𑁬. 𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑁄

𑁬𑁨𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀗𑁆𑀖𑀲𑁆𑀲 𑀧𑀬𑁄𑀧𑀸𑀦𑀁 𑀧𑀝𑀺𑀬𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀔𑀻𑀭𑀁 𑀧𑀺𑀯𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀦𑀝𑀧𑀼𑀩𑁆𑀩𑀓𑁄 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 ‘‘𑀲𑀩𑁆𑀩𑁄𑀬𑀁 𑀫𑀜𑁆𑀜𑁂 𑀲𑀗𑁆𑀖𑁄 𑀲𑀻𑀢𑀻𑀓𑀢𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀆𑀭𑀩𑁆𑀪 𑀤𑀯𑀁 𑀓𑀭𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀗𑁆𑀖𑀁 𑀆𑀭𑀩𑁆𑀪 𑀤𑀯𑀁 𑀅𑀓𑀸𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀲𑀗𑁆𑀖𑀁 𑀆𑀭𑀩𑁆𑀪 𑀤𑀯𑀁 𑀓𑀭𑀺𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀁 𑀯𑀸 𑀥𑀫𑁆𑀫𑀁 𑀯𑀸 𑀲𑀗𑁆𑀖𑀁 𑀯𑀸 𑀆𑀭𑀩𑁆𑀪 𑀤𑀯𑁄 𑀓𑀸𑀢𑀩𑁆𑀩𑁄. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀦 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀦 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁨𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀦𑁆𑀢𑀺…𑀧𑁂….

‘‘𑀦 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀦 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁨𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀦𑁆𑀢𑀺…𑀧𑁂….

‘‘𑀦 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀦 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲, 𑀧𑀭𑀺𑀢𑁆𑀢𑀓𑁂 𑀲𑁂𑀲𑁂 𑀏𑀓𑀢𑁄 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀦𑀺𑀮𑁆𑀮𑁂𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀦𑁆𑀢𑀺…𑀧𑁂….

‘‘𑀦 𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀦 𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 [𑀲𑀼𑀁𑀲𑀼𑀫𑀸𑀭𑀕𑀺𑀭𑁂 (𑀲𑀻. 𑀲𑁆𑀬𑀸.), 𑀲𑀁𑀲𑀼𑀫𑀸𑀭𑀕𑀺𑀭𑁂 (𑀓.)] 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀓𑁄𑀓𑀦𑀤𑁂 [𑀓𑁄𑀓𑀦𑀼𑀤𑁂 (𑀓.)] 𑀧𑀸𑀲𑀸𑀤𑁂 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀦 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀦 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲, ‘‘𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀥𑁄𑀯𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀪𑀕𑁆𑀕𑁂𑀲𑀼 𑀯𑀺𑀳𑀭𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀓𑁄𑀓𑀦𑀤𑁂 𑀧𑀸𑀲𑀸𑀤𑁂 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀦 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀦 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀢𑀩𑁆𑀩𑀁. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀕𑀺𑀮𑀸𑀦𑀲𑁆𑀲, 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀝𑀺𑀕𑁆𑀕𑀳𑁂 𑀯𑀸 𑀦𑀻𑀳𑀭𑀺𑀢𑁆𑀯𑀸 𑀯𑀸 𑀙𑀟𑁆𑀟𑁂𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀙𑀢𑁆𑀢𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀙𑀢𑁆𑀢𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀙𑀢𑁆𑀢𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀦 𑀙𑀢𑁆𑀢𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁬𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀢𑁆𑀢𑀧𑀸𑀡𑀺𑀲𑁆𑀲 𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀙𑀢𑁆𑀢𑀧𑀸𑀡𑀺𑀲𑁆𑀲 𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀦 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙𑀢𑁆𑀢𑀧𑀸𑀡𑀺𑀲𑁆𑀲 𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀦 𑀙𑀢𑁆𑀢𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀙𑀢𑁆𑀢𑀁 𑀦𑀸𑀫 𑀢𑀻𑀡𑀺 𑀙𑀢𑁆𑀢𑀸𑀦𑀺 𑁋 𑀲𑁂𑀢𑀘𑁆𑀙𑀢𑁆𑀢𑀁, 𑀓𑀺𑀮𑀜𑁆𑀚𑀘𑁆𑀙𑀢𑁆𑀢𑀁, 𑀧𑀡𑁆𑀡𑀘𑁆𑀙𑀢𑁆𑀢𑀁 𑀫𑀡𑁆𑀟𑀮𑀩𑀤𑁆𑀥𑀁 𑀲𑀮𑀸𑀓𑀩𑀤𑁆𑀥𑀁.

𑀥𑀫𑁆𑀫𑁄 𑀦𑀸𑀫 𑀩𑀼𑀤𑁆𑀥𑀪𑀸𑀲𑀺𑀢𑁄 𑀲𑀸𑀯𑀓𑀪𑀸𑀲𑀺𑀢𑁄 𑀇𑀲𑀺𑀪𑀸𑀲𑀺𑀢𑁄 𑀤𑁂𑀯𑀢𑀸𑀪𑀸𑀲𑀺𑀢𑁄 𑀅𑀢𑁆𑀣𑀽𑀧𑀲𑀜𑁆𑀳𑀺𑀢𑁄 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑁄.

𑀤𑁂𑀲𑁂𑀬𑁆𑀬𑀸𑀢𑀺 𑀧𑀤𑁂𑀦 𑀤𑁂𑀲𑁂𑀢𑀺, 𑀧𑀤𑁂 𑀧𑀤𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀓𑁆𑀔𑀭𑀸𑀬 𑀤𑁂𑀲𑁂𑀢𑀺, 𑀅𑀓𑁆𑀔𑀭𑀓𑁆𑀔𑀭𑀸𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦 𑀙𑀢𑁆𑀢𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀙𑀢𑁆𑀢𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀡𑁆𑀟𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺…𑀧𑁂….

‘‘𑀦 𑀤𑀡𑁆𑀟𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀤𑀡𑁆𑀟𑁄 𑀦𑀸𑀫 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀳𑀢𑁆𑀣𑁄 𑀤𑀡𑁆𑀟𑁄. 𑀢𑀢𑁄 𑀉𑀓𑁆𑀓𑀝𑁆𑀞𑁄 𑀅𑀤𑀡𑁆𑀟𑁄, 𑀑𑀫𑀓𑁄 𑀅𑀤𑀡𑁆𑀟𑁄.

𑀦 𑀤𑀡𑁆𑀟𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀤𑀡𑁆𑀟𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀣𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺…𑀧𑁂….

‘‘𑀦 𑀲𑀢𑁆𑀣𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀲𑀢𑁆𑀣𑀁 𑀦𑀸𑀫 𑀏𑀓𑀢𑁄𑀥𑀸𑀭𑀁 𑀉𑀪𑀢𑁄𑀥𑀸𑀭𑀁 𑀧𑀳𑀭𑀡𑀁.

𑀦 𑀲𑀢𑁆𑀣𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀲𑀢𑁆𑀣𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬𑁩𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀆𑀯𑀼𑀥𑀧𑀸𑀡𑀺𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺…𑀧𑁂….

‘‘𑀦 𑀆𑀯𑀼𑀥𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺.

𑀆𑀯𑀼𑀥𑀁 𑀦𑀸𑀫 𑀘𑀸𑀧𑁄 𑀓𑁄𑀤𑀡𑁆𑀟𑁄.

𑀦 𑀆𑀯𑀼𑀥𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑁄 𑀤𑁂𑀲𑁂𑀢𑀩𑁆𑀩𑁄. 𑀬𑁄 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀆𑀯𑀼𑀥𑀧𑀸𑀡𑀺𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀲𑀼𑀭𑀼𑀲𑀼𑀭𑀼𑀯𑀕𑁆𑀕𑁄 𑀙𑀝𑁆𑀞𑁄.