𑁧. 𑀧𑀞𑀫𑀪𑀸𑀡𑀯𑀸𑀭𑁄

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸

𑁩𑁩𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀅𑀦𑀼𑀧𑀺𑀬𑀸𑀬𑀁 𑀯𑀺𑀳𑀭𑀢𑀺, 𑀅𑀦𑀼𑀧𑀺𑀬𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁄. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀲𑀓𑁆𑀬𑀓𑀼𑀫𑀸𑀭𑀸 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸𑀦𑀸𑀫𑁄 𑀘 𑀲𑀓𑁆𑀓𑁄 𑀅𑀦𑀼𑀭𑀼𑀤𑁆𑀥𑁄 𑀘 𑀲𑀓𑁆𑀓𑁄 𑀤𑁆𑀯𑁂𑀪𑀸𑀢𑀺𑀓𑀸 𑀳𑁄𑀦𑁆𑀢𑀺. 𑀅𑀦𑀼𑀭𑀼𑀤𑁆𑀥𑁄 𑀲𑀓𑁆𑀓𑁄 𑀲𑀼𑀔𑀼𑀫𑀸𑀮𑁄 𑀳𑁄𑀢𑀺. 𑀢𑀲𑁆𑀲 𑀢𑀬𑁄 𑀧𑀸𑀲𑀸𑀤𑀸 𑀳𑁄𑀦𑁆𑀢𑀺 𑁋 𑀏𑀓𑁄 𑀳𑁂𑀫𑀦𑁆𑀢𑀺𑀓𑁄, 𑀏𑀓𑁄 𑀕𑀺𑀫𑁆𑀳𑀺𑀓𑁄, 𑀏𑀓𑁄 𑀯𑀲𑁆𑀲𑀺𑀓𑁄. 𑀲𑁄 𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 [𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 (𑀲𑀻.)] 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 [𑀧𑀭𑀺𑀘𑀸𑀭𑀺𑀬𑀫𑀸𑀦𑁄 (𑀓.)] 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀢𑀺. 𑀅𑀣 𑀔𑁄 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀲𑀓𑁆𑀬𑀓𑀼𑀫𑀸𑀭𑀸 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀦𑁆𑀢𑀺. 𑀅𑀫𑁆𑀳𑀸𑀓𑀜𑁆𑀘 𑀧𑀦 𑀓𑀼𑀮𑀸 𑀦𑀢𑁆𑀣𑀺 𑀓𑁄𑀘𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀬𑀁𑀦𑀽𑀦𑀸𑀳𑀁 𑀯𑀸 𑀧𑀩𑁆𑀩𑀚𑁂𑀬𑁆𑀬𑀁, 𑀅𑀦𑀼𑀭𑀼𑀤𑁆𑀥𑁄 𑀯𑀸’’𑀢𑀺. 𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄 𑀬𑁂𑀦 𑀅𑀦𑀼𑀭𑀼𑀤𑁆𑀥𑁄 𑀲𑀓𑁆𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑀼𑀭𑀼𑀤𑁆𑀥𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀭𑀳𑀺, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀲𑀓𑁆𑀬𑀓𑀼𑀫𑀸𑀭𑀸 𑀪𑀕𑀯𑀦𑁆𑀢𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀦𑁆𑀢𑀺. 𑀅𑀫𑁆𑀳𑀸𑀓𑀜𑁆𑀘 𑀧𑀦 𑀓𑀼𑀮𑀸 𑀦𑀢𑁆𑀣𑀺 𑀓𑁄𑀘𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀢𑁂𑀦 𑀳𑀺 𑀢𑁆𑀯𑀁 𑀯𑀸 𑀧𑀩𑁆𑀩𑀚, 𑀅𑀳𑀁 𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀳𑀁 𑀔𑁄 𑀲𑀼𑀔𑀼𑀫𑀸𑀮𑁄, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀢𑁆𑀯𑀁 𑀧𑀩𑁆𑀩𑀚𑀸𑀳𑀻’’𑀢𑀺. ‘‘𑀏𑀳𑀺 𑀔𑁄 𑀢𑁂, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀖𑀭𑀸𑀯𑀸𑀲𑀢𑁆𑀣𑀁 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀺. 𑀧𑀞𑀫𑀁 𑀔𑁂𑀢𑁆𑀢𑀁 𑀓𑀲𑀸𑀧𑁂𑀢𑀩𑁆𑀩𑀁. 𑀓𑀲𑀸𑀧𑁂𑀢𑁆𑀯𑀸 𑀯𑀧𑀸𑀧𑁂𑀢𑀩𑁆𑀩𑀁. 𑀯𑀧𑀸𑀧𑁂𑀢𑁆𑀯𑀸 𑀉𑀤𑀓𑀁 𑀅𑀪𑀺𑀦𑁂𑀢𑀩𑁆𑀩𑀁. 𑀉𑀤𑀓𑀁 𑀅𑀪𑀺𑀦𑁂𑀢𑁆𑀯𑀸 𑀉𑀤𑀓𑀁 𑀦𑀺𑀦𑁆𑀦𑁂𑀢𑀩𑁆𑀩𑀁. 𑀉𑀤𑀓𑀁 𑀦𑀺𑀦𑁆𑀦𑁂𑀢𑁆𑀯𑀸 𑀦𑀺𑀤𑁆𑀥𑀸𑀧𑁂𑀢𑀩𑁆𑀩𑀁. 𑀦𑀺𑀤𑁆𑀥𑀸𑀧𑁂𑀢𑁆𑀯𑀸 [𑀦𑀺𑀟𑁆𑀟𑀳𑁂𑀢𑀩𑁆𑀩𑀁, 𑀦𑀺𑀟𑁆𑀟𑀳𑁂𑀢𑁆𑀯𑀸 (𑀲𑀻.)] 𑀮𑀯𑀸𑀧𑁂𑀢𑀩𑁆𑀩𑀁. 𑀮𑀯𑀸𑀧𑁂𑀢𑁆𑀯𑀸 𑀉𑀩𑁆𑀩𑀸𑀳𑀸𑀧𑁂𑀢𑀩𑁆𑀩𑀁. 𑀉𑀩𑁆𑀩𑀸𑀳𑀸𑀧𑁂𑀢𑁆𑀯𑀸 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑀩𑁆𑀩𑀁. 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀤𑁆𑀤𑀸𑀧𑁂𑀢𑀩𑁆𑀩𑀁. 𑀫𑀤𑁆𑀤𑀸𑀧𑁂𑀢𑁆𑀯𑀸 𑀧𑀮𑀸𑀮𑀸𑀦𑀺 𑀉𑀤𑁆𑀥𑀭𑀸𑀧𑁂𑀢𑀩𑁆𑀩𑀸𑀦𑀺. 𑀧𑀮𑀸𑀮𑀸𑀦𑀺 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀪𑀼𑀲𑀺𑀓𑀸 𑀉𑀤𑁆𑀥𑀭𑀸𑀧𑁂𑀢𑀩𑁆𑀩𑀸. 𑀪𑀼𑀲𑀺𑀓𑀁 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀑𑀧𑀼𑀦𑀸𑀧𑁂𑀢𑀩𑁆𑀩𑀁 [𑀑𑀨𑀼𑀦𑀸𑀧𑁂𑀢𑀩𑁆𑀩𑀁 (𑀲𑁆𑀬𑀸. 𑀓.), 𑀑𑀨𑀼𑀡𑀸𑀧𑁂𑀢𑀩𑁆𑀩𑀁 (𑀬𑁄𑀚𑀦𑀸)]. 𑀑𑀧𑀼𑀦𑀸𑀧𑁂𑀢𑁆𑀯𑀸 𑀅𑀢𑀺𑀳𑀭𑀸𑀧𑁂𑀢𑀩𑁆𑀩𑀁. 𑀅𑀢𑀺𑀳𑀭𑀸𑀧𑁂𑀢𑁆𑀯𑀸 𑀆𑀬𑀢𑀺𑀫𑁆𑀧𑀺 𑀯𑀲𑁆𑀲𑀁 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁, 𑀆𑀬𑀢𑀺𑀫𑁆𑀧𑀺 𑀯𑀲𑁆𑀲𑀁 𑀏𑀯𑀫𑁂𑀯 𑀓𑀸𑀢𑀩𑁆𑀩’’𑀦𑁆𑀢𑀺. ‘‘𑀦 𑀓𑀫𑁆𑀫𑀸 𑀔𑀻𑀬𑀦𑁆𑀢𑀺? 𑀦 𑀓𑀫𑁆𑀫𑀸𑀦𑀁 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺? 𑀓𑀤𑀸 𑀓𑀫𑁆𑀫𑀸 𑀔𑀻𑀬𑀺𑀲𑁆𑀲𑀦𑁆𑀢𑀺? 𑀓𑀤𑀸 𑀓𑀫𑁆𑀫𑀸𑀦𑀁 𑀅𑀦𑁆𑀢𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀺? 𑀓𑀤𑀸 𑀫𑀬𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀲𑁆𑀲𑀸𑀫𑀸’’𑀢𑀺? ‘‘𑀦 𑀳𑀺, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀓𑀫𑁆𑀫𑀸 𑀔𑀻𑀬𑀦𑁆𑀢𑀺. 𑀦 𑀓𑀫𑁆𑀫𑀸𑀦𑀁 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺. 𑀅𑀔𑀻𑀡𑁂𑀯 𑀓𑀫𑁆𑀫𑁂 𑀧𑀺𑀢𑀭𑁄 𑀘 𑀧𑀺𑀢𑀸𑀫𑀳𑀸 𑀘 𑀓𑀸𑀮𑀗𑁆𑀓𑀢𑀸’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀜𑁆𑀜𑁂𑀯 𑀖𑀭𑀸𑀯𑀸𑀲𑀢𑁆𑀣𑁂𑀦 𑀉𑀧𑀚𑀸𑀦𑀸𑀳𑀺. 𑀅𑀳𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀅𑀦𑀼𑀭𑀼𑀤𑁆𑀥𑁄 𑀲𑀓𑁆𑀓𑁄 𑀬𑁂𑀦 𑀫𑀸𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀅𑀫𑁆𑀫, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀅𑀦𑀼𑀚𑀸𑀦𑀸𑀳𑀺 𑀫𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀓𑁆𑀓𑀲𑁆𑀲 𑀫𑀸𑀢𑀸 𑀅𑀦𑀼𑀭𑀼𑀤𑁆𑀥𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘 𑁋 ‘‘𑀢𑀼𑀫𑁆𑀳𑁂 𑀔𑁄 𑀫𑁂, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀤𑁆𑀯𑁂 𑀧𑀼𑀢𑁆𑀢𑀸 𑀧𑀺𑀬𑀸 𑀫𑀦𑀸𑀧𑀸 𑀅𑀧𑁆𑀧𑀝𑀺𑀓𑀽𑀮𑀸. 𑀫𑀭𑀡𑁂𑀦𑀧𑀺 𑀯𑁄 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀺. 𑀓𑀺𑀁 𑀧𑀦𑀸𑀳𑀁 𑀢𑀼𑀫𑁆𑀳𑁂 𑀚𑀻𑀯𑀦𑁆𑀢𑁂 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀅𑀦𑀼𑀭𑀼𑀤𑁆𑀥𑁄 𑀲𑀓𑁆𑀓𑁄 𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀅𑀫𑁆𑀫, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀅𑀦𑀼𑀚𑀸𑀦𑀸𑀳𑀺 𑀫𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺 [𑀇𑀫𑀲𑁆𑀲 𑀅𑀦𑀦𑁆𑀢𑀭𑀁 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀏𑀯𑀫𑁆𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺 𑁋- ‘‘𑀏𑀯𑀁 𑀯𑀼𑀢𑁆𑀢𑁂 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀓𑁆𑀓𑀲𑁆𑀲 𑀫𑀸𑀢𑀸 𑀏𑀯𑀫𑀸𑀳 ‘𑀲𑀘𑁂 𑀢𑀸𑀢 𑀅𑀦𑀼𑀭𑀼𑀤𑁆𑀥 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀲𑀓𑁆𑀬𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀧𑀩𑁆𑀩𑀚𑀸𑀳𑀻’’’𑀢𑀺]. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀲𑀓𑁆𑀬𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀲𑁄 𑀘 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀓𑁆𑀓𑀲𑁆𑀲 𑀲𑀳𑀸𑀬𑁄 𑀳𑁄𑀢𑀺. 𑀅𑀣 𑀔𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀓𑁆𑀓𑀲𑁆𑀲 𑀫𑀸𑀢𑀸 𑁋 ‘𑀅𑀬𑀁 𑀔𑁄 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀲𑀓𑁆𑀬𑀸𑀦𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺; 𑀅𑀦𑀼𑀭𑀼𑀤𑁆𑀥𑀲𑁆𑀲 𑀲𑀓𑁆𑀓𑀲𑁆𑀲 𑀲𑀳𑀸𑀬𑁄; 𑀲𑁄 𑀦 𑀉𑀲𑁆𑀲𑀳𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼’𑀦𑁆𑀢𑀺 𑁋 𑀅𑀦𑀼𑀭𑀼𑀤𑁆𑀥𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀧𑀩𑁆𑀩𑀚𑀸𑀳𑀻’’𑀢𑀺. 𑀅𑀣 𑀔𑁄 𑀅𑀦𑀼𑀭𑀼𑀤𑁆𑀥𑁄 𑀲𑀓𑁆𑀓𑁄 𑀬𑁂𑀦 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀤𑁆𑀤𑀺𑀬𑀁 𑀲𑀓𑁆𑀬𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀫 𑀔𑁄, 𑀲𑀫𑁆𑀫, 𑀧𑀩𑁆𑀩𑀚𑁆𑀚𑀸 𑀢𑀯 𑀧𑀝𑀺𑀩𑀤𑁆𑀥𑀸’’𑀢𑀺. ‘‘𑀲𑀘𑁂 𑀢𑁂, 𑀲𑀫𑁆𑀫, 𑀧𑀩𑁆𑀩𑀚𑁆𑀚𑀸 𑀫𑀫 𑀧𑀝𑀺𑀩𑀤𑁆𑀥𑀸 𑀯𑀸 𑀅𑀧𑁆𑀧𑀝𑀺𑀩𑀤𑁆𑀥𑀸 𑀯𑀸 𑀲𑀸 𑀳𑁄𑀢𑀼, 𑀅𑀳𑀁 𑀢𑀬𑀸; 𑀬𑀣𑀸 𑀲𑀼𑀔𑀁 𑀧𑀩𑁆𑀩𑀚𑀸𑀳𑀻’’𑀢𑀺. ‘‘𑀏𑀳𑀺, 𑀲𑀫𑁆𑀫, 𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀦𑀸𑀳𑀁, 𑀲𑀫𑁆𑀫, 𑀲𑀓𑁆𑀓𑁄𑀫𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀦𑁆𑀢𑀺. 𑀬𑀁 𑀢𑁂 𑀲𑀓𑁆𑀓𑀸 𑀅𑀜𑁆𑀜𑀁 𑀫𑀬𑀸 𑀓𑀸𑀢𑀼𑀁, 𑀓𑁆𑀬𑀸𑀳𑀁 [𑀢𑁆𑀬𑀸𑀳𑀁 (𑀲𑀻. 𑀲𑁆𑀬𑀸.)] 𑀓𑀭𑀺𑀲𑁆𑀲𑀸𑀫𑀺. 𑀢𑁆𑀯𑀁 𑀧𑀩𑁆𑀩𑀚𑀸𑀳𑀻’’𑀢𑀺. ‘‘𑀫𑀸𑀢𑀸 𑀔𑁄 𑀫𑀁, 𑀲𑀫𑁆𑀫, 𑀏𑀯𑀫𑀸𑀳 𑁋 ‘𑀲𑀘𑁂, 𑀢𑀸𑀢 𑀅𑀦𑀼𑀭𑀼𑀤𑁆𑀥, 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀏𑀯𑀁 𑀢𑁆𑀯𑀫𑁆𑀧𑀺 𑀧𑀩𑁆𑀩𑀚𑀸𑀳𑀻’’’𑀢𑀺. ‘‘𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂, 𑀲𑀫𑁆𑀫, 𑀏𑀲𑀸 𑀯𑀸𑀘𑀸. 𑀲𑀘𑁂 𑀢𑁂, 𑀲𑀫𑁆𑀫, 𑀧𑀩𑁆𑀩𑀚𑁆𑀚𑀸 𑀫𑀫 𑀧𑀝𑀺𑀩𑀤𑁆𑀥𑀸 𑀯𑀸, 𑀅𑀧𑁆𑀧𑀝𑀺𑀩𑀤𑁆𑀥𑀸 𑀯𑀸 𑀲𑀸 𑀳𑁄𑀢𑀼, 𑀅𑀳𑀁 𑀢𑀬𑀸; 𑀬𑀣𑀸 𑀲𑀼𑀔𑀁 𑀧𑀩𑁆𑀩𑀚𑀸𑀳𑀻’’𑀢𑀺. ‘‘𑀏𑀳𑀺, 𑀲𑀫𑁆𑀫, 𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀲𑀘𑁆𑀘𑀯𑀸𑀤𑀺𑀦𑁄 𑀳𑁄𑀦𑁆𑀢𑀺, 𑀲𑀘𑁆𑀘𑀧𑀝𑀺𑀜𑁆𑀜𑀸. 𑀅𑀣 𑀔𑁄 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀅𑀦𑀼𑀭𑀼𑀤𑁆𑀥𑀁 𑀲𑀓𑁆𑀓𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀳𑀺, 𑀲𑀫𑁆𑀫, 𑀲𑀢𑁆𑀢𑀯𑀲𑁆𑀲𑀸𑀦𑀺. 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀢𑀺𑀘𑀺𑀭𑀁, 𑀲𑀫𑁆𑀫, 𑀲𑀢𑁆𑀢𑀯𑀲𑁆𑀲𑀸𑀦𑀺. 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀲𑀢𑁆𑀢𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼’’𑀦𑁆𑀢𑀺. ‘‘𑀆𑀕𑀫𑁂𑀳𑀺, 𑀲𑀫𑁆𑀫, 𑀙𑀯𑀲𑁆𑀲𑀸𑀦𑀺…𑀧𑁂… 𑀧𑀜𑁆𑀘𑀯𑀲𑁆𑀲𑀸𑀦𑀺… 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺… 𑀢𑀻𑀡𑀺 𑀯𑀲𑁆𑀲𑀸𑀦𑀺… 𑀤𑁆𑀯𑁂 𑀯𑀲𑁆𑀲𑀸𑀦𑀺… 𑀏𑀓𑀁 𑀯𑀲𑁆𑀲𑀁. 𑀏𑀓𑀲𑁆𑀲 𑀯𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀢𑀺𑀘𑀺𑀭𑀁, 𑀲𑀫𑁆𑀫, 𑀏𑀓𑀯𑀲𑁆𑀲𑀁. 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀏𑀓𑀁 𑀯𑀲𑁆𑀲𑀁 𑀆𑀕𑀫𑁂𑀢𑀼’’𑀦𑁆𑀢𑀺. ‘‘𑀆𑀕𑀫𑁂𑀳𑀺, 𑀲𑀫𑁆𑀫, 𑀲𑀢𑁆𑀢𑀫𑀸𑀲𑁂. 𑀲𑀢𑁆𑀢𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀉𑀪𑁄𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀢𑀺𑀘𑀺𑀭𑀁, 𑀲𑀫𑁆𑀫, 𑀲𑀢𑁆𑀢𑀫𑀸𑀲𑀸. 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀲𑀢𑁆𑀢𑀫𑀸𑀲𑁂 𑀆𑀕𑀫𑁂𑀢𑀼’’𑀦𑁆𑀢𑀺. ‘‘𑀆𑀕𑀫𑁂𑀳𑀺, 𑀲𑀫𑁆𑀫, 𑀙 𑀫𑀸𑀲𑁂…𑀧𑁂… 𑀧𑀜𑁆𑀘 𑀫𑀸𑀲𑁂… 𑀘𑀢𑁆𑀢𑀸𑀭𑁄 𑀫𑀸𑀲𑁂… 𑀢𑀬𑁄 𑀫𑀸𑀲𑁂… 𑀤𑁆𑀯𑁂 𑀫𑀸𑀲𑁂… 𑀏𑀓𑀁 𑀫𑀸𑀲𑀁… 𑀅𑀟𑁆𑀠𑀫𑀸𑀲𑀁. 𑀅𑀟𑁆𑀠𑀫𑀸𑀲𑀲𑁆𑀲 𑀅𑀘𑁆𑀘𑀬𑁂𑀦 𑀉𑀪𑁄𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀢𑀺𑀘𑀺𑀭𑀁, 𑀲𑀫𑁆𑀫, 𑀅𑀟𑁆𑀠𑀫𑀸𑀲𑁄. 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀅𑀟𑁆𑀠𑀫𑀸𑀲𑀁 𑀆𑀕𑀫𑁂𑀢𑀼’’𑀦𑁆𑀢𑀺. ‘‘𑀆𑀕𑀫𑁂𑀳𑀺, 𑀲𑀫𑁆𑀫, 𑀲𑀢𑁆𑀢𑀸𑀳𑀁 𑀬𑀸𑀯𑀸𑀳𑀁 𑀧𑀼𑀢𑁆𑀢𑁂 𑀘 𑀪𑀸𑀢𑀭𑁄 𑀘 𑀭𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀫𑀻’’𑀢𑀺. ‘‘𑀦 𑀘𑀺𑀭𑀁, 𑀲𑀫𑁆𑀫, 𑀲𑀢𑁆𑀢𑀸𑀳𑁄, 𑀆𑀕𑀫𑁂𑀲𑁆𑀲𑀸𑀫𑀻’’𑀢𑀺.

𑁩𑁩𑁧. 𑀅𑀣 𑀔𑁄 𑀪𑀤𑁆𑀤𑀺𑀬𑁄 𑀘 𑀲𑀓𑁆𑀬𑀭𑀸𑀚𑀸 𑀅𑀦𑀼𑀭𑀼𑀤𑁆𑀥𑁄 𑀘 𑀆𑀦𑀦𑁆𑀤𑁄 𑀘 𑀪𑀕𑀼 𑀘 𑀓𑀺𑀫𑀺𑀮𑁄 𑀘 𑀤𑁂𑀯𑀤𑀢𑁆𑀢𑁄 𑀘, 𑀉𑀧𑀸𑀮𑀺𑀓𑀧𑁆𑀧𑀓𑁂𑀦 𑀲𑀢𑁆𑀢𑀫𑀸, 𑀬𑀣𑀸 𑀧𑀼𑀭𑁂 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑀺, 𑀏𑀯𑀫𑁂𑀯 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀺𑀬𑁆𑀬𑀺𑀁𑀲𑀼. 𑀢𑁂 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀲𑁂𑀦𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀭𑀯𑀺𑀲𑀬𑀁 𑀑𑀓𑁆𑀓𑀫𑀺𑀢𑁆𑀯𑀸 𑀆𑀪𑀭𑀡𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀧𑀸𑀮𑀺𑀁 𑀓𑀧𑁆𑀧𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀳𑀦𑁆𑀤, 𑀪𑀡𑁂 𑀉𑀧𑀸𑀮𑀺, 𑀦𑀺𑀯𑀢𑁆𑀢𑀲𑁆𑀲𑀼; 𑀅𑀮𑀁 𑀢𑁂 𑀏𑀢𑁆𑀢𑀓𑀁 𑀚𑀻𑀯𑀺𑀓𑀸𑀬𑀸’’𑀢𑀺. 𑀅𑀣 𑀔𑁄 𑀉𑀧𑀸𑀮𑀺𑀲𑁆𑀲 𑀓𑀧𑁆𑀧𑀓𑀲𑁆𑀲 𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀘𑀡𑁆𑀟𑀸 𑀔𑁄 𑀲𑀸𑀓𑀺𑀬𑀸; 𑀇𑀫𑀺𑀦𑀸 𑀓𑀼𑀫𑀸𑀭𑀸 𑀦𑀺𑀧𑁆𑀧𑀸𑀢𑀺𑀢𑀸𑀢𑀺 𑀖𑀸𑀢𑀸𑀧𑁂𑀬𑁆𑀬𑀼𑀫𑁆𑀧𑀺 𑀫𑀁. 𑀇𑀫𑁂 𑀳𑀺 𑀦𑀸𑀫 𑀲𑀓𑁆𑀬𑀓𑀼𑀫𑀸𑀭𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀦𑁆𑀢𑀺. 𑀓𑀺𑀫𑀗𑁆𑀕 [𑀓𑀺𑀫𑀗𑁆𑀕 (𑀲𑀻.)] 𑀧𑀦𑀸𑀳’’𑀦𑁆𑀢𑀺. 𑀪𑀡𑁆𑀟𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀪𑀡𑁆𑀟𑀁 𑀭𑀼𑀓𑁆𑀔𑁂 𑀆𑀮𑀕𑁆𑀕𑁂𑀢𑁆𑀯𑀸 ‘𑀬𑁄 𑀧𑀲𑁆𑀲𑀢𑀺, 𑀤𑀺𑀦𑁆𑀦𑀁𑀬𑁂𑀯 𑀳𑀭𑀢𑀽’𑀢𑀺 𑀯𑀢𑁆𑀯𑀸 𑀬𑁂𑀦 𑀢𑁂 𑀲𑀓𑁆𑀬𑀓𑀼𑀫𑀸𑀭𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸𑀲𑀼𑀁 𑀔𑁄 𑀢𑁂 𑀲𑀓𑁆𑀬𑀓𑀼𑀫𑀸𑀭𑀸 𑀉𑀧𑀸𑀮𑀺𑀁 𑀓𑀧𑁆𑀧𑀓𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀉𑀧𑀸𑀮𑀺𑀁 𑀓𑀧𑁆𑀧𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲, 𑀪𑀡𑁂 𑀉𑀧𑀸𑀮𑀺, 𑀦𑀺𑀯𑀢𑁆𑀢𑁂𑀲𑀻’’𑀢𑀺? ‘‘𑀇𑀥 𑀫𑁂, 𑀅𑀬𑁆𑀬𑀧𑀼𑀢𑁆𑀢𑀸, 𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀘𑀡𑁆𑀟𑀸 𑀔𑁄 𑀲𑀸𑀓𑀺𑀬𑀸; 𑀇𑀫𑀺𑀦𑀸 𑀓𑀼𑀫𑀸𑀭𑀸 𑀦𑀺𑀧𑁆𑀧𑀸𑀢𑀺𑀢𑀸𑀢𑀺 𑀖𑀸𑀢𑀸𑀧𑁂𑀬𑁆𑀬𑀼𑀫𑁆𑀧𑀺 𑀫𑀁. 𑀇𑀫𑁂 𑀳𑀺 𑀦𑀸𑀫 𑀲𑀓𑁆𑀬𑀓𑀼𑀫𑀸𑀭𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀦𑁆𑀢𑀺. 𑀓𑀺𑀫𑀗𑁆𑀕 𑀧𑀦𑀸𑀳’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀅𑀬𑁆𑀬𑀧𑀼𑀢𑁆𑀢𑀸, 𑀪𑀡𑁆𑀟𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀁 𑀪𑀡𑁆𑀟𑀁 𑀭𑀼𑀓𑁆𑀔𑁂 𑀆𑀮𑀕𑁆𑀕𑁂𑀢𑁆𑀯𑀸 ‘𑀬𑁄 𑀧𑀲𑁆𑀲𑀢𑀺, 𑀤𑀺𑀦𑁆𑀦𑀜𑁆𑀜𑁂𑀯 𑀳𑀭𑀢𑀽’𑀢𑀺 𑀯𑀢𑁆𑀯𑀸 𑀢𑀢𑁄𑀫𑁆𑀳𑀺 𑀧𑀝𑀺𑀦𑀺𑀯𑀢𑁆𑀢𑁄’’𑀢𑀺. ‘‘𑀲𑀼𑀝𑁆𑀞𑀼, 𑀪𑀡𑁂 𑀉𑀧𑀸𑀮𑀺, 𑀅𑀓𑀸𑀲𑀺 𑀬𑀫𑁆𑀧𑀺 𑀦 𑀦𑀺𑀯𑀢𑁆𑀢𑁄 [𑀬𑀁 𑀦𑀺𑀯𑀢𑁆𑀢𑁄 (𑀲𑀻.), 𑀬𑀁 𑀧𑀦 𑀦𑀺𑀯𑀢𑁆𑀢𑁄 (𑀲𑁆𑀬𑀸.)]. 𑀘𑀡𑁆𑀟𑀸 𑀔𑁄 𑀲𑀸𑀓𑀺𑀬𑀸; 𑀇𑀫𑀺𑀦𑀸 𑀓𑀼𑀫𑀸𑀭𑀸 𑀦𑀺𑀧𑁆𑀧𑀸𑀢𑀺𑀢𑀸𑀢𑀺 𑀖𑀸𑀢𑀸𑀧𑁂𑀬𑁆𑀬𑀼𑀫𑁆𑀧𑀺 𑀢’’𑀦𑁆𑀢𑀺.

𑀅𑀣 𑀔𑁄 𑀲𑀓𑁆𑀬𑀓𑀼𑀫𑀸𑀭𑀸 𑀉𑀧𑀸𑀮𑀺𑀁 𑀓𑀧𑁆𑀧𑀓𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀲𑀓𑁆𑀬𑀓𑀼𑀫𑀸𑀭𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀁, 𑀪𑀦𑁆𑀢𑁂, 𑀲𑀸𑀓𑀺𑀬𑀸 𑀦𑀸𑀫 𑀫𑀸𑀦𑀲𑁆𑀲𑀺𑀦𑁄. 𑀅𑀬𑀁, 𑀪𑀦𑁆𑀢𑁂, 𑀉𑀧𑀸𑀮𑀺 𑀓𑀧𑁆𑀧𑀓𑁄 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀸𑀭𑀓𑁄. 𑀇𑀫𑀁 𑀪𑀕𑀯𑀸 𑀧𑀞𑀫𑀁 𑀧𑀩𑁆𑀩𑀸𑀚𑁂𑀢𑀼. 𑀇𑀫𑀲𑁆𑀲 𑀫𑀬𑀁 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫. 𑀏𑀯𑀁 𑀅𑀫𑁆𑀳𑀸𑀓𑀁 𑀲𑀸𑀓𑀺𑀬𑀸𑀦𑀁 𑀲𑀸𑀓𑀺𑀬𑀫𑀸𑀦𑁄 𑀦𑀺𑀫𑁆𑀫𑀸𑀦𑀸𑀬𑀺𑀲𑁆𑀲𑀢𑀻’’𑀢𑀺 [𑀦𑀺𑀫𑁆𑀫𑀸𑀤𑀬𑀺𑀲𑁆𑀲𑀢𑀻𑀢𑀺 (𑀲𑀻.), 𑀦𑀺𑀫𑁆𑀫𑀸𑀦𑀺𑀬𑀺𑀲𑁆𑀲𑀢𑀻𑀢𑀺 (𑀲𑁆𑀬𑀸.)].

𑀅𑀣 𑀔𑁄 𑀪𑀕𑀯𑀸 𑀉𑀧𑀸𑀮𑀺𑀁 𑀓𑀧𑁆𑀧𑀓𑀁 𑀧𑀞𑀫𑀁 𑀧𑀩𑁆𑀩𑀸𑀚𑁂𑀲𑀺, 𑀧𑀘𑁆𑀙𑀸 𑀢𑁂 𑀲𑀓𑁆𑀬𑀓𑀼𑀫𑀸𑀭𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀢𑁂𑀦𑁂𑀯 𑀅𑀦𑁆𑀢𑀭𑀯𑀲𑁆𑀲𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀸𑀲𑀺. 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀁 𑀉𑀧𑁆𑀧𑀸𑀤𑁂𑀲𑀺. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀸𑀓𑀸𑀲𑀺. 𑀤𑁂𑀯𑀤𑀢𑁆𑀢𑁄 𑀧𑁄𑀣𑀼𑀚𑁆𑀚𑀦𑀺𑀓𑀁 𑀇𑀤𑁆𑀥𑀺𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀲𑀺.

𑁩𑁩𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀪𑀤𑁆𑀤𑀺𑀬𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’𑀦𑁆𑀢𑀺. 𑀦𑀺𑀲𑁆𑀲𑀁𑀲𑀬𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀅𑀦𑀪𑀺𑀭𑀢𑁄𑀯 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀢𑀁𑀬𑁂𑀯 𑀯𑀸 𑀧𑀼𑀭𑀺𑀫𑀁 𑀭𑀚𑁆𑀚𑀲𑀼𑀔𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀪𑀤𑁆𑀤𑀺𑀬𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀪𑀤𑁆𑀤𑀺𑀬, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀪𑀤𑁆𑀤𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀪𑀤𑁆𑀤𑀺𑀬, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀪𑀤𑁆𑀤𑀺𑀬𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀪𑀤𑁆𑀤𑀺𑀬𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀤𑁆𑀤𑀺𑀬, 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺? ‘‘𑀏𑀯𑀁 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀪𑀤𑁆𑀤𑀺𑀬, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’’𑀦𑁆𑀢𑀺? ‘‘𑀧𑀼𑀩𑁆𑀩𑁂 𑀫𑁂, 𑀪𑀦𑁆𑀢𑁂, 𑀭𑀜𑁆𑀜𑁄 𑀲𑀢𑁄𑀧𑀺 𑀅𑀦𑁆𑀢𑁄𑀧𑀺 𑀅𑀦𑁆𑀢𑁂𑀧𑀼𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀳𑁄𑀢𑀺, 𑀩𑀳𑀺𑀧𑀺 𑀅𑀦𑁆𑀢𑁂𑀧𑀼𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀳𑁄𑀢𑀺, 𑀅𑀦𑁆𑀢𑁄𑀧𑀺 𑀦𑀕𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀳𑁄𑀢𑀺, 𑀩𑀳𑀺𑀧𑀺 𑀦𑀕𑀭𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀳𑁄𑀢𑀺, 𑀅𑀦𑁆𑀢𑁄𑀧𑀺 𑀚𑀦𑀧𑀤𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀳𑁄𑀢𑀺, 𑀩𑀳𑀺𑀧𑀺 𑀚𑀦𑀧𑀤𑁂 𑀭𑀓𑁆𑀔𑀸 𑀲𑀼𑀲𑀁𑀯𑀺𑀳𑀺𑀢𑀸 𑀳𑁄𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀏𑀯𑀁 𑀭𑀓𑁆𑀔𑀺𑀢𑁄𑀧𑀺 𑀕𑁄𑀧𑀺𑀢𑁄𑀧𑀺 𑀲𑀦𑁆𑀢𑁄 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀯𑀺𑀳𑀭𑀸𑀫𑀺. 𑀏𑀢𑀭𑀳𑀺 𑀔𑁄 𑀧𑀦 𑀅𑀳𑀁 𑀏𑀓𑁄, 𑀪𑀦𑁆𑀢𑁂, 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀻𑀢𑁄 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀲𑁆𑀲𑀗𑁆𑀓𑀻 𑀅𑀦𑀼𑀢𑁆𑀭𑀲𑁆𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀻𑀢𑀺. 𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀅𑀭𑀜𑁆𑀜𑀕𑀢𑁄𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁄𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁄𑀧𑀺 𑀅𑀪𑀺𑀓𑁆𑀔𑀡𑀁 𑀉𑀤𑀸𑀦𑀁 𑀉𑀤𑀸𑀦𑁂𑀫𑀺 𑁋 ‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀉𑀤𑀸. 𑁨𑁦] ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸, 𑀇𑀢𑀺 𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀯𑀺𑀕𑀢𑀪𑀬𑀁 𑀲𑀼𑀔𑀺𑀁 𑀅𑀲𑁄𑀓𑀁, 𑀤𑁂𑀯𑀸 𑀦𑀸𑀦𑀼𑀪𑀯𑀦𑁆𑀢𑀺 𑀤𑀲𑁆𑀲𑀦𑀸𑀬𑀸’’𑀢𑀺.

𑀤𑁂𑀯𑀤𑀢𑁆𑀢𑀯𑀢𑁆𑀣𑀼

𑁩𑁩𑁩. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀺𑀬𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀓𑁄𑀲𑀫𑁆𑀩𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀓𑁄𑀲𑀫𑁆𑀩𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀓𑀁 𑀦𑀼 𑀔𑁄 𑀅𑀳𑀁 𑀧𑀲𑀸𑀤𑁂𑀬𑁆𑀬𑀁, 𑀬𑀲𑁆𑀫𑀺𑀁 𑀫𑁂 𑀧𑀲𑀦𑁆𑀦𑁂 𑀩𑀳𑀼𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺? 𑀅𑀣 𑀔𑁄 𑀤𑁂𑀯𑀤𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀢𑀭𑀼𑀡𑁄 𑀘𑁂𑀯 𑀆𑀬𑀢𑀺𑀁 𑀪𑀤𑁆𑀤𑁄 𑀘. 𑀬𑀁𑀦𑀽𑀦𑀸𑀳𑀁 𑀅𑀚𑀸𑀢𑀲𑀢𑁆𑀢𑀼𑀁 𑀓𑀼𑀫𑀸𑀭𑀁 𑀧𑀲𑀸𑀤𑁂𑀬𑁆𑀬𑀁. 𑀢𑀲𑁆𑀫𑀺𑀁 𑀫𑁂 𑀧𑀲𑀦𑁆𑀦𑁂 𑀩𑀳𑀼𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀲𑀓𑀯𑀡𑁆𑀡𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀓𑀼𑀫𑀸𑀭𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀅𑀳𑀺𑀫𑁂𑀔𑀮𑀺𑀓𑀸𑀬 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀉𑀘𑁆𑀙𑀗𑁆𑀕𑁂 [𑀉𑀘𑁆𑀘𑀗𑁆𑀓𑁂 (𑀲𑁆𑀬𑀸.)] 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀪𑀻𑀢𑁄 𑀅𑀳𑁄𑀲𑀺, 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀅𑀚𑀸𑀢𑀲𑀢𑁆𑀢𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀪𑀸𑀬𑀲𑀺 𑀫𑀁 𑀢𑁆𑀯𑀁 𑀓𑀼𑀫𑀸𑀭𑀸’’𑀢𑀺? ‘‘𑀆𑀫, 𑀪𑀸𑀬𑀸𑀫𑀺. 𑀓𑁄𑀲𑀺 𑀢𑁆𑀯’’𑀦𑁆𑀢𑀺? ‘‘𑀅𑀳𑀁 𑀤𑁂𑀯𑀤𑀢𑁆𑀢𑁄’’𑀢𑀺. ‘‘𑀲𑀘𑁂 𑀔𑁄 𑀢𑁆𑀯𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀤𑁂𑀯𑀤𑀢𑁆𑀢𑁄, 𑀇𑀗𑁆𑀖 𑀲𑀓𑁂𑀦𑁂𑀯 𑀯𑀡𑁆𑀡𑁂𑀦 𑀧𑀸𑀢𑀼𑀪𑀯𑀲𑁆𑀲𑀽’’𑀢𑀺. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑁄 𑀓𑀼𑀫𑀸𑀭𑀓𑀯𑀡𑁆𑀡𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀭𑁄 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀅𑀣 𑀔𑁄 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀤𑁂𑀯𑀤𑀢𑁆𑀢𑀲𑁆𑀲 𑀇𑀫𑀺𑀦𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀪𑀺𑀧𑁆𑀧𑀲𑀦𑁆𑀦𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀻𑀬𑀢𑀺. 𑀅𑀣 𑀔𑁄 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀇𑀘𑁆𑀙𑀸𑀕𑀢𑀁 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀯 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲𑀸 𑀇𑀤𑁆𑀥𑀺𑀬𑀸 𑀧𑀭𑀺𑀳𑀸𑀬𑀺.

[𑀅. 𑀦𑀺. 𑁫.𑁧𑁦𑁦] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀓𑀼𑀥𑁄 𑀦𑀸𑀫 𑀓𑁄𑀴𑀺𑀬𑀧𑀼𑀢𑁆𑀢𑁄, 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀉𑀧𑀝𑁆𑀞𑀸𑀓𑁄, 𑀅𑀥𑀼𑀦𑀸 𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄. 𑀢𑀲𑁆𑀲 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑁄 𑀳𑁄𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 [𑀫𑀸𑀕𑀥𑀺𑀓𑀸𑀦𑀺 (𑀲𑁆𑀬𑀸.)] 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺. 𑀲𑁄 𑀢𑁂𑀦 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑁂𑀦 𑀦𑁂𑀯 𑀅𑀢𑁆𑀢𑀸𑀦𑀁 𑀦 𑀧𑀭𑀁 𑀩𑁆𑀬𑀸𑀩𑀸𑀥𑁂𑀢𑀺. 𑀅𑀣 𑀔𑁄 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀯𑀤𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀲𑁆𑀲 [𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑀲𑁆𑀲 (𑀓.)] 𑀏𑀯𑀭𑀽𑀧𑀁 𑀇𑀘𑁆𑀙𑀸𑀕𑀢𑀁 𑀉𑀧𑁆𑀧𑀚𑁆𑀚𑀺 𑁋 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺. 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀯 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲𑀸 𑀇𑀤𑁆𑀥𑀺𑀬𑀸 𑀧𑀭𑀺𑀳𑀻𑀦𑁄’’𑀢𑀺. 𑀇𑀤𑀫𑀯𑁄𑀘 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄. 𑀇𑀤𑀁 𑀯𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀓𑀼𑀥𑁄 𑀦𑀸𑀫, 𑀪𑀦𑁆𑀢𑁂, 𑀓𑁄𑀴𑀺𑀬𑀧𑀼𑀢𑁆𑀢𑁄 𑀫𑀫 𑀉𑀧𑀝𑁆𑀞𑀸𑀓𑁄 𑀅𑀥𑀼𑀦𑀸 𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀫𑀦𑁄𑀫𑀬𑀁 𑀓𑀸𑀬𑀁 𑀉𑀧𑀧𑀦𑁆𑀦𑁄. 𑀢𑀲𑁆𑀲 𑀏𑀯𑀭𑀽𑀧𑁄 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑁄 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀫𑀸𑀕𑀥𑀓𑀸𑀦𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺. 𑀲𑁄 𑀢𑁂𑀦 𑀅𑀢𑁆𑀢𑀪𑀸𑀯𑀧𑁆𑀧𑀝𑀺𑀮𑀸𑀪𑁂𑀦 𑀦𑁂𑀯 𑀅𑀢𑁆𑀢𑀸𑀦𑀁 𑀦 𑀧𑀭𑀁 𑀩𑁆𑀬𑀸𑀩𑀸𑀥𑁂𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀤𑁂𑀯𑀤𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀲𑁆𑀲 𑀏𑀯𑀭𑀽𑀧𑀁 𑀇𑀘𑁆𑀙𑀸𑀕𑀢𑀁 𑀉𑀧𑁆𑀧𑀚𑁆𑀚𑀺 𑁋 𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺. 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀯 𑀪𑀦𑁆𑀢𑁂, 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲𑀸 𑀇𑀤𑁆𑀥𑀺𑀬𑀸 𑀧𑀭𑀺𑀳𑀻𑀦𑁄’𑀢𑀺. 𑀇𑀤𑀫𑀯𑁄𑀘, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄. 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀻’’𑀢𑀺.

‘‘𑀓𑀺𑀁 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄? 𑀬𑀁 𑀓𑀺𑀜𑁆𑀘𑀺 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀪𑀸𑀲𑀢𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸’’𑀢𑀺? ‘‘𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑀘 𑀫𑁂, 𑀪𑀦𑁆𑀢𑁂, 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄. 𑀬𑀁 𑀓𑀺𑀜𑁆𑀘𑀺 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄 𑀪𑀸𑀲𑀢𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸’’𑀢𑀺. ‘‘𑀭𑀓𑁆𑀔𑀲𑁆𑀲𑁂𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀯𑀸𑀘𑀁. 𑀭𑀓𑁆𑀔𑀲𑁆𑀲𑁂𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀯𑀸𑀘𑀁. 𑀇𑀤𑀸𑀦𑀺 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑀺𑀲𑁆𑀲𑀢𑀺.

𑀧𑀜𑁆𑀘𑀲𑀢𑁆𑀣𑀼𑀓𑀣𑀸

𑁩𑁩𑁪. [𑀅. 𑀦𑀺. 𑁫.𑁧𑁦𑁦] ‘‘𑀧𑀜𑁆𑀘𑀺𑀫𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? ‘‘𑀇𑀥, 𑀫𑁄𑀕𑁆𑀕𑀮𑁆𑀮𑀸𑀦, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫? 𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦 𑁋 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺, 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀻𑀮𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀲𑀻𑀮𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺 [𑀧𑀘𑁆𑀘𑀸𑀲𑀺𑀁𑀲𑀢𑀺 (𑀲𑀻. 𑀲𑁆𑀬𑀸.)].

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄 𑀧𑀭𑀺𑀬𑁄𑀤𑀸𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄’𑀢𑀺 𑀘. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑁄 𑀫𑁂 𑀆𑀚𑀻𑀯𑁄 𑀧𑀭𑀺𑀬𑁄𑀤𑀸𑀢𑁄 𑀅𑀲𑀁𑀓𑀺𑀮𑀺𑀝𑁆𑀞𑁄’𑀢𑀺 𑀘. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫? 𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦 𑁋 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺, 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀆𑀚𑀻𑀯𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀆𑀚𑀻𑀯𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀸 𑀫𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑁄𑀤𑀸𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀸’𑀢𑀺 𑀘. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀸 𑀫𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑁄𑀤𑀸𑀢𑀸 𑀅𑀲𑀁𑀓𑀺𑀮𑀺𑀝𑁆𑀞𑀸’𑀢𑀺 𑀘. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫? 𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦 𑁋 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺, 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀥𑀫𑁆𑀫𑀤𑁂𑀲𑀦𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀥𑀫𑁆𑀫𑀤𑁂𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀯𑁂𑀬𑁆𑀬𑀸𑀓𑀭𑀡𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀯𑁂𑀬𑁆𑀬𑀸𑀓𑀭𑀡𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫? 𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦 𑁋 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺, 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀯𑁂𑀬𑁆𑀬𑀸𑀓𑀭𑀡𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀯𑁂𑀬𑁆𑀬𑀸𑀓𑀭𑀡𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀢𑀫𑁂𑀦𑀁 𑀲𑀸𑀯𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀲𑀢𑁆𑀣𑀸 𑀅𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀢𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀫𑀬𑀜𑁆𑀘𑁂𑀯 𑀔𑁄 𑀧𑀦 𑀕𑀺𑀳𑀻𑀦𑀁 𑀆𑀭𑁄𑀘𑁂𑀬𑁆𑀬𑀸𑀫, 𑀦𑀸𑀲𑁆𑀲𑀲𑁆𑀲 𑀫𑀦𑀸𑀧𑀁. 𑀬𑀁 𑀔𑁄 𑀧𑀦𑀲𑁆𑀲 𑀅𑀫𑀦𑀸𑀧𑀁, 𑀓𑀣𑀁 𑀦𑀁 𑀫𑀬𑀁 𑀢𑁂𑀦 𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀫? 𑀲𑀫𑁆𑀫𑀦𑁆𑀦𑀢𑀺 𑀔𑁄 𑀧𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦 𑁋 𑀬𑀁 𑀢𑀼𑀫𑁄 𑀓𑀭𑀺𑀲𑁆𑀲𑀢𑀺, 𑀢𑀼𑀫𑁄𑀯 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺. 𑀏𑀯𑀭𑀽𑀧𑀁 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀦𑁆𑀢𑀺; 𑀏𑀯𑀭𑀽𑀧𑁄 𑀘 𑀧𑀦 𑀲𑀢𑁆𑀣𑀸 𑀲𑀸𑀯𑀓𑁂𑀳𑀺 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀢𑀻𑀢𑀺. 𑀇𑀫𑁂 𑀔𑁄, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀜𑁆𑀘 𑀲𑀢𑁆𑀣𑀸𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁.

‘‘𑀅𑀳𑀁 𑀔𑁄 𑀧𑀦, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀦 𑀘 𑀫𑀁 𑀲𑀸𑀯𑀓𑀸 𑀲𑀻𑀮𑀢𑁄 𑀭𑀓𑁆𑀔𑀦𑁆𑀢𑀺; 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀲𑀻𑀮𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀫𑀸𑀦𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑁄 𑀲𑀫𑀸𑀦𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀸𑀦𑁄…𑀧𑁂… 𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄 𑀲𑀫𑀸𑀦𑁄 ‘𑀧𑀭𑀺𑀲𑀼𑀤𑁆𑀥𑀜𑀸𑀡𑀤𑀲𑁆𑀲𑀦𑁄𑀫𑁆𑀳𑀻’𑀢𑀺 𑀧𑀝𑀺𑀚𑀸𑀦𑀸𑀫𑀺 ‘𑀧𑀭𑀺𑀲𑀼𑀤𑁆𑀥𑀁 𑀫𑁂 𑀜𑀸𑀡𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀁 𑀅𑀲𑀁𑀓𑀺𑀮𑀺𑀝𑁆𑀞’𑀦𑁆𑀢𑀺 𑀘. 𑀦 𑀘 𑀫𑀁 𑀲𑀸𑀯𑀓𑀸 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀦𑁆𑀢𑀺; 𑀦 𑀘𑀸𑀳𑀁 𑀲𑀸𑀯𑀓𑁂𑀳𑀺 𑀜𑀸𑀡𑀤𑀲𑁆𑀲𑀦𑀢𑁄 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀸𑀫𑀻’’𑀢𑀺.

𑁩𑁩𑁫. 𑀅𑀣 𑀔𑁄 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀯𑀤𑀢𑁆𑀢𑀲𑁆𑀲, 𑀪𑀦𑁆𑀢𑁂, 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺; 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀻𑀬𑀢𑀻’’𑀢𑀺. ‘‘𑀫𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀺𑀳𑀬𑀺𑀢𑁆𑀣. 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀻𑀬𑀺𑀲𑁆𑀲𑀢𑀺, 𑀳𑀸𑀦𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀟𑁆𑀠𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲 𑀦𑀸𑀲𑀸𑀬 𑀧𑀺𑀢𑁆𑀢𑀁 𑀪𑀺𑀦𑁆𑀤𑁂𑀬𑁆𑀬𑀼𑀁, 𑀏𑀯𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀭𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀡𑁆𑀟𑀢𑀭𑁄 𑀅𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀸𑀯𑀓𑀻𑀯𑀜𑁆𑀘 𑀤𑁂𑀯𑀤𑀢𑁆𑀢𑀲𑁆𑀲 𑀅𑀚𑀸𑀢𑀲𑀢𑁆𑀢𑀼 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀭𑀣𑀲𑀢𑁂𑀳𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀢𑀺, 𑀧𑀜𑁆𑀘 𑀘 𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀻𑀬𑀺𑀲𑁆𑀲𑀢𑀺, 𑀳𑀸𑀦𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀯𑀼𑀟𑁆𑀠𑀺.

[𑀲𑀁. 𑀦𑀺. 𑁨.𑁧𑁮𑁪; 𑀅. 𑀦𑀺. 𑁪.𑁬𑁮] ‘‘𑀅𑀢𑁆𑀢𑀯𑀥𑀸𑀬, 𑀪𑀺𑀓𑁆𑀔𑀯𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀤𑀮𑀻 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑁂𑀴𑀼 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀦𑀴𑁄 𑀅𑀢𑁆𑀢𑀯𑀥𑀸𑀬 𑀨𑀮𑀁 𑀤𑁂𑀢𑀺, 𑀧𑀭𑀸𑀪𑀯𑀸𑀬 𑀨𑀮𑀁 𑀤𑁂𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀢𑀭𑀻 𑀅𑀢𑁆𑀢𑀯𑀥𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀸𑀪𑀯𑀸𑀬 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀥𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀺, 𑀧𑀭𑀸𑀪𑀯𑀸𑀬 𑀤𑁂𑀯𑀤𑀢𑁆𑀢𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀉𑀤𑀧𑀸𑀤𑀻’’𑀢𑀺.

[𑀲𑀁. 𑀦𑀺. 𑁧.𑁧𑁮𑁩, 𑁧.𑁨.𑁧𑁮𑁪, 𑀦𑁂𑀢𑁆𑀢𑀺. 𑁯𑁦] ‘‘𑀨𑀮𑀁 𑀯𑁂 𑀓𑀤𑀮𑀺𑀁 𑀳𑀦𑁆𑀢𑀺, 𑀨𑀮𑀁 𑀯𑁂𑀴𑀼𑀁 𑀨𑀮𑀁 𑀦𑀴𑀁;

𑀲𑀓𑁆𑀓𑀸𑀭𑁄 𑀓𑀸𑀧𑀼𑀭𑀺𑀲𑀁 𑀳𑀦𑁆𑀢𑀺, 𑀕𑀩𑁆𑀪𑁄 𑀅𑀲𑁆𑀲𑀢𑀭𑀺𑀁 𑀬𑀣𑀸’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.