𑁩𑁧. 𑀘𑁄𑀤𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸

𑁨𑁩𑁦. 𑀘𑁄𑀤𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑁄𑀢𑀺 𑀏𑀢𑁆𑀣 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁬) 𑀧𑀦 𑀘𑁄𑀤𑁂𑀢𑀼𑀁 𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀺? 𑀤𑀼𑀩𑁆𑀩𑀮𑀘𑁄𑀤𑀓𑀯𑀘𑀦𑀁 𑀢𑀸𑀯 𑀕𑀳𑁂𑀢𑁆𑀯𑀸 𑀓𑁄𑀘𑀺 𑀦 𑀮𑀪𑀢𑀺. 𑀤𑀼𑀩𑁆𑀩𑀮𑀘𑁄𑀤𑀓𑁄 𑀦𑀸𑀫 𑀲𑀫𑁆𑀩𑀳𑀼𑀮𑁂𑀲𑀼 𑀓𑀣𑀸𑀲𑀮𑁆𑀮𑀸𑀧𑁂𑀦 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑁄 𑀏𑀓𑀁 𑀆𑀭𑀩𑁆𑀪 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀓𑀣𑁂𑀢𑀺, 𑀅𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸 𑀇𑀢𑀭𑀲𑁆𑀲 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀺, 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑁆𑀯𑀁 𑀓𑀺𑀭 𑀫𑀁 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑀲𑀻’’𑀢𑀺 𑀪𑀡𑀢𑀺, 𑀲𑁄 ‘‘𑀦𑀸𑀳𑀁 𑀏𑀯𑀭𑀽𑀧𑀁 𑀚𑀸𑀦𑀸𑀫𑀺, 𑀓𑀣𑀸𑀧𑀯𑀢𑁆𑀢𑀺𑀬𑀁 𑀧𑀦 𑀫𑀬𑀸 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀫𑀢𑁆𑀣𑀺. 𑀲𑀘𑁂 𑀅𑀳𑀁 𑀢𑀯 𑀇𑀫𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀁 𑀚𑀸𑀦𑁂𑀬𑁆𑀬𑀁, 𑀏𑀢𑁆𑀢𑀓𑀫𑁆𑀧𑀺 𑀦 𑀓𑀣𑁂𑀬𑁆𑀬’’𑀦𑁆𑀢𑀺. 𑀅𑀬𑀁 𑀤𑀼𑀩𑁆𑀩𑀮𑀘𑁄𑀤𑀓𑁄. 𑀢𑀲𑁆𑀲𑁂𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀕𑀳𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀘𑁄𑀤𑁂𑀢𑀼𑀁 𑀦 𑀮𑀪𑀢𑀺, 𑀏𑀢𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀯𑀸 𑀪𑀺𑀓𑁆𑀔𑀼𑀦𑀺𑀁 𑀯𑀸, 𑀲𑀻𑀮𑀲𑀫𑁆𑀧𑀦𑁆𑀦𑀸 𑀘 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀫𑁂𑀯 𑀘𑁄𑀤𑁂𑀢𑀼𑀁 𑀮𑀪𑀢𑀻𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀧𑀜𑁆𑀘𑀧𑀺 𑀲𑀳𑀥𑀫𑁆𑀫𑀺𑀓𑀸 𑀮𑀪𑀦𑁆𑀢𑀻’’𑀢𑀺 𑀆𑀳. 𑀕𑁄𑀤𑀢𑁆𑀢𑀢𑁆𑀣𑁂𑀭𑁄 ‘‘𑀦 𑀓𑁄𑀘𑀺 𑀦 𑀮𑀪𑀢𑀻’’𑀢𑀺 𑀯𑀢𑁆𑀯𑀸 ‘‘𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀘𑁄𑀤𑁂𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸…𑀧𑁂… 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀘𑁄𑀤𑁂𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺. 𑀢𑀺𑀡𑁆𑀡𑀫𑁆𑀧𑀺 𑀣𑁂𑀭𑀸𑀦𑀁 𑀯𑀸𑀤𑁂 𑀘𑀼𑀤𑀺𑀢𑀓𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑁄.

𑀅𑀬𑀁 𑀧𑀦 𑀘𑁄𑀤𑀦𑀸 𑀦𑀸𑀫 𑀤𑀺𑀝𑁆𑀞𑀘𑁄𑀤𑀦𑀸 𑀲𑀼𑀢𑀘𑁄𑀤𑀦𑀸 𑀧𑀭𑀺𑀲𑀗𑁆𑀓𑀺𑀢𑀘𑁄𑀤𑀦𑀸𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺. 𑀅𑀧𑀭𑀸𑀧𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀘𑁄𑀤𑀦𑀸𑀢𑀺. 𑀢𑀢𑁆𑀣 𑀕𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀯𑀲𑁂𑀦 𑀲𑀻𑀮𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀯𑀲𑁂𑀲𑀸𑀦𑀁 𑀯𑀲𑁂𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀯𑀲𑁂𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀘𑁄𑀤𑀦𑀸, 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀘𑁄𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑀸𑀧𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺, 𑀫𑀦𑀼𑀲𑁆𑀲𑀁 𑀖𑀸𑀢𑀬𑀺𑀢𑁆𑀣, 𑀅𑀪𑀽𑀢𑀁 𑀆𑀭𑁄𑀘𑀬𑀺𑀢𑁆𑀣𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸. 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸 𑀦𑀸𑀫 ‘‘𑀢𑁆𑀯𑀁 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀸. 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 ‘‘𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁄. 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄 𑀦𑀸𑀫 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀻𑀓𑀫𑁆𑀫𑀩𑀻𑀚𑀦𑀸𑀤𑀺𑀓𑀫𑁆𑀫𑀸𑀦𑀁 𑀅𑀓𑀭𑀡𑀁. 𑀢𑀁 𑀧𑀝𑀺𑀧𑀸𑀝𑀺𑀬𑀸 𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀏𑀓𑀲𑁆𑀲 𑀅𑀓𑀢𑁆𑀯𑀸 𑀲𑁂𑀲𑀸𑀦𑀁 𑀓𑀭𑀡𑀓𑀸𑀮𑁂 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸𑀧𑀺 𑀘𑁄𑀤𑀦𑀸 𑀦𑀸𑀫 𑀳𑁄𑀢𑀺. 𑀬𑀸𑀕𑀼𑀪𑀢𑁆𑀢𑀸𑀤𑀺𑀦𑀸 𑀧𑀦 𑀬𑀁 𑀇𑀘𑁆𑀙𑀢𑀺, 𑀢𑀁 𑀆𑀧𑀼𑀘𑁆𑀙𑀢𑀺, 𑀦 𑀢𑀸𑀯𑀢𑀸 𑀘𑁄𑀤𑀦𑀸 𑀳𑁄𑀢𑀺.

𑀅𑀧𑀭𑀸 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁮𑁭) ‘‘𑀏𑀓𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁, 𑀏𑀓𑀁 𑀥𑀫𑁆𑀫𑀺𑀓’’𑀦𑁆𑀢𑀺𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀤𑀲 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀤𑀲 𑀥𑀫𑁆𑀫𑀺𑀓𑀸𑀦𑀻𑀢𑀺 𑀏𑀯𑀁 𑀅𑀥𑀫𑁆𑀫𑀺𑀓𑀸 𑀧𑀜𑁆𑀘𑀧𑀜𑁆𑀜𑀸𑀲, 𑀥𑀫𑁆𑀫𑀺𑀓𑀸 𑀧𑀜𑁆𑀘𑀧𑀜𑁆𑀜𑀸𑀲𑀸𑀢𑀺 𑀤𑀲𑀼𑀢𑁆𑀢𑀭𑀲𑀢𑀁 𑀘𑁄𑀤𑀦𑀸 𑀯𑀼𑀢𑁆𑀢𑀸. 𑀢𑀸 𑀤𑀺𑀝𑁆𑀞𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀁, 𑀲𑀼𑀢𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀁, 𑀧𑀭𑀺𑀲𑀗𑁆𑀓𑀸𑀬 𑀘𑁄𑀤𑁂𑀦𑁆𑀢𑀲𑁆𑀲 𑀤𑀲𑀼𑀢𑁆𑀢𑀭𑀲𑀢𑀦𑁆𑀢𑀺 𑀢𑀺𑀁𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀓𑀸𑀬𑁂𑀦 𑀘𑁄𑀤𑁂𑀦𑁆𑀢𑀲𑁆𑀲, 𑀯𑀸𑀘𑀸𑀬 𑀘𑁄𑀤𑁂𑀦𑁆𑀢𑀲𑁆𑀲, 𑀓𑀸𑀬𑀯𑀸𑀘𑀸𑀬 𑀘𑁄𑀤𑁂𑀦𑁆𑀢𑀲𑁆𑀲𑀸𑀢𑀺 𑀢𑀺𑀕𑀼𑀡𑀸𑀦𑀺 𑀓𑀢𑀸𑀦𑀺 𑀦𑀯𑀼𑀢𑀸𑀥𑀺𑀓𑀸𑀦𑀺 𑀦𑀯 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀅𑀢𑁆𑀢𑀦𑀸 𑀘𑁄𑀤𑁂𑀦𑁆𑀢𑀲𑁆𑀲𑀧𑀺 𑀧𑀭𑁂𑀦 𑀘𑁄𑀤𑀸𑀧𑁂𑀦𑁆𑀢𑀲𑁆𑀲𑀧𑀺 𑀢𑀢𑁆𑀢𑀓𑀸𑀦𑁂𑀯𑀸𑀢𑀺 𑀯𑀻𑀲𑀢𑀺𑀊𑀦𑀸𑀦𑀺 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀦 𑀤𑀺𑀝𑁆𑀞𑀸𑀤𑀺𑀪𑁂𑀤𑁂 𑀲𑀫𑀽𑀮𑀺𑀓𑀸𑀫𑀽𑀮𑀺𑀓𑀯𑀲𑁂𑀦 𑀅𑀦𑁂𑀓𑀲𑀳𑀲𑁆𑀲𑀸 𑀘𑁄𑀤𑀦𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁩𑁧. 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀲𑀼 𑀧𑀦 𑀇𑀫𑀸𑀲𑀼 𑀘𑁄𑀤𑀦𑀸𑀲𑀼 𑀬𑀸𑀬 𑀓𑀸𑀬𑀘𑀺 𑀘𑁄𑀤𑀦𑀸𑀬 𑀯𑀲𑁂𑀦 𑀲𑀗𑁆𑀖𑀫𑀚𑁆𑀛𑁂 𑀑𑀲𑀝𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀼𑀤𑀺𑀢𑀓𑀘𑁄𑀤𑀓𑀸 𑀯𑀢𑁆𑀢𑀩𑁆𑀩𑀸 ‘‘𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀺𑀦𑀺𑀘𑁆𑀙𑀬𑁂𑀦 𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀣𑀸’’𑀢𑀺. 𑀲𑀘𑁂 ‘‘𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑀗𑁆𑀖𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀣 𑀧𑀦 ‘‘𑀯𑀺𑀦𑀺𑀘𑁆𑀙𑀺𑀦𑀣 𑀢𑀸𑀯, 𑀪𑀦𑁆𑀢𑁂, 𑀲𑀘𑁂 𑀅𑀫𑁆𑀳𑀸𑀓𑀁 𑀔𑀫𑀺𑀲𑁆𑀲𑀢𑀺, 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, ‘‘𑀘𑁂𑀢𑀺𑀬𑀁 𑀢𑀸𑀯 𑀯𑀦𑁆𑀤𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀻𑀖𑀲𑀼𑀢𑁆𑀢𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀢𑁂 𑀘𑁂 𑀘𑀺𑀭𑀭𑀢𑁆𑀢𑀁 𑀓𑀺𑀮𑀦𑁆𑀢𑀸 𑀧𑀓𑁆𑀓𑀦𑁆𑀢𑀧𑀭𑀺𑀲𑀸 𑀉𑀧𑀘𑁆𑀙𑀺𑀦𑁆𑀦𑀧𑀓𑁆𑀔𑀸 𑀳𑀼𑀢𑁆𑀯𑀸 𑀧𑀼𑀦 𑀬𑀸𑀘𑀦𑁆𑀢𑀺, 𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀤𑀸 𑀦𑀺𑀫𑁆𑀫𑀤𑀸 𑀳𑁄𑀦𑁆𑀢𑀺, 𑀢𑀤𑀸 𑀦𑁂𑀲𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀳𑀺 𑀘 𑀲𑀘𑁂 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸 𑀳𑁄𑀢𑀺 𑀧𑀭𑀺𑀲𑀸, 𑀉𑀩𑁆𑀩𑀸𑀳𑀺𑀓𑀸𑀬 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁. 𑀲𑀘𑁂 𑀩𑀸𑀮𑀼𑀲𑁆𑀲𑀦𑁆𑀦𑀸 𑀳𑁄𑀢𑀺 𑀧𑀭𑀺𑀲𑀸, ‘‘𑀢𑀼𑀫𑁆𑀳𑀸𑀓𑀁 𑀲𑀪𑀸𑀕𑁂 𑀯𑀺𑀦𑀬𑀥𑀭𑁂 𑀧𑀭𑀺𑀬𑁂𑀲𑀣𑀸’’𑀢𑀺 𑀯𑀺𑀦𑀬𑀥𑀭𑁂 𑀧𑀭𑀺𑀬𑁂𑀲𑀸𑀧𑁂𑀢𑁆𑀯𑀸 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁.

𑀢𑀢𑁆𑀣 𑀘 𑀥𑀫𑁆𑀫𑁄𑀢𑀺 𑀪𑀽𑀢𑀁 𑀯𑀢𑁆𑀣𑀼. 𑀯𑀺𑀦𑀬𑁄𑀢𑀺 𑀘𑁄𑀤𑀦𑀸 𑀘𑁂𑀯 𑀲𑀸𑀭𑀡𑀸 𑀘. 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀤𑀸 𑀘 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸 𑀘. 𑀢𑀲𑁆𑀫𑀸 𑀘𑁄𑀤𑀓𑁂𑀦 𑀯𑀢𑁆𑀣𑀼𑀲𑁆𑀫𑀺𑀁 𑀆𑀭𑁄𑀘𑀺𑀢𑁂 𑀘𑀼𑀤𑀺𑀢𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀲𑀦𑁆𑀢𑀫𑁂𑀢𑀁, 𑀦𑁄’’𑀢𑀺. 𑀏𑀯𑀁 𑀯𑀢𑁆𑀣𑀼𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀜𑀢𑁆𑀢𑀺𑀲𑀫𑁆𑀧𑀤𑀸𑀬 𑀘 𑀅𑀦𑀼𑀲𑁆𑀲𑀸𑀯𑀦𑀲𑀫𑁆𑀧𑀤𑀸𑀬 𑀘 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀢𑀢𑁆𑀭 𑀘𑁂 𑀅𑀮𑀚𑁆𑀚𑀻 𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀘 𑀅𑀮𑀚𑁆𑀚𑀻 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀦𑀸𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄, 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀻’’𑀢𑀺. 𑀅𑀤𑁆𑀥𑀸 𑀲𑁄 𑀯𑀓𑁆𑀔𑀢𑀺 ‘‘𑀓𑀺𑀫𑀺𑀤𑀁, 𑀪𑀦𑁆𑀢𑁂, 𑀓𑀺𑀫𑁆𑀳𑀺 𑀦𑀁 𑀦𑀸𑀫𑀸’’𑀢𑀺. ‘‘𑀢𑁆𑀯𑀁 𑀓𑀺𑀫𑁆𑀳𑀺 𑀦𑀫𑁆𑀧𑀺 𑀦 𑀚𑀸𑀦𑀸𑀲𑀺, 𑀦 𑀬𑀼𑀢𑁆𑀢𑀁 𑀢𑀬𑀸 𑀏𑀯𑀭𑀽𑀧𑁂𑀦 𑀩𑀸𑀮𑁂𑀦 𑀧𑀭𑀁 𑀘𑁄𑀤𑁂𑀢𑀼’’𑀦𑁆𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄, 𑀦𑀸𑀲𑁆𑀲 𑀅𑀦𑀼𑀬𑁄𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑁄 𑀅𑀮𑀚𑁆𑀚𑀻 𑀧𑀡𑁆𑀟𑀺𑀢𑁄 𑀳𑁄𑀢𑀺 𑀩𑁆𑀬𑀢𑁆𑀢𑁄, 𑀤𑀺𑀝𑁆𑀞𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀢𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀮𑀚𑁆𑀚𑀺𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀬 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁.

𑀲𑀘𑁂 𑀮𑀚𑁆𑀚𑀻 𑀅𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀘 𑀮𑀚𑁆𑀚𑀻 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀦 𑀲𑀓𑁆𑀓𑁄𑀢𑀺 𑀅𑀦𑀼𑀬𑁄𑀕𑀁 𑀤𑀸𑀢𑀼𑀁, 𑀢𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀆𑀤𑀻𑀲𑀼 𑀯𑀸 𑀏𑀓𑀺𑀲𑁆𑀲𑀸’’𑀢𑀺. 𑀓𑀲𑁆𑀫𑀸 𑀧𑀦 𑀇𑀫𑀲𑁆𑀲𑁂𑀯 𑀏𑀯𑀁 𑀦𑀬𑁄 𑀤𑀸𑀢𑀩𑁆𑀩𑁄, 𑀦 𑀇𑀢𑀭𑀲𑁆𑀲𑀸𑀢𑀺, 𑀦𑀦𑀼 𑀦 𑀬𑀼𑀢𑁆𑀢𑀁 𑀯𑀺𑀦𑀬𑀥𑀭𑀸𑀦𑀁 𑀅𑀕𑀢𑀺𑀕𑀫𑀦𑀦𑁆𑀢𑀺? 𑀦 𑀬𑀼𑀢𑁆𑀢𑀫𑁂𑀯. 𑀇𑀤𑀁 𑀧𑀦 𑀅𑀕𑀢𑀺𑀕𑀫𑀦𑀁 𑀦 𑀳𑁄𑀢𑀺, 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀦𑀸𑀫 𑀏𑀲𑁄. 𑀅𑀮𑀚𑁆𑀚𑀺𑀦𑀺𑀕𑁆𑀕𑀳𑀢𑁆𑀣𑀸𑀬 𑀳𑀺 𑀮𑀚𑁆𑀚𑀺𑀧𑀕𑁆𑀕𑀳𑀢𑁆𑀣𑀸𑀬 𑀘 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀢𑀢𑁆𑀭 𑀅𑀮𑀚𑁆𑀚𑀻 𑀦𑀬𑀁 𑀮𑀪𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀏𑀳𑀺𑀢𑀺, 𑀮𑀚𑁆𑀚𑀻 𑀧𑀦 𑀦𑀬𑀁 𑀮𑀪𑀺𑀢𑁆𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀦𑁆𑀢𑀸𑀦𑁂𑀦 𑀲𑀼𑀢𑁂 𑀲𑀼𑀢𑀲𑀦𑁆𑀢𑀸𑀦𑁂𑀦 𑀧𑀢𑀺𑀝𑁆𑀞𑀸𑀬 𑀓𑀣𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑁄 𑀮𑀚𑁆𑀚𑀻 𑀧𑀡𑁆𑀟𑀺𑀢𑁄 𑀳𑁄𑀢𑀺 𑀩𑁆𑀬𑀢𑁆𑀢𑁄, 𑀧𑀢𑀺𑀝𑁆𑀞𑀸𑀬 𑀓𑀣𑁂𑀢𑀺, 𑀅𑀮𑀚𑁆𑀚𑀻 𑀘 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀅𑀮𑀚𑁆𑀚𑀺𑀲𑁆𑀲 𑀧𑀝𑀺𑀜𑁆𑀜𑀸𑀬 𑀏𑀯 𑀓𑀸𑀢𑀩𑁆𑀩𑀁.

𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀜𑁆𑀘 𑀇𑀤𑀁 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀓𑀺𑀭 𑀮𑁄𑀳𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀁 𑀓𑀣𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀼𑀝𑁆𑀞𑀸𑀦𑀲𑀫𑀬𑁂 𑀤𑁆𑀯𑁂 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸 𑀓𑀣𑀁 𑀧𑀯𑀢𑁆𑀢𑁂𑀲𑀼𑀁. 𑀏𑀓𑁄 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀺, 𑀏𑀢𑀫𑁆𑀧𑀺 𑀦𑀢𑁆𑀣𑀻’’𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀅𑀣 𑀅𑀧𑁆𑀧𑀸𑀯𑀲𑁂𑀲𑁂 𑀧𑀞𑀫𑀬𑀸𑀫𑁂 𑀣𑁂𑀭𑀲𑁆𑀲 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 ‘‘𑀅𑀬𑀁 𑀧𑀢𑀺𑀝𑁆𑀞𑀸𑀬 𑀓𑀣𑁂𑀢𑀺, 𑀅𑀬𑀁 𑀧𑀦 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀩𑀳𑀽𑀦𑀺 𑀘 𑀯𑀢𑁆𑀣𑀽𑀦𑀺 𑀑𑀲𑀝𑀸𑀦𑀺, 𑀅𑀤𑁆𑀥𑀸 𑀏𑀢𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀲𑀼𑀤𑁆𑀥𑀮𑀤𑁆𑀥𑀺 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀩𑀻𑀚𑀦𑀻𑀤𑀡𑁆𑀟𑀓𑁂𑀦 𑀧𑀸𑀤𑀓𑀣𑀮𑀺𑀓𑀸𑀬 𑀲𑀜𑁆𑀜𑀁 𑀤𑀢𑁆𑀯𑀸 ‘‘𑀅𑀳𑀁, 𑀆𑀯𑀼𑀲𑁄, 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑁄, 𑀅𑀜𑁆𑀜𑁂𑀦 𑀯𑀺𑀦𑀺𑀘𑁆𑀙𑀺𑀦𑀸𑀧𑁂𑀳𑀻’’𑀢𑀺 𑀆𑀳. ‘‘𑀓𑀲𑁆𑀫𑀸, 𑀪𑀦𑁆𑀢𑁂’’𑀢𑀺? 𑀣𑁂𑀭𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀘𑀼𑀤𑀺𑀢𑀓𑀧𑀼𑀕𑁆𑀕𑀮𑀲𑁆𑀲 𑀓𑀸𑀬𑁂 𑀟𑀸𑀳𑁄 𑀉𑀝𑁆𑀞𑀺𑀢𑁄, 𑀢𑀢𑁄 𑀲𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀪𑀦𑁆𑀢𑁂, 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀼𑀭𑀽𑀧𑁂𑀦 𑀯𑀺𑀦𑀬𑀥𑀭𑁂𑀦 𑀦𑀸𑀫 𑀢𑀼𑀫𑁆𑀳𑀸𑀤𑀺𑀲𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀘𑁄𑀤𑀓𑁂𑀦 𑀘 𑀈𑀤𑀺𑀲𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀘𑀺𑀭𑀁 𑀓𑀺𑀮𑀫𑀺𑀢𑀸𑀢𑁆𑀣 𑀫𑀬𑀸’’𑀢𑀺 𑀔𑀫𑀸𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀏𑀯𑀁 𑀮𑀚𑁆𑀚𑀺𑀦𑀸 𑀘𑁄𑀤𑀺𑀬𑀫𑀸𑀦𑁄 𑀅𑀮𑀚𑁆𑀚𑀻 𑀩𑀳𑀽𑀲𑀼𑀧𑀺 𑀯𑀢𑁆𑀣𑀽𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, 𑀲𑁄 𑀦𑁂𑀯 ‘‘𑀲𑀼𑀤𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑁄, 𑀦 ‘‘𑀅𑀲𑀼𑀤𑁆𑀥𑁄’’𑀢𑀺, 𑀚𑀻𑀯𑀫𑀢𑀓𑁄 𑀦𑀸𑀫 𑀆𑀫𑀓𑀧𑀽𑀢𑀺𑀓𑁄 𑀦𑀸𑀫 𑀘𑁂𑀲. 𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀯𑀢𑁆𑀣𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁, 𑀢𑀣𑀸 𑀦𑀸𑀲𑀺𑀢𑀓𑁄 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀅𑀮𑀚𑁆𑀚𑀻𑀬𑁂𑀯 𑀅𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀆𑀯𑀼𑀲𑁄, 𑀢𑀯 𑀯𑀘𑀦𑁂𑀦𑀸𑀬𑀁 𑀓𑀺𑀁 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺. 𑀇𑀢𑀭𑀫𑁆𑀧𑀺 𑀢𑀣𑁂𑀯 𑀯𑀢𑁆𑀯𑀸 ‘‘𑀉𑀪𑁄𑀧𑀺 𑀏𑀓𑀲𑀫𑁆𑀪𑁄𑀕𑀧𑀭𑀺𑀪𑁄𑀕𑀸 𑀳𑀼𑀢𑁆𑀯𑀸 𑀚𑀻𑀯𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑀸. 𑀲𑀻𑀮𑀢𑁆𑀣𑀸𑀬 𑀦𑁂𑀲𑀁 𑀯𑀺𑀦𑀺𑀘𑁆𑀙𑀬𑁄 𑀦 𑀓𑀸𑀢𑀩𑁆𑀩𑁄, 𑀧𑀢𑁆𑀢𑀘𑀻𑀯𑀭𑀧𑀭𑀺𑀯𑁂𑀡𑀸𑀤𑀺𑀅𑀢𑁆𑀣𑀸𑀬 𑀧𑀦 𑀧𑀢𑀺𑀭𑀽𑀧𑀁 𑀲𑀓𑁆𑀔𑀺𑀁 𑀮𑀪𑀺𑀢𑁆𑀯𑀸 𑀓𑀸𑀢𑀩𑁆𑀩𑁄𑀢𑀺.

𑀅𑀣 𑀮𑀚𑁆𑀚𑀻 𑀮𑀚𑁆𑀚𑀺𑀁 𑀘𑁄𑀤𑁂𑀢𑀺, 𑀯𑀺𑀯𑀸𑀤𑁄 𑀘 𑀦𑁂𑀲𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀧𑁆𑀧𑀫𑀢𑁆𑀢𑀓𑁄 𑀳𑁄𑀢𑀺, 𑀲𑀜𑁆𑀜𑀸𑀧𑁂𑀢𑁆𑀯𑀸 ‘‘𑀫𑀸 𑀏𑀯𑀁 𑀓𑀭𑁄𑀣𑀸’’𑀢𑀺 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸. 𑀅𑀣 𑀧𑀦𑁂𑀢𑁆𑀣 𑀘𑀼𑀤𑀺𑀢𑀓𑁂𑀦 𑀲𑀳𑀲𑀸 𑀯𑀺𑀭𑀤𑁆𑀥𑀁 𑀳𑁄𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀺. 𑀲𑁄 𑀘 𑀧𑀓𑁆𑀔𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺, ‘‘𑀫𑀬𑀁 𑀲𑀤𑁆𑀤𑀳𑀸𑀫, 𑀫𑀬𑀁 𑀲𑀤𑁆𑀤𑀳𑀸𑀫𑀸’’𑀢𑀺 𑀩𑀳𑀽 𑀉𑀝𑁆𑀞𑀳𑀦𑁆𑀢𑀺, 𑀲𑁄 𑀢𑁂𑀲𑀁 𑀧𑀝𑀺𑀜𑁆𑀜𑀸𑀬 𑀏𑀓𑀯𑀸𑀭𑀁 𑀤𑁆𑀯𑁂𑀯𑀸𑀭𑀁 𑀲𑀼𑀤𑁆𑀥𑁄 𑀳𑁄𑀢𑀼, 𑀅𑀣 𑀧𑀦 𑀯𑀺𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀯𑀺𑀦𑀺𑀘𑁆𑀙𑀬𑁄 𑀦 𑀤𑀸𑀢𑀩𑁆𑀩𑁄.

𑁨𑁩𑁨. 𑀅𑀤𑀺𑀦𑁆𑀦𑀸𑀤𑀸𑀦𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀦 (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨) 𑀧𑀦 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀢𑁂𑀲𑀼 𑀘 𑀓𑀼𑀲𑀮𑁂𑀦 𑀯𑀺𑀦𑀬𑀥𑀭𑁂𑀦 𑀑𑀢𑀺𑀡𑁆𑀡𑀁 𑀯𑀢𑁆𑀣𑀼𑀁 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀧𑀜𑁆𑀘 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀲𑀦𑁆𑀥𑀸𑀬 𑀧𑁄𑀭𑀸𑀡𑀸 𑀆𑀳𑀼 𑁋

‘‘𑀯𑀢𑁆𑀣𑀼𑀁 𑀓𑀸𑀮𑀜𑁆𑀘 𑀤𑁂𑀲𑀜𑁆𑀘, 𑀅𑀕𑁆𑀖𑀁 𑀧𑀭𑀺𑀪𑁄𑀕𑀧𑀜𑁆𑀘𑀫𑀁;

𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺, 𑀥𑀸𑀭𑁂𑀬𑁆𑀬𑀢𑁆𑀣𑀁 𑀯𑀺𑀘𑀓𑁆𑀔𑀡𑁄’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁯𑁨);

𑀢𑀢𑁆𑀣 𑀯𑀢𑁆𑀣𑀼𑀦𑁆𑀢𑀺 𑀪𑀡𑁆𑀟𑀁. 𑀅𑀯𑀳𑀸𑀭𑀓𑁂𑀦 𑀳𑀺 ‘‘𑀫𑀬𑀸 𑀇𑀤𑀁 𑀦𑀸𑀫 𑀅𑀯𑀳𑀝’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸𑀯 𑀢𑀁 𑀪𑀡𑁆𑀟𑀁 ‘‘𑀲𑀲𑀸𑀫𑀺𑀓𑀁 𑀯𑀸 𑀅𑀲𑀸𑀫𑀺𑀓𑀁 𑀯𑀸’’𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀲𑀲𑀸𑀫𑀺𑀓𑁂𑀧𑀺 𑀲𑀸𑀫𑀺𑀓𑀸𑀦𑀁 𑀲𑀸𑀮𑀬𑀪𑀸𑀯𑁄 𑀯𑀸 𑀦𑀺𑀭𑀸𑀮𑀬𑀪𑀸𑀯𑁄 𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀲𑀁 𑀲𑀸𑀮𑀬𑀓𑀸𑀮𑁂 𑀅𑀯𑀳𑀝𑀁, 𑀪𑀡𑁆𑀟𑀁 𑀅𑀕𑁆𑀖𑀸𑀧𑁂𑀢𑁆𑀯𑀸 𑀆𑀧𑀢𑁆𑀢𑀺 𑀓𑀸𑀢𑀩𑁆𑀩𑀸. 𑀲𑀘𑁂 𑀦𑀺𑀭𑀸𑀮𑀬𑀓𑀸𑀮𑁂, 𑀧𑀸𑀭𑀸𑀚𑀺𑀓𑁂𑀦 𑀦 𑀓𑀸𑀢𑀩𑁆𑀩𑀸. 𑀪𑀡𑁆𑀟𑀲𑀸𑀫𑀺𑀓𑁂𑀲𑀼 𑀧𑀦 𑀪𑀡𑁆𑀟𑀁 𑀆𑀳𑀭𑀸𑀧𑁂𑀦𑁆𑀢𑁂𑀲𑀼 𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀸𑀫𑀻𑀘𑀺.

𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀪𑀸𑀢𑀺𑀬𑀭𑀸𑀚𑀓𑀸𑀮𑁂 𑀓𑀺𑀭 𑀫𑀳𑀸𑀘𑁂𑀢𑀺𑀬𑀧𑀽𑀚𑀸𑀬 𑀤𑀓𑁆𑀔𑀺𑀡𑀤𑀺𑀲𑀢𑁄 𑀏𑀓𑁄 𑀪𑀺𑀓𑁆𑀔𑀼 𑀲𑀢𑁆𑀢𑀳𑀢𑁆𑀣𑀁 𑀧𑀡𑁆𑀟𑀼𑀓𑀸𑀲𑀸𑀯𑀁 𑀅𑀁𑀲𑁂 𑀓𑀭𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀧𑀸𑀯𑀺𑀲𑀺. 𑀢𑀗𑁆𑀔𑀡𑀫𑁂𑀯 𑀘 𑀭𑀸𑀚𑀸𑀧𑀺 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀆𑀕𑀢𑁄. 𑀢𑀢𑁄 𑀉𑀲𑁆𑀲𑀸𑀭𑀡𑀸𑀬 𑀯𑀢𑁆𑀢𑀫𑀸𑀦𑀸𑀬 𑀫𑀳𑀸𑀚𑀦𑀲𑀫𑁆𑀫𑀤𑁆𑀤𑁄 𑀅𑀳𑁄𑀲𑀺. 𑀅𑀣 𑀲𑁄 𑀪𑀺𑀓𑁆𑀔𑀼 𑀚𑀦𑀲𑀫𑁆𑀫𑀤𑁆𑀤𑀧𑀻𑀴𑀺𑀢𑁄 𑀅𑀁𑀲𑀢𑁄 𑀧𑀢𑀦𑁆𑀢𑀁 𑀓𑀸𑀲𑀸𑀯𑀁 𑀅𑀤𑀺𑀲𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀲𑀸𑀯𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀓𑁄 𑀈𑀤𑀺𑀲𑁂 𑀚𑀦𑀲𑀫𑁆𑀫𑀤𑁆𑀤𑁂 𑀓𑀸𑀲𑀸𑀯𑀁 𑀮𑀘𑁆𑀙𑀢𑀺, 𑀦 𑀤𑀸𑀦𑀺 𑀢𑀁 𑀫𑀬𑁆𑀳’’𑀦𑁆𑀢𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀕𑀢𑁄. 𑀅𑀣𑀜𑁆𑀜𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑁄 𑀢𑀁 𑀓𑀸𑀲𑀸𑀯𑀁 𑀤𑀺𑀲𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀅𑀲𑁆𑀲𑀫𑀡𑁄 𑀤𑀸𑀦𑀺𑀫𑁆𑀳𑀺, 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 ‘‘𑀯𑀺𑀦𑀬𑀥𑀭𑁂 𑀧𑀼𑀘𑁆𑀙𑀺𑀢𑁆𑀯𑀸 𑀜𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀢𑁂𑀦 𑀲𑀫𑀬𑁂𑀦 𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑁄 𑀦𑀸𑀫 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀥𑀭𑁄 𑀯𑀺𑀦𑀬𑀸𑀘𑀭𑀺𑀬𑀧𑀸𑀫𑁄𑀓𑁆𑀔𑁄 𑀫𑀳𑀸𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀲𑁄 𑀪𑀺𑀓𑁆𑀔𑀼 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀢𑁂𑀦 𑀪𑀝𑁆𑀞𑁂 𑀚𑀦𑀓𑀸𑀬𑁂 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀕𑀳𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀤𑀸𑀦𑀺 𑀏𑀢𑁆𑀣 𑀑𑀓𑀸𑀲𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 ‘‘𑀲𑀘𑁂 𑀓𑀸𑀲𑀸𑀯𑀲𑀸𑀫𑀺𑀓𑀁 𑀪𑀺𑀓𑁆𑀔𑀼𑀁 𑀆𑀦𑁂𑀬𑁆𑀬𑀸𑀲𑀺, 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀢𑀯 𑀧𑀢𑀺𑀝𑁆𑀞𑀸 𑀓𑀸𑀢𑀼’’𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑀁 𑀤𑀓𑁆𑀔𑀺𑀲𑁆𑀲𑀸𑀫𑀻𑀢𑀺. 𑀢𑀳𑀺𑀁 𑀢𑀳𑀺𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀳𑀻𑀢𑀺. 𑀲𑁄 𑀧𑀜𑁆𑀘𑀧𑀺 𑀫𑀳𑀸𑀯𑀺𑀳𑀸𑀭𑁂 𑀑𑀮𑁄𑀓𑁂𑀢𑁆𑀯𑀸 𑀦𑁂𑀯 𑀅𑀤𑁆𑀤𑀓𑁆𑀔𑀺. 𑀢𑀢𑁄 𑀦𑀁 𑀣𑁂𑀭𑁄 𑀧𑀼𑀘𑁆𑀙𑀺 ‘‘𑀓𑀢𑀭𑀸𑀬 𑀤𑀺𑀲𑀸𑀬 𑀩𑀳𑀽 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀤𑀓𑁆𑀔𑀺𑀡𑀤𑀺𑀲𑀸𑀬, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺 𑀓𑀸𑀲𑀸𑀯𑀁 𑀤𑀻𑀖𑀢𑁄 𑀘 𑀢𑀺𑀭𑀺𑀬𑀜𑁆𑀘 𑀫𑀺𑀦𑀺𑀢𑁆𑀯𑀸 𑀞𑀧𑁂𑀳𑀺, 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀬 𑀯𑀺𑀳𑀸𑀭𑀧𑀝𑀺𑀧𑀸𑀝𑀺𑀬𑀸 𑀯𑀺𑀘𑀺𑀦𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀦𑁂𑀳𑀻𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀣𑁂𑀭𑁄 𑀧𑀼𑀘𑁆𑀙𑀺 ‘‘𑀢𑀯𑁂𑀤𑀁 𑀓𑀸𑀲𑀸𑀯’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. 𑀓𑀼𑀳𑀺𑀁 𑀢𑁂 𑀧𑀸𑀢𑀺𑀢𑀦𑁆𑀢𑀺? 𑀲𑁄 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺. 𑀣𑁂𑀭𑁄 𑀢𑁂𑀦 𑀓𑀢𑀁 𑀥𑀼𑀭𑀦𑀺𑀓𑁆𑀔𑁂𑀧𑀁 𑀲𑀼𑀢𑁆𑀯𑀸 𑀇𑀢𑀭𑀁 𑀧𑀼𑀘𑁆𑀙𑀺 ‘‘𑀢𑀬𑀸 𑀇𑀤𑀁 𑀓𑀼𑀳𑀺𑀁 𑀤𑀺𑀲𑁆𑀯𑀸 𑀕𑀳𑀺𑀢’’𑀦𑁆𑀢𑀺? 𑀲𑁄𑀧𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀢𑀢𑁄 𑀢𑀁 𑀣𑁂𑀭𑁄 𑀆𑀳 ‘‘𑀲𑀘𑁂 𑀢𑁂 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀳𑀺𑀢𑀁 𑀅𑀪𑀯𑀺𑀲𑁆𑀲, 𑀅𑀦𑀸𑀧𑀢𑁆𑀢𑀺𑀬𑁂𑀯 𑀢𑁂 𑀅𑀲𑁆𑀲, 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀧𑀦 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀓𑀝𑀁 𑀆𑀧𑀦𑁆𑀦𑁄𑀲𑀺, 𑀢𑀁 𑀤𑁂𑀲𑁂𑀢𑁆𑀯𑀸 𑀅𑀦𑀸𑀧𑀢𑁆𑀢𑀺𑀓𑁄 𑀳𑁄𑀢𑀺, 𑀇𑀤𑀜𑁆𑀘 𑀓𑀸𑀲𑀸𑀯𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀤𑁂𑀳𑀻’’𑀢𑀺. 𑀲𑁄 𑀪𑀺𑀓𑁆𑀔𑀼 𑀅𑀫𑀢𑁂𑀦𑁂𑀯 𑀅𑀪𑀺𑀲𑀺𑀢𑁆𑀢𑁄 𑀯𑀭𑀫𑀲𑁆𑀲𑀸𑀲𑀧𑁆𑀧𑀢𑁆𑀢𑁄 𑀅𑀳𑁄𑀲𑀺. 𑀏𑀯𑀁 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁.

𑀓𑀸𑀮𑁄𑀢𑀺 𑀅𑀯𑀳𑀸𑀭𑀓𑀸𑀮𑁄. 𑀢𑀤𑁂𑀯 𑀳𑀺 𑀪𑀡𑁆𑀟𑀁 𑀓𑀤𑀸𑀘𑀺 𑀅𑀧𑁆𑀧𑀕𑁆𑀖𑀁 𑀳𑁄𑀢𑀺, 𑀓𑀤𑀸𑀘𑀺 𑀫𑀳𑀕𑁆𑀖𑀁. 𑀢𑀲𑁆𑀫𑀸 𑀢𑀁 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄 𑀳𑁄𑀢𑀺, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀏𑀯𑀁 𑀓𑀸𑀮𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀤𑁂𑀲𑁄𑀢𑀺 𑀅𑀯𑀳𑀸𑀭𑀤𑁂𑀲𑁄. 𑀢𑀜𑁆𑀳𑀺 𑀪𑀡𑁆𑀟𑀁 𑀬𑀲𑁆𑀫𑀺𑀁 𑀤𑁂𑀲𑁂 𑀅𑀯𑀳𑀝𑀁, 𑀢𑀲𑁆𑀫𑀺𑀁𑀬𑁂𑀯 𑀤𑁂𑀲𑁂 𑀬𑁄 𑀢𑀲𑁆𑀲 𑀅𑀕𑁆𑀖𑁄 𑀳𑁄𑀢𑀺, 𑀢𑁂𑀦 𑀅𑀕𑁆𑀖𑁂𑀦 𑀆𑀧𑀢𑁆𑀢𑀺 𑀓𑀸𑀭𑁂𑀢𑀩𑁆𑀩𑀸. 𑀪𑀡𑁆𑀟𑀼𑀝𑁆𑀞𑀸𑀦𑀤𑁂𑀲𑁂 𑀳𑀺 𑀪𑀡𑁆𑀟𑀁 𑀅𑀧𑁆𑀧𑀕𑁆𑀖𑀁 𑀳𑁄𑀢𑀺, 𑀅𑀜𑁆𑀜𑀢𑁆𑀣 𑀫𑀳𑀕𑁆𑀖𑀁.

𑀇𑀫𑀲𑁆𑀲𑀧𑀺 𑀘 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀓𑀺𑀭 𑀏𑀓𑁄 𑀪𑀺𑀓𑁆𑀔𑀼 𑀲𑀼𑀲𑀡𑁆𑀞𑀸𑀦𑀁 𑀦𑀸𑀴𑀺𑀓𑁂𑀭𑀁 𑀮𑀪𑀺𑀢𑁆𑀯𑀸 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀣𑀸𑀮𑀓𑀲𑀤𑀺𑀲𑀁 𑀫𑀦𑁄𑀭𑀫𑀁 𑀧𑀸𑀦𑀻𑀬𑀣𑀸𑀮𑀓𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀞𑀧𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀁 𑀅𑀕𑀫𑀸𑀲𑀺. 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀅𑀦𑁆𑀢𑀭𑀲𑀫𑀼𑀤𑁆𑀤𑀁 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀝𑀺𑀯𑀲𑀦𑁆𑀢𑁄 𑀢𑀁 𑀣𑀸𑀮𑀓𑀁 𑀤𑀺𑀲𑁆𑀯𑀸 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀕𑀺𑀭𑀺𑀫𑁂𑀯 𑀆𑀕𑀢𑁄. 𑀢𑀲𑁆𑀲 𑀢𑀢𑁆𑀣 𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲 𑀢𑀁 𑀣𑀸𑀮𑀓𑀁 𑀤𑀺𑀲𑁆𑀯𑀸 𑀣𑀸𑀮𑀓𑀲𑀸𑀫𑀺𑀓𑁄 𑀪𑀺𑀓𑁆𑀔𑀼 𑀆𑀳 ‘‘𑀓𑀼𑀢𑁄 𑀢𑁂 𑀇𑀤𑀁 𑀮𑀤𑁆𑀥’’𑀦𑁆𑀢𑀺. 𑀅𑀦𑁆𑀢𑀭𑀲𑀫𑀼𑀤𑁆𑀤𑀢𑁄 𑀫𑁂 𑀆𑀦𑀻𑀢𑀦𑁆𑀢𑀺. 𑀲𑁄 𑀢𑀁 ‘‘𑀦𑁂𑀢𑀁 𑀢𑀯 𑀲𑀦𑁆𑀢𑀓𑀁, 𑀣𑁂𑀬𑁆𑀬𑀸𑀬 𑀢𑁂 𑀕𑀳𑀺𑀢’’𑀦𑁆𑀢𑀺 𑀲𑀗𑁆𑀖𑀫𑀚𑁆𑀛𑀁 𑀆𑀓𑀟𑁆𑀠𑀺. 𑀢𑀢𑁆𑀣 𑀘 𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀺𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀅𑀕𑀫𑀺𑀁𑀲𑀼, 𑀢𑀢𑁆𑀣 𑀘 𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀲𑀫𑀻𑀧𑁂 𑀲𑀦𑁆𑀦𑀺𑀧𑀸𑀢𑀁 𑀓𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀆𑀭𑀪𑀺𑀁𑀲𑀼. 𑀯𑀺𑀦𑀬𑀥𑀭𑀢𑁆𑀣𑁂𑀭𑀸 𑀅𑀯𑀳𑀸𑀭𑀁 𑀲𑀜𑁆𑀜𑀸𑀧𑁂𑀲𑀼𑀁.

𑀢𑀲𑁆𑀫𑀺𑀜𑁆𑀘 𑀲𑀦𑁆𑀦𑀺𑀧𑀸𑀢𑁂 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀯𑀺𑀦𑀬𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀏𑀯𑀫𑀸𑀳 ‘‘𑀇𑀫𑀺𑀦𑀸 𑀇𑀤𑀁 𑀣𑀸𑀮𑀓𑀁 𑀓𑀼𑀳𑀺𑀁 𑀅𑀯𑀳𑀝’’𑀦𑁆𑀢𑀺? ‘‘𑀅𑀦𑁆𑀢𑀭𑀲𑀫𑀼𑀤𑁆𑀤𑁂 𑀅𑀯𑀳𑀝’’𑀦𑁆𑀢𑀺. 𑀢𑀢𑁆𑀣 𑀢𑀁 𑀓𑀺𑀁 𑀅𑀕𑁆𑀖𑀢𑀻𑀢𑀺. 𑀦 𑀓𑀺𑀜𑁆𑀘𑀺 𑀅𑀕𑁆𑀖𑀢𑀺. 𑀢𑀢𑁆𑀭 𑀳𑀺 𑀦𑀸𑀴𑀺𑀓𑁂𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀔𑀸𑀤𑀺𑀢𑁆𑀯𑀸 𑀓𑀧𑀸𑀮𑀁 𑀙𑀟𑁆𑀟𑁂𑀢𑀺, 𑀤𑀸𑀭𑀼𑀅𑀢𑁆𑀣𑀁 𑀧𑀦 𑀨𑀭𑀢𑀻𑀢𑀺. 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑁆𑀣 𑀳𑀢𑁆𑀣𑀓𑀫𑁆𑀫𑀁 𑀓𑀺𑀁 𑀅𑀕𑁆𑀖𑀢𑀻𑀢𑀺? 𑀫𑀸𑀲𑀓𑀁 𑀯𑀸 𑀊𑀦𑀫𑀸𑀲𑀓𑀁 𑀯𑀸𑀢𑀺. 𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀸𑀲𑀓𑁂 𑀯𑀸 𑀊𑀦𑀫𑀸𑀲𑀓𑁂 𑀯𑀸 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀸𑀥𑀼, 𑀲𑀼𑀓𑀣𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢’’𑀦𑁆𑀢𑀺 𑀏𑀓𑀲𑀸𑀥𑀼𑀓𑀸𑀭𑁄 𑀅𑀳𑁄𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀪𑀸𑀢𑀺𑀬𑀭𑀸𑀚𑀸𑀧𑀺 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀁 𑀦𑀕𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀇𑀤’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀁 𑀧𑀝𑀺𑀧𑀸𑀝𑀺𑀬𑀸 𑀲𑀼𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 ‘‘𑀫𑀬𑀺 𑀲𑀦𑁆𑀢𑁂 𑀪𑀺𑀓𑁆𑀔𑀽𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀕𑀺𑀳𑀻𑀦𑀫𑁆𑀧𑀺 𑀅𑀥𑀺𑀓𑀭𑀡𑀁 𑀆𑀪𑀺𑀥𑀫𑁆𑀫𑀺𑀓𑀕𑁄𑀤𑀢𑁆𑀢𑀢𑁆𑀣𑁂𑀭𑁂𑀦 𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀁, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁂 𑀅𑀢𑀺𑀝𑁆𑀞𑀫𑀸𑀦𑀁 𑀭𑀸𑀚𑀸𑀡𑀸𑀬 𑀞𑀧𑁂𑀫𑀻’’𑀢𑀺. 𑀏𑀯𑀁 𑀤𑁂𑀲𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀅𑀕𑁆𑀖𑁄𑀢𑀺 𑀪𑀡𑁆𑀟𑀕𑁆𑀖𑁄. 𑀦𑀯𑀪𑀡𑁆𑀟𑀲𑁆𑀲 𑀳𑀺 𑀬𑁄 𑀅𑀕𑁆𑀖𑁄 𑀳𑁄𑀢𑀺, 𑀲𑁄 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀺. 𑀬𑀣𑀸 𑀦𑀯𑀥𑁄𑀢𑁄 𑀧𑀢𑁆𑀢𑁄 𑀅𑀝𑁆𑀞 𑀯𑀸 𑀤𑀲 𑀯𑀸 𑀅𑀕𑁆𑀖𑀢𑀺, 𑀲𑁄 𑀧𑀘𑁆𑀙𑀸 𑀪𑀺𑀦𑁆𑀦𑁄 𑀯𑀸 𑀙𑀺𑀤𑁆𑀤𑁄 𑀯𑀸 𑀆𑀡𑀺𑀕𑀡𑁆𑀞𑀺𑀓𑀸𑀳𑀢𑁄 𑀯𑀸 𑀅𑀧𑁆𑀧𑀕𑁆𑀖𑁄 𑀳𑁄𑀢𑀺, 𑀢𑀲𑁆𑀫𑀸 𑀦 𑀲𑀩𑁆𑀩𑀤𑀸 𑀪𑀡𑁆𑀟𑀁 𑀧𑀓𑀢𑀺𑀅𑀕𑁆𑀖𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀅𑀕𑁆𑀖𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀧𑀭𑀺𑀪𑁄𑀕𑁄𑀢𑀺 𑀪𑀡𑁆𑀟𑀧𑀭𑀺𑀪𑁄𑀕𑁄. 𑀧𑀭𑀺𑀪𑁄𑀕𑁂𑀦𑀧𑀺 𑀳𑀺 𑀯𑀸𑀲𑀺𑀆𑀤𑀺𑀪𑀡𑁆𑀟𑀲𑁆𑀲 𑀅𑀕𑁆𑀖𑁄 𑀧𑀭𑀺𑀳𑀸𑀬𑀢𑀺. 𑀢𑀲𑁆𑀫𑀸 𑀏𑀯𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑁋 𑀲𑀘𑁂 𑀓𑁄𑀘𑀺 𑀓𑀲𑁆𑀲𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀸𑀲𑀺𑀁 𑀳𑀭𑀢𑀺, 𑀢𑀢𑁆𑀭 𑀯𑀸𑀲𑀺𑀲𑀸𑀫𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀢𑀬𑀸 𑀅𑀬𑀁 𑀯𑀸𑀲𑀺 𑀓𑀺𑀢𑁆𑀢𑀓𑁂𑀦 𑀓𑀻𑀢𑀸’’𑀢𑀺? ‘‘𑀧𑀸𑀤𑁂𑀦, 𑀪𑀦𑁆𑀢𑁂’’𑀢𑀺. 𑀓𑀺𑀁 𑀧𑀦 𑀢𑁂 𑀓𑀺𑀡𑀺𑀢𑁆𑀯𑀸𑀯 𑀞𑀧𑀺𑀢𑀸, 𑀉𑀤𑀸𑀳𑀼 𑀦𑀁 𑀯𑀴𑀜𑁆𑀚𑁂𑀲𑀻𑀢𑀺? 𑀲𑀘𑁂 𑀯𑀤𑀢𑀺 ‘‘𑀏𑀓𑀤𑀺𑀯𑀲𑀁 𑀫𑁂 𑀤𑀦𑁆𑀢𑀓𑀝𑁆𑀞𑀁 𑀯𑀸 𑀭𑀚𑀦𑀙𑀮𑁆𑀮𑀺 𑀯𑀸 𑀧𑀢𑁆𑀢𑀧𑀘𑀦𑀓𑀤𑀸𑀭𑀼 𑀯𑀸 𑀙𑀺𑀦𑁆𑀦𑀁, 𑀖𑀁𑀲𑀺𑀢𑁆𑀯𑀸 𑀯𑀸 𑀦𑀺𑀲𑀺𑀢𑀸’’𑀢𑀺, 𑀅𑀣𑀲𑁆𑀲 𑀧𑁄𑀭𑀸𑀡𑀓𑁄 𑀅𑀕𑁆𑀖𑁄 𑀪𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀯𑀸𑀲𑀺𑀬𑀸, 𑀏𑀯𑀁 𑀅𑀜𑁆𑀚𑀦𑀺𑀬𑀸 𑀯𑀸 𑀅𑀜𑁆𑀚𑀦𑀺𑀲𑀮𑀸𑀓𑀸𑀬 𑀯𑀸 𑀓𑀼𑀜𑁆𑀘𑀺𑀓𑀸𑀬 𑀯𑀸 𑀧𑀮𑀸𑀮𑁂𑀦 𑀯𑀸 𑀣𑀼𑀲𑁂𑀳𑀺 𑀯𑀸 𑀇𑀝𑁆𑀞𑀓𑀘𑀼𑀡𑁆𑀡𑁂𑀦 𑀯𑀸 𑀏𑀓𑀯𑀸𑀭𑀁 𑀖𑀁𑀲𑀺𑀢𑁆𑀯𑀸 𑀥𑁄𑀯𑀺𑀢𑀫𑀢𑁆𑀢𑁂𑀦𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀺𑀧𑀼𑀫𑀡𑁆𑀟𑀮𑀲𑁆𑀲 𑀫𑀓𑀭𑀤𑀦𑁆𑀢𑀘𑁆𑀙𑁂𑀤𑀦𑁂𑀦𑀧𑀺 𑀧𑀭𑀺𑀫𑀚𑁆𑀚𑀦𑀫𑀢𑁆𑀢𑁂𑀦𑀧𑀺, 𑀉𑀤𑀓𑀲𑀸𑀝𑀓𑀲𑁆𑀲 𑀲𑀓𑀺𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑁂𑀦𑀧𑀺 𑀧𑀭𑀺𑀪𑁄𑀕𑀲𑀻𑀲𑁂𑀦 𑀅𑀁𑀲𑁂 𑀯𑀸 𑀲𑀻𑀲𑁂 𑀯𑀸 𑀞𑀧𑀦𑀫𑀢𑁆𑀢𑁂𑀦𑀧𑀺, 𑀢𑀡𑁆𑀟𑀼𑀮𑀸𑀤𑀻𑀦𑀁 𑀧𑀧𑁆𑀨𑁄𑀝𑀦𑁂𑀦𑀧𑀺 𑀢𑀢𑁄 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀅𑀧𑀦𑀬𑀦𑁂𑀦𑀧𑀺 𑀅𑀦𑁆𑀢𑀫𑀲𑁄 𑀏𑀓𑀁 𑀧𑀸𑀲𑀸𑀡𑀲𑀓𑁆𑀔𑀭𑀁 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀧𑀺, 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀪𑀸𑀚𑀦𑀦𑁆𑀢𑀭𑀧𑀅𑀯𑀢𑁆𑀢𑀦𑁂𑀦𑀧𑀺 𑀅𑀦𑁆𑀢𑀫𑀲𑁄 𑀢𑀢𑁄 𑀫𑀓𑁆𑀔𑀺𑀓𑀁 𑀯𑀸 𑀓𑀺𑀧𑀺𑀮𑁆𑀮𑀺𑀓𑀁 𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀙𑀟𑁆𑀟𑀺𑀢𑀫𑀢𑁆𑀢𑁂𑀦𑀧𑀺, 𑀕𑀼𑀴𑀧𑀺𑀡𑁆𑀟𑀓𑀲𑁆𑀲 𑀫𑀥𑀼𑀭𑀪𑀸𑀯𑀚𑀸𑀦𑀦𑀢𑁆𑀣𑀁 𑀦𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀅𑀡𑀼𑀫𑀢𑁆𑀢𑀁 𑀕𑀳𑀺𑀢𑀫𑀢𑁆𑀢𑁂𑀦𑀧𑀺 𑀅𑀕𑁆𑀖𑁄 𑀪𑀲𑁆𑀲𑀢𑀺. 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀧𑀸𑀤𑀕𑁆𑀖𑀦𑀓𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸𑀫𑀺𑀓𑁂𑀳𑀺 𑀧𑀭𑀺𑀪𑁄𑀕𑁂𑀦 𑀊𑀦𑀁 𑀓𑀢𑀁 𑀳𑁄𑀢𑀺, 𑀦 𑀢𑀁 𑀅𑀯𑀳𑀝𑁄 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑁂𑀦 𑀓𑀸𑀢𑀩𑁆𑀩𑁄𑀢𑀺. 𑀏𑀯𑀁 𑀅𑀕𑁆𑀖𑁄 𑀑𑀮𑁄𑀓𑁂𑀢𑀩𑁆𑀩𑁄.

𑀏𑀯𑀁 𑀇𑀫𑀸𑀦𑀺 𑀢𑀼𑀮𑀬𑀺𑀢𑁆𑀯𑀸 𑀧𑀜𑁆𑀘 𑀞𑀸𑀦𑀸𑀦𑀺 𑀥𑀸𑀭𑁂𑀬𑁆𑀬 𑀅𑀢𑁆𑀣𑀁 𑀯𑀺𑀘𑀓𑁆𑀔𑀡𑁄, 𑀆𑀧𑀢𑁆𑀢𑀺𑀁 𑀯𑀸 𑀅𑀦𑀸𑀧𑀢𑁆𑀢𑀺𑀁 𑀯𑀸 𑀕𑀭𑀼𑀓𑀁 𑀯𑀸 𑀮𑀳𑀼𑀓𑀁 𑀯𑀸 𑀆𑀧𑀢𑁆𑀢𑀺𑀁 𑀬𑀣𑀸𑀞𑀸𑀦𑁂 𑀞𑀧𑁂𑀬𑁆𑀬𑀸𑀢𑀺. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀲𑀺𑀓𑁆𑀔𑀸𑀧𑀤𑀁 𑀲𑀫𑀁 𑀢𑁂𑀦, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦 𑀯𑀺𑀚𑁆𑀚𑀢𑀺;

𑀅𑀦𑁂𑀓𑀦𑀬𑀯𑁄𑀓𑀺𑀡𑁆𑀡𑀁, 𑀕𑀫𑁆𑀪𑀻𑀭𑀢𑁆𑀣𑀯𑀺𑀦𑀺𑀘𑁆𑀙𑀬𑀁.

‘‘𑀢𑀲𑁆𑀫𑀸 𑀯𑀢𑁆𑀣𑀼𑀫𑁆𑀳𑀺 𑀑𑀢𑀺𑀡𑁆𑀡𑁂, 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑀜𑁆𑀜𑀼𑀦𑀸;

𑀯𑀺𑀦𑀬𑀸𑀦𑀼𑀕𑁆𑀕𑀳𑁂𑀦𑁂𑀢𑁆𑀣, 𑀓𑀭𑁄𑀦𑁆𑀢𑁂𑀦 𑀯𑀺𑀦𑀺𑀘𑁆𑀙𑀬𑀁.

‘‘𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀲𑀸𑀥𑀺𑀧𑁆𑀧𑀸𑀬𑀫𑀲𑁂𑀲𑀢𑁄;

𑀑𑀕𑀬𑁆𑀳 𑀅𑀧𑁆𑀧𑀫𑀢𑁆𑀢𑁂𑀦, 𑀓𑀭𑀡𑀻𑀬𑁄 𑀯𑀺𑀦𑀺𑀘𑁆𑀙𑀬𑁄.

‘‘𑀆𑀧𑀢𑁆𑀢𑀺𑀤𑀲𑁆𑀲𑀦𑀼𑀲𑁆𑀲𑀸𑀳𑁄, 𑀦 𑀓𑀢𑁆𑀢𑀩𑁆𑀩𑁄 𑀓𑀼𑀤𑀸𑀘𑀦𑀁;

𑀧𑀲𑁆𑀲𑀺𑀲𑁆𑀲𑀸𑀫𑀺 𑀅𑀦𑀸𑀧𑀢𑁆𑀢𑀺-𑀫𑀺𑀢𑀺 𑀓𑀬𑀺𑀭𑀸𑀣 𑀫𑀸𑀦𑀲𑀁.

‘‘𑀧𑀲𑁆𑀲𑀺𑀢𑁆𑀯𑀸𑀧𑀺 𑀘 𑀆𑀧𑀢𑁆𑀢𑀺𑀁, 𑀅𑀯𑀢𑁆𑀯𑀸𑀯 𑀧𑀼𑀦𑀧𑁆𑀧𑀼𑀦𑀁;

𑀯𑀻𑀫𑀁𑀲𑀺𑀢𑁆𑀯𑀸𑀣 𑀯𑀺𑀜𑁆𑀜𑀽𑀳𑀺, 𑀲𑀁𑀲𑀦𑁆𑀤𑀺𑀢𑁆𑀯𑀸 𑀘 𑀢𑀁 𑀯𑀤𑁂.

‘‘𑀓𑀧𑁆𑀧𑀺𑀬𑁂𑀧𑀺 𑀘 𑀯𑀢𑁆𑀣𑀼𑀲𑁆𑀫𑀺𑀁, 𑀘𑀺𑀢𑁆𑀢𑀲𑁆𑀲 𑀮𑀳𑀼𑀯𑀢𑁆𑀢𑀺𑀦𑁄;

𑀯𑀲𑁂𑀦 𑀲𑀸𑀫𑀜𑁆𑀜𑀕𑀼𑀡𑀸, 𑀘𑀯𑀦𑁆𑀢𑀻𑀥 𑀧𑀼𑀣𑀼𑀚𑁆𑀚𑀦𑀸.

‘‘𑀢𑀲𑁆𑀫𑀸 𑀧𑀭𑀧𑀭𑀺𑀓𑁆𑀔𑀸𑀭𑀁, 𑀆𑀲𑀻𑀯𑀺𑀲𑀫𑀺𑀯𑁄𑀭𑀕𑀁;

𑀅𑀕𑁆𑀕𑀺𑀁 𑀯𑀺𑀬 𑀘 𑀲𑀫𑁆𑀧𑀲𑁆𑀲𑀁, 𑀦𑀸𑀫𑀲𑁂𑀬𑁆𑀬 𑀯𑀺𑀘𑀓𑁆𑀔𑀡𑁄’’𑀢𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁧𑁬𑁦-𑁧 𑀢𑀢𑁆𑀭𑀸𑀬𑀁 𑀅𑀦𑀼𑀲𑀸𑀲𑀦𑀻);

𑁨𑁩𑁩. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁂𑀦 (𑀧𑀸𑀭𑀸. 𑀅𑀝𑁆𑀞. 𑁨.𑁧𑁯𑁭) 𑀧𑀦 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁. 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀁, 𑀓𑀤𑀸 𑀢𑁂 𑀅𑀥𑀺𑀕𑀢𑀁, 𑀓𑀢𑁆𑀣 𑀢𑁂 𑀅𑀥𑀺𑀕𑀢𑀁, 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀯𑀺𑀲𑁄𑀥𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀲𑁄 𑀏𑀢𑁆𑀢𑀸𑀯𑀢𑀸 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀇𑀫𑁂𑀲𑀁 𑀧𑀦 𑀙𑀦𑁆𑀦𑀁 𑀞𑀸𑀦𑀸𑀦𑀁 𑀲𑁄𑀥𑀦𑀢𑁆𑀣𑀁 𑀏𑀯𑀁 𑀯𑀢𑁆𑀢𑀩𑁆𑀩𑁄 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁, 𑀓𑀺𑀁 𑀛𑀸𑀦𑀁 𑀉𑀤𑀸𑀳𑀼 𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭’’𑀦𑁆𑀢𑀺. 𑀬𑁄 𑀳𑀺 𑀬𑁂𑀦 𑀅𑀥𑀺𑀕𑀢𑁄 𑀥𑀫𑁆𑀫𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀇𑀤𑀁 𑀦𑀸𑀫 𑀫𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀲𑀼 𑀓𑀺𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀝𑁆𑀞𑀢𑀺𑀁𑀲𑀸𑀬 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀽𑀧𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀓𑁂𑀦 𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸’’𑀢𑀺. 𑀬𑁄 𑀳𑀺 𑀬𑀲𑁆𑀲𑀸𑀪𑀺𑀦𑀺𑀯𑁂𑀲𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀬𑀁 𑀦𑀸𑀫 𑀫𑁂 𑀅𑀪𑀺𑀦𑀺𑀯𑁂𑀲𑁄, 𑀏𑀯𑀁 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀤𑀸 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀼𑀩𑁆𑀩𑀡𑁆𑀳𑁂, 𑀉𑀤𑀸𑀳𑀼 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀓𑀸𑀮𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀅𑀥𑀺𑀕𑀓’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑁆𑀣 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀤𑀺𑀯𑀸𑀝𑁆𑀞𑀸𑀦𑁂, 𑀉𑀤𑀸𑀳𑀼 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀑𑀓𑀸𑀲𑁂’’𑀢𑀺. 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑁄𑀓𑀸𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀫𑁂 𑀑𑀓𑀸𑀲𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀞𑀫𑀫𑀕𑁆𑀕𑀯𑀚𑁆𑀛𑀸, 𑀉𑀤𑀸𑀳𑀼 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀯𑀚𑁆𑀛𑀸’’𑀢𑀺. 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀲𑀘𑁂 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲, 𑀉𑀤𑀸𑀳𑀼 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲𑀸’’𑀢𑀺. 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀥𑀫𑁆𑀫𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀇𑀫𑁂𑀲𑀁 𑀦𑀸𑀫𑀸𑀳𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀯𑀤𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺𑀲𑁆𑀲 𑀯𑀘𑀦𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁. 𑀩𑀳𑀼𑀲𑁆𑀲𑀼𑀢𑀸 𑀳𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀓𑀼𑀲𑀮𑀸 𑀪𑀺𑀓𑁆𑀔𑀽 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀧𑀝𑀺𑀧𑀤𑀸 𑀲𑁄𑀥𑁂𑀢𑀩𑁆𑀩𑀸. 𑀬𑀤𑀺 𑀆𑀕𑀫𑀦𑀧𑀝𑀺𑀧𑀤𑀸 𑀦 𑀲𑀼𑀚𑁆𑀛𑀢𑀺, ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀦 𑀮𑀩𑁆𑀪𑀢𑀻’’𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀬𑀤𑀺 𑀧𑀦𑀲𑁆𑀲 𑀆𑀕𑀫𑀦𑀧𑀝𑀺𑀧𑀤𑀸 𑀲𑀼𑀚𑁆𑀛𑀢𑀺, 𑀤𑀻𑀖𑀭𑀢𑁆𑀢𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀕𑁆𑀕𑁄 𑀆𑀓𑀸𑀲𑁂 𑀧𑀸𑀡𑀺𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘𑀸’’𑀢𑀺 (𑀤𑀻. 𑀦𑀺. 𑁨.𑁨𑁯𑁬) 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺. 𑀅𑀧𑀺𑀘 𑀔𑁄 𑀦 𑀏𑀢𑁆𑀢𑀓𑁂𑀦𑀧𑀺 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀓𑀘𑁆𑀘𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀲𑀢𑁄 𑀔𑀻𑀡𑀸𑀲𑀯𑀲𑁆𑀲 𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀉𑀢𑁆𑀢𑀸𑀲𑁂𑀢𑀩𑁆𑀩𑁄. 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫 𑀅𑀲𑀦𑀺𑀬𑀸𑀧𑀺 𑀫𑀢𑁆𑀣𑀓𑁂 𑀧𑀢𑀫𑀸𑀦𑀸𑀬 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀦 𑀳𑁄𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀳𑁄𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁦𑁨) 𑁋 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑁄 𑀓𑀺𑀭 𑀏𑀓𑀁 𑀧𑀺𑀡𑁆𑀟𑀧𑀸𑀢𑀺𑀓𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑀳𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀢𑀁 𑀦𑀳𑀸𑀬𑀫𑀸𑀦𑀁 𑀓𑀮𑁆𑀬𑀸𑀡𑀻𑀦𑀤𑀻𑀫𑀼𑀔𑀤𑁆𑀯𑀸𑀭𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺. 𑀧𑀺𑀡𑁆𑀟𑀧𑀸𑀢𑀺𑀓𑁄 ‘‘𑀓𑀼𑀫𑁆𑀪𑀻𑀮𑁄’’𑀢𑀺 𑀲𑀜𑁆𑀜𑀸𑀬 𑀫𑀳𑀸𑀲𑀤𑁆𑀤𑀫𑀓𑀸𑀲𑀺, 𑀢𑀤𑀸 𑀦𑀁 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀚𑀸𑀦𑀺𑀁𑀲𑀼.

𑀘𑀦𑁆𑀤𑀫𑀼𑀔𑀢𑀺𑀲𑁆𑀲𑀭𑀸𑀚𑀓𑀸𑀮𑁂 𑀧𑀦 𑀫𑀳𑀸𑀯𑀺𑀳𑀸𑀭𑁂 𑀲𑀗𑁆𑀖𑀢𑁆𑀣𑁂𑀭𑁄 𑀔𑀻𑀡𑀸𑀲𑀯𑁄 𑀤𑀼𑀩𑁆𑀩𑀮𑀘𑀓𑁆𑀔𑀼𑀓𑁄 𑀯𑀺𑀳𑀸𑀭𑁂𑀬𑁂𑀯 𑀅𑀘𑁆𑀙𑀢𑀺. 𑀭𑀸𑀚𑀸 ‘‘𑀣𑁂𑀭𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑁂𑀲𑀼 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀧𑁆𑀧𑁄 𑀯𑀺𑀬 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺. 𑀣𑁂𑀭𑁄 𑀲𑀺𑀮𑀸𑀣𑀫𑁆𑀪𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 ‘‘𑀓𑁄 𑀏𑀢𑁆𑀣𑀸’’𑀢𑀺 𑀆𑀳. ‘‘𑀅𑀳𑀁, 𑀪𑀦𑁆𑀢𑁂, 𑀢𑀺𑀲𑁆𑀲𑁄’’𑀢𑀺? ‘‘𑀲𑀼𑀕𑀦𑁆𑀥𑀁 𑀯𑀸𑀬𑀲𑀺 𑀦𑁄 𑀢𑀺𑀲𑁆𑀲𑀸’’𑀢𑀺. 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲 𑀪𑀬𑀁 𑀦𑀸𑀫 𑀦𑀢𑁆𑀣𑀺.

𑀏𑀓𑀘𑁆𑀘𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄𑀧𑀺 𑀅𑀢𑀺𑀲𑀽𑀭𑁄 𑀳𑁄𑀢𑀺 𑀦𑀺𑀩𑁆𑀪𑀬𑁄. 𑀲𑁄 𑀭𑀚𑀦𑀻𑀬𑁂𑀦 𑀆𑀭𑀫𑁆𑀫𑀡𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑁄. 𑀯𑀲𑀪𑀭𑀸𑀚𑀸𑀧𑀺 𑀏𑀓𑀁 𑀣𑁂𑀭𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄 𑀖𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑀤𑀭𑀲𑀸𑀴𑀯𑀁 𑀫𑀤𑁆𑀤𑀫𑀸𑀦𑁄 𑀦𑀺𑀲𑀻𑀤𑀺. 𑀫𑀳𑀸𑀣𑁂𑀭𑀲𑁆𑀲 𑀔𑁂𑀴𑁄 𑀘𑀮𑀺𑀢𑁄, 𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀆𑀯𑀺𑀪𑀽𑀢𑁄. 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀭𑀲𑀢𑀡𑁆𑀳𑀸 𑀦𑀸𑀫 𑀲𑀼𑀧𑁆𑀧𑀳𑀻𑀦𑀸, 𑀤𑀺𑀩𑁆𑀩𑁂𑀲𑀼𑀧𑀺 𑀭𑀲𑁂𑀲𑀼 𑀦𑀺𑀓𑀦𑁆𑀢𑀺 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑀲𑁆𑀲 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀭𑀲𑀢𑀡𑁆𑀳𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺, ‘‘𑀦 𑀘 𑀢𑁆𑀯𑀁 𑀅𑀭𑀳𑀸’’𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀅𑀪𑀻𑀭𑀼 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀳𑀼𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀤𑀺𑀩𑁆𑀩𑀸𑀭𑀫𑁆𑀫𑀡𑁂𑀧𑀺 𑀦𑀺𑀓𑀦𑁆𑀢𑀺𑀁 𑀦 𑀚𑀦𑁂𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀦𑁆𑀢𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑁂𑀲𑀺𑀢𑀁 𑀲𑀓𑁆𑀓𑀸𑀭𑀁 𑀅𑀭𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑀸𑀯 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁.

𑁨𑁩𑁪. 𑀲𑀓𑀮𑁂 𑀧𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀓𑁄𑀲𑀮𑁆𑀮𑀁 𑀧𑀢𑁆𑀣𑀬𑀦𑁆𑀢𑁂𑀦 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄.

𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀯𑀺𑀦𑀬𑀁, 𑀫𑀳𑀸𑀣𑁂𑀭𑀸 𑀫𑀳𑀺𑀤𑁆𑀥𑀺𑀓𑀸;

𑀦𑀻𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀲𑀼𑀁, 𑀥𑀫𑁆𑀫𑀲𑀗𑁆𑀕𑀸𑀳𑀓𑀸 𑀧𑀼𑀭𑀸.

𑀓𑀢𑀫𑀁 𑀘𑀢𑀼𑀩𑁆𑀩𑀺𑀥𑀁? 𑀲𑀼𑀢𑁆𑀢𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀆𑀘𑀭𑀺𑀬𑀯𑀸𑀤𑀁 𑀅𑀢𑁆𑀢𑀦𑁄𑀫𑀢𑀺𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀳𑀘𑁆𑀘𑀧𑀤𑁂𑀦 𑀔𑁄, 𑀫𑀳𑀸𑀭𑀸𑀚, 𑀭𑀲𑁂𑀦 𑀆𑀘𑀭𑀺𑀬𑀯𑀁𑀲𑁂𑀦 𑀅𑀥𑀺𑀧𑁆𑀧𑀸𑀬𑀸’’𑀢𑀺 (𑀫𑀺. 𑀧. 𑁪.𑁨.𑁩). 𑀏𑀢𑁆𑀣 𑀳𑀺 𑀆𑀳𑀘𑁆𑀘𑀧𑀤𑀦𑁆𑀢𑀺 𑀲𑀼𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀭𑀲𑁄𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀆𑀘𑀭𑀺𑀬𑀯𑀁𑀲𑁄𑀢𑀺 𑀆𑀘𑀭𑀺𑀬𑀯𑀸𑀤𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀢𑁆𑀢𑀦𑁄𑀫𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀺.

𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸. 𑀬𑁂 𑀪𑀕𑀯𑀢𑀸 𑀏𑀯𑀁 𑀯𑀼𑀢𑁆𑀢𑀸 𑁋

‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀜𑁆𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀜𑁆𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀁 𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀜𑁆𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫).

𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀧𑀜𑁆𑀘𑀳𑀺 𑀅𑀭𑀳𑀦𑁆𑀢𑀲𑀢𑁂𑀳𑀺 𑀞𑀧𑀺𑀢𑀸 𑀧𑀸𑀴𑀺𑀯𑀺𑀦𑀺𑀫𑀼𑀢𑁆𑀢𑀸 𑀑𑀓𑁆𑀓𑀦𑁆𑀢𑀯𑀺𑀦𑀺𑀘𑁆𑀙𑀬𑀧𑁆𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸𑀢𑀦𑁆𑀢𑀺.

𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀫𑀸𑀦𑁂𑀦 𑀅𑀢𑁆𑀢𑀦𑁄 𑀅𑀦𑀼𑀩𑀼𑀤𑁆𑀥𑀺𑀬𑀸 𑀦𑀬𑀕𑁆𑀕𑀸𑀳𑁂𑀦 𑀉𑀧𑀝𑁆𑀞𑀺𑀢𑀸𑀓𑀸𑀭𑀓𑀣𑀦𑀁.

𑀅𑀧𑀺𑀘 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀆𑀕𑀢𑁄 𑀲𑀩𑁆𑀩𑁄𑀧𑀺 𑀣𑁂𑀭𑀯𑀸𑀤𑁄 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫. 𑀢𑀁 𑀧𑀦 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑀦 𑀤𑀴𑁆𑀳𑀕𑁆𑀕𑀸𑀳𑀁 𑀕𑀳𑁂𑀢𑁆𑀯𑀸 𑀯𑁄𑀳𑀭𑀺𑀢𑀩𑁆𑀩𑀁, 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀣𑁂𑀦 𑀧𑀸𑀴𑀺𑀁, 𑀧𑀸𑀴𑀺𑀬𑀸 𑀘 𑀅𑀢𑁆𑀣𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁, 𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀢𑀢𑁆𑀣 𑀑𑀢𑀭𑀢𑀺 𑀘𑁂𑀯 𑀲𑀫𑁂𑀢𑀺 𑀘, 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀦𑁂𑀯 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀦 𑀕𑀳𑁂𑀢𑀩𑁆𑀩𑀸. 𑀅𑀬𑀜𑁆𑀳𑀺 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀲𑀩𑁆𑀩𑀤𑀼𑀩𑁆𑀩𑀮𑀸, 𑀅𑀢𑁆𑀢𑀦𑁄𑀫𑀢𑀺𑀢𑁄 𑀆𑀘𑀭𑀺𑀬𑀯𑀸𑀤𑁄 𑀩𑀮𑀯𑀢𑀭𑁄.

𑀆𑀘𑀭𑀺𑀬𑀯𑀸𑀤𑁄𑀧𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀢𑀢𑁆𑀣 𑀑𑀢𑀭𑀦𑁆𑀢𑁄 𑀲𑀫𑁂𑀦𑁆𑀢𑁄 𑀏𑀯 𑀕𑀳𑁂𑀢𑀩𑁆𑀩𑁄, 𑀇𑀢𑀭𑁄 𑀦 𑀕𑀳𑁂𑀢𑀩𑁆𑀩𑁄. 𑀆𑀘𑀭𑀺𑀬𑀯𑀸𑀤𑀢𑁄 𑀳𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀩𑀮𑀯𑀢𑀭𑀁.

𑀲𑀼𑀢𑁆𑀢𑀸𑀦𑀼𑀮𑁄𑀫𑀫𑁆𑀧𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀳𑀺 𑀲𑀼𑀢𑁆𑀢𑀫𑁂𑀯 𑀩𑀮𑀯𑀢𑀭𑀁. 𑀲𑀼𑀢𑁆𑀢𑀜𑁆𑀳𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀓𑀸𑀭𑀓𑀲𑀗𑁆𑀖𑀲𑀤𑀺𑀲𑀁 𑀩𑀼𑀤𑁆𑀥𑀸𑀦𑀁 𑀞𑀺𑀢𑀓𑀸𑀮𑀲𑀤𑀺𑀲𑀁. 𑀢𑀲𑁆𑀫𑀸 𑀬𑀤𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀲𑀸𑀓𑀘𑁆𑀙𑀦𑁆𑀢𑀺, 𑀲𑀓𑀯𑀸𑀤𑀻 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑀯𑀸𑀤𑀻 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁, 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀁, 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀢𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀆𑀘𑀭𑀺𑀬𑀯𑀸𑀤𑁄 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀅𑀦𑁄𑀢𑀭𑀦𑁆𑀢𑁄 𑀅𑀲𑀫𑁂𑀦𑁆𑀢𑁄 𑀘 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄, 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀢𑁂𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀔𑁂𑀧𑀁 𑀯𑀸 𑀕𑀭𑀳𑀁 𑀯𑀸 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸, 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸, 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀁 𑀧𑀸𑀴𑀺𑀆𑀕𑀢𑀁 𑀧𑀜𑁆𑀜𑀸𑀬𑀢𑀺, 𑀕𑀳𑁂𑀢𑀩𑁆𑀩𑀁, 𑀦𑁄 𑀘𑁂 𑀢𑀣𑀸 𑀧𑀜𑁆𑀜𑀸𑀬𑀢𑀺, 𑀦 𑀑𑀢𑀭𑀢𑀺 𑀦 𑀲𑀫𑁂𑀢𑀺, 𑀩𑀸𑀳𑀺𑀭𑀓𑀲𑀼𑀢𑁆𑀢𑀁 𑀯𑀸 𑀳𑁄𑀢𑀺 𑀲𑀺𑀮𑁄𑀓𑁄 𑀯𑀸 𑀅𑀜𑁆𑀜𑀁 𑀯𑀸 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭𑀕𑀼𑀴𑁆𑀳𑀯𑀺𑀦𑀬𑀯𑁂𑀤𑀮𑁆𑀮𑀸𑀤𑀻𑀦𑀁 𑀅𑀜𑁆𑀜𑀢𑀭𑀢𑁄 𑀆𑀪𑀢𑀁, 𑀦 𑀕𑀳𑁂𑀢𑀩𑁆𑀩𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀭𑀺𑀬𑀯𑀸𑀤𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑁄, 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀅𑀢𑁆𑀢𑀦𑁄𑀫𑀢𑀺 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸, 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁, 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀆𑀘𑀭𑀺𑀬𑀯𑀸𑀤𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀢𑁆𑀢𑀦𑁄𑀫𑀢𑀺𑀁. 𑀅𑀢𑁆𑀢𑀦𑁄𑀫𑀢𑀺 𑀆𑀘𑀭𑀺𑀬𑀯𑀸𑀤𑁂 𑀑𑀢𑀸𑀭𑁂𑀢𑀩𑁆𑀩𑀸. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀸. 𑀦𑁄 𑀘𑁂, 𑀦 𑀕𑀳𑁂𑀢𑀩𑁆𑀩𑀸, 𑀆𑀘𑀭𑀺𑀬𑀯𑀸𑀤𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀁. 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑀁. 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑀁. 𑀑𑀢𑀭𑀦𑁆𑀢𑀁 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀕𑀳𑁂𑀢𑀩𑁆𑀩𑀁, 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀅𑀢𑁆𑀢𑀦𑁄𑀫𑀢𑀺𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀭𑀺𑀬𑀯𑀸𑀤𑁄 𑀅𑀢𑁆𑀢𑀦𑁄𑀫𑀢𑀺𑀬𑀁 𑀑𑀢𑀸𑀭𑁂𑀢𑀩𑁆𑀩𑁄. 𑀲𑀘𑁂 𑀑𑀢𑀭𑀢𑀺 𑀲𑀫𑁂𑀢𑀺, 𑀕𑀳𑁂𑀢𑀩𑁆𑀩𑁄. 𑀇𑀢𑀭𑁄 𑀕𑀸𑀭𑀬𑁆𑀳𑀸𑀘𑀭𑀺𑀬𑀯𑀸𑀤𑁄 𑀦 𑀕𑀳𑁂𑀢𑀩𑁆𑀩𑁄, 𑀅𑀢𑁆𑀢𑀦𑁄𑀫𑀢𑀺𑀬𑀫𑁂𑀯 𑀞𑀸𑀢𑀩𑁆𑀩𑀁, 𑀅𑀢𑁆𑀢𑀦𑁄 𑀕𑀳𑀡𑀫𑁂𑀯 𑀩𑀮𑀺𑀬𑀁 𑀓𑀸𑀢𑀩𑁆𑀩𑀁. 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀘 𑀔𑁂𑀧𑁄 𑀯𑀸 𑀕𑀭𑀳𑀸 𑀯𑀸 𑀦 𑀓𑀸𑀢𑀩𑁆𑀩𑀸𑀢𑀺.

𑀅𑀣 𑀧𑀦𑀸𑀬𑀁 𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀅𑀓𑀧𑁆𑀧𑀺𑀬𑀦𑁆𑀢𑀺, 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀢𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀺, 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀓𑀧𑁆𑀧𑀺𑀬𑁂𑀯 𑀞𑀸𑀢𑀩𑁆𑀩𑀁. 𑀅𑀣 𑀧𑀭𑁄 𑀢𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑀲𑀸𑀥𑀓𑀁 𑀲𑀼𑀢𑁆𑀢𑀢𑁄 𑀩𑀳𑀼𑀁 𑀓𑀸𑀭𑀡𑀜𑁆𑀘 𑀯𑀺𑀦𑀺𑀘𑁆𑀙𑀬𑀜𑁆𑀘 𑀤𑀲𑁆𑀲𑁂𑀢𑀺, 𑀅𑀦𑁂𑀦 𑀅𑀢𑁆𑀢𑀦𑁄 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸 𑀤𑀴𑁆𑀳𑀁 𑀆𑀤𑀸𑀬 𑀦 𑀞𑀸𑀢𑀩𑁆𑀩𑀁, ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀓𑀧𑁆𑀧𑀺𑀬𑁂 𑀏𑀯 𑀞𑀸𑀢𑀩𑁆𑀩𑀁. 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑁄𑀬𑁂𑀯 𑀲𑀸𑀥𑀼, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀯𑀺𑀦𑀬𑀜𑁆𑀳𑀺 𑀧𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀘𑀸𑀭𑀡𑀁 𑀆𑀕𑀫𑁆𑀫 𑀭𑀼𑀦𑁆𑀥𑀺𑀢𑀩𑁆𑀩𑀁, 𑀕𑀸𑀴𑁆𑀳𑀁 𑀓𑀢𑁆𑀢𑀩𑁆𑀩𑀁, 𑀲𑁄𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀁, 𑀕𑀭𑀼𑀓𑀪𑀸𑀯𑁂𑀬𑁂𑀯 𑀞𑀸𑀢𑀩𑁆𑀩𑀁.

𑀅𑀣 𑀧𑀦𑀸𑀬𑀁 𑀅𑀓𑀧𑁆𑀧𑀺𑀬𑀦𑁆𑀢𑀺 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺, 𑀧𑀭𑁄 𑀓𑀧𑁆𑀧𑀺𑀬𑀦𑁆𑀢𑀺, 𑀲𑀼𑀢𑁆𑀢𑁂 𑀘 𑀲𑀼𑀢𑁆𑀢𑀸𑀦𑀼𑀮𑁄𑀫𑁂 𑀘 𑀑𑀢𑀸𑀭𑁂𑀢𑀩𑁆𑀩𑀁. 𑀲𑀘𑁂 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀲𑀘𑁂 𑀅𑀓𑀧𑁆𑀧𑀺𑀬𑀁, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣𑀸𑀬𑀁 𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀅𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀧𑀭𑁄 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀅𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣 𑀧𑀭𑁄 𑀩𑀳𑀽𑀳𑀺 𑀲𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀓𑀸𑀭𑀡𑁂𑀳𑀺 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀅𑀬𑀁 𑀓𑀸𑀭𑀡𑀁 𑀦 𑀯𑀺𑀦𑁆𑀤𑀢𑀺, 𑀓𑀧𑁆𑀧𑀺𑀬𑁂 𑀞𑀸𑀢𑀩𑁆𑀩𑀁. 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀭𑀡𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀕𑀳𑀡𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁. 𑀬𑀣𑀸 𑀘𑀸𑀬𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀓𑀧𑁆𑀧𑀺𑀬𑁂 𑀘 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀏𑀯𑀁 𑀅𑀦𑀸𑀧𑀢𑁆𑀢𑀺𑀆𑀧𑀢𑁆𑀢𑀺𑀯𑀸𑀤𑁂 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀯𑀸𑀤𑁂 𑀘, 𑀮𑀳𑀼𑀓𑀕𑀭𑀼𑀓𑀸𑀧𑀢𑁆𑀢𑀺𑀯𑀸𑀤𑁂 𑀕𑀭𑀼𑀓𑀮𑀳𑀼𑀓𑀸𑀧𑀢𑁆𑀢𑀺𑀯𑀸𑀤𑁂 𑀘𑀸𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀫𑀢𑁆𑀢𑁂𑀬𑁂𑀯 𑀳𑀺 𑀏𑀢𑁆𑀣 𑀦𑀸𑀦𑀁, 𑀬𑁄𑀚𑀦𑀸𑀦𑀬𑁂 𑀦𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀯𑀺𑀢𑁆𑀣𑀸𑀭𑀺𑀢𑀁.

𑀏𑀯𑀁 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀸𑀤𑀺𑀯𑀺𑀦𑀺𑀘𑁆𑀙𑀬𑁂 𑀉𑀧𑁆𑀧𑀦𑁆𑀦𑁂 𑀬𑁄 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀻𑀲𑀼 𑀅𑀢𑀺𑀭𑁂𑀓𑀓𑀸𑀭𑀡𑀁 𑀮𑀪𑀢𑀺, 𑀢𑀲𑁆𑀲 𑀯𑀸𑀤𑁂 𑀞𑀸𑀢𑀩𑁆𑀩𑀁, 𑀲𑀩𑁆𑀩𑀲𑁄 𑀧𑀦 𑀓𑀸𑀭𑀡𑀯𑀺𑀦𑀺𑀘𑁆𑀙𑀬𑀁 𑀅𑀮𑀪𑀦𑁆𑀢𑁂𑀦 𑀲𑀼𑀢𑁆𑀢𑀁 𑀦 𑀚𑀳𑀺𑀢𑀩𑁆𑀩𑀁, 𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀞𑀸𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀲𑀓𑀮𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀓𑁄𑀲𑀮𑁆𑀮𑀁 𑀧𑀢𑁆𑀣𑀬𑀦𑁆𑀢𑁂𑀦 𑀅𑀬𑀁 𑀘𑀢𑀼𑀩𑁆𑀩𑀺𑀥𑁄 𑀯𑀺𑀦𑀬𑁄 𑀚𑀸𑀦𑀺𑀢𑀩𑁆𑀩𑁄.

𑀇𑀫𑀜𑁆𑀘 𑀧𑀦 𑀘𑀢𑀼𑀩𑁆𑀩𑀺𑀥𑀁 𑀯𑀺𑀦𑀬𑀁 𑀜𑀢𑁆𑀯𑀸𑀧𑀺 𑀯𑀺𑀦𑀬𑀥𑀭𑁂𑀦 𑀧𑀼𑀕𑁆𑀕𑀮𑁂𑀦 𑀢𑀺𑀮𑀓𑁆𑀔𑀡𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀻𑀡𑀺 𑀳𑀺 𑀯𑀺𑀦𑀬𑀥𑀭𑀲𑁆𑀲 𑀮𑀓𑁆𑀔𑀡𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀲𑀼𑀢𑁆𑀢𑀜𑁆𑀘𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀺 𑀲𑀼𑀧𑁆𑀧𑀯𑀢𑁆𑀢𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀢𑁆𑀢𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀇𑀤𑀫𑁂𑀓𑀁 𑀮𑀓𑁆𑀔𑀡𑀁. 𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀺 𑀅𑀲𑀁𑀳𑀻𑀭𑁄𑀢𑀺 𑀇𑀤𑀁 𑀤𑀼𑀢𑀺𑀬𑀁. 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑀼𑀫𑀦𑀲𑀺𑀓𑀢𑀸 𑀲𑀽𑀧𑀥𑀸𑀭𑀺𑀢𑀸𑀢𑀺 𑀇𑀤𑀁 𑀢𑀢𑀺𑀬𑀁.

𑀢𑀢𑁆𑀣 𑀲𑀼𑀢𑁆𑀢𑀁 𑀦𑀸𑀫 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁. 𑀢𑀤𑀲𑁆𑀲 𑀲𑁆𑀯𑀸𑀕𑀢𑀁 𑀳𑁄𑀢𑀻𑀢𑀺 𑀲𑀼𑀝𑁆𑀞𑀼 𑀆𑀕𑀢𑀁. 𑀲𑀼𑀧𑁆𑀧𑀯𑀢𑁆𑀢𑀻𑀢𑀺 𑀲𑀼𑀝𑁆𑀞𑀼 𑀧𑀯𑀢𑁆𑀢𑀁 𑀧𑀕𑀼𑀡𑀁 𑀯𑀸𑀘𑀼𑀕𑁆𑀕𑀢𑀁. 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀧𑀸𑀴𑀺𑀢𑁄 𑀘 𑀧𑀭𑀺𑀧𑀼𑀘𑁆𑀙𑀢𑁄 𑀘 𑀅𑀝𑁆𑀞𑀓𑀣𑀸𑀢𑁄 𑀘 𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀳𑁄𑀢𑀺 𑀓𑀗𑁆𑀔𑀸𑀙𑁂𑀤𑀦𑀁 𑀓𑀢𑁆𑀯𑀸 𑀉𑀕𑁆𑀕𑀳𑀺𑀢𑀁. 𑀯𑀺𑀦𑀬𑁂 𑀔𑁄 𑀧𑀦 𑀞𑀺𑀢𑁄 𑀳𑁄𑀢𑀻𑀢𑀺 𑀯𑀺𑀦𑀬𑁂 𑀮𑀚𑁆𑀚𑀺𑀪𑀸𑀯𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀮𑀚𑁆𑀚𑀻 𑀳𑀺 𑀩𑀳𑀼𑀲𑁆𑀲𑀼𑀢𑁄𑀧𑀺 𑀲𑀫𑀸𑀦𑁄 𑀮𑀸𑀪𑀕𑀭𑀼𑀓𑀢𑀸𑀬 𑀢𑀦𑁆𑀢𑀺𑀁 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀤𑀻𑀧𑁂𑀢𑁆𑀯𑀸 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀉𑀧𑀤𑁆𑀤𑀯𑀁 𑀓𑀭𑁄𑀢𑀺, 𑀲𑀗𑁆𑀖𑀪𑁂𑀤𑀫𑁆𑀧𑀺 𑀲𑀗𑁆𑀖𑀭𑀸𑀚𑀺𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀺. 𑀮𑀚𑁆𑀚𑀻 𑀧𑀦 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀚𑀻𑀯𑀺𑀢𑀳𑁂𑀢𑀼𑀧𑀺 𑀢𑀦𑁆𑀢𑀺𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀥𑀫𑁆𑀫𑀫𑁂𑀯 𑀯𑀺𑀦𑀬𑀫𑁂𑀯 𑀤𑀻𑀧𑁂𑀢𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀕𑀭𑀼𑀓𑀁 𑀓𑀢𑁆𑀯𑀸 𑀞𑀧𑁂𑀢𑀺. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀫𑀳𑀸𑀣𑁂𑀭𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀼𑀁 ‘‘𑀅𑀦𑀸𑀕𑀢𑁂 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺, 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀺, 𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁪𑁫). 𑀏𑀯𑀁 𑀬𑁄 𑀮𑀚𑁆𑀚𑀻, 𑀲𑁄 𑀯𑀺𑀦𑀬𑀁 𑀅𑀯𑀺𑀚𑀳𑀦𑁆𑀢𑁄 𑀅𑀯𑁄𑀓𑁆𑀓𑀫𑀦𑁆𑀢𑁄 𑀮𑀚𑁆𑀚𑀺𑀪𑀸𑀯𑁂𑀦𑁂𑀯 𑀯𑀺𑀦𑀬𑁂 𑀞𑀺𑀢𑁄 𑀳𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺.

𑀅𑀲𑀁𑀳𑀻𑀭𑁄𑀢𑀺 𑀲𑀁𑀳𑀻𑀭𑁄 𑀦𑀸𑀫 𑀬𑁄 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀳𑁂𑀝𑁆𑀞𑀢𑁄 𑀯𑀸 𑀉𑀧𑀭𑀺𑀢𑁄 𑀯𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀯𑀺𑀢𑁆𑀣𑀼𑀦𑀢𑀺 𑀯𑀺𑀧𑁆𑀨𑀦𑁆𑀤𑀢𑀺 𑀲𑀦𑁆𑀢𑀺𑀝𑁆𑀞𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀁 𑀬𑀁 𑀧𑀭𑁂𑀦 𑀯𑀼𑀘𑁆𑀘𑀢𑀺, 𑀢𑀁 𑀢𑀁 𑀅𑀦𑀼𑀚𑀸𑀦𑀸𑀢𑀺, 𑀲𑀓𑀯𑀸𑀤𑀁 𑀙𑀟𑁆𑀟𑁂𑀢𑁆𑀯𑀸 𑀧𑀭𑀯𑀸𑀤𑀁 𑀕𑀡𑁆𑀳𑀸𑀢𑀺. 𑀬𑁄 𑀧𑀦 𑀧𑀸𑀴𑀺𑀬𑀁 𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀯𑀸 𑀧𑀤𑀧𑀝𑀺𑀧𑀸𑀝𑀺𑀬𑀸 𑀯𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀦 𑀯𑀺𑀢𑁆𑀣𑀼𑀦𑀢𑀺 𑀦 𑀯𑀺𑀧𑁆𑀨𑀦𑁆𑀤𑀢𑀺, 𑀏𑀓𑁂𑀓𑀮𑁄𑀫𑀁 𑀲𑀡𑁆𑀟𑀸𑀲𑁂𑀦 𑀕𑀡𑁆𑀳𑀦𑁆𑀢𑁄 𑀯𑀺𑀬 ‘‘𑀏𑀯𑀁 𑀫𑀬𑀁 𑀯𑀤𑀸𑀫, 𑀏𑀯𑀁 𑀦𑁄 𑀆𑀘𑀭𑀺𑀬𑀸 𑀯𑀤𑀦𑁆𑀢𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀬𑀫𑁆𑀳𑀺 𑀧𑀸𑀴𑀺 𑀘 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄 𑀘 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀅𑀕𑀘𑁆𑀙𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀅𑀲𑀁𑀳𑀻𑀭𑁄’’𑀢𑀺.

𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀻𑀢𑀺 𑀣𑁂𑀭𑀧𑀭𑀫𑁆𑀧𑀭𑀸 𑀯𑀁𑀲𑀧𑀭𑀫𑁆𑀧𑀭𑀸 𑀅𑀲𑁆𑀲 𑀲𑀼𑀝𑁆𑀞𑀼 𑀕𑀳𑀺𑀢𑀸 𑀳𑁄𑀢𑀺. 𑀲𑀼𑀫𑀦𑀲𑀺𑀓𑀢𑀸𑀢𑀺 𑀲𑀼𑀝𑁆𑀞𑀼 𑀫𑀦𑀲𑀺𑀓𑀢𑀸, 𑀆𑀯𑀚𑁆𑀚𑀺𑀢𑀫𑀢𑁆𑀢𑁂 𑀉𑀚𑁆𑀚𑀮𑀺𑀢𑀧𑀤𑀻𑀧𑁄 𑀯𑀺𑀬 𑀳𑁄𑀢𑀺. 𑀲𑀽𑀧𑀥𑀸𑀭𑀺𑀢𑀸𑀢𑀺 𑀲𑀼𑀝𑁆𑀞𑀼 𑀉𑀧𑀥𑀸𑀭𑀺𑀢𑀸 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺𑀢𑁄 𑀅𑀢𑁆𑀣𑀢𑁄 𑀓𑀸𑀭𑀡𑀢𑁄 𑀘 𑀉𑀧𑀥𑀸𑀭𑀺𑀢𑀸. 𑀅𑀢𑁆𑀢𑀦𑁄𑀫𑀢𑀺𑀁 𑀧𑀳𑀸𑀬 𑀆𑀘𑀭𑀺𑀬𑀲𑀼𑀤𑁆𑀥𑀺𑀬𑀸 𑀯𑀢𑁆𑀢𑀸 𑀳𑁄𑀢𑀺, ‘‘𑀫𑀬𑁆𑀳𑀁 𑀆𑀘𑀭𑀺𑀬𑁄 𑀅𑀲𑀼𑀓𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺, 𑀲𑁄 𑀅𑀲𑀼𑀓𑀲𑁆𑀲𑀸’’𑀢𑀺 𑀏𑀯𑀁 𑀲𑀩𑁆𑀩𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀣𑁂𑀭𑀯𑀸𑀤𑀗𑁆𑀕𑀁 𑀳𑀭𑀺𑀢𑁆𑀯𑀸 𑀬𑀸𑀯 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀻𑀢𑀺 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺, 𑀢𑀢𑁄𑀧𑀺 𑀆𑀳𑀭𑀺𑀢𑁆𑀯𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺, 𑀤𑀸𑀲𑀓𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲, 𑀲𑁄𑀡𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀤𑀸𑀲𑀓𑀢𑁆𑀣𑁂𑀭𑀲𑁆𑀲, 𑀲𑀺𑀕𑁆𑀕𑀯𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑁄𑀡𑀢𑁆𑀣𑁂𑀭𑀲𑁆𑀲, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀲𑀺𑀕𑁆𑀕𑀯𑀢𑁆𑀣𑁂𑀭𑀲𑁆𑀲 𑀘𑀡𑁆𑀟𑀯𑀚𑁆𑀚𑀺𑀢𑁆𑀣𑁂𑀭𑀲𑁆𑀲 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀁 𑀆𑀘𑀭𑀺𑀬𑀧𑀭𑀫𑁆𑀧𑀭𑀁 𑀣𑁂𑀭𑀯𑀸𑀤𑀗𑁆𑀕𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀏𑀯𑀁 𑀉𑀕𑁆𑀕𑀳𑀺𑀢𑀸 𑀳𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺. 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀅𑀯𑀲𑁆𑀲𑀁 𑀤𑁆𑀯𑁂 𑀢𑀬𑁄 𑀧𑀭𑀺𑀯𑀝𑁆𑀝𑀸 𑀉𑀕𑁆𑀕𑀳𑁂𑀢𑀩𑁆𑀩𑀸. 𑀲𑀩𑁆𑀩𑀧𑀘𑁆𑀙𑀺𑀫𑁂𑀦 𑀳𑀺 𑀦𑀬𑁂𑀦 𑀬𑀣𑀸 𑀆𑀘𑀭𑀺𑀬𑁄 𑀆𑀘𑀭𑀺𑀬𑀸𑀘𑀭𑀺𑀬𑁄 𑀘 𑀧𑀸𑀴𑀺𑀜𑁆𑀘 𑀧𑀭𑀺𑀧𑀼𑀘𑁆𑀙𑀜𑁆𑀘 𑀯𑀤𑀦𑁆𑀢𑀺, 𑀢𑀣𑀸 𑀜𑀸𑀢𑀼𑀁 𑀯𑀝𑁆𑀝𑀢𑀺.

𑀇𑀫𑁂𑀳𑀺 𑀘 𑀧𑀦 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀯𑀺𑀦𑀬𑀥𑀭𑁂𑀦 𑀯𑀢𑁆𑀣𑀼𑀯𑀺𑀦𑀺𑀘𑁆𑀙𑀬𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑁄𑀤𑀓𑁂𑀦 𑀘 𑀘𑀼𑀤𑀺𑀢𑀓𑁂𑀦 𑀘 𑀯𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑁂 𑀲𑀳𑀲𑀸 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀙 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑀩𑁆𑀩𑀸𑀦𑀺. 𑀓𑀢𑀫𑀸𑀦𑀺 𑀙? 𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁, 𑀫𑀸𑀢𑀺𑀓𑀸 𑀑𑀮𑁄𑀓𑁂𑀢𑀩𑁆𑀩𑀸, 𑀧𑀤𑀪𑀸𑀚𑀦𑀻𑀬𑀁 𑀑𑀮𑁄𑀓𑁂𑀢𑀩𑁆𑀩𑀁, 𑀢𑀺𑀓𑀧𑀭𑀺𑀘𑁆𑀙𑁂𑀤𑁄 𑀑𑀮𑁄𑀓𑁂𑀢𑀩𑁆𑀩𑁄, 𑀅𑀦𑁆𑀢𑀭𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑀩𑁆𑀩𑀸, 𑀅𑀦𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑀩𑁆𑀩𑀸𑀢𑀺.

𑀯𑀢𑁆𑀣𑀼𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 𑀳𑀺 ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁, 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁧𑁭) 𑀏𑀯𑀁 𑀏𑀓𑀘𑁆𑀘𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀫𑀸𑀢𑀺𑀓𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁩) 𑀦𑀬𑁂𑀦 𑀧𑀜𑁆𑀘𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀧𑀤𑀪𑀸𑀚𑀦𑀻𑀬𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀅𑀓𑁆𑀔𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀬𑁂𑀪𑀼𑀬𑁆𑀬𑁂𑀦 𑀔𑀬𑀺𑀢𑁂 𑀲𑀭𑀻𑀭𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁯 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀦𑀬𑁂𑀦 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀧𑀤𑀪𑀸𑀚𑀦𑀻𑀬𑀢𑁄 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀢𑀺𑀓𑀧𑀭𑀺𑀘𑁆𑀙𑁂𑀤𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 𑀢𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀁 𑀯𑀸 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀸 𑀢𑀺𑀓𑀤𑀼𑀓𑁆𑀓𑀝𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀆𑀧𑀢𑁆𑀢𑀺𑀁 𑀢𑀺𑀓𑀧𑀭𑀺𑀘𑁆𑀙𑁂𑀤𑁂 𑀧𑀲𑁆𑀲𑀢𑀺, 𑀲𑁄 𑀢𑀢𑁄 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀧𑀝𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁫𑁫) 𑀏𑀯𑀁 𑀬𑀸 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀅𑀦𑁆𑀢𑀭𑀸𑀧𑀢𑁆𑀢𑀺 𑀳𑁄𑀢𑀺, 𑀢𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀅𑀦𑀸𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀼 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀅𑀣𑁂𑀬𑁆𑀬𑀘𑀺𑀢𑁆𑀢𑀲𑁆𑀲, 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲, 𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑀲𑁆𑀲, 𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁭𑁨, 𑁧𑁩𑁬, 𑁧𑁮𑁦, 𑁨𑁨𑁫, 𑁨𑁬𑁩 𑀣𑁄𑀓𑀁 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦𑀺𑀤𑁆𑀤𑀺𑀝𑁆𑀞𑀁 𑀅𑀦𑀸𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀼𑀢𑁆𑀢𑀁 𑀆𑀦𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺.

𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀢𑀼𑀩𑁆𑀩𑀺𑀥𑀯𑀺𑀦𑀬𑀓𑁄𑀯𑀺𑀤𑁄 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀲𑁆𑀲𑀢𑀺, 𑀢𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑁄 𑀩𑀼𑀤𑁆𑀥𑁂𑀦 𑀲𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀢𑀲𑀤𑀺𑀲𑁄 𑀳𑁄𑀢𑀺. 𑀢𑀁 𑀘𑁂 𑀏𑀯𑀁 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀁 𑀪𑀺𑀓𑁆𑀔𑀼𑀁 𑀓𑁄𑀘𑀺 𑀓𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄 𑀪𑀺𑀓𑁆𑀔𑀼 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑁂𑀬𑁆𑀬, 𑀢𑁂𑀦 𑀲𑀸𑀥𑀼𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀘𑁂 𑀅𑀦𑀸𑀧𑀢𑁆𑀢𑀺 𑀳𑁄𑀢𑀺, ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀆𑀧𑀢𑁆𑀢𑀺 𑀳𑁄𑀢𑀺, 𑀲𑀸 𑀤𑁂𑀲𑀦𑀸𑀕𑀸𑀫𑀺𑀦𑀻 𑀘𑁂, ‘‘𑀤𑁂𑀲𑀦𑀸𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀘𑁂, ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀣𑀲𑁆𑀲 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 𑀤𑀺𑀲𑁆𑀲𑀢𑀺, ‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀫𑁂𑀣𑀼𑀦𑀥𑀫𑁆𑀫𑀯𑀻𑀢𑀺𑀓𑁆𑀓𑀫𑁄 𑀳𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀻𑀢𑀺𑀓𑁆𑀓𑀫𑁄 𑀘 𑀑𑀴𑀸𑀭𑀺𑀓𑁄, 𑀅𑀤𑀺𑀦𑁆𑀦𑀸𑀤𑀸𑀦𑀫𑀦𑀉𑀲𑁆𑀲𑀯𑀺𑀕𑁆𑀕𑀳𑀯𑀻𑀢𑀺𑀓𑁆𑀓𑀫𑀸 𑀧𑀦 𑀲𑀼𑀔𑀼𑀫𑀸 𑀘𑀺𑀢𑁆𑀢𑀮𑀳𑀼𑀓𑀸. 𑀢𑁂 𑀲𑀼𑀔𑀼𑀫𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀲𑀼𑀔𑀼𑀫𑁂𑀦 𑀭𑀓𑁆𑀔𑀢𑀺, 𑀢𑀲𑁆𑀫𑀸 𑀯𑀺𑀲𑁂𑀲𑁂𑀦 𑀢𑀁𑀯𑀢𑁆𑀣𑀼𑀓𑀁 𑀓𑀼𑀓𑁆𑀓𑀼𑀘𑁆𑀘𑀁 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀆𑀧𑀢𑁆𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀘𑀲𑁆𑀲 𑀆𑀘𑀭𑀺𑀬𑁄 𑀥𑀭𑀢𑀺, 𑀢𑀢𑁄 𑀢𑁂𑀦 𑀲𑁄 𑀪𑀺𑀓𑁆𑀔𑀼 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀁 𑀧𑀼𑀘𑁆𑀙𑀸’’𑀢𑀺 𑀧𑁂𑀲𑁂𑀢𑀩𑁆𑀩𑁄. 𑀲𑀘𑁂 𑀲𑁄 𑀧𑀼𑀦 𑀆𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀲𑀼𑀢𑁆𑀢𑀢𑁄 𑀦𑀬𑀢𑁄 𑀑𑀮𑁄𑀓𑁂𑀢𑁆𑀯𑀸 ‘𑀲𑀢𑁂𑀓𑀺𑀘𑁆𑀙𑁄’𑀢𑀺 𑀫𑀁 𑀆𑀳𑀸’’𑀢𑀺 𑀯𑀤𑀢𑀺, 𑀢𑀢𑁄 𑀢𑁂𑀦 𑀲𑁄 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀬𑀁 𑀆𑀘𑀭𑀺𑀬𑁄 𑀪𑀡𑀢𑀺, 𑀢𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀧𑀦𑀲𑁆𑀲 𑀆𑀘𑀭𑀺𑀬𑁄 𑀦𑀢𑁆𑀣𑀺, 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄 𑀧𑀦 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀩𑁆𑀩𑁄 ‘‘𑀅𑀫𑁆𑀳𑁂𑀳𑀺 𑀲𑀳 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄 𑀕𑀡𑀧𑀸𑀫𑁄𑀓𑁆𑀔𑁄, 𑀢𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺. 𑀢𑁂𑀦𑀧𑀺 ‘‘𑀲𑀢𑁂𑀓𑀺𑀘𑁆𑀙𑁄’’𑀢𑀺 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀢𑀲𑁆𑀲 𑀲𑀤𑁆𑀥𑀺𑀁 𑀉𑀕𑁆𑀕𑀳𑀺𑀢𑀢𑁆𑀣𑁂𑀭𑁄𑀧𑀺 𑀦𑀢𑁆𑀣𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀡𑁆𑀟𑀺𑀢𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀩𑁆𑀩𑁄 ‘‘𑀅𑀲𑀼𑀓𑀤𑀳𑀭𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸’’𑀢𑀺. 𑀢𑁂𑀦𑀧𑀺 ‘‘𑀲𑀢𑁂𑀓𑀺𑀘𑁆𑀙𑁄’’𑀢𑀺 𑀯𑀺𑀦𑀺𑀘𑁆𑀙𑀺𑀢𑁂 ‘‘𑀲𑀸𑀥𑀼 𑀲𑀼𑀝𑁆𑀞𑀼 𑀢𑀲𑁆𑀲 𑀯𑀘𑀦𑀁 𑀓𑀭𑁄𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀣 𑀤𑀳𑀭𑀲𑁆𑀲𑀧𑀺 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸𑀯 𑀉𑀧𑀝𑁆𑀞𑀸𑀢𑀺, 𑀢𑁂𑀦𑀧𑀺 ‘‘𑀧𑀸𑀭𑀸𑀚𑀺𑀓𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀤𑀼𑀮𑁆𑀮𑀪𑁄 𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀢𑀢𑁄 𑀤𑀼𑀮𑁆𑀮𑀪𑀢𑀭𑀸 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑁄 ‘‘𑀯𑀺𑀯𑀺𑀢𑁆𑀢𑀁 𑀑𑀓𑀸𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀮𑀸𑀦𑀺 𑀯𑀺𑀲𑁄𑀥𑁂𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀢𑀸𑀯 𑀫𑀦𑀲𑀺𑀓𑀭𑁄𑀳𑀻’’𑀢𑀺. 𑀲𑀘𑁂 𑀢𑀲𑁆𑀲 𑀅𑀭𑁄𑀕𑀁 𑀲𑀻𑀮𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀖𑀝𑀬𑀢𑀺, 𑀲𑀗𑁆𑀔𑀸𑀭𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀉𑀧𑀘𑀸𑀭𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀯𑀺𑀬 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀤𑀺𑀯𑀲𑀁 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀲𑁄 𑀤𑀺𑀯𑀲𑀸𑀢𑀺𑀓𑁆𑀓𑀫𑁂 𑀉𑀧𑀝𑁆𑀞𑀸𑀦𑀁 𑀆𑀕𑀢𑁄 𑀏𑀯𑀁 𑀯𑀢𑁆𑀢𑀩𑁆𑀩𑁄 ‘‘𑀓𑀻𑀤𑀺𑀲𑀸 𑀢𑁂 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀻’’𑀢𑀺. 𑀆𑀭𑁄𑀘𑀺𑀢𑀸𑀬 𑀘 𑀘𑀺𑀢𑁆𑀢𑀧𑀯𑀢𑁆𑀢𑀺𑀬𑀸 𑀯𑀢𑁆𑀢𑀩𑁆𑀩𑁄 ‘‘𑀧𑀩𑁆𑀩𑀚𑁆𑀚𑀸 𑀦𑀸𑀫 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸𑀬, 𑀅𑀧𑁆𑀧𑀫𑀢𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀭𑁄𑀳𑀻’’𑀢𑀺.

𑀬𑀲𑁆𑀲 𑀧𑀦 𑀲𑀻𑀮𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀖𑀝𑀬𑀢𑀺, 𑀧𑀢𑁄𑀤𑀸𑀪𑀺𑀢𑀼𑀦𑁆𑀦𑀁 𑀯𑀺𑀬 𑀘𑀺𑀢𑁆𑀢𑀁 𑀯𑀺𑀓𑀫𑁆𑀧𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀕𑁆𑀕𑀺𑀦𑀸 𑀟𑀬𑁆𑀳𑀢𑀺, 𑀢𑀢𑁆𑀢𑀧𑀸𑀲𑀸𑀡𑁂 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀢𑀗𑁆𑀔𑀡𑁂𑀬𑁂𑀯 𑀯𑀼𑀝𑁆𑀞𑀸𑀢𑀺. 𑀲𑁄 𑀆𑀕𑀢𑁄 ‘‘𑀓𑀸 𑀢𑁂 𑀘𑀺𑀢𑁆𑀢𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀆𑀭𑁄𑀘𑀺𑀢𑀸𑀬 𑀘𑀺𑀢𑁆𑀢𑀧𑀯𑀢𑁆𑀢𑀺𑀬𑀸 ‘‘𑀦𑀢𑁆𑀣𑀺 𑀮𑁄𑀓𑁂 𑀭𑀳𑁄 𑀦𑀸𑀫 𑀧𑀸𑀧𑀓𑀫𑁆𑀫𑀁 𑀧𑀓𑀼𑀩𑁆𑀩𑀢𑁄. 𑀲𑀩𑁆𑀩𑀧𑀞𑀫𑀜𑁆𑀳𑀺 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑀸 𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀆𑀭𑀓𑁆𑀔𑀤𑁂𑀯𑀢𑀸 𑀧𑀭𑀘𑀺𑀢𑁆𑀢𑀯𑀺𑀤𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑀸 𑀘 𑀤𑁂𑀯𑀢𑀸 𑀚𑀸𑀦𑀦𑁆𑀢𑀺, 𑀢𑁆𑀯𑀁𑀬𑁂𑀯 𑀤𑀸𑀦𑀺 𑀢𑀯 𑀲𑁄𑀢𑁆𑀣𑀺𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀏𑀯𑀁 𑀓𑀢𑀯𑀻𑀢𑀺𑀓𑁆𑀓𑀫𑁂𑀦𑁂𑀯 𑀪𑀺𑀓𑁆𑀔𑀼𑀦𑀸 𑀲𑀬𑀫𑁂𑀯 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑀺𑀢𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁨𑁩𑁫. 𑀇𑀤𑀸𑀦𑀺 𑀬𑀸 𑀲𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑀸 𑀘𑁄𑀤𑀦𑀸, 𑀢𑀲𑁆𑀲𑀸𑀬𑁂𑀯 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀚𑀸𑀦𑀦𑀢𑁆𑀣𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀤𑀻𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁, 𑀘𑁄𑀤𑀦𑀸𑀬 𑀓𑁄 𑀆𑀤𑀺, 𑀓𑀺𑀁 𑀫𑀚𑁆𑀛𑁂, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁? 𑀘𑁄𑀤𑀦𑀸𑀬 ‘‘𑀅𑀳𑀁 𑀢𑀁 𑀯𑀢𑁆𑀢𑀼𑀓𑀸𑀫𑁄, 𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀑𑀓𑀸𑀲’’𑀦𑁆𑀢𑀺 𑀏𑀯𑀁 𑀑𑀓𑀸𑀲𑀓𑀫𑁆𑀫𑀁 𑀆𑀤𑀺. 𑀑𑀢𑀺𑀡𑁆𑀡𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀫𑀚𑁆𑀛𑁂. 𑀆𑀧𑀢𑁆𑀢𑀺𑀬𑀁 𑀯𑀸 𑀅𑀦𑀸𑀧𑀢𑁆𑀢𑀺𑀬𑀁 𑀯𑀸 𑀧𑀢𑀺𑀝𑁆𑀞𑀸𑀧𑀦𑁂𑀦 𑀲𑀫𑀣𑁄 𑀧𑀭𑀺𑀬𑁄𑀲𑀸𑀦𑀁.

𑀘𑁄𑀤𑀦𑀸𑀬 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀯𑀢𑁆𑀣𑀽𑀦𑀺, 𑀓𑀢𑀺 𑀪𑀽𑀫𑀺𑀬𑁄? 𑀘𑁄𑀤𑀦𑀸𑀬 𑀤𑁆𑀯𑁂 𑀫𑀽𑀮𑀸𑀦𑀺 𑀲𑀫𑀽𑀮𑀺𑀓𑀸 𑀯𑀸 𑀅𑀫𑀽𑀮𑀺𑀓𑀸 𑀯𑀸. 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀤𑀺𑀝𑁆𑀞𑀁 𑀲𑀼𑀢𑀁 𑀧𑀭𑀺𑀲𑀗𑁆𑀓𑀺𑀢𑀁. 𑀧𑀜𑁆𑀘 𑀪𑀽𑀫𑀺𑀬𑁄 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺, 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺. 𑀇𑀫𑀸𑀬 𑀘 𑀧𑀦 𑀘𑁄𑀤𑀦𑀸𑀬 𑀘𑁄𑀤𑀓𑁂𑀦 𑀧𑀼𑀕𑁆𑀕𑀮𑁂𑀦 ‘‘𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 𑀦𑀼 𑀔𑁄𑀫𑁆𑀳𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁪𑁩𑁬) 𑀦𑀬𑁂𑀦 𑀉𑀧𑀸𑀮𑀺𑀧𑀜𑁆𑀘𑀓𑁂𑀲𑀼 𑀯𑀼𑀢𑁆𑀢𑁂𑀲𑀼 𑀧𑀦𑁆𑀦𑀭𑀲𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁. 𑀘𑀼𑀤𑀺𑀢𑀓𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸𑀢𑀺.

𑀅𑀦𑀼𑀯𑀺𑀚𑁆𑀚𑀓𑁂𑀦 (𑀧𑀭𑀺. 𑁩𑁬𑁦) 𑀘 𑀘𑁄𑀤𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀲𑀺, 𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀺, 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀲𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀲𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀲𑀻’’𑀢𑀺. 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘‘𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀫𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀫𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀘𑁄𑀤𑁂𑀫𑀻’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀚𑀸𑀦𑀸𑀲𑀺 𑀧𑀦𑀸𑀬𑀲𑁆𑀫𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀲𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀲𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘‘𑀚𑀸𑀦𑀸𑀫𑀺 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀁, 𑀚𑀸𑀦𑀸𑀫𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺’’𑀦𑁆𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀓𑀢𑀫𑀸 𑀧𑀦𑀸𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺, 𑀓𑀢𑀫𑀸 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺? 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀅𑀬𑀁 𑀲𑀻𑀮𑀯𑀺𑀧𑀢𑁆𑀢𑀺. 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢𑀁, 𑀅𑀬𑀁 𑀆𑀘𑀸𑀭𑀯𑀺𑀧𑀢𑁆𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺, 𑀅𑀬𑀁 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻’’𑀢𑀺.

𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀘𑁄𑀤𑁂𑀲𑀺, 𑀤𑀺𑀝𑁆𑀞𑁂𑀦 𑀯𑀸 𑀘𑁄𑀤𑁂𑀲𑀺, 𑀲𑀼𑀢𑁂𑀦 𑀯𑀸 𑀘𑁄𑀤𑁂𑀲𑀺, 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀘𑁄𑀤𑁂𑀲𑀻’’𑀢𑀺. 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘‘𑀤𑀺𑀝𑁆𑀞𑁂𑀦 𑀯𑀸 𑀘𑁄𑀤𑁂𑀫𑀺, 𑀲𑀼𑀢𑁂𑀦 𑀯𑀸 𑀘𑁄𑀤𑁂𑀫𑀺, 𑀧𑀭𑀺𑀲𑀗𑁆𑀓𑀸𑀬 𑀯𑀸 𑀘𑁄𑀤𑁂𑀫𑀻’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀤𑀺𑀝𑁆𑀞𑁂𑀦 𑀘𑁄𑀤𑁂𑀲𑀺, 𑀓𑀺𑀁 𑀢𑁂 𑀤𑀺𑀝𑁆𑀞𑀁, 𑀓𑀺𑀦𑁆𑀢𑀺 𑀢𑁂 𑀤𑀺𑀝𑁆𑀞𑀁, 𑀓𑀤𑀸 𑀢𑁂 𑀤𑀺𑀝𑁆𑀞𑀁, 𑀓𑀢𑁆𑀣 𑀢𑁂 𑀤𑀺𑀝𑁆𑀞𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄, 𑀓𑀢𑁆𑀣 𑀘𑀸𑀬𑀁 𑀪𑀺𑀓𑁆𑀔𑀼 𑀅𑀳𑁄𑀲𑀺, 𑀓𑀢𑁆𑀣 𑀘 𑀢𑁆𑀯𑀁 𑀓𑀭𑁄𑀲𑀺, 𑀓𑀺𑀜𑁆𑀘 𑀢𑁆𑀯𑀁 𑀓𑀭𑁄𑀲𑀺, 𑀓𑀺𑀁 𑀅𑀬𑀁 𑀪𑀺𑀓𑁆𑀔𑀼 𑀓𑀭𑁄𑀢𑀻’’𑀢𑀺?

𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀤𑀺𑀝𑁆𑀞𑁂𑀦 𑀘𑁄𑀤𑁂𑀫𑀺, 𑀅𑀧𑀺𑀘 𑀲𑀼𑀢𑁂𑀦 𑀘𑁄𑀤𑁂𑀫𑀻’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀲𑀼𑀢𑁂𑀦 𑀘𑁄𑀤𑁂𑀲𑀺, 𑀓𑀺𑀁 𑀢𑁂 𑀲𑀼𑀢𑀁, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁, 𑀓𑀤𑀸 𑀢𑁂 𑀲𑀼𑀢𑀁, 𑀓𑀢𑁆𑀣 𑀢𑁂 𑀲𑀼𑀢𑀁, 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀲𑀼𑀢𑀁, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀼𑀢𑀁, 𑀲𑀸𑀫𑀡𑁂𑀭𑀲𑁆𑀲 𑀲𑀼𑀢𑀁, 𑀲𑀸𑀫𑀡𑁂𑀭𑀺𑀬𑀸 𑀲𑀼𑀢𑀁, 𑀉𑀧𑀸𑀲𑀓𑀲𑁆𑀲 𑀲𑀼𑀢𑀁, 𑀉𑀧𑀸𑀲𑀺𑀓𑀸𑀬 𑀲𑀼𑀢𑀁, 𑀭𑀸𑀚𑀽𑀦𑀁 𑀲𑀼𑀢𑀁, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀸𑀦𑀁 𑀲𑀼𑀢𑀁, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢’’𑀦𑁆𑀢𑀺.

𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀲𑀼𑀢𑁂𑀦 𑀘𑁄𑀤𑁂𑀫𑀺, 𑀅𑀧𑀺𑀘 𑀧𑀭𑀺𑀲𑀗𑁆𑀓𑀸𑀬 𑀘𑁄𑀤𑁂𑀫𑀻’’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 ‘‘𑀬𑀁 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀭𑀺𑀲𑀗𑁆𑀓𑀸𑀬 𑀘𑁄𑀤𑁂𑀲𑀺, 𑀓𑀺𑀁 𑀧𑀭𑀺𑀲𑀗𑁆𑀓𑀲𑀺, 𑀓𑀺𑀦𑁆𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀓𑀤𑀸 𑀧𑀭𑀺𑀲𑀗𑁆𑀓𑀲𑀺, 𑀓𑀢𑁆𑀣 𑀧𑀭𑀺𑀲𑀗𑁆𑀓𑀲𑀺? 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀲𑀼𑀢𑁆𑀯𑀸…𑀧𑁂… 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀁 𑀲𑀼𑀢𑁆𑀯𑀸 𑀧𑀭𑀺𑀲𑀗𑁆𑀓𑀲𑀻’’𑀢𑀺.

𑀤𑀺𑀝𑁆𑀞𑀁 𑀤𑀺𑀝𑁆𑀞𑁂𑀦 𑀲𑀫𑁂𑀢𑀺, 𑀤𑀺𑀝𑁆𑀞𑁂𑀦 𑀲𑀁𑀲𑀦𑁆𑀤𑀢𑁂 𑀤𑀺𑀝𑁆𑀞𑀁;

𑀤𑀺𑀝𑁆𑀞𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺, 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬, 𑀓𑀸𑀢𑀩𑁆𑀩𑁄 𑀢𑁂𑀦𑀼𑀧𑁄𑀲𑀣𑁄.

𑀲𑀼𑀢𑀁 𑀲𑀼𑀢𑁂𑀦 𑀲𑀫𑁂𑀢𑀺, 𑀲𑀼𑀢𑁂𑀦 𑀲𑀁𑀲𑀦𑁆𑀤𑀢𑁂 𑀲𑀼𑀢𑀁;

𑀲𑀼𑀢𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺, 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬, 𑀓𑀸𑀢𑀩𑁆𑀩𑁄 𑀢𑁂𑀦𑀼𑀧𑁄𑀲𑀣𑁄.

𑀫𑀼𑀢𑀁 𑀫𑀼𑀢𑁂𑀦 𑀲𑀫𑁂𑀢𑀺, 𑀫𑀼𑀢𑁂𑀦 𑀲𑀁𑀲𑀦𑁆𑀤𑀢𑁂 𑀫𑀼𑀢𑀁;

𑀫𑀼𑀢𑀁 𑀧𑀝𑀺𑀘𑁆𑀘 𑀦 𑀉𑀧𑁂𑀢𑀺, 𑀅𑀲𑀼𑀤𑁆𑀥𑀧𑀭𑀺𑀲𑀗𑁆𑀓𑀺𑀢𑁄;

𑀲𑁄 𑀧𑀼𑀕𑁆𑀕𑀮𑁄 𑀧𑀝𑀺𑀜𑁆𑀜𑀸𑀬, 𑀓𑀸𑀢𑀩𑁆𑀩𑁄 𑀢𑁂𑀦𑀼𑀧𑁄𑀲𑀣𑁄.

𑀧𑀝𑀺𑀜𑁆𑀜𑀸 𑀮𑀚𑁆𑀚𑀻𑀲𑀼 𑀓𑀢𑀸, 𑀅𑀮𑀚𑁆𑀚𑀻𑀲𑀼 𑀏𑀯𑀁 𑀦 𑀯𑀺𑀚𑁆𑀚𑀢𑀺;

𑀩𑀳𑀼𑀫𑁆𑀧𑀺 𑀅𑀮𑀚𑁆𑀚𑀻 𑀪𑀸𑀲𑁂𑀬𑁆𑀬, 𑀯𑀢𑁆𑀢𑀸𑀦𑀼𑀲𑀦𑁆𑀥𑀺𑀢𑁂𑀦 𑀓𑀸𑀭𑀬𑁂𑀢𑀺. (𑀧𑀭𑀺. 𑁩𑁫𑁯);

𑀅𑀧𑀺𑀘𑁂𑀢𑁆𑀣 𑀲𑀗𑁆𑀕𑀸𑀫𑀸𑀯𑀘𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀦𑀻𑀘𑀘𑀺𑀢𑁆𑀢𑁂𑀦 𑀲𑀗𑁆𑀖𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀭𑀚𑁄𑀳𑀭𑀡𑀲𑀫𑁂𑀦 𑀘𑀺𑀢𑁆𑀢𑁂𑀦, 𑀆𑀲𑀦𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁 𑀦𑀺𑀲𑀚𑁆𑀚𑀓𑀼𑀲𑀮𑁂𑀦, 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚𑀦𑁆𑀢𑁂𑀦 𑀦𑀯𑁂 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀅𑀧𑁆𑀧𑀝𑀺𑀩𑀸𑀳𑀦𑁆𑀢𑁂𑀦 𑀬𑀣𑀸𑀧𑀢𑀺𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀅𑀦𑀸𑀦𑀸𑀓𑀣𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑁂𑀦, 𑀲𑀸𑀫𑀁 𑀯𑀸 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄, 𑀧𑀭𑁄 𑀯𑀸 𑀅𑀚𑁆𑀛𑁂𑀲𑀺𑀢𑀩𑁆𑀩𑁄, 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀢𑀺𑀫𑀜𑁆𑀜𑀺𑀢𑀩𑁆𑀩𑁄.

𑀲𑀗𑁆𑀖𑁂𑀦 𑀅𑀦𑀼𑀫𑀢𑁂𑀦 𑀧𑀼𑀕𑁆𑀕𑀮𑁂𑀦 𑀅𑀦𑀼𑀯𑀺𑀚𑁆𑀚𑀓𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀼𑀓𑀸𑀫𑁂𑀦 𑀦 𑀉𑀧𑀚𑁆𑀛𑀸𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀆𑀘𑀭𑀺𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀲𑀫𑀸𑀦𑀸𑀘𑀭𑀺𑀬𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀚𑀸𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀸, 𑀦 𑀦𑀸𑀫𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀕𑁄𑀢𑁆𑀢𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀦 𑀆𑀕𑀫𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀓𑀼𑀮𑀧𑀤𑁂𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀦 𑀚𑀸𑀢𑀺𑀪𑀽𑀫𑀺 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀢𑀁 𑀓𑀺𑀁𑀓𑀸𑀭𑀡𑀸? 𑀅𑀢𑁆𑀭𑀲𑁆𑀲 𑀧𑁂𑀫𑀁 𑀯𑀸 𑀤𑁄𑀲𑁄 𑀯𑀸, 𑀧𑁂𑀫𑁂 𑀯𑀸 𑀲𑀢𑀺 𑀤𑁄𑀲𑁂 𑀯𑀸 𑀙𑀦𑁆𑀤𑀸𑀧𑀺 𑀕𑀘𑁆𑀙𑁂𑀬𑁆𑀬 𑀤𑁄𑀲𑀸𑀧𑀺 𑀕𑀘𑁆𑀙𑁂𑀬𑁆𑀬 𑀫𑁄𑀳𑀸𑀧𑀺 𑀕𑀘𑁆𑀙𑁂𑀬𑁆𑀬 𑀪𑀬𑀸𑀧𑀺 𑀕𑀘𑁆𑀙𑁂𑀬𑁆𑀬𑀸𑀢𑀺.

𑀲𑀗𑁆𑀖𑁂𑀦 𑀅𑀦𑀼𑀫𑀢𑁂𑀦 𑀧𑀼𑀕𑁆𑀕𑀮𑁂𑀦 𑀅𑀦𑀼𑀯𑀺𑀚𑁆𑀚𑀓𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀼𑀓𑀸𑀫𑁂𑀦 𑀲𑀗𑁆𑀖𑀕𑀭𑀼𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀦𑁄 𑀧𑀼𑀕𑁆𑀕𑀮𑀕𑀭𑀼𑀓𑁂𑀦, 𑀲𑀤𑁆𑀥𑀫𑁆𑀫𑀕𑀭𑀼𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀦𑁄 𑀆𑀫𑀺𑀲𑀕𑀭𑀼𑀓𑁂𑀦, 𑀅𑀢𑁆𑀣𑀯𑀲𑀺𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀦𑁄 𑀧𑀭𑀺𑀲𑀓𑀧𑁆𑀧𑀺𑀓𑁂𑀦, 𑀓𑀸𑀮𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁, 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁, 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁, 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀅𑀦𑀼𑀯𑀺𑀚𑁆𑀚𑀺𑀢𑀩𑁆𑀩𑀁, 𑀦𑁄 𑀤𑁄𑀲𑀦𑁆𑀢𑀭𑁂𑀦, 𑀦 𑀉𑀧𑀓𑀡𑁆𑀡𑀓𑀚𑀧𑁆𑀧𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀚𑀺𑀫𑁆𑀳𑀁 𑀧𑁂𑀓𑁆𑀔𑀺𑀢𑀩𑁆𑀩𑀁, 𑀦 𑀅𑀓𑁆𑀔𑀺 𑀦𑀺𑀔𑀡𑀺𑀢𑀩𑁆𑀩𑀁, 𑀦 𑀪𑀫𑀼𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁, 𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁, 𑀦 𑀳𑀢𑁆𑀣𑀯𑀺𑀓𑀸𑀭𑁄 𑀓𑀸𑀢𑀩𑁆𑀩𑁄, 𑀦 𑀳𑀢𑁆𑀣𑀫𑀼𑀤𑁆𑀤𑀸 𑀤𑀲𑁆𑀲𑁂𑀢𑀩𑁆𑀩𑀸.

𑀆𑀲𑀦𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁 𑀦𑀺𑀲𑀚𑁆𑀚𑀓𑀼𑀲𑀮𑁂𑀦, 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀦𑁆𑀢𑁂𑀦 𑀅𑀢𑁆𑀣𑀁 𑀅𑀦𑀼𑀯𑀺𑀥𑀺𑀬𑀦𑁆𑀢𑁂𑀦 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀦 𑀘 𑀆𑀲𑀦𑀸 𑀯𑀼𑀝𑁆𑀞𑀸𑀢𑀩𑁆𑀩𑀁, 𑀦 𑀯𑀻𑀢𑀺𑀳𑀸𑀢𑀩𑁆𑀩𑀁, 𑀦 𑀓𑀼𑀫𑁆𑀫𑀕𑁆𑀕𑁄 𑀲𑁂𑀯𑀺𑀢𑀩𑁆𑀩𑁄, 𑀦 𑀩𑀸𑀳𑀸𑀯𑀺𑀓𑁆𑀔𑁂𑀧𑀓𑀁 𑀪𑀡𑀺𑀢𑀩𑁆𑀩𑀁, 𑀅𑀢𑀼𑀭𑀺𑀢𑁂𑀦 𑀪𑀯𑀺𑀢𑀩𑁆𑀩𑀁 𑀅𑀲𑀸𑀳𑀲𑀺𑀓𑁂𑀦, 𑀅𑀘𑀡𑁆𑀟𑀺𑀓𑀢𑁂𑀦 𑀪𑀯𑀺𑀢𑀩𑁆𑀩𑀁 𑀯𑀘𑀦𑀓𑁆𑀔𑀫𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸, 𑀓𑀸𑀭𑀼𑀡𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀳𑀺𑀢𑀧𑀭𑀺𑀲𑀓𑁆𑀓𑀺𑀦𑀸, 𑀅𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑀸 𑀪𑀯𑀺𑀢𑀩𑁆𑀩𑀁 𑀧𑀭𑀺𑀬𑀦𑁆𑀢𑀪𑀸𑀡𑀺𑀦𑀸, 𑀅𑀯𑁂𑀭𑀯𑀲𑀺𑀓𑁂𑀦 𑀪𑀯𑀺𑀢𑀩𑁆𑀩𑀁 𑀅𑀦𑀲𑀼𑀭𑀼𑀢𑁆𑀢𑁂𑀦, 𑀅𑀢𑁆𑀢𑀸 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀧𑀭𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀅𑀥𑀫𑁆𑀫𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀥𑀫𑁆𑀫𑀘𑁄𑀤𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀥𑀫𑁆𑀫𑀘𑀼𑀤𑀺𑀢𑀓𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄, 𑀯𑀼𑀢𑁆𑀢𑀁 𑀅𑀳𑀸𑀧𑁂𑀦𑁆𑀢𑁂𑀦 𑀅𑀯𑀼𑀢𑁆𑀢𑀁 𑀅𑀧𑁆𑀧𑀓𑀸𑀲𑁂𑀦𑁆𑀢𑁂𑀦 𑀑𑀢𑀺𑀡𑁆𑀡𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀭𑁄 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑁄, 𑀫𑀦𑁆𑀤𑁄 𑀳𑀸𑀲𑁂𑀢𑀩𑁆𑀩𑁄, 𑀪𑀻𑀭𑀼 𑀅𑀲𑁆𑀲𑀸𑀲𑁂𑀢𑀩𑁆𑀩𑁄, 𑀘𑀡𑁆𑀟𑁄 𑀦𑀺𑀲𑁂𑀥𑁂𑀢𑀩𑁆𑀩𑁄, 𑀅𑀲𑀼𑀘𑀺 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀉𑀚𑀼𑀫𑀤𑁆𑀤𑀯𑁂𑀦 𑀦 𑀙𑀦𑁆𑀤𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀦 𑀤𑁄𑀲𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀦 𑀫𑁄𑀳𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀦 𑀪𑀬𑀸𑀕𑀢𑀺 𑀕𑀦𑁆𑀢𑀩𑁆𑀩𑀸, 𑀫𑀚𑁆𑀛𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁 𑀥𑀫𑁆𑀫𑁂𑀲𑀼 𑀘 𑀧𑀼𑀕𑁆𑀕𑀮𑁂𑀲𑀼 𑀘, 𑀏𑀯𑀜𑁆𑀘 𑀧𑀦 𑀅𑀦𑀼𑀯𑀺𑀚𑁆𑀚𑀓𑁄 𑀅𑀦𑀼𑀯𑀺𑀚𑁆𑀚𑀫𑀸𑀦𑁄 𑀲𑀢𑁆𑀣𑀼 𑀘𑁂𑀯 𑀲𑀸𑀲𑀦𑀓𑀭𑁄 𑀳𑁄𑀢𑀺, 𑀯𑀺𑀜𑁆𑀜𑀽𑀦𑀜𑁆𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀘𑁄𑀤𑀦𑀸𑀤𑀺𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.