𑁩. 𑀦𑀳𑀸𑀦𑀯𑀕𑁆𑀕𑁄

𑁨𑁩𑁩. 𑀦𑀕𑁆𑀕𑀸 𑀦𑀳𑀸𑀬𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀦𑀳𑀸𑀬𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀦𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀉𑀤𑀓𑀲𑀸𑀝𑀺𑀓𑀁 𑀓𑀸𑀭𑀸𑀧𑁂𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀓𑀸𑀭𑀸𑀧𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀓𑀸𑀭𑀸𑀧𑀺𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀯𑀺𑀲𑀺𑀩𑁆𑀩𑁂𑀢𑁆𑀯𑀸 𑀯𑀸 𑀯𑀺𑀲𑀺𑀩𑁆𑀩𑀸𑀧𑁂𑀢𑁆𑀯𑀸 𑀯𑀸 𑀦𑁂𑀯 𑀲𑀺𑀩𑁆𑀩𑁂𑀦𑁆𑀢𑀻 𑀦 𑀲𑀺𑀩𑁆𑀩𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀦𑁆𑀢𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀧𑀸𑀘𑀺𑀢𑁆𑀢𑀺𑀬𑀁.

𑀧𑀜𑁆𑀘𑀸𑀳𑀺𑀓𑀁 𑀲𑀗𑁆𑀖𑀸𑀝𑀺𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀻 𑀏𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀧𑀸𑀘𑀺𑀢𑁆𑀢𑀺𑀬𑀁. 𑀘𑀻𑀯𑀭𑀲𑀗𑁆𑀓𑀫𑀦𑀻𑀬𑀁 𑀥𑀸𑀭𑁂𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀥𑀸𑀭𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀥𑀸𑀭𑀺𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀕𑀡𑀲𑁆𑀲 𑀘𑀻𑀯𑀭𑀮𑀸𑀪𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀓𑀭𑁄𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀓𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀥𑀫𑁆𑀫𑀺𑀓𑀁 𑀘𑀻𑀯𑀭𑀯𑀺𑀪𑀗𑁆𑀕𑀁 𑀧𑀝𑀺𑀩𑀸𑀳𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀧𑀝𑀺𑀩𑀸𑀳𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀧𑀝𑀺𑀩𑀸𑀳𑀺𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀕𑀸𑀭𑀺𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀫𑀡𑀘𑀻𑀯𑀭𑀁 𑀤𑁂𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀤𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀤𑀺𑀦𑁆𑀦𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀤𑀼𑀩𑁆𑀩𑀮𑀘𑀻𑀯𑀭𑀧𑀘𑁆𑀘𑀸𑀲𑀸 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀅𑀢𑀺𑀓𑁆𑀓𑀸𑀫𑀺𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀥𑀫𑁆𑀫𑀺𑀓𑀁 𑀓𑀣𑀺𑀦𑀼𑀤𑁆𑀥𑀸𑀭𑀁 𑀧𑀝𑀺𑀩𑀸𑀳𑀦𑁆𑀢𑀻 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀧𑀝𑀺𑀩𑀸𑀳𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁; 𑀧𑀝𑀺𑀩𑀸𑀳𑀺𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀦𑀳𑀸𑀦𑀯𑀕𑁆𑀕𑁄 𑀢𑀢𑀺𑀬𑁄.