𑄷. 𑄖𑄨𑄖𑄴𑄗𑄧𑄡𑄖𑄚𑄧𑄘𑄨𑄥𑄪𑄖𑄴𑄖𑄁

𑄼𑄸. ‘‘𑄖𑄩𑄕𑄨𑄟𑄧𑄚𑄨, 𑄞𑄨𑄇𑄴𑄈𑄤𑄬, 𑄖𑄨𑄖𑄴𑄗𑄧𑄡𑄖𑄚𑄧𑄚𑄨 𑄡𑄧𑄚𑄨 𑄛𑄕𑄴𑄓𑄨𑄖𑄬𑄦𑄨 𑄥𑄟𑄚𑄪𑄡𑄪𑄐𑄴𑄎𑄨𑄡𑄟𑄧𑄚𑄧𑄚𑄨 [𑄥𑄟𑄚𑄪𑄉𑄴𑄉𑄧𑄦𑄨𑄡𑄟𑄧𑄚𑄧𑄚𑄨 (𑄥𑄴𑄡𑄧. 𑄇𑄁. 𑄇.)] 𑄥𑄟𑄚𑄪𑄉𑄧𑄦𑄨𑄡𑄟𑄧𑄚𑄧𑄚𑄨 𑄥𑄟𑄚𑄪𑄞𑄧𑄥𑄨𑄡𑄟𑄧𑄚𑄧𑄚𑄨 𑄛𑄢𑄟𑄴𑄛𑄨 𑄉𑄚𑄴𑄖𑄴𑄤𑄧 𑄃𑄇𑄨𑄢𑄨𑄡𑄧𑄡 𑄥𑄕𑄴𑄒𑄦𑄚𑄴𑄖𑄨. 𑄇𑄖𑄟𑄧𑄚𑄨 𑄖𑄩𑄕𑄨? 𑄥𑄚𑄴𑄖𑄨, 𑄞𑄨𑄇𑄴𑄈𑄤𑄬, 𑄆𑄇𑄬 𑄥𑄟𑄕𑄝𑄴𑄢𑄧𑄦𑄴𑄟𑄕𑄧 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – ‘𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄛𑄪𑄝𑄴𑄝𑄬𑄇𑄖𑄦𑄬𑄖𑄫’𑄖𑄨. 𑄥𑄚𑄴𑄖𑄨, 𑄞𑄨𑄇𑄴𑄈𑄤𑄬, 𑄆𑄇𑄬 𑄥𑄟𑄕𑄝𑄴𑄢𑄧𑄦𑄴𑄟𑄕𑄧 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – ‘𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄫’𑄖𑄨. 𑄥𑄚𑄴𑄖𑄨, 𑄞𑄨𑄇𑄴𑄈𑄤𑄬, 𑄆𑄇𑄬 𑄥𑄟𑄕𑄝𑄴𑄢𑄧𑄦𑄴𑄟𑄕𑄧 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – ‘𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄧’’’𑄖𑄨.

‘‘𑄖𑄖𑄴𑄢, 𑄞𑄨𑄇𑄴𑄈𑄤𑄬, 𑄡𑄬 𑄖𑄬 𑄥𑄟𑄕𑄝𑄴𑄢𑄧𑄦𑄴𑄟𑄕𑄧 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – ‘𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄛𑄪𑄝𑄴𑄝𑄬𑄇𑄖𑄦𑄬𑄖𑄫’𑄖𑄨, 𑄖𑄴𑄡𑄧𑄦𑄁 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄆𑄤𑄁 𑄤𑄘𑄧𑄟𑄨 – ‘𑄥𑄌𑄴𑄌𑄁 𑄇𑄨𑄢 𑄖𑄪𑄟𑄴𑄦𑄬 𑄃𑄂𑄡𑄥𑄴𑄟𑄚𑄴𑄖𑄮 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – 𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄛𑄪𑄝𑄴𑄝𑄬𑄇𑄖𑄦𑄬𑄖𑄫’𑄖𑄨? 𑄖𑄬 𑄌 𑄟𑄬 [𑄖𑄬 𑄌𑄬 𑄟𑄬 (𑄥𑄩. 𑄥𑄴𑄡𑄧. 𑄇𑄁. 𑄛𑄩.)] 𑄆𑄤𑄁 𑄛𑄪𑄑𑄴𑄒𑄧 ‘𑄃𑄂𑄟𑄧’𑄖𑄨 [𑄃𑄂𑄟𑄮𑄖𑄨 (𑄥𑄩.)] 𑄛𑄑𑄨𑄎𑄧𑄚𑄚𑄴𑄖𑄨. 𑄖𑄴𑄡𑄧𑄦𑄁 𑄆𑄤𑄁 𑄤𑄘𑄧𑄟𑄨 – ‘𑄖𑄬𑄚𑄦𑄧𑄡𑄥𑄴𑄟𑄚𑄴𑄖𑄮 𑄛𑄧𑄕𑄧𑄖𑄨𑄛𑄧𑄖𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄃𑄘𑄨𑄚𑄴𑄚𑄧𑄘𑄧𑄡𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄃𑄝𑄴𑄢𑄦𑄴𑄟𑄌𑄧𑄢𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄟𑄪𑄥𑄧𑄤𑄧𑄘𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄛𑄨𑄥𑄪𑄕𑄤𑄧𑄌𑄧 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄜𑄢𑄪𑄥𑄤𑄧𑄌𑄧 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄥𑄟𑄴𑄜𑄛𑄴𑄛𑄣𑄧𑄛𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄃𑄞𑄨𑄎𑄴𑄏𑄧𑄣𑄪𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄝𑄴𑄡𑄧𑄛𑄚𑄴𑄚𑄌𑄨𑄖𑄴𑄖𑄧 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪, 𑄟𑄨𑄌𑄴𑄍𑄧𑄘𑄨𑄑𑄴𑄒𑄨𑄇𑄧 𑄞𑄤𑄨𑄥𑄴𑄥𑄚𑄴𑄖𑄨 𑄛𑄪𑄝𑄴𑄝𑄬𑄇𑄖𑄦𑄬𑄖𑄪’’’.

‘‘𑄛𑄪𑄝𑄴𑄝𑄬𑄇𑄖𑄁 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄧𑄢𑄖𑄮 𑄛𑄌𑄴𑄌𑄧𑄉𑄌𑄴𑄍𑄖𑄁 𑄚 𑄦𑄮𑄖𑄨 𑄍𑄚𑄴𑄘𑄮 𑄤𑄧 𑄤𑄧𑄡𑄧𑄟𑄮 𑄤𑄧 𑄄𑄘𑄁 𑄤𑄧 𑄇𑄢𑄕𑄩𑄡𑄁 𑄄𑄘𑄁 𑄤𑄧 𑄃𑄇𑄢𑄕𑄩𑄡𑄚𑄴𑄖𑄨. 𑄄𑄖𑄨 𑄇𑄢𑄕𑄩𑄡𑄧𑄇𑄢𑄕𑄩𑄡𑄬 𑄈𑄮 𑄛𑄚 𑄥𑄌𑄴𑄌𑄖𑄮 𑄗𑄬𑄖𑄖𑄮 𑄃𑄚𑄪𑄛𑄣𑄝𑄴𑄞𑄨𑄡𑄟𑄧𑄚𑄬 𑄟𑄪𑄑𑄴𑄒𑄥𑄴𑄥𑄖𑄩𑄚𑄁 𑄃𑄚𑄧𑄢𑄇𑄴𑄈𑄧𑄚𑄁 𑄤𑄨𑄦𑄢𑄖𑄁 𑄚 𑄦𑄮𑄖𑄨 𑄛𑄌𑄴𑄌𑄖𑄴𑄖𑄁 𑄥𑄦𑄙𑄟𑄴𑄟𑄨𑄇𑄮 𑄥𑄟𑄕𑄤𑄧𑄘𑄮. 𑄃𑄡𑄁 𑄈𑄮 𑄟𑄬, 𑄞𑄨𑄇𑄴𑄈𑄤𑄬, 𑄖𑄬𑄥𑄪 𑄥𑄟𑄕𑄝𑄴𑄢𑄧𑄦𑄴𑄟𑄕𑄬𑄥𑄪 𑄆𑄤𑄁𑄤𑄧𑄘𑄩𑄥𑄪 𑄆𑄤𑄁𑄘𑄨𑄑𑄴𑄒𑄩𑄥𑄪 𑄛𑄒𑄟𑄮 𑄥𑄦𑄙𑄟𑄴𑄟𑄨𑄇𑄮 𑄚𑄨𑄉𑄴𑄉𑄦𑄮 𑄦𑄮𑄖𑄨.

‘‘𑄖𑄖𑄴𑄢, 𑄞𑄨𑄇𑄴𑄈𑄤𑄬, 𑄡𑄬 𑄖𑄬 𑄥𑄟𑄕𑄝𑄴𑄢𑄧𑄦𑄴𑄟𑄕𑄧 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – ‘𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄫’𑄖𑄨, 𑄖𑄴𑄡𑄧𑄦𑄁 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄆𑄤𑄁 𑄤𑄘𑄧𑄟𑄨 – ‘𑄥𑄌𑄴𑄌𑄁 𑄇𑄨𑄢 𑄖𑄪𑄟𑄴𑄦𑄬 𑄃𑄂𑄡𑄥𑄴𑄟𑄚𑄴𑄖𑄮 𑄆𑄤𑄁𑄤𑄧𑄘𑄨𑄚𑄮 𑄆𑄤𑄘𑄨𑄑𑄴𑄒𑄨𑄚𑄮 – 𑄡𑄁 𑄇𑄨𑄐𑄴𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄫’𑄖𑄨? 𑄖𑄬 𑄌 𑄟𑄬 𑄆𑄤𑄁 𑄛𑄪𑄑𑄴𑄒𑄧 ‘𑄃𑄂𑄟𑄧’𑄖𑄨 𑄛𑄑𑄨𑄎𑄧𑄚𑄚𑄴𑄖𑄨. 𑄖𑄴𑄡𑄧𑄦𑄁 𑄆𑄤𑄁 𑄤𑄘𑄧𑄟𑄨 – ‘𑄖𑄬𑄚𑄦𑄧𑄡𑄥𑄴𑄟𑄚𑄴𑄖𑄮 𑄛𑄧𑄕𑄧𑄖𑄨𑄛𑄧𑄖𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄃𑄘𑄨𑄚𑄴𑄚𑄧𑄘𑄧𑄡𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄃𑄝𑄴𑄢𑄦𑄴𑄟𑄌𑄧𑄢𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄟𑄪𑄥𑄧𑄤𑄧𑄘𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄛𑄨𑄥𑄪𑄕𑄤𑄧𑄌𑄧 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄜𑄢𑄪𑄥𑄤𑄧𑄌𑄧 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄥𑄟𑄴𑄜𑄛𑄴𑄛𑄣𑄧𑄛𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄃𑄞𑄨𑄎𑄴𑄏𑄧𑄣𑄪𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄝𑄴𑄡𑄧𑄛𑄚𑄴𑄚𑄌𑄨𑄖𑄴𑄖𑄧 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪, 𑄟𑄨𑄌𑄴𑄍𑄧𑄘𑄨𑄑𑄴𑄒𑄨𑄇𑄧 𑄞𑄤𑄨𑄥𑄴𑄥𑄚𑄴𑄖𑄨 𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄦𑄬𑄖𑄪’’’.

‘‘𑄄𑄥𑄴𑄥𑄢𑄚𑄨𑄟𑄴𑄟𑄧𑄚𑄁 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄧𑄢𑄖𑄮 𑄛𑄌𑄴𑄌𑄧𑄉𑄌𑄴𑄍𑄖𑄁 𑄚 𑄦𑄮𑄖𑄨 𑄍𑄚𑄴𑄘𑄮 𑄤𑄧 𑄤𑄧𑄡𑄧𑄟𑄮 𑄤𑄧 𑄄𑄘𑄁 𑄤𑄧 𑄇𑄢𑄕𑄩𑄡𑄁 𑄄𑄘𑄁 𑄤𑄧 𑄃𑄇𑄢𑄕𑄩𑄡𑄚𑄴𑄖𑄨. 𑄄𑄖𑄨 𑄇𑄢𑄕𑄩𑄡𑄧𑄇𑄢𑄕𑄩𑄡𑄬 𑄈𑄮 𑄛𑄚 𑄥𑄌𑄴𑄌𑄖𑄮 𑄗𑄬𑄖𑄖𑄮 𑄃𑄚𑄪𑄛𑄣𑄝𑄴𑄞𑄨𑄡𑄟𑄧𑄚𑄬 𑄟𑄪𑄑𑄴𑄒𑄥𑄴𑄥𑄖𑄩𑄚𑄁 𑄃𑄚𑄧𑄢𑄇𑄴𑄈𑄧𑄚𑄁 𑄤𑄨𑄦𑄢𑄖𑄁 𑄚 𑄦𑄮𑄖𑄨 𑄛𑄌𑄴𑄌𑄖𑄴𑄖𑄁 𑄥𑄦𑄙𑄟𑄴𑄟𑄨𑄇𑄮 𑄥𑄟𑄕𑄤𑄧𑄘𑄮. 𑄃𑄡𑄁 𑄈𑄮 𑄟𑄬, 𑄞𑄨𑄇𑄴𑄈𑄤𑄬, 𑄖𑄬𑄥𑄪 𑄥𑄟𑄕𑄝𑄴𑄢𑄧𑄦𑄴𑄟𑄕𑄬𑄥𑄪 𑄆𑄤𑄁𑄤𑄧𑄘𑄩𑄥𑄪 𑄆𑄤𑄁𑄘𑄨𑄑𑄴𑄒𑄩𑄥𑄪 𑄘𑄪𑄖𑄨𑄡𑄮 𑄥𑄦𑄙𑄟𑄴𑄟𑄨𑄇𑄮 𑄚𑄨𑄉𑄴𑄉𑄦𑄮 𑄦𑄮𑄖𑄨.

‘‘𑄖𑄖𑄴𑄢, 𑄞𑄨𑄇𑄴𑄈𑄤𑄬, 𑄡𑄬 𑄖𑄬 𑄥𑄟𑄕𑄝𑄴𑄢𑄧𑄦𑄴𑄟𑄕𑄧 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – ‘𑄡𑄁 𑄇𑄨𑄁 𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄧’𑄖𑄨, 𑄖𑄴𑄡𑄧𑄦𑄁 𑄅𑄛𑄥𑄋𑄴𑄇𑄟𑄨𑄖𑄴𑄤𑄧 𑄆𑄤𑄁 𑄤𑄘𑄧𑄟𑄨 – ‘𑄥𑄌𑄴𑄌𑄁 𑄇𑄨𑄢 𑄖𑄪𑄟𑄴𑄦𑄬 𑄃𑄂𑄡𑄥𑄴𑄟𑄚𑄴𑄖𑄮 𑄆𑄤𑄁𑄤𑄧𑄘𑄨𑄚𑄮 𑄆𑄤𑄁𑄘𑄨𑄑𑄴𑄒𑄨𑄚𑄮 – 𑄡𑄁 𑄇𑄨𑄁 𑄌𑄧𑄡𑄁 𑄛𑄪𑄢𑄨𑄥𑄛𑄪𑄉𑄴𑄉𑄣𑄮 𑄛𑄑𑄨𑄥𑄁𑄤𑄬𑄘𑄬𑄖𑄨 𑄥𑄪𑄈𑄁 𑄤𑄧 𑄘𑄪𑄇𑄴𑄈𑄁 𑄤𑄧 𑄃𑄘𑄪𑄇𑄴𑄈𑄟𑄥𑄪𑄈𑄁 𑄤𑄧 𑄥𑄝𑄴𑄝𑄁 𑄖𑄁 𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄧’𑄖𑄨? 𑄖𑄬 𑄌 𑄟𑄬 𑄆𑄤𑄁 𑄛𑄪𑄑𑄴𑄒𑄧 ‘𑄃𑄂𑄟𑄧’𑄖𑄨 𑄛𑄑𑄨𑄎𑄧𑄚𑄚𑄴𑄖𑄨. 𑄖𑄴𑄡𑄧𑄦𑄁 𑄆𑄤𑄁 𑄤𑄘𑄧𑄟𑄨 – ‘𑄖𑄬𑄚𑄦𑄧𑄡𑄥𑄴𑄟𑄚𑄴𑄖𑄮 𑄛𑄧𑄕𑄧𑄖𑄨𑄛𑄧𑄖𑄨𑄚𑄮 𑄞𑄤𑄨𑄥𑄴𑄥𑄚𑄴𑄖𑄨 𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄧…𑄛𑄬… 𑄟𑄨𑄌𑄴𑄍𑄧𑄘𑄨𑄑𑄴𑄒𑄨𑄇𑄧 𑄞𑄤𑄨𑄥𑄴𑄥𑄚𑄴𑄖𑄨 𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄧’’’.

‘‘𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄁 [𑄃𑄦𑄬𑄖𑄪𑄁 (𑄥𑄩.), 𑄃𑄦𑄬𑄖𑄪 (𑄥𑄴𑄡𑄧. 𑄇𑄁.), 𑄃𑄦𑄬𑄖𑄪𑄃𑄛𑄴𑄛𑄌𑄴𑄌𑄡𑄧 (𑄛𑄩.), 𑄃𑄦𑄬𑄖𑄪𑄁 𑄃𑄛𑄴𑄛𑄌𑄴𑄌𑄡𑄁 (𑄇.)] 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄧𑄢𑄖𑄮 𑄛𑄌𑄴𑄌𑄧𑄉𑄌𑄴𑄍𑄖𑄁 𑄚 𑄦𑄮𑄖𑄨 𑄍𑄚𑄴𑄘𑄮 𑄤𑄧 𑄤𑄧𑄡𑄧𑄟𑄮 𑄤𑄧 𑄄𑄘𑄁 𑄤𑄧 𑄇𑄢𑄕𑄩𑄡𑄁 𑄄𑄘𑄁 𑄤𑄧 𑄃𑄇𑄢𑄕𑄩𑄡𑄚𑄴𑄖𑄨. 𑄄𑄖𑄨 𑄇𑄢𑄕𑄩𑄡𑄧𑄇𑄢𑄕𑄩𑄡𑄬 𑄈𑄮 𑄛𑄚 𑄥𑄌𑄴𑄌𑄖𑄮 𑄗𑄬𑄖𑄖𑄮 𑄃𑄚𑄪𑄛𑄣𑄝𑄴𑄞𑄨𑄡𑄟𑄧𑄚𑄬 𑄟𑄪𑄑𑄴𑄒𑄥𑄴𑄥𑄖𑄩𑄚𑄁 𑄃𑄚𑄧𑄢𑄇𑄴𑄈𑄧𑄚𑄁 𑄤𑄨𑄦𑄢𑄖𑄁 𑄚 𑄦𑄮𑄖𑄨 𑄛𑄌𑄴𑄌𑄖𑄴𑄖𑄁 𑄥𑄦𑄙𑄟𑄴𑄟𑄨𑄇𑄮 𑄥𑄟𑄕𑄤𑄧𑄘𑄮. 𑄃𑄡𑄁 𑄈𑄮 𑄟𑄬, 𑄞𑄨𑄇𑄴𑄈𑄤𑄬, 𑄖𑄬𑄥𑄪 𑄥𑄟𑄕𑄝𑄴𑄢𑄧𑄦𑄴𑄟𑄕𑄬𑄥𑄪 𑄆𑄤𑄁𑄤𑄧𑄘𑄩𑄥𑄪 𑄆𑄤𑄁𑄘𑄨𑄑𑄴𑄒𑄩𑄥𑄪 𑄖𑄖𑄨𑄡𑄮 𑄥𑄦𑄙𑄟𑄴𑄟𑄨𑄇𑄮 𑄚𑄨𑄉𑄴𑄉𑄦𑄮 𑄦𑄮𑄖𑄨.

‘‘𑄄𑄟𑄧𑄚𑄨 𑄈𑄮, 𑄞𑄨𑄇𑄴𑄈𑄤𑄬, 𑄖𑄩𑄕𑄨 𑄖𑄨𑄖𑄴𑄗𑄧𑄡𑄖𑄚𑄧𑄚𑄨 𑄡𑄧𑄚𑄨 𑄛𑄕𑄴𑄓𑄨𑄖𑄬𑄦𑄨 𑄥𑄟𑄚𑄪𑄡𑄪𑄐𑄴𑄎𑄨𑄡𑄟𑄧𑄚𑄧𑄚𑄨 𑄥𑄟𑄚𑄪𑄉𑄧𑄦𑄨𑄡𑄟𑄧𑄚𑄧𑄚𑄨 𑄥𑄟𑄚𑄪𑄞𑄧𑄥𑄨𑄡𑄟𑄧𑄚𑄧𑄚𑄨 𑄛𑄢𑄟𑄴𑄛𑄨 𑄉𑄚𑄴𑄖𑄴𑄤𑄧 𑄃𑄇𑄨𑄢𑄨𑄡𑄧𑄡 𑄥𑄕𑄴𑄒𑄦𑄚𑄴𑄖𑄨.

‘‘𑄃𑄡𑄁 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄨. 𑄇𑄖𑄟𑄮 𑄌, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄨? 𑄄𑄟𑄧 𑄍 𑄙𑄧𑄖𑄪𑄡𑄮𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄨. 𑄄𑄟𑄧𑄚𑄨 𑄍 𑄜𑄥𑄴𑄥𑄧𑄡𑄖𑄚𑄧𑄚𑄩𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄨. 𑄄𑄟𑄬 𑄃𑄑𑄴𑄒𑄧𑄢𑄥 𑄟𑄚𑄮𑄛𑄤𑄨𑄌𑄧𑄢𑄧𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄨. 𑄄𑄟𑄧𑄚𑄨 𑄌𑄖𑄴𑄖𑄧𑄢𑄨 𑄃𑄢𑄨𑄡𑄥𑄌𑄴𑄌𑄧𑄚𑄩𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄨.

‘‘𑄄𑄟𑄧 𑄍 𑄙𑄧𑄖𑄪𑄡𑄮𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄈𑄮 𑄛𑄚𑄬𑄖𑄁 𑄤𑄪𑄖𑄴𑄖𑄁. 𑄇𑄨𑄐𑄴𑄌𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁? 𑄍𑄡𑄨𑄟𑄧, 𑄞𑄨𑄇𑄴𑄈𑄤𑄬, 𑄙𑄧𑄖𑄪𑄡𑄮 – 𑄛𑄗𑄤𑄩𑄙𑄧𑄖𑄪, 𑄃𑄂𑄛𑄮𑄙𑄧𑄖𑄪, 𑄖𑄬𑄎𑄮𑄙𑄧𑄖𑄪, 𑄤𑄧𑄡𑄮𑄙𑄧𑄖𑄪, 𑄃𑄂𑄇𑄧𑄥𑄙𑄧𑄖𑄪, 𑄤𑄨𑄐𑄴𑄐𑄧𑄕𑄙𑄧𑄖𑄪. 𑄄𑄟𑄧 𑄍 𑄙𑄧𑄖𑄪𑄡𑄮𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄡𑄁 𑄖𑄁 𑄤𑄪𑄖𑄴𑄖𑄁, 𑄄𑄘𑄟𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁.

‘‘𑄄𑄟𑄧𑄚𑄨 𑄍 𑄜𑄥𑄴𑄥𑄧𑄡𑄖𑄚𑄧𑄚𑄩𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄈𑄮 𑄛𑄚𑄬𑄖𑄁 𑄤𑄪𑄖𑄴𑄖𑄁. 𑄇𑄨𑄐𑄴𑄌𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁? 𑄍𑄡𑄨𑄟𑄧𑄚𑄨, 𑄞𑄨𑄇𑄴𑄈𑄤𑄬, 𑄜𑄥𑄴𑄥𑄧𑄡𑄖𑄚𑄧𑄚𑄨 – 𑄌𑄇𑄴𑄈𑄪 𑄜𑄥𑄴𑄥𑄧𑄡𑄖𑄚𑄁, 𑄥𑄮𑄖𑄁 𑄜𑄥𑄴𑄥𑄧𑄡𑄖𑄚𑄁, 𑄊𑄧𑄚𑄁 𑄜𑄥𑄴𑄥𑄧𑄡𑄖𑄚𑄁, 𑄎𑄨𑄤𑄴𑄦𑄧 𑄜𑄥𑄴𑄥𑄧𑄡𑄖𑄚𑄁, 𑄇𑄧𑄡𑄮 𑄜𑄥𑄴𑄥𑄧𑄡𑄖𑄚𑄁, 𑄟𑄚𑄮 𑄜𑄥𑄴𑄥𑄧𑄡𑄖𑄚𑄁. 𑄄𑄟𑄧𑄚𑄨 𑄍 𑄜𑄥𑄴𑄥𑄧𑄡𑄖𑄚𑄧𑄚𑄩𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄡𑄁 𑄖𑄁 𑄤𑄪𑄖𑄴𑄖𑄁, 𑄄𑄘𑄟𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁.

‘‘𑄄𑄟𑄬 𑄃𑄑𑄴𑄒𑄧𑄢𑄥 𑄟𑄚𑄮𑄛𑄤𑄨𑄌𑄧𑄢𑄧𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄈𑄮 𑄛𑄚𑄬𑄖𑄁 𑄤𑄪𑄖𑄴𑄖𑄁. 𑄇𑄨𑄐𑄴𑄌𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁? 𑄌𑄇𑄴𑄈𑄪𑄚𑄧 𑄢𑄫𑄛𑄁 𑄘𑄨𑄥𑄴𑄤𑄧 𑄥𑄮𑄟𑄚𑄥𑄴𑄥𑄑𑄴𑄒𑄧𑄚𑄨𑄡𑄁 𑄢𑄫𑄛𑄁 𑄅𑄛𑄤𑄨𑄌𑄢𑄖𑄨 𑄘𑄮𑄟𑄚𑄥𑄴𑄥𑄑𑄴𑄒𑄧𑄚𑄨𑄡𑄁 𑄢𑄫𑄛𑄁 𑄅𑄛𑄤𑄨𑄌𑄢𑄖𑄨 𑄅𑄛𑄬𑄇𑄴𑄈𑄧𑄑𑄴𑄒𑄧𑄚𑄨𑄡𑄁 𑄢𑄫𑄛𑄁 𑄅𑄛𑄤𑄨𑄌𑄢𑄖𑄨, 𑄥𑄮𑄖𑄬𑄚 𑄥𑄘𑄴𑄘𑄁 𑄥𑄪𑄖𑄴𑄤𑄧… 𑄊𑄧𑄚𑄬𑄚 𑄉𑄚𑄴𑄙𑄁 𑄊𑄧𑄡𑄨𑄖𑄴𑄤𑄧… 𑄎𑄨𑄤𑄴𑄦𑄧𑄡 𑄢𑄥𑄁 𑄥𑄧𑄡𑄨𑄖𑄴𑄤𑄧… 𑄇𑄧𑄡𑄬𑄚 𑄜𑄮𑄑𑄴𑄒𑄝𑄴𑄝𑄁 𑄜𑄪𑄥𑄨𑄖𑄴𑄤𑄧… 𑄟𑄚𑄥𑄧 𑄙𑄟𑄴𑄟𑄁 𑄤𑄨𑄐𑄴𑄐𑄧𑄡 𑄥𑄮𑄟𑄚𑄥𑄴𑄥𑄑𑄴𑄒𑄧𑄚𑄨𑄡𑄁 𑄙𑄟𑄴𑄟𑄁 𑄅𑄛𑄤𑄨𑄌𑄢𑄖𑄨 𑄘𑄮𑄟𑄚𑄥𑄴𑄥𑄑𑄴𑄒𑄧𑄚𑄨𑄡𑄁 𑄙𑄟𑄴𑄟𑄁 𑄅𑄛𑄤𑄨𑄌𑄢𑄖𑄨 𑄅𑄛𑄬𑄇𑄴𑄈𑄧𑄑𑄴𑄒𑄧𑄚𑄨𑄡𑄁 𑄙𑄟𑄴𑄟𑄁 𑄅𑄛𑄤𑄨𑄌𑄢𑄖𑄨. 𑄄𑄟𑄬 𑄃𑄑𑄴𑄒𑄧𑄢𑄥 𑄟𑄚𑄮𑄛𑄤𑄨𑄌𑄧𑄢𑄧𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄡𑄁 𑄖𑄁 𑄤𑄪𑄖𑄴𑄖𑄁, 𑄄𑄘𑄟𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁.

‘‘𑄄𑄟𑄧𑄚𑄨 𑄌𑄖𑄴𑄖𑄧𑄢𑄨 𑄃𑄢𑄨𑄡𑄥𑄌𑄴𑄌𑄧𑄚𑄩𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄈𑄮 𑄛𑄚𑄬𑄖𑄁 𑄤𑄪𑄖𑄴𑄖𑄁. 𑄇𑄨𑄐𑄴𑄌𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖𑄁? 𑄍𑄚𑄴𑄚𑄁, 𑄞𑄨𑄇𑄴𑄈𑄤𑄬, 𑄙𑄧𑄖𑄫𑄚𑄁 𑄅𑄛𑄧𑄘𑄧𑄡 𑄉𑄝𑄴𑄞𑄥𑄴𑄥𑄧𑄤𑄇𑄴𑄇𑄚𑄴𑄖𑄨 𑄦𑄮𑄖𑄨; 𑄃𑄮𑄇𑄴𑄇𑄚𑄴𑄖𑄨𑄡𑄧 𑄥𑄖𑄨 𑄚𑄧𑄟𑄢𑄫𑄛𑄁, 𑄚𑄧𑄟𑄢𑄫𑄛𑄛𑄌𑄴𑄌𑄡𑄧 𑄥𑅄𑄧𑄡𑄖𑄚𑄁, 𑄥𑅄𑄧𑄡𑄖𑄚𑄛𑄌𑄴𑄌𑄡𑄧 𑄜𑄥𑄴𑄥𑄮, 𑄜𑄥𑄴𑄥𑄛𑄌𑄴𑄌𑄡𑄧 𑄤𑄬𑄘𑄚𑄧. 𑄤𑄬𑄘𑄨𑄡𑄟𑄧𑄚𑄥𑄴𑄥 𑄈𑄮 𑄛𑄚𑄧𑄦𑄁, 𑄞𑄨𑄇𑄴𑄈𑄤𑄬, 𑄄𑄘𑄁 𑄘𑄪𑄇𑄴𑄈𑄚𑄴𑄖𑄨 𑄛𑄐𑄴𑄐𑄛𑄬𑄟𑄨, 𑄃𑄡𑄁 𑄘𑄪𑄇𑄴𑄈𑄥𑄟𑄪𑄘𑄡𑄮𑄖𑄨 𑄛𑄐𑄴𑄐𑄛𑄬𑄟𑄨, 𑄃𑄡𑄁 𑄘𑄪𑄇𑄴𑄈𑄚𑄨𑄢𑄮𑄙𑄮𑄖𑄨 𑄛𑄐𑄴𑄐𑄛𑄬𑄟𑄨, 𑄃𑄡𑄁 𑄘𑄪𑄇𑄴𑄈𑄚𑄨𑄢𑄮𑄙𑄉𑄧𑄟𑄨𑄚𑄩 𑄛𑄑𑄨𑄛𑄘𑄧𑄖𑄨 𑄛𑄐𑄴𑄐𑄛𑄬𑄟𑄨.

‘‘𑄇𑄖𑄟𑄐𑄴𑄌, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄁 𑄃𑄢𑄨𑄡𑄥𑄌𑄴𑄌𑄁? 𑄎𑄧𑄖𑄨𑄛𑄨 𑄘𑄪𑄇𑄴𑄈𑄧, 𑄎𑄢𑄧𑄛𑄨 𑄘𑄪𑄇𑄴𑄈𑄧, ( ) [(𑄝𑄴𑄡𑄧𑄙𑄨𑄛𑄨 𑄘𑄪𑄇𑄴𑄈𑄮) (𑄥𑄩. 𑄛𑄩. 𑄇.) 𑄃𑄑𑄴𑄒𑄇𑄗𑄧𑄡 𑄥𑄁𑄥𑄚𑄴𑄘𑄬𑄖𑄝𑄴𑄝𑄁 𑄤𑄨𑄥𑄪𑄘𑄴𑄙𑄨. 𑄸.𑄻𑄹𑄽] 𑄟𑄢𑄕𑄟𑄴𑄛𑄨 𑄘𑄪𑄇𑄴𑄈𑄁, 𑄥𑄮𑄇𑄛𑄢𑄨𑄘𑄬𑄤𑄘𑄪𑄇𑄴𑄈𑄘𑄮𑄟𑄚𑄥𑄴𑄥𑄪𑄛𑄧𑄡𑄧𑄥𑄧𑄛𑄨 𑄘𑄪𑄇𑄴𑄈𑄧, (𑄃𑄛𑄴𑄛𑄨𑄡𑄬𑄦𑄨 𑄥𑄟𑄴𑄛𑄡𑄮𑄉𑄮 𑄘𑄪𑄇𑄴𑄈𑄮, 𑄛𑄨𑄡𑄬𑄦𑄨 𑄤𑄨𑄛𑄴𑄛𑄡𑄮𑄉𑄮 𑄘𑄪𑄇𑄴𑄈𑄮,) [(𑄚𑄖𑄴𑄗𑄨 𑄇𑄖𑄴𑄗𑄌𑄨)] 𑄡𑄟𑄴𑄛𑄨𑄌𑄴𑄍𑄁 𑄚 𑄣𑄞𑄖𑄨 𑄖𑄟𑄴𑄛𑄨 𑄘𑄪𑄇𑄴𑄈𑄁. 𑄥𑄁𑄈𑄨𑄖𑄴𑄖𑄬𑄚 𑄛𑄐𑄴𑄌𑄪𑄛𑄧𑄘𑄧𑄚𑄇𑄴𑄈𑄚𑄴𑄙𑄧 𑄘𑄪𑄇𑄴𑄈𑄧. 𑄄𑄘𑄁 𑄤𑄪𑄌𑄴𑄌𑄖𑄨, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄁 𑄃𑄢𑄨𑄡𑄥𑄌𑄴𑄌𑄁.

‘‘𑄇𑄖𑄟𑄐𑄴𑄌, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄥𑄟𑄪𑄘𑄡𑄁 [𑄘𑄪𑄇𑄴𑄈𑄥𑄟𑄪𑄘𑄡𑄮 (𑄥𑄴𑄡𑄧. 𑄇𑄁.)] 𑄃𑄢𑄨𑄡𑄥𑄌𑄴𑄌𑄁? 𑄃𑄤𑄨𑄎𑄴𑄎𑄧𑄛𑄌𑄴𑄌𑄡𑄧 𑄥𑄋𑄴𑄈𑄧𑄢𑄧, 𑄥𑄋𑄴𑄈𑄧𑄢𑄛𑄌𑄴𑄌𑄡𑄧 𑄤𑄨𑄐𑄴𑄐𑄧𑄕𑄁, 𑄤𑄨𑄐𑄴𑄐𑄧𑄕𑄛𑄌𑄴𑄌𑄡𑄧 𑄚𑄧𑄟𑄢𑄫𑄛𑄁, 𑄚𑄧𑄟𑄢𑄫𑄛𑄛𑄌𑄴𑄌𑄡𑄧 𑄥𑅄𑄧𑄡𑄖𑄚𑄁, 𑄥𑅄𑄧𑄡𑄖𑄚𑄛𑄌𑄴𑄌𑄡𑄧 𑄜𑄥𑄴𑄥𑄮, 𑄜𑄥𑄴𑄥𑄛𑄌𑄴𑄌𑄡𑄧 𑄤𑄬𑄘𑄚𑄧, 𑄤𑄬𑄘𑄚𑄧𑄛𑄌𑄴𑄌𑄡𑄧 𑄖𑄕𑄴𑄦𑄧, 𑄖𑄕𑄴𑄦𑄧𑄛𑄌𑄴𑄌𑄡𑄧 𑄅𑄛𑄧𑄘𑄧𑄚𑄁, 𑄅𑄛𑄧𑄘𑄧𑄚𑄛𑄌𑄴𑄌𑄡𑄧 𑄞𑄤𑄮, 𑄞𑄤𑄛𑄌𑄴𑄌𑄡𑄧 𑄎𑄧𑄖𑄨, 𑄎𑄧𑄖𑄨𑄛𑄌𑄴𑄌𑄡𑄧 𑄎𑄢𑄧𑄟𑄢𑄕𑄁 𑄥𑄮𑄇𑄛𑄢𑄨𑄘𑄬𑄤𑄘𑄪𑄇𑄴𑄈𑄘𑄮𑄟𑄚𑄥𑄴𑄥𑄪𑄛𑄧𑄡𑄧𑄥𑄧 𑄥𑄟𑄴𑄞𑄤𑄚𑄴𑄖𑄨. 𑄆𑄤𑄟𑄬𑄖𑄥𑄴𑄥 𑄇𑄬𑄤𑄣𑄥𑄴𑄥 𑄘𑄪𑄇𑄴𑄈𑄇𑄴𑄈𑄚𑄴𑄙𑄥𑄴𑄥 𑄥𑄟𑄪𑄘𑄡𑄮 𑄦𑄮𑄖𑄨. 𑄄𑄘𑄁 𑄤𑄪𑄌𑄴𑄌𑄖𑄨, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄥𑄟𑄪𑄘𑄡𑄁 𑄃𑄢𑄨𑄡𑄥𑄌𑄴𑄌𑄁.

‘‘𑄇𑄖𑄟𑄐𑄴𑄌, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄚𑄨𑄢𑄮𑄙𑄁 [𑄘𑄪𑄇𑄴𑄈𑄚𑄨𑄢𑄮𑄙𑄮 (𑄥𑄴𑄡𑄧. 𑄇𑄁.)] 𑄃𑄢𑄨𑄡𑄥𑄌𑄴𑄌𑄁? 𑄃𑄤𑄨𑄎𑄴𑄎𑄧𑄡 𑄖𑄴𑄤𑄬𑄤 𑄃𑄥𑄬𑄥𑄤𑄨𑄢𑄧𑄉𑄚𑄨𑄢𑄮𑄙𑄧 𑄥𑄋𑄴𑄈𑄧𑄢𑄚𑄨𑄢𑄮𑄙𑄮, 𑄥𑄋𑄴𑄈𑄧𑄢𑄚𑄨𑄢𑄮𑄙𑄧 𑄤𑄨𑄐𑄴𑄐𑄧𑄕𑄚𑄨𑄢𑄮𑄙𑄮, 𑄤𑄨𑄐𑄴𑄐𑄧𑄕𑄚𑄨𑄢𑄮𑄙𑄧 𑄚𑄧𑄟𑄢𑄫𑄛𑄚𑄨𑄢𑄮𑄙𑄮, 𑄚𑄧𑄟𑄢𑄫𑄛𑄚𑄨𑄢𑄮𑄙𑄧 𑄥𑅄𑄧𑄡𑄖𑄚𑄚𑄨𑄢𑄮𑄙𑄮, 𑄥𑅄𑄧𑄡𑄖𑄚𑄚𑄨𑄢𑄮𑄙𑄧 𑄜𑄥𑄴𑄥𑄚𑄨𑄢𑄮𑄙𑄮, 𑄜𑄥𑄴𑄥𑄚𑄨𑄢𑄮𑄙𑄧 𑄤𑄬𑄘𑄚𑄧𑄚𑄨𑄢𑄮𑄙𑄮, 𑄤𑄬𑄘𑄚𑄧𑄚𑄨𑄢𑄮𑄙𑄧 𑄖𑄕𑄴𑄦𑄧𑄚𑄨𑄢𑄮𑄙𑄮, 𑄖𑄕𑄴𑄦𑄧𑄚𑄨𑄢𑄮𑄙𑄧 𑄅𑄛𑄧𑄘𑄧𑄚𑄚𑄨𑄢𑄮𑄙𑄮, 𑄅𑄛𑄧𑄘𑄧𑄚𑄚𑄨𑄢𑄮𑄙𑄧 𑄞𑄤𑄚𑄨𑄢𑄮𑄙𑄮, 𑄞𑄤𑄚𑄨𑄢𑄮𑄙𑄧 𑄎𑄧𑄖𑄨𑄚𑄨𑄢𑄮𑄙𑄮, 𑄎𑄧𑄖𑄨𑄚𑄨𑄢𑄮𑄙𑄧 𑄎𑄢𑄧𑄟𑄢𑄕𑄁 𑄥𑄮𑄇𑄛𑄢𑄨𑄘𑄬𑄤𑄘𑄪𑄇𑄴𑄈𑄘𑄮𑄟𑄚𑄥𑄴𑄥𑄪𑄛𑄧𑄡𑄧𑄥𑄧 𑄚𑄨𑄢𑄪𑄎𑄴𑄏𑄚𑄴𑄖𑄨. 𑄆𑄤𑄟𑄬𑄖𑄥𑄴𑄥 𑄇𑄬𑄤𑄣𑄥𑄴𑄥 𑄘𑄪𑄇𑄴𑄈𑄇𑄴𑄈𑄚𑄴𑄙𑄥𑄴𑄥 𑄚𑄨𑄢𑄮𑄙𑄮 𑄦𑄮𑄖𑄨. 𑄄𑄘𑄁 𑄤𑄪𑄌𑄴𑄌𑄖𑄨, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄚𑄨𑄢𑄮𑄙𑄁 𑄃𑄢𑄨𑄡𑄥𑄌𑄴𑄌𑄁.

‘‘𑄇𑄖𑄟𑄐𑄴𑄌, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄚𑄨𑄢𑄮𑄙𑄉𑄧𑄟𑄨𑄚𑄩 𑄛𑄑𑄨𑄛𑄘𑄧 𑄃𑄢𑄨𑄡𑄥𑄌𑄴𑄌𑄁? 𑄃𑄡𑄟𑄬𑄤 𑄃𑄢𑄨𑄡𑄮 𑄃𑄑𑄴𑄒𑄋𑄴𑄉𑄨𑄇𑄮 𑄟𑄉𑄴𑄉𑄮, 𑄥𑄬𑄡𑄴𑄡𑄗𑄨𑄘𑄁 – 𑄥𑄟𑄴𑄟𑄧𑄘𑄨𑄑𑄴𑄒𑄨, 𑄥𑄟𑄴𑄟𑄧𑄥𑄋𑄴𑄇𑄛𑄴𑄛𑄮, 𑄥𑄟𑄴𑄟𑄧𑄤𑄧𑄌𑄧, 𑄥𑄟𑄴𑄟𑄧𑄇𑄟𑄴𑄟𑄚𑄴𑄖𑄮, 𑄥𑄟𑄴𑄟𑄧𑄃𑄂𑄎𑄩𑄤𑄮, 𑄥𑄟𑄴𑄟𑄧𑄤𑄧𑄡𑄧𑄟𑄮, 𑄥𑄟𑄴𑄟𑄧𑄥𑄖𑄨, 𑄥𑄟𑄴𑄟𑄧𑄥𑄟𑄧𑄙𑄨. 𑄄𑄘𑄁 𑄤𑄪𑄌𑄴𑄌𑄖𑄨, 𑄞𑄨𑄇𑄴𑄈𑄤𑄬, 𑄘𑄪𑄇𑄴𑄈𑄚𑄨𑄢𑄮𑄙𑄉𑄧𑄟𑄨𑄚𑄩 𑄛𑄑𑄨𑄛𑄘𑄧 𑄃𑄢𑄨𑄡𑄥𑄌𑄴𑄌𑄁. ‘𑄄𑄟𑄧𑄚𑄨 𑄌𑄖𑄴𑄖𑄧𑄢𑄨 𑄃𑄢𑄨𑄡𑄥𑄌𑄴𑄌𑄧𑄚𑄩’𑄖𑄨, 𑄞𑄨𑄇𑄴𑄈𑄤𑄬, 𑄟𑄡𑄧 𑄙𑄟𑄴𑄟𑄮 𑄘𑄬𑄥𑄨𑄖𑄮 𑄃𑄚𑄨𑄉𑄴𑄉𑄦𑄨𑄖𑄮 𑄃𑄥𑄁𑄇𑄨𑄣𑄨𑄑𑄴𑄒𑄮 𑄃𑄚𑄪𑄛𑄤𑄎𑄴𑄎𑄮 𑄃𑄛𑄴𑄛𑄑𑄨𑄇𑄪𑄑𑄴𑄒𑄮 𑄥𑄟𑄕𑄬𑄦𑄨 𑄝𑄴𑄢𑄧𑄦𑄴𑄟𑄕𑄬𑄦𑄨 𑄤𑄨𑄐𑄴𑄐𑄫𑄦𑄩𑄖𑄨. 𑄄𑄖𑄨 𑄡𑄁 𑄖𑄁 𑄤𑄪𑄖𑄴𑄖𑄁 𑄄𑄘𑄟𑄬𑄖𑄁 𑄛𑄑𑄨𑄌𑄴𑄌 𑄤𑄪𑄖𑄴𑄖’’𑄚𑄴𑄖𑄨. 𑄛𑄒𑄟𑄁.

𑄼𑄹. ‘‘𑄖𑄩𑄕𑄨𑄟𑄧𑄚𑄨, 𑄞𑄨𑄇𑄴𑄈𑄤𑄬, 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨 𑄞𑄡𑄧𑄚𑄩𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨. 𑄇𑄖𑄟𑄧𑄚𑄨 𑄖𑄩𑄕𑄨? 𑄦𑄮𑄖𑄨 𑄥𑄮, 𑄞𑄨𑄇𑄴𑄈𑄤𑄬, 𑄥𑄟𑄡𑄮 𑄡𑄁 𑄟𑄦𑄧𑄃𑄉𑄴𑄉𑄨𑄓𑄧𑄦𑄮 𑄤𑄪𑄑𑄴𑄒𑄧𑄖𑄨. 𑄟𑄦𑄧𑄃𑄉𑄴𑄉𑄨𑄓𑄧𑄦𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄤𑄪𑄑𑄴𑄒𑄨𑄖𑄬 𑄖𑄬𑄚 𑄉𑄧𑄟𑄧𑄛𑄨 𑄓𑄡𑄴𑄦𑄚𑄴𑄖𑄨 𑄚𑄨𑄉𑄟𑄧𑄛𑄨 𑄓𑄡𑄴𑄦𑄚𑄴𑄖𑄨 𑄚𑄉𑄢𑄧𑄛𑄨 𑄓𑄡𑄴𑄦𑄚𑄴𑄖𑄨. 𑄉𑄧𑄟𑄬𑄥𑄪𑄛𑄨 𑄓𑄡𑄴𑄦𑄟𑄧𑄚𑄬𑄥𑄪 𑄚𑄨𑄉𑄟𑄬𑄥𑄪𑄛𑄨 𑄓𑄡𑄴𑄦𑄟𑄧𑄚𑄬𑄥𑄪 𑄚𑄉𑄢𑄬𑄥𑄪𑄛𑄨 𑄓𑄡𑄴𑄦𑄟𑄧𑄚𑄬𑄥𑄪 𑄖𑄖𑄴𑄗 𑄟𑄧𑄖𑄧𑄛𑄨 𑄛𑄪𑄖𑄴𑄖𑄁 𑄚𑄛𑄴𑄛𑄑𑄨𑄣𑄞𑄖𑄨, 𑄛𑄪𑄖𑄴𑄖𑄮𑄛𑄨 𑄟𑄧𑄖𑄢𑄁 𑄚𑄛𑄴𑄛𑄑𑄨𑄣𑄞𑄖𑄨. 𑄄𑄘𑄁, 𑄞𑄨𑄇𑄴𑄈𑄤𑄬, 𑄛𑄒𑄟𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄁 𑄞𑄡𑄚𑄴𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨.

‘‘𑄛𑄪𑄚 𑄌𑄛𑄢𑄁, 𑄞𑄨𑄇𑄴𑄈𑄤𑄬, 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄟𑄦𑄧𑄟𑄬𑄊𑄮 𑄤𑄪𑄑𑄴𑄒𑄧𑄖𑄨. 𑄟𑄦𑄧𑄟𑄬𑄊𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄤𑄪𑄑𑄴𑄒𑄨𑄖𑄬 𑄟𑄦𑄧𑄅𑄘𑄇𑄤𑄧𑄦𑄇𑄮 𑄥𑄐𑄴𑄎𑄧𑄡𑄖𑄨. 𑄟𑄦𑄧𑄅𑄘𑄇𑄤𑄧𑄦𑄇𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄐𑄴𑄎𑄧𑄡𑄚𑄴𑄖𑄬 𑄖𑄬𑄚 𑄉𑄧𑄟𑄧𑄛𑄨 𑄤𑄪𑄡𑄴𑄦𑄚𑄴𑄖𑄨 𑄚𑄨𑄉𑄟𑄧𑄛𑄨 𑄤𑄪𑄡𑄴𑄦𑄚𑄴𑄖𑄨 𑄚𑄉𑄢𑄧𑄛𑄨 𑄤𑄪𑄡𑄴𑄦𑄚𑄴𑄖𑄨. 𑄉𑄧𑄟𑄬𑄥𑄪𑄛𑄨 𑄤𑄪𑄡𑄴𑄦𑄟𑄧𑄚𑄬𑄥𑄪 𑄚𑄨𑄉𑄟𑄬𑄥𑄪𑄛𑄨 𑄤𑄪𑄡𑄴𑄦𑄟𑄧𑄚𑄬𑄥𑄪 𑄚𑄉𑄢𑄬𑄥𑄪𑄛𑄨 𑄤𑄪𑄡𑄴𑄦𑄟𑄧𑄚𑄬𑄥𑄪 𑄖𑄖𑄴𑄗 𑄟𑄧𑄖𑄧𑄛𑄨 𑄛𑄪𑄖𑄴𑄖𑄁 𑄚𑄛𑄴𑄛𑄑𑄨𑄣𑄞𑄖𑄨, 𑄛𑄪𑄖𑄴𑄖𑄮𑄛𑄨 𑄟𑄧𑄖𑄢𑄁 𑄚𑄛𑄴𑄛𑄑𑄨𑄣𑄞𑄖𑄨. 𑄄𑄘𑄁, 𑄞𑄨𑄇𑄴𑄈𑄤𑄬, 𑄘𑄪𑄖𑄨𑄡𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄁 𑄞𑄡𑄚𑄴𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨.

‘‘𑄛𑄪𑄚 𑄌𑄛𑄢𑄁, 𑄞𑄨𑄇𑄴𑄈𑄤𑄬, 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄞𑄡𑄁 𑄦𑄮𑄖𑄨 𑄃𑄑𑄤𑄨𑄥𑄋𑄴𑄇𑄮𑄛𑄮, 𑄌𑄇𑄴𑄇𑄥𑄟𑄧𑄢𑄪𑅄𑄴𑄦𑄧 𑄎𑄧𑄚𑄛𑄘𑄧 𑄛𑄢𑄨𑄡𑄧𑄡𑄚𑄴𑄖𑄨. 𑄞𑄡𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄖𑄨 𑄃𑄑𑄤𑄨𑄥𑄋𑄴𑄇𑄮𑄛𑄬 𑄌𑄇𑄴𑄇𑄥𑄟𑄧𑄢𑄪𑅄𑄴𑄦𑄬𑄥𑄪 𑄎𑄧𑄚𑄛𑄘𑄬𑄥𑄪 𑄛𑄢𑄨𑄡𑄧𑄡𑄚𑄴𑄖𑄬𑄥𑄪 𑄖𑄖𑄴𑄗 𑄟𑄧𑄖𑄧𑄛𑄨 𑄛𑄪𑄖𑄴𑄖𑄁 𑄚𑄛𑄴𑄛𑄑𑄨𑄣𑄞𑄖𑄨, 𑄛𑄪𑄖𑄴𑄖𑄮𑄛𑄨 𑄟𑄧𑄖𑄢𑄁 𑄚𑄛𑄴𑄛𑄑𑄨𑄣𑄞𑄖𑄨. 𑄄𑄘𑄁, 𑄞𑄨𑄇𑄴𑄈𑄤𑄬, 𑄖𑄖𑄨𑄡𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄁 𑄞𑄡𑄚𑄴𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨. 𑄄𑄟𑄧𑄚𑄨 𑄈𑄮, 𑄞𑄨𑄇𑄴𑄈𑄤𑄬, 𑄖𑄩𑄕𑄨 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨 𑄞𑄡𑄧𑄚𑄩𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨.

‘‘𑄖𑄧𑄚𑄨 𑄈𑄮 𑄛𑄚𑄨𑄟𑄧𑄚𑄨 [𑄄𑄟𑄧𑄚𑄨 𑄈𑄮 (𑄥𑄩.), 𑄄𑄟𑄧𑄚𑄨 𑄈𑄮 𑄛𑄚 (𑄇.)], 𑄞𑄨𑄇𑄴𑄈𑄤𑄬, 𑄖𑄩𑄕𑄨 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨𑄡𑄬𑄤 𑄞𑄡𑄧𑄚𑄨 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨 𑄞𑄡𑄧𑄚𑄩𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨. 𑄇𑄖𑄟𑄧𑄚𑄨 𑄖𑄩𑄕𑄨? 𑄦𑄮𑄖𑄨 𑄥𑄮, 𑄞𑄨𑄇𑄴𑄈𑄤𑄬, 𑄥𑄟𑄡𑄮 𑄡𑄁 𑄟𑄦𑄧𑄃𑄉𑄴𑄉𑄨𑄓𑄧𑄦𑄮 𑄤𑄪𑄑𑄴𑄒𑄧𑄖𑄨. 𑄟𑄦𑄧𑄃𑄉𑄴𑄉𑄨𑄓𑄧𑄦𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄤𑄪𑄑𑄴𑄒𑄨𑄖𑄬 𑄖𑄬𑄚 𑄉𑄧𑄟𑄧𑄛𑄨 𑄓𑄡𑄴𑄦𑄚𑄴𑄖𑄨 𑄚𑄨𑄉𑄟𑄧𑄛𑄨 𑄓𑄡𑄴𑄦𑄚𑄴𑄖𑄨 𑄚𑄉𑄢𑄧𑄛𑄨 𑄓𑄡𑄴𑄦𑄚𑄴𑄖𑄨. 𑄉𑄧𑄟𑄬𑄥𑄪𑄛𑄨 𑄓𑄡𑄴𑄦𑄟𑄧𑄚𑄬𑄥𑄪 𑄚𑄨𑄉𑄟𑄬𑄥𑄪𑄛𑄨 𑄓𑄡𑄴𑄦𑄟𑄧𑄚𑄬𑄥𑄪 𑄚𑄉𑄢𑄬𑄥𑄪𑄛𑄨 𑄓𑄡𑄴𑄦𑄟𑄧𑄚𑄬𑄥𑄪 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄇𑄘𑄧𑄌𑄨 𑄇𑄢𑄦𑄌𑄨 𑄟𑄧𑄖𑄧𑄛𑄨 𑄛𑄪𑄖𑄴𑄖𑄁 𑄛𑄑𑄨𑄣𑄞𑄖𑄨, 𑄛𑄪𑄖𑄴𑄖𑄮𑄛𑄨 𑄟𑄧𑄖𑄢𑄁 𑄛𑄑𑄨𑄣𑄞𑄖𑄨. 𑄄𑄘𑄁, 𑄞𑄨𑄇𑄴𑄈𑄤𑄬, 𑄛𑄒𑄟𑄁 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄁𑄡𑄬𑄤 𑄞𑄡𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄁 𑄞𑄡𑄚𑄴𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨.

‘‘𑄛𑄪𑄚 𑄌𑄛𑄢𑄁, 𑄞𑄨𑄇𑄴𑄈𑄤𑄬, 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄟𑄦𑄧𑄟𑄬𑄊𑄮 𑄤𑄪𑄑𑄴𑄒𑄧𑄖𑄨. 𑄟𑄦𑄧𑄟𑄬𑄊𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄤𑄪𑄑𑄴𑄒𑄨𑄖𑄬 𑄟𑄦𑄧𑄅𑄘𑄇𑄤𑄧𑄦𑄇𑄮 𑄥𑄐𑄴𑄎𑄧𑄡𑄖𑄨. 𑄟𑄦𑄧𑄅𑄘𑄇𑄤𑄧𑄦𑄇𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄐𑄴𑄎𑄧𑄖𑄬 𑄖𑄬𑄚 𑄉𑄧𑄟𑄧𑄛𑄨 𑄤𑄪𑄡𑄴𑄦𑄚𑄴𑄖𑄨 𑄚𑄨𑄉𑄟𑄧𑄛𑄨 𑄤𑄪𑄡𑄴𑄦𑄚𑄴𑄖𑄨 𑄚𑄉𑄢𑄧𑄛𑄨 𑄤𑄪𑄡𑄴𑄦𑄚𑄴𑄖𑄨. 𑄉𑄧𑄟𑄬𑄥𑄪𑄛𑄨 𑄤𑄪𑄡𑄴𑄦𑄟𑄧𑄚𑄬𑄥𑄪 𑄚𑄨𑄉𑄟𑄬𑄥𑄪𑄛𑄨 𑄤𑄪𑄡𑄴𑄦𑄟𑄧𑄚𑄬𑄥𑄪 𑄚𑄉𑄢𑄬𑄥𑄪𑄛𑄨 𑄤𑄪𑄡𑄴𑄦𑄟𑄧𑄚𑄬𑄥𑄪 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄇𑄘𑄧𑄌𑄨 𑄇𑄢𑄦𑄌𑄨 𑄟𑄧𑄖𑄧𑄛𑄨 𑄛𑄪𑄖𑄴𑄖𑄁 𑄛𑄑𑄨𑄣𑄞𑄖𑄨, 𑄛𑄪𑄖𑄴𑄖𑄮𑄛𑄨 𑄟𑄧𑄖𑄢𑄁 𑄛𑄑𑄨𑄣𑄞𑄖𑄨. 𑄄𑄘𑄁, 𑄞𑄨𑄇𑄴𑄈𑄤𑄬, 𑄘𑄪𑄖𑄨𑄡𑄁 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄁𑄡𑄬𑄤 𑄞𑄡𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄁 𑄞𑄡𑄚𑄴𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨.

‘‘𑄛𑄪𑄚 𑄌𑄛𑄢𑄁, 𑄞𑄨𑄇𑄴𑄈𑄤𑄬, 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄞𑄡𑄁 𑄦𑄮𑄖𑄨 𑄃𑄑𑄤𑄨𑄥𑄋𑄴𑄇𑄮𑄛𑄮, 𑄌𑄇𑄴𑄇𑄥𑄟𑄧𑄢𑄪𑅄𑄴𑄦𑄧 𑄎𑄧𑄚𑄛𑄘𑄧 𑄛𑄢𑄨𑄡𑄧𑄡𑄚𑄴𑄖𑄨. 𑄞𑄡𑄬 𑄈𑄮 𑄛𑄚, 𑄞𑄨𑄇𑄴𑄈𑄤𑄬, 𑄥𑄖𑄨 𑄃𑄑𑄤𑄨𑄥𑄋𑄴𑄇𑄮𑄛𑄬 𑄌𑄇𑄴𑄇𑄥𑄟𑄧𑄢𑄪𑅄𑄴𑄦𑄬𑄥𑄪 𑄎𑄧𑄚𑄛𑄘𑄬𑄥𑄪 𑄛𑄢𑄨𑄡𑄧𑄡𑄚𑄴𑄖𑄬𑄥𑄪 𑄦𑄮𑄖𑄨 𑄥𑄮 𑄥𑄟𑄡𑄮 𑄡𑄁 𑄇𑄘𑄧𑄌𑄨 𑄇𑄢𑄦𑄌𑄨 𑄟𑄧𑄖𑄧𑄛𑄨 𑄛𑄪𑄖𑄴𑄖𑄁 𑄛𑄑𑄨𑄣𑄞𑄖𑄨, 𑄛𑄪𑄖𑄴𑄖𑄮𑄛𑄨 𑄟𑄧𑄖𑄢𑄁 𑄛𑄑𑄨𑄣𑄞𑄖𑄨. 𑄄𑄘𑄁, 𑄞𑄨𑄇𑄴𑄈𑄤𑄬, 𑄖𑄖𑄨𑄡𑄁 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄁𑄡𑄬𑄤 𑄞𑄡𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄁 𑄞𑄡𑄚𑄴𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨. ‘‘𑄄𑄟𑄧𑄚𑄨 𑄈𑄮, 𑄞𑄨𑄇𑄴𑄈𑄤𑄬, 𑄖𑄩𑄕𑄨 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨𑄡𑄬𑄤 𑄞𑄡𑄧𑄚𑄨 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨 𑄞𑄡𑄧𑄚𑄩𑄖𑄨 𑄃𑄥𑄴𑄥𑄪𑄖𑄤𑄧 𑄛𑄪𑄗𑄪𑄎𑄴𑄎𑄚𑄮 𑄞𑄧𑄥𑄖𑄨’’.

‘‘𑄖𑄩𑄕𑄨𑄟𑄧𑄚𑄨, 𑄞𑄨𑄇𑄴𑄈𑄤𑄬, 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨 𑄞𑄡𑄧𑄚𑄨. 𑄇𑄖𑄟𑄧𑄚𑄨 𑄖𑄩𑄕𑄨? 𑄎𑄢𑄧𑄞𑄡𑄁, 𑄝𑄴𑄡𑄧𑄙𑄨𑄞𑄡𑄁, 𑄟𑄢𑄕𑄞𑄡𑄚𑄴𑄖𑄨. 𑄚, 𑄞𑄨𑄇𑄴𑄈𑄤𑄬, 𑄟𑄧𑄖𑄧 𑄛𑄪𑄖𑄴𑄖𑄁 𑄎𑄩𑄢𑄟𑄧𑄚𑄁 𑄆𑄤𑄁 𑄣𑄞𑄖𑄨 – ‘𑄃𑄦𑄁 𑄎𑄩𑄢𑄧𑄟𑄨, 𑄟𑄧 𑄟𑄬 𑄛𑄪𑄖𑄴𑄖𑄮 𑄎𑄩𑄢𑄩’𑄖𑄨; 𑄛𑄪𑄖𑄴𑄖𑄮 𑄤𑄧 𑄛𑄚 𑄟𑄧𑄖𑄢𑄁 𑄎𑄩𑄢𑄟𑄧𑄚𑄁 𑄚 𑄆𑄤𑄁 𑄣𑄞𑄖𑄨 – ‘𑄃𑄦𑄁 𑄎𑄩𑄢𑄧𑄟𑄨, 𑄟𑄧 𑄟𑄬 𑄟𑄧𑄖𑄧 𑄎𑄩𑄢𑄩’’’𑄖𑄨.

‘‘𑄚, 𑄞𑄨𑄇𑄴𑄈𑄤𑄬, 𑄟𑄧𑄖𑄧 𑄛𑄪𑄖𑄴𑄖𑄁 𑄝𑄴𑄡𑄧𑄙𑄨𑄡𑄟𑄧𑄚𑄁 𑄆𑄤𑄁 𑄣𑄞𑄖𑄨 – ‘𑄃𑄦𑄁 𑄝𑄴𑄡𑄧𑄙𑄨𑄡𑄧𑄟𑄨, 𑄟𑄧 𑄟𑄬 𑄛𑄪𑄖𑄴𑄖𑄮 𑄝𑄴𑄡𑄧𑄙𑄨𑄡𑄩’𑄖𑄨; 𑄛𑄪𑄖𑄴𑄖𑄮 𑄤𑄧 𑄛𑄚 𑄟𑄧𑄖𑄢𑄁 𑄝𑄴𑄡𑄧𑄙𑄨𑄡𑄟𑄧𑄚𑄁 𑄚 𑄆𑄤𑄁 𑄣𑄞𑄖𑄨 – ‘𑄃𑄦𑄁 𑄝𑄴𑄡𑄧𑄙𑄨𑄡𑄧𑄟𑄨, 𑄟𑄧 𑄟𑄬 𑄟𑄧𑄖𑄧 𑄝𑄴𑄡𑄧𑄙𑄨𑄡𑄩’’’𑄖𑄨.

‘‘𑄚, 𑄞𑄨𑄇𑄴𑄈𑄤𑄬, 𑄟𑄧𑄖𑄧 𑄛𑄪𑄖𑄴𑄖𑄁 𑄟𑄩𑄡𑄟𑄧𑄚𑄁 𑄆𑄤𑄁 𑄣𑄞𑄖𑄨 – ‘𑄃𑄦𑄁 𑄟𑄩𑄡𑄧𑄟𑄨, 𑄟𑄧 𑄟𑄬 𑄛𑄪𑄖𑄴𑄖𑄮 𑄟𑄩𑄡𑄩’𑄖𑄨; 𑄛𑄪𑄖𑄴𑄖𑄮 𑄤𑄧 𑄛𑄚 𑄟𑄧𑄖𑄢𑄁 𑄟𑄩𑄡𑄟𑄧𑄚𑄁 𑄚 𑄆𑄤𑄁 𑄣𑄞𑄖𑄨 – ‘𑄃𑄦𑄁 𑄟𑄩𑄡𑄧𑄟𑄨, 𑄟𑄧 𑄟𑄬 𑄟𑄧𑄖𑄧 𑄟𑄩𑄡𑄩’𑄖𑄨. 𑄄𑄟𑄧𑄚𑄨 𑄈𑄮, 𑄞𑄨𑄇𑄴𑄈𑄤𑄬, 𑄖𑄩𑄕𑄨 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄨 𑄞𑄡𑄧𑄚𑄩’’𑄖𑄨.

‘‘𑄃𑄖𑄴𑄗𑄨, 𑄞𑄨𑄇𑄴𑄈𑄤𑄬, 𑄟𑄉𑄴𑄉𑄮 𑄃𑄖𑄴𑄗𑄨 𑄛𑄑𑄨𑄛𑄘𑄧 𑄄𑄟𑄬𑄥𑄐𑄴𑄌 𑄖𑄨𑄕𑄴𑄕𑄁 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄁 𑄞𑄡𑄧𑄚𑄁 𑄄𑄟𑄬𑄥𑄐𑄴𑄌 𑄖𑄨𑄕𑄴𑄕𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄁 𑄞𑄡𑄧𑄚𑄁 𑄛𑄦𑄧𑄚𑄧𑄡 𑄥𑄟𑄖𑄨𑄇𑄴𑄇𑄟𑄧𑄡 𑄥𑄁𑄤𑄖𑄴𑄖𑄖𑄨. 𑄇𑄖𑄟𑄮 𑄌, 𑄞𑄨𑄇𑄴𑄈𑄤𑄬, 𑄟𑄉𑄴𑄉𑄮 𑄇𑄖𑄟𑄧 𑄌 𑄛𑄑𑄨𑄛𑄘𑄧 𑄄𑄟𑄬𑄥𑄐𑄴𑄌 𑄖𑄨𑄕𑄴𑄕𑄁 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄁 𑄞𑄡𑄧𑄚𑄁 𑄄𑄟𑄬𑄥𑄐𑄴𑄌 𑄖𑄨𑄕𑄴𑄕𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄁 𑄞𑄡𑄧𑄚𑄁 𑄛𑄦𑄧𑄚𑄧𑄡 𑄥𑄟𑄖𑄨𑄇𑄴𑄇𑄟𑄧𑄡 𑄥𑄁𑄤𑄖𑄴𑄖𑄖𑄨? 𑄃𑄡𑄟𑄬𑄤 𑄃𑄢𑄨𑄡𑄮 𑄃𑄑𑄴𑄒𑄋𑄴𑄉𑄨𑄇𑄮 𑄟𑄉𑄴𑄉𑄮, 𑄥𑄬𑄡𑄴𑄡𑄗𑄨𑄘𑄁 – 𑄥𑄟𑄴𑄟𑄧𑄘𑄨𑄑𑄴𑄒𑄨, 𑄥𑄟𑄴𑄟𑄧𑄥𑄋𑄴𑄇𑄛𑄮, 𑄥𑄟𑄴𑄟𑄧𑄤𑄧𑄌𑄧, 𑄥𑄟𑄴𑄟𑄧𑄇𑄟𑄴𑄟𑄚𑄴𑄖𑄮, 𑄥𑄟𑄴𑄟𑄧𑄃𑄂𑄎𑄩𑄤𑄮, 𑄥𑄟𑄴𑄟𑄧𑄤𑄧𑄡𑄧𑄟𑄮, 𑄥𑄟𑄴𑄟𑄧𑄥𑄖𑄨, 𑄥𑄟𑄴𑄟𑄧𑄥𑄟𑄧𑄙𑄨. 𑄃𑄡𑄁 𑄈𑄮, 𑄞𑄨𑄇𑄴𑄈𑄤𑄬, 𑄟𑄉𑄴𑄉𑄮 𑄃𑄡𑄁 𑄛𑄑𑄨𑄛𑄘𑄧 𑄄𑄟𑄬𑄥𑄐𑄴𑄌 𑄖𑄨𑄕𑄴𑄕𑄁 𑄥𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄁 𑄞𑄡𑄧𑄚𑄁 𑄄𑄟𑄬𑄥𑄐𑄴𑄌 𑄖𑄨𑄕𑄴𑄕𑄁 𑄃𑄟𑄧𑄖𑄧𑄛𑄪𑄖𑄴𑄖𑄨𑄇𑄧𑄚𑄁 𑄞𑄡𑄧𑄚𑄁 𑄛𑄦𑄧𑄚𑄧𑄡 𑄥𑄟𑄖𑄨𑄇𑄴𑄇𑄟𑄧𑄡 𑄥𑄁𑄤𑄖𑄴𑄖𑄖𑄩’’𑄖𑄨. 𑄘𑄪𑄖𑄨𑄡𑄁.