𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧𑁯𑁩. 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀅𑀓𑁆𑀔𑀸𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀯𑀝𑁆𑀝𑀓𑀢𑁂 𑀫𑀼𑀔𑁂 𑀅𑀘𑁆𑀙𑀼𑀧𑀦𑁆𑀢𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲; 𑀚𑀢𑀼𑀫𑀝𑁆𑀞𑀓𑁂 𑀧𑀸𑀘𑀺𑀢𑁆𑀢𑀺𑀬𑀁 𑁋 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀇𑀫𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑀧𑀘𑁆𑀘𑀬𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀅𑀢𑀺𑀭𑁂𑀓𑀫𑀸𑀲𑀓𑀁 𑀯𑀸 𑀊𑀦𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑀧𑀘𑁆𑀘𑀬𑀸 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀧𑀘𑁆𑀘𑀬𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀫𑀦𑀼𑀲𑁆𑀲𑀁 𑀑𑀤𑀺𑀲𑁆𑀲 𑀑𑀧𑀸𑀢𑀁 𑀔𑀡𑀢𑀺 ‘‘𑀧𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲; 𑀧𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀧𑀘𑁆𑀘𑀬𑀸 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀦𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀦𑀧𑀘𑁆𑀘𑀬𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑁋 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺 𑀪𑀡𑀢𑀺, 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀦𑀧𑀘𑁆𑀘𑀬𑀸 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀦𑀺𑀝𑁆𑀞𑀺𑀢𑀸.