𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁨-𑁩. 𑀔𑀦𑁆𑀥𑀬𑀫𑀓𑁂 …𑀧𑁂… 𑀧𑀭𑀺𑀜𑁆𑀜𑀸 𑀘 𑀯𑀢𑁆𑀢𑀩𑁆𑀩𑀸𑀢𑀺 𑀇𑀤𑀁 𑀧𑀥𑀸𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀤𑀲𑁆𑀲𑀦𑀁. 𑀅𑀪𑀺𑀜𑁆𑀜𑁂𑀬𑁆𑀬𑀓𑀣𑀸 𑀳𑀺 𑀅𑀪𑀺𑀥𑀫𑁆𑀫𑁄, 𑀲𑀸 𑀘 𑀬𑀸𑀯𑀤𑁂𑀯 𑀧𑀭𑀺𑀜𑁆𑀜𑀢𑁆𑀢𑀸𑀢𑀺 𑀧𑀭𑀺𑀜𑁆𑀜𑀸𑀲𑀼 𑀘 𑀦 𑀯𑀺𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸, 𑀢𑀻𑀭𑀡𑀜𑁆𑀘 𑀲𑀫𑁆𑀧𑀼𑀡𑁆𑀡𑀧𑀭𑀸𑀦𑀼𑀕𑁆𑀕𑀳𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀓𑀸𑀮𑀧𑀼𑀕𑁆𑀕𑀮𑁄𑀓𑀸𑀲𑀯𑀺𑀪𑀸𑀕𑀫𑀼𑀔𑁂𑀦 𑀔𑀦𑁆𑀥𑀸𑀦𑀁 𑀯𑀺𑀲𑀼𑀁 𑀲𑀳 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀯𑀲𑁂𑀦 𑀲𑀸𑀢𑀺𑀲𑀬𑀁 𑀲𑀫𑁆𑀪𑀯𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀙𑀲𑀼 𑀓𑀸𑀮𑀪𑁂𑀤𑁂𑀲𑀼…𑀧𑁂… 𑀧𑀭𑀺𑀜𑁆𑀜𑀸 𑀘 𑀯𑀢𑁆𑀢𑀩𑁆𑀩𑀸’’𑀢𑀺 𑀧𑀥𑀸𑀦𑀁 𑀯𑀢𑁆𑀢𑀩𑁆𑀩𑀁 𑀉𑀤𑁆𑀥𑀭𑀢𑀺. 𑀢𑀢𑁆𑀣 𑀧𑀦 𑀬𑀣𑀸 𑀦 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀯𑀺𑀦𑀸 𑀧𑀳𑀸𑀦𑀧𑀭𑀺𑀜𑁆𑀜𑀸, 𑀏𑀯𑀁 𑀢𑀻𑀭𑀡𑀧𑀭𑀺𑀜𑁆𑀜𑀸 𑀯𑀺𑀦𑀸 𑀜𑀸𑀢𑀧𑀭𑀺𑀜𑁆𑀜𑀸𑀬. 𑀲𑀸 𑀘 𑀲𑀼𑀢𑀫𑀬𑀜𑀸𑀡𑀫𑀽𑀮𑀺𑀓𑀸𑀢𑀺 𑀤𑁂𑀲𑀦𑀸𑀓𑀼𑀲𑀮𑁄 𑀲𑀢𑁆𑀣𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀫𑀼𑀤𑀸𑀬𑀸𑀯𑀬𑀯𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦 𑀔𑀦𑁆𑀥𑁂𑀲𑀼 𑀧𑀭𑀺𑀜𑁆𑀜𑀸𑀧𑁆𑀧𑀪𑁂𑀤𑀁 𑀧𑀓𑀸𑀲𑁂𑀢𑀼𑀓𑀸𑀫𑁄 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀆𑀭𑀪𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀧𑀦 𑀔𑀦𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀳𑀺 𑀧𑀤𑁂𑀳𑀻𑀢𑀺 𑀧𑀜𑁆𑀘𑀳𑀺 𑀲𑀫𑀼𑀤𑀸𑀬𑀧𑀤𑁂𑀳𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀫𑀼𑀤𑀸𑀬𑀸𑀯𑀬𑀯𑀧𑀤𑁂𑀲𑀼. 𑀥𑀫𑁆𑀫𑁄𑀢𑀺 𑀭𑀼𑀧𑁆𑀧𑀦𑀸𑀤𑀺𑀓𑁄 𑀜𑁂𑀬𑁆𑀬𑀥𑀫𑁆𑀫𑁄. 𑀲𑀫𑀼𑀤𑀸𑀬𑀧𑀤𑀲𑁆𑀲𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀲𑀫𑀼𑀤𑀸𑀬𑀧𑀤𑀲𑁆𑀲. 𑀬𑀤𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀧𑀭𑀫𑀢𑁆𑀣𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀦𑀢𑁆𑀣𑀺, 𑀬𑀣𑀸 𑀧𑀦 𑀅𑀯𑀬𑀯𑁄 𑀲𑀫𑀼𑀤𑀸𑀬𑁄 𑀦 𑀳𑁄𑀢𑀺, 𑀏𑀯𑀁 𑀦 𑀲𑀫𑀼𑀤𑀸𑀬𑁄𑀧𑀺 𑀅𑀯𑀬𑀯𑁄𑀢𑀺 𑀲𑀢𑀺𑀧𑀺 𑀲𑀫𑀼𑀤𑀸𑀬𑀸𑀯𑀬𑀯𑀸𑀦𑀁 𑀪𑁂𑀤𑁂 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄 𑀅𑀢𑁆𑀣𑁂𑀯𑀸𑀪𑁂𑀤𑁄𑀢𑀺 𑀧𑀤𑀤𑁆𑀯𑀬𑀲𑁆𑀲 𑀲𑀫𑀸𑀦𑀢𑁆𑀣𑀢𑀸𑀬 𑀲𑀺𑀬𑀸 𑀆𑀲𑀗𑁆𑀓𑀸𑀢𑀺 𑀆𑀳 ‘‘𑀏𑀢𑀲𑁆𑀫𑀺𑀁 𑀲𑀁𑀲𑀬𑀝𑁆𑀞𑀸𑀦𑁂’’𑀢𑀺. ‘‘𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀻𑀲𑀼 𑀏𑀓𑀤𑁂𑀲𑁄 𑀲𑀫𑀼𑀤𑀸𑀬𑀧𑀤𑀢𑁆𑀣𑁄 𑀯𑀼𑀢𑁆𑀢𑁄, ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁨) 𑀧𑀦 𑀲𑀓𑀮𑁄𑀢𑀺 𑀆𑀳 ‘‘𑀭𑀽𑀧𑀸𑀤𑀺…𑀧𑁂… 𑀅𑀢𑁆𑀣𑁄’’𑀢𑀺. 𑀅𑀯𑀬𑀯𑀧𑀤𑀸𑀦𑀜𑁆𑀘𑁂𑀢𑁆𑀣 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀯𑀺𑀲𑀬𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬 𑀲𑀫𑀼𑀤𑀸𑀬𑀧𑀤𑀢𑁆𑀣𑀢𑀸 𑀯𑀼𑀢𑁆𑀢𑀸, 𑀢𑀢𑁄 𑀏𑀯 𑀲𑀫𑀼𑀤𑀸𑀬𑀧𑀤𑀸𑀦𑀫𑁆𑀧𑀺 𑀅𑀯𑀬𑀯𑀧𑀤𑀢𑁆𑀣𑀢𑀸. 𑀦 𑀳𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀅𑀘𑁆𑀘𑀦𑁆𑀢𑀁 𑀪𑁂𑀤𑁄 𑀅𑀪𑁂𑀤𑁄 𑀯𑀸 𑀇𑀘𑁆𑀙𑀺𑀢𑁄, 𑀅𑀣 𑀔𑁄 𑀪𑁂𑀤𑀸𑀪𑁂𑀤𑁄, 𑀢𑀲𑁆𑀫𑀸 𑀅𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀧𑀞𑀫𑀦𑀬𑁄 𑀯𑀼𑀢𑁆𑀢𑁄, 𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀤𑀼𑀢𑀺𑀬𑀦𑀬𑁄. 𑀬𑁄 𑀳𑀺 𑀭𑀼𑀧𑁆𑀧𑀦𑀸𑀤𑀺𑀲𑀗𑁆𑀔𑀸𑀢𑁄 𑀭𑀸𑀲𑀝𑁆𑀞𑁄 𑀅𑀯𑀬𑀯𑀧𑀤𑁂𑀳𑀺 𑀭𑀽𑀧𑀸𑀤𑀺𑀲𑀤𑁆𑀤𑁂𑀳𑀺 𑀘 𑀔𑀦𑁆𑀥𑀲𑀤𑁆𑀤𑁂𑀦 𑀘 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁄, 𑀲𑁆𑀯𑀸𑀬𑀁 𑀅𑀢𑁆𑀣𑀢𑁄 𑀭𑀸𑀲𑀺𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑁄 𑀭𑀼𑀧𑁆𑀧𑀦𑀸𑀤𑀺𑀅𑀢𑁆𑀣𑁄 𑀏𑀯𑀸𑀢𑀺.

𑀬𑀣𑀸 𑀅𑀯𑀬𑀯𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀲𑀫𑀼𑀤𑀸𑀬𑀧𑀤𑀲𑁆𑀲 𑀅𑀢𑁆𑀣𑁄 𑀳𑁄𑀢𑀺, 𑀏𑀯𑀁 𑀲𑀫𑀼𑀤𑀸𑀬𑀧𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀅𑀯𑀬𑀯𑀧𑀤𑀲𑁆𑀲 𑀅𑀢𑁆𑀣𑁄𑀢𑀺 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀤𑀲𑁄𑀥𑀦𑀸 𑀓𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺…𑀧𑁂… 𑀧𑀤𑀲𑁄𑀥𑀦𑀯𑀸𑀭𑁄 𑀯𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀏𑀓𑀘𑁆𑀘𑀲𑁆𑀲 𑀅𑀯𑀬𑀯𑀧𑀤𑀲𑁆𑀲 𑀅𑀜𑁆𑀜𑀢𑁆𑀣 𑀯𑀼𑀢𑁆𑀢𑀺𑀬𑀸 𑀅𑀯𑀬𑀯𑀧𑀤𑀢𑁆𑀣𑀲𑁆𑀲 𑀲𑀫𑀼𑀤𑀸𑀬𑀧𑀤𑀢𑁆𑀣𑀢𑀸𑀬 𑀲𑀺𑀬𑀸 𑀅𑀦𑁂𑀓𑀦𑁆𑀢𑀺𑀓𑀢𑀸, 𑀲𑀫𑀼𑀤𑀸𑀬𑀧𑀤𑀲𑁆𑀲 𑀧𑀦 𑀢𑀁 𑀦𑀢𑁆𑀣𑀻𑀢𑀺 𑀲𑀫𑀼𑀤𑀸𑀬𑀧𑀤𑀢𑁆𑀣𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀢𑀸𑀬 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑁄 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺 𑀧𑀸𑀴𑀺𑀬𑀸 𑀧𑀓𑀸𑀲𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀸𑀤𑀺…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺.

‘‘𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 𑀔𑀦𑁆𑀥𑀢𑁆𑀣𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀥𑀸𑀦𑀪𑀽𑀢𑀲𑁆𑀲 𑀔𑀦𑁆𑀥𑀧𑀤𑀲𑁆𑀲𑀸’’𑀢𑀺. 𑀯𑁂𑀤𑀦𑀸𑀤𑀺𑀉𑀧𑀧𑀤𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀢𑁄 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼. 𑀭𑀽𑀧𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲𑀸𑀢𑀺 𑀭𑀽𑀧𑀲𑀗𑁆𑀔𑀸𑀢𑁂𑀦 𑀅𑀯𑀬𑀯𑀧𑀤𑁂𑀦 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀔𑀦𑁆𑀥𑀢𑁆𑀣𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀪𑀸𑀯𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀭𑀽𑀧𑀓𑁆𑀔𑀦𑁆𑀥𑀧𑀤𑁂. 𑀧𑀥𑀸𑀦𑀪𑀽𑀢𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑀲𑁆𑀲 𑀭𑀼𑀧𑁆𑀧𑀦𑀝𑁆𑀞𑀲𑁆𑀲 𑀓𑀺𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀫𑀸𑀦𑁂 𑀅𑀯𑀬𑀯𑀧𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂 𑀅𑀧𑁆𑀧𑀥𑀸𑀦𑁂𑀦 𑀧𑀤𑁂𑀦 𑀬𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀲𑁄 𑀓𑀲𑁆𑀫𑀸 𑀧𑀥𑀸𑀦𑁂𑀦 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀯𑀼𑀢𑁆𑀢𑁄 𑀥𑀫𑁆𑀫𑁄𑀢𑀺 𑀭𑀸𑀲𑀝𑁆𑀞𑀫𑀸𑀳. 𑀢𑀢𑁆𑀣 𑀓𑁄𑀘𑀻𑀢𑀺 𑀭𑀼𑀧𑁆𑀧𑀦𑀝𑁆𑀞𑁄. 𑀓𑁂𑀦𑀘𑀺 𑀲𑀫𑀼𑀤𑀸𑀬𑀧𑀤𑁂𑀦𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀧𑀤𑁂𑀦, 𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀧𑀤𑁂𑀦. 𑀢𑁂𑀦𑀸𑀳 ‘‘𑀦 𑀲𑀩𑁆𑀩𑁄 𑀲𑀩𑁆𑀩𑁂𑀦𑀸’’𑀢𑀺. 𑀏𑀲 𑀦𑀬𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼. 𑀭𑀽𑀧𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑀧𑀤𑀲𑁄𑀥𑀦𑀫𑀼𑀔𑁂𑀦 𑀢𑀢𑁆𑀣 𑀘 𑀘𑀢𑀼𑀓𑁆𑀔𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀸 𑀧𑀸𑀴𑀺𑀕𑀢𑀺 𑀧𑀤𑀲𑁄𑀥𑀦𑀫𑀽𑀮𑀘𑀓𑁆𑀓𑀯𑀸𑀭𑁄. 𑀏𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦𑀸𑀢𑀺 𑀇𑀫𑀺𑀦𑀸 𑀬𑁆𑀯𑀸𑀬𑀁 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀲𑀫𑀼𑀤𑀸𑀬𑀧𑀤𑁂𑀳𑀺 𑀘 𑀤𑀲𑁆𑀲𑀺𑀢𑀸𑀓𑀸𑀭𑁄 𑀅𑀢𑁆𑀣𑀯𑀺𑀲𑁂𑀲𑁄, 𑀢𑀁 𑀧𑀘𑁆𑀘𑀸𑀫𑀲𑀢𑀺. 𑀯𑀺𑀲𑁂𑀲𑀦𑀪𑀸𑀯𑁄 𑀪𑁂𑀤𑀓𑀢𑀸𑀬 𑀲𑀸𑀫𑀜𑁆𑀜𑀢𑁄 𑀅𑀯𑀘𑁆𑀙𑁂𑀤𑀓𑀢𑁆𑀢𑀸, 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀅𑀪𑁂𑀤𑀬𑁄𑀕𑁂𑀦 𑀪𑁂𑀤𑀦𑁆𑀢𑀭𑀢𑁄 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸, 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀢𑁂𑀲𑀁 𑀪𑁂𑀤𑀸𑀪𑁂𑀤𑀸𑀦𑀁 𑀏𑀓𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸.

𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀫𑀸𑀦𑀸𑀥𑀺𑀓𑀭𑀡𑁂. 𑀢𑁂𑀦𑀸𑀢𑀺 𑀯𑀸 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦. 𑀏𑀢𑁆𑀣𑀸𑀢𑀺 𑀭𑀽𑀧𑀓𑁆𑀔𑀦𑁆𑀥𑀧𑀤𑁂. 𑀬𑀣𑀸 𑀦𑀻𑀮𑀼𑀧𑁆𑀧𑀮𑀧𑀤𑁂 𑀉𑀧𑁆𑀧𑀮𑀯𑀺𑀲𑁂𑀲𑀦𑀪𑀽𑀢𑀁 𑀦𑀻𑀮𑀁 𑀯𑀺𑀲𑀺𑀝𑁆𑀞𑀫𑁂𑀯 𑀳𑁄𑀢𑀺, 𑀦 𑀬𑀁 𑀓𑀺𑀜𑁆𑀘𑀺, 𑀏𑀯𑀫𑀺𑀥𑀸𑀧𑀺 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑀁 𑀭𑀽𑀧𑀫𑁆𑀧𑀺 𑀯𑀺𑀲𑀺𑀝𑁆𑀞𑀫𑁂𑀯 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀁 𑀔𑀦𑁆𑀥𑀢𑁄…𑀧𑁂… 𑀳𑁄𑀢𑀻’’𑀢𑀺 𑀆𑀳. 𑀢𑀣𑀸 ‘‘𑀭𑀽𑀧𑀜𑁆𑀘 𑀢𑀁 𑀔𑀦𑁆𑀥𑁄 𑀘𑀸’’𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦𑁂𑀯 𑀬𑀁 𑀭𑀽𑀧𑀁, 𑀲𑁄 𑀔𑀦𑁆𑀥𑁄. 𑀬𑁄 𑀔𑀦𑁆𑀥𑁄, 𑀢𑀁 𑀭𑀽𑀧𑀦𑁆𑀢𑀺 𑀅𑀬𑀫𑁆𑀧𑀺 𑀆𑀧𑀦𑁆𑀦𑁄 𑀏𑀯𑀸𑀢𑀺 𑀆𑀳 ‘‘𑀲𑀩𑁆𑀩𑁂𑀯…𑀧𑁂… 𑀯𑀺𑀲𑁂𑀲𑀺𑀢𑀩𑁆𑀩𑀸’’𑀢𑀺. 𑀯𑀺𑀲𑁂𑀲𑀦𑁂𑀦 𑀘 𑀦𑀸𑀫 𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀁 𑀅𑀯𑀘𑁆𑀙𑁂𑀤𑀓𑀢𑁆𑀢𑀸, 𑀦 𑀅𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑁂𑀦𑀸𑀢𑀺 𑀆𑀳 ‘‘𑀓𑀺𑀁 𑀧𑀦 𑀢’’𑀦𑁆𑀢𑀺𑀆𑀤𑀺, 𑀢𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀦 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀢𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀸𑀯𑁂𑀦 𑀕𑀳𑀺𑀢𑀁, 𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁 𑀢𑀲𑁆𑀲𑁂𑀯𑀸𑀢𑀺 𑀬𑁄𑀚𑀦𑀸. 𑀦 𑀔𑀦𑁆𑀥𑀢𑁄 𑀅𑀜𑁆𑀜𑀁 𑀭𑀽𑀧𑀁 𑀅𑀢𑁆𑀣𑀻𑀢𑀺 𑀇𑀤𑀁 𑀭𑀼𑀧𑁆𑀧𑀦𑀝𑁆𑀞𑁄 𑀭𑀽𑀧𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀳𑀺 𑀲𑁄 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀣𑀺. 𑀢𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑀲𑁆𑀲 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀪𑀸𑀯𑁂𑀦𑁂𑀯. ‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀤𑀲𑁆𑀲𑁂𑀦𑁆𑀢𑁂𑀦𑀧𑁆𑀧𑀓’’𑀦𑁆𑀢𑀺 𑀘 𑀆𑀤𑀻𑀲𑀼 𑀅𑀢𑀤𑀢𑁆𑀣𑀲𑁆𑀲 𑀭𑀽𑀧𑀲𑀤𑁆𑀤𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀢𑁂𑀦 𑀭𑀽𑀧𑀲𑀤𑁆𑀤𑁂𑀦𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀼𑀘𑁆𑀘𑀫𑀸𑀦𑀁 𑀪𑀽𑀢𑀼𑀧𑀸𑀤𑀸𑀬𑀫𑁆𑀧𑀺 𑀪𑁂𑀤𑀁 𑀥𑀫𑁆𑀫𑀚𑀸𑀢𑀁. 𑀲𑀼𑀤𑁆𑀥𑁂𑀦𑀸𑀢𑀺 𑀓𑁂𑀯𑀮𑁂𑀦, 𑀭𑀽𑀧𑀲𑀤𑁆𑀤𑁂𑀦 𑀯𑀺𑀦𑀸𑀧𑀻𑀢𑀺 𑀅𑀢𑁆𑀣𑁄. 𑀢𑀬𑀺𑀤𑀁 𑀧𑀓𑀭𑀡𑀸𑀤𑀺𑀅𑀯𑀘𑁆𑀙𑀺𑀦𑁆𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀫𑀸𑀦𑀸𑀥𑀺𑀓𑀭𑀡𑀢𑀁 𑀯𑀸. 𑀬𑁄 𑀳𑀺 𑀭𑀽𑀧𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄 𑀔𑀦𑁆𑀥𑀲𑀤𑁆𑀤𑁄, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀭𑀽𑀧𑀲𑀤𑁆𑀤𑁂𑀦 𑀯𑀺𑀬 𑀢𑀤𑀢𑁆𑀣𑁄 𑀯𑀼𑀘𑁆𑀘𑀢𑁂𑀯. 𑀢𑁂𑀦𑀸𑀳 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺. 𑀬𑀤𑀺𑀧𑀺 𑀬𑀣𑀸𑀯𑀼𑀢𑁆𑀢𑀁 𑀭𑀽𑀧𑀁 𑀔𑀦𑁆𑀥𑁄 𑀏𑀯 𑀘, 𑀔𑀦𑁆𑀥𑁄 𑀧𑀦 𑀦 𑀭𑀽𑀧𑀫𑁂𑀯𑀸𑀢𑀺 𑀆𑀳 ‘‘𑀦 𑀘 𑀲𑀩𑁆𑀩𑁂…𑀧𑁂… 𑀯𑀺𑀲𑁂𑀲𑀺𑀢𑀩𑁆𑀩𑀸’’𑀢𑀺. 𑀢𑁂𑀦𑁂𑀯𑀸𑀢𑀺 𑀅𑀭𑀽𑀧𑀲𑀪𑀸𑀯𑀲𑁆𑀲 𑀔𑀦𑁆𑀥𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦𑁂𑀯. 𑀢𑁂𑀢𑀺 𑀔𑀦𑁆𑀥𑀸. 𑀯𑀺𑀪𑀚𑀺𑀢𑀩𑁆𑀩𑀸𑀢𑀺 ‘‘𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀔𑀦𑁆𑀥𑁄 𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀅𑀯𑀲𑁂𑀲𑀸 𑀔𑀦𑁆𑀥𑀸 𑀦 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀩𑁆𑀩𑀸.

𑀔𑀦𑁆𑀥𑀸𑀦𑀁 𑀭𑀽𑀧𑀯𑀺𑀲𑁂𑀲𑀦…𑀧𑁂… 𑀲𑀁𑀲𑀬𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀺𑀁 𑀔𑀦𑁆𑀥𑀢𑁄 𑀅𑀜𑁆𑀜𑀸𑀧𑀺 𑀯𑁂𑀤𑀦𑀸 𑀅𑀢𑁆𑀣𑀺, 𑀬𑀢𑁄 𑀯𑀺𑀦𑀺𑀯𑀢𑁆𑀢𑀸 𑀯𑁂𑀤𑀦𑀸 𑀔𑀦𑁆𑀥𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀲𑀩𑁆𑀩𑁂 𑀘 𑀔𑀦𑁆𑀥𑀸 𑀓𑀺𑀁 𑀔𑀦𑁆𑀥𑀯𑀺𑀲𑁂𑀲𑀦𑀪𑀽𑀢𑀸𑀬 𑀯𑁂𑀤𑀦𑀸𑀬 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀻𑀢𑀺 𑀅𑀦𑀼𑀪𑀯𑀦𑀸𑀤𑀺𑀧𑁆𑀧𑀓𑀸𑀭𑀸. 𑀓𑁂𑀦𑀘𑀺 𑀯𑀺𑀲𑁂𑀲𑀦𑁂𑀦𑀸𑀢𑀺 𑀯𑁂𑀤𑀦𑀸𑀤𑀺𑀦𑀸 𑀯𑀺𑀲𑁂𑀲𑀦𑁂𑀦.

𑀏𑀢𑁆𑀣 𑀘 𑀭𑀽𑀧𑀸𑀤𑀺𑀧𑀡𑁆𑀡𑀢𑁆𑀢𑀺 𑀔𑀦𑁆𑀥𑀧𑀡𑁆𑀡𑀢𑁆𑀢𑀺 𑀘 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀲𑀳 𑀘 𑀭𑀼𑀧𑁆𑀧𑀦𑀸𑀤𑀺𑀓𑁂 𑀅𑀢𑁆𑀣𑁂 𑀧𑀯𑀢𑁆𑀢𑀫𑀸𑀦𑀸 𑀓𑀤𑀸𑀘𑀺 𑀅𑀯𑀬𑀯𑀪𑀽𑀢𑁂 𑀧𑀯𑀢𑁆𑀢𑀢𑀺, 𑀓𑀤𑀸𑀘𑀺 𑀲𑀫𑀼𑀤𑀸𑀬𑀪𑀽𑀢𑁂, 𑀢𑀲𑁆𑀲𑀸 𑀧𑀦 𑀢𑀣𑀸 𑀧𑀯𑀢𑁆𑀢𑀦𑀸𑀓𑀸𑀭𑁂 𑀦𑀺𑀤𑁆𑀥𑀸𑀭𑀺𑀢𑁂 𑀬𑀲𑁆𑀫𑀸 𑀭𑀽𑀧𑀸𑀤𑀺𑀓𑁆𑀔𑀦𑁆𑀥𑀸 𑀧𑀤𑀢𑁄 𑀅𑀢𑁆𑀣𑀢𑁄 𑀘 𑀯𑀺𑀲𑁄𑀥𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺 𑀢𑀩𑁆𑀩𑀺𑀲𑀬𑀓𑀗𑁆𑀔𑀸𑀧𑀦𑁄𑀤𑀦𑀢𑁄, 𑀢𑀲𑁆𑀫𑀸 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀜𑁆𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑁄 𑀘, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀦𑁆𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀞𑀫𑀯𑀸𑀭𑁂𑀦 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀅𑀯𑀬𑀯𑀢𑁆𑀣𑁄 𑀯𑀺𑀬 𑀲𑀫𑀼𑀤𑀸𑀬𑀢𑁆𑀣𑁄𑀧𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀲𑀫𑀼𑀤𑀸𑀬𑀧𑀤𑁂𑀳𑀺𑀧𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀦 𑀤𑀼𑀢𑀺𑀬𑀯𑀸𑀭𑁂𑀦 𑀯𑀺𑀲𑁂𑀲𑀯𑀸𑀘𑀻 𑀯𑀺𑀬 𑀭𑀽𑀧𑀸𑀤𑀺𑀅𑀯𑀬𑀯𑀧𑀤𑁂𑀳𑀺 𑀲𑀸𑀫𑀜𑁆𑀜𑀪𑀽𑀢𑁂𑀦𑀧𑀺 𑀢𑀁𑀢𑀁𑀯𑀺𑀲𑀺𑀝𑁆𑀞𑁂𑀦 𑀔𑀦𑁆𑀥𑀸𑀯𑀬𑀯𑀧𑀤𑁂𑀦 𑀲𑁄 𑀲𑁄 𑀏𑀯 𑀲𑀫𑀼𑀤𑀸𑀬𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀦 𑀲𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀪𑀸𑀯𑀸 𑀬𑀤𑀺𑀧𑀺 𑀔𑀦𑁆𑀥𑁄𑀬𑁂𑀯 𑀭𑀽𑀧𑀁, 𑀲𑁄 𑀧𑀦 𑀦 𑀲𑀩𑁆𑀩𑁄 𑀭𑀽𑀧𑀁, 𑀅𑀣 𑀔𑁄 𑀢𑀤𑁂𑀓𑀤𑁂𑀲𑁄, 𑀢𑀣𑀸 𑀯𑁂𑀤𑀦𑀸𑀤𑀬𑁄𑀧𑀻𑀢𑀺 𑀅𑀬𑀫𑀢𑁆𑀣𑁄 ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀢𑀢𑀺𑀬𑀯𑀸𑀭𑁂𑀦 𑀤𑀲𑁆𑀲𑀺𑀢𑁄. ‘‘𑀭𑀽𑀧𑀁 𑀔𑀦𑁆𑀥𑁄, 𑀔𑀦𑁆𑀥𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀧𑀦 𑀘𑀢𑀼𑀢𑁆𑀣𑀯𑀸𑀭𑁂𑀦 ‘‘𑀭𑀽𑀧𑀁 𑀔𑀦𑁆𑀥𑁄’’𑀢𑀺 𑀭𑀽𑀧𑀲𑁆𑀲 𑀔𑀦𑁆𑀥𑀪𑀸𑀯𑁂 𑀦𑀺𑀘𑁆𑀙𑀺𑀢𑁂 𑀔𑀦𑁆𑀥𑁄 𑀦𑀸𑀫𑀸𑀬𑀁 𑀦 𑀓𑁂𑀯𑀮𑀁 𑀭𑀽𑀧𑀫𑁂𑀯, 𑀅𑀣 𑀔𑁄 𑀯𑁂𑀤𑀦𑀸𑀤𑀺 𑀘𑀸𑀢𑀺 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀔𑀦𑁆𑀥𑀪𑀸𑀯𑀧𑁆𑀧𑀓𑀸𑀲𑀦𑁂 𑀦 𑀲𑀩𑁆𑀩𑁂 𑀔𑀦𑁆𑀥𑀸 𑀯𑁂𑀤𑀦𑀸𑀤𑀺𑀯𑀺𑀲𑁂𑀲𑀯𑀦𑁆𑀢𑁄, 𑀓𑁂𑀘𑀺𑀤𑁂𑀯 𑀧𑀦 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀢𑀣𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀏𑀯𑀁 𑀤𑀲𑁆𑀲𑁂𑀦𑁆𑀢𑀻 𑀘𑁂𑀲𑀸 𑀧𑀸𑀴𑀺 𑀔𑀦𑁆𑀥𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀡𑁆𑀡𑀢𑁆𑀢𑀺𑀲𑁄𑀥𑀦𑀫𑀼𑀔𑁂𑀦 𑀲𑀭𑀽𑀧𑀸𑀯𑀥𑀸𑀭𑀡𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀜𑁆𑀘 𑀢𑁂𑀲𑀁 𑀬𑀸𑀯𑀤𑁂𑀯 𑀉𑀧𑁆𑀧𑀸𑀤𑀸𑀤𑀺𑀦𑀺𑀘𑁆𑀙𑀬𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀬𑁂𑀲𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳.

𑀏𑀓𑀤𑁂𑀲𑁂𑀧𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺 𑀬𑀣𑀸 𑀧𑀝𑁄 𑀤𑀟𑁆𑀠𑁄, 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀘𑀓𑁆𑀓𑀸𑀯𑀬𑀯𑀪𑀸𑀯𑀢𑁄 𑀘𑀓𑁆𑀓𑀸𑀦𑀻𑀢𑀺 𑀬𑀫𑀓𑀸𑀦𑀺 𑀯𑀼𑀢𑁆𑀢𑀸𑀦𑀻’’𑀢𑀺. 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀫𑀓𑀪𑀸𑀯𑁂𑀦 𑀩𑀦𑁆𑀥𑀺𑀢𑁆𑀯𑀸, 𑀬𑀫𑀓𑀫𑀽𑀮𑀪𑀸𑀯𑁂𑀦𑁂𑀯 𑀯𑀸. 𑀫𑀽𑀮𑀪𑀸𑀯𑁂𑀦 𑀕𑀳𑀡𑀁 𑀲𑀫𑁆𑀩𑀦𑁆𑀥𑀪𑀸𑀯𑁄, 𑀢𑀁𑀲𑀫𑁆𑀩𑀦𑁆𑀥𑀢𑀸 𑀘 𑀫𑀽𑀮𑀧𑀤𑀸𑀤𑀻𑀦𑀁 𑀦𑀸𑀪𑀺𑀆𑀤𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀧𑀼𑀩𑁆𑀩𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀦𑀬𑀺𑀥 𑀤𑁂𑀲𑀦𑀸 𑀫𑀡𑁆𑀟𑀮𑀪𑀸𑀯𑁂𑀦𑁂𑀯 𑀲𑀫𑁆𑀩𑀚𑁆𑀛𑀢𑀻𑀢𑀺 𑀆𑀳 ‘‘𑀦 𑀫𑀡𑁆𑀟𑀮𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀦𑀢𑁄’’𑀢𑀺. 𑀬𑀤𑀺𑀧𑀺 𑀭𑀽𑀧𑀓𑁆𑀔𑀦𑁆𑀥𑀫𑀽𑀮𑀓𑁂 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺𑀫𑀽𑀮𑀓𑁂𑀲𑀼 𑀧𑀦 𑀲𑀜𑁆𑀜𑀸𑀤𑀺𑀫𑀼𑀔𑁂𑀦 𑀤𑁂𑀲𑀦𑀧𑁆𑀧𑀯𑀢𑁆𑀢𑀺𑀬𑀁 𑀅𑀧𑀼𑀩𑁆𑀩𑀯𑀲𑁂𑀦𑁂𑀯 𑀕𑀢𑁄 𑀲𑀺𑀬𑀸 𑀫𑀡𑁆𑀟𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄, 𑀦 𑀢𑀣𑀸 𑀧𑀸𑀞𑁄 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀯𑁂𑀤𑀦𑀸𑀓𑁆𑀔𑀦𑁆𑀥…𑀧𑁂… 𑀲𑀫𑁆𑀩𑀦𑁆𑀥𑁂𑀦𑀸’’𑀢𑀺. 𑀧𑀘𑁆𑀙𑀺𑀫𑀲𑁆𑀲 𑀧𑀼𑀭𑀺𑀫𑁂𑀦 𑀅𑀲𑀫𑁆𑀩𑀚𑁆𑀛𑀦𑀫𑁂𑀯 𑀳𑀺 𑀳𑁂𑀝𑁆𑀞𑀺𑀫𑀲𑁄𑀥𑀦𑀁. 𑀲𑀼𑀤𑁆𑀥𑀓𑁆𑀔𑀦𑁆𑀥𑀮𑀸𑀪𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸𑀢𑀺 ‘‘𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀔𑀦𑁆𑀥𑀸𑀢𑀺 𑀔𑀦𑁆𑀥𑀲𑀤𑁆𑀤𑁂𑀦 𑀮𑀩𑁆𑀪𑀫𑀸𑀦𑀁 𑀭𑀽𑀧𑀸𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀔𑀦𑁆𑀥𑀝𑁆𑀞𑀫𑀢𑁆𑀢𑀫𑁂𑀯 𑀉𑀤𑁆𑀤𑁂𑀲𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀬𑀤𑀺𑀧𑀺 𑀉𑀤𑁆𑀤𑁂𑀲𑁂 𑀔𑀦𑁆𑀥𑀯𑀺𑀲𑁂𑀲𑀦𑀁 𑀭𑀽𑀧𑀸𑀤𑀺 ‘‘𑀔𑀦𑁆𑀥𑀸 𑀭𑀽𑀧’’𑀦𑁆𑀢𑀺 𑀲𑀼𑀤𑁆𑀥𑀭𑀽𑀧𑀸𑀤𑀺𑀫𑀢𑁆𑀢𑀫𑁂𑀯 𑀕𑀳𑀺𑀢𑀁, 𑀢𑀣𑀸𑀧𑀺 𑀯𑀺𑀲𑁂𑀲𑀭𑀳𑀺𑀢𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀢𑀢𑁆𑀣 𑀲𑀼𑀤𑁆𑀥𑀭𑀽𑀧𑀸𑀤𑀺𑀫𑀢𑁆𑀢𑀢𑀸𑀬 𑀅𑀝𑁆𑀞𑀢𑁆𑀯𑀸. 𑀔𑀦𑁆𑀥𑀯𑀺𑀲𑁂𑀲𑀦𑀪𑀸𑀯𑀲𑀗𑁆𑀔𑀸𑀢𑀦𑁆𑀢𑀺 𑀬𑀣𑀸𑀥𑀺𑀕𑀢𑀁 𑀔𑀦𑁆𑀥𑀸𑀦𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀓𑀣𑀺𑀢𑀁 𑀭𑀼𑀧𑁆𑀧𑀦𑀸𑀤𑀺𑀓𑀁 𑀯𑀺𑀲𑁂𑀲𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁. 𑀓𑁂𑀯𑀮𑀫𑁂𑀯 𑀢𑀁 𑀅𑀕𑁆𑀕𑀡𑁆𑀳𑀦𑁆𑀢𑁄 𑀔𑀦𑁆𑀥𑀲𑀤𑁆𑀤𑁂𑀦 𑀲𑀳 𑀬𑁄𑀚𑁂𑀢𑁆𑀯𑀸…𑀧𑁂… 𑀯𑀺𑀪𑀢𑁆𑀢𑀢𑁆𑀢𑀸 𑀲𑀼𑀤𑁆𑀥𑀓𑁆𑀔𑀦𑁆𑀥𑀯𑀸𑀭𑁄𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.