𑁨. 𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀁

𑁧𑁫𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑀺 𑀧𑀭𑀺𑀬𑀸𑀬𑁂𑀦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀘𑀽𑀴𑀧𑀦𑁆𑀣𑀓𑀲𑁆𑀲 𑀧𑀭𑀺𑀬𑀸𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀤𑀸𑀦𑀺 𑀅𑀚𑁆𑀚 𑀑𑀯𑀸𑀤𑁄 𑀇𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀜𑁆𑀜𑁂𑀯 𑀤𑀸𑀦𑀺 𑀉𑀤𑀸𑀦𑀁 𑀅𑀬𑁆𑀬𑁄 𑀘𑀽𑀴𑀧𑀦𑁆𑀣𑀓𑁄 𑀧𑀼𑀦𑀧𑁆𑀧𑀼𑀦𑀁 𑀪𑀡𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑁂𑀦𑀸𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀘𑀽𑀴𑀧𑀦𑁆𑀣𑀓𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀏𑀢𑀤𑀯𑁄𑀘 𑁋 ‘‘𑀲𑀫𑀕𑁆𑀕𑀸𑀢𑁆𑀣, 𑀪𑀕𑀺𑀦𑀺𑀬𑁄’’𑀢𑀺? ‘‘𑀲𑀫𑀕𑁆𑀕𑀸𑀫𑁆𑀳𑀸𑀬𑁆𑀬𑀸’’𑀢𑀺. ‘‘𑀯𑀢𑁆𑀢𑀦𑁆𑀢𑀺, 𑀪𑀕𑀺𑀦𑀺𑀬𑁄, 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸’’𑀢𑀺? ‘‘𑀯𑀢𑁆𑀢𑀦𑁆𑀢𑀸𑀬𑁆𑀬𑀸’’𑀢𑀺. ‘‘𑀏𑀲𑁄, 𑀪𑀕𑀺𑀦𑀺𑀬𑁄, 𑀑𑀯𑀸𑀤𑁄’’𑀢𑀺 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀅𑀪𑀸𑀲𑀺 𑁋

[𑀉𑀤𑀸. 𑁩𑁭] ‘‘𑀅𑀥𑀺𑀘𑁂𑀢𑀲𑁄 𑀅𑀧𑁆𑀧𑀫𑀚𑁆𑀚𑀢𑁄, 𑀫𑀼𑀦𑀺𑀦𑁄 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀢𑁄;

𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄, 𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄’’𑀢𑀺.

𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀦𑀼 𑀅𑀯𑁄𑀘𑀼𑀫𑁆𑀳𑀸 𑁋 𑀦 𑀤𑀸𑀦𑀺 𑀅𑀚𑁆𑀚 𑀑𑀯𑀸𑀤𑁄 𑀇𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑀜𑁆𑀜𑁂𑀯 𑀤𑀸𑀦𑀺 𑀉𑀤𑀸𑀦𑀁 𑀅𑀬𑁆𑀬𑁄 𑀘𑀽𑀴𑀧𑀦𑁆𑀣𑀓𑁄 𑀧𑀼𑀦𑀧𑁆𑀧𑀼𑀦𑀁 𑀪𑀡𑀺𑀲𑁆𑀲𑀢𑀻’’𑀢𑀺! 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺 𑀥𑀽𑀫𑀸𑀬𑀢𑀺𑀧𑀺 𑀧𑀚𑁆𑀚𑀮𑀢𑀺𑀧𑀺 𑀅𑀦𑁆𑀢𑀭𑀥𑀸𑀬𑀢𑀺𑀧𑀺, 𑀢𑀜𑁆𑀘𑁂𑀯 [𑀢𑀜𑁆𑀜𑁂𑀯 (𑀇𑀢𑀺𑀧𑀺)] 𑀉𑀤𑀸𑀦𑀁 𑀪𑀡𑀢𑀺 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀩𑀼𑀤𑁆𑀥𑀯𑀘𑀦𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀦 𑀯𑀢 𑀦𑁄 𑀇𑀢𑁄 𑀧𑀼𑀩𑁆𑀩𑁂 𑀑𑀯𑀸𑀤𑁄 𑀏𑀯𑀁 𑀇𑀤𑁆𑀥𑁄 𑀪𑀽𑀢𑀧𑀼𑀩𑁆𑀩𑁄 𑀬𑀣𑀸 𑀅𑀬𑁆𑀬𑀲𑁆𑀲 𑀘𑀽𑀴𑀧𑀦𑁆𑀣𑀓𑀲𑁆𑀲𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑀸𑀯 𑀲𑀫𑀦𑁆𑀥𑀓𑀸𑀭𑀸 𑀑𑀯𑀤𑀺𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 𑀕𑀘𑁆𑀙𑀣 𑀪𑀕𑀺𑀦𑀺𑀬𑁄𑀢𑀺.

𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀕𑀭𑀤𑁆𑀯𑀸𑀭𑁂 𑀣𑀓𑀺𑀢𑁂 𑀩𑀳𑀺𑀦𑀕𑀭𑁂 𑀯𑀲𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀬𑁄 𑀇𑀫𑀸 𑀪𑀺𑀓𑁆𑀔𑀼𑀦𑀺𑀬𑁄; 𑀆𑀭𑀸𑀫𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀺𑀢𑁆𑀯𑀸 𑀇𑀤𑀸𑀦𑀺 𑀦𑀕𑀭𑀁 𑀧𑀯𑀺𑀲𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀘𑀽𑀴𑀧𑀦𑁆𑀣𑀓𑁄 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀲𑁆𑀲𑀢𑀻’’𑀢𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀘𑀽𑀴𑀧𑀦𑁆𑀣𑀓, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀘𑀽𑀴𑀧𑀦𑁆𑀣𑀓, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀲𑁆𑀲𑀲𑀺! 𑀦𑁂𑀢𑀁, 𑀘𑀽𑀴𑀧𑀦𑁆𑀣𑀓, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁫𑁪. ‘‘𑀲𑀫𑁆𑀫𑀢𑁄𑀧𑀺 𑀘𑁂 𑀪𑀺𑀓𑁆𑀔𑀼 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁫𑁫. 𑀲𑀫𑁆𑀫𑀢𑁄 𑀦𑀸𑀫 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀲𑀫𑁆𑀫𑀢𑁄.

𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂𑀢𑀺 𑀑𑀕𑁆𑀕𑀢𑁂 𑀲𑀽𑀭𑀺𑀬𑁂.

𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸.

𑀑𑀯𑀤𑁂𑀬𑁆𑀬𑀸𑀢𑀺 𑀅𑀝𑁆𑀞𑀳𑀺 𑀯𑀸 𑀕𑀭𑀼𑀥𑀫𑁆𑀫𑁂𑀳𑀺 𑀅𑀜𑁆𑀜𑁂𑀦 𑀯𑀸 𑀥𑀫𑁆𑀫𑁂𑀦 𑀑𑀯𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁫𑁬. 𑀅𑀢𑁆𑀣𑀗𑁆𑀕𑀢𑁂 𑀅𑀢𑁆𑀣𑀗𑁆𑀕𑀢𑀲𑀜𑁆𑀜𑀻 𑀑𑀯𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀢𑁆𑀣𑀗𑁆𑀕𑀢𑁂 𑀯𑁂𑀫𑀢𑀺𑀓𑁄 𑀑𑀯𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀢𑁆𑀣𑀗𑁆𑀕𑀢𑁂 𑀅𑀦𑀢𑁆𑀣𑀗𑁆𑀕𑀢𑀲𑀜𑁆𑀜𑀻 𑀑𑀯𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀑𑀯𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀢𑁆𑀣𑀗𑁆𑀕𑀢𑁂 𑀅𑀢𑁆𑀣𑀗𑁆𑀕𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀢𑁆𑀣𑀗𑁆𑀕𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀢𑁆𑀣𑀗𑁆𑀕𑀢𑁂 𑀅𑀦𑀢𑁆𑀣𑀗𑁆𑀕𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁧𑁫𑁭. 𑀅𑀦𑀸𑀧𑀢𑁆𑀢𑀺 𑀉𑀤𑁆𑀤𑁂𑀲𑀁 𑀤𑁂𑀦𑁆𑀢𑁄, 𑀧𑀭𑀺𑀧𑀼𑀘𑁆𑀙𑀁 𑀤𑁂𑀦𑁆𑀢𑁄, ‘‘𑀑𑀲𑀸𑀭𑁂𑀳𑀺 𑀅𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄, 𑀑𑀲𑀸𑀭𑁂𑀢𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀺, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀪𑀡𑀦𑁆𑀢𑀁 𑀪𑀺𑀓𑁆𑀔𑀼𑀦𑀺𑀬𑁄 𑀲𑀼𑀡𑀦𑁆𑀢𑀺, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀺𑀬𑀸, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.