𑁧𑁦. 𑀘𑀻𑀯𑀭𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁

𑁩𑁭𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀲𑀦𑁆𑀦𑀺𑀳𑀺𑀢𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀫𑁆𑀧𑀺 𑀘𑀻𑀯𑀭𑀫𑁆𑀧𑀺 𑀅𑀧𑀦𑀺𑀥𑁂𑀦𑁆𑀢𑀺. 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀧𑀢𑁆𑀢𑀫𑁆𑀧𑀺 𑀘𑀻𑀯𑀭𑀫𑁆𑀧𑀻’’𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀳𑀲𑀦𑁆𑀢𑀺, 𑀢𑁂 𑀭𑁄𑀤𑀦𑁆𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀭𑁄𑀤𑀣𑀸’’𑀢𑀺? ‘‘𑀇𑀫𑁂, 𑀆𑀯𑀼𑀲𑁄, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀫𑁆𑀳𑀸𑀓𑀁 𑀧𑀢𑁆𑀢𑀫𑁆𑀧𑀺 𑀘𑀻𑀯𑀭𑀫𑁆𑀧𑀺 𑀅𑀧𑀦𑀺𑀥𑁂𑀦𑁆𑀢𑀻’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀫𑁆𑀧𑀺 𑀘𑀻𑀯𑀭𑀫𑁆𑀧𑀺 𑀅𑀧𑀦𑀺𑀥𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀫𑁆𑀧𑀺 𑀘𑀻𑀯𑀭𑀫𑁆𑀧𑀺 𑀅𑀧𑀦𑀺𑀥𑁂𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀫𑁆𑀧𑀺 𑀘𑀻𑀯𑀭𑀫𑁆𑀧𑀺 𑀅𑀧𑀦𑀺𑀥𑁂𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁭𑁮. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀦𑀺𑀲𑀻𑀤𑀦𑀁 𑀯𑀸 𑀲𑀽𑀘𑀺𑀖𑀭𑀁 𑀯𑀸 𑀓𑀸𑀬𑀩𑀦𑁆𑀥𑀦𑀁 𑀯𑀸 𑀅𑀧𑀦𑀺𑀥𑁂𑀬𑁆𑀬 𑀯𑀸 𑀅𑀧𑀦𑀺𑀥𑀸𑀧𑁂𑀬𑁆𑀬 𑀯𑀸, 𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀺, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁩𑁭𑁯. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲.

𑀧𑀢𑁆𑀢𑁄 𑀦𑀸𑀫 𑀤𑁆𑀯𑁂 𑀧𑀢𑁆𑀢𑀸 𑁋 𑀅𑀬𑁄𑀧𑀢𑁆𑀢𑁄, 𑀫𑀢𑁆𑀢𑀺𑀓𑀸𑀧𑀢𑁆𑀢𑁄.

𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁, 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀁.

𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀺.

𑀲𑀽𑀘𑀺𑀖𑀭𑀁 𑀦𑀸𑀫 𑀲𑀲𑀽𑀘𑀺𑀓𑀁 𑀯𑀸 𑀅𑀲𑀽𑀘𑀺𑀓𑀁 𑀯𑀸.

𑀓𑀸𑀬𑀩𑀦𑁆𑀥𑀦𑀁 𑀦𑀸𑀫 𑀤𑁆𑀯𑁂 𑀓𑀸𑀬𑀩𑀦𑁆𑀥𑀦𑀸𑀦𑀺 𑁋 𑀧𑀝𑁆𑀝𑀺𑀓𑀸, 𑀲𑀽𑀓𑀭𑀦𑁆𑀢𑀓𑀁.

𑀅𑀧𑀦𑀺𑀥𑁂𑀬𑁆𑀬 𑀯𑀸𑀢𑀺 𑀲𑀬𑀁 𑀅𑀧𑀦𑀺𑀥𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀧𑀦𑀺𑀥𑀸𑀧𑁂𑀬𑁆𑀬 𑀯𑀸𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀲𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀧𑀦𑀺𑀥𑀸𑀧𑁂𑀬𑁆𑀬 𑀯𑀸 𑀢𑀺 𑀅𑀬𑁆𑀬𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀓𑀫𑁆𑀧𑀺 𑀅𑀧𑀦𑀺𑀥𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀻𑀢𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑁄.

𑁩𑁮𑁦. 𑀉𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀦𑀺𑀲𑀻𑀤𑀦𑀁 𑀯𑀸 𑀲𑀽𑀘𑀺𑀖𑀭𑀁 𑀯𑀸 𑀓𑀸𑀬𑀩𑀦𑁆𑀥𑀦𑀁 𑀯𑀸 𑀅𑀧𑀦𑀺𑀥𑁂𑀢𑀺 𑀯𑀸 𑀅𑀧𑀦𑀺𑀥𑀸𑀧𑁂𑀢𑀺 𑀯𑀸, 𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀧𑀲𑀫𑁆𑀧𑀦𑁆𑀦𑁂 𑀯𑁂𑀫𑀢𑀺𑀓𑁄…𑀧𑁂… 𑀉𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀦𑀺𑀲𑀻𑀤𑀦𑀁 𑀯𑀸 𑀲𑀽𑀘𑀺𑀖𑀭𑀁 𑀯𑀸 𑀓𑀸𑀬𑀩𑀦𑁆𑀥𑀦𑀁 𑀯𑀸 𑀅𑀧𑀦𑀺𑀥𑁂𑀢𑀺 𑀯𑀸 𑀅𑀧𑀦𑀺𑀥𑀸𑀧𑁂𑀢𑀺 𑀯𑀸, 𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁 𑀅𑀧𑀦𑀺𑀥𑁂𑀢𑀺 𑀯𑀸 𑀅𑀧𑀦𑀺𑀥𑀸𑀧𑁂𑀢𑀺 𑀯𑀸, 𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀭𑀺𑀓𑁆𑀔𑀸𑀭𑀁 𑀅𑀧𑀦𑀺𑀥𑁂𑀢𑀺 𑀯𑀸 𑀅𑀧𑀦𑀺𑀥𑀸𑀧𑁂𑀢𑀺 𑀯𑀸, 𑀅𑀦𑁆𑀢𑀫𑀲𑁄 𑀳𑀲𑀸𑀧𑁂𑀓𑁆𑀔𑁄𑀧𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁩𑁮𑁧. 𑀅𑀦𑀸𑀧𑀢𑁆𑀢𑀺 𑀦𑀳𑀲𑀸𑀥𑀺𑀧𑁆𑀧𑀸𑀬𑁄, 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀧𑀝𑀺𑀲𑀸𑀫𑁂𑀢𑀺, ‘‘𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀲𑀸𑀫𑁂𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀘𑀻𑀯𑀭𑀅𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀭𑀸 𑀅𑀗𑁆𑀕𑀼𑀮𑀺 𑀳𑀸𑀲𑁄 𑀘 [𑀢𑁄𑀬𑀜𑁆𑀘 (𑀇𑀢𑀺𑀧𑀺)], 𑀅𑀦𑀸𑀤𑀭𑀺𑀬𑀜𑁆𑀘 𑀪𑀺𑀁𑀲𑀦𑀁;

𑀚𑁄𑀢𑀺𑀦𑀳𑀸𑀦𑀤𑀼𑀩𑁆𑀩𑀡𑁆𑀡𑀁, 𑀲𑀸𑀫𑀁 𑀅𑀧𑀦𑀺𑀥𑁂𑀦 𑀘𑀸𑀢𑀺.