𑁫. 𑀅𑀘𑁂𑀮𑀓𑀯𑀕𑁆𑀕𑁄

𑁧. 𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀁

𑁨𑁬𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀔𑀸𑀤𑀦𑀻𑀬𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀯𑀺𑀖𑀸𑀲𑀸𑀤𑀸𑀦𑀁 𑀧𑀽𑀯𑀁 𑀤𑁂𑀳𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀖𑀸𑀲𑀸𑀤𑁂 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀏𑀓𑁂𑀓𑀁 𑀧𑀽𑀯𑀁 𑀤𑁂𑀦𑁆𑀢𑁄 𑀅𑀜𑁆𑀜𑀢𑀭𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀏𑀓𑀁 𑀫𑀜𑁆𑀜𑀫𑀸𑀦𑁄 𑀤𑁆𑀯𑁂 𑀧𑀽𑀯𑁂 𑀅𑀤𑀸𑀲𑀺. 𑀲𑀸𑀫𑀦𑁆𑀢𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑁄 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀚𑀸𑀭𑁄 𑀢𑁂 𑀏𑀲𑁄 𑀲𑀫𑀡𑁄’’𑀢𑀺. ‘‘𑀦 𑀫𑁂 𑀲𑁄 𑀲𑀫𑀡𑁄 𑀚𑀸𑀭𑁄, 𑀏𑀓𑀁 𑀫𑀜𑁆𑀜𑀫𑀸𑀦𑁄 𑀤𑁆𑀯𑁂 𑀧𑀽𑀯𑁂 𑀅𑀤𑀸𑀲𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀓𑁂𑀓𑀁 𑀧𑀽𑀯𑀁 𑀤𑁂𑀦𑁆𑀢𑁄 𑀢𑀲𑁆𑀲𑀸𑀬𑁂𑀯 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀏𑀓𑀁 𑀫𑀜𑁆𑀜𑀫𑀸𑀦𑁄 𑀤𑁆𑀯𑁂 𑀧𑀽𑀯𑁂 𑀅𑀤𑀸𑀲𑀺. 𑀲𑀸𑀫𑀦𑁆𑀢𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑁄 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀚𑀸𑀭𑁄 𑀢𑁂 𑀏𑀲𑁄 𑀲𑀫𑀡𑁄’’𑀢𑀺. ‘‘𑀦 𑀫𑁂 𑀲𑁄 𑀲𑀫𑀡𑁄 𑀚𑀸𑀭𑁄, 𑀏𑀓𑀁 𑀫𑀜𑁆𑀜𑀫𑀸𑀦𑁄 𑀤𑁆𑀯𑁂 𑀧𑀽𑀯𑁂 𑀅𑀤𑀸𑀲𑀻’’𑀢𑀺. ‘‘𑀚𑀸𑀭𑁄 𑀦 𑀚𑀸𑀭𑁄’’𑀢𑀺 𑀪𑀡𑁆𑀟𑀺𑀁𑀲𑀼. 𑀅𑀜𑁆𑀜𑀢𑀭𑁄𑀧𑀺 𑀆𑀚𑀻𑀯𑀓𑁄 𑀧𑀭𑀺𑀯𑁂𑀲𑀦𑀁 𑀅𑀕𑀫𑀸𑀲𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀳𑀽𑀢𑁂𑀦 𑀲𑀧𑁆𑀧𑀺𑀦𑀸 𑀑𑀤𑀦𑀁 𑀫𑀤𑁆𑀤𑀺𑀢𑁆𑀯𑀸 𑀢𑀲𑁆𑀲 𑀆𑀚𑀻𑀯𑀓𑀲𑁆𑀲 𑀫𑀳𑀦𑁆𑀢𑀁 𑀧𑀺𑀡𑁆𑀟𑀁 𑀅𑀤𑀸𑀲𑀺. 𑀅𑀣 𑀔𑁄 𑀲𑁄 𑀆𑀚𑀻𑀯𑀓𑁄 𑀢𑀁 𑀧𑀺𑀡𑁆𑀟𑀁 𑀆𑀤𑀸𑀬 𑀅𑀕𑀫𑀸𑀲𑀺. 𑀅𑀜𑁆𑀜𑀢𑀭𑁄 𑀆𑀚𑀻𑀯𑀓𑁄 𑀢𑀁 𑀆𑀚𑀻𑀯𑀓𑀁 𑀏𑀢𑀤𑀯𑁄𑀘 𑁋 ‘‘𑀓𑀼𑀢𑁄 𑀢𑀬𑀸, 𑀆𑀯𑀼𑀲𑁄, 𑀧𑀺𑀡𑁆𑀟𑁄 𑀮𑀤𑁆𑀥𑁄’’𑀢𑀺? ‘‘𑀢𑀲𑁆𑀲𑀸𑀯𑀼𑀲𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀼𑀡𑁆𑀟𑀕𑀳𑀧𑀢𑀺𑀓𑀲𑁆𑀲 𑀧𑀭𑀺𑀯𑁂𑀲𑀦𑀸𑀬 𑀮𑀤𑁆𑀥𑁄’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀉𑀧𑀸𑀲𑀓𑀸 𑀢𑁂𑀲𑀁 𑀆𑀚𑀻𑀯𑀓𑀸𑀦𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀢𑁂 𑀉𑀧𑀸𑀲𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀫𑁂, 𑀪𑀦𑁆𑀢𑁂, 𑀢𑀺𑀢𑁆𑀣𑀺𑀬𑀸 𑀅𑀯𑀡𑁆𑀡𑀓𑀸𑀫𑀸 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀓𑀸𑀫𑀸 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀓𑀸𑀫𑀸 𑀲𑀗𑁆𑀖𑀲𑁆𑀲. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸 𑀢𑀺𑀢𑁆𑀣𑀺𑀬𑀸𑀦𑀁 𑀲𑀳𑀢𑁆𑀣𑀸 𑀦 𑀤𑀤𑁂𑀬𑁆𑀬𑀼’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀉𑀧𑀸𑀲𑀓𑁂 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀢𑁂 𑀉𑀧𑀸𑀲𑀓𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑁋 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬, 𑀲𑀗𑁆𑀖𑀨𑀸𑀲𑀼𑀢𑀸𑀬 …𑀧𑁂… 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁭𑁦. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀘𑁂𑀮𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁭𑁧. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀅𑀘𑁂𑀮𑀓𑁄 𑀦𑀸𑀫 𑀬𑁄 𑀓𑁄𑀘𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄 𑀦𑀕𑁆𑀕𑁄.

𑀧𑀭𑀺𑀩𑁆𑀩𑀸𑀚𑀓𑁄 𑀦𑀸𑀫 𑀪𑀺𑀓𑁆𑀔𑀼𑀜𑁆𑀘 𑀲𑀸𑀫𑀡𑁂𑀭𑀜𑁆𑀘 𑀞𑀧𑁂𑀢𑁆𑀯𑀸 𑀬𑁄 𑀓𑁄𑀘𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄.

𑀧𑀭𑀺𑀩𑁆𑀩𑀸𑀚𑀺𑀓𑀸 𑀦𑀸𑀫 𑀪𑀺𑀓𑁆𑀔𑀼𑀦𑀺𑀜𑁆𑀘 𑀲𑀺𑀓𑁆𑀔𑀫𑀸𑀦𑀜𑁆𑀘 𑀲𑀸𑀫𑀡𑁂𑀭𑀺𑀜𑁆𑀘 𑀞𑀧𑁂𑀢𑁆𑀯𑀸 𑀬𑀸 𑀓𑀸𑀘𑀺 𑀧𑀭𑀺𑀩𑁆𑀩𑀸𑀚𑀺𑀓𑀲𑀫𑀸𑀧𑀦𑁆𑀦𑀸.

𑀔𑀸𑀤𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺 𑁋 𑀉𑀤𑀓𑀤𑀦𑁆𑀢𑀧𑁄𑀦𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫.

𑀪𑁄𑀚𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺 𑁋 𑀑𑀤𑀦𑁄, 𑀓𑀼𑀫𑁆𑀫𑀸𑀲𑁄, 𑀲𑀢𑁆𑀢𑀼, 𑀫𑀘𑁆𑀙𑁄, 𑀫𑀁𑀲𑀁.

𑀤𑀤𑁂𑀬𑁆𑀬𑀸𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁨𑁭𑁨. 𑀢𑀺𑀢𑁆𑀣𑀺𑀬𑁂 𑀢𑀺𑀢𑁆𑀣𑀺𑀬𑀲𑀜𑁆𑀜𑀻 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀢𑀺𑀢𑁆𑀣𑀺𑀬𑁂 𑀯𑁂𑀫𑀢𑀺𑀓𑁄 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀢𑀺𑀢𑁆𑀣𑀺𑀬𑁂 𑀅𑀢𑀺𑀢𑁆𑀣𑀺𑀬𑀲𑀜𑁆𑀜𑀻 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀤𑀓𑀤𑀦𑁆𑀢𑀧𑁄𑀦𑀁 𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀢𑀺𑀢𑁆𑀣𑀺𑀬𑁂 𑀢𑀺𑀢𑁆𑀣𑀺𑀬𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀢𑀺𑀢𑁆𑀣𑀺𑀬𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀢𑀺𑀢𑁆𑀣𑀺𑀬𑁂 𑀅𑀢𑀺𑀢𑁆𑀣𑀺𑀬𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁨𑁭𑁩. 𑀅𑀦𑀸𑀧𑀢𑁆𑀢𑀺 𑀤𑀸𑀧𑁂𑀢𑀺 𑀦 𑀤𑁂𑀢𑀺, 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀢𑀺, 𑀩𑀸𑀳𑀺𑀭𑀸𑀮𑁂𑀧𑀁 𑀤𑁂𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀅𑀘𑁂𑀮𑀓𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁭𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀪𑀸𑀢𑀼𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺. 𑀢𑀲𑁆𑀲 𑀅𑀤𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀦 𑀫𑁂 𑀢𑀬𑀸 𑀲𑀤𑁆𑀥𑀺𑀁 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀺, 𑀏𑀓𑀓𑀲𑁆𑀲 𑀫𑁂 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀻’’𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀦𑀸𑀲𑀓𑁆𑀔𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁, 𑀧𑀝𑀺𑀓𑁆𑀓𑀫𑀦𑁂𑀧𑀺 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀦 𑀲𑀫𑁆𑀪𑀸𑀯𑁂𑀲𑀺, 𑀙𑀺𑀦𑁆𑀦𑀪𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀪𑀺𑀓𑁆𑀔𑀼𑀁 𑁋 ‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀸’𑀢𑀺 𑀢𑀲𑁆𑀲 𑀅𑀤𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑁆𑀲𑀢𑀻’’𑀢𑀺 …𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀪𑀺𑀓𑁆𑀔𑀼𑀁 𑁋 ‘‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀲 𑀅𑀤𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀪𑀺𑀓𑁆𑀔𑀼𑀁 𑁋 ‘‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀲 𑀅𑀤𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁭𑁫. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑁋 ‘‘𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀸’𑀢𑀺 𑀢𑀲𑁆𑀲 𑀤𑀸𑀧𑁂𑀢𑁆𑀯𑀸 𑀯𑀸 𑀅𑀤𑀸𑀧𑁂𑀢𑁆𑀯𑀸 𑀯𑀸 𑀉𑀬𑁆𑀬𑁄𑀚𑁂𑀬𑁆𑀬 𑁋 ‘𑀕𑀘𑁆𑀙𑀸𑀯𑀼𑀲𑁄, 𑀦 𑀫𑁂 𑀢𑀬𑀸 𑀲𑀤𑁆𑀥𑀺𑀁 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀺, 𑀏𑀓𑀓𑀲𑁆𑀲 𑀫𑁂 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀻’𑀢𑀺, 𑀏𑀢𑀤𑁂𑀯 𑀧𑀘𑁆𑀘𑀬𑀁 𑀓𑀭𑀺𑀢𑁆𑀯𑀸 𑀅𑀦𑀜𑁆𑀜𑀁, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁭𑁬. 𑀬𑁄 𑀧𑀦𑀸𑀢𑀺 𑀬𑁄, 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀪𑀺𑀓𑁆𑀔𑀼𑀦𑁆𑀢𑀺 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁.

𑀏𑀳𑀸𑀯𑀼𑀲𑁄, 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸𑀢𑀺 𑀕𑀸𑀫𑁄𑀧𑀺 𑀦𑀺𑀕𑀫𑁄𑀧𑀺 𑀦𑀕𑀭𑀫𑁆𑀧𑀺, 𑀕𑀸𑀫𑁄 𑀘𑁂𑀯 𑀦𑀺𑀕𑀫𑁄 𑀘.

𑀢𑀲𑁆𑀲 𑀤𑀸𑀧𑁂𑀢𑁆𑀯𑀸𑀢𑀺 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀸𑀧𑁂𑀢𑁆𑀯𑀸.

𑀅𑀤𑀸𑀧𑁂𑀢𑁆𑀯𑀸𑀢𑀺 𑀦 𑀓𑀺𑀜𑁆𑀘𑀺 𑀤𑀸𑀧𑁂𑀢𑁆𑀯𑀸.

𑀉𑀬𑁆𑀬𑁄𑀚𑁂𑀬𑁆𑀬𑀸𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀼𑀓𑀸𑀫𑁄 𑀓𑀻𑀴𑀺𑀢𑀼𑀓𑀸𑀫𑁄 𑀭𑀳𑁄 𑀦𑀺𑀲𑀻𑀤𑀺𑀢𑀼𑀓𑀸𑀫𑁄 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑀼𑀓𑀸𑀫𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄, 𑀦 𑀫𑁂 𑀢𑀬𑀸 𑀲𑀤𑁆𑀥𑀺𑀁 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀺, 𑀏𑀓𑀓𑀲𑁆𑀲 𑀫𑁂 𑀓𑀣𑀸 𑀯𑀸 𑀦𑀺𑀲𑀚𑁆𑀚𑀸 𑀯𑀸 𑀨𑀸𑀲𑀼 𑀳𑁄𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀸 𑀲𑀯𑀦𑀽𑀧𑀘𑀸𑀭𑀁 𑀯𑀸 𑀯𑀺𑀚𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀯𑀺𑀚𑀳𑀺𑀢𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀏𑀢𑀤𑁂𑀯 𑀧𑀘𑁆𑀘𑀬𑀁 𑀓𑀭𑀺𑀢𑁆𑀯𑀸 𑀅𑀦𑀜𑁆𑀜𑀦𑁆𑀢𑀺 𑀦 𑀅𑀜𑁆𑀜𑁄 𑀓𑁄𑀘𑀺 𑀧𑀘𑁆𑀘𑀬𑁄 𑀳𑁄𑀢𑀺 𑀉𑀬𑁆𑀬𑁄𑀚𑁂𑀢𑀼𑀁.

𑁨𑁭𑁭. 𑀉𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀧𑀲𑀫𑁆𑀧𑀦𑁆𑀦𑁂 𑀯𑁂𑀫𑀢𑀺𑀓𑁄 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀓𑀮𑀺𑀲𑀸𑀲𑀦𑀁 𑀆𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀓𑀮𑀺𑀲𑀸𑀲𑀦𑀁 𑀆𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁨𑁭𑁮. 𑀅𑀦𑀸𑀧𑀢𑁆𑀢𑀺 ‘‘𑀉𑀪𑁄 𑀏𑀓𑀢𑁄 𑀦 𑀬𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀫𑀳𑀕𑁆𑀖𑀁 𑀪𑀡𑁆𑀟𑀁 𑀧𑀲𑁆𑀲𑀺𑀢𑁆𑀯𑀸 𑀮𑁄𑀪𑀥𑀫𑁆𑀫𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀫𑀸𑀢𑀼𑀕𑀸𑀫𑀁 𑀧𑀲𑁆𑀲𑀺𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀕𑀺𑀮𑀸𑀦𑀲𑁆𑀲 𑀯𑀸 𑀑𑀳𑀺𑀬𑁆𑀬𑀓𑀲𑁆𑀲 𑀯𑀸 𑀯𑀺𑀳𑀸𑀭𑀧𑀸𑀮𑀲𑁆𑀲 𑀯𑀸 𑀬𑀸𑀕𑀼𑀁 𑀯𑀸 𑀪𑀢𑁆𑀢𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀦𑀻𑀳𑀭𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀦 𑀅𑀦𑀸𑀘𑀸𑀭𑀁 𑀆𑀘𑀭𑀺𑀢𑀼𑀓𑀸𑀫𑁄, 𑀲𑀢𑀺 𑀓𑀭𑀡𑀻𑀬𑁂 𑀉𑀬𑁆𑀬𑁄𑀚𑁂𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁭𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀳𑀸𑀬𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀲𑀬𑀦𑀺𑀖𑀭𑁂 [𑀲𑀬𑀦𑀻𑀖𑀭𑁂 (𑀲𑁆𑀬𑀸.)] 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀬𑁂𑀦𑀸𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀚𑀸𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀤𑀤𑁂𑀳𑀸𑀬𑁆𑀬𑀲𑁆𑀲 𑀪𑀺𑀓𑁆𑀔’’𑀦𑁆𑀢𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀁 𑀅𑀤𑀸𑀲𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙𑀣, 𑀪𑀦𑁆𑀢𑁂, 𑀬𑀢𑁄 𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸’’𑀢𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋 ‘‘𑀧𑀭𑀺𑀬𑀼𑀝𑁆𑀞𑀺𑀢𑁄 𑀅𑀬𑀁 𑀧𑀼𑀭𑀺𑀲𑁄’’𑀢𑀺, 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂, 𑀫𑀸 𑀅𑀕𑀫𑀺𑀢𑁆𑀣𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀭𑀺𑀲𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀭𑀺𑀲𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙𑀣, 𑀪𑀦𑁆𑀢𑁂, 𑀬𑀢𑁄 𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀸 𑀤𑀺𑀦𑁆𑀦𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀇𑀢𑁆𑀣𑀻 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀲𑀻𑀤𑀣, 𑀪𑀦𑁆𑀢𑁂, 𑀫𑀸 𑀅𑀕𑀫𑀺𑀢𑁆𑀣𑀸’’𑀢𑀺.

𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀲𑀺 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀉𑀧𑀦𑀦𑁆𑀤𑁄 𑀫𑀬𑁆𑀳𑀁 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀲𑀬𑀦𑀺𑀖𑀭𑁂 𑀦𑀺𑀲𑀺𑀦𑁆𑀦𑁄. 𑀲𑁄 𑀫𑀬𑀸 𑀉𑀬𑁆𑀬𑁄𑀚𑀻𑀬𑀫𑀸𑀦𑁄 𑀦 𑀇𑀘𑁆𑀙𑀢𑀺 𑀕𑀦𑁆𑀢𑀼𑀁. 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁮𑁦. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁮𑁧. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀪𑁄𑀚𑀦𑀁 𑀦𑀸𑀫 𑀓𑀼𑀮𑀁 𑀇𑀢𑁆𑀣𑀻 𑀘𑁂𑀯 𑀳𑁄𑀢𑀺 𑀧𑀼𑀭𑀺𑀲𑁄 𑀘, 𑀇𑀢𑁆𑀣𑀻 𑀘 𑀧𑀼𑀭𑀺𑀲𑁄 𑀘 𑀉𑀪𑁄 𑀅𑀦𑀺𑀓𑁆𑀔𑀦𑁆𑀢𑀸 𑀳𑁄𑀦𑁆𑀢𑀺, 𑀉𑀪𑁄 𑀅𑀯𑀻𑀢𑀭𑀸𑀕𑀸.

𑀅𑀦𑀼𑀧𑀔𑀚𑁆𑀚𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸.

𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀫𑀳𑀮𑁆𑀮𑀓𑁂 𑀖𑀭𑁂 𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲 [𑀧𑀺𑀝𑁆𑀞𑀺𑀲𑀗𑁆𑀖𑀸𑀝𑀲𑁆𑀲 (𑀲𑁆𑀬𑀸.)] 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀔𑀼𑀤𑁆𑀤𑀓𑁂 𑀖𑀭𑁂 𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁨𑁮𑁨. 𑀲𑀬𑀦𑀺𑀖𑀭𑁂 𑀲𑀬𑀦𑀺𑀖𑀭𑀲𑀜𑁆𑀜𑀻 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀬𑀦𑀺𑀖𑀭𑁂 𑀯𑁂𑀫𑀢𑀺𑀓𑁄 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀬𑀦𑀺𑀖𑀭𑁂 𑀦𑀲𑀬𑀦𑀺𑀖𑀭𑀲𑀜𑁆𑀜𑀻 𑀲𑀪𑁄𑀚𑀦𑁂 𑀓𑀼𑀮𑁂 𑀅𑀦𑀼𑀧𑀔𑀚𑁆𑀚 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀦𑀲𑀬𑀦𑀺𑀖𑀭𑁂 𑀲𑀬𑀦𑀺𑀖𑀭𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦𑀲𑀬𑀦𑀺𑀖𑀭𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦𑀲𑀬𑀦𑀺𑀖𑀭𑁂 𑀦𑀲𑀬𑀦𑀺𑀖𑀭𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁨𑁮𑁩. 𑀅𑀦𑀸𑀧𑀢𑁆𑀢𑀺 𑀫𑀳𑀮𑁆𑀮𑀓𑁂 𑀖𑀭𑁂 𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀔𑀼𑀤𑁆𑀤𑀓𑁂 𑀖𑀭𑁂 𑀧𑀺𑀝𑁆𑀞𑀺𑀯𑀁𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀪𑀺𑀓𑁆𑀔𑀼 𑀤𑀼𑀢𑀺𑀬𑁄 𑀳𑁄𑀢𑀺, 𑀉𑀪𑁄 𑀦𑀺𑀓𑁆𑀔𑀦𑁆𑀢𑀸 𑀳𑁄𑀦𑁆𑀢𑀺, 𑀉𑀪𑁄 𑀯𑀻𑀢𑀭𑀸𑀕𑀸, 𑀦𑀲𑀬𑀦𑀺𑀖𑀭𑁂, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀲𑀺𑀓𑁆𑀔𑀸𑀧𑀤𑀁

𑁨𑁮𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀳𑀸𑀬𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑁄 𑀉𑀧𑀦𑀦𑁆𑀤𑁄 𑀫𑀬𑁆𑀳𑀁 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁮𑁫. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁮𑁬. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻.

𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄.

[𑀧𑀸𑀘𑀺. 𑁨𑁦𑁦,𑁨𑁯𑁧; 𑀧𑀸𑀭𑀸. 𑁪𑁪𑁫,𑁪𑁫𑁪] 𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀻𑀬𑀫𑀸𑀦𑁂 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼𑀁.

[𑀧𑀸𑀭𑀸. 𑁪𑁪𑁫] 𑀧𑀝𑀺𑀘𑁆𑀙𑀦𑁆𑀦𑀁 𑀦𑀸𑀫 𑀆𑀲𑀦𑀁 𑀓𑀼𑀝𑁆𑀝𑁂𑀦 [𑀓𑀼𑀟𑁆𑀟𑁂𑀦 (𑀲𑀻. 𑀲𑁆𑀬𑀸.)] 𑀯𑀸 𑀓𑀯𑀸𑀝𑁂𑀦 𑀯𑀸 𑀓𑀺𑀮𑀜𑁆𑀚𑁂𑀦 𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀯𑀸 𑀭𑀼𑀓𑁆𑀔𑁂𑀦 𑀯𑀸 𑀣𑀫𑁆𑀪𑁂𑀦 𑀯𑀸 𑀓𑁄𑀢𑁆𑀣𑀴𑀺𑀬𑀸 [𑀓𑁄𑀝𑁆𑀞𑀴𑀺𑀬𑀸 (𑀲𑀻. 𑀲𑁆𑀬𑀸.) 𑀓𑁄𑀢𑁆𑀣𑀴𑀺𑀓𑀸𑀬 (𑀓.)] 𑀯𑀸, 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺.

𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀫𑀸𑀢𑀼𑀕𑀸𑀫𑁂 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀼 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀪𑁄 𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀉𑀪𑁄 𑀯𑀸 𑀦𑀺𑀧𑀦𑁆𑀦𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁨𑁮𑁭. 𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀻 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀫𑀸𑀢𑀼𑀕𑀸𑀫𑁂 𑀯𑁂𑀫𑀢𑀺𑀓𑁄 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀫𑀸𑀢𑀼𑀕𑀸𑀫𑁂 𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀬𑀓𑁆𑀔𑀺𑀬𑀸 𑀯𑀸 𑀧𑁂𑀢𑀺𑀬𑀸 𑀯𑀸 𑀧𑀡𑁆𑀟𑀓𑁂𑀦 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀬 𑀯𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀯𑀸 𑀲𑀤𑁆𑀥𑀺𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁨𑁮𑁮. 𑀅𑀦𑀸𑀧𑀢𑁆𑀢𑀺 𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄 𑀳𑁄𑀢𑀺, 𑀢𑀺𑀝𑁆𑀞𑀢𑀺 𑀦 𑀦𑀺𑀲𑀻𑀤𑀢𑀺, 𑀅𑀭𑀳𑁄𑀧𑁂𑀓𑁆𑀔𑁄, 𑀅𑀜𑁆𑀜𑀯𑀺𑀳𑀺𑀢𑁄 𑀦𑀺𑀲𑀻𑀤𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁

𑁨𑁮𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀳𑀸𑀬𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑁄 𑀉𑀧𑀦𑀦𑁆𑀤𑁄 𑀫𑀬𑁆𑀳𑀁 𑀧𑀚𑀸𑀧𑀢𑀺𑀬𑀸 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀸𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁯𑁦. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁯𑁧. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼𑀁.

𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄.

𑀏𑀓𑁄 𑀏𑀓𑀸𑀬𑀸𑀢𑀺 𑀪𑀺𑀓𑁆𑀔𑀼 𑀘𑁂𑀯 𑀳𑁄𑀢𑀺 𑀫𑀸𑀢𑀼𑀕𑀸𑀫𑁄 𑀘.

[𑀧𑀸𑀘𑀺. 𑁨𑁦𑁦,𑁨𑁮𑁬; 𑀧𑀸𑀭𑀸. 𑁪𑁪𑁫,𑁪𑁫𑁪] 𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄, 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀻𑀬𑀫𑀸𑀦𑁂 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼𑀁.

𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀫𑀸𑀢𑀼𑀕𑀸𑀫𑁂 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀼 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀪𑁄 𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀉𑀪𑁄 𑀯𑀸 𑀦𑀺𑀧𑀦𑁆𑀦𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁨𑁯𑁨. 𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀻 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀫𑀸𑀢𑀼𑀕𑀸𑀫𑁂 𑀯𑁂𑀫𑀢𑀺𑀓𑁄 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀫𑀸𑀢𑀼𑀕𑀸𑀫𑁂 𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀬𑀓𑁆𑀔𑀺𑀬𑀸 𑀯𑀸 𑀧𑁂𑀢𑀺𑀬𑀸 𑀯𑀸 𑀧𑀡𑁆𑀟𑀓𑁂𑀦 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀯𑀸 [𑀢𑀺𑀭𑀘𑁆𑀙𑀸𑀦𑀕𑀢𑀸𑀬 𑀯𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀯𑀸 (𑀓.)] 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁨𑁯𑁩. 𑀅𑀦𑀸𑀧𑀢𑁆𑀢𑀺 𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄 𑀳𑁄𑀢𑀺, 𑀢𑀺𑀝𑁆𑀞𑀢𑀺 𑀦 𑀦𑀺𑀲𑀻𑀤𑀢𑀺, 𑀅𑀭𑀳𑁄𑀧𑁂𑀓𑁆𑀔𑁄 𑀅𑀜𑁆𑀜𑀯𑀺𑀳𑀺𑀢𑁄 𑀦𑀺𑀲𑀻𑀤𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.

𑁬. 𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁

𑁨𑁯𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀼𑀭𑁂𑀪𑀢𑁆𑀢𑀁, 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂 𑀫𑀦𑀼𑀲𑁆𑀲𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀣𑀸𑀯𑀼𑀲𑁄 𑀪𑀢𑁆𑀢’’𑀦𑁆𑀢𑀺. ‘‘𑀆𑀕𑀫𑁂𑀣, 𑀪𑀦𑁆𑀢𑁂, 𑀬𑀸𑀯𑀸𑀬𑁆𑀬𑁄 𑀉𑀧𑀦𑀦𑁆𑀤𑁄 𑀆𑀕𑀘𑁆𑀙𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀢𑁂 𑀪𑀺𑀓𑁆𑀔𑀽…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂 𑀫𑀦𑀼𑀲𑁆𑀲𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀣𑀸𑀯𑀼𑀲𑁄, 𑀪𑀢𑁆𑀢𑀁; 𑀧𑀼𑀭𑁂 𑀓𑀸𑀮𑁄 𑀅𑀢𑀺𑀓𑁆𑀓𑀫𑀢𑀻’’𑀢𑀺. ‘‘𑀬𑀫𑁆𑀧𑀺 𑀫𑀬𑀁, 𑀪𑀦𑁆𑀢𑁂, 𑀪𑀢𑁆𑀢𑀁 𑀓𑀭𑀺𑀫𑁆𑀳𑀸 𑀅𑀬𑁆𑀬𑀲𑁆𑀲 𑀉𑀧𑀦𑀦𑁆𑀤𑀲𑁆𑀲 𑀓𑀸𑀭𑀡𑀸. 𑀆𑀕𑀫𑁂𑀣, 𑀪𑀦𑁆𑀢𑁂, 𑀬𑀸𑀯𑀸𑀬𑁆𑀬𑁄 𑀉𑀧𑀦𑀦𑁆𑀤𑁄 𑀆𑀕𑀘𑁆𑀙𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀤𑀺𑀯𑀸 𑀆𑀕𑀘𑁆𑀙𑀢𑀺. 𑀪𑀺𑀓𑁆𑀔𑀽 𑀦 𑀘𑀺𑀢𑁆𑀢𑀭𑀽𑀧𑀁 𑀪𑀼𑀜𑁆𑀚𑀺𑀁𑀲𑀼. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁨𑁯𑁫. [𑀫𑀳𑀸𑀯. 𑁨𑁭𑁭] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀁 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀔𑀸𑀤𑀦𑀻𑀬𑀁 𑀧𑀸𑀳𑁂𑀲𑀺 𑁋 ‘‘𑀅𑀬𑁆𑀬𑀲𑁆𑀲 𑀉𑀧𑀦𑀦𑁆𑀤𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀉𑀧𑀦𑀦𑁆𑀤𑁄’’𑀢𑀺? ‘‘𑀏𑀲𑀸𑀯𑀼𑀲𑁄, 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺. ‘‘𑀇𑀤𑀁, 𑀪𑀦𑁆𑀢𑁂, 𑀔𑀸𑀤𑀦𑀻𑀬𑀁 𑀅𑀬𑁆𑀬𑀲𑁆𑀲 𑀉𑀧𑀦𑀦𑁆𑀤𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀣 𑀬𑀸𑀯 𑀉𑀧𑀦𑀦𑁆𑀤𑁄 𑀆𑀕𑀘𑁆𑀙𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑁋 ‘‘𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀤𑀺𑀯𑀸 𑀧𑀝𑀺𑀓𑁆𑀓𑀫𑀺, 𑀔𑀸𑀤𑀦𑀻𑀬𑀁 𑀉𑀲𑁆𑀲𑀸𑀭𑀺𑀬𑀺𑀢𑁆𑀣. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁨𑁯𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀘𑀻𑀯𑀭𑀤𑀸𑀦𑀲𑀫𑀬𑁂 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀓𑀼𑀮𑀸𑀦𑀺 𑀦 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀘𑀻𑀯𑀭𑀁 𑀧𑀭𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀤𑀸𑀦𑀲𑀫𑀬𑁂 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄. 𑀘𑀻𑀯𑀭𑀤𑀸𑀦𑀲𑀫𑀬𑁄 𑁋 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁨𑁯𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀅𑀢𑁆𑀣𑁄 𑀘 𑀳𑁄𑀢𑀺 𑀲𑀽𑀘𑀺𑀬𑀸𑀧𑀺 𑀲𑀼𑀢𑁆𑀢𑁂𑀦𑀧𑀺 𑀲𑀢𑁆𑀣𑀓𑁂𑀦𑀧𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀓𑀼𑀮𑀸𑀦𑀺 𑀦 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀓𑀸𑀭𑀲𑀫𑀬𑁂 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄. 𑀘𑀻𑀯𑀭𑀤𑀸𑀦𑀲𑀫𑀬𑁄, 𑀘𑀻𑀯𑀭𑀓𑀸𑀭𑀲𑀫𑀬𑁄 𑁋 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁨𑁯𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀕𑀺𑀮𑀸𑀦𑀸 𑀳𑁄𑀦𑁆𑀢𑀺, 𑀅𑀢𑁆𑀣𑁄 𑀘 𑀳𑁄𑀢𑀺 𑀪𑁂𑀲𑀚𑁆𑀚𑁂𑀳𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀓𑀼𑀮𑀸𑀦𑀺 𑀦 𑀧𑀬𑀺𑀭𑀼𑀧𑀸𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀆𑀧𑀼𑀘𑁆𑀙𑀸 𑀓𑀼𑀮𑀸𑀦𑀺 𑀧𑀬𑀺𑀭𑀼𑀧𑀸𑀲𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁯𑁯. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄. 𑀘𑀻𑀯𑀭𑀤𑀸𑀦𑀲𑀫𑀬𑁄, 𑀘𑀻𑀯𑀭𑀓𑀸𑀭𑀲𑀫𑀬𑁄 𑁋 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺.

𑁩𑁦𑁦. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀦𑀺𑀫𑀦𑁆𑀢𑀺𑀢𑁄 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑁄.

𑀲𑀪𑀢𑁆𑀢𑁄 𑀦𑀸𑀫 𑀬𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑁂𑀦 𑀲𑀪𑀢𑁆𑀢𑁄.

𑀲𑀦𑁆𑀢𑀁 𑀦𑀸𑀫 𑀪𑀺𑀓𑁆𑀔𑀼𑀁 𑀲𑀓𑁆𑀓𑀸 𑀳𑁄𑀢𑀺 𑀆𑀧𑀼𑀘𑁆𑀙𑀸 𑀧𑀯𑀺𑀲𑀺𑀢𑀼𑀁.

𑀅𑀲𑀦𑁆𑀢𑀁 𑀦𑀸𑀫 𑀪𑀺𑀓𑁆𑀔𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺 𑀆𑀧𑀼𑀘𑁆𑀙𑀸 𑀧𑀯𑀺𑀲𑀺𑀢𑀼𑀁.

𑀧𑀼𑀭𑁂𑀪𑀢𑁆𑀢𑀁 𑀦𑀸𑀫 𑀬𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑀁 𑀅𑀪𑀼𑀢𑁆𑀢𑀸𑀯𑀻.

𑀧𑀘𑁆𑀙𑀸𑀪𑀢𑁆𑀢𑀁 𑀦𑀸𑀫 𑀬𑁂𑀦 𑀦𑀺𑀫𑀦𑁆𑀢𑀺𑀢𑁄 𑀢𑀁 𑀅𑀦𑁆𑀢𑀫𑀲𑁄 𑀓𑀼𑀲𑀕𑁆𑀕𑁂𑀦𑀧𑀺 [𑀅𑀭𑀼𑀡𑀼𑀕𑁆𑀕𑀫𑀦𑁂𑀧𑀺 (𑀲𑀻.)] 𑀪𑀼𑀢𑁆𑀢𑀁 𑀳𑁄𑀢𑀺.

𑀓𑀼𑀮𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺 𑁋 𑀔𑀢𑁆𑀢𑀺𑀬𑀓𑀼𑀮𑀁, 𑀩𑁆𑀭𑀸𑀳𑁆𑀫𑀡𑀓𑀼𑀮𑀁, 𑀯𑁂𑀲𑁆𑀲𑀓𑀼𑀮𑀁, 𑀲𑀼𑀤𑁆𑀤𑀓𑀼𑀮𑀁.

𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀜𑁆𑀜𑀲𑁆𑀲 𑀖𑀭𑀽𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀞𑀫𑀁 𑀧𑀸𑀤𑀁 𑀉𑀫𑁆𑀫𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀞𑀧𑁂𑀢𑁆𑀯𑀸 𑀲𑀫𑀬𑀁.

𑀘𑀻𑀯𑀭𑀤𑀸𑀦𑀲𑀫𑀬𑁄 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀜𑁆𑀘 𑀫𑀸𑀲𑀸.

𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑀸𑀫 𑀘𑀻𑀯𑀭𑁂 𑀓𑀬𑀺𑀭𑀫𑀸𑀦𑁂.

𑁩𑁦𑁧. 𑀦𑀺𑀫𑀦𑁆𑀢𑀺𑀢𑁂 𑀦𑀺𑀫𑀦𑁆𑀢𑀺𑀢𑀲𑀜𑁆𑀜𑀻 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀦𑀺𑀫𑀦𑁆𑀢𑀺𑀢𑁂 𑀯𑁂𑀫𑀢𑀺𑀓𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀦𑀺𑀫𑀦𑁆𑀢𑀺𑀢𑁂 𑀅𑀦𑀺𑀫𑀦𑁆𑀢𑀺𑀢𑀲𑀜𑁆𑀜𑀻 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀦𑀺𑀫𑀦𑁆𑀢𑀺𑀢𑁂 𑀦𑀺𑀫𑀦𑁆𑀢𑀺𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀺𑀫𑀦𑁆𑀢𑀺𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀺𑀫𑀦𑁆𑀢𑀺𑀢𑁂 𑀅𑀦𑀺𑀫𑀦𑁆𑀢𑀺𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁩𑁦𑁨. 𑀅𑀦𑀸𑀧𑀢𑁆𑀢𑀺 𑀲𑀫𑀬𑁂, 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀆𑀧𑀼𑀘𑁆𑀙𑀸 𑀧𑀯𑀺𑀲𑀢𑀺, 𑀅𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀯𑀺𑀲𑀢𑀺, 𑀅𑀜𑁆𑀜𑀲𑁆𑀲 𑀖𑀭𑁂𑀦 𑀫𑀕𑁆𑀕𑁄 𑀳𑁄𑀢𑀺, 𑀖𑀭𑀽𑀧𑀘𑀸𑀭𑁂𑀦 𑀫𑀕𑁆𑀕𑁄 𑀳𑁄𑀢𑀺, 𑀅𑀦𑁆𑀢𑀭𑀸𑀭𑀸𑀫𑀁 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀕𑀘𑁆𑀙𑀢𑀺, 𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀁 𑀕𑀘𑁆𑀙𑀢𑀺, 𑀧𑀝𑀺𑀓𑁆𑀓𑀫𑀦𑀁 𑀕𑀘𑁆𑀙𑀢𑀺, 𑀪𑀢𑁆𑀢𑀺𑀬𑀖𑀭𑀁 𑀕𑀘𑁆𑀙𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀘𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.

𑁭. 𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀁

𑁩𑁦𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀪𑁂𑀲𑀚𑁆𑀚𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀘𑀢𑀼𑀫𑀸𑀲𑀁 [𑀘𑀢𑀼𑀫𑁆𑀫𑀸𑀲𑀁 (𑀲𑀻.) 𑀘𑀸𑀢𑀼𑀫𑀸𑀲𑀁 (𑀲𑁆𑀬𑀸.)] 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀢𑀼’’𑀦𑁆𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀫𑀳𑀸𑀦𑀸𑀫! 𑀢𑁂𑀦 𑀳𑀺 𑀢𑁆𑀯𑀁, 𑀫𑀳𑀸𑀦𑀸𑀫, 𑀲𑀗𑁆𑀖𑀁 𑀘𑀢𑀼𑀫𑀸𑀲𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀳𑀻’’𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀥𑀺𑀯𑀸𑀲𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀢𑀼𑀫𑀸𑀲𑀁 𑀪𑁂𑀲𑀚𑁆𑀚𑀧𑁆𑀧𑀘𑁆𑀘𑀬𑀧𑀯𑀸𑀭𑀡𑀁 𑀲𑀸𑀤𑀺𑀢𑀼𑀦𑁆𑀢𑀺.

𑁩𑁦𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀧𑀭𑀺𑀢𑁆𑀢𑀁 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺. 𑀢𑀣𑁂𑀯 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀪𑁂𑀲𑀚𑁆𑀚𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀅𑀧𑀭𑀫𑁆𑀧𑀺 𑀘𑀢𑀼𑀫𑀸𑀲𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀢𑀼’’𑀦𑁆𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀫𑀳𑀸𑀦𑀸𑀫! 𑀢𑁂𑀦 𑀳𑀺 𑀢𑁆𑀯𑀁, 𑀫𑀳𑀸𑀦𑀸𑀫, 𑀲𑀗𑁆𑀖𑀁 𑀅𑀧𑀭𑀫𑁆𑀧𑀺 𑀘𑀢𑀼𑀫𑀸𑀲𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀳𑀻’’𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀥𑀺𑀯𑀸𑀲𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀦 𑀧𑀯𑀸𑀭𑀡𑀫𑁆𑀧𑀺 𑀲𑀸𑀤𑀺𑀢𑀼𑀦𑁆𑀢𑀺.

𑁩𑁦𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀧𑀭𑀺𑀢𑁆𑀢𑀁𑀬𑁂𑀯 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀺. 𑀢𑀣𑁂𑀯 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀪𑁂𑀲𑀚𑁆𑀚𑀁 𑀉𑀲𑁆𑀲𑀦𑁆𑀦𑀁 𑀳𑁄𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀬𑀸𑀯𑀚𑀻𑀯𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀢𑀼’’𑀦𑁆𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀫𑀳𑀸𑀦𑀸𑀫! 𑀢𑁂𑀦 𑀳𑀺 𑀢𑁆𑀯𑀁, 𑀫𑀳𑀸𑀦𑀸𑀫, 𑀲𑀗𑁆𑀖𑀁 𑀬𑀸𑀯𑀚𑀻𑀯𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀳𑀻’’𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀥𑀺𑀯𑀸𑀲𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀺𑀘𑁆𑀘𑀧𑀯𑀸𑀭𑀡𑀫𑁆𑀧𑀺 𑀲𑀸𑀤𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀳𑁄𑀦𑁆𑀢𑀺 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸. 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀯𑀢𑁆𑀢𑀸 𑀳𑁄𑀢𑀺 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸? 𑀦𑀦𑀼 𑀦𑀸𑀫 𑀧𑀩𑁆𑀩𑀚𑀺𑀢𑁂𑀦 𑀲𑀼𑀦𑀺𑀯𑀢𑁆𑀣𑁂𑀦 𑀪𑀯𑀺𑀢𑀩𑁆𑀩𑀁 𑀲𑀼𑀧𑀸𑀭𑀼𑀢𑁂𑀦 𑀆𑀓𑀧𑁆𑀧𑀲𑀫𑁆𑀧𑀦𑁆𑀦𑁂𑀦𑀸’’𑀢𑀺? 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑀳𑀸𑀦𑀸𑀫𑁂 𑀲𑀓𑁆𑀓𑁂 𑀉𑀧𑀦𑀦𑁆𑀥𑀺𑀁𑀲𑀼. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀫𑀬𑀁 𑀉𑀧𑀸𑀬𑁂𑀦 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀫𑀗𑁆𑀓𑀼 𑀓𑀭𑁂𑀬𑁆𑀬𑀸𑀫𑀸’’𑀢𑀺? 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀸𑀦𑀸𑀫𑁂𑀦 𑀔𑁄, 𑀆𑀯𑀼𑀲𑁄, 𑀲𑀓𑁆𑀓𑁂𑀦 𑀲𑀗𑁆𑀖𑁄 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑀺𑀢𑁄. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀲𑀧𑁆𑀧𑀺𑀁 𑀯𑀺𑀜𑁆𑀜𑀸𑀧𑁂𑀫𑀸’’𑀢𑀺. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀬𑁂𑀦 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁄𑀡𑁂𑀦, 𑀆𑀯𑀼𑀲𑁄, 𑀲𑀧𑁆𑀧𑀺𑀦𑀸 𑀅𑀢𑁆𑀣𑁄’’𑀢𑀺. ‘‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀣. 𑀫𑀦𑀼𑀲𑁆𑀲𑀸 𑀯𑀚𑀁 𑀕𑀢𑀸 𑀲𑀧𑁆𑀧𑀺𑀁 𑀆𑀳𑀭𑀺𑀢𑀼𑀁. 𑀓𑀸𑀮𑀁 𑀆𑀳𑀭𑀺𑀲𑁆𑀲𑀣𑀸’’𑀢𑀺 [𑀓𑀸𑀮𑁂 𑀳𑀭𑀺𑀲𑁆𑀲𑀣𑀸𑀢𑀺 (𑀲𑁆𑀬𑀸.)].

𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁄𑀡𑁂𑀦, 𑀆𑀯𑀼𑀲𑁄, 𑀲𑀧𑁆𑀧𑀺𑀦𑀸 𑀅𑀢𑁆𑀣𑁄’’𑀢𑀺. ‘‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀣. 𑀫𑀦𑀼𑀲𑁆𑀲𑀸 𑀯𑀚𑀁 𑀕𑀢𑀸 𑀲𑀧𑁆𑀧𑀺𑀁 𑀆𑀳𑀭𑀺𑀢𑀼𑀁. 𑀓𑀸𑀮𑀁 𑀆𑀳𑀭𑀺𑀲𑁆𑀲𑀣𑀸’’𑀢𑀺. ‘‘𑀓𑀺𑀁 𑀧𑀦 𑀢𑀬𑀸, 𑀆𑀯𑀼𑀲𑁄, 𑀅𑀤𑀸𑀢𑀼𑀓𑀸𑀫𑁂𑀦 𑀧𑀯𑀸𑀭𑀺𑀢𑁂𑀦, 𑀬𑀁 𑀢𑁆𑀯𑀁 𑀧𑀯𑀸𑀭𑁂𑀢𑁆𑀯𑀸 𑀦 𑀤𑁂𑀲𑀻’’𑀢𑀺! 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑀦𑁆𑀢𑀸 𑁋 ‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀣𑀸’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀦𑀸𑀕𑀫𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦 𑁋 ‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀣𑀸’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀦𑀸𑀕𑀫𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦 𑁋 ‘‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀣𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀦𑀸𑀕𑀫𑁂𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦 𑁋 ‘‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂 𑀆𑀕𑀫𑁂𑀣𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀦𑀸𑀕𑀫𑁂𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁦𑁬. ‘‘𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀢𑀼𑀫𑀸𑀲𑀧𑁆𑀧𑀘𑁆𑀘𑀬𑀧𑀯𑀸𑀭𑀡𑀸 𑀲𑀸𑀤𑀺𑀢𑀩𑁆𑀩𑀸, 𑀅𑀜𑁆𑀜𑀢𑁆𑀭 𑀧𑀼𑀦𑀧𑀯𑀸𑀭𑀡𑀸𑀬, 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑀯𑀸𑀭𑀡𑀸𑀬; 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁩𑁦𑁭. 𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀢𑀼𑀫𑀸𑀲𑀧𑁆𑀧𑀘𑁆𑀘𑀬𑀧𑀯𑀸𑀭𑀡𑀸 𑀲𑀸𑀤𑀺𑀢𑀩𑁆𑀩𑀸𑀢𑀺 𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀧𑀯𑀸𑀭𑀡𑀸 𑀲𑀸𑀤𑀺𑀢𑀩𑁆𑀩𑀸.

𑀧𑀼𑀦𑀧𑀯𑀸𑀭𑀡𑀸𑀧𑀺 𑀲𑀸𑀤𑀺𑀢𑀩𑁆𑀩𑀸𑀢𑀺 𑀬𑀤𑀸 𑀕𑀺𑀮𑀸𑀦𑁄 𑀪𑀯𑀺𑀲𑁆𑀲𑀸𑀫𑀺 𑀢𑀤𑀸 𑀯𑀺𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺.

𑀦𑀺𑀘𑁆𑀘𑀧𑀯𑀸𑀭𑀡𑀸𑀧𑀺 𑀲𑀸𑀤𑀺𑀢𑀩𑁆𑀩𑀸𑀢𑀺 𑀬𑀤𑀸 𑀕𑀺𑀮𑀸𑀦𑁄 𑀪𑀯𑀺𑀲𑁆𑀲𑀸𑀫𑀺 𑀢𑀤𑀸 𑀯𑀺𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺.

𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀅𑀢𑁆𑀣𑀺 𑀧𑀯𑀸𑀭𑀡𑀸 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀦 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸, 𑀅𑀢𑁆𑀣𑀺 𑀧𑀯𑀸𑀭𑀡𑀸 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀦 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸, 𑀅𑀢𑁆𑀣𑀺 𑀧𑀯𑀸𑀭𑀡𑀸 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀘 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀘, 𑀅𑀢𑁆𑀣𑀺 𑀧𑀯𑀸𑀭𑀡𑀸 𑀦𑁂𑀯 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀦 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸.

𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀦𑀸𑀫 𑀪𑁂𑀲𑀚𑁆𑀚𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺 𑁋 ‘‘𑀏𑀢𑁆𑀢𑀓𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑁂𑀫𑀻’’𑀢𑀺. 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀦𑀸𑀫 𑀭𑀢𑁆𑀢𑀺𑀬𑁄 𑀧𑀭𑀺𑀕𑁆𑀕𑀳𑀺𑀢𑀸𑀬𑁄 𑀳𑁄𑀦𑁆𑀢𑀺 𑁋 ‘‘𑀏𑀢𑁆𑀢𑀓𑀸𑀲𑀼 𑀭𑀢𑁆𑀢𑀻𑀲𑀼 𑀧𑀯𑀸𑀭𑁂𑀫𑀻’’𑀢𑀺. 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀘 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀘 𑀦𑀸𑀫 𑀪𑁂𑀲𑀚𑁆𑀚𑀸𑀦𑀺 𑀘 𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺 𑀭𑀢𑁆𑀢𑀺𑀬𑁄 𑀘 𑀧𑀭𑀺𑀕𑁆𑀕𑀳𑀺𑀢𑀸𑀬𑁄 𑀳𑁄𑀦𑁆𑀢𑀺 𑁋 ‘‘𑀏𑀢𑁆𑀢𑀓𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀏𑀢𑁆𑀢𑀓𑀸𑀲𑀼 𑀭𑀢𑁆𑀢𑀻𑀲𑀼 𑀧𑀯𑀸𑀭𑁂𑀫𑀻’’𑀢𑀺. 𑀦𑁂𑀯 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑀸 𑀦 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑀸 𑀦𑀸𑀫 𑀪𑁂𑀲𑀚𑁆𑀚𑀸𑀦𑀺 𑀘 𑀅𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺 𑀭𑀢𑁆𑀢𑀺𑀬𑁄 𑀘 𑀅𑀧𑀭𑀺𑀕𑁆𑀕𑀳𑀺𑀢𑀸𑀬𑁄 𑀳𑁄𑀦𑁆𑀢𑀺.

𑁩𑁦𑁮. 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑁂 𑁋 𑀬𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑀺𑀢𑁄 𑀳𑁄𑀢𑀺 𑀢𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑁋 𑀬𑀸𑀲𑀼 𑀭𑀢𑁆𑀢𑀻𑀲𑀼 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀢𑀸 𑀭𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 𑀅𑀜𑁆𑀜𑀸𑀲𑀼 𑀭𑀢𑁆𑀢𑀻𑀲𑀼 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑁂 𑀘 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀘 𑁋 𑀬𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀢𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀞𑀧𑁂𑀢𑁆𑀯𑀸 𑀬𑀸𑀲𑀼 𑀭𑀢𑁆𑀢𑀻𑀲𑀼 𑀧𑀯𑀸𑀭𑀺𑀢𑁄 𑀳𑁄𑀢𑀺, 𑀢𑀸 𑀭𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 𑀅𑀜𑁆𑀜𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀜𑁆𑀜𑀸𑀲𑀼 𑀭𑀢𑁆𑀢𑀻𑀲𑀼 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀦𑁂𑀯 𑀪𑁂𑀲𑀚𑁆𑀚𑀧𑀭𑀺𑀬𑀦𑁆𑀢𑁂 𑀦 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂, 𑀅𑀦𑀸𑀧𑀢𑁆𑀢𑀺.

𑁩𑁦𑁯. 𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 [𑀓𑀭𑀡𑀻𑀬𑁂 (𑀲𑀻. 𑀲𑁆𑀬𑀸.)] 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀜𑁆𑀜𑁂𑀦 𑀪𑁂𑀲𑀚𑁆𑀚𑁂𑀦 𑀓𑀭𑀡𑀻𑀬𑁂𑀦 𑀅𑀜𑁆𑀜𑀁 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀢𑀢𑀼𑀢𑁆𑀢𑀭𑀺 𑀢𑀢𑀼𑀢𑁆𑀢𑀭𑀺𑀲𑀜𑁆𑀜𑀻 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀢𑀢𑀼𑀢𑁆𑀢𑀭𑀺 𑀯𑁂𑀫𑀢𑀺𑀓𑁄 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀢𑀢𑀼𑀢𑁆𑀢𑀭𑀺 𑀦𑀢𑀢𑀼𑀢𑁆𑀢𑀭𑀺𑀲𑀜𑁆𑀜𑀻 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀦𑀢𑀢𑀼𑀢𑁆𑀢𑀭𑀺 𑀢𑀢𑀼𑀢𑁆𑀢𑀭𑀺𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦𑀢𑀢𑀼𑀢𑁆𑀢𑀭𑀺 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦𑀢𑀢𑀼𑀢𑁆𑀢𑀭𑀺 𑀦𑀢𑀢𑀼𑀢𑁆𑀢𑀭𑀺𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁩𑁧𑁦. 𑀅𑀦𑀸𑀧𑀢𑁆𑀢𑀺 𑀬𑁂𑀳𑀺 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑀺𑀢𑁄 𑀳𑁄𑀢𑀺 𑀢𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀬𑀸𑀲𑀼 𑀭𑀢𑁆𑀢𑀻𑀲𑀼 𑀧𑀯𑀸𑀭𑀺𑀢𑁄 𑀳𑁄𑀢𑀺 𑀢𑀸𑀲𑀼 𑀭𑀢𑁆𑀢𑀻𑀲𑀼 𑀯𑀺𑀜𑁆𑀜𑀸𑀧𑁂𑀢𑀺, ‘‘𑀇𑀫𑁂𑀳𑀺 𑀢𑀬𑀸 𑀪𑁂𑀲𑀚𑁆𑀚𑁂𑀳𑀺 𑀧𑀯𑀸𑀭𑀺𑀢𑀸𑀫𑁆𑀳, 𑀅𑀫𑁆𑀳𑀸𑀓𑀜𑁆𑀘 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁄’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑀺, ‘‘𑀬𑀸𑀲𑀼 𑀢𑀬𑀸 𑀭𑀢𑁆𑀢𑀻𑀲𑀼 𑀧𑀯𑀸𑀭𑀺𑀢𑀸𑀫𑁆𑀳 𑀢𑀸𑀬𑁄 𑀘 𑀭𑀢𑁆𑀢𑀺𑀬𑁄 𑀯𑀻𑀢𑀺𑀯𑀢𑁆𑀢𑀸 𑀅𑀫𑁆𑀳𑀸𑀓𑀜𑁆𑀘 𑀪𑁂𑀲𑀚𑁆𑀚𑁂𑀦 𑀅𑀢𑁆𑀣𑁄’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑀺, 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀁, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀥𑀦𑁂𑀦, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀫𑀳𑀸𑀦𑀸𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.

𑁮. 𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀁

𑁩𑁧𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑁂𑀦𑀸𑀬 𑀅𑀩𑁆𑀪𑀼𑀬𑁆𑀬𑀸𑀢𑁄 𑀳𑁄𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀅𑀕𑀫𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺? ‘‘𑀫𑀳𑀸𑀭𑀸𑀚𑀸𑀦𑀁 𑀫𑀬𑀁 𑀤𑀝𑁆𑀞𑀼𑀓𑀸𑀫𑀸’’ [𑀫𑀳𑀸𑀭𑀸𑀚 𑀫𑀳𑀸𑀭𑀸𑀚𑀸𑀦𑀁 𑀫𑀬𑀁 𑀤𑀝𑁆𑀞𑀼𑀓𑀸𑀫𑀸 (𑀓.)] 𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀫𑀁 𑀤𑀺𑀝𑁆𑀞𑁂𑀦 𑀬𑀼𑀤𑁆𑀥𑀸𑀪𑀺𑀦𑀦𑁆𑀤𑀺𑀦𑀁 [𑀬𑀼𑀤𑁆𑀥𑀸𑀪𑀺𑀦𑀦𑁆𑀤𑀺𑀦𑀸 (𑀓.)]; 𑀦𑀦𑀼 𑀪𑀕𑀯𑀸 𑀧𑀲𑁆𑀲𑀺𑀢𑀩𑁆𑀩𑁄’’𑀢𑀺? 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺! 𑀅𑀫𑁆𑀳𑀸𑀓𑀫𑁆𑀧𑀺 𑀅𑀮𑀸𑀪𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀼𑀮𑁆𑀮𑀤𑁆𑀥𑀁, 𑀬𑁂 𑀫𑀬𑀁 𑀆𑀚𑀻𑀯𑀲𑁆𑀲 𑀳𑁂𑀢𑀼 𑀧𑀼𑀢𑁆𑀢𑀤𑀸𑀭𑀲𑁆𑀲 𑀓𑀸𑀭𑀡𑀸 𑀲𑁂𑀦𑀸𑀬 𑀆𑀕𑀘𑁆𑀙𑀸𑀫𑀸’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁩𑁧𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀸𑀢𑀼𑀮𑁄 𑀲𑁂𑀦𑀸𑀬 𑀕𑀺𑀮𑀸𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀜𑁆𑀳𑀺 𑀲𑁂𑀦𑀸𑀬 𑀕𑀺𑀮𑀸𑀦𑁄. 𑀆𑀕𑀘𑁆𑀙𑀢𑀼 𑀪𑀤𑀦𑁆𑀢𑁄. 𑀇𑀘𑁆𑀙𑀸𑀫𑀺 𑀪𑀤𑀦𑁆𑀢𑀲𑁆𑀲 𑀆𑀕𑀢’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑁋 ‘𑀦 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀦𑁆𑀢𑀩𑁆𑀩’𑀦𑁆𑀢𑀺. 𑀅𑀬𑀜𑁆𑀘 𑀫𑁂 𑀫𑀸𑀢𑀼𑀮𑁄 𑀲𑁂𑀦𑀸𑀬 𑀕𑀺𑀮𑀸𑀦𑁄. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸 𑀲𑁂𑀦𑀸𑀬 𑀕𑀦𑁆𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁧𑁩. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀉𑀬𑁆𑀬𑀼𑀢𑁆𑀢𑀁 𑀲𑁂𑀦𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁩𑁧𑁪. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀉𑀬𑁆𑀬𑀼𑀢𑁆𑀢𑀸 𑀦𑀸𑀫 𑀲𑁂𑀦𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀯𑀺𑀝𑁆𑀞𑀸 𑀯𑀸 𑀳𑁄𑀢𑀺 𑀧𑀬𑀸𑀢𑀸 𑀯𑀸.

𑀲𑁂𑀦𑀸 𑀦𑀸𑀫 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻. 𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻, 𑀢𑀺𑀧𑀼𑀭𑀺𑀲𑁄 𑀅𑀲𑁆𑀲𑁄, 𑀘𑀢𑀼𑀧𑀼𑀭𑀺𑀲𑁄 𑀭𑀣𑁄, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀲𑀭𑀳𑀢𑁆𑀣𑀸 𑀧𑀢𑁆𑀢𑀺. 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀢𑁆𑀣 𑀞𑀺𑀢𑁄 𑀧𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀜𑁆𑀜𑀢𑁆𑀭 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸𑀢𑀺 𑀞𑀧𑁂𑀢𑁆𑀯𑀸 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀁.

𑁩𑁧𑁫. 𑀉𑀬𑁆𑀬𑀼𑀢𑁆𑀢𑁂 𑀉𑀬𑁆𑀬𑀼𑀢𑁆𑀢𑀲𑀜𑁆𑀜𑀻 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀅𑀜𑁆𑀜𑀢𑁆𑀭 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀬𑁆𑀬𑀼𑀢𑁆𑀢𑁂 𑀯𑁂𑀫𑀢𑀺𑀓𑁄 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀅𑀜𑁆𑀜𑀢𑁆𑀭 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀬𑁆𑀬𑀼𑀢𑁆𑀢𑁂 𑀅𑀦𑀼𑀬𑁆𑀬𑀼𑀢𑁆𑀢𑀲𑀜𑁆𑀜𑀻 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀅𑀜𑁆𑀜𑀢𑁆𑀭 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀏𑀓𑀫𑁂𑀓𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀢𑁆𑀣 𑀞𑀺𑀢𑁄 𑀧𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀬𑁆𑀬𑀼𑀢𑁆𑀢𑁂 𑀉𑀬𑁆𑀬𑀼𑀢𑁆𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀬𑁆𑀬𑀼𑀢𑁆𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀬𑁆𑀬𑀼𑀢𑁆𑀢𑁂 𑀅𑀦𑀼𑀬𑁆𑀬𑀼𑀢𑁆𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁩𑁧𑁬. 𑀅𑀦𑀸𑀧𑀢𑁆𑀢𑀺 𑀆𑀭𑀸𑀫𑁂 𑀞𑀺𑀢𑁄 𑀧𑀲𑁆𑀲𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀞𑀺𑀢𑁄𑀓𑀸𑀲𑀁 𑀯𑀸 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀯𑀸 𑀦𑀺𑀧𑀦𑁆𑀦𑁄𑀓𑀸𑀲𑀁 𑀯𑀸 𑀆𑀕𑀘𑁆𑀙𑀢𑀺, 𑀧𑀝𑀺𑀧𑀣𑀁 𑀕𑀘𑁆𑀙𑀦𑁆𑀢𑁄 𑀧𑀲𑁆𑀲𑀢𑀺, 𑀢𑀣𑀸𑀭𑀽𑀧𑀧𑁆𑀧𑀘𑁆𑀘𑀬𑀸, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.

𑁯. 𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀁

𑁩𑁧𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑀺 𑀓𑀭𑀡𑀻𑀬𑁂 𑀲𑁂𑀦𑀁 𑀕𑀦𑁆𑀢𑁆𑀯𑀸 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑀁 𑀲𑁂𑀦𑀸𑀬 𑀯𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑁂𑀦𑀸𑀬 𑀯𑀲𑀺𑀲𑁆𑀲𑀦𑁆𑀢𑀺! 𑀅𑀫𑁆𑀳𑀸𑀓𑀫𑁆𑀧𑀺 𑀅𑀮𑀸𑀪𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀼𑀮𑁆𑀮𑀤𑁆𑀥𑀁, 𑀬𑁂 𑀫𑀬𑀁 𑀆𑀚𑀻𑀯𑀲𑁆𑀲 𑀳𑁂𑀢𑀼 𑀧𑀼𑀢𑁆𑀢𑀤𑀸𑀭𑀲𑁆𑀲 𑀓𑀸𑀭𑀡𑀸 𑀲𑁂𑀦𑀸𑀬 𑀧𑀝𑀺𑀯𑀲𑀸𑀫𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑀁 𑀲𑁂𑀦𑀸𑀬 𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑀁 𑀲𑁂𑀦𑀸𑀬 𑀯𑀲𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑀁 𑀲𑁂𑀦𑀸𑀬 𑀯𑀲𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁧𑁮. ‘‘𑀲𑀺𑀬𑀸 𑀘 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀘𑀺𑀤𑁂𑀯 𑀧𑀘𑁆𑀘𑀬𑁄 𑀲𑁂𑀦𑀁 𑀕𑀫𑀦𑀸𑀬, 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑁂𑀦𑀸𑀬 𑀯𑀲𑀺𑀢𑀩𑁆𑀩𑀁. 𑀢𑀢𑁄 𑀘𑁂 𑀉𑀢𑁆𑀢𑀭𑀺𑀁 𑀯𑀲𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁩𑁧𑁯. 𑀲𑀺𑀬𑀸 𑀘 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀘𑀺𑀤𑁂𑀯 𑀧𑀘𑁆𑀘𑀬𑁄 𑀲𑁂𑀦𑀁 𑀕𑀫𑀦𑀸𑀬𑀸𑀢𑀺 𑀲𑀺𑀬𑀸 𑀧𑀘𑁆𑀘𑀬𑁄 𑀲𑀺𑀬𑀸 𑀓𑀭𑀡𑀻𑀬𑀁.

𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑁂𑀦𑀸𑀬 𑀯𑀲𑀺𑀢𑀩𑁆𑀩𑀦𑁆𑀢𑀺 𑀤𑁆𑀯𑁂𑀢𑀺𑀲𑁆𑀲𑁄 𑀭𑀢𑁆𑀢𑀺𑀬𑁄 𑀯𑀲𑀺𑀢𑀩𑁆𑀩𑀁.

𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀲𑁂𑀬𑁆𑀬𑀸𑀢𑀺 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀲𑁂𑀦𑀸𑀬 𑀯𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁩𑁨𑁦. 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑁂 𑀅𑀢𑀺𑀭𑁂𑀓𑀲𑀜𑁆𑀜𑀻 𑀲𑁂𑀦𑀸𑀬 𑀯𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑁂 𑀯𑁂𑀫𑀢𑀺𑀓𑁄 𑀲𑁂𑀦𑀸𑀬 𑀯𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀢𑀺𑀭𑁂𑀓𑀢𑀺𑀭𑀢𑁆𑀢𑁂 𑀊𑀦𑀓𑀲𑀜𑁆𑀜𑀻 𑀲𑁂𑀦𑀸𑀬 𑀯𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀊𑀦𑀓𑀢𑀺𑀭𑀢𑁆𑀢𑁂 𑀅𑀢𑀺𑀭𑁂𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀢𑀺𑀭𑀢𑁆𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀢𑀺𑀭𑀢𑁆𑀢𑁂 𑀊𑀦𑀓𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁩𑁨𑁧. 𑀅𑀦𑀸𑀧𑀢𑁆𑀢𑀺 𑀤𑁆𑀯𑁂𑀢𑀺𑀲𑁆𑀲𑁄 𑀭𑀢𑁆𑀢𑀺𑀬𑁄 𑀯𑀲𑀢𑀺, 𑀊𑀦𑀓𑀤𑁆𑀯𑁂𑀢𑀺𑀲𑁆𑀲𑁄 𑀭𑀢𑁆𑀢𑀺𑀬𑁄 𑀯𑀲𑀢𑀺, 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸 𑀢𑀢𑀺𑀬𑀸𑀬 𑀭𑀢𑁆𑀢𑀺𑀬𑀸 𑀧𑀼𑀭𑀸𑀭𑀼𑀡𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀯𑀲𑀢𑀺, 𑀕𑀺𑀮𑀸𑀦𑁄 𑀯𑀲𑀢𑀺, 𑀕𑀺𑀮𑀸𑀦𑀲𑁆𑀲 𑀓𑀭𑀡𑀻𑀬𑁂𑀦 𑀯𑀲𑀢𑀺, 𑀲𑁂𑀦𑀸 𑀯𑀸 𑀧𑀝𑀺𑀲𑁂𑀦𑀸𑀬 𑀭𑀼𑀤𑁆𑀥𑀸 𑀳𑁄𑀢𑀺, 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑁄 𑀳𑁄𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑁂𑀦𑀸𑀯𑀸𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.

𑁧𑁦. 𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑀁

𑁩𑁨𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑁂𑀦𑀸𑀬 𑀯𑀲𑀫𑀸𑀦𑀸 𑀉𑀬𑁆𑀬𑁄𑀥𑀺𑀓𑀫𑁆𑀧𑀺 𑀩𑀮𑀕𑁆𑀕𑀫𑁆𑀧𑀺 𑀲𑁂𑀦𑀸𑀩𑁆𑀬𑀽𑀳𑀫𑁆𑀧𑀺 𑀅𑀦𑀻𑀓𑀤𑀲𑁆𑀲𑀦𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀅𑀜𑁆𑀜𑀢𑀭𑁄𑀧𑀺 𑀙𑀩𑁆𑀩𑀕𑁆𑀕𑀺𑀬𑁄 𑀪𑀺𑀓𑁆𑀔𑀼 𑀉𑀬𑁆𑀬𑁄𑀥𑀺𑀓𑀁 𑀕𑀦𑁆𑀢𑁆𑀯𑀸 𑀓𑀡𑁆𑀟𑁂𑀦 𑀧𑀝𑀺𑀯𑀺𑀤𑁆𑀥𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑁆𑀧𑀡𑁆𑀟𑁂𑀲𑀼𑀁 𑁋 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀲𑀼𑀬𑀼𑀤𑁆𑀥𑀁 𑀅𑀳𑁄𑀲𑀺, 𑀓𑀢𑀺 𑀢𑁂 𑀮𑀓𑁆𑀔𑀸𑀦𑀺 𑀮𑀤𑁆𑀥𑀸𑀦𑀻’’𑀢𑀺? 𑀲𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀉𑀧𑁆𑀧𑀡𑁆𑀟𑀻𑀬𑀫𑀸𑀦𑁄 𑀫𑀗𑁆𑀓𑀼 𑀅𑀳𑁄𑀲𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀉𑀬𑁆𑀬𑁄𑀥𑀺𑀓𑀁 𑀤𑀲𑁆𑀲𑀦𑀸𑀬 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺! 𑀅𑀫𑁆𑀳𑀸𑀓𑀫𑁆𑀧𑀺 𑀅𑀮𑀸𑀪𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀼𑀮𑁆𑀮𑀤𑁆𑀥𑀁, 𑀬𑁂 𑀫𑀬𑀁 𑀆𑀚𑀻𑀯𑀲𑁆𑀲 𑀳𑁂𑀢𑀼 𑀧𑀼𑀢𑁆𑀢𑀤𑀸𑀭𑀲𑁆𑀲 𑀓𑀸𑀭𑀡𑀸 𑀉𑀬𑁆𑀬𑁄𑀥𑀺𑀓𑀁 𑀆𑀕𑀘𑁆𑀙𑀸𑀫𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀬𑁆𑀬𑁄𑀥𑀺𑀓𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀬𑁆𑀬𑁄𑀥𑀺𑀓𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀉𑀬𑁆𑀬𑁄𑀥𑀺𑀓𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁨𑁩. ‘‘𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀘𑁂 𑀪𑀺𑀓𑁆𑀔𑀼 𑀲𑁂𑀦𑀸𑀬 𑀯𑀲𑀫𑀸𑀦𑁄 𑀉𑀬𑁆𑀬𑁄𑀥𑀺𑀓𑀁 𑀯𑀸 𑀩𑀮𑀕𑁆𑀕𑀁 𑀯𑀸 𑀲𑁂𑀦𑀸𑀩𑁆𑀬𑀽𑀳𑀁 𑀯𑀸 𑀅𑀦𑀻𑀓𑀤𑀲𑁆𑀲𑀦𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁩𑁨𑁪. 𑀤𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀘𑁂 𑀪𑀺𑀓𑁆𑀔𑀼 𑀲𑁂𑀦𑀸𑀬 𑀯𑀲𑀫𑀸𑀦𑁄𑀢𑀺 𑀤𑁆𑀯𑁂𑀢𑀺𑀲𑁆𑀲𑁄 𑀭𑀢𑁆𑀢𑀺𑀬𑁄 𑀯𑀲𑀫𑀸𑀦𑁄.

𑀉𑀬𑁆𑀬𑁄𑀥𑀺𑀓𑀁 𑀦𑀸𑀫 𑀬𑀢𑁆𑀣 𑀲𑀫𑁆𑀧𑀳𑀸𑀭𑁄 𑀤𑀺𑀲𑁆𑀲𑀢𑀺.

𑀩𑀮𑀕𑁆𑀕𑀁 𑀦𑀸𑀫 𑀏𑀢𑁆𑀢𑀓𑀸 𑀳𑀢𑁆𑀣𑀻, 𑀏𑀢𑁆𑀢𑀓𑀸 𑀅𑀲𑁆𑀲𑀸, 𑀏𑀢𑁆𑀢𑀓𑀸 𑀭𑀣𑀸, 𑀏𑀢𑁆𑀢𑀓𑀸 𑀧𑀢𑁆𑀢𑀻.

𑀲𑁂𑀦𑀸𑀩𑁆𑀬𑀽𑀳𑀁 𑀦𑀸𑀫 𑀇𑀢𑁄 𑀳𑀢𑁆𑀣𑀻 𑀳𑁄𑀦𑁆𑀢𑀼, 𑀇𑀢𑁄 𑀅𑀲𑁆𑀲𑀸 𑀳𑁄𑀦𑁆𑀢𑀼, 𑀇𑀢𑁄 𑀭𑀣𑀸 𑀳𑁄𑀦𑁆𑀢𑀼, 𑀇𑀢𑁄 𑀧𑀢𑁆𑀢𑀺𑀓𑀸 𑀳𑁄𑀦𑁆𑀢𑀼.

𑀅𑀦𑀻𑀓𑀁 𑀦𑀸𑀫 𑀳𑀢𑁆𑀣𑀸𑀦𑀻𑀓𑀁, 𑀅𑀲𑁆𑀲𑀸𑀦𑀻𑀓𑀁, 𑀭𑀣𑀸𑀦𑀻𑀓𑀁, 𑀧𑀢𑁆𑀢𑀸𑀦𑀻𑀓𑀁. 𑀢𑀬𑁄 𑀳𑀢𑁆𑀣𑀻 𑀧𑀘𑁆𑀙𑀺𑀫𑀁 𑀳𑀢𑁆𑀣𑀸𑀦𑀻𑀓𑀁, 𑀢𑀬𑁄 𑀅𑀲𑁆𑀲𑀸 𑀧𑀘𑁆𑀙𑀺𑀫𑀁 𑀅𑀲𑁆𑀲𑀸𑀦𑀻𑀓𑀁, 𑀢𑀬𑁄 𑀭𑀣𑀸 𑀧𑀘𑁆𑀙𑀺𑀫𑀁 𑀭𑀣𑀸𑀦𑀻𑀓𑀁, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀲𑀭𑀳𑀢𑁆𑀣𑀸 𑀧𑀢𑁆𑀢𑀻 𑀧𑀘𑁆𑀙𑀺𑀫𑀁 𑀧𑀢𑁆𑀢𑀸𑀦𑀻𑀓𑀁. 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀢𑁆𑀣 𑀞𑀺𑀢𑁄 𑀧𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.