𑁩. 𑀢𑀢𑀺𑀬𑀪𑀸𑀡𑀯𑀸𑀭𑁄

𑀲𑀗𑁆𑀖𑀪𑁂𑀤𑀓𑀣𑀸

𑁩𑁪𑁪. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀢𑀤𑀳𑀼𑀧𑁄𑀲𑀣𑁂 𑀉𑀝𑁆𑀞𑀸𑀬𑀸𑀲𑀦𑀸 𑀲𑀮𑀸𑀓𑀁 𑀕𑀸𑀳𑁂𑀲𑀺 𑁋 ‘‘𑀫𑀬𑀁, 𑀆𑀯𑀼𑀲𑁄, 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀬𑀸𑀘𑀺𑀫𑁆𑀳𑀸 𑁋 ‘𑀪𑀕𑀯𑀸, 𑀪𑀦𑁆𑀢𑁂, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀲𑁆𑀲…𑀧𑁂… 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀇𑀫𑀸𑀦𑀺, 𑀪𑀦𑁆𑀢𑁂, 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀺𑀘𑁆𑀙𑀢𑀸𑀬…𑀧𑁂… 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀬𑀸𑀯𑀚𑀻𑀯𑀁 𑀆𑀭𑀜𑁆𑀜𑀺𑀓𑀸 𑀅𑀲𑁆𑀲𑀼; 𑀬𑁄 𑀕𑀸𑀫𑀦𑁆𑀢𑀁 𑀑𑀲𑀭𑁂𑀬𑁆𑀬, 𑀯𑀚𑁆𑀚𑀁 𑀦𑀁 𑀨𑀼𑀲𑁂𑀬𑁆𑀬…𑀧𑁂… 𑀬𑀸𑀯𑀚𑀻𑀯𑀁 𑀫𑀘𑁆𑀙𑀫𑀁𑀲𑀁 𑀦 𑀔𑀸𑀤𑁂𑀬𑁆𑀬𑀼𑀁; 𑀬𑁄 𑀫𑀘𑁆𑀙𑀫𑀁𑀲𑀁 𑀔𑀸𑀤𑁂𑀬𑁆𑀬, 𑀯𑀚𑁆𑀚𑀁 𑀦𑀁 𑀨𑀼𑀲𑁂𑀬𑁆𑀬𑀸’𑀢𑀺. 𑀇𑀫𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀲𑀫𑀡𑁄 𑀕𑁄𑀢𑀫𑁄 𑀦𑀸𑀦𑀼𑀚𑀸𑀦𑀸𑀢𑀺. 𑀢𑁂 𑀫𑀬𑀁 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺 𑀲𑀫𑀸𑀤𑀸𑀬 𑀯𑀢𑁆𑀢𑀸𑀫. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀇𑀫𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀔𑀫𑀦𑁆𑀢𑀺, 𑀲𑁄 𑀲𑀮𑀸𑀓𑀁 𑀕𑀡𑁆𑀳𑀸𑀢𑀽’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀦𑀯𑀓𑀸 𑀘𑁂𑀯 𑀳𑁄𑀦𑁆𑀢𑀺 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 𑀘. 𑀢𑁂 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺 𑁋 𑀲𑀮𑀸𑀓𑀁 𑀕𑀡𑁆𑀳𑀺𑀁𑀲𑀼. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀬𑁂𑀦 𑀕𑀬𑀸𑀲𑀻𑀲𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀯𑀤𑀢𑁆𑀢𑁄, 𑀪𑀦𑁆𑀢𑁂, 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀬𑁂𑀦 𑀕𑀬𑀸𑀲𑀻𑀲𑀁 𑀢𑁂𑀦 𑀧𑀓𑁆𑀓𑀦𑁆𑀢𑁄’’𑀢𑀺. ‘‘𑀦 𑀳𑀺 𑀦𑀸𑀫 𑀢𑀼𑀫𑁆𑀳𑀸𑀓𑀁, 𑀲𑀸𑀭𑀺𑀧𑀼𑀢𑁆𑀢𑀸, 𑀢𑁂𑀲𑀼 𑀦𑀯𑀓𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑀸𑀭𑀼𑀜𑁆𑀜𑀫𑁆𑀧𑀺 𑀪𑀯𑀺𑀲𑁆𑀲𑀢𑀺? 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀲𑀸𑀭𑀺𑀧𑀼𑀢𑁆𑀢𑀸, 𑀧𑀼𑀭𑀸 𑀢𑁂 𑀪𑀺𑀓𑁆𑀔𑀽 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀕𑀬𑀸𑀲𑀻𑀲𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀭𑁄𑀤𑀫𑀸𑀦𑁄 𑀞𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀪𑀺𑀓𑁆𑀔𑀼, 𑀭𑁄𑀤𑀲𑀻’’𑀢𑀺? ‘‘𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀢𑁂𑀧𑀺 𑀤𑁂𑀯𑀤𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀕𑀘𑁆𑀙𑀦𑁆𑀢𑀺 𑀤𑁂𑀯𑀤𑀢𑁆𑀢𑀲𑁆𑀲 𑀥𑀫𑁆𑀫𑀁 𑀭𑁄𑀘𑁂𑀦𑁆𑀢𑀸’’𑀢𑀺. ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀼, 𑀅𑀦𑀯𑀓𑀸𑀲𑁄, 𑀬𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀤𑁂𑀯𑀤𑀢𑁆𑀢𑀲𑁆𑀲 𑀥𑀫𑁆𑀫𑀁 𑀭𑁄𑀘𑁂𑀬𑁆𑀬𑀼𑀁, 𑀅𑀧𑀺 𑀘 𑀢𑁂 𑀕𑀢𑀸 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀬𑀸’’𑀢𑀺 [𑀪𑀺𑀓𑁆𑀔𑀼𑀲𑀜𑁆𑀜𑀢𑁆𑀢𑀺𑀬𑀸𑀢𑀺 (𑀲𑀻. 𑀲𑁆𑀬𑀸.), 𑀪𑀺𑀓𑁆𑀔𑀽 𑀲𑀜𑁆𑀜𑀢𑁆𑀢𑀺𑀬𑀸 (𑀓.)].

𑁩𑁪𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁂𑀯𑀤𑀢𑁆𑀢𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀤𑁂𑀯𑀤𑀢𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀬𑀸𑀯 𑀲𑁆𑀯𑀸𑀓𑁆𑀔𑀸𑀢𑁄 𑀫𑀬𑀸 𑀥𑀫𑁆𑀫𑁄, 𑀬𑁂𑀧𑀺 𑀢𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀕𑁆𑀕𑀲𑀸𑀯𑀓𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀢𑁂𑀧𑀺 𑀫𑀫 𑀲𑀦𑁆𑀢𑀺𑀓𑁂 𑀆𑀕𑀘𑁆𑀙𑀦𑁆𑀢𑀺. 𑀫𑀫 𑀥𑀫𑁆𑀫𑀁 𑀭𑁄𑀘𑁂𑀦𑁆𑀢𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑁄𑀓𑀸𑀮𑀺𑀓𑁄 𑀤𑁂𑀯𑀤𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀯𑀺𑀲𑁆𑀲𑀲𑀺. 𑀧𑀸𑀧𑀺𑀘𑁆𑀙𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄. 𑀲𑁆𑀯𑀸𑀕𑀢𑀁 𑀢𑁂𑀲𑀁 𑀬𑀢𑁄 𑀫𑁂 𑀥𑀫𑁆𑀫𑀁 𑀭𑁄𑀘𑁂𑀦𑁆𑀢𑀻’’𑀢𑀺.

𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀉𑀧𑀟𑁆𑀠𑀸𑀲𑀦𑁂𑀦 𑀦𑀺𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀇𑀥 𑀦𑀺𑀲𑀻𑀤𑀸𑀳𑀻’’𑀢𑀺. ‘‘𑀅𑀮𑀁 𑀆𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀜𑁆𑀜𑀢𑀭𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀜𑁆𑀜𑀢𑀭𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀚𑁆𑀛𑁂𑀲𑀺 𑁋 ‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀧𑀝𑀺𑀪𑀸𑀢𑀼 𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀻 𑀓𑀣𑀸, 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀓𑀺𑀮𑀫𑀦𑁆𑀢𑀲𑁆𑀲 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀫𑀼𑀳𑀼𑀢𑁆𑀢𑀓𑁂𑀦𑁂𑀯 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀆𑀬𑀲𑁆𑀫𑀢𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀸𑀫 𑀫𑀬𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂. 𑀬𑁄 𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀭𑁄𑀘𑁂𑀲𑀺 𑀲𑁄 𑀆𑀕𑀘𑁆𑀙𑀢𑀽’’𑀢𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀢𑀸𑀦𑀺 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺 𑀆𑀤𑀸𑀬 𑀬𑁂𑀦 𑀯𑁂𑀴𑀼𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀓𑁄𑀓𑀸𑀮𑀺𑀓𑁄 𑀤𑁂𑀯𑀤𑀢𑁆𑀢𑀁 𑀉𑀝𑁆𑀞𑀸𑀧𑁂𑀲𑀺 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀦𑀻𑀢𑀸 𑀢𑁂 𑀪𑀺𑀓𑁆𑀔𑀽 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺. 𑀦𑀦𑀼 𑀢𑁆𑀯𑀁, 𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀫𑀬𑀸 𑀯𑀼𑀢𑁆𑀢𑁄 𑁋 ‘𑀫𑀸, 𑀆𑀯𑀼𑀲𑁄 𑀤𑁂𑀯𑀤𑀢𑁆𑀢, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀯𑀺𑀲𑁆𑀲𑀸𑀲𑀺. 𑀧𑀸𑀧𑀺𑀘𑁆𑀙𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸’’’𑀢𑀺? 𑀅𑀣 𑀔𑁄 𑀤𑁂𑀯𑀤𑀢𑁆𑀢𑀲𑁆𑀲 𑀢𑀢𑁆𑀣𑁂𑀯 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺.

𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀲𑀼𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀼𑀦 𑀉𑀧𑀲𑀫𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺. ‘‘𑀅𑀮𑀁, 𑀲𑀸𑀭𑀺𑀧𑀼𑀢𑁆𑀢. 𑀫𑀸 𑀢𑁂 𑀭𑀼𑀘𑁆𑀘𑀺 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀦 𑀉𑀧𑀲𑀫𑁆𑀧𑀤𑀸. 𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀣𑀼𑀮𑁆𑀮𑀘𑁆𑀘𑀬𑀁 𑀤𑁂𑀲𑀸𑀧𑁂𑀳𑀺. 𑀓𑀣𑀁 𑀧𑀦 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀤𑁂𑀯𑀤𑀢𑁆𑀢𑁄 𑀧𑀝𑀺𑀧𑀚𑁆𑀚𑀻’’𑀢𑀺? ‘‘𑀬𑀣𑁂𑀯, 𑀪𑀦𑁆𑀢𑁂, 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀫𑀁 𑀅𑀚𑁆𑀛𑁂𑀲𑀢𑀺 𑁋 ‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀧𑀝𑀺𑀪𑀸𑀢𑀼 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀻 𑀓𑀣𑀸, 𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀺, 𑀢𑀫𑀳𑀁 𑀆𑀬𑀫𑀺𑀲𑁆𑀲𑀸𑀫𑀻’𑀢𑀺, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀧𑀝𑀺𑀧𑀚𑁆𑀚𑀻’’𑀢𑀺.

𑁩𑁪𑁬. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀭𑀜𑁆𑀜𑀸𑀬𑀢𑀦𑁂 𑀫𑀳𑀸𑀲𑀭𑀲𑀻. 𑀢𑀁 𑀦𑀸𑀕𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀁𑀲𑀼. 𑀢𑁂 𑀢𑀁 𑀲𑀭𑀲𑀺𑀁 𑀑𑀕𑀸𑀳𑁂𑀢𑁆𑀯𑀸, 𑀲𑁄𑀡𑁆𑀟𑀸𑀬 𑀪𑀺𑀲𑀫𑀼𑀴𑀸𑀮𑀁 𑀅𑀩𑁆𑀩𑀼𑀳𑀺𑀢𑁆𑀯𑀸, 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸, 𑀅𑀓𑀤𑁆𑀤𑀫𑀁 𑀲𑀗𑁆𑀔𑀸𑀤𑀺𑀢𑁆𑀯𑀸, 𑀅𑀚𑁆𑀛𑁄𑀳𑀭𑀦𑁆𑀢𑀺. 𑀢𑁂𑀲𑀁 𑀢𑀁 𑀯𑀡𑁆𑀡𑀸𑀬 𑀘𑁂𑀯 𑀳𑁄𑀢𑀺, 𑀩𑀮𑀸𑀬 𑀘. 𑀦 𑀘 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀦𑁆𑀢𑀺, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑁂𑀲𑀁𑀬𑁂𑀯 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀫𑀳𑀸𑀦𑀸𑀕𑀸𑀦𑀁 𑀅𑀦𑀼𑀲𑀺𑀓𑁆𑀔𑀫𑀸𑀦𑀸 𑀢𑀭𑀼𑀡𑀸 𑀪𑀺𑀗𑁆𑀓𑀘𑁆𑀙𑀸𑀧𑀸. 𑀢𑁂 𑀢𑀁 𑀲𑀭𑀲𑀺𑀁 𑀑𑀕𑀸𑀳𑁂𑀢𑁆𑀯𑀸, 𑀲𑁄𑀡𑁆𑀟𑀸𑀬 𑀪𑀺𑀲𑀫𑀼𑀴𑀸𑀮𑀁 𑀅𑀩𑁆𑀩𑀼𑀳𑀺𑀢𑁆𑀯𑀸, 𑀦 𑀲𑀼𑀯𑀺𑀓𑁆𑀔𑀸𑀮𑀺𑀢𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸, 𑀲𑀓𑀤𑁆𑀤𑀫𑀁 𑀲𑀗𑁆𑀔𑀸𑀤𑀺𑀢𑁆𑀯𑀸, 𑀅𑀚𑁆𑀛𑁄𑀳𑀭𑀦𑁆𑀢𑀺. 𑀢𑁂𑀲𑀁 𑀢𑀁 𑀦𑁂𑀯 𑀯𑀡𑁆𑀡𑀸𑀬 𑀳𑁄𑀢𑀺, 𑀦 𑀩𑀮𑀸𑀬. 𑀢𑀢𑁄𑀦𑀺𑀤𑀸𑀦𑀜𑁆𑀘 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀦𑁆𑀢𑀺, 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑁄 𑀫𑀫𑀸𑀦𑀼𑀓𑁆𑀭𑀼𑀩𑁆𑀩𑀁 [𑀫𑀫𑀸𑀦𑀼𑀓𑀼𑀩𑁆𑀩𑀁 (𑀲𑀻. 𑀲𑁆𑀬𑀸.)] 𑀓𑀧𑀡𑁄 𑀫𑀭𑀺𑀲𑁆𑀲𑀢𑀻𑀢𑀺.

‘‘𑀫𑀳𑀸𑀯𑀭𑀸𑀳𑀲𑁆𑀲 𑀫𑀳𑀺𑀁 𑀯𑀺𑀓𑁆𑀭𑀼𑀩𑁆𑀩𑀢𑁄 [𑀯𑀺𑀓𑀼𑀩𑁆𑀩𑀢𑁄 (𑀲𑀻. 𑀲𑁆𑀬𑀸.)], 𑀪𑀺𑀲𑀁 𑀖𑀲𑀸𑀦𑀲𑁆𑀲 [𑀖𑀲𑀫𑀸𑀦𑀲𑁆𑀲 (𑀓.)] 𑀦𑀤𑀻𑀲𑀼 𑀚𑀕𑁆𑀕𑀢𑁄;

𑀪𑀺𑀗𑁆𑀓𑁄𑀯 𑀧𑀗𑁆𑀓𑀁 𑀅𑀪𑀺𑀪𑀓𑁆𑀔𑀬𑀺𑀢𑁆𑀯𑀸, 𑀫𑀫𑀸𑀦𑀼𑀓𑁆𑀭𑀼𑀩𑁆𑀩𑀁 𑀓𑀧𑀡𑁄 𑀫𑀭𑀺𑀲𑁆𑀲𑀢𑀻’’𑀢𑀺.

𑁩𑁪𑁭. [𑀅. 𑀦𑀺. 𑁮.𑁧𑁬] ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑀸 𑀘 𑀳𑁄𑀢𑀺, 𑀲𑀸𑀯𑁂𑀢𑀸 𑀘, 𑀉𑀕𑁆𑀕𑀳𑁂𑀢𑀸 𑀘, 𑀥𑀸𑀭𑁂𑀢𑀸 𑀘, 𑀯𑀺𑀜𑁆𑀜𑀸𑀢𑀸 𑀘, 𑀯𑀺𑀜𑁆𑀜𑀸𑀧𑁂𑀢𑀸 𑀘, 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀲𑁆𑀲, 𑀦𑁄 𑀘 𑀓𑀮𑀳𑀓𑀸𑀭𑀓𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺.

[𑀅. 𑀦𑀺. 𑁮.𑁧𑁬] ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀲𑁄𑀢𑀸 𑀘 𑀳𑁄𑀢𑀺, 𑀲𑀸𑀯𑁂𑀢𑀸 𑀘, 𑀉𑀕𑁆𑀕𑀳𑁂𑀢𑀸 𑀘, 𑀥𑀸𑀭𑁂𑀢𑀸 𑀘, 𑀯𑀺𑀜𑁆𑀜𑀸𑀢𑀸 𑀘, 𑀯𑀺𑀜𑁆𑀜𑀸𑀧𑁂𑀢𑀸 𑀘, 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀲𑁆𑀲, 𑀦𑁄 𑀘 𑀓𑀮𑀳𑀓𑀸𑀭𑀓𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀻𑀢𑀺.

[𑀅. 𑀦𑀺. 𑁮.𑁧𑁬] ‘‘𑀬𑁄 𑀯𑁂 𑀦 𑀩𑁆𑀬𑀣𑀢𑀺 [𑀩𑁆𑀬𑀸𑀥𑀢𑀺 (𑀲𑀻. 𑀲𑁆𑀬𑀸.)] 𑀧𑀢𑁆𑀯𑀸, 𑀧𑀭𑀺𑀲𑀁 𑀉𑀕𑁆𑀕𑀯𑀸𑀤𑀺𑀦𑀺𑀁;

𑀦 𑀘 𑀳𑀸𑀧𑁂𑀢𑀺 𑀯𑀘𑀦𑀁, 𑀦 𑀘 𑀙𑀸𑀤𑁂𑀢𑀺 𑀲𑀸𑀲𑀦𑀁.

‘‘𑀅𑀲𑀦𑁆𑀤𑀺𑀤𑁆𑀥𑁄 𑀘 𑀅𑀓𑁆𑀔𑀸𑀢𑀺 [𑀅𑀓𑁆𑀔𑀸𑀢𑀸 (𑀓.)], 𑀧𑀼𑀘𑁆𑀙𑀺𑀢𑁄 𑀘 𑀦 𑀓𑀼𑀧𑁆𑀧𑀢𑀺;

𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀻’’𑀢𑀺.

𑁩𑁪𑁮. [𑀅. 𑀦𑀺. 𑁮.𑁭] ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀮𑀸𑀪𑁂𑀦, 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄; 𑀅𑀮𑀸𑀪𑁂𑀦, 𑀪𑀺𑀓𑁆𑀔𑀯𑁂…𑀧𑁂… 𑀬𑀲𑁂𑀦, 𑀪𑀺𑀓𑁆𑀔𑀯𑁂…𑀧𑁂… 𑀅𑀬𑀲𑁂𑀦, 𑀪𑀺𑀓𑁆𑀔𑀯𑁂…𑀧𑁂… 𑀲𑀓𑁆𑀓𑀸𑀭𑁂𑀦, 𑀪𑀺𑀓𑁆𑀔𑀯𑁂…𑀧𑁂… 𑀅𑀲𑀓𑁆𑀓𑀸𑀭𑁂𑀦, 𑀪𑀺𑀓𑁆𑀔𑀯𑁂…𑀧𑁂… 𑀧𑀸𑀧𑀺𑀘𑁆𑀙𑀢𑀸𑀬, 𑀪𑀺𑀓𑁆𑀔𑀯𑁂…𑀧𑁂… 𑀧𑀸𑀧𑀫𑀺𑀢𑁆𑀢𑀢𑀸𑀬 𑀪𑀺𑀓𑁆𑀔𑀯𑁂, 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄.

𑁩𑁪𑁯. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬, 𑀉𑀧𑁆𑀧𑀦𑁆𑀦𑀁 𑀅𑀮𑀸𑀪𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀅𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀅𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀺𑀘𑁆𑀙𑀢𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀫𑀺𑀢𑁆𑀢𑀢𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬, 𑀉𑀧𑁆𑀧𑀦𑁆𑀦𑀁 𑀅𑀮𑀸𑀪𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀅𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀅𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀺𑀘𑁆𑀙𑀢𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀫𑀺𑀢𑁆𑀢𑀢𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬? 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀦𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑁄 𑀏𑀯𑀁𑀲𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀬𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀦𑁆𑀦𑀁 𑀅𑀮𑀸𑀪𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀅𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀅𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀺𑀘𑁆𑀙𑀢𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀫𑀺𑀢𑁆𑀢𑀢𑀁 𑀅𑀦𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸, 𑀉𑀧𑁆𑀧𑀦𑁆𑀦𑀁 𑀧𑀸𑀧𑀫𑀺𑀢𑁆𑀢𑀢𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑁄 𑀏𑀯𑀁𑀲𑀢𑁂 𑀆𑀲𑀯𑀸 𑀯𑀺𑀖𑀸𑀢𑀧𑀭𑀺𑀴𑀸𑀳𑀸 𑀦 𑀳𑁄𑀦𑁆𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬, 𑀉𑀧𑁆𑀧𑀦𑁆𑀦𑀁 𑀅𑀮𑀸𑀪𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀅𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀅𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀺𑀘𑁆𑀙𑀢𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀫𑀺𑀢𑁆𑀢𑀢𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑁂𑀬𑁆𑀬. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀺𑀲𑁆𑀲𑀸𑀫, 𑀉𑀧𑁆𑀧𑀦𑁆𑀦𑀁 𑀅𑀮𑀸𑀪𑀁…𑀧𑁂… 𑀉𑀧𑁆𑀧𑀦𑁆𑀦𑀁 𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀅𑀬𑀲𑀁… 𑀉𑀧𑁆𑀧𑀦𑁆𑀦𑀁 𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀅𑀲𑀓𑁆𑀓𑀸𑀭𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀺𑀘𑁆𑀙𑀢𑀁… 𑀉𑀧𑁆𑀧𑀦𑁆𑀦𑀁 𑀧𑀸𑀧𑀫𑀺𑀢𑁆𑀢𑀢𑀁 𑀅𑀪𑀺𑀪𑀼𑀬𑁆𑀬 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺; 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺.

𑁩𑁫𑁦. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄. 𑀓𑀢𑀫𑁂𑀳𑀺 𑀢𑀻𑀳𑀺? 𑀧𑀸𑀧𑀺𑀘𑁆𑀙𑀢𑀸, 𑀧𑀸𑀧𑀫𑀺𑀢𑁆𑀢𑀢𑀸, 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀸𑀤𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄𑀢𑀺.

‘‘𑀫𑀸 𑀚𑀸𑀢𑀼 𑀓𑁄𑀘𑀺 𑀮𑁄𑀓𑀲𑁆𑀫𑀺𑀁, 𑀧𑀸𑀧𑀺𑀘𑁆𑀙𑁄 𑀉𑀤𑀧𑀚𑁆𑀚𑀣;

𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣, 𑀧𑀸𑀧𑀺𑀘𑁆𑀙𑀸𑀦𑀁 𑀬𑀣𑀸𑀕𑀢𑀺.

‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀪𑀸𑀯𑀺𑀢𑀢𑁆𑀢𑁄𑀢𑀺 𑀲𑀫𑁆𑀫𑀢𑁄;

𑀚𑀮𑀁𑀯 𑀬𑀲𑀲𑀸 𑀅𑀝𑁆𑀞𑀸, 𑀤𑁂𑀯𑀤𑀢𑁆𑀢𑁄𑀢𑀺 𑀫𑁂 𑀲𑀼𑀢𑀁.

‘‘𑀲𑁄 𑀧𑀫𑀸𑀤𑀁 𑀅𑀦𑀼𑀘𑀺𑀡𑁆𑀡𑁄, 𑀆𑀲𑀚𑁆𑀚 𑀦𑀁 𑀢𑀣𑀸𑀕𑀢𑀁;

𑀅𑀯𑀻𑀘𑀺𑀦𑀺𑀭𑀬𑀁 𑀧𑀢𑁆𑀢𑁄, 𑀘𑀢𑀼𑀤𑁆𑀯𑀸𑀭𑀁 𑀪𑀬𑀸𑀦𑀓𑀁.

‘‘𑀅𑀤𑀼𑀝𑁆𑀞𑀲𑁆𑀲 𑀳𑀺 𑀬𑁄 𑀤𑀼𑀩𑁆𑀪𑁂, 𑀧𑀸𑀧𑀓𑀫𑁆𑀫𑀁 𑀅𑀓𑁆𑀭𑀼𑀩𑁆𑀩𑀢𑁄;

𑀢𑀫𑁂𑀯 𑀧𑀸𑀧𑀁 𑀨𑀼𑀲𑀢𑀺, 𑀤𑀼𑀝𑁆𑀞𑀘𑀺𑀢𑁆𑀢𑀁 𑀅𑀦𑀸𑀤𑀭𑀁.

‘‘𑀲𑀫𑀼𑀤𑁆𑀤𑀁 𑀯𑀺𑀲𑀓𑀼𑀫𑁆𑀪𑁂𑀦, 𑀬𑁄 𑀫𑀜𑁆𑀜𑁂𑀬𑁆𑀬 𑀧𑀤𑀽𑀲𑀺𑀢𑀼𑀁 [𑀧𑀤𑀼𑀲𑁆𑀲𑀺𑀢𑀼𑀁 (𑀓.)];

𑀦 𑀲𑁄 𑀢𑁂𑀦 𑀧𑀤𑀽𑀲𑁂𑀬𑁆𑀬, 𑀪𑁂𑀲𑁆𑀫𑀸 𑀳𑀺 𑀉𑀤𑀥𑀻 𑀫𑀳𑀸.

‘‘𑀏𑀯𑀫𑁂𑀯 𑀢𑀣𑀸𑀕𑀢𑀁, 𑀬𑁄 𑀯𑀸𑀤𑁂𑀦𑀼𑀧𑀳𑀺𑀁𑀲𑀢𑀺;

𑀲𑀫𑀕𑁆𑀕𑀢𑀁 [𑀲𑀫𑁆𑀫𑀸𑀕𑀢𑀁 (𑀲𑀻.), 𑀲𑀫𑀕𑀢𑀁 (𑀲𑁆𑀬𑀸.)] 𑀲𑀦𑁆𑀢𑀘𑀺𑀢𑁆𑀢𑀁, 𑀯𑀸𑀤𑁄 𑀢𑀫𑁆𑀳𑀺 𑀦 𑀭𑀽𑀳𑀢𑀺.

‘‘𑀢𑀸𑀤𑀺𑀲𑀁 𑀫𑀺𑀢𑁆𑀢𑀁 𑀓𑁆𑀭𑀼𑀩𑁆𑀩𑁂𑀣 [𑀓𑀼𑀩𑁆𑀩𑁂𑀣 (𑀲𑀻. 𑀲𑁆𑀬𑀸.)], 𑀢𑀜𑁆𑀘 𑀲𑁂𑀯𑁂𑀣 𑀧𑀡𑁆𑀟𑀺𑀢𑁄;

𑀬𑀲𑁆𑀲 𑀫𑀕𑁆𑀕𑀸𑀦𑀼𑀕𑁄 𑀪𑀺𑀓𑁆𑀔𑀼, 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂’’𑀢𑀺.

𑀉𑀧𑀸𑀮𑀺𑀧𑀜𑁆𑀳𑀸

𑁩𑁫𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀭𑀸𑀚𑀻𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄? 𑀓𑀺𑀢𑁆𑀢𑀸𑀯𑀢𑀸 𑀘 𑀧𑀦 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘𑀸’’𑀢𑀺?

‘‘𑀏𑀓𑀢𑁄, 𑀉𑀧𑀸𑀮𑀺, 𑀏𑀓𑁄 𑀳𑁄𑀢𑀺, 𑀏𑀓𑀢𑁄 𑀤𑁆𑀯𑁂, 𑀘𑀢𑀼𑀢𑁆𑀣𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄. 𑀏𑀓𑀢𑁄, 𑀉𑀧𑀸𑀮𑀺, 𑀤𑁆𑀯𑁂 𑀳𑁄𑀦𑁆𑀢𑀺, 𑀏𑀓𑀢𑁄 𑀤𑁆𑀯𑁂, 𑀧𑀜𑁆𑀘𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄. 𑀏𑀓𑀢𑁄, 𑀉𑀧𑀸𑀮𑀺, 𑀤𑁆𑀯𑁂 𑀳𑁄𑀦𑁆𑀢𑀺, 𑀏𑀓𑀢𑁄 𑀢𑀬𑁄, 𑀙𑀝𑁆𑀞𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄. 𑀏𑀓𑀢𑁄, 𑀉𑀧𑀸𑀮𑀺, 𑀢𑀬𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀢𑀬𑁄, 𑀲𑀢𑁆𑀢𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄. 𑀏𑀓𑀢𑁄, 𑀉𑀧𑀸𑀮𑀺, 𑀢𑀬𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀅𑀝𑁆𑀞𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀳𑁄𑀢𑀺, 𑀦𑁄 𑀘 𑀲𑀗𑁆𑀖𑀪𑁂𑀤𑁄. 𑀏𑀓𑀢𑁄, 𑀉𑀧𑀸𑀮𑀺, 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀦𑀯𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀏𑀯𑀁 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘. 𑀦𑀯𑀦𑁆𑀦𑀁 𑀯𑀸, 𑀉𑀧𑀸𑀮𑀺, 𑀅𑀢𑀺𑀭𑁂𑀓𑀦𑀯𑀦𑁆𑀦𑀁 𑀯𑀸 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘. 𑀦 𑀔𑁄, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀅𑀧𑀺 𑀘 𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀺, 𑀦 𑀲𑀺𑀓𑁆𑀔𑀫𑀸𑀦𑀸 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺…𑀧𑁂… 𑀦 𑀲𑀸𑀫𑀡𑁂𑀭𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀲𑀸𑀫𑀡𑁂𑀭𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀉𑀧𑀸𑀲𑀓𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀉𑀧𑀸𑀲𑀺𑀓𑀸 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀅𑀧𑀺 𑀘 𑀪𑁂𑀤𑀸𑀬 𑀧𑀭𑀓𑁆𑀓𑀫𑀢𑀺. 𑀪𑀺𑀓𑁆𑀔𑀼 𑀔𑁄, 𑀉𑀧𑀸𑀮𑀺, 𑀧𑀓𑀢𑀢𑁆𑀢𑁄, 𑀲𑀫𑀸𑀦𑀲𑀁𑀯𑀸𑀲𑀓𑁄, 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄, 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻’’𑀢𑀺.

𑁩𑁫𑁨. [𑀅. 𑀦𑀺. 𑁧𑁦.𑁩𑁭] ‘‘𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀪𑁂𑀤𑁄𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀻’’𑀢𑀺?

‘‘𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀽 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀢𑁂 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀧𑀓𑀲𑁆𑀲𑀦𑁆𑀢𑀺, 𑀅𑀯𑀧𑀓𑀲𑁆𑀲𑀦𑁆𑀢𑀺, 𑀆𑀯𑁂𑀦𑀺𑀁 [𑀆𑀯𑁂𑀡𑀺 (𑀲𑀻.), 𑀆𑀯𑁂𑀡𑀺𑀓𑀁 (𑀲𑁆𑀬𑀸.)] 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀆𑀯𑁂𑀦𑀺𑀁 𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑀺, 𑀆𑀯𑁂𑀦𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀳𑁄𑀢𑀻’’𑀢𑀺.

𑁩𑁫𑁩. [𑀅. 𑀦𑀺. 𑁧𑁦.𑁩𑁭] ‘‘𑀲𑀗𑁆𑀖𑀲𑀸𑀫𑀕𑁆𑀕𑀻 𑀲𑀗𑁆𑀖𑀲𑀸𑀫𑀕𑁆𑀕𑀻𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑁄 𑀲𑀫𑀕𑁆𑀕𑁄 𑀳𑁄𑀢𑀻’’𑀢𑀺? ‘‘𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀽 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀢𑁂 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀦 𑀅𑀧𑀓𑀲𑁆𑀲𑀦𑁆𑀢𑀺, 𑀦 𑀅𑀯𑀧𑀓𑀲𑁆𑀲𑀦𑁆𑀢𑀺, 𑀦 𑀆𑀯𑁂𑀦𑀺𑀁 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀦 𑀆𑀯𑁂𑀦𑀺𑀁 𑀧𑀯𑀸𑀭𑀡𑀁 𑀓𑀭𑁄𑀦𑁆𑀢𑀺, 𑀦 𑀆𑀯𑁂𑀦𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑁄 𑀲𑀫𑀕𑁆𑀕𑁄 𑀳𑁄𑀢𑀻’’𑀢𑀺.

𑁩𑁫𑁪. ‘‘𑀲𑀫𑀕𑁆𑀕𑀁 𑀧𑀦, 𑀪𑀦𑁆𑀢𑁂, 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀺𑀁 𑀲𑁄 𑀧𑀲𑀯𑀢𑀻’’𑀢𑀺? ‘‘𑀲𑀫𑀕𑁆𑀕𑀁 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀝𑁆𑀞𑀺𑀓𑀁 𑀓𑀺𑀩𑁆𑀩𑀺𑀲𑀁 𑀧𑀲𑀯𑀢𑀺, 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺.

[𑀇𑀢𑀺𑀯𑀼. 𑁧𑁮; 𑀅. 𑀦𑀺. 𑁧𑁦.𑁩𑁯] ‘‘𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄 𑀲𑀗𑁆𑀖𑀪𑁂𑀤𑀓𑁄;

𑀯𑀕𑁆𑀕𑀭𑀢𑁄 𑀅𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀧𑀥𑀁𑀲𑀢𑀺;

𑀲𑀗𑁆𑀖𑀁 𑀲𑀫𑀕𑁆𑀕𑀁 𑀪𑀺𑀦𑁆𑀤𑀺𑀢𑁆𑀯𑀸, 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺.

‘‘𑀪𑀺𑀦𑁆𑀦𑀁 𑀧𑀦, 𑀪𑀦𑁆𑀢𑁂, 𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀢𑁆𑀯𑀸 𑀓𑀺𑀁 𑀲𑁄 𑀧𑀲𑀯𑀢𑀻’’𑀢𑀺? ‘‘𑀪𑀺𑀦𑁆𑀦𑀁 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻’’𑀢𑀺.

[𑀇𑀢𑁆𑀢𑀺𑀯𑀼. 𑁧𑁮; 𑀅. 𑀦𑀺. 𑁧𑁦.𑁪𑁦] ‘‘𑀲𑀼𑀔𑀸 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻, 𑀲𑀫𑀕𑁆𑀕𑀸𑀦𑀜𑁆𑀘 𑀅𑀦𑀼𑀕𑁆𑀕𑀳𑁄;

𑀲𑀫𑀕𑁆𑀕𑀭𑀢𑁄 𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀺;

𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀢𑁆𑀯𑀸𑀦, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻’’𑀢𑀺.

𑁩𑁫𑁫. [𑀧𑀭𑀺. 𑁪𑁫𑁯] ‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄’’𑀢𑀺? ‘‘𑀲𑀺𑀬𑀸, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄’’𑀢𑀺.

[𑀧𑀭𑀺. 𑁪𑁫𑁯] ‘‘𑀲𑀺𑀬𑀸 [𑀲𑀺𑀬𑀸 𑀦𑀼 𑀔𑁄 (𑀲𑁆𑀬𑀸. 𑀓𑀁.)] 𑀧𑀦, 𑀪𑀦𑁆𑀢𑁂, 𑀲𑀗𑁆𑀖𑀪𑁂𑀤𑀓𑁄 𑀦 𑀆𑀧𑀸𑀬𑀺𑀓𑁄, 𑀦 𑀦𑁂𑀭𑀬𑀺𑀓𑁄, 𑀦 𑀓𑀧𑁆𑀧𑀝𑁆𑀞𑁄, 𑀦 𑀅𑀢𑁂𑀓𑀺𑀘𑁆𑀙𑁄’’𑀢𑀺? ‘‘𑀲𑀺𑀬𑀸, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀦 𑀆𑀧𑀸𑀬𑀺𑀓𑁄, 𑀦 𑀦𑁂𑀭𑀬𑀺𑀓𑁄, 𑀦 𑀓𑀧𑁆𑀧𑀝𑁆𑀞𑁄, 𑀦 𑀅𑀢𑁂𑀓𑀺𑀘𑁆𑀙𑁄’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄’’𑀢𑀺? ‘‘𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀯𑁂𑀫𑀢𑀺𑀓𑁄, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺…𑀧𑁂… (𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺) [( ) 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀦𑀢𑁆𑀣𑀺, 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀝𑀻𑀓𑀸𑀬 𑀲𑀫𑁂𑀢𑀺]. 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺 𑀪𑁂𑀤𑁂 𑀯𑁂𑀫𑀢𑀺𑀓𑁄. 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁄 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺. 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁄 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺. 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁄 𑀪𑁂𑀤𑁂 𑀯𑁂𑀫𑀢𑀺𑀓𑁄 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺…𑀧𑁂… 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺… 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺… 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺… 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺… 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺… 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺… 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺… 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺… 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺… 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺…𑀧𑁂… 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺 … 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀯𑁂𑀫𑀢𑀺𑀓𑁄… 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺… (𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺) [( ) 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀦𑀢𑁆𑀣𑀺] … 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀯𑁂𑀫𑀢𑀺𑀓𑁄… 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁄, 𑀪𑁂𑀤𑁂 𑀅𑀥𑀫𑁆𑀫𑀤𑀺𑀝𑁆𑀞𑀺… 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁄, 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺… 𑀢𑀲𑁆𑀫𑀺𑀁 𑀯𑁂𑀫𑀢𑀺𑀓𑁄, 𑀪𑁂𑀤𑁂 𑀯𑁂𑀫𑀢𑀺𑀓𑁄, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀆𑀧𑀸𑀬𑀺𑀓𑁄, 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄, 𑀅𑀢𑁂𑀓𑀺𑀘𑁆𑀙𑁄’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀲𑀗𑁆𑀖𑀪𑁂𑀤𑀓𑁄 𑀦 𑀆𑀧𑀸𑀬𑀺𑀓𑁄, 𑀦 𑀦𑁂𑀭𑀬𑀺𑀓𑁄, 𑀦 𑀓𑀧𑁆𑀧𑀝𑁆𑀞𑁄, 𑀦 𑀅𑀢𑁂𑀓𑀺𑀘𑁆𑀙𑁄’’𑀢𑀺? ‘‘𑀇𑀥𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺, 𑀅𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀅𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀅𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀅𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀦 𑀆𑀧𑀸𑀬𑀺𑀓𑁄, 𑀦 𑀦𑁂𑀭𑀬𑀺𑀓𑁄, 𑀦 𑀓𑀧𑁆𑀧𑀝𑁆𑀞𑁄, 𑀦 𑀅𑀢𑁂𑀓𑀺𑀘𑁆𑀙𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀲𑁆𑀫𑀺𑀁 𑀥𑀫𑁆𑀫𑀤𑀺𑀝𑁆𑀞𑀺, 𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺, 𑀅𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀅𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀅𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀅𑀯𑀺𑀦𑀺𑀥𑀸𑀬 𑀪𑀸𑀯𑀁, 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 𑁋 ‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄, 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀫𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺. 𑀅𑀬𑀫𑁆𑀧𑀺 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀪𑁂𑀤𑀓𑁄 𑀦 𑀆𑀧𑀸𑀬𑀺𑀓𑁄, 𑀦 𑀦𑁂𑀭𑀬𑀺𑀓𑁄, 𑀦 𑀓𑀧𑁆𑀧𑀝𑁆𑀞𑁄, 𑀦 𑀅𑀢𑁂𑀓𑀺𑀘𑁆𑀙𑁄’’𑀢𑀺.

𑀢𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀦𑀼𑀧𑀺𑀬𑁂 𑀅𑀪𑀺𑀜𑁆𑀜𑀸𑀢𑀸, 𑀲𑀼𑀔𑀼𑀫𑀸𑀮𑁄 𑀦 𑀇𑀘𑁆𑀙𑀢𑀺;

𑀓𑀲𑀸 𑀯𑀧𑀸 𑀅𑀪𑀺 𑀦𑀺𑀦𑁆𑀦𑁂, 𑀦𑀺𑀤𑁆𑀥𑀸 𑀮𑀸𑀯𑁂 𑀘 𑀉𑀩𑁆𑀩𑀳𑁂.

𑀧𑀼𑀜𑁆𑀚𑀫𑀤𑁆𑀤𑀧𑀮𑀸𑀮𑀜𑁆𑀘, 𑀪𑀼𑀲𑀑𑀨𑀼𑀡𑀦𑀻𑀳𑀭𑁂;

𑀆𑀬𑀢𑀺𑀫𑁆𑀧𑀺 𑀦 𑀔𑀻𑀬𑀦𑁆𑀢𑀺, 𑀧𑀺𑀢𑀭𑁄 𑀘 𑀧𑀺𑀢𑀸𑀫𑀳𑀸.

𑀪𑀤𑁆𑀤𑀺𑀬𑁄 𑀅𑀦𑀼𑀭𑀼𑀤𑁆𑀥𑁄 𑀘, 𑀆𑀦𑀦𑁆𑀤𑁄 𑀪𑀕𑀼 𑀓𑀺𑀫𑀺𑀮𑁄;

𑀲𑀓𑁆𑀬𑀫𑀸𑀦𑁄 𑀘 𑀓𑁄𑀲𑀫𑁆𑀩𑀺𑀁, 𑀧𑀭𑀺𑀳𑀸𑀬𑀺 𑀓𑀓𑀼𑀥𑁂𑀦 𑀘.

𑀧𑀓𑀸𑀲𑁂𑀲𑀺 𑀧𑀺𑀢𑀼𑀦𑁄 𑀘, 𑀧𑀼𑀭𑀺𑀲𑁂 𑀲𑀺𑀮𑀁 𑀦𑀸𑀴𑀸𑀕𑀺𑀭𑀺𑀁;

𑀢𑀺𑀓𑀧𑀜𑁆𑀘𑀕𑀭𑀼𑀓𑁄 𑀔𑁄, 𑀪𑀺𑀦𑁆𑀤𑀺 𑀣𑀼𑀮𑁆𑀮𑀘𑁆𑀘𑀬𑁂𑀦 𑀘;

𑀢𑀬𑁄 𑀅𑀝𑁆𑀞 𑀧𑀼𑀦 𑀢𑀻𑀡𑀺, 𑀭𑀸𑀚𑀺 𑀪𑁂𑀤𑀸 𑀲𑀺𑀬𑀸 𑀦𑀼 𑀔𑁄𑀢𑀺.

𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀁 𑀦𑀺𑀝𑁆𑀞𑀺𑀢𑀁.