𑄛𑄧𑄡𑄁 𑄦𑄮𑄖𑄪, 𑄈𑄩𑄕𑄧𑄥𑄤𑄥𑄴𑄥 𑄇𑄗𑄁 𑄃𑄥𑄛𑄴𑄛𑄧𑄡𑄚𑄴𑄖𑄨. 𑄡𑄘𑄉𑄴𑄉𑄬𑄚 𑄛𑄪𑄗𑄪𑄎𑄴𑄎𑄚𑄥𑄴𑄥 𑄃𑄥𑄛𑄴𑄛𑄧𑄡𑄁, 𑄖𑄘𑄉𑄴𑄉𑄬𑄚 𑄈𑄩𑄕𑄧𑄥𑄤𑄥𑄴𑄥𑄧𑄛𑄨 𑄃𑄥𑄛𑄴𑄛𑄧𑄡𑄟𑄬𑄤. 𑄤𑄨𑄥𑄁 𑄚𑄧𑄟 𑄎𑄧𑄚𑄨𑄖𑄴𑄤𑄧 𑄈𑄧𑄘𑄨𑄖𑄟𑄴𑄛𑄨 𑄃𑄎𑄧𑄚𑄨𑄖𑄴𑄤𑄧 𑄈𑄧𑄘𑄨𑄖𑄟𑄴𑄛𑄨 𑄤𑄨𑄥𑄟𑄬𑄤. 𑄚 𑄦𑄨 𑄈𑄩𑄕𑄧𑄥𑄤𑄬𑄚𑄛𑄨 ‘‘𑄃𑄦𑄁 𑄈𑄩𑄕𑄧𑄥𑄤𑄮’’𑄖𑄨 𑄃𑄥𑄁𑄤𑄪𑄖𑄬𑄚 𑄞𑄤𑄨𑄖𑄝𑄴𑄝𑄁. 𑄈𑄩𑄕𑄧𑄥𑄤𑄬𑄚𑄛𑄨 𑄡𑄪𑄖𑄴𑄖𑄛𑄡𑄪𑄖𑄴𑄖𑄬𑄚𑄬𑄤 𑄞𑄤𑄨𑄖𑄪𑄁 𑄤𑄑𑄴𑄑𑄖𑄨.

𑄼𑄺. 𑄖𑄖𑄴𑄗 𑄥𑄟𑄕𑄬𑄚𑄧𑄖𑄨 𑄝𑄪𑄘𑄴𑄙𑄥𑄟𑄕𑄬𑄚. 𑄍𑄚𑄴𑄘𑄢𑄧𑄉𑄝𑄴𑄡𑄧𑄛𑄧𑄘𑄬𑄚𑄧𑄖𑄨 𑄥𑄮 𑄃𑄤𑄨𑄎𑄴𑄎𑄧𑄥𑄋𑄴𑄈𑄧𑄖𑄮 𑄤𑄨𑄥𑄘𑄮𑄥𑄮 𑄍𑄚𑄴𑄘𑄢𑄧𑄉𑄬𑄚 𑄌 𑄝𑄴𑄡𑄧𑄛𑄧𑄘𑄬𑄚 𑄌 𑄢𑄪𑄛𑄴𑄛𑄖𑄨 𑄇𑄪𑄛𑄴𑄛𑄖𑄨. 𑄃𑄥𑄛𑄴𑄛𑄧𑄡𑄧𑄚𑄩𑄖𑄨 𑄃𑄤𑄓𑄴𑄔𑄨𑄇𑄢𑄧𑄚𑄨 𑄃𑄂𑄢𑄟𑄴𑄟𑄕𑄧𑄚𑄨. 𑄃𑄚𑄪𑄘𑄴𑄙𑄁𑄥𑄬𑄡𑄴𑄡𑄧𑄖𑄨 𑄥𑄮𑄥𑄬𑄡𑄴𑄡 𑄟𑄨𑄣𑄧𑄛𑄬𑄡𑄴𑄡. 𑄥𑄅𑄛𑄧𑄘𑄨𑄥𑄬𑄥𑄚𑄴𑄖𑄨 𑄥𑄉𑄦𑄕𑄥𑄬𑄥𑄁, 𑄅𑄛𑄧𑄘𑄨𑄖𑄝𑄴𑄝𑄁 𑄉𑄕𑄴𑄦𑄨𑄖𑄝𑄴𑄝𑄁 𑄄𑄙 𑄅𑄛𑄧𑄘𑄩𑄖𑄨 𑄤𑄪𑄖𑄴𑄖𑄁. 𑄃𑄚𑄣𑄐𑄴𑄌 𑄖𑄬 𑄃𑄚𑄴𑄖𑄢𑄧𑄡𑄧𑄡𑄧𑄖𑄨 𑄎𑄩𑄤𑄨𑄖𑄚𑄴𑄖𑄢𑄧𑄡𑄁 𑄖𑄬 𑄇𑄧𑄖𑄪𑄁 𑄃𑄥𑄟𑄖𑄴𑄗𑄁. 𑄢𑄎𑄮𑄥𑄫𑄇𑄚𑄴𑄖𑄨 𑄢𑄎𑄮 𑄌 𑄤𑄩𑄦𑄨𑄥𑄪𑄇𑄧𑄘𑄨 𑄌 𑄥𑄫𑄇𑄁. 𑄃𑄥𑄪 𑄌 𑄤𑄨𑄥𑄘𑄮𑄥𑄮𑄖𑄨 𑄥𑄮 𑄌 𑄤𑄨𑄥𑄘𑄮𑄥𑄮. 𑄖𑄘𑄪𑄞𑄡𑄬𑄚𑄧𑄖𑄨 𑄡𑄧 𑄥𑄧 𑄃𑄥𑄛𑄴𑄛𑄧𑄡𑄇𑄨𑄢𑄨𑄡𑄧 𑄌 𑄡𑄮 𑄤𑄨𑄥𑄘𑄮𑄥𑄮 𑄌, 𑄖𑄬𑄚 𑄅𑄞𑄡𑄬𑄚. 𑄛𑄪𑄗𑄪𑄖𑄴𑄖𑄚𑄴𑄖𑄨 𑄟𑄦𑄚𑄴𑄖𑄞𑄧𑄤𑄁.

𑄆𑄤𑄟𑄬𑄤 𑄈𑄮𑄖𑄨 𑄆𑄖𑄴𑄗 𑄥𑄅𑄛𑄧𑄘𑄧𑄚𑄥𑄣𑄴𑄣𑄪𑄘𑄴𑄙𑄧𑄢𑄮 𑄤𑄨𑄡 𑄃𑄛𑄴𑄛𑄦𑄩𑄚𑄮 𑄃𑄤𑄨𑄎𑄴𑄎𑄧𑄤𑄨𑄥𑄘𑄮𑄥𑄮 𑄘𑄑𑄴𑄒𑄝𑄴𑄝𑄮, 𑄃𑄥𑄛𑄴𑄛𑄧𑄡𑄇𑄨𑄢𑄨𑄡𑄧𑄡 𑄒𑄨𑄖𑄞𑄧𑄤𑄮 𑄤𑄨𑄡 𑄍𑄥𑄪 𑄘𑄴𑄤𑄧𑄢𑄬𑄥𑄪 𑄃𑄥𑄁𑄤𑄪𑄖𑄇𑄧𑄣𑄮, 𑄖𑄘𑄪𑄞𑄡𑄬𑄚 𑄤𑄕𑄬 𑄛𑄪𑄗𑄪𑄖𑄴𑄖𑄁 𑄉𑄖𑄬 𑄟𑄢𑄕𑄁 𑄤𑄨𑄡 𑄥𑄨𑄇𑄴𑄈𑄁 𑄛𑄌𑄴𑄌𑄇𑄴𑄈𑄧𑄡 𑄦𑄩𑄚𑄧𑄡𑄧𑄤𑄖𑄴𑄖𑄚𑄁, 𑄟𑄢𑄕𑄟𑄖𑄴𑄖𑄁 𑄘𑄪𑄇𑄴𑄈𑄁 𑄤𑄨𑄡 𑄃𑄐𑄴𑄐𑄖𑄢𑄧𑄡 𑄉𑄢𑄪𑄇𑄧𑄡 𑄥𑄁𑄇𑄨𑄣𑄨𑄑𑄴𑄒𑄧𑄡 𑄃𑄂𑄛𑄖𑄴𑄖𑄨𑄡𑄧 𑄃𑄂𑄛𑄎𑄴𑄎𑄚𑄁 𑄘𑄑𑄴𑄒𑄝𑄴𑄝𑄁. 𑄥𑄪𑄇𑄴𑄇𑄛𑄇𑄴𑄈𑄬𑄛𑄨 𑄄𑄟𑄨𑄚𑄧𑄤 𑄚𑄡𑄬𑄚 𑄃𑄮𑄛𑄟𑄴𑄟𑄥𑄁𑄥𑄚𑄴𑄘𑄚𑄁 𑄤𑄬𑄘𑄨𑄖𑄝𑄴𑄝𑄁.

𑄼𑄻. 𑄥𑄖𑄨𑄡𑄧𑄡𑄬𑄖𑄁 𑄃𑄙𑄨𑄤𑄌𑄚𑄚𑄴𑄖𑄨 𑄆𑄖𑄴𑄗 𑄥𑄖𑄨 𑄛𑄐𑄴𑄐𑄧𑄉𑄖𑄨𑄇𑄧. 𑄣𑄮𑄇𑄨𑄇𑄧𑄡 𑄛𑄐𑄴𑄐𑄧𑄡 𑄣𑄮𑄇𑄨𑄇𑄧 𑄦𑄮𑄖𑄨, 𑄣𑄮𑄇𑄪𑄖𑄴𑄖𑄢𑄧𑄡 𑄣𑄮𑄇𑄪𑄖𑄴𑄖𑄢𑄧. 𑄃𑄢𑄨𑄡𑄧𑄡𑄬𑄖𑄁 𑄛𑄐𑄴𑄐𑄧𑄡𑄧𑄖𑄨 𑄛𑄢𑄨𑄥𑄪𑄘𑄴𑄙𑄧𑄡 𑄤𑄨𑄛𑄥𑄴𑄥𑄚𑄧𑄛𑄐𑄴𑄐𑄧𑄡.

𑄄𑄘𑄧𑄚𑄨 𑄈𑄩𑄕𑄧𑄥𑄤𑄥𑄴𑄥 𑄝𑄣𑄁 𑄘𑄥𑄴𑄥𑄬𑄚𑄴𑄖𑄮 𑄥𑄮 𑄤𑄖𑄧𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄥𑄁𑄤𑄪𑄖𑄇𑄧𑄢𑄩𑄖𑄨 𑄛𑄨𑄦𑄨𑄖𑄇𑄧𑄢𑄩. 𑄄𑄖𑄨 𑄤𑄨𑄘𑄨𑄖𑄴𑄤𑄧 𑄚𑄨𑄢𑄪𑄛𑄙𑄩𑄖𑄨 𑄆𑄤𑄁 𑄎𑄧𑄚𑄨𑄖𑄴𑄤𑄧 𑄇𑄨𑄣𑄬𑄥𑄪𑄛𑄙𑄨𑄛𑄦𑄧𑄚𑄧 𑄚𑄨𑄢𑄪𑄛𑄙𑄨 𑄦𑄮𑄖𑄨, 𑄚𑄨𑄢𑄪𑄛𑄧𑄘𑄧𑄚𑄮𑄖𑄨 𑄃𑄖𑄴𑄗𑄮. 𑄅𑄛𑄙𑄨𑄥𑄋𑄴𑄈𑄡𑄬 𑄤𑄨𑄟𑄪𑄖𑄴𑄖𑄮𑄖𑄨 𑄅𑄛𑄙𑄩𑄚𑄁 𑄥𑄋𑄴𑄈𑄡𑄞𑄫𑄖𑄬 𑄚𑄨𑄝𑄴𑄝𑄧𑄚𑄬 𑄃𑄂𑄢𑄟𑄴𑄟𑄕𑄖𑄮 𑄤𑄨𑄟𑄪𑄖𑄴𑄖𑄮. 𑄅𑄛𑄙𑄨𑄥𑄴𑄟𑄨𑄚𑄴𑄖𑄨 𑄇𑄧𑄟𑄪𑄛𑄙𑄨𑄥𑄴𑄟𑄨𑄁. 𑄇𑄧𑄡𑄁 𑄅𑄛𑄥𑄁𑄦𑄢𑄨𑄥𑄴𑄥𑄖𑄩𑄖𑄨 𑄇𑄧𑄡𑄁 𑄃𑄣𑄴𑄣𑄩𑄡𑄧𑄛𑄬𑄥𑄴𑄥𑄖𑄨. 𑄄𑄘𑄁 𑄤𑄪𑄖𑄴𑄖𑄁 𑄦𑄮𑄖𑄨 – 𑄖𑄕𑄴𑄦𑄇𑄴𑄈𑄡𑄬 𑄚𑄨𑄝𑄴𑄝𑄧𑄚𑄬 𑄃𑄂𑄢𑄟𑄴𑄟𑄕𑄖𑄮 𑄤𑄨𑄟𑄪𑄖𑄴𑄖𑄮 𑄈𑄩𑄕𑄧𑄥𑄤𑄮 𑄛𑄐𑄴𑄌 𑄇𑄧𑄟𑄉𑄪𑄕𑄬 𑄥𑄬𑄤𑄨𑄖𑄪𑄁, 𑄇𑄧𑄡𑄁 𑄤𑄧 𑄅𑄛𑄥𑄁𑄦𑄢𑄨𑄥𑄴𑄥𑄖𑄨 𑄌𑄨𑄖𑄴𑄖𑄁 𑄤𑄧 𑄅𑄛𑄴𑄛𑄧𑄘𑄬𑄥𑄴𑄥𑄖𑄩𑄖𑄨 𑄚𑄬𑄖𑄁 𑄒𑄧𑄚𑄁 𑄤𑄨𑄎𑄴𑄎𑄖𑄨. 𑄥𑄬𑄥𑄁 𑄥𑄝𑄴𑄝𑄖𑄴𑄗 𑄅𑄖𑄴𑄖𑄧𑄚𑄖𑄴𑄗𑄟𑄬𑄤𑄧𑄖𑄨.

𑄛𑄛𑄐𑄴𑄌𑄥𑄫𑄘𑄚𑄨𑄡𑄧 𑄟𑄎𑄴𑄏𑄨𑄟𑄚𑄨𑄇𑄧𑄡𑄑𑄴𑄒𑄇𑄗𑄧𑄡

𑄥𑄪𑄚𑄇𑄴𑄈𑄖𑄴𑄖𑄥𑄪𑄖𑄴𑄖𑄤𑄕𑄴𑄕𑄚𑄧 𑄚𑄨𑄑𑄴𑄒𑄨𑄖𑄧.

𑄼. 𑄃𑄂𑄚𑄬𑄐𑄴𑄎𑄥𑄛𑄴𑄛𑄧𑄡𑄥𑄪𑄖𑄴𑄖𑄤𑄕𑄴𑄕𑄚𑄧

𑄼𑄼. 𑄆𑄤𑄁 𑄟𑄬 𑄥𑄪𑄖𑄚𑄴𑄖𑄨 𑄃𑄂𑄚𑄬𑄐𑄴𑄎𑄥𑄛𑄴𑄛𑄧𑄡𑄥𑄪𑄖𑄴𑄖𑄁. 𑄖𑄖𑄴𑄗 𑄃𑄚𑄨𑄌𑄴𑄌𑄧𑄖𑄨 𑄦𑄪𑄖𑄴𑄤𑄧 𑄃𑄞𑄧𑄤𑄑𑄴𑄒𑄬𑄚 𑄃𑄚𑄨𑄌𑄴𑄌𑄧. 𑄇𑄧𑄟𑄧𑄖𑄨 𑄤𑄖𑄴𑄗𑄪𑄇𑄧𑄟𑄧𑄛𑄨 𑄇𑄨𑄣𑄬𑄥𑄇𑄧𑄟𑄧𑄛𑄨. 𑄖𑄪𑄌𑄴𑄍𑄧𑄖𑄨 𑄚𑄨𑄌𑄴𑄌𑄥𑄧𑄢𑄙𑄪𑄤𑄥𑄧𑄢𑄃𑄖𑄴𑄖𑄥𑄧𑄢𑄤𑄨𑄢𑄦𑄨𑄖𑄖𑄴𑄖𑄧 𑄢𑄨𑄖𑄴𑄖𑄧, 𑄚 𑄛𑄚 𑄚𑄖𑄴𑄗𑄩𑄖𑄨 𑄉𑄦𑄬𑄖𑄝𑄴𑄝𑄧. 𑄚 𑄦𑄨 𑄖𑄪𑄌𑄴𑄍𑄟𑄪𑄑𑄴𑄒𑄩𑄖𑄨 𑄤𑄪𑄖𑄴𑄖𑄬 𑄟𑄪𑄑𑄴𑄒𑄨 𑄚𑄧𑄟 𑄚𑄖𑄴𑄗𑄩𑄖𑄨 𑄤𑄪𑄖𑄴𑄖𑄁 𑄦𑄮𑄖𑄨. 𑄡𑄥𑄴𑄥 𑄛𑄚 𑄃𑄝𑄴𑄞𑄚𑄴𑄖𑄢𑄬 𑄇𑄨𑄐𑄴𑄌𑄨 𑄚𑄖𑄴𑄗𑄨, 𑄥𑄮 𑄤𑄪𑄌𑄴𑄌𑄖𑄨 𑄖𑄪𑄌𑄴𑄍𑄮. 𑄟𑄪𑄥𑄧𑄖𑄨 𑄚𑄧𑄥𑄚𑄇𑄧. 𑄟𑄮𑄥𑄙𑄟𑄴𑄟𑄧𑄖𑄨 𑄚𑄥𑄴𑄥𑄚𑄥𑄞𑄧𑄤𑄧, 𑄈𑄬𑄖𑄴𑄖𑄁 𑄤𑄨𑄡 𑄤𑄖𑄴𑄗𑄪 𑄤𑄨𑄡 𑄦𑄨𑄢𑄐𑄴𑄐𑄥𑄪𑄤𑄕𑄴𑄕𑄁 𑄤𑄨𑄡 𑄌 𑄚 𑄛𑄐𑄴𑄐𑄧𑄡𑄨𑄖𑄴𑄗, 𑄇𑄖𑄨𑄛𑄧𑄦𑄬𑄚𑄬𑄤 𑄥𑄪𑄛𑄨𑄚𑄇𑄬 𑄘𑄨𑄑𑄴𑄒𑄧 𑄤𑄨𑄡 𑄚𑄥𑄴𑄥𑄚𑄴𑄖𑄨 𑄚 𑄛𑄐𑄴𑄐𑄧𑄡𑄚𑄴𑄖𑄨. 𑄖𑄬𑄚 𑄤𑄪𑄖𑄴𑄖𑄁 ‘‘𑄟𑄮𑄥𑄙𑄟𑄴𑄟𑄧’’𑄖𑄨, 𑄟𑄧𑄡𑄧𑄇𑄖𑄟𑄬𑄖𑄚𑄴𑄖𑄨 𑄡𑄗𑄧 𑄟𑄧𑄡𑄧𑄡 𑄅𑄘𑄇𑄁 𑄟𑄕𑄩𑄖𑄨 𑄇𑄖𑄴𑄤𑄧 𑄘𑄥𑄴𑄥𑄨𑄖𑄁, 𑄝𑄘𑄢𑄨𑄛𑄕𑄴𑄕𑄁 𑄇𑄦𑄧𑄛𑄕𑄮𑄖𑄨 𑄇𑄖𑄴𑄤𑄧 𑄘𑄥𑄴𑄥𑄨𑄖𑄁, 𑄃𑄐𑄴𑄐𑄁 𑄤𑄧 𑄛𑄚 𑄆𑄤𑄢𑄫𑄛𑄁 𑄘𑄥𑄴𑄥𑄚𑄫𑄛𑄌𑄧𑄢𑄬 𑄒𑄨𑄖𑄥𑄴𑄥𑄬𑄤 𑄖𑄗𑄧 𑄛𑄐𑄴𑄐𑄧𑄡𑄖𑄨, 𑄅𑄛𑄌𑄧𑄢𑄧𑄖𑄨𑄇𑄴𑄇𑄟𑄖𑄮 𑄛𑄑𑄴𑄒𑄧𑄡 𑄛𑄧𑄇𑄖𑄨𑄇𑄟𑄬𑄤 𑄛𑄐𑄴𑄐𑄧𑄡𑄖𑄨. 𑄆𑄤𑄁 𑄇𑄧𑄟𑄧𑄛𑄨 𑄄𑄖𑄴𑄖𑄢𑄛𑄌𑄴𑄌𑄪𑄛𑄑𑄴𑄒𑄧𑄚𑄑𑄴𑄒𑄬𑄚 ‘‘𑄟𑄧𑄡𑄧𑄇𑄖’’𑄚𑄴𑄖𑄨 𑄤𑄪𑄖𑄴𑄖𑄧. 𑄡𑄗𑄧 𑄌 𑄟𑄧𑄡𑄧𑄇𑄧𑄢𑄮 𑄅𑄘𑄇𑄧𑄘𑄩𑄚𑄨 𑄟𑄕𑄨𑄃𑄂𑄘𑄩𑄚𑄁 𑄤𑄥𑄬𑄚 𑄘𑄥𑄴𑄥𑄬𑄚𑄴𑄖𑄮 𑄤𑄐𑄴𑄌𑄬𑄖𑄨, 𑄆𑄤𑄁 𑄇𑄧𑄟𑄧𑄛𑄨 𑄃𑄚𑄨𑄌𑄴𑄌𑄧𑄘𑄩𑄚𑄨 𑄚𑄨𑄌𑄴𑄌𑄧𑄘𑄨𑄥𑄞𑄧𑄤𑄁 𑄘𑄥𑄴𑄥𑄬𑄚𑄴𑄖𑄧 𑄤𑄐𑄴𑄌𑄬𑄚𑄴𑄖𑄩𑄖𑄨 𑄤𑄐𑄴𑄌𑄚𑄇𑄑𑄴𑄒𑄬𑄚𑄛𑄨 ‘‘𑄟𑄧𑄡𑄧𑄇𑄖’’𑄚𑄴𑄖𑄨 𑄤𑄪𑄖𑄴𑄖𑄧. 𑄝𑄧𑄣𑄣𑄧𑄛𑄚𑄚𑄴𑄖𑄨 𑄟𑄡𑄴𑄦𑄁 𑄛𑄪𑄖𑄴𑄖𑄮, 𑄟𑄡𑄴𑄦𑄁 𑄙𑄩𑄖𑄧, 𑄟𑄡𑄴𑄦𑄁 𑄦𑄨𑄢𑄐𑄴𑄐𑄁 𑄟𑄡𑄴𑄦𑄁 𑄥𑄪𑄤𑄕𑄴𑄕𑄚𑄴𑄖𑄨 𑄆𑄤𑄁 𑄝𑄧𑄣𑄧𑄚𑄁 𑄣𑄧𑄛𑄚𑄖𑄮 𑄝𑄧𑄣𑄣𑄧𑄛𑄚𑄁. 𑄘𑄨𑄑𑄴𑄒𑄙𑄟𑄴𑄟𑄨𑄇𑄧 𑄇𑄧𑄟𑄧𑄖𑄨 𑄟𑄧𑄚𑄪𑄥𑄇𑄧 𑄛𑄐𑄴𑄌 𑄇𑄧𑄟𑄉𑄪𑄕𑄧. 𑄥𑄟𑄴𑄛𑄢𑄧𑄡𑄨𑄇𑄧𑄖𑄨 𑄖𑄬 𑄒𑄛𑄬𑄖𑄴𑄤𑄧 𑄃𑄤𑄥𑄬𑄥𑄧. 𑄘𑄨𑄑𑄴𑄒𑄙𑄟𑄴𑄟𑄨𑄇𑄧. 𑄇𑄧𑄟𑄥𑄐𑄴𑄐𑄧𑄖𑄨 𑄟𑄧𑄚𑄪𑄥𑄇𑄬 𑄇𑄧𑄟𑄬 𑄃𑄂𑄢𑄝𑄴𑄞 𑄅𑄛𑄴𑄛𑄚𑄴𑄚𑄥𑄐𑄴𑄐𑄧. 𑄅𑄞𑄡𑄟𑄬𑄖𑄁 𑄟𑄧𑄢𑄙𑄬𑄡𑄴𑄡𑄚𑄴𑄖𑄨 𑄆𑄖𑄬 𑄇𑄧𑄟𑄧 𑄌 𑄇𑄧𑄟𑄥𑄐𑄴𑄐𑄧 𑄌 𑄅𑄞𑄡𑄟𑄴𑄛𑄨 𑄟𑄧𑄢𑄙𑄬𑄡𑄴𑄡𑄁. 𑄡𑄬𑄦𑄨 𑄅𑄞𑄡𑄟𑄬𑄖𑄁 𑄉𑄦𑄨𑄖𑄁, 𑄖𑄬𑄥𑄐𑄴𑄦𑄨 𑄅𑄛𑄢𑄨 𑄟𑄧𑄢𑄮 𑄤𑄥𑄁 𑄤𑄖𑄴𑄖𑄬𑄖𑄨. 𑄖𑄁 𑄥𑄚𑄴𑄙𑄧𑄡 ‘‘𑄅𑄞𑄡𑄟𑄬𑄖𑄁 𑄟𑄧𑄢𑄙𑄬𑄡𑄴𑄡’’𑄚𑄴𑄖𑄨 𑄤𑄪𑄖𑄴𑄖𑄁.

𑄟𑄧𑄢𑄥𑄴𑄥𑄬𑄥 𑄤𑄨𑄥𑄡𑄮𑄖𑄨𑄃𑄂𑄘𑄩𑄥𑄪𑄛𑄨 𑄡𑄗𑄧 𑄌𑄮𑅄𑄥𑄴𑄥 𑄤𑄨𑄥𑄡𑄮 𑄌𑄮𑅄𑄤𑄨𑄥𑄡𑄮, 𑄛𑄕𑄴𑄓𑄥𑄴𑄥 𑄤𑄨𑄥𑄡𑄮 𑄛𑄕𑄴𑄓𑄤𑄨𑄥𑄡𑄮, 𑄥𑄁𑄤𑄢𑄧𑄚𑄁 𑄤𑄨𑄥𑄡𑄮 𑄥𑄁𑄤𑄢𑄤𑄨𑄥𑄡𑄮𑄖𑄨 𑄛𑄤𑄖𑄴𑄖𑄚𑄑𑄴𑄒𑄧𑄚𑄁 𑄤𑄨𑄥𑄡𑄮𑄖𑄨 𑄤𑄪𑄌𑄴𑄌𑄖𑄨, 𑄆𑄤𑄁 𑄡𑄬𑄦𑄨 𑄆𑄖𑄬 𑄇𑄧𑄟𑄧 𑄉𑄦𑄨𑄖𑄧, 𑄖𑄬𑄥𑄁 𑄅𑄛𑄢𑄨 𑄟𑄧𑄢𑄮 𑄤𑄥𑄁 𑄤𑄖𑄴𑄖𑄬𑄖𑄨. 𑄖𑄁 𑄥𑄚𑄴𑄙𑄧𑄡 𑄟𑄧𑄢𑄥𑄴𑄥𑄬𑄥 𑄤𑄨𑄥𑄡𑄮𑄖𑄨 𑄤𑄪𑄖𑄴𑄖𑄁. 𑄛𑄐𑄴𑄌 𑄛𑄚 𑄇𑄧𑄟𑄉𑄪𑄕𑄬 𑄚𑄨𑄤𑄧𑄛𑄝𑄩𑄎𑄁 𑄤𑄨𑄡 𑄤𑄨𑄛𑄴𑄛𑄇𑄨𑄢𑄚𑄴𑄖𑄮 𑄟𑄧𑄢𑄮 𑄉𑄌𑄴𑄍𑄖𑄨. 𑄡𑄬𑄦𑄨 𑄛𑄚 𑄖𑄬 𑄉𑄦𑄨𑄖𑄧, 𑄖𑄬𑄥𑄁 𑄅𑄛𑄢𑄨 𑄟𑄧𑄢𑄮 𑄤𑄥𑄁 𑄤𑄖𑄴𑄖𑄬𑄖𑄨. 𑄖𑄁 𑄥𑄚𑄴𑄙𑄧𑄡 𑄟𑄧𑄢𑄥𑄴𑄥𑄬𑄥 𑄚𑄨𑄤𑄧𑄛𑄮𑄖𑄨 𑄤𑄪𑄖𑄴𑄖𑄁. 𑄡𑄗𑄧 𑄌 𑄡𑄖𑄴𑄗 𑄦𑄖𑄴𑄗𑄨𑄃𑄂𑄘𑄡𑄮 𑄤𑄥𑄁 𑄤𑄖𑄴𑄖𑄬𑄚𑄴𑄖𑄨, 𑄥𑄮 𑄦𑄖𑄴𑄗𑄨𑄉𑄮𑄌𑄢𑄮 𑄃𑄥𑄴𑄥𑄉𑄮𑄌𑄢𑄮 𑄃𑄎𑄉𑄮𑄌𑄢𑄮𑄖𑄨 𑄤𑄪𑄌𑄴𑄌𑄖𑄨, 𑄆𑄤𑄁 𑄡𑄬𑄦𑄨 𑄆𑄖𑄬 𑄇𑄧𑄟𑄧 𑄉𑄦𑄨𑄖𑄧, 𑄖𑄬𑄥𑄪 𑄟𑄧𑄢𑄮 𑄤𑄥𑄁 𑄤𑄖𑄴𑄖𑄬𑄖𑄨. 𑄖𑄁 𑄥𑄚𑄴𑄙𑄧𑄡 𑄟𑄧𑄢𑄥𑄴𑄥𑄬𑄥 𑄉𑄮𑄌𑄢𑄮𑄖𑄨 𑄤𑄪𑄖𑄴𑄖𑄁.

𑄆𑄖𑄴𑄗𑄧𑄖𑄨 𑄆𑄖𑄬𑄥𑄪 𑄇𑄧𑄟𑄬𑄥𑄪. 𑄟𑄧𑄚𑄥𑄧𑄖𑄨 𑄌𑄨𑄖𑄴𑄖𑄥𑄟𑄴𑄞𑄫𑄖𑄧. 𑄖𑄖𑄴𑄗 𑄥𑄨𑄡𑄧 – 𑄘𑄪𑄤𑄨𑄙𑄬 𑄖𑄧𑄤 𑄇𑄧𑄟𑄬 𑄃𑄂𑄢𑄝𑄴𑄞 𑄃𑄞𑄨𑄎𑄴𑄏𑄧𑄚𑄣𑄇𑄴𑄈𑄕𑄧 𑄃𑄞𑄨𑄎𑄴𑄏𑄧, 𑄇𑄢𑄕𑄪𑄖𑄴𑄖𑄢𑄨𑄡𑄣𑄇𑄴𑄈𑄕𑄮 𑄥𑄧𑄢𑄟𑄴𑄞𑄮 𑄌 𑄅𑄛𑄴𑄛𑄎𑄴𑄎𑄖𑄪, 𑄝𑄴𑄡𑄧𑄛𑄧𑄘𑄮 𑄇𑄗𑄁 𑄅𑄛𑄴𑄛𑄎𑄴𑄎𑄖𑄩𑄖𑄨? 𑄟𑄟𑄧𑄡𑄨𑄖𑄬 𑄤𑄖𑄴𑄗𑄪𑄥𑄴𑄟𑄨𑄁 𑄃𑄌𑄴𑄍𑄨𑄚𑄴𑄚𑄬𑄛𑄨 𑄥𑄮𑄌𑄚𑄴𑄖𑄨, 𑄃𑄌𑄴𑄍𑄨𑄎𑄴𑄎𑄚𑄴𑄖𑄬𑄛𑄨 𑄥𑄮𑄌𑄚𑄴𑄖𑄨, 𑄃𑄌𑄴𑄍𑄨𑄚𑄴𑄚𑄥𑄋𑄴𑄇𑄨𑄚𑄮𑄛𑄨 𑄥𑄮𑄌𑄚𑄴𑄖𑄨, 𑄡𑄮 𑄆𑄤𑄢𑄫𑄛𑄮 𑄌𑄨𑄖𑄴𑄖𑄥𑄴𑄥 𑄃𑄂𑄊𑄧𑄖𑄮𑄖𑄨 𑄆𑄤𑄁 𑄅𑄛𑄴𑄛𑄎𑄴𑄎𑄖𑄨. 𑄖𑄬𑄤 𑄃𑄢𑄨𑄡𑄥𑄧𑄤𑄇𑄥𑄴𑄥𑄧𑄖𑄨 𑄖𑄬 𑄃𑄢𑄨𑄡𑄥𑄧𑄤𑄇𑄥𑄴𑄥. 𑄤𑄇𑄧𑄢𑄮 𑄃𑄂𑄉𑄟𑄥𑄚𑄴𑄙𑄨𑄟𑄖𑄴𑄖𑄁 𑄦𑄮𑄖𑄨. 𑄄𑄙 𑄟𑄚𑄪𑄥𑄨𑄇𑄴𑄈𑄖𑄮𑄖𑄨 𑄄𑄟𑄥𑄴𑄟𑄨𑄁 𑄥𑄧𑄥𑄚𑄬 𑄥𑄨𑄇𑄴𑄈𑄚𑄴𑄖𑄥𑄴𑄥 𑄖𑄬 𑄖𑄡𑄮𑄛𑄨 𑄇𑄨𑄣𑄬𑄥𑄧 𑄃𑄚𑄴𑄖𑄢𑄧𑄡𑄇𑄢𑄧 𑄦𑄮𑄚𑄴𑄖𑄨. 𑄃𑄞𑄨𑄞𑄪𑄡𑄴𑄡 𑄣𑄮𑄇𑄚𑄴𑄖𑄨 𑄇𑄧𑄟𑄣𑄮𑄇𑄁 𑄃𑄞𑄨𑄞𑄤𑄨𑄖𑄴𑄤𑄧. 𑄃𑄙𑄨𑄑𑄴𑄒𑄧𑄡 𑄟𑄚𑄥𑄧𑄖𑄨 𑄏𑄧𑄚𑄧𑄢𑄟𑄴𑄟𑄕𑄌𑄨𑄖𑄴𑄖𑄬𑄚 𑄃𑄙𑄨𑄑𑄴𑄒𑄦𑄨𑄖𑄴𑄤𑄧. 𑄃𑄛𑄢𑄨𑄖𑄴𑄖𑄚𑄴𑄖𑄨 𑄇𑄧𑄟𑄧𑄤𑄌𑄢𑄌𑄨𑄖𑄴𑄖𑄁 𑄛𑄢𑄨𑄖𑄴𑄖𑄁 𑄚𑄧𑄟, 𑄖𑄥𑄴𑄥 𑄛𑄑𑄨𑄇𑄴𑄈𑄬𑄛𑄬𑄚 𑄟𑄦𑄉𑄴𑄉𑄖𑄁 𑄃𑄛𑄢𑄨𑄖𑄴𑄖𑄁 𑄚𑄧𑄟. 𑄛𑄟𑄧𑄕𑄚𑄴𑄖𑄨𑄛𑄨 𑄇𑄧𑄟𑄧𑄤𑄌𑄢𑄟𑄬𑄤, 𑄢𑄫𑄛𑄧𑄤𑄌𑄢𑄁 𑄃𑄢𑄫𑄛𑄧𑄤𑄌𑄢𑄁 𑄃𑄛𑄴𑄛𑄟𑄧𑄕𑄁. 𑄥𑄪𑄞𑄧𑄤𑄨𑄖𑄚𑄴𑄖𑄨 𑄛𑄚 𑄆𑄖𑄁 𑄇𑄧𑄟𑄧𑄤𑄌𑄢𑄧𑄘𑄩𑄚𑄁 𑄚𑄧𑄟𑄁 𑄚 𑄦𑄮𑄖𑄨, 𑄣𑄮𑄇𑄪𑄖𑄴𑄖𑄢𑄥𑄴𑄥𑄬𑄤𑄬𑄖𑄁 𑄚𑄧𑄟𑄁. 𑄖𑄥𑄴𑄟𑄧 𑄆𑄖𑄥𑄴𑄥 𑄤𑄥𑄬𑄚 𑄃𑄛𑄢𑄨𑄖𑄴𑄖𑄁 𑄃𑄛𑄴𑄛𑄟𑄧𑄕𑄁 𑄥𑄪𑄞𑄧𑄤𑄨𑄖𑄚𑄴𑄖𑄨 𑄥𑄝𑄴𑄝𑄁 𑄣𑄮𑄇𑄪𑄖𑄴𑄖𑄢𑄟𑄬𑄤 𑄤𑄑𑄴𑄑𑄖𑄨.

𑄖𑄝𑄴𑄝𑄦𑄪𑄣𑄤𑄨𑄦𑄧𑄢𑄨𑄚𑄮𑄖𑄨 𑄇𑄧𑄟𑄛𑄑𑄨𑄝𑄧𑄦𑄚𑄬𑄚 𑄖𑄟𑄬𑄤 𑄛𑄑𑄨𑄛𑄘𑄁 𑄝𑄦𑄪𑄣𑄁 𑄇𑄖𑄴𑄤𑄧 𑄤𑄨𑄦𑄢𑄚𑄴𑄖𑄥𑄴𑄥. 𑄃𑄂𑄡𑄖𑄚𑄬 𑄌𑄨𑄖𑄴𑄖𑄁 𑄛𑄥𑄩𑄘𑄖𑄩𑄖𑄨 𑄇𑄧𑄢𑄕𑄬 𑄌𑄨𑄖𑄴𑄖𑄁 𑄛𑄥𑄩𑄘𑄖𑄨. 𑄇𑄨𑄁 𑄛𑄚𑄬𑄖𑄴𑄗 𑄇𑄧𑄢𑄕𑄁? 𑄃𑄢𑄦𑄖𑄴𑄖𑄁 𑄤𑄧, 𑄃𑄢𑄦𑄖𑄴𑄖𑄥𑄴𑄥 𑄤𑄨𑄛𑄥𑄴𑄥𑄚𑄁 𑄤𑄧, 𑄌𑄖𑄪𑄖𑄴𑄗𑄎𑄴𑄏𑄧𑄚𑄁 𑄤𑄧, 𑄌𑄖𑄪𑄖𑄴𑄗𑄎𑄴𑄏𑄧𑄚𑄥𑄴𑄥 𑄅𑄛𑄌𑄧𑄢𑄁 𑄤𑄧. 𑄥𑄟𑄴𑄛𑄥𑄧𑄘𑄬 𑄥𑄖𑄩𑄖𑄨 𑄆𑄖𑄴𑄗 𑄘𑄪𑄤𑄨𑄙𑄮 𑄥𑄟𑄴𑄛𑄥𑄧𑄘𑄮 𑄃𑄙𑄨𑄟𑄮𑄇𑄴𑄈𑄥𑄟𑄴𑄛𑄥𑄧𑄘𑄮 𑄌 𑄛𑄑𑄨𑄣𑄧𑄞𑄥𑄟𑄴𑄛𑄥𑄧𑄘𑄮 𑄌. 𑄃𑄢𑄦𑄖𑄴𑄖𑄥𑄴𑄥 𑄦𑄨 𑄤𑄨𑄛𑄥𑄴𑄥𑄚𑄁 𑄛𑄑𑄴𑄒𑄛𑄬𑄖𑄴𑄤𑄧 𑄤𑄨𑄦𑄢𑄖𑄮 𑄟𑄦𑄧𑄞𑄫𑄖𑄧𑄘𑄩𑄥𑄪 𑄅𑄛𑄑𑄴𑄒𑄦𑄚𑄴𑄖𑄬𑄥𑄪 𑄡𑄬𑄚𑄨𑄟𑄬 𑄚𑄩𑄦𑄧𑄢𑄬𑄚 𑄟𑄦𑄧𑄞𑄫𑄖𑄧 𑄅𑄛𑄑𑄴𑄒𑄦𑄚𑄴𑄖𑄨, 𑄅𑄛𑄧𑄘𑄧𑄢𑄫𑄛𑄧 𑄅𑄛𑄑𑄴𑄒𑄦𑄚𑄴𑄖𑄨 𑄚𑄧𑄟𑄢𑄫𑄛𑄧 𑄅𑄛𑄑𑄴𑄒𑄦𑄚𑄴𑄖𑄨, 𑄛𑄌𑄴𑄌𑄡𑄧 𑄥𑄝𑄴𑄝𑄗𑄧 𑄅𑄛𑄑𑄴𑄒𑄦𑄚𑄴𑄖𑄨, 𑄣𑄇𑄴𑄈𑄕𑄧𑄢𑄟𑄴𑄟𑄕𑄧 𑄤𑄨𑄛𑄥𑄴𑄥𑄚𑄧 𑄅𑄛𑄑𑄴𑄒𑄦𑄖𑄨, 𑄃𑄎𑄴𑄎𑄬𑄤 𑄃𑄢𑄦𑄖𑄴𑄖𑄁 𑄉𑄕𑄴𑄦𑄨𑄥𑄴𑄥𑄧𑄟𑄩𑄖𑄨 𑄃𑄛𑄴𑄛𑄑𑄨𑄣𑄘𑄴𑄙𑄬𑄡𑄬𑄤 𑄃𑄂𑄥𑄧 𑄥𑄚𑄴𑄖𑄨𑄑𑄴𑄒𑄖𑄨, 𑄃𑄙𑄨𑄟𑄮𑄇𑄴𑄈𑄁 𑄛𑄑𑄨𑄣𑄞𑄖𑄨. 𑄖𑄖𑄨𑄡𑄎𑄴𑄏𑄧𑄚𑄁 𑄤𑄧 𑄛𑄧𑄘𑄇𑄁 𑄇𑄖𑄴𑄤𑄧 𑄌𑄖𑄪𑄖𑄴𑄗𑄎𑄴𑄏𑄧𑄚𑄖𑄴𑄗𑄧𑄡 𑄇𑄥𑄨𑄕𑄛𑄢𑄨𑄇𑄟𑄴𑄟𑄁 𑄇𑄢𑄮𑄚𑄴𑄖𑄥𑄴𑄥 𑄚𑄩𑄤𑄢𑄕𑄤𑄨𑄇𑄴𑄈𑄟𑄴𑄞𑄚𑄧𑄘𑄩𑄚𑄨 𑄥𑄟𑄚𑄪𑄛𑄥𑄴𑄥𑄖𑄮 𑄡𑄬𑄚𑄨𑄟𑄬 𑄚𑄩𑄦𑄧𑄢𑄬𑄚 𑄚𑄩𑄤𑄢𑄕𑄧 𑄤𑄨𑄇𑄴𑄈𑄟𑄴𑄞𑄚𑄴𑄖𑄨, 𑄇𑄨𑄣𑄬𑄥𑄧 𑄥𑄚𑄴𑄚𑄨𑄥𑄩𑄘𑄚𑄴𑄖𑄨, 𑄥𑄖𑄨 𑄥𑄚𑄴𑄖𑄨𑄑𑄴𑄒𑄖𑄨, 𑄥𑄋𑄴𑄈𑄧𑄢𑄉𑄖𑄁 𑄤𑄧 𑄤𑄨𑄞𑄫𑄖𑄁 𑄛𑄧𑄇𑄑𑄁 𑄦𑄪𑄖𑄴𑄤𑄧 𑄘𑄨𑄝𑄴𑄝𑄌𑄇𑄴𑄈𑄪𑄇𑄥𑄴𑄥 𑄛𑄢𑄣𑄮𑄇𑄮 𑄤𑄨𑄡 𑄅𑄛𑄑𑄴𑄒𑄧𑄖𑄨, 𑄌𑄨𑄖𑄴𑄖𑄪𑄛𑄴𑄛𑄧𑄘𑄮 𑄣𑄬𑄛𑄛𑄨𑄕𑄴𑄓𑄬 𑄣𑄉𑄴𑄉𑄟𑄧𑄚𑄮 𑄤𑄨𑄡 𑄅𑄛𑄌𑄧𑄢𑄬𑄚 𑄥𑄟𑄧𑄙𑄨𑄡𑄖𑄨, 𑄃𑄎𑄴𑄎𑄬𑄤 𑄌𑄖𑄪𑄖𑄴𑄗𑄎𑄴𑄏𑄧𑄚𑄁 𑄚𑄨𑄝𑄴𑄝𑄖𑄴𑄖𑄬𑄥𑄴𑄥𑄧𑄟𑄩𑄖𑄨 𑄃𑄛𑄑𑄨𑄣𑄘𑄴𑄙𑄬𑄡𑄬𑄤 𑄃𑄂𑄥𑄧 𑄥𑄚𑄴𑄖𑄨𑄑𑄴𑄒𑄖𑄨, 𑄃𑄙𑄨𑄟𑄮𑄇𑄴𑄈𑄁 𑄛𑄑𑄨𑄣𑄞𑄖𑄨. 𑄃𑄡𑄁 𑄃𑄙𑄨𑄟𑄮𑄇𑄴𑄈𑄥𑄟𑄴𑄛𑄥𑄧𑄘𑄮 𑄚𑄧𑄟. 𑄖𑄥𑄴𑄟𑄨𑄁 𑄥𑄟𑄴𑄛𑄥𑄧𑄘𑄬 𑄥𑄖𑄨. 𑄡𑄮 𑄛𑄚 𑄃𑄢𑄦𑄖𑄴𑄖𑄁 𑄤𑄧 𑄛𑄑𑄨𑄣𑄞𑄖𑄨 𑄌𑄖𑄪𑄖𑄴𑄗𑄎𑄴𑄏𑄧𑄚𑄁 𑄤𑄧, 𑄖𑄥𑄴𑄥 𑄌𑄨𑄖𑄴𑄖𑄁 𑄤𑄨𑄛𑄴𑄛𑄥𑄚𑄴𑄚𑄁 𑄦𑄮𑄖𑄨𑄡𑄬𑄤. 𑄄𑄙 𑄛𑄚 ‘‘𑄃𑄂𑄡𑄖𑄚𑄬 𑄌𑄨𑄖𑄴𑄖𑄁 𑄛𑄥𑄩𑄘𑄖𑄩’’𑄖𑄨 𑄤𑄌𑄚𑄖𑄮 𑄃𑄢𑄦𑄖𑄴𑄖𑄤𑄨𑄛𑄥𑄴𑄥𑄚𑄧𑄡 𑄌𑄬𑄤 𑄌𑄖𑄪𑄖𑄴𑄗𑄎𑄴𑄏𑄧𑄚𑄫𑄛𑄌𑄧𑄢𑄥𑄴𑄥 𑄌 𑄛𑄑𑄨𑄣𑄧𑄞𑄮 𑄛𑄑𑄨𑄣𑄧𑄞𑄥𑄟𑄴𑄛𑄥𑄧𑄘𑄮𑄖𑄨 𑄤𑄬𑄘𑄨𑄖𑄝𑄴𑄝𑄮. 𑄤𑄨𑄛𑄥𑄴𑄥𑄚𑄧 𑄦𑄨 𑄛𑄐𑄴𑄐𑄧𑄡 𑄃𑄙𑄨𑄟𑄪𑄌𑄴𑄌𑄚𑄥𑄴𑄥 𑄇𑄧𑄢𑄕𑄁, 𑄅𑄛𑄌𑄧𑄢𑄁 𑄃𑄂𑄚𑄬𑄐𑄴𑄎𑄥𑄟𑄧𑄛𑄖𑄴𑄖𑄨𑄡𑄧.

𑄆𑄖𑄢𑄦𑄨 𑄤𑄧 𑄃𑄂𑄚𑄬𑄐𑄴𑄎𑄁 𑄥𑄟𑄧𑄛𑄎𑄴𑄎𑄖𑄨. 𑄛𑄐𑄴𑄐𑄧𑄡 𑄤𑄧 𑄃𑄙𑄨𑄟𑄪𑄌𑄴𑄌𑄖𑄩𑄖𑄨 𑄆𑄖𑄴𑄗 𑄆𑄖𑄢𑄦𑄨 𑄤𑄧 𑄛𑄐𑄴𑄐𑄧𑄡 𑄃𑄙𑄨𑄟𑄪𑄌𑄴𑄌𑄖𑄨, 𑄃𑄂𑄚𑄬𑄐𑄴𑄎𑄁 𑄤𑄧 𑄥𑄟𑄧𑄛𑄎𑄴𑄎𑄖𑄩𑄖𑄨 𑄆𑄤𑄁 𑄛𑄘𑄛𑄢𑄨𑄤𑄖𑄴𑄖𑄚𑄁 𑄇𑄖𑄴𑄤𑄧 𑄃𑄖𑄴𑄗𑄮 𑄤𑄬𑄘𑄨𑄖𑄝𑄴𑄝𑄮. 𑄄𑄘𑄐𑄴𑄦𑄨 𑄤𑄪𑄖𑄴𑄖𑄁 𑄦𑄮𑄖𑄨 – 𑄖𑄥𑄴𑄟𑄨𑄁 𑄥𑄟𑄴𑄛𑄥𑄧𑄘𑄬 𑄥𑄖𑄨 𑄆𑄖𑄢𑄦𑄨 𑄤𑄧 𑄛𑄐𑄴𑄐𑄧𑄡 𑄃𑄙𑄨𑄟𑄪𑄌𑄴𑄌𑄖𑄨, 𑄃𑄢𑄦𑄖𑄴𑄖𑄁 𑄥𑄌𑄴𑄍𑄨𑄇𑄢𑄮𑄖𑄩𑄖𑄨 𑄃𑄖𑄴𑄗𑄮. 𑄖𑄁 𑄃𑄚𑄞𑄨𑄥𑄟𑄴𑄞𑄪𑄕𑄚𑄴𑄖𑄮 𑄃𑄂𑄚𑄬𑄐𑄴𑄎𑄁 𑄤𑄧 𑄥𑄟𑄧𑄛𑄎𑄴𑄎𑄖𑄨, 𑄃𑄗 𑄤𑄧 𑄛𑄐𑄴𑄐𑄧𑄡 𑄤𑄧 𑄃𑄙𑄨𑄟𑄪𑄌𑄴𑄌𑄖𑄩𑄖𑄨 𑄃𑄢𑄦𑄖𑄴𑄖𑄟𑄉𑄴𑄉𑄁 𑄞𑄧𑄤𑄬𑄖𑄨, 𑄖𑄁 𑄃𑄚𑄞𑄨𑄥𑄟𑄴𑄞𑄪𑄕𑄚𑄴𑄖𑄮 𑄃𑄂𑄚𑄬𑄐𑄴𑄎𑄁 𑄤𑄧 𑄥𑄟𑄧𑄛𑄎𑄴𑄎𑄖𑄨. 𑄃𑄢𑄦𑄖𑄴𑄖𑄟𑄉𑄴𑄉𑄁 𑄞𑄧𑄤𑄬𑄖𑄪𑄁 𑄃𑄥𑄇𑄴𑄇𑄮𑄚𑄴𑄖𑄮 𑄆𑄖𑄢𑄦𑄨 𑄌𑄖𑄪𑄥𑄌𑄴𑄌𑄁 𑄤𑄧 𑄥𑄌𑄴𑄍𑄨𑄇𑄢𑄮𑄖𑄨. 𑄖𑄁 𑄃𑄚𑄞𑄨𑄥𑄟𑄴𑄞𑄪𑄕𑄚𑄴𑄖𑄮 𑄃𑄂𑄚𑄬𑄐𑄴𑄎𑄁 𑄤𑄧 𑄥𑄟𑄧𑄛𑄎𑄴𑄎𑄖𑄩𑄖𑄨.