𑁧𑁦. 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀁

𑁮𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 [𑀆𑀴𑀯𑀺𑀓𑀸 (𑀲𑁆𑀬𑀸.)] 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀧𑀣𑀯𑀺𑀁 𑀔𑀡𑀦𑁆𑀢𑀺𑀧𑀺 𑀔𑀡𑀸𑀧𑁂𑀦𑁆𑀢𑀺𑀧𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀧𑀣𑀯𑀺𑀁 𑀔𑀡𑀺𑀲𑁆𑀲𑀦𑁆𑀢𑀺𑀧𑀺 𑀔𑀡𑀸𑀧𑁂𑀲𑁆𑀲𑀦𑁆𑀢𑀺𑀧𑀺! 𑀏𑀓𑀺𑀦𑁆𑀤𑁆𑀭𑀺𑀬𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀻𑀯𑀁 𑀯𑀺𑀳𑁂𑀞𑁂𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀧𑀣𑀯𑀺𑀁 𑀔𑀡𑀺𑀲𑁆𑀲𑀦𑁆𑀢𑀺𑀧𑀺 𑀔𑀡𑀸𑀧𑁂𑀲𑁆𑀲𑀦𑁆𑀢𑀺𑀧𑀻’’𑀢𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀣𑀯𑀺𑀁 𑀔𑀡𑀣𑀧𑀺 𑀔𑀡𑀸𑀧𑁂𑀣𑀧𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀧𑀣𑀯𑀺𑀁 𑀔𑀡𑀺𑀲𑁆𑀲𑀣𑀧𑀺 𑀔𑀡𑀸𑀧𑁂𑀲𑁆𑀲𑀣𑀧𑀺! 𑀚𑀻𑀯𑀲𑀜𑁆𑀜𑀺𑀦𑁄 𑀳𑀺, 𑀫𑁄𑀖𑀧𑀼𑀭𑀺𑀲𑀸, 𑀫𑀦𑀼𑀲𑁆𑀲𑀸 𑀧𑀣𑀯𑀺𑀬𑀸. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁮𑁫. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀧𑀣𑀯𑀺𑀁 𑀔𑀡𑁂𑀬𑁆𑀬 𑀯𑀸 𑀔𑀡𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁬. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀧𑀣𑀯𑀻 𑀦𑀸𑀫 𑀤𑁆𑀯𑁂 𑀧𑀣𑀯𑀺𑀬𑁄 𑁋 𑀚𑀸𑀢𑀸 𑀘 𑀧𑀣𑀯𑀻 𑀅𑀚𑀸𑀢𑀸 𑀘 𑀧𑀣𑀯𑀻.

𑀚𑀸𑀢𑀸 𑀦𑀸𑀫 𑀧𑀣𑀯𑀻 𑁋 𑀲𑀼𑀤𑁆𑀥𑀧𑀁𑀲𑀼 𑀲𑀼𑀤𑁆𑀥𑀫𑀢𑁆𑀢𑀺𑀓𑀸 𑀅𑀧𑁆𑀧𑀧𑀸𑀲𑀸𑀡𑀸 𑀅𑀧𑁆𑀧𑀲𑀓𑁆𑀔𑀭𑀸 𑀅𑀧𑁆𑀧𑀓𑀞𑀮𑀸 𑀅𑀧𑁆𑀧𑀫𑀭𑀼𑀫𑁆𑀩𑀸 𑀅𑀧𑁆𑀧𑀯𑀸𑀮𑀺𑀓𑀸, 𑀬𑁂𑀪𑀼𑀬𑁆𑀬𑁂𑀦𑀧𑀁𑀲𑀼𑀓𑀸, 𑀬𑁂𑀪𑀼𑀬𑁆𑀬𑁂𑀦𑀫𑀢𑁆𑀢𑀺𑀓𑀸. 𑀅𑀤𑀟𑁆𑀠𑀸𑀧𑀺 𑀯𑀼𑀘𑁆𑀘𑀢𑀺 𑀚𑀸𑀢𑀸 𑀧𑀣𑀯𑀻. 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀅𑀢𑀺𑀭𑁂𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀚𑀸𑀢𑀸 𑀧𑀣𑀯𑀻.

𑀅𑀚𑀸𑀢𑀸 𑀦𑀸𑀫 𑀧𑀣𑀯𑀻 𑁋 𑀲𑀼𑀤𑁆𑀥𑀧𑀸𑀲𑀸𑀡𑀸 𑀲𑀼𑀤𑁆𑀥𑀲𑀓𑁆𑀔𑀭𑀸 𑀲𑀼𑀤𑁆𑀥𑀓𑀞𑀮𑀸 𑀲𑀼𑀤𑁆𑀥𑀫𑀭𑀼𑀫𑁆𑀩𑀸 𑀲𑀼𑀤𑁆𑀥𑀯𑀸𑀮𑀺𑀓𑀸 𑀅𑀧𑁆𑀧𑀧𑀁𑀲𑀼𑀓𑀸 𑀅𑀧𑁆𑀧𑀫𑀢𑁆𑀢𑀺𑀓𑀸, 𑀬𑁂𑀪𑀼𑀬𑁆𑀬𑁂𑀦𑀧𑀸𑀲𑀸𑀡𑀸, 𑀬𑁂𑀪𑀼𑀬𑁆𑀬𑁂𑀦𑀲𑀓𑁆𑀔𑀭𑀸, 𑀬𑁂𑀪𑀼𑀬𑁆𑀬𑁂𑀦𑀓𑀞𑀮𑀸, 𑀬𑁂𑀪𑀼𑀬𑁆𑀬𑁂𑀦𑀫𑀭𑀼𑀫𑁆𑀩𑀸, 𑀬𑁂𑀪𑀼𑀬𑁆𑀬𑁂𑀦𑀯𑀸𑀮𑀺𑀓𑀸. 𑀤𑀟𑁆𑀠𑀸𑀧𑀺 𑀯𑀼𑀘𑁆𑀘𑀢𑀺 𑀅𑀚𑀸𑀢𑀸 𑀧𑀣𑀯𑀻. 𑀬𑁄𑀧𑀺 𑀧𑀁𑀲𑀼𑀧𑀼𑀜𑁆𑀚𑁄 𑀯𑀸 𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑁄 𑀯𑀸 𑀑𑀫𑀓𑀘𑀸𑀢𑀼𑀫𑀸𑀲𑀁 𑀑𑀯𑀝𑁆𑀞𑁄, 𑀅𑀬𑀫𑁆𑀧𑀺 𑀯𑀼𑀘𑁆𑀘𑀢𑀺 𑀅𑀚𑀸𑀢𑀸 𑀧𑀣𑀯𑀻.

𑀔𑀡𑁂𑀬𑁆𑀬𑀸𑀢𑀺 𑀲𑀬𑀁 𑀔𑀡𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀔𑀡𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀓𑀫𑁆𑀧𑀺 𑀔𑀡𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁭. 𑀧𑀣𑀯𑀺𑀬𑀸 𑀧𑀣𑀯𑀺𑀲𑀜𑁆𑀜𑀻 𑀔𑀡𑀢𑀺 𑀯𑀸 𑀔𑀡𑀸𑀧𑁂𑀢𑀺 𑀯𑀸, 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸, 𑀤𑀳𑀢𑀺 𑀯𑀸 𑀤𑀳𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀧𑀣𑀯𑀺𑀬𑀸 𑀯𑁂𑀫𑀢𑀺𑀓𑁄 𑀔𑀡𑀢𑀺 𑀯𑀸 𑀔𑀡𑀸𑀧𑁂𑀢𑀺 𑀯𑀸, 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸, 𑀤𑀳𑀢𑀺 𑀯𑀸 𑀤𑀳𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀧𑀣𑀯𑀺𑀬𑀸 𑀅𑀧𑀣𑀯𑀺𑀲𑀜𑁆𑀜𑀻 𑀔𑀡𑀢𑀺 𑀯𑀸 𑀔𑀡𑀸𑀧𑁂𑀢𑀺 𑀯𑀸, 𑀪𑀺𑀦𑁆𑀤𑀢𑀺 𑀯𑀸 𑀪𑁂𑀤𑀸𑀧𑁂𑀢𑀺 𑀯𑀸, 𑀤𑀳𑀢𑀺 𑀯𑀸 𑀤𑀳𑀸𑀧𑁂𑀢𑀺 𑀯𑀸, 𑀅𑀦𑀸𑀧𑀢𑁆𑀢𑀺.

𑀅𑀧𑀣𑀯𑀺𑀬𑀸 𑀧𑀣𑀯𑀺𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀣𑀯𑀺𑀬𑀸 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀣𑀯𑀺𑀬𑀸 𑀅𑀧𑀣𑀯𑀺𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁮𑁮. 𑀅𑀦𑀸𑀧𑀢𑁆𑀢𑀺 𑁋 ‘‘𑀇𑀫𑀁 𑀚𑀸𑀦, 𑀇𑀫𑀁 𑀤𑁂𑀳𑀺, 𑀇𑀫𑀁 𑀆𑀳𑀭, 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀁 𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺 𑀪𑀡𑀢𑀺, 𑀅𑀲𑀜𑁆𑀘𑀺𑀘𑁆𑀘, 𑀅𑀲𑀢𑀺𑀬𑀸, 𑀅𑀚𑀸𑀦𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀼𑀲𑀸 𑀑𑀫𑀲𑀧𑁂𑀲𑀼𑀜𑁆𑀜𑀁, 𑀧𑀤𑀲𑁂𑀬𑁆𑀬𑀸𑀬 𑀯𑁂 𑀤𑀼𑀯𑁂;

𑀅𑀜𑁆𑀜𑀢𑁆𑀭 𑀯𑀺𑀜𑁆𑀜𑀼𑀦𑀸 𑀪𑀽𑀢𑀸, 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺 𑀔𑀡𑀦𑀸𑀢𑀺.