𑁧. 𑀫𑀽𑀮𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀬𑀫𑀓𑀲𑀫𑀽𑀳𑀲𑁆𑀲𑀸𑀢𑀺 𑀫𑀽𑀮𑀬𑀫𑀓𑀸𑀤𑀺𑀓𑀲𑁆𑀲 𑀬𑀫𑀓𑀲𑀫𑀽𑀳𑀲𑁆𑀲. 𑀫𑀽𑀮𑀬𑀫𑀓𑀸𑀤𑀬𑁄 𑀳𑀺 𑀧𑀓𑀭𑀡𑀸𑀧𑁂𑀓𑁆𑀔𑀸𑀬 𑀅𑀯𑀬𑀯𑀪𑀽𑀢𑀸𑀧𑀺 𑀦𑀺𑀘𑁆𑀘𑀸𑀯𑀬𑀯𑀸𑀧𑁂𑀓𑁆𑀔𑀸𑀬 𑀬𑀫𑀓𑀲𑀫𑀽𑀳𑁄𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀢𑀁𑀲𑀫𑀽𑀳𑀲𑁆𑀲 𑀘 𑀲𑀓𑀮𑀲𑁆𑀲 𑀧𑀓𑀭𑀡𑀲𑁆𑀲𑀸’’𑀢𑀺.

𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑀸𑀦𑀦𑁆𑀢𑀺 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀸𑀦𑀁 𑀲𑀁𑀲𑀬𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀓𑀼𑀲𑀮𑀲𑀗𑁆𑀔𑀸𑀢𑀸𑀦𑀁, 𑀢𑀣𑀸 𑀧𑀞𑀫𑀧𑀼𑀘𑁆𑀙𑀸𑀬 𑀯𑀼𑀢𑁆𑀢𑀸𑀦𑀁 𑀓𑀼𑀲𑀮𑀫𑀽𑀮𑀲𑀗𑁆𑀔𑀸𑀢𑀸𑀦𑀁 𑀯𑀺𑀲𑁂𑀲𑀸𑀦𑀁 𑀅𑀢𑁆𑀣𑀬𑀫𑀓𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀳𑀺 𑀧𑀞𑀫𑀧𑀼𑀘𑁆𑀙𑀸𑀬 𑀯𑀺𑀲𑁂𑀲𑀯𑀦𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀸𑀬𑁂𑀯 𑀓𑀼𑀲𑀮𑀥𑀫𑁆𑀫𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀯𑀺𑀲𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀏𑀯𑀁 𑀧𑀞𑀫𑀧𑀼𑀘𑁆𑀙𑀸𑀬𑀁 𑀯𑀺𑀲𑁂𑀲𑀪𑀸𑀯𑁂𑀦 𑀯𑀼𑀢𑁆𑀢𑀸𑀬𑁂𑀯 𑀓𑀼𑀲𑀮𑀫𑀽𑀮𑀥𑀫𑁆𑀫𑀸 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀯𑀺𑀲𑁂𑀲𑀯𑀦𑁆𑀢𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀯𑀢𑁆𑀢𑀼𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀯𑀺𑀲𑁂𑀲𑀯𑀦𑁆𑀢𑀢𑀸𑀯𑀺𑀪𑀸𑀕𑀸 𑀳𑁄𑀦𑁆𑀢𑀻𑀢𑀺. 𑀓𑀼𑀲𑀮𑀫𑀽𑀮𑀓𑀼𑀲𑀮𑀯𑀺𑀲𑁂𑀲𑁂𑀳𑀺 𑀲𑀁𑀲𑀬𑀺𑀢𑀧𑀤𑀲𑀗𑁆𑀕𑀳𑀺𑀢𑁂𑀳𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀯𑀺𑀲𑁂𑀲𑀯𑀦𑁆𑀢𑀸𑀧𑁂𑀓𑁆𑀔𑀯𑀺𑀲𑁂𑀲𑀯𑀲𑁂𑀦 𑀧𑀞𑀫𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀧𑀦 𑀯𑀺𑀲𑁂𑀲𑀸𑀧𑁂𑀓𑁆𑀔𑀯𑀺𑀲𑁂𑀲𑀯𑀦𑁆𑀢𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀁 𑀳𑀻’’𑀢𑀺𑀆𑀤𑀺.

𑀢𑀢𑁆𑀣 𑀜𑀸𑀢𑀼𑀁 𑀇𑀘𑁆𑀙𑀺𑀢𑀸𑀦𑀦𑁆𑀢𑀺 𑀧𑀼𑀘𑁆𑀙𑀸𑀬 𑀯𑀺𑀲𑀬𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀸𑀦𑀦𑁆𑀢𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑀸𑀦𑀁. 𑀯𑀺𑀲𑁂𑀲𑀯𑀦𑁆𑀢𑀸𑀧𑁂𑀓𑁆𑀔𑀸𑀦𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀼𑀲𑀮𑀲𑀗𑁆𑀔𑀸𑀢𑁂𑀳𑀺 𑀯𑀺𑀲𑁂𑀲𑀯𑀦𑁆𑀢𑁂𑀳𑀺 𑀲𑀸𑀧𑁂𑀓𑁆𑀔𑀸𑀦𑀁. 𑀯𑀺𑀲𑁂𑀲𑀯𑀢𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀼𑀲𑀮𑀸𑀦𑀁. 𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀦𑀦𑁆𑀢𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀯𑀺𑀲𑁂𑀲𑁂𑀳𑀺 𑀲𑀸𑀧𑁂𑀓𑁆𑀔𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀫𑀽𑀮𑀬𑀫𑀓𑁂. 𑀧𑀥𑀸𑀦𑀪𑀸𑀯𑁄𑀢𑀺 𑀧𑀞𑀫𑀯𑀺𑀓𑀧𑁆𑀧𑁂 𑀢𑀸𑀯 𑀲𑀁𑀲𑀬𑀺𑀢𑀧𑁆𑀧𑀥𑀸𑀦𑀢𑁆𑀢𑀸 𑀧𑀼𑀘𑁆𑀙𑀸𑀬 𑀯𑀺𑀲𑁂𑀲𑀸𑀦𑀁 𑀧𑀥𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀳𑀺 𑀲𑀁𑀲𑀬𑀺𑀢𑀸𑀦𑀁 𑀯𑀺𑀲𑁂𑀲𑀯𑀦𑁆𑀢𑁄𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀯𑀺𑀲𑁂𑀲𑀸 𑀦𑀸𑀫 𑀯𑀺𑀲𑁂𑀲𑀯𑀦𑁆𑀢𑀸𑀥𑀻𑀦𑀸𑀢𑀺 𑀯𑀺𑀲𑁂𑀲𑀯𑀦𑁆𑀢𑀸𑀦𑀁 𑀢𑀢𑁆𑀣 𑀧𑀥𑀸𑀦𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀺𑀦𑁆𑀦𑀁 𑀧𑀦 𑀏𑀓𑀚𑁆𑀛𑀁 𑀧𑀥𑀸𑀦𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺. 𑀲𑀢𑀺 𑀳𑀺 𑀅𑀧𑁆𑀧𑀥𑀸𑀦𑁂 𑀧𑀥𑀸𑀦𑀁 𑀦𑀸𑀫 𑀲𑀺𑀬𑀸. 𑀢𑁂𑀦𑀸𑀳 ‘‘𑀏𑀓𑁂𑀓𑀸𑀬 𑀧𑀼𑀘𑁆𑀙𑀸𑀬 𑀏𑀓𑁂𑀓𑁄 𑀏𑀯 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀻’’𑀢𑀺. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀯𑀺𑀦𑀺𑀘𑁆𑀙𑀺𑀢𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀳𑀺 𑀇𑀥 𑀧𑀥𑀸𑀦𑀪𑀸𑀯𑁄 𑀦 𑀬𑀼𑀚𑁆𑀚𑀢𑁂𑀯𑀸𑀢𑀺. 𑀦 𑀥𑀫𑁆𑀫𑀯𑀸𑀘𑀓𑁄𑀢𑀺 𑀦 𑀲𑀪𑀸𑀯𑀥𑀫𑁆𑀫𑀯𑀸𑀘𑀓𑁄. 𑀲𑀪𑀸𑀯𑀥𑀫𑁆𑀫𑁄𑀧𑀺 𑀳𑀺 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀕𑀫𑁆𑀪𑀻𑀭𑀧𑀜𑁆𑀜𑀁 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁭𑁮). ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀅𑀢𑁆𑀣-𑀲𑀤𑁆𑀤𑀲𑁆𑀲 𑀳𑁂𑀢𑀼𑀨𑀮𑀯𑀸𑀘𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀆𑀤𑀺-𑀲𑀤𑁆𑀤𑁂𑀦𑀲𑁆𑀲 ‘‘𑀅𑀢𑁆𑀣𑀸𑀪𑀺𑀲𑀫𑀬𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁯) 𑀆𑀕𑀢𑀸 𑀳𑀺𑀢𑀸𑀤𑀺𑀯𑀸𑀘𑀓𑀢𑀸 𑀲𑀗𑁆𑀕𑀬𑁆𑀳𑀢𑀺. 𑀢𑁂𑀦𑁂𑀯𑀸𑀢𑀺 𑀧𑀸𑀴𑀺𑀅𑀢𑁆𑀣𑀯𑀸𑀘𑀓𑀢𑁆𑀢𑀸 𑀏𑀯.

𑀢𑀻𑀡𑀺𑀧𑀺 𑀧𑀤𑀸𑀦𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀲𑀫𑀼𑀘𑁆𑀘𑀬𑁄 𑀘 𑀢𑀼𑀮𑁆𑀬𑀬𑁄𑀕𑁂 𑀲𑀺𑀬𑀸. 𑀓𑀺𑀁 𑀦𑀸𑀫-𑀧𑀤𑁂𑀦 𑀅𑀦𑀯𑀲𑁂𑀲𑀢𑁄 𑀓𑀼𑀲𑀮𑀸𑀤𑀻𑀦𑀁 𑀲𑀗𑁆𑀕𑀳𑁄𑀢𑀺 𑀆𑀲𑀗𑁆𑀓𑀸𑀬 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀢𑀻𑀡𑀺𑀧𑀺…𑀧𑁂… 𑀲𑀗𑁆𑀕𑀸𑀳𑀓𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀲𑀗𑁆𑀕𑀸𑀳𑀓𑀢𑁆𑀢𑀫𑀢𑁆𑀢𑀦𑁆𑀢𑀺 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄𑀢𑀺. 𑀢𑁂𑀦 𑀦𑀺𑀯𑀢𑁆𑀢𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀦𑀺𑀭𑀯𑀲𑁂𑀲𑀲𑀗𑁆𑀕𑀸𑀳𑀓𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀭𑀽𑀧𑀁 𑀦𑀸𑀫-𑀧𑀤𑁂𑀦 𑀲𑀗𑁆𑀕𑀬𑁆𑀳𑀢𑀺. 𑀓𑀼𑀲𑀮𑀸𑀤𑀺𑀬𑁂𑀯 𑀦𑀸𑀫𑀦𑁆𑀢𑀺 𑀦𑀺𑀬𑀫𑁄 𑀤𑀝𑁆𑀞𑀩𑁆𑀩𑁄, 𑀦 𑀦𑀸𑀫𑀁𑀬𑁂𑀯 𑀓𑀼𑀲𑀮𑀸𑀤𑀻𑀢𑀺 𑀇𑀫𑀫𑁂𑀯 𑀘 𑀦𑀺𑀬𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀼𑀲𑀮𑀸𑀤𑀻𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀬𑀤𑀺𑀧𑀺 𑀦𑀸𑀫-𑀧𑀤𑀁 𑀦 𑀦𑀺𑀭𑀯𑀲𑁂𑀲𑀓𑀼𑀲𑀮𑀸𑀤𑀺𑀲𑀗𑁆𑀕𑀸𑀳𑀓𑀁, 𑀓𑀼𑀲𑀮𑀸𑀤𑀺𑀲𑀗𑁆𑀕𑀸𑀳𑀓𑀁 𑀧𑀦 𑀳𑁄𑀢𑀺, 𑀢𑀤𑀢𑁆𑀣𑀫𑁂𑀯 𑀘 𑀢𑀁 𑀕𑀳𑀺𑀢𑀦𑁆𑀢𑀺 𑀦𑀸𑀫𑀲𑁆𑀲 𑀓𑀼𑀲𑀮𑀢𑁆𑀢𑀺𑀓𑀧𑀭𑀺𑀬𑀸𑀧𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀼𑀲𑀮𑀸𑀤𑀺…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑀬𑀫𑀓𑁂𑀢𑀺 𑀏𑀓𑀫𑀽𑀮𑀬𑀫𑀓𑁂. 𑀏𑀯𑀫𑀺𑀥𑀸𑀧𑀻𑀢𑀺 𑀬𑀣𑀸 𑀏𑀓𑀫𑀽𑀮𑀬𑀫𑀓𑁂 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀇𑀘𑁆𑀘𑁂𑀯 𑀧𑀼𑀘𑁆𑀙𑀸 𑀆𑀭𑀤𑁆𑀥𑀸, 𑀏𑀯𑀁 𑀇𑀥𑀸𑀧𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀬𑀫𑀓𑁂𑀧𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀇𑀘𑁆𑀘𑁂𑀯 𑀧𑀼𑀘𑁆𑀙𑀸 𑀆𑀭𑀪𑀺𑀢𑀩𑁆𑀩𑀸 𑀲𑀺𑀬𑀸. 𑀓𑀲𑁆𑀫𑀸? 𑀧𑀼𑀭𑀺𑀫𑀬𑀫𑀓…𑀧𑁂… 𑀅𑀧𑁆𑀧𑀯𑀢𑁆𑀢𑀢𑁆𑀢𑀸𑀢𑀺. 𑀇𑀤𑀜𑁆𑀘 𑀤𑀼𑀢𑀺𑀬𑀬𑀫𑀓𑀲𑁆𑀲 𑀢𑀣𑀸 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀢𑀺𑀬𑀬𑀫𑀓𑀁 𑀧𑀦 𑀢𑀣𑁂𑀯 𑀧𑀯𑀢𑁆𑀢𑀁. 𑀓𑁂𑀘𑀻𑀢𑀺 𑀧𑀤𑀓𑀸𑀭𑀸. 𑀢𑁂 𑀳𑀺 𑀬𑀣𑀸 𑀧𑀞𑀫𑀤𑀼𑀢𑀺𑀬𑀬𑀫𑀓𑁂𑀲𑀼 𑀧𑀼𑀭𑀺𑀫𑀧𑀼𑀘𑁆𑀙𑀸 𑀏𑀯 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀘𑁆𑀙𑀺𑀫𑀧𑀼𑀘𑁆𑀙𑀸 𑀓𑀢𑀸𑀢𑀺 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬 𑀧𑀼𑀭𑀺𑀫𑀧𑀼𑀘𑁆𑀙𑀸 𑀲𑀫𑀸𑀦𑀸 𑀞𑀧𑁂𑀢𑁆𑀯𑀸 𑀧𑀝𑀺𑀮𑁄𑀫𑀪𑀸𑀯𑀁, 𑀦 𑀢𑀣𑀸 𑀅𑀜𑁆𑀜𑀫𑀜𑁆𑀜𑀬𑀫𑀓𑁂. 𑀢𑀢𑁆𑀣 𑀳𑀺 𑀤𑁆𑀯𑁂𑀧𑀺 𑀧𑀼𑀘𑁆𑀙𑀸 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀸. 𑀬𑀤𑀺 𑀢𑀢𑁆𑀣𑀸𑀧𑀺 𑀤𑁆𑀯𑀻𑀳𑀺𑀧𑀺 𑀧𑀼𑀘𑁆𑀙𑀸𑀳𑀺 𑀲𑀤𑀺𑀲𑀸𑀳𑀺 𑀪𑀯𑀺𑀢𑀩𑁆𑀩𑀁, ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀧𑀞𑀫𑀧𑀼𑀘𑁆𑀙𑀸 𑀆𑀭𑀪𑀺𑀢𑀩𑁆𑀩𑀸, 𑀧𑀘𑁆𑀙𑀺𑀫𑀧𑀼𑀘𑁆𑀙𑀸 𑀯𑀸 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀏𑀯𑀁 𑀧𑀦 𑀅𑀯𑀢𑁆𑀯𑀸 𑀧𑀞𑀫𑀤𑀼𑀢𑀺𑀬𑀬𑀫𑀓𑁂𑀲𑀼 𑀯𑀺𑀬 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀼𑀘𑁆𑀙𑀸 𑀲𑀤𑀺𑀲𑀸 𑀅𑀓𑀢𑁆𑀯𑀸 𑀢𑀢𑀺𑀬𑀬𑀫𑀓𑁂 𑀢𑀸𑀲𑀁 𑀯𑀺𑀲𑀤𑀺𑀲𑀢𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀅𑀦𑀸𑀭𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸𑀬 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀢𑁆𑀣𑀯𑀲𑁂𑀦𑀸𑀢𑀺 𑀲𑀫𑁆𑀪𑀯𑀦𑁆𑀢𑀸𑀦𑀁 𑀦𑀺𑀘𑁆𑀙𑀺𑀢𑀲𑀁𑀲𑀬𑀺𑀢𑀸𑀦𑀁 𑀅𑀢𑁆𑀣𑀸𑀦𑀁 𑀯𑀲𑁂𑀦. 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀢𑀲𑁆𑀲𑀸 𑀧𑀼𑀭𑀺𑀫𑀧𑀼𑀘𑁆𑀙𑀸𑀬 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀅𑀦𑀼𑀘𑁆𑀙𑀯𑀺𑀓𑀸𑀬. 𑀧𑀼𑀭𑀺𑀫𑀜𑁆𑀳𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀺𑀫𑀸𑀬 𑀪𑀯𑀺𑀢𑀩𑁆𑀩𑀁. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀬𑀲𑁆𑀫𑀸 𑀅𑀦𑀼𑀮𑁄𑀫𑁂 𑀲𑀁𑀲𑀬𑀘𑁆𑀙𑁂𑀤𑁂 𑀚𑀸𑀢𑁂𑀧𑀺 𑀧𑀝𑀺𑀮𑁄𑀫𑁂 𑀲𑀁𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀬𑀤𑀺 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀬 𑀧𑀬𑁄𑀚𑀦𑀫𑁂𑀯 𑀦 𑀲𑀺𑀬𑀸, 𑀢𑀲𑁆𑀫𑀸 𑀦 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸 𑀧𑀼𑀭𑀺𑀫𑀧𑀼𑀘𑁆𑀙𑀸, 𑀅𑀣 𑀔𑁄 𑀯𑀼𑀢𑁆𑀢𑀦𑀬𑁂𑀦 𑀧𑀼𑀭𑀺𑀫𑀧𑀼𑀘𑁆𑀙𑀸𑀦𑀼𑀭𑀽𑀧𑀸 𑀧𑀘𑁆𑀙𑀺𑀫𑀧𑀼𑀘𑁆𑀙𑀸, 𑀢𑀸𑀬 𑀘 𑀅𑀦𑀼𑀭𑀽𑀧𑀢𑀸𑀬 𑀅𑀢𑁆𑀣𑀸𑀤𑀺𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀢𑁆𑀢𑀸 𑀅𑀢𑁆𑀣𑀸𑀤𑀺𑀬𑀫𑀓𑀢𑀸 𑀯𑀼𑀢𑁆𑀢𑀸. 𑀤𑁂𑀲𑀦𑀸𑀓𑁆𑀓𑀫𑀢𑁄 𑀘𑁂𑀢𑁆𑀣 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀯𑁂𑀤𑀺𑀢𑀩𑁆𑀩𑀸 ‘‘𑀓𑀼𑀲𑀮𑀸 𑀓𑀼𑀲𑀮𑀫𑀽𑀮𑀸’’𑀢𑀺 𑀯𑀢𑁆𑀯𑀸 ‘‘𑀓𑀼𑀲𑀮𑀫𑀽𑀮𑀸 𑀓𑀼𑀲𑀮𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀬𑀫𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑁂𑀲𑀯𑀦𑁆𑀢𑀯𑀺𑀲𑁂𑀲, 𑀯𑀺𑀲𑁂𑀲𑀯𑀺𑀲𑁂𑀲𑀯𑀦𑁆𑀢𑀕𑁆𑀕𑀳𑀡𑀢𑁄 𑀯𑀸 𑀇𑀥 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀧𑀼𑀘𑁆𑀙𑀸𑀬𑀜𑁆𑀳𑀺 𑀬𑁂 𑀥𑀫𑁆𑀫𑀸 𑀯𑀺𑀲𑁂𑀲𑀯𑀦𑁆𑀢𑁄, 𑀢𑁂 𑀦𑀺𑀘𑁆𑀙𑀬𑀸𑀥𑀺𑀝𑁆𑀞𑀸𑀦𑁂 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀼 𑀬𑀲𑁆𑀫𑀺𑀁 𑀯𑀺𑀲𑁂𑀲𑁄 𑀲𑀁𑀲𑀬𑀸𑀥𑀺𑀝𑁆𑀞𑀸𑀦𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀧𑀦 𑀢𑀧𑁆𑀧𑀝𑀺𑀮𑁄𑀫𑀢𑁄 𑀬𑁂𑀦 𑀯𑀺𑀲𑁂𑀲𑁂𑀦 𑀢𑁂 𑀯𑀺𑀲𑁂𑀲𑀯𑀦𑁆𑀢𑁄, 𑀢𑀁 𑀯𑀺𑀲𑁂𑀲𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸’’𑀢𑀺 𑀯𑀢𑁆𑀯𑀸 𑀢𑁂 𑀯𑀺𑀲𑁂𑀲𑀯𑀦𑁆𑀢𑁂 𑀲𑀁𑀲𑀬𑀸𑀥𑀺𑀝𑁆𑀞𑀸𑀦𑀪𑀽𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸 𑀓𑀢𑀸. 𑀅𑀦𑀺𑀬𑀢𑀯𑀢𑁆𑀣𑀼𑀓𑀸 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀲𑀁𑀲𑀬𑀸 𑀅𑀦𑁂𑀓𑀚𑁆𑀛𑀸𑀲𑀬𑀢𑁆𑀢𑀸 𑀲𑀢𑁆𑀢𑀸𑀦𑀁.

𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀇𑀫𑀺𑀦𑀸𑀧𑀺 𑀯𑀸𑀓𑁆𑀬𑁂𑀦. 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀫𑁂𑀯𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺 ‘‘𑀦 𑀳𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑁂𑀦𑁂𑀯𑀸𑀢𑀺 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲 𑀪𑀺𑀦𑁆𑀦𑀢𑁆𑀢𑀸 𑀏𑀯. 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀺𑀪𑀚𑀦𑀁. 𑀇𑀢𑀭𑀣𑀸𑀢𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑁂𑀦 𑀧𑀼𑀘𑁆𑀙𑀸𑀬 𑀓𑀢𑀸𑀬. 𑀢𑀸𑀦𑀺 𑀯𑀘𑀦𑀸𑀦𑀻𑀢𑀺 𑀓𑀼𑀲𑀮𑀯𑀘𑀦𑀁 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀯𑀘𑀦𑀜𑁆𑀘. 𑀓𑀼𑀲𑀮𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀘𑀲𑁆𑀲 𑀅𑀩𑁆𑀬𑀸𑀓𑀢𑀤𑀻𑀧𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣𑀸𑀢𑀺 ‘‘𑀇𑀫𑀺𑀦𑀸𑀧𑀺 𑀩𑁆𑀬𑀜𑁆𑀚𑀦𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄’’𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀬𑁂 𑀓𑁂𑀘𑀺 𑀓𑀼𑀲𑀮𑀸…𑀧𑁂… 𑀲𑀫𑁆𑀪𑀯𑀢𑁄𑀢𑀺 𑀏𑀢𑁂𑀦 𑀓𑀼𑀲𑀮𑀸𑀦𑀁 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀢𑀸𑀬 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀳𑀺…𑀧𑁂… 𑀲𑀦𑁆𑀢𑀻’’𑀢𑀺. 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲𑁂𑀯 𑀲𑀫𑁆𑀪𑀯𑀢𑁄𑀢𑀺 𑀳𑀺 𑀇𑀫𑀺𑀦𑀸 𑀅𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀢𑁆𑀣𑀲𑁆𑀲 𑀲𑀫𑁆𑀪𑀯𑀸𑀪𑀸𑀯𑀯𑀘𑀦𑁂𑀦 𑀲𑁆𑀯𑀸𑀬𑀫𑀥𑀺𑀧𑁆𑀧𑀸𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄. 𑀬𑀣𑀸 𑀳𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀩𑁆𑀬𑀜𑁆𑀚𑀦𑀢𑁆𑀣𑁄 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑀁 𑀩𑁆𑀬𑀪𑀺𑀘𑀭𑀢𑀺, 𑀦 𑀏𑀯𑀁 𑀢𑀁 𑀓𑀼𑀲𑀮𑀩𑁆𑀬𑀜𑁆𑀚𑀦𑀢𑁆𑀣𑁄. 𑀓𑀣𑀁 𑀓𑀢𑁆𑀯𑀸 𑀘𑁄𑀤𑀦𑀸, 𑀓𑀣𑀜𑁆𑀘 𑀓𑀢𑁆𑀯𑀸 𑀧𑀭𑀺𑀳𑀸𑀭𑁄? 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸 𑀓𑀼𑀲𑀮𑀸 𑀏𑀯𑀸𑀢𑀺 𑀘𑁄𑀤𑀦𑀸 𑀓𑀢𑀸, 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸 𑀏𑀯 𑀓𑀼𑀲𑀮𑀸𑀢𑀺 𑀧𑀦 𑀧𑀭𑀺𑀳𑀸𑀭𑁄 𑀧𑀯𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀬𑀫𑀓𑁂 𑀯𑀺𑀬 𑀅𑀧𑀼𑀘𑁆𑀙𑀺𑀢𑁆𑀯𑀸𑀢𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸’’𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸. 𑀓𑀼𑀲𑀮𑀫𑀽𑀮𑁂𑀳𑀻𑀢𑀺 𑀓𑀼𑀲𑀮𑁂𑀳𑀺 𑀫𑀽𑀮𑁂𑀳𑀺. 𑀢𑁂𑀢𑀺 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸.

𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀓𑀼𑀲𑀮𑀫𑀽𑀮𑀸𑀦𑀺 𑀏𑀓𑀫𑀽𑀮𑀸𑀦𑀺 𑀘𑁂𑀯 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀺 𑀘𑀸’’𑀢𑀺𑀆𑀤𑀺𑀧𑀸𑀴𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀬𑀁 𑀲𑀦𑁆𑀥𑀸𑀬 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑁂𑀝𑁆𑀞𑀸𑀢𑀺 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀫𑀽𑀮𑀸𑀦𑀺 𑀬𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀢𑀫𑁆𑀧𑀻𑀢𑀺 ‘‘𑀓𑀼𑀲𑀮𑀫𑀽𑀮𑁂𑀦𑀸’’𑀢𑀺𑀆𑀤𑀺 𑀅𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺. 𑀢𑀣𑀸𑀢𑀺 𑀢𑁂𑀦 𑀧𑀓𑀸𑀭𑁂𑀦, 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬𑀁 𑀯𑀺𑀬 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀓𑀸𑀭𑀡𑁂𑀦 ‘‘𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀯𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀆𑀫𑀦𑁆𑀢𑀸’’𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀸𑀬𑀁 𑀯𑀺𑀬 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀧𑀼𑀘𑁆𑀙𑀺𑀢𑁂𑀧𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀮𑀩𑁆𑀪𑀢𑀺, 𑀦 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬𑀁 𑀯𑀺𑀬 𑀲𑀭𑀽𑀧𑀤𑀲𑁆𑀲𑀦𑀯𑀺𑀲𑁆𑀲𑀚𑁆𑀚𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀬𑁂 𑀳𑀺 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸, 𑀦 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀯. 𑀬𑁂 𑀧𑀦 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸𑀯. 𑀢𑁂𑀦𑀸𑀳 ‘‘𑀦 𑀳𑀺…𑀧𑁂… 𑀯𑀺𑀪𑀸𑀕𑁄 𑀓𑀸𑀢𑀩𑁆𑀩𑁄 𑀪𑀯𑁂𑀬𑁆𑀬𑀸’’𑀢𑀺.

𑀢𑀢𑁆𑀣 𑀬𑁂𑀦𑀸𑀢𑀺 𑀬𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑁂𑀲𑀼 𑀏𑀓𑀫𑀽𑀮𑀲𑁆𑀲 𑀅𑀪𑀸𑀯𑁂𑀦. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂. 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀢𑁆𑀢𑀸 𑀏𑀓𑀫𑀽𑀮𑀓𑀢𑁆𑀢𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀜𑁆𑀳𑀺 𑀏𑀓𑁂𑀓𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀓𑀢𑁆𑀢𑁂 𑀯𑀼𑀢𑁆𑀢𑁂 𑀢𑁂𑀲𑀁 𑀏𑀓𑁂𑀓𑁂𑀦 𑀏𑀓𑀫𑀽𑀮𑀓𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺 𑀲𑀫𑀸𑀦𑀢𑁆𑀣𑁄 𑀏𑀓𑀲𑀤𑁆𑀤𑁄𑀢𑀺 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀬𑀢𑁆𑀣 𑀧𑀦…𑀧𑁂… 𑀦 𑀏𑀓𑀫𑀽𑀮𑀸𑀦𑀻’’𑀢𑀺. 𑀢𑀬𑀺𑀤𑀁 𑀫𑀺𑀘𑁆𑀙𑀸, 𑀤𑁆𑀯𑀻𑀲𑀼𑀧𑀺 𑀏𑀓𑁂𑀓𑁂𑀦 𑀇𑀢𑀭𑀲𑁆𑀲 𑀏𑀓𑀫𑀽𑀮𑀓𑀢𑁆𑀢𑀁 𑀲𑀫𑁆𑀪𑀯𑀢𑀺 𑀏𑀯𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀕𑀳𑀡𑀲𑁆𑀲 𑀦𑀺𑀯𑀸𑀭𑀡𑀢𑁆𑀣’’𑀦𑁆𑀢𑀺𑀆𑀤𑀺. ‘‘𑀬𑁂 𑀥𑀫𑁆𑀫𑀸 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸, 𑀢𑁂 𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁂𑀦 𑀇𑀥 ‘‘𑀆𑀫𑀦𑁆𑀢𑀸’’𑀢𑀺 𑀧𑀤𑁂𑀦 𑀬𑀢𑁆𑀣 𑀤𑁆𑀯𑁂 𑀫𑀽𑀮𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀏𑀓𑁂𑀓𑁂𑀦 𑀇𑀢𑀭𑀲𑁆𑀲 𑀏𑀓𑀫𑀽𑀮𑀓𑀢𑁆𑀢𑀁 𑀧𑀓𑀸𑀲𑀺𑀢𑀫𑁂𑀯𑀸𑀢𑀺 𑀆𑀳 ‘‘𑀆𑀫𑀦𑁆𑀢𑀸𑀢𑀺 𑀇𑀫𑀺𑀦𑀸𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀢𑀁𑀕𑀳𑀡𑀦𑀺𑀯𑀸𑀭𑀡𑀢𑁄’’𑀢𑀺. 𑀦𑀺𑀘𑁆𑀙𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀢𑀺𑀡𑁆𑀡𑀦𑁆𑀦𑀁 𑀢𑀸𑀯 𑀫𑀽𑀮𑀸𑀦𑀁 𑀦𑀺𑀘𑁆𑀙𑀺𑀢𑀁 𑀳𑁄𑀢𑀼 𑀅𑀜𑁆𑀜𑀫𑀜𑁆𑀜𑁂𑀓𑀫𑀽𑀮𑀓𑀢𑁆𑀢𑀁, 𑀤𑁆𑀯𑀺𑀦𑁆𑀦𑀁 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀁 𑀳𑀻’’𑀢𑀺𑀆𑀤𑀺. 𑀲𑀫𑀸𑀦𑀫𑀽𑀮𑀢𑀸 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀅𑀜𑁆𑀜𑀫𑀜𑁆𑀜𑀲𑀫𑀸𑀦𑀫𑀽𑀮𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀦𑀁 𑀲𑀫𑀸𑀦𑀫𑀽𑀮𑀢𑀸𑀫𑀢𑁆𑀢𑀯𑀘𑀦𑀺𑀘𑁆𑀙𑀸𑀬 𑀏𑀓𑀫𑀽𑀮𑀕𑁆𑀕𑀳𑀡𑀁, 𑀦 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀯𑀺𑀲𑀺𑀝𑁆𑀞𑀲𑀫𑀸𑀦𑀫𑀽𑀮𑀢𑀸𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑁆𑀯𑀺𑀦𑁆𑀦𑀁 𑀫𑀽𑀮𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀏𑀓𑀫𑀽𑀮𑀸𑀦𑀁 𑀏𑀓𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁. 𑀬𑀣𑀸 𑀢𑁂𑀲𑀁 𑀲𑀫𑀸𑀦𑀫𑀽𑀮𑀢𑀸, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁𑀫𑀽𑀮𑁂𑀳𑀺 𑀅𑀜𑁆𑀜𑁂𑀳𑀻𑀢𑀺 𑀇𑀢𑀭𑀫𑀽𑀮𑁂𑀳𑀺 𑀫𑀽𑀮𑀤𑁆𑀯𑀬𑀢𑁄 𑀅𑀜𑁆𑀜𑁂𑀳𑀺 𑀲𑀳𑀚𑀸𑀢𑀥𑀫𑁆𑀫𑁂𑀳𑀺.

𑀇𑀤𑀸𑀦𑀺 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀧𑀝𑀺𑀮𑁄𑀫𑁂 ‘‘𑀓𑀼𑀲𑀮𑀸’’𑀇𑀘𑁆𑀘𑁂𑀯 𑀧𑀼𑀘𑁆𑀙𑀸 𑀓𑀢𑀸, 𑀦 ‘‘𑀓𑀼𑀲𑀮𑀫𑀽𑀮𑁂𑀦 𑀏𑀓𑀫𑀽𑀮𑀸’’𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀫𑀜𑁆𑀜𑀫𑀽𑀮𑀢𑁆𑀢𑁂 𑀧𑀦…𑀧𑁂… 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀦 𑀳𑀺 𑀓𑀼𑀲𑀮𑀫𑀽𑀮𑁂𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑁂𑀲𑀼 𑀓𑀺𑀜𑁆𑀘𑀺 𑀏𑀓𑀫𑀽𑀮𑀁 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀦 𑀫𑀽𑀮𑁂𑀳𑀺 𑀅𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀢𑁂𑀦𑁂𑀯𑀸𑀢𑀺 𑀫𑀽𑀮𑀬𑀼𑀢𑁆𑀢𑀢𑀸𑀬 𑀏𑀯 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀉𑀪𑀬𑀢𑁆𑀣𑀸𑀧𑀻𑀢𑀺 𑀅𑀜𑁆𑀜𑀫𑀜𑁆𑀜𑀫𑀽𑀮𑀸 𑀏𑀓𑀫𑀽𑀮𑀸𑀢𑀺 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼. ‘‘𑀓𑀼𑀲𑀮𑀫𑀽𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀓𑀼𑀲𑀮𑀫𑀽𑀮𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. 𑀬𑀤𑀺 𑀉𑀪𑀬𑀫𑁆𑀧𑀺 𑀯𑀘𑀦𑀁 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀅𑀣 𑀓𑀲𑁆𑀫𑀸 𑀅𑀦𑀼𑀮𑁄𑀫𑀧𑀼𑀘𑁆𑀙𑀸𑀬𑀫𑁂𑀯 𑀏𑀓𑀫𑀽𑀮𑀕𑁆𑀕𑀳𑀡𑀁 𑀓𑀢𑀁, 𑀦 𑀧𑀝𑀺𑀮𑁄𑀫𑀧𑀼𑀘𑁆𑀙𑀸𑀬𑀦𑁆𑀢𑀺 𑀉𑀪𑀬𑀢𑁆𑀣𑀸𑀧𑀺 𑀢𑀁 𑀕𑀳𑁂𑀢𑀩𑁆𑀩𑀁 𑀦 𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀫𑀽𑀮𑁂𑀓𑀫𑀽𑀮𑀬𑀫𑀓𑀤𑁂𑀲𑀦𑀸𑀳𑀺 𑀅𑀬𑀁 𑀅𑀜𑁆𑀜𑀫𑀜𑁆𑀜𑀬𑀫𑀓𑀤𑁂𑀲𑀦𑀸 𑀲𑀫𑀸𑀦𑀭𑀲𑀸 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀜𑁆𑀜𑀫𑀜𑁆𑀜𑀬𑀫𑀓𑁂. 𑀬𑀤𑀺𑀧𑀺 𑀏𑀓𑀫𑀽𑀮𑀸 𑀅𑀜𑁆𑀜𑀫𑀜𑁆𑀜𑀫𑀽𑀮𑀸𑀢𑀺 𑀇𑀤𑀁 𑀧𑀤𑀤𑁆𑀯𑀬𑀁 𑀯𑀼𑀢𑁆𑀢𑀦𑀬𑁂𑀦 𑀫𑀽𑀮𑀬𑀼𑀢𑁆𑀢𑀢𑀫𑁂𑀯 𑀯𑀤𑀢𑀺, 𑀢𑀣𑀸𑀧𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀮𑀓𑁆𑀔𑀡𑁂 𑀅𑀢𑁆𑀣𑁂𑀯 𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀽𑀮𑀓𑀸𑀦𑀁 𑀲𑀫𑀸𑀦𑀫𑀽𑀮𑀢𑀸 𑀏𑀓𑀫𑀽𑀮𑀢𑁆𑀢𑀦𑁆𑀢𑀺 𑀏𑀓𑀫𑀽𑀮𑀯𑀘𑀦𑀁 𑀢𑁂𑀲𑀼 𑀅𑀯𑀺𑀲𑁂𑀲𑀢𑁄 𑀫𑀽𑀮𑀲𑀩𑁆𑀪𑀸𑀯𑀫𑀢𑁆𑀢𑀁 𑀯𑀤𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀫𑀽𑀮𑀲𑀤𑁆𑀤𑁄 𑀯𑀺𑀬 𑀫𑀽𑀮𑁂𑀲𑀼 𑀮𑀩𑁆𑀪𑀫𑀸𑀦𑀁 𑀯𑀺𑀲𑁂𑀲𑀁, 𑀦 𑀘 𑀲𑀸𑀫𑀜𑁆𑀜𑁂 𑀦𑀺𑀘𑁆𑀙𑀬𑁄 𑀯𑀺𑀲𑁂𑀲𑁂 𑀲𑀁𑀲𑀬𑀁 𑀯𑀺𑀥𑀫𑀢𑀻𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀫𑀽𑀮𑀬𑁄𑀕𑀲𑀸𑀫𑀜𑁆𑀜𑁂…𑀧𑁂… 𑀧𑀯𑀢𑁆𑀢𑀸’’𑀢𑀺 𑀇𑀫𑀺𑀦𑀸. 𑀯𑀺𑀲𑁂𑀲𑁂 𑀧𑀦 𑀦𑀺𑀘𑁆𑀙𑀬𑁄 𑀲𑀸𑀫𑀜𑁆𑀜𑁂 𑀲𑀁𑀲𑀬𑀁 𑀯𑀺𑀥𑀫𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀫𑀽𑀮𑀬𑁄𑀕𑀯𑀺𑀲𑁂𑀲𑁂 𑀧𑀦…𑀧𑁂… 𑀦𑀺𑀘𑁆𑀙𑀺𑀢𑀫𑁂𑀯 𑀳𑁄𑀢𑀻’’𑀢𑀺. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀲𑁆𑀲𑁂𑀯 𑀢𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀭𑀸𑀫𑀲𑀦𑀁, 𑀯𑀺𑀲𑁂𑀲𑀦𑀺𑀘𑁆𑀙𑀬𑁂𑀦𑁂𑀯 𑀅𑀯𑀺𑀦𑀸𑀪𑀸𑀯𑀢𑁄, 𑀲𑀸𑀫𑀜𑁆𑀜𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸 𑀢𑀢𑁆𑀣 𑀯𑀸 𑀲𑀁𑀲𑀬𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑀫𑀽𑀮𑀸𑀢𑀺 𑀧𑀼𑀘𑁆𑀙𑀁 𑀅𑀓𑀢𑁆𑀯𑀸’’𑀢𑀺. 𑀓𑀼𑀲𑀮𑀪𑀸𑀯𑀤𑀻𑀧𑀓𑀁 𑀦 𑀳𑁄𑀢𑀻𑀢𑀺 𑀓𑀼𑀲𑀮𑀪𑀸𑀯𑀲𑁆𑀲𑁂𑀯 𑀤𑀻𑀧𑀓𑀁 𑀦 𑀳𑁄𑀢𑀺 𑀢𑀤𑀜𑁆𑀜𑀚𑀸𑀢𑀺𑀓𑀲𑁆𑀲𑀧𑀺 𑀤𑀻𑀧𑀦𑀢𑁄. 𑀢𑁂𑀦𑀸𑀳 ‘‘𑀓𑀼𑀲𑀮𑀪𑀸𑀯𑁂 𑀲𑀁𑀲𑀬𑀲𑀩𑁆𑀪𑀸𑀯𑀸’’𑀢𑀺. 𑀅𑀜𑁆𑀜𑀫𑀜𑁆𑀜𑀫𑀽𑀮𑀯𑀘𑀦𑀦𑁆𑀢𑀺 𑀓𑁂𑀯𑀮𑀁 𑀅𑀜𑁆𑀜𑀫𑀜𑁆𑀜𑀫𑀽𑀮𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀲𑀮𑀸𑀥𑀺𑀓𑀸𑀭𑀲𑁆𑀲 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀓𑀼𑀲𑀮𑀕𑁆𑀕𑀳𑀡𑁂 𑀓𑀸𑀭𑀡𑀫𑀸𑀳. 𑀏𑀓𑀫𑀽𑀮𑀕𑁆𑀕𑀳𑀡𑁂 𑀳𑀺 𑀧𑀬𑁄𑀚𑀦𑀸𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀓𑀼𑀲𑀮𑀲𑁆𑀲 𑀯𑀲𑁂𑀦 𑀘𑀸𑀬𑀁 𑀤𑁂𑀲𑀦𑀸𑀢𑀺.

𑁫𑁩-𑁬𑁧. 𑀫𑀽𑀮𑀦𑀬𑁂 𑀯𑀼𑀢𑁆𑀢𑁂 𑀏𑀯 𑀅𑀢𑁆𑀣𑁂𑀢𑀺 𑀫𑀽𑀮𑀦𑀬𑁂 𑀯𑀼𑀢𑁆𑀢𑁂 𑀏𑀯 𑀓𑀼𑀲𑀮𑀸𑀤𑀺𑀥𑀫𑁆𑀫𑁂. 𑀓𑀼𑀲𑀮𑀸𑀤𑀬𑁄 𑀳𑀺 𑀲𑀪𑀸𑀯𑀥𑀫𑁆𑀫𑀸 𑀇𑀥 𑀧𑀸𑀴𑀺𑀅𑀢𑁆𑀣𑀢𑀸𑀬 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑁄. 𑀓𑀼𑀲𑀮𑀫𑀽𑀮𑀪𑀸𑀯𑁂𑀦, 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦, 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘 𑀧𑀓𑀸𑀲𑁂𑀢𑀼𑀁. 𑀓𑀼𑀲𑀮𑀫𑀽𑀮𑀪𑀽𑀢𑀸 𑀫𑀽𑀮𑀸 𑀓𑀼𑀲𑀮𑀫𑀽𑀮𑀫𑀽𑀮𑀸𑀢𑀺 𑀲𑀫𑀸𑀲𑀬𑁄𑀚𑀦𑀸. 𑀫𑀽𑀮𑀯𑀘𑀦𑀜𑁆𑀳𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀁. 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀧𑀺 𑀫𑀽𑀮𑀥𑀫𑁆𑀫𑀸 𑀅𑀢𑁆𑀣𑀻𑀢𑀺 𑀓𑀼𑀲𑀮𑀫𑀽𑀮𑀪𑀸𑀯𑁂𑀦 𑀫𑀽𑀮𑀥𑀫𑁆𑀫𑀸 𑀯𑀺𑀲𑁂𑀲𑀺𑀢𑀸. 𑀫𑀽𑀮𑀕𑁆𑀕𑀳𑀡𑁂𑀦 𑀘 𑀫𑀽𑀮𑀯𑀦𑁆𑀢𑀸𑀦𑀁 𑀫𑀽𑀮𑀬𑁄𑀕𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀲𑀫𑀸𑀦𑁂𑀦 𑀫𑀽𑀮𑁂𑀦, 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦, 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘 𑀧𑀓𑀸𑀲𑁂𑀢𑀼𑀁 ‘‘𑀏𑀓𑀫𑀽𑀮𑀫𑀽𑀮𑀸’’𑀢𑀺, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀽𑀮𑁂𑀦 𑀫𑀽𑀮𑀪𑀸𑀯𑁂𑀦, 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦, 𑀫𑀽𑀮𑀬𑁄𑀕𑀤𑀻𑀧𑀦𑁂𑀦 𑀘 𑀧𑀓𑀸𑀲𑁂𑀢𑀼𑀁 ‘‘𑀅𑀜𑁆𑀜𑀫𑀜𑁆𑀜𑀫𑀽𑀮𑀫𑀽𑀮𑀸’’𑀢𑀺 𑀫𑀽𑀮𑀫𑀽𑀮𑀦𑀬𑁄 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀢𑀻𑀲𑀼𑀧𑀺 𑀬𑀫𑀓𑁂𑀲𑀼 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀦𑀫𑁂𑀯𑁂𑀢𑁆𑀣 𑀧𑀭𑀺𑀬𑀸𑀬𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑀁.

𑀫𑀽𑀮𑀬𑁄𑀕𑀁 𑀤𑀻𑀧𑁂𑀢𑀼𑀦𑁆𑀢𑀺 𑀫𑀽𑀮𑀬𑁄𑀕𑀫𑁂𑀯 𑀧𑀥𑀸𑀦𑀁 𑀲𑀸𑀢𑀺𑀲𑀬𑀜𑁆𑀘 𑀓𑀢𑁆𑀯𑀸 𑀤𑀻𑀧𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀳𑀺 𑀓𑀼𑀲𑀮𑀸𑀦𑀺 𑀫𑀽𑀮𑀸𑀦𑀺 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀫𑀽𑀮𑀓𑀸𑀦𑀻𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁂 𑀫𑀽𑀮𑀬𑁄𑀕𑁄 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄 𑀳𑁄𑀢𑀺, 𑀦 𑀏𑀯𑀁 ‘‘𑀓𑀼𑀲𑀮𑀲𑀗𑁆𑀔𑀸𑀢𑀸 𑀫𑀽𑀮𑀸 𑀓𑀼𑀲𑀮𑀫𑀽𑀮𑀸’’𑀢𑀺 𑀓𑁂𑀯𑀮𑀁, ‘‘𑀓𑀼𑀲𑀮𑀫𑀽𑀮𑀫𑀽𑀮𑀸’’𑀢𑀺 𑀲𑀯𑀺𑀲𑁂𑀲𑀦𑀁 𑀯𑀸 𑀯𑀼𑀢𑁆𑀢𑁂 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀲𑀫𑀸𑀲𑁂. 𑀢𑁂𑀦𑀸𑀳 ‘‘𑀅𑀜𑁆𑀜𑀧𑀤𑀢𑁆𑀣…𑀧𑁂… 𑀤𑀻𑀧𑁂𑀢𑀼’’𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀯𑀸𑀢𑀺 ‘‘𑀓𑀼𑀲𑀮𑀫𑀽𑀮𑀪𑀸𑀯𑁂𑀦 𑀫𑀽𑀮𑀲𑁆𑀲 𑀯𑀺𑀲𑁂𑀲𑀦𑁂𑀦𑀸’’𑀢𑀺𑀆𑀤𑀺𑀦𑀸 𑀫𑀽𑀮𑀫𑀽𑀮𑀦𑀬𑁂 𑀘, ‘‘𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀦𑁆𑀢𑁂𑀦 𑀓-𑀓𑀸𑀭𑁂𑀦𑀸’’𑀢𑀺𑀆𑀤𑀺𑀦𑀸 𑀫𑀽𑀮𑀓𑀦𑀬𑁂 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀏𑀯. 𑀯𑀘𑀦𑀧𑀭𑀺𑀬𑀸𑀬𑁄 𑀫𑀽𑀮𑀫𑀽𑀮𑀓𑀦𑀬𑁂 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄.

𑁭𑁪-𑁮𑁫. 𑀦 𑀏𑀓𑀫𑀽𑀮𑀪𑀸𑀯𑀁 𑀮𑀪𑀫𑀸𑀦𑁂𑀳𑀻𑀢𑀺 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮𑀓𑀁 𑀢𑀣𑀸𑀯𑀢𑁆𑀢𑀩𑁆𑀩𑀢𑀁 𑀮𑀪𑀫𑀸𑀦𑁂𑀳𑀺 𑀅𑀝𑁆𑀞𑀸𑀭𑀲𑀅𑀳𑁂𑀢𑀼𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺 𑀏𑀓𑀢𑁄 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀬𑀣𑀸 𑀳𑀺 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀬𑁄 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑀺𑀢𑀸 𑀅𑀳𑁂𑀢𑀼𑀓𑀯𑁄𑀳𑀸𑀭𑀁 𑀮𑀪𑀦𑁆𑀢𑀺, 𑀦 𑀏𑀯𑀁 𑀲𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁. 𑀢𑁂𑀦𑀸𑀳 ‘‘𑀅𑀳𑁂𑀢𑀼𑀓𑀯𑁄𑀳𑀸𑀭𑀭𑀳𑀺𑀢𑀁 𑀓𑀢𑁆𑀯𑀸’’𑀢𑀺. 𑀏𑀢𑁆𑀣 𑀘 ‘‘𑀲𑀩𑁆𑀩𑀁 𑀭𑀽𑀧𑀁 𑀦 𑀳𑁂𑀢𑀼𑀓𑀫𑁂𑀯, 𑀅𑀳𑁂𑀢𑀼𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀲𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀭𑀽𑀧𑀁 𑀅𑀳𑁂𑀢𑀼𑀓𑀁, ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸 𑀳𑁂𑀢𑀽 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁩) 𑀧𑀦 𑀯𑀘𑀦𑀢𑁄 𑀳𑁂𑀢𑀼𑀧𑀘𑁆𑀘𑀬𑀬𑁄𑀕𑁂𑀦 𑀲𑀳𑁂𑀢𑀼𑀓𑀲𑀫𑀼𑀝𑁆𑀞𑀸𑀦𑀲𑁆𑀲 𑀭𑀽𑀧𑀲𑁆𑀲 𑀅𑀳𑁂𑀢𑀼𑀓𑀯𑁄𑀳𑀸𑀭𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦 ‘‘𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀲𑀳𑁂𑀢𑀼𑀓𑀯𑁄𑀳𑀸𑀭𑁂𑀦 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀁 𑀯𑀢𑁆𑀯𑀸 𑀅𑀜𑁆𑀜𑀣𑀸 ‘𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀼𑀢𑁆𑀢𑀫𑁂𑀯 𑀅𑀳𑁂𑀢𑀼𑀓𑀯𑁄𑀳𑀸𑀭𑀸𑀪𑀸𑀯𑁂𑀦 𑀲𑀳𑁂𑀢𑀼𑀓𑀢𑀸𑀧𑀭𑀺𑀬𑀸𑀬𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀅𑀧𑀺𑀘 𑀳𑁂𑀢𑀼𑀧𑀘𑁆𑀘𑀬𑀲𑀩𑁆𑀪𑀸𑀯𑀢𑁄 𑀢𑀲𑁆𑀲 𑀲𑀳𑁂𑀢𑀼𑀓𑀢𑀸𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀦 𑀯𑀸 𑀲𑀳𑁂𑀢𑀼𑀓𑀤𑀼𑀓𑁂 𑀯𑀺𑀬…𑀧𑁂… 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢’’𑀦𑁆𑀢𑀺. 𑀏𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀏𑀓𑀫𑀽𑀮𑀓𑀤𑀼𑀓𑁂. 𑀳𑁂𑀢𑀼𑀧𑀘𑁆𑀘𑀬𑀬𑁄𑀕𑀸𑀬𑁄𑀕𑀯𑀲𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀬𑁄𑀕𑀸𑀬𑁄𑀕𑀯𑀲𑁂𑀦, 𑀳𑁂𑀢𑀼𑀧𑀘𑁆𑀘𑀬𑀲𑁆𑀲 𑀲𑀩𑁆𑀪𑀸𑀯𑀸𑀲𑀩𑁆𑀪𑀸𑀯𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀳𑁂𑀢𑀼𑀓𑀯𑁄𑀳𑀸𑀭𑀫𑁂𑀯 𑀮𑀪𑀢𑀺 𑀧𑀘𑁆𑀘𑀬𑀪𑀽𑀢𑀳𑁂𑀢𑀼𑀲𑀩𑁆𑀪𑀸𑀯𑀢𑁄.

𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀲𑀳𑁂𑀢𑀼𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀫𑁆𑀧𑀺 𑀲𑀫𑀽𑀮𑀓𑀢𑁆𑀢𑀸 ‘𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀲𑀢𑀺𑀧𑀺 𑀲𑀫𑀽𑀮𑀓𑀢𑁆𑀢𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀳𑁂𑀢𑀼𑀓𑀁 𑀦 𑀳𑁄𑀢𑀻𑀢𑀺 ‘𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮’𑀦𑁆𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 ‘𑀅𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀦 𑀏𑀓𑀫𑀽𑀮𑀁, 𑀲𑀳𑁂𑀢𑀼𑀓𑀁 𑀅𑀩𑁆𑀬𑀸𑀓𑀢𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮’𑀦𑁆𑀢𑀺 𑀤𑁆𑀯𑀻𑀲𑀼𑀧𑀺 𑀧𑀤𑁂𑀲𑀼 𑀅𑀦𑀯𑀭𑁄𑀥𑀢𑁄 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 ‘‘𑀲𑀳𑁂𑀢𑀼𑀓𑀅𑀩𑁆𑀬𑀸𑀓𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀅𑀩𑁆𑀬𑀸𑀓𑀢𑀫𑀽𑀮𑁂𑀦 𑀏𑀓𑀫𑀽𑀮𑀁 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀢𑀲𑁆𑀲 𑀏𑀓𑀫𑀽𑀮𑀪𑀸𑀯𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁮𑁬-𑁯𑁭. 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀭𑀸𑀲𑀺𑀢𑁄 𑀦𑀫𑀦𑀦𑀸𑀫𑀦𑀲𑀗𑁆𑀔𑀸𑀢𑁂𑀦 𑀯𑀺𑀲𑁂𑀲𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀕𑀳𑀡𑀁 𑀦𑀺𑀤𑁆𑀥𑀸𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀸𑀫𑀸𑀦𑀁 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸’’𑀢𑀺. 𑀢𑁂𑀦 𑀢𑁂𑀲𑀁 𑀅𑀥𑀺𑀓𑀪𑀸𑀯𑀫𑀸𑀳 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯 𑀧𑀓𑀭𑀡𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀤𑀺 𑀏𑀯𑀁 ‘‘𑀅𑀳𑁂𑀢𑀼𑀓𑀁 𑀦𑀸𑀫𑀁 𑀲𑀳𑁂𑀢𑀼𑀓𑀁 𑀦𑀸𑀫’’𑀦𑁆𑀢𑀺 𑀧𑀸𑀞𑀦𑁆𑀢𑀭𑁂 𑀓𑀲𑁆𑀫𑀸 𑀦𑀸𑀫𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀲𑀼𑀧𑀸𑀓𑀝𑀪𑀸𑀯𑀢𑁆𑀣’’𑀦𑁆𑀢𑀺, 𑀧𑀭𑀺𑀩𑁆𑀬𑀢𑁆𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑁂 𑀓𑀺𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.