𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀁

𑁧𑁦𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀳𑁂𑀫𑀦𑁆𑀢𑀺𑀓𑁂 𑀓𑀸𑀮𑁂 𑀅𑀚𑁆𑀛𑁄𑀓𑀸𑀲𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀓𑀸𑀬𑀁 𑀑𑀢𑀸𑀧𑁂𑀦𑁆𑀢𑀸 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀢𑀁 𑀧𑀓𑁆𑀓𑀫𑀦𑁆𑀢𑀸 𑀦𑁂𑀯 𑀉𑀤𑁆𑀥𑀭𑀺𑀁𑀲𑀼 𑀦 𑀉𑀤𑁆𑀥𑀭𑀸𑀧𑁂𑀲𑀼𑀁, 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀁𑀲𑀼. 𑀲𑁂𑀦𑀸𑀲𑀦𑀁 𑀑𑀯𑀝𑁆𑀞𑀁 𑀳𑁄𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀁 𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀅𑀚𑁆𑀛𑁄𑀓𑀸𑀲𑁂 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀢𑀁 𑀧𑀓𑁆𑀓𑀫𑀦𑁆𑀢𑀸 𑀦𑁂𑀯 𑀉𑀤𑁆𑀥𑀭𑀺𑀲𑁆𑀲𑀦𑁆𑀢𑀺 𑀦 𑀉𑀤𑁆𑀥𑀭𑀸𑀧𑁂𑀲𑁆𑀲𑀦𑁆𑀢𑀺, 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀑𑀯𑀝𑁆𑀞’’𑀦𑁆𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀚𑁆𑀛𑁄𑀓𑀸𑀲𑁂…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁦𑁯. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀁 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀪𑀺𑀲𑀺𑀁 𑀯𑀸 𑀓𑁄𑀘𑁆𑀙𑀁 𑀯𑀸 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬 𑀦 𑀉𑀤𑁆𑀥𑀭𑀸𑀧𑁂𑀬𑁆𑀬, 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁧𑁧𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀚𑁆𑀛𑁄𑀓𑀸𑀲𑁂 𑀯𑀲𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀲𑁂𑀦𑀸𑀲𑀦𑀁 𑀅𑀪𑀺𑀳𑀭𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀓𑀸𑀮𑀲𑁆𑀲𑁂𑀯 𑀲𑁂𑀦𑀸𑀲𑀦𑀁 𑀅𑀪𑀺𑀳𑀭𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀫𑀸𑀲𑁂 𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂 [𑀯𑀲𑀺𑀢𑀼𑀁 𑀅𑀯𑀲𑁆𑀲𑀺𑀓𑀲𑀁𑀓𑁂𑀢𑁂 (𑀇𑀢𑀺𑀧𑀺)] 𑀫𑀡𑁆𑀟𑀧𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀬𑀢𑁆𑀣 𑀓𑀸𑀓𑀸 𑀯𑀸 𑀓𑀼𑀮𑀮𑀸 𑀯𑀸 𑀦 𑀊𑀳𑀤𑀦𑁆𑀢𑀺 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺.

𑁧𑁧𑁧. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀗𑁆𑀖𑀺𑀓𑀁 𑀦𑀸𑀫 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀁 𑀳𑁄𑀢𑀺 𑀧𑀭𑀺𑀘𑁆𑀘𑀢𑁆𑀢𑀁.

𑀫𑀜𑁆𑀘𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀜𑁆𑀘𑀸 𑁋 𑀫𑀲𑀸𑀭𑀓𑁄, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀓𑀼𑀴𑀻𑀭𑀧𑀸𑀤𑀓𑁄, 𑀆𑀳𑀘𑁆𑀘𑀧𑀸𑀤𑀓𑁄.

𑀧𑀻𑀞𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀧𑀻𑀞𑀸𑀦𑀺 𑁋 𑀫𑀲𑀸𑀭𑀓𑀁, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑀁, 𑀓𑀼𑀴𑀻𑀭𑀧𑀸𑀤𑀓𑀁, 𑀆𑀳𑀘𑁆𑀘𑀧𑀸𑀤𑀓𑀁.

𑀪𑀺𑀲𑀺 𑀦𑀸𑀫 𑀧𑀜𑁆𑀘 𑀪𑀺𑀲𑀺𑀬𑁄 𑁋 𑀉𑀡𑁆𑀡𑀪𑀺𑀲𑀺, 𑀘𑁄𑀴𑀪𑀺𑀢𑀺, 𑀯𑀸𑀓𑀪𑀺𑀲𑀺, 𑀢𑀺𑀡𑀪𑀺𑀲𑀺, 𑀧𑀡𑁆𑀡𑀪𑀺𑀲𑀺.

𑀓𑁄𑀘𑁆𑀙𑀁 𑀦𑀸𑀫 𑁋 𑀯𑀸𑀓𑀫𑀬𑀁 𑀯𑀸 𑀉𑀲𑀻𑀭𑀫𑀬𑀁 𑀯𑀸 𑀫𑀼𑀜𑁆𑀚𑀫𑀬𑀁 𑀯𑀸 𑀧𑀩𑁆𑀩𑀚𑀫𑀬𑀁 [𑀩𑀩𑁆𑀩𑀚𑀫𑀬𑀁 (𑀲𑀻.)] 𑀯𑀸 𑀅𑀦𑁆𑀢𑁄 𑀲𑀁𑀯𑁂𑀞𑁂𑀢𑁆𑀯𑀸 𑀩𑀤𑁆𑀥𑀁 𑀳𑁄𑀢𑀺.

𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀲𑀬𑀁 𑀲𑀦𑁆𑀣𑀭𑀺𑀢𑁆𑀯𑀸.

𑀲𑀦𑁆𑀣𑀭𑀸𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀁 𑀲𑀦𑁆𑀣𑀭𑀸𑀧𑁂𑀢𑁆𑀯𑀸. 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀲𑀦𑁆𑀣𑀭𑀸𑀧𑁂𑀢𑀺, 𑀢𑀲𑁆𑀲 𑀧𑀮𑀺𑀩𑁄𑀥𑁄. 𑀉𑀧𑀲𑀫𑁆𑀧𑀦𑁆𑀦𑀁 𑀲𑀦𑁆𑀣𑀭𑀸𑀧𑁂𑀢𑀺, 𑀲𑀦𑁆𑀣𑀸𑀭𑀓𑀲𑁆𑀲 [𑀲𑀦𑁆𑀣𑀢𑀲𑁆𑀲 (𑀇𑀢𑀺𑀧𑀺)] 𑀧𑀮𑀺𑀩𑁄𑀥𑁄.

𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬𑀸𑀢𑀺 𑀦 𑀲𑀬𑀁 𑀉𑀤𑁆𑀥𑀭𑁂𑀬𑁆𑀬.

𑀦 𑀉𑀤𑁆𑀥𑀭𑀸𑀧𑁂𑀬𑁆𑀬𑀸𑀢𑀺 𑀦 𑀅𑀜𑁆𑀜𑀁 𑀉𑀤𑁆𑀥𑀭𑀸𑀧𑁂𑀬𑁆𑀬.

𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸𑀢𑀺 𑀪𑀺𑀓𑁆𑀔𑀼𑀁 𑀯𑀸 𑀲𑀸𑀫𑀡𑁂𑀭𑀁 𑀯𑀸 𑀆𑀭𑀸𑀫𑀺𑀓𑀁 𑀯𑀸 𑀅𑀦𑀸𑀧𑀼𑀘𑁆𑀙𑀸 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀮𑁂𑀟𑁆𑀟𑀼𑀧𑀸𑀢𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁨. 𑀲𑀗𑁆𑀖𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀻 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬 𑀦 𑀉𑀤𑁆𑀥𑀭𑀸𑀧𑁂𑀬𑁆𑀬 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀗𑁆𑀖𑀺𑀓𑁂 𑀯𑁂𑀫𑀢𑀺𑀓𑁄…𑀧𑁂… 𑀲𑀗𑁆𑀖𑀺𑀓𑁂 𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬 𑀦 𑀉𑀤𑁆𑀥𑀭𑀸𑀧𑁂𑀬𑁆𑀬, 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀘𑀺𑀫𑀺𑀮𑀺𑀓𑀁 𑀯𑀸 𑀉𑀢𑁆𑀢𑀭𑀢𑁆𑀣𑀭𑀡𑀁 𑀯𑀸 𑀪𑀽𑀫𑀢𑁆𑀣𑀭𑀡𑀁 𑀯𑀸 𑀢𑀝𑁆𑀝𑀺𑀓𑀁 𑀯𑀸 𑀘𑀫𑁆𑀫𑀔𑀡𑁆𑀟𑀁 𑀯𑀸 𑀧𑀸𑀤𑀧𑀼𑀜𑁆𑀙𑀦𑀺𑀁 𑀯𑀸 𑀨𑀮𑀓𑀧𑀻𑀞𑀁 𑀯𑀸 𑀅𑀚𑁆𑀛𑁄𑀓𑀸𑀲𑁂 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀢𑀁 𑀧𑀓𑁆𑀓𑀫𑀦𑁆𑀢𑁄 𑀦𑁂𑀯 𑀉𑀤𑁆𑀥𑀭𑁂𑀬𑁆𑀬 𑀦 𑀉𑀤𑁆𑀥𑀭𑀸𑀧𑁂𑀬𑁆𑀬, 𑀅𑀦𑀸𑀧𑀼𑀘𑁆𑀙𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀼𑀕𑁆𑀕𑀮𑀺𑀓𑁂 𑀲𑀗𑁆𑀖𑀺𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀼𑀕𑁆𑀕𑀮𑀺𑀓𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀼𑀕𑁆𑀕𑀮𑀺𑀓𑁂 𑀧𑀼𑀕𑁆𑀕𑀮𑀺𑀓𑀲𑀜𑁆𑀜𑀻 𑀅𑀜𑁆𑀜𑀲𑁆𑀲 𑀧𑀼𑀕𑁆𑀕𑀮𑀺𑀓𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀢𑁆𑀢𑀦𑁄 𑀧𑀼𑀕𑁆𑀕𑀮𑀺𑀓𑁂 𑀅𑀦𑀸𑀧𑀢𑁆𑀢𑀺.

𑁧𑁧𑁩. 𑀅𑀦𑀸𑀧𑀢𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀆𑀧𑀼𑀘𑁆𑀙𑀁 𑀕𑀘𑁆𑀙𑀢𑀺, 𑀑𑀢𑀸𑀧𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.