𑁭. 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀁

𑁧𑁨𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀺𑀫𑀁 𑀫𑀳𑀸𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺 𑁋 ‘‘𑀇𑀥 𑀫𑀬𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀸’’𑀢𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑁂, 𑀆𑀯𑀼𑀲𑁄, 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺. 𑀳𑀦𑁆𑀤 𑀦𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺! 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀕𑀫𑁂𑀣𑀸𑀯𑀼𑀲𑁄, 𑀬𑀸𑀯 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺; 𑀧𑀝𑀺𑀲𑀗𑁆𑀔𑀢𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀝𑁆𑀞𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀦𑀦𑀼, 𑀆𑀯𑀼𑀲𑁄, 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀫𑀬𑀜𑁆𑀘𑀜𑁆𑀜𑀁 𑀧𑀝𑀺𑀲𑀗𑁆𑀔𑀭𑁂𑀬𑁆𑀬𑀸𑀫𑀸’’𑀢𑀺. ‘‘𑀦𑀦𑀼, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄’’𑀢𑀺. ‘‘𑀉𑀝𑁆𑀞𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀫𑀳𑀮𑁆𑀮𑀓𑁄, 𑀆𑀯𑀼𑀲𑁄, 𑀯𑀺𑀳𑀸𑀭𑁄. 𑀢𑀼𑀫𑁆𑀳𑁂𑀧𑀺 𑀯𑀲𑀣, 𑀫𑀬𑀫𑁆𑀧𑀺 𑀯𑀲𑀺𑀲𑁆𑀲𑀸𑀫𑀸’’𑀢𑀺. ‘‘𑀉𑀝𑁆𑀞𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑀺. 𑀢𑁂 𑀦𑀺𑀓𑁆𑀓𑀟𑁆𑀠𑀻𑀬𑀫𑀸𑀦𑀸 𑀭𑁄𑀤𑀦𑁆𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀭𑁄𑀤𑀣𑀸’’𑀢𑀺? ‘‘𑀇𑀫𑁂, 𑀆𑀯𑀼𑀲𑁄, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀫𑁆𑀳𑁂 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑀻’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀣? 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁨𑁫. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑁂𑀬𑁆𑀬 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁨𑁬. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀪𑀺𑀓𑁆𑀔𑀼𑀦𑁆𑀢𑀺 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁.

𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄𑀢𑀺 𑀅𑀦𑀪𑀺𑀭𑀤𑁆𑀥𑁄 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄.

𑀲𑀗𑁆𑀖𑀺𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑁄.

𑀦𑀺𑀓𑁆𑀓𑀟𑁆𑀠𑁂𑀬𑁆𑀬𑀸𑀢𑀺 𑀕𑀩𑁆𑀪𑁂 𑀕𑀳𑁂𑀢𑁆𑀯𑀸 𑀧𑀫𑀼𑀔𑀁 𑀦𑀺𑀓𑁆𑀓𑀟𑁆𑀠𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀧𑀫𑀼𑀔𑁂 𑀕𑀳𑁂𑀢𑁆𑀯𑀸 𑀩𑀳𑀺 𑀦𑀺𑀓𑁆𑀓𑀟𑁆𑀠𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀏𑀓𑁂𑀦 𑀧𑀬𑁄𑀕𑁂𑀦 𑀩𑀳𑀼𑀓𑁂𑀧𑀺 𑀤𑁆𑀯𑀸𑀭𑁂 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀦𑀺𑀓𑁆𑀓𑀟𑁆𑀠𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 [𑀤𑀼𑀓𑁆𑀓𑀝𑀲𑁆𑀲 (𑀓𑀢𑁆𑀣𑀘𑀺)]. 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀓𑁂𑀧𑀺 𑀤𑁆𑀯𑀸𑀭𑁂 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁨𑁭. 𑀲𑀗𑁆𑀖𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀻 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀗𑁆𑀖𑀺𑀓𑁂 𑀯𑁂𑀫𑀢𑀺𑀓𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀗𑁆𑀖𑀺𑀓𑁂 𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑀸 𑀯𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀯𑀸 𑀫𑀡𑁆𑀟𑀧𑀸 𑀯𑀸 𑀭𑀼𑀓𑁆𑀔𑀫𑀽𑀮𑀸 𑀯𑀸 𑀅𑀚𑁆𑀛𑁄𑀓𑀸𑀲𑀸 𑀯𑀸 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀯𑀺𑀳𑀸𑀭𑀸 𑀯𑀸 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑀸 𑀯𑀸 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀯𑀸 𑀫𑀡𑁆𑀟𑀧𑀸 𑀯𑀸 𑀭𑀼𑀓𑁆𑀔𑀫𑀽𑀮𑀸 𑀯𑀸 𑀅𑀚𑁆𑀛𑁄𑀓𑀸𑀲𑀸 𑀯𑀸 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀧𑀼𑀕𑁆𑀕𑀮𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀼𑀕𑁆𑀕𑀮𑀺𑀓𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀼𑀕𑁆𑀕𑀮𑀺𑀓𑁂 𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀺𑀓𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑁂 𑀅𑀦𑀸𑀧𑀢𑁆𑀢𑀺.

𑁧𑁨𑁮. 𑀅𑀦𑀸𑀧𑀢𑁆𑀢𑀺 𑀅𑀮𑀚𑁆𑀚𑀺𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀉𑀫𑁆𑀫𑀢𑁆𑀢𑀓𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀪𑀡𑁆𑀟𑀦𑀓𑀸𑀭𑀓𑀁 𑀓𑀮𑀳𑀓𑀸𑀭𑀓𑀁 𑀯𑀺𑀯𑀸𑀤𑀓𑀸𑀭𑀓𑀁 𑀪𑀲𑁆𑀲𑀓𑀸𑀭𑀓𑀁 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀅𑀦𑁆𑀢𑁂𑀯𑀸𑀲𑀺𑀓𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀯𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀢𑀲𑁆𑀲 𑀧𑀭𑀺𑀓𑁆𑀔𑀸𑀭𑀁 𑀦𑀺𑀓𑁆𑀓𑀟𑁆𑀠𑀢𑀺 𑀯𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑀺 𑀯𑀸, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.