𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁

𑁮𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀺𑀧𑀺 𑀙𑁂𑀤𑀸𑀧𑁂𑀦𑁆𑀢𑀺𑀧𑀺. 𑀅𑀜𑁆𑀜𑀢𑀭𑁄𑀧𑀺 𑀆𑀴𑀯𑀓𑁄 𑀪𑀺𑀓𑁆𑀔𑀼 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺. 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀪𑀦𑁆𑀢𑁂, 𑀅𑀢𑁆𑀢𑀦𑁄 𑀪𑀯𑀦𑀁 𑀓𑀢𑁆𑀢𑀼𑀓𑀸𑀫𑁄 𑀫𑀬𑁆𑀳𑀁 𑀪𑀯𑀦𑀁 𑀙𑀺𑀦𑁆𑀤𑀻’’𑀢𑀺. 𑀲𑁄 𑀪𑀺𑀓𑁆𑀔𑀼 𑀅𑀦𑀸𑀤𑀺𑀬𑀦𑁆𑀢𑁄 𑀙𑀺𑀦𑁆𑀤𑀺 𑀬𑁂𑀯, 𑀢𑀲𑁆𑀲𑀸 𑀘 𑀤𑁂𑀯𑀢𑀸𑀬 𑀤𑀸𑀭𑀓𑀲𑁆𑀲 𑀩𑀸𑀳𑀼𑀁 𑀆𑀓𑁄𑀝𑁂𑀲𑀺. 𑀅𑀣 𑀔𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑁆𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀇𑀥𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀇𑀥𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀁. 𑀬𑀦𑁆𑀦𑀽𑀦𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀲𑀸𑀥𑀼 𑀲𑀸𑀥𑀼 𑀤𑁂𑀯𑀢𑁂! 𑀲𑀸𑀥𑀼 𑀔𑁄 𑀢𑁆𑀯𑀁, 𑀤𑁂𑀯𑀢𑁂, 𑀢𑀁 𑀪𑀺𑀓𑁆𑀔𑀼𑀁 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑀺. 𑀲𑀘𑀚𑁆𑀚 𑀢𑁆𑀯𑀁, 𑀤𑁂𑀯𑀢𑁂, 𑀢𑀁 𑀪𑀺𑀓𑁆𑀔𑀼𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀲𑀺, 𑀩𑀳𑀼𑀜𑁆𑀘 𑀢𑁆𑀯𑀁, 𑀤𑁂𑀯𑀢𑁂, 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀸𑀲𑀺. 𑀕𑀘𑁆𑀙 𑀢𑁆𑀯𑀁, 𑀤𑁂𑀯𑀢𑁂, 𑀅𑀫𑀼𑀓𑀲𑁆𑀫𑀺𑀁 𑀑𑀓𑀸𑀲𑁂 𑀭𑀼𑀓𑁆𑀔𑁄 𑀯𑀺𑀯𑀺𑀢𑁆𑀢𑁄 𑀢𑀲𑁆𑀫𑀺𑀁 𑀉𑀧𑀕𑀘𑁆𑀙𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺𑀧𑀺 𑀙𑁂𑀤𑀸𑀧𑁂𑀲𑁆𑀲𑀦𑁆𑀢𑀺𑀧𑀺 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀻’’𑀢𑀺!

𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺𑀧𑀺 𑀙𑁂𑀤𑀸𑀧𑁂𑀲𑁆𑀲𑀦𑁆𑀢𑀺𑀧𑀻’’𑀢𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀁 𑀙𑀺𑀦𑁆𑀤𑀣𑀸𑀧𑀺 𑀙𑁂𑀤𑀸𑀧𑁂𑀣𑀸𑀧𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀣𑀸𑀧𑀺, 𑀙𑁂𑀤𑀸𑀧𑁂𑀲𑁆𑀲𑀣𑀸𑀧𑀺! 𑀚𑀻𑀯𑀲𑀜𑁆𑀜𑀺𑀦𑁄 𑀳𑀺, 𑀫𑁄𑀖𑀧𑀼𑀭𑀺𑀲𑀸, 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺𑀁, 𑀦𑁂𑀢𑀁 𑀫𑁄𑀖𑀧𑀼𑀭𑀺𑀲𑀸 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁯𑁦. ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁯𑁧. 𑀪𑀽𑀢𑀕𑀸𑀫𑁄 𑀦𑀸𑀫 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺 𑁋 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀨𑀴𑀼𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁, 𑀩𑀻𑀚𑀩𑀻𑀚𑀫𑁂𑀯 [𑀩𑀻𑀚𑀩𑀻𑀚𑀜𑁆𑀘𑁂𑀯 (𑀇𑀢𑀺𑀧𑀺)] 𑀧𑀜𑁆𑀘𑀫𑀁.

𑀫𑀽𑀮𑀩𑀻𑀚𑀁 𑀦𑀸𑀫 𑁋 𑀳𑀮𑀺𑀤𑁆𑀤𑀺, 𑀲𑀺𑀗𑁆𑀕𑀺𑀯𑁂𑀭𑀁, 𑀯𑀘𑀸, 𑀯𑀘𑀢𑁆𑀢𑀁, 𑀅𑀢𑀺𑀯𑀺𑀲𑀸, 𑀓𑀝𑀼𑀓𑀭𑁄𑀳𑀺𑀡𑀻, 𑀉𑀲𑀻𑀭𑀁, 𑀪𑀤𑁆𑀤𑀫𑀽𑀢𑁆𑀢𑀓𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀫𑀽𑀮𑁂 𑀚𑀸𑀬𑀦𑁆𑀢𑀺, 𑀫𑀽𑀮𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀫𑀽𑀮𑀩𑀻𑀚𑀁 𑀦𑀸𑀫.

𑀔𑀦𑁆𑀥𑀩𑀻𑀚𑀁 𑀦𑀸𑀫 𑁋 𑀅𑀲𑁆𑀲𑀢𑁆𑀣𑁄, 𑀦𑀺𑀕𑁆𑀭𑁄𑀥𑁄, 𑀧𑀺𑀮𑀓𑁆𑀔𑁄, 𑀉𑀤𑀼𑀫𑁆𑀩𑀭𑁄, 𑀓𑀘𑁆𑀙𑀓𑁄, 𑀓𑀧𑀺𑀢𑁆𑀣𑀦𑁄, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀔𑀦𑁆𑀥𑁂 𑀚𑀸𑀬𑀦𑁆𑀢𑀺, 𑀔𑀦𑁆𑀥𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀔𑀦𑁆𑀥𑀩𑀻𑀚𑀁 𑀦𑀸𑀫.

𑀨𑀴𑀼𑀩𑀻𑀚𑀁 𑀦𑀸𑀫 𑁋 𑀉𑀘𑁆𑀙𑀼, 𑀯𑁂𑀴𑀼, 𑀦𑀴𑁄, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀧𑀩𑁆𑀩𑁂 𑀚𑀸𑀬𑀦𑁆𑀢𑀺, 𑀧𑀩𑁆𑀩𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀨𑀴𑀼𑀩𑀻𑀚𑀁 𑀦𑀸𑀫.

𑀅𑀕𑁆𑀕𑀩𑀻𑀚𑀁 𑀦𑀸𑀫 𑁋 𑀅𑀚𑁆𑀚𑀼𑀓𑀁, 𑀨𑀡𑀺𑀚𑁆𑀚𑀓𑀁, 𑀳𑀺𑀭𑀺𑀯𑁂𑀭𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀅𑀕𑁆𑀕𑁂 𑀚𑀸𑀬𑀦𑁆𑀢𑀺, 𑀅𑀕𑁆𑀕𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀅𑀕𑁆𑀕𑀩𑀻𑀚𑀁 𑀦𑀸𑀫.

𑀩𑀻𑀚𑀩𑀻𑀚𑀁 𑀦𑀸𑀫 𑁋 𑀧𑀼𑀩𑁆𑀩𑀡𑁆𑀡𑀁, 𑀅𑀧𑀭𑀡𑁆𑀡𑀁, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀩𑀻𑀚𑁂 𑀚𑀸𑀬𑀦𑁆𑀢𑀺, 𑀩𑀻𑀚𑁂 𑀲𑀜𑁆𑀚𑀸𑀬𑀦𑁆𑀢𑀺, 𑀏𑀢𑀁 𑀩𑀻𑀚𑀩𑀻𑀚𑀁 𑀦𑀸𑀫.

𑁯𑁨. 𑀩𑀻𑀚𑁂 𑀩𑀻𑀚𑀲𑀜𑁆𑀜𑀻 𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸, 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸, 𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀩𑀻𑀚𑁂 𑀯𑁂𑀫𑀢𑀺𑀓𑁄 𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸, 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸, 𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀩𑀻𑀚𑁂 𑀅𑀩𑀻𑀚𑀲𑀜𑁆𑀜𑀻 𑀙𑀺𑀦𑁆𑀤𑀢𑀺 𑀯𑀸 𑀙𑁂𑀤𑀸𑀧𑁂𑀢𑀺 𑀯𑀸, 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸, 𑀧𑀘𑀢𑀺 𑀯𑀸 𑀧𑀘𑀸𑀧𑁂𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀺. 𑀅𑀩𑀻𑀚𑁂 𑀩𑀻𑀚𑀲𑀜𑁆𑀜𑀻 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀩𑀻𑀚𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀩𑀻𑀚𑁂 𑀅𑀩𑀻𑀚𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁯𑁩. 𑀅𑀦𑀸𑀧𑀢𑁆𑀢𑀺 𑁋 ‘‘𑀇𑀫𑀁 𑀚𑀸𑀦, 𑀇𑀫𑀁 𑀤𑁂𑀳𑀺, 𑀇𑀫𑀁 𑀆𑀳𑀭, 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀪𑀡𑀢𑀺, 𑀅𑀲𑀜𑁆𑀘𑀺𑀘𑁆𑀘, 𑀅𑀲𑁆𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.