𑁬. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁

𑁫𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 [𑀏𑀢𑁆𑀣 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀸𑀤𑀺𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀲𑀸𑀬𑀁 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀉𑀧𑀕𑀘𑁆𑀙𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀢𑀭𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀆𑀯𑀲𑀣𑀸𑀕𑀸𑀭𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦 𑀲𑀸 𑀇𑀢𑁆𑀣𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑁂, 𑀪𑀕𑀺𑀦𑀺, 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀆𑀯𑀲𑀣𑀸𑀕𑀸𑀭𑁂’’𑀢𑀺. ‘‘𑀯𑀲𑁂𑀬𑁆𑀬𑀸𑀣, 𑀪𑀦𑁆𑀢𑁂’’𑀢𑀺. 𑀅𑀜𑁆𑀜𑁂𑀧𑀺 𑀅𑀤𑁆𑀥𑀺𑀓𑀸 𑀬𑁂𑀦 𑀲𑀸 𑀇𑀢𑁆𑀣𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁂 𑀢𑁂, 𑀅𑀬𑁆𑀬𑁂, 𑀅𑀕𑀭𑀼 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀆𑀯𑀲𑀣𑀸𑀕𑀸𑀭𑁂’’𑀢𑀺. ‘‘𑀏𑀲𑁄 𑀔𑁄 𑀅𑀬𑁆𑀬𑁄 𑀲𑀫𑀡𑁄 𑀧𑀞𑀫𑀁 𑀉𑀧𑀕𑀢𑁄; 𑀲𑀘𑁂 𑀲𑁄 𑀅𑀦𑀼𑀚𑀸𑀦𑀸𑀢𑀺, 𑀯𑀲𑁂𑀬𑁆𑀬𑀸𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀅𑀤𑁆𑀥𑀺𑀓𑀸 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁂 𑀢𑁂, 𑀪𑀦𑁆𑀢𑁂, 𑀅𑀕𑀭𑀼, 𑀯𑀲𑁂𑀬𑁆𑀬𑀸𑀫 𑀏𑀓𑀭𑀢𑁆𑀢𑀁 𑀆𑀯𑀲𑀣𑀸𑀕𑀸𑀭𑁂’’𑀢𑀺. ‘‘𑀯𑀲𑁂𑀬𑁆𑀬𑀸𑀣, 𑀆𑀯𑀼𑀲𑁄’’𑀢𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀆𑀬𑀲𑁆𑀫𑀦𑁆𑀢𑁂 𑀅𑀦𑀼𑀭𑀼𑀤𑁆𑀥𑁂 𑀲𑀳 𑀤𑀲𑁆𑀲𑀦𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀅𑀳𑁄𑀲𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑁆𑀬𑁄, 𑀪𑀦𑁆𑀢𑁂, 𑀇𑀫𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀭𑀺𑀲𑁆𑀲𑀢𑀺. 𑀲𑀸𑀥𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀫𑀜𑁆𑀘𑀓𑀁 𑀅𑀩𑁆𑀪𑀦𑁆𑀢𑀭𑀁 𑀧𑀜𑁆𑀜𑀧𑁂𑀬𑁆𑀬’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀫𑀜𑁆𑀘𑀓𑀁 𑀅𑀩𑁆𑀪𑀦𑁆𑀢𑀭𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀸 𑀕𑀦𑁆𑀥𑀕𑀦𑁆𑀥𑀺𑀦𑀻 𑀬𑁂𑀦𑀸𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑁆𑀬𑁄, 𑀪𑀦𑁆𑀢𑁂, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄, 𑀅𑀳𑀁 𑀘𑀫𑁆𑀳𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀲𑀸𑀥𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀧𑀚𑀸𑀧𑀢𑀺 𑀪𑀯𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀇𑀢𑁆𑀣𑀻 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑁆𑀬𑁄, 𑀪𑀦𑁆𑀢𑁂, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄, 𑀅𑀳𑀜𑁆𑀘𑀫𑁆𑀳𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀜𑁆𑀘𑁂𑀯 𑀧𑀝𑀺𑀘𑁆𑀙𑀢𑀼 [𑀲𑀫𑁆𑀧𑀝𑀺𑀘𑁆𑀙𑀢𑀼 (𑀲𑁆𑀬𑀸.)] 𑀲𑀩𑁆𑀩𑀜𑁆𑀘 𑀲𑀸𑀧𑀢𑁂𑀬𑁆𑀬’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀲𑀸𑀝𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀼𑀭𑀢𑁄 𑀘𑀗𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀑𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀇𑀢𑁆𑀣𑀺𑀁 𑀦𑁂𑀯 𑀑𑀮𑁄𑀓𑁂𑀲𑀺 𑀦𑀧𑀺 𑀆𑀮𑀧𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀩𑀳𑀽 𑀫𑁂 𑀫𑀦𑀼𑀲𑁆𑀲𑀸 𑀲𑀢𑁂𑀦𑀧𑀺 𑀲𑀳𑀲𑁆𑀲𑁂𑀦𑀧𑀺 𑀧𑀳𑀺𑀡𑀦𑁆𑀢𑀺. 𑀅𑀬𑀁 𑀧𑀦 𑀲𑀫𑀡𑁄 𑁋 𑀫𑀬𑀸 𑀲𑀸𑀫𑀁 𑀬𑀸𑀘𑀺𑀬𑀫𑀸𑀦𑁄 𑁋 𑀦 𑀇𑀘𑁆𑀙𑀢𑀺 𑀫𑀜𑁆𑀘𑁂𑀯 𑀧𑀝𑀺𑀘𑁆𑀙𑀺𑀢𑀼𑀁 𑀲𑀩𑁆𑀩𑀜𑁆𑀘 𑀲𑀸𑀧𑀢𑁂𑀬𑁆𑀬’’𑀦𑁆𑀢𑀺 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁 𑀬𑀸𑀳𑀁 𑀏𑀯𑀫𑀓𑀸𑀲𑀺𑀁. 𑀢𑀲𑁆𑀲𑀸 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺. ‘‘𑀢𑀕𑁆𑀖 𑀢𑁆𑀯𑀁, 𑀪𑀕𑀺𑀦𑀺, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁 𑀬𑀸 𑀢𑁆𑀯𑀁 𑀏𑀯𑀫𑀓𑀸𑀲𑀺. 𑀬𑀢𑁄 𑀘 𑀔𑁄 𑀢𑁆𑀯𑀁, 𑀪𑀕𑀺𑀦𑀺, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀺, 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺 𑀳𑁂𑀲𑀸, 𑀪𑀕𑀺𑀦𑀺, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺 𑀆𑀬𑀢𑀺𑀜𑁆𑀘 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺.

𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸, 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀇𑀢𑁆𑀣𑀺𑀁 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑁋 𑀆𑀬𑀲𑁆𑀫𑀢𑀸 𑀅𑀦𑀼𑀭𑀼𑀤𑁆𑀥𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑁋 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺, 𑀏𑀯𑀫𑁂𑀯𑀁 𑀅𑀬𑁆𑀬𑁂𑀦 𑀅𑀦𑀼𑀭𑀼𑀤𑁆𑀥𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀢𑀁 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀺𑀓𑀁 𑀫𑀁 𑀅𑀬𑁆𑀬𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀲𑀸𑀯𑀢𑁆𑀣𑀺𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀅𑀦𑀼𑀭𑀼𑀤𑁆𑀥, 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑁆𑀲𑀲𑀺! 𑀦𑁂𑀢𑀁, 𑀅𑀦𑀼𑀭𑀼𑀤𑁆𑀥, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁫𑁬. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁫𑁭. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 [𑀬𑀓𑁆𑀔𑀺𑀦𑀻 (𑀓.)], 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸; 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻.

𑀲𑀳𑀸𑀢𑀺 𑀏𑀓𑀢𑁄.

𑀲𑁂𑀬𑁆𑀬𑀸 𑀦𑀸𑀫 𑀲𑀩𑁆𑀩𑀘𑁆𑀙𑀦𑁆𑀦𑀸, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑀸, 𑀬𑁂𑀪𑀼𑀬𑁆𑀬𑁂𑀦𑀘𑁆𑀙𑀦𑁆𑀦𑀸, 𑀬𑁂𑀪𑀼𑀬𑁆𑀬𑁂𑀦 𑀧𑀭𑀺𑀘𑁆𑀙𑀦𑁆𑀦𑀸.

𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂, 𑀫𑀸𑀢𑀼𑀕𑀸𑀫𑁂 𑀦𑀺𑀧𑀦𑁆𑀦𑁂 𑀪𑀺𑀓𑁆𑀔𑀼 𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼 𑀦𑀺𑀧𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀪𑁄 𑀯𑀸 𑀦𑀺𑀧𑀚𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀧𑀚𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁫𑁮. 𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀻 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀫𑀸𑀢𑀼𑀕𑀸𑀫𑁂 𑀯𑁂𑀫𑀢𑀺𑀓𑁄 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀫𑀸𑀢𑀼𑀕𑀸𑀫𑁂 𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀟𑁆𑀠𑀘𑁆𑀙𑀦𑁆𑀦𑁂 𑀉𑀧𑀟𑁆𑀠𑀧𑀭𑀺𑀘𑁆𑀙𑀦𑁆𑀦𑁂, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀓𑁆𑀔𑀺𑀬𑀸 𑀯𑀸 𑀧𑁂𑀢𑀺𑀬𑀸 𑀯𑀸 𑀧𑀡𑁆𑀟𑀓𑁂𑀦 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀯𑀸 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀫𑀸𑀢𑀼𑀕𑀸𑀫𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀫𑀸𑀢𑀼𑀕𑀸𑀫𑁂 𑀅𑀫𑀸𑀢𑀼𑀕𑀸𑀫𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁫𑁯. 𑀅𑀦𑀸𑀧𑀢𑁆𑀢𑀺 𑀲𑀩𑁆𑀩𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀧𑀭𑀺𑀘𑁆𑀙𑀦𑁆𑀦𑁂, 𑀲𑀩𑁆𑀩𑀧𑀭𑀺𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀘𑁆𑀙𑀦𑁆𑀦𑁂 [𑀅𑀦𑀸𑀧𑀢𑁆𑀢𑀺 𑀲𑀩𑁆𑀩𑀅𑀘𑁆𑀙𑀦𑁆𑀦𑁂 𑀲𑀩𑁆𑀩𑀅𑀧𑀭𑀺𑀘𑁆𑀙𑀦𑁆𑀦𑁂, (𑀲𑀻.)], 𑀬𑁂𑀪𑀼𑀬𑁆𑀬𑁂𑀦 𑀅𑀘𑁆𑀙𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦 𑀅𑀧𑀭𑀺𑀘𑁆𑀙𑀦𑁆𑀦𑁂, 𑀫𑀸𑀢𑀼𑀕𑀸𑀫𑁂 𑀦𑀺𑀧𑀦𑁆𑀦𑁂 𑀪𑀺𑀓𑁆𑀔𑀼 𑀦𑀺𑀲𑀻𑀤𑀢𑀺, 𑀪𑀺𑀓𑁆𑀔𑀼 𑀦𑀺𑀧𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀦𑀺𑀲𑀻𑀤𑀢𑀺, 𑀉𑀪𑁄 𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.