𑁮. 𑀤𑁆𑀯𑁂𑀪𑀺𑀓𑁆𑀔𑀼𑀯𑀸𑀭𑀏𑀓𑀸𑀤𑀲𑀓𑀁

𑁧𑁮𑁧. ‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 [𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑀸𑀦𑀁 (𑀲𑀻.)] 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀯𑁂𑀫𑀢𑀺𑀓𑀸 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀫𑀺𑀲𑁆𑀲𑀓𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀫𑀺𑀲𑁆𑀲𑀓𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀫𑀺𑀲𑁆𑀲𑀓𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀫𑀺𑀲𑁆𑀲𑀓𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀫𑀺𑀲𑁆𑀲𑀓𑁂 𑀫𑀺𑀲𑁆𑀲𑀓𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀼𑀤𑁆𑀥𑀓𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀼𑀤𑁆𑀥𑀓𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀉𑀪𑁄𑀧𑀺 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀸.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀼𑀤𑁆𑀥𑀓𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀼𑀤𑁆𑀥𑀓𑁂 𑀲𑀼𑀤𑁆𑀥𑀓𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀉𑀪𑁄𑀧𑀺 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀸.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑀲𑁆𑀲 𑀳𑁄𑀢𑀺 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺, 𑀏𑀓𑀲𑁆𑀲 𑀳𑁄𑀢𑀺 𑀦 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺. 𑀲𑁄 𑀧𑀞𑀫𑀫𑁆𑀧𑀺 𑀬𑀸𑀫𑀁 𑀙𑀸𑀤𑁂𑀢𑀺, 𑀤𑀼𑀢𑀺𑀬𑀫𑁆𑀧𑀺 𑀬𑀸𑀫𑀁 𑀙𑀸𑀤𑁂𑀢𑀺, 𑀢𑀢𑀺𑀬𑀫𑁆𑀧𑀺 𑀬𑀸𑀫𑀁 𑀙𑀸𑀤𑁂𑀢𑀺 𑁋 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀙𑀦𑁆𑀦𑀸 𑀳𑁄𑀢𑀺 𑀆𑀧𑀢𑁆𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀢𑁂 𑀕𑀘𑁆𑀙𑀦𑁆𑀢𑀺 𑀆𑀭𑁄𑀘𑁂𑀲𑁆𑀲𑀸𑀫𑀸𑀢𑀺. 𑀏𑀓𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀓𑁆𑀔𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺. 𑀲𑁄 𑀧𑀞𑀫𑀫𑁆𑀧𑀺 𑀬𑀸𑀫𑀁 𑀙𑀸𑀤𑁂𑀢𑀺, 𑀤𑀼𑀢𑀺𑀬𑀫𑁆𑀧𑀺 𑀬𑀸𑀫𑀁 𑀙𑀸𑀤𑁂𑀢𑀺, 𑀢𑀢𑀺𑀬𑀫𑁆𑀧𑀺 𑀬𑀸𑀫𑀁 𑀙𑀸𑀤𑁂𑀢𑀺 𑁋 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀙𑀦𑁆𑀦𑀸 𑀳𑁄𑀢𑀺 𑀆𑀧𑀢𑁆𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀢𑁂 𑀉𑀫𑁆𑀫𑀢𑁆𑀢𑀓𑀸 𑀳𑁄𑀦𑁆𑀢𑀺. 𑀢𑁂 𑀧𑀘𑁆𑀙𑀸 𑀅𑀦𑀼𑀫𑁆𑀫𑀢𑁆𑀢𑀓𑀸 𑀳𑀼𑀢𑁆𑀯𑀸 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

‘‘𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀧𑀸𑀢𑀺𑀫𑁄𑀓𑁆𑀔𑁂 𑀉𑀤𑁆𑀤𑀺𑀲𑁆𑀲𑀫𑀸𑀦𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀇𑀤𑀸𑀦𑁂𑀯 𑀔𑁄 𑀫𑀬𑀁 𑀚𑀸𑀦𑀸𑀫 𑁋 𑀅𑀬𑀫𑁆𑀧𑀺 𑀓𑀺𑀭 𑀥𑀫𑁆𑀫𑁄 𑀲𑀼𑀢𑁆𑀢𑀸𑀕𑀢𑁄 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀻’𑀢𑀺. 𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀏𑀓𑁄 𑀙𑀸𑀤𑁂𑀢𑀺, 𑀏𑀓𑁄 𑀦𑀘𑁆𑀙𑀸𑀤𑁂𑀢𑀺. 𑀬𑁄 𑀙𑀸𑀤𑁂𑀢𑀺 𑀲𑁄 𑀤𑀼𑀓𑁆𑀓𑀝𑀁 𑀤𑁂𑀲𑀸𑀧𑁂𑀢𑀩𑁆𑀩𑁄. 𑀬𑀣𑀸𑀧𑀝𑀺𑀘𑁆𑀙𑀦𑁆𑀦𑁂 𑀘𑀲𑁆𑀲 𑀧𑀭𑀺𑀯𑀸𑀲𑀁 𑀤𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀫𑀸𑀦𑀢𑁆𑀢𑀁 𑀤𑀸𑀢𑀩𑁆𑀩𑀁.

𑀤𑁆𑀯𑁂𑀪𑀺𑀓𑁆𑀔𑀼𑀯𑀸𑀭𑀏𑀓𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.