𑁧𑁩. 𑀆𑀯𑀸𑀲𑀺𑀓𑀯𑀕𑁆𑀕𑁄

𑁪𑁬𑁧. ‘‘𑀓𑀢𑀺𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺? ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀲𑀗𑁆𑀖𑀺𑀓𑀁 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑀺 𑁋 𑀇𑀫𑁂𑀳𑀺 𑀔𑁄, 𑀉𑀧𑀸𑀮𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

‘‘𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀲𑀗𑁆𑀖𑀺𑀓𑀁 𑀦 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑀺 𑁋 𑀇𑀫𑁂𑀳𑀺 𑀔𑁄, 𑀉𑀧𑀸𑀮𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑁪𑁬𑁨. ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀥𑀫𑁆𑀫𑀺𑀓𑀸 𑀯𑀺𑀦𑀬𑀩𑁆𑀬𑀸𑀓𑀭𑀡𑀸’’𑀢𑀺? ‘‘𑀧𑀜𑁆𑀘𑀺𑀫𑁂, 𑀉𑀧𑀸𑀮𑀺, 𑀅𑀥𑀫𑁆𑀫𑀺𑀓𑀸 𑀯𑀺𑀦𑀬𑀩𑁆𑀬𑀸𑀓𑀭𑀡𑀸. 𑀓𑀢𑀫𑁂 𑀧𑀜𑁆𑀘? 𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀸𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑁋 𑀇𑀫𑁂 𑀔𑁄, 𑀉𑀧𑀸𑀮𑀺, 𑀧𑀜𑁆𑀘 𑀅𑀥𑀫𑁆𑀫𑀺𑀓𑀸 𑀯𑀺𑀦𑀬𑀩𑁆𑀬𑀸𑀓𑀭𑀡𑀸. 𑀧𑀜𑁆𑀘𑀺𑀫𑁂, 𑀉𑀧𑀸𑀮𑀺, 𑀥𑀫𑁆𑀫𑀺𑀓𑀸 𑀯𑀺𑀦𑀬𑀩𑁆𑀬𑀸𑀓𑀭𑀡𑀸. 𑀓𑀢𑀫𑁂 𑀧𑀜𑁆𑀘? 𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑁋 𑀇𑀫𑁂 𑀔𑁄, 𑀉𑀧𑀸𑀮𑀺, 𑀧𑀜𑁆𑀘 𑀥𑀫𑁆𑀫𑀺𑀓𑀸 𑀯𑀺𑀦𑀬𑀩𑁆𑀬𑀸𑀓𑀭𑀡𑀸’’𑀢𑀺.

𑁪𑁬𑁩. [𑀅. 𑀦𑀺. 𑁫.𑁨𑁭𑁨-𑁨𑁮𑁫] ‘‘𑀓𑀢𑀺𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺? ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀉𑀤𑁆𑀤𑀺𑀝𑁆𑀞𑀸𑀦𑀼𑀤𑁆𑀤𑀺𑀝𑁆𑀞𑀁 𑀦 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀉𑀧𑀸𑀮𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂.

[𑀅. 𑀦𑀺. 𑁫.𑁨𑁭𑁨-𑁨𑁮𑁫] ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀉𑀤𑁆𑀤𑀺𑀝𑁆𑀞𑀸𑀦𑀼𑀤𑁆𑀤𑀺𑀝𑁆𑀞𑀁 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀉𑀧𑀸𑀮𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑁪𑁬𑁪. ‘‘𑀓𑀢𑀺𑀳𑀺 𑀦𑀼 𑀔𑁄, 𑀪𑀦𑁆𑀢𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄…𑀧𑁂… 𑀪𑀡𑁆𑀟𑀸𑀕𑀸𑀭𑀺𑀓𑁄…𑀧𑁂… 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄…𑀧𑁂… 𑀘𑀻𑀯𑀭𑀪𑀸𑀚𑀓𑁄…𑀧𑁂… 𑀬𑀸𑀕𑀼𑀪𑀸𑀚𑀓𑁄…𑀧𑁂… 𑀨𑀮𑀪𑀸𑀚𑀓𑁄…𑀧𑁂… 𑀔𑀚𑁆𑀚𑀪𑀸𑀚𑀓𑁄…𑀧𑁂… 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁄…𑀧𑁂… 𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑁄…𑀧𑁂… 𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑁄…𑀧𑁂… 𑀆𑀭𑀸𑀫𑀺𑀓𑀧𑁂𑀲𑀓𑁄…𑀧𑁂… 𑀲𑀸𑀫𑀡𑁂𑀭𑀧𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’’𑀢𑀺? ‘‘𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀫𑀡𑁂𑀭𑀧𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀧𑁂𑀲𑀺𑀢𑀸𑀧𑁂𑀲𑀺𑀢𑀁 𑀦 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀉𑀧𑀸𑀮𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀫𑀡𑁂𑀭𑀧𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂. 𑀧𑀜𑁆𑀘𑀳𑀼𑀧𑀸𑀮𑀺, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀫𑀡𑁂𑀭𑀧𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀧𑁂𑀲𑀺𑀢𑀸𑀧𑁂𑀲𑀺𑀢𑀁 𑀚𑀸𑀦𑀸𑀢𑀺 𑁋 𑀇𑀫𑁂𑀳𑀺 𑀔𑁄, 𑀉𑀧𑀸𑀮𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀫𑀡𑁂𑀭𑀧𑁂𑀲𑀓𑁄 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀲𑀕𑁆𑀕𑁂’’𑀢𑀺.

𑀆𑀯𑀸𑀲𑀺𑀓𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀢𑁂𑀭𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀯𑀸𑀲𑀺𑀓𑀩𑁆𑀬𑀸𑀓𑀭𑀡𑀸, 𑀪𑀢𑁆𑀢𑀼𑀲𑁂𑀦𑀸𑀲𑀦𑀸𑀦𑀺 𑀘;

𑀪𑀡𑁆𑀟𑀘𑀻𑀯𑀭𑀕𑁆𑀕𑀸𑀳𑁄 𑀘, 𑀘𑀻𑀯𑀭𑀲𑁆𑀲 𑀘 𑀪𑀸𑀚𑀓𑁄.

𑀬𑀸𑀕𑀼 𑀨𑀮𑀁 𑀔𑀚𑁆𑀚𑀓𑀜𑁆𑀘, 𑀅𑀧𑁆𑀧𑀲𑀸𑀝𑀺𑀬𑀕𑀸𑀳𑀓𑁄;

𑀧𑀢𑁆𑀢𑁄 𑀆𑀭𑀸𑀫𑀺𑀓𑁄 𑀘𑁂𑀯, 𑀲𑀸𑀫𑀡𑁂𑀭𑁂𑀦 𑀧𑁂𑀲𑀓𑁄𑀢𑀺.