𑁧. 𑀧𑀞𑀫𑀪𑀸𑀡𑀯𑀸𑀭𑁄

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼

𑁪𑁦𑁨. [𑀅. 𑀦𑀺. 𑁮.𑁫𑁧 𑀇𑀤𑀁 𑀯𑀢𑁆𑀣𑀼 𑀆𑀕𑀢𑀁] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 [𑀫𑀳𑀸𑀧𑀚𑀸𑀧𑀢𑀻 (𑀲𑀻. 𑀲𑁆𑀬𑀸.)] 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀕𑁄𑀢𑀫𑀺, 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀫𑀳𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀕𑁄𑀢𑀫𑀺, 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑁋 𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀦𑁆𑀢𑀺 𑁋 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀪𑀕𑀯𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀓𑁂𑀲𑁂 𑀙𑁂𑀤𑀸𑀧𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀲𑀫𑁆𑀩𑀳𑀼𑀮𑀸𑀳𑀺 𑀲𑀸𑀓𑀺𑀬𑀸𑀦𑀻𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀯𑁂𑀲𑀸𑀮𑀻 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀺𑀁 𑀤𑀼𑀫𑁆𑀫𑀦𑀁 𑀅𑀲𑁆𑀲𑀼𑀫𑀼𑀔𑀺𑀁 𑀭𑀼𑀤𑀫𑀸𑀦𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀁. 𑀤𑀺𑀲𑁆𑀯𑀸𑀦 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀕𑁄𑀢𑀫𑀺, 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀸’’𑀢𑀺? ‘‘𑀢𑀣𑀸 𑀳𑀺 𑀧𑀦, 𑀪𑀦𑁆𑀢𑁂 𑀆𑀦𑀦𑁆𑀤, 𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑁄𑀢𑀫𑀺, 𑀫𑀼𑀳𑀼𑀢𑁆𑀢𑀁 𑀇𑀥𑁂𑀯 𑀢𑀸𑀯 𑀳𑁄𑀳𑀺, 𑀬𑀸𑀯𑀸𑀳𑀁 𑀪𑀕𑀯𑀦𑁆𑀢𑀁 𑀬𑀸𑀘𑀸𑀫𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀲𑀽𑀦𑁂𑀳𑀺 𑀧𑀸𑀤𑁂𑀳𑀺 𑀭𑀚𑁄𑀓𑀺𑀡𑁆𑀡𑁂𑀦 𑀕𑀢𑁆𑀢𑁂𑀦 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑀸 𑀅𑀲𑁆𑀲𑀼𑀫𑀼𑀔𑀻 𑀭𑀼𑀤𑀫𑀸𑀦𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀸 𑁋 𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀆𑀦𑀦𑁆𑀤, 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. ‘‘𑀅𑀮𑀁, 𑀆𑀦𑀦𑁆𑀤, 𑀫𑀸 𑀢𑁂 𑀭𑀼𑀘𑁆𑀘𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 [𑀅. 𑀦𑀺. 𑁮.𑁫𑁧 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀻’’𑀢𑀺 𑀆𑀕𑀢𑀁] 𑁋 ‘‘𑀦 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁; 𑀬𑀁𑀦𑀽𑀦𑀸𑀳𑀁 𑀅𑀜𑁆𑀜𑁂𑀦𑀧𑀺 𑀧𑀭𑀺𑀬𑀸𑀬𑁂𑀦 𑀪𑀕𑀯𑀦𑁆𑀢𑀁 𑀬𑀸𑀘𑁂𑀬𑁆𑀬𑀁 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀩𑁆𑀩𑁄 𑀦𑀼 𑀔𑁄, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 [𑀲𑀓𑀺𑀤𑀸𑀕𑀸𑀫𑀺𑀨𑀮𑀁 (𑀲𑁆𑀬𑀸.)] 𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀯𑀸 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺? ‘‘𑀪𑀩𑁆𑀩𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀲𑀓𑀤𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀭𑀳𑀢𑁆𑀢𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀪𑀩𑁆𑀩𑁄 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀲𑀓𑀤𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀅𑀭𑀳𑀢𑁆𑀢𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀸𑀢𑀼𑀁; 𑀩𑀳𑀽𑀧𑀓𑀸𑀭𑀸, 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀢𑁄 𑀫𑀸𑀢𑀼𑀘𑁆𑀙𑀸 𑀆𑀧𑀸𑀤𑀺𑀓𑀸, 𑀧𑁄𑀲𑀺𑀓𑀸, 𑀔𑀻𑀭𑀲𑁆𑀲 𑀤𑀸𑀬𑀺𑀓𑀸, 𑀪𑀕𑀯𑀦𑁆𑀢𑀁 𑀚𑀦𑁂𑀢𑁆𑀢𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀣𑀜𑁆𑀜𑀁 𑀧𑀸𑀬𑁂𑀲𑀺; 𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑁂𑀬𑁆𑀬 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚’’𑀦𑁆𑀢𑀺.

𑀅𑀝𑁆𑀞𑀕𑀭𑀼𑀥𑀫𑁆𑀫𑀸

𑁪𑁦𑁩. ‘‘𑀲𑀘𑁂, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀸𑀯𑀲𑁆𑀲𑀸. 𑀳𑁄𑀢𑀼 𑀉𑀧𑀲𑀫𑁆𑀧𑀤𑀸.

[𑀧𑀸𑀘𑀺. 𑁧𑁪𑁯] ‘‘𑀯𑀲𑁆𑀲𑀲𑀢𑀽𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 [𑀕𑀭𑀼𑀁𑀓𑀢𑁆𑀯𑀸 (𑀓.)] 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀦 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀅𑀦𑁆𑀯𑀤𑁆𑀥𑀫𑀸𑀲𑀁 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀤𑁆𑀯𑁂 𑀥𑀫𑁆𑀫𑀸 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸 𑁋 𑀉𑀧𑁄𑀲𑀣𑀧𑀼𑀘𑁆𑀙𑀓𑀜𑁆𑀘, 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀜𑁆𑀘. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀯𑀲𑁆𑀲𑀁𑀯𑀼𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀢𑀻𑀳𑀺 𑀞𑀸𑀦𑁂𑀳𑀺 𑀧𑀯𑀸𑀭𑁂𑀢𑀩𑁆𑀩𑀁 𑁋 𑀤𑀺𑀝𑁆𑀞𑁂𑀦 𑀯𑀸, 𑀲𑀼𑀢𑁂𑀦 𑀯𑀸, 𑀧𑀭𑀺𑀲𑀗𑁆𑀓𑀸𑀬 𑀯𑀸. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀤𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀦 𑀪𑀺𑀓𑁆𑀔𑀼𑀦𑀺𑀬𑀸 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀪𑀺𑀓𑁆𑀔𑀼 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑀺𑀪𑀸𑀲𑀺𑀢𑀩𑁆𑀩𑁄. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀅𑀚𑁆𑀚𑀢𑀕𑁆𑀕𑁂 𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄, 𑀅𑀦𑁄𑀯𑀝𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀲𑀼 𑀯𑀘𑀦𑀧𑀣𑁄. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀲𑀘𑁂, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀸𑀯𑀲𑁆𑀲𑀸 𑀳𑁄𑀢𑀼 𑀉𑀧𑀲𑀫𑁆𑀧𑀤𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀉𑀕𑁆𑀕𑀳𑁂𑀢𑁆𑀯𑀸 𑀬𑁂𑀦 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀲𑀺, 𑀲𑀸𑀯 𑀢𑁂 𑀪𑀯𑀺𑀲𑁆𑀲𑀢𑀺 𑀉𑀧𑀲𑀫𑁆𑀧𑀤𑀸.

‘‘𑀯𑀲𑁆𑀲𑀲𑀢𑀽𑀧𑀲𑀫𑁆𑀧𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀲𑀓𑁆𑀓𑀢𑁆𑀯𑀸 𑀕𑀭𑀼𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄.

‘‘𑀲𑀘𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀲𑀺, 𑀲𑀸𑀯 𑀢𑁂 𑀪𑀯𑀺𑀲𑁆𑀲𑀢𑀺 𑀉𑀧𑀲𑀫𑁆𑀧𑀤𑀸’’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂 𑀆𑀦𑀦𑁆𑀤, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄, 𑀬𑀼𑀯𑀸, 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀲𑀻𑀲𑀁𑀦𑀳𑀸𑀢𑁄 𑀉𑀧𑁆𑀧𑀮𑀫𑀸𑀮𑀁 𑀯𑀸 𑀯𑀲𑁆𑀲𑀺𑀓𑀫𑀸𑀮𑀁 𑀯𑀸 𑀅𑀢𑀺𑀫𑀼𑀢𑁆𑀢𑀓𑀫𑀸𑀮𑀁 [𑀅𑀥𑀺𑀫𑀢𑁆𑀢𑀓𑀫𑀸𑀮𑀁 (𑀲𑁆𑀬𑀸.)] 𑀯𑀸 𑀮𑀪𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀸𑀧𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀅𑀳𑀁, 𑀪𑀦𑁆𑀢𑁂, 𑀆𑀦𑀦𑁆𑀤 𑀇𑀫𑁂 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁂’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀕𑁆𑀕𑀳𑀺𑀢𑀸, 𑀪𑀦𑁆𑀢𑁂, 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸, 𑀉𑀧𑀲𑀫𑁆𑀧𑀦𑁆𑀦𑀸 𑀪𑀕𑀯𑀢𑁄 𑀫𑀸𑀢𑀼𑀘𑁆𑀙𑀸’’𑀢𑀺.

‘‘𑀲𑀘𑁂, 𑀆𑀦𑀦𑁆𑀤, 𑀦𑀸𑀮𑀪𑀺𑀲𑁆𑀲 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀯𑀺𑀲𑁆𑀲, 𑀯𑀲𑁆𑀲𑀲𑀳𑀲𑁆𑀲𑀁 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬. 𑀬𑀢𑁄 𑀘 𑀔𑁄, 𑀆𑀦𑀦𑁆𑀤, 𑀫𑀸𑀢𑀼𑀕𑀸𑀫𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀦 𑀤𑀸𑀦𑀺, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀪𑀯𑀺𑀲𑁆𑀲𑀢𑀺. 𑀧𑀜𑁆𑀘𑁂𑀯 𑀤𑀸𑀦𑀺, 𑀆𑀦𑀦𑁆𑀤, 𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀞𑀲𑁆𑀲𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀬𑀸𑀦𑀺 𑀓𑀸𑀦𑀺𑀘𑀺 𑀓𑀼𑀮𑀸𑀦𑀺 𑀩𑀳𑀼𑀢𑁆𑀣𑀺𑀓𑀸𑀦𑀺 [𑀩𑀳𑀼𑀇𑀢𑁆𑀣𑀺𑀓𑀸𑀦𑀺 (𑀲𑀻. 𑀲𑁆𑀬𑀸.)] 𑀅𑀧𑁆𑀧𑀧𑀼𑀭𑀺𑀲𑀓𑀸𑀦𑀺, 𑀢𑀸𑀦𑀺 𑀲𑀼𑀧𑁆𑀧𑀥𑀁𑀲𑀺𑀬𑀸𑀦𑀺 𑀳𑁄𑀦𑁆𑀢𑀺 𑀘𑁄𑀭𑁂𑀳𑀺 𑀓𑀼𑀫𑁆𑀪𑀣𑁂𑀦𑀓𑁂𑀳𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀮𑀪𑀢𑀺 𑀫𑀸𑀢𑀼𑀕𑀸𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀦 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀲𑀫𑁆𑀧𑀦𑁆𑀦𑁂 𑀲𑀸𑀮𑀺𑀓𑁆𑀔𑁂𑀢𑁆𑀢𑁂 𑀲𑁂𑀢𑀝𑁆𑀝𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀺 𑀦𑀺𑀧𑀢𑀢𑀺, 𑀏𑀯𑀁 𑀢𑀁 𑀲𑀸𑀮𑀺𑀓𑁆𑀔𑁂𑀢𑁆𑀢𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀮𑀪𑀢𑀺 𑀫𑀸𑀢𑀼𑀕𑀸𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀦 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀲𑀫𑁆𑀧𑀦𑁆𑀦𑁂 𑀉𑀘𑁆𑀙𑀼𑀓𑁆𑀔𑁂𑀢𑁆𑀢𑁂 𑀫𑀜𑁆𑀚𑀺𑀝𑁆𑀞𑀺𑀓𑀸 [𑀫𑀜𑁆𑀚𑁂𑀝𑁆𑀞𑀺𑀓𑀸 (𑀲𑀻. 𑀲𑁆𑀬𑀸.)] 𑀦𑀸𑀫 𑀭𑁄𑀕𑀚𑀸𑀢𑀺 𑀦𑀺𑀧𑀢𑀢𑀺, 𑀏𑀯𑀁 𑀢𑀁 𑀉𑀘𑁆𑀙𑀼𑀓𑁆𑀔𑁂𑀢𑁆𑀢𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀬𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀮𑀪𑀢𑀺 𑀫𑀸𑀢𑀼𑀕𑀸𑀫𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀁, 𑀦 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀼𑀭𑀺𑀲𑁄 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀝𑀺𑀓𑀘𑁆𑀘𑁂𑀯 𑀆𑀴𑀺𑀁 𑀩𑀦𑁆𑀥𑁂𑀬𑁆𑀬 𑀬𑀸𑀯𑀤𑁂𑀯 𑀉𑀤𑀓𑀲𑁆𑀲 𑀅𑀦𑀢𑀺𑀓𑁆𑀓𑀫𑀦𑀸𑀬; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀸 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑀸’’𑀢𑀺.

𑀪𑀺𑀓𑁆𑀔𑀼𑀦𑀻𑀦𑀁 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀁

𑁪𑁦𑁪. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀇𑀫𑀸𑀲𑀼 𑀲𑀸𑀓𑀺𑀬𑀸𑀦𑀻𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺.

𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀬𑁆𑀬𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀸, 𑀫𑀬𑀜𑁆𑀘𑀫𑁆𑀳𑀸 𑀉𑀧𑀲𑀫𑁆𑀧𑀦𑁆𑀦𑀸; 𑀏𑀯𑀜𑁆𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’𑀢𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸 𑀫𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑁆𑀬𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀸, 𑀫𑀬𑀜𑁆𑀘𑀫𑁆𑀳𑀸 𑀉𑀧𑀲𑀫𑁆𑀧𑀦𑁆𑀦𑀸; 𑀏𑀯𑀜𑁆𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀧𑀚𑀸𑀧𑀢𑀺, 𑀪𑀦𑁆𑀢𑁂, 𑀕𑁄𑀢𑀫𑀻 𑀏𑀯𑀫𑀸𑀳 𑁋 ‘𑀇𑀫𑀸 𑀫𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 𑀅𑀬𑁆𑀬𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀸, 𑀫𑀬𑀜𑁆𑀘𑀫𑁆𑀳𑀸 𑀉𑀧𑀲𑀫𑁆𑀧𑀦𑁆𑀦𑀸; 𑀏𑀯𑀜𑁆𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸’’’𑀢𑀺.

‘‘𑀬𑀤𑀕𑁆𑀕𑁂𑀦, 𑀆𑀦𑀦𑁆𑀤, 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸 𑀧𑀝𑀺𑀕𑁆𑀕𑀳𑀺𑀢𑀸, 𑀢𑀤𑁂𑀯 𑀲𑀸 [𑀢𑀤𑁂𑀯𑀲𑁆𑀲𑀸 (𑀓.)] 𑀉𑀧𑀲𑀫𑁆𑀧𑀦𑁆𑀦𑀸’’𑀢𑀺.

𑁪𑁦𑁫. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀳𑀸𑀧𑀚𑀸𑀧𑀢𑀺, 𑀪𑀦𑁆𑀢𑁂, 𑀕𑁄𑀢𑀫𑀻 𑀏𑀯𑀫𑀸𑀳 𑁋 ‘𑀏𑀓𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀦𑁆𑀢𑀁 𑀯𑀭𑀁 𑀬𑀸𑀘𑀸𑀫𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫’’’𑀦𑁆𑀢𑀺.

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀅𑀦𑀼𑀚𑀸𑀦𑁂𑀬𑁆𑀬 𑀫𑀸𑀢𑀼𑀕𑀸𑀫𑀲𑁆𑀲 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁. 𑀇𑀫𑁂𑀳𑀺 𑀦𑀸𑀫, 𑀆𑀦𑀦𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀸 𑀫𑀸𑀢𑀼𑀕𑀸𑀫𑀲𑁆𑀲 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀓𑀭𑀺𑀲𑁆𑀲𑀦𑁆𑀢𑀺; 𑀓𑀺𑀫𑀗𑁆𑀕𑀁 𑀧𑀦 𑀢𑀣𑀸𑀕𑀢𑁄 𑀅𑀦𑀼𑀚𑀸𑀦𑀺𑀲𑁆𑀲𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫’’𑀦𑁆𑀢𑀺?

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀸𑀦𑀺 𑀢𑀸𑀦𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸𑀦𑀺, 𑀓𑀣𑀁 𑀫𑀬𑀁, 𑀪𑀦𑁆𑀢𑁂, 𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺? ‘‘𑀬𑀸𑀦𑀺 𑀢𑀸𑀦𑀺, 𑀕𑁄𑀢𑀫𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸𑀦𑀺, 𑀬𑀣𑀸 𑀪𑀺𑀓𑁆𑀔𑀽 𑀲𑀺𑀓𑁆𑀔𑀦𑁆𑀢𑀺 𑀢𑀣𑀸 𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀣𑀸’’𑀢𑀺. ‘‘𑀬𑀸𑀦𑀺 𑀧𑀦 𑀢𑀸𑀦𑀺, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺, 𑀓𑀣𑀁 𑀫𑀬𑀁, 𑀪𑀦𑁆𑀢𑁂, 𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺? ‘‘𑀬𑀸𑀦𑀺 𑀢𑀸𑀦𑀺, 𑀕𑁄𑀢𑀫𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸𑀦𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀣𑀸’’𑀢𑀺.

𑁪𑁦𑁬. [𑀅. 𑀦𑀺. 𑁮.𑁫𑁩] 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑀸 𑀯𑀽𑀧𑀓𑀝𑁆𑀞𑀸 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑀻 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. ‘‘𑀬𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀭𑀸𑀕𑀸𑀬, 𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀲𑀜𑁆𑀜𑁄𑀕𑀸𑀬, 𑀆𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑀘𑀬𑀸𑀬, 𑀫𑀳𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬, 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀦𑁆𑀢𑀼𑀝𑁆𑀞𑀺𑀬𑀸, 𑀲𑀗𑁆𑀕𑀡𑀺𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀧𑀯𑀺𑀯𑁂𑀓𑀸𑀬, 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀸𑀬, 𑀤𑀼𑀩𑁆𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀼𑀪𑀭𑀢𑀸𑀬; 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 𑀦𑁂𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀯𑀺𑀦𑀬𑁄, 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺. 𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺 𑁋 𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀭𑀸𑀕𑀸𑀬, 𑀯𑀺𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀜𑁆𑀜𑁄𑀕𑀸𑀬, 𑀅𑀧𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀆𑀘𑀬𑀸𑀬, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀫𑀳𑀺𑀘𑁆𑀙𑀢𑀸𑀬, 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀲𑀦𑁆𑀢𑀼𑀝𑁆𑀞𑀺𑀬𑀸, 𑀧𑀯𑀺𑀯𑁂𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀗𑁆𑀕𑀡𑀺𑀓𑀸𑀬, 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀓𑁄𑀲𑀚𑁆𑀚𑀸𑀬, 𑀲𑀼𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀤𑀼𑀩𑁆𑀪𑀭𑀢𑀸𑀬; 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄, 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺.

𑁪𑁦𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀉𑀤𑁆𑀤𑀺𑀲𑀻𑀬𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀚𑀸𑀬𑀸𑀬𑁄 𑀇𑀫𑀸 𑀇𑀫𑁂𑀲𑀁, 𑀚𑀸𑀭𑀺𑀬𑁄 𑀇𑀫𑀸 𑀇𑀫𑁂𑀲𑀁, 𑀇𑀤𑀸𑀦𑀺 𑀇𑀫𑁂 𑀇𑀫𑀸𑀳𑀺 𑀲𑀤𑁆𑀥𑀺𑀁 𑀅𑀪𑀺𑀭𑀫𑀺𑀲𑁆𑀲𑀦𑁆𑀢𑀻’’𑀢𑀺! 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀚𑀸𑀦𑀦𑁆𑀢𑀺 𑁋 ‘‘𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀘𑀺𑀓𑁆𑀔𑀺𑀢𑀼𑀁 𑁋 ‘𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’’𑀢𑀺.

𑁪𑁦𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀓𑀭𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑀸 𑀆𑀧𑀢𑁆𑀢𑀺 𑀦 𑀧𑀝𑀺𑀓𑀸𑀢𑀩𑁆𑀩𑀸. 𑀬𑀸 𑀦 𑀧𑀝𑀺𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀚𑀸𑀦𑀦𑁆𑀢𑀺 𑁋 ‘‘𑀏𑀯𑀁 𑀆𑀧𑀢𑁆𑀢𑀺 𑀧𑀝𑀺𑀓𑀸𑀢𑀩𑁆𑀩𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀘𑀺𑀓𑁆𑀔𑀺𑀢𑀼𑀁 𑁋 ‘𑀏𑀯𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑁂𑀬𑁆𑀬𑀸𑀣𑀸’’’𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀭𑀣𑀺𑀓𑀸𑀬𑀧𑀺 𑀩𑁆𑀬𑀽𑀳𑁂𑀧𑀺 𑀲𑀺𑀗𑁆𑀖𑀸𑀝𑀓𑁂𑀧𑀺 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀧𑀢𑁆𑀢𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀚𑀸𑀬𑀸𑀬𑁄 𑀇𑀫𑀸 𑀇𑀫𑁂𑀲𑀁, 𑀚𑀸𑀭𑀺𑀬𑁄 𑀇𑀫𑀸 𑀇𑀫𑁂𑀲𑀁, 𑀭𑀢𑁆𑀢𑀺𑀁 𑀯𑀺𑀫𑀸𑀦𑁂𑀢𑁆𑀯𑀸 𑀇𑀤𑀸𑀦𑀺 𑀔𑀫𑀸𑀧𑁂𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀬𑁄 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀚𑀸𑀦𑀦𑁆𑀢𑀺 𑁋 ‘‘𑀏𑀯𑀁 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀘𑀺𑀓𑁆𑀔𑀺𑀢𑀼𑀁 𑁋 ‘𑀏𑀯𑀁 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀣𑀸’’’𑀢𑀺.

𑁪𑁦𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀦 𑀓𑀭𑀺𑀬𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀢𑀓𑀫𑁆𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀭𑀣𑀺𑀓𑀸𑀬𑀧𑀺 𑀩𑁆𑀬𑀽𑀳𑁂𑀧𑀺 𑀲𑀺𑀗𑁆𑀖𑀸𑀝𑀓𑁂𑀧𑀺 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀧𑀢𑁆𑀢𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀔𑀫𑀸𑀧𑁂𑀦𑁆𑀢𑀺 ‘𑀏𑀯𑀁 𑀦𑀽𑀦 𑀓𑀸𑀢𑀩𑁆𑀩’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸. 𑀫𑀦𑀼𑀲𑁆𑀲𑀸 𑀢𑀣𑁂𑀯 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀚𑀸𑀬𑀸𑀬𑁄 𑀇𑀫𑀸 𑀇𑀫𑁂𑀲𑀁, 𑀚𑀸𑀭𑀺𑀬𑁄 𑀇𑀫𑀸 𑀇𑀫𑁂𑀲𑀁, 𑀭𑀢𑁆𑀢𑀺𑀁 𑀯𑀺𑀫𑀸𑀦𑁂𑀢𑁆𑀯𑀸 𑀇𑀤𑀸𑀦𑀺 𑀔𑀫𑀸𑀧𑁂𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀚𑀸𑀦𑀦𑁆𑀢𑀺 𑁋 ‘‘𑀏𑀯𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀘𑀺𑀓𑁆𑀔𑀺𑀢𑀼𑀁 𑁋 ‘𑀏𑀯𑀁 𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀣𑀸’’’𑀢𑀺.

𑁪𑁧𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀲𑀗𑁆𑀖𑀫𑀚𑁆𑀛𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀻𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀦𑁆𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀤𑀺𑀲𑁆𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑁄 𑀓𑀫𑁆𑀫𑀧𑁆𑀧𑀢𑁆𑀢𑀸𑀬𑁄𑀧𑀺 𑀆𑀧𑀢𑁆𑀢𑀺𑀕𑀸𑀫𑀺𑀦𑀺𑀬𑁄𑀧𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑀸𑀯 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀼, 𑀅𑀬𑁆𑀬𑀸𑀯 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀼; 𑀏𑀯𑀜𑁆𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀦𑀺𑀬𑁆𑀬𑀸𑀤𑁂𑀢𑀼𑀁 𑁋 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀓𑀫𑁆𑀫𑀁 𑀓𑀸𑀢𑀼𑀁, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀦𑀺𑀬𑁆𑀬𑀸𑀤𑁂𑀢𑀼𑀁, 𑀪𑀺𑀓𑁆𑀔𑀼𑀦𑀻𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀧𑀢𑁆𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑁂𑀯𑀸𑀲𑀺𑀦𑀻 𑀪𑀺𑀓𑁆𑀔𑀼𑀦𑀻 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀸 𑀳𑁄𑀢𑀺 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻. 𑀢𑀲𑁆𑀲𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑀺𑀬𑀸 𑀕𑀳𑀺𑀢𑁄 𑀕𑀳𑀺𑀢𑁄 𑀫𑀼𑀲𑁆𑀲𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑁋 ‘‘𑀪𑀕𑀯𑀸 𑀓𑀺𑀭 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑀼𑀓𑀸𑀫𑁄’’𑀢𑀺. 𑀅𑀣 𑀔𑁄 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁 𑀅𑀦𑀼𑀩𑀦𑁆𑀥𑀺𑀁 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻. 𑀢𑀲𑁆𑀲𑀸 𑀫𑁂 𑀫𑀼𑀝𑁆𑀞𑀲𑁆𑀲𑀢𑀺𑀦𑀺𑀬𑀸 𑀕𑀳𑀺𑀢𑁄 𑀕𑀳𑀺𑀢𑁄 𑀫𑀼𑀲𑁆𑀲𑀢𑀺. 𑀤𑀼𑀓𑁆𑀓𑀭𑀁 𑀔𑁄 𑀧𑀦 𑀫𑀸𑀢𑀼𑀕𑀸𑀫𑁂𑀦 𑀬𑀸𑀯𑀚𑀻𑀯𑀁 𑀲𑀢𑁆𑀣𑀸𑀭𑀁 𑀅𑀦𑀼𑀩𑀦𑁆𑀥𑀺𑀢𑀼𑀁. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀦𑀬𑀁 𑀯𑀸𑀘𑁂𑀢𑀼’’𑀦𑁆𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.