𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀁

𑁩𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑀺; 𑀇𑀫𑀲𑁆𑀲 𑀲𑀼𑀢𑁆𑀯𑀸 𑀅𑀫𑀼𑀲𑁆𑀲 𑀅𑀓𑁆𑀔𑀸𑀬𑀦𑁆𑀢𑀺, 𑀇𑀫𑀲𑁆𑀲 𑀪𑁂𑀤𑀸𑀬; 𑀅𑀫𑀼𑀲𑁆𑀲 𑀲𑀼𑀢𑁆𑀯𑀸 𑀇𑀫𑀲𑁆𑀲 𑀅𑀓𑁆𑀔𑀸𑀬𑀦𑁆𑀢𑀺, 𑀅𑀫𑀼𑀲𑁆𑀲 𑀪𑁂𑀤𑀸𑀬. 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀲 𑀲𑀼𑀢𑁆𑀯𑀸 𑀅𑀫𑀼𑀲𑁆𑀲 𑀅𑀓𑁆𑀔𑀸𑀬𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀲 𑀪𑁂𑀤𑀸𑀬; 𑀅𑀫𑀼𑀲𑁆𑀲 𑀲𑀼𑀢𑁆𑀯𑀸 𑀇𑀫𑀲𑁆𑀲 𑀅𑀓𑁆𑀔𑀸𑀬𑀺𑀲𑁆𑀲𑀦𑁆𑀢𑀺, 𑀅𑀫𑀼𑀲𑁆𑀲 𑀪𑁂𑀤𑀸𑀬! 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀣, 𑀇𑀫𑀲𑁆𑀲 𑀲𑀼𑀢𑁆𑀯𑀸 𑀅𑀫𑀼𑀲𑁆𑀲 𑀅𑀓𑁆𑀔𑀸𑀬𑀣, 𑀇𑀫𑀲𑁆𑀲 𑀪𑁂𑀤𑀸𑀬, 𑀅𑀫𑀼𑀲𑁆𑀲 𑀲𑀼𑀢𑁆𑀯𑀸 𑀇𑀫𑀲𑁆𑀲 𑀅𑀓𑁆𑀔𑀸𑀬𑀣, 𑀅𑀫𑀼𑀲𑁆𑀲 𑀪𑁂𑀤𑀸𑀬? 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀺𑀲𑁆𑀲𑀣! 𑀇𑀫𑀲𑁆𑀲 𑀲𑀼𑀢𑁆𑀯𑀸 𑀅𑀫𑀼𑀲𑁆𑀲 𑀅𑀓𑁆𑀔𑀸𑀬𑀺𑀲𑁆𑀲𑀣, 𑀇𑀫𑀲𑁆𑀲 𑀪𑁂𑀤𑀸𑀬! 𑀅𑀫𑀼𑀲𑁆𑀲 𑀲𑀼𑀢𑁆𑀯𑀸 𑀇𑀫𑀲𑁆𑀲 𑀅𑀓𑁆𑀔𑀸𑀬𑀺𑀲𑁆𑀲𑀣, 𑀅𑀫𑀼𑀲𑁆𑀲 𑀪𑁂𑀤𑀸𑀬! 𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀦𑀺 𑀘𑁂𑀯 𑀪𑀡𑁆𑀟𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀦𑀺 𑀘 𑀪𑀡𑁆𑀟𑀦𑀸𑀦𑀺 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬. 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁭. ‘‘𑀪𑀺𑀓𑁆𑀔𑀼𑀧𑁂𑀲𑀼𑀜𑁆𑀜𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁩𑁮. 𑀧𑁂𑀲𑀼𑀜𑁆𑀜𑀁 𑀦𑀸𑀫 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑁂𑀲𑀼𑀜𑁆𑀜𑀁 𑀳𑁄𑀢𑀺 𑁋 𑀧𑀺𑀬𑀓𑀫𑁆𑀬𑀲𑁆𑀲 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑁆𑀲 𑀯𑀸. 𑀤𑀲𑀳𑀸𑀓𑀸𑀭𑁂𑀳𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 𑀚𑀸𑀢𑀺𑀢𑁄𑀧𑀺, 𑀦𑀸𑀫𑀢𑁄𑀧𑀺, 𑀕𑁄𑀢𑁆𑀢𑀢𑁄𑀧𑀺, 𑀓𑀫𑁆𑀫𑀢𑁄𑀧𑀺, 𑀲𑀺𑀧𑁆𑀧𑀢𑁄𑀧𑀺, 𑀆𑀩𑀸𑀥𑀢𑁄𑀧𑀺, 𑀮𑀺𑀗𑁆𑀕𑀢𑁄𑀧𑀺, 𑀓𑀺𑀮𑁂𑀲𑀢𑁄𑀧𑀺, 𑀆𑀧𑀢𑁆𑀢𑀺𑀢𑁄𑀧𑀺, 𑀅𑀓𑁆𑀓𑁄𑀲𑀢𑁄𑀧𑀺.

𑀚𑀸𑀢𑀺 𑀦𑀸𑀫 𑀤𑁆𑀯𑁂 𑀚𑀸𑀢𑀺𑀬𑁄 𑁋 𑀳𑀻𑀦𑀸 𑀘 𑀚𑀸𑀢𑀺 𑀉𑀓𑁆𑀓𑀝𑁆𑀞𑀸 𑀘 𑀚𑀸𑀢𑀺. 𑀳𑀻𑀦𑀸 𑀦𑀸𑀫 𑀚𑀸𑀢𑀺 𑁋 𑀘𑀡𑁆𑀟𑀸𑀮𑀚𑀸𑀢𑀺 𑀯𑁂𑀦𑀚𑀸𑀢𑀺 𑀦𑁂𑀲𑀸𑀤𑀚𑀸𑀢𑀺 𑀭𑀣𑀓𑀸𑀭𑀚𑀸𑀢𑀺 𑀧𑀼𑀓𑁆𑀓𑀼𑀲𑀚𑀸𑀢𑀺. 𑀏𑀲𑀸 𑀳𑀻𑀦𑀸 𑀦𑀸𑀫 𑀚𑀸𑀢𑀺. 𑀉𑀓𑁆𑀓𑀝𑁆𑀞𑀸 𑀦𑀸𑀫 𑀚𑀸𑀢𑀺 𑁋 𑀔𑀢𑁆𑀢𑀺𑀬𑀚𑀸𑀢𑀺 𑀩𑁆𑀭𑀸𑀳𑁆𑀫𑀡𑀚𑀸𑀢𑀺. 𑀏𑀲𑀸 𑀉𑀓𑁆𑀓𑀝𑁆𑀞𑀸 𑀦𑀸𑀫 𑀚𑀸𑀢𑀺…𑀧𑁂….

𑀅𑀓𑁆𑀓𑁄𑀲𑁄 𑀦𑀸𑀫 𑀤𑁆𑀯𑁂 𑀅𑀓𑁆𑀓𑁄𑀲𑀸 𑁋 𑀳𑀻𑀦𑁄 𑀘 𑀅𑀓𑁆𑀓𑁄𑀲𑁄 𑀉𑀓𑁆𑀓𑀝𑁆𑀞𑁄 𑀘 𑀅𑀓𑁆𑀓𑁄𑀲𑁄. 𑀳𑀻𑀦𑁄 𑀦𑀸𑀫 𑀅𑀓𑁆𑀓𑁄𑀲𑁄 𑁋 𑀑𑀝𑁆𑀞𑁄𑀲𑀺, 𑀫𑁂𑀡𑁆𑀟𑁄𑀲𑀺, 𑀕𑁄𑀡𑁄𑀲𑀺, 𑀕𑀤𑁆𑀭𑀪𑁄𑀲𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄𑀲𑀺, 𑀦𑁂𑀭𑀬𑀺𑀓𑁄𑀲𑀺; 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀲𑀼𑀕𑀢𑀺; 𑀤𑀼𑀕𑁆𑀕𑀢𑀺 𑀬𑁂𑀯 𑀢𑀼𑀬𑁆𑀳𑀁 𑀧𑀸𑀝𑀺𑀓𑀗𑁆𑀔𑀸𑀢𑀺, 𑀬𑀓𑀸𑀭𑁂𑀦 𑀯𑀸 𑀪𑀓𑀸𑀭𑁂𑀦 𑀯𑀸 𑀓𑀸𑀝𑀓𑁄𑀝𑀘𑀺𑀓𑀸𑀬 𑀯𑀸. 𑀏𑀲𑁄 𑀳𑀻𑀦𑁄 𑀦𑀸𑀫 𑀅𑀓𑁆𑀓𑁄𑀲𑁄. 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀅𑀓𑁆𑀓𑁄𑀲𑁄 𑁋 𑀧𑀡𑁆𑀟𑀺𑀢𑁄𑀲𑀺, 𑀩𑁆𑀬𑀢𑁆𑀢𑁄𑀲𑀺, 𑀫𑁂𑀥𑀸𑀯𑀻𑀲𑀺, 𑀩𑀳𑀼𑀲𑁆𑀲𑀼𑀢𑁄𑀲𑀺, 𑀥𑀫𑁆𑀫𑀓𑀣𑀺𑀓𑁄𑀲𑀺; 𑀦𑀢𑁆𑀣𑀺 𑀢𑀼𑀬𑁆𑀳𑀁 𑀤𑀼𑀕𑁆𑀕𑀢𑀺; 𑀲𑀼𑀕𑀢𑀺 𑀬𑁂𑀯 𑀢𑀼𑀬𑁆𑀳𑀁 𑀧𑀸𑀝𑀺𑀓𑀗𑁆𑀔𑀸𑀢𑀺. 𑀏𑀲𑁄 𑀉𑀓𑁆𑀓𑀝𑁆𑀞𑁄 𑀦𑀸𑀫 𑀅𑀓𑁆𑀓𑁄𑀲𑁄.

𑁩𑁯. 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀘𑀡𑁆𑀟𑀸𑀮𑁄 𑀯𑁂𑀦𑁄 𑀦𑁂𑀲𑀸𑀤𑁄 𑀭𑀣𑀓𑀸𑀭𑁄 𑀧𑀼𑀓𑁆𑀓𑀼𑀲𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀅𑀯𑀓𑀡𑁆𑀡𑀓𑁄 𑀚𑀯𑀓𑀡𑁆𑀡𑀓𑁄 𑀥𑀦𑀺𑀝𑁆𑀞𑀓𑁄 𑀲𑀯𑀺𑀝𑁆𑀞𑀓𑁄 𑀓𑀼𑀮𑀯𑀟𑁆𑀠𑀓𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀥𑀫𑁆𑀫𑀭𑀓𑁆𑀔𑀺𑀢𑁄 𑀲𑀗𑁆𑀖𑀭𑀓𑁆𑀔𑀺𑀢𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀓𑁄𑀲𑀺𑀬𑁄 𑀪𑀸𑀭𑀤𑁆𑀯𑀸𑀚𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀕𑁄𑀢𑀫𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀓𑀘𑁆𑀘𑀸𑀦𑁄 𑀯𑀸𑀲𑀺𑀝𑁆𑀞𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀓𑁄𑀝𑁆𑀞𑀓𑁄 𑀧𑀼𑀧𑁆𑀨𑀙𑀟𑁆𑀟𑀓𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀓𑀲𑁆𑀲𑀓𑁄 𑀯𑀸𑀡𑀺𑀚𑁄 𑀕𑁄𑀭𑀓𑁆𑀔𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀦𑀴𑀓𑀸𑀭𑁄 𑀓𑀼𑀫𑁆𑀪𑀓𑀸𑀭𑁄 𑀧𑁂𑀲𑀓𑀸𑀭𑁄 𑀘𑀫𑁆𑀫𑀓𑀸𑀭𑁄 𑀦𑀳𑀸𑀧𑀺𑀢𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀫𑀼𑀤𑁆𑀤𑀺𑀓𑁄 𑀕𑀡𑀓𑁄 𑀮𑁂𑀔𑀓𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁪𑁦. 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀓𑀼𑀝𑁆𑀞𑀺𑀓𑁄 𑀕𑀡𑁆𑀟𑀺𑀓𑁄 𑀓𑀺𑀮𑀸𑀲𑀺𑀓𑁄 𑀲𑁄𑀲𑀺𑀓𑁄 𑀅𑀧𑀫𑀸𑀭𑀺𑀓𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀫𑀥𑀼𑀫𑁂𑀳𑀺𑀓𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀅𑀢𑀺𑀤𑀻𑀖𑁄 𑀅𑀢𑀺𑀭𑀲𑁆𑀲𑁄 𑀅𑀢𑀺𑀓𑀡𑁆𑀳𑁄 𑀅𑀘𑁆𑀘𑁄𑀤𑀸𑀢𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀦𑀸𑀢𑀺𑀤𑀻𑀖𑁄 𑀦𑀸𑀢𑀺𑀭𑀲𑁆𑀲𑁄 𑀦𑀸𑀢𑀺𑀓𑀡𑁆𑀳𑁄 𑀦𑀸𑀘𑁆𑀘𑁄𑀤𑀸𑀢𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁄 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑁄 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀣𑀼𑀮𑁆𑀮𑀘𑁆𑀘𑀬𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀧𑀸𑀘𑀺𑀢𑁆𑀢𑀺𑀬𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀧𑀸𑀝𑀺𑀤𑁂𑀲𑀦𑀻𑀬𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀤𑀼𑀓𑁆𑀓𑀝𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀲𑁄𑀢𑀸𑀧𑀦𑁆𑀦𑁄’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀑𑀝𑁆𑀞𑁄 𑀫𑁂𑀡𑁆𑀟𑁄 𑀕𑁄𑀡𑁄 𑀕𑀤𑁆𑀭𑀪𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀦𑁂𑀭𑀬𑀺𑀓𑁄, 𑀦𑀢𑁆𑀣𑀺 𑀢𑀲𑁆𑀲 𑀲𑀼𑀕𑀢𑀺, 𑀤𑀼𑀕𑁆𑀕𑀢𑀺𑀬𑁂𑀯 𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀸’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀢𑀁 ‘𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄, 𑀦𑀢𑁆𑀣𑀺 𑀢𑀲𑁆𑀲 𑀤𑀼𑀕𑁆𑀕𑀢𑀺, 𑀲𑀼𑀕𑀢𑀺 𑀬𑁂𑀯 𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀸’𑀢𑀺 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁪𑁧. 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀸 𑀯𑁂𑀦𑀸 𑀦𑁂𑀲𑀸𑀤𑀸 𑀭𑀣𑀓𑀸𑀭𑀸, 𑀧𑀼𑀓𑁆𑀓𑀼𑀲𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲…𑀧𑁂….

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀓𑀣𑀺𑀓𑀸, 𑀦𑀢𑁆𑀣𑀺 𑀢𑁂𑀲𑀁 𑀤𑀼𑀕𑁆𑀕𑀢𑀺, 𑀲𑀼𑀕𑀢𑀺 𑀬𑁂𑀯 𑀢𑁂𑀲𑀁 𑀧𑀸𑀝𑀺𑀓𑀗𑁆𑀔𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀬𑁂 𑀦𑀽𑀦 𑀘𑀡𑁆𑀟𑀸𑀮𑀸 𑀯𑁂𑀦𑀸 𑀦𑁂𑀲𑀸𑀤𑀸 𑀭𑀣𑀓𑀸𑀭𑀸 𑀧𑀼𑀓𑁆𑀓𑀼𑀲𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀬𑁂 𑀦𑀽𑀦 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀓𑀣𑀺𑀓𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀦 𑀫𑀬𑀁 𑀘𑀡𑁆𑀟𑀸𑀮𑀸 𑀯𑁂𑀦𑀸 𑀦𑁂𑀲𑀸𑀤𑀸 𑀭𑀣𑀓𑀸𑀭𑀸 𑀧𑀼𑀓𑁆𑀓𑀼𑀲𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 ‘𑀦 𑀫𑀬𑀁 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀓𑀣𑀺𑀓𑀸, 𑀦𑀢𑁆𑀣𑀫𑁆𑀳𑀸𑀓𑀁 𑀤𑀼𑀕𑁆𑀕𑀢𑀺, 𑀲𑀼𑀕𑀢𑀺 𑀬𑁂𑀯 𑀅𑀫𑁆𑀳𑀸𑀓𑀁 𑀧𑀸𑀝𑀺𑀓𑀗𑁆𑀔𑀸’𑀢𑀺 𑀪𑀡𑀢𑀺, 𑀦 𑀲𑁄 𑀅𑀜𑁆𑀜𑀁 𑀪𑀡𑀢𑀺, 𑀢𑀜𑁆𑀜𑁂𑀯 𑀪𑀡𑀢𑀻’’𑀢𑀺. 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀤𑀼𑀓𑁆𑀓𑀝𑀲𑁆𑀲.

𑁪𑁨. 𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺; 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀉𑀧𑀲𑀫𑁆𑀧𑀦𑁆𑀦𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁪𑁩. 𑀅𑀦𑀸𑀧𑀢𑁆𑀢𑀺 𑀦𑀧𑀺𑀬𑀓𑀫𑁆𑀬𑀲𑁆𑀲, 𑀦𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑁆𑀲, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.