𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀲𑀸𑀭𑀢𑁆𑀣𑀤𑀻𑀧𑀦𑀻-𑀝𑀻𑀓𑀸 (𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀫𑀳𑀸𑀓𑀸𑀭𑀼𑀡𑀺𑀓𑀁 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘 𑀯𑀺𑀫𑀮𑀁 𑀯𑀭𑀁;

𑀯𑀦𑁆𑀤𑁂 𑀅𑀭𑀺𑀬𑀲𑀗𑁆𑀖𑀜𑁆𑀘, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀦𑀺𑀭𑀗𑁆𑀕𑀡𑀁.

𑀉𑀴𑀸𑀭𑀧𑀼𑀜𑁆𑀜𑀢𑁂𑀚𑁂𑀦, 𑀓𑀢𑁆𑀯𑀸 𑀲𑀢𑁆𑀢𑀼𑀯𑀺𑀫𑀤𑁆𑀤𑀦𑀁;

𑀧𑀢𑁆𑀢𑀭𑀚𑁆𑀚𑀸𑀪𑀺𑀲𑁂𑀓𑁂𑀦, 𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀺𑀦𑀸.

𑀦𑀺𑀲𑁆𑀲𑀸𑀬 𑀲𑀻𑀳𑀴𑀺𑀦𑁆𑀤𑁂𑀦, 𑀬𑀁 𑀧𑀭𑀓𑁆𑀓𑀫𑀩𑀸𑀳𑀼𑀦𑀸;

𑀓𑀢𑁆𑀯𑀸 𑀦𑀺𑀓𑀸𑀬𑀲𑀸𑀫𑀕𑁆𑀕𑀺𑀁, 𑀲𑀸𑀲𑀦𑀁 𑀲𑀼𑀯𑀺𑀲𑁄𑀥𑀺𑀢𑀁.

𑀓𑀲𑁆𑀲𑀧𑀁 𑀢𑀁 𑀫𑀳𑀸𑀣𑁂𑀭𑀁, 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀬𑀓𑀁;

𑀤𑀻𑀧𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀫𑁆𑀳𑀺, 𑀲𑀸𑀲𑀦𑁄𑀤𑀬𑀓𑀸𑀭𑀓𑀁.

𑀧𑀝𑀺𑀧𑀢𑁆𑀢𑀺𑀧𑀭𑀸𑀥𑀻𑀦𑀁, 𑀲𑀤𑀸𑀭𑀜𑁆𑀜𑀦𑀺𑀯𑀸𑀲𑀺𑀦𑀁;

𑀧𑀸𑀓𑀝𑀁 𑀕𑀕𑀦𑁂 𑀘𑀦𑁆𑀤-𑀫𑀡𑁆𑀟𑀮𑀁 𑀯𑀺𑀬 𑀲𑀸𑀲𑀦𑁂.

𑀲𑀗𑁆𑀖𑀲𑁆𑀲 𑀧𑀺𑀢𑀭𑀁 𑀯𑀦𑁆𑀤𑁂, 𑀯𑀺𑀦𑀬𑁂 𑀲𑀼𑀯𑀺𑀲𑀸𑀭𑀤𑀁;

𑀬𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄𑀳𑀁, 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄𑀲𑁆𑀫𑀺 𑀲𑀸𑀲𑀦𑁂.

𑀅𑀦𑀼𑀣𑁂𑀭𑀁 𑀫𑀳𑀸𑀧𑀼𑀜𑁆𑀜𑀁, 𑀲𑀼𑀫𑁂𑀥𑀁 𑀲𑀼𑀢𑀺𑀯𑀺𑀲𑁆𑀲𑀼𑀢𑀁;

𑀅𑀯𑀺𑀔𑀡𑁆𑀟𑀺𑀢𑀲𑀻𑀮𑀸𑀤𑀺-𑀧𑀭𑀺𑀲𑀼𑀤𑁆𑀥𑀕𑀼𑀡𑁄𑀤𑀬𑀁.

𑀩𑀳𑀼𑀲𑁆𑀲𑀼𑀢𑀁 𑀲𑀢𑀺𑀫𑀦𑁆𑀢𑀁, 𑀤𑀦𑁆𑀢𑀁 𑀲𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀦𑀫𑀸𑀫𑀺 𑀲𑀺𑀭𑀲𑀸 𑀥𑀻𑀭𑀁, 𑀕𑀭𑀼𑀁 𑀫𑁂 𑀕𑀡𑀯𑀸𑀘𑀓𑀁.

𑀆𑀕𑀢𑀸𑀕𑀫𑀢𑀓𑁆𑀓𑁂𑀲𑀼, 𑀲𑀤𑁆𑀤𑀲𑀢𑁆𑀣𑀦𑀬𑀜𑁆𑀜𑀼𑀲𑀼;

𑀬𑀲𑁆𑀲𑀦𑁆𑀢𑁂𑀯𑀸𑀲𑀺𑀪𑀺𑀓𑁆𑀔𑀽𑀲𑀼, 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁.

𑀯𑀺𑀦𑀬𑀝𑁆𑀞𑀓𑀣𑀸𑀬𑀸𑀳𑀁, 𑀮𑀻𑀦𑀲𑀸𑀭𑀢𑁆𑀣𑀤𑀻𑀧𑀦𑀺𑀁;

𑀓𑀭𑀺𑀲𑁆𑀲𑀸𑀫𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀁, 𑀧𑀭𑀺𑀧𑀼𑀡𑁆𑀡𑀫𑀦𑀸𑀓𑀼𑀮𑀁.

𑀧𑁄𑀭𑀸𑀡𑁂𑀳𑀺 𑀓𑀢𑀁 𑀬𑀁 𑀢𑀼, 𑀮𑀻𑀦𑀢𑁆𑀣𑀲𑁆𑀲 𑀧𑀓𑀸𑀲𑀦𑀁;

𑀦 𑀢𑀁 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀽𑀦𑀁, 𑀅𑀢𑁆𑀣𑀁 𑀲𑀸𑀥𑁂𑀢𑀺 𑀲𑀩𑁆𑀩𑀲𑁄.

𑀤𑀼𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀸𑀬, 𑀲𑀻𑀳𑀴𑀸𑀬 𑀦𑀺𑀭𑀼𑀢𑁆𑀢𑀺𑀬𑀸;

𑀕𑀡𑁆𑀞𑀺𑀧𑀤𑁂𑀲𑁆𑀯𑀦𑁂𑀓𑁂𑀲𑀼, 𑀮𑀺𑀔𑀺𑀢𑀁 𑀓𑀺𑀜𑁆𑀘𑀺 𑀓𑀢𑁆𑀣𑀘𑀺.

𑀫𑀸𑀕𑀥𑀺𑀓𑀸𑀬 𑀪𑀸𑀲𑀸𑀬, 𑀆𑀭𑀪𑀺𑀢𑁆𑀯𑀸𑀧𑀺 𑀓𑁂𑀦𑀘𑀺;

𑀪𑀸𑀲𑀦𑁆𑀢𑀭𑁂𑀳𑀺 𑀲𑀫𑁆𑀫𑀺𑀲𑁆𑀲𑀁, 𑀮𑀺𑀔𑀺𑀢𑀁 𑀓𑀺𑀜𑁆𑀘𑀺𑀤𑁂𑀯 𑀘.

𑀅𑀲𑀸𑀭𑀕𑀦𑁆𑀣𑀪𑀸𑀭𑁄𑀧𑀺, 𑀢𑀢𑁆𑀣𑁂𑀯 𑀩𑀳𑀼 𑀤𑀺𑀲𑁆𑀲𑀢𑀺;

𑀆𑀓𑀼𑀮𑀜𑁆𑀘 𑀓𑀢𑀁 𑀬𑀢𑁆𑀣, 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁆𑀧𑀺 𑀅𑀢𑁆𑀣𑀢𑁄.

𑀢𑀢𑁄 𑀅𑀧𑀭𑀺𑀧𑀼𑀡𑁆𑀡𑁂𑀦, 𑀢𑀸𑀤𑀺𑀲𑁂𑀦𑁂𑀢𑁆𑀣 𑀲𑀩𑁆𑀩𑀲𑁄;

𑀓𑀣𑀫𑀢𑁆𑀣𑀁 𑀯𑀺𑀚𑀸𑀦𑀦𑁆𑀢𑀺, 𑀦𑀸𑀦𑀸𑀤𑁂𑀲𑀦𑀺𑀯𑀸𑀲𑀺𑀦𑁄.

𑀪𑀸𑀲𑀦𑁆𑀢𑀭𑀁 𑀢𑀢𑁄 𑀳𑀺𑀢𑁆𑀯𑀸, 𑀲𑀸𑀭𑀫𑀸𑀤𑀸𑀬 𑀲𑀩𑁆𑀩𑀲𑁄;

𑀅𑀦𑀸𑀓𑀼𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀭𑀺𑀧𑀼𑀡𑁆𑀡𑀯𑀺𑀦𑀺𑀘𑁆𑀙𑀬𑀦𑁆𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑀼𑀓𑀸𑀫𑁄 𑀢𑀲𑁆𑀲 𑀯𑀺𑀲𑀺𑀝𑁆𑀞𑀕𑀼𑀡𑀬𑁄𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀺𑀝𑁆𑀞𑀕𑀼𑀡𑀬𑁄𑀕𑁂𑀦 𑀳𑀺 𑀯𑀦𑁆𑀤𑀦𑀸𑀭𑀳𑀪𑀸𑀯𑁄, 𑀯𑀦𑁆𑀤𑀦𑀸𑀭𑀳𑁂 𑀘 𑀓𑀢𑀸 𑀯𑀦𑁆𑀤𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀲𑀸𑀥𑁂𑀢𑀺. 𑀏𑀢𑁆𑀣 𑀘 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀧𑁆𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 𑀯𑀡𑁆𑀡𑀬𑀦𑁆𑀢𑀺 𑁋

‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀣 𑀯𑀸 𑀫𑀗𑁆𑀕𑀮𑀪𑀸𑀯𑀢𑁄, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺.

𑀫𑀬𑀁 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀬𑁄𑀚𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀳𑀺 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀇𑀘𑁆𑀘𑁂𑀯𑀫𑀘𑁆𑀘𑀦𑁆𑀢𑀦𑀫𑀲𑁆𑀲𑀦𑁂𑀬𑁆𑀬𑀁,

𑀦𑀫𑀲𑁆𑀲𑀫𑀸𑀦𑁄 𑀭𑀢𑀦𑀢𑁆𑀢𑀬𑀁 𑀬𑀁;

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀯𑀺𑀧𑀼𑀮𑀁 𑀅𑀮𑀢𑁆𑀣𑀁,

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄’’𑀢𑀺.

𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑁂𑀦 𑀘𑁂𑀢𑁆𑀣 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀸𑀝𑀯𑀪𑀸𑀯𑀢𑁄, 𑀢𑀸𑀬 𑀧𑀜𑁆𑀜𑀸𑀧𑀸𑀝𑀯𑀜𑁆𑀘 𑀭𑀸𑀕𑀸𑀤𑀺𑀫𑀮𑀯𑀺𑀥𑀫𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁧.𑁧𑁧).

𑀢𑀲𑁆𑀫𑀸 𑀭𑀢𑀦𑀢𑁆𑀢𑀬𑀧𑀽𑀚𑀦𑁂𑀦 𑀯𑀺𑀓𑁆𑀔𑀸𑀮𑀺𑀢𑀫𑀮𑀸𑀬 𑀧𑀜𑁆𑀜𑀸𑀬 𑀧𑀸𑀝𑀯𑀲𑀺𑀤𑁆𑀥𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀦𑀲𑁆𑀲 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀸 𑀧𑀜𑁆𑀜𑀸𑀧𑀸𑀝𑀯𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀁 𑁋

‘‘𑀏𑀯𑀁 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁧𑁧.𑁧𑁧.).

𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁯; 𑀫𑀺. 𑀧. 𑁨.𑁧.𑁧𑁪). 𑀢𑀢𑁄 𑀏𑀯𑀁 𑀧𑀝𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀧𑀝𑀺𑀜𑁆𑀜𑀸𑀫𑀳𑀢𑁆𑀢𑀓𑀢𑀁 𑀔𑁂𑀤𑀫𑀪𑀺𑀪𑀼𑀬𑁆𑀬 𑀅𑀦𑀦𑁆𑀢𑀭𑀸𑀬𑁂𑀦 𑀲𑀁𑀯𑀡𑁆𑀡𑀦𑀁 𑀲𑀫𑀸𑀧𑀬𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣’’𑀦𑁆𑀢𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀟𑁆𑀠𑀦𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀢𑀦𑀢𑁆𑀢𑀬𑀧𑀡𑀸𑀫𑁂𑀦 𑀳𑀺 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺. (𑀥. 𑀧. 𑁧𑁦𑁯);

𑀢𑀢𑁄 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀼𑀟𑁆𑀠𑀺𑀬𑀸 𑀳𑁄𑀢𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀫𑀺𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣’’𑀦𑁆𑀢𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀕𑀸𑀭𑀯𑀲𑁆𑀲 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑀸𑀯𑀳𑀢𑁆𑀢𑀸. 𑀅𑀧𑀭𑀺𑀳𑀸𑀦𑀸𑀯𑀳𑀜𑁆𑀳𑀺 𑀢𑀻𑀲𑀼𑀧𑀺 𑀭𑀢𑀦𑁂𑀲𑀼 𑀕𑀸𑀭𑀯𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑁆𑀣𑀼𑀕𑀸𑀭𑀯𑀢𑀸 𑀥𑀫𑁆𑀫𑀕𑀸𑀭𑀯𑀢𑀸 𑀲𑀗𑁆𑀖𑀕𑀸𑀭𑀯𑀢𑀸 𑀲𑀺𑀓𑁆𑀔𑀸𑀕𑀸𑀭𑀯𑀢𑀸 𑀲𑀫𑀸𑀥𑀺𑀕𑀸𑀭𑀯𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑁄𑀯𑀘𑀲𑁆𑀲𑀢𑀸’’𑀢𑀺 (𑀅. 𑀦𑀺. 𑁭.𑁩𑁪).

𑀳𑁄𑀢𑁂𑀯 𑀘 𑀢𑀢𑁄 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑁂𑀦 𑀬𑀣𑀸𑀧𑀝𑀺𑀜𑁆𑀜𑀸𑀢𑀧𑀭𑀺𑀲𑀫𑀸𑀧𑀦𑀁.

𑀅𑀣 𑀯𑀸 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸𑀬 𑀧𑀼𑀜𑁆𑀜𑀸𑀢𑀺𑀲𑀬𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀧𑀼𑀜𑁆𑀜𑀸𑀢𑀺𑀲𑀬𑀢𑁆𑀢𑀁 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

‘‘𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀥. 𑀧. 𑁧𑁯𑁫-𑁧𑁯𑁬; 𑀅𑀧. 𑀣𑁂𑀭 𑁧.𑁧𑁦.𑁧-𑁨);

𑀧𑀼𑀜𑁆𑀜𑀸𑀢𑀺𑀲𑀬𑁄 𑀘 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀲𑀫𑀸𑀧𑀦𑀼𑀧𑀸𑀬𑁄. 𑀬𑀣𑀸𑀳 𑁋

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁦);

𑀉𑀧𑀸𑀬𑁂𑀲𑀼 𑀘 𑀧𑀝𑀺𑀧𑀦𑁆𑀦𑀲𑁆𑀲 𑀳𑁄𑀢𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀁. 𑀭𑀢𑀦𑀢𑁆𑀢𑀬𑀧𑀽𑀚𑀸 𑀳𑀺 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀁𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀁 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀦 𑀲𑀧𑁆𑀧𑀬𑁄𑀚𑀦𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀪𑀕𑀯𑀢𑁄 𑀯𑀦𑁆𑀤𑀦𑀁 𑀓𑀸𑀢𑀼𑀁 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 ‘‘𑀬𑁄 𑀓𑀧𑁆𑀧…𑀧𑁂… 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲𑀸’’𑀢𑀺 𑀆𑀳. 𑀏𑀢𑁆𑀣 𑀧𑀦 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀬𑀲𑁆𑀫𑀸 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸, 𑀢𑀲𑁆𑀫𑀸 𑀓𑀭𑀼𑀡𑀸𑀧𑁆𑀧𑀥𑀸𑀦𑀫𑁂𑀯 𑀪𑀕𑀯𑀢𑁄 𑀣𑁄𑀫𑀦𑀁 𑀆𑀭𑀤𑁆𑀥𑀁. 𑀏𑀲𑀸 𑀳𑀺 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀆𑀭𑀫𑁆𑀪𑀸𑀦𑀼𑀭𑀽𑀧𑀣𑁄𑀫𑀦𑀸. 𑀢𑁂𑀦𑁂𑀯 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀁, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸 𑀯𑀺𑀬 𑀲𑀢𑁆𑀢𑁂𑀲𑀼, 𑀧𑀜𑁆𑀜𑀸 𑀬𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺 𑀧𑀜𑁆𑀜𑀸𑀧𑁆𑀧𑀥𑀸𑀦𑀜𑁆𑀘 𑀣𑁄𑀫𑀦𑀁 𑀆𑀭𑀤𑁆𑀥𑀁. 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀸𑀥𑀺𑀫𑀼𑀢𑁆𑀢𑀺𑀘𑀭𑀺𑀬𑀸𑀤𑀺𑀪𑁂𑀤𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀳𑀺 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀢𑀤𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀕𑀫𑁆𑀪𑀻𑀭𑀫𑀢𑁆𑀣𑀧𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀘 𑀓𑁂𑀯𑀮𑀁 𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄.

𑀯𑀺𑀦𑀬𑀤𑁂𑀲𑀦𑀸 𑀧𑀦 𑀆𑀲𑀬𑀸𑀤𑀺𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀓𑀭𑀼𑀡𑀸𑀬 𑀧𑀸𑀓𑀢𑀺𑀓𑀲𑀢𑁆𑀢𑁂𑀦𑀧𑀺 𑀅𑀲𑁄𑀢𑀩𑁆𑀩𑀸𑀭𑀳𑀁 𑀲𑀼𑀡𑀦𑁆𑀢𑁄 𑀅𑀧𑀼𑀘𑁆𑀙𑀺𑀢𑀩𑁆𑀩𑀸𑀭𑀳𑀁 𑀧𑀼𑀘𑁆𑀙𑀦𑁆𑀢𑁄 𑀅𑀯𑀢𑁆𑀢𑀩𑁆𑀩𑀸𑀭𑀳𑀜𑁆𑀘 𑀯𑀤𑀦𑁆𑀢𑁄 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻𑀢𑀺 𑀓𑀭𑀼𑀡𑀸𑀧𑁆𑀧𑀥𑀸𑀦𑀸. 𑀢𑀣𑀸 𑀳𑀺 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑀳𑀺𑀭𑁄𑀢𑁆𑀢𑀧𑁆𑀧𑁄𑀧𑀺 𑀪𑀕𑀯𑀸 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺 ‘‘𑀲𑀺𑀔𑀭𑀡𑀻𑀲𑀻’’𑀢𑀺𑀆𑀤𑀻𑀦𑀺 𑀯𑀘𑀦𑀸𑀦𑀺 𑀬𑀣𑀸𑀧𑀭𑀸𑀥𑀜𑁆𑀘 𑀕𑀭𑀳𑀯𑀘𑀦𑀸𑀦𑀺 𑀯𑀺𑀦𑀬𑀧𑀺𑀝𑀓𑀤𑁂𑀲𑀦𑀸𑀬 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀅𑀪𑀸𑀲𑀺, 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀸𑀧𑁂𑀓𑁆𑀔𑀸𑀬 𑀯𑁂𑀭𑀜𑁆𑀚𑀸𑀤𑀻𑀲𑀼 𑀲𑀸𑀭𑀻𑀭𑀺𑀓𑀜𑁆𑀘 𑀔𑁂𑀤𑀫𑀦𑀼𑀪𑁄𑀲𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀪𑀽𑀫𑀦𑁆𑀢𑀭𑀧𑀘𑁆𑀘𑀬𑀸𑀓𑀸𑀭𑀲𑀫𑀬𑀦𑁆𑀢𑀭𑀓𑀣𑀸𑀦𑀁 𑀯𑀺𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀜𑁆𑀜𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀢𑀺𑀲𑀬𑀓𑀺𑀘𑁆𑀘𑀯𑀢𑀻, 𑀓𑀭𑀼𑀡𑀸𑀬 𑀓𑀺𑀘𑁆𑀘𑀁 𑀧𑀦 𑀢𑀢𑁄𑀧𑀺 𑀅𑀥𑀺𑀓𑀦𑁆𑀢𑀺 𑀓𑀭𑀼𑀡𑀸𑀧𑁆𑀧𑀥𑀸𑀦𑀸 𑀯𑀺𑀦𑀬𑀤𑁂𑀲𑀦𑀸. 𑀓𑀭𑀼𑀡𑀸𑀩𑁆𑀬𑀸𑀧𑀸𑀭𑀸𑀥𑀺𑀓𑀢𑀸𑀬 𑀳𑀺 𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀢𑀸. 𑀢𑀲𑁆𑀫𑀸 𑀆𑀭𑀫𑁆𑀪𑀸𑀦𑀼𑀭𑀽𑀧𑀁 𑀓𑀭𑀼𑀡𑀸𑀧𑁆𑀧𑀥𑀸𑀦𑀫𑁂𑀯 𑀏𑀢𑁆𑀣 𑀣𑁄𑀫𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑀸 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 𑀢𑀁𑀫𑀽𑀮𑀓𑀢𑁆𑀢𑀸 𑀲𑁂𑀲𑀩𑀼𑀤𑁆𑀥𑀕𑀼𑀡𑀸𑀦𑀁. 𑀫𑀳𑀸𑀓𑀭𑀼𑀡𑀸𑀬 𑀯𑀸 𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀅𑀜𑁆𑀜𑀢𑀭𑀢𑁆𑀢𑀸 𑀢𑀁𑀲𑀳𑀘𑀭𑀺𑀢𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀫𑁆𑀧𑀺 𑀕𑀳𑀡𑀲𑀩𑁆𑀪𑀸𑀯𑀢𑁄 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀦𑀬𑀢𑁄 𑀤𑀲𑁆𑀲𑀺𑀢𑀸𑀯 𑀳𑁄𑀦𑁆𑀢𑀺. 𑀏𑀲𑁄𑀬𑁂𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑁄. 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫);

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺𑀘 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺𑀆𑀤𑀺𑀦𑀸 𑀓𑀭𑀼𑀡𑀸𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄.

𑀅𑀬𑀁 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀬𑁄𑀢𑀺 𑀅𑀦𑀺𑀬𑀫𑀯𑀘𑀦𑀁. 𑀢𑀲𑁆𑀲 ‘‘𑀦𑀸𑀣𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. ‘‘𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺𑀆𑀤𑀺𑀦𑀸 𑀧𑀦 𑀬𑀸𑀬 𑀓𑀭𑀼𑀡𑀸𑀬 𑀲𑁄 ‘‘𑀫𑀳𑀸𑀓𑀸𑀭𑀼𑀡𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀯𑀲𑁂𑀦 𑀓𑀧𑁆𑀧𑀓𑁄𑀝𑀺𑀕𑀡𑀦𑀸𑀬𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀁 𑀮𑁄𑀓𑀳𑀺𑀢𑀢𑁆𑀣𑀸𑀬 𑀅𑀢𑀺𑀤𑀼𑀓𑁆𑀓𑀭𑀁 𑀓𑀭𑁄𑀦𑁆𑀢𑀲𑁆𑀲 𑀪𑀕𑀯𑀢𑁄 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀤𑀲𑁆𑀲𑁂𑀢𑀺. 𑀓𑀭𑀼𑀡𑀸𑀬 𑀩𑀮𑁂𑀦𑁂𑀯 𑀳𑀺 𑀲𑁄 𑀪𑀕𑀯𑀸 𑀳𑀢𑁆𑀣𑀕𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀧𑀳𑀸𑀬 𑀲𑀁𑀲𑀸𑀭𑀧𑀗𑁆𑀓𑁂 𑀦𑀺𑀫𑀼𑀕𑁆𑀕𑀁 𑀲𑀢𑁆𑀢𑀦𑀺𑀓𑀸𑀬𑀁 𑀢𑀢𑁄 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀘𑀺𑀦𑁆𑀢𑁂𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀬𑀦𑀚𑀻𑀯𑀺𑀢𑀧𑀼𑀢𑁆𑀢𑀪𑀭𑀺𑀬𑀤𑀸𑀦𑀸𑀤𑀺𑀓𑀁 𑀅𑀢𑀺𑀤𑀼𑀓𑁆𑀓𑀭𑀫𑀓𑀸𑀲𑀺. 𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀦𑁆𑀢𑀺 𑀓𑀧𑁆𑀧𑀓𑁄𑀝𑀺𑀕𑀡𑀦𑀸𑀬𑀧𑀺 ‘‘𑀏𑀢𑁆𑀢𑀓𑀸 𑀓𑀧𑁆𑀧𑀓𑁄𑀝𑀺𑀬𑁄’’𑀢𑀺 𑀧𑀫𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀓𑀸𑀮𑀁, 𑀓𑀧𑁆𑀧𑀓𑁄𑀝𑀺𑀕𑀡𑀦𑀯𑀲𑁂𑀦𑀧𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀧𑁆𑀧𑀓𑁄𑀝𑀺𑀯𑀲𑁂𑀦𑁂𑀯 𑀳𑀺 𑀲𑁄 𑀓𑀸𑀮𑁄 𑀅𑀧𑁆𑀧𑀫𑁂𑀬𑁆𑀬𑁄, 𑀅𑀲𑀗𑁆𑀔𑁆𑀬𑁂𑀬𑁆𑀬𑀯𑀲𑁂𑀦 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑁄𑀬𑁂𑀯. ‘‘𑀓𑀧𑁆𑀧𑀓𑁄𑀝𑀻𑀳𑀺𑀧𑀻’’𑀢𑀺 𑀅𑀧𑀺𑀲𑀤𑁆𑀤𑁄 𑀓𑀧𑁆𑀧𑀓𑁄𑀝𑀺𑀯𑀲𑁂𑀦𑀧𑀺 𑀢𑀸𑀯 𑀧𑀫𑁂𑀢𑀼𑀁 𑀦 𑀲𑀓𑁆𑀓𑀸, 𑀧𑀕𑁂𑀯 𑀯𑀲𑁆𑀲𑀕𑀡𑀦𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮’’𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 ‘‘𑀫𑀸𑀲𑀫𑀥𑀻𑀢𑁂, 𑀤𑀺𑀯𑀲𑀁 𑀘𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀭𑁄𑀦𑁆𑀢𑁄 𑀅𑀢𑀺𑀤𑀼𑀓𑁆𑀓𑀭𑀸𑀦𑀻𑀢𑀺 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄. 𑀏𑀯𑀫𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄 𑀓𑀺𑀁 𑀯𑀺𑀦𑁆𑀤𑀻𑀢𑀺 𑀘𑁂? 𑀔𑁂𑀤𑀁 𑀕𑀢𑁄, 𑀓𑀸𑀬𑀺𑀓𑀁 𑀔𑁂𑀤𑀫𑀼𑀧𑀕𑀢𑁄, 𑀧𑀭𑀺𑀲𑁆𑀲𑀫𑀁 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄, 𑀤𑀼𑀓𑁆𑀔𑀫𑀦𑀼𑀪𑀯𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀓𑁆𑀔𑀜𑁆𑀳𑀺 𑀔𑀺𑀚𑁆𑀚𑀢𑀺 𑀲𑀳𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 ‘‘𑀔𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀳𑀺𑀢𑀸𑀬𑀸𑀢𑀺 ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀯𑀝𑁆𑀝𑀤𑀼𑀓𑁆𑀔𑁂𑀦 𑀅𑀘𑁆𑀘𑀦𑁆𑀢𑀧𑀻𑀴𑀺𑀢𑀁 𑀲𑀢𑁆𑀢𑀮𑁄𑀓𑀁 𑀢𑀫𑁆𑀳𑀸 𑀤𑀼𑀓𑁆𑀔𑀢𑁄 𑀫𑁄𑀘𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀼𑀔𑀪𑀸𑀕𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀲𑀢𑁆𑀢𑀮𑁄𑀓𑀲𑁆𑀲 𑀳𑀺𑀢𑀓𑀭𑀡𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲 𑀘 ‘‘𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀮𑁄𑀓𑀳𑀺𑀢𑀸𑀬 𑀔𑁂𑀤𑀁 𑀕𑀢𑁄𑀢𑀺 𑀬𑁄𑀚𑀦𑀸𑀬𑀧𑀺 𑀦𑀢𑁆𑀣𑀺 𑀤𑁄𑀲𑁄. 𑀫𑀳𑀸𑀕𑀡𑁆𑀞𑀺𑀧𑀤𑁂𑀧𑀺 𑀳𑀺 ‘‘𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄 𑀔𑁂𑀤𑀁 𑀕𑀢𑁄, 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀮𑁄𑀓𑀳𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁.

𑀬𑀁 𑀧𑀦 𑀏𑀯𑀁 𑀬𑁄𑀚𑀦𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑁂𑀦 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀦 𑀳𑀺 𑀪𑀕𑀯𑀸 𑀮𑁄𑀓𑀳𑀺𑀢𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀫𑀦𑀼𑀪𑀯𑀢𑀺. 𑀦 𑀳𑀺 𑀓𑀲𑁆𑀲𑀘𑀺 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀮𑁄𑀓𑀲𑁆𑀲 𑀉𑀧𑀓𑀸𑀭𑀁 𑀆𑀯𑀳𑀢𑀻’’𑀢𑀺, 𑀢𑀁 𑀢𑀲𑁆𑀲 𑀫𑀢𑀺𑀫𑀢𑁆𑀢𑀁. 𑀏𑀯𑀁 𑀬𑁄𑀚𑀦𑀸𑀬𑀧𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑀲𑁆𑀲 𑀪𑀕𑀯𑀢𑁄 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀮𑁄𑀓𑀳𑀺𑀢𑀓𑀭𑀡𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀦 𑀢𑀼 𑀤𑀼𑀓𑁆𑀔𑀸𑀦𑀼𑀪𑀯𑀦𑁂𑀦𑁂𑀯 𑀮𑁄𑀓𑀳𑀺𑀢𑀲𑀺𑀤𑁆𑀥𑀻𑀢𑀺. 𑀧𑀞𑀫𑀁 𑀯𑀼𑀢𑁆𑀢𑀬𑁄𑀚𑀦𑀸𑀬𑀧𑀺 𑀳𑀺 𑀦 𑀤𑀼𑀓𑁆𑀓𑀭𑀓𑀭𑀡𑀫𑀢𑁆𑀢𑁂𑀦 𑀮𑁄𑀓𑀳𑀺𑀢𑀲𑀺𑀤𑁆𑀥𑀺. 𑀦 𑀳𑀺 𑀤𑀼𑀓𑁆𑀓𑀭𑀁 𑀓𑀭𑁄𑀦𑁆𑀢𑁄 𑀓𑀜𑁆𑀘𑀺 𑀲𑀢𑁆𑀢𑀁 𑀫𑀕𑁆𑀕𑀨𑀮𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀣 𑀔𑁄 𑀢𑀸𑀤𑀺𑀲𑀁 𑀅𑀢𑀺𑀤𑀼𑀓𑁆𑀓𑀭𑀁 𑀓𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀲𑀘𑁆𑀙𑀺𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀬 𑀫𑀕𑁆𑀕𑀨𑀮𑀸𑀤𑀻𑀲𑀼 𑀲𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀮𑁄𑀓𑀲𑁆𑀲 𑀳𑀺𑀢𑀁 𑀲𑀸𑀥𑁂𑀢𑀺.

𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀳𑀺𑀢𑀓𑀭𑀡𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀁𑀯𑀺𑀲𑀬𑀲𑁆𑀲𑁂𑀯 𑀲𑀢𑁆𑀢𑀮𑁄𑀓𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀁𑀯𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀽𑀳𑀢𑁆𑀣𑁄𑀧𑀺 𑀮𑁄𑀓𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀲𑀢𑁆𑀢𑀮𑁄𑀓𑀜𑁆𑀘 𑀚𑀸𑀢𑀺𑀮𑁄𑀓𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀁, 𑀅𑀢𑀺𑀓𑁆𑀓𑀦𑁆𑀢𑀧𑀭𑀮𑁄𑀓𑀸𑀦𑀁 𑀯𑀸 𑀉𑀘𑁆𑀙𑀺𑀦𑁆𑀦𑀮𑁄𑀓𑀲𑀫𑀼𑀤𑀬𑀸𑀦𑀁 𑀇𑀥 𑀚𑀸𑀢𑀺𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀗𑁆𑀔𑀸𑀢𑀜𑁆𑀘 𑀳𑀺𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀮𑁄𑀓𑀲𑁆𑀲, 𑀮𑁄𑀓𑀸𑀦𑀁, 𑀮𑁄𑀓𑁂 𑀯𑀸 𑀳𑀺𑀢𑀦𑁆𑀢𑀺 𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀮𑁄𑀓𑀳𑀺𑀢𑀫𑀺𑀘𑁆𑀘𑁂𑀯𑀸𑀳𑀸’’𑀢𑀺, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀗𑁆𑀔𑀆𑀢𑀳𑀺𑀢𑀲𑁆𑀲𑀧𑀺 𑀲𑀢𑁆𑀢𑀮𑁄𑀓𑀯𑀺𑀲𑀬𑀢𑁆𑀢𑀸, 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑁂𑀦𑁂𑀯 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀁 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸.

𑀲𑀩𑁆𑀩𑀢𑁆𑀣 ‘‘𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑁂 ‘‘𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸𑀓𑀸𑀭𑁂𑀦𑀸’’𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀫𑀳𑀸𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀸 ‘‘𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀸 ‘‘𑀘𑀽𑀴𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀲𑀻𑀳𑀴𑀕𑀡𑁆𑀞𑀺𑀧𑀤𑁂𑀲𑀽’’𑀢𑀺 𑀕𑀳𑁂𑀢𑀩𑁆𑀩𑀁. 𑀓𑁂𑀯𑀮𑀁 ‘‘𑀕𑀡𑁆𑀞𑀺𑀧𑀤𑁂’’𑀢𑀺 𑀯𑀼𑀢𑁆𑀢𑁂 ‘‘𑀫𑀸𑀕𑀥𑀪𑀸𑀲𑀸𑀬 𑀮𑀺𑀔𑀺𑀢𑁂 𑀕𑀡𑁆𑀞𑀺𑀧𑀤𑁂’’𑀢𑀺 𑀕𑀳𑁂𑀢𑀩𑁆𑀩𑀁.

𑀦𑀸𑀣𑁄𑀢𑀺 𑀮𑁄𑀓𑀧𑀝𑀺𑀲𑀭𑀡𑁄, 𑀮𑁄𑀓𑀲𑀸𑀫𑀻 𑀮𑁄𑀓𑀦𑀸𑀬𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀅𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀏𑀓𑀧𑀝𑀺𑀲𑀭𑀡𑁄 𑀧𑀢𑀺𑀝𑁆𑀞𑀸. 𑀅𑀣 𑀯𑀸 𑀦𑀸𑀣𑀢𑀻𑀢𑀺 𑀦𑀸𑀣𑁄, 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀆𑀲𑀻𑀲𑀢𑀺 𑀧𑀢𑁆𑀣𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀸𑀣𑀢𑀺 𑀯𑁂𑀦𑁂𑀬𑁆𑀬𑀕𑀢𑁂 𑀓𑀺𑀮𑁂𑀲𑁂 𑀉𑀧𑀢𑀸𑀧𑁂𑀢𑀻𑀢𑀺 𑀅𑀢𑁆𑀣𑁄, 𑀦𑀸𑀣𑀢𑀻𑀢𑀺 𑀯𑀸 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀳𑀺 ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁮.𑁭) 𑀲𑀢𑁆𑀢𑀸𑀦𑀁 𑀢𑀁 𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀺𑀢𑁆𑀯𑀸𑀧𑀺 𑀓𑀭𑀼𑀡𑀸𑀬 𑀲𑀫𑀼𑀲𑁆𑀲𑀸𑀳𑀺𑀢𑁄 𑀢𑁂 𑀢𑀢𑁆𑀣 𑀦𑀺𑀬𑁄𑀚𑁂𑀢𑀺. 𑀧𑀭𑀫𑁂𑀦 𑀯𑀸 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑁂 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑁄𑀧𑀺 𑀘𑀸𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀬𑁄 𑀓𑀭𑀼𑀡𑀸𑀬 𑀓𑀫𑁆𑀧𑀺𑀢𑀳𑀤𑀬𑀢𑁆𑀢𑀸 𑀮𑁄𑀓𑀳𑀺𑀢𑀢𑁆𑀣𑀁 𑀅𑀢𑀺𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬 𑀅𑀦𑁂𑀓𑀧𑁆𑀧𑀓𑀸𑀭𑀁 𑀢𑀸𑀤𑀺𑀲𑀁 𑀲𑀁𑀲𑀸𑀭𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑁆𑀯𑀸 𑀆𑀕𑀢𑁄, 𑀢𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀺𑀢𑁂𑀲𑀼 𑀯𑀸 𑀓𑀺𑀭𑀻𑀬𑀢𑀺 𑀧𑀲𑀸𑀭𑀻𑀬𑀢𑀻𑀢𑀺 𑀓𑀭𑀼𑀡𑀸. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑁂𑀢𑀺, 𑀯𑀺𑀦𑀸𑀲𑁂𑀢𑀺 𑀯𑀸 𑀧𑀭𑀲𑁆𑀲 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀸𑀥𑁂𑀢𑀻𑀢𑀺. 𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 𑀓𑀸𑀭𑀼𑀡𑀺𑀓𑁄 𑀬𑀣𑀸 ‘‘𑀤𑁄𑀯𑀸𑀭𑀺𑀓𑁄’’𑀢𑀺. 𑀬𑀣𑀸 𑀳𑀺 𑀤𑁆𑀯𑀸𑀭𑀝𑁆𑀞𑀸𑀦𑀢𑁄 𑀅𑀜𑁆𑀜𑀢𑁆𑀣 𑀯𑀢𑁆𑀢𑀫𑀸𑀦𑁄𑀧𑀺 𑀤𑁆𑀯𑀸𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑁄 𑀧𑀼𑀭𑀺𑀲𑁄 𑀤𑁆𑀯𑀸𑀭𑀸𑀦𑀢𑀺𑀯𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄𑀢𑀺 ‘‘𑀤𑁄𑀯𑀸𑀭𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀪𑀕𑀯𑀸 𑀫𑁂𑀢𑁆𑀢𑀸𑀤𑀺𑀯𑀲𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑀢𑁄 𑀅𑀜𑁆𑀜𑀢𑁆𑀣 𑀯𑀢𑁆𑀢𑀫𑀸𑀦𑁄𑀧𑀺 𑀓𑀭𑀼𑀡𑀸𑀦𑀢𑀺𑀯𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 ‘‘𑀓𑀸𑀭𑀼𑀡𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀸 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀮𑁄𑀓𑀦𑀸𑀣𑀸 𑀢𑀺𑀝𑁆𑀞𑀦𑁆𑀢𑀺. 𑀫𑀳𑀦𑁆𑀢𑁄 𑀓𑀸𑀭𑀼𑀡𑀺𑀓𑁄𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄. 𑀲𑀢𑀺𑀧𑀺 𑀪𑀕𑀯𑀢𑁄 𑀢𑀤𑀜𑁆𑀜𑀕𑀼𑀡𑀸𑀦𑀫𑁆𑀧𑀺 𑀯𑀲𑁂𑀦 𑀫𑀳𑀦𑁆𑀢𑀪𑀸𑀯𑁂 𑀓𑀸𑀭𑀼𑀡𑀺𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀯𑀼𑀢𑁆𑀢𑀢𑁆𑀢𑀸 𑀓𑀭𑀼𑀡𑀸𑀯𑀲𑁂𑀦𑁂𑀢𑁆𑀣 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀬𑀣𑀸 ‘‘𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀲𑀢𑁆𑀣𑀼 𑀫𑀳𑀸𑀓𑀭𑀼𑀡𑀸 𑀯𑀼𑀢𑁆𑀢𑀸 𑀳𑁄𑀢𑀺.

𑀅𑀣 𑀯𑀸 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀁 𑀲𑀻𑀮𑀁 𑀧𑀓𑀢𑀺 𑀏𑀢𑀲𑁆𑀲𑀸𑀢𑀺 𑀓𑀸𑀭𑀼𑀡𑀺𑀓𑁄, 𑀧𑀣𑀯𑀻𑀨𑀲𑁆𑀲𑀸𑀤𑀬𑁄 𑀯𑀺𑀬 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑀸 𑀓𑀭𑀼𑀡𑀸𑀬𑀦𑀲𑀪𑀸𑀯𑁄 𑀲𑀪𑀸𑀯𑀪𑀽𑀢𑀓𑀭𑀼𑀡𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀅𑀣 𑀯𑀸 𑀫𑀳𑀸𑀯𑀺𑀲𑀬𑀢𑀸𑀬 𑀫𑀳𑀸𑀦𑀼𑀪𑀸𑀯𑀢𑀸𑀬 𑀫𑀳𑀸𑀩𑀮𑀢𑀸𑀬 𑀘 𑀫𑀳𑀢𑀻 𑀓𑀭𑀼𑀡𑀸𑀢𑀺 𑀫𑀳𑀸𑀓𑀭𑀼𑀡𑀸. 𑀪𑀕𑀯𑀢𑁄 𑀳𑀺 𑀓𑀭𑀼𑀡𑀸 𑀦𑀺𑀭𑀯𑀲𑁂𑀲𑁂𑀲𑀼 𑀲𑀢𑁆𑀢𑁂𑀲𑀼 𑀧𑀯𑀢𑁆𑀢𑀢𑀺, 𑀧𑀯𑀢𑁆𑀢𑀫𑀸𑀦𑀸 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀧𑀯𑀢𑁆𑀢𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀪𑁂𑀤𑀜𑁆𑀘 𑀫𑀳𑀦𑁆𑀢𑀫𑁂𑀯 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀏𑀓𑀦𑁆𑀢𑀢𑁄 𑀦𑀺𑀧𑁆𑀨𑀸𑀤𑁂𑀢𑀺, 𑀫𑀳𑀸𑀓𑀭𑀼𑀡𑀸𑀬 𑀦𑀺𑀬𑀼𑀢𑁆𑀢𑁄𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀫𑀳𑀢𑀻 𑀧𑀲𑀢𑁆𑀣𑀸 𑀓𑀭𑀼𑀡𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄. 𑀧𑀽𑀚𑀸𑀯𑀘𑀦𑁄 𑀳𑁂𑀢𑁆𑀣 𑀫𑀳𑀦𑁆𑀢𑀲𑀤𑁆𑀤𑁄 ‘‘𑀫𑀳𑀸𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀲𑀢𑁆𑀣𑀸 𑀘 𑀪𑀕𑀯𑀢𑁄 𑀓𑀭𑀼𑀡𑀸 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀧𑀺 𑀧𑀯𑀢𑁆𑀢𑀺𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸𑀢𑀺.

𑀏𑀯𑀁 𑀓𑀭𑀼𑀡𑀸𑀫𑀼𑀔𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀼𑀁 ‘‘𑀅𑀲𑀫𑁆𑀩𑀼𑀥’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀫𑁆𑀩𑀼𑀥𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 𑀅𑀲𑀫𑁆𑀩𑀼𑀚𑁆𑀛𑀦𑁆𑀢𑁄 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀬𑀣𑀸𑀲𑀪𑀸𑀯𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀢𑀼𑀅𑀢𑁆𑀣𑁄 𑀳𑁂𑀢𑁆𑀣 𑀅𑀦𑁆𑀢𑀲𑀤𑁆𑀤𑁄 ‘‘𑀧𑀞𑀦𑁆𑀢𑁄 𑀦𑀺𑀲𑀻𑀤𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀅𑀦𑀺𑀬𑀫𑀢𑁄 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀦𑁆𑀢𑀺 𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨) 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀁𑀲𑀺𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭; 𑀧𑀝𑀺. 𑀫. 𑁧.𑁧𑁬𑁧). 𑀢𑁂𑀦 𑀏𑀯𑀁 𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑁂𑀦 𑀩𑀼𑀤𑁆𑀥𑁂𑀦 𑀦𑀺𑀲𑁂𑀯𑀺𑀢𑀁 𑀕𑁄𑀘𑀭𑀸𑀲𑁂𑀯𑀦𑀸𑀪𑀸𑀯𑀦𑀸𑀲𑁂𑀯𑀦𑀸𑀳𑀺 𑀬𑀣𑀸𑀭𑀳𑀁 𑀦𑀺𑀲𑁂𑀯𑀺𑀢𑀁 𑀅𑀦𑀼𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀦𑀺𑀩𑁆𑀩𑀸𑀦𑀁 𑀕𑁄𑀘𑀭𑀸𑀲𑁂𑀯𑀦𑀸𑀯𑀲𑁂𑀦𑁂𑀯 𑀦𑀺𑀲𑁂𑀯𑀺𑀢𑀁, 𑀫𑀕𑁆𑀕𑁄 𑀧𑀦 𑀅𑀢𑁆𑀢𑀦𑀸 𑀪𑀸𑀯𑀺𑀢𑁄 𑀘 𑀪𑀸𑀯𑀦𑀸𑀲𑁂𑀯𑀦𑀸𑀯𑀲𑁂𑀦 𑀲𑁂𑀯𑀺𑀢𑁄, 𑀧𑀭𑁂𑀳𑀺 𑀉𑀧𑁆𑀧𑀸𑀤𑀺𑀢𑀸𑀦𑀺 𑀧𑀦 𑀫𑀕𑁆𑀕𑀨𑀮𑀸𑀦𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀤𑀺𑀦𑀸 𑀬𑀤𑀸 𑀧𑀭𑀺𑀚𑀸𑀦𑀸𑀢𑀺, 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀸𑀦𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀢𑀤𑀸 𑀕𑁄𑀘𑀭𑀸𑀲𑁂𑀯𑀦𑀸𑀯𑀲𑁂𑀦𑀧𑀺 𑀲𑁂𑀯𑀺𑀢𑀸𑀦𑀺 𑀳𑁄𑀦𑁆𑀢𑀺𑀬𑁂𑀯. 𑀏𑀢𑁆𑀣 𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀧𑀭𑀺𑀬𑀸𑀬𑀢𑁄 𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀡𑁂 𑀲𑀢𑀺 𑀲𑁄𑀧𑀺 𑀤𑁂𑀲𑀦𑀸𑀲𑀫𑁆𑀫𑀲𑀦𑀜𑀸𑀡𑀕𑁄𑀘𑀭𑀢𑀸𑀬 𑀕𑁄𑀘𑀭𑀸𑀲𑁂𑀯𑀦𑀸𑀬 𑀲𑁂𑀯𑀺𑀢𑁄𑀢𑀺 𑀲𑀓𑁆𑀓𑀸 𑀕𑀳𑁂𑀢𑀼𑀁. ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀘𑁆𑀙𑀢𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀬𑀁 𑀅𑀲𑀫𑁆𑀩𑀼𑀥𑀁 𑀅𑀲𑀫𑁆𑀩𑀼𑀚𑁆𑀛𑀦𑁆𑀢𑁄 𑀅𑀲𑀘𑁆𑀙𑀺𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀲𑁄𑀧𑀺 𑀇𑀥 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀫𑁆𑀧𑀺 𑀘 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀪𑀯𑀸𑀪𑀯𑀁 𑀕𑀘𑁆𑀙𑀢𑀺, 𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑀯𑀺𑀦𑀬𑁄 𑀧𑀦 𑀢𑀤𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀦 𑀘𑀺𑀭𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺. (𑀤𑀻. 𑀦𑀺. 𑁨.𑁧𑁮𑁫; 𑀲𑀁. 𑀦𑀺. 𑁧.𑁧𑁮𑁫);

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑁂𑀳𑀺𑀧𑀺 𑀕𑁄𑀘𑀭𑀸𑀲𑁂𑀯𑀦𑀸𑀤𑀺𑀦𑀸 𑀲𑁂𑀯𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 ‘‘𑀩𑀼𑀤𑁆𑀥𑀦𑀺𑀲𑁂𑀯𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀲𑀸𑀫𑀜𑁆𑀜𑀢𑁄 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀯𑀼𑀢𑁆𑀢𑁄.

𑀪𑀯𑀸𑀪𑀯𑀦𑁆𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄, 𑀪𑀯𑀢𑁄 𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀯𑀸𑀪𑀯𑀦𑁆𑀢𑀺 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀳𑀻𑀦𑀧𑀡𑀻𑀢𑀯𑀲𑁂𑀦 𑀘 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀜𑁆𑀘 𑀪𑀯𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀤𑁆𑀥𑀢𑁆𑀣𑁄𑀧𑀺 𑀳𑀺 𑀅-𑀓𑀸𑀭𑁄 𑀤𑀺𑀲𑁆𑀲𑀢𑀺 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀸 𑀅𑀪𑀯𑁄𑀢𑀺 𑀫𑀳𑀸𑀪𑀯𑁄 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀪𑀯𑁄 𑀘 𑀅𑀪𑀯𑁄 𑀘 𑀪𑀯𑀸𑀪𑀯𑁄. 𑀢𑀁 𑀪𑀯𑀸𑀪𑀯𑀁. 𑀕𑀘𑁆𑀙𑀢𑀻𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀚𑀻𑀯𑀮𑁄𑀓𑁄𑀢𑀺 𑀲𑀢𑁆𑀢𑀮𑁄𑀓𑁄. 𑀚𑀻𑀯𑀕𑁆𑀕𑀳𑀡𑁂𑀦 𑀳𑀺 𑀲𑀗𑁆𑀔𑀸𑀭𑀪𑀸𑀚𑀦𑀮𑁄𑀓𑀁 𑀦𑀺𑀯𑀢𑁆𑀢𑁂𑀢𑀺 𑀢𑀲𑁆𑀲 𑀪𑀯𑀸𑀪𑀯𑀕𑀫𑀦𑀸𑀲𑀫𑁆𑀪𑀯𑀢𑁄. 𑀦𑀫𑁄 𑀅𑀢𑁆𑀣𑀽𑀢𑀺 𑀧𑀸𑀞𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄𑀢𑀺 𑀥𑀫𑁆𑀫𑀯𑀺𑀲𑁂𑀲𑀦𑀁. 𑀢𑀢𑁆𑀣 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀧𑀽𑀭𑁂𑀢𑀼𑀁 𑀅𑀬𑀼𑀢𑁆𑀢𑀝𑁆𑀞𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺 𑀅𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀅𑀮𑀤𑁆𑀥𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀩𑁆𑀩𑀺𑀧𑀭𑀻𑀢𑀢𑁄 𑀓𑀸𑀬𑀲𑀼𑀘𑀭𑀺𑀢𑀸𑀤𑀺 𑀯𑀺𑀦𑁆𑀤𑀺𑀬𑀁 𑀦𑀸𑀫, 𑀢𑀁 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸, 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀢𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀬𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸, 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺𑀧𑀺 𑀅𑀯𑀺𑀚𑁆𑀚𑀸, 𑀅𑀦𑁆𑀢𑀯𑀺𑀭𑀳𑀺𑀢𑁂 𑀲𑀁𑀲𑀸𑀭𑁂 𑀲𑀩𑁆𑀩𑀬𑁄𑀦𑀺𑀕𑀢𑀺𑀪𑀯𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀢𑁆𑀢𑁂 𑀚𑀯𑀸𑀧𑁂𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸, 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀻𑀲𑀼 𑀚𑀯𑀢𑀺, 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀔𑀦𑁆𑀥𑀸𑀤𑀻𑀲𑀼 𑀦 𑀚𑀯𑀢𑀻𑀢𑀺 𑀯𑀸 𑀅𑀯𑀺𑀚𑁆𑀚𑀸. 𑀲𑀸 𑀆𑀤𑀺 𑀬𑁂𑀲𑀁 𑀢𑀡𑁆𑀳𑀸𑀤𑀻𑀦𑀁 𑀢𑁂 𑀅𑀯𑀺𑀚𑁆𑀚𑀸𑀤𑀬𑁄, 𑀢𑁂𑀬𑁂𑀯 𑀓𑀺𑀮𑀺𑀲𑁆𑀲𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸𑀢𑀺 𑀓𑀺𑀮𑁂𑀲𑀸, 𑀢𑁂𑀬𑁂𑀯 𑀘 𑀲𑀢𑁆𑀢𑀸𑀦𑀁 𑀩𑀦𑁆𑀥𑀦𑀝𑁆𑀞𑁂𑀦 𑀚𑀸𑀮𑀲𑀤𑀺𑀲𑀸𑀢𑀺 𑀚𑀸𑀮𑀁, 𑀢𑀁 𑀯𑀺𑀤𑁆𑀥𑀁𑀲𑁂𑀢𑀺 𑀲𑀩𑁆𑀩𑀲𑁄 𑀯𑀺𑀦𑀸𑀲𑁂𑀢𑀺 𑀲𑀻𑀮𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀻. 𑀦𑀦𑀼 𑀘𑁂𑀢𑁆𑀣 𑀲𑀧𑀭𑀺𑀬𑀢𑁆𑀢𑀺𑀓𑁄 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀢𑁆𑀣 𑀘 𑀫𑀕𑁆𑀕𑁄𑀬𑁂𑀯 𑀓𑀺𑀮𑁂𑀲𑁂 𑀯𑀺𑀤𑁆𑀥𑀁𑀲𑁂𑀢𑀺, 𑀦𑁂𑀢𑀭𑁂𑀢𑀺 𑀘𑁂? 𑀯𑀼𑀘𑁆𑀘𑀢𑁂. 𑀫𑀕𑁆𑀕𑀲𑁆𑀲𑀧𑀺 𑀦𑀺𑀩𑁆𑀩𑀸𑀦𑀫𑀸𑀕𑀫𑁆𑀫 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀢𑁄 𑀦𑀺𑀩𑁆𑀩𑀸𑀦𑀫𑁆𑀧𑀺 𑀓𑀺𑀮𑁂𑀲𑁂 𑀯𑀺𑀤𑁆𑀥𑀁𑀲𑁂𑀢𑀺 𑀦𑀸𑀫, 𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀓𑀺𑀘𑁆𑀘𑀁 𑀨𑀮𑁂𑀦 𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀨𑀮𑀫𑁆𑀧𑀺 ‘‘𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 ‘‘𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀻’’𑀢𑀺 𑀯𑀢𑁆𑀢𑀼𑀫𑀭𑀳𑀢𑀻𑀢𑀺 𑀦 𑀓𑁄𑀘𑀺 𑀤𑁄𑀲𑁄.

𑀥𑀫𑁆𑀫𑀯𑀭𑀲𑁆𑀲 𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑁂 𑀅𑀦𑀺𑀬𑀫𑀺𑀢𑀲𑁆𑀲 𑀦𑀺𑀬𑀫𑀯𑀘𑀦𑀁. 𑀢𑀢𑁆𑀣 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄.

‘‘𑀬𑁂 𑀓𑁂𑀘𑀺 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺. (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭) 𑁋

𑀳𑀺 𑀯𑀼𑀢𑁆𑀢𑀁. 𑀲𑀁𑀲𑀸𑀭𑀤𑀼𑀓𑁆𑀔𑁂 𑀯𑀸 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀢𑀸𑀤𑀺𑀯𑀲𑁂𑀦 𑀲𑀁𑀲𑀸𑀭𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀅𑀧𑀸𑀬𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀜𑁆𑀘𑁂𑀢𑁆𑀣 𑀥𑀸𑀭𑀡𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁄 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀦𑀺𑀩𑁆𑀩𑀸𑀦𑀜𑁆𑀘𑀸𑀢𑀺 𑀉𑀪𑀬𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀥𑀸𑀭𑁂𑀢𑀺, 𑀅𑀭𑀺𑀬𑀨𑀮𑀁 𑀧𑀦 𑀢𑀁𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁂𑀦 𑀢𑀤𑀦𑀼𑀕𑀼𑀡𑀢𑀸𑀬, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀢𑀤𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀁 𑀧𑀭𑀺𑀬𑀸𑀬𑀢𑁄 𑀥𑀸𑀭𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀥𑀫𑁆𑀫𑁄𑀬𑁂𑀯 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀯𑀭𑁄 𑀧𑀯𑀭𑁄 𑀅𑀦𑀼𑀢𑁆𑀢𑀭𑁄𑀢𑀺 𑀥𑀫𑁆𑀫𑀯𑀭𑁄, 𑀢𑀲𑁆𑀲 𑀥𑀫𑁆𑀫𑀯𑀭𑀲𑁆𑀲 𑀦𑀫𑁄 𑀅𑀢𑁆𑀣𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀅𑀫𑁆𑀳𑁂𑀳𑀺 𑀲𑀸𑀭𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀧𑀧𑀜𑁆𑀘𑀺𑀢𑀁, 𑀅𑀫𑁆𑀳𑁂𑀳𑀺 𑀘 𑀇𑀥 𑀦 𑀤𑀲𑁆𑀲𑀺𑀢𑀁, 𑀦 𑀢𑀁 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀫𑀸 𑀇𑀢𑁄 𑀧𑀝𑁆𑀞𑀸𑀬 𑀏𑀢𑁆𑀢𑀓𑀫𑁆𑀧𑀺 𑀅𑀯𑀢𑁆𑀯𑀸 𑀲𑀸𑀭𑀢𑁆𑀣𑀫𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀬𑀢𑁆𑀣 𑀧𑀦 𑀓𑁂𑀦𑀘𑀺 𑀅𑀘𑁆𑀘𑀦𑁆𑀢𑀯𑀺𑀭𑀼𑀤𑁆𑀥𑀁 𑀮𑀺𑀔𑀺𑀢𑀁, 𑀢𑀫𑁆𑀧𑀺 𑀓𑀢𑁆𑀣𑀘𑀺 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀏𑀢𑁆𑀣 𑀘 ‘‘𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀻𑀳𑀺 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀥𑀫𑁆𑀫𑀯𑀭𑀲𑁆𑀲𑀸’’𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑀢𑁄 𑀧𑀭𑀺𑀧𑀼𑀡𑁆𑀡𑀢𑀸𑀬. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀁 𑀥𑀫𑁆𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀧𑀪𑀸𑀯𑀲𑀫𑁆𑀧𑀤𑀁.

𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀁 𑀣𑁄𑀫𑁂𑀢𑀼𑀁 ‘‘𑀕𑀼𑀡𑁂𑀳𑀻’’𑀢𑀺𑀆𑀤𑀺𑀫𑀸𑀳. ‘‘𑀕𑀼𑀡𑁂𑀳𑀻’’𑀢𑀺 𑀧𑀤𑀲𑁆𑀲 ‘‘𑀬𑀼𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀇𑀤𑀸𑀦𑀺 𑀬𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑁄, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀮𑀲𑀫𑀸𑀥𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺 ‘‘𑀲𑀻𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀸𑀥𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺. 𑀲𑀫𑀸𑀥𑀺𑀲𑀻𑀲𑁂𑀦 𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀬𑁄 𑀯𑀼𑀢𑁆𑀢𑀸. 𑀧𑀜𑁆𑀜𑀸𑀢𑀺 𑀫𑀕𑁆𑀕𑀧𑀜𑁆𑀜𑀸. 𑀯𑀺𑀫𑀼𑀢𑁆𑀢𑀺 𑀘 𑀯𑀺𑀫𑀼𑀢𑁆𑀢𑀺𑀜𑀸𑀡𑀜𑁆𑀘 𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦 ‘‘𑀯𑀺𑀫𑀼𑀢𑁆𑀢𑀺𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀲𑀤𑁆𑀤𑀧𑀭𑀺𑀬𑀸𑀬𑁂𑀦 𑀧𑀪𑀼𑀢𑀺𑀲𑀤𑁆𑀤𑁂𑀦 𑀯𑀸 𑀯𑀺𑀫𑀼𑀢𑁆𑀢𑀺𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀁. 𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀧𑀪𑀼𑀢𑀺-𑀲𑀤𑁆𑀤𑁂𑀦 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀕𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀲𑀻𑀮𑀸𑀤𑀬𑁄 𑀕𑀼𑀡𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀬𑀣𑀸𑀲𑀫𑁆𑀪𑀯𑀁 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦𑁂𑀢𑁆𑀣 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀲𑀻𑀮𑀸𑀤𑀬𑁄 𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀬𑀣𑀸𑀲𑀫𑁆𑀪𑀯𑀁 𑀮𑀩𑁆𑀪𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁂 ‘𑀅𑀭𑀺𑀬𑀲𑀗𑁆𑀖’𑀦𑁆𑀢𑀺 𑀯𑀘𑀦𑀢𑁄 𑀲𑀻𑀮𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀮𑁄𑀓𑀼𑀢𑁆𑀢𑀭𑀸𑀯𑀸’’𑀢𑀺, 𑀢𑀁 𑀢𑀲𑁆𑀲 𑀫𑀢𑀺𑀫𑀢𑁆𑀢𑀁. 𑀦 𑀳𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀺𑀬𑀕𑀼𑀡𑁂𑀳𑀺𑀧𑀺 𑀣𑁄𑀫𑀦𑀸𑀬 𑀓𑁄𑀘𑀺 𑀤𑁄𑀲𑁄 𑀤𑀺𑀲𑁆𑀲𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲𑀧𑀺 𑀢𑀸𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀣𑁄𑀫𑀦𑀸 𑀳𑁄𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀅𑀭𑀺𑀬𑀲𑀗𑁆𑀖𑀲𑁆𑀲𑀸𑀢𑀺.

𑀓𑀼𑀲𑀮𑀢𑁆𑀣𑀺𑀓𑀸𑀦𑀁 𑀚𑀦𑀸𑀦𑀁 𑀧𑀼𑀜𑁆𑀜𑀲𑁆𑀲 𑀯𑀼𑀤𑁆𑀥𑀺𑀬𑀸 𑀔𑁂𑀢𑁆𑀢𑀲𑀤𑀺𑀲𑀢𑁆𑀢𑀸 𑀔𑁂𑀢𑁆𑀢𑀦𑁆𑀢𑀺 𑀆𑀳 ‘‘𑀔𑁂𑀢𑁆𑀢𑀁 𑀚𑀦𑀸𑀦𑀁 𑀓𑀼𑀲𑀮𑀢𑁆𑀣𑀺𑀓𑀸𑀦’’𑀦𑁆𑀢𑀺. 𑀔𑀺𑀢𑁆𑀢𑀁 𑀩𑀻𑀚𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀢𑀸𑀬𑀢𑀻𑀢𑀺 𑀳𑀺 𑀔𑁂𑀢𑁆𑀢𑀁, 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀯𑀺𑀭𑀼𑀳𑀦𑀪𑀽𑀫𑀺, 𑀢𑀁𑀲𑀤𑀺𑀲𑀢𑁆𑀢𑀸 𑀅𑀭𑀺𑀬𑀲𑀗𑁆𑀖𑁄𑀧𑀺 ‘‘𑀔𑁂𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀁 𑀤𑀻𑀧𑁂𑀢𑀺. ‘‘𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀧𑀼𑀩𑁆𑀩𑁂 ‘‘𑀬𑁄’’𑀢𑀺 𑀅𑀦𑀺𑀬𑀫𑁂𑀦 𑀯𑀼𑀢𑁆𑀢𑀲𑁆𑀲 𑀦𑀺𑀬𑀫𑀯𑀘𑀦𑀁. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀏𑀢𑁆𑀣 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸. 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄 𑀲𑀫𑀽𑀳𑁄𑀢𑀺 𑀅𑀭𑀺𑀬𑀲𑀗𑁆𑀖𑁄. 𑀅𑀣 𑀯𑀸 𑀅𑀭𑀺𑀬𑁄 𑀘 𑀲𑁄 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀖𑁄 𑀘 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀢𑁄𑀢𑀺 𑀅𑀭𑀺𑀬𑀲𑀗𑁆𑀖𑁄, 𑀅𑀝𑁆𑀞 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀦𑀫𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑁂 𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 𑀆𑀳 ‘‘𑀇𑀘𑁆𑀘𑁂𑀯’’𑀫𑀺𑀘𑁆𑀘𑀸𑀤𑀺. 𑀇𑀘𑁆𑀘𑁂𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀘𑁆𑀘𑀦𑁆𑀢𑀁 𑀏𑀓𑀦𑁆𑀢𑁂𑀦 𑀦𑀫𑀲𑁆𑀲𑀦𑁂𑀬𑁆𑀬𑀁 𑀦𑀫𑀲𑁆𑀲𑀺𑀢𑀩𑁆𑀩𑀁 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀫𑀸𑀦𑁄 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀯𑀦𑁆𑀤𑀫𑀸𑀦𑁄 𑀅𑀳𑀁 𑀯𑀺𑀧𑀼𑀮𑀁 𑀬𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀅𑀮𑀢𑁆𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀩𑀼𑀤𑁆𑀥𑀸𑀤𑀬𑁄 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩);

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀤𑀻𑀲𑀼𑀬𑁂𑀯 𑀮𑀩𑁆𑀪𑀦𑁆𑀢𑀻𑀢𑀺.

‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀭𑀸𑀲𑀺𑀁 𑀧𑀼𑀜𑁆𑀜𑀧𑁆𑀧𑀯𑀢𑁆𑀢𑀁 𑀯𑀸’’𑀢𑀺 𑀫𑀳𑀸𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀧𑀦 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀸𑀪𑀺𑀦𑀺𑀲𑀁𑀲’’𑀦𑁆𑀢𑀺𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀦𑀤𑀺𑀁, 𑀧𑀼𑀜𑁆𑀜𑀧𑁆𑀧𑀯𑀸𑀳𑀦𑁆𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀜𑁆𑀳𑀺 𑀧𑀼𑀜𑁆𑀜𑀁 𑀅𑀪𑀺𑀲𑀦𑁆𑀤𑀦𑀝𑁆𑀞𑁂𑀦 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀲𑀸𑀭𑀢𑁆𑀣𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁦𑁨𑁭) 𑁋

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸 𑀲𑀼𑀔𑀲𑁆𑀲𑀸𑀳𑀸𑀭𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺, 𑀅𑀬𑀁 𑀧𑀞𑀫𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀲𑀼𑀔𑀲𑁆𑀲𑀸𑀳𑀸𑀭𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁨𑁭) 𑁋

𑀏𑀯𑀫𑀸𑀤𑀺𑀓𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸𑀢𑀺 𑀧𑀼𑀜𑁆𑀜𑀦𑀤𑀺𑀬𑁄 𑀓𑀼𑀲𑀮𑀦𑀤𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀦𑁆𑀢𑀺 𑀧𑀼𑀜𑁆𑀜𑀨𑀮’’𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀦 𑀳𑀺 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀫𑀸𑀦𑁄 𑀢𑀲𑁆𑀫𑀺𑀁 𑀔𑀡𑁂 𑀧𑀼𑀜𑁆𑀜𑀨𑀮𑀁 𑀅𑀮𑀢𑁆𑀣, 𑀓𑀺𑀦𑁆𑀢𑀼 𑀅𑀦𑀧𑁆𑀧𑀓𑀁 𑀧𑀼𑀜𑁆𑀜𑀭𑀸𑀲𑀺𑀁 𑀢𑀤𑀸 𑀅𑀮𑀪𑀺, 𑀢𑀲𑁆𑀲 𑀘 𑀨𑀮𑀁 𑀧𑀭𑀮𑁄𑀓𑀪𑀸𑀕𑀻, 𑀤𑀺𑀝𑁆𑀞𑀥𑀫𑁆𑀫𑁂 𑀢𑀼 𑀅𑀦𑁆𑀢𑀭𑀸𑀬𑀯𑀺𑀖𑀸𑀢𑁄 𑀢𑀲𑁆𑀲 𑀘 𑀧𑀼𑀜𑁆𑀜𑀲𑁆𑀲 𑀆𑀦𑀺𑀲𑀁𑀲𑀫𑀢𑁆𑀢𑀓𑀁, ‘‘𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀘 𑀧𑀼𑀜𑁆𑀜𑀨𑀮𑁂 𑀅𑀦𑀼𑀧𑁆𑀧𑀦𑁆𑀦𑁂 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑀪𑀸𑀯𑁄 𑀦 𑀲𑀺𑀚𑁆𑀛𑀢𑀺, 𑀦 𑀘𑁂𑀢𑀁 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀢𑀲𑁆𑀲 𑀫𑀳𑀢𑁄 𑀧𑀼𑀜𑁆𑀜𑀧𑁆𑀧𑀯𑀸𑀳𑀲𑁆𑀲 𑀆𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀅𑀣𑀸𑀧𑀺 𑀧𑀡𑀸𑀫𑀓𑀺𑀭𑀺𑀬𑀸𑀬 𑀚𑀦𑀺𑀢𑀢𑁆𑀢𑀸 𑀧𑀼𑀜𑁆𑀜𑀫𑁂𑀯 𑀧𑀼𑀜𑁆𑀜𑀨𑀮𑀦𑁆𑀢𑀺 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀲𑁄 𑀘 𑀧𑀼𑀜𑁆𑀜𑀧𑁆𑀧𑀯𑀸𑀳𑁄 𑀦 𑀅𑀧𑁆𑀧𑀫𑀢𑁆𑀢𑀓𑁄, 𑀅𑀣 𑀔𑁄 𑀫𑀳𑀦𑁆𑀢𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀧𑀼𑀮’’𑀦𑁆𑀢𑀺, 𑀫𑀳𑀦𑁆𑀢𑀁 𑀅𑀦𑀧𑁆𑀧𑀓𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀮𑀢𑁆𑀣𑀦𑁆𑀢𑀺 𑀅𑀮𑀪𑀺𑀁, 𑀧𑀸𑀧𑀼𑀡𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀼𑀜𑁆𑀜𑀧𑁆𑀧𑀯𑀸𑀳𑀲𑁆𑀲 𑀆𑀦𑀼𑀪𑀸𑀯𑁂𑀦 𑀩𑀮𑁂𑀦. 𑀳𑀢𑀦𑁆𑀢𑀭𑀸𑀬𑁄𑀢𑀺 𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄. 𑀧𑀡𑀸𑀫𑀧𑀬𑁄𑀚𑀦𑁂 𑀯𑀼𑀢𑁆𑀢𑀯𑀺𑀥𑀺𑀦𑀸 𑀳𑀢𑁄 𑀯𑀺𑀤𑁆𑀥𑀲𑁆𑀢𑁄 𑀅𑀦𑁆𑀢𑀭𑀸𑀬𑁄 𑀉𑀧𑀤𑁆𑀤𑀯𑁄 𑀅𑀲𑁆𑀲𑀸𑀢𑀺 𑀳𑀢𑀦𑁆𑀢𑀭𑀸𑀬𑁄. 𑀅𑀲𑁆𑀲 ‘‘𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀳𑀢𑀦𑁆𑀢𑀭𑀸𑀬𑁄 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀢𑀲𑁆𑀲 𑀧𑀼𑀜𑁆𑀜𑀧𑁆𑀧𑀯𑀸𑀳𑀲𑁆𑀲 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀳𑀦𑀦𑁂 𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺.

𑀏𑀯𑀁 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲 𑀯𑀺𑀦𑀬𑀧𑀺𑀝𑀓𑀲𑁆𑀲 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀲𑁆𑀲 𑀢𑀸𑀯 𑀪𑀕𑀯𑀢𑁄 𑀲𑀸𑀲𑀦𑀲𑁆𑀲 𑀫𑀽𑀮𑀧𑀢𑀺𑀝𑁆𑀞𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀫𑁆𑀧𑀺 𑀣𑁄𑀫𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀺𑀁 𑀞𑀺𑀢𑁂’’𑀢𑀺𑀆𑀤𑀺. 𑀅𑀝𑁆𑀞𑀺𑀢𑀲𑁆𑀲 𑀲𑀼𑀲𑀡𑁆𑀞𑀺𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀬𑀲𑁆𑀫𑀺𑀁 𑀞𑀺𑀢𑁂 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀬𑀲𑁆𑀫𑀺𑀦𑁆𑀢𑀺 𑀬𑀲𑁆𑀫𑀺𑀁 𑀯𑀺𑀦𑀬𑀧𑀺𑀝𑀓𑁂. 𑀞𑀺𑀢𑁂𑀢𑀺 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀦𑀽𑀦𑀁 𑀳𑀼𑀢𑁆𑀯𑀸 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀦𑀝𑁆𑀞𑁂𑀦 𑀞𑀺𑀢𑁂𑀢𑀺 𑀅𑀢𑁆𑀣𑁄. 𑀲𑀸𑀲𑀦𑀦𑁆𑀢𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀸𑀲𑀦𑀁. 𑀅𑀝𑁆𑀞𑀺𑀢𑀲𑁆𑀲𑀸𑀢𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀗𑁆𑀔𑀸𑀢𑁂 𑀅𑀦𑁆𑀢𑀤𑁆𑀯𑀬𑁂 𑀅𑀝𑁆𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀧𑁆𑀧𑀢𑀺𑀝𑁆𑀞𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’𑀦𑁆𑀢𑀺 (𑀲𑀁. 𑀦𑀺. 𑁧.𑁧) 𑀳𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀘𑀢𑁆𑀣𑁄 𑀢𑀻𑀲𑀼𑀧𑀺 𑀲𑀻𑀳𑀴𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑁄𑀬𑁂𑀯. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀝𑁆𑀞𑀺𑀢𑀲𑁆𑀲𑀸𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀧𑀺 𑀪𑀕𑀯𑀢𑁄’’𑀢𑀺 𑀯𑀼𑀢𑁆𑀢𑀁.

𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀢𑁂𑀲𑀼𑀬𑁂𑀯 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀦𑀝𑁆𑀞𑁂𑀦 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺. 𑀲𑀼𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀸𑀯 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀲𑀫𑀦𑁆𑀦𑀸𑀕𑀫𑀦𑀯𑀲𑁂𑀦 𑀲𑀼𑀲𑀡𑁆𑀞𑀸𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀦𑁂𑀦 𑀅𑀲𑁆𑀲 𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀬𑀣𑀸𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀭𑀽𑀧𑀓𑀸𑀬𑁂𑀦 𑀲𑀼𑀲𑀡𑁆𑀞𑀺𑀢𑁄, 𑀓𑀸𑀬𑀯𑀗𑁆𑀓𑀸𑀤𑀺𑀭𑀳𑀺𑀢𑀢𑁆𑀢𑀸 𑀢𑀸𑀤𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀦𑀸𑀫𑀓𑀸𑀬𑁂𑀦𑀧𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀲𑀢𑁆𑀢𑁂𑀲𑀼 𑀲𑀼𑀝𑁆𑀞𑀼 𑀲𑀫𑁆𑀫𑀸 𑀘 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁂𑀦 𑀯𑀸 𑀲𑀼𑀲𑀡𑁆𑀞𑀺𑀢𑀲𑁆𑀲. 𑀲𑀼𑀲𑀡𑁆𑀞𑀺𑀢𑀢𑁆𑀢𑀸 𑀳𑁂𑀲 𑀓𑁂𑀯𑀮𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀁 𑀅𑀧𑀦𑁂𑀢𑀼𑀓𑀸𑀫𑁄 𑀳𑀺𑀢𑀁 𑀉𑀧𑀲𑀁𑀳𑀭𑀺𑀢𑀼𑀓𑀸𑀫𑁄 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀫𑀼𑀤𑀺𑀢𑁄 𑀅𑀧𑀓𑁆𑀔𑀧𑀢𑀺𑀢𑁄 𑀘 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀥𑀺𑀓𑀸𑀭𑁂 𑀲𑀸𑀭𑀼𑀧𑁆𑀧𑀸𑀬 𑀣𑀼𑀢𑀺𑀬𑀸 𑀣𑁄𑀫𑁂𑀦𑁆𑀢𑁄 𑀆𑀳 ‘𑀲𑀼𑀲𑀡𑁆𑀞𑀺𑀢𑀲𑁆𑀲𑀸’’’𑀢𑀺 𑀯𑀢𑁆𑀯𑀸 ‘‘𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑀸𑀥𑀺𑀓𑀸𑀭𑀸𑀦𑀼𑀭𑀽𑀧𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀬𑀣𑀸𑀯𑀼𑀢𑁆𑀢𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀤𑀺𑀅𑀦𑁆𑀢𑀤𑁆𑀯𑀬𑁂 𑀅𑀝𑁆𑀞𑀺𑀢𑀢𑁆𑀢𑀸𑀬𑁂𑀯 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀲𑀫𑁆𑀫𑀸 𑀞𑀺𑀢𑀢𑁆𑀢𑀸 𑀲𑀼𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀆𑀭𑀫𑁆𑀪𑀸𑀦𑀼𑀭𑀽𑀧𑀣𑁄𑀫𑀦𑀸 𑀓𑀢𑀸 𑀳𑁄𑀢𑀺 𑀬𑀣𑀸𑀯𑀼𑀢𑁆𑀢𑀅𑀦𑁆𑀢𑀤𑁆𑀯𑀬𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀬𑁂𑀯 𑀬𑁂𑀪𑀼𑀬𑁆𑀬𑁂𑀦 𑀧𑀓𑀸𑀲𑀦𑀢𑁄.

𑀢𑀦𑁆𑀢𑀺 𑀧𑀼𑀩𑁆𑀩𑁂 ‘‘𑀬𑀲𑁆𑀫𑀺’’𑀦𑁆𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀦𑀺𑀬𑀫𑀯𑀘𑀦𑀁, 𑀢𑀲𑁆𑀲 ‘‘𑀯𑀺𑀦𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀓𑀢𑁆𑀯𑀸 𑀅𑀦𑀸𑀓𑀼𑀮𑀁 𑀓𑀢𑁆𑀯𑀸 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀲𑁆𑀲 𑀓𑀸𑀮𑀫𑀢𑁆𑀢𑀲𑁆𑀲𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂𑀦𑀧𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 𑀓𑁂𑀯𑀮𑀁 𑀩𑀼𑀤𑁆𑀥𑀯𑀺𑀲𑀬𑀁 𑀯𑀺𑀦𑀬𑀧𑀺𑀝𑀓𑀁 𑀅𑀢𑁆𑀢𑀦𑁄 𑀩𑀮𑁂𑀦 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀯𑀘𑀦𑀫𑀢𑁆𑀢𑀫𑁆𑀧𑀺 𑀅𑀜𑁆𑀜𑁂𑀳𑀺 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 ‘‘𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯’’𑀦𑁆𑀢𑀺 𑀆𑀳. 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑁄 𑀦𑀸𑀫 𑀅𑀢𑁆𑀣𑀢𑁄 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀺𑀢𑀸 𑀅𑀝𑁆𑀞𑀓𑀣𑀸, 𑀢𑀢𑁄𑀬𑁂𑀯 𑀘 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑁄 𑀅𑀝𑁆𑀞𑀓𑀣𑀸’’𑀢𑀺 𑀲𑀩𑁆𑀩𑀢𑁆𑀣 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀺𑀢𑀁 𑀅𑀝𑁆𑀞𑀓𑀣𑀁 𑀦𑀺𑀲𑁆𑀲𑀸𑀬 𑀯𑀡𑁆𑀡𑀬𑀺𑀲𑁆𑀲𑀁, 𑀦 𑀅𑀢𑁆𑀢𑀦𑁄𑀬𑁂𑀯 𑀩𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 ‘‘𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼 𑀧𑀼𑀦 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀓𑀺𑀁 𑀧𑀬𑁄𑀚𑀦’’𑀦𑁆𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀲𑁆𑀲 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀅𑀦𑀽𑀦𑀪𑀸𑀯𑀁 𑀅𑀢𑁆𑀢𑀦𑁄 𑀘 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀦𑁆𑀢𑀺 𑀏𑀓𑀦𑁆𑀢𑁂𑀦, 𑀬𑀣𑀺𑀘𑁆𑀙𑀓𑀁 𑀯𑀸, 𑀲𑀩𑁆𑀩𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 ‘‘𑀲𑀁𑀯𑀡𑁆𑀡𑀺𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀁 𑀲𑀁𑀯𑀡𑁆𑀡𑀺𑀢𑁄𑀬𑁂𑀯, 𑀦𑁄 𑀦 𑀲𑀁𑀯𑀡𑁆𑀡𑀺𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀳𑀺 𑀧𑀦 𑀲𑁄 𑀯𑀺𑀦𑀬𑁄 𑀲𑀁𑀯𑀡𑁆𑀡𑀺𑀢𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀻’’𑀢𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀬𑁄 𑀧𑀼𑀩𑁆𑀩𑀸𑀘𑀭𑀺𑀬𑀸 𑀏𑀯 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀉𑀢𑁆𑀢𑀫𑀝𑁆𑀞𑁂𑀦 𑀘 𑀆𑀲𑀪𑀸, 𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀻𑀤𑀺𑀲𑀸 𑀧𑀦𑁂𑀢𑁂 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀆𑀳 ‘‘𑀜𑀸𑀡𑀫𑁆𑀩𑀽’’𑀢𑀺𑀆𑀤𑀺. 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀦 𑀅𑀫𑁆𑀩𑀼𑀦𑀸 𑀲𑀮𑀺𑀮𑁂𑀦 𑀦𑀺𑀤𑁆𑀥𑁄𑀢𑀸𑀦𑀺 𑀦𑀺𑀲𑁆𑀲𑁂𑀲𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀥𑁄𑀢𑀸𑀦𑀺 𑀯𑀺𑀓𑁆𑀔𑀸𑀮𑀺𑀢𑀸𑀦𑀺 𑀯𑀺𑀲𑁄𑀥𑀺𑀢𑀸𑀦𑀺 𑀭𑀸𑀕𑀸𑀤𑀻𑀦𑀺 𑀢𑀻𑀡𑀺 𑀫𑀮𑀸𑀦𑀺 𑀓𑀸𑀫𑀸𑀲𑀯𑀸𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀬𑁂𑀳𑀺 𑀢𑁂 𑀜𑀸𑀡𑀫𑁆𑀩𑀼𑀦𑀺𑀤𑁆𑀥𑀸𑀢𑀫𑀮𑀸𑀲𑀯𑀸, 𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀘 𑀦 𑀓𑁂𑀯𑀮𑀁 𑀏𑀢𑁂𑀲𑀼 𑀆𑀘𑀭𑀺𑀬𑀪𑀸𑀯𑁄𑀬𑁂𑀯, 𑀅𑀣 𑀔𑁄 𑀭𑀸𑀕𑀸𑀤𑀺𑀫𑀮𑀭𑀳𑀺𑀢𑀸 𑀔𑀻𑀡𑀸𑀲𑀯𑀸 𑀯𑀺𑀲𑀼𑀤𑁆𑀥𑀲𑀢𑁆𑀢𑀸 𑀏𑀢𑁂𑀢𑀺 𑀤𑀲𑁆𑀲𑁂𑀢𑀺.

𑀔𑀻𑀡𑀸𑀲𑀯𑀪𑀸𑀯𑁂𑀧𑀺 𑀦 𑀏𑀢𑁂 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸, 𑀅𑀣 𑀔𑁄 𑀏𑀯𑀭𑀽𑀧𑁂𑀳𑀺𑀧𑀺 𑀆𑀦𑀼𑀪𑀸𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀧𑀝𑀺𑀲𑀫𑁆𑀪𑀺𑀤𑁂𑀳𑀻’’𑀢𑀺. 𑀯𑀺𑀲𑀼𑀤𑁆𑀥𑀸 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑀸 𑀯𑀺𑀚𑁆𑀚𑀸 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀬𑁂𑀲𑀁 𑀢𑁂 𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀧𑀝𑀺𑀲𑀫𑁆𑀪𑀺𑀤𑀸, 𑀢𑁂𑀳𑀺. 𑀏𑀓𑀤𑁂𑀲𑁂𑀦 𑀧𑀝𑀺𑀲𑀫𑁆𑀪𑀺𑀤𑀁 𑀅𑀧𑁆𑀧𑀢𑁆𑀢𑀸𑀦𑀁 𑀅𑀭𑀺𑀬𑀸𑀦𑀫𑁂𑀯 𑀅𑀪𑀸𑀯𑀢𑁄 𑀏𑀢𑁂𑀳𑀺 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀼𑀢𑀭𑀮𑀤𑁆𑀥𑀧𑁆𑀧𑀪𑁂𑀤𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀼𑀤𑁆𑀥𑀕𑁆𑀕𑀳𑀡𑀁 𑀓𑀢𑀁. 𑀯𑀺𑀚𑁆𑀚𑀸𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀅𑀝𑁆𑀞 𑀯𑀺𑀚𑁆𑀚𑀸 𑀯𑀸. 𑀢𑀢𑁆𑀣 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀜𑁆𑀘𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀅𑀝𑁆𑀞 𑀯𑀺𑀚𑁆𑀚𑀸 𑀧𑀦 𑁋

‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀺,

𑀇𑀤𑁆𑀥𑀺𑀧𑁆𑀧𑀪𑁂𑀤𑁄𑀧𑀺 𑀘 𑀤𑀺𑀩𑁆𑀩𑀲𑁄𑀢𑀁;

𑀧𑀭𑀲𑁆𑀲 𑀘𑁂𑀢𑁄𑀧𑀭𑀺𑀬𑀸𑀬𑀜𑀸𑀡𑀁,

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀕𑀢𑀜𑁆𑀘 𑀜𑀸𑀡𑀁;

𑀤𑀺𑀩𑁆𑀩𑀜𑁆𑀘 𑀘𑀓𑁆𑀔𑀸𑀲𑀯𑀲𑀗𑁆𑀔𑀬𑁄 𑀘,

𑀏𑀢𑀸𑀦𑀺 𑀜𑀸𑀡𑀸𑀦𑀺 𑀇𑀥𑀝𑁆𑀞 𑀯𑀺𑀚𑁆𑀚𑀸’’𑀢𑀺. 𑁋

𑀏𑀯𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑀦𑁄𑀫𑀬𑀺𑀤𑁆𑀥𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀕𑁆𑀕𑀳𑀺𑀢𑀸 𑀙 𑀅𑀪𑀺𑀜𑁆𑀜𑀸𑀬𑁂𑀯. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸, 𑀳𑁂𑀢𑀼𑀳𑁂𑀢𑀼𑀨𑀮𑀸𑀦𑀼𑀭𑀽𑀧𑀁 𑀯𑁄𑀳𑀸𑀭𑁂𑀲𑀼 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸, 𑀇𑀤𑀁 𑀜𑀸𑀡𑀁 𑀇𑀫𑀫𑀢𑁆𑀣𑀁 𑀚𑁄𑀢𑀬𑀢𑀻𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀜𑀸𑀡𑁂𑀲𑀼 𑀧𑀯𑀢𑁆𑀢𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀏𑀢𑀸𑀲𑀁 𑀧𑀦 𑀯𑀺𑀢𑁆𑀣𑀸𑀭𑀓𑀣𑀸 𑀅𑀢𑀺𑀧𑀧𑀜𑁆𑀘𑀪𑀸𑀯𑀢𑁄 𑀇𑀥 𑀦 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀁 𑀲𑀤𑁆𑀥𑀫𑁆𑀫𑁂𑀲𑀼 𑀙𑁂𑀓𑀪𑀸𑀯𑀢𑁄 𑀆𑀳 ‘‘𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀻’’𑀢𑀺. ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀥𑀫𑁆𑀫𑁂𑀲𑀼 𑀅𑀪𑀺𑀬𑁄𑀕𑀯𑀲𑁂𑀦 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀮𑀤𑁆𑀥𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀲𑀸𑀢𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀻𑀢𑀺 𑀧𑀺𑀝𑀓𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲 𑀲𑀁𑀯𑀡𑁆𑀡𑀦𑁂 𑀲𑀩𑁆𑀩𑀲𑁄 𑀅𑀢𑁆𑀣𑀧𑁆𑀧𑀓𑀸𑀲𑀦𑁂 𑀓𑁄𑀯𑀺𑀤𑁂𑀳𑀺 𑀙𑁂𑀓𑁂𑀳𑀺, 𑀓𑀼𑀲𑀮𑁂𑀳𑀻𑀢𑀺 𑀅𑀢𑁆𑀣𑁄.

𑀓𑀺𑀮𑁂𑀲𑀚𑀸𑀮𑀁 𑀧𑀭𑀺𑀓𑁆𑀔𑀸𑀭𑀩𑀸𑀳𑀼𑀮𑁆𑀮𑀁 𑀯𑀸 𑀲𑀁𑀮𑀺𑀔𑀢𑀺 𑀢𑀦𑀼𑀁 𑀓𑀭𑁄𑀢𑀻𑀢𑀺 𑀲𑀮𑁆𑀮𑁂𑀔𑁄. 𑀇𑀥 𑀧𑀦 𑀔𑀻𑀡𑀸𑀲𑀯𑀸𑀥𑀺𑀓𑀸𑀭𑀢𑁆𑀢𑀸 𑀧𑀭𑀺𑀓𑁆𑀔𑀸𑀭𑀩𑀸𑀳𑀼𑀮𑁆𑀮𑀲𑁆𑀲 𑀲𑀮𑁆𑀮𑀺𑀔𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀢𑀢𑁄𑀬𑁂𑀯 𑀘 𑀕𑀡𑁆𑀞𑀺𑀧𑀤𑁂 ‘‘𑀲𑀮𑁆𑀮𑁂𑀔𑀺𑀬𑁂 𑀧𑀭𑀺𑀫𑀺𑀢𑀧𑀭𑀺𑀓𑁆𑀔𑀸𑀭𑀯𑀼𑀢𑁆𑀢𑀺𑀬𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀮𑁆𑀮𑁂𑀔𑀲𑁆𑀲 𑀪𑀸𑀯𑁄 𑀲𑀮𑁆𑀮𑁂𑀔𑀺𑀬𑀁, 𑀢𑀲𑁆𑀫𑀺𑀁 𑀲𑀮𑁆𑀮𑁂𑀔𑀺𑀬𑁂, 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁄𑀲𑀼𑀮𑀪𑀽𑀧𑀫𑁂𑀳𑀻𑀢𑀺 𑀅𑀲𑀼𑀮𑀪𑀽𑀧𑀫𑁂𑀳𑀺 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀼𑀓𑀲𑀤𑀺𑀲𑀸𑀢𑀺 𑀢𑁂𑀲𑀁 𑀉𑀧𑀫𑀸𑀬 𑀅𑀦𑀼𑀘𑁆𑀙𑀯𑀺𑀓𑀧𑀼𑀕𑁆𑀕𑀮𑀸𑀦𑀁 𑀤𑀼𑀮𑁆𑀮𑀪𑀢𑁆𑀢𑀸 𑀦𑀢𑁆𑀣𑀺 𑀲𑀼𑀮𑀪𑀸 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀦𑁄𑀲𑀼𑀮𑀪𑀽𑀧𑀫𑀸. 𑀫𑀳𑀸𑀯𑀺𑀳𑀸𑀭𑀲𑁆𑀲𑀸𑀢𑀺 𑀘𑀺𑀢𑁆𑀢𑀮𑀧𑀩𑁆𑀩𑀢𑀅𑀪𑀬𑀕𑀺𑀭𑀺𑀲𑁂𑀲𑀦𑀺𑀓𑀸𑀬𑀤𑁆𑀯𑀬𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀥𑀚𑀽𑀧𑀫𑁂𑀳𑀻𑀢𑀺 𑀭𑀣𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀓𑀁 𑀭𑀣𑁂 𑀩𑀤𑁆𑀥𑀥𑀚𑀁 𑀯𑀺𑀬 𑀅𑀚𑀸𑀦𑀦𑁆𑀢𑀸𑀦𑀁 ‘‘𑀅𑀲𑀼𑀓𑁂𑀳𑀺 𑀘 𑀅𑀲𑀼𑀓𑁂𑀳𑀺 𑀘 𑀣𑁂𑀭𑁂𑀳𑀺 𑀦𑀺𑀯𑀸𑀲𑀺𑀢𑁄 𑀫𑀳𑀸𑀯𑀺𑀳𑀸𑀭𑁄 𑀦𑀸𑀫𑀸’’𑀢𑀺 𑀏𑀯𑀁 𑀫𑀳𑀸𑀯𑀺𑀳𑀸𑀭𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁆𑀢𑀸 𑀫𑀳𑀸𑀯𑀺𑀳𑀸𑀭𑀲𑁆𑀲 𑀥𑀚𑀽𑀧𑀫𑁂𑀳𑀺. 𑀲𑀁𑀯𑀡𑁆𑀡𑀺𑀢𑁄𑀢𑀺 𑀲𑀫𑁆𑀫𑀸 𑀅𑀦𑀽𑀦𑀁 𑀓𑀢𑁆𑀯𑀸 𑀯𑀡𑁆𑀡𑀺𑀢𑁄. 𑀲𑀁𑀯𑀡𑁆𑀡𑀺𑀢𑁄 𑀅𑀬𑀁 𑀯𑀺𑀦𑀬𑁄𑀢𑀺 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀘𑀺𑀢𑁆𑀢𑁂𑀳𑀺 𑀦𑀬𑁂𑀳𑀻𑀢𑀺 𑀅𑀦𑁂𑀓𑀧𑁆𑀧𑀪𑁂𑀤𑀦𑀬𑀢𑁆𑀢𑀸 𑀯𑀺𑀘𑀺𑀢𑁆𑀢𑁂𑀳𑀺 𑀦𑀬𑁂𑀳𑀺. 𑀲𑀫𑁆𑀩𑀼𑀤𑁆𑀥𑀯𑀭𑀦𑁆𑀯𑀬𑁂𑀳𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀯𑀭𑀁 𑀅𑀦𑀼𑀕𑀢𑁂𑀳𑀺, 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀕𑀢𑁂𑀳𑀺 𑀦𑀬𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀩𑀼𑀤𑁆𑀥𑀯𑀭𑀁 𑀅𑀦𑀼𑀕𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀻𑀢𑀺 𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄.

𑀏𑀯𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀅𑀦𑀽𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀯𑀡𑁆𑀡𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀺𑀜𑁆𑀘𑀸𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀲𑀪𑁂𑀳𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑀯𑀺𑀲𑀺𑀝𑁆𑀞𑁂𑀳𑀺 𑀅𑀬𑀁 𑀯𑀺𑀦𑀬𑁄 𑀲𑀩𑁆𑀩𑀲𑁄 𑀯𑀡𑁆𑀡𑀺𑀢𑁄, 𑀢𑀣𑀸𑀧𑀺 𑀢𑁂𑀲𑀁 𑀏𑀲𑀸 𑀲𑀁𑀯𑀡𑁆𑀡𑀦𑀸 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀁 𑀪𑀸𑀲𑀸𑀬 𑀲𑀗𑁆𑀔𑀢𑀢𑁆𑀢𑀸 𑀭𑀘𑀺𑀢𑀢𑁆𑀢𑀸 𑀤𑀻𑀧𑀦𑁆𑀢𑀭𑁂 𑀪𑀺𑀓𑁆𑀔𑀼𑀚𑀦𑀲𑁆𑀲 𑀲𑀻𑀳𑀴𑀤𑀻𑀧𑀢𑁄 𑀅𑀜𑁆𑀜𑀤𑀻𑀧𑀯𑀸𑀲𑀺𑀦𑁄 𑀪𑀺𑀓𑁆𑀔𑀼𑀕𑀡𑀲𑁆𑀲 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀬𑀲𑁆𑀫𑀸 𑀦𑀸𑀪𑀺𑀲𑀫𑁆𑀪𑀼𑀡𑀸𑀢𑀺 𑀦 𑀲𑀫𑁆𑀧𑀸𑀤𑁂𑀢𑀺 𑀦 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀇𑀫𑀁 𑀲𑀁𑀯𑀡𑁆𑀡𑀦𑀁 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀁 𑀓𑀢𑁆𑀯𑀸 𑀩𑀼𑀤𑁆𑀥𑀲𑀺𑀭𑀺𑀢𑁆𑀣𑁂𑀭𑁂𑀦 𑀅𑀚𑁆𑀛𑀺𑀝𑁆𑀞𑁄 𑀇𑀤𑀸𑀦𑀺 𑀲𑀫𑀸𑀭𑀪𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀲𑀁𑀯𑀡𑁆𑀡𑀺𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀲𑀁𑀯𑀡𑁆𑀡𑀦𑀸, 𑀅𑀝𑁆𑀞𑀓𑀣𑀸. 𑀲𑀸 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀞𑀫𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀦𑀼𑀭𑀽𑀧𑁂𑀦𑁂𑀯 𑀯𑀸𑀘𑀦𑀸𑀫𑀕𑁆𑀕𑀁 𑀆𑀭𑁄𑀧𑀺𑀢𑀢𑁆𑀢𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁄𑀬𑁂𑀯 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀪𑀽𑀢𑁄 𑀓𑀣𑀸𑀫𑀕𑁆𑀕𑁄. 𑀲𑁄𑀬𑁂𑀯 𑀘 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀪𑀢𑁄, 𑀧𑀘𑁆𑀙𑀸 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑁄. 𑀢𑁂𑀦𑀸𑀳 ‘‘𑀲𑀻𑀳𑀴𑀤𑀻𑀧𑀓𑁂𑀦𑀸’’𑀢𑀺𑀆𑀤𑀺. 𑀲𑀻𑀳𑀲𑁆𑀲 𑀮𑀸𑀦𑀢𑁄 𑀕𑀳𑀡𑀢𑁄 𑀲𑀻𑀳𑀴𑁄, 𑀲𑀻𑀳𑀓𑀼𑀫𑀸𑀭𑁄. 𑀢𑀁𑀯𑀁𑀲𑀚𑀸𑀢𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸𑀦𑀁 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲𑀧𑀺 𑀲𑀻𑀳𑀴𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀺𑀁 𑀲𑀻𑀳𑀴𑀤𑀻𑀧𑁂 𑀪𑀽𑀢𑀢𑁆𑀢𑀸 𑀲𑀻𑀳𑀴𑀤𑀻𑀧𑀓𑁂𑀦 𑀯𑀸𑀓𑁆𑀬𑁂𑀦 𑀯𑀘𑀦𑁂𑀦, 𑀲𑀻𑀳𑀴𑀪𑀸𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀦𑁆𑀢𑀺 𑀧𑀸𑀴𑀺𑀦𑀬𑀲𑁆𑀲 𑀅𑀦𑀼𑀭𑀽𑀧𑀁 𑀓𑀢𑁆𑀯𑀸, 𑀫𑀸𑀕𑀥𑀪𑀸𑀲𑀸𑀬 𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀚𑁆𑀛𑁂𑀲𑀦𑀦𑁆𑀢𑀺 𑀕𑀭𑀼𑀝𑁆𑀞𑀸𑀦𑀺𑀬𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀭𑀼𑀢𑀭𑀁 𑀧𑀬𑁄𑀚𑀦𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀅𑀚𑁆𑀛𑁂𑀲𑀦𑀸, 𑀢𑀁 𑀅𑀚𑁆𑀛𑁂𑀲𑀦𑀁, 𑀆𑀬𑀸𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀲 ‘‘𑀲𑀫𑀦𑀼𑀲𑁆𑀲𑀭𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀲 𑀅𑀚𑁆𑀛𑁂𑀲𑀦𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀲𑁆𑀲 𑀣𑁂𑀭𑀲𑁆𑀲𑀸’’𑀢𑀺. 𑀩𑀼𑀤𑁆𑀥𑀲𑀺𑀭𑀻𑀢𑀺 𑀅𑀯𑁆𑀳𑀬𑁄 𑀦𑀸𑀫𑀁 𑀬𑀲𑁆𑀲 𑀲𑁄𑀬𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑁄, 𑀢𑀲𑁆𑀲, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀣𑁂𑀭𑀲𑁆𑀲 𑀅𑀚𑁆𑀛𑁂𑀲𑀦𑀁 𑀲𑀫𑁆𑀫𑀸 𑀆𑀤𑀭𑁂𑀦 𑀲𑀫𑀦𑀼𑀲𑁆𑀲𑀭𑀦𑁆𑀢𑁄 𑀳𑀤𑀬𑁂 𑀞𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀁𑀯𑀡𑁆𑀡𑀦𑀁 𑀢𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀜𑁆𑀘 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀲𑀁𑀯𑀡𑁆𑀡𑀦𑀁 𑀲𑀫𑀸𑀭𑀪𑀦𑁆𑀢𑁄 𑀲𑀓𑀮𑀸𑀬𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀇𑀥 𑀕𑀳𑁂𑀢𑀩𑁆𑀩𑀢𑁄 𑀫𑀳𑀸𑀅𑀝𑁆𑀞𑀓𑀣𑀁 𑀢𑀲𑁆𑀲𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀬 𑀲𑀁𑀯𑀡𑁆𑀡𑀦𑀸𑀬 𑀲𑀭𑀻𑀭𑀁 𑀓𑀢𑁆𑀯𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀬𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀣𑁂𑀯 𑀓𑀼𑀭𑀼𑀦𑁆𑀤𑀻𑀦𑀸𑀫𑀸𑀤𑀻𑀲𑀼 𑀯𑀺𑀲𑁆𑀲𑀼𑀢𑀸𑀲𑀼 𑀅𑀝𑁆𑀞𑀓𑀣𑀸𑀲𑀼 𑀬𑁄 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀢𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑀢𑁄 𑀬𑀼𑀢𑁆𑀢𑀫𑀢𑁆𑀣𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄 𑀅𑀦𑁆𑀢𑁄𑀕𑀥𑀢𑁆𑀣𑁂𑀭𑀯𑀸𑀤𑀁 𑀓𑀢𑁆𑀯𑀸 𑀲𑀁𑀯𑀡𑁆𑀡𑀦𑀁 𑀲𑀫𑀸𑀭𑀪𑀺𑀲𑁆𑀲𑀦𑁆𑀢𑀺 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀢𑁆𑀣𑁄 𑀓𑀣𑀺𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸𑀬𑁂𑀯 𑀅𑀝𑁆𑀞𑀓𑀣𑀸 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁭; 𑁨.𑁮) 𑀯𑀺𑀬. 𑀫𑀳𑀸𑀧𑀘𑁆𑀘𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀘𑁆𑀘𑀭𑀻𑀢𑀺 𑀉𑀴𑀼𑀫𑁆𑀧𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀢𑁆𑀢𑀸 𑀢𑀫𑁂𑀯 𑀦𑀸𑀫𑀁 𑀚𑀸𑀢𑀁. 𑀓𑀼𑀭𑀼𑀦𑁆𑀤𑀺𑀯𑀮𑁆𑀮𑀺𑀯𑀺𑀳𑀸𑀭𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀓𑀢𑀢𑁆𑀢𑀸 𑀓𑀼𑀭𑀼𑀦𑁆𑀤𑀻𑀢𑀺 𑀦𑀸𑀫𑀁 𑀚𑀸𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀅𑀦𑁆𑀥𑀓𑀝𑁆𑀞𑀓𑀣𑀁 𑀲𑀗𑁆𑀔𑁂𑀧𑀝𑁆𑀞𑀓𑀣𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀲𑁆𑀲𑀼𑀢𑀸𑀲𑀽𑀢𑀺 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀸𑀲𑀼, 𑀧𑀸𑀓𑀝𑀸𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀼𑀢𑁆𑀢𑀫𑀢𑁆𑀣𑀦𑁆𑀢𑀺 𑀏𑀢𑁆𑀣 𑀢𑀸𑀯 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 𑀇𑀤𑀁 𑀯𑀼𑀢𑁆𑀢𑀁 ‘‘𑀬𑀼𑀢𑁆𑀢𑀫𑀢𑁆𑀣𑀦𑁆𑀢𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀝𑁆𑀞𑀸𑀦𑀲𑁆𑀲 𑀬𑀼𑀢𑁆𑀢𑀫𑀢𑁆𑀣𑀁, 𑀦 𑀧𑀦 𑀢𑀢𑁆𑀣 𑀅𑀬𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀫𑀳𑀸𑀕𑀡𑁆𑀞𑀺𑀧𑀤𑁂 𑀧𑀦𑁂𑀢𑁆𑀣 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀧𑀦 ‘‘𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁂𑀦 𑀯𑀺𑀦𑀬𑀬𑀼𑀢𑁆𑀢𑀺𑀬𑀸 𑀯𑀸 𑀬𑀼𑀢𑁆𑀢𑀫𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀫𑀳𑀸𑀧𑀘𑁆𑀘𑀭𑀺𑀆𑀤𑀻𑀲𑀼𑀧𑀺 𑀓𑀢𑁆𑀣𑀘𑀺 𑀅𑀬𑀼𑀢𑁆𑀢𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀉𑀧𑀭𑀺 𑀯𑀺𑀪𑀸𑀯𑀦𑀢𑁄. ‘‘𑀅𑀝𑁆𑀞𑀓𑀣𑀁𑀬𑁂𑀯 𑀕𑀳𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀢𑁆𑀣𑁂𑀭𑀯𑀸𑀤𑀸𑀦𑀁 𑀩𑀸𑀳𑀺𑀭𑀪𑀸𑀯𑁄 𑀲𑀺𑀬𑀸𑀢𑀺 𑀢𑁂𑀧𑀺 𑀅𑀦𑁆𑀢𑁄𑀓𑀢𑁆𑀢𑀼𑀓𑀸𑀫𑁄 ‘‘𑀅𑀦𑁆𑀢𑁄𑀕𑀥𑀣𑁂𑀭𑀯𑀸𑀤’’𑀦𑁆𑀢𑀺 𑀆𑀳, 𑀣𑁂𑀭𑀯𑀸𑀤𑁂𑀧𑀺 𑀅𑀦𑁆𑀢𑁄𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀁𑀯𑀡𑁆𑀡𑀦𑀦𑁆𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀢𑀼 ‘‘𑀲𑀁𑀯𑀡𑁆𑀡𑀦’’𑀦𑁆𑀢𑀺 𑀯𑀘𑀦𑀁 𑀢𑀢𑁆𑀣𑁂𑀯 ‘‘𑀲𑀫𑀸𑀭𑀪𑀦𑁆𑀢𑁄’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀓𑀫𑁆𑀫𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀸𑀢𑀺 𑀯𑀢𑁆𑀢𑀩𑁆𑀩𑁂 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀭𑀲𑁆𑀲𑀪𑀸𑀯𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑁄𑀢𑀽𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀫𑁂’’𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀢𑀁 𑀫𑀫 𑀲𑀁𑀯𑀡𑁆𑀡𑀦𑀁 𑀥𑀫𑁆𑀫𑀧𑀤𑀻𑀧𑀲𑁆𑀲 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀁 𑀲𑀸𑀲𑀦𑀥𑀫𑁆𑀫𑀁 𑀧𑀸𑀴𑀺𑀥𑀫𑁆𑀫𑀁 𑀯𑀸 𑀲𑀓𑁆𑀓𑀘𑁆𑀘𑀁 𑀧𑀝𑀺𑀫𑀸𑀦𑀬𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸, 𑀅𑀘𑀺𑀭𑀧𑀩𑁆𑀩𑀚𑀺𑀢𑀢𑁆𑀢𑀸 𑀦𑀯𑀸, 𑀢𑁂𑀲𑀁 𑀫𑀚𑁆𑀛𑁂 𑀪𑀯𑀢𑁆𑀢𑀸 𑀫𑀚𑁆𑀛𑀺𑀫𑀸 𑀘 𑀪𑀺𑀓𑁆𑀔𑀽 𑀧𑀲𑀦𑁆𑀦𑀘𑀺𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀧𑁆𑀧𑀬𑁄𑀚𑀦𑀢𑁆𑀢𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀯𑀺𑀥𑀺𑀦𑀸 𑀧𑀫𑀸𑀡𑀢𑁆𑀢𑀸 𑀘 𑀲𑀤𑁆𑀤𑀳𑀺𑀢𑁆𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀬𑀼𑀢𑁆𑀢𑀘𑀺𑀢𑁆𑀢𑀸 𑀇𑀲𑁆𑀲𑀸𑀧𑀓𑀢𑀸 𑀅𑀳𑀼𑀢𑁆𑀯𑀸 𑀦𑀺𑀲𑀸𑀫𑁂𑀦𑁆𑀢𑀼 𑀲𑀼𑀡𑀦𑁆𑀢𑀽𑀢𑀺. 𑀢𑀢𑁆𑀣 𑀥𑀫𑁆𑀫𑀧𑁆𑀧𑀤𑀻𑀧𑀲𑁆𑀲𑀸𑀢𑀺 𑀥𑀫𑁆𑀫𑁄𑀬𑁂𑀯 𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀫𑁄𑀳𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄 𑀧𑀤𑀻𑀧𑀲𑀤𑀺𑀲𑀢𑁆𑀢𑀸 𑀧𑀤𑀻𑀧𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀧𑀤𑀻𑀧𑁄, 𑀪𑀕𑀯𑀸. 𑀢𑀲𑁆𑀲 𑀥𑀫𑁆𑀫𑀧𑀤𑀻𑀧𑀲𑁆𑀲.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀫𑀸𑀡𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑁂𑀯 𑀩𑀼𑀤𑁆𑀥𑁂𑀦 𑀬𑁄 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄, 𑀲𑁄 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀬𑁂𑀳𑀺 𑀧𑀼𑀢𑁆𑀢𑁂𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀳𑀺 𑀢𑀣𑁂𑀯 𑀜𑀸𑀢𑁄, 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸 𑀲𑀻𑀳𑀴𑀝𑁆𑀞𑀓𑀣𑀸𑀘𑀭𑀺𑀬𑀸 𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀽𑀢𑀺 𑀅𑀬𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀥𑀫𑁆𑀫𑁄𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂 𑀲𑀗𑁆𑀕𑀡𑁆𑀳𑀸𑀢𑀺, 𑀯𑀺𑀦𑀬𑁄𑀢𑀺 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁. 𑀏𑀢𑁆𑀢𑀸𑀯𑀢𑀸 𑀘 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺. 𑀲𑀓𑀮𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑀯𑀺𑀦𑀬𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀯𑀼𑀢𑁆𑀢𑁄𑀢𑀺 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑁄. 𑀦 𑀳𑀺 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑀦𑀸𑀫 𑀢𑀦𑁆𑀢𑀺𑀧𑀤𑀁 𑀅𑀢𑁆𑀣𑀺, 𑀲𑀩𑁆𑀩𑁂𑀲𑀁𑀬𑁂𑀯 𑀅𑀢𑁆𑀣𑁄 𑀓𑀣𑀺𑀢𑁄, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄𑀧𑀺 𑀪𑀸𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀸 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀬𑁂𑀯 𑀳𑀺 𑀅𑀝𑁆𑀞𑀓𑀣𑀸. 𑀢𑀣𑁂𑀯 𑀜𑀸𑀢𑁄𑀢𑀺 𑀬𑀣𑁂𑀯 𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑁄, 𑀢𑀣𑁂𑀯 𑀏𑀓𑀧𑀤𑀫𑁆𑀧𑀺 𑀏𑀓𑀓𑁆𑀔𑀭𑀫𑁆𑀧𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀜𑁆𑀘 𑀅𑀯𑀺𑀓𑁄𑀧𑁂𑀢𑁆𑀯𑀸 𑀜𑀸𑀢𑁄 𑀯𑀺𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀫𑀢𑀺𑀫𑀘𑁆𑀘𑀚𑀦𑁆𑀢𑀸𑀢𑀺 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑀸. 𑀅𑀝𑁆𑀞𑀓𑀣𑀸 𑀅𑀓𑀁𑀲𑀽𑀢𑀺 𑀅𑀝𑁆𑀞𑀓𑀣𑀸𑀬𑁄 𑀅𑀓𑀁𑀲𑀼. 𑀓𑀢𑁆𑀣𑀘𑀺 ‘‘𑀅𑀝𑁆𑀞𑀓𑀣𑀸𑀫𑀓𑀁𑀲𑀽’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀢𑁆𑀣𑀸𑀧𑀺 𑀲𑁄𑀬𑁂𑀯𑀢𑁆𑀣𑁄, 𑀫-𑀓𑀸𑀭𑁄 𑀧𑀦 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀅𑀝𑁆𑀞𑀓𑀣𑀸’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀁 𑀅𑀯𑀺𑀓𑁄𑀧𑁂𑀢𑁆𑀯𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀼, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀳𑁂𑀢𑀼𑀅𑀢𑁆𑀣𑀲𑁆𑀲 ‘‘𑀢𑀲𑁆𑀫𑀸’’𑀢𑀺 𑀇𑀫𑀺𑀦𑀸𑀬𑁂𑀯 𑀧𑀓𑀸𑀲𑀺𑀢𑀢𑁆𑀢𑀸. 𑀬𑀤𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀧𑀫𑀸𑀡𑀁, 𑀏𑀯𑀁 𑀲𑀢𑀺 𑀢𑀢𑁆𑀣 𑀧𑀫𑀸𑀤𑀮𑁂𑀔𑀸𑀧𑀺 𑀧𑀫𑀸𑀡𑀁 𑀲𑀺𑀬𑀸𑀢𑀺 𑀆𑀳 ‘‘𑀯𑀚𑁆𑀚𑀬𑀺𑀢𑁆𑀯𑀸𑀦 𑀧𑀫𑀸𑀤𑀮𑁂𑀔’’𑀦𑁆𑀢𑀺. 𑀢𑀢𑁆𑀣 𑀧𑀫𑀸𑀤𑀮𑁂𑀔𑀦𑁆𑀢𑀺 𑀅𑀧𑀭𑀪𑀸𑀕𑁂 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀓𑀸𑀮𑁂 𑀧𑀫𑀚𑁆𑀚𑀺𑀢𑁆𑀯𑀸 𑀮𑀺𑀔𑀦𑀯𑀲𑁂𑀦 𑀧𑀯𑀢𑁆𑀢𑀁 𑀧𑀫𑀸𑀤𑀧𑀸𑀞𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀫𑀸𑀤𑁂𑀦 𑀲𑀢𑀺𑀁 𑀅𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 ‘‘𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑀤𑀺𑀲𑀁 𑀬𑀁 𑀮𑀺𑀔𑀺𑀢𑀁, 𑀢𑀁 𑀯𑀚𑁆𑀚𑀬𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸 𑀲𑀩𑁆𑀩𑀁 𑀧𑀫𑀸𑀡𑀦𑁆𑀢𑀺. 𑀯𑀓𑁆𑀔𑀢𑀺 𑀳𑀺 𑀢𑀢𑁆𑀣 𑁋

‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲 𑀧𑀼𑀩𑁆𑀩𑀧𑀬𑁄𑀕𑁂 𑀧𑀸𑀘𑀺𑀢𑁆𑀢𑀺𑀬𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀁 𑀦𑀸𑀫 𑀅𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁪).

𑀓𑁂𑀲𑀁 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁 𑀇𑀥 𑀧𑀡𑁆𑀟𑀺𑀢𑀸𑀦’’𑀦𑁆𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀧𑀼𑀦 ‘‘𑀬𑀲𑁆𑀫𑀸’’𑀢𑀺 𑀯𑀘𑀦𑀲𑁆𑀲 𑀓𑁄 𑀲𑀫𑁆𑀩𑀦𑁆𑀥𑁄𑀢𑀺 𑀘𑁂? 𑀏𑀢𑁆𑀣 𑀢𑀸𑀯 𑀫𑀳𑀸𑀕𑀡𑁆𑀞𑀺𑀧𑀤𑁂 𑀕𑀡𑁆𑀞𑀺𑀧𑀤𑁂 𑀘 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁, 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀧𑀦 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 𑀇𑀤𑀁 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀧𑀫𑀸𑀡𑀁, 𑀢𑀲𑁆𑀫𑀸 𑀦𑀺𑀲𑀸𑀫𑁂𑀦𑁆𑀢𑀼 𑀧𑀲𑀦𑁆𑀦𑀘𑀺𑀢𑁆𑀢𑀸’’𑀢𑀺. 𑀏𑀯𑀫𑀲𑁆𑀲 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀫𑁆𑀧𑀺 𑀧𑀫𑀸𑀡𑀫𑁂𑀯𑀸𑀢𑀺 𑀧𑀸𑀞𑀲𑁂𑀲𑀁 𑀓𑀢𑁆𑀯𑀸 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄 𑀯𑀤𑀢𑀺. 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀢𑀢𑁆𑀣 ‘‘𑀬𑀲𑁆𑀫𑀸’’𑀢𑀺 𑀯𑀘𑀦𑀲𑁆𑀲 𑀧𑀞𑀫𑀁 𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀧𑀫𑀸𑀡𑀦𑁆𑀢𑀺 𑀲𑀸𑀥𑀺𑀢𑀢𑁆𑀢𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀧𑀺 𑀲𑀁𑀯𑀡𑁆𑀡𑀦𑀸 𑀓𑁂𑀯𑀮𑀁 𑀯𑀘𑀦𑀫𑀢𑁆𑀢𑁂𑀦𑁂𑀯 𑀪𑀺𑀦𑁆𑀦𑀸, 𑀅𑀢𑁆𑀣𑀢𑁄 𑀧𑀦 𑀅𑀝𑁆𑀞𑀓𑀣𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀙𑀸 𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀯𑀲𑁂𑀦 𑀧𑀦 𑀇𑀥 𑀯𑀼𑀢𑁆𑀢𑀫𑁆𑀧𑀺 𑀓𑀲𑁆𑀫𑀸 𑀧𑀫𑀸𑀡𑀦𑁆𑀢𑀺 𑀘𑁂? 𑀬𑀲𑁆𑀫𑀸 𑀯𑀘𑀦𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀏𑀲𑀸𑀧𑀺 𑀅𑀝𑁆𑀞𑀓𑀣𑀸𑀬𑁂𑀯, 𑀢𑀲𑁆𑀫𑀸 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀫𑀸𑀓𑀼𑀮𑀁 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀜𑁆𑀘 𑀓𑀢𑁆𑀯𑀸 𑀕𑀡𑁆𑀞𑀺𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄, 𑀅𑀦𑀸𑀓𑀼𑀮𑀯𑀘𑀦𑁄 𑀘 𑀪𑀤𑀦𑁆𑀢𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄. 𑀦 𑀳𑀺 𑀲𑁄 𑀏𑀯𑀫𑀸𑀓𑀼𑀮𑀁 𑀓𑀢𑁆𑀯𑀸 𑀯𑀢𑁆𑀢𑀼𑀫𑀭𑀳𑀢𑀺, 𑀢𑀲𑁆𑀫𑀸 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀫𑀦𑀸𑀓𑀼𑀮𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀜𑁆𑀘 𑀓𑀢𑁆𑀯𑀸 𑀬𑀣𑀸𑀞𑀺𑀢𑀲𑁆𑀲 𑀲𑀫𑁆𑀩𑀦𑁆𑀥𑀯𑀲𑁂𑀦𑁂𑀯 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀓𑀣𑀁? 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀺 𑀦𑀸𑀫 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀅𑀬𑀁 𑀧𑀦 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀓𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀢𑀢𑁄 𑀘 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀬𑀲𑁆𑀫𑀸 𑀘 𑀅𑀬𑀁 𑀲𑀁𑀯𑀡𑁆𑀡𑀦𑀸𑀧𑀺 𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑀢𑁆𑀢𑀯𑀺𑀲𑀺𑀝𑁆𑀞𑀸, 𑀅𑀢𑁆𑀣𑀢𑁄 𑀧𑀦 𑀅𑀪𑀺𑀦𑁆𑀦𑀸𑀯, 𑀢𑀢𑁄𑀬𑁂𑀯 𑀘 𑀧𑀫𑀸𑀡𑀪𑀽𑀢𑀸 𑀳𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀆𑀤𑀭𑀁 𑀓𑀢𑁆𑀯𑀸 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺. 𑀢𑀣𑀸 𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀧𑀫𑀸𑀡𑀪𑀸𑀯𑁄, 𑀇𑀫𑀺𑀲𑁆𑀲𑀸 𑀘 𑀲𑀁𑀯𑀡𑁆𑀡𑀦𑀸𑀬 𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀫𑀢𑁆𑀢𑀯𑀺𑀲𑀺𑀝𑁆𑀞𑀸𑀬 𑀅𑀢𑁆𑀣𑀢𑁄 𑀢𑀢𑁄 𑀅𑀪𑀺𑀦𑁆𑀦𑀪𑀸𑀯𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀳𑁂𑀢𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀓𑁂𑀯𑀮𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀲𑀢𑀺𑀧𑀺 𑀧𑀫𑀸𑀡𑀪𑀸𑀯𑁂 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀢𑀢𑁄 𑀪𑀺𑀦𑁆𑀦𑀸 𑀅𑀢𑁆𑀣𑀢𑁄 𑀅𑀜𑁆𑀜𑀸𑀬𑁂𑀯 𑀘 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀯𑀢𑁆𑀢𑀼𑀫𑀭𑀳𑀢𑀺, 𑀦𑀸𑀧𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀢𑀢𑁄𑀅𑀪𑀺𑀦𑁆𑀦𑀪𑀸𑀯𑁂𑀧𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀁 𑀅𑀲𑀢𑀺 𑀧𑀫𑀸𑀡𑀪𑀸𑀯𑁂 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀭𑀽𑀧𑀸 𑀳𑁄𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀉𑀪𑀬𑀫𑁆𑀧𑁂𑀢𑀁 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀳𑁂𑀢𑀽𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀪𑀸𑀲𑀦𑁆𑀢𑀭𑀫𑁂𑀯 𑀳𑀺𑀢𑁆𑀯𑀸𑀢𑀺 𑀓𑀜𑁆𑀘𑀼𑀓𑀲𑀤𑀺𑀲𑀁 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸. 𑀯𑀺𑀢𑁆𑀣𑀸𑀭𑀫𑀕𑁆𑀕𑀜𑁆𑀘 𑀲𑀫𑀸𑀲𑀬𑀺𑀢𑁆𑀯𑀸𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀆𑀦𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀧𑀜𑁆𑀘𑀺𑀢𑀁 ‘‘𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽’’𑀢𑀺 (𑀧𑀸𑀭𑀸. 𑁪𑁫) 𑀏𑀢𑁆𑀣 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀬 𑀢𑀸𑀤𑀺𑀲𑀁 𑀯𑀺𑀢𑁆𑀣𑀸𑀭𑀫𑀕𑁆𑀕𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀏𑀢𑁆𑀣 𑀘 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀏𑀓𑀫𑁂𑀯 𑀆𑀕𑀢𑀁, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑀩𑁆𑀩𑀸𑀦𑀻𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀸𑀦𑀺 𑀘 ‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫’𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀔𑀦𑁆𑀥𑀓𑀢𑁄 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀺𑀪𑀗𑁆𑀕𑀢𑁄 𑀘 𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 𑀓𑀣𑀺𑀢𑀸𑀦𑀺. 𑀢𑀸𑀦𑀺 𑀫𑀬𑀁 𑀧𑀭𑀺𑀯𑀸𑀭𑀸𑀯𑀲𑀸𑀦𑁂 𑀓𑀫𑁆𑀫𑀯𑀺𑀪𑀗𑁆𑀕𑁂𑀬𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀘 𑀦 𑀪𑀸𑀭𑀺𑀬𑀸 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀞𑀺𑀢𑀸𑀬 𑀘 𑀧𑀸𑀴𑀺𑀬𑀸 𑀯𑀡𑁆𑀡𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀪𑀯𑀺𑀲𑁆𑀲𑀢𑀺, 𑀢𑀸𑀦𑀺 𑀘 𑀞𑀸𑀦𑀸𑀦𑀺 𑀅𑀲𑀼𑀜𑁆𑀜𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀼𑀧𑀤𑀯𑀡𑁆𑀡𑀦𑀫𑁂𑀯 𑀓𑀭𑁄𑀫𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫 𑀪𑀺𑀓𑁆𑀔𑀼𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸).

𑀯𑀺𑀦𑀺𑀘𑁆𑀙𑀬𑀁 𑀲𑀩𑁆𑀩𑀫𑀲𑁂𑀲𑀬𑀺𑀢𑁆𑀯𑀸𑀢𑀺 𑀢𑀁𑀢𑀁𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀦𑀺𑀘𑁆𑀙𑀬𑀁 𑀅𑀲𑁂𑀲𑀬𑀺𑀢𑁆𑀯𑀸 𑀲𑁂𑀲𑀁 𑀅𑀓𑀢𑁆𑀯𑀸, 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀡𑁆𑀡𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀆𑀕𑀢𑀁 𑀧𑀸𑀴𑀺𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀲𑀁𑀯𑀡𑁆𑀡𑀦𑀢𑁄 𑀲𑀻𑀳𑀴𑀝𑁆𑀞𑀓𑀣𑀸𑀲𑀼 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀯𑀡𑁆𑀡𑀺𑀢𑀁 𑀬𑀣𑀸𑀞𑀸𑀦𑁂𑀬𑁂𑀯 𑀲𑀁𑀯𑀡𑁆𑀡𑀦𑀢𑁄 𑀘 𑀯𑀼𑀢𑁆𑀢𑀁 ‘‘𑀢𑀦𑁆𑀢𑀺𑀓𑁆𑀓𑀫𑀁 𑀓𑀺𑀜𑁆𑀘𑀺 𑀅𑀯𑁄𑀓𑁆𑀓𑀫𑀺𑀢𑁆𑀯𑀸’’𑀢𑀺, 𑀓𑀺𑀜𑁆𑀘𑀺 𑀧𑀸𑀴𑀺𑀓𑁆𑀓𑀫𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 𑀆𑀕𑀢𑀸𑀦𑀫𑁆𑀧𑀺 𑀯𑀘𑀦𑀸𑀦𑀫𑀢𑁆𑀣𑀁. 𑀲𑀻𑀳𑀴𑀝𑁆𑀞𑀓𑀣𑀸𑀲𑀼 ‘‘𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀯𑁂𑀭𑀜𑁆𑀚𑀓𑀡𑁆𑀟𑀸𑀤𑀻𑀲𑀼 𑀛𑀸𑀦𑀓𑀣𑀸𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀆𑀥𑀺𑀆𑀤𑀻𑀦𑀁 𑀲𑀼𑀢𑁆𑀢𑀦𑁆𑀢𑀯𑀘𑀦𑀸𑀦𑀫𑀢𑁆𑀣𑀁 𑀢𑀁𑀢𑀁𑀲𑀼𑀢𑁆𑀢𑀸𑀦𑀼𑀭𑀽𑀧𑀁 𑀲𑀩𑁆𑀩𑀲𑁄 𑀧𑀭𑀺𑀤𑀻𑀧𑀬𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁂𑀲𑁆𑀲𑀢𑀻𑀢𑀺 𑀪𑀯𑀺𑀲𑁆𑀲𑀢𑀺, 𑀓𑀭𑀺𑀬𑀺𑀲𑁆𑀲𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀞𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁 𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁 𑀧𑀭𑀺𑀤𑀻𑀧𑀬𑀦𑁆𑀢𑀻 𑀅𑀬𑀁 𑀯𑀡𑁆𑀡𑀦𑀸 𑀪𑀯𑀺𑀲𑁆𑀲𑀢𑀻𑀢𑀺 𑀯𑀡𑁆𑀡𑀦𑀸𑀬 𑀯𑀲𑁂𑀦 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀙𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀧𑀦 𑀳𑁂𑀝𑁆𑀞𑀸𑀯𑀼𑀢𑁆𑀢𑀪𑀸𑀲𑀦𑁆𑀢𑀭𑀧𑀭𑀺𑀘𑁆𑀘𑀸𑀕𑀸𑀤𑀺𑀁 𑀓𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁 𑀧𑀭𑀺𑀤𑀻𑀧𑀬𑀦𑁆𑀢𑀻 𑀅𑀬𑀁 𑀯𑀡𑁆𑀡𑀦𑀸 𑀅𑀫𑁆𑀳𑁂𑀳𑀺 𑀓𑀭𑀺𑀬𑀺𑀲𑁆𑀲𑀢𑀻𑀢𑀺 𑀏𑀯𑀁 𑀆𑀘𑀭𑀺𑀬𑀯𑀲𑁂𑀦 𑀲𑀫𑀸𑀦𑀓𑀢𑁆𑀢𑀼𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀡𑁆𑀡𑀦𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 ‘‘𑀢𑀲𑁆𑀫𑀸𑀧𑀺 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀘𑀽𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀯𑀺𑀲𑁂𑀲𑀁 𑀧𑀫𑀸𑀡𑀪𑀸𑀯𑀜𑁆𑀘 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀧𑀻’’𑀢𑀺 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. 𑀏𑀢𑁆𑀣 𑀧𑀦 𑀦 𑀓𑁂𑀯𑀮𑀁 𑀅𑀬𑀁 𑀯𑀡𑁆𑀡𑀦𑀸 𑀳𑁂𑀲𑁆𑀲𑀢𑀺, 𑀅𑀣 𑀔𑁄 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀧𑀺 𑀬𑀣𑀸𑀞𑀺𑀢𑀯𑀲𑁂𑀦𑁂𑀯 𑀅𑀧𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑀧𑀫𑀸𑀡𑀁, 𑀬𑀲𑁆𑀫𑀸 𑀘 𑀅𑀬𑀁 𑀯𑀡𑁆𑀡𑀦𑀸𑀧𑀺 𑀢𑀢𑁄 𑀅𑀪𑀺𑀦𑁆𑀦𑀢𑁆𑀢𑀸 𑀧𑀫𑀸𑀡𑀪𑀽𑀢𑀸𑀬𑁂𑀯 𑀳𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸

𑀇𑀤𑀸𑀦𑀺 ‘‘𑀢𑀁 𑀯𑀡𑁆𑀡𑀬𑀺𑀲𑁆𑀲𑀁 𑀯𑀺𑀦𑀬’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀢𑁆𑀢𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑀯𑀺𑀦𑀬𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀲𑁆𑀲 𑀩𑀳𑀼𑀯𑀺𑀥𑀢𑁆𑀢𑀸 𑀇𑀥 𑀲𑀁𑀯𑀡𑁆𑀡𑁂𑀢𑀩𑁆𑀩𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑁄 𑀢𑀸𑀯 𑀯𑀺𑀦𑀬𑁄 𑀯𑀯𑀢𑁆𑀣𑀧𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀕𑀸𑀣𑀸𑀲𑀼. 𑀢𑀸𑀯-𑀲𑀤𑁆𑀤𑁄 𑀧𑀞𑀫𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀧𑀞𑀫𑀁 𑀯𑀺𑀦𑀬𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀘𑁆𑀙𑀸 𑀢𑀲𑁆𑀲 𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀯𑀯𑀢𑁆𑀣𑀧𑁂𑀢𑀩𑁆𑀩𑁄𑀢𑀺 𑀦𑀺𑀬𑀫𑁂𑀢𑀩𑁆𑀩𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀻𑀢𑀺 𑀬𑀲𑁆𑀫𑀸 𑀯𑀯𑀢𑁆𑀣𑀧𑁂𑀢𑀩𑁆𑀩𑁄, 𑀢𑁂𑀦 𑀳𑁂𑀢𑀼𑀦𑀸 𑀏𑀢𑀁 ‘‘𑀯𑀺𑀦𑀬𑁄 𑀦𑀸𑀫𑀸’’𑀢𑀺𑀆𑀤𑀺𑀓𑀁 𑀦𑀺𑀬𑀸𑀫𑀓𑀯𑀘𑀦𑀁 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀯𑀺𑀦𑀬𑀲𑁆𑀲. 𑀫𑀸𑀢𑀺𑀓𑀸𑀢𑀺 𑀉𑀤𑁆𑀤𑁂𑀲𑁄. 𑀲𑁄 𑀳𑀺 𑀦𑀺𑀤𑁆𑀤𑁂𑀲𑀧𑀤𑀸𑀦𑀁 𑀚𑀦𑀦𑀻𑀞𑀸𑀦𑁂 𑀞𑀺𑀢𑀢𑁆𑀢𑀸 𑀫𑀸𑀢𑀸 𑀯𑀺𑀬𑀸𑀢𑀺 𑀫𑀸𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺.

𑀇𑀤𑀸𑀦𑀺 𑀯𑀡𑁆𑀡𑁂𑀢𑀩𑁆𑀩𑀫𑀢𑁆𑀣𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀁 𑀬𑁂𑀦𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀺𑀤𑀸𑀦𑀯𑀘𑀦𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀦𑀬𑀧𑀺𑀝𑀓𑀁 𑀬𑁂𑀦 𑀧𑀼𑀕𑁆𑀕𑀮𑁂𑀦 𑀯𑀼𑀢𑁆𑀢𑀁, 𑀬𑀲𑁆𑀫𑀺𑀁 𑀓𑀸𑀮𑁂 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀓𑀸𑀭𑀡𑀸 𑀯𑀼𑀢𑁆𑀢𑀁, 𑀬𑁂𑀦 𑀥𑀸𑀭𑀺𑀢𑀁, 𑀬𑁂𑀦 𑀘 𑀆𑀪𑀢𑀁, 𑀬𑁂𑀲𑀼 𑀧𑀢𑀺𑀝𑁆𑀞𑀺𑀢𑀁, 𑀏𑀢𑀁 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀯𑀢𑁆𑀯𑀸 𑀢𑀢𑁄 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀧𑀸𑀞𑀲𑁆𑀲 𑀅𑀢𑁆𑀣𑀁 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑀬𑀦𑁆𑀢𑁄 𑀯𑀺𑀦𑀬𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀏𑀢𑁆𑀣 𑀘 ‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸’’𑀢𑀺 𑀇𑀤𑀁 𑀯𑀘𑀦𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀺𑀤𑀸𑀦𑀯𑀘𑀦𑀫𑀢𑁆𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑁄𑀧𑀺 𑀯𑀺𑀲𑀼𑀁 𑀅𑀯𑀢𑁆𑀯𑀸 ‘‘𑀦𑀺𑀤𑀸𑀦𑁂𑀦 𑀆𑀤𑀺𑀓𑀮𑁆𑀬𑀸𑀡𑀁, ‘𑀇𑀤𑀫𑀯𑁄𑀘𑀸’𑀢𑀺 𑀦𑀺𑀕𑀫𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡’’𑀦𑁆𑀢𑀺 𑀘 𑀯𑀘𑀦𑀢𑁄 𑀦𑀺𑀤𑀸𑀦𑀦𑀺𑀕𑀫𑀦𑀸𑀦𑀺𑀧𑀺 𑀲𑀢𑁆𑀣𑀼𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁆𑀢𑀸 𑀢𑀤𑀦𑁆𑀢𑁄𑀕𑀥𑀸𑀦𑁂𑀯𑀸𑀢𑀺 𑀦𑀺𑀤𑀸𑀦𑀲𑁆𑀲𑀧𑀺 𑀯𑀺𑀦𑀬𑀧𑀸𑀴𑀺𑀬𑀁𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀯𑀼𑀢𑁆𑀢𑀁 𑀬𑁂𑀦 𑀬𑀤𑀸 𑀬𑀲𑁆𑀫𑀸’’𑀢𑀺 𑀇𑀤𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀲𑀫𑁆𑀩𑀦𑁆𑀥𑀁𑀬𑁂𑀯 𑀓𑀢𑁆𑀯𑀸 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀫𑀸𑀢𑀺𑀓𑀸𑀬 𑀳𑀺 ‘‘𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀯𑀺𑀦𑀬𑀧𑀺𑀝𑀓𑀁𑀬𑁂𑀯 𑀲𑀸𑀫𑀜𑁆𑀜𑀢𑁄 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺.

𑀇𑀤𑀸𑀦𑀺 𑀧𑀦 𑀢𑀁 𑀯𑀺𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀯𑀼𑀢𑁆𑀢𑀁 𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀫𑀸𑀢𑀺𑀓𑀸𑀧𑀤𑁂𑀲𑀼. 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺. 𑀇𑀤𑀦𑁆𑀢𑀺 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀯𑀘𑀦𑀁. 𑀳𑀺-𑀲𑀤𑁆𑀤𑁄 𑀬𑀲𑁆𑀫𑀸𑀢𑀺 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄, 𑀬𑀲𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀁 𑀦 𑀳𑁄𑀢𑀺, 𑀪𑀕𑀯𑀢𑀸 𑀯𑀼𑀢𑁆𑀢𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀆𑀳𑀘𑁆𑀘 𑀪𑀸𑀲𑀺𑀢𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀓𑁂𑀦𑀘𑀺 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀢𑀦𑁄 𑀥𑀭𑀫𑀸𑀦𑀓𑀸𑀮𑁂 𑀯𑀼𑀢𑁆𑀢𑀯𑀘𑀦𑀁 𑀦 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀢𑀤𑀼𑀪𑀬𑀫𑁆𑀧𑀺 𑀅𑀢𑁆𑀣𑀢𑁄 𑀲𑀫𑀸𑀦𑀫𑁂𑀯. 𑀇𑀤𑀸𑀦𑀺 𑀧𑀜𑁆𑀳𑀓𑀭𑀡𑀁 𑀯𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀬𑀣𑀸𑀯𑀼𑀢𑁆𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁄 ‘‘𑀆𑀬𑀲𑁆𑀫𑀢𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸 𑀧𑀼𑀕𑁆𑀕𑀮𑀁 𑀦𑀺𑀬𑀫𑁂𑀢𑀺, ‘‘𑀢𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀓𑀸𑀮𑀁 𑀦𑀺𑀬𑀫𑁂𑀢𑀺. 𑀢𑀜𑁆𑀘 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀯𑀘𑀦𑀁 𑀓𑀸𑀮𑀢𑁄 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀢𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀢𑀲𑁆𑀲𑀸 𑀢𑀦𑁆𑀢𑀺𑀆𑀭𑀼𑀴𑁆𑀳𑀸𑀬 𑀇𑀥 𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑁂𑀲𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑁂𑀲𑀸𑀢𑀺 𑀘-𑀲𑀤𑁆𑀤𑁄 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀢𑁆𑀢𑀩𑁆𑀩𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑀜𑁆𑀘 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁, 𑀏𑀲𑀸 𑀘 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀜𑁆𑀜𑀸𑀲𑀢𑁆𑀣𑁄 𑀯𑀸 𑀘-𑀲𑀤𑁆𑀤𑁄. 𑀉𑀧𑀜𑁆𑀜𑀸𑀲𑁄𑀢𑀺 𑀘 𑀯𑀸𑀓𑁆𑀬𑀸𑀭𑀫𑁆𑀪𑁄 𑀯𑀼𑀘𑁆𑀘𑀢𑀺. 𑀏𑀲𑀸 𑀳𑀺 𑀕𑀦𑁆𑀣𑀓𑀸𑀭𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀧𑀼𑀦 𑀧𑀭𑀁 𑀯𑀢𑁆𑀢𑀼𑀫𑀸𑀭𑀪𑀦𑁆𑀢𑀸𑀦𑀁 𑀘𑀲𑀤𑁆𑀤𑀧𑁆𑀧𑀬𑁄𑀕𑁄. 𑀬𑀁 𑀧𑀦 𑀓𑁂𑀦𑀘𑀺 𑀯𑀼𑀢𑁆𑀢𑀁 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀅𑀜𑁆𑀜𑀸𑀧𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀻’’𑀢𑀺. 𑀢𑀤𑁂𑀯 𑀢𑀲𑁆𑀲 𑀕𑀦𑁆𑀣𑀓𑁆𑀓𑀫𑁂 𑀅𑀓𑁄𑀯𑀺𑀤𑀢𑀁 𑀤𑀲𑁆𑀲𑁂𑀢𑀺. 𑀦 𑀳𑁂𑀢𑁆𑀣 𑀘𑀲𑀤𑁆𑀤𑁂𑀦 𑀅𑀢𑀺𑀭𑁂𑀓𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀘𑁂𑀢𑁆𑀣 𑀏𑀢𑀤𑀢𑁆𑀣𑁄𑀬𑁂𑀯 𑀘-𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀦 𑀓𑀢𑁆𑀢𑀩𑁆𑀩𑁄𑀬𑁂𑀯 𑀧𑀞𑀫𑀲𑀤𑁆𑀤𑁂𑀦𑁂𑀯 𑀅𑀜𑁆𑀜𑀸𑀲𑀁 𑀤𑀼𑀢𑀺𑀬𑀸𑀤𑀺𑀲𑀗𑁆𑀕𑀻𑀢𑀻𑀦𑀫𑁆𑀧𑀺 𑀅𑀢𑁆𑀣𑀺𑀪𑀸𑀯𑀲𑁆𑀲 𑀤𑀻𑀧𑀺𑀢𑀢𑁆𑀢𑀸. 𑀤𑀼𑀢𑀺𑀬𑀸𑀤𑀺𑀁 𑀉𑀧𑀸𑀤𑀸𑀬 𑀳𑀺 𑀧𑀞𑀫𑀲𑀤𑁆𑀤𑀧𑁆𑀧𑀬𑁄𑀕𑁄 𑀤𑀻𑀖𑀸𑀤𑀺𑀁 𑀉𑀧𑀸𑀤𑀸𑀬 𑀭𑀲𑁆𑀲𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄 𑀯𑀺𑀬. 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 𑀓𑀣𑀦𑀁 𑀲𑀗𑁆𑀕𑀻𑀢𑀺. 𑀏𑀢𑁂𑀦 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀼𑀢𑁆𑀢𑀸𑀦𑀜𑁆𑀘 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀞𑀧𑀺𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀽𑀚𑀦𑀻𑀬𑀢𑁆𑀢𑀸 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺, 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺. 𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀦𑁆𑀢𑀺 𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁, 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀦𑀺𑀤𑀸𑀦𑀓𑁄𑀲𑀮𑁆𑀮𑀁, 𑀢𑀤𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀭𑀡𑀸𑀤𑀺𑀧𑀝𑀺𑀮𑀸𑀪𑀳𑁂𑀢𑀼𑀪𑀽𑀢𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀅𑀜𑁆𑀜𑀸𑀲𑀼 𑀪𑀕𑀯𑀢𑁄 𑀓𑀺𑀭𑀺𑀬𑀸𑀲𑀼 ‘‘𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬’’𑀦𑁆𑀢𑀺 𑀧𑀝𑀺𑀜𑁆𑀜𑀸𑀬 𑀅𑀦𑀼𑀮𑁄𑀫𑀦𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀓𑀺𑀭𑀺𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸’’𑀢𑀺. 𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀥𑀫𑁆𑀫𑁄𑀬𑁂𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀣 𑀯𑀸 𑀘𑀓𑁆𑀓𑀦𑁆𑀢𑀺 𑀆𑀡𑀸, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 𑁋

‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁦).

𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂𑀢𑀺 𑀓𑀢𑀁 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀁 𑀩𑀼𑀤𑁆𑀥𑀓𑀺𑀘𑁆𑀘𑀁 𑀬𑁂𑀦, 𑀢𑀲𑁆𑀫𑀺𑀁 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁂𑀦 𑀩𑀼𑀤𑁆𑀥𑀓𑀢𑁆𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀲𑁂𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁄𑀬𑁂𑀯 𑀳𑀺 𑀲𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺. 𑀦𑀦𑀼 𑀘 𑀲𑀸𑀯𑀓𑁂𑀳𑀺 𑀯𑀺𑀦𑀻𑀢𑀸𑀧𑀺 𑀯𑀺𑀦𑁂𑀬𑁆𑀬𑀸 𑀪𑀕𑀯𑀢𑀸𑀬𑁂𑀯 𑀯𑀺𑀦𑀻𑀢𑀸 𑀳𑁄𑀦𑁆𑀢𑀺, 𑀢𑀣𑀸 𑀳𑀺 𑀲𑀸𑀯𑀓𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀸𑀯𑀓𑀯𑀺𑀦𑁂𑀬𑁆𑀬𑀸 𑀘 𑀦 𑀢𑀸𑀯 𑀯𑀺𑀦𑀻𑀢𑀸𑀢𑀺? 𑀦𑀸𑀬𑀁 𑀤𑁄𑀲𑁄 𑀢𑁂𑀲𑀁 𑀯𑀺𑀦𑀬𑀦𑀽𑀧𑀸𑀬𑀲𑁆𑀲 𑀲𑀸𑀯𑀓𑁂𑀲𑀼 𑀞𑀧𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋

‘‘𑀦 𑀢𑀸𑀯𑀸𑀳𑀁 𑀧𑀸𑀧𑀺𑀫 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀦 𑀪𑀺𑀓𑁆𑀔𑀽 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁬𑁮).

‘‘𑀓𑀼𑀲𑀺𑀦𑀸𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀤𑁂𑀲𑀓𑀸𑀮𑀯𑀺𑀲𑁂𑀲𑀤𑀲𑁆𑀲𑀦𑀁, ‘‘𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀕𑀸𑀳𑀲𑁆𑀲 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀮𑁄𑀓𑁂 𑀚𑀸𑀢𑀲𑀁𑀯𑀟𑁆𑀠𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀢𑀣𑀸 𑀳𑀺 𑀫𑀦𑀼𑀲𑁆𑀲𑀪𑀸𑀯𑀲𑁆𑀲 𑀲𑀼𑀧𑀸𑀓𑀝𑀓𑀭𑀡𑀢𑁆𑀣𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀤𑀸𑀭𑀧𑀭𑀺𑀕𑁆𑀕𑀳𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀻𑀢𑀺. 𑀓𑀼𑀲𑀺𑀦𑀸𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀉𑀧𑀯𑀢𑁆𑀢𑀦𑀪𑀽𑀢𑀁 𑀫𑀮𑁆𑀮𑀭𑀸𑀚𑀽𑀦𑀁 𑀲𑀸𑀮𑀯𑀦𑀼𑀬𑁆𑀬𑀸𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀦𑀕𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀉𑀬𑁆𑀬𑀸𑀦𑀢𑁄 𑀉𑀧𑁂𑀘𑁆𑀘 𑀯𑀢𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀯𑀢𑁆𑀢𑀦𑀦𑁆𑀢𑀺 𑀲𑀸𑀮𑀯𑀦𑀁 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬𑀁, 𑀏𑀯𑀁 𑀢𑀁 𑀉𑀬𑁆𑀬𑀸𑀦𑀁 𑀓𑀼𑀲𑀺𑀦𑀸𑀭𑀸𑀬 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬 𑀳𑁄𑀢𑀺. 𑀬𑀣𑀸 𑀘 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸, 𑀢𑀲𑁆𑀫𑀸 𑀢𑀁 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂𑀢𑀺 𑀬𑀫𑀓𑀲𑀸𑀮𑀸𑀦𑀁 𑀯𑁂𑀫𑀚𑁆𑀛𑁂. 𑀢𑀢𑁆𑀣 𑀓𑀺𑀭 𑀪𑀕𑀯𑀢𑁄 𑀧𑀜𑁆𑀜𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀲𑁆𑀲 𑀏𑀓𑀸 𑀲𑀸𑀮𑀧𑀦𑁆𑀢𑀺 𑀲𑀻𑀲𑀪𑀸𑀕𑁂 𑀳𑁄𑀢𑀺, 𑀏𑀓𑀸 𑀧𑀸𑀤𑀪𑀸𑀕𑁂, 𑀢𑀢𑁆𑀭𑀸𑀧𑀺 𑀏𑀓𑁄 𑀢𑀭𑀼𑀡𑀲𑀸𑀮𑁄 𑀲𑀻𑀲𑀪𑀸𑀕𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀧𑀸𑀤𑀪𑀸𑀕𑀲𑁆𑀲, 𑀢𑀲𑁆𑀫𑀸 ‘‘𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀅𑀧𑀺 𑀘 ‘‘𑀬𑀫𑀓𑀲𑀸𑀮𑀸 𑀦𑀸𑀫 𑀫𑀽𑀮𑀓𑁆𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑀲𑀸𑀮𑀸’’𑀢𑀺𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀉𑀧𑀸𑀤𑀻𑀬𑀢𑁂 𑀓𑀫𑁆𑀫𑀓𑀺𑀮𑁂𑀲𑁂𑀳𑀻𑀢𑀺 𑀉𑀧𑀸𑀤𑀺, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁. 𑀲𑁄 𑀧𑀦 𑀉𑀧𑀸𑀤𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀦𑀺𑀫𑁆𑀫𑀣𑀦𑁂𑀦 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀁 𑀅𑀦𑁄𑀲𑁆𑀲𑀝𑁆𑀞𑁄, 𑀇𑀥 𑀔𑀦𑁆𑀥𑀫𑀘𑁆𑀘𑀼𑀫𑀸𑀭𑀦𑀺𑀫𑁆𑀫𑀣𑀦𑁂𑀦 𑀑𑀲𑁆𑀲𑀝𑁆𑀞𑁄 𑀦𑀺𑀲𑁂𑀲𑀺𑀢𑁄𑀢𑀺 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀉𑀧𑀸𑀤𑀺𑀲𑁂𑀲𑁄𑀢𑀺 𑀓𑀢𑁆𑀯𑀸. 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀘𑁂𑀢𑁆𑀣 𑀦𑀺𑀩𑁆𑀩𑀼𑀢𑀺𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑀸𑀬𑀁 𑀓𑀭𑀡𑀦𑀺𑀤𑁆𑀤𑁂𑀲𑁄. 𑀧𑀭𑀺𑀦𑀺𑀩𑁆𑀩𑀸𑀦𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑁂, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁, 𑀧𑀭𑀺𑀦𑀺𑀩𑁆𑀩𑀸𑀦𑀳𑁂𑀢𑀼 𑀲𑀦𑁆𑀦𑀺𑀧𑀢𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀲𑁆𑀲 𑀣𑁂𑀭𑁄 𑀲𑀗𑁆𑀖𑀢𑁆𑀣𑁂𑀭𑁄. 𑀲𑁄 𑀧𑀦 𑀲𑀗𑁆𑀖𑁄 𑀓𑀺𑀁𑀧𑀭𑀺𑀫𑀸𑀡𑁄𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦’’𑀦𑁆𑀢𑀺. 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑀸 𑀳𑀺 𑀈𑀤𑀺𑀲𑁂𑀲𑀼 𑀲𑀫𑀸𑀲𑁄 𑀳𑁄𑀢𑀺𑀬𑁂𑀯 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀕𑀭𑀼𑀓𑀼𑀮’’𑀦𑁆𑀢𑀺. 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀦𑁆𑀢𑀺 𑀘 𑀲𑀗𑁆𑀖𑀢𑁆𑀣𑁂𑀭𑀸𑀦𑀁𑀬𑁂𑀯 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁. 𑀢𑀤𑀸 𑀳𑀺 ‘‘𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀏𑀢𑁆𑀢𑀓𑀸’’𑀢𑀺 𑀧𑀫𑀸𑀡𑀭𑀳𑀺𑀢𑀸. 𑀢𑀣𑀸 𑀳𑀺 𑀯𑁂𑀴𑀼𑀯𑀕𑀸𑀫𑁂 𑀯𑁂𑀤𑀦𑀸𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬 ‘‘𑀦 𑀘𑀺𑀭𑁂𑀦 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀕𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀪𑀺𑀓𑁆𑀔𑀼𑀧𑀺 𑀧𑀓𑁆𑀓𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀕𑀡𑀦𑀁 𑀯𑀻𑀢𑀺𑀯𑀢𑁆𑀢𑁄 𑀲𑀗𑁆𑀖𑁄 𑀅𑀳𑁄𑀲𑀺. 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 𑀫𑀳𑀸𑀓𑀲𑁆𑀲𑀧𑁄𑀢𑀺 𑀫𑀳𑀦𑁆𑀢𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑁄 𑀓𑀲𑁆𑀲𑀧𑁄𑀢𑀺 𑀫𑀳𑀸𑀓𑀲𑁆𑀲𑀧𑁄, 𑀅𑀧𑀺𑀘 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀁 𑀉𑀧𑀸𑀤𑀸𑀬 𑀅𑀬𑀁 𑀫𑀳𑀸𑀣𑁂𑀭𑁄 ‘‘𑀫𑀳𑀸𑀓𑀲𑁆𑀲𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀓𑀺𑀫𑀢𑁆𑀣𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀆𑀳 ‘‘𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺𑀆𑀤𑀺. 𑀲𑀢𑁆𑀢 𑀅𑀳𑀸𑀦𑀺 𑀲𑀫𑀸𑀳𑀝𑀸𑀦𑀺 𑀲𑀢𑁆𑀢𑀸𑀳𑀁, 𑀲𑀢𑁆𑀢𑀸𑀳𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀕𑀯𑀸, 𑀢𑀲𑁆𑀫𑀺𑀁 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺, 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀲𑀫𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀲𑀼𑀪𑀤𑁆𑀤𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀯𑀼𑀟𑁆𑀠𑀓𑀸𑀮𑁂 𑀧𑀦 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀮𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀲𑀼 𑀧𑀜𑁆𑀘𑀫𑀢𑁆𑀢𑁂𑀲𑀼 𑀪𑀺𑀓𑁆𑀔𑀼𑀲𑀢𑁂𑀲𑀼 𑀅𑀯𑀻𑀢𑀭𑀸𑀕𑁂 𑀪𑀺𑀓𑁆𑀔𑀽 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀝𑁆𑀞𑀆𑀚𑀻𑀯𑀓𑀲𑁆𑀲 𑀲𑀦𑁆𑀢𑀺𑀓𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀦𑁆𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳.

𑀓𑀲𑁆𑀫𑀸 𑀧𑀦 𑀲𑁄 𑀏𑀯𑀫𑀸𑀳? 𑀪𑀕𑀯𑀢𑀺 𑀆𑀖𑀸𑀢𑁂𑀦. 𑀅𑀬𑀁 𑀓𑀺𑀭 𑀲𑁄 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁩) 𑀆𑀕𑀢𑁂 𑀆𑀢𑀼𑀫𑀸𑀯𑀢𑁆𑀣𑀼𑀲𑁆𑀫𑀺𑀁 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀪𑀕𑀯𑀢𑀺 𑀓𑀼𑀲𑀺𑀦𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀆𑀢𑀼𑀫𑀁 𑀕𑀘𑁆𑀙𑀦𑁆𑀢𑁂 ‘‘𑀪𑀕𑀯𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀆𑀕𑀢𑀓𑀸𑀮𑁂 ‘‘𑀬𑀸𑀕𑀼𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀏𑀢𑀤𑀯𑁄𑀘 ‘‘𑀪𑀕𑀯𑀸 𑀓𑀺𑀭 𑀢𑀸𑀢𑀸 𑀆𑀢𑀼𑀫𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀢𑀸𑀢𑀸 𑀔𑀼𑀭𑀪𑀡𑁆𑀟𑀁 𑀆𑀤𑀸𑀬 𑀦𑀸𑀴𑀺𑀬𑀸𑀯𑀸𑀧𑀓𑁂𑀦 𑀅𑀦𑀼𑀖𑀭𑀓𑀁 𑀅𑀦𑀼𑀖𑀭𑀓𑀁 𑀆𑀳𑀺𑀡𑁆𑀟𑀣, 𑀮𑁄𑀡𑀫𑁆𑀧𑀺 𑀢𑁂𑀮𑀫𑁆𑀧𑀺 𑀢𑀡𑁆𑀟𑀼𑀮𑀫𑁆𑀧𑀺 𑀔𑀸𑀤𑀦𑀻𑀬𑀫𑁆𑀧𑀺 𑀲𑀁𑀳𑀭𑀣, 𑀪𑀕𑀯𑀢𑁄 𑀆𑀕𑀢𑀲𑁆𑀲 𑀬𑀸𑀕𑀼𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀅𑀣 𑀪𑀕𑀯𑀢𑀺 𑀆𑀢𑀼𑀫𑀁 𑀆𑀕𑀦𑁆𑀢𑁆𑀯𑀸 𑀪𑀼𑀲𑀸𑀕𑀸𑀭𑀓𑀁 𑀧𑀯𑀺𑀝𑁆𑀞𑁂 𑀲𑀼𑀪𑀤𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀕𑀸𑀫𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀳𑀢𑁆𑀣𑀓𑀫𑁆𑀫𑀫𑀢𑁆𑀢𑀁 𑀫𑁂 𑀤𑁂𑀣𑀸’’𑀢𑀺 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑁆𑀯𑀸 ‘‘𑀓𑀺𑀁 𑀪𑀦𑁆𑀢𑁂 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀡𑁆𑀳𑀣𑀸’’𑀢𑀺 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑁂 𑀉𑀤𑁆𑀥𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀓𑀸𑀴𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀸𑀤𑀺𑀲𑀫𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀇𑀤𑀁 𑀓𑀭𑁄𑀣, 𑀇𑀤𑀁 𑀓𑀭𑁄𑀣𑀸’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀯𑀺𑀘𑀸𑀭𑁂𑀦𑁆𑀢𑁄 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑁄𑀚𑁆𑀚𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀪𑁄𑀚𑁆𑀚𑀬𑀸𑀕𑀼 𑀦𑀸𑀫 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀢𑀩𑁆𑀩𑀬𑀸𑀕𑀼, 𑀢𑀢𑁆𑀣 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀧𑀼𑀧𑁆𑀨𑀨𑀮𑀭𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀧𑀯𑀺𑀲𑀢𑀺, 𑀓𑀻𑀴𑀺𑀢𑀼𑀓𑀸𑀫𑀸𑀦𑀁 𑀲𑀻𑀲𑀫𑀓𑁆𑀔𑀦𑀬𑁄𑀕𑁆𑀕𑀸 𑀳𑁄𑀢𑀺 𑀲𑀼𑀕𑀦𑁆𑀥𑀕𑀦𑁆𑀥𑀸.

𑀅𑀣 𑀪𑀕𑀯𑀸 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀆𑀢𑀼𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀪𑀕𑀯𑀸 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀧𑀯𑀺𑀲𑀢𑀺, 𑀢𑀬𑀸 𑀓𑀲𑁆𑀲 𑀬𑀸𑀕𑀼 𑀧𑀝𑀺𑀬𑀸𑀤𑀺𑀢𑀸’’𑀢𑀺. 𑀲𑁄 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑁂𑀳𑁂𑀯 𑀢𑁂𑀳𑀺 𑀓𑀸𑀴𑀓𑀓𑀸𑀲𑀸𑀯𑁂𑀳𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀩𑁆𑀩𑀺𑀜𑁆𑀘 𑀓𑀝𑀘𑁆𑀙𑀼𑀜𑁆𑀘 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀸 𑀯𑀺𑀬 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀝𑀺𑀕𑁆𑀕𑀡𑁆𑀳𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀬𑀸𑀕𑀼’’𑀦𑁆𑀢𑀺 𑀆𑀳. 𑀢𑀢𑁄 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁩) 𑀆𑀕𑀢𑀦𑀬𑁂𑀦 𑀪𑀕𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀢𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀯𑀺𑀕𑀭𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀧𑀦𑀲𑀺𑀓𑁆𑀔𑀸𑀧𑀤𑀁 𑀔𑀼𑀭𑀪𑀡𑁆𑀟𑀧𑀭𑀺𑀳𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀪𑀺𑀓𑁆𑀔𑀯𑁂 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀬𑁄 𑀪𑁄𑀚𑀦𑀁 𑀧𑀭𑀺𑀬𑁂𑀲𑀦𑁆𑀢𑁂𑀳𑁂𑀯 𑀯𑀻𑀢𑀺𑀦𑀸𑀫𑀺𑀢𑀸, 𑀇𑀤𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀅𑀓𑀧𑁆𑀧𑀺𑀬𑀁, 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀪𑁄𑀚𑀦𑀁 𑀇𑀫𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑁂𑀓𑀸𑀦𑀺 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑀸𑀦𑀺 𑀅𑀧𑀸𑀬𑁂𑀲𑁆𑀯𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀅𑀧𑁂𑀣 𑀫𑀸 𑀕𑀡𑁆𑀳𑀣𑀸’’𑀢𑀺 𑀪𑀺𑀓𑁆𑀔𑀸𑀘𑀸𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺, 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀦 𑀓𑀺𑀜𑁆𑀘𑀺 𑀕𑀳𑀺𑀢𑀁.

𑀲𑀼𑀪𑀤𑁆𑀤𑁄 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀅𑀬𑀁 ‘𑀲𑀩𑁆𑀩𑀁 𑀚𑀸𑀦𑀸𑀫𑀻’𑀢𑀺 𑀆𑀳𑀺𑀡𑁆𑀟𑀢𑀺, 𑀲𑀘𑁂 𑀦 𑀕𑀳𑁂𑀢𑀼𑀓𑀸𑀫𑁄 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑀅𑀲𑁆𑀲, 𑀧𑀓𑁆𑀓𑀸𑀳𑀸𑀭𑁄 𑀦𑀸𑀫 𑀲𑀩𑁆𑀩𑀘𑀺𑀭𑀁 𑀢𑀺𑀝𑁆𑀞𑀦𑁆𑀢𑁄 𑀲𑀢𑁆𑀢𑀸𑀳𑀫𑀢𑁆𑀢𑀁 𑀢𑀺𑀝𑁆𑀞𑁂𑀬𑁆𑀬, 𑀇𑀤𑀜𑁆𑀘 𑀫𑀫 𑀬𑀸𑀯𑀚𑀻𑀯𑀁 𑀧𑀭𑀺𑀬𑀢𑁆𑀢𑀁 𑀅𑀲𑁆𑀲, 𑀲𑀩𑁆𑀩𑀁 𑀢𑁂𑀦 𑀦𑀸𑀲𑀺𑀢𑀁, 𑀅𑀳𑀺𑀢𑀓𑀸𑀫𑁄 𑀅𑀬𑀁 𑀫𑀬𑁆𑀳’’𑀦𑁆𑀢𑀺 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀤𑀲𑀩𑀮𑁂 𑀥𑀭𑀫𑀸𑀦𑁂 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀅𑀬𑀁 𑀉𑀘𑁆𑀘𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀳𑀸𑀧𑀼𑀭𑀺𑀲𑁄, 𑀲𑀘𑁂 𑀓𑀺𑀜𑁆𑀘𑀺 𑀯𑀓𑁆𑀔𑀸𑀫𑀺, 𑀫𑀫𑀁𑀬𑁂𑀯 𑀲𑀦𑁆𑀢𑀚𑁆𑀚𑁂𑀲𑁆𑀲𑀢𑀻’’𑀢𑀺. 𑀲𑁆𑀯𑀸𑀬𑀁 𑀅𑀚𑁆𑀚 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑁄 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀲𑀼𑀢𑁆𑀯𑀸 𑀮𑀤𑁆𑀥𑀲𑁆𑀲𑀸𑀲𑁄 𑀯𑀺𑀬 𑀳𑀝𑁆𑀞𑀢𑀼𑀝𑁆𑀞𑁄 𑀏𑀯𑀫𑀸𑀳. 𑀣𑁂𑀭𑁄 𑀧𑀦 𑀢𑀁 𑀲𑀼𑀢𑁆𑀯𑀸 𑀳𑀤𑀬𑁂 𑀧𑀳𑀸𑀭𑀁 𑀯𑀺𑀬 𑀫𑀢𑁆𑀣𑀓𑁂 𑀧𑀢𑀺𑀢𑀲𑀼𑀓𑁆𑀓𑀸𑀲𑀦𑀺𑀁 𑀯𑀺𑀬 𑀫𑀜𑁆𑀜𑀺, 𑀥𑀫𑁆𑀫𑀲𑀁𑀯𑁂𑀕𑁄 𑀘𑀲𑁆𑀲 𑀉𑀧𑁆𑀧𑀚𑁆𑀚𑀺 ‘‘𑀲𑀢𑁆𑀢𑀸𑀳𑀫𑀢𑁆𑀢𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸, 𑀅𑀚𑁆𑀚𑀸𑀧𑀺𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀥𑀭𑀢𑀺𑀬𑁂𑀯, 𑀤𑀼𑀓𑁆𑀔𑁂𑀦 𑀪𑀕𑀯𑀢𑀸 𑀆𑀭𑀸𑀥𑀺𑀢𑀲𑀸𑀲𑀦𑁂 𑀦𑀸𑀫 𑀏𑀯𑀁 𑀮𑀳𑀼𑀁 𑀫𑀳𑀦𑁆𑀢𑀁 𑀧𑀸𑀧𑀓𑀲𑀝𑀁 𑀓𑀡𑁆𑀝𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀮𑀁 𑀔𑁄 𑀧𑀦𑁂𑀲 𑀧𑀸𑀧𑁄 𑀯𑀟𑁆𑀠𑀫𑀸𑀦𑁄 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑁂 𑀲𑀳𑀸𑀬𑁂 𑀮𑀪𑀺𑀢𑁆𑀯𑀸 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑀼’’𑀦𑁆𑀢𑀺.

𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑀁 𑀫𑀳𑀮𑁆𑀮𑀓𑀁 𑀇𑀥𑁂𑀯 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀙𑀸𑀭𑀺𑀓𑀸𑀬 𑀑𑀓𑀺𑀭𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀸 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀭𑀻𑀭𑁂 𑀥𑀭𑀫𑀸𑀦𑁂𑀬𑁂𑀯 𑀲𑀸𑀯𑀓𑀸 𑀯𑀺𑀯𑀤𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀅𑀥𑀺𑀯𑀸𑀲𑁂𑀫𑀺 𑀢𑀸𑀯. 𑀪𑀕𑀯𑀢𑀸 𑀳𑀺 𑀤𑁂𑀲𑀺𑀢𑀥𑀫𑁆𑀫𑁄 𑀅𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀭𑀸𑀲𑀺𑀲𑀤𑀺𑀲𑁄, 𑀢𑀢𑁆𑀣 𑀬𑀣𑀸 𑀯𑀸𑀢𑁂𑀦 𑀧𑀳𑀝𑀧𑀼𑀧𑁆𑀨𑀸𑀦𑀺 𑀬𑀢𑁄 𑀯𑀸 𑀢𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑀸𑀦𑀁 𑀯𑀲𑁂𑀦 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀯𑀺𑀦𑀬𑁂 𑀏𑀓𑀁 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀼𑀢𑁆𑀢𑁂 𑀏𑀓𑁄 𑀤𑁆𑀯𑁂 𑀧𑀜𑁆𑀳𑀯𑀸𑀭𑀸 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀅𑀪𑀺𑀥𑀫𑁆𑀫𑁂 𑀏𑀓𑀁 𑀤𑁆𑀯𑁂 𑀪𑀽𑀫𑀦𑁆𑀢𑀭𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀫𑀽𑀮𑁂 𑀦𑀝𑁆𑀞𑁂 𑀧𑀺𑀲𑀸𑀘𑀲𑀤𑀺𑀲𑀸 𑀪𑀯𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀲𑀢𑀺 𑀤𑀴𑁆𑀳𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀸𑀦𑀺 𑀯𑀺𑀬 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀦𑀺𑀘𑁆𑀘𑀮𑁄 𑀪𑀯𑀺𑀲𑁆𑀲𑀢𑀺. 𑀏𑀢𑀤𑀢𑁆𑀣𑀜𑁆𑀳𑀺 𑀪𑀕𑀯𑀸 𑀫𑀬𑁆𑀳𑀁 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺, 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀅𑀓𑀸𑀲𑀺, 𑀓𑀸𑀬𑀢𑁄 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀅𑀓𑀸𑀲𑀺, 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸 𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄 𑀫𑀜𑁆𑀜𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀮𑀲𑀸𑀲𑀦𑀭𑀢𑀦𑀁 𑀧𑀝𑀺𑀘𑁆𑀙𑀸𑀧𑁂𑀲𑀺, 𑀫𑀸𑀤𑀺𑀲𑁂 𑀪𑀺𑀓𑁆𑀔𑀼𑀫𑁆𑀳𑀺 𑀢𑀺𑀝𑁆𑀞𑀫𑀸𑀦𑁂 𑀅𑀬𑀁 𑀧𑀸𑀧𑁄 𑀲𑀸𑀲𑀦𑁂 𑀯𑀟𑁆𑀠𑀺𑀁 𑀫𑀸 𑀅𑀮𑀢𑁆𑀣𑀼, 𑀬𑀸𑀯 𑀅𑀥𑀫𑁆𑀫𑁄 𑀦 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀦 𑀧𑀝𑀺𑀩𑀸𑀳𑀻𑀬𑀢𑀺, 𑀅𑀯𑀺𑀦𑀬𑁄 𑀦 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀦 𑀧𑀝𑀺𑀩𑀸𑀳𑀻𑀬𑀢𑀺, 𑀅𑀥𑀫𑁆𑀫𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀅𑀯𑀺𑀦𑀬𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀺, 𑀢𑀢𑁄 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀣𑀸𑀬𑀁 𑀧𑀸𑀧𑁄 𑀲𑀬𑀫𑁂𑀯 𑀦𑀺𑀕𑁆𑀕𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀸𑀲𑀦𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀲𑁄 ‘‘𑀏𑀯𑀁 𑀦𑀸𑀫 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀣 𑀧𑀘𑁆𑀙𑀸 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂…𑀧𑁂… 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺.

𑀢𑀢𑁆𑀣 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀆𑀯𑀼𑀲𑁄𑀢𑀺 𑀧𑀭𑀺𑀤𑁂𑀯𑀦𑁆𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀫𑀸 𑀲𑁄𑀘𑀺𑀢𑁆𑀣𑀸𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀫𑀸 𑀲𑁄𑀘𑀺𑀢𑁆𑀣. 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣𑀸𑀢𑀺 𑀯𑀸𑀘𑀸𑀬 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣 ‘‘𑀧𑀭𑀺𑀤𑁂𑀯𑀦𑀁 𑀯𑀺𑀮𑀸𑀧𑁄’’𑀢𑀺 𑀯𑀘𑀦𑀢𑁄. 𑀇𑀤𑀸𑀦𑀺 𑀅𑀲𑁄𑀘𑀦𑀸𑀤𑀻𑀲𑀼 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀫𑀼𑀢𑁆𑀢𑀸 𑀫𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀫𑀳𑀸𑀲𑀫𑀡𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁, 𑀢𑀢𑁄 𑀫𑀳𑀸𑀲𑀫𑀡𑀢𑁄 𑀲𑀼𑀝𑁆𑀞𑀼 𑀫𑀼𑀢𑁆𑀢𑀸 𑀫𑀬𑀦𑁆𑀢𑀺 𑀅𑀢𑁆𑀣𑁄, 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫 𑀢𑀤𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀫𑀸𑀢𑀺 𑀯𑀸 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀅𑀳𑀼𑀫𑁆𑀳𑀸𑀢𑀺 𑀅𑀢𑁆𑀣𑁄, 𑀅𑀦𑀼𑀲𑁆𑀲𑀭𑀦𑁆𑀢𑁄 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀥𑀫𑁆𑀫𑀲𑀁𑀯𑁂𑀕𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋