𑄽. 𑄢𑄬𑄤𑄖𑄝𑄪𑄘𑄴𑄙𑄤𑄁𑄥𑄤𑄕𑄴𑄕𑄚𑄧

𑄥𑄪𑄟𑄚𑄥𑄴𑄥 𑄛𑄚 𑄞𑄉𑄤𑄖𑄮 𑄃𑄛𑄢𑄞𑄧𑄉𑄬 𑄥𑄧𑄥𑄚𑄬 𑄌𑄥𑄴𑄥 𑄃𑄚𑄴𑄖𑄢𑄦𑄨𑄖𑄬 𑄚𑄤𑄪𑄖𑄨𑄤𑄥𑄴𑄥𑄥𑄦𑄥𑄴𑄥𑄧𑄡𑄪𑄇𑄧 𑄟𑄚𑄪𑄥𑄴𑄥𑄧 𑄃𑄚𑄪𑄇𑄴𑄇𑄟𑄬𑄚 𑄛𑄢𑄨𑄦𑄧𑄡𑄨𑄖𑄴𑄤𑄧 𑄘𑄥𑄤𑄥𑄴𑄥𑄧𑄡𑄪𑄇𑄧 𑄦𑄪𑄖𑄴𑄤𑄧 𑄛𑄪𑄚 𑄃𑄚𑄪𑄇𑄴𑄇𑄟𑄬𑄚 𑄤𑄓𑄴𑄔𑄨𑄖𑄴𑄤𑄧 𑄃𑄥𑄋𑄴𑄈𑄴𑄡𑄬𑄡𑄴𑄡𑄧𑄡𑄪𑄇𑄧 𑄦𑄪𑄖𑄴𑄤𑄧 𑄛𑄪𑄚 𑄛𑄢𑄨𑄦𑄧𑄡𑄟𑄧𑄚𑄧 𑄥𑄑𑄴𑄒𑄨𑄤𑄥𑄴𑄥𑄥𑄦𑄥𑄴𑄥𑄧𑄡𑄪𑄇𑄧 𑄃𑄦𑄬𑄥𑄪𑄁. 𑄖𑄘𑄧 𑄢𑄬𑄤𑄖𑄮 𑄚𑄧𑄟 𑄥𑄖𑄴𑄗𑄧 𑄅𑄘𑄛𑄧𑄘𑄨. 𑄥𑄮𑄛𑄨 𑄛𑄧𑄢𑄟𑄨𑄡𑄮 𑄛𑄫𑄢𑄬𑄖𑄴𑄤𑄧 𑄃𑄚𑄬𑄇𑄢𑄖𑄚𑄥𑄟𑄪𑄎𑄴𑄎𑄣𑄨𑄖𑄞𑄤𑄚𑄬 𑄖𑄪𑄥𑄨𑄖𑄞𑄤𑄚𑄬 𑄚𑄨𑄝𑄴𑄝𑄖𑄴𑄖𑄨𑄖𑄴𑄤𑄧 𑄖𑄖𑄮 𑄌𑄤𑄨𑄖𑄴𑄤𑄧 𑄥𑄝𑄴𑄝𑄙𑄚𑄙𑄐𑄴𑄐𑄤𑄖𑄨𑄥𑄪𑄙𑄐𑄴𑄐𑄤𑄖𑄩𑄚𑄉𑄢𑄬 𑄥𑄝𑄴𑄝𑄧𑄣𑄋𑄴𑄇𑄧𑄢𑄥𑄟𑄣𑄋𑄴𑄇𑄖𑄃𑄟𑄨𑄖𑄢𑄪𑄌𑄨𑄢𑄛𑄢𑄨𑄤𑄧𑄢𑄛𑄢𑄨𑄤𑄪𑄖𑄥𑄴𑄥 𑄥𑄨𑄢𑄨𑄤𑄨𑄞𑄤𑄥𑄟𑄪𑄘𑄡𑄬𑄚𑄧𑄇𑄪𑄣𑄥𑄴𑄥 𑄥𑄝𑄴𑄝𑄥𑄟𑄨𑄘𑄴𑄙𑄨𑄤𑄨𑄛𑄪𑄣𑄥𑄴𑄥 𑄤𑄨𑄛𑄪𑄣𑄥𑄴𑄥 𑄚𑄧𑄟 𑄢𑄐𑄴𑄐𑄮 𑄇𑄪𑄣𑄬 𑄥𑄝𑄴𑄝𑄎𑄚𑄚𑄡𑄚𑄧𑄣𑄨𑄛𑄧𑄣𑄨𑄥𑄟𑄧𑄇𑄪𑄣𑄧𑄡 𑄥𑄟𑄴𑄜𑄪𑄣𑄴𑄣𑄚𑄡𑄚𑄇𑄪𑄤𑄣𑄡𑄥𑄥𑄴𑄥𑄨𑄢𑄨𑄇𑄥𑄨𑄚𑄨𑄘𑄴𑄙𑄤𑄘𑄚𑄇𑄟𑄣𑄧𑄇𑄢𑄥𑄮𑄞𑄧𑄥𑄟𑄪𑄎𑄴𑄎𑄣𑄧𑄡 𑄥𑄪𑄢𑄪𑄌𑄨𑄢𑄟𑄚𑄮𑄦𑄢𑄉𑄪𑄕𑄉𑄕𑄤𑄨𑄛𑄪𑄣𑄧𑄡 𑄤𑄨𑄛𑄪𑄣𑄧𑄡 𑄚𑄧𑄟 𑄃𑄉𑄴𑄉𑄟𑄦𑄬𑄥𑄨𑄡𑄧 𑄇𑄪𑄌𑄴𑄍𑄨𑄥𑄴𑄟𑄨𑄁 𑄛𑄑𑄨𑄥𑄚𑄴𑄙𑄨𑄁 𑄉𑄦𑄬𑄖𑄴𑄤𑄧 𑄘𑄥𑄚𑄴𑄚𑄁 𑄟𑄧𑄥𑄧𑄚𑄁 𑄃𑄌𑄴𑄌𑄡𑄬𑄚 𑄌𑄨𑄖𑄴𑄖𑄇𑄫𑄑𑄛𑄝𑄴𑄝𑄖𑄖𑄮 𑄥𑄪𑄤𑄕𑄴𑄕𑄦𑄁𑄥𑄢𑄧𑄎𑄧 𑄤𑄨𑄡 𑄟𑄧𑄖𑄪𑄇𑄪𑄌𑄴𑄍𑄨𑄖𑄮 𑄚𑄨𑄇𑄴𑄈𑄟𑄨.

𑄖𑄥𑄴𑄥 𑄛𑄑𑄨𑄥𑄚𑄴𑄙𑄨𑄡𑄁 𑄎𑄧𑄖𑄨𑄡𑄐𑄴𑄌 𑄛𑄧𑄑𑄨𑄦𑄧𑄢𑄨𑄡𑄧𑄚𑄨 𑄛𑄪𑄝𑄴𑄝𑄬 𑄤𑄪𑄖𑄴𑄖𑄚𑄡𑄧𑄚𑄬𑄤 𑄃𑄦𑄬𑄥𑄪𑄁. 𑄥𑄪𑄘𑄥𑄴𑄥𑄚𑄢𑄖𑄚𑄉𑄴𑄊𑄨𑄃𑄂𑄤𑄬𑅄𑄚𑄧𑄟𑄇𑄧 𑄖𑄡𑄮 𑄌𑄥𑄴𑄥 𑄛𑄧𑄥𑄧𑄘𑄧 𑄃𑄦𑄬𑄥𑄪𑄁. 𑄥𑄪𑄘𑄥𑄴𑄥𑄚𑄧𑄘𑄬𑄤𑄨𑄛𑄴𑄛𑄟𑄪𑄈𑄧𑄚𑄨 𑄖𑄬𑄖𑄴𑄖𑄨𑄁𑄥 𑄄𑄖𑄴𑄗𑄨𑄥𑄦𑄥𑄴𑄥𑄧𑄚𑄨 𑄛𑄌𑄴𑄌𑄪𑄛𑄑𑄴𑄒𑄨𑄖𑄧𑄚𑄨 𑄃𑄦𑄬𑄥𑄪𑄁. 𑄖𑄧𑄦𑄨 𑄛𑄢𑄨𑄤𑄪𑄖𑄮 𑄥𑄮 𑄥𑄪𑄢𑄡𑄪𑄤𑄖𑄩𑄦𑄨 𑄛𑄢𑄨𑄤𑄪𑄖𑄮 𑄘𑄬𑄤𑄇𑄪𑄟𑄧𑄢𑄮 𑄤𑄨𑄡 𑄍𑄝𑄴𑄝𑄥𑄴𑄥𑄥𑄦𑄥𑄴𑄥𑄧𑄚𑄨 𑄤𑄨𑄥𑄡𑄥𑄪𑄈𑄟𑄚𑄪𑄞𑄤𑄟𑄧𑄚𑄮 𑄃𑄉𑄧𑄢𑄁 𑄃𑄎𑄴𑄏𑄧𑄤𑄥𑄨. 𑄥𑄮 𑄥𑄪𑄘𑄥𑄴𑄥𑄚𑄧𑄡 𑄚𑄧𑄟 𑄘𑄬𑄤𑄨𑄡𑄧 𑄤𑄢𑄪𑄕𑄬 𑄚𑄧𑄟 𑄖𑄚𑄡𑄬 𑄎𑄧𑄖𑄬 𑄌𑄖𑄴𑄖𑄧𑄢𑄨 𑄚𑄨𑄟𑄨𑄖𑄴𑄖𑄧𑄚𑄨 𑄘𑄨𑄥𑄴𑄤𑄧 𑄚𑄧𑄚𑄧𑄤𑄨𑄢𑄧𑄉𑄖𑄚𑄪𑄤𑄢𑄤𑄥𑄚𑄚𑄨𑄤𑄥𑄚𑄮 𑄃𑄂𑄟𑄪𑄇𑄴𑄇𑄟𑄪𑄖𑄴𑄖𑄧𑄦𑄧𑄢𑄟𑄕𑄨𑄇𑄪𑄕𑄴𑄓𑄣𑄮 𑄤𑄢𑄇𑄬𑄡𑄫𑄢𑄟𑄇𑄪𑄑𑄇𑄑𑄇𑄙𑄢𑄮 𑄛𑄢𑄟𑄥𑄪𑄢𑄞𑄨𑄉𑄚𑄴𑄙𑄇𑄪𑄥𑄪𑄟𑄥𑄟𑄣𑄋𑄴𑄇𑄖𑄮 𑄛𑄢𑄟𑄢𑄪𑄌𑄨𑄢𑄇𑄢𑄚𑄨𑄇𑄢𑄮 𑄥𑄢𑄘𑄥𑄟𑄡𑄢𑄎𑄚𑄨𑄇𑄢𑄮 𑄤𑄨𑄡 𑄖𑄧𑄢𑄧𑄉𑄕𑄛𑄢𑄨𑄤𑄪𑄖𑄮 𑄤𑄨𑄡 𑄌𑄚𑄴𑄘𑄮 𑄖𑄨𑄘𑄥𑄉𑄕𑄛𑄢𑄨𑄤𑄪𑄖𑄮 𑄤𑄨𑄡 𑄘𑄥𑄥𑄖𑄚𑄡𑄚𑄮 𑄝𑄴𑄢𑄦𑄴𑄟𑄉𑄕𑄛𑄢𑄨𑄤𑄪𑄖𑄮 𑄤𑄨𑄡 𑄌 𑄦𑄧𑄢𑄨𑄖𑄟𑄦𑄧𑄝𑄴𑄢𑄦𑄴𑄟𑄧 𑄌𑄖𑄪𑄢𑄋𑄴𑄉𑄨𑄚𑄨𑄡𑄧 𑄟𑄦𑄖𑄨𑄡𑄧 𑄥𑄬𑄚𑄧𑄡 𑄛𑄢𑄨𑄤𑄪𑄖𑄮 𑄃𑄂𑄎𑄐𑄴𑄐𑄢𑄗𑄬𑄚 𑄟𑄦𑄧𑄞𑄨𑄚𑄨𑄇𑄴𑄈𑄟𑄚𑄁 𑄚𑄨𑄇𑄴𑄈𑄟𑄨𑄖𑄴𑄤𑄧 𑄥𑄝𑄴𑄝𑄧𑄞𑄢𑄕𑄧𑄚𑄨 𑄃𑄮𑄟𑄪𑄐𑄴𑄌𑄨𑄖𑄴𑄤𑄧 𑄞𑄕𑄴𑄓𑄧𑄉𑄧𑄢𑄨𑄇𑄥𑄴𑄥 𑄦𑄖𑄴𑄗𑄬 𑄘𑄖𑄴𑄤𑄧 𑄎𑄣𑄎𑄧𑄟𑄣𑄧𑄤𑄨𑄇𑄣𑄚𑄩𑄣𑄇𑄪𑄤𑄣𑄡𑄘𑄣𑄥𑄘𑄨𑄥𑄬𑄚𑄧𑄖𑄨𑄚𑄨𑄥𑄨𑄖𑄬𑄚𑄧𑄖𑄨𑄖𑄨𑄈𑄨𑄕𑄬𑄚𑄧𑄥𑄨𑄚𑄧 𑄥𑄇𑄬𑄥𑄟𑄇𑄪𑄑𑄁 𑄍𑄨𑄚𑄴𑄘𑄨𑄖𑄴𑄤𑄧 𑄃𑄂𑄇𑄧𑄥𑄬 𑄈𑄨𑄛𑄨. 𑄖𑄁 𑄥𑄇𑄴𑄇𑄮 𑄘𑄬𑄤𑄢𑄧𑄎𑄧 𑄥𑄪𑄤𑄕𑄴𑄕𑄌𑄋𑄴𑄇𑄮𑄑𑄇𑄬𑄚 𑄛𑄑𑄨𑄉𑄴𑄉𑄦𑄬𑄖𑄴𑄤𑄧 𑄖𑄧𑄤𑄖𑄨𑄁𑄥𑄞𑄤𑄚𑄁 𑄚𑄬𑄖𑄴𑄤𑄧 𑄥𑄨𑄚𑄬𑄢𑄪𑄟𑄪𑄘𑄴𑄙𑄚𑄨 𑄥𑄖𑄴𑄖𑄢𑄖𑄚𑄟𑄡𑄁 𑄌𑄬𑄖𑄨𑄡𑄁 𑄃𑄇𑄧𑄥𑄨.

𑄟𑄦𑄧𑄛𑄪𑄢𑄨𑄥𑄮 𑄛𑄚 𑄘𑄬𑄤𑄘𑄖𑄴𑄖𑄧𑄚𑄨 𑄇𑄧𑄥𑄧𑄡𑄧𑄚𑄨 𑄛𑄢𑄨𑄘𑄦𑄨𑄖𑄴𑄤𑄧 𑄛𑄝𑄴𑄝𑄎𑄨, 𑄆𑄇𑄧 𑄌 𑄚𑄁 𑄛𑄪𑄢𑄨𑄥𑄇𑄮𑄑𑄨 𑄃𑄚𑄪𑄛𑄝𑄴𑄝𑄎𑄨. 𑄥𑄮 𑄖𑄬𑄦𑄨 𑄛𑄢𑄨𑄤𑄪𑄖𑄮 𑄥𑄖𑄴𑄖𑄟𑄧𑄥𑄬 𑄛𑄙𑄧𑄚𑄌𑄢𑄨𑄡𑄁 𑄌𑄢𑄨𑄖𑄴𑄤𑄧 𑄤𑄨𑄥𑄧𑄈𑄛𑄪𑄕𑄴𑄕𑄟𑄧𑄡 𑄃𑄐𑄴𑄐𑄖𑄢𑄧𑄡 𑄥𑄧𑄙𑄪𑄘𑄬𑄤𑄨𑄡𑄧 𑄚𑄧𑄟 𑄥𑄬𑄑𑄴𑄒𑄨𑄙𑄩𑄖𑄧𑄡 𑄘𑄨𑄚𑄴𑄚𑄁 𑄟𑄙𑄪𑄛𑄧𑄡𑄧𑄥𑄁 𑄛𑄢𑄨𑄞𑄪𑄐𑄴𑄎𑄨𑄖𑄴𑄤𑄧 𑄥𑄧𑄣𑄤𑄚𑄬 𑄘𑄨𑄤𑄧𑄤𑄨𑄦𑄧𑄢𑄁 𑄤𑄩𑄖𑄨𑄚𑄧𑄟𑄬𑄖𑄴𑄤𑄧 𑄥𑄧𑄡𑄚𑄴𑄦𑄥𑄟𑄡𑄬 𑄃𑄐𑄴𑄐𑄖𑄢𑄬𑄚𑄧𑄎𑄩𑄤𑄇𑄬𑄚 𑄘𑄨𑄚𑄴𑄚𑄧 𑄃𑄑𑄴𑄒 𑄖𑄨𑄕𑄟𑄪𑄑𑄴𑄒𑄨𑄡𑄮 𑄉𑄦𑄬𑄖𑄴𑄤𑄧 𑄟𑄖𑄴𑄖𑄤𑄢𑄚𑄧𑄉𑄉𑄧𑄟𑄩 𑄚𑄧𑄉𑄝𑄮𑄙𑄨𑄁 𑄛𑄘𑄇𑄴𑄈𑄨𑄕𑄁 𑄇𑄖𑄴𑄤𑄧 𑄖𑄬𑄛𑄕𑄴𑄕𑄧𑄥𑄦𑄖𑄴𑄗𑄤𑄨𑄖𑄴𑄗𑄖𑄁 𑄖𑄨𑄕𑄥𑄚𑄴𑄗𑄢𑄁 𑄥𑄚𑄴𑄗𑄢𑄨𑄖𑄴𑄤𑄧 𑄌𑄖𑄪𑄢𑄋𑄴𑄉𑄤𑄩𑄢𑄨𑄡𑄁 𑄃𑄙𑄨𑄑𑄴𑄒𑄧𑄡 𑄚𑄨𑄥𑄩𑄘𑄨𑄖𑄴𑄤𑄧 𑄟𑄧𑄢𑄝𑄣𑄁 𑄤𑄨𑄙𑄟𑄨𑄖𑄴𑄤𑄧 𑄥𑄝𑄴𑄝𑄐𑄴𑄐𑄪𑄖𑄐𑄴𑄐𑄧𑄕𑄁 𑄛𑄑𑄨𑄤𑄨𑄎𑄴𑄏𑄨𑄖𑄴𑄤𑄧 – ‘‘𑄃𑄚𑄬𑄇𑄎𑄧𑄖𑄨𑄥𑄁𑄥𑄧𑄢𑄁…𑄛𑄬… 𑄖𑄕𑄴𑄦𑄧𑄚𑄁 𑄈𑄡𑄟𑄎𑄴𑄏𑄉𑄧’’𑄖𑄨 (𑄙. 𑄛. 𑄷𑄻𑄹-𑄷𑄻𑄺) 𑄅𑄘𑄧𑄚𑄁 𑄅𑄘𑄧𑄚𑄬𑄥𑄨. 𑄖𑄬𑄚 𑄤𑄪𑄖𑄴𑄖𑄁 –

𑄷. ‘‘𑄥𑄪𑄟𑄚𑄥𑄴𑄥 𑄃𑄛𑄢𑄬𑄚, 𑄢𑄬𑄤𑄖𑄮 𑄚𑄧𑄟 𑄚𑄧𑄡𑄇𑄮;

𑄃𑄚𑄪𑄛𑄟𑄮 𑄃𑄥𑄘𑄨𑄥𑄮, 𑄃𑄖𑄪𑄣𑄮 𑄅𑄖𑄴𑄖𑄟𑄮 𑄎𑄨𑄚𑄮’’𑄖𑄨.

𑄢𑄬𑄤𑄖𑄮 𑄇𑄨𑄢 𑄥𑄖𑄴𑄗𑄧 𑄝𑄮𑄙𑄨𑄥𑄟𑄩𑄛𑄬𑄡𑄬𑄤 𑄥𑄖𑄴𑄖𑄥𑄖𑄴𑄖𑄧𑄦𑄧𑄚𑄨 𑄤𑄩𑄖𑄨𑄚𑄧𑄟𑄬𑄖𑄴𑄤𑄧 𑄙𑄟𑄴𑄟𑄘𑄬𑄥𑄚𑄖𑄴𑄗𑄁 𑄝𑄴𑄢𑄦𑄴𑄟𑄧𑄡𑄧𑄌𑄚𑄁 𑄥𑄟𑄴𑄛𑄑𑄨𑄌𑄴𑄍𑄨𑄖𑄴𑄤𑄧 – ‘‘𑄇𑄥𑄴𑄥 𑄚𑄪 𑄈𑄮 𑄃𑄦𑄁 𑄛𑄒𑄟𑄁 𑄙𑄟𑄴𑄟𑄁 𑄘𑄬𑄥𑄬𑄡𑄴𑄡’’𑄚𑄴𑄖𑄨 (𑄘𑄩. 𑄚𑄨. 𑄸.𑄽𑄸; 𑄟. 𑄚𑄨. 𑄷.𑄸𑄾𑄺; 𑄸.𑄹𑄺𑄷; 𑄟𑄦𑄧𑄤. 𑄷𑄶) 𑄅𑄛𑄙𑄧𑄢𑄬𑄚𑄴𑄖𑄮 𑄃𑄖𑄴𑄖𑄚𑄧 𑄥𑄦 𑄛𑄝𑄴𑄝𑄎𑄨𑄖𑄞𑄨𑄇𑄴𑄈𑄪𑄇𑄮𑄑𑄨𑄡𑄮 𑄃𑄐𑄴𑄐𑄬 𑄌 𑄝𑄦𑄫 𑄘𑄬𑄤𑄟𑄚𑄪𑄥𑄴𑄥𑄬 𑄅𑄛𑄚𑄨𑄥𑄴𑄥𑄡𑄥𑄟𑄴𑄛𑄚𑄴𑄚𑄬 𑄘𑄨𑄥𑄴𑄤𑄧 𑄃𑄂𑄇𑄧𑄥𑄬𑄚 𑄉𑄚𑄴𑄖𑄴𑄤𑄧 𑄤𑄢𑄪𑄕𑄧𑄢𑄧𑄟𑄬 𑄃𑄮𑄖𑄢𑄨𑄖𑄴𑄤𑄧 𑄖𑄬𑄦𑄨 𑄛𑄢𑄨𑄤𑄪𑄖𑄮 𑄉𑄟𑄴𑄞𑄩𑄢𑄁 𑄚𑄨𑄛𑄪𑄕𑄁 𑄖𑄨𑄛𑄢𑄨𑄤𑄑𑄴𑄑𑄁 𑄃𑄛𑄴𑄛𑄑𑄨𑄤𑄖𑄴𑄖𑄨𑄡𑄁 𑄃𑄐𑄴𑄐𑄬𑄚 𑄃𑄚𑄪𑄖𑄴𑄖𑄢𑄁 𑄙𑄟𑄴𑄟𑄌𑄇𑄴𑄇𑄁 𑄛𑄤𑄖𑄴𑄖𑄬𑄖𑄴𑄤𑄧 𑄞𑄨𑄇𑄴𑄈𑄫𑄚𑄁 𑄇𑄮𑄑𑄨 𑄃𑄢𑄦𑄖𑄴𑄖𑄬 𑄛𑄖𑄨𑄑𑄴𑄒𑄧𑄛𑄬𑄥𑄨. 𑄖𑄩𑄥𑄪 𑄟𑄉𑄴𑄉𑄜𑄣𑄬𑄥𑄪 𑄛𑄖𑄨𑄑𑄴𑄒𑄨𑄖𑄧𑄚𑄁 𑄉𑄕𑄚𑄛𑄢𑄨𑄌𑄴𑄍𑄬𑄘𑄮 𑄚𑄖𑄴𑄗𑄨. 𑄖𑄬𑄚 𑄤𑄪𑄖𑄴𑄖𑄁 –

𑄸. ‘‘𑄥𑄮𑄛𑄨 𑄙𑄟𑄴𑄟𑄁 𑄛𑄇𑄧𑄥𑄬𑄥𑄨, 𑄝𑄴𑄢𑄦𑄴𑄟𑄪𑄚𑄧 𑄃𑄞𑄨𑄡𑄧𑄌𑄨𑄖𑄮;

𑄈𑄚𑄴𑄙𑄙𑄧𑄖𑄪𑄤𑄤𑄖𑄴𑄗𑄧𑄚𑄁, 𑄃𑄛𑄴𑄛𑄤𑄖𑄴𑄖𑄁 𑄞𑄤𑄧𑄞𑄤𑄬’’𑄖𑄨.

𑄖𑄖𑄴𑄗 𑄈𑄚𑄴𑄙𑄙𑄧𑄖𑄪𑄤𑄤𑄖𑄴𑄗𑄧𑄚𑄚𑄴𑄖𑄨 𑄛𑄐𑄴𑄌𑄚𑄴𑄚𑄁 𑄈𑄚𑄴𑄙𑄧𑄚𑄁 𑄃𑄑𑄴𑄒𑄧𑄢𑄥𑄚𑄴𑄚𑄁 𑄙𑄧𑄖𑄫𑄚𑄁 𑄚𑄧𑄟𑄢𑄫𑄛𑄤𑄤𑄖𑄴𑄗𑄧𑄚𑄧𑄘𑄨𑄤𑄥𑄬𑄚 𑄤𑄨𑄞𑄧𑄉𑄇𑄢𑄕𑄁. 𑄥𑄞𑄧𑄤𑄣𑄇𑄴𑄈𑄕𑄥𑄧𑄟𑄐𑄴𑄐𑄣𑄇𑄴𑄈𑄕𑄧𑄘𑄨𑄤𑄥𑄬𑄚 𑄢𑄫𑄛𑄧𑄢𑄫𑄛𑄙𑄟𑄴𑄟𑄛𑄢𑄨𑄉𑄴𑄉𑄦𑄮 𑄈𑄚𑄴𑄙𑄙𑄧𑄖𑄪𑄤𑄤𑄖𑄴𑄗𑄧𑄚𑄁 𑄚𑄧𑄟. 𑄃𑄗 𑄤𑄧 𑄜𑄬𑄕𑄛𑄨𑄕𑄴𑄓𑄫𑄛𑄟𑄁 𑄢𑄫𑄛𑄁 𑄛𑄢𑄨𑄟𑄘𑄴𑄘𑄚𑄧𑄥𑄦𑄚𑄖𑄮 𑄍𑄨𑄘𑄴𑄘𑄧𑄤𑄍𑄨𑄘𑄴𑄘𑄧𑄘𑄨𑄞𑄧𑄤𑄖𑄮 𑄌 𑄅𑄘𑄇𑄛𑄪𑄝𑄴𑄝𑄪𑅄𑄇𑄁 𑄤𑄨𑄡 𑄤𑄬𑄘𑄚𑄧 𑄟𑄪𑄦𑄪𑄖𑄴𑄖𑄢𑄟𑄕𑄩𑄡𑄞𑄧𑄤𑄖𑄮, 𑄟𑄢𑄩𑄌𑄨𑄇𑄧 𑄤𑄨𑄡 𑄥𑄐𑄴𑄐𑄧 𑄤𑄨𑄛𑄴𑄛𑄣𑄟𑄴𑄞𑄚𑄖𑄮, 𑄇𑄘𑄣𑄨𑄇𑄴𑄈𑄚𑄴𑄙𑄮 𑄤𑄨𑄡 𑄥𑄋𑄴𑄈𑄧𑄢𑄧 𑄃𑄥𑄧𑄢𑄇𑄖𑄮, 𑄟𑄧𑄡𑄧 𑄤𑄨𑄡 𑄤𑄨𑄐𑄴𑄐𑄧𑄕𑄁 𑄤𑄐𑄴𑄌𑄚𑄇𑄖𑄮’’𑄖𑄨 𑄆𑄤𑄟𑄧𑄘𑄨𑄚𑄧𑄛𑄨 𑄚𑄡𑄬𑄚 𑄃𑄚𑄨𑄌𑄴𑄌𑄧𑄚𑄪𑄛𑄥𑄴𑄥𑄚𑄧𑄘𑄨𑄤𑄥𑄬𑄚𑄛𑄨 𑄈𑄚𑄴𑄙𑄙𑄧𑄖𑄪𑄤𑄤𑄖𑄴𑄗𑄧𑄚𑄁 𑄤𑄬𑄘𑄨𑄖𑄝𑄴𑄝𑄁 (𑄤𑄨𑄞. 𑄃𑄑𑄴𑄒. 𑄸𑄼 𑄇𑄟𑄧𑄘𑄨𑄤𑄨𑄚𑄨𑄌𑄴𑄍𑄡𑄇𑄗𑄧). 𑄃𑄛𑄴𑄛𑄤𑄖𑄴𑄖𑄁 𑄞𑄤𑄧𑄞𑄤𑄬𑄖𑄨 𑄆𑄖𑄴𑄗 𑄞𑄤𑄮𑄖𑄨 𑄤𑄓𑄴𑄔𑄨, 𑄃𑄞𑄤𑄮𑄖𑄨 𑄦𑄧𑄚𑄨. 𑄞𑄤𑄮𑄖𑄨 𑄥𑄥𑄴𑄥𑄖𑄘𑄨𑄑𑄴𑄒𑄨, 𑄃𑄞𑄤𑄮𑄖𑄨 𑄅𑄌𑄴𑄍𑄬𑄘𑄘𑄨𑄑𑄴𑄒𑄨. 𑄞𑄤𑄮𑄖𑄨 𑄈𑄪𑄘𑄴𑄘𑄇𑄞𑄤𑄮, 𑄃𑄞𑄤𑄮𑄖𑄨 𑄟𑄦𑄧𑄞𑄤𑄮. 𑄞𑄤𑄮𑄖𑄨 𑄇𑄧𑄟𑄞𑄤𑄮, 𑄃𑄞𑄤𑄮𑄖𑄨 𑄢𑄫𑄛𑄧𑄢𑄫𑄛𑄞𑄤𑄮𑄖𑄨 𑄆𑄤𑄟𑄧𑄘𑄨𑄚𑄧 𑄚𑄡𑄬𑄚 𑄞𑄤𑄧𑄞𑄤𑄧𑄚𑄁 𑄃𑄖𑄴𑄗𑄮 𑄤𑄬𑄘𑄨𑄖𑄝𑄴𑄝𑄮 (𑄟. 𑄚𑄨. 𑄃𑄑𑄴𑄒. 𑄸.𑄸𑄸𑄹; 𑄥𑄁. 𑄚𑄨. 𑄃𑄑𑄴𑄒. 𑄹.𑄻.𑄷𑄶𑄾𑄶; 𑄅𑄘𑄧. 𑄃𑄑𑄴𑄒. 𑄸𑄶). 𑄖𑄬𑄥𑄁 𑄞𑄤𑄧𑄞𑄤𑄧𑄚𑄁 𑄃𑄛𑄴𑄛𑄤𑄖𑄴𑄖𑄨𑄦𑄬𑄖𑄪𑄞𑄫𑄖𑄁 𑄙𑄟𑄴𑄟𑄁 𑄛𑄇𑄧𑄥𑄬𑄥𑄩𑄖𑄨 𑄃𑄖𑄴𑄗𑄮. 𑄃𑄗 𑄤𑄧 𑄞𑄤𑄖𑄨 𑄃𑄚𑄬𑄚𑄧𑄖𑄨 𑄞𑄤𑄮, 𑄖𑄩𑄥𑄪 𑄞𑄤𑄬𑄥𑄪 𑄅𑄛𑄴𑄛𑄖𑄴𑄖𑄨𑄚𑄨𑄟𑄨𑄖𑄴𑄖𑄁 𑄇𑄟𑄴𑄟𑄧𑄘𑄨𑄇𑄁. 𑄅𑄛𑄛𑄖𑄴𑄖𑄨𑄞𑄤𑄮 𑄃𑄞𑄤𑄮 𑄚𑄧𑄟. 𑄅𑄞𑄡𑄖𑄴𑄗 𑄚𑄨𑄇𑄚𑄴𑄖𑄨𑄡𑄧 𑄛𑄦𑄧𑄚𑄇𑄢𑄁 𑄃𑄛𑄴𑄛𑄤𑄖𑄴𑄖𑄁 𑄙𑄟𑄴𑄟𑄁 𑄘𑄬𑄥𑄬𑄥𑄩𑄖𑄨 𑄃𑄖𑄴𑄗𑄮. 𑄖𑄥𑄴𑄥 𑄛𑄚 𑄢𑄬𑄤𑄖𑄝𑄪𑄘𑄴𑄙𑄥𑄴𑄥 𑄖𑄡𑄮𑄤 𑄃𑄞𑄨𑄥𑄟𑄡𑄧 𑄃𑄦𑄬𑄥𑄪𑄁. 𑄛𑄒𑄟𑄮 𑄛𑄚𑄥𑄴𑄥 𑄉𑄕𑄚𑄛𑄗𑄁 𑄤𑄩𑄖𑄨𑄤𑄖𑄴𑄖𑄮. 𑄖𑄬𑄚 𑄤𑄪𑄖𑄴𑄖𑄁 –

𑄹. ‘‘𑄖𑄥𑄴𑄥𑄧𑄞𑄨𑄥𑄟𑄡𑄧 𑄖𑄩𑄕𑄨, 𑄃𑄦𑄬𑄥𑄪𑄁 𑄙𑄟𑄴𑄟𑄘𑄬𑄥𑄚𑄬;

𑄉𑄕𑄚𑄧𑄡 𑄚 𑄤𑄖𑄴𑄖𑄝𑄴𑄝𑄮, 𑄛𑄒𑄟𑄧𑄞𑄨𑄥𑄟𑄡𑄮 𑄃𑄦𑄫’’𑄖𑄨.

𑄖𑄖𑄴𑄗 𑄖𑄩𑄕𑄩𑄖𑄨 𑄖𑄡𑄮, 𑄣𑄨𑄋𑄴𑄉𑄤𑄨𑄛𑄣𑄴𑄣𑄧𑄥𑄮 𑄇𑄖𑄮, 𑄃𑄡𑄁 𑄛𑄒𑄟𑄮 𑄃𑄞𑄨𑄥𑄟𑄡𑄮 𑄃𑄦𑄮𑄥𑄨.

𑄃𑄗𑄧𑄛𑄢𑄬𑄚 𑄥𑄟𑄡𑄬𑄚 𑄚𑄉𑄢𑄪𑄖𑄴𑄖𑄢𑄬 𑄅𑄖𑄴𑄖𑄢𑄬 𑄚𑄉𑄢𑄬 𑄥𑄝𑄴𑄝𑄧𑄢𑄨𑄚𑄴𑄘𑄟𑄮 𑄃𑄢𑄨𑄚𑄴𑄘𑄟𑄮 𑄚𑄧𑄟 𑄢𑄧𑄎𑄧 𑄃𑄦𑄮𑄥𑄨. 𑄥𑄮 𑄇𑄨𑄢 𑄞𑄉𑄤𑄚𑄴𑄖𑄁 𑄃𑄖𑄴𑄖𑄚𑄮 𑄚𑄉𑄢𑄟𑄚𑄪𑄛𑄴𑄛𑄖𑄴𑄖𑄁 𑄥𑄪𑄖𑄴𑄤𑄧 𑄖𑄩𑄦𑄨 𑄎𑄚𑄇𑄮𑄑𑄩𑄦𑄨 𑄛𑄢𑄨𑄤𑄪𑄖𑄮 𑄞𑄉𑄤𑄖𑄮 𑄛𑄌𑄴𑄌𑄪𑄉𑄴𑄉𑄟𑄚𑄁 𑄇𑄖𑄴𑄤𑄧 𑄥𑄴𑄤𑄧𑄖𑄚𑄧𑄡 𑄚𑄨𑄟𑄚𑄴𑄖𑄬𑄖𑄴𑄤𑄧 𑄝𑄪𑄘𑄴𑄙𑄛𑄴𑄛𑄟𑄪𑄈𑄥𑄴𑄥 𑄞𑄨𑄇𑄴𑄈𑄪𑄥𑄋𑄴𑄊𑄥𑄴𑄥 𑄥𑄖𑄴𑄖𑄧𑄦𑄁 𑄟𑄦𑄧𑄘𑄧𑄚𑄁 𑄛𑄤𑄖𑄴𑄖𑄬𑄖𑄴𑄤𑄧 𑄖𑄨𑄉𑄧𑄤𑄪𑄖𑄤𑄨𑄖𑄴𑄗𑄖𑄁 𑄘𑄩𑄛𑄛𑄫𑄎𑄁 𑄇𑄖𑄴𑄤𑄧 𑄞𑄉𑄤𑄚𑄴𑄖𑄁 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄚𑄨𑄥𑄩𑄘𑄨. 𑄃𑄗 𑄞𑄉𑄤𑄧 𑄖𑄥𑄴𑄥 𑄟𑄚𑄮𑄚𑄪𑄇𑄫𑄣𑄁 𑄤𑄨𑄌𑄨𑄖𑄴𑄖𑄚𑄡𑄁 𑄙𑄟𑄴𑄟𑄁 𑄘𑄬𑄥𑄬𑄥𑄨. 𑄖𑄖𑄴𑄗 𑄘𑄬𑄤𑄟𑄚𑄪𑄥𑄴𑄥𑄧𑄚𑄁 𑄇𑄮𑄑𑄨𑄥𑄦𑄥𑄴𑄥𑄥𑄴𑄥 𑄘𑄪𑄖𑄨𑄡𑄧𑄞𑄨𑄥𑄟𑄡𑄮 𑄃𑄦𑄮𑄥𑄨. 𑄖𑄬𑄚 𑄤𑄪𑄖𑄴𑄖𑄁 –

𑄺. ‘‘𑄡𑄘𑄧 𑄃𑄢𑄨𑄚𑄴𑄘𑄟𑄁 𑄢𑄧𑄎𑄁, 𑄤𑄨𑄚𑄬𑄥𑄨 𑄢𑄬𑄤𑄖𑄮 𑄟𑄪𑄚𑄨;

𑄖𑄘𑄧 𑄇𑄮𑄑𑄨𑄥𑄦𑄥𑄴𑄥𑄧𑄚𑄁, 𑄘𑄪𑄖𑄨𑄡𑄧𑄞𑄨𑄥𑄟𑄡𑄮 𑄃𑄦𑄫’’𑄖𑄨.

𑄃𑄡𑄁 𑄘𑄪𑄖𑄨𑄡𑄮 𑄃𑄞𑄨𑄥𑄟𑄡𑄮.

𑄃𑄗𑄧𑄛𑄢𑄬𑄚 𑄥𑄟𑄡𑄬𑄚 𑄢𑄬𑄤𑄖𑄮 𑄥𑄖𑄴𑄗𑄧 𑄅𑄖𑄴𑄖𑄢𑄚𑄨𑄉𑄟𑄁 𑄚𑄧𑄟 𑄅𑄛𑄚𑄨𑄥𑄴𑄥𑄧𑄡 𑄤𑄨𑄦𑄢𑄚𑄴𑄖𑄮 𑄥𑄖𑄴𑄖𑄧𑄦𑄁 𑄚𑄨𑄢𑄮𑄙𑄥𑄟𑄧𑄛𑄖𑄴𑄖𑄨𑄁 𑄥𑄟𑄧𑄛𑄎𑄴𑄎𑄨𑄖𑄴𑄤𑄧 𑄚𑄨𑄥𑄩𑄘𑄨. 𑄖𑄘𑄧 𑄇𑄨𑄢 𑄅𑄖𑄴𑄖𑄢𑄚𑄨𑄉𑄟𑄤𑄧𑄥𑄨𑄚𑄮 𑄟𑄚𑄪𑄥𑄴𑄥𑄧 𑄡𑄧𑄉𑄪𑄞𑄖𑄴𑄖𑄈𑄎𑄴𑄎𑄇𑄞𑄬𑄥𑄎𑄴𑄎𑄛𑄧𑄚𑄇𑄧𑄘𑄩𑄚𑄨 𑄃𑄂𑄦𑄢𑄨𑄖𑄴𑄤𑄧 𑄞𑄨𑄇𑄴𑄈𑄪𑄥𑄋𑄴𑄊𑄥𑄴𑄥 𑄟𑄦𑄧𑄘𑄧𑄚𑄁 𑄘𑄖𑄴𑄤𑄧 𑄞𑄨𑄇𑄴𑄈𑄫 𑄛𑄢𑄨𑄛𑄪𑄌𑄴𑄍𑄨𑄁𑄥𑄪 – ‘‘𑄇𑄪𑄦𑄨𑄁, 𑄞𑄚𑄴𑄖𑄬, 𑄞𑄉𑄤𑄧’’𑄖𑄨? 𑄖𑄖𑄮 𑄖𑄬𑄥𑄁 𑄞𑄨𑄇𑄴𑄈𑄫 𑄃𑄂𑄦𑄁𑄥𑄪 – ‘‘𑄞𑄉𑄤𑄧, 𑄃𑄂𑄤𑄪𑄥𑄮, 𑄚𑄨𑄢𑄮𑄙𑄥𑄟𑄧𑄛𑄖𑄴𑄖𑄨𑄁 𑄥𑄟𑄧𑄛𑄚𑄴𑄚𑄮’’𑄖𑄨. 𑄃𑄗𑄧𑄖𑄩𑄖𑄬 𑄖𑄥𑄴𑄟𑄨𑄁 𑄥𑄖𑄴𑄖𑄧𑄦𑄬 𑄞𑄉𑄤𑄚𑄴𑄖𑄁 𑄚𑄨𑄢𑄮𑄙𑄥𑄟𑄧𑄛𑄖𑄴𑄖𑄨𑄖𑄮 𑄤𑄪𑄑𑄴𑄒𑄨𑄖𑄁 𑄥𑄢𑄘𑄥𑄟𑄡𑄬 𑄥𑄫𑄢𑄨𑄡𑄮 𑄤𑄨𑄡 𑄃𑄖𑄴𑄖𑄚𑄮 𑄃𑄚𑄫𑄛𑄟𑄧𑄡 𑄝𑄪𑄘𑄴𑄙𑄥𑄨𑄢𑄨𑄡𑄧 𑄤𑄨𑄢𑄮𑄌𑄟𑄧𑄚𑄁 𑄘𑄨𑄥𑄴𑄤𑄧 𑄚𑄨𑄢𑄮𑄙𑄥𑄟𑄧𑄛𑄖𑄴𑄖𑄨𑄡𑄧 𑄉𑄪𑄕𑄧𑄚𑄨𑄥𑄁𑄥𑄁 𑄛𑄪𑄌𑄴𑄍𑄨𑄁𑄥𑄪. 𑄞𑄉𑄤𑄧 𑄌 𑄖𑄬𑄥𑄁 𑄚𑄨𑄢𑄮𑄙𑄥𑄟𑄧𑄛𑄖𑄴𑄖𑄨𑄡𑄧 𑄉𑄪𑄕𑄧𑄚𑄨𑄥𑄁𑄥𑄁 𑄇𑄗𑄬𑄥𑄨. 𑄖𑄘𑄧 𑄘𑄬𑄤𑄟𑄚𑄪𑄥𑄴𑄥𑄧𑄚𑄁 𑄇𑄮𑄑𑄨𑄥𑄖𑄁 𑄃𑄢𑄦𑄖𑄴𑄖𑄬 𑄛𑄖𑄨𑄑𑄴𑄒𑄧𑄥𑄨. 𑄃𑄡𑄁 𑄖𑄖𑄨𑄡𑄮 𑄃𑄞𑄨𑄥𑄟𑄡𑄮 𑄃𑄦𑄮𑄥𑄨. 𑄖𑄬𑄚 𑄤𑄪𑄖𑄴𑄖𑄁 –

𑄻. ‘‘𑄥𑄖𑄴𑄖𑄧𑄦𑄁 𑄛𑄑𑄨𑄥𑄣𑄴𑄣𑄧𑄚𑄧, 𑄤𑄪𑄑𑄴𑄒𑄦𑄨𑄖𑄴𑄤𑄧 𑄚𑄢𑄧𑄥𑄞𑄮;

𑄇𑄮𑄑𑄨𑄥𑄖𑄁 𑄚𑄢𑄟𑄢𑄫𑄚𑄁, 𑄤𑄨𑄚𑄬𑄥𑄨 𑄅𑄖𑄴𑄖𑄟𑄬 𑄜𑄣𑄬’’𑄖𑄨.

𑄥𑄪𑄙𑄐𑄴𑄐𑄤𑄖𑄩𑄚𑄉𑄢𑄬 𑄛𑄒𑄟𑄟𑄦𑄧𑄛𑄧𑄖𑄨𑄟𑄮𑄇𑄴𑄈𑄪𑄘𑄴𑄘𑄬𑄥𑄬 𑄆𑄦𑄨𑄞𑄨𑄇𑄴𑄈𑄪𑄛𑄝𑄴𑄝𑄎𑄴𑄎𑄧𑄡 𑄛𑄝𑄴𑄝𑄎𑄨𑄖𑄧𑄚𑄁 𑄃𑄢𑄦𑄚𑄴𑄖𑄧𑄚𑄁 𑄉𑄕𑄚𑄛𑄗𑄁 𑄤𑄩𑄖𑄨𑄤𑄖𑄴𑄖𑄧𑄚𑄁 𑄛𑄒𑄟𑄮 𑄥𑄚𑄴𑄚𑄨𑄛𑄧𑄖𑄮 𑄃𑄦𑄮𑄥𑄨. 𑄟𑄬𑄈𑄣𑄚𑄉𑄢𑄬 𑄇𑄮𑄑𑄨𑄥𑄖𑄥𑄦𑄥𑄴𑄥𑄥𑄋𑄴𑄈𑄧𑄖𑄧𑄚𑄁 𑄆𑄦𑄨𑄞𑄨𑄇𑄴𑄈𑄪𑄛𑄝𑄴𑄝𑄎𑄴𑄎𑄧𑄡 𑄛𑄝𑄴𑄝𑄎𑄨𑄖𑄧𑄚𑄁 𑄃𑄢𑄦𑄚𑄴𑄖𑄧𑄚𑄁 𑄘𑄪𑄖𑄨𑄡𑄮 𑄥𑄚𑄴𑄚𑄨𑄛𑄧𑄖𑄮 𑄃𑄦𑄮𑄥𑄨. 𑄢𑄬𑄤𑄖𑄥𑄴𑄥 𑄛𑄚 𑄞𑄉𑄤𑄖𑄮 𑄙𑄟𑄴𑄟𑄌𑄇𑄴𑄇𑄧𑄚𑄪𑄤𑄖𑄴𑄖𑄇𑄮 𑄤𑄢𑄪𑄕𑄮 𑄚𑄧𑄟 𑄃𑄉𑄴𑄉𑄥𑄧𑄤𑄇𑄮 𑄛𑄐𑄴𑄐𑄤𑄚𑄴𑄖𑄧𑄚𑄁 𑄃𑄉𑄴𑄉𑄮 𑄃𑄂𑄝𑄧𑄙𑄨𑄇𑄮 𑄃𑄦𑄮𑄥𑄨. 𑄖𑄖𑄴𑄗 𑄉𑄨𑄣𑄧𑄚𑄛𑄪𑄌𑄴𑄍𑄚𑄖𑄴𑄗𑄧𑄡 𑄥𑄟𑄴𑄛𑄖𑄴𑄖𑄟𑄦𑄧𑄎𑄚𑄥𑄴𑄥 𑄣𑄇𑄴𑄈𑄕𑄖𑄴𑄖𑄡𑄛𑄢𑄨𑄘𑄩𑄛𑄇𑄁 𑄙𑄟𑄴𑄟𑄁 𑄘𑄬𑄥𑄬𑄖𑄴𑄤𑄧 𑄇𑄮𑄑𑄨𑄥𑄖𑄥𑄦𑄥𑄴𑄥𑄁 𑄛𑄪𑄢𑄨𑄥𑄧𑄚𑄁 𑄆𑄦𑄨𑄞𑄨𑄇𑄴𑄈𑄪𑄛𑄝𑄴𑄝𑄎𑄴𑄎𑄧𑄡 𑄛𑄝𑄴𑄝𑄧𑄎𑄬𑄖𑄴𑄤𑄧 𑄃𑄢𑄦𑄖𑄴𑄖𑄬 𑄛𑄖𑄨𑄑𑄴𑄒𑄧𑄛𑄬𑄖𑄴𑄤𑄧 𑄌𑄖𑄪𑄢𑄋𑄴𑄉𑄨𑄚𑄨𑄇𑄬 𑄥𑄚𑄴𑄚𑄨𑄛𑄧𑄖𑄬 𑄛𑄧𑄖𑄨𑄟𑄮𑄇𑄴𑄈𑄁 𑄅𑄘𑄴𑄘𑄨𑄥𑄨. 𑄃𑄡𑄁 𑄖𑄖𑄨𑄡𑄮 𑄥𑄚𑄴𑄚𑄨𑄛𑄧𑄖𑄮 𑄃𑄦𑄮𑄥𑄨. 𑄖𑄬𑄚 𑄤𑄪𑄖𑄴𑄖𑄁 –

𑄼. ‘‘𑄥𑄚𑄴𑄚𑄨𑄛𑄧𑄖𑄧 𑄖𑄡𑄮 𑄃𑄂𑄥𑄪𑄁, 𑄢𑄬𑄤𑄖𑄥𑄴𑄥 𑄟𑄦𑄬𑄥𑄨𑄚𑄮;

𑄈𑄩𑄕𑄧𑄥𑄤𑄧𑄚𑄁 𑄤𑄨𑄟𑄣𑄧𑄚𑄁, 𑄥𑄪𑄤𑄨𑄟𑄪𑄖𑄴𑄖𑄧𑄚 𑄖𑄧𑄘𑄨𑄚𑄁.

𑄽. ‘‘𑄃𑄖𑄨𑄇𑄴𑄇𑄚𑄴𑄖𑄧 𑄉𑄕𑄚𑄛𑄗𑄁, 𑄛𑄒𑄟𑄁 𑄡𑄬 𑄥𑄟𑄧𑄉𑄖𑄧;

𑄇𑄮𑄑𑄨𑄥𑄖𑄥𑄦𑄥𑄴𑄥𑄧𑄚𑄁, 𑄘𑄪𑄖𑄨𑄡𑄮 𑄃𑄂𑄥𑄨 𑄥𑄟𑄧𑄉𑄟𑄮.

𑄾. ‘‘𑄡𑄮𑄛𑄨 𑄛𑄐𑄴𑄐𑄧𑄡 𑄃𑄥𑄟𑄮, 𑄖𑄥𑄴𑄥 𑄌𑄇𑄴𑄇𑄧𑄚𑄪𑄤𑄖𑄴𑄖𑄇𑄮;

𑄥𑄮 𑄖𑄘𑄧 𑄝𑄴𑄡𑄧𑄙𑄨𑄖𑄮 𑄃𑄂𑄥𑄨, 𑄛𑄖𑄴𑄖𑄮 𑄎𑄩𑄤𑄨𑄖𑄥𑄁𑄥𑄡𑄁.

𑄿. ‘‘𑄖𑄥𑄴𑄥 𑄉𑄨𑄣𑄧𑄚𑄛𑄪𑄌𑄴𑄍𑄧𑄡, 𑄡𑄬 𑄖𑄘𑄧 𑄅𑄛𑄉𑄖𑄧 𑄟𑄪𑄚𑄩;

𑄇𑄮𑄑𑄨𑄥𑄖𑄥𑄦𑄥𑄴𑄥𑄧 𑄃𑄢𑄦𑄚𑄴𑄖𑄮, 𑄖𑄖𑄨𑄡𑄮 𑄃𑄂𑄥𑄨 𑄥𑄟𑄧𑄉𑄟𑄮’’𑄖𑄨.

𑄖𑄖𑄴𑄗 𑄌𑄇𑄴𑄇𑄧𑄚𑄪𑄤𑄖𑄴𑄖𑄇𑄮𑄖𑄨 𑄙𑄟𑄴𑄟𑄌𑄇𑄴𑄇𑄧𑄚𑄪𑄤𑄖𑄴𑄖𑄇𑄮. 𑄛𑄖𑄴𑄖𑄮 𑄎𑄩𑄤𑄨𑄖𑄥𑄁𑄥𑄡𑄚𑄴𑄖𑄨 𑄆𑄖𑄴𑄗 𑄎𑄩𑄤𑄨𑄖𑄬 𑄥𑄁𑄥𑄡𑄁 𑄎𑄩𑄤𑄨𑄖𑄥𑄁𑄥𑄡𑄁, 𑄎𑄩𑄤𑄨𑄖𑄇𑄴𑄈𑄡𑄁 𑄛𑄧𑄛𑄪𑄕𑄧𑄖𑄨 𑄤𑄧, 𑄚 𑄤𑄧 𑄛𑄧𑄛𑄪𑄕𑄧𑄖𑄩𑄖𑄨 𑄆𑄤𑄁 𑄎𑄩𑄤𑄨𑄖𑄥𑄁𑄥𑄡𑄁 𑄛𑄖𑄴𑄖𑄮, 𑄝𑄴𑄡𑄧𑄙𑄨𑄖𑄥𑄴𑄥 𑄝𑄣𑄤𑄞𑄧𑄤𑄬𑄚 𑄟𑄢𑄖𑄨, 𑄚 𑄟𑄢𑄖𑄩𑄖𑄨 𑄎𑄩𑄤𑄨𑄖𑄬 𑄥𑄁𑄥𑄡𑄁 𑄛𑄖𑄴𑄖𑄮𑄖𑄨 𑄃𑄖𑄴𑄗𑄮. 𑄡𑄬 𑄖𑄘𑄧 𑄅𑄛𑄉𑄖𑄧 𑄟𑄪𑄚𑄩𑄖𑄨 𑄄𑄖𑄨 𑄘𑄩𑄊𑄞𑄧𑄤𑄬 𑄥𑄖𑄨 𑄞𑄨𑄇𑄴𑄈𑄫𑄚𑄁 𑄅𑄛𑄢𑄨 𑄦𑄮𑄖𑄨, 𑄢𑄥𑄴𑄥𑄬 𑄃𑄚𑄪𑄥𑄴𑄥𑄢𑄬𑄚 𑄥𑄘𑄴𑄙𑄨𑄁 𑄤𑄢𑄪𑄕𑄥𑄴𑄥 𑄅𑄛𑄢𑄨 𑄦𑄮𑄖𑄨.

𑄖𑄘𑄧 𑄃𑄟𑄴𑄦𑄧𑄇𑄁 𑄝𑄮𑄙𑄨𑄥𑄖𑄴𑄖𑄮 𑄢𑄟𑄴𑄟𑄤𑄖𑄩𑄚𑄉𑄢𑄬 𑄃𑄖𑄨𑄘𑄬𑄤𑄮 𑄚𑄧𑄟 𑄝𑄴𑄢𑄧𑄦𑄴𑄟𑄕𑄮 𑄦𑄪𑄖𑄴𑄤𑄧 𑄝𑄴𑄢𑄧𑄦𑄴𑄟𑄕𑄙𑄟𑄴𑄟𑄬 𑄛𑄧𑄢𑄁 𑄉𑄖𑄮 𑄢𑄬𑄤𑄖𑄁 𑄥𑄟𑄴𑄟𑄧𑄥𑄟𑄴𑄝𑄪𑄘𑄴𑄙𑄁 𑄘𑄨𑄥𑄴𑄤𑄧 𑄖𑄥𑄴𑄥 𑄙𑄟𑄴𑄟𑄇𑄗𑄁 𑄥𑄪𑄖𑄴𑄤𑄧 𑄥𑄢𑄕𑄬𑄥𑄪 𑄛𑄖𑄨𑄑𑄴𑄒𑄧𑄡 𑄥𑄨𑄣𑄮𑄇𑄥𑄦𑄥𑄴𑄥𑄬𑄚 𑄘𑄥𑄝𑄣𑄁 𑄇𑄨𑄖𑄴𑄖𑄬𑄖𑄴𑄤𑄧 𑄥𑄦𑄥𑄴𑄥𑄉𑄴𑄊𑄚𑄨𑄇𑄬𑄚 𑄅𑄖𑄴𑄖𑄢𑄧𑄥𑄋𑄴𑄉𑄬𑄚 𑄞𑄉𑄤𑄚𑄴𑄖𑄁 𑄛𑄫𑄎𑄬𑄥𑄨. 𑄥𑄮𑄛𑄨 𑄚𑄁 𑄝𑄪𑄘𑄴𑄙𑄮 𑄝𑄴𑄡𑄧𑄇𑄧𑄥𑄨 – ‘‘𑄄𑄖𑄮 𑄇𑄛𑄴𑄛𑄥𑄖𑄥𑄦𑄥𑄴𑄥𑄧𑄙𑄨𑄇𑄧𑄚𑄁 𑄘𑄴𑄤𑄨𑄚𑄴𑄚𑄁 𑄃𑄥𑄋𑄴𑄈𑄴𑄡𑄬𑄡𑄴𑄡𑄧𑄚𑄁 𑄟𑄖𑄴𑄗𑄇𑄬 𑄉𑄮𑄖𑄟𑄮 𑄚𑄧𑄟 𑄝𑄪𑄘𑄴𑄙𑄮 𑄞𑄤𑄨𑄥𑄴𑄥𑄖𑄩’’𑄖𑄨. 𑄖𑄬𑄚 𑄤𑄪𑄖𑄴𑄖𑄁 –

𑄷𑄶. ‘‘𑄃𑄦𑄁 𑄖𑄬𑄚 𑄥𑄟𑄡𑄬𑄚, 𑄃𑄖𑄨𑄘𑄬𑄤𑄮 𑄚𑄧𑄟 𑄝𑄴𑄢𑄧𑄦𑄴𑄟𑄕𑄮;

𑄅𑄛𑄉𑄚𑄴𑄖𑄴𑄤𑄧 𑄢𑄬𑄤𑄖𑄁 𑄝𑄪𑄘𑄴𑄙𑄁, 𑄥𑄢𑄕𑄁 𑄖𑄥𑄴𑄥 𑄉𑄐𑄴𑄍𑄦𑄁.

𑄷𑄷. ‘‘𑄖𑄥𑄴𑄥 𑄥𑄩𑄣𑄁 𑄥𑄟𑄧𑄙𑄨𑄐𑄴𑄌, 𑄛𑄐𑄴𑄐𑄧𑄉𑄪𑄕𑄟𑄚𑄪𑄖𑄴𑄖𑄟𑄁;

𑄗𑄮𑄟𑄡𑄨𑄖𑄴𑄤𑄧 𑄡𑄗𑄧𑄗𑄧𑄟𑄁, 𑄅𑄖𑄴𑄖𑄢𑄩𑄡𑄟𑄘𑄧𑄥𑄦𑄁.

𑄷𑄸. ‘‘𑄥𑄮𑄛𑄨 𑄟𑄁 𑄝𑄪𑄘𑄴𑄙𑄮 𑄝𑄴𑄡𑄧𑄇𑄧𑄥𑄨, 𑄢𑄬𑄤𑄖𑄮 𑄣𑄮𑄇𑄚𑄧𑄡𑄇𑄮;

𑄃𑄛𑄢𑄨𑄟𑄬𑄡𑄴𑄡𑄨𑄖𑄮 𑄇𑄛𑄴𑄛𑄬, 𑄃𑄡𑄁 𑄝𑄪𑄘𑄴𑄙𑄮 𑄞𑄤𑄨𑄥𑄴𑄥𑄖𑄨.

𑄷𑄹. ‘𑄛𑄙𑄧𑄚𑄁 𑄛𑄘𑄦𑄨𑄖𑄴𑄤𑄧𑄚…𑄛𑄬… 𑄦𑄬𑄥𑄴𑄥𑄧𑄟 𑄥𑄟𑄴𑄟𑄪𑄈𑄧 𑄄𑄟’’’𑄚𑄴𑄖𑄨. –

𑄃𑄑𑄴𑄒 𑄉𑄧𑄗𑄧 𑄤𑄨𑄖𑄴𑄗𑄧𑄢𑄬𑄖𑄝𑄴𑄝𑄧.

𑄷𑄺. ‘‘𑄖𑄥𑄴𑄥𑄧𑄛𑄨 𑄤𑄌𑄚𑄁 𑄥𑄪𑄖𑄴𑄤𑄧, 𑄞𑄨𑄡𑄴𑄡𑄮 𑄌𑄨𑄖𑄴𑄖𑄁 𑄛𑄥𑄧𑄘𑄡𑄨𑄁;

𑄅𑄖𑄴𑄖𑄢𑄨𑄁 𑄤𑄖𑄟𑄙𑄨𑄑𑄴𑄒𑄧𑄥𑄨𑄁, 𑄘𑄥𑄛𑄧𑄢𑄟𑄨𑄛𑄫𑄢𑄨𑄡𑄧.

𑄷𑄻. ‘‘𑄖𑄘𑄧𑄛𑄨 𑄖𑄁 𑄝𑄪𑄘𑄴𑄙𑄙𑄟𑄴𑄟𑄁, 𑄥𑄢𑄨𑄖𑄴𑄤𑄧 𑄃𑄚𑄪𑄝𑄴𑄢𑄫𑄦𑄡𑄨𑄁;

𑄃𑄂𑄦𑄢𑄨𑄥𑄴𑄥𑄧𑄟𑄨 𑄖𑄁 𑄙𑄟𑄴𑄟𑄁, 𑄡𑄁 𑄟𑄡𑄴𑄦𑄁 𑄃𑄞𑄨𑄛𑄖𑄴𑄗𑄨𑄖’’𑄚𑄴𑄖𑄨.

𑄖𑄖𑄴𑄗 𑄥𑄢𑄕𑄁 𑄖𑄥𑄴𑄥 𑄉𑄐𑄴𑄍𑄦𑄚𑄴𑄖𑄨 𑄖𑄁 𑄥𑄢𑄕𑄁 𑄃𑄉𑄐𑄴𑄍𑄨𑄁 𑄃𑄦𑄁, 𑄅𑄛𑄡𑄮𑄉𑄖𑄴𑄗𑄬 𑄥𑄧𑄟𑄨𑄤𑄌𑄚𑄁. 𑄛𑄐𑄴𑄐𑄧𑄉𑄪𑄕𑄚𑄴𑄖𑄨 𑄛𑄐𑄴𑄐𑄧𑄥𑄟𑄴𑄛𑄖𑄴𑄖𑄨𑄁. 𑄃𑄚𑄪𑄖𑄴𑄖𑄟𑄚𑄴𑄖𑄨 𑄥𑄬𑄑𑄴𑄒𑄁. ‘‘𑄛𑄐𑄴𑄐𑄧𑄤𑄨𑄟𑄪𑄖𑄴𑄖𑄨𑄉𑄪𑄕𑄟𑄪𑄖𑄴𑄖𑄟’’𑄚𑄴𑄖𑄨𑄛𑄨 𑄛𑄧𑄒𑄮, 𑄥𑄮 𑄅𑄖𑄴𑄖𑄧𑄚𑄮𑄤. 𑄗𑄮𑄟𑄡𑄨𑄖𑄴𑄤𑄧𑄖𑄨 𑄗𑄮𑄟𑄬𑄖𑄴𑄤𑄧 𑄤𑄕𑄴𑄕𑄡𑄨𑄖𑄴𑄤𑄧. 𑄡𑄗𑄧𑄗𑄧𑄟𑄚𑄴𑄖𑄨 𑄡𑄗𑄧𑄝𑄣𑄁. 𑄅𑄖𑄴𑄖𑄢𑄩𑄡𑄚𑄴𑄖𑄨 𑄅𑄖𑄴𑄖𑄢𑄧𑄥𑄋𑄴𑄉𑄁. 𑄃𑄘𑄧𑄥𑄦𑄚𑄴𑄖𑄨 𑄃𑄘𑄧𑄥𑄨𑄁 𑄃𑄦𑄁. 𑄝𑄪𑄘𑄴𑄙𑄙𑄟𑄴𑄟𑄚𑄴𑄖𑄨 𑄝𑄪𑄘𑄴𑄙𑄞𑄧𑄤𑄇𑄢𑄁 𑄙𑄟𑄴𑄟𑄁, 𑄛𑄧𑄢𑄟𑄩𑄙𑄟𑄴𑄟𑄚𑄴𑄖𑄨 𑄃𑄖𑄴𑄗𑄮. 𑄥𑄢𑄨𑄖𑄴𑄤𑄧𑄖𑄨 𑄃𑄚𑄪𑄥𑄴𑄥𑄢𑄨𑄖𑄴𑄤𑄧. 𑄃𑄚𑄪𑄝𑄴𑄢𑄫𑄦𑄡𑄨𑄚𑄴𑄖𑄨 𑄃𑄞𑄨𑄤𑄓𑄴𑄔𑄬𑄥𑄨𑄁. 𑄃𑄂𑄦𑄢𑄨𑄥𑄴𑄥𑄧𑄟𑄩𑄖𑄨 𑄃𑄂𑄚𑄡𑄨𑄥𑄴𑄥𑄧𑄟𑄨. 𑄖𑄁 𑄙𑄟𑄴𑄟𑄚𑄴𑄖𑄨 𑄖𑄁 𑄝𑄪𑄘𑄴𑄙𑄖𑄴𑄖𑄁. 𑄡𑄁 𑄟𑄡𑄴𑄦𑄁 𑄃𑄞𑄨𑄛𑄖𑄴𑄗𑄨𑄖𑄚𑄴𑄖𑄨 𑄡𑄁 𑄟𑄡𑄧 𑄃𑄞𑄨𑄛𑄖𑄴𑄗𑄨𑄖𑄁 𑄝𑄪𑄘𑄴𑄙𑄖𑄴𑄖𑄁, 𑄖𑄁 𑄃𑄂𑄦𑄢𑄨𑄥𑄴𑄥𑄧𑄟𑄩𑄖𑄨 𑄃𑄖𑄴𑄗𑄮.

𑄖𑄥𑄴𑄥 𑄛𑄚 𑄢𑄬𑄤𑄖𑄥𑄴𑄥 𑄞𑄉𑄤𑄖𑄮 𑄚𑄉𑄢𑄁 𑄥𑄪𑄙𑄐𑄴𑄐𑄤𑄖𑄩 𑄚𑄧𑄟 𑄃𑄦𑄮𑄥𑄨, 𑄛𑄨𑄖𑄧 𑄤𑄨𑄛𑄪𑄣𑄮 𑄚𑄧𑄟 𑄈𑄖𑄴𑄖𑄨𑄡𑄮, 𑄟𑄧𑄖𑄧 𑄤𑄨𑄛𑄪𑄣𑄧 𑄚𑄧𑄟, 𑄤𑄢𑄪𑄕𑄮 𑄌 𑄝𑄴𑄢𑄦𑄴𑄟𑄘𑄬𑄤𑄮 𑄌 𑄘𑄴𑄤𑄬 𑄃𑄉𑄴𑄉𑄥𑄧𑄤𑄇𑄧, 𑄥𑄟𑄴𑄞𑄤𑄮 𑄚𑄧𑄟 𑄅𑄛𑄑𑄴𑄒𑄧𑄇𑄮, 𑄞𑄘𑄴𑄘𑄧 𑄌 𑄥𑄪𑄞𑄘𑄴𑄘𑄧 𑄌 𑄘𑄴𑄤𑄬 𑄃𑄉𑄴𑄉𑄥𑄧𑄤𑄨𑄇𑄧, 𑄚𑄧𑄉𑄢𑄪𑄇𑄴𑄈𑄮 𑄝𑄮𑄙𑄨, 𑄥𑄢𑄩𑄢𑄁 𑄃𑄥𑄩𑄖𑄨𑄦𑄖𑄴𑄗𑄪𑄝𑄴𑄝𑄬𑄙𑄁 𑄃𑄦𑄮𑄥𑄨, 𑄃𑄂𑄡𑄪 𑄥𑄑𑄴𑄒𑄨𑄤𑄥𑄴𑄥𑄥𑄦𑄥𑄴𑄥𑄧𑄚𑄨, 𑄥𑄪𑄘𑄥𑄴𑄥𑄚𑄧 𑄚𑄧𑄟 𑄃𑄉𑄴𑄉𑄟𑄦𑄬𑄥𑄩, 𑄤𑄢𑄪𑄕𑄮 𑄚𑄧𑄟 𑄛𑄪𑄖𑄴𑄖𑄮, 𑄃𑄂𑄎𑄐𑄴𑄐𑄢𑄗𑄬𑄚 𑄚𑄨𑄇𑄴𑄈𑄟𑄨.

‘‘𑄖𑄥𑄴𑄥 𑄘𑄬𑄦𑄧𑄞𑄨𑄚𑄨𑄇𑄴𑄈𑄚𑄴𑄖𑄁, 𑄛𑄞𑄧𑄎𑄧𑄣𑄟𑄚𑄪𑄖𑄴𑄖𑄢𑄁;

𑄘𑄨𑄤𑄧 𑄌𑄬𑄤 𑄖𑄘𑄧 𑄢𑄖𑄴𑄖𑄨𑄁, 𑄚𑄨𑄌𑄴𑄌𑄁 𑄜𑄢𑄖𑄨 𑄡𑄮𑄎𑄚𑄁.

‘‘𑄙𑄧𑄖𑄪𑄡𑄮 𑄟𑄟 𑄥𑄝𑄴𑄝𑄧𑄛𑄨, 𑄤𑄨𑄇𑄨𑄢𑄚𑄴𑄖𑄫𑄖𑄨 𑄥𑄮 𑄎𑄨𑄚𑄮;

𑄃𑄙𑄨𑄑𑄴𑄒𑄧𑄥𑄨 𑄟𑄦𑄧𑄤𑄩𑄢𑄮, 𑄥𑄝𑄴𑄝𑄥𑄖𑄴𑄖𑄧𑄚𑄪𑄇𑄟𑄴𑄛𑄇𑄮.

‘‘𑄟𑄦𑄧𑄚𑄧𑄉𑄤𑄚𑄪𑄡𑄴𑄡𑄧𑄚𑄬, 𑄟𑄦𑄖𑄮 𑄚𑄉𑄢𑄥𑄴𑄥 𑄥𑄮;

𑄛𑄫𑄎𑄨𑄖𑄮 𑄚𑄢𑄟𑄢𑄫𑄦𑄨, 𑄛𑄢𑄨𑄚𑄨𑄝𑄴𑄝𑄧𑄡𑄨 𑄢𑄬𑄤𑄖𑄮’’𑄖𑄨.

𑄖𑄬𑄚 𑄤𑄪𑄖𑄴𑄖𑄁 –

𑄷𑄼. ‘‘𑄚𑄉𑄢𑄁 𑄥𑄪𑄙𑄐𑄴𑄐𑄤𑄖𑄩 𑄚𑄧𑄟, 𑄤𑄨𑄛𑄪𑄣𑄮 𑄚𑄧𑄟 𑄈𑄖𑄴𑄖𑄨𑄡𑄮;

𑄤𑄨𑄛𑄪𑄣𑄧 𑄚𑄧𑄟 𑄎𑄚𑄨𑄇𑄧, 𑄢𑄬𑄤𑄖𑄥𑄴𑄥 𑄟𑄦𑄬𑄥𑄨𑄚𑄮.

𑄸𑄷. ‘‘𑄤𑄢𑄪𑄕𑄮 𑄝𑄴𑄢𑄦𑄴𑄟𑄘𑄬𑄤𑄮 𑄌, 𑄃𑄦𑄬𑄥𑄪𑄁 𑄃𑄉𑄴𑄉𑄥𑄧𑄤𑄇𑄧;

𑄥𑄟𑄴𑄞𑄤𑄮 𑄚𑄧𑄟𑄪𑄛𑄑𑄴𑄒𑄧𑄇𑄮, 𑄢𑄬𑄤𑄖𑄥𑄴𑄥 𑄟𑄦𑄬𑄥𑄨𑄚𑄮.

𑄸𑄸. ‘‘𑄞𑄘𑄴𑄘𑄧 𑄌𑄬𑄤 𑄥𑄪𑄞𑄘𑄴𑄘𑄧 𑄌, 𑄃𑄦𑄬𑄥𑄪𑄁 𑄃𑄉𑄴𑄉𑄥𑄧𑄤𑄨𑄇𑄧;

𑄥𑄮𑄛𑄨 𑄝𑄪𑄘𑄴𑄙𑄮 𑄃𑄥𑄟𑄥𑄟𑄮, 𑄚𑄧𑄉𑄟𑄫𑄣𑄬 𑄃𑄝𑄪𑄎𑄴𑄏𑄗.

𑄸𑄹. ‘‘𑄛𑄘𑄪𑄟𑄮 𑄇𑄪𑄐𑄴𑄎𑄢𑄮 𑄌𑄬𑄤, 𑄃𑄦𑄬𑄥𑄪𑄁 𑄃𑄉𑄴𑄉𑄪𑄛𑄑𑄴𑄒𑄇𑄧;

𑄥𑄨𑄢𑄨𑄟𑄧 𑄌𑄬𑄤 𑄡𑄥𑄤𑄖𑄩, 𑄃𑄦𑄬𑄥𑄪𑄁 𑄃𑄉𑄴𑄉𑄪𑄛𑄑𑄴𑄒𑄨𑄇𑄧.

𑄸𑄺. ‘‘𑄅𑄌𑄴𑄌𑄖𑄴𑄖𑄚𑄬𑄚 𑄥𑄮 𑄝𑄪𑄘𑄴𑄙𑄮, 𑄃𑄥𑄩𑄖𑄨𑄦𑄖𑄴𑄗𑄟𑄪𑄉𑄴𑄉𑄖𑄮;

𑄃𑄮𑄞𑄧𑄥𑄬𑄖𑄨 𑄘𑄨𑄥𑄧 𑄥𑄝𑄴𑄝𑄧, 𑄄𑄚𑄴𑄘𑄇𑄬𑄖𑄪𑄤 𑄅𑄉𑄴𑄉𑄖𑄮.

𑄸𑄻. ‘‘𑄖𑄥𑄴𑄥 𑄥𑄢𑄩𑄢𑄬 𑄚𑄨𑄝𑄴𑄝𑄖𑄴𑄖𑄧, 𑄛𑄞𑄧𑄟𑄧𑄣𑄧 𑄃𑄚𑄪𑄖𑄴𑄖𑄢𑄧;

𑄘𑄨𑄤𑄧 𑄤𑄧 𑄡𑄘𑄨 𑄤𑄧 𑄢𑄖𑄴𑄖𑄨𑄁, 𑄥𑄟𑄚𑄴𑄖𑄧 𑄜𑄢𑄖𑄨 𑄡𑄮𑄎𑄚𑄁.

𑄸𑄼. ‘‘𑄥𑄑𑄴𑄒𑄨𑄤𑄥𑄴𑄥𑄥𑄦𑄥𑄴𑄥𑄧𑄚𑄨, 𑄃𑄂𑄡𑄪 𑄤𑄨𑄎𑄴𑄎𑄖𑄨 𑄖𑄧𑄤𑄘𑄬;

𑄖𑄧𑄤𑄖𑄧 𑄘𑄨𑄑𑄴𑄒𑄟𑄧𑄚𑄮 𑄥𑄮, 𑄖𑄧𑄢𑄬𑄥𑄨 𑄎𑄚𑄖𑄁 𑄝𑄦𑄪𑄁.

𑄸𑄽. ‘‘𑄘𑄥𑄴𑄥𑄡𑄨𑄖𑄴𑄤𑄧 𑄝𑄪𑄘𑄴𑄙𑄝𑄣𑄁 𑄃𑄟𑄖𑄁 𑄣𑄮𑄇𑄬 𑄛𑄇𑄧𑄥𑄡𑄁;

𑄚𑄨𑄝𑄴𑄝𑄧𑄡𑄨 𑄃𑄚𑄪𑄛𑄧𑄘𑄧𑄚𑄮, 𑄡𑄗𑄉𑄴𑄉𑄪𑄛𑄧𑄘𑄧𑄚𑄥𑄋𑄴𑄈𑄡𑄧.

𑄸𑄾. ‘‘𑄥𑄮 𑄌 𑄇𑄧𑄡𑄮 𑄢𑄖𑄚𑄚𑄨𑄞𑄮, 𑄥𑄮 𑄌 𑄙𑄟𑄴𑄟𑄮 𑄃𑄥𑄧𑄘𑄨𑄥𑄮;

𑄥𑄝𑄴𑄝𑄁 𑄖𑄟𑄚𑄴𑄖𑄢𑄦𑄨𑄖𑄁, 𑄚𑄚𑄪 𑄢𑄨𑄖𑄴𑄖𑄧 𑄥𑄝𑄴𑄝𑄥𑄋𑄴𑄈𑄧𑄢𑄧’’𑄖𑄨.

𑄖𑄖𑄴𑄗 𑄃𑄮𑄞𑄧𑄥𑄬𑄖𑄩𑄖𑄨 𑄛𑄇𑄧𑄥𑄡𑄖𑄨. 𑄅𑄉𑄴𑄉𑄖𑄮𑄖𑄨 𑄅𑄥𑄴𑄥𑄨𑄖𑄮. 𑄛𑄞𑄧𑄟𑄧𑄣𑄧𑄖𑄨 𑄛𑄞𑄧𑄤𑄬𑄣𑄧. 𑄡𑄗𑄉𑄴𑄉𑄩𑄖𑄨 𑄃𑄉𑄴𑄉𑄨 𑄤𑄨𑄡. 𑄅𑄛𑄧𑄘𑄧𑄚𑄥𑄋𑄴𑄈𑄡𑄧𑄖𑄨 𑄄𑄚𑄴𑄙𑄚𑄇𑄴𑄈𑄡𑄧. 𑄥𑄮 𑄌 𑄇𑄧𑄡𑄮 𑄢𑄖𑄚𑄚𑄨𑄞𑄮𑄖𑄨 𑄥𑄮 𑄌 𑄖𑄥𑄴𑄥 𑄞𑄉𑄤𑄖𑄮 𑄇𑄧𑄡𑄮 𑄥𑄪𑄤𑄕𑄴𑄕𑄤𑄕𑄴𑄕𑄮. ‘‘𑄖𑄐𑄴𑄌 𑄇𑄧𑄡𑄁 𑄢𑄖𑄚𑄚𑄨𑄞’’𑄚𑄴𑄖𑄨𑄛𑄨 𑄛𑄧𑄒𑄮, 𑄣𑄨𑄋𑄴𑄉𑄤𑄨𑄛𑄣𑄴𑄣𑄧𑄥𑄬𑄚 𑄤𑄪𑄖𑄴𑄖𑄁. 𑄥𑄮𑄡𑄬𑄤 𑄛𑄚𑄥𑄴𑄥𑄖𑄴𑄗𑄮. 𑄥𑄬𑄥𑄉𑄧𑄗𑄧𑄥𑄪 𑄥𑄝𑄴𑄝𑄖𑄴𑄗 𑄅𑄖𑄴𑄖𑄧𑄚𑄟𑄬𑄤𑄧𑄖𑄨.

𑄢𑄬𑄤𑄖𑄝𑄪𑄘𑄴𑄙𑄤𑄁𑄥𑄤𑄕𑄴𑄕𑄚𑄧 𑄚𑄨𑄑𑄴𑄒𑄨𑄖𑄧.

𑄚𑄨𑄑𑄴𑄒𑄨𑄖𑄮 𑄛𑄐𑄴𑄌𑄟𑄮 𑄝𑄪𑄘𑄴𑄙𑄤𑄁𑄥𑄮.