𑁨. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀁

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁭𑁫. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 𑀦𑀯𑀓𑀢𑀭𑀁 𑀧𑀸𑀭𑀺𑀯𑀸𑀲𑀺𑀓𑀦𑁆𑀢𑀺 𑀅𑀢𑁆𑀢𑀦𑁄 𑀦𑀯𑀓𑀢𑀭𑀁 𑀧𑀸𑀭𑀺𑀯𑀸𑀲𑀺𑀓𑀁. 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀳𑀺 𑀅𑀢𑁆𑀢𑀦𑁄 𑀦𑀯𑀓𑀢𑀭𑀁 𑀧𑀸𑀭𑀺𑀯𑀸𑀲𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀫𑀸𑀦𑀢𑁆𑀢𑀸𑀭𑀳𑀫𑀸𑀦𑀢𑁆𑀢𑀘𑀸𑀭𑀺𑀓𑀅𑀩𑁆𑀪𑀸𑀦𑀸𑀭𑀳𑀸𑀧𑀺 𑀧𑀓𑀢𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀦𑁆𑀢𑀫𑀲𑁄 𑀫𑀽𑀮𑀸𑀬𑀧𑀅𑀓𑀲𑁆𑀲𑀦𑀸𑀭𑀳𑀸𑀤𑀻𑀦𑀫𑁆𑀧𑀻’’𑀢𑀺. 𑀧𑀸𑀤𑁂 𑀖𑀁𑀲𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀸𑀤𑀖𑀁𑀲𑀦𑀁, 𑀲𑀓𑁆𑀔𑀭𑀓𑀣𑀮𑀸𑀤𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀧𑀸𑀤𑀖𑀁𑀲𑀦𑀺𑀬𑁄 𑀲𑀓𑁆𑀔𑀭𑀁 𑀓𑀣𑀮𑀁 𑀲𑀫𑀼𑀤𑁆𑀤𑀨𑁂𑀡𑀓’’𑀦𑁆𑀢𑀺 (𑀘𑀽𑀴𑀯. 𑁨𑁬𑁯) 𑀳𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀫𑁆𑀧𑀺 𑀲𑀸𑀤𑀺𑀬𑀦𑁆𑀢𑀲𑁆𑀲𑀸𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀫𑁆𑀧𑀺 𑀅𑀪𑀺𑀯𑀸𑀤𑀦𑀸𑀤𑀺𑀁 𑀲𑀸𑀤𑀺𑀬𑀦𑁆𑀢𑀲𑁆𑀲. ‘‘𑀫𑀸 𑀫𑀁 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀅𑀦𑀸𑀧𑀼𑀘𑁆𑀙𑀸𑀧𑀺 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀬𑁄 𑀬𑁄 𑀯𑀼𑀟𑁆𑀠𑁄𑀢𑀺 𑀧𑀸𑀭𑀺𑀯𑀸𑀲𑀺𑀓𑁂𑀲𑀼 𑀪𑀺𑀓𑁆𑀔𑀽𑀲𑀼 𑀬𑁄 𑀬𑁄 𑀯𑀼𑀟𑁆𑀠𑁄. 𑀦𑀯𑀓𑀢𑀭𑀲𑁆𑀲 𑀲𑀸𑀤𑀺𑀢𑀼𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀦𑀯𑀓𑀢𑀭𑀲𑁆𑀲 𑀅𑀪𑀺𑀯𑀸𑀤𑀦𑀸𑀤𑀺𑀁 𑀲𑀸𑀤𑀺𑀢𑀼𑀁.

𑀢𑀢𑁆𑀣𑁂𑀯𑀸𑀢𑀺 𑀲𑀗𑁆𑀖𑀦𑀯𑀓𑀝𑁆𑀞𑀸𑀦𑁂𑀬𑁂𑀯. 𑀅𑀢𑁆𑀢𑀦𑁄 𑀧𑀸𑀴𑀺𑀬𑀸 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀧𑀸𑀴𑀺𑀬𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀦 𑀧𑀦 𑀲𑀩𑁆𑀩𑁂𑀲𑀼 𑀧𑀯𑀸𑀭𑀺𑀢𑁂𑀲𑀽𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀦 𑀦 𑀕𑀡𑁆𑀳𑀸𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀬𑀤𑀺 𑀧𑀼𑀭𑀺𑀫𑀤𑀺𑀯𑀲𑁂 𑀅𑀢𑁆𑀢𑀦𑁄 𑀦 𑀕𑀡𑁆𑀳𑀸𑀢𑀺 𑀕𑀳𑁂𑀢𑁆𑀯𑀸 𑀘 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀘𑀢𑀼𑀲𑁆𑀲𑀸𑀮𑀪𑀢𑁆𑀢𑀦𑁆𑀢𑀺 𑀪𑁄𑀚𑀦𑀲𑀸𑀮𑀸𑀬𑀁 𑀧𑀝𑀺𑀧𑀸𑀝𑀺𑀬𑀸 𑀤𑀺𑀬𑁆𑀬𑀫𑀸𑀦𑀪𑀢𑁆𑀢𑀁. 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦𑀸𑀢𑀺 𑀤𑀸𑀬𑀓𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦.

𑁭𑁬. 𑀅𑀜𑁆𑀜𑁄 𑀲𑀸𑀫𑀡𑁂𑀭𑁄 𑀦 𑀕𑀳𑁂𑀢𑀩𑁆𑀩𑁄𑀢𑀺 𑀉𑀧𑀚𑁆𑀛𑀸𑀬𑁂𑀦 𑀳𑀼𑀢𑁆𑀯𑀸 𑀅𑀜𑁆𑀜𑁄 𑀲𑀸𑀫𑀡𑁂𑀭𑁄 𑀦 𑀕𑀳𑁂𑀢𑀩𑁆𑀩𑁄. 𑀉𑀧𑀚𑁆𑀛𑀁 𑀤𑀢𑁆𑀯𑀸 𑀕𑀳𑀺𑀢𑀲𑀸𑀫𑀡𑁂𑀭𑀸𑀧𑀻𑀢𑀺 𑀧𑀓𑀢𑀢𑁆𑀢𑀓𑀸𑀮𑁂 𑀉𑀧𑀚𑁆𑀛𑀁 𑀤𑀢𑁆𑀯𑀸 𑀕𑀳𑀺𑀢𑀲𑀸𑀫𑀡𑁂𑀭𑀸𑀧𑀺. 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂𑀦 𑀆𑀡𑀢𑁆𑀢𑁄𑀧𑀺 𑀕𑀭𑀼𑀥𑀫𑁆𑀫𑁂𑀳𑀺 𑀅𑀜𑁆𑀜𑁂𑀳𑀺 𑀯𑀸 𑀑𑀯𑀤𑀺𑀢𑀼𑀁 𑀮𑀪𑀢𑀻𑀢𑀺 𑀆𑀳 ‘‘𑀧𑀝𑀺𑀩𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀪𑀸𑀭𑁄 𑀓𑀸𑀢𑀩𑁆𑀩𑁄’’𑀢𑀺. 𑀆𑀕𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀯𑀘𑀦𑀻𑀬𑀦𑁆𑀢𑀺 𑀲𑀤𑁄𑀲𑀁. 𑀚𑁂𑀝𑁆𑀞𑀓𑀝𑁆𑀞𑀸𑀦𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀧𑀥𑀸𑀦𑀝𑁆𑀞𑀸𑀦𑀁 𑀦 𑀓𑀸𑀢𑀩𑁆𑀩𑀁. 𑀓𑀺𑀁 𑀢𑀦𑁆𑀢𑀺 𑀆𑀳 ‘‘𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁂𑀦 𑀯𑀸’’𑀢𑀺𑀆𑀤𑀺.

𑀭𑀚𑁂𑀳𑀺 𑀳𑀢𑀸 𑀉𑀧𑀳𑀢𑀸 𑀪𑀽𑀫𑀺 𑀏𑀢𑀺𑀲𑁆𑀲𑀸𑀢𑀺 𑀭𑀚𑁄𑀳𑀢𑀪𑀽𑀫𑀺, 𑀭𑀚𑁄𑀓𑀺𑀡𑁆𑀡𑀪𑀽𑀫𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀮𑀸𑀪𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀓𑀧𑀲𑁆𑀲𑁂 𑀞𑀢𑁆𑀯𑀸𑀢𑀺 𑀧𑀸𑀴𑀺𑀁 𑀯𑀺𑀳𑀸𑀬 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀢𑁄 𑀞𑀢𑁆𑀯𑀸. 𑀲𑁂𑀦𑀸𑀲𑀦𑀁 𑀦 𑀮𑀪𑀢𑀻𑀢𑀺 𑀲𑁂𑀬𑁆𑀬𑀸𑀧𑀭𑀺𑀬𑀦𑁆𑀢𑀪𑀸𑀕𑀺𑀢𑀸𑀬 𑀯𑀲𑁆𑀲𑀕𑁆𑀕𑁂𑀦 𑀕𑀡𑁆𑀳𑀺𑀢𑀼𑀁 𑀦 𑀮𑀪𑀢𑀺. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. ‘‘𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀘𑁂 𑀤𑁆𑀯𑁂 𑀧𑀸𑀭𑀺𑀯𑀸𑀲𑀺𑀓𑀸 𑀕𑀢𑀝𑁆𑀞𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀺, 𑀉𑀪𑁄𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁. 𑀬𑀣𑀸 𑀩𑀳𑀺 𑀤𑀺𑀲𑁆𑀯𑀸 𑀆𑀭𑁄𑀘𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀸𑀭𑀁 𑀆𑀕𑀢𑁂 𑀧𑀼𑀦 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀏𑀯𑀁 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀢𑁂𑀦𑀧𑀺 𑀢𑀢𑁆𑀣 𑀧𑀼𑀩𑁆𑀩𑁂 𑀆𑀭𑁄𑀘𑀺𑀢𑀲𑁆𑀲 𑀧𑀼𑀦 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺.

𑁮𑁧. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀘 𑀅𑀯𑀺𑀲𑁂𑀲𑁂𑀦. 𑀑𑀩𑀤𑁆𑀥𑀦𑁆𑀢𑀺 𑀧𑀮𑀺𑀩𑀼𑀤𑁆𑀥𑀁.

𑁮𑁩. 𑀲𑀳𑀯𑀸𑀲𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀙𑀦𑁆𑀦𑁂 𑀧𑀓𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀲𑀬𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀦 𑀲𑁂𑀲𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.