𑄷𑄽. 𑄌𑄖𑄴𑄖𑄧𑄣𑄩𑄥𑄚𑄨𑄛𑄧𑄖𑄮

[𑄻𑄸𑄷] 𑄷. 𑄖𑄬𑄥𑄇𑄪𑄕𑄎𑄧𑄖𑄇𑄤𑄕𑄴𑄕𑄚𑄧

𑄤𑄬𑄥𑄴𑄥𑄚𑄴𑄖𑄢𑄁 𑄖𑄁 𑄛𑄪𑄌𑄴𑄍𑄧𑄟𑄩𑄖𑄨 𑄄𑄘𑄁 𑄥𑄖𑄴𑄗𑄧 𑄎𑄬𑄖𑄤𑄚𑄬 𑄤𑄨𑄦𑄢𑄚𑄴𑄖𑄮 𑄇𑄮𑄥𑄣𑄢𑄐𑄴𑄐𑄮 𑄃𑄮𑄤𑄧𑄘𑄤𑄥𑄬𑄚 𑄇𑄗𑄬𑄥𑄨. 𑄖𑄐𑄴𑄦𑄨 𑄢𑄧𑄎𑄧𑄚𑄁 𑄙𑄟𑄴𑄟𑄥𑄴𑄥𑄤𑄚𑄖𑄴𑄗𑄧𑄡 𑄃𑄂𑄉𑄖𑄁 𑄥𑄖𑄴𑄗𑄧 𑄃𑄂𑄟𑄚𑄴𑄖𑄬𑄖𑄴𑄤𑄧 ‘‘𑄟𑄦𑄧𑄢𑄧𑄎, 𑄢𑄐𑄴𑄐𑄧 𑄚𑄧𑄟 𑄙𑄟𑄴𑄟𑄬𑄚 𑄢𑄎𑄴𑄎𑄁 𑄇𑄧𑄢𑄬𑄖𑄝𑄴𑄝𑄁, 𑄡𑄥𑄴𑄟𑄨𑄐𑄴𑄦𑄨 𑄥𑄟𑄡𑄬 𑄢𑄧𑄎𑄧𑄚𑄮 𑄃𑄙𑄟𑄴𑄟𑄨𑄇𑄧 𑄦𑄮𑄚𑄴𑄖𑄨, 𑄢𑄧𑄎𑄡𑄪𑄖𑄴𑄖𑄧𑄛𑄨 𑄖𑄥𑄴𑄟𑄨𑄁 𑄥𑄟𑄡𑄬 𑄃𑄙𑄟𑄴𑄟𑄨𑄇𑄧 𑄦𑄮𑄚𑄴𑄖𑄩’’𑄖𑄨 𑄌𑄖𑄪𑄇𑄴𑄇𑄚𑄨𑄛𑄧𑄖𑄬 (𑄃. 𑄚𑄨. 𑄺.𑄽𑄶) 𑄃𑄂𑄉𑄖𑄥𑄪𑄖𑄴𑄖𑄚𑄡𑄬𑄚 𑄃𑄮𑄤𑄘𑄨𑄖𑄴𑄤𑄧 𑄃𑄉𑄖𑄨𑄉𑄟𑄚𑄬 𑄃𑄉𑄖𑄨𑄃𑄉𑄟𑄚𑄬 𑄌 𑄃𑄂𑄘𑄩𑄚𑄤𑄐𑄴𑄌 𑄃𑄂𑄚𑄨𑄥𑄁𑄥𑄐𑄴𑄌 𑄇𑄗𑄬𑄖𑄴𑄤𑄧 ‘‘𑄥𑄪𑄛𑄨𑄚𑄇𑄫𑄛𑄟𑄧 𑄇𑄧𑄟𑄧’’𑄖𑄨𑄃𑄂𑄘𑄨𑄚𑄧 𑄚𑄡𑄬𑄚 𑄇𑄧𑄟𑄬𑄥𑄪 𑄃𑄂𑄘𑄩𑄚𑄤𑄁 𑄤𑄨𑄖𑄴𑄗𑄧𑄢𑄬𑄖𑄴𑄤𑄧, ‘‘𑄟𑄦𑄧𑄢𑄧𑄎, 𑄄𑄟𑄬𑄥𑄐𑄴𑄦𑄨 𑄥𑄖𑄴𑄖𑄧𑄚𑄁 –

‘𑄟𑄌𑄴𑄌𑄪𑄚𑄧 𑄥𑄋𑄴𑄉𑄢𑄮 𑄚𑄖𑄴𑄗𑄨, 𑄣𑄐𑄴𑄎𑄉𑄴𑄉𑄧𑄦𑄮 𑄚 𑄤𑄨𑄎𑄴𑄎𑄖𑄨;

𑄡𑄪𑄘𑄴𑄙𑄁 𑄚𑄖𑄴𑄗𑄨 𑄎𑄡𑄮 𑄚𑄖𑄴𑄗𑄨, 𑄥𑄝𑄴𑄝𑄬 𑄟𑄌𑄴𑄌𑄪𑄛𑄢𑄧𑄡𑄕𑄧’.

𑄖𑄬𑄥𑄁 𑄛𑄢𑄣𑄮𑄇𑄁 𑄉𑄌𑄴𑄍𑄚𑄴𑄖𑄧𑄚𑄁 𑄒𑄛𑄬𑄖𑄴𑄤𑄧 𑄃𑄖𑄴𑄖𑄚𑄧 𑄇𑄖𑄁 𑄇𑄣𑄴𑄡𑄧𑄕𑄇𑄟𑄴𑄟𑄁 𑄃𑄐𑄴𑄐𑄧 𑄛𑄖𑄨𑄑𑄴𑄒𑄧 𑄚𑄧𑄟 𑄚𑄖𑄴𑄗𑄨. 𑄆𑄤𑄁 𑄄𑄖𑄴𑄖𑄢𑄛𑄌𑄴𑄌𑄪𑄛𑄑𑄴𑄒𑄧𑄚𑄁 𑄃𑄤𑄥𑄴𑄥𑄁 𑄛𑄦𑄧𑄖𑄝𑄴𑄝𑄁, 𑄚 𑄡𑄥𑄁 𑄚𑄨𑄥𑄴𑄥𑄧𑄡 𑄛𑄟𑄧𑄘𑄁 𑄇𑄧𑄖𑄪𑄁 𑄤𑄑𑄴𑄑𑄖𑄨, 𑄃𑄛𑄴𑄛𑄟𑄖𑄴𑄖𑄬𑄚𑄬𑄤 𑄦𑄪𑄖𑄴𑄤𑄧 𑄙𑄟𑄴𑄟𑄬𑄚 𑄢𑄎𑄴𑄎𑄁 𑄇𑄧𑄢𑄬𑄖𑄪𑄁 𑄤𑄑𑄴𑄑𑄖𑄨. 𑄛𑄮𑄢𑄧𑄕𑄇𑄢𑄧𑄎𑄧𑄚𑄮 𑄃𑄚𑄪𑄛𑄴𑄛𑄚𑄴𑄚𑄬𑄛𑄨 𑄝𑄪𑄘𑄴𑄙𑄬 𑄛𑄕𑄴𑄓𑄨𑄖𑄧𑄚𑄁 𑄃𑄮𑄤𑄧𑄘𑄬 𑄒𑄖𑄴𑄤𑄧 𑄙𑄟𑄴𑄟𑄬𑄚 𑄢𑄎𑄴𑄎𑄁 𑄇𑄧𑄢𑄬𑄖𑄴𑄤𑄧 𑄘𑄬𑄤𑄚𑄉𑄢𑄁 𑄛𑄫𑄢𑄡𑄟𑄧𑄚𑄧 𑄉𑄟𑄨𑄁𑄥𑄫’’𑄖𑄨 𑄤𑄖𑄴𑄤𑄧 𑄖𑄬𑄚 𑄡𑄧𑄌𑄨𑄖𑄮 𑄃𑄖𑄩𑄖𑄁 𑄃𑄂𑄦𑄢𑄨.

𑄃𑄖𑄩𑄖𑄬 𑄝𑄧𑄢𑄧𑄕𑄥𑄨𑄡𑄁 𑄝𑄴𑄢𑄦𑄴𑄟𑄘𑄖𑄴𑄖𑄮 𑄢𑄎𑄴𑄎𑄁 𑄇𑄧𑄢𑄬𑄚𑄴𑄖𑄮 𑄃𑄛𑄪𑄖𑄴𑄖𑄇𑄮 𑄃𑄦𑄮𑄥𑄨, 𑄛𑄖𑄴𑄗𑄬𑄚𑄴𑄖𑄮𑄛𑄨 𑄛𑄪𑄖𑄴𑄖𑄁 𑄤𑄧 𑄙𑄩𑄖𑄢𑄁 𑄤𑄧 𑄚 𑄣𑄞𑄨. 𑄥𑄮 𑄆𑄇𑄘𑄨𑄤𑄥𑄁 𑄟𑄦𑄚𑄴𑄖𑄬𑄚 𑄛𑄢𑄨𑄤𑄧𑄢𑄬𑄚 𑄅𑄡𑄴𑄡𑄧𑄚𑄁 𑄉𑄚𑄴𑄖𑄴𑄤𑄧 𑄘𑄨𑄤𑄥𑄞𑄧𑄉𑄁 𑄅𑄡𑄴𑄡𑄧𑄚𑄬 𑄇𑄩𑅄𑄨𑄖𑄴𑄤𑄧 𑄟𑄋𑄴𑄉𑄣𑄥𑄧𑄣𑄢𑄪𑄇𑄴𑄈𑄟𑄫𑄣𑄬 𑄥𑄡𑄚𑄁 𑄃𑄖𑄴𑄗𑄢𑄧𑄛𑄬𑄖𑄴𑄤𑄧 𑄗𑄮𑄇𑄁 𑄚𑄨𑄘𑄴𑄘𑄧𑄡𑄨𑄖𑄴𑄤𑄧 𑄛𑄝𑄪𑄘𑄴𑄙𑄮 𑄥𑄧𑄣𑄢𑄪𑄇𑄴𑄈𑄁 𑄃𑄮𑄣𑄮𑄇𑄬𑄖𑄴𑄤𑄧 𑄖𑄖𑄴𑄗 𑄥𑄇𑄪𑄕𑄇𑄪𑄣𑄧𑄤𑄇𑄁 𑄛𑄥𑄴𑄥𑄨, 𑄥𑄦 𑄘𑄥𑄴𑄥𑄚𑄬𑄚𑄬𑄤𑄥𑄴𑄥 𑄥𑄨𑄚𑄬𑄦𑄮 𑄅𑄛𑄴𑄛𑄎𑄴𑄎𑄨. 𑄥𑄮 𑄆𑄇𑄁 𑄛𑄪𑄢𑄨𑄥𑄁 𑄛𑄇𑄴𑄇𑄮𑄥𑄧𑄛𑄬𑄖𑄴𑄤𑄧 ‘‘𑄄𑄟𑄁 𑄢𑄪𑄇𑄴𑄈𑄁 𑄃𑄞𑄨𑄢𑄪𑄦𑄨𑄖𑄴𑄤𑄧 𑄆𑄖𑄥𑄴𑄟𑄨𑄁 𑄇𑄪𑄣𑄧𑄤𑄇𑄬 𑄇𑄥𑄴𑄥𑄌𑄨 𑄃𑄖𑄴𑄗𑄨𑄖𑄁 𑄤𑄧 𑄚𑄖𑄴𑄗𑄨𑄖𑄁 𑄤𑄧 𑄎𑄧𑄚𑄧𑄦𑄩’’𑄖𑄨 𑄃𑄂𑄦. 𑄥𑄮 ‘‘𑄥𑄧𑄙𑄪, 𑄘𑄬𑄤𑄧’’𑄖𑄨 𑄤𑄖𑄴𑄤𑄧 𑄃𑄞𑄨𑄢𑄪𑄦𑄨𑄖𑄴𑄤𑄧 𑄖𑄖𑄴𑄗 𑄖𑄩𑄕𑄨 𑄃𑄕𑄴𑄓𑄇𑄧𑄚𑄨 𑄘𑄨𑄥𑄴𑄤𑄧 𑄢𑄐𑄴𑄐𑄮 𑄃𑄂𑄢𑄮𑄌𑄬𑄥𑄨. 𑄢𑄧𑄎𑄧 ‘‘𑄖𑄬𑄚 𑄦𑄨 𑄆𑄖𑄬𑄥𑄁 𑄅𑄛𑄢𑄨 𑄚𑄧𑄥𑄤𑄧𑄖𑄁 𑄟𑄧 𑄤𑄨𑄥𑄴𑄥𑄎𑄴𑄎𑄬𑄥𑄩’’𑄖𑄨 𑄤𑄖𑄴𑄤𑄧 ‘‘𑄌𑄋𑄴𑄇𑄮𑄑𑄇𑄬 𑄇𑄛𑄴𑄛𑄧𑄥𑄛𑄨𑄌𑄪𑄁 𑄃𑄖𑄴𑄗𑄢𑄨𑄖𑄴𑄤𑄧 𑄖𑄖𑄴𑄗𑄬𑄤 𑄖𑄧𑄚𑄨 𑄃𑄕𑄴𑄓𑄇𑄧𑄚𑄨 𑄒𑄛𑄬𑄖𑄴𑄤𑄧 𑄥𑄕𑄨𑄇𑄁 𑄃𑄮𑄖𑄢𑄧𑄦𑄩’’𑄖𑄨 𑄃𑄮𑄖𑄧𑄢𑄧𑄛𑄬𑄖𑄴𑄤𑄧 𑄌𑄋𑄴𑄇𑄮𑄑𑄇𑄁 𑄦𑄖𑄴𑄗𑄬𑄚 𑄉𑄦𑄬𑄖𑄴𑄤𑄧 ‘‘𑄇𑄖𑄢𑄥𑄇𑄪𑄕𑄕𑄴𑄓𑄇𑄧𑄚𑄨 𑄚𑄧𑄟𑄬𑄖𑄧𑄚𑄩’’𑄖𑄨 𑄃𑄟𑄌𑄴𑄌𑄬 𑄛𑄪𑄌𑄴𑄍𑄨. 𑄖𑄬 ‘‘𑄟𑄡𑄁 𑄚 𑄎𑄧𑄚𑄧𑄟, 𑄚𑄬𑄥𑄧𑄘𑄧 𑄎𑄧𑄚𑄨𑄥𑄴𑄥𑄚𑄴𑄖𑄩’’𑄖𑄨 𑄤𑄘𑄨𑄁𑄥𑄪. 𑄢𑄧𑄎𑄧 𑄚𑄬𑄥𑄧𑄘𑄬 𑄛𑄇𑄴𑄇𑄮𑄥𑄧𑄛𑄬𑄖𑄴𑄤𑄧 𑄛𑄪𑄌𑄴𑄍𑄨. 𑄚𑄬𑄥𑄧𑄘𑄧, ‘‘𑄟𑄦𑄧𑄢𑄧𑄎, 𑄖𑄬𑄥𑄪 𑄆𑄇𑄁 𑄅𑄣𑄫𑄇𑄃𑄕𑄴𑄓𑄁, 𑄆𑄇𑄁 𑄥𑄧𑄣𑄨𑄇𑄧𑄃𑄕𑄴𑄓𑄁, 𑄆𑄇𑄁 𑄥𑄪𑄤𑄇𑄃𑄕𑄴𑄓’’𑄚𑄴𑄖𑄨 𑄇𑄗𑄡𑄨𑄁𑄥𑄪. 𑄇𑄨𑄁 𑄛𑄚 𑄆𑄇𑄥𑄴𑄟𑄨𑄁 𑄇𑄪𑄣𑄧𑄤𑄇𑄬 𑄖𑄨𑄕𑄴𑄕𑄁 𑄥𑄇𑄪𑄕𑄨𑄇𑄧𑄚𑄁 𑄃𑄕𑄴𑄓𑄧𑄚𑄨 𑄦𑄮𑄚𑄴𑄖𑄩𑄖𑄨. 𑄃𑄂𑄟, 𑄘𑄬𑄤, 𑄛𑄢𑄨𑄛𑄚𑄴𑄗𑄬 𑄃𑄥𑄖𑄨 𑄥𑄪𑄚𑄨𑄇𑄴𑄈𑄨𑄖𑄴𑄖𑄧𑄚𑄨 𑄚 𑄚𑄥𑄴𑄥𑄚𑄴𑄖𑄩𑄖𑄨. 𑄢𑄧𑄎𑄧 𑄖𑄪𑄥𑄴𑄥𑄨𑄖𑄴𑄤𑄧 ‘‘𑄄𑄟𑄬 𑄟𑄟 𑄛𑄪𑄖𑄴𑄖𑄧 𑄞𑄤𑄨𑄥𑄴𑄥𑄚𑄴𑄖𑄩’’𑄖𑄨 𑄖𑄧𑄚𑄨 𑄖𑄩𑄕𑄨 𑄃𑄕𑄴𑄓𑄧𑄚𑄨 𑄖𑄡𑄮 𑄃𑄟𑄌𑄴𑄌𑄬 𑄛𑄑𑄨𑄌𑄴𑄍𑄧𑄛𑄬𑄖𑄴𑄤𑄧 ‘‘𑄄𑄟𑄬 𑄟𑄡𑄴𑄦𑄁 𑄛𑄪𑄖𑄴𑄖𑄧 𑄞𑄤𑄨𑄥𑄴𑄥𑄚𑄴𑄖𑄨, 𑄖𑄪𑄟𑄴𑄦𑄬 𑄥𑄧𑄙𑄪𑄇𑄁 𑄛𑄑𑄨𑄎𑄉𑄴𑄉𑄨𑄖𑄴𑄤𑄧 𑄃𑄕𑄴𑄓𑄇𑄮𑄥𑄖𑄮 𑄚𑄨𑄇𑄴𑄈𑄚𑄴𑄖𑄇𑄧𑄣𑄬 𑄟𑄟𑄧𑄢𑄮𑄌𑄬𑄡𑄴𑄡𑄧𑄗𑄧’’𑄖𑄨 𑄃𑄂𑄦. 𑄖𑄬 𑄖𑄧𑄚𑄨 𑄥𑄧𑄙𑄪𑄇𑄁 𑄢𑄇𑄴𑄈𑄨𑄁𑄥𑄪.

𑄖𑄬𑄥𑄪 𑄛𑄒𑄟𑄁 𑄅𑄣𑄫𑄇𑄃𑄕𑄴𑄓𑄁 𑄞𑄨𑄎𑄴𑄎𑄨. 𑄃𑄟𑄌𑄴𑄌𑄮 𑄆𑄇𑄁 𑄚𑄬𑄥𑄧𑄘𑄁 𑄛𑄇𑄴𑄇𑄮𑄥𑄧𑄛𑄬𑄖𑄴𑄤𑄧 ‘‘𑄖𑄴𑄤𑄁 𑄄𑄖𑄴𑄗𑄨𑄞𑄧𑄤𑄁 𑄤𑄧 𑄛𑄪𑄢𑄨𑄥𑄞𑄧𑄤𑄁 𑄤𑄧 𑄎𑄧𑄚𑄧𑄦𑄩’’𑄖𑄨 𑄤𑄖𑄴𑄤𑄧 𑄖𑄬𑄚 𑄖𑄁 𑄤𑄩𑄟𑄁𑄥𑄨𑄖𑄴𑄤𑄧 ‘‘𑄛𑄪𑄢𑄨𑄥𑄮’’𑄖𑄨 𑄤𑄪𑄖𑄴𑄖𑄬 𑄢𑄧𑄎𑄧𑄚𑄁 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 ‘‘𑄛𑄪𑄖𑄴𑄖𑄮 𑄖𑄬, 𑄘𑄬𑄤, 𑄎𑄧𑄖𑄮’’𑄖𑄨 𑄃𑄂𑄦. 𑄢𑄧𑄎𑄧 𑄖𑄪𑄑𑄴𑄒𑄮 𑄖𑄥𑄴𑄥 𑄝𑄦𑄪𑄁 𑄙𑄚𑄁 𑄘𑄖𑄴𑄤𑄧 ‘‘𑄛𑄪𑄖𑄴𑄖𑄇𑄁 𑄟𑄬 𑄥𑄧𑄙𑄪𑄇𑄁 𑄛𑄑𑄨𑄎𑄉𑄴𑄉, ‘𑄤𑄬𑄥𑄴𑄥𑄚𑄴𑄖𑄢𑄮’𑄖𑄨 𑄌𑄥𑄴𑄥 𑄚𑄧𑄟𑄁 𑄇𑄢𑄮𑄦𑄩’’𑄖𑄨 𑄤𑄖𑄴𑄤𑄧 𑄅𑄡𑄴𑄡𑄮𑄎𑄬𑄥𑄨. 𑄥𑄮 𑄖𑄗𑄧 𑄃𑄇𑄧𑄥𑄨. 𑄖𑄖𑄮 𑄇𑄖𑄨𑄛𑄧𑄦𑄌𑄴𑄌𑄡𑄬𑄚 𑄥𑄧𑄣𑄨𑄇𑄧𑄃𑄕𑄴𑄓𑄁 𑄞𑄨𑄎𑄴𑄎𑄨. 𑄥𑄮𑄛𑄨 𑄃𑄟𑄌𑄴𑄌𑄮 𑄖𑄁 𑄚𑄬𑄥𑄧𑄘𑄬𑄚 𑄤𑄩𑄟𑄁𑄥𑄧𑄛𑄬𑄖𑄴𑄤𑄧 ‘‘𑄄𑄖𑄴𑄗𑄩’’𑄖𑄨 𑄥𑄪𑄖𑄴𑄤𑄧 𑄢𑄐𑄴𑄐𑄮 𑄥𑄚𑄴𑄖𑄨𑄇𑄁 𑄉𑄚𑄴𑄖𑄴𑄤𑄧 ‘‘𑄙𑄩𑄖𑄧 𑄖𑄬, 𑄘𑄬𑄤, 𑄎𑄧𑄖𑄧’’𑄖𑄨 𑄃𑄂𑄦. 𑄢𑄧𑄎𑄧 𑄖𑄪𑄑𑄴𑄒𑄮 𑄖𑄥𑄴𑄥𑄛𑄨 𑄝𑄦𑄪𑄁 𑄙𑄚𑄁 𑄘𑄖𑄴𑄤𑄧 ‘‘𑄙𑄩𑄖𑄢𑄁 𑄟𑄬 𑄥𑄧𑄙𑄪𑄇𑄁 𑄛𑄑𑄨𑄎𑄉𑄴𑄉, ‘𑄇𑄪𑄕𑄴𑄓𑄣𑄨𑄚𑄩’𑄖𑄨 𑄌𑄥𑄴𑄥𑄧 𑄚𑄧𑄟𑄁 𑄇𑄢𑄮𑄦𑄩’’𑄖𑄨 𑄤𑄖𑄴𑄤𑄧 𑄅𑄡𑄴𑄡𑄮𑄎𑄬𑄥𑄨. 𑄥𑄮𑄛𑄨 𑄖𑄗𑄧 𑄃𑄇𑄧𑄥𑄨. 𑄛𑄪𑄚 𑄇𑄖𑄨𑄛𑄧𑄦𑄌𑄴𑄌𑄡𑄬𑄚 𑄥𑄪𑄤𑄇𑄃𑄕𑄴𑄓𑄁 𑄞𑄨𑄎𑄴𑄎𑄨. 𑄥𑄮𑄛𑄨 𑄃𑄟𑄌𑄴𑄌𑄮 𑄚𑄬𑄥𑄧𑄘𑄬𑄚 𑄖𑄁 𑄤𑄩𑄟𑄁𑄥𑄨𑄖𑄴𑄤𑄧 ‘‘𑄛𑄪𑄢𑄨𑄥𑄮’’𑄖𑄨 𑄤𑄪𑄖𑄴𑄖𑄬 𑄢𑄐𑄴𑄐𑄮 𑄥𑄚𑄴𑄖𑄨𑄇𑄁 𑄉𑄚𑄴𑄖𑄴𑄤𑄧 ‘‘𑄛𑄪𑄖𑄴𑄖𑄮 𑄖𑄬, 𑄘𑄬𑄤, 𑄎𑄧𑄖𑄮’’𑄖𑄨 𑄃𑄂𑄦. 𑄢𑄧𑄎𑄧 𑄖𑄪𑄑𑄴𑄒𑄮 𑄖𑄥𑄴𑄥𑄛𑄨 𑄝𑄦𑄪𑄁 𑄙𑄚𑄁 𑄘𑄖𑄴𑄤𑄧 ‘‘𑄛𑄪𑄖𑄴𑄖𑄥𑄴𑄥 𑄟𑄬 𑄟𑄦𑄚𑄴𑄖𑄬𑄚 𑄛𑄢𑄨𑄤𑄧𑄢𑄬𑄚 𑄟𑄋𑄴𑄉𑄣𑄁 𑄇𑄖𑄴𑄤𑄧 ‘𑄎𑄟𑄴𑄝𑄪𑄇𑄮’𑄖𑄨𑄥𑄴𑄥 𑄚𑄧𑄟𑄁 𑄇𑄢𑄮𑄦𑄩’’𑄖𑄨 𑄤𑄖𑄴𑄤𑄧 𑄅𑄡𑄴𑄡𑄮𑄎𑄬𑄥𑄨. 𑄥𑄮𑄛𑄨 𑄖𑄗𑄧 𑄃𑄇𑄧𑄥𑄨. 𑄖𑄬 𑄖𑄡𑄮𑄛𑄨 𑄥𑄇𑄪𑄕𑄧 𑄖𑄨𑄕𑄴𑄕𑄁 𑄃𑄟𑄌𑄴𑄌𑄧𑄚𑄁 𑄉𑄬𑄦𑄬𑄥𑄪 𑄢𑄧𑄎𑄇𑄪𑄟𑄧𑄢𑄛𑄢𑄨𑄦𑄧𑄢𑄬𑄚𑄬𑄤 𑄤𑄓𑄴𑄔𑄚𑄴𑄖𑄨. 𑄢𑄧𑄎𑄧 ‘‘𑄟𑄟 𑄛𑄪𑄖𑄴𑄖𑄮, 𑄟𑄟 𑄙𑄩𑄖𑄧’’𑄖𑄨 𑄤𑄮𑄦𑄢𑄖𑄨. 𑄃𑄗𑄥𑄴𑄥 𑄃𑄟𑄌𑄴𑄌𑄧 𑄃𑄐𑄴𑄐𑄟𑄐𑄴𑄐𑄁 𑄃𑄤𑄦𑄥𑄚𑄴𑄖𑄨 ‘‘𑄛𑄥𑄴𑄥𑄗, 𑄞𑄮, 𑄢𑄐𑄴𑄐𑄮 𑄇𑄨𑄢𑄨𑄡𑄁, 𑄖𑄨𑄢𑄌𑄴𑄍𑄧𑄚𑄉𑄖𑄬𑄛𑄨 ‘𑄛𑄪𑄖𑄴𑄖𑄮 𑄟𑄬, 𑄙𑄩𑄖𑄧 𑄟𑄬’𑄖𑄨 𑄤𑄘𑄚𑄴𑄖𑄮 𑄤𑄨𑄌𑄢𑄖𑄩’’𑄖𑄨.

𑄖𑄁 𑄥𑄪𑄖𑄴𑄤𑄧 𑄢𑄧𑄎𑄧 𑄌𑄨𑄚𑄴𑄖𑄬𑄥𑄨 – ‘‘𑄄𑄟𑄬 𑄃𑄟𑄌𑄴𑄌𑄧 𑄆𑄖𑄬𑄥𑄁 𑄟𑄟 𑄛𑄪𑄖𑄴𑄖𑄧𑄚𑄁 𑄛𑄐𑄴𑄐𑄧𑄥𑄟𑄴𑄛𑄘𑄁 𑄚 𑄎𑄧𑄚𑄚𑄴𑄖𑄨, 𑄛𑄧𑄇𑄑𑄁 𑄚𑄬𑄥𑄁 𑄇𑄢𑄨𑄥𑄴𑄥𑄧𑄟𑄩’’𑄖𑄨. 𑄃𑄗𑄬𑄇𑄁 𑄃𑄟𑄌𑄴𑄌𑄁 𑄤𑄬𑄥𑄴𑄥𑄚𑄴𑄖𑄢𑄥𑄴𑄥 𑄥𑄚𑄴𑄖𑄨𑄇𑄁 𑄛𑄬𑄥𑄬𑄥𑄨 – ‘‘𑄖𑄪𑄟𑄴𑄦𑄧𑄇𑄁 𑄛𑄨𑄖𑄧 𑄛𑄐𑄴𑄦𑄁 𑄛𑄪𑄌𑄴𑄍𑄨𑄖𑄪𑄇𑄧𑄟𑄮, 𑄇𑄘𑄧 𑄇𑄨𑄢 𑄃𑄂𑄉𑄚𑄴𑄖𑄴𑄤𑄧 𑄛𑄪𑄌𑄴𑄍𑄖𑄫’’𑄖𑄨. 𑄥𑄮 𑄃𑄟𑄌𑄴𑄌𑄮 𑄉𑄚𑄴𑄖𑄴𑄤𑄧 𑄤𑄬𑄥𑄴𑄥𑄚𑄴𑄖𑄢𑄁 𑄤𑄚𑄴𑄘𑄨𑄖𑄴𑄤𑄧 𑄖𑄁 𑄥𑄧𑄥𑄚𑄁 𑄃𑄂𑄢𑄮𑄌𑄬𑄥𑄨. 𑄖𑄁 𑄥𑄪𑄖𑄴𑄤𑄧 𑄤𑄬𑄥𑄴𑄥𑄚𑄴𑄖𑄢𑄮 𑄃𑄖𑄴𑄖𑄚𑄮 𑄛𑄑𑄨𑄎𑄉𑄴𑄉𑄇𑄁 𑄃𑄟𑄌𑄴𑄌𑄁 𑄛𑄇𑄴𑄇𑄮𑄥𑄨𑄖𑄴𑄤𑄧 ‘‘𑄟𑄡𑄴𑄦𑄁 𑄇𑄨𑄢 𑄛𑄨𑄖𑄧 𑄟𑄁 𑄛𑄐𑄴𑄦𑄁 𑄛𑄪𑄌𑄴𑄍𑄨𑄖𑄪𑄇𑄧𑄟𑄮, 𑄖𑄥𑄴𑄥 𑄄𑄙𑄧𑄉𑄖𑄥𑄴𑄥 𑄥𑄇𑄴𑄇𑄧𑄢𑄁 𑄇𑄧𑄖𑄪𑄁 𑄤𑄑𑄴𑄑𑄖𑄨, 𑄇𑄘𑄧 𑄃𑄂𑄉𑄌𑄴𑄍𑄖𑄫’’𑄖𑄨 𑄛𑄪𑄌𑄴𑄍𑄨. 𑄃𑄟𑄌𑄴𑄌𑄮 ‘‘𑄄𑄖𑄮 𑄥𑄖𑄴𑄖𑄟𑄬 𑄘𑄨𑄤𑄥𑄬 𑄖𑄤 𑄛𑄨𑄖𑄧 𑄃𑄂𑄉𑄌𑄴𑄍𑄖𑄫’’𑄖𑄨 𑄃𑄂𑄦. 𑄖𑄁 𑄥𑄪𑄖𑄴𑄤𑄧 𑄤𑄬𑄥𑄴𑄥𑄚𑄴𑄖𑄢𑄮 ‘‘𑄛𑄨𑄖𑄧 𑄟𑄬 𑄄𑄖𑄮 𑄥𑄖𑄴𑄖𑄟𑄬 𑄘𑄨𑄤𑄥𑄬 𑄃𑄂𑄉𑄌𑄴𑄍𑄖𑄫’’𑄖𑄨 𑄤𑄖𑄴𑄤𑄧 𑄅𑄡𑄴𑄡𑄮𑄎𑄬𑄥𑄨. 𑄥𑄮 𑄃𑄂𑄉𑄚𑄴𑄖𑄴𑄤𑄧 𑄢𑄐𑄴𑄐𑄮 𑄃𑄂𑄌𑄨𑄇𑄴𑄈𑄨. 𑄢𑄧𑄎𑄧 𑄥𑄖𑄴𑄖𑄟𑄬 𑄘𑄨𑄤𑄥𑄬 𑄚𑄉𑄢𑄬 𑄞𑄬𑄢𑄨𑄁 𑄌𑄢𑄧𑄛𑄬𑄖𑄴𑄤𑄧 𑄛𑄪𑄖𑄴𑄖𑄥𑄴𑄥 𑄚𑄨𑄤𑄬𑄥𑄚𑄁 𑄃𑄉𑄟𑄧𑄥𑄨. 𑄤𑄬𑄥𑄴𑄥𑄚𑄴𑄖𑄢𑄮 𑄢𑄐𑄴𑄐𑄮 𑄟𑄦𑄚𑄴𑄖𑄁 𑄥𑄇𑄴𑄇𑄧𑄢𑄁 𑄇𑄧𑄢𑄬𑄥𑄨, 𑄃𑄚𑄴𑄖𑄟𑄥𑄮 𑄘𑄧𑄥𑄇𑄟𑄴𑄟𑄇𑄧𑄢𑄧𑄚𑄟𑄴𑄛𑄨 𑄥𑄇𑄴𑄇𑄧𑄢𑄁 𑄇𑄧𑄢𑄬𑄥𑄨. 𑄢𑄧𑄎𑄧 𑄤𑄬𑄥𑄴𑄥𑄚𑄴𑄖𑄢𑄥𑄇𑄪𑄕𑄥𑄴𑄥 𑄉𑄬𑄦𑄬 𑄞𑄪𑄐𑄴𑄎𑄨𑄖𑄴𑄤𑄧 𑄟𑄦𑄚𑄴𑄖𑄁 𑄡𑄥𑄁 𑄃𑄚𑄪𑄞𑄤𑄨𑄖𑄴𑄤𑄧 𑄥𑄇𑄁 𑄚𑄨𑄤𑄬𑄥𑄚𑄁 𑄃𑄂𑄉𑄚𑄴𑄖𑄴𑄤𑄧 𑄢𑄧𑄎𑄋𑄴𑄉𑄕𑄬 𑄟𑄦𑄚𑄴𑄖𑄁 𑄟𑄕𑄴𑄓𑄛𑄁 𑄇𑄧𑄢𑄧𑄛𑄬𑄖𑄴𑄤𑄧 𑄚𑄉𑄢𑄬 𑄞𑄬𑄢𑄨𑄁 𑄌𑄢𑄧𑄛𑄬𑄖𑄴𑄤𑄧 𑄃𑄣𑄋𑄴𑄇𑄖𑄟𑄕𑄴𑄓𑄛𑄟𑄎𑄴𑄏𑄬 𑄟𑄦𑄧𑄎𑄚𑄛𑄢𑄨𑄤𑄧𑄢𑄮 𑄚𑄨𑄥𑄩𑄘𑄨𑄖𑄴𑄤𑄧 ‘‘𑄤𑄬𑄥𑄴𑄥𑄚𑄴𑄖𑄢𑄁 𑄃𑄂𑄚𑄬𑄖𑄫’’𑄖𑄨 𑄃𑄟𑄌𑄴𑄌𑄥𑄴𑄥 𑄥𑄚𑄴𑄖𑄨𑄇𑄁 𑄛𑄬𑄥𑄬𑄥𑄨. 𑄃𑄟𑄌𑄴𑄌𑄮 𑄤𑄬𑄥𑄴𑄥𑄚𑄴𑄖𑄢𑄁 𑄥𑄪𑄤𑄕𑄴𑄕𑄛𑄩𑄒𑄬 𑄚𑄨𑄥𑄩𑄘𑄧𑄛𑄬𑄖𑄴𑄤𑄧 𑄃𑄂𑄚𑄬𑄥𑄨. 𑄤𑄬𑄥𑄴𑄥𑄚𑄴𑄖𑄢𑄥𑄇𑄪𑄕𑄮 𑄛𑄨𑄖𑄪 𑄃𑄋𑄴𑄇𑄬 𑄚𑄨𑄥𑄩𑄘𑄨𑄖𑄴𑄤𑄧 𑄛𑄨𑄖𑄢𑄧 𑄥𑄦 𑄇𑄩𑅄𑄨𑄖𑄴𑄤𑄧 𑄉𑄚𑄴𑄖𑄴𑄤𑄧 𑄖𑄖𑄴𑄗𑄬𑄤 𑄥𑄪𑄤𑄕𑄴𑄕𑄛𑄩𑄒𑄬 𑄚𑄨𑄥𑄩𑄘𑄨. 𑄃𑄗 𑄚𑄁 𑄢𑄧𑄎𑄧 𑄟𑄦𑄧𑄎𑄚𑄟𑄎𑄴𑄏𑄬 𑄢𑄧𑄎𑄙𑄟𑄴𑄟𑄁 𑄛𑄪𑄌𑄴𑄍𑄚𑄴𑄖𑄮 𑄛𑄒𑄟𑄁 𑄉𑄧𑄗𑄟𑄧𑄦 –

𑄷. ‘‘𑄤𑄬𑄥𑄴𑄥𑄚𑄴𑄖𑄢𑄁 𑄖𑄁 𑄛𑄪𑄌𑄴𑄍𑄧𑄟𑄨, 𑄥𑄇𑄪𑄕 𑄞𑄘𑄴𑄘𑄟𑄖𑄴𑄗𑄪 𑄖𑄬;

𑄢𑄎𑄴𑄎𑄁 𑄇𑄧𑄢𑄬𑄖𑄪𑄇𑄧𑄟𑄬𑄚, 𑄇𑄨𑄁 𑄥𑄪 𑄇𑄨𑄌𑄴𑄌𑄁 𑄇𑄖𑄁 𑄤𑄢’’𑄚𑄴𑄖𑄨.

𑄖𑄖𑄴𑄗 𑄥𑄇𑄪𑄕𑄧𑄖𑄨 𑄖𑄁 𑄃𑄂𑄣𑄛𑄖𑄨. 𑄇𑄨𑄁 𑄥𑄫𑄖𑄨 𑄇𑄖𑄢𑄁 𑄇𑄨𑄌𑄴𑄌𑄁 𑄇𑄖𑄁 𑄤𑄢𑄁 𑄅𑄖𑄴𑄖𑄟𑄁 𑄦𑄮𑄖𑄨, 𑄇𑄗𑄬𑄦𑄨 𑄟𑄬, 𑄖𑄧𑄖, 𑄥𑄇𑄣𑄁 𑄢𑄧𑄎𑄙𑄟𑄴𑄟𑄚𑄴𑄖𑄨 𑄆𑄤𑄁 𑄇𑄨𑄢 𑄖𑄁 𑄥𑄮 𑄛𑄪𑄌𑄴𑄍𑄨.

𑄖𑄁 𑄥𑄪𑄖𑄴𑄤𑄧 𑄤𑄬𑄥𑄴𑄥𑄚𑄴𑄖𑄢𑄮 𑄛𑄐𑄴𑄦𑄁 𑄃𑄇𑄗𑄬𑄖𑄴𑄤𑄧𑄤 𑄢𑄧𑄎𑄧𑄚𑄁 𑄖𑄧𑄤 𑄛𑄟𑄧𑄘𑄬𑄚 𑄌𑄮𑄘𑄬𑄚𑄴𑄖𑄮 𑄘𑄪𑄖𑄨𑄡𑄁 𑄉𑄧𑄗𑄟𑄧𑄦 –

𑄸. ‘‘𑄌𑄨𑄢𑄥𑄴𑄥𑄁 𑄤𑄖 𑄟𑄁 𑄖𑄧𑄖𑄮, 𑄇𑄁𑄥𑄮 𑄝𑄧𑄢𑄧𑄕𑄥𑄨𑄉𑄴𑄉𑄦𑄮;

𑄛𑄟𑄖𑄴𑄖𑄮 𑄃𑄛𑄴𑄛𑄟𑄖𑄴𑄖𑄁 𑄟𑄁, 𑄛𑄨𑄖𑄧 𑄛𑄪𑄖𑄴𑄖𑄁 𑄃𑄌𑄮𑄘𑄡𑄩’’𑄖𑄨.

𑄖𑄖𑄴𑄗 𑄖𑄧𑄖𑄮𑄖𑄨 𑄛𑄨𑄖𑄧. 𑄇𑄁𑄥𑄮𑄖𑄨 𑄄𑄘𑄁 𑄖𑄥𑄴𑄥 𑄚𑄧𑄟𑄁. 𑄝𑄧𑄢𑄧𑄕𑄥𑄨𑄉𑄴𑄉𑄦𑄮𑄖𑄨 𑄌𑄖𑄫𑄦𑄨 𑄥𑄋𑄴𑄉𑄦𑄤𑄖𑄴𑄗𑄫𑄦𑄨 𑄝𑄧𑄢𑄧𑄕𑄥𑄨𑄁 𑄥𑄋𑄴𑄉𑄦𑄬𑄖𑄴𑄤𑄧 𑄤𑄖𑄴𑄖𑄚𑄴𑄖𑄮. 𑄛𑄟𑄖𑄴𑄖𑄮𑄖𑄨 𑄆𑄤𑄢𑄫𑄛𑄧𑄚𑄁 𑄛𑄕𑄴𑄓𑄨𑄖𑄧𑄚𑄁 𑄥𑄚𑄴𑄖𑄨𑄇𑄬 𑄤𑄥𑄚𑄴𑄖𑄮 𑄛𑄐𑄴𑄦𑄥𑄴𑄥 𑄃𑄛𑄪𑄌𑄴𑄍𑄚𑄬𑄚 𑄛𑄟𑄖𑄴𑄖𑄮. 𑄃𑄛𑄴𑄛𑄟𑄖𑄴𑄖𑄁 𑄟𑄚𑄴𑄖𑄨 𑄥𑄩𑄣𑄧𑄘𑄨𑄉𑄪𑄕𑄡𑄮𑄉𑄬𑄚 𑄟𑄁 𑄃𑄛𑄴𑄛𑄟𑄖𑄴𑄖𑄁. 𑄛𑄨𑄖𑄧𑄖𑄨 𑄛𑄮𑄥𑄇𑄛𑄨𑄖𑄧. 𑄃𑄌𑄮𑄘𑄡𑄩𑄖𑄨 𑄃𑄟𑄌𑄴𑄌𑄬𑄦𑄨 ‘‘𑄖𑄨𑄢𑄌𑄴𑄍𑄧𑄚𑄉𑄖𑄬 𑄛𑄪𑄖𑄴𑄖𑄬 𑄇𑄖𑄴𑄤𑄧 𑄤𑄮𑄦𑄢𑄖𑄩’’𑄖𑄨 𑄃𑄤𑄦𑄥𑄨𑄡𑄟𑄧𑄚𑄮 𑄛𑄟𑄧𑄘𑄁 𑄃𑄂𑄛𑄎𑄴𑄎𑄨𑄖𑄴𑄤𑄧 𑄌𑄨𑄢𑄥𑄴𑄥𑄁 𑄃𑄎𑄴𑄎 𑄌𑄮𑄘𑄬𑄥𑄨, 𑄛𑄐𑄴𑄦𑄁 𑄛𑄪𑄌𑄴𑄍𑄩𑄖𑄨 𑄤𑄘𑄖𑄨.

𑄆𑄤𑄁 𑄥𑄮 𑄄𑄟𑄧𑄡 𑄉𑄧𑄗𑄧𑄡 𑄌𑄮𑄘𑄬𑄖𑄴𑄤𑄧 ‘‘𑄟𑄦𑄧𑄢𑄧𑄎, 𑄢𑄐𑄴𑄐𑄧 𑄚𑄧𑄟 𑄖𑄩𑄥𑄪 𑄙𑄟𑄴𑄟𑄬𑄥𑄪 𑄒𑄖𑄴𑄤𑄧 𑄙𑄟𑄴𑄟𑄬𑄚 𑄢𑄎𑄴𑄎𑄁 𑄇𑄧𑄢𑄬𑄖𑄝𑄴𑄝’’𑄚𑄴𑄖𑄨 𑄤𑄖𑄴𑄤𑄧 𑄢𑄧𑄎𑄙𑄟𑄴𑄟𑄁 𑄇𑄗𑄬𑄚𑄴𑄖𑄮 𑄄𑄟𑄧 𑄉𑄧𑄗𑄧𑄡𑄮 𑄃𑄂𑄦 –

𑄹. ‘‘𑄛𑄒𑄟𑄬𑄚𑄬𑄤 𑄤𑄨𑄖𑄗𑄁, 𑄇𑄮𑄙𑄁 𑄦𑄧𑄥𑄁 𑄚𑄨𑄤𑄧𑄢𑄡𑄬;

𑄖𑄖𑄮 𑄇𑄨𑄌𑄴𑄌𑄧𑄚𑄨 𑄇𑄧𑄢𑄬𑄡𑄴𑄡, 𑄖𑄁 𑄤𑄖𑄁 𑄃𑄂𑄦𑄪 𑄈𑄖𑄴𑄖𑄨𑄡.

𑄺. ‘‘𑄡𑄁 𑄖𑄴𑄤𑄁 𑄖𑄧𑄖 𑄖𑄛𑄮𑄇𑄟𑄴𑄟𑄁, 𑄛𑄪𑄝𑄴𑄝𑄬 𑄇𑄖𑄟𑄥𑄁𑄥𑄡𑄁;

𑄢𑄖𑄴𑄖𑄮 𑄘𑄪𑄑𑄴𑄒𑄮 𑄌 𑄡𑄁 𑄇𑄡𑄨𑄢𑄧, 𑄚 𑄖𑄁 𑄇𑄡𑄨𑄢𑄧 𑄖𑄖𑄮 𑄛𑄪𑄚.

𑄻. ‘‘𑄈𑄖𑄴𑄖𑄨𑄡𑄥𑄴𑄥 𑄛𑄟𑄖𑄴𑄖𑄥𑄴𑄥, 𑄢𑄑𑄴𑄒𑄥𑄴𑄟𑄨𑄁 𑄢𑄑𑄴𑄒𑄤𑄓𑄴𑄔𑄚;

𑄥𑄝𑄴𑄝𑄬 𑄞𑄮𑄉𑄧 𑄤𑄨𑄚𑄥𑄴𑄥𑄚𑄴𑄖𑄨, 𑄢𑄐𑄴𑄐𑄮 𑄖𑄁 𑄤𑄪𑄌𑄴𑄌𑄖𑄬 𑄃𑄊𑄁.

𑄼. ‘‘𑄥𑄨𑄢𑄩 𑄖𑄧𑄖 𑄃𑄣𑄇𑄴𑄈𑄩 𑄌, 𑄛𑄪𑄌𑄴𑄍𑄨𑄖𑄧 𑄆𑄖𑄘𑄝𑄴𑄢𑄤𑄪𑄁;

𑄅𑄑𑄴𑄒𑄧𑄚𑄤𑄩𑄢𑄨𑄡𑄬 𑄛𑄮𑄥𑄬, 𑄢𑄟𑄧𑄦𑄁 𑄃𑄚𑄪𑄥𑄫𑄡𑄇𑄬.

𑄽. ‘‘𑄅𑄥𑄫𑄡𑄇𑄬 𑄘𑄪𑄦𑄘𑄡𑄬, 𑄛𑄪𑄢𑄨𑄥𑄬 𑄇𑄟𑄴𑄟𑄘𑄪𑄥𑄴𑄥𑄇𑄬;

𑄇𑄧𑅄𑄇𑄕𑄴𑄕𑄩 𑄟𑄦𑄧𑄢𑄧𑄎, 𑄢𑄟𑄖𑄨 𑄌𑄇𑄴𑄇𑄞𑄐𑄴𑄎𑄚𑄩.

𑄾. ‘‘𑄥𑄮 𑄖𑄴𑄤𑄁 𑄥𑄝𑄴𑄝𑄬 𑄥𑄪𑄦𑄘𑄡𑄮, 𑄥𑄝𑄴𑄝𑄬𑄥𑄁 𑄢𑄇𑄴𑄈𑄨𑄖𑄮 𑄞𑄤;

𑄃𑄣𑄇𑄴𑄈𑄨𑄁 𑄚𑄪𑄘 𑄟𑄦𑄧𑄢𑄧𑄎, 𑄣𑄇𑄴𑄈𑄴𑄡𑄧 𑄞𑄤 𑄚𑄨𑄤𑄬𑄥𑄚𑄁.

𑄿. ‘‘𑄥 𑄣𑄇𑄴𑄈𑄩𑄙𑄨𑄖𑄨𑄥𑄟𑄴𑄛𑄚𑄴𑄚𑄮, 𑄛𑄪𑄢𑄨𑄥𑄮 𑄦𑄨 𑄟𑄦𑄉𑄴𑄉𑄖𑄮;

𑄃𑄟𑄨𑄖𑄴𑄖𑄧𑄚𑄁 𑄇𑄧𑄥𑄨𑄛𑄖𑄨, 𑄟𑄫𑄣𑄁 𑄃𑄉𑄴𑄉𑄐𑄴𑄌 𑄍𑄨𑄚𑄴𑄘𑄖𑄨.

𑄷𑄶. ‘‘𑄥𑄇𑄴𑄇𑄮𑄛𑄨 𑄦𑄨 𑄞𑄫𑄖𑄛𑄖𑄨, 𑄅𑄑𑄴𑄒𑄧𑄚𑄬 𑄚𑄛𑄴𑄛𑄟𑄎𑄴𑄎𑄖𑄨;

𑄥 𑄇𑄣𑄴𑄡𑄧𑄕𑄬 𑄙𑄨𑄖𑄨𑄁 𑄇𑄖𑄴𑄤𑄧, 𑄅𑄑𑄴𑄒𑄧𑄚𑄬 𑄇𑄪𑄢𑄪𑄖𑄬 𑄟𑄚𑄮.

𑄷𑄷. ‘‘𑄉𑄚𑄴𑄙𑄝𑄴𑄝𑄧 𑄛𑄨𑄖𑄢𑄮 𑄘𑄬𑄤𑄧, 𑄥𑄧𑄎𑄩𑄤𑄧 𑄦𑄮𑄚𑄴𑄖𑄨 𑄖𑄧𑄘𑄨𑄚𑄮;

𑄅𑄑𑄴𑄒𑄧𑄦𑄖𑄮 𑄃𑄛𑄴𑄛𑄟𑄎𑄴𑄎𑄖𑄮, 𑄃𑄚𑄪𑄖𑄨𑄑𑄴𑄒𑄚𑄴𑄖𑄨 𑄘𑄬𑄤𑄖𑄧.

𑄷𑄸. ‘‘𑄥𑄮 𑄃𑄛𑄴𑄛𑄟𑄖𑄴𑄖𑄮 𑄃𑄇𑄴𑄇𑄪𑄘𑄴𑄙𑄮, 𑄖𑄧𑄖 𑄇𑄨𑄌𑄴𑄌𑄧𑄚𑄨 𑄇𑄧𑄢𑄡;

𑄤𑄧𑄡𑄟𑄥𑄴𑄥𑄪 𑄌 𑄇𑄨𑄌𑄴𑄌𑄬𑄥𑄪, 𑄚𑄧𑄣𑄥𑄮 𑄤𑄨𑄚𑄴𑄘𑄖𑄬 𑄥𑄪𑄈𑄁.

𑄷𑄹. ‘‘𑄖𑄖𑄴𑄗𑄬𑄤 𑄖𑄬 𑄤𑄖𑄴𑄖𑄛𑄘𑄧, 𑄆𑄥𑄧𑄤 𑄃𑄚𑄪𑄥𑄧𑄥𑄚𑄩;

𑄃𑄣𑄁 𑄟𑄨𑄖𑄴𑄖𑄬 𑄥𑄪𑄈𑄧𑄛𑄬𑄖𑄪𑄁, 𑄃𑄟𑄨𑄖𑄴𑄖𑄧𑄚𑄁 𑄘𑄪𑄈𑄧𑄡 𑄌𑄧’’𑄖𑄨.

𑄖𑄖𑄴𑄗 𑄛𑄒𑄟𑄬𑄚𑄬𑄤 𑄤𑄨𑄖𑄗𑄚𑄴𑄖𑄨, 𑄖𑄧𑄖, 𑄢𑄧𑄎𑄧 𑄚𑄧𑄟 𑄃𑄂𑄘𑄨𑄖𑄮𑄤 𑄟𑄪𑄥𑄧𑄤𑄧𑄘𑄁 𑄚𑄨𑄤𑄧𑄢𑄡𑄬. 𑄟𑄪𑄥𑄧𑄤𑄧𑄘𑄨𑄚𑄮 𑄦𑄨 𑄢𑄐𑄴𑄐𑄮 𑄢𑄑𑄴𑄒𑄁 𑄚𑄨𑄢𑄮𑄎𑄁 𑄦𑄮𑄖𑄨, 𑄛𑄗𑄤𑄨𑄡𑄧 𑄃𑄮𑄎𑄧 𑄇𑄟𑄴𑄟𑄇𑄢𑄕𑄑𑄴𑄒𑄧𑄚𑄖𑄮 𑄥𑄖𑄴𑄖𑄢𑄖𑄚𑄟𑄖𑄴𑄖𑄁 𑄦𑄬𑄑𑄴𑄒𑄧 𑄞𑄥𑄴𑄥𑄖𑄨, 𑄖𑄖𑄮 𑄃𑄂𑄦𑄧𑄢𑄬 𑄤𑄧 𑄖𑄬𑄣𑄟𑄙𑄪𑄜𑄧𑄕𑄨𑄖𑄧𑄘𑄩𑄥𑄪 𑄤𑄧 𑄃𑄮𑄥𑄙𑄬𑄥𑄪 𑄃𑄮𑄎𑄧 𑄚 𑄦𑄮𑄖𑄨. 𑄚𑄨𑄢𑄮𑄎𑄧𑄦𑄧𑄢𑄞𑄮𑄎𑄚𑄧 𑄟𑄚𑄪𑄥𑄴𑄥𑄧 𑄝𑄦𑄴𑄤𑄧𑄝𑄧𑄙𑄧 𑄦𑄮𑄚𑄴𑄖𑄨, 𑄢𑄑𑄴𑄒𑄬 𑄗𑄣𑄎𑄣𑄛𑄗𑄬𑄥𑄪 𑄃𑄂𑄡𑄮 𑄚𑄪𑄛𑄴𑄛𑄎𑄴𑄎𑄖𑄨, 𑄖𑄥𑄴𑄟𑄨𑄁 𑄃𑄚𑄪𑄛𑄴𑄛𑄎𑄴𑄎𑄚𑄴𑄖𑄬 𑄢𑄧𑄎𑄧𑄚𑄮 𑄘𑄪𑄉𑄴𑄉𑄖𑄧 𑄦𑄮𑄚𑄴𑄖𑄨. 𑄖𑄬 𑄥𑄬𑄤𑄇𑄬 𑄥𑄋𑄴𑄉𑄕𑄴𑄦𑄨𑄖𑄪𑄁 𑄚 𑄥𑄇𑄴𑄇𑄮𑄚𑄴𑄖𑄨, 𑄃𑄥𑄋𑄴𑄉𑄦𑄨𑄖𑄧 𑄥𑄬𑄤𑄇𑄧 𑄢𑄧𑄎𑄧𑄚𑄁 𑄉𑄢𑄪𑄌𑄨𑄖𑄴𑄖𑄬𑄚 𑄚 𑄃𑄮𑄣𑄮𑄇𑄬𑄚𑄴𑄖𑄨. 𑄆𑄤𑄁, 𑄖𑄧𑄖, 𑄟𑄪𑄥𑄧𑄤𑄧𑄘𑄮 𑄚𑄧𑄟𑄬𑄥 𑄚𑄨𑄢𑄮𑄎𑄮, 𑄚 𑄥𑄮 𑄎𑄩𑄤𑄨𑄖𑄦𑄬𑄖𑄪𑄛𑄨 𑄇𑄧𑄖𑄝𑄴𑄝𑄮, 𑄥𑄌𑄴𑄌𑄁 𑄛𑄚 𑄥𑄧𑄘𑄪𑄖𑄢𑄁 𑄢𑄥𑄧𑄚𑄚𑄴𑄖𑄨 𑄖𑄘𑄬𑄤 𑄛𑄑𑄨𑄉𑄴𑄉𑄦𑄬𑄖𑄝𑄴𑄝𑄁. 𑄃𑄛𑄨𑄌 𑄟𑄪𑄥𑄧𑄤𑄧𑄘𑄮 𑄚𑄧𑄟 𑄉𑄪𑄕𑄛𑄢𑄨𑄙𑄁𑄥𑄇𑄮 𑄤𑄨𑄛𑄖𑄴𑄖𑄨𑄛𑄢𑄨𑄡𑄮𑄥𑄧𑄚𑄮, 𑄘𑄪𑄖𑄨𑄡𑄌𑄨𑄖𑄴𑄖𑄤𑄧𑄢𑄬 𑄃𑄤𑄩𑄌𑄨𑄛𑄢𑄧𑄡𑄕𑄁 𑄇𑄢𑄮𑄖𑄨. 𑄄𑄟𑄥𑄴𑄟𑄨𑄁 𑄛𑄚𑄖𑄴𑄗𑄬 ‘‘𑄙𑄟𑄴𑄟𑄮 𑄦𑄤𑄬 𑄦𑄖𑄮 𑄦𑄚𑄴𑄖𑄩’’𑄖𑄨 𑄌𑄬𑄖𑄨𑄡𑄎𑄧𑄖𑄇𑄁 (𑄎𑄧. 𑄷.𑄾.𑄺𑄻 𑄃𑄂𑄘𑄡𑄮) 𑄇𑄗𑄬𑄖𑄝𑄴𑄝𑄁.

𑄇𑄮𑄙𑄚𑄴𑄖𑄨, 𑄖𑄧𑄖, 𑄢𑄧𑄎𑄧 𑄚𑄧𑄟 𑄛𑄒𑄟𑄟𑄬𑄤 𑄇𑄪𑄎𑄴𑄏𑄚𑄣𑄇𑄴𑄈𑄕𑄁 𑄇𑄮𑄙𑄟𑄴𑄛𑄨 𑄚𑄨𑄤𑄧𑄢𑄬𑄡𑄴𑄡. 𑄖𑄧𑄖, 𑄃𑄐𑄴𑄐𑄬𑄥𑄐𑄴𑄦𑄨 𑄇𑄮𑄙𑄮 𑄈𑄨𑄛𑄴𑄛𑄁 𑄟𑄖𑄴𑄗𑄇𑄁 𑄚 𑄛𑄧𑄛𑄪𑄕𑄧𑄖𑄨, 𑄢𑄧𑄎𑄫𑄚𑄁 𑄛𑄧𑄛𑄪𑄕𑄧𑄖𑄨. 𑄢𑄧𑄎𑄧𑄚𑄮 𑄚𑄧𑄟 𑄤𑄧𑄌𑄧𑄤𑄪𑄙𑄧 𑄇𑄪𑄎𑄴𑄏𑄨𑄖𑄴𑄤𑄧 𑄃𑄮𑄣𑄮𑄇𑄨𑄖𑄟𑄖𑄴𑄖𑄬𑄚𑄧𑄛𑄨 𑄛𑄢𑄁 𑄤𑄨𑄚𑄧𑄥𑄬𑄚𑄴𑄖𑄨, 𑄖𑄥𑄴𑄟𑄧 𑄢𑄐𑄴𑄐𑄧 𑄃𑄐𑄴𑄐𑄬𑄦𑄨 𑄟𑄚𑄪𑄥𑄴𑄥𑄬𑄦𑄨 𑄃𑄖𑄨𑄢𑄬𑄇𑄖𑄢𑄁 𑄚𑄨𑄇𑄴𑄇𑄮𑄙𑄬𑄚 𑄞𑄤𑄨𑄖𑄝𑄴𑄝𑄁, 𑄈𑄚𑄴𑄖𑄨𑄟𑄬𑄖𑄴𑄖𑄧𑄚𑄪𑄘𑄴𑄘𑄡𑄧𑄥𑄟𑄴𑄛𑄚𑄴𑄚𑄬𑄚 𑄃𑄖𑄴𑄖𑄚𑄮 𑄛𑄨𑄡𑄛𑄪𑄖𑄴𑄖𑄁 𑄤𑄨𑄡 𑄣𑄮𑄇𑄁 𑄤𑄮𑄣𑄮𑄇𑄬𑄚𑄴𑄖𑄬𑄚 𑄞𑄤𑄨𑄖𑄝𑄴𑄝𑄁. 𑄖𑄧𑄖, 𑄃𑄖𑄨𑄇𑄮𑄙𑄚𑄮 𑄚𑄧𑄟 𑄢𑄧𑄎𑄧 𑄅𑄛𑄴𑄛𑄚𑄴𑄚𑄁 𑄡𑄥𑄁 𑄢𑄇𑄴𑄈𑄨𑄖𑄪𑄁 𑄚 𑄥𑄇𑄴𑄇𑄮𑄖𑄨. 𑄄𑄟𑄥𑄴𑄥 𑄛𑄚𑄖𑄴𑄗𑄥𑄴𑄥 𑄘𑄩𑄛𑄚𑄖𑄴𑄗𑄁 𑄈𑄚𑄴𑄖𑄨𑄤𑄧𑄘𑄨𑄎𑄧𑄖𑄇- (𑄎𑄧. 𑄷.𑄺.𑄺𑄿 𑄃𑄂𑄘𑄡𑄮) 𑄌𑄫𑅄𑄙𑄟𑄴𑄟𑄛𑄧𑄣𑄎𑄧𑄖𑄇𑄧𑄚𑄨 (𑄎𑄧. 𑄷.𑄻.𑄺𑄺 𑄃𑄂𑄘𑄡𑄮) 𑄇𑄗𑄬𑄖𑄝𑄴𑄝𑄧𑄚𑄨. 𑄌𑄫𑅄𑄙𑄟𑄴𑄟𑄛𑄧𑄣𑄎𑄧𑄖𑄇𑄥𑄴𑄟𑄨𑄐𑄴𑄦𑄨 𑄟𑄦𑄧𑄛𑄖𑄧𑄛𑄚𑄮 𑄚𑄧𑄟 𑄢𑄧𑄎𑄧 𑄛𑄪𑄖𑄴𑄖𑄁 𑄊𑄧𑄖𑄬𑄖𑄴𑄤𑄧 𑄛𑄪𑄖𑄴𑄖𑄥𑄮𑄇𑄬𑄚 𑄦𑄘𑄡𑄬𑄚 𑄜𑄣𑄨𑄖𑄬𑄚 𑄟𑄖𑄧𑄡 𑄘𑄬𑄤𑄨𑄡𑄧 𑄥𑄡𑄟𑄴𑄛𑄨 𑄘𑄬𑄤𑄨𑄁 𑄃𑄚𑄪𑄥𑄮𑄌𑄚𑄴𑄖𑄮 𑄦𑄘𑄡𑄬𑄚 𑄜𑄣𑄨𑄖𑄬𑄚𑄬𑄤 𑄟𑄢𑄨. 𑄃𑄗 𑄖𑄬 𑄖𑄡𑄮𑄛𑄨 𑄆𑄇𑄃𑄂𑅄𑄧𑄦𑄚𑄬𑄤 𑄏𑄧𑄛𑄬𑄥𑄪𑄁. 𑄖𑄥𑄴𑄟𑄧 𑄢𑄐𑄴𑄐𑄧 𑄛𑄒𑄟𑄟𑄬𑄤 𑄟𑄪𑄥𑄧𑄤𑄧𑄘𑄁 𑄤𑄎𑄴𑄎𑄬𑄖𑄴𑄤𑄧 𑄘𑄪𑄖𑄨𑄡𑄁 𑄇𑄮𑄙𑄮 𑄤𑄎𑄴𑄎𑄬𑄖𑄝𑄴𑄝𑄮.

𑄦𑄧𑄥𑄚𑄴𑄖𑄨 𑄦𑄥𑄴𑄥𑄁, 𑄃𑄡𑄟𑄬𑄤 𑄤𑄧 𑄛𑄧𑄒𑄮. 𑄖𑄬𑄥𑄪 𑄖𑄬𑄥𑄪 𑄇𑄨𑄌𑄴𑄌𑄬𑄥𑄪 𑄅𑄛𑄴𑄛𑄨𑄣𑄧𑄤𑄨𑄖𑄌𑄨𑄖𑄴𑄖𑄖𑄧𑄡 𑄇𑄬𑅄𑄨𑄥𑄩𑄣𑄖𑄁 𑄛𑄢𑄨𑄦𑄧𑄥𑄁 𑄚𑄨𑄤𑄧𑄢𑄬𑄡𑄴𑄡. 𑄖𑄧𑄖, 𑄢𑄐𑄴𑄐𑄧 𑄚𑄧𑄟 𑄇𑄬𑅄𑄨𑄥𑄩𑄣𑄬𑄚 𑄚 𑄞𑄤𑄨𑄖𑄝𑄴𑄝𑄁, 𑄃𑄛𑄢𑄛𑄖𑄴𑄖𑄨𑄡𑄬𑄚 𑄦𑄪𑄖𑄴𑄤𑄧 𑄥𑄝𑄴𑄝𑄧𑄚𑄨 𑄇𑄨𑄌𑄴𑄌𑄧𑄚𑄨 𑄃𑄖𑄴𑄖𑄛𑄌𑄴𑄌𑄇𑄴𑄈𑄬𑄚𑄬𑄤 𑄇𑄧𑄖𑄝𑄴𑄝𑄧𑄚𑄨. 𑄅𑄛𑄴𑄛𑄨𑄣𑄧𑄤𑄨𑄖𑄌𑄨𑄖𑄴𑄖𑄮 𑄦𑄨 𑄢𑄧𑄎𑄧 𑄃𑄖𑄪𑄣𑄬𑄖𑄴𑄤𑄧 𑄇𑄟𑄴𑄟𑄧𑄚𑄨 𑄇𑄢𑄮𑄚𑄴𑄖𑄮 𑄣𑄘𑄴𑄙𑄁 𑄡𑄥𑄁 𑄤𑄨𑄚𑄧𑄥𑄬𑄖𑄨. 𑄄𑄟𑄥𑄴𑄟𑄨𑄁 𑄛𑄚𑄖𑄴𑄗𑄬 𑄥𑄢𑄞𑄋𑄴𑄉𑄎𑄧𑄖𑄇𑄬 (𑄎𑄧. 𑄸.𑄷𑄽.𑄻𑄶 𑄃𑄂𑄘𑄡𑄮) 𑄛𑄪𑄢𑄮𑄦𑄨𑄖𑄥𑄴𑄥 𑄤𑄌𑄚𑄁 𑄉𑄦𑄬𑄖𑄴𑄤𑄧 𑄘𑄕𑄴𑄓𑄇𑄨𑄢𑄐𑄴𑄐𑄮 𑄇𑄨𑄥𑄤𑄌𑄴𑄍𑄬 𑄃𑄛𑄢𑄎𑄴𑄏𑄨𑄖𑄴𑄤𑄧 𑄥𑄦 𑄢𑄑𑄴𑄒𑄬𑄚 𑄅𑄌𑄴𑄍𑄨𑄎𑄴𑄎𑄨𑄖𑄴𑄤𑄧 𑄇𑄪𑄇𑄴𑄇𑄪𑅄𑄚𑄨𑄢𑄡𑄬 𑄚𑄨𑄝𑄴𑄝𑄖𑄴𑄖𑄞𑄧𑄤𑄮 𑄌 𑄟𑄧𑄖𑄋𑄴𑄉𑄎𑄧𑄖𑄇𑄬 (𑄎𑄧. 𑄷.𑄷𑄻.𑄷 𑄃𑄂𑄘𑄡𑄮) 𑄟𑄎𑄴𑄏𑄢𑄐𑄴𑄐𑄮 𑄝𑄴𑄢𑄧𑄦𑄴𑄟𑄕𑄧𑄚𑄁 𑄇𑄗𑄁 𑄉𑄦𑄬𑄖𑄴𑄤𑄧 𑄟𑄧𑄖𑄋𑄴𑄉𑄖𑄧𑄛𑄥𑄬 𑄃𑄛𑄢𑄎𑄴𑄏𑄨𑄖𑄴𑄤𑄧 𑄥𑄦 𑄢𑄑𑄴𑄒𑄬𑄚 𑄅𑄌𑄴𑄍𑄨𑄎𑄴𑄎𑄨𑄖𑄴𑄤𑄧 𑄚𑄨𑄢𑄡𑄬 𑄚𑄨𑄝𑄴𑄝𑄖𑄴𑄖𑄞𑄧𑄤𑄮 𑄌 𑄊𑄑𑄛𑄕𑄴𑄓𑄨𑄖𑄎𑄧𑄖𑄇𑄬 (𑄎𑄧. 𑄷.𑄷𑄶.𑄷𑄼𑄻 𑄃𑄂𑄘𑄡𑄮) 𑄘𑄥𑄞𑄧𑄖𑄨𑄇𑄢𑄧𑄎𑄘𑄧𑄢𑄇𑄧𑄚𑄁 𑄟𑄮𑄦𑄟𑄫𑅄𑄴𑄦𑄧𑄚𑄁 𑄤𑄌𑄚𑄁 𑄉𑄦𑄬𑄖𑄴𑄤𑄧 𑄇𑄕𑄴𑄦𑄘𑄩𑄛𑄧𑄡𑄚𑄬 𑄃𑄛𑄢𑄎𑄴𑄏𑄨𑄖𑄴𑄤𑄧 𑄤𑄧𑄥𑄪𑄘𑄬𑄤𑄇𑄪𑄣𑄥𑄴𑄥 𑄚𑄧𑄥𑄨𑄖𑄞𑄧𑄤𑄮 𑄌 𑄇𑄗𑄬𑄖𑄝𑄴𑄝𑄮.

𑄖𑄖𑄮 𑄇𑄨𑄌𑄴𑄌𑄧𑄚𑄨 𑄇𑄧𑄢𑄬𑄡𑄴𑄡𑄧𑄖𑄨 𑄆𑄤𑄁, 𑄖𑄧𑄖, 𑄛𑄒𑄟𑄁 𑄟𑄪𑄥𑄧𑄤𑄧𑄘𑄁 𑄘𑄪𑄖𑄨𑄡𑄁 𑄇𑄮𑄙𑄁 𑄖𑄖𑄨𑄡𑄁 𑄃𑄙𑄟𑄴𑄟𑄦𑄧𑄥𑄁 𑄤𑄎𑄴𑄎𑄬𑄖𑄴𑄤𑄧 𑄖𑄖𑄮 𑄛𑄌𑄴𑄍𑄧 𑄢𑄧𑄎𑄧 𑄢𑄑𑄴𑄒𑄤𑄧𑄥𑄩𑄚𑄁 𑄇𑄖𑄴𑄖𑄝𑄴𑄝𑄇𑄨𑄌𑄴𑄌𑄧𑄚𑄨 𑄇𑄧𑄢𑄬𑄡𑄴𑄡. 𑄖𑄁 𑄤𑄖𑄁 𑄃𑄂𑄦𑄪 𑄈𑄖𑄴𑄖𑄨𑄡𑄧𑄖𑄨, 𑄈𑄖𑄴𑄖𑄨𑄡𑄟𑄦𑄧𑄢𑄧𑄎, 𑄡𑄁 𑄟𑄡𑄧 𑄤𑄪𑄖𑄴𑄖𑄁, 𑄆𑄖𑄁 𑄢𑄐𑄴𑄐𑄮 𑄤𑄖𑄥𑄟𑄧𑄘𑄧𑄚𑄚𑄴𑄖𑄨 𑄛𑄮𑄢𑄧𑄕𑄇𑄛𑄕𑄴𑄓𑄨𑄖𑄧 𑄇𑄗𑄡𑄨𑄁𑄥𑄪.

𑄚 𑄖𑄁 𑄇𑄡𑄨𑄢𑄧𑄖𑄨 𑄡𑄁 𑄖𑄡𑄧 𑄢𑄧𑄉𑄧𑄘𑄨𑄤𑄥𑄬𑄚 𑄛𑄌𑄴𑄍𑄧 𑄖𑄧𑄛𑄇𑄢𑄁 𑄇𑄟𑄴𑄟𑄁 𑄇𑄖𑄁 𑄦𑄮𑄖𑄨, 𑄖𑄖𑄮 𑄛𑄪𑄝𑄴𑄝𑄬 𑄇𑄖𑄖𑄮 𑄛𑄪𑄚 𑄖𑄧𑄘𑄨𑄥𑄁 𑄇𑄟𑄴𑄟𑄁 𑄚 𑄇𑄡𑄨𑄢𑄧, 𑄟𑄧 𑄇𑄢𑄬𑄡𑄴𑄡𑄧𑄥𑄨, 𑄖𑄧𑄖𑄧𑄖𑄨. 𑄤𑄪𑄌𑄴𑄌𑄖𑄬𑄖𑄨 𑄖𑄁 𑄢𑄐𑄴𑄐𑄮 𑄃𑄊𑄚𑄴𑄖𑄨 𑄤𑄪𑄌𑄴𑄌𑄖𑄨, 𑄆𑄤𑄁 𑄛𑄮𑄢𑄧𑄕𑄇𑄛𑄕𑄴𑄓𑄨𑄖𑄧 𑄇𑄗𑄡𑄨𑄁𑄥𑄪. 𑄥𑄨𑄢𑄩𑄖𑄨 𑄄𑄘𑄁 𑄤𑄬𑄥𑄴𑄥𑄚𑄴𑄖𑄢𑄥𑄇𑄪𑄕𑄮 𑄛𑄪𑄝𑄴𑄝𑄬 𑄝𑄧𑄢𑄧𑄕𑄥𑄨𑄡𑄁 𑄛𑄤𑄖𑄴𑄖𑄨𑄖𑄇𑄧𑄢𑄕𑄁 𑄃𑄂𑄦𑄢𑄨𑄖𑄴𑄤𑄧 𑄘𑄥𑄴𑄥𑄬𑄚𑄴𑄖𑄮 𑄃𑄂𑄦. 𑄖𑄖𑄴𑄗 𑄃𑄝𑄴𑄢𑄤𑄪𑄚𑄴𑄖𑄨 𑄥𑄪𑄌𑄨𑄛𑄢𑄨𑄤𑄧𑄢𑄥𑄬𑄑𑄴𑄒𑄨𑄚𑄧 𑄛𑄪𑄌𑄴𑄍𑄨𑄖𑄧 𑄇𑄗𑄡𑄨𑄁𑄥𑄪. 𑄅𑄑𑄴𑄒𑄧𑄚𑄤𑄩𑄢𑄨𑄡𑄬𑄖𑄨 𑄡𑄮 𑄛𑄮𑄥𑄮 𑄅𑄑𑄴𑄒𑄧𑄚𑄬 𑄤𑄩𑄢𑄨𑄡𑄬 𑄌 𑄛𑄖𑄨𑄑𑄴𑄒𑄨𑄖𑄮, 𑄚 𑄌 𑄛𑄢𑄬𑄥𑄁 𑄥𑄟𑄴𑄛𑄖𑄴𑄖𑄨𑄁 𑄘𑄨𑄥𑄴𑄤𑄧 𑄅𑄥𑄫𑄡𑄖𑄨, 𑄖𑄥𑄴𑄟𑄨𑄁 𑄃𑄦𑄁 𑄃𑄞𑄨𑄢𑄟𑄧𑄟𑄩𑄖𑄨 𑄃𑄂𑄦. 𑄆𑄤𑄁 𑄖𑄧𑄤 𑄖𑄧𑄖 𑄥𑄨𑄢𑄩 𑄇𑄗𑄬𑄥𑄨. 𑄅𑄥𑄫𑄡𑄇𑄬𑄖𑄨 𑄃𑄣𑄇𑄴𑄈𑄩 𑄛𑄚, 𑄖𑄧𑄖, 𑄛𑄪𑄌𑄴𑄍𑄨𑄖𑄧 𑄃𑄦𑄁 𑄛𑄢𑄥𑄟𑄴𑄛𑄖𑄴𑄖𑄨𑄅𑄥𑄫𑄡𑄇𑄬 𑄘𑄪𑄦𑄘𑄡𑄬 𑄘𑄪𑄌𑄨𑄖𑄴𑄖𑄬 𑄇𑄣𑄴𑄡𑄧𑄕𑄇𑄟𑄴𑄟𑄘𑄫𑄥𑄇𑄬 𑄡𑄮 𑄇𑄣𑄴𑄡𑄧𑄕𑄇𑄟𑄴𑄟𑄁 𑄘𑄪𑄥𑄴𑄥𑄚𑄴𑄖𑄮 𑄃𑄛𑄴𑄛𑄨𑄡𑄧𑄡𑄚𑄴𑄖𑄮 𑄃𑄑𑄴𑄑𑄩𑄡𑄚𑄴𑄖𑄮 𑄚 𑄇𑄢𑄮𑄖𑄨, 𑄖𑄥𑄴𑄟𑄨𑄁 𑄃𑄞𑄨𑄢𑄟𑄧𑄟𑄩𑄖𑄨 𑄃𑄂𑄦. 𑄆𑄤𑄁 𑄥𑄧 𑄇𑄧𑅄𑄇𑄕𑄴𑄕𑄩, 𑄟𑄦𑄧𑄢𑄧𑄎, 𑄢𑄟𑄖𑄨 𑄛𑄖𑄨𑄢𑄫𑄛𑄘𑄬𑄥𑄤𑄧𑄥𑄧𑄘𑄨𑄚𑄮 𑄇𑄪𑄥𑄣𑄌𑄇𑄴𑄇𑄥𑄴𑄥 𑄞𑄐𑄴𑄎𑄚𑄩.

𑄥𑄪𑄦𑄘𑄡𑄮𑄖𑄨 𑄥𑄪𑄚𑄴𑄘𑄢𑄌𑄨𑄖𑄴𑄖𑄮 𑄦𑄨𑄖𑄌𑄨𑄖𑄴𑄖𑄇𑄮. 𑄚𑄪𑄘𑄧𑄖𑄨 𑄚𑄩𑄦𑄢. 𑄚𑄨𑄤𑄬𑄥𑄚𑄚𑄴𑄖𑄨 𑄣𑄇𑄴𑄈𑄨𑄡𑄧 𑄛𑄚 𑄚𑄨𑄤𑄬𑄥𑄚𑄁 𑄞𑄤 𑄛𑄖𑄨𑄑𑄴𑄒𑄧 𑄦𑄮𑄦𑄨. 𑄥 𑄣𑄇𑄴𑄈𑄩𑄙𑄨𑄖𑄨𑄥𑄟𑄴𑄛𑄚𑄴𑄚𑄮𑄖𑄨, 𑄟𑄦𑄧𑄢𑄧𑄎, 𑄇𑄧𑄥𑄨𑄛𑄖𑄨 𑄥𑄮 𑄛𑄪𑄢𑄨𑄥𑄮 𑄛𑄐𑄴𑄐𑄧𑄡 𑄌𑄬𑄤 𑄤𑄩𑄢𑄨𑄡𑄬𑄚 𑄌 𑄥𑄟𑄴𑄛𑄚𑄴𑄚𑄮. 𑄟𑄦𑄉𑄴𑄉𑄖𑄮𑄖𑄨 𑄟𑄦𑄎𑄴𑄏𑄧𑄥𑄡𑄮 𑄌𑄮𑄢𑄧𑄚𑄁 𑄛𑄌𑄴𑄌𑄡𑄞𑄫𑄖𑄬 𑄉𑄕𑄴𑄦𑄚𑄴𑄖𑄮 𑄃𑄟𑄨𑄖𑄴𑄖𑄧𑄚𑄁 𑄟𑄫𑄣𑄁 𑄌𑄮𑄢𑄬 𑄉𑄕𑄴𑄦𑄚𑄴𑄖𑄮 𑄃𑄟𑄨𑄖𑄴𑄖𑄧𑄚𑄁 𑄃𑄉𑄴𑄉𑄁 𑄍𑄨𑄚𑄴𑄘𑄖𑄩𑄖𑄨 𑄤𑄘𑄖𑄨. 𑄥𑄇𑄴𑄇𑄮𑄖𑄨 𑄄𑄚𑄴𑄘𑄮. 𑄞𑄫𑄖𑄛𑄖𑄩𑄖𑄨 𑄢𑄧𑄎𑄧𑄚𑄁 𑄃𑄂𑄣𑄛𑄖𑄨. 𑄅𑄑𑄴𑄒𑄧𑄚𑄬𑄖𑄨 𑄅𑄑𑄴𑄒𑄧𑄚𑄤𑄩𑄢𑄨𑄡𑄬. 𑄚𑄛𑄴𑄛𑄟𑄎𑄴𑄎𑄖𑄩𑄖𑄨 𑄚 𑄛𑄟𑄎𑄴𑄎𑄖𑄨, 𑄥𑄝𑄴𑄝𑄇𑄨𑄌𑄴𑄌𑄧𑄚𑄨 𑄇𑄢𑄮𑄖𑄨. 𑄥 𑄇𑄣𑄴𑄡𑄧𑄕𑄬𑄖𑄨 𑄥𑄮 𑄘𑄬𑄤𑄢𑄧𑄎𑄧 𑄅𑄑𑄴𑄒𑄧𑄚𑄤𑄩𑄢𑄨𑄡𑄬 𑄟𑄚𑄁 𑄇𑄢𑄮𑄚𑄴𑄖𑄮 𑄛𑄧𑄛𑄇𑄟𑄴𑄟𑄁 𑄃𑄇𑄖𑄴𑄤𑄧 𑄇𑄣𑄴𑄡𑄧𑄕𑄬 𑄛𑄪𑄐𑄴𑄐𑄇𑄟𑄴𑄟𑄥𑄴𑄟𑄨𑄐𑄴𑄐𑄬𑄤 𑄙𑄨𑄖𑄨𑄁 𑄇𑄖𑄴𑄤𑄧 𑄃𑄛𑄴𑄛𑄟𑄖𑄴𑄖𑄮 𑄅𑄑𑄴𑄒𑄧𑄚𑄬 𑄟𑄚𑄁 𑄇𑄢𑄮𑄖𑄨, 𑄖𑄥𑄴𑄥 𑄛𑄚 𑄇𑄣𑄴𑄡𑄧𑄕𑄇𑄟𑄴𑄟𑄬 𑄤𑄩𑄢𑄨𑄡𑄇𑄢𑄕𑄞𑄧𑄤𑄘𑄥𑄴𑄥𑄚𑄖𑄴𑄗𑄁 𑄥𑄢𑄞𑄋𑄴𑄉𑄎𑄧𑄖𑄇𑄬 𑄘𑄴𑄤𑄩𑄥𑄪 𑄘𑄬𑄤𑄣𑄮𑄇𑄬𑄥𑄪 𑄘𑄬𑄤𑄖𑄧𑄦𑄨 𑄥𑄘𑄴𑄙𑄨𑄁 𑄇𑄛𑄨𑄑𑄴𑄒𑄧𑄢𑄧𑄟𑄁 𑄃𑄂𑄉𑄚𑄴𑄖𑄴𑄤𑄧 𑄛𑄐𑄴𑄦𑄁 𑄛𑄪𑄌𑄴𑄍𑄨𑄖𑄴𑄤𑄧 𑄙𑄟𑄴𑄟𑄥𑄴𑄥 𑄥𑄪𑄖𑄞𑄧𑄤𑄮, 𑄟𑄦𑄧𑄇𑄕𑄴𑄦𑄎𑄧𑄖𑄇𑄬 (𑄎𑄧. 𑄷.𑄷𑄸.𑄼𑄷 𑄃𑄂𑄘𑄡𑄮) 𑄃𑄖𑄴𑄖𑄚𑄮 𑄃𑄂𑄚𑄪𑄞𑄧𑄤𑄬𑄚 𑄎𑄚𑄁 𑄖𑄧𑄥𑄬𑄖𑄴𑄤𑄧 𑄃𑄮𑄥𑄇𑄴𑄇𑄚𑄴𑄖𑄥𑄴𑄥 𑄥𑄧𑄥𑄚𑄥𑄴𑄥 𑄛𑄤𑄖𑄴𑄖𑄨𑄖𑄞𑄧𑄤𑄮 𑄌𑄧𑄖𑄨 𑄆𑄤𑄟𑄧𑄘𑄩𑄚𑄨 𑄤𑄖𑄴𑄗𑄫𑄚𑄨 𑄇𑄗𑄬𑄖𑄝𑄴𑄝𑄧𑄚𑄨.

𑄉𑄚𑄴𑄙𑄝𑄴𑄝𑄧𑄖𑄨 𑄌𑄧𑄖𑄪𑄟𑄦𑄧𑄢𑄧𑄎𑄨𑄇𑄧𑄚𑄁 𑄦𑄬𑄑𑄴𑄒𑄧 𑄌𑄖𑄪𑄡𑄮𑄚𑄨𑄇𑄧 𑄘𑄬𑄤𑄧, 𑄌𑄖𑄪𑄡𑄮𑄚𑄨𑄇𑄖𑄴𑄖𑄧𑄡𑄬𑄤 𑄇𑄨𑄢 𑄖𑄬 𑄉𑄚𑄴𑄙𑄝𑄴𑄝𑄧 𑄚𑄧𑄟 𑄎𑄧𑄖𑄧. 𑄛𑄨𑄖𑄢𑄮𑄖𑄨 𑄝𑄴𑄢𑄦𑄴𑄟𑄧𑄚𑄮. 𑄘𑄬𑄤𑄧𑄖𑄨 𑄅𑄛𑄛𑄖𑄴𑄖𑄨𑄘𑄬𑄤𑄤𑄥𑄬𑄚 𑄍 𑄇𑄧𑄟𑄧𑄤𑄌𑄢𑄘𑄬𑄤𑄧. 𑄖𑄧𑄘𑄨𑄚𑄮𑄖𑄨 𑄖𑄗𑄧𑄤𑄨𑄙𑄥𑄴𑄥 𑄇𑄪𑄥𑄣𑄧𑄞𑄨𑄢𑄖𑄥𑄴𑄥 𑄢𑄐𑄴𑄐𑄮. 𑄥𑄧𑄎𑄩𑄤𑄧 𑄦𑄮𑄚𑄴𑄖𑄩𑄖𑄨 𑄥𑄟𑄧𑄚𑄎𑄩𑄤𑄨𑄇𑄧 𑄅𑄛𑄎𑄩𑄤𑄨𑄖𑄝𑄴𑄝𑄧. 𑄖𑄧𑄘𑄨𑄥𑄧 𑄦𑄨 𑄢𑄧𑄎𑄧𑄚𑄮 𑄘𑄧𑄚𑄧𑄘𑄩𑄚𑄨 𑄛𑄪𑄐𑄴𑄐𑄧𑄚𑄨 𑄇𑄢𑄮𑄚𑄴𑄖𑄧 𑄘𑄬𑄤𑄖𑄧𑄚𑄁 𑄛𑄖𑄴𑄖𑄨𑄁 𑄘𑄬𑄚𑄴𑄖𑄨, 𑄖𑄧 𑄖𑄁 𑄛𑄖𑄴𑄖𑄨𑄁 𑄃𑄚𑄪𑄟𑄮𑄘𑄨𑄖𑄴𑄤𑄧 𑄥𑄟𑄴𑄛𑄑𑄨𑄌𑄴𑄍𑄨𑄖𑄴𑄤𑄧 𑄘𑄨𑄝𑄴𑄝𑄡𑄥𑄬𑄚 𑄤𑄓𑄴𑄔𑄚𑄴𑄖𑄨. 𑄃𑄚𑄪𑄖𑄨𑄑𑄴𑄒𑄚𑄴𑄖𑄩𑄖𑄨 𑄖𑄧𑄘𑄨𑄥𑄥𑄴𑄥 𑄢𑄐𑄴𑄐𑄮 𑄤𑄩𑄢𑄨𑄡𑄁 𑄇𑄢𑄮𑄚𑄴𑄖𑄥𑄴𑄥 𑄃𑄛𑄴𑄛𑄟𑄧𑄘𑄁 𑄃𑄂𑄛𑄎𑄴𑄎𑄚𑄴𑄖𑄥𑄴𑄥 𑄘𑄬𑄤𑄖𑄧 𑄃𑄚𑄪𑄖𑄨𑄑𑄴𑄒𑄚𑄴𑄖𑄨 𑄃𑄚𑄪𑄉𑄌𑄴𑄍𑄚𑄴𑄖𑄨, 𑄙𑄟𑄴𑄟𑄨𑄇𑄁 𑄢𑄇𑄴𑄈𑄁 𑄥𑄁𑄤𑄨𑄘𑄦𑄚𑄴𑄖𑄩𑄖𑄨 𑄃𑄖𑄴𑄗𑄮.

𑄥𑄮𑄖𑄨 𑄥𑄮 𑄖𑄴𑄤𑄁. 𑄤𑄧𑄡𑄟𑄥𑄴𑄥𑄫𑄖𑄨 𑄖𑄧𑄚𑄨 𑄢𑄑𑄴𑄒𑄇𑄨𑄌𑄴𑄌𑄧𑄚𑄨 𑄇𑄢𑄮𑄚𑄴𑄖𑄮 𑄖𑄪𑄣𑄚𑄤𑄥𑄬𑄚 𑄖𑄩𑄢𑄕𑄤𑄥𑄬𑄚 𑄛𑄌𑄴𑄌𑄇𑄴𑄈𑄇𑄟𑄴𑄟𑄤𑄥𑄬𑄚 𑄖𑄬𑄥𑄪 𑄖𑄬𑄥𑄪 𑄇𑄨𑄌𑄴𑄌𑄬𑄥𑄪 𑄤𑄩𑄢𑄨𑄡𑄁 𑄇𑄢𑄥𑄴𑄥𑄪. 𑄖𑄖𑄴𑄗𑄬𑄤 𑄖𑄬 𑄤𑄖𑄴𑄖𑄛𑄘𑄧𑄖𑄨, 𑄖𑄧𑄖, 𑄡𑄁 𑄟𑄁 𑄖𑄴𑄤𑄁 𑄇𑄨𑄁𑄥𑄪 𑄇𑄨𑄌𑄴𑄌𑄁 𑄇𑄖𑄁 𑄤𑄢𑄚𑄴𑄖𑄨 𑄛𑄪𑄌𑄴𑄍𑄨, 𑄖𑄖𑄴𑄗 𑄖𑄤 𑄛𑄐𑄴𑄦𑄬𑄡𑄬𑄤 𑄆𑄖𑄬 𑄟𑄡𑄧 ‘‘𑄛𑄒𑄟𑄬𑄚𑄬𑄤 𑄤𑄨𑄖𑄗’’𑄚𑄴𑄖𑄨𑄃𑄂𑄘𑄡𑄮 𑄤𑄪𑄖𑄴𑄖𑄧, 𑄆𑄖𑄬 𑄤𑄖𑄴𑄖𑄛𑄘𑄧 𑄤𑄖𑄴𑄖𑄇𑄮𑄑𑄴𑄒𑄧𑄥𑄧, 𑄆𑄤𑄁 𑄖𑄖𑄴𑄗 𑄤𑄖𑄴𑄖𑄥𑄴𑄥𑄪. 𑄆𑄥𑄧𑄖𑄨 𑄡𑄧 𑄖𑄬 𑄟𑄡𑄧 𑄇𑄗𑄨𑄖𑄧, 𑄆𑄥𑄧𑄤 𑄖𑄤 𑄃𑄚𑄪𑄥𑄧𑄥𑄚𑄩. 𑄃𑄣𑄚𑄴𑄖𑄨 𑄆𑄤𑄁 𑄤𑄖𑄴𑄖𑄟𑄧𑄚𑄮 𑄦𑄨 𑄢𑄧𑄎𑄧 𑄃𑄖𑄴𑄖𑄚𑄮 𑄟𑄨𑄖𑄴𑄖𑄬 𑄥𑄪𑄈𑄧𑄛𑄬𑄖𑄪𑄁, 𑄃𑄟𑄨𑄖𑄴𑄖𑄧𑄚𑄐𑄴𑄌 𑄘𑄪𑄇𑄴𑄈𑄧𑄡 𑄃𑄣𑄁 𑄛𑄢𑄨𑄡𑄖𑄴𑄖𑄮 𑄥𑄟𑄖𑄴𑄗𑄮𑄖𑄨.

𑄆𑄤𑄁 𑄤𑄬𑄥𑄴𑄥𑄚𑄴𑄖𑄢𑄥𑄇𑄪𑄕𑄬𑄚 𑄆𑄇𑄧𑄡 𑄉𑄧𑄗𑄧𑄡 𑄢𑄐𑄴𑄐𑄮 𑄛𑄟𑄧𑄘𑄁 𑄌𑄮𑄘𑄬𑄖𑄴𑄤𑄧 𑄆𑄇𑄧𑄘𑄥𑄦𑄨 𑄉𑄧𑄗𑄧𑄦𑄨 𑄙𑄟𑄴𑄟𑄬 𑄇𑄗𑄨𑄖𑄬 ‘‘𑄝𑄪𑄘𑄴𑄙𑄣𑄩𑅄𑄧𑄡 𑄛𑄐𑄴𑄦𑄮 𑄇𑄗𑄨𑄖𑄮’’𑄖𑄨 𑄟𑄦𑄧𑄎𑄚𑄮 𑄃𑄌𑄴𑄍𑄢𑄨𑄡𑄝𑄴𑄞𑄪𑄖𑄌𑄨𑄖𑄴𑄖𑄎𑄧𑄖𑄮 𑄥𑄧𑄙𑄪𑄇𑄧𑄢𑄥𑄖𑄧𑄚𑄨 𑄛𑄤𑄖𑄴𑄖𑄬𑄥𑄨. 𑄢𑄧𑄎𑄧 𑄥𑄮𑄟𑄚𑄥𑄴𑄥𑄛𑄴𑄛𑄖𑄴𑄖𑄮 𑄃𑄟𑄌𑄴𑄌𑄬 𑄃𑄂𑄟𑄚𑄴𑄖𑄬𑄖𑄴𑄤𑄧 𑄛𑄪𑄌𑄴𑄍𑄨 – ‘‘𑄞𑄮𑄚𑄴𑄖𑄮! 𑄃𑄟𑄌𑄴𑄌𑄧 𑄟𑄟 𑄛𑄪𑄖𑄴𑄖𑄬𑄚 𑄤𑄬𑄥𑄴𑄥𑄚𑄴𑄖𑄢𑄬𑄚 𑄆𑄤𑄁 𑄇𑄗𑄬𑄚𑄴𑄖𑄬𑄚 𑄇𑄬𑄚 𑄇𑄖𑄴𑄖𑄝𑄴𑄝𑄁 𑄇𑄨𑄌𑄴𑄌𑄁 𑄇𑄖’’𑄚𑄴𑄖𑄨. 𑄟𑄦𑄧𑄥𑄬𑄚𑄉𑄪𑄖𑄴𑄖𑄬𑄚, 𑄘𑄬𑄤𑄧𑄖𑄨. ‘‘𑄖𑄬𑄚 𑄦𑄨𑄥𑄴𑄥 𑄟𑄦𑄧𑄥𑄬𑄚𑄉𑄪𑄖𑄴𑄖𑄑𑄴𑄒𑄧𑄚𑄁 𑄘𑄟𑄴𑄟𑄩’’𑄖𑄨 𑄤𑄬𑄥𑄴𑄥𑄚𑄴𑄖𑄢𑄁 𑄒𑄧𑄚𑄚𑄴𑄖𑄢𑄬 𑄒𑄛𑄬𑄥𑄨. 𑄥𑄮 𑄖𑄖𑄮 𑄛𑄑𑄴𑄒𑄧𑄡 𑄟𑄦𑄧𑄥𑄬𑄚𑄉𑄪𑄖𑄴𑄖𑄑𑄴𑄒𑄧𑄚𑄬 𑄒𑄨𑄖𑄮 𑄛𑄨𑄖𑄪 𑄇𑄟𑄴𑄟𑄁 𑄃𑄇𑄧𑄥𑄩𑄖𑄨.

𑄤𑄬𑄥𑄴𑄥𑄚𑄴𑄖𑄢𑄛𑄐𑄴𑄦𑄮 𑄚𑄨𑄑𑄴𑄒𑄨𑄖𑄮.

𑄛𑄪𑄚 𑄢𑄧𑄎𑄧 𑄇𑄖𑄨𑄛𑄧𑄦𑄌𑄴𑄌𑄡𑄬𑄚 𑄛𑄪𑄢𑄨𑄟𑄚𑄡𑄬𑄚𑄬𑄤 𑄇𑄪𑄕𑄴𑄓𑄣𑄨𑄚𑄨𑄡𑄧 𑄥𑄚𑄴𑄖𑄨𑄇𑄁 𑄘𑄫𑄖𑄁 𑄛𑄬𑄥𑄬𑄖𑄴𑄤𑄧 𑄥𑄖𑄴𑄖𑄟𑄬 𑄘𑄨𑄤𑄥𑄬 𑄖𑄖𑄴𑄗 𑄉𑄚𑄴𑄖𑄴𑄤𑄧 𑄛𑄌𑄴𑄌𑄧𑄉𑄚𑄴𑄖𑄴𑄤𑄧 𑄖𑄖𑄴𑄗𑄬𑄤 𑄟𑄕𑄴𑄓𑄛𑄟𑄎𑄴𑄏𑄬 𑄚𑄨𑄥𑄩𑄘𑄨𑄖𑄴𑄤𑄧 𑄇𑄪𑄕𑄴𑄓𑄣𑄨𑄚𑄨𑄁 𑄃𑄂𑄦𑄢𑄧𑄛𑄬𑄖𑄴𑄤𑄧 𑄥𑄪𑄤𑄕𑄴𑄕𑄛𑄩𑄒𑄬 𑄚𑄨𑄥𑄨𑄚𑄴𑄚𑄁 𑄢𑄧𑄎𑄙𑄟𑄴𑄟𑄁 𑄛𑄪𑄌𑄴𑄍𑄚𑄴𑄖𑄮 𑄉𑄧𑄗𑄟𑄧𑄦 –

𑄷𑄺. ‘‘𑄥𑄇𑄴𑄈𑄨𑄥𑄨 𑄖𑄴𑄤𑄁 𑄇𑄪𑄕𑄴𑄓𑄣𑄨𑄚𑄨, 𑄟𑄐𑄴𑄐𑄥𑄨 𑄈𑄖𑄴𑄖𑄝𑄚𑄴𑄙𑄪𑄚𑄨;

𑄢𑄎𑄴𑄎𑄁 𑄇𑄧𑄢𑄬𑄖𑄪𑄇𑄧𑄟𑄬𑄚, 𑄇𑄨𑄁 𑄥𑄪 𑄇𑄨𑄌𑄴𑄌𑄁 𑄇𑄖𑄁 𑄤𑄢’’𑄚𑄴𑄖𑄨.

𑄖𑄖𑄴𑄗 𑄥𑄇𑄴𑄈𑄨𑄥𑄩𑄖𑄨 𑄟𑄡𑄧 𑄛𑄪𑄑𑄴𑄒𑄛𑄐𑄴𑄦𑄁 𑄇𑄗𑄬𑄖𑄪𑄁 𑄥𑄇𑄴𑄈𑄨𑄥𑄴𑄥𑄥𑄩𑄖𑄨 𑄛𑄪𑄌𑄴𑄍𑄖𑄨. 𑄇𑄪𑄕𑄴𑄓𑄣𑄨𑄚𑄩𑄖𑄨 𑄖𑄥𑄴𑄥𑄧 𑄥𑄣𑄨𑄋𑄴𑄉𑄖𑄮 𑄃𑄂𑄉𑄖𑄚𑄧𑄟𑄬𑄚𑄧𑄣𑄛𑄖𑄨. 𑄖𑄥𑄴𑄥𑄧 𑄇𑄨𑄢 𑄘𑄴𑄤𑄩𑄥𑄪 𑄇𑄕𑄴𑄕𑄛𑄨𑄑𑄴𑄒𑄬𑄥𑄪 𑄇𑄪𑄕𑄴𑄓𑄣𑄥𑄕𑄴𑄒𑄧𑄚𑄧 𑄘𑄴𑄤𑄬 𑄣𑄬𑄈𑄧 𑄃𑄦𑄬𑄥𑄪𑄁, 𑄖𑄬𑄚𑄥𑄴𑄥𑄧 ‘‘𑄇𑄪𑄕𑄴𑄓𑄣𑄨𑄚𑄩’’𑄖𑄨 𑄚𑄧𑄟𑄁 𑄇𑄧𑄢𑄬𑄥𑄨. 𑄟𑄐𑄴𑄐𑄥𑄩𑄖𑄨 𑄎𑄧𑄚𑄨𑄥𑄴𑄥𑄥𑄨 𑄟𑄡𑄧 𑄛𑄪𑄑𑄴𑄒𑄛𑄐𑄴𑄦𑄥𑄴𑄥 𑄃𑄖𑄴𑄗𑄚𑄴𑄖𑄨. 𑄈𑄖𑄴𑄖𑄝𑄚𑄴𑄙𑄪𑄚𑄩𑄖𑄨 𑄈𑄖𑄴𑄖𑄥𑄴𑄥 𑄟𑄦𑄧𑄥𑄬𑄚𑄉𑄪𑄖𑄴𑄖𑄥𑄴𑄥 𑄞𑄉𑄨𑄚𑄨𑄞𑄧𑄤𑄬𑄚 𑄚𑄁 𑄆𑄤𑄁 𑄃𑄂𑄣𑄛𑄖𑄨. 𑄇𑄥𑄴𑄟𑄧 𑄛𑄚𑄬𑄥 𑄤𑄬𑄥𑄴𑄥𑄚𑄴𑄖𑄢𑄥𑄇𑄪𑄕𑄁 𑄆𑄤𑄁 𑄃𑄛𑄪𑄌𑄴𑄍𑄨𑄖𑄴𑄤𑄧 𑄄𑄟𑄟𑄬𑄤 𑄛𑄪𑄌𑄴𑄍𑄖𑄩𑄖𑄨? 𑄄𑄖𑄴𑄗𑄨𑄞𑄧𑄤𑄬𑄚. 𑄄𑄖𑄴𑄗𑄨𑄡𑄮 𑄦𑄨 𑄛𑄢𑄨𑄖𑄴𑄖𑄛𑄐𑄴𑄐𑄧, 𑄖𑄥𑄴𑄟𑄧 ‘‘𑄥𑄌𑄬 𑄥𑄇𑄴𑄇𑄮𑄖𑄨, 𑄛𑄪𑄌𑄴𑄍𑄨𑄥𑄴𑄥𑄧𑄟𑄨, 𑄚𑄮 𑄌𑄬, 𑄚 𑄛𑄪𑄌𑄴𑄍𑄨𑄥𑄴𑄥𑄧𑄟𑄩’’𑄖𑄨 𑄤𑄩𑄟𑄁𑄥𑄚𑄤𑄥𑄬𑄚 𑄆𑄤𑄁 𑄛𑄪𑄌𑄴𑄍𑄨𑄖𑄴𑄤𑄧 𑄖𑄐𑄴𑄐𑄬𑄤 𑄛𑄐𑄴𑄦𑄁 𑄛𑄪𑄌𑄴𑄍𑄨.

𑄥𑄧 𑄆𑄤𑄁 𑄢𑄐𑄴𑄐𑄧 𑄢𑄧𑄎𑄙𑄟𑄴𑄟𑄬 𑄛𑄪𑄌𑄴𑄍𑄨𑄖𑄬, ‘‘𑄖𑄧𑄖, 𑄖𑄴𑄤𑄁 𑄟𑄁 ‘𑄄𑄖𑄴𑄗𑄨𑄇𑄧 𑄚𑄧𑄟 𑄇𑄨𑄁 𑄇𑄗𑄬𑄥𑄴𑄥𑄖𑄩’𑄖𑄨 𑄤𑄩𑄟𑄁𑄥𑄥𑄨 𑄟𑄐𑄴𑄐𑄬, 𑄥𑄇𑄣𑄁 𑄖𑄬 𑄢𑄧𑄎𑄙𑄟𑄴𑄟𑄁 𑄘𑄴𑄤𑄩𑄥𑄪𑄡𑄬𑄤 𑄛𑄘𑄬𑄥𑄪 𑄛𑄇𑄴𑄈𑄨𑄛𑄨𑄖𑄴𑄤𑄧 𑄇𑄗𑄬𑄥𑄴𑄥𑄧𑄟𑄩’’𑄖𑄨 𑄤𑄖𑄴𑄤𑄧 𑄃𑄂𑄦 –

𑄷𑄻. ‘‘𑄘𑄴𑄤𑄬𑄤 𑄖𑄧𑄖 𑄛𑄘𑄇𑄧𑄚𑄨, 𑄡𑄖𑄴𑄗 𑄥𑄝𑄴𑄝𑄁 𑄛𑄖𑄨𑄑𑄴𑄒𑄨𑄖𑄁;

𑄃𑄣𑄘𑄴𑄙𑄥𑄴𑄥 𑄌 𑄡𑄮 𑄣𑄧𑄞𑄮, 𑄣𑄘𑄴𑄙𑄥𑄴𑄥 𑄌𑄧𑄚𑄪𑄢𑄇𑄴𑄈𑄕𑄧.

𑄷𑄼. ‘‘𑄃𑄟𑄌𑄴𑄌𑄬 𑄖𑄧𑄖 𑄎𑄧𑄚𑄧𑄦𑄨, 𑄙𑄩𑄢𑄬 𑄃𑄖𑄴𑄗𑄥𑄴𑄥 𑄇𑄮𑄤𑄨𑄘𑄬;

𑄃𑄚𑄇𑄴𑄈𑄧𑄇𑄨𑄖𑄤𑄬 𑄖𑄧𑄖, 𑄃𑄥𑄮𑄕𑄴𑄓𑄬 𑄃𑄤𑄨𑄚𑄧𑄥𑄇𑄬.

𑄷𑄽. ‘‘𑄡𑄮 𑄌 𑄖𑄁 𑄖𑄧𑄖 𑄢𑄇𑄴𑄈𑄬𑄡𑄴𑄡, 𑄙𑄚𑄁 𑄡𑄐𑄴𑄌𑄬𑄤 𑄖𑄬 𑄥𑄨𑄡𑄧;

𑄥𑄫𑄖𑄮𑄤 𑄢𑄗𑄁 𑄥𑄋𑄴𑄉𑄕𑄴𑄦𑄬, 𑄥𑄮 𑄖𑄬 𑄇𑄨𑄌𑄴𑄌𑄧𑄚𑄨 𑄇𑄧𑄢𑄡𑄬.

𑄷𑄾. ‘‘𑄥𑄪𑄥𑄋𑄴𑄉𑄦𑄨𑄖𑄚𑄴𑄖𑄎𑄚𑄮, 𑄥𑄡𑄁 𑄤𑄨𑄖𑄴𑄖𑄁 𑄃𑄤𑄬𑄇𑄴𑄈𑄨𑄡;

𑄚𑄨𑄙𑄨𑄐𑄴𑄌 𑄄𑄕𑄘𑄧𑄚𑄐𑄴𑄌, 𑄚 𑄇𑄢𑄬 𑄛𑄢𑄛𑄖𑄴𑄖𑄨𑄡𑄧.

𑄷𑄿. ‘‘𑄥𑄡𑄁 𑄃𑄂𑄡𑄁 𑄤𑄡𑄁 𑄎𑄐𑄴𑄐𑄧, 𑄥𑄡𑄁 𑄎𑄐𑄴𑄐𑄧 𑄇𑄖𑄧𑄇𑄖𑄁;

𑄚𑄨𑄉𑄴𑄉𑄕𑄴𑄦𑄬 𑄚𑄨𑄉𑄴𑄉𑄦𑄧𑄢𑄦𑄁, 𑄛𑄉𑄴𑄉𑄕𑄴𑄦𑄬 𑄛𑄉𑄴𑄉𑄦𑄧𑄢𑄦𑄁.

𑄸𑄶. ‘‘𑄥𑄡𑄁 𑄎𑄧𑄚𑄛𑄘𑄁 𑄃𑄖𑄴𑄗𑄁, 𑄃𑄚𑄪𑄥𑄧𑄥 𑄢𑄗𑄬𑄥𑄞;

𑄟𑄧 𑄖𑄬 𑄃𑄙𑄟𑄴𑄟𑄨𑄇𑄧 𑄡𑄪𑄖𑄴𑄖𑄧, 𑄙𑄚𑄁 𑄢𑄑𑄴𑄒𑄐𑄴𑄌 𑄚𑄧𑄥𑄡𑄪𑄁.

𑄸𑄷. ‘‘𑄟𑄧 𑄌 𑄤𑄬𑄉𑄬𑄚 𑄇𑄨𑄌𑄴𑄌𑄧𑄚𑄨, 𑄇𑄢𑄮𑄥𑄨 𑄇𑄧𑄢𑄡𑄬𑄥𑄨 𑄤𑄧;

𑄤𑄬𑄉𑄥𑄧 𑄦𑄨 𑄇𑄖𑄁 𑄇𑄟𑄴𑄟𑄁, 𑄟𑄚𑄴𑄘𑄮 𑄛𑄌𑄴𑄍𑄧𑄚𑄪𑄖𑄛𑄴𑄛𑄖𑄨.

𑄸𑄸. ‘‘𑄟𑄧 𑄖𑄬 𑄃𑄙𑄨𑄥𑄢𑄬 𑄟𑄪𑄐𑄴𑄌, 𑄥𑄪𑄝𑄧𑅄𑄴𑄦𑄟𑄙𑄨𑄇𑄮𑄛𑄨𑄖𑄁;

𑄇𑄮𑄙𑄥𑄧 𑄦𑄨 𑄝𑄦𑄫 𑄜𑄩𑄖𑄧, 𑄇𑄪𑄣𑄧 𑄃𑄇𑄪𑄣𑄖𑄁 𑄉𑄖𑄧.

𑄸𑄹. ‘‘‘𑄟𑄧 𑄖𑄧𑄖 𑄄𑄥𑄴𑄥𑄢𑄮𑄟𑄴𑄦𑄩’𑄖𑄨, 𑄃𑄚𑄖𑄴𑄗𑄧𑄡 𑄛𑄖𑄧𑄢𑄡𑄨;

𑄄𑄖𑄴𑄗𑄩𑄚𑄁 𑄛𑄪𑄢𑄨𑄥𑄧𑄚𑄐𑄴𑄌, 𑄟𑄧 𑄖𑄬 𑄃𑄂𑄥𑄨 𑄘𑄪𑄈𑄪𑄘𑄴𑄢𑄡𑄮.

𑄸𑄺. ‘‘𑄃𑄛𑄬𑄖𑄣𑄮𑄟𑄦𑄁𑄥𑄥𑄴𑄥, 𑄢𑄐𑄴𑄐𑄮 𑄇𑄧𑄟𑄧𑄚𑄪𑄥𑄧𑄢𑄨𑄚𑄮;

𑄥𑄝𑄴𑄝𑄬 𑄞𑄮𑄉𑄧 𑄤𑄨𑄚𑄥𑄴𑄥𑄚𑄴𑄖𑄨, 𑄢𑄐𑄴𑄐𑄮 𑄖𑄁 𑄤𑄪𑄌𑄴𑄌𑄖𑄬 𑄃𑄊𑄁.

𑄸𑄻. ‘‘𑄖𑄖𑄴𑄗𑄬𑄤 𑄖𑄬 𑄤𑄖𑄴𑄖𑄛𑄘𑄧, 𑄆𑄥𑄧𑄤 𑄃𑄚𑄪𑄥𑄧𑄥𑄚𑄩;

𑄘𑄇𑄴𑄈𑄥𑄴𑄥𑄪𑄘𑄧𑄚𑄨 𑄛𑄪𑄐𑄴𑄐𑄇𑄢𑄮, 𑄃𑄥𑄮𑄕𑄴𑄓𑄮 𑄃𑄤𑄨𑄚𑄧𑄥𑄇𑄮;

𑄥𑄩𑄣𑄤𑄧𑄥𑄴𑄥𑄪 𑄟𑄦𑄧𑄢𑄧𑄎, 𑄘𑄪𑄥𑄴𑄥𑄩𑄣𑄮 𑄤𑄨𑄚𑄨𑄛𑄧𑄖𑄨𑄇𑄮’’𑄖𑄨.

𑄖𑄖𑄴𑄗 𑄛𑄘𑄇𑄧𑄚𑄩𑄖𑄨 𑄇𑄧𑄢𑄕𑄛𑄘𑄧𑄚𑄨. 𑄡𑄖𑄴𑄗𑄧𑄖𑄨 𑄡𑄬𑄥𑄪 𑄘𑄴𑄤𑄩𑄥𑄪 𑄛𑄘𑄬𑄥𑄪 𑄥𑄝𑄴𑄝𑄁 𑄃𑄖𑄴𑄗𑄎𑄧𑄖𑄁 𑄦𑄨𑄖𑄥𑄪𑄈𑄁 𑄛𑄖𑄨𑄑𑄴𑄒𑄨𑄖𑄁. 𑄃𑄣𑄘𑄴𑄙𑄥𑄴𑄥𑄧𑄖𑄨 𑄡𑄮 𑄌 𑄛𑄪𑄝𑄴𑄝𑄬 𑄃𑄣𑄘𑄴𑄙𑄥𑄴𑄥 𑄣𑄧𑄞𑄥𑄴𑄥 𑄣𑄧𑄞𑄮, 𑄡𑄧 𑄌 𑄣𑄘𑄴𑄙𑄥𑄴𑄥 𑄃𑄚𑄪𑄢𑄇𑄴𑄈𑄕𑄧. 𑄖𑄧𑄖, 𑄃𑄚𑄪𑄛𑄴𑄛𑄚𑄴𑄚𑄥𑄴𑄥 𑄦𑄨 𑄣𑄧𑄞𑄥𑄴𑄥 𑄅𑄛𑄴𑄛𑄧𑄘𑄚𑄁 𑄚𑄧𑄟 𑄚 𑄞𑄧𑄢𑄮, 𑄅𑄛𑄴𑄛𑄚𑄴𑄚𑄥𑄴𑄥 𑄛𑄚 𑄃𑄚𑄪𑄢𑄇𑄴𑄈𑄕𑄟𑄬𑄤 𑄞𑄧𑄢𑄮. 𑄆𑄇𑄌𑄴𑄌𑄮 𑄦𑄨 𑄡𑄥𑄁 𑄅𑄛𑄴𑄛𑄧𑄘𑄬𑄖𑄴𑄤𑄧𑄛𑄨 𑄡𑄥𑄬 𑄛𑄟𑄖𑄴𑄖𑄮 𑄛𑄟𑄧𑄘𑄁 𑄅𑄛𑄴𑄛𑄧𑄘𑄬𑄖𑄴𑄤𑄧 𑄛𑄧𑄕𑄧𑄖𑄨𑄛𑄧𑄖𑄧𑄘𑄩𑄚𑄨 𑄇𑄢𑄮𑄖𑄨, 𑄟𑄦𑄧𑄌𑄮𑄢𑄮 𑄦𑄪𑄖𑄴𑄤𑄧 𑄢𑄑𑄴𑄒𑄁 𑄤𑄨𑄣𑄪𑄟𑄴𑄛𑄟𑄧𑄚𑄮 𑄌𑄢𑄖𑄨. 𑄃𑄗 𑄚𑄁 𑄢𑄧𑄎𑄧𑄚𑄮 𑄉𑄧𑄦𑄧𑄛𑄬𑄖𑄴𑄤𑄧 𑄟𑄦𑄧𑄤𑄨𑄚𑄧𑄥𑄁 𑄛𑄧𑄛𑄬𑄚𑄴𑄖𑄨. 𑄃𑄗 𑄤𑄧 𑄅𑄛𑄴𑄛𑄚𑄴𑄚𑄢𑄫𑄛𑄧𑄘𑄩𑄥𑄪 𑄇𑄧𑄟𑄉𑄪𑄕𑄬𑄥𑄪 𑄛𑄟𑄖𑄴𑄖𑄮 𑄃𑄡𑄮𑄚𑄨𑄥𑄮 𑄙𑄚𑄁 𑄚𑄧𑄥𑄬𑄚𑄴𑄖𑄮 𑄥𑄝𑄴𑄝𑄥𑄧𑄛𑄖𑄬𑄡𑄴𑄡𑄬 𑄈𑄩𑄕𑄬 𑄇𑄛𑄕𑄮 𑄦𑄪𑄖𑄴𑄤𑄧 𑄌𑄩𑄢𑄇𑄤𑄥𑄚𑄮 𑄇𑄛𑄧𑄣𑄟𑄧𑄘𑄧𑄡 𑄌𑄢𑄖𑄨. 𑄛𑄝𑄴𑄝𑄎𑄨𑄖𑄮 𑄤𑄧 𑄛𑄚 𑄉𑄚𑄴𑄗𑄙𑄪𑄢𑄧𑄘𑄨𑄤𑄥𑄬𑄚 𑄣𑄧𑄞𑄥𑄇𑄴𑄇𑄧𑄢𑄁 𑄚𑄨𑄝𑄴𑄝𑄖𑄴𑄖𑄬𑄖𑄴𑄤𑄧 𑄛𑄟𑄖𑄴𑄖𑄮 𑄦𑄩𑄚𑄧𑄡𑄧𑄤𑄖𑄴𑄖𑄖𑄨. 𑄃𑄛𑄢𑄮 𑄛𑄒𑄟𑄏𑄧𑄚𑄧𑄘𑄩𑄚𑄨 𑄚𑄨𑄝𑄴𑄝𑄖𑄴𑄖𑄬𑄖𑄴𑄤𑄧𑄛𑄨 𑄟𑄪𑄑𑄴𑄒𑄥𑄴𑄥𑄖𑄨𑄖𑄧𑄡 𑄖𑄗𑄧𑄢𑄫𑄛𑄬 𑄃𑄂𑄢𑄟𑄴𑄟𑄕𑄬 𑄝𑄎𑄴𑄏𑄨𑄖𑄴𑄤𑄧 𑄏𑄧𑄚𑄧 𑄛𑄢𑄨𑄦𑄧𑄡𑄖𑄨. 𑄆𑄤𑄁 𑄅𑄛𑄴𑄛𑄚𑄴𑄚𑄥𑄴𑄥 𑄡𑄥𑄥𑄴𑄥 𑄤𑄧 𑄏𑄧𑄚𑄧𑄘𑄨𑄣𑄧𑄞𑄥𑄴𑄥 𑄤𑄧 𑄢𑄇𑄴𑄈𑄕𑄟𑄬𑄤 𑄘𑄪𑄇𑄴𑄇𑄢𑄁. 𑄖𑄘𑄖𑄴𑄗𑄘𑄩𑄛𑄚𑄖𑄴𑄗𑄁 𑄛𑄚 𑄘𑄬𑄤𑄘𑄖𑄴𑄖𑄥𑄴𑄥 𑄤𑄖𑄴𑄗𑄪 𑄌, 𑄟𑄪𑄘𑄪𑄣𑄇𑄴𑄈𑄕- (𑄎𑄧. 𑄷.𑄷.𑄼𑄼) 𑄣𑄮𑄟𑄥𑄇𑄥𑄴𑄥𑄛- (𑄎𑄧. 𑄷.𑄿.𑄼𑄶 𑄃𑄂𑄘𑄡𑄮) 𑄦𑄢𑄨𑄖𑄌𑄎𑄧𑄖𑄇- (𑄎𑄧. 𑄷.𑄿.𑄺𑄶 𑄃𑄂𑄘𑄡𑄮) 𑄥𑄋𑄴𑄇𑄛𑄴𑄛𑄎𑄧𑄖𑄇𑄧𑄘𑄩𑄚𑄨 (𑄎𑄧. 𑄷.𑄹.𑄷 𑄃𑄂𑄘𑄡𑄮) 𑄌 𑄇𑄗𑄬𑄖𑄝𑄴𑄝𑄧𑄚𑄨. 𑄆𑄇𑄮 𑄛𑄚 𑄣𑄧𑄞𑄥𑄇𑄴𑄇𑄧𑄢𑄁 𑄅𑄛𑄴𑄛𑄧𑄘𑄬𑄖𑄴𑄤𑄧 𑄃𑄛𑄴𑄛𑄟𑄧𑄘𑄬 𑄒𑄖𑄴𑄤𑄧 𑄇𑄣𑄴𑄡𑄧𑄕𑄇𑄟𑄴𑄟𑄁 𑄇𑄢𑄮𑄖𑄨, 𑄖𑄥𑄴𑄥 𑄥𑄮 𑄡𑄥𑄮 𑄥𑄪𑄇𑄴𑄇𑄛𑄇𑄴𑄈𑄬 𑄌𑄚𑄴𑄘𑄮 𑄤𑄨𑄡 𑄤𑄓𑄴𑄔𑄖𑄨, 𑄖𑄥𑄴𑄟𑄧 𑄖𑄴𑄤𑄁, 𑄟𑄦𑄧𑄢𑄧𑄎, 𑄃𑄛𑄴𑄛𑄟𑄖𑄴𑄖𑄮 𑄛𑄡𑄮𑄉𑄥𑄟𑄴𑄛𑄖𑄴𑄖𑄨𑄡𑄧 𑄒𑄖𑄴𑄤𑄧 𑄙𑄟𑄴𑄟𑄬𑄚 𑄢𑄎𑄴𑄎𑄁 𑄇𑄧𑄢𑄬𑄚𑄴𑄖𑄮 𑄖𑄤 𑄅𑄛𑄴𑄛𑄚𑄴𑄚𑄁 𑄡𑄥𑄁 𑄃𑄚𑄪𑄢𑄇𑄴𑄈𑄧𑄦𑄩𑄖𑄨.

𑄎𑄧𑄚𑄧𑄦𑄩𑄖𑄨 𑄞𑄕𑄴𑄓𑄧𑄉𑄧𑄢𑄨𑄇𑄇𑄟𑄴𑄟𑄧𑄘𑄩𑄚𑄁 𑄇𑄢𑄕𑄖𑄴𑄗𑄁 𑄅𑄛𑄙𑄧𑄢𑄬𑄦𑄨. 𑄃𑄚𑄇𑄴𑄈𑄧𑄇𑄨𑄖𑄤𑄬𑄖𑄨 𑄃𑄚𑄇𑄴𑄈𑄬 𑄃𑄇𑄨𑄖𑄤𑄬 𑄃𑄎𑄪𑄖𑄇𑄢𑄬 𑄌𑄬𑄤 𑄃𑄇𑄬𑄢𑄧𑄑𑄨𑄇𑄬 𑄌. 𑄃𑄥𑄮𑄕𑄴𑄓𑄬𑄖𑄨 𑄛𑄫𑄤𑄥𑄪𑄢𑄧𑄉𑄚𑄴𑄙𑄟𑄧𑄣𑄧𑄥𑄮𑄕𑄴𑄓𑄞𑄧𑄤𑄢𑄦𑄨𑄖𑄬. 𑄃𑄤𑄨𑄚𑄧𑄥𑄇𑄬𑄖𑄨 𑄖𑄤 𑄥𑄚𑄴𑄖𑄇𑄧𑄚𑄁 𑄙𑄚𑄙𑄐𑄴𑄐𑄧𑄘𑄩𑄚𑄁 𑄃𑄤𑄨𑄚𑄧𑄥𑄇𑄬. 𑄡𑄮𑄖𑄨 𑄡𑄮 𑄃𑄟𑄌𑄴𑄌𑄮. 𑄡𑄐𑄴𑄌𑄬𑄤𑄧𑄖𑄨 𑄡𑄐𑄴𑄌 𑄖𑄬 𑄊𑄢𑄬 𑄙𑄚𑄁 𑄥𑄨𑄡𑄧, 𑄖𑄁 𑄢𑄇𑄴𑄈𑄬𑄡𑄴𑄡. 𑄥𑄫𑄖𑄮𑄤𑄧𑄖𑄨 𑄢𑄗𑄥𑄧𑄢𑄗𑄨 𑄤𑄨𑄡. 𑄡𑄗𑄧 𑄥𑄧𑄢𑄗𑄨 𑄤𑄨𑄥𑄟𑄟𑄉𑄴𑄉𑄚𑄨𑄤𑄧𑄢𑄕𑄖𑄴𑄗𑄁 𑄃𑄥𑄴𑄥𑄬 𑄥𑄋𑄴𑄉𑄕𑄴𑄦𑄚𑄴𑄖𑄮 𑄢𑄗𑄁 𑄥𑄋𑄴𑄉𑄕𑄴𑄦𑄬𑄡𑄴𑄡, 𑄆𑄤𑄁 𑄡𑄮 𑄥𑄦 𑄞𑄮𑄉𑄬𑄦𑄨 𑄖𑄁 𑄢𑄇𑄴𑄈𑄨𑄖𑄪𑄁 𑄥𑄇𑄴𑄇𑄮𑄖𑄨, 𑄥𑄮 𑄖𑄬 𑄃𑄟𑄌𑄴𑄌𑄮 𑄚𑄧𑄟 𑄖𑄧𑄘𑄨𑄥𑄁 𑄥𑄋𑄴𑄉𑄦𑄬𑄖𑄴𑄤𑄧 𑄞𑄕𑄴𑄓𑄧𑄉𑄧𑄢𑄨𑄇𑄧𑄘𑄨𑄇𑄨𑄌𑄴𑄌𑄧𑄚𑄨 𑄇𑄧𑄢𑄡𑄬.

𑄥𑄪𑄥𑄋𑄴𑄉𑄦𑄨𑄖𑄚𑄴𑄖𑄎𑄚𑄮𑄖𑄨, 𑄖𑄧𑄖, 𑄡𑄥𑄴𑄥 𑄦𑄨 𑄢𑄐𑄴𑄐𑄮 𑄃𑄖𑄴𑄖𑄚𑄮 𑄃𑄚𑄴𑄖𑄮𑄎𑄚𑄮 𑄃𑄖𑄴𑄖𑄚𑄮 𑄤𑄣𑄐𑄴𑄎𑄚𑄇𑄛𑄢𑄨𑄎𑄚𑄮 𑄌 𑄘𑄧𑄚𑄧𑄘𑄩𑄦𑄨 𑄃𑄥𑄋𑄴𑄉𑄦𑄨𑄖𑄮 𑄦𑄮𑄖𑄨, 𑄖𑄥𑄴𑄥 𑄃𑄚𑄴𑄖𑄮𑄚𑄨𑄤𑄬𑄥𑄚𑄬 𑄥𑄪𑄤𑄕𑄴𑄕𑄦𑄨𑄢𑄐𑄴𑄐𑄧𑄘𑄩𑄚𑄨 𑄖𑄬𑄥𑄁 𑄃𑄥𑄋𑄴𑄉𑄦𑄨𑄖𑄟𑄚𑄪𑄥𑄴𑄥𑄧𑄚𑄁 𑄤𑄥𑄬𑄚 𑄚𑄥𑄴𑄥𑄚𑄴𑄖𑄨, 𑄃𑄚𑄴𑄖𑄮𑄎𑄚𑄧 𑄝𑄦𑄨 𑄉𑄌𑄴𑄍𑄚𑄴𑄖𑄨, 𑄖𑄥𑄴𑄟𑄧 𑄖𑄴𑄤𑄁 𑄥𑄪𑄑𑄴𑄒𑄪𑄥𑄋𑄴𑄉𑄦𑄨𑄖𑄃𑄚𑄴𑄖𑄮𑄎𑄚𑄮 𑄦𑄪𑄖𑄴𑄤𑄧 ‘‘𑄆𑄖𑄴𑄖𑄇𑄁 𑄚𑄧𑄟 𑄟𑄬 𑄤𑄨𑄖𑄴𑄖’’𑄚𑄴𑄖𑄨 𑄥𑄡𑄁 𑄃𑄖𑄴𑄖𑄚𑄮 𑄙𑄚𑄁 𑄃𑄤𑄬𑄇𑄴𑄈𑄨𑄖𑄴𑄤𑄧 ‘‘𑄃𑄥𑄪𑄇𑄑𑄴𑄒𑄧𑄚𑄬 𑄚𑄧𑄟 𑄚𑄨𑄙𑄨𑄁 𑄚𑄨𑄙𑄬𑄟, 𑄃𑄥𑄪𑄇𑄥𑄴𑄥 𑄄𑄕𑄁 𑄘𑄬𑄟𑄧’’𑄖𑄨 𑄄𑄘𑄁 𑄅𑄞𑄡𑄟𑄴𑄛𑄨 𑄚 𑄇𑄢𑄬 𑄛𑄢𑄛𑄖𑄴𑄖𑄨𑄡𑄧, 𑄛𑄢𑄛𑄖𑄴𑄖𑄨𑄡𑄧𑄛𑄨 𑄖𑄴𑄤𑄁 𑄟𑄧 𑄇𑄢𑄨, 𑄥𑄝𑄴𑄝𑄁 𑄃𑄖𑄴𑄖𑄛𑄌𑄴𑄌𑄇𑄴𑄈𑄟𑄬𑄤 𑄇𑄢𑄬𑄡𑄴𑄡𑄧𑄥𑄩𑄖𑄨 𑄤𑄘𑄖𑄨.

𑄃𑄂𑄡𑄁 𑄤𑄡𑄚𑄴𑄖𑄨 𑄖𑄖𑄮 𑄅𑄛𑄴𑄛𑄎𑄴𑄎𑄚𑄇𑄁 𑄃𑄂𑄡𑄐𑄴𑄌 𑄖𑄬𑄥𑄁 𑄖𑄬𑄥𑄁 𑄘𑄧𑄖𑄝𑄴𑄝𑄁 𑄤𑄡𑄐𑄴𑄌 𑄥𑄡𑄟𑄬𑄤 𑄎𑄧𑄚𑄬𑄡𑄴𑄡𑄧𑄥𑄩𑄖𑄨. 𑄇𑄖𑄧𑄇𑄖𑄚𑄴𑄖𑄨 𑄥𑄋𑄴𑄉𑄧𑄟𑄬 𑄤𑄧 𑄚𑄤𑄇𑄟𑄴𑄟𑄬 𑄤𑄧 𑄃𑄐𑄴𑄐𑄬𑄥𑄪 𑄤𑄧 𑄇𑄨𑄌𑄴𑄌𑄬𑄥𑄪 ‘‘𑄄𑄟𑄨𑄚𑄧 𑄄𑄘𑄁 𑄚𑄧𑄟 𑄟𑄡𑄴𑄦𑄁 𑄇𑄖𑄁, 𑄄𑄟𑄨𑄚𑄧 𑄚 𑄇𑄖’’𑄚𑄴𑄖𑄨 𑄆𑄖𑄟𑄴𑄛𑄨 𑄥𑄡𑄟𑄬𑄤 𑄎𑄧𑄚𑄬𑄡𑄴𑄡𑄧𑄥𑄨, 𑄟𑄧 𑄛𑄢𑄛𑄖𑄴𑄖𑄨𑄡𑄮 𑄦𑄮𑄦𑄨. 𑄚𑄨𑄉𑄴𑄉𑄕𑄴𑄦𑄬𑄖𑄨, 𑄖𑄧𑄖, 𑄢𑄧𑄎𑄧 𑄚𑄧𑄟 𑄥𑄚𑄴𑄙𑄨𑄌𑄴𑄍𑄬𑄘𑄧𑄘𑄨𑄇𑄧𑄢𑄇𑄁 𑄚𑄨𑄉𑄴𑄉𑄦𑄧𑄢𑄦𑄁 𑄃𑄂𑄚𑄬𑄖𑄴𑄤𑄧 𑄘𑄥𑄴𑄥𑄨𑄖𑄁 𑄅𑄛𑄛𑄢𑄨𑄇𑄴𑄈𑄨𑄖𑄴𑄤𑄧 𑄥𑄮𑄙𑄬𑄖𑄴𑄤𑄧 𑄛𑄮𑄢𑄧𑄕𑄇𑄢𑄧𑄎𑄫𑄦𑄨 𑄒𑄛𑄨𑄖𑄘𑄕𑄴𑄓𑄁 𑄃𑄮𑄣𑄮𑄇𑄬𑄖𑄴𑄤𑄧 𑄘𑄮𑄥𑄧𑄚𑄪𑄢𑄫𑄛𑄁 𑄚𑄨𑄉𑄴𑄉𑄕𑄴𑄦𑄬𑄡𑄴𑄡. 𑄛𑄉𑄴𑄉𑄕𑄴𑄦𑄬𑄖𑄨 𑄡𑄮 𑄛𑄚 𑄛𑄉𑄴𑄉𑄦𑄧𑄢𑄦𑄮 𑄦𑄮𑄖𑄨, 𑄃𑄞𑄨𑄚𑄴𑄚𑄥𑄴𑄥 𑄤𑄧 𑄛𑄢𑄝𑄣𑄥𑄴𑄥 𑄞𑄬𑄘𑄬𑄖𑄧, 𑄞𑄨𑄚𑄴𑄚𑄥𑄴𑄥 𑄤𑄧 𑄥𑄇𑄝𑄣𑄥𑄴𑄥 𑄃𑄂𑄢𑄧𑄙𑄇𑄮, 𑄃𑄣𑄘𑄴𑄙𑄥𑄴𑄥 𑄤𑄧 𑄢𑄎𑄴𑄎𑄥𑄴𑄥 𑄃𑄂𑄦𑄢𑄇𑄮, 𑄣𑄘𑄴𑄙𑄥𑄴𑄥 𑄤𑄧 𑄗𑄧𑄤𑄢𑄇𑄧𑄢𑄇𑄮, 𑄡𑄬𑄚 𑄤𑄧 𑄛𑄚 𑄎𑄩𑄤𑄨𑄖𑄁 𑄘𑄨𑄚𑄴𑄚𑄁 𑄦𑄮𑄖𑄨, 𑄆𑄤𑄢𑄫𑄛𑄁 𑄛𑄉𑄴𑄉𑄦𑄧𑄢𑄦𑄁 𑄛𑄉𑄴𑄉𑄦𑄬𑄖𑄴𑄤𑄧 𑄟𑄦𑄚𑄴𑄖𑄁 𑄥𑄇𑄴𑄇𑄧𑄢𑄥𑄟𑄴𑄟𑄧𑄚𑄁 𑄇𑄢𑄬𑄡𑄴𑄡. 𑄆𑄤𑄁 𑄦𑄨𑄥𑄴𑄥 𑄇𑄨𑄌𑄴𑄌𑄬𑄥𑄪 𑄃𑄐𑄴𑄐𑄬𑄛𑄨 𑄅𑄢𑄁 𑄘𑄖𑄴𑄤𑄧 𑄇𑄖𑄴𑄖𑄝𑄴𑄝𑄁 𑄇𑄢𑄨𑄥𑄴𑄥𑄚𑄴𑄖𑄨.

𑄎𑄧𑄚𑄛𑄘𑄚𑄴𑄖𑄨 𑄎𑄚𑄛𑄘𑄤𑄧𑄥𑄩𑄚𑄁 𑄃𑄖𑄴𑄗𑄁 𑄥𑄡𑄁 𑄃𑄖𑄴𑄖𑄛𑄌𑄴𑄌𑄇𑄴𑄈𑄬𑄚𑄬𑄤 𑄃𑄚𑄪𑄥𑄧𑄥. 𑄃𑄙𑄟𑄴𑄟𑄨𑄇𑄧 𑄡𑄪𑄖𑄴𑄖𑄧𑄖𑄨 𑄃𑄙𑄟𑄴𑄟𑄨𑄇𑄧 𑄖𑄖𑄴𑄗 𑄖𑄖𑄴𑄗 𑄚𑄨𑄡𑄪𑄖𑄴𑄖𑄧 𑄃𑄂𑄡𑄪𑄖𑄴𑄖𑄇𑄧 𑄣𑄐𑄴𑄎𑄁 𑄉𑄦𑄬𑄖𑄴𑄤𑄧 𑄤𑄨𑄚𑄨𑄌𑄴𑄍𑄡𑄁 𑄞𑄨𑄚𑄴𑄘𑄚𑄴𑄖𑄧 𑄖𑄤 𑄙𑄚𑄐𑄴𑄌 𑄢𑄑𑄴𑄒𑄐𑄴𑄌 𑄟𑄧 𑄚𑄧𑄥𑄡𑄪𑄁. 𑄄𑄟𑄨𑄚𑄧 𑄇𑄧𑄢𑄕𑄬𑄚 𑄃𑄛𑄴𑄛𑄟𑄖𑄴𑄖𑄮 𑄦𑄪𑄖𑄴𑄤𑄧 𑄥𑄡𑄟𑄬𑄤 𑄃𑄚𑄪𑄥𑄧𑄥. 𑄤𑄬𑄉𑄬𑄚𑄧𑄖𑄨 𑄥𑄦𑄥𑄧 𑄃𑄖𑄪𑄣𑄬𑄖𑄴𑄤𑄧 𑄃𑄖𑄩𑄢𑄬𑄖𑄴𑄤𑄧. 𑄤𑄬𑄉𑄥𑄧𑄖𑄨 𑄃𑄖𑄪𑄣𑄬𑄖𑄴𑄤𑄧 𑄃𑄖𑄩𑄢𑄬𑄖𑄴𑄤𑄧 𑄍𑄚𑄴𑄘𑄧𑄘𑄨𑄤𑄥𑄬𑄚 𑄥𑄦𑄥𑄧 𑄇𑄖𑄁 𑄇𑄟𑄴𑄟𑄐𑄴𑄦𑄨 𑄚 𑄥𑄧𑄙𑄪 𑄚 𑄥𑄪𑄚𑄴𑄘𑄢𑄁. 𑄇𑄨𑄁𑄇𑄧𑄢𑄕𑄧? 𑄖𑄧𑄘𑄨𑄥𑄐𑄴𑄦𑄨 𑄇𑄖𑄴𑄤𑄧 𑄟𑄚𑄴𑄘𑄮 𑄛𑄌𑄴𑄍𑄧 𑄤𑄨𑄛𑄴𑄛𑄑𑄨𑄥𑄧𑄢𑄤𑄥𑄬𑄚 𑄄𑄙 𑄣𑄮𑄇𑄬 𑄃𑄛𑄧𑄡𑄘𑄪𑄇𑄴𑄈𑄁 𑄃𑄚𑄪𑄞𑄤𑄚𑄴𑄖𑄮 𑄛𑄢𑄣𑄮𑄇𑄬 𑄌 𑄃𑄚𑄪𑄖𑄛𑄴𑄛𑄖𑄨. 𑄃𑄡𑄁 𑄛𑄚𑄬𑄖𑄴𑄗 𑄃𑄖𑄴𑄗𑄮 ‘‘𑄄𑄥𑄩𑄚𑄟𑄚𑄴𑄖𑄢𑄁 𑄇𑄖𑄴𑄤𑄧, 𑄞𑄢𑄪𑄢𑄧𑄎𑄧𑄖𑄨 𑄟𑄬 𑄥𑄪𑄖’’𑄚𑄴𑄖𑄨 𑄞𑄢𑄪𑄎𑄧𑄖𑄇𑄬𑄚 (𑄎𑄧. 𑄷.𑄸.𑄷𑄸𑄻-𑄷𑄸𑄼) 𑄘𑄩𑄛𑄬𑄖𑄝𑄴𑄝𑄮.

𑄟𑄧 𑄖𑄬 𑄃𑄙𑄨𑄥𑄢𑄬 𑄟𑄪𑄐𑄴𑄌, 𑄥𑄪𑄝𑄧𑅄𑄴𑄦𑄟𑄙𑄨𑄇𑄮𑄛𑄨𑄖𑄚𑄴𑄖𑄨, 𑄖𑄧𑄖, 𑄖𑄤 𑄦𑄘𑄡𑄁 𑄇𑄪𑄥𑄣𑄁 𑄃𑄙𑄨𑄥𑄢𑄨𑄖𑄴𑄤𑄧 𑄃𑄖𑄨𑄇𑄴𑄇𑄟𑄨𑄖𑄴𑄤𑄧 𑄛𑄤𑄖𑄴𑄖𑄬 𑄛𑄢𑄬𑄥𑄁 𑄃𑄇𑄪𑄥𑄣𑄇𑄟𑄴𑄟𑄬 𑄥𑄪𑄑𑄴𑄒𑄪 𑄝𑄧𑅄𑄴𑄦𑄁 𑄃𑄙𑄨𑄇𑄮𑄛𑄨𑄖𑄁 𑄇𑄪𑄎𑄴𑄏𑄧𑄛𑄨𑄖𑄁 𑄦𑄪𑄖𑄴𑄤𑄧 𑄟𑄧 𑄟𑄪𑄐𑄴𑄌, 𑄟𑄧 𑄛𑄖𑄨𑄑𑄴𑄒𑄧𑄡𑄖𑄫𑄖𑄨 𑄃𑄖𑄴𑄗𑄮. 𑄄𑄘𑄁 𑄤𑄪𑄖𑄴𑄖𑄁 𑄦𑄮𑄖𑄨 – 𑄖𑄧𑄖, 𑄡𑄘𑄧 𑄖𑄬 𑄤𑄨𑄚𑄨𑄌𑄴𑄍𑄡𑄬 𑄒𑄨𑄖𑄥𑄴𑄥 𑄄𑄟𑄨𑄚𑄧 𑄛𑄪𑄢𑄨𑄥𑄮 𑄤𑄧 𑄦𑄖𑄮 𑄥𑄚𑄴𑄙𑄨 𑄤𑄧 𑄍𑄨𑄚𑄴𑄚𑄮𑄖𑄨 𑄌𑄮𑄢𑄁 𑄘𑄥𑄴𑄥𑄬𑄚𑄴𑄖𑄨, 𑄖𑄘𑄧 𑄖𑄬 𑄛𑄢𑄬𑄥𑄁 𑄤𑄌𑄚𑄬𑄦𑄨 𑄥𑄪𑄑𑄴𑄒𑄪 𑄇𑄮𑄛𑄨𑄖𑄟𑄴𑄛𑄨 𑄦𑄘𑄡𑄁 𑄇𑄮𑄙𑄤𑄥𑄬𑄚 𑄟𑄧 𑄟𑄪𑄐𑄴𑄌, 𑄃𑄛𑄢𑄨𑄉𑄴𑄉𑄦𑄬𑄖𑄴𑄤𑄧 𑄟𑄧 𑄘𑄕𑄴𑄓𑄁 𑄛𑄕𑄬𑄦𑄨. 𑄇𑄨𑄁𑄇𑄧𑄢𑄕𑄧? 𑄃𑄌𑄮𑄢𑄟𑄴𑄛𑄨 𑄦𑄨 ‘‘𑄌𑄮𑄢𑄮’’𑄖𑄨 𑄉𑄦𑄬𑄖𑄴𑄤𑄧 𑄃𑄂𑄚𑄬𑄚𑄴𑄖𑄨, 𑄖𑄥𑄴𑄟𑄧 𑄃𑄇𑄪𑄎𑄴𑄏𑄨𑄖𑄴𑄤𑄧 𑄅𑄞𑄨𑄚𑄴𑄚𑄁 𑄃𑄖𑄴𑄖𑄛𑄌𑄴𑄌𑄖𑄴𑄗𑄨𑄇𑄧𑄚𑄁 𑄇𑄗𑄁 𑄥𑄪𑄖𑄴𑄤𑄧 𑄥𑄪𑄑𑄴𑄒𑄪 𑄥𑄮𑄙𑄬𑄖𑄴𑄤𑄧 𑄃𑄖𑄴𑄖𑄛𑄌𑄴𑄌𑄇𑄴𑄈𑄬𑄚 𑄖𑄥𑄴𑄥 𑄌𑄮𑄢𑄞𑄧𑄤𑄁 𑄐𑄖𑄴𑄤𑄧 𑄛𑄤𑄬𑄕𑄨𑄡𑄧 𑄒𑄛𑄨𑄖𑄘𑄕𑄴𑄓𑄤𑄥𑄬𑄚 𑄇𑄖𑄴𑄖𑄝𑄴𑄝𑄁 𑄇𑄢𑄮𑄦𑄨. 𑄢𑄐𑄴𑄐𑄧 𑄦𑄨 𑄅𑄛𑄴𑄛𑄚𑄴𑄚𑄬𑄛𑄨 𑄇𑄮𑄙𑄬 𑄦𑄘𑄡𑄁 𑄥𑄩𑄖𑄣𑄁 𑄃𑄇𑄖𑄴𑄤𑄧 𑄇𑄟𑄴𑄟𑄁 𑄚 𑄇𑄧𑄖𑄝𑄴𑄝𑄁. 𑄡𑄘𑄧 𑄛𑄚𑄥𑄴𑄥 𑄦𑄘𑄡𑄁 𑄚𑄨𑄝𑄴𑄝𑄪𑄖𑄁 𑄦𑄮𑄖𑄨 𑄟𑄪𑄘𑄪𑄇𑄁, 𑄖𑄘𑄧 𑄤𑄨𑄚𑄨𑄌𑄴𑄍𑄡𑄇𑄟𑄴𑄟𑄁 𑄇𑄧𑄖𑄝𑄴𑄝𑄁. 𑄜𑄢𑄪𑄥𑄬 𑄦𑄨 𑄌𑄨𑄖𑄴𑄖𑄬 𑄛𑄇𑄴𑄇𑄪𑄗𑄨𑄖𑄬 𑄅𑄘𑄇𑄬 𑄟𑄪𑄈𑄚𑄨𑄟𑄨𑄖𑄴𑄖𑄁 𑄤𑄨𑄡 𑄇𑄧𑄢𑄕𑄁 𑄚 𑄛𑄐𑄴𑄐𑄧𑄡𑄖𑄨. 𑄇𑄮𑄙𑄥𑄧 𑄦𑄩𑄖𑄨, 𑄖𑄧𑄖, 𑄇𑄮𑄙𑄬𑄚 𑄦𑄨 𑄝𑄦𑄫𑄚𑄨 𑄜𑄩𑄖𑄧𑄚𑄨 𑄢𑄧𑄎𑄇𑄪𑄣𑄧𑄚𑄨 𑄃𑄇𑄪𑄣𑄞𑄧𑄤𑄁 𑄉𑄖𑄧𑄚𑄨 𑄟𑄦𑄧𑄤𑄨𑄚𑄧𑄥𑄟𑄬𑄤 𑄛𑄖𑄴𑄖𑄧𑄚𑄩𑄖𑄨. 𑄄𑄟𑄥𑄴𑄥 𑄛𑄚𑄖𑄴𑄗𑄥𑄴𑄥 𑄘𑄩𑄛𑄚𑄖𑄴𑄗𑄁 𑄈𑄚𑄴𑄖𑄨𑄤𑄧𑄘𑄨𑄎𑄧𑄖𑄇- (𑄎𑄧. 𑄷.𑄺.𑄺𑄿 𑄃𑄂𑄘𑄡𑄮) 𑄚𑄧𑅄𑄨𑄇𑄬𑄢𑄢𑄧𑄎𑄤𑄖𑄴𑄗𑄪𑄥𑄦𑄥𑄴𑄥𑄝𑄧𑄦𑄪𑄃𑄎𑄴𑄎𑄪𑄚𑄤𑄖𑄴𑄗𑄪𑄃𑄂𑄘𑄩𑄚𑄨 𑄇𑄗𑄬𑄖𑄝𑄴𑄝𑄧𑄚𑄨.

𑄟𑄧, 𑄖𑄧𑄖, 𑄄𑄥𑄴𑄥𑄢𑄮𑄟𑄴𑄦𑄩𑄖𑄨, 𑄃𑄚𑄖𑄴𑄗𑄧𑄡 𑄛𑄖𑄧𑄢𑄡𑄩𑄖𑄨, 𑄖𑄧𑄖, ‘‘𑄃𑄦𑄁 𑄛𑄗𑄤𑄨𑄥𑄴𑄥𑄢𑄮’’𑄖𑄨 𑄟𑄧 𑄟𑄦𑄧𑄎𑄚𑄁 𑄇𑄧𑄡𑄘𑄪𑄌𑄴𑄌𑄢𑄨𑄖𑄧𑄘𑄨𑄃𑄚𑄖𑄴𑄗𑄧𑄡 𑄛𑄖𑄧𑄢𑄡𑄨 𑄟𑄧 𑄃𑄮𑄖𑄧𑄢𑄡𑄨, 𑄡𑄗𑄧 𑄖𑄁 𑄃𑄚𑄖𑄴𑄗𑄁 𑄥𑄟𑄧𑄘𑄧𑄡 𑄤𑄖𑄴𑄖𑄖𑄨, 𑄟𑄧 𑄆𑄤𑄟𑄇𑄧𑄥𑄩𑄖𑄨 𑄃𑄖𑄴𑄗𑄮. 𑄟𑄧 𑄖𑄬 𑄃𑄂𑄥𑄩𑄖𑄨, 𑄖𑄧𑄖, 𑄖𑄤 𑄤𑄨𑄎𑄨𑄖𑄬 𑄟𑄚𑄪𑄥𑄴𑄥𑄎𑄧𑄖𑄨𑄇𑄧𑄚𑄁 𑄤𑄧 𑄖𑄨𑄢𑄌𑄴𑄍𑄧𑄚𑄎𑄧𑄖𑄨𑄇𑄧𑄚𑄁 𑄤𑄧 𑄄𑄖𑄴𑄗𑄨𑄛𑄪𑄢𑄨𑄥𑄧𑄚𑄁 𑄘𑄪𑄈𑄪𑄘𑄴𑄢𑄡𑄮 𑄘𑄪𑄇𑄴𑄈𑄪𑄛𑄴𑄛𑄖𑄴𑄖𑄨 𑄟𑄧 𑄃𑄂𑄥𑄨. 𑄡𑄗𑄧 𑄦𑄨 𑄃𑄙𑄟𑄴𑄟𑄨𑄇𑄢𑄧𑄎𑄫𑄚𑄁 𑄤𑄨𑄎𑄨𑄖𑄬 𑄟𑄚𑄪𑄥𑄴𑄥𑄧 𑄇𑄧𑄡𑄘𑄪𑄌𑄴𑄌𑄢𑄨𑄖𑄧𑄘𑄩𑄚𑄨 𑄇𑄖𑄴𑄤𑄧 𑄚𑄨𑄢𑄡𑄬 𑄅𑄛𑄴𑄛𑄎𑄴𑄎𑄚𑄴𑄖𑄨, 𑄖𑄤 𑄢𑄑𑄴𑄒𑄤𑄧𑄥𑄩𑄚𑄁 𑄖𑄁 𑄘𑄪𑄇𑄴𑄈𑄁 𑄡𑄗𑄧 𑄚 𑄦𑄮𑄖𑄨, 𑄖𑄗𑄧 𑄇𑄢𑄮𑄦𑄩𑄖𑄨 𑄃𑄖𑄴𑄗𑄮.

𑄃𑄛𑄬𑄖𑄣𑄮𑄟𑄦𑄁𑄥𑄥𑄴𑄥𑄧𑄖𑄨 𑄃𑄖𑄴𑄖𑄧𑄚𑄪𑄤𑄧𑄘𑄧𑄘𑄨𑄞𑄡𑄬𑄦𑄨 𑄚𑄨𑄝𑄴𑄞𑄡𑄥𑄴𑄥. 𑄄𑄟𑄨𑄚𑄧 𑄄𑄟𑄁 𑄘𑄥𑄴𑄥𑄬𑄖𑄨 – 𑄖𑄧𑄖, 𑄡𑄮 𑄢𑄧𑄎𑄧 𑄇𑄨𑄥𑄴𑄟𑄨𑄐𑄴𑄌𑄨 𑄃𑄂𑄥𑄋𑄴𑄇𑄁 𑄃𑄇𑄖𑄴𑄤𑄧 𑄃𑄖𑄴𑄖𑄚𑄮 𑄇𑄧𑄟𑄟𑄬𑄤 𑄃𑄚𑄪𑄥𑄴𑄥𑄢𑄖𑄨, 𑄍𑄚𑄴𑄘𑄤𑄥𑄬𑄚 𑄡𑄁 𑄡𑄁 𑄄𑄌𑄴𑄍𑄖𑄨, 𑄖𑄁 𑄖𑄁 𑄇𑄢𑄮𑄖𑄨, 𑄤𑄨𑄥𑄴𑄥𑄑𑄴𑄒𑄡𑄑𑄴𑄒𑄨 𑄤𑄨𑄡 𑄃𑄚𑄴𑄙𑄮 𑄚𑄨𑄢𑄋𑄴𑄇𑄪𑄥𑄮 𑄤𑄨𑄡 𑄌 𑄌𑄕𑄴𑄓𑄦𑄖𑄴𑄗𑄩 𑄦𑄮𑄖𑄨, 𑄖𑄥𑄴𑄥 𑄥𑄝𑄴𑄝𑄬 𑄞𑄮𑄉𑄧 𑄤𑄨𑄚𑄥𑄴𑄥𑄚𑄴𑄖𑄨, 𑄖𑄥𑄴𑄥 𑄖𑄁 𑄞𑄮𑄉𑄝𑄴𑄡𑄥𑄚𑄁 𑄃𑄊𑄁 𑄘𑄪𑄇𑄴𑄈𑄚𑄴𑄖𑄨 𑄤𑄪𑄌𑄴𑄌𑄖𑄨.

𑄖𑄖𑄴𑄗𑄬𑄤 𑄖𑄬 𑄤𑄖𑄴𑄖𑄛𑄘𑄧𑄖𑄨 𑄛𑄪𑄢𑄨𑄟𑄚𑄡𑄬𑄚𑄬𑄤 𑄡𑄮𑄎𑄬𑄖𑄝𑄴𑄝𑄁. 𑄘𑄇𑄴𑄈𑄥𑄴𑄥𑄪𑄘𑄧𑄚𑄩𑄖𑄨, 𑄖𑄧𑄖, 𑄖𑄴𑄤𑄁 𑄄𑄟𑄁 𑄃𑄚𑄪𑄥𑄧𑄥𑄚𑄨𑄁 𑄥𑄪𑄖𑄴𑄤𑄧 𑄄𑄘𑄧𑄚𑄨 𑄘𑄇𑄴𑄈𑄮 𑄃𑄚𑄣𑄥𑄮 𑄛𑄪𑄐𑄴𑄐𑄧𑄚𑄁 𑄇𑄢𑄕𑄬𑄚 𑄛𑄪𑄐𑄴𑄐𑄇𑄢𑄮 𑄥𑄪𑄢𑄧𑄘𑄨𑄛𑄢𑄨𑄦𑄢𑄕𑄬𑄚. 𑄃𑄥𑄮𑄕𑄴𑄓𑄮 𑄘𑄨𑄑𑄴𑄒𑄙𑄟𑄴𑄟𑄨𑄇𑄥𑄟𑄴𑄛𑄢𑄧𑄡𑄨𑄇𑄥𑄴𑄥 𑄃𑄖𑄴𑄗𑄥𑄴𑄥 𑄃𑄤𑄨𑄚𑄧𑄥𑄚𑄬𑄚 𑄃𑄤𑄨𑄚𑄧𑄥𑄇𑄮 𑄞𑄤𑄬𑄡𑄴𑄡𑄧𑄥𑄩𑄖𑄨. 𑄥𑄩𑄣𑄤𑄧𑄥𑄴𑄥𑄫𑄖𑄨 𑄥𑄩𑄣𑄤𑄧 𑄃𑄂𑄌𑄧𑄢𑄥𑄟𑄴𑄛𑄚𑄴𑄚𑄮 𑄞𑄤, 𑄘𑄥𑄥𑄪 𑄢𑄧𑄎𑄙𑄟𑄴𑄟𑄬𑄥𑄪 𑄛𑄖𑄨𑄑𑄴𑄒𑄧𑄡 𑄢𑄎𑄴𑄎𑄁 𑄇𑄧𑄢𑄬𑄦𑄨. 𑄘𑄪𑄥𑄴𑄥𑄩𑄣𑄮 𑄤𑄨𑄚𑄨𑄛𑄧𑄖𑄨𑄇𑄮𑄖𑄨 𑄘𑄪𑄥𑄴𑄥𑄩𑄣𑄮 𑄦𑄨, 𑄟𑄦𑄧𑄢𑄧𑄎, 𑄃𑄖𑄴𑄖𑄧𑄚𑄁 𑄚𑄨𑄢𑄡𑄬 𑄤𑄨𑄚𑄨𑄛𑄧𑄖𑄬𑄚𑄴𑄖𑄮 𑄤𑄨𑄚𑄨𑄛𑄧𑄖𑄨𑄇𑄮 𑄚𑄧𑄟 𑄦𑄮𑄖𑄩𑄖𑄨.

𑄆𑄤𑄁 𑄇𑄪𑄕𑄴𑄓𑄣𑄨𑄚𑄩𑄛𑄨 𑄆𑄇𑄧𑄘𑄥𑄦𑄨 𑄉𑄧𑄗𑄧𑄦𑄨 𑄙𑄟𑄴𑄟𑄁 𑄘𑄬𑄥𑄬𑄥𑄨. 𑄢𑄧𑄎𑄧 𑄖𑄪𑄑𑄴𑄒𑄮 𑄃𑄟𑄌𑄴𑄌𑄬 𑄃𑄂𑄟𑄚𑄴𑄖𑄬𑄖𑄴𑄤𑄧 𑄛𑄪𑄌𑄴𑄍𑄨 – ‘‘𑄞𑄮𑄚𑄴𑄖𑄮! 𑄃𑄟𑄌𑄴𑄌𑄧 𑄟𑄟 𑄙𑄩𑄖𑄧𑄡 𑄇𑄪𑄕𑄴𑄓𑄣𑄨𑄚𑄨𑄡𑄧 𑄆𑄤𑄁 𑄇𑄗𑄡𑄟𑄧𑄚𑄧𑄡 𑄇𑄬𑄚 𑄇𑄖𑄴𑄖𑄝𑄴𑄝𑄁 𑄇𑄨𑄌𑄴𑄌𑄁 𑄇𑄖’’𑄚𑄴𑄖𑄨. 𑄞𑄕𑄴𑄓𑄧𑄉𑄧𑄢𑄨𑄇𑄬𑄚, 𑄘𑄬𑄤𑄧𑄖𑄨. ‘‘𑄖𑄬𑄚 𑄦𑄨𑄥𑄴𑄥𑄧 𑄞𑄕𑄴𑄓𑄧𑄉𑄧𑄢𑄨𑄇𑄑𑄴𑄒𑄧𑄚𑄁 𑄘𑄟𑄴𑄟𑄩’’𑄖𑄨 𑄇𑄪𑄕𑄴𑄓𑄣𑄨𑄚𑄨𑄁 𑄒𑄧𑄚𑄚𑄴𑄖𑄢𑄬 𑄒𑄛𑄬𑄥𑄨. 𑄥𑄧 𑄖𑄖𑄮 𑄛𑄑𑄴𑄒𑄧𑄡 𑄞𑄕𑄴𑄓𑄧𑄉𑄧𑄢𑄨𑄇𑄑𑄴𑄒𑄧𑄚𑄬 𑄒𑄖𑄴𑄤𑄧 𑄛𑄨𑄖𑄪 𑄇𑄟𑄴𑄟𑄁 𑄃𑄇𑄧𑄥𑄩𑄖𑄨.

𑄇𑄪𑄕𑄴𑄓𑄣𑄨𑄚𑄨𑄛𑄐𑄴𑄦𑄮 𑄚𑄨𑄑𑄴𑄒𑄨𑄖𑄮.

𑄛𑄪𑄚 𑄢𑄧𑄎𑄧 𑄇𑄖𑄨𑄛𑄧𑄦𑄌𑄴𑄌𑄡𑄬𑄚 𑄛𑄪𑄢𑄨𑄟𑄚𑄡𑄬𑄚𑄬𑄤 𑄎𑄟𑄴𑄝𑄪𑄇𑄛𑄕𑄴𑄓𑄨𑄖𑄥𑄴𑄥 𑄥𑄚𑄴𑄖𑄨𑄇𑄁 𑄘𑄫𑄖𑄁 𑄛𑄬𑄥𑄬𑄖𑄴𑄤𑄧 𑄥𑄖𑄴𑄖𑄟𑄬 𑄘𑄨𑄤𑄥𑄬 𑄖𑄖𑄴𑄗 𑄉𑄚𑄴𑄖𑄴𑄤𑄧 𑄥𑄟𑄴𑄛𑄖𑄴𑄖𑄨𑄁 𑄃𑄚𑄪𑄞𑄤𑄨𑄖𑄴𑄤𑄧 𑄛𑄌𑄴𑄌𑄧𑄉𑄖𑄮 𑄖𑄖𑄴𑄗𑄬𑄤 𑄟𑄕𑄴𑄓𑄛𑄟𑄎𑄴𑄏𑄬 𑄚𑄨𑄥𑄩𑄘𑄨. 𑄃𑄟𑄌𑄴𑄌𑄮 𑄎𑄟𑄴𑄝𑄪𑄇𑄛𑄕𑄴𑄓𑄨𑄖𑄁 𑄇𑄐𑄴𑄌𑄚𑄞𑄘𑄴𑄘𑄛𑄩𑄒𑄬 𑄚𑄨𑄥𑄩𑄘𑄧𑄛𑄬𑄖𑄴𑄤𑄧 𑄛𑄩𑄒𑄁 𑄥𑄩𑄥𑄬𑄚𑄧𑄘𑄧𑄡 𑄃𑄂𑄉𑄌𑄴𑄍𑄨. 𑄛𑄕𑄴𑄓𑄨𑄖𑄮 𑄛𑄨𑄖𑄪 𑄃𑄋𑄴𑄇𑄬 𑄚𑄨𑄥𑄩𑄘𑄨𑄖𑄴𑄤𑄧 𑄇𑄩𑅄𑄨𑄖𑄴𑄤𑄧 𑄉𑄚𑄴𑄖𑄴𑄤𑄧 𑄇𑄐𑄴𑄌𑄚𑄛𑄩𑄒𑄬𑄡𑄬𑄤 𑄚𑄨𑄥𑄩𑄘𑄨. 𑄃𑄗 𑄚𑄁 𑄢𑄧𑄎𑄧 𑄛𑄐𑄴𑄦𑄁 𑄛𑄪𑄌𑄴𑄍𑄚𑄴𑄖𑄮 𑄉𑄧𑄗𑄟𑄧𑄦 –

𑄸𑄼. ‘‘𑄃𑄛𑄪𑄌𑄴𑄍𑄨𑄟𑄴𑄦 𑄇𑄮𑄥𑄨𑄡𑄉𑄮𑄖𑄴𑄖𑄁, 𑄇𑄪𑄕𑄴𑄓𑄣𑄨𑄚𑄨𑄁 𑄖𑄗𑄬𑄤 𑄌;

𑄖𑄴𑄤𑄁 𑄘𑄧𑄚𑄨 𑄤𑄘𑄬𑄦𑄨 𑄎𑄟𑄴𑄝𑄪𑄇, 𑄝𑄣𑄧𑄚𑄁 𑄝𑄣𑄟𑄪𑄖𑄴𑄖𑄟’’𑄚𑄴𑄖𑄨.

𑄖𑄥𑄴𑄥𑄖𑄴𑄗𑄮 – 𑄖𑄧𑄖, 𑄎𑄟𑄴𑄝𑄪𑄇, 𑄃𑄦𑄁 𑄖𑄤 𑄞𑄧𑄖𑄢𑄁 𑄇𑄮𑄥𑄨𑄡𑄉𑄮𑄖𑄴𑄖𑄁 𑄤𑄬𑄥𑄴𑄥𑄚𑄴𑄖𑄢𑄁 𑄞𑄉𑄨𑄚𑄨𑄐𑄴𑄌 𑄖𑄬 𑄇𑄪𑄕𑄴𑄓𑄣𑄨𑄚𑄨𑄁 𑄢𑄧𑄎𑄙𑄟𑄴𑄟𑄁 𑄃𑄛𑄪𑄌𑄴𑄍𑄨𑄁, 𑄖𑄬 𑄃𑄖𑄴𑄖𑄚𑄮 𑄝𑄣𑄬𑄚 𑄇𑄗𑄬𑄥𑄪𑄁, 𑄡𑄗𑄧 𑄛𑄚 𑄖𑄬 𑄛𑄪𑄌𑄴𑄍𑄨𑄁, 𑄖𑄗𑄬𑄤 𑄄𑄘𑄧𑄚𑄨, 𑄛𑄪𑄖𑄴𑄖 𑄎𑄟𑄴𑄝𑄪𑄇, 𑄖𑄁 𑄛𑄪𑄌𑄴𑄍𑄧𑄟𑄨, 𑄖𑄴𑄤𑄁 𑄟𑄬 𑄢𑄧𑄎𑄙𑄟𑄴𑄟𑄐𑄴𑄌 𑄝𑄣𑄧𑄚𑄁 𑄅𑄖𑄴𑄖𑄟𑄁 𑄝𑄣𑄐𑄴𑄌 𑄇𑄗𑄬𑄦𑄩𑄖𑄨.

𑄆𑄤𑄁 𑄢𑄧𑄎𑄧 𑄟𑄦𑄧𑄥𑄖𑄴𑄖𑄁 𑄛𑄐𑄴𑄦𑄁 𑄛𑄪𑄌𑄴𑄍𑄚𑄴𑄖𑄮 𑄃𑄐𑄴𑄐𑄬𑄥𑄁 𑄛𑄪𑄌𑄴𑄍𑄨𑄖𑄚𑄨𑄡𑄧𑄟𑄬𑄚 𑄃𑄛𑄪𑄌𑄴𑄍𑄨𑄖𑄴𑄤𑄧 𑄤𑄨𑄥𑄬𑄥𑄬𑄖𑄴𑄤𑄧 𑄛𑄪𑄌𑄴𑄍𑄨. 𑄃𑄗𑄥𑄴𑄥 𑄛𑄕𑄴𑄓𑄨𑄖𑄮 ‘‘𑄖𑄬𑄚 𑄦𑄨, 𑄟𑄦𑄧𑄢𑄧𑄎, 𑄃𑄮𑄦𑄨𑄖𑄥𑄮𑄖𑄮 𑄥𑄪𑄕𑄧𑄦𑄨, 𑄥𑄝𑄴𑄝𑄁 𑄖𑄬 𑄇𑄗𑄬𑄥𑄴𑄥𑄧𑄟𑄩’’𑄖𑄨 𑄛𑄥𑄧𑄢𑄨𑄖𑄦𑄖𑄴𑄗𑄬 𑄥𑄦𑄥𑄴𑄥𑄖𑄴𑄗𑄤𑄨𑄇𑄁 𑄒𑄛𑄬𑄚𑄴𑄖𑄮 𑄤𑄨𑄡 𑄙𑄟𑄴𑄟𑄘𑄬𑄥𑄚𑄁 𑄃𑄂𑄢𑄞𑄨 –

𑄸𑄽. ‘‘𑄝𑄣𑄁 𑄛𑄐𑄴𑄌𑄤𑄨𑄙𑄁 𑄣𑄮𑄇𑄬, 𑄛𑄪𑄢𑄨𑄥𑄥𑄴𑄟𑄨𑄁 𑄟𑄦𑄉𑄴𑄉𑄖𑄬;

𑄖𑄖𑄴𑄗 𑄝𑄧𑄦𑄪𑄝𑄣𑄁 𑄚𑄧𑄟, 𑄌𑄢𑄨𑄟𑄁 𑄤𑄪𑄌𑄴𑄌𑄖𑄬 𑄝𑄣𑄁.

𑄸𑄾. ‘‘𑄞𑄮𑄉𑄝𑄣𑄐𑄴𑄌 𑄘𑄩𑄊𑄧𑄤𑄪, 𑄘𑄪𑄖𑄨𑄡𑄁 𑄤𑄪𑄌𑄴𑄌𑄖𑄬 𑄝𑄣𑄁;

𑄃𑄟𑄌𑄴𑄌𑄝𑄣𑄐𑄴𑄌 𑄘𑄩𑄊𑄧𑄤𑄪, 𑄖𑄖𑄨𑄡𑄁 𑄤𑄪𑄌𑄴𑄌𑄖𑄬 𑄝𑄣𑄁.

𑄸𑄿. ‘‘𑄃𑄞𑄨𑄎𑄌𑄴𑄌𑄝𑄣𑄐𑄴𑄌𑄬𑄤, 𑄖𑄁 𑄌𑄖𑄪𑄖𑄴𑄗𑄁 𑄃𑄥𑄁𑄥𑄡𑄁;

𑄡𑄧𑄚𑄨 𑄌𑄬𑄖𑄧𑄚𑄨 𑄥𑄝𑄴𑄝𑄧𑄚𑄨, 𑄃𑄙𑄨𑄉𑄕𑄴𑄦𑄧𑄖𑄨 𑄛𑄕𑄴𑄓𑄨𑄖𑄮.

𑄹𑄶. ‘‘𑄖𑄁 𑄝𑄣𑄧𑄚𑄁 𑄝𑄣𑄁 𑄥𑄬𑄑𑄴𑄒𑄁, 𑄃𑄉𑄴𑄉𑄁 𑄛𑄐𑄴𑄐𑄧𑄝𑄣𑄁 𑄝𑄣𑄁;

𑄛𑄐𑄴𑄐𑄧𑄝𑄣𑄬𑄚𑄪𑄛𑄖𑄴𑄗𑄘𑄴𑄙𑄮, 𑄃𑄖𑄴𑄗𑄁 𑄤𑄨𑄚𑄴𑄘𑄖𑄨 𑄛𑄕𑄴𑄓𑄨𑄖𑄮.

𑄹𑄷. ‘‘𑄃𑄛𑄨 𑄌𑄬 𑄣𑄞𑄖𑄨 𑄟𑄚𑄴𑄘𑄮, 𑄜𑄩𑄖𑄁 𑄙𑄢𑄕𑄨𑄟𑄪𑄖𑄴𑄖𑄟𑄁;

𑄃𑄇𑄧𑄟𑄥𑄴𑄥 𑄛𑄥𑄡𑄴𑄦𑄁 𑄤𑄧, 𑄃𑄐𑄴𑄐𑄮 𑄖𑄁 𑄛𑄑𑄨𑄛𑄎𑄴𑄎𑄖𑄨.

𑄹𑄸. ‘‘𑄃𑄞𑄨𑄎𑄧𑄖𑄮𑄛𑄨 𑄌𑄬 𑄦𑄮𑄖𑄨, 𑄢𑄎𑄴𑄎𑄁 𑄣𑄘𑄴𑄙𑄧𑄚 𑄈𑄖𑄴𑄖𑄨𑄡𑄮;

𑄘𑄪𑄛𑄴𑄛𑄐𑄴𑄐𑄮 𑄦𑄨 𑄇𑄧𑄥𑄨𑄛𑄖𑄨, 𑄥𑄝𑄴𑄝𑄬𑄚𑄛𑄨 𑄚 𑄎𑄩𑄤𑄖𑄨.

𑄹𑄹. ‘‘𑄛𑄐𑄴𑄐𑄧𑄤 𑄥𑄪𑄖𑄁 𑄤𑄨𑄚𑄨𑄌𑄴𑄍𑄨𑄚𑄩, 𑄛𑄐𑄴𑄐𑄧 𑄇𑄨𑄖𑄴𑄖𑄨𑄥𑄨𑄣𑄮𑄇𑄤𑄓𑄴𑄔𑄚𑄩;

𑄛𑄐𑄴𑄐𑄧𑄥𑄦𑄨𑄖𑄮 𑄚𑄢𑄮 𑄄𑄙, 𑄃𑄛𑄨 𑄘𑄪𑄇𑄴𑄈𑄬 𑄥𑄪𑄈𑄧𑄚𑄨 𑄤𑄨𑄚𑄴𑄘𑄖𑄨.

𑄹𑄺. ‘‘𑄛𑄐𑄴𑄐𑄐𑄴𑄌 𑄈𑄮 𑄃𑄥𑄪𑄥𑄴𑄥𑄫𑄥𑄁, 𑄚 𑄇𑄮𑄌𑄨 𑄃𑄙𑄨𑄉𑄌𑄴𑄍𑄖𑄨;

𑄝𑄦𑄪𑄥𑄴𑄥𑄪𑄖𑄁 𑄃𑄚𑄧𑄉𑄟𑄴𑄟, 𑄙𑄟𑄴𑄟𑄑𑄴𑄒𑄁 𑄃𑄤𑄨𑄚𑄨𑄝𑄴𑄞𑄪𑄎𑄁.

𑄹𑄻. ‘‘𑄡𑄮 𑄌 𑄙𑄟𑄴𑄟𑄤𑄨𑄞𑄋𑄴𑄉𑄐𑄴𑄐𑄫, 𑄇𑄧𑄣𑄪𑄑𑄴𑄒𑄧𑄡𑄩 𑄃𑄖𑄚𑄴𑄘𑄨𑄖𑄮;

𑄃𑄚𑄪𑄑𑄴𑄒𑄦𑄖𑄨 𑄇𑄧𑄣𑄬𑄚, 𑄇𑄟𑄴𑄟𑄜𑄣𑄁 𑄖𑄥𑄴𑄥𑄨𑄎𑄴𑄏𑄖𑄨.

𑄹𑄼. ‘‘𑄃𑄚𑄧𑄡𑄖𑄚𑄥𑄩𑄣𑄥𑄴𑄥, 𑄃𑄚𑄧𑄡𑄖𑄚𑄥𑄬𑄤𑄨𑄚𑄮;

𑄚 𑄚𑄨𑄝𑄴𑄝𑄨𑄚𑄴𑄘𑄨𑄡𑄇𑄧𑄢𑄨𑄥𑄴𑄥, 𑄥𑄟𑄴𑄟𑄘𑄖𑄴𑄗𑄮 𑄤𑄨𑄛𑄌𑄴𑄌𑄖𑄨.

𑄹𑄽. ‘‘𑄃𑄎𑄴𑄏𑄖𑄴𑄖𑄐𑄴𑄌 𑄛𑄡𑄪𑄖𑄴𑄖𑄥𑄴𑄥, 𑄖𑄗𑄧𑄡𑄖𑄚𑄥𑄬𑄤𑄨𑄚𑄮;

𑄃𑄚𑄨𑄝𑄴𑄝𑄨𑄚𑄴𑄘𑄨𑄡𑄇𑄧𑄢𑄨𑄥𑄴𑄥, 𑄥𑄟𑄴𑄟𑄘𑄖𑄴𑄗𑄮 𑄤𑄨𑄛𑄌𑄴𑄌𑄖𑄨.

𑄹𑄾. ‘‘𑄡𑄮𑄉𑄛𑄴𑄛𑄡𑄮𑄉𑄥𑄋𑄴𑄈𑄧𑄖𑄁, 𑄥𑄟𑄴𑄞𑄖𑄥𑄴𑄥𑄧𑄚𑄪𑄢𑄇𑄴𑄈𑄕𑄁;

𑄖𑄧𑄚𑄨 𑄖𑄴𑄤𑄁 𑄖𑄧𑄖 𑄥𑄬𑄤𑄥𑄴𑄥𑄪, 𑄟𑄧 𑄃𑄇𑄟𑄴𑄟𑄧𑄡 𑄢𑄚𑄴𑄙𑄡𑄨;

𑄃𑄇𑄟𑄴𑄟𑄪𑄚𑄧 𑄦𑄨 𑄘𑄪𑄟𑄴𑄟𑄬𑄙𑄮, 𑄚𑅄𑄧𑄉𑄧𑄢𑄁𑄤 𑄥𑄩𑄘𑄖𑄩’’𑄖𑄨.

𑄖𑄖𑄴𑄗 𑄟𑄦𑄉𑄴𑄉𑄖𑄬𑄖𑄨, 𑄟𑄦𑄧𑄢𑄧𑄎, 𑄄𑄟𑄥𑄴𑄟𑄨𑄁 𑄥𑄖𑄴𑄖𑄣𑄮𑄇𑄬 𑄟𑄦𑄎𑄴𑄏𑄧𑄥𑄡𑄬 𑄛𑄪𑄢𑄨𑄥𑄬 𑄛𑄐𑄴𑄌𑄤𑄨𑄙𑄁 𑄝𑄣𑄁 𑄦𑄮𑄖𑄨. 𑄝𑄧𑄦𑄪𑄝𑄣𑄚𑄴𑄖𑄨 𑄇𑄧𑄡𑄝𑄣𑄁. 𑄌𑄢𑄨𑄟𑄚𑄴𑄖𑄨 𑄖𑄁 𑄃𑄖𑄨𑄟𑄦𑄚𑄴𑄖𑄟𑄴𑄛𑄨 𑄥𑄟𑄧𑄚𑄁 𑄣𑄧𑄟𑄇𑄟𑄬𑄤. 𑄇𑄨𑄁𑄇𑄧𑄢𑄕𑄧? 𑄃𑄚𑄴𑄙𑄝𑄧𑄣𑄞𑄧𑄤𑄬𑄚. 𑄥𑄌𑄬 𑄦𑄨 𑄇𑄧𑄡𑄝𑄣𑄁 𑄟𑄦𑄚𑄴𑄖𑄁 𑄚𑄧𑄟 𑄞𑄤𑄬𑄡𑄴𑄡, 𑄤𑄧𑄢𑄕𑄝𑄣𑄖𑄮 𑄣𑄑𑄪𑄇𑄨𑄇𑄧𑄡 𑄝𑄣𑄁 𑄈𑄪𑄘𑄴𑄘𑄇𑄁 𑄞𑄤𑄬𑄡𑄴𑄡, 𑄤𑄧𑄢𑄕𑄝𑄣𑄁 𑄛𑄚 𑄃𑄚𑄴𑄙𑄝𑄧𑄣𑄞𑄧𑄤𑄬𑄚 𑄟𑄢𑄕𑄥𑄴𑄥 𑄛𑄌𑄴𑄌𑄡𑄁 𑄎𑄧𑄖𑄁, 𑄣𑄑𑄪𑄇𑄨𑄇𑄧 𑄃𑄖𑄴𑄖𑄚𑄮 𑄐𑄧𑄕𑄇𑄪𑄥𑄣𑄖𑄧𑄡 𑄤𑄧𑄢𑄕𑄁 𑄎𑄩𑄤𑄨𑄖𑄇𑄴𑄈𑄡𑄁 𑄛𑄧𑄛𑄬𑄥𑄨. 𑄄𑄟𑄥𑄴𑄟𑄨𑄁 𑄛𑄚𑄖𑄴𑄗𑄬 ‘‘𑄚 𑄦𑄬𑄤 𑄥𑄝𑄴𑄝𑄖𑄴𑄗 𑄝𑄣𑄬𑄚 𑄇𑄨𑄌𑄴𑄌𑄁, 𑄝𑄣𑄐𑄴𑄦𑄨 𑄝𑄧𑄣𑄥𑄴𑄥 𑄤𑄙𑄧𑄡 𑄦𑄮𑄖𑄩’’𑄖𑄨 𑄥𑄪𑄖𑄴𑄖𑄁 (𑄎𑄧. 𑄷.𑄻.𑄺𑄸) 𑄃𑄂𑄦𑄢𑄨𑄖𑄝𑄴𑄝𑄁.

𑄞𑄮𑄉𑄝𑄣𑄚𑄴𑄖𑄨 𑄅𑄛𑄖𑄴𑄗𑄟𑄴𑄞𑄚𑄤𑄥𑄬𑄚 𑄥𑄝𑄴𑄝𑄁 𑄦𑄨𑄢𑄐𑄴𑄐𑄥𑄪𑄤𑄕𑄴𑄕𑄧𑄘𑄨 𑄅𑄛𑄞𑄮𑄉𑄎𑄧𑄖𑄁 𑄞𑄮𑄉𑄝𑄣𑄁 𑄚𑄧𑄟, 𑄖𑄁 𑄇𑄧𑄡𑄝𑄣𑄖𑄮 𑄟𑄦𑄚𑄴𑄖𑄖𑄢𑄁. 𑄃𑄟𑄌𑄴𑄌𑄝𑄣𑄚𑄴𑄖𑄨 𑄃𑄞𑄬𑄎𑄴𑄎𑄟𑄚𑄴𑄖𑄥𑄴𑄥 𑄥𑄫𑄢𑄥𑄴𑄥 𑄥𑄪𑄦𑄘𑄡𑄥𑄴𑄥 𑄃𑄟𑄌𑄴𑄌𑄟𑄕𑄴𑄓𑄣𑄥𑄴𑄥 𑄃𑄖𑄴𑄗𑄨𑄖𑄧, 𑄖𑄁 𑄝𑄣𑄁 𑄥𑄋𑄴𑄉𑄧𑄟𑄥𑄫𑄢𑄖𑄧𑄡 𑄛𑄪𑄢𑄨𑄟𑄬𑄦𑄨 𑄝𑄣𑄬𑄦𑄨 𑄟𑄦𑄚𑄴𑄖𑄖𑄢𑄁. 𑄃𑄞𑄨𑄎𑄌𑄴𑄌𑄝𑄣𑄚𑄴𑄖𑄨 𑄖𑄩𑄕𑄨 𑄇𑄪𑄣𑄧𑄚𑄨 𑄃𑄖𑄨𑄇𑄴𑄇𑄟𑄨𑄖𑄴𑄤𑄧 𑄈𑄖𑄴𑄖𑄨𑄡𑄇𑄪𑄣𑄤𑄥𑄬𑄚 𑄎𑄧𑄖𑄨𑄥𑄟𑄴𑄛𑄖𑄴𑄖𑄨, 𑄖𑄁 𑄄𑄖𑄢𑄬𑄦𑄨 𑄝𑄣𑄬𑄦𑄨 𑄟𑄦𑄚𑄴𑄖𑄖𑄢𑄁. 𑄎𑄧𑄖𑄨𑄥𑄟𑄴𑄛𑄚𑄴𑄚𑄧 𑄆𑄤 𑄦𑄨 𑄥𑄪𑄎𑄴𑄏𑄚𑄴𑄖𑄨, 𑄚 𑄄𑄖𑄢𑄬𑄖𑄨. 𑄡𑄧𑄚𑄨 𑄌𑄬𑄖𑄧𑄚𑄩𑄖𑄨 𑄡𑄧𑄚𑄨 𑄌 𑄆𑄖𑄧𑄚𑄨 𑄌𑄖𑄴𑄖𑄧𑄢𑄨𑄛𑄨 𑄝𑄣𑄧𑄚𑄨 𑄛𑄕𑄴𑄓𑄨𑄖𑄮 𑄛𑄐𑄴𑄐𑄧𑄚𑄪𑄞𑄧𑄤𑄬𑄚 𑄃𑄙𑄨𑄉𑄕𑄴𑄦𑄧𑄖𑄨 𑄃𑄞𑄨𑄞𑄤𑄖𑄨, 𑄖𑄁 𑄥𑄝𑄴𑄝𑄝𑄣𑄧𑄚𑄁 𑄛𑄐𑄴𑄐𑄧𑄝𑄣𑄁 𑄥𑄬𑄑𑄴𑄒𑄚𑄴𑄖𑄨 𑄌 𑄃𑄉𑄴𑄉𑄚𑄴𑄖𑄨 𑄌 𑄤𑄪𑄌𑄴𑄌𑄖𑄨. 𑄇𑄨𑄁𑄇𑄧𑄢𑄕𑄧? 𑄖𑄬𑄚 𑄦𑄨 𑄝𑄣𑄬𑄚 𑄅𑄛𑄖𑄴𑄗𑄘𑄴𑄙𑄮 𑄛𑄕𑄴𑄓𑄨𑄖𑄮 𑄃𑄖𑄴𑄗𑄁 𑄤𑄨𑄚𑄴𑄘𑄖𑄨, 𑄤𑄪𑄓𑄴𑄔𑄨𑄁 𑄛𑄧𑄛𑄪𑄕𑄧𑄖𑄨. 𑄖𑄘𑄖𑄴𑄗𑄎𑄮𑄖𑄚𑄖𑄴𑄗𑄁 ‘‘𑄛𑄪𑄕𑄴𑄕𑄁 𑄚𑄘𑄨𑄁 𑄡𑄬𑄚 𑄌 𑄛𑄬𑄡𑄴𑄡𑄟𑄧𑄦𑄫’’𑄖𑄨 𑄛𑄪𑄕𑄴𑄕𑄚𑄘𑄩𑄎𑄧𑄖𑄇𑄐𑄴𑄌 (𑄎𑄧. 𑄷.𑄸.𑄷𑄸𑄽 𑄃𑄂𑄘𑄡𑄮) 𑄥𑄨𑄢𑄩𑄇𑄧𑅄𑄇𑄕𑄴𑄕𑄨𑄛𑄐𑄴𑄦𑄁 𑄛𑄐𑄴𑄌𑄛𑄕𑄴𑄓𑄨𑄖𑄛𑄐𑄴𑄦𑄐𑄴𑄌 𑄥𑄖𑄴𑄖𑄪𑄞𑄥𑄴𑄖𑄎𑄧𑄖𑄇- (𑄎𑄧. 𑄷.𑄽.𑄺𑄼 𑄃𑄂𑄘𑄡𑄮) 𑄥𑄟𑄴𑄞𑄤𑄎𑄧𑄖𑄇- (𑄎𑄧. 𑄷.𑄷𑄼.𑄷𑄹𑄾 𑄃𑄂𑄘𑄡𑄮) 𑄥𑄢𑄞𑄋𑄴𑄉𑄎𑄧𑄖𑄇𑄧𑄘𑄩𑄚𑄨 (𑄎𑄧. 𑄸.𑄷𑄽.𑄻𑄶 𑄃𑄂𑄘𑄡𑄮) 𑄌 𑄇𑄗𑄬𑄖𑄝𑄴𑄝𑄧𑄚𑄨.

𑄟𑄚𑄴𑄘𑄮𑄖𑄨 𑄟𑄚𑄴𑄘𑄛𑄐𑄴𑄐𑄮 𑄝𑄧𑄣𑄮. 𑄜𑄩𑄖𑄚𑄴𑄖𑄨, 𑄖𑄧𑄖, 𑄟𑄚𑄴𑄘𑄛𑄐𑄴𑄐𑄮 𑄛𑄪𑄉𑄴𑄉𑄣𑄮 𑄥𑄖𑄴𑄖𑄢𑄖𑄚𑄛𑄪𑄕𑄴𑄕𑄁 𑄌𑄬𑄛𑄨 𑄅𑄖𑄴𑄖𑄟𑄁 𑄙𑄢𑄕𑄨𑄁 𑄣𑄞𑄖𑄨, 𑄖𑄥𑄴𑄥 𑄃𑄚𑄨𑄌𑄴𑄍𑄟𑄧𑄚𑄥𑄴𑄥𑄬𑄤 𑄛𑄥𑄡𑄴𑄦𑄇𑄧𑄢𑄁 𑄤𑄧 𑄛𑄚 𑄇𑄖𑄴𑄤𑄧 𑄃𑄐𑄴𑄐𑄮 𑄛𑄐𑄴𑄐𑄧𑄥𑄟𑄴𑄛𑄚𑄴𑄚𑄮 𑄖𑄁 𑄛𑄑𑄨𑄛𑄎𑄴𑄎𑄖𑄨. 𑄟𑄚𑄴𑄘𑄮 𑄦𑄨 𑄣𑄘𑄴𑄙𑄁 𑄡𑄥𑄁 𑄢𑄇𑄴𑄈𑄨𑄖𑄪𑄁 𑄇𑄪𑄣𑄥𑄚𑄴𑄖𑄇𑄁 𑄤𑄧 𑄛𑄚 𑄛𑄤𑄬𑄕𑄨𑄃𑄂𑄉𑄖𑄟𑄴𑄛𑄨 𑄢𑄎𑄴𑄎𑄁 𑄃𑄙𑄨𑄉𑄚𑄴𑄖𑄪𑄁 𑄚 𑄥𑄇𑄴𑄇𑄮𑄖𑄨. 𑄖𑄘𑄖𑄴𑄗𑄎𑄮𑄖𑄚𑄖𑄴𑄗𑄁 ‘‘𑄃𑄘𑄴𑄙𑄧 𑄛𑄧𑄘𑄐𑄴𑄎𑄣𑄩 𑄥𑄝𑄴𑄝𑄬, 𑄛𑄐𑄴𑄐𑄧𑄡 𑄃𑄖𑄨𑄢𑄮𑄌𑄖𑄩’’𑄖𑄨 𑄛𑄧𑄘𑄐𑄴𑄎𑄣𑄩𑄎𑄧𑄖𑄇𑄁 (𑄎𑄧. 𑄷.𑄸.𑄷𑄿𑄺-𑄷𑄿𑄻) 𑄇𑄗𑄬𑄖𑄝𑄴𑄝𑄁. 𑄣𑄘𑄴𑄙𑄧𑄚𑄧𑄖𑄨 𑄎𑄧𑄖𑄨𑄥𑄟𑄴𑄛𑄖𑄴𑄖𑄨𑄁 𑄚𑄨𑄥𑄴𑄥𑄧𑄡 𑄇𑄪𑄣𑄥𑄚𑄴𑄖𑄇𑄁 𑄢𑄎𑄴𑄎𑄁 𑄣𑄞𑄨𑄖𑄴𑄤𑄧𑄛𑄨. 𑄥𑄝𑄴𑄝𑄬𑄚𑄛𑄩𑄖𑄨 𑄖𑄬𑄚 𑄥𑄇𑄣𑄬𑄚𑄛𑄨 𑄢𑄎𑄴𑄎𑄬𑄚 𑄚 𑄎𑄩𑄤𑄖𑄨, 𑄃𑄚𑄪𑄛𑄧𑄡𑄇𑄪𑄥𑄣𑄖𑄧𑄡 𑄘𑄪𑄉𑄴𑄉𑄖𑄮𑄤 𑄦𑄮𑄖𑄩𑄖𑄨.

𑄆𑄤𑄁 𑄟𑄦𑄧𑄥𑄖𑄴𑄖𑄮 𑄆𑄖𑄴𑄖𑄇𑄬𑄚 𑄒𑄧𑄚𑄬𑄚 𑄃𑄛𑄕𑄴𑄓𑄨𑄖𑄥𑄴𑄥 𑄃𑄉𑄪𑄕𑄁 𑄇𑄗𑄬𑄖𑄴𑄤𑄧 𑄄𑄘𑄧𑄚𑄨 𑄛𑄐𑄴𑄐𑄁 𑄛𑄥𑄁𑄥𑄚𑄴𑄖𑄮 ‘‘𑄛𑄐𑄴𑄐𑄧’’𑄖𑄨𑄃𑄂𑄘𑄨𑄟𑄧𑄦. 𑄖𑄖𑄴𑄗 𑄥𑄪𑄖𑄚𑄴𑄖𑄨 𑄥𑄪𑄖𑄛𑄢𑄨𑄡𑄖𑄴𑄖𑄨. 𑄖𑄐𑄴𑄦𑄨 𑄛𑄐𑄴𑄐𑄧𑄤 𑄤𑄨𑄚𑄨𑄌𑄴𑄍𑄨𑄚𑄖𑄨. 𑄇𑄨𑄖𑄴𑄖𑄨𑄥𑄨𑄣𑄮𑄇𑄤𑄓𑄴𑄔𑄚𑄩𑄖𑄨 𑄇𑄨𑄖𑄴𑄖𑄨𑄊𑄮𑄥𑄥𑄴𑄥 𑄌 𑄣𑄧𑄞𑄥𑄇𑄴𑄇𑄧𑄢𑄥𑄴𑄥 𑄌 𑄤𑄓𑄴𑄔𑄚𑄩. 𑄘𑄪𑄇𑄴𑄈𑄬 𑄥𑄪𑄈𑄧𑄚𑄨 𑄤𑄨𑄚𑄴𑄘𑄖𑄩𑄖𑄨 𑄘𑄪𑄇𑄴𑄈𑄬 𑄅𑄛𑄴𑄛𑄚𑄴𑄚𑄬𑄛𑄨 𑄚𑄨𑄝𑄴𑄞𑄡𑄮 𑄦𑄪𑄖𑄴𑄤𑄧 𑄅𑄛𑄧𑄡𑄇𑄪𑄥𑄣𑄖𑄧𑄡 𑄥𑄪𑄈𑄁 𑄛𑄑𑄨𑄣𑄞𑄖𑄨. 𑄖𑄘𑄖𑄴𑄗𑄘𑄩𑄛𑄚𑄖𑄴𑄗𑄁 –

‘‘𑄡𑄥𑄴𑄥𑄬𑄖𑄬 𑄌𑄖𑄪𑄢𑄮 𑄙𑄟𑄴𑄟𑄧, 𑄤𑄧𑄚𑄢𑄨𑄚𑄴𑄘 𑄡𑄗𑄧 𑄖𑄤’’. (𑄎𑄧. 𑄷.𑄷.𑄻𑄽);

𑄃𑄣𑄟𑄬𑄖𑄬𑄦𑄨 𑄃𑄟𑄴𑄝𑄬𑄦𑄨, 𑄎𑄟𑄴𑄝𑄫𑄦𑄨 𑄛𑄚𑄥𑄬𑄦𑄨 𑄌𑄧’’𑄖𑄨. (𑄎𑄧. 𑄷.𑄸.𑄷𑄷𑄻) –

𑄃𑄂𑄘𑄩𑄚𑄨 𑄎𑄧𑄖𑄇𑄧𑄚𑄨 𑄇𑄗𑄬𑄖𑄝𑄴𑄝𑄧𑄚𑄨.

𑄃𑄥𑄪𑄥𑄴𑄥𑄫𑄥𑄚𑄴𑄖𑄨 𑄛𑄕𑄴𑄓𑄨𑄖𑄛𑄪𑄉𑄴𑄉𑄣𑄬 𑄃𑄛𑄡𑄨𑄢𑄪𑄛𑄧𑄥𑄚𑄴𑄖𑄮 𑄃𑄥𑄴𑄥𑄪𑄕𑄚𑄴𑄖𑄮. 𑄙𑄟𑄴𑄟𑄑𑄴𑄒𑄚𑄴𑄖𑄨 𑄥𑄞𑄧𑄤𑄇𑄧𑄢𑄕𑄬 𑄒𑄨𑄖𑄁 𑄝𑄦𑄪𑄥𑄴𑄥𑄪𑄖𑄁 𑄃𑄚𑄧𑄉𑄟𑄴𑄟 𑄖𑄁 𑄃𑄥𑄘𑄴𑄘𑄦𑄚𑄴𑄖𑄮. 𑄃𑄤𑄨𑄚𑄨𑄝𑄴𑄞𑄪𑄎𑄚𑄴𑄖𑄨 𑄃𑄖𑄴𑄗𑄧𑄚𑄖𑄴𑄗𑄁 𑄇𑄧𑄢𑄕𑄧𑄇𑄧𑄢𑄕𑄁 𑄃𑄚𑄮𑄉𑄧𑄦𑄚𑄴𑄖𑄮 𑄃𑄖𑄩𑄢𑄬𑄚𑄴𑄖𑄮 𑄚 𑄇𑄮𑄌𑄨 𑄛𑄐𑄴𑄐𑄁 𑄃𑄙𑄨𑄉𑄌𑄴𑄍𑄖𑄨, 𑄖𑄧𑄖𑄧𑄖𑄨.

𑄙𑄟𑄴𑄟𑄤𑄨𑄞𑄋𑄴𑄉𑄐𑄴𑄐𑄫𑄖𑄨 𑄘𑄥𑄇𑄪𑄥𑄣𑄇𑄟𑄴𑄟𑄛𑄗𑄤𑄨𑄞𑄋𑄴𑄉𑄇𑄪𑄥𑄣𑄮. 𑄇𑄧𑄣𑄪𑄑𑄴𑄒𑄧𑄡𑄩𑄖𑄨 𑄤𑄩𑄢𑄨𑄡𑄁 𑄇𑄧𑄖𑄪𑄁 𑄡𑄪𑄖𑄴𑄖𑄇𑄧𑄣𑄬 𑄤𑄩𑄢𑄨𑄡𑄥𑄴𑄥 𑄇𑄧𑄢𑄇𑄮. 𑄃𑄚𑄪𑄑𑄴𑄒𑄦𑄖𑄩𑄖𑄨 𑄖𑄥𑄴𑄟𑄨𑄁 𑄖𑄥𑄴𑄟𑄨𑄁 𑄇𑄧𑄣𑄬 𑄖𑄁 𑄖𑄁 𑄇𑄨𑄌𑄴𑄌𑄁 𑄇𑄢𑄮𑄖𑄨. 𑄖𑄥𑄴𑄥𑄧𑄖𑄨 𑄖𑄥𑄴𑄥 𑄛𑄪𑄉𑄴𑄉𑄣𑄥𑄴𑄥 𑄇𑄟𑄴𑄟𑄜𑄣𑄁 𑄥𑄟𑄨𑄎𑄴𑄏𑄖𑄨 𑄚𑄨𑄛𑄴𑄜𑄎𑄴𑄎𑄖𑄨. 𑄃𑄚𑄧𑄡𑄖𑄚𑄥𑄩𑄣𑄥𑄴𑄥𑄧𑄖𑄨 𑄃𑄚𑄧𑄡𑄖𑄚𑄁 𑄤𑄪𑄌𑄴𑄌𑄖𑄨 𑄣𑄧𑄞𑄡𑄥𑄥𑄪𑄈𑄧𑄚𑄁 𑄃𑄚𑄧𑄇𑄢𑄮 𑄘𑄪𑄥𑄴𑄥𑄩𑄣𑄴𑄡𑄇𑄟𑄴𑄟𑄁, 𑄖𑄁𑄥𑄩𑄣𑄥𑄴𑄥 𑄖𑄬𑄚 𑄘𑄪𑄥𑄴𑄥𑄩𑄣𑄴𑄡𑄇𑄟𑄴𑄟𑄬𑄚 𑄥𑄟𑄚𑄴𑄚𑄧𑄉𑄖𑄥𑄴𑄥, 𑄃𑄚𑄧𑄡𑄖𑄚𑄞𑄫𑄖𑄟𑄬𑄤 𑄘𑄪𑄥𑄴𑄥𑄩𑄣𑄛𑄪𑄉𑄴𑄉𑄣𑄁 𑄥𑄬𑄤𑄚𑄴𑄖𑄥𑄴𑄥, 𑄇𑄪𑄥𑄣𑄥𑄴𑄥 𑄇𑄟𑄴𑄟𑄥𑄴𑄥 𑄇𑄢𑄕𑄇𑄧𑄣𑄬 𑄚𑄨𑄝𑄴𑄝𑄨𑄚𑄴𑄘𑄨𑄡𑄇𑄧𑄢𑄨𑄥𑄴𑄥 𑄚𑄨𑄝𑄴𑄝𑄨𑄚𑄴𑄘𑄨𑄖𑄴𑄤𑄧 𑄅𑄇𑄴𑄇𑄕𑄴𑄒𑄨𑄖𑄴𑄤𑄧 𑄇𑄢𑄮𑄚𑄴𑄖𑄥𑄴𑄥 𑄆𑄤𑄢𑄫𑄛𑄥𑄴𑄥, 𑄖𑄧𑄖, 𑄛𑄪𑄉𑄴𑄉𑄣𑄥𑄴𑄥 𑄇𑄟𑄴𑄟𑄧𑄚𑄁 𑄃𑄖𑄴𑄗𑄮 𑄥𑄟𑄴𑄟𑄧 𑄚 𑄤𑄨𑄛𑄌𑄴𑄌𑄖𑄨 𑄚 𑄥𑄟𑄴𑄛𑄎𑄴𑄎𑄖𑄨, 𑄖𑄩𑄕𑄨 𑄇𑄪𑄣𑄉𑄴𑄉𑄧𑄚𑄨 𑄌 𑄍 𑄇𑄧𑄟𑄥𑄉𑄴𑄉𑄧𑄚𑄨 𑄌 𑄚 𑄅𑄛𑄚𑄬𑄖𑄩𑄖𑄨 𑄃𑄖𑄴𑄗𑄮. 𑄃𑄎𑄴𑄏𑄖𑄴𑄖𑄐𑄴𑄌𑄧𑄖𑄨 𑄃𑄖𑄴𑄖𑄚𑄮 𑄚𑄨𑄡𑄇𑄎𑄴𑄏𑄖𑄴𑄖𑄁 𑄃𑄚𑄨𑄌𑄴𑄌𑄞𑄧𑄤𑄚𑄧𑄘𑄨𑄤𑄥𑄬𑄚 𑄛𑄡𑄪𑄖𑄴𑄖𑄥𑄴𑄥. 𑄖𑄗𑄧𑄡𑄖𑄚𑄥𑄬𑄤𑄨𑄚𑄮𑄖𑄨 𑄖𑄗𑄬𑄤 𑄥𑄩𑄣𑄤𑄚𑄴𑄖𑄬 𑄛𑄪𑄉𑄴𑄉𑄣𑄬 𑄥𑄬𑄤𑄟𑄧𑄚𑄥𑄴𑄥. 𑄤𑄨𑄛𑄌𑄴𑄌𑄖𑄩𑄖𑄨 𑄥𑄟𑄴𑄛𑄎𑄴𑄎𑄖𑄨 𑄟𑄦𑄚𑄴𑄖𑄁 𑄡𑄥𑄁 𑄘𑄬𑄖𑄨.

𑄡𑄮𑄉𑄛𑄴𑄛𑄡𑄮𑄉𑄥𑄋𑄴𑄈𑄧𑄖𑄚𑄴𑄖𑄨 𑄡𑄮𑄉𑄬 𑄡𑄪𑄐𑄴𑄎𑄨𑄖𑄝𑄴𑄝𑄡𑄪𑄖𑄴𑄖𑄇𑄬 𑄇𑄧𑄢𑄕𑄬 𑄛𑄡𑄮𑄉𑄇𑄮𑄑𑄴𑄒𑄧𑄥𑄞𑄫𑄖𑄁 𑄛𑄐𑄴𑄐𑄁. 𑄥𑄟𑄴𑄞𑄖𑄥𑄴𑄥𑄧𑄖𑄨 𑄢𑄧𑄥𑄨𑄇𑄖𑄥𑄴𑄥 𑄙𑄚𑄥𑄴𑄥 𑄃𑄚𑄪𑄢𑄇𑄴𑄈𑄕𑄁. 𑄖𑄧𑄚𑄨 𑄖𑄴𑄤𑄚𑄴𑄖𑄨 𑄆𑄖𑄧𑄚𑄨 𑄌 𑄘𑄴𑄤𑄬 𑄛𑄪𑄢𑄨𑄟𑄧𑄚𑄨 𑄌 𑄟𑄡𑄧 𑄤𑄪𑄖𑄴𑄖𑄇𑄧𑄢𑄕𑄧𑄚𑄨 𑄥𑄝𑄴𑄝𑄧𑄚𑄨, 𑄖𑄧𑄖, 𑄖𑄴𑄤𑄁 𑄥𑄬𑄤𑄥𑄴𑄥𑄪, 𑄟𑄡𑄧 𑄤𑄪𑄖𑄴𑄖𑄁 𑄃𑄮𑄤𑄧𑄘𑄁 𑄦𑄘𑄡𑄬 𑄇𑄖𑄴𑄤𑄧 𑄃𑄖𑄴𑄖𑄚𑄮 𑄊𑄢𑄬 𑄙𑄚𑄁 𑄢𑄇𑄴𑄈. 𑄟𑄧 𑄃𑄇𑄟𑄴𑄟𑄧𑄡 𑄢𑄚𑄴𑄙𑄡𑄩𑄖𑄨 𑄃𑄡𑄪𑄖𑄴𑄖𑄬𑄚 𑄃𑄇𑄧𑄢𑄕𑄬𑄚 𑄟𑄧 𑄢𑄚𑄴𑄙𑄡𑄨, 𑄖𑄁 𑄙𑄚𑄁 𑄟𑄧 𑄏𑄧𑄛𑄡𑄨 𑄟𑄧 𑄚𑄧𑄥𑄡𑄨. 𑄇𑄨𑄁𑄇𑄧𑄢𑄕𑄧? 𑄃𑄇𑄟𑄴𑄟𑄪𑄚𑄧 𑄦𑄩𑄖𑄨 𑄃𑄡𑄪𑄖𑄴𑄖𑄇𑄟𑄴𑄟𑄇𑄢𑄕𑄬𑄚 𑄘𑄪𑄟𑄴𑄟𑄬𑄙𑄮 𑄛𑄪𑄉𑄴𑄉𑄣𑄮 𑄥𑄇𑄁 𑄙𑄚𑄁 𑄚𑄧𑄥𑄬𑄖𑄴𑄤𑄧 𑄛𑄌𑄴𑄍𑄧 𑄘𑄪𑄉𑄴𑄉𑄖𑄮. 𑄚𑅄𑄧𑄉𑄧𑄢𑄁𑄤 𑄥𑄩𑄘𑄖𑄩𑄖𑄨 𑄡𑄗𑄧 𑄚𑅄𑄧𑄉𑄧𑄢𑄁 𑄟𑄫𑄣𑄖𑄮 𑄛𑄑𑄴𑄒𑄧𑄡 𑄎𑄩𑄢𑄟𑄧𑄚𑄁 𑄃𑄛𑄴𑄛𑄖𑄨𑄑𑄴𑄒𑄁 𑄛𑄖𑄖𑄨, 𑄆𑄤𑄁 𑄃𑄇𑄧𑄢𑄕𑄬𑄚 𑄙𑄚𑄁 𑄚𑄧𑄥𑄬𑄖𑄴𑄤𑄧 𑄃𑄛𑄧𑄡𑄬𑄥𑄪 𑄚𑄨𑄝𑄴𑄝𑄖𑄴𑄖𑄖𑄩𑄖𑄨.

𑄆𑄤𑄟𑄴𑄛𑄨 𑄝𑄮𑄙𑄨𑄥𑄖𑄴𑄖𑄮 𑄆𑄖𑄴𑄖𑄇𑄬𑄚 𑄒𑄧𑄚𑄬𑄚 𑄛𑄐𑄴𑄌 𑄝𑄣𑄧𑄚𑄨 𑄤𑄕𑄴𑄕𑄬𑄖𑄴𑄤𑄧 𑄛𑄐𑄴𑄐𑄧𑄝𑄣𑄁 𑄅𑄇𑄴𑄈𑄨𑄛𑄨𑄖𑄴𑄤𑄧 𑄌𑄚𑄴𑄘𑄟𑄕𑄴𑄓𑄣𑄁 𑄚𑄩𑄦𑄢𑄚𑄴𑄖𑄮 𑄤𑄨𑄡 𑄇𑄗𑄬𑄖𑄴𑄤𑄧 𑄄𑄘𑄧𑄚𑄨 𑄘𑄥𑄦𑄨 𑄉𑄧𑄗𑄧𑄦𑄨 𑄢𑄐𑄴𑄐𑄮 𑄃𑄮𑄤𑄧𑄘𑄁 𑄘𑄬𑄚𑄴𑄖𑄮 𑄃𑄂𑄦 –

𑄹𑄿. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄟𑄧𑄖𑄧𑄛𑄨𑄖𑄫𑄥𑄪 𑄈𑄖𑄴𑄖𑄨𑄡;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄶. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄛𑄪𑄖𑄴𑄖𑄘𑄧𑄢𑄬𑄥𑄪 𑄈𑄖𑄴𑄖𑄨𑄡;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄷. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄟𑄨𑄖𑄴𑄖𑄧𑄟𑄌𑄴𑄌𑄬𑄥𑄪 𑄈𑄖𑄴𑄖𑄨𑄡;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄸. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄤𑄧𑄦𑄚𑄬𑄥𑄪 𑄝𑄣𑄬𑄥𑄪 𑄌;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄹. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄉𑄧𑄟𑄬𑄥𑄪 𑄚𑄨𑄉𑄟𑄬𑄥𑄪 𑄌;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄺. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄢𑄑𑄴𑄒𑄬 𑄎𑄚𑄛𑄘𑄬𑄥𑄪 𑄌;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄻. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄥𑄟𑄕𑄬 𑄝𑄴𑄢𑄧𑄦𑄴𑄟𑄕𑄬𑄥𑄪 𑄌;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄼. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄟𑄨𑄉𑄛𑄇𑄴𑄈𑄩𑄥𑄪 𑄈𑄖𑄴𑄖𑄨𑄡;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄽. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄙𑄟𑄴𑄟𑄮 𑄌𑄨𑄕𑄴𑄕𑄮 𑄥𑄪𑄈𑄧𑄤𑄦𑄮;

𑄄𑄙 𑄙𑄟𑄴𑄟𑄁 𑄌𑄢𑄨𑄖𑄴𑄤𑄧𑄚, 𑄢𑄧𑄎 𑄥𑄉𑄴𑄉𑄁 𑄉𑄟𑄨𑄥𑄴𑄥𑄥𑄨.

𑄺𑄾. ‘‘𑄙𑄟𑄴𑄟𑄁 𑄌𑄢 𑄟𑄦𑄧𑄢𑄧𑄎, 𑄥𑄄𑄚𑄴𑄘𑄧 𑄘𑄬𑄤𑄧 𑄥𑄝𑄴𑄢𑄦𑄴𑄟𑄇𑄧;

𑄥𑄪𑄌𑄨𑄕𑄴𑄕𑄬𑄚 𑄘𑄨𑄤𑄁 𑄛𑄖𑄴𑄖𑄧, 𑄟𑄧 𑄙𑄟𑄴𑄟𑄁 𑄢𑄧𑄎 𑄛𑄧𑄟𑄘𑄮’’𑄖𑄨.

𑄖𑄖𑄴𑄗 𑄛𑄒𑄟𑄉𑄧𑄗𑄧𑄡 𑄖𑄧𑄤 𑄄𑄙 𑄙𑄟𑄴𑄟𑄚𑄴𑄖𑄨 𑄟𑄧𑄖𑄧𑄛𑄨𑄖𑄪𑄛𑄑𑄴𑄒𑄧𑄚𑄙𑄟𑄴𑄟𑄁. 𑄖𑄁 𑄇𑄧𑄣𑄥𑄴𑄥𑄬𑄤 𑄤𑄪𑄑𑄴𑄒𑄧𑄡 𑄟𑄧𑄖𑄧𑄛𑄨𑄖𑄫𑄚𑄁 𑄟𑄪𑄈𑄮𑄘𑄇𑄘𑄚𑄴𑄖𑄇𑄑𑄴𑄒𑄘𑄧𑄚𑄟𑄧𑄘𑄨𑄁 𑄇𑄖𑄴𑄤𑄧 𑄥𑄝𑄴𑄝𑄥𑄢𑄩𑄢𑄇𑄨𑄌𑄴𑄌𑄛𑄢𑄨𑄦𑄢𑄕𑄁 𑄇𑄢𑄮𑄚𑄴𑄖𑄮𑄤 𑄛𑄫𑄢𑄬𑄦𑄩𑄖𑄨 𑄤𑄘𑄖𑄨. 𑄛𑄪𑄖𑄴𑄖𑄘𑄧𑄢𑄬𑄥𑄫𑄖𑄨 𑄛𑄪𑄖𑄴𑄖𑄙𑄩𑄖𑄢𑄮 𑄖𑄧𑄤 𑄛𑄧𑄛𑄧 𑄚𑄨𑄤𑄧𑄢𑄬𑄖𑄴𑄤𑄧 𑄇𑄣𑄴𑄡𑄧𑄕𑄬 𑄚𑄨𑄤𑄬𑄥𑄬𑄚𑄴𑄖𑄮 𑄥𑄨𑄛𑄴𑄛𑄁 𑄅𑄉𑄴𑄉𑄕𑄴𑄦𑄧𑄛𑄬𑄚𑄴𑄖𑄮 𑄤𑄡𑄛𑄴𑄛𑄖𑄴𑄖𑄇𑄧𑄣𑄬 𑄛𑄖𑄨𑄢𑄫𑄛𑄇𑄪𑄣𑄤𑄁𑄥𑄬𑄚 𑄃𑄂𑄤𑄧𑄦𑄤𑄨𑄤𑄧𑄦𑄁 𑄇𑄢𑄮𑄚𑄴𑄖𑄮 𑄥𑄟𑄡𑄬 𑄙𑄚𑄁 𑄘𑄬𑄚𑄴𑄖𑄮 𑄛𑄪𑄖𑄴𑄖𑄬𑄥𑄪 𑄙𑄟𑄴𑄟𑄁 𑄌𑄢𑄖𑄨 𑄚𑄧𑄟, 𑄞𑄢𑄨𑄡𑄁 𑄥𑄟𑄴𑄟𑄧𑄚𑄬𑄚𑄴𑄖𑄮 𑄃𑄚𑄤𑄟𑄧𑄚𑄬𑄚𑄴𑄖𑄮 𑄃𑄚𑄖𑄨𑄌𑄢𑄚𑄴𑄖𑄮 𑄄𑄥𑄴𑄥𑄢𑄨𑄡𑄁 𑄤𑄮𑄥𑄴𑄥𑄎𑄴𑄎𑄬𑄚𑄴𑄖𑄮 𑄃𑄣𑄋𑄴𑄇𑄧𑄢𑄁 𑄃𑄚𑄪𑄛𑄴𑄛𑄘𑄬𑄚𑄴𑄖𑄮 𑄘𑄧𑄢𑄬𑄥𑄪 𑄙𑄟𑄴𑄟𑄁 𑄌𑄢𑄖𑄨 𑄚𑄧𑄟. 𑄟𑄨𑄖𑄴𑄖𑄧𑄟𑄌𑄴𑄌𑄬𑄥𑄫𑄖𑄨 𑄟𑄨𑄖𑄴𑄖𑄧𑄟𑄌𑄴𑄌𑄬 𑄌𑄖𑄫𑄦𑄨 𑄥𑄋𑄴𑄉𑄦𑄤𑄖𑄴𑄗𑄫𑄦𑄨 𑄥𑄋𑄴𑄉𑄕𑄴𑄦𑄚𑄴𑄖𑄮 𑄃𑄤𑄨𑄥𑄁𑄤𑄧𑄘𑄬𑄚𑄴𑄖𑄮 𑄆𑄖𑄬𑄥𑄪 𑄙𑄟𑄴𑄟𑄁 𑄌𑄢𑄖𑄨 𑄚𑄧𑄟. 𑄤𑄧𑄦𑄚𑄬𑄥𑄪 𑄝𑄣𑄬𑄥𑄪 𑄌𑄧𑄖𑄨 𑄦𑄖𑄴𑄗𑄨𑄃𑄥𑄴𑄥𑄧𑄘𑄩𑄚𑄁 𑄤𑄧𑄦𑄚𑄧𑄚𑄁 𑄝𑄣𑄇𑄧𑄡𑄥𑄴𑄥 𑄌 𑄘𑄧𑄖𑄝𑄴𑄝𑄡𑄪𑄖𑄴𑄖𑄇𑄁 𑄘𑄬𑄚𑄴𑄖𑄮 𑄥𑄇𑄴𑄇𑄧𑄢𑄁 𑄇𑄢𑄮𑄚𑄴𑄖𑄮 𑄦𑄖𑄴𑄗𑄨𑄃𑄥𑄴𑄥𑄧𑄘𑄡𑄮 𑄟𑄦𑄣𑄴𑄣𑄇𑄇𑄧𑄣𑄬 𑄇𑄟𑄴𑄟𑄬𑄥𑄪 𑄃𑄡𑄮𑄎𑄬𑄚𑄴𑄖𑄮 𑄖𑄬𑄥𑄪 𑄙𑄟𑄴𑄟𑄁 𑄌𑄢𑄖𑄨 𑄚𑄧𑄟.