𑁨𑁮. 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀻𑀬𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁯𑁪. 𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀦𑁆𑀢𑀺 𑀘𑀻𑀯𑀭𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀪𑀸𑀚𑀦𑀁. 𑀢𑀢𑁆𑀣 𑀘𑀻𑀯𑀭𑀪𑀸𑀚𑀦𑁂 𑀢𑀸𑀯 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀘𑀻𑀯𑀭𑀦𑀺𑀤𑀳𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀪𑀡𑁆𑀟𑀸𑀕𑀸𑀭𑀁 𑀯𑁂𑀤𑀺𑀢𑀩𑁆𑀩𑀁, 𑀘𑀻𑀯𑀭𑀪𑀸𑀚𑀓𑁄 𑀯𑁂𑀤𑀺𑀢𑀩𑁆𑀩𑁄, 𑀘𑀻𑀯𑀭𑀪𑀸𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁩𑁪𑁦-𑁩𑁪𑁨) ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁩𑁪𑁨) 𑀯𑀘𑀦𑀢𑁄 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀘𑁆𑀙𑀸 𑀆𑀕𑀢𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀜𑀸𑀢𑀓𑀸𑀤𑀻𑀦𑀁 𑀧𑀞𑀫𑀢𑀭𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀸 𑀏𑀓𑀘𑁆𑀘𑀲𑁆𑀫𑀺𑀁 𑀧𑁂𑀫𑀁 𑀤𑀲𑁆𑀲𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀸 𑀮𑁄𑀪𑀧𑀓𑀢𑀺𑀢𑀸𑀬 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀦𑁆𑀢𑁄 𑀯𑀸 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀧𑀞𑀫𑀢𑀭𑀁 𑀆𑀕𑀢𑀲𑁆𑀲𑀧𑀺 𑀓𑁄𑀥𑀯𑀲𑁂𑀦 𑀧𑀘𑁆𑀙𑀸 𑀕𑀡𑁆𑀳𑀦𑁆𑀢𑁄 𑀯𑀸 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁂𑀲𑀼 𑀅𑀯𑀫𑀜𑁆𑀜𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀸 ‘‘𑀓𑀺𑀁 𑀯𑁄 𑀖𑀭𑁂 𑀞𑀧𑀦𑁄𑀓𑀸𑀲𑁄 𑀦𑀢𑁆𑀣𑀺, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀏𑀯𑀁 𑀲𑀗𑁆𑀖𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑁄 𑀯𑀸 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀧𑀦 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄, 𑀅𑀬𑀁 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀧𑀘𑁆𑀙𑀸 𑀆𑀕𑀢𑀸𑀦𑀫𑁆𑀧𑀺 𑀇𑀲𑁆𑀲𑀭𑀸𑀦𑀁 𑀪𑀬𑁂𑀦 𑀧𑀞𑀫𑀢𑀭𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀸 ‘‘𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀝𑁆𑀞𑀸𑀦𑀁 𑀦𑀸𑀫𑁂𑀢𑀁 𑀪𑀸𑀭𑀺𑀬’’𑀦𑁆𑀢𑀺 𑀲𑀦𑁆𑀢𑀲𑀦𑁆𑀢𑁄 𑀯𑀸 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. ‘‘𑀫𑀬𑀸 𑀇𑀤𑀜𑁆𑀘𑀺𑀤𑀜𑁆𑀘 𑀕𑀳𑀺𑀢𑀁, 𑀇𑀤𑀜𑁆𑀘𑀺𑀤𑀜𑁆𑀘 𑀦 𑀕𑀳𑀺𑀢’’𑀦𑁆𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀕𑀳𑀺𑀢𑀸𑀕𑀳𑀺𑀢𑀁 𑀚𑀸𑀦𑀸𑀢𑀺 𑀦𑀸𑀫. 𑀢𑀲𑁆𑀫𑀸 𑀬𑁄 𑀙𑀦𑁆𑀤𑀸𑀕𑀢𑀺𑀆𑀤𑀺𑀯𑀲𑁂𑀦 𑀦 𑀕𑀘𑁆𑀙𑀢𑀺, 𑀜𑀸𑀢𑀓𑀅𑀜𑁆𑀜𑀸𑀢𑀓𑀅𑀟𑁆𑀠𑀤𑀼𑀕𑁆𑀕𑀢𑁂𑀲𑀼 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀕𑀡𑁆𑀳𑀸𑀢𑀺, 𑀲𑀻𑀮𑀸𑀘𑀸𑀭𑀧𑀝𑀺𑀧𑀢𑁆𑀢𑀺𑀬𑀼𑀢𑁆𑀢𑁄 𑀳𑁄𑀢𑀺 𑀲𑀢𑀺𑀫𑀸 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄, 𑀲𑀓𑁆𑀓𑁄𑀢𑀺 𑀤𑀸𑀬𑀓𑀸𑀦𑀁 𑀯𑀺𑀲𑁆𑀲𑀝𑁆𑀞𑀸𑀬 𑀯𑀸𑀘𑀸𑀬 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀧𑀲𑀸𑀤𑀁 𑀚𑀦𑁂𑀢𑀼𑀁, 𑀏𑀯𑀭𑀽𑀧𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀏𑀯𑀜𑁆𑀘 𑀧𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀢𑀺, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁩𑁪𑁨) 𑁋

𑀇𑀢𑀺 𑀇𑀫𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀲𑀩𑁆𑀩𑀲𑀗𑁆𑀖𑀫𑀚𑁆𑀛𑁂𑀧𑀺 𑀔𑀡𑁆𑀟𑀲𑀻𑀫𑀸𑀬𑀫𑁆𑀧𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀏𑀯𑀁 𑀲𑀫𑁆𑀫𑀢𑁂𑀦 𑀘 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀯𑀸 𑀧𑀥𑀸𑀦𑀖𑀭𑁂 𑀯𑀸 𑀦 𑀅𑀘𑁆𑀙𑀺𑀢𑀩𑁆𑀩𑀁. 𑀬𑀢𑁆𑀣 𑀧𑀦 𑀆𑀕𑀢𑀸𑀕𑀢𑀸 𑀫𑀦𑀼𑀲𑁆𑀲𑀸 𑀲𑀼𑀔𑀁 𑀧𑀲𑁆𑀲𑀦𑁆𑀢𑀺, 𑀢𑀸𑀤𑀺𑀲𑁂 𑀥𑀼𑀭𑀯𑀺𑀳𑀸𑀭𑀝𑁆𑀞𑀸𑀦𑁂 𑀩𑀻𑀚𑀦𑀺𑀁 𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁂𑀦 𑀲𑀼𑀧𑀸𑀭𑀼𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀁.

𑁧𑁯𑁫. 𑀘𑀻𑀯𑀭𑀦𑀺𑀤𑀳𑀓𑁄𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦𑀺𑀳𑀺𑀢𑀸𑀦𑀺𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 𑀯𑀘𑀦𑀢𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀦𑀺𑀤𑀳𑀓𑀁 𑀲𑀫𑁆𑀫𑀦𑁆𑀦𑀢𑀺, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀦𑀺𑀤𑀳𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀘𑀻𑀯𑀭𑀦𑀺𑀤𑀳𑀓𑁄, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁩𑁪𑁨) 𑁋

𑀇𑀢𑀺 𑀇𑀫𑀸𑀬 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑁧𑁯𑁬. 𑀪𑀡𑁆𑀟𑀸𑀕𑀸𑀭𑀺𑀓𑁄𑀧𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀼𑀢𑁆𑀢𑀸𑀕𑀼𑀢𑁆𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁩𑁪𑁩) 𑀯𑀘𑀦𑀢𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀡𑁆𑀟𑀸𑀕𑀸𑀭𑀺𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁪𑁩) 𑀦𑀬𑁂𑀦 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁩𑁪𑁩) 𑀘 𑀬𑀢𑁆𑀣 𑀙𑀤𑀦𑀸𑀤𑀻𑀲𑀼 𑀓𑁄𑀘𑀺 𑀤𑁄𑀲𑁄 𑀦𑀢𑁆𑀣𑀺, 𑀢𑀁 𑀕𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀙𑀤𑀦𑀢𑀺𑀡𑀁 𑀯𑀸 𑀙𑀤𑀦𑀺𑀝𑁆𑀞𑀓𑀸 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀢𑀺𑀢𑀸, 𑀬𑁂𑀦 𑀑𑀯𑀲𑁆𑀲𑀢𑀺 𑀯𑀸, 𑀫𑀽𑀲𑀺𑀓𑀸𑀤𑀻𑀦𑀁 𑀯𑀸 𑀧𑀯𑁂𑀲𑁄 𑀳𑁄𑀢𑀺, 𑀪𑀺𑀢𑁆𑀢𑀺𑀆𑀤𑀻𑀲𑀼 𑀯𑀸 𑀓𑀢𑁆𑀣𑀘𑀺 𑀙𑀺𑀤𑁆𑀤𑀁 𑀳𑁄𑀢𑀺, 𑀉𑀧𑀘𑀺𑀓𑀸 𑀯𑀸 𑀉𑀝𑁆𑀞𑀳𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀅𑀕𑀼𑀢𑁆𑀢𑀁 𑀦𑀸𑀫. 𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀧𑀝𑀺𑀲𑀗𑁆𑀔𑀭𑀺𑀢𑀩𑁆𑀩𑀁. 𑀲𑀻𑀢𑀲𑀫𑀬𑁂 𑀤𑁆𑀯𑀸𑀭𑀜𑁆𑀘 𑀯𑀸𑀢𑀧𑀸𑀦𑀜𑁆𑀘 𑀲𑀼𑀧𑀺𑀳𑀺𑀢𑀁 𑀓𑀸𑀢𑀩𑁆𑀩𑀁. 𑀲𑀻𑀢𑁂𑀦 𑀳𑀺 𑀘𑀻𑀯𑀭𑀸𑀦𑀺 𑀓𑀡𑁆𑀡𑀓𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀉𑀡𑁆𑀳𑀲𑀫𑀬𑁂 𑀅𑀦𑁆𑀢𑀭𑀦𑁆𑀢𑀭𑀸 𑀯𑀸𑀢𑀧𑁆𑀧𑀯𑁂𑀲𑀦𑀢𑁆𑀣𑀁 𑀯𑀺𑀯𑀭𑀺𑀢𑀩𑁆𑀩𑀁. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀕𑀼𑀢𑁆𑀢𑀸𑀕𑀼𑀢𑁆𑀢𑀁 𑀚𑀸𑀦𑀸𑀢𑀺 𑀦𑀸𑀫.

𑁧𑁯𑁭. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑀁 𑀲𑀗𑁆𑀖𑁄 𑀆𑀓𑀗𑁆𑀔𑀢𑀺 𑀯𑀺𑀳𑀸𑀭𑀁 𑀯𑀸 𑀅𑀟𑁆𑀠𑀬𑁄𑀕𑀁 𑀯𑀸 𑀧𑀸𑀲𑀸𑀤𑀁 𑀯𑀸 𑀳𑀫𑁆𑀫𑀺𑀬𑀁 𑀯𑀸 𑀕𑀼𑀳𑀁 𑀯𑀸’’𑀢𑀺 (𑀫𑀳𑀸𑀯. 𑁩𑁪𑁩) 𑀯𑀘𑀦𑀢𑁄 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀬𑁄 𑀆𑀭𑀸𑀫𑀫𑀚𑁆𑀛𑁂 𑀆𑀭𑀸𑀫𑀺𑀓𑀲𑀸𑀫𑀡𑁂𑀭𑀸𑀤𑀻𑀳𑀺 𑀅𑀯𑀺𑀯𑀺𑀢𑁆𑀢𑁄 𑀲𑀩𑁆𑀩𑁂𑀲𑀁 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀯𑀺𑀳𑀸𑀭𑁄 𑀯𑀸 𑀅𑀟𑁆𑀠𑀬𑁄𑀕𑁄 𑀯𑀸 𑀳𑁄𑀢𑀺, 𑀲𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀘𑁆𑀘𑀦𑁆𑀢𑀲𑁂𑀦𑀸𑀲𑀦𑀁 𑀧𑀦 𑀦 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁. 𑀇𑀫𑀁 𑀧𑀦 𑀪𑀡𑁆𑀟𑀸𑀕𑀸𑀭𑀁 𑀔𑀡𑁆𑀟𑀲𑀻𑀫𑀁 𑀕𑀦𑁆𑀢𑁆𑀯𑀸 𑀔𑀡𑁆𑀟𑀲𑀻𑀫𑀸𑀬 𑀦𑀺𑀲𑀺𑀦𑁆𑀦𑁂𑀳𑀺 𑀲𑀫𑁆𑀫𑀦𑁆𑀦𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀯𑀺𑀳𑀸𑀭𑀫𑀚𑁆𑀛𑁂𑀬𑁂𑀯 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀯𑀺𑀳𑀸𑀭𑀁 𑀪𑀡𑁆𑀟𑀸𑀕𑀸𑀭𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁪𑁩) 𑀦𑀬𑁂𑀦 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀁.

𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀸𑀤𑀻𑀳𑀺 𑀧𑀦 𑀢𑀻𑀳𑀺𑀧𑀺 𑀅𑀢𑁆𑀢𑀦𑁄 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁆𑀣 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁂𑀦 𑀢𑀸𑀯 𑀬𑀁 𑀬𑀁 𑀫𑀦𑀼𑀲𑁆𑀲𑀸 ‘‘𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀯𑀸 ‘‘𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀯𑀸 ‘‘𑀅𑀘𑁆𑀘𑁂𑀓𑀘𑀻𑀯𑀭’’𑀦𑁆𑀢𑀺 𑀯𑀸 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓’’𑀦𑁆𑀢𑀺 𑀯𑀸 ‘‘𑀦𑀺𑀲𑀻𑀤𑀦’’𑀦𑁆𑀢𑀺 𑀯𑀸 ‘‘𑀧𑀘𑁆𑀘𑀢𑁆𑀣𑀭𑀡’’𑀦𑁆𑀢𑀺 𑀯𑀸 ‘‘𑀫𑀼𑀔𑀧𑀼𑀜𑁆𑀙𑀦𑀘𑁄𑀴’’𑀦𑁆𑀢𑀺 𑀯𑀸 𑀤𑁂𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀏𑀓𑀭𑀸𑀲𑀺𑀁 𑀓𑀢𑁆𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀦 𑀕𑀡𑁆𑀳𑀺𑀢𑀩𑁆𑀩𑀁, 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸𑀯 𑀕𑀡𑁆𑀳𑀺𑀢𑁆𑀯𑀸 𑀘𑀻𑀯𑀭𑀦𑀺𑀤𑀳𑀓𑀲𑁆𑀲 𑀢𑀣𑁂𑀯 𑀆𑀘𑀺𑀓𑁆𑀔𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀘𑀻𑀯𑀭𑀦𑀺𑀤𑀳𑀓𑁂𑀦𑀧𑀺 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀤𑀤𑀫𑀸𑀦𑁂𑀦 ‘‘𑀇𑀤𑀁 𑀓𑀸𑀮𑀘𑀻𑀯𑀭𑀁…𑀧𑁂… 𑀇𑀤𑀁 𑀫𑀼𑀔𑀧𑀼𑀜𑁆𑀙𑀦𑀘𑁄𑀴’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀁. 𑀪𑀡𑁆𑀟𑀸𑀕𑀸𑀭𑀺𑀓𑁂𑀦𑀧𑀺 𑀢𑀣𑁂𑀯 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀢𑀢𑁄 𑀲𑀗𑁆𑀖𑁂𑀦 ‘‘𑀓𑀸𑀮𑀘𑀻𑀯𑀭𑀁 𑀆𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀓𑀸𑀮𑀘𑀻𑀯𑀭𑀫𑁂𑀯 𑀤𑀸𑀢𑀩𑁆𑀩𑀁…𑀧𑁂… ‘‘𑀫𑀼𑀔𑀧𑀼𑀜𑁆𑀙𑀦𑀘𑁄𑀴𑀁 𑀆𑀳𑀭𑀸’’𑀢𑀺 𑀯𑀼𑀢𑁆𑀢𑁂 𑀢𑀤𑁂𑀯 𑀤𑀸𑀢𑀩𑁆𑀩𑀁. 𑀇𑀢𑀺 𑀪𑀕𑀯𑀢𑀸 𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑁄 𑀅𑀦𑀼𑀜𑁆𑀜𑀸𑀢𑁄, 𑀘𑀻𑀯𑀭𑀦𑀺𑀤𑀳𑀓𑁄 𑀅𑀦𑀼𑀜𑁆𑀜𑀸𑀢𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀦𑀼𑀜𑁆𑀜𑀸𑀢𑁄, 𑀪𑀡𑁆𑀟𑀸𑀕𑀸𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀦 𑀩𑀸𑀳𑀼𑀮𑀺𑀓𑀢𑀸𑀬, 𑀦 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀬, 𑀅𑀧𑀺𑀘 𑀔𑁄 𑀲𑀗𑁆𑀖𑀸𑀦𑀼𑀕𑁆𑀕𑀳𑀸𑀬. 𑀲𑀘𑁂 𑀳𑀺 𑀆𑀳𑀝𑀸𑀳𑀝𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀽 𑀪𑀸𑀚𑁂𑀬𑁆𑀬𑀼𑀁, 𑀦𑁂𑀯 𑀆𑀳𑀝𑀁, 𑀦 𑀅𑀦𑀸𑀳𑀝𑀁, 𑀦 𑀤𑀺𑀦𑁆𑀦𑀁, 𑀦 𑀅𑀤𑀺𑀦𑁆𑀦𑀁, 𑀦 𑀮𑀤𑁆𑀥𑀁, 𑀦 𑀅𑀮𑀤𑁆𑀥𑀁 𑀚𑀸𑀦𑁂𑀬𑁆𑀬𑀼𑀁, 𑀆𑀳𑀝𑀸𑀳𑀝𑀁 𑀣𑁂𑀭𑀸𑀲𑀦𑁂 𑀯𑀸 𑀤𑀤𑁂𑀬𑁆𑀬𑀼𑀁, 𑀔𑀡𑁆𑀟𑀸𑀔𑀡𑁆𑀟𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀏𑀯𑀁 𑀲𑀢𑀺 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁄 𑀘 𑀳𑁄𑀢𑀺, 𑀦 𑀘 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀪𑀡𑁆𑀟𑀸𑀕𑀸𑀭𑁂 𑀧𑀦 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀉𑀲𑁆𑀲𑀦𑁆𑀦𑀓𑀸𑀮𑁂 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑀁 𑀯𑀸 𑀤𑁆𑀯𑁂 𑀤𑁆𑀯𑁂 𑀯𑀸 𑀏𑀓𑁂𑀓𑀁 𑀯𑀸 𑀘𑀻𑀯𑀭𑀁 𑀤𑀲𑁆𑀲𑀦𑁆𑀢𑀺, 𑀮𑀤𑁆𑀥𑀸𑀮𑀤𑁆𑀥𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺.

𑁧𑁯𑁮. 𑀘𑀻𑀯𑀭𑀪𑀸𑀚𑀓𑁄𑀯𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁, 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀚𑀺𑀢𑀸𑀪𑀸𑀚𑀺𑀢𑀜𑁆𑀘 𑀚𑀸𑀦𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁩𑁪𑁩) 𑀯𑀘𑀦𑀢𑁄 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀬𑁂𑀯 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺(𑀫𑀳𑀸𑀯. 𑁩𑁪𑁩) 𑀆𑀤𑀺𑀦𑀸 𑀦𑀬𑁂𑀦 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀅𑀧𑀮𑁄𑀓𑀦𑁂𑀦 𑀯𑀸 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑁄.

𑀏𑀢𑁆𑀣 𑀲𑀪𑀸𑀕𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀧𑀸𑀧𑀼𑀡𑀦𑁆𑀢𑀫𑁆𑀧𑀺 𑀫𑀳𑀕𑁆𑀖𑀘𑀻𑀯𑀭𑀁 𑀤𑁂𑀦𑁆𑀢𑁄 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀅𑀜𑁆𑀜𑁂𑀲𑀁 𑀯𑀼𑀟𑁆𑀠𑀢𑀭𑀸𑀦𑀁 𑀧𑀸𑀧𑀼𑀡𑀦𑁆𑀢𑀫𑁆𑀧𑀺 𑀫𑀳𑀕𑁆𑀖𑀘𑀻𑀯𑀭𑀁 𑀅𑀤𑀢𑁆𑀯𑀸 𑀅𑀧𑁆𑀧𑀕𑁆𑀖𑀁 𑀤𑁂𑀦𑁆𑀢𑁄 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀫𑁄𑀳𑀫𑀽𑀴𑁆𑀳𑁄 𑀘𑀻𑀯𑀭𑀤𑀸𑀦𑀯𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀫𑀼𑀔𑀭𑀸𑀦𑀁 𑀦𑀯𑀓𑀸𑀦𑀫𑁆𑀧𑀺 𑀪𑀬𑁂𑀦 𑀅𑀧𑀸𑀧𑀼𑀡𑀦𑁆𑀢𑀁 𑀏𑀯 𑀫𑀳𑀕𑁆𑀖𑀁 𑀘𑀻𑀯𑀭𑀁 𑀤𑁂𑀦𑁆𑀢𑁄 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦𑀸𑀫. 𑀬𑁄 𑀏𑀯𑀁 𑀦 𑀕𑀘𑁆𑀙𑀢𑀺, 𑀲𑀩𑁆𑀩𑁂𑀲𑀁 𑀢𑀼𑀮𑀸𑀪𑀽𑀢𑁄 𑀧𑀫𑀸𑀡𑀪𑀽𑀢𑁄 𑀫𑀚𑁆𑀛𑀢𑁆𑀢𑁄, 𑀲𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀢𑁂𑀦𑀧𑀺 𑀘𑀻𑀯𑀭𑀁 𑀪𑀸𑀚𑁂𑀦𑁆𑀢𑁂𑀦 𑀧𑀞𑀫𑀁 ‘‘𑀇𑀤𑀁 𑀣𑀽𑀮𑀁, 𑀇𑀤𑀁 𑀲𑀡𑁆𑀳𑀁, 𑀇𑀤𑀁 𑀖𑀦𑀁, 𑀇𑀤𑀁 𑀢𑀦𑀼𑀓𑀁, 𑀇𑀤𑀁 𑀧𑀭𑀺𑀪𑀼𑀢𑁆𑀢𑀁, 𑀇𑀤𑀁 𑀅𑀧𑀭𑀺𑀪𑀼𑀢𑁆𑀢𑀁, 𑀇𑀤𑀁 𑀤𑀻𑀖𑀢𑁄 𑀏𑀢𑁆𑀢𑀓𑀁, 𑀧𑀼𑀣𑀼𑀮𑀢𑁄 𑀏𑀢𑁆𑀢𑀓’’𑀦𑁆𑀢𑀺 𑀏𑀯𑀁 𑀯𑀢𑁆𑀣𑀸𑀦𑀺 𑀯𑀺𑀘𑀺𑀦𑀺𑀢𑁆𑀯𑀸 ‘‘𑀇𑀤𑀁 𑀏𑀢𑁆𑀢𑀓𑀁 𑀅𑀕𑁆𑀖𑀢𑀺, 𑀇𑀤𑀁 𑀏𑀢𑁆𑀢𑀓’’𑀦𑁆𑀢𑀺 𑀏𑀯𑀁 𑀅𑀕𑁆𑀖𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀘𑁂 𑀲𑀩𑁆𑀩𑁂𑀲𑀁 𑀏𑀓𑁂𑀓𑀫𑁂𑀯 𑀤𑀲𑀤𑀲𑀅𑀕𑁆𑀖𑀦𑀓𑀁 𑀧𑀸𑀧𑀼𑀡𑀸𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀸𑀧𑀼𑀡𑀸𑀢𑀺, 𑀬𑀁 𑀦𑀯 𑀯𑀸 𑀅𑀝𑁆𑀞 𑀯𑀸 𑀅𑀕𑁆𑀖𑀢𑀺, 𑀢𑀁 𑀅𑀜𑁆𑀜𑁂𑀦 𑀏𑀓𑀅𑀕𑁆𑀖𑀦𑀓𑁂𑀦 𑀘 𑀤𑁆𑀯𑀺𑀅𑀕𑁆𑀖𑀦𑀓𑁂𑀦 𑀘 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀏𑀢𑁂𑀦 𑀉𑀧𑀸𑀬𑁂𑀦 𑀲𑀫𑁂 𑀧𑀝𑀺𑀯𑀻𑀲𑁂 𑀞𑀧𑁂𑀢𑁆𑀯𑀸 𑀓𑀼𑀲𑁄 𑀧𑀸𑀢𑁂𑀢𑀩𑁆𑀩𑁄. 𑀲𑀘𑁂 𑀏𑀓𑁂𑀓𑀲𑁆𑀲 𑀤𑀻𑀬𑀫𑀸𑀦𑁂 𑀘𑀻𑀯𑀭𑁂 𑀤𑀺𑀯𑀲𑁄 𑀦𑀧𑁆𑀧𑀳𑁄𑀢𑀺, 𑀤𑀲 𑀤𑀲 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀤𑀲 𑀤𑀲 𑀘𑀻𑀯𑀭𑀧𑀝𑀺𑀯𑀻𑀲𑁂 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀏𑀓𑁄 𑀘𑀻𑀯𑀭𑀧𑀝𑀺𑀯𑀻𑀲𑁄 𑀞𑀧𑁂𑀢𑀩𑁆𑀩𑁄. 𑀏𑀯𑀁 𑀞𑀧𑀺𑀢𑁂𑀲𑀼 𑀘𑀻𑀯𑀭𑀧𑀝𑀺𑀯𑀻𑀲𑁂𑀲𑀼 𑀓𑀼𑀲𑁄 𑀧𑀸𑀢𑁂𑀢𑀩𑁆𑀩𑁄. 𑀢𑁂𑀳𑀺𑀧𑀺 𑀪𑀺𑀓𑁆𑀔𑀽𑀳𑀺 𑀧𑀼𑀦 𑀓𑀼𑀲𑀧𑀸𑀢𑀁 𑀓𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁩) 𑀯𑀘𑀦𑀢𑁄 𑀬𑁂 𑀲𑀸𑀫𑀡𑁂𑀭𑀸 𑀅𑀢𑁆𑀢𑀺𑀲𑁆𑀲𑀭𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺, 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀲𑀼 𑀬𑀼𑀢𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁𑀬𑁂𑀯 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑁂𑀲𑀁 𑀦 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁𑀬𑁂𑀯 𑀉𑀧𑀟𑁆𑀠𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀬𑁂 𑀧𑀦 𑀧𑀼𑀭𑁂𑀪𑀢𑁆𑀢𑀜𑁆𑀘 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀲𑀫𑀓𑁄 𑀤𑀸𑀢𑀩𑁆𑀩𑁄. 𑀇𑀤𑀜𑁆𑀘 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑁂𑀦 𑀪𑀡𑁆𑀟𑀸𑀕𑀸𑀭𑁂 𑀞𑀧𑀺𑀢𑁂𑀦 𑀅𑀓𑀸𑀮𑀘𑀻𑀯𑀭𑁂𑀦𑁂𑀯 𑀓𑀣𑀺𑀢𑀁, 𑀓𑀸𑀮𑀘𑀻𑀯𑀭𑀁 𑀧𑀦 𑀲𑀫𑀓𑀁𑀬𑁂𑀯 𑀤𑀸𑀢𑀩𑁆𑀩𑀁. 𑀢𑀢𑁆𑀭𑀼𑀧𑁆𑀧𑀸𑀤𑀯𑀲𑁆𑀲𑀸𑀯𑀸𑀲𑀺𑀓𑀁 𑀲𑀫𑁆𑀫𑀼𑀜𑁆𑀚𑀦𑀻𑀩𑀦𑁆𑀥𑀦𑀸𑀤𑀺 𑀲𑀗𑁆𑀖𑀲𑁆𑀲 𑀨𑀸𑀢𑀺𑀓𑀫𑁆𑀫𑀁 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀏𑀢𑀜𑁆𑀳𑁂𑀢𑁆𑀣 𑀲𑀩𑁆𑀩𑁂𑀲𑀁 𑀯𑀢𑁆𑀢𑀁. 𑀪𑀡𑁆𑀟𑀸𑀕𑀸𑀭𑀘𑀻𑀯𑀭𑁂𑀧𑀺 𑀲𑀘𑁂 𑀲𑀸𑀫𑀡𑁂𑀭𑀸 𑀆𑀕𑀦𑁆𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑀁 𑀬𑀸𑀕𑀼𑀁 𑀧𑀘𑀸𑀫, 𑀪𑀢𑁆𑀢𑀁 𑀧𑀘𑀸𑀫, 𑀔𑀚𑁆𑀚𑀓𑀁 𑀧𑀘𑀸𑀫, 𑀅𑀧𑁆𑀧𑀳𑀭𑀺𑀢𑀁 𑀓𑀭𑁄𑀫, 𑀤𑀦𑁆𑀢𑀓𑀝𑁆𑀞𑀁 𑀆𑀳𑀭𑀸𑀫, 𑀭𑀗𑁆𑀕𑀙𑀮𑁆𑀮𑀺𑀁 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀤𑁂𑀫, 𑀓𑀺𑀁 𑀅𑀫𑁆𑀳𑁂𑀳𑀺 𑀦 𑀓𑀢𑀁 𑀦𑀸𑀫𑀸’’𑀢𑀺 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀺, 𑀲𑀫𑀪𑀸𑀕𑁄𑀯 𑀤𑀸𑀢𑀩𑁆𑀩𑁄. 𑀏𑀢𑀁𑀬𑁂𑀯 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀬𑁂𑀲𑀜𑁆𑀘 𑀓𑀭𑀡𑀪𑀸𑀯𑁄 𑀦 𑀧𑀜𑁆𑀜𑀸𑀬𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀡𑁂𑀭𑀸𑀦𑀁 𑀉𑀧𑀟𑁆𑀠𑀧𑀝𑀺𑀯𑀻𑀲𑀁 𑀤𑀸𑀢𑀼’’𑀦𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀲𑀘𑁂 𑀲𑀸𑀫𑀡𑁂𑀭𑀸 ‘𑀓𑀲𑁆𑀫𑀸 𑀫𑀬𑀁, 𑀪𑀦𑁆𑀢𑁂, 𑀲𑀗𑁆𑀖𑀓𑀫𑁆𑀫𑀁 𑀦 𑀓𑀭𑁄𑀫, 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀬𑀸𑀘𑀦𑁆𑀢𑀺, 𑀲𑀫𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.

𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀲𑀓𑀁 𑀪𑀸𑀕𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀁 𑀮𑀪𑀺𑀢𑁆𑀯𑀸 𑀦𑀤𑀺𑀁 𑀯𑀸 𑀓𑀦𑁆𑀢𑀸𑀭𑀁 𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀤𑀺𑀲𑀸𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑁆𑀢𑀭𑀦𑁆𑀢𑀲𑁆𑀲 𑀲𑀓𑀁 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁩) 𑀯𑀘𑀦𑀢𑁄 𑀘𑀻𑀯𑀭𑁂𑀲𑀼 𑀪𑀡𑁆𑀟𑀸𑀕𑀸𑀭𑀢𑁄 𑀩𑀳𑀺 𑀦𑀻𑀳𑀝𑁂𑀲𑀼 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀲𑀦𑁆𑀦𑀺𑀧𑀢𑀺𑀢𑁂 𑀘𑀻𑀯𑀭𑀪𑀸𑀚𑀓𑁂𑀦 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀝𑁆𑀞𑀸𑀲𑁂𑀦 𑀏𑀢𑁆𑀢𑀓𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀢𑀓𑁆𑀓𑁂𑀢𑁆𑀯𑀸 𑀦𑀬𑀕𑁆𑀕𑀸𑀳𑁂𑀦 𑀲𑀫𑀪𑀸𑀕𑁂𑀦 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁. 𑀢𑀼𑀮𑀸𑀬 𑀢𑀼𑀮𑀺𑀢𑀫𑀺𑀯 𑀳𑀺 𑀲𑀫𑀲𑀫𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀊𑀦𑀁 𑀯𑀸 𑀳𑁄𑀢𑀼 𑀅𑀥𑀺𑀓𑀁 𑀯𑀸, 𑀏𑀯𑀁 𑀢𑀓𑁆𑀓𑁂𑀦 𑀦𑀬𑁂𑀦 𑀤𑀺𑀦𑁆𑀦𑀁 𑀲𑀼𑀤𑀺𑀦𑁆𑀦𑀁. 𑀦𑁂𑀯 𑀊𑀦𑀓𑀁 𑀧𑀼𑀦 𑀤𑀸𑀢𑀩𑁆𑀩𑀁, 𑀦𑀸𑀢𑀺𑀭𑀺𑀢𑁆𑀢𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀁. 𑀲𑀘𑁂 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀲𑀸𑀝𑀓𑀸𑀧𑀺 𑀤𑀲𑁂𑀯, 𑀢𑁂𑀲𑀼 𑀏𑀓𑁄 𑀤𑁆𑀯𑀸𑀤𑀲 𑀅𑀕𑁆𑀖𑀢𑀺, 𑀲𑁂𑀲𑀸 𑀤𑀲𑀕𑁆𑀖𑀦𑀓𑀸. 𑀲𑀩𑁆𑀩𑁂𑀲𑀼 𑀤𑀲𑀕𑁆𑀖𑀦𑀓𑀯𑀲𑁂𑀦 𑀓𑀼𑀲𑁂 𑀧𑀸𑀢𑀺𑀢𑁂 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑀸𑀤𑀲𑀕𑁆𑀖𑀦𑀓𑁄 𑀓𑀼𑀲𑁄 𑀧𑀸𑀢𑀺𑀢𑁄, 𑀢𑁂𑀦 𑀬𑀢𑁆𑀢𑀓𑀁 𑀢𑀲𑁆𑀫𑀺𑀁 𑀧𑀝𑀺𑀯𑀻𑀲𑁂 𑀅𑀥𑀺𑀓𑀁, 𑀢𑀢𑁆𑀢𑀓𑀁 𑀅𑀕𑁆𑀖𑀦𑀓𑀁 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀤𑀢𑁆𑀯𑀸 𑀲𑁄 𑀅𑀢𑀺𑀭𑁂𑀓𑀪𑀸𑀕𑁄 𑀕𑀳𑁂𑀢𑀩𑁆𑀩𑁄. 𑀲𑀘𑁂 𑀲𑀩𑁆𑀩𑁂𑀲𑀁 𑀧𑀜𑁆𑀘 𑀧𑀜𑁆𑀘 𑀯𑀢𑁆𑀣𑀸𑀦𑀺 𑀧𑀢𑁆𑀢𑀸𑀦𑀺, 𑀲𑁂𑀲𑀸𑀦𑀺𑀧𑀺 𑀅𑀢𑁆𑀣𑀺, 𑀏𑀓𑁂𑀓𑀁 𑀧𑀦 𑀦 𑀧𑀸𑀧𑀼𑀡𑀸𑀢𑀺, 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀺.

𑀙𑀺𑀦𑁆𑀤𑀦𑁆𑀢𑁂𑀦 𑀘 𑀅𑀟𑁆𑀠𑀫𑀡𑁆𑀟𑀮𑀸𑀤𑀻𑀦𑀁 𑀯𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀸𑀤𑀻𑀦𑀁 𑀯𑀸 𑀧𑀳𑁄𑀦𑀓𑀸𑀦𑀺 𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀸𑀦𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀸𑀭𑀫𑁆𑀧𑀺 𑀅𑀦𑀼𑀯𑀸𑀢𑀧𑁆𑀧𑀳𑁄𑀦𑀓𑀸𑀬𑀸𑀫𑀁 𑀔𑀡𑁆𑀟𑀁 𑀓𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀅𑀧𑀭𑀺𑀪𑁄𑀕𑀁 𑀧𑀦 𑀦 𑀓𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀝𑁆𑀞𑀸𑀲𑁂 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀢𑁆𑀣𑀸𑀦𑀺 𑀦𑀧𑁆𑀧𑀳𑁄𑀦𑁆𑀢𑀺, 𑀢𑀢𑁆𑀣 𑀅𑀜𑁆𑀜𑀁 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑀞𑀧𑁂𑀢𑁆𑀯𑀸 𑀬𑁄 𑀢𑁂𑀦 𑀢𑀼𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀪𑀸𑀕𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀤𑀲 𑀤𑀲 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀯𑀕𑁆𑀕𑀁 𑀓𑀭𑁄𑀦𑁆𑀢𑀸𑀦𑀁 𑀏𑀓𑁄 𑀯𑀕𑁆𑀕𑁄 𑀦 𑀧𑀽𑀭𑀢𑀺, 𑀅𑀝𑁆𑀞 𑀯𑀸 𑀦𑀯 𑀯𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞 𑀯𑀸 𑀦𑀯 𑀯𑀸 𑀓𑁄𑀝𑁆𑀞𑀸𑀲𑀸 ‘‘𑀢𑀼𑀫𑁆𑀳𑁂 𑀇𑀫𑁂 𑀕𑀳𑁂𑀢𑁆𑀯𑀸 𑀯𑀺𑀲𑀼𑀁 𑀪𑀸𑀚𑁂𑀣𑀸’’𑀢𑀺 𑀤𑀸𑀢𑀩𑁆𑀩𑀸. 𑀏𑀯𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀓𑀼𑀲𑀧𑀸𑀢𑁄 𑀓𑀸𑀢𑀩𑁆𑀩𑁄.

𑁧𑁯𑁯. 𑀇𑀤𑀸𑀦𑀺 ‘‘𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀘𑀻𑀯𑀭𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀲𑀻𑀫𑀸𑀬 𑀤𑁂𑀢𑀺, 𑀓𑀢𑀺𑀓𑀸𑀬 𑀤𑁂𑀢𑀺, 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸 𑀤𑁂𑀢𑀺, 𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀆𑀤𑀺𑀲𑁆𑀲 𑀤𑁂𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻’’𑀢𑀺 (𑀫𑀳𑀸𑀯. 𑁩𑁭𑁯) 𑀘𑀻𑀯𑀭𑀸𑀦𑀁 𑀧𑀝𑀺𑀮𑀸𑀪𑀔𑁂𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀬𑀸 𑀢𑀸 𑀅𑀝𑁆𑀞 𑀫𑀸𑀢𑀺𑀓𑀸 𑀯𑀼𑀢𑁆𑀢𑀸, 𑀢𑀸𑀲𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀏𑀯𑀁 𑀲𑀻𑀫𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑁂𑀦𑁆𑀢𑁄 𑀲𑀻𑀫𑀸𑀬 𑀤𑁂𑀢𑀺 𑀦𑀸𑀫. 𑀏𑀯𑀁 𑀲𑀻𑀫𑀸𑀬 𑀤𑀺𑀦𑁆𑀦𑀁 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀫𑀸𑀕𑀢𑀸, 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁. 𑀲𑀻𑀫𑀸 𑀘 𑀦𑀸𑀫𑁂𑀲𑀸 𑀔𑀡𑁆𑀟𑀲𑀻𑀫𑀸 𑀉𑀧𑀘𑀸𑀭𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀮𑀸𑀪𑀲𑀻𑀫𑀸 𑀕𑀸𑀫𑀲𑀻𑀫𑀸 𑀦𑀺𑀕𑀫𑀲𑀻𑀫𑀸 𑀦𑀕𑀭𑀲𑀻𑀫𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀚𑀦𑀧𑀤𑀲𑀻𑀫𑀸 𑀭𑀝𑁆𑀞𑀲𑀻𑀫𑀸 𑀭𑀚𑁆𑀚𑀲𑀻𑀫𑀸 𑀤𑀻𑀧𑀲𑀻𑀫𑀸 𑀘𑀓𑁆𑀓𑀯𑀸𑀴𑀲𑀻𑀫𑀸𑀢𑀺 𑀧𑀦𑁆𑀦𑀭𑀲𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀔𑀡𑁆𑀟𑀲𑀻𑀫𑀸 𑀲𑀻𑀫𑀸𑀓𑀣𑀸𑀬𑀁 𑀯𑀼𑀢𑁆𑀢𑀸𑀯. 𑀉𑀧𑀘𑀸𑀭𑀲𑀻𑀫𑀸 𑀦𑀸𑀫 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑁂𑀦, 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀳𑁄𑀢𑀺. 𑀅𑀧𑀺𑀘 𑀪𑀺𑀓𑁆𑀔𑀽𑀦𑀁 𑀥𑀼𑀯𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄 𑀧𑀭𑀺𑀬𑀦𑁆𑀢𑁂 𑀞𑀺𑀢𑀪𑁄𑀚𑀦𑀲𑀸𑀮𑀢𑁄 𑀯𑀸 𑀦𑀺𑀩𑀤𑁆𑀥𑀯𑀲𑀦𑀆𑀯𑀸𑀲𑀢𑁄 𑀯𑀸 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁 𑀅𑀦𑁆𑀢𑁄 𑀉𑀧𑀘𑀸𑀭𑀲𑀻𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦 𑀆𑀯𑀸𑀲𑁂𑀲𑀼 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀺, 𑀧𑀭𑀺𑀳𑀸𑀬𑀦𑁆𑀢𑁂𑀲𑀼 𑀧𑀭𑀺𑀳𑀸𑀬𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀪𑀺𑀓𑁆𑀔𑀽𑀲𑀼𑀧𑀺 𑀯𑀟𑁆𑀠𑀦𑁆𑀢𑁂𑀲𑀼 𑀯𑀟𑁆𑀠𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀬𑁄𑀚𑀦𑀲𑀢𑀫𑁆𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀬𑁄𑀚𑀦𑀲𑀢𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀸𑀯 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀮𑀸𑀪𑁄 𑀧𑀸𑀧𑀼𑀡𑀸𑀢𑀺. 𑀲𑀫𑀸𑀦𑀲𑀁𑀯𑀸𑀲𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀤𑁆𑀯𑀬𑀫𑁆𑀧𑀺 𑀯𑀼𑀢𑁆𑀢𑀫𑁂𑀯. 𑀮𑀸𑀪𑀲𑀻𑀫𑀸 𑀦𑀸𑀫 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀜𑁆𑀜𑀸𑀢𑀸, 𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀸, 𑀅𑀧𑀺𑀘 𑀔𑁄 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀕𑀸𑀯𑀼𑀢𑀁 𑀯𑀸 𑀅𑀟𑁆𑀠𑀬𑁄𑀚𑀦𑀁 𑀯𑀸 𑀬𑁄𑀚𑀦𑀁 𑀯𑀸 𑀲𑀫𑀦𑁆𑀢𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀮𑀸𑀪𑀲𑀻𑀫𑀸’’𑀢𑀺 𑀦𑀸𑀫𑀮𑀺𑀔𑀺𑀢𑀓𑁂 𑀣𑀫𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 ‘‘𑀬𑀁 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀲𑀻𑀫𑀸 𑀞𑀧𑁂𑀦𑁆𑀢𑀺, 𑀅𑀬𑀁 𑀮𑀸𑀪𑀲𑀻𑀫𑀸 𑀦𑀸𑀫. 𑀕𑀸𑀫𑀦𑀺𑀕𑀫𑀦𑀕𑀭𑀅𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀧𑀺 𑀯𑀼𑀢𑁆𑀢𑀸 𑀏𑀯.

𑀚𑀦𑀧𑀤𑀲𑀻𑀫𑀸 𑀦𑀸𑀫 𑀓𑀸𑀲𑀺𑀓𑁄𑀲𑀮𑀭𑀝𑁆𑀞𑀸𑀤𑀻𑀦𑀁 𑀅𑀦𑁆𑀢𑁄 𑀩𑀳𑀽 𑀚𑀦𑀧𑀤𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀏𑀓𑁂𑀓𑁄 𑀚𑀦𑀧𑀤𑀧𑀭𑀺𑀘𑁆𑀙𑁂𑀤𑁄 𑀚𑀦𑀧𑀤𑀲𑀻𑀫𑀸. 𑀭𑀝𑁆𑀞𑀲𑀻𑀫𑀸 𑀦𑀸𑀫 𑀓𑀸𑀲𑀺𑀓𑁄𑀲𑀮𑀸𑀤𑀺𑀭𑀝𑁆𑀞𑀧𑀭𑀺𑀘𑁆𑀙𑁂𑀤𑁄. 𑀭𑀚𑁆𑀚𑀲𑀻𑀫𑀸 𑀦𑀸𑀫 ‘‘𑀘𑁄𑀴𑀪𑁄𑀕𑁄 𑀓𑁂𑀭𑀴𑀪𑁄𑀕𑁄’’𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀤𑀻𑀧𑀲𑀻𑀫𑀸 𑀦𑀸𑀫 𑀲𑀫𑀼𑀤𑁆𑀤𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀫𑀳𑀸𑀤𑀻𑀧𑀸 𑀘 𑀅𑀦𑁆𑀢𑀭𑀤𑀻𑀧𑀸 𑀘. 𑀘𑀓𑁆𑀓𑀯𑀸𑀴𑀲𑀻𑀫𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀏𑀯𑀫𑁂𑀢𑀸𑀲𑀼 𑀲𑀻𑀫𑀸𑀲𑀼 𑀔𑀡𑁆𑀟𑀲𑀻𑀫𑀸𑀬 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀲𑀗𑁆𑀖𑀁 𑀤𑀺𑀲𑁆𑀯𑀸 ‘‘𑀏𑀢𑁆𑀣𑁂𑀯 𑀲𑀻𑀫𑀸𑀬 𑀲𑀗𑁆𑀖𑀲𑁆𑀲 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀅𑀦𑁆𑀢𑁄𑀔𑀡𑁆𑀟𑀲𑀻𑀫𑀸𑀕𑀢𑀸, 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁. 𑀢𑁂𑀲𑀁𑀬𑁂𑀯 𑀳𑀺 𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀜𑁆𑀜𑁂𑀲𑀁 𑀲𑀻𑀫𑀦𑁆𑀢𑀭𑀺𑀓𑀸𑀬 𑀯𑀸 𑀉𑀧𑀘𑀸𑀭𑀲𑀻𑀫𑀸𑀬 𑀯𑀸 𑀞𑀺𑀢𑀸𑀦𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀺. 𑀔𑀡𑁆𑀟𑀲𑀻𑀫𑀸𑀬 𑀞𑀺𑀢𑁂 𑀧𑀦 𑀭𑀼𑀓𑁆𑀔𑁂 𑀯𑀸 𑀧𑀩𑁆𑀩𑀢𑁂 𑀯𑀸 𑀞𑀺𑀢𑀲𑁆𑀲 𑀳𑁂𑀝𑁆𑀞𑀸 𑀯𑀸 𑀧𑀣𑀯𑀻𑀯𑁂𑀫𑀚𑁆𑀛𑀕𑀢𑀲𑁆𑀲 𑀧𑀸𑀧𑀼𑀡𑀸𑀢𑀺𑀬𑁂𑀯. ‘‘𑀇𑀫𑀺𑀲𑁆𑀲𑀸 𑀉𑀧𑀘𑀸𑀭𑀲𑀻𑀫𑀸𑀬 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀔𑀡𑁆𑀟𑀲𑀻𑀫𑀸𑀲𑀻𑀫𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. ‘‘𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑀁 𑀧𑀦 𑀔𑀡𑁆𑀟𑀲𑀻𑀫𑀸𑀲𑀻𑀫𑀦𑁆𑀢𑀭𑀺𑀓𑀸𑀲𑀼 𑀞𑀺𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀮𑀸𑀪𑀲𑀻𑀫𑀸𑀲𑀼 𑀤𑀺𑀦𑁆𑀦𑀁 𑀢𑀸𑀲𑀼 𑀲𑀻𑀫𑀸𑀲𑀼 𑀅𑀦𑁆𑀢𑁄𑀕𑀢𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀕𑀸𑀫𑀲𑀻𑀫𑀸𑀤𑀻𑀲𑀼 𑀤𑀺𑀦𑁆𑀦𑀁 𑀢𑀸𑀲𑀁 𑀲𑀻𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀩𑀤𑁆𑀥𑀲𑀻𑀫𑀸𑀬 𑀞𑀺𑀢𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀲𑀼 𑀤𑀺𑀦𑁆𑀦𑀁 𑀢𑀢𑁆𑀣 𑀅𑀦𑁆𑀢𑁄𑀕𑀢𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀚𑀦𑀧𑀤𑀭𑀝𑁆𑀞𑀭𑀚𑁆𑀚𑀤𑀻𑀧𑀘𑀓𑁆𑀓𑀯𑀸𑀴𑀲𑀻𑀫𑀸𑀲𑀼𑀧𑀺 𑀕𑀸𑀫𑀲𑀻𑀫𑀸𑀤𑀻𑀲𑀼 𑀯𑀼𑀢𑁆𑀢𑀲𑀤𑀺𑀲𑁄𑀬𑁂𑀯 𑀯𑀺𑀦𑀺𑀘𑁆𑀙𑀬𑁄.

𑀲𑀘𑁂 𑀧𑀦 𑀚𑀫𑁆𑀩𑀼𑀤𑀻𑀧𑁂 𑀞𑀺𑀢𑁄 ‘‘𑀢𑀫𑁆𑀩𑀯𑀡𑁆𑀡𑀺𑀤𑀻𑀧𑁂 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀢𑁄 𑀏𑀓𑁄𑀧𑀺 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀲𑀘𑁂𑀧𑀺 𑀢𑀢𑁆𑀭𑁂𑀯 𑀏𑀓𑁄 𑀲𑀪𑀸𑀕𑀪𑀺𑀓𑁆𑀔𑀼 𑀲𑀪𑀸𑀕𑀸𑀦𑀁 𑀪𑀸𑀕𑀁 𑀕𑀡𑁆𑀳𑀸𑀢𑀺, 𑀦 𑀯𑀸𑀭𑁂𑀢𑀩𑁆𑀩𑁄. 𑀏𑀯𑀁 𑀢𑀸𑀯 𑀬𑁄 𑀲𑀻𑀫𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑁂𑀢𑀺, 𑀢𑀲𑁆𑀲 𑀤𑀸𑀦𑁂 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀧𑀦 ‘‘𑀅𑀲𑀼𑀓𑀲𑀻𑀫𑀸𑀬’’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀚𑀸𑀦𑀸𑀢𑀺, 𑀓𑁂𑀯𑀮𑀁 ‘‘𑀲𑀻𑀫𑀸’’𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀚𑀸𑀦𑀦𑁆𑀢𑁄 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 ‘‘𑀲𑀻𑀫𑀸𑀬 𑀤𑀫𑁆𑀫𑀻’’𑀢𑀺 𑀯𑀸 ‘‘𑀲𑀻𑀫𑀝𑁆𑀞𑀓𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀸 𑀪𑀡𑀢𑀺, 𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀲𑀻𑀫𑀸 𑀦𑀸𑀫 𑀩𑀳𑀼𑀯𑀺𑀥𑀸, 𑀓𑀢𑀭𑀲𑀻𑀫𑀁 𑀲𑀦𑁆𑀥𑀸𑀬 𑀪𑀡𑀲𑀻’’𑀢𑀺. 𑀲𑀘𑁂 𑀯𑀤𑀢𑀺 ‘‘𑀅𑀳𑀁 ‘𑀅𑀲𑀼𑀓𑀲𑀻𑀫𑀸’𑀢𑀺 𑀦 𑀚𑀸𑀦𑀸𑀫𑀺, 𑀲𑀻𑀫𑀝𑁆𑀞𑀓𑀲𑀗𑁆𑀖𑁄 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀢𑀽’’𑀢𑀺, 𑀓𑀢𑀭𑀲𑀻𑀫𑀸𑀬 𑀪𑀸𑀚𑁂𑀢𑀩𑁆𑀩𑀁? 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀓𑀺𑀭𑀸𑀳 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬𑀸’’𑀢𑀺. 𑀢𑀢𑁄 𑀦𑀁 𑀆𑀳𑀁𑀲𑀼 ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦𑀸𑀫 𑀢𑀺𑀬𑁄𑀚𑀦𑀸𑀧𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀢𑀺𑀬𑁄𑀚𑀦𑁂 𑀞𑀺𑀢𑀸 𑀮𑀸𑀪𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀕𑀫𑀺𑀓𑁄 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀆𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑀺𑀲𑁆𑀲𑀬𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺𑀲𑁆𑀲𑀢𑀺, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀪𑀺𑀓𑁆𑀔𑀼𑀦𑀺𑀬𑀸 𑀢𑀺𑀬𑁄𑀚𑀦𑁂 𑀞𑀢𑁆𑀯𑀸 𑀆𑀭𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀲𑀩𑁆𑀩𑀫𑁆𑀧𑁂𑀢𑀁 𑀉𑀧𑀘𑀸𑀭𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀉𑀧𑀘𑀸𑀭𑀲𑀻𑀫𑀸𑀬 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺.

𑁨𑁦𑁦. 𑀓𑀢𑀺𑀓𑀸𑀬 𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀓𑀢𑀺𑀓𑀸 𑀦𑀸𑀫 𑀲𑀫𑀸𑀦𑀮𑀸𑀪𑀓𑀢𑀺𑀓𑀸. 𑀢𑀢𑁆𑀭𑁂𑀯𑀁 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸, 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀁 𑀯𑀺𑀳𑀸𑀭𑀁 𑀲𑀗𑁆𑀕𑀡𑁆𑀳𑀺𑀢𑀼𑀓𑀸𑀫𑀸 𑀲𑀫𑀸𑀦𑀮𑀸𑀪𑀁 𑀓𑀸𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀦𑀸𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀲𑀼𑀓𑁄 𑀦𑀸𑀫 𑀯𑀺𑀳𑀸𑀭𑁄 𑀧𑁄𑀭𑀸𑀡𑀓𑁄’’𑀢𑀺 𑀯𑀸 ‘‘𑀩𑀼𑀤𑁆𑀥𑀸𑀥𑀺𑀯𑀼𑀢𑁆𑀣𑁄’’𑀢𑀺 𑀯𑀸 ‘‘𑀅𑀧𑁆𑀧𑀮𑀸𑀪𑁄’’𑀢𑀺 𑀯𑀸 𑀬 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀢𑀁 𑀯𑀺𑀳𑀸𑀭𑀁 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀏𑀓𑀮𑀸𑀪𑀁 𑀓𑀸𑀢𑀼𑀁 𑀲𑀗𑁆𑀖𑀲𑁆𑀲 𑀭𑀼𑀘𑁆𑀘𑀢𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀲𑀸𑀯𑁂𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀧𑀺 𑀇𑀥 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂𑀧𑀺 𑀲𑀗𑁆𑀖𑁂𑀦 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀇𑀥 𑀦𑀺𑀲𑀺𑀦𑁆𑀦𑁄𑀧𑀺 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀮𑀸𑀪𑁂 𑀪𑀸𑀚𑀺𑀬𑀫𑀸𑀦𑁂 𑀇𑀢𑀭𑀲𑁆𑀫𑀺𑀁 𑀞𑀺𑀢𑀲𑁆𑀲 𑀪𑀸𑀕𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀏𑀓𑁂𑀦 𑀯𑀺𑀳𑀸𑀭𑁂𑀦 𑀲𑀤𑁆𑀥𑀺𑀁 𑀩𑀳𑀽𑀧𑀺 𑀆𑀯𑀸𑀲𑀸 𑀏𑀓𑀮𑀸𑀪𑀸 𑀓𑀸𑀢𑀩𑁆𑀩𑀸. 𑀏𑀯𑀜𑁆𑀘 𑀓𑀢𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀤𑀺𑀦𑁆𑀦𑁂 𑀲𑀩𑁆𑀩𑀢𑁆𑀣 𑀤𑀺𑀦𑁆𑀦𑀁 𑀳𑁄𑀢𑀺.

𑁨𑁦𑁧. 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺 𑀦𑀸𑀫 𑀅𑀢𑁆𑀢𑀦𑁄 𑀧𑀭𑀺𑀘𑁆𑀘𑀸𑀕𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑀁, 𑀬𑀢𑁆𑀣 𑀲𑀗𑁆𑀖𑀲𑁆𑀲 𑀥𑀼𑀯𑀓𑀸𑀭𑀸 𑀓𑀭𑀻𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀲𑁆𑀲 𑀘𑀻𑀯𑀭𑀤𑀸𑀬𑀓𑀲𑁆𑀲 𑀲𑀦𑁆𑀢𑀓𑀁 𑀲𑀗𑁆𑀖𑀲𑁆𑀲 𑀧𑀸𑀓𑀯𑀝𑁆𑀝𑀁 𑀯𑀸 𑀯𑀢𑁆𑀢𑀢𑀺, 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀲𑀤𑀸 𑀕𑁂𑀳𑁂 𑀪𑁄𑀚𑁂𑀢𑀺, 𑀬𑀢𑁆𑀣 𑀯𑀸 𑀢𑁂𑀦 𑀆𑀯𑀸𑀲𑁄 𑀓𑀸𑀭𑀺𑀢𑁄, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀦𑀺𑀩𑀤𑁆𑀥𑀸𑀦𑀺, 𑀇𑀫𑁂 𑀥𑀼𑀯𑀓𑀸𑀭𑀸 𑀦𑀸𑀫. 𑀬𑁂𑀦 𑀧𑀦 𑀲𑀓𑀮𑁄𑀧𑀺 𑀯𑀺𑀳𑀸𑀭𑁄 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀘𑁂 𑀲𑁄 ‘‘𑀬𑀢𑁆𑀣 𑀫𑀬𑁆𑀳𑀁 𑀥𑀼𑀯𑀓𑀸𑀭𑀸 𑀓𑀭𑀻𑀬𑀦𑁆𑀢𑀺, 𑀢𑀢𑁆𑀣 𑀤𑀫𑁆𑀫𑀻’’𑀢𑀺 𑀯𑀸 ‘‘𑀢𑀢𑁆𑀣 𑀤𑁂𑀣𑀸’’𑀢𑀺 𑀯𑀸 𑀪𑀡𑀢𑀺, 𑀩𑀳𑀽𑀲𑀼 𑀘𑁂𑀧𑀺 𑀞𑀸𑀦𑁂𑀲𑀼 𑀥𑀼𑀯𑀓𑀸𑀭𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀢𑁂𑀳𑀺 𑀯𑀢𑁆𑀢𑀩𑁆𑀩𑀁 ‘‘𑀢𑀼𑀫𑁆𑀳𑀸𑀓𑀁 𑀥𑀼𑀯𑀓𑀸𑀭𑁂 𑀏𑀓𑀢𑁆𑀣 𑀪𑀺𑀓𑁆𑀔𑀽 𑀩𑀳𑀽, 𑀏𑀓𑀢𑁆𑀣 𑀅𑀧𑁆𑀧𑀓𑀸’’𑀢𑀺. 𑀲𑀘𑁂 ‘‘𑀪𑀺𑀓𑁆𑀔𑀼𑀕𑀡𑀦𑀸𑀬 𑀕𑀡𑁆𑀳𑀣𑀸’’𑀢𑀺 𑀪𑀡𑀢𑀺, 𑀢𑀣𑀸 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀯𑀢𑁆𑀣𑀪𑁂𑀲𑀚𑁆𑀚𑀸𑀤𑀺 𑀅𑀧𑁆𑀧𑀓𑀫𑁆𑀧𑀺 𑀲𑀼𑀔𑁂𑀦 𑀪𑀸𑀚𑀻𑀬𑀢𑀺. 𑀬𑀤𑀺 𑀧𑀦 𑀫𑀜𑁆𑀘𑁄 𑀯𑀸 𑀧𑀻𑀞𑀁 𑀯𑀸 𑀏𑀓𑀫𑁂𑀯 𑀳𑁄𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀬𑀲𑁆𑀲 𑀯𑀺𑀳𑀸𑀭𑀲𑁆𑀲, 𑀏𑀓𑀯𑀺𑀳𑀸𑀭𑁂𑀧𑀺 𑀯𑀸 𑀬𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑁄 𑀯𑀺𑀘𑀸𑀭𑁂𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 ‘‘𑀅𑀲𑀼𑀓𑀪𑀺𑀓𑁆𑀔𑀼 𑀕𑀡𑁆𑀳𑀢𑀽’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺. 𑀅𑀣 ‘‘𑀫𑀬𑁆𑀳𑀁 𑀥𑀼𑀯𑀓𑀸𑀭𑁂 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀯𑀺𑀘𑀸𑀭𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀲𑀗𑁆𑀖𑀲𑁆𑀲𑀧𑀺 𑀯𑀺𑀘𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀯𑀁 𑀧𑀦 𑀯𑀺𑀘𑀸𑀭𑁂𑀢𑀩𑁆𑀩𑀁, ‘‘𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 𑀤𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀬𑀢𑁆𑀣 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 ‘‘𑀫𑀬𑁆𑀳𑀁 𑀯𑀲𑀦𑀝𑁆𑀞𑀸𑀦𑁂 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀪𑀡𑁆𑀟𑀁 𑀦𑀢𑁆𑀣𑀻’’𑀢𑀺 𑀯𑀤𑀢𑀺, 𑀢𑀢𑁆𑀣 𑀤𑀸𑀢𑀩𑁆𑀩𑀁.

𑁨𑁦𑁨. 𑀲𑀗𑁆𑀖𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀘𑁂 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑁂𑀢𑀺, 𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑁂𑀦 𑀲𑀗𑁆𑀖𑁂𑀦 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀸𑀦𑀺, 𑀲𑀻𑀫𑀝𑁆𑀞𑀓𑀲𑁆𑀲 𑀅𑀲𑀫𑁆𑀧𑀢𑁆𑀢𑀲𑁆𑀲𑀧𑀺 𑀪𑀸𑀕𑀁 𑀕𑀡𑁆𑀳𑀦𑁆𑀢𑁄 𑀦 𑀯𑀸𑀭𑁂𑀢𑀩𑁆𑀩𑁄. 𑀯𑀺𑀳𑀸𑀭𑁄 𑀫𑀳𑀸 𑀳𑁄𑀢𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀯𑀢𑁆𑀣𑁂𑀲𑀼 𑀤𑀻𑀬𑀫𑀸𑀦𑁂𑀲𑀼 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀤𑀻𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀪𑀸𑀬 𑀤𑀸𑀢𑀩𑁆𑀩𑀁. ‘‘𑀅𑀲𑀼𑀓𑀯𑀺𑀳𑀸𑀭𑁂 𑀓𑀺𑀭 𑀩𑀳𑀼 𑀘𑀻𑀯𑀭𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁, 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀫𑁂𑀯. ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀸𑀦𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀤𑀸𑀢𑀩𑁆𑀩𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀤𑀸𑀢𑀩𑁆𑀩𑀫𑁂𑀯. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀤𑀸𑀢𑀩𑁆𑀩𑀁.

𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀤𑀲 𑀯𑀢𑁆𑀣𑀸𑀦𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀤𑁂𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀪𑀸𑀚𑁂𑀢𑀩𑁆𑀩𑀸𑀦𑀺. 𑀲𑀘𑁂 ‘‘𑀲𑀩𑁆𑀩𑀸𑀦𑁂𑀯 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀤𑀼𑀧𑁆𑀧𑀸𑀧𑀺𑀢𑀸𑀦𑀺 𑀘𑁂𑀯 𑀤𑀼𑀕𑁆𑀕𑀳𑀺𑀢𑀸𑀦𑀺 𑀘, 𑀕𑀢𑀕𑀢𑀝𑁆𑀞𑀸𑀦𑁂 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀺. 𑀏𑀓𑀁 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀧𑀸𑀧𑁂𑀢𑁆𑀯𑀸 ‘‘𑀲𑁂𑀲𑀸𑀦𑀺 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀓𑀫𑁂𑀯 𑀯𑀢𑁆𑀣𑀁 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀆𑀳𑀭𑀦𑁆𑀢𑀺, 𑀅𑀪𑀸𑀚𑁂𑀢𑁆𑀯𑀸𑀯 ‘‘𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀤𑀼𑀧𑁆𑀧𑀸𑀧𑀺𑀢𑀜𑁆𑀘𑁂𑀯 𑀤𑀼𑀕𑁆𑀕𑀳𑀺𑀢𑀜𑁆𑀘. 𑀲𑀢𑁆𑀣𑀓𑁂𑀦 𑀯𑀸 𑀳𑀮𑀺𑀤𑁆𑀤𑀺𑀆𑀤𑀺𑀦𑀸 𑀯𑀸 𑀮𑁂𑀔𑀁 𑀓𑀢𑁆𑀯𑀸 𑀏𑀓𑀓𑁄𑀝𑁆𑀞𑀸𑀲𑀁 ‘‘𑀇𑀤𑀁 𑀞𑀸𑀦𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀧𑀸𑀧𑁂𑀢𑁆𑀯𑀸 ‘‘𑀲𑁂𑀲𑀁 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀁 𑀧𑀦 𑀯𑀢𑁆𑀣𑀲𑁆𑀲𑁂𑀯 𑀧𑀼𑀧𑁆𑀨𑀁 𑀯𑀸 𑀯𑀮𑀺 𑀯𑀸, 𑀢𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀏𑀓𑀁 𑀢𑀦𑁆𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀇𑀤𑀁 𑀞𑀸𑀦𑀁 𑀢𑀼𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀣𑁂𑀭𑀲𑁆𑀲 𑀤𑀢𑁆𑀯𑀸 ‘‘𑀲𑁂𑀲𑀁 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀯𑀝𑁆𑀝𑀢𑀺. 𑀔𑀡𑁆𑀟𑀁 𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀪𑀸𑀚𑀺𑀬𑀫𑀸𑀦𑀁 𑀯𑀝𑁆𑀝𑀢𑀺𑀬𑁂𑀯.

𑀏𑀓𑀪𑀺𑀓𑁆𑀔𑀼𑀓𑁂 𑀯𑀺𑀳𑀸𑀭𑁂 𑀲𑀗𑁆𑀖𑀲𑁆𑀲 𑀘𑀻𑀯𑀭𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀘𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁄 𑀪𑀺𑀓𑁆𑀔𑀼 ‘‘𑀲𑀩𑁆𑀩𑀸𑀦𑀺 𑀫𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀸𑀦𑀺, 𑀞𑀺𑀢𑀺𑀓𑀸 𑀧𑀦 𑀦 𑀢𑀺𑀝𑁆𑀞𑀢𑀺. 𑀲𑀘𑁂 𑀏𑀓𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀇𑀤𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀞𑀺𑀢𑀺𑀓𑀸 𑀢𑀺𑀝𑁆𑀞𑀢𑀺. 𑀢𑀢𑁆𑀣 𑀅𑀝𑁆𑀞𑀺𑀢𑀸𑀬 𑀞𑀺𑀢𑀺𑀓𑀸𑀬 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀏𑀓𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀫𑀚𑁆𑀛𑁂 𑀙𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀳𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀞𑀺𑀢𑀸𑀬 𑀞𑀺𑀢𑀺𑀓𑀸𑀬 𑀧𑀼𑀦 𑀅𑀜𑁆𑀜𑀲𑁆𑀫𑀺𑀁 𑀘𑀻𑀯𑀭𑁂 𑀉𑀧𑁆𑀧𑀦𑁆𑀦𑁂 𑀲𑀘𑁂 𑀦𑀯𑀓𑀢𑀭𑁄 𑀆𑀕𑀘𑁆𑀙𑀢𑀺, 𑀞𑀺𑀢𑀺𑀓𑀸 𑀳𑁂𑀝𑁆𑀞𑀸 𑀑𑀭𑁄𑀳𑀢𑀺. 𑀲𑀘𑁂 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀞𑀺𑀢𑀺𑀓𑀸 𑀉𑀤𑁆𑀥𑀁 𑀆𑀭𑁄𑀳𑀢𑀺. 𑀅𑀣 𑀅𑀜𑁆𑀜𑁄 𑀦𑀢𑁆𑀣𑀺, 𑀧𑀼𑀦 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀗𑁆𑀖𑀁 𑀆𑀫𑀲𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀧𑀁𑀲𑀼𑀓𑀽𑀮𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀸𑀫𑀺, 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀦 𑀧𑀦 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀺𑀦𑁆𑀦𑀫𑁆𑀧𑀺 𑀦 𑀕𑀳𑁂𑀢𑀩𑁆𑀩𑀁. 𑀬𑀁 𑀧𑀦 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀤𑁂𑀢𑀺, 𑀢𑀁 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀁 𑀦𑀸𑀫 𑀯𑀝𑁆𑀝𑀢𑀺, 𑀧𑀁𑀲𑀼𑀓𑀽𑀮𑀁 𑀧𑀦 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀥𑀼𑀢𑀗𑁆𑀕𑀁 𑀦 𑀪𑀺𑀚𑁆𑀚𑀢𑀺. ‘‘𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀣𑁂𑀭𑀸𑀦𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺, ‘‘𑀇𑀤𑀁 𑀯𑀢𑁆𑀣𑀁 𑀲𑀗𑁆𑀖𑀲𑁆𑀲 𑀤𑁂𑀫, 𑀇𑀫𑀺𑀦𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀧𑀢𑁆𑀢𑀢𑁆𑀣𑀯𑀺𑀓𑀆𑀬𑁄𑀕𑀅𑀁𑀲𑀩𑀤𑁆𑀥𑀓𑀸𑀤𑀻𑀦𑀺 𑀓𑀭𑁄𑀦𑁆𑀢𑀽’’𑀢𑀺 𑀤𑀺𑀦𑁆𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑀺𑀦𑁆𑀦𑀸𑀦𑀺 𑀩𑀳𑀽𑀦𑀺𑀧𑀺 𑀳𑁄𑀦𑁆𑀢𑀺, 𑀘𑀻𑀯𑀭𑀢𑁆𑀣𑀸𑀬𑀧𑀺 𑀧𑀳𑁄𑀦𑁆𑀢𑀺, 𑀢𑀢𑁄 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀲𑀗𑁆𑀖𑁄 𑀪𑀸𑀚𑀺𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑀸𑀳𑀦𑀢𑁆𑀣𑀯𑀺𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀪𑀸𑀚𑁂𑀢𑀺, 𑀢𑀢𑁄 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀸𑀫𑀺𑀓𑁂𑀳𑀺 𑀯𑀺𑀘𑀸𑀭𑀺𑀢𑀫𑁂𑀯 𑀳𑀺 𑀯𑀝𑁆𑀝𑀢𑀺, 𑀦 𑀇𑀢𑀭𑀁. 𑀧𑀁𑀲𑀼𑀓𑀽𑀮𑀺𑀓𑀁 ‘‘𑀲𑀗𑁆𑀖𑀲𑁆𑀲 𑀥𑀫𑁆𑀫𑀓𑀭𑀡𑀧𑀝𑀸𑀤𑀻𑀦𑀁 𑀅𑀢𑁆𑀣𑀸𑀬 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑀸𑀦𑀫𑁆𑀧𑀺 𑀇𑀘𑁆𑀙𑀺𑀢𑀩𑁆𑀩𑁄. 𑀬𑀁 𑀢𑀢𑁆𑀣 𑀅𑀢𑀺𑀭𑁂𑀓𑀁 𑀳𑁄𑀢𑀺, 𑀢𑀁 𑀘𑀻𑀯𑀭𑁂𑀧𑀺 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀢𑁆𑀢𑀁 𑀲𑀗𑁆𑀖𑀲𑁆𑀲 𑀤𑁂𑀦𑁆𑀢𑀺, 𑀧𑀁𑀲𑀼𑀓𑀽𑀮𑀺𑀓𑁂𑀳𑀺𑀧𑀺 𑀕𑀳𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑀺𑀦𑁆𑀦𑁂𑀲𑀼 𑀯𑀺𑀦𑀺𑀘𑁆𑀙𑀬𑁄. 𑀲𑀘𑁂 𑀧𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀸 𑀲𑀗𑁆𑀖𑀦𑀯𑀓𑀲𑁆𑀲 𑀯𑀸 𑀆𑀭𑁄𑀘𑁂𑀢𑀺, 𑀲𑀘𑁂𑀧𑀺 𑀬𑁄𑀚𑀦𑀁 𑀨𑀭𑀺𑀢𑁆𑀯𑀸 𑀧𑀭𑀺𑀲𑀸 𑀞𑀺𑀢𑀸 𑀳𑁄𑀢𑀺, 𑀏𑀓𑀸𑀩𑀤𑁆𑀥𑀸 𑀘𑁂, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑁂 𑀧𑀦 𑀤𑁆𑀯𑀸𑀤𑀲𑀳𑀺 𑀳𑀢𑁆𑀣𑁂𑀳𑀺 𑀧𑀭𑀺𑀲𑀁 𑀅𑀲𑀫𑁆𑀧𑀢𑁆𑀢𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺.

𑁨𑁦𑁩. 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀤𑁆𑀯𑀺𑀥𑀸 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺, ‘‘𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀤𑀫𑁆𑀫𑀻’’𑀢𑀺, ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀲𑁆𑀲 𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀲𑀘𑁂 𑀩𑀳𑀼𑀓𑀸𑀧𑀺 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀏𑀓𑀸 𑀪𑀺𑀓𑁆𑀔𑀼𑀦𑀻 𑀳𑁄𑀢𑀺, 𑀉𑀧𑀟𑁆𑀠𑀁 𑀤𑀸𑀢𑀩𑁆𑀩𑀁, 𑀤𑁆𑀯𑁂 𑀪𑀸𑀕𑁂 𑀲𑀫𑁂 𑀓𑀢𑁆𑀯𑀸 𑀏𑀓𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑀘𑁂 𑀩𑀳𑀼𑀓𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀳𑁄𑀦𑁆𑀢𑀺, 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀉𑀧𑀟𑁆𑀠𑀁 𑀤𑀸𑀢𑀩𑁆𑀩𑀁. ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀘𑁂 𑀤𑀲 𑀤𑀲 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀳𑁄𑀦𑁆𑀢𑀺, 𑀏𑀓𑀯𑀻𑀲𑀢𑀺 𑀧𑀝𑀺𑀯𑀻𑀲𑁂 𑀓𑀢𑁆𑀯𑀸 𑀏𑀓𑁄 𑀧𑀼𑀕𑁆𑀕𑀮𑀲𑁆𑀲 𑀤𑀸𑀢𑀩𑁆𑀩𑁄, 𑀤𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀤𑀲 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀲𑁆𑀲. 𑀬𑁂𑀦 𑀧𑀼𑀕𑁆𑀕𑀮𑀺𑀓𑁄 𑀮𑀤𑁆𑀥𑁄, 𑀲𑁄 𑀲𑀗𑁆𑀖𑀢𑁄𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀕𑀳𑁂𑀢𑀼𑀁 𑀮𑀪𑀢𑀺. 𑀓𑀲𑁆𑀫𑀸? 𑀉𑀪𑀢𑁄𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 𑀘𑁂𑀢𑀺𑀬𑀲𑁆𑀲 𑀲𑀗𑁆𑀖𑀢𑁄 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀓𑁄𑀝𑁆𑀞𑀸𑀲𑀲𑀫𑁄𑀯 𑀓𑁄𑀝𑁆𑀞𑀸𑀲𑁄 𑀳𑁄𑀢𑀺. ‘‘𑀉𑀪𑀢𑁄𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑁆𑀯𑀸𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀤𑀲 𑀪𑀺𑀓𑁆𑀔𑀽𑀦𑀁, 𑀤𑀲 𑀪𑀺𑀓𑁆𑀔𑀼𑀦𑀻𑀦𑀁, 𑀏𑀓𑁄 𑀧𑀼𑀕𑁆𑀕𑀮𑀲𑁆𑀲, 𑀏𑀓𑁄 𑀘𑁂𑀢𑀺𑀬𑀲𑁆𑀲 𑀤𑀸𑀢𑀩𑁆𑀩𑁄. 𑀢𑀢𑁆𑀣 𑀧𑀼𑀕𑁆𑀕𑀮𑁄 𑀲𑀗𑁆𑀖𑀢𑁄𑀧𑀺 𑀅𑀢𑁆𑀢𑀦𑁄 𑀯𑀲𑁆𑀲𑀕𑁆𑀕𑁂𑀦 𑀕𑀳𑁂𑀢𑀼𑀁 𑀮𑀪𑀢𑀺, 𑀘𑁂𑀢𑀺𑀬𑀲𑁆𑀲 𑀏𑀓𑁄𑀬𑁂𑀯.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀼𑀕𑁆𑀕𑀮𑁄 𑀯𑀺𑀲𑀼𑀁 𑀦 𑀮𑀪𑀢𑀺, 𑀧𑀸𑀧𑀼𑀡𑀦𑀝𑁆𑀞𑀸𑀦𑀢𑁄 𑀏𑀓𑀫𑁂𑀯 𑀮𑀪𑀢𑀺. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀏𑀓𑀁 𑀘𑁂𑀢𑀺𑀬𑀲𑁆𑀲 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁.

‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁, 𑀧𑀼𑀕𑁆𑀕𑀮𑀕𑀡𑀦𑀸𑀬 𑀏𑀯 𑀯𑀺𑀪𑀚𑀺𑀢𑀩𑁆𑀩𑀁. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘, 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘, 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲 𑀏𑀓𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦𑀢𑁆𑀣𑀺, 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀕𑀡𑁂𑀢𑁆𑀯𑀸 𑀏𑀯 𑀪𑀸𑀚𑁂𑀢𑀩𑁆𑀩𑀁. 𑀬𑀣𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸 𑀦𑀬𑁄 𑀦𑀻𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸𑀧𑀺 𑀦𑁂𑀢𑀩𑁆𑀩𑁄.

‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑀲𑁆𑀲 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺, 𑀯𑀲𑁆𑀲𑀕𑁆𑀕𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀯𑀺𑀲𑀼𑀁 𑀧𑀝𑀺𑀯𑀻𑀲𑁄 𑀮𑀩𑁆𑀪𑀢𑀺. ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲𑁂𑀯 𑀯𑀺𑀲𑀼𑀁 𑀮𑀩𑁆𑀪𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀢𑀼𑀬𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀯𑀺𑀲𑀼𑀁 𑀦 𑀮𑀩𑁆𑀪𑀢𑀺, ‘‘𑀪𑀺𑀓𑁆𑀔𑀽𑀦𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀮𑀩𑁆𑀪𑀢𑀺. ‘‘𑀪𑀺𑀓𑁆𑀔𑀽𑀦𑀜𑁆𑀘 𑀢𑀼𑀬𑁆𑀳𑀜𑁆𑀘 𑀘𑁂𑀢𑀺𑀬𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀘𑁂𑀢𑀺𑀬𑀲𑁆𑀲𑁂𑀯 𑀯𑀺𑀲𑀼𑀁 𑀮𑀩𑁆𑀪𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲. 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑀁 𑀆𑀤𑀺𑀁 𑀓𑀢𑁆𑀯𑀸𑀧𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀧𑀼𑀩𑁆𑀩𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀺, 𑀪𑀕𑀯𑀸 𑀫𑀚𑁆𑀛𑁂 𑀦𑀺𑀲𑀻𑀤𑀢𑀺, 𑀤𑀓𑁆𑀔𑀺𑀡𑀢𑁄 𑀪𑀺𑀓𑁆𑀔𑀽, 𑀯𑀸𑀫𑀢𑁄 𑀪𑀺𑀓𑁆𑀔𑀼𑀦𑀺𑀬𑁄 𑀦𑀺𑀲𑀻𑀤𑀦𑁆𑀢𑀺, 𑀪𑀕𑀯𑀸 𑀉𑀪𑀺𑀦𑁆𑀦𑀁 𑀲𑀗𑁆𑀖𑀢𑁆𑀣𑁂𑀭𑁄, 𑀢𑀤𑀸 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀧𑀘𑁆𑀘𑀬𑁂 𑀅𑀢𑁆𑀢𑀦𑀸𑀧𑀺 𑀧𑀭𑀺𑀪𑀼𑀜𑁆𑀚𑀢𑀺, 𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀸𑀧𑁂𑀢𑀺. 𑀏𑀢𑀭𑀳𑀺 𑀧𑀦 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀸 𑀲𑀥𑀸𑀢𑀼𑀓𑀁 𑀧𑀝𑀺𑀫𑀁 𑀯𑀸 𑀘𑁂𑀢𑀺𑀬𑀁 𑀯𑀸 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑀺, 𑀧𑀝𑀺𑀫𑀸𑀬 𑀯𑀸 𑀘𑁂𑀢𑀺𑀬𑀲𑁆𑀲 𑀯𑀸 𑀧𑀼𑀭𑀢𑁄 𑀆𑀥𑀸𑀭𑀓𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 ‘‘𑀩𑀼𑀤𑁆𑀥𑀸𑀦𑀁 𑀤𑁂𑀫𑀸’’𑀢𑀺, 𑀢𑀢𑁆𑀣 𑀧𑀞𑀫𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑁂𑀦𑁆𑀢𑀺, 𑀯𑀺𑀳𑀸𑀭𑀁 𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀤𑀁 𑀘𑁂𑀢𑀺𑀬𑀲𑁆𑀲 𑀤𑁂𑀫𑀸’’𑀢𑀺 𑀧𑀺𑀡𑁆𑀟𑀧𑀸𑀢𑀜𑁆𑀘 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀘 𑀤𑁂𑀦𑁆𑀢𑀺, 𑀢𑀢𑁆𑀣 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀫𑀸𑀮𑀸𑀕𑀦𑁆𑀥𑀸𑀤𑀻𑀦𑀺 𑀢𑀸𑀯 𑀘𑁂𑀢𑀺𑀬𑁂 𑀆𑀭𑁄𑀧𑁂𑀢𑀩𑁆𑀩𑀸𑀦𑀺, 𑀯𑀢𑁆𑀣𑁂𑀳𑀺 𑀧𑀝𑀸𑀓𑀸, 𑀢𑁂𑀮𑁂𑀦 𑀧𑀤𑀻𑀧𑀸 𑀓𑀸𑀢𑀩𑁆𑀩𑀸. 𑀧𑀺𑀡𑁆𑀟𑀧𑀸𑀢𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀧𑀦 𑀬𑁄 𑀦𑀺𑀩𑀤𑁆𑀥𑀘𑁂𑀢𑀺𑀬𑀚𑀕𑁆𑀕𑀓𑁄 𑀳𑁄𑀢𑀺 𑀧𑀩𑁆𑀩𑀚𑀺𑀢𑁄 𑀯𑀸 𑀕𑀳𑀝𑁆𑀞𑁄 𑀯𑀸, 𑀢𑀲𑁆𑀲 𑀤𑀸𑀢𑀩𑁆𑀩𑀸𑀦𑀺. 𑀦𑀺𑀩𑀤𑁆𑀥𑀚𑀕𑁆𑀕𑀓𑁂 𑀅𑀲𑀢𑀺 𑀆𑀳𑀝𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀉𑀧𑀓𑀝𑁆𑀞𑁂 𑀓𑀸𑀮𑁂 𑀪𑀼𑀜𑁆𑀚𑀺𑀢𑁆𑀯𑀸 𑀧𑀘𑁆𑀙𑀸𑀧𑀺 𑀯𑀢𑁆𑀢𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀫𑀸𑀮𑀸𑀕𑀦𑁆𑀥𑀸𑀤𑀻𑀲𑀼 𑀘 𑀬𑀁 𑀓𑀺𑀜𑁆𑀘𑀺 ‘‘𑀇𑀤𑀁 𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑁂 𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀤𑀽𑀭𑀫𑁆𑀧𑀺 𑀳𑀭𑀺𑀢𑁆𑀯𑀸 𑀧𑀽𑀚𑁂𑀢𑀩𑁆𑀩𑀁, ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀭𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀳𑀭𑀺𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀅𑀳𑀁 𑀧𑀺𑀡𑁆𑀟𑀸𑀬 𑀘𑀭𑀸𑀫𑀺, 𑀆𑀲𑀦𑀲𑀸𑀮𑀸𑀬 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀢𑁂 𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀦𑁆𑀢𑁂, 𑀢𑀼𑀬𑁆𑀳𑀫𑁂𑀯 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀧𑀦 ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀳𑀭𑀦𑁆𑀢𑀲𑁆𑀲 𑀕𑀘𑁆𑀙𑀢𑁄 𑀅𑀦𑁆𑀢𑀭𑀸𑀯 𑀓𑀸𑀮𑁄 𑀉𑀧𑀓𑀝𑁆𑀞𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺.

𑁨𑁦𑁪. 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀲𑀘𑁂 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀤𑁂𑀢𑀺, 𑀬𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀧𑀼𑀭𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁, 𑀅𑀜𑁆𑀜𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺. 𑀤𑀺𑀲𑀸𑀧𑀓𑁆𑀓𑀦𑁆𑀢𑀲𑁆𑀲𑀧𑀺 𑀲𑀢𑀺 𑀕𑀸𑀳𑀓𑁂 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸 𑀤𑀸𑀢𑀩𑁆𑀩𑀁. ‘‘𑀅𑀦𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀅𑀦𑁆𑀢𑁄𑀳𑁂𑀫𑀦𑁆𑀢𑁂 𑀏𑀯𑀜𑁆𑀘 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀫𑁆𑀧𑀺 𑀧𑀸𑀧𑀼𑀡𑀸𑀢𑀻’’𑀢𑀺 𑀮𑀓𑁆𑀔𑀡𑀜𑁆𑀜𑀽 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦𑁂𑀢𑀁 𑀦 𑀯𑀺𑀘𑀸𑀭𑀺𑀢𑀁. 𑀲𑀘𑁂 𑀧𑀦 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑁄 ‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀲𑀫𑁆𑀧𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀅𑀣 ‘‘𑀅𑀲𑀼𑀓𑀯𑀺𑀳𑀸𑀭𑁂 𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀤𑀢𑀺, 𑀢𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀫𑁂𑀯 𑀬𑀸𑀯 𑀓𑀣𑀺𑀦𑀲𑁆𑀲𑀼𑀩𑁆𑀪𑀸𑀭𑀸 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀯𑀤𑀢𑀺, 𑀢𑀢𑁆𑀭 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? 𑀧𑀺𑀝𑁆𑀞𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀙𑀺𑀦𑁆𑀦𑀯𑀲𑁆𑀲𑀸 𑀦 𑀮𑀪𑀦𑁆𑀢𑀺, 𑀯𑀲𑁆𑀲𑀁 𑀯𑀲𑀦𑁆𑀢𑀸𑀯 𑀮𑀪𑀦𑁆𑀢𑀺. 𑀘𑀻𑀯𑀭𑀫𑀸𑀲𑁂 𑀧𑀦 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺, 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀢𑀸𑀦𑀜𑁆𑀘 𑀙𑀺𑀦𑁆𑀦𑀯𑀲𑁆𑀲𑀸𑀦𑀜𑁆𑀘 𑀦 𑀧𑀸𑀧𑀼𑀡𑀸𑀢𑀺.

𑀘𑀻𑀯𑀭𑀫𑀸𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑁂𑀫𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑁄 𑀤𑀺𑀯𑀲𑁄, 𑀢𑀸𑀯 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀯𑀸 𑀳𑁄𑀢𑀼 𑀅𑀦𑀢𑁆𑀣𑀢𑀁 𑀯𑀸, 𑀅𑀢𑀻𑀢𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑁂 𑀧𑀦 𑀫𑀸𑀢𑀺𑀓𑀸 𑀆𑀭𑁄𑀧𑁂𑀢𑀩𑁆𑀩𑀸 ‘‘𑀅𑀢𑀻𑀢𑀧𑀲𑁆𑀲𑀸𑀯𑀸𑀲𑀲𑁆𑀲 𑀧𑀜𑁆𑀘 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀅𑀦𑀸𑀕𑀢𑁄 𑀘𑀸𑀢𑀼𑀫𑀸𑀲𑀘𑁆𑀘𑀬𑁂𑀦 𑀪𑀯𑀺𑀲𑁆𑀲𑀢𑀺, 𑀓𑀢𑀭𑀯𑀲𑁆𑀲𑀸𑀯𑀸𑀲𑀲𑁆𑀲 𑀤𑁂𑀲𑀻’’𑀢𑀺. 𑀲𑀘𑁂 ‘‘𑀅𑀢𑀻𑀢𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀁 𑀅𑀦𑁆𑀢𑁄𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀫𑁂𑀯 𑀧𑀸𑀧𑀼𑀡𑀸𑀢𑀺, 𑀤𑀺𑀲𑀸𑀧𑀓𑁆𑀓𑀦𑁆𑀢𑀸𑀦𑀫𑁆𑀧𑀺 𑀲𑀪𑀸𑀕𑀸 𑀕𑀡𑁆𑀳𑀺𑀢𑀼𑀁 𑀮𑀪𑀦𑁆𑀢𑀺. 𑀲𑀘𑁂 ‘‘𑀅𑀦𑀸𑀕𑀢𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀢𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀕𑀳𑁂𑀢𑀩𑁆𑀩𑀁. 𑀅𑀣 ‘‘𑀅𑀕𑀼𑀢𑁆𑀢𑁄 𑀯𑀺𑀳𑀸𑀭𑁄, 𑀘𑁄𑀭𑀪𑀬𑀁 𑀅𑀢𑁆𑀣𑀺, 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁 𑀕𑀡𑁆𑀳𑀺𑀢𑁆𑀯𑀸 𑀯𑀸 𑀆𑀳𑀺𑀡𑁆𑀟𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀲𑀫𑁆𑀧𑀢𑁆𑀢𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀯𑀤𑀢𑀺 ‘‘𑀇𑀢𑁄 𑀫𑁂, 𑀪𑀦𑁆𑀢𑁂, 𑀢𑀢𑀺𑀬𑁂 𑀯𑀲𑁆𑀲𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀦 𑀤𑀺𑀦𑁆𑀦𑀁, 𑀢𑀁 𑀤𑀫𑁆𑀫𑀻’’𑀢𑀺, 𑀢𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀼𑀝𑁆𑀞𑀪𑀺𑀓𑁆𑀔𑀽𑀦𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀢𑁂 𑀤𑀺𑀲𑀸 𑀧𑀓𑁆𑀓𑀦𑁆𑀢𑀸, 𑀅𑀜𑁆𑀜𑁄 𑀯𑀺𑀲𑁆𑀲𑀸𑀲𑀺𑀓𑁄 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀅𑀣𑁂𑀓𑁄𑀬𑁂𑀯 𑀅𑀯𑀲𑀺𑀝𑁆𑀞𑁄, 𑀲𑁂𑀲𑀸 𑀓𑀸𑀮𑀓𑀢𑀸, 𑀲𑀩𑁆𑀩𑀁 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀏𑀓𑁄𑀧𑀺 𑀦𑀢𑁆𑀣𑀺, 𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑁂𑀳𑀺 𑀪𑀸𑀚𑁂𑀢𑀩𑁆𑀩𑀁.

𑁨𑁦𑁫. 𑀆𑀤𑀺𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 𑀬𑀸𑀕𑀼𑀬𑀸 𑀯𑀸 𑀪𑀢𑁆𑀢𑁂 𑀯𑀸 𑀔𑀸𑀤𑀦𑀻𑀬𑁂 𑀯𑀸 𑀘𑀻𑀯𑀭𑁂 𑀯𑀸 𑀲𑁂𑀦𑀸𑀲𑀦𑁂 𑀯𑀸 𑀪𑁂𑀲𑀚𑁆𑀚𑁂 𑀯𑀸 𑀆𑀤𑀺𑀲𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑁄 𑀆𑀤𑀺𑀲𑁆𑀲 𑀤𑁂𑀢𑀺 𑀦𑀸𑀫. 𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀪𑀺𑀓𑁆𑀔𑀽 𑀅𑀚𑁆𑀚𑀢𑀦𑀸𑀬 𑀯𑀸 𑀲𑁆𑀯𑀸𑀢𑀦𑀸𑀬 𑀯𑀸 𑀬𑀸𑀕𑀼𑀬𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀖𑀭𑀁 𑀧𑀯𑀺𑀝𑁆𑀞𑀸𑀦𑀁 𑀬𑀸𑀕𑀼𑀁 𑀤𑁂𑀢𑀺, 𑀬𑀸𑀕𑀼𑀁 𑀤𑀢𑁆𑀯𑀸 𑀧𑀻𑀢𑀸𑀬 𑀬𑀸𑀕𑀼𑀬𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁 𑀤𑀫𑁆𑀫𑀻’’𑀢𑀺 𑀤𑁂𑀢𑀺, 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑁂𑀳𑀺 𑀬𑀸𑀕𑀼 𑀧𑀻𑀢𑀸, 𑀢𑁂𑀲𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀬𑁂𑀳𑀺 𑀧𑀦 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀖𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁂𑀳𑀺 𑀯𑀸 𑀖𑀭𑀁 𑀧𑀯𑀺𑀝𑁆𑀞𑁂𑀳𑀺 𑀯𑀸 𑀬𑀸𑀕𑀼 𑀮𑀤𑁆𑀥𑀸, 𑀬𑁂𑀲𑀁 𑀯𑀸 𑀆𑀲𑀦𑀲𑀸𑀮𑀢𑁄 𑀧𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀦𑀻𑀢𑀸, 𑀬𑁂𑀲𑀁 𑀯𑀸 𑀣𑁂𑀭𑁂𑀳𑀺 𑀧𑁂𑀲𑀺𑀢𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀦𑀺𑀫𑀦𑁆𑀢𑀺𑀳𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀧𑀺 𑀩𑀳𑀽 𑀆𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀜𑁆𑀘 𑀩𑀳𑀺𑀕𑁂𑀳𑀜𑁆𑀘 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀤𑀸𑀬𑀓𑁄 𑀘 𑀏𑀯𑀁 𑀯𑀤𑀢𑀺 ‘‘𑀦𑀺𑀫𑀦𑁆𑀢𑀺𑀢𑀸 𑀯𑀸 𑀳𑁄𑀦𑁆𑀢𑀼 𑀅𑀦𑀺𑀫𑀦𑁆𑀢𑀺𑀢𑀸 𑀯𑀸, 𑀬𑁂𑀲𑀁 𑀫𑀬𑀸 𑀬𑀸𑀕𑀼 𑀤𑀺𑀦𑁆𑀦𑀸, 𑀲𑀩𑁆𑀩𑁂𑀲𑀁 𑀇𑀫𑀸𑀦𑀺 𑀯𑀢𑁆𑀣𑀸𑀦𑀺 𑀳𑁄𑀦𑁆𑀢𑀽’’𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑁂𑀳𑀺 𑀧𑀦 𑀣𑁂𑀭𑀸𑀦𑀁 𑀳𑀢𑁆𑀣𑀢𑁄 𑀬𑀸𑀕𑀼 𑀮𑀤𑁆𑀥𑀸, 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺. 𑀅𑀣 𑀲𑁄 ‘‘𑀬𑁂𑀳𑀺 𑀫𑀬𑁆𑀳𑀁 𑀬𑀸𑀕𑀼 𑀧𑀻𑀢𑀸, 𑀲𑀩𑁆𑀩𑁂𑀲𑀁 𑀳𑁄𑀢𑀽’’𑀢𑀺 𑀯𑀤𑀢𑀺, 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀪𑀢𑁆𑀢𑀔𑀸𑀤𑀦𑀻𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀻𑀯𑀭𑁂 𑀧𑀦 𑀧𑀼𑀩𑁆𑀩𑁂𑀧𑀺 𑀢𑁂𑀦 𑀯𑀲𑁆𑀲𑀁 𑀯𑀸𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀤𑀺𑀦𑁆𑀦𑀧𑀼𑀩𑁆𑀩𑀁 𑀳𑁄𑀢𑀺, 𑀲𑁄 𑀘𑁂 𑀪𑀺𑀓𑁆𑀔𑀽 𑀪𑁄𑀚𑁂𑀢𑁆𑀯𑀸 𑀯𑀤𑀢𑀺 ‘‘𑀬𑁂𑀲𑀁 𑀫𑀬𑀸 𑀧𑀼𑀩𑁆𑀩𑁂 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀢𑁂𑀲𑀁𑀬𑁂𑀯 𑀇𑀫𑀁 𑀘𑀻𑀯𑀭𑀁 𑀯𑀸 𑀲𑀼𑀢𑁆𑀢𑀁 𑀯𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀯𑀸 𑀳𑁄𑀦𑁆𑀢𑀽’’𑀢𑀺, 𑀲𑀩𑁆𑀩𑀁 𑀢𑁂𑀲𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀲𑁂𑀦𑀸𑀲𑀦𑁂𑀧𑀺 ‘‘𑀬𑁄 𑀫𑀬𑀸 𑀓𑀸𑀭𑀺𑀢𑁂 𑀯𑀺𑀳𑀸𑀭𑁂 𑀯𑀸 𑀧𑀭𑀺𑀯𑁂𑀡𑁂 𑀯𑀸 𑀯𑀲𑀢𑀺, 𑀢𑀲𑁆𑀲𑀺𑀤𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲𑁂𑀯 𑀳𑁄𑀢𑀺. 𑀪𑁂𑀲𑀚𑁆𑀚𑁂𑀧𑀺 ‘‘𑀫𑀬𑀁 𑀓𑀸𑀮𑁂𑀦 𑀓𑀸𑀮𑀁 𑀣𑁂𑀭𑀸𑀦𑀁 𑀲𑀧𑁆𑀧𑀺𑀆𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀤𑁂𑀫, 𑀬𑁂𑀳𑀺 𑀢𑀸𑀦𑀺 𑀮𑀤𑁆𑀥𑀸𑀦𑀺, 𑀢𑁂𑀲𑀁𑀬𑁂𑀯𑀺𑀤𑀁 𑀳𑁄𑀢𑀽’’𑀢𑀺 𑀯𑀼𑀢𑁆𑀢𑁂 𑀢𑁂𑀲𑀁𑀬𑁂𑀯 𑀳𑁄𑀢𑀺.

𑁨𑁦𑁬. 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻𑀢𑀺 𑀏𑀢𑁆𑀣 𑀧𑀦 ‘‘𑀇𑀫𑀁 𑀘𑀻𑀯𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸, 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀇𑀤𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀤𑀫𑁆𑀫𑀻’’𑀢𑀺 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 𑀤𑁂𑀢𑀺, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀺. 𑀲𑀘𑁂 𑀧𑀦 ‘‘𑀇𑀤𑀁 𑀢𑀼𑀫𑁆𑀳𑀸𑀓𑀜𑁆𑀘 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀤𑀫𑁆𑀫𑀻’’𑀢𑀺 𑀏𑀯𑀁 𑀯𑀤𑀢𑀺, 𑀣𑁂𑀭𑀲𑁆𑀲 𑀘 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀉𑀤𑁆𑀤𑁂𑀲𑀁 𑀕𑀳𑁂𑀢𑀼𑀁 𑀆𑀕𑀢𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀘 𑀅𑀢𑁆𑀣𑀺, 𑀢𑀲𑁆𑀲𑀧𑀺 𑀧𑀸𑀧𑀼𑀡𑀸𑀢𑀺. ‘‘𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀦𑀺𑀩𑀤𑁆𑀥𑀘𑀸𑀭𑀺𑀓𑀪𑀺𑀓𑁆𑀔𑀽𑀦𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀉𑀤𑁆𑀤𑁂𑀲𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀁 ‘‘𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀯𑀺𑀦𑀺𑀘𑁆𑀙𑀬𑁄.

𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀏𑀓𑁄𑀯 𑀯𑀲𑁆𑀲𑀁 𑀯𑀲𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀬𑀸𑀯 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸’’𑀢𑀺 (𑀫𑀳𑀸𑀯. 𑁩𑁬𑁩) 𑀯𑀘𑀦𑀢𑁄 𑀲𑀘𑁂 (𑀫𑀳𑀸𑀯. 𑀅𑀝𑁆𑀞. 𑁩𑁬𑁩) 𑀕𑀡𑀧𑀽𑀭𑀓𑁂 𑀪𑀺𑀓𑁆𑀔𑀽 𑀮𑀪𑀺𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺, 𑀧𑀜𑁆𑀘 𑀫𑀸𑀲𑁂, 𑀦𑁄 𑀘𑁂 𑀅𑀢𑁆𑀣𑀢𑀁 𑀳𑁄𑀢𑀺, 𑀏𑀓𑀁 𑀘𑀻𑀯𑀭𑀫𑀸𑀲𑀁 𑀅𑀜𑁆𑀜𑀢𑁆𑀣 𑀕𑀳𑁂𑀢𑁆𑀯𑀸 𑀦𑀻𑀢𑀸𑀦𑀺𑀧𑀺 𑀢𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺, 𑀦 𑀢𑁂𑀲𑀁 𑀅𑀜𑁆𑀜𑁄 𑀓𑁄𑀘𑀺 𑀇𑀲𑁆𑀲𑀭𑁄. 𑀬𑀁 𑀬𑀜𑁆𑀳𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀯𑀲𑁆𑀲𑀁𑀯𑀼𑀝𑁆𑀞𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀯𑀸 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀸 𑀤𑁂𑀦𑁆𑀢𑀺, 𑀲𑀘𑁂𑀧𑀺 𑀫𑀢𑀓𑀘𑀻𑀯𑀭𑀁 𑀅𑀯𑀺𑀪𑀚𑀺𑀢𑁆𑀯𑀸 𑀢𑀁 𑀯𑀺𑀳𑀸𑀭𑀁 𑀧𑀯𑀺𑀲𑀢𑀺, 𑀢𑀁 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺. 𑀬𑀫𑁆𑀧𑀺 𑀲𑁄 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀯𑀟𑁆𑀠𑀺𑀁 𑀧𑀬𑁄𑀚𑁂𑀢𑁆𑀯𑀸 𑀞𑀧𑀺𑀢𑀉𑀧𑀦𑀺𑀓𑁆𑀔𑁂𑀧𑀢𑁄 𑀯𑀸 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀡𑁆𑀳𑀸𑀢𑀺, 𑀲𑀩𑁆𑀩𑀁 𑀲𑀼𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀇𑀤𑀜𑁆𑀳𑁂𑀢𑁆𑀣 𑀮𑀓𑁆𑀔𑀡𑀁 𑁋 𑀬𑁂𑀦 𑀢𑁂𑀦𑀸𑀓𑀸𑀭𑁂𑀦 𑀲𑀗𑁆𑀖𑀲𑁆𑀲 𑀉𑀧𑁆𑀧𑀦𑁆𑀦𑀯𑀢𑁆𑀣𑀁 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀧𑀜𑁆𑀘 𑀫𑀸𑀲𑁂, 𑀅𑀦𑀢𑁆𑀣𑀢𑀓𑀣𑀺𑀦𑀲𑁆𑀲 𑀏𑀓𑀁 𑀘𑀻𑀯𑀭𑀫𑀸𑀲𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀪𑀺𑀓𑁆𑀔𑀼 𑀯𑀲𑁆𑀲𑀸𑀦𑀢𑁄 𑀅𑀜𑁆𑀜𑀲𑁆𑀫𑀺𑀁 𑀉𑀢𑀼𑀓𑀸𑀮𑁂 𑀏𑀓𑀓𑁄 𑀯𑀲𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 ‘‘𑀫𑀬𑁆𑀳𑀺𑀫𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺. 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀧𑀦 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀖𑀡𑁆𑀝𑀺𑀁 𑀯𑀸 𑀧𑀳𑀭𑀺𑀢𑁆𑀯𑀸 𑀓𑀸𑀮𑀁 𑀯𑀸 𑀖𑁄𑀲𑁂𑀢𑁆𑀯𑀸 𑀣𑁄𑀓𑀁 𑀆𑀕𑀫𑁂𑀢𑁆𑀯𑀸 𑀲𑀘𑁂 𑀖𑀡𑁆𑀝𑀺𑀲𑀜𑁆𑀜𑀸𑀬 𑀯𑀸 𑀓𑀸𑀮𑀲𑀜𑁆𑀜𑀸𑀬 𑀯𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀪𑀸𑀚𑁂𑀢𑀩𑁆𑀩𑀸𑀦𑀺. 𑀢𑁂𑀳𑀺 𑀘𑁂 𑀪𑀺𑀓𑁆𑀔𑀽𑀳𑀺 𑀢𑀲𑁆𑀫𑀺𑀁 𑀘𑀻𑀯𑀭𑁂 𑀪𑀸𑀚𑀺𑀬𑀫𑀸𑀦𑁂 𑀅𑀧𑀸𑀢𑀺𑀢𑁂 𑀓𑀼𑀲𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀲𑀫𑀓𑁄 𑀤𑀸𑀢𑀩𑁆𑀩𑁄 𑀪𑀸𑀕𑁄, 𑀧𑀸𑀢𑀺𑀢𑁂 𑀓𑀼𑀲𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑁄 𑀪𑀸𑀕𑁄. 𑀏𑀓𑀓𑁄𑀝𑁆𑀞𑀸𑀲𑁂𑀧𑀺 𑀳𑀺 𑀓𑀼𑀲𑀤𑀡𑁆𑀟𑀓𑁂 𑀧𑀸𑀢𑀺𑀢𑀫𑀢𑁆𑀢𑁂 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀳𑁄𑀢𑀺, 𑀕𑀳𑀺𑀢𑀫𑁂𑀯 𑀦𑀸𑀫 𑀘𑀻𑀯𑀭𑀁, 𑀢𑀲𑁆𑀫𑀸 𑀦 𑀅𑀓𑀸𑀫𑀸 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀤𑁂𑀦𑁆𑀢𑀼. 𑀅𑀦𑀼𑀪𑀸𑀕𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀣 𑀖𑀡𑁆𑀝𑀺𑀲𑀜𑁆𑀜𑀸𑀬 𑀯𑀸 𑀓𑀸𑀮𑀲𑀜𑁆𑀜𑀸𑀬 𑀯𑀸 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀦 𑀆𑀕𑀘𑁆𑀙𑀦𑁆𑀢𑀺, ‘‘𑀫𑀬𑁆𑀳𑀺𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀏𑀯𑀁 𑀅𑀥𑀺𑀝𑁆𑀞𑀺𑀢𑁂 𑀲𑀩𑁆𑀩𑀸𑀦𑀺 𑀢𑀲𑁆𑀲𑁂𑀯 𑀳𑁄𑀦𑁆𑀢𑀺, 𑀞𑀺𑀢𑀺𑀓𑀸 𑀧𑀦 𑀦 𑀢𑀺𑀝𑁆𑀞𑀢𑀺. 𑀲𑀘𑁂 𑀏𑀓𑁂𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀅𑀬𑀁 𑀧𑀞𑀫𑀪𑀸𑀕𑁄 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀤𑀼𑀢𑀺𑀬𑀪𑀸𑀕𑁄’’𑀢𑀺 𑀏𑀯𑀁 𑀕𑀡𑁆𑀳𑀸𑀢𑀺, 𑀕𑀳𑀺𑀢𑀸𑀦𑀺 𑀘 𑀲𑀼𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀞𑀺𑀢𑀺𑀓𑀸 𑀘 𑀢𑀺𑀝𑁆𑀞𑀢𑀺, 𑀏𑀯𑀁 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀦𑀧𑀺 𑀅𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀯𑀸 𑀅𑀧𑁆𑀧𑀳𑀭𑀺𑀢𑁆𑀯𑀸 𑀯𑀸 𑀓𑀸𑀮𑀫𑁆𑀧𑀺 𑀖𑁄𑀲𑁂𑀢𑁆𑀯𑀸 𑀯𑀸 𑀅𑀖𑁄𑀲𑁂𑀢𑁆𑀯𑀸 𑀯𑀸 ‘‘𑀅𑀳𑀫𑁂𑀯𑁂𑀢𑁆𑀣, 𑀫𑀬𑁆𑀳𑀫𑁂𑀯 𑀇𑀫𑀸𑀦𑀺 𑀘𑀻𑀯𑀭𑀸𑀦𑀻’’𑀢𑀺 𑀕𑀡𑁆𑀳𑀸𑀢𑀺, 𑀤𑀼𑀕𑁆𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀅𑀣 ‘‘𑀅𑀜𑁆𑀜𑁄 𑀓𑁄𑀘𑀺 𑀇𑀥 𑀦𑀢𑁆𑀣𑀺, 𑀫𑀬𑁆𑀳𑀁 𑀏𑀢𑀸𑀦𑀺 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀲𑀼𑀕𑁆𑀕𑀳𑀺𑀢𑀸𑀦𑀺. 𑀅𑀣 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀢𑀺 ‘‘𑀢𑀢𑁆𑀣 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀪𑀸𑀚𑁂𑀲𑁆𑀲𑀸𑀫𑀻’’𑀢𑀺, 𑀢𑀸𑀦𑀺 𑀘𑀻𑀯𑀭𑀸𑀦𑀺 𑀕𑀢𑀕𑀢𑀝𑁆𑀞𑀸𑀦𑁂 𑀲𑀗𑁆𑀖𑀺𑀓𑀸𑀦𑁂𑀯 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽𑀳𑀺 𑀤𑀺𑀝𑁆𑀞𑀫𑀢𑁆𑀢𑀫𑁂𑀯𑁂𑀢𑁆𑀣 𑀧𑀫𑀸𑀡𑀁. 𑀢𑀲𑁆𑀫𑀸 𑀲𑀘𑁂 𑀓𑁂𑀘𑀺 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 ‘‘𑀓𑀼𑀳𑀺𑀁, 𑀆𑀯𑀼𑀲𑁄, 𑀕𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀓𑀺𑀁, 𑀆𑀯𑀼𑀲𑁄, 𑀫𑀬𑀁 𑀲𑀗𑁆𑀖𑁄 𑀦 𑀳𑁄𑀫𑀸’’𑀢𑀺 𑀢𑀢𑁆𑀣𑁂𑀯 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀲𑀼𑀕𑁆𑀕𑀳𑀺𑀢𑀸𑀦𑀺. 𑀲𑀘𑁂𑀧𑀺 𑀏𑀲 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀓𑀜𑁆𑀘𑀺 𑀯𑀺𑀳𑀸𑀭𑀁 𑀯𑀸 𑀆𑀲𑀦𑀲𑀸𑀮𑀁 𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀏𑀓𑀕𑁂𑀳𑀫𑁂𑀯 𑀯𑀸 𑀧𑀯𑀺𑀲𑀢𑀺, 𑀢𑀢𑁆𑀭 𑀘 𑀦𑀁 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀲𑀼𑀕𑁆𑀕𑀳𑀺𑀢𑀸𑀦𑁂𑀯.

‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁂𑀦 𑀅𑀜𑁆𑀜𑀢𑁆𑀭 𑀘𑀻𑀯𑀭𑀪𑀸𑀕𑁄 𑀲𑀸𑀤𑀺𑀢𑀩𑁆𑀩𑁄, 𑀬𑁄 𑀲𑀸𑀤𑀺𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁪) 𑀯𑀘𑀦𑀢𑁄 𑀅𑀜𑁆𑀜𑀢𑁆𑀭 𑀯𑀲𑁆𑀲𑀁𑀯𑀼𑀝𑁆𑀞𑁄 𑀅𑀜𑁆𑀜𑀢𑁆𑀭 𑀪𑀸𑀕𑀁 𑀕𑀡𑁆𑀳𑀸𑀢𑀺, 𑀤𑀼𑀓𑁆𑀓𑀝𑀁. 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀮𑀳𑀼𑀓𑀸 𑀆𑀧𑀢𑁆𑀢𑀺, 𑀅𑀣 𑀔𑁄 𑀕𑀳𑀺𑀢𑀸𑀦𑀺 𑀘𑀻𑀯𑀭𑀸𑀦𑀺 𑀕𑀳𑀺𑀢𑀝𑁆𑀞𑀸𑀦𑁂 𑀤𑀸𑀢𑀩𑁆𑀩𑀸𑀦𑀺. 𑀲𑀘𑁂𑀧𑀺 𑀦𑀝𑁆𑀞𑀸𑀦𑀺 𑀯𑀸 𑀚𑀺𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀺, 𑀢𑀲𑁆𑀲𑁂𑀯 𑀕𑀻𑀯𑀸. ‘‘𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑀅𑀤𑁂𑀦𑁆𑀢𑁄 𑀥𑀼𑀭𑀦𑀺𑀓𑁆𑀔𑁂𑀧𑁂 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄.

𑀏𑀓𑁄 𑀪𑀺𑀓𑁆𑀔𑀼 𑀤𑁆𑀯𑀻𑀲𑀼 𑀆𑀯𑀸𑀲𑁂𑀲𑀼 𑀯𑀲𑁆𑀲𑀁 𑀯𑀲𑀢𑀺 ‘‘𑀏𑀯𑀁 𑀫𑁂 𑀩𑀳𑀼 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺, 𑀏𑀓𑀁 𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑀁𑀬𑁂𑀯 𑀮𑀪𑀢𑀺. 𑀢𑀲𑁆𑀫𑀸 𑀲𑀘𑁂 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀓𑀸𑀳𑀫𑁂𑀓𑀸𑀳𑀁 𑀯𑀸 𑀲𑀢𑁆𑀢𑀸𑀳𑀁 𑀯𑀸 𑀯𑀲𑀢𑀺, 𑀏𑀓𑁂𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀬𑀁 𑀏𑀓𑁄 𑀧𑀼𑀕𑁆𑀕𑀮𑁄 𑀮𑀪𑀢𑀺, 𑀢𑀢𑁄 𑀢𑀢𑁄 𑀉𑀧𑀟𑁆𑀠𑀁 𑀉𑀧𑀟𑁆𑀠𑀁 𑀤𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄 𑀤𑀺𑀦𑁆𑀦𑁄 𑀳𑁄𑀢𑀺. 𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀇𑀢𑀭𑀲𑁆𑀫𑀺𑀁 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀫𑁂𑀯 𑀉𑀝𑁆𑀞𑀸𑀧𑁂𑀢𑀺, 𑀩𑀳𑀼𑀢𑀭𑀁 𑀯𑀲𑀺𑀢𑀯𑀺𑀳𑀸𑀭𑀢𑁄 𑀢𑀲𑁆𑀲 𑀧𑀝𑀺𑀯𑀻𑀲𑁄 𑀤𑀸𑀢𑀩𑁆𑀩𑁄. 𑀏𑀯𑀫𑁆𑀧𑀺 𑀏𑀓𑀧𑀼𑀕𑁆𑀕𑀮𑀧𑀝𑀺𑀯𑀻𑀲𑁄𑀬𑁂𑀯 𑀤𑀺𑀦𑁆𑀦𑁄 𑀳𑁄𑀢𑀺. 𑀇𑀤𑀜𑁆𑀘 𑀦𑀸𑀦𑀸𑀮𑀸𑀪𑁂𑀳𑀺 𑀦𑀸𑀦𑀽𑀧𑀘𑀸𑀭𑁂𑀳𑀺 𑀏𑀓𑀲𑀻𑀫𑀸𑀯𑀺𑀳𑀸𑀭𑁂𑀳𑀺 𑀓𑀣𑀺𑀢𑀁, 𑀦𑀸𑀦𑀸𑀲𑀻𑀫𑀸𑀯𑀺𑀳𑀸𑀭𑁂 𑀧𑀦 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀘𑀻𑀯𑀭𑀧𑀝𑀺𑀯𑀻𑀲𑁄 𑀦 𑀧𑀸𑀧𑀼𑀡𑀸𑀢𑀺, 𑀲𑁂𑀲𑀁 𑀧𑀦 𑀆𑀫𑀺𑀲𑀪𑁂𑀲𑀚𑁆𑀚𑀸𑀤𑀺 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀅𑀦𑁆𑀢𑁄𑀲𑀻𑀫𑀸𑀕𑀢𑀲𑁆𑀲 𑀧𑀸𑀧𑀼𑀡𑀸𑀢𑀺.

𑁨𑁦𑁭. ‘‘𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀓𑀸𑀮𑀓𑀢𑁂 𑀲𑀗𑁆𑀖𑁄 𑀲𑀸𑀫𑀻 𑀧𑀢𑁆𑀢𑀘𑀻𑀯𑀭𑁂, 𑀅𑀧𑀺𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁, 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀼𑀁, 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁 𑀕𑀭𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀆𑀕𑀢𑀸𑀦𑀸𑀕𑀢𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀓𑀁 𑀅𑀯𑁂𑀪𑀗𑁆𑀕𑀺𑀓’’𑀦𑁆𑀢𑀺 (𑀫𑀳𑀸𑀯. 𑁩𑁬𑁯) 𑀯𑀘𑀦𑀢𑁄 𑀪𑀺𑀓𑁆𑀔𑀼𑀲𑁆𑀫𑀺𑀁 𑀓𑀸𑀮𑀓𑀢𑁂 𑀅𑀧𑀮𑁄𑀓𑁂𑀢𑁆𑀯𑀸 𑀯𑀸 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀓𑀸𑀮𑀓𑀢𑁄, 𑀇𑀤𑀁 𑀢𑀲𑁆𑀲 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀤𑁂𑀬𑁆𑀬, 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀓𑀸𑀮𑀓𑀢𑁄, 𑀇𑀤𑀁 𑀢𑀲𑁆𑀲 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀲𑀗𑁆𑀖𑁄 𑀇𑀫𑀁 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑁂𑀢𑀺, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑀲𑁆𑀲 𑀢𑀺𑀘𑀻𑀯𑀭𑀲𑁆𑀲 𑀘 𑀧𑀢𑁆𑀢𑀲𑁆𑀲 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲. 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁, 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 (𑀫𑀳𑀸𑀯. 𑁩𑁬𑁭) 𑁋

𑀏𑀯𑀁 𑀓𑀫𑁆𑀫𑀯𑀸𑀘𑀁 𑀯𑀸 𑀲𑀸𑀯𑁂𑀢𑁆𑀯𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀲𑁂𑀲𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑁨𑁦𑁮. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀮𑀸𑀪𑁂 𑀧𑀦 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑁋 𑀲𑀘𑁂 𑀲𑀓𑀮𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀝𑁆𑀞𑀳𑀦𑁆𑀢𑁂 𑀓𑀸𑀮𑀁 𑀓𑀭𑁄𑀢𑀺, 𑀲𑀩𑁆𑀩𑁂𑀧𑀺 𑀲𑀸𑀫𑀺𑀓𑀸. 𑀅𑀣 𑀏𑀓𑀘𑁆𑀘𑁂𑀳𑀺 𑀯𑀸𑀭𑁂 𑀓𑀢𑁂 𑀏𑀓𑀘𑁆𑀘𑁂𑀳𑀺 𑀅𑀓𑀢𑁂𑀬𑁂𑀯 𑀓𑀸𑀮𑀁 𑀓𑀭𑁄𑀢𑀺, 𑀢𑀢𑁆𑀭 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺 ‘‘𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀓𑀭𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀲𑀸𑀫𑀺𑀦𑁄’’𑀢𑀺. 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺 ‘‘𑀬𑁂𑀳𑀺 𑀚𑀕𑁆𑀕𑀺𑀢𑁄, 𑀢𑁂 𑀏𑀯 𑀮𑀪𑀦𑁆𑀢𑀺, 𑀇𑀢𑀭𑁂 𑀦 𑀮𑀪𑀦𑁆𑀢𑀻’’𑀢𑀺. 𑀲𑀸𑀫𑀡𑁂𑀭𑁂𑀧𑀺 𑀓𑀸𑀮𑀓𑀢𑁂 𑀲𑀘𑁂 𑀘𑀻𑀯𑀭𑀁 𑀅𑀢𑁆𑀣𑀺, 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀩𑁆𑀩𑀁. 𑀦𑁄 𑀘𑁂 𑀅𑀢𑁆𑀣𑀺, 𑀬𑀁 𑀅𑀢𑁆𑀣𑀺, 𑀢𑀁 𑀤𑀸𑀢𑀩𑁆𑀩𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀭𑀺𑀓𑁆𑀔𑀸𑀭𑁂 𑀲𑀢𑀺 𑀘𑀻𑀯𑀭𑀪𑀸𑀕𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀪𑀺𑀓𑁆𑀔𑀼 𑀘 𑀲𑀸𑀫𑀡𑁂𑀭𑁄 𑀘 𑀲𑀘𑁂 𑀲𑀫𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀲𑀫𑀓𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀅𑀣 𑀲𑀸𑀫𑀡𑁂𑀭𑁄𑀯 𑀉𑀧𑀝𑁆𑀞𑀳𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀲𑀁𑀯𑀺𑀤𑀳𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀲𑀸𑀫𑀡𑁂𑀭𑀲𑁆𑀲 𑀚𑁂𑀝𑁆𑀞𑀓𑁄𑀝𑁆𑀞𑀸𑀲𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀲𑀸𑀫𑀡𑁂𑀭𑁄 𑀪𑀺𑀓𑁆𑀔𑀼𑀦𑀸 𑀆𑀦𑀻𑀢𑀉𑀤𑀓𑁂𑀦 𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑀸𑀧𑀦𑀫𑀢𑁆𑀢𑀫𑁂𑀯 𑀓𑀭𑁄𑀢𑀺, 𑀪𑀺𑀓𑁆𑀔𑀼 𑀉𑀧𑀝𑁆𑀞𑀳𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀚𑁂𑀝𑁆𑀞𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀩𑀳𑀽 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀬𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁂𑀦 𑀉𑀧𑀝𑁆𑀞𑀳𑀢𑀺, 𑀢𑀲𑁆𑀲 𑀯𑀺𑀲𑁂𑀲𑁄 𑀓𑀸𑀢𑀩𑁆𑀩𑁄.

𑀬𑁂𑀦 𑀧𑀦 𑀏𑀓𑀤𑀺𑀯𑀲𑀫𑁆𑀧𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀯𑀲𑁂𑀦 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀧𑀘𑀺𑀢𑁆𑀯𑀸 𑀤𑀺𑀦𑁆𑀦𑀁, 𑀦𑁆𑀳𑀸𑀦𑀁 𑀯𑀸 𑀧𑀝𑀺𑀲𑀸𑀤𑀺𑀢𑀁, 𑀲𑁄𑀧𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄𑀯. 𑀬𑁄 𑀧𑀦 𑀲𑀫𑀻𑀧𑀁 𑀅𑀦𑀸𑀕𑀦𑁆𑀢𑁆𑀯𑀸 𑀪𑁂𑀲𑀚𑁆𑀚𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑁂𑀲𑁂𑀢𑀺, 𑀅𑀬𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦 𑀳𑁄𑀢𑀺. 𑀬𑁄 𑀧𑀭𑀺𑀬𑁂𑀲𑀺𑀢𑁆𑀯𑀸 𑀕𑀸𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺, 𑀅𑀬𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄𑀯. 𑀏𑀓𑁄 𑀯𑀢𑁆𑀢𑀲𑀻𑀲𑁂𑀦 𑀚𑀕𑁆𑀕𑀢𑀺, 𑀏𑀓𑁄 𑀧𑀘𑁆𑀘𑀸𑀲𑀸𑀬, 𑀫𑀢𑀓𑀸𑀮𑁂 𑀉𑀪𑁄𑀧𑀺 𑀧𑀘𑁆𑀘𑀸𑀲𑀻𑀲𑀦𑁆𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀤𑀸𑀢𑀩𑁆𑀩𑀁. 𑀏𑀓𑁄 𑀉𑀧𑀝𑁆𑀞𑀳𑀺𑀢𑁆𑀯𑀸 𑀕𑀺𑀮𑀸𑀦𑀲𑁆𑀲 𑀯𑀸 𑀓𑀫𑁆𑀫𑁂𑀦 𑀅𑀢𑁆𑀢𑀦𑁄 𑀯𑀸 𑀓𑀫𑁆𑀫𑁂𑀦 𑀓𑀢𑁆𑀣𑀘𑀺 𑀕𑀢𑁄 ‘‘𑀧𑀼𑀦 𑀆𑀕𑀦𑁆𑀢𑁆𑀯𑀸 𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺, 𑀏𑀢𑀲𑁆𑀲𑀧𑀺 𑀤𑀸𑀢𑀩𑁆𑀩𑀁. 𑀏𑀓𑁄 𑀘𑀺𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀦 𑀲𑀓𑁆𑀓𑁄𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀲𑀘𑁂𑀧𑀺 𑀢𑀁 𑀤𑀺𑀯𑀲𑀫𑁂𑀯 𑀕𑀺𑀮𑀸𑀦𑁄 𑀓𑀸𑀮𑀁 𑀓𑀭𑁄𑀢𑀺, 𑀉𑀧𑀝𑁆𑀞𑀸𑀓𑀪𑀸𑀕𑁄 𑀦 𑀤𑀸𑀢𑀩𑁆𑀩𑁄. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄 𑀦𑀸𑀫 𑀕𑀺𑀳𑀻 𑀯𑀸 𑀳𑁄𑀢𑀼 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀦𑁆𑀢𑀫𑀲𑁄 𑀫𑀸𑀢𑀼𑀕𑀸𑀫𑁄𑀧𑀺, 𑀲𑀩𑁆𑀩𑁂 𑀪𑀸𑀕𑀁 𑀮𑀪𑀦𑁆𑀢𑀺. 𑀲𑀘𑁂 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑀘𑀻𑀯𑀭𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀁 𑀦𑀢𑁆𑀣𑀺, 𑀲𑀩𑁆𑀩𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁𑀬𑁂𑀯 𑀤𑀸𑀢𑀩𑁆𑀩𑀁. 𑀲𑀘𑁂𑀧𑀺 𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀅𑀜𑁆𑀜𑀁 𑀧𑀦 𑀩𑀳𑀼𑀫𑁆𑀧𑀺 𑀧𑀭𑀺𑀓𑁆𑀔𑀸𑀭𑀁 𑀢𑁂 𑀦 𑀮𑀪𑀦𑁆𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀳𑁄𑀢𑀺. 𑀅𑀯𑀲𑁂𑀲𑀁 𑀪𑀡𑁆𑀟𑀁 𑀩𑀳𑀼 𑀘𑁂𑀯 𑀫𑀳𑀕𑁆𑀖𑀜𑁆𑀘, 𑀢𑀺𑀘𑀻𑀯𑀭𑀁 𑀅𑀧𑁆𑀧𑀕𑁆𑀖𑀁, 𑀢𑀢𑁄 𑀕𑀳𑁂𑀢𑁆𑀯𑀸 𑀢𑀺𑀘𑀻𑀯𑀭𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄, 𑀲𑀩𑁆𑀩𑀜𑁆𑀘𑁂𑀢𑀁 𑀲𑀗𑁆𑀖𑀺𑀓𑀢𑁄𑀯 𑀮𑀩𑁆𑀪𑀢𑀺. 𑀲𑀘𑁂 𑀧𑀦 𑀲𑁄 𑀚𑀻𑀯𑀫𑀸𑀦𑁄𑀬𑁂𑀯 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀓𑀲𑁆𑀲𑀘𑀺 𑀅𑀤𑀸𑀲𑀺, 𑀓𑁄𑀘𑀺 𑀯𑀸 𑀯𑀺𑀲𑁆𑀲𑀸𑀲𑀁 𑀅𑀕𑁆𑀕𑀳𑁂𑀲𑀺, 𑀬𑀲𑁆𑀲 𑀤𑀺𑀦𑁆𑀦𑀁, 𑀬𑁂𑀦 𑀘 𑀕𑀳𑀺𑀢𑀁, 𑀢𑀲𑁆𑀲𑁂𑀯 𑀳𑁄𑀢𑀺, 𑀢𑀲𑁆𑀲 𑀭𑀼𑀘𑀺𑀬𑀸 𑀏𑀯 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀮𑀪𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀅𑀤𑀢𑁆𑀯𑀸 𑀤𑀽𑀭𑁂 𑀞𑀧𑀺𑀢𑀧𑀭𑀺𑀓𑁆𑀔𑀸𑀭𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀖𑀲𑁆𑀲𑁂𑀯 𑀳𑁄𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺 𑀅𑀯𑀺𑀪𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀓𑀸𑀮𑀓𑀢𑁂 𑀇𑀢𑀭𑁄 𑀲𑀸𑀫𑀻. 𑀩𑀳𑀽𑀦𑀫𑁆𑀧𑀺 𑀲𑀦𑁆𑀢𑀓𑁂 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀲𑀼 𑀫𑀢𑁂𑀲𑀼 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀲𑀘𑁂𑀧𑀺 𑀅𑀯𑀺𑀪𑀚𑀺𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑁂𑀦𑁆𑀢𑀺, 𑀅𑀤𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀯𑀺𑀪𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀲𑀼𑀤𑀺𑀦𑁆𑀦𑀁. 𑀢𑀁 𑀢𑁂𑀲𑀼 𑀫𑀢𑁂𑀲𑀼𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁𑀬𑁂𑀯 𑀳𑁄𑀢𑀺, 𑀦 𑀲𑀗𑁆𑀖𑀲𑁆𑀲.

𑀲𑀘𑁂 𑀯𑀲𑁆𑀲𑀁𑀯𑀼𑀝𑁆𑀞𑁄 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑁂 𑀯𑀸 𑀉𑀧𑁆𑀧𑀦𑁆𑀦𑁂 𑀯𑀸 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀯𑀸 𑀧𑀓𑁆𑀓𑀫𑀢𑀺, 𑀉𑀫𑁆𑀫𑀢𑁆𑀢𑀓𑁄 𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑀦𑀸𑀝𑁆𑀝𑁄 𑀉𑀓𑁆𑀔𑀺𑀢𑁆𑀢𑀓𑁄 𑀯𑀸 𑀳𑁄𑀢𑀺, 𑀲𑀦𑁆𑀢𑁂 𑀧𑀢𑀺𑀭𑀽𑀧𑁂 𑀕𑀸𑀳𑀓𑁂 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀯𑀺𑀩𑁆𑀪𑀫𑀢𑀺 𑀯𑀸 𑀓𑀸𑀮𑀁 𑀯𑀸 𑀓𑀭𑁄𑀢𑀺 𑀲𑀸𑀫𑀡𑁂𑀭𑁄 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄, 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄, 𑀧𑀡𑁆𑀟𑀓𑁄, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄, 𑀲𑀗𑁆𑀖𑀪𑁂𑀤𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑁄 𑀲𑀸𑀫𑀻, 𑀪𑀸𑀕𑁄 𑀦 𑀤𑀸𑀢𑀩𑁆𑀩𑁄.

𑀲𑀘𑁂 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺, 𑀓𑁄𑀲𑀫𑁆𑀩𑀓𑀪𑀺𑀓𑁆𑀔𑀽 𑀯𑀺𑀬 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀤𑀓𑁆𑀔𑀺𑀡𑁄𑀤𑀓𑀜𑁆𑀘 𑀕𑀦𑁆𑀥𑀸𑀤𑀻𑀦𑀺 𑀘 𑀤𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺, 𑀬𑀢𑁆𑀣 𑀯𑀸 𑀉𑀤𑀓𑀁 𑀤𑀺𑀦𑁆𑀦𑀁, 𑀬𑀲𑁆𑀫𑀺𑀁𑀬𑁂𑀯 𑀧𑀓𑁆𑀔𑁂 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺 ‘‘𑀲𑀗𑁆𑀖𑀲𑁆𑀲 𑀤𑁂𑀫𑀸’’𑀢𑀺, 𑀲𑀗𑁆𑀖𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑁄𑀝𑁆𑀞𑀸𑀲𑀸𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀤𑁆𑀯𑀻𑀳𑀺𑀧𑀺 𑀧𑀓𑁆𑀔𑁂𑀳𑀺 𑀏𑀓𑀢𑁄 𑀪𑀸𑀚𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀤𑀓𑁆𑀔𑀺𑀡𑁄𑀤𑀓𑀁 𑀕𑀦𑁆𑀥𑀸𑀤𑀻𑀦𑀺 𑀘 𑀤𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺 ‘‘𑀧𑀓𑁆𑀔𑀲𑁆𑀲 𑀤𑁂𑀫𑀸’’𑀢𑀺, 𑀧𑀓𑁆𑀔𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺. 𑀏𑀯𑀜𑁆𑀳𑀺 𑀤𑀺𑀦𑁆𑀦𑁂 𑀬𑀲𑁆𑀲 𑀓𑁄𑀝𑁆𑀞𑀸𑀲𑀲𑁆𑀲 𑀉𑀤𑀓𑀁 𑀤𑀺𑀦𑁆𑀦𑀁, 𑀢𑀲𑁆𑀲 𑀉𑀤𑀓𑀫𑁂𑀯 𑀳𑁄𑀢𑀺. 𑀬𑀲𑁆𑀲 𑀘𑀻𑀯𑀭𑀁 𑀤𑀺𑀦𑁆𑀦𑀁, 𑀢𑀲𑁆𑀲𑁂𑀯 𑀘𑀻𑀯𑀭𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀤𑀓𑁆𑀔𑀺𑀡𑁄𑀤𑀓𑀁 𑀧𑀫𑀸𑀡𑀁 𑀳𑁄𑀢𑀺, 𑀢𑀢𑁆𑀣 𑀏𑀓𑁄 𑀧𑀓𑁆𑀔𑁄 𑀤𑀓𑁆𑀔𑀺𑀡𑁄𑀤𑀓𑀲𑁆𑀲 𑀮𑀤𑁆𑀥𑀢𑁆𑀢𑀸 𑀘𑀻𑀯𑀭𑀸𑀦𑀺 𑀮𑀪𑀢𑀺, 𑀏𑀓𑁄 𑀘𑀻𑀯𑀭𑀸𑀦𑀫𑁂𑀯 𑀮𑀤𑁆𑀥𑀢𑁆𑀢𑀸𑀢𑀺 𑀉𑀪𑁄𑀳𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀬𑀣𑀸𑀯𑀼𑀟𑁆𑀠𑀁 𑀪𑀸𑀚𑁂𑀢𑀩𑁆𑀩𑀁. ‘‘𑀇𑀤𑀁 𑀓𑀺𑀭 𑀧𑀭𑀲𑀫𑀼𑀤𑁆𑀤𑁂 𑀮𑀓𑁆𑀔𑀡’’𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀘𑁂 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑀺𑀦𑁆𑀦𑀁, 𑀢𑀲𑁆𑀫𑀺𑀁𑀬𑁂𑀯 𑀧𑀓𑁆𑀔𑁂 𑀘𑀻𑀯𑀭𑀸𑀦𑀺 𑀤𑁂𑀦𑁆𑀢𑀺 ‘‘𑀧𑀓𑁆𑀔𑀲𑁆𑀲 𑀤𑁂𑀫𑀸’’𑀢𑀺, 𑀧𑀓𑁆𑀔𑀲𑁆𑀲𑁂𑀯 𑀢𑀸𑀦𑀺 𑀘𑀻𑀯𑀭𑀸𑀦𑀺, 𑀇𑀢𑀭𑁄 𑀧𑀓𑁆𑀔𑁄 𑀅𑀦𑀺𑀲𑁆𑀲𑀭𑁄𑀬𑁂𑀯. 𑀲𑀘𑁂 𑀧𑀦 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺, 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀪𑀸𑀚𑁂𑀢𑀩𑁆𑀩𑀁.

𑀲𑀘𑁂 𑀲𑀫𑁆𑀩𑀳𑀼𑀮𑁂𑀲𑀼 𑀪𑀺𑀓𑁆𑀔𑀽𑀲𑀼 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀲𑀼 𑀓𑁂𑀘𑀺 𑀪𑀺𑀓𑁆𑀔𑀽 𑀧𑀁𑀲𑀼𑀓𑀽𑀮𑀢𑁆𑀣𑀸𑀬 𑀲𑀼𑀲𑀸𑀦𑀁 𑀑𑀓𑁆𑀓𑀫𑀦𑁆𑀢𑀺, 𑀓𑁂𑀘𑀺 𑀅𑀦𑀸𑀕𑀫𑁂𑀦𑁆𑀢𑀸 𑀧𑀓𑁆𑀓𑀫𑀦𑁆𑀢𑀺, 𑀅𑀦𑀸𑀕𑀫𑁂𑀦𑁆𑀢𑀸𑀦𑀁 𑀦 𑀅𑀓𑀸𑀫𑀸 𑀪𑀸𑀕𑁄 𑀤𑀸𑀢𑀩𑁆𑀩𑁄, 𑀆𑀕𑀫𑁂𑀦𑁆𑀢𑀸𑀦𑀁 𑀧𑀦 𑀅𑀓𑀸𑀫𑀸𑀧𑀺 𑀤𑀸𑀢𑀩𑁆𑀩𑁄 𑀪𑀸𑀕𑁄. 𑀬𑀤𑀺 𑀧𑀦 𑀫𑀦𑀼𑀲𑁆𑀲𑀸 ‘‘𑀇𑀥𑀸𑀕𑀢𑀸 𑀏𑀯 𑀕𑀡𑁆𑀳𑀦𑁆𑀢𑀽’’𑀢𑀺 𑀤𑁂𑀦𑁆𑀢𑀺, 𑀲𑀜𑁆𑀜𑀸𑀡𑀁 𑀯𑀸 𑀓𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 ‘‘𑀲𑀫𑁆𑀧𑀢𑁆𑀢𑀸 𑀕𑀡𑁆𑀳𑀦𑁆𑀢𑀽’’𑀢𑀺, 𑀲𑀫𑁆𑀧𑀢𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸, 𑀬𑁂𑀦 𑀕𑀳𑀺𑀢𑀁, 𑀲𑁄 𑀏𑀯 𑀲𑀸𑀫𑀻. 𑀲𑀘𑁂 𑀓𑁂𑀘𑀺 𑀪𑀺𑀓𑁆𑀔𑀽 𑀧𑀞𑀫𑀁 𑀲𑀼𑀲𑀸𑀦𑀁 𑀑𑀓𑁆𑀓𑀫𑀦𑁆𑀢𑀺, 𑀓𑁂𑀘𑀺 𑀧𑀘𑁆𑀙𑀸, 𑀢𑀢𑁆𑀣 𑀧𑀞𑀫𑀁 𑀑𑀓𑁆𑀓𑀦𑁆𑀢𑀸 𑀧𑀁𑀲𑀼𑀓𑀽𑀮𑀁 𑀮𑀪𑀦𑁆𑀢𑀺, 𑀧𑀘𑁆𑀙𑀸 𑀑𑀓𑁆𑀓𑀦𑁆𑀢𑀸 𑀦 𑀮𑀪𑀦𑁆𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀙𑀸 𑀑𑀓𑁆𑀓𑀦𑁆𑀢𑀸𑀦𑀁 𑀦 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁧) 𑀯𑀘𑀦𑀢𑁄 𑀧𑀘𑁆𑀙𑀸 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑁄 𑀦 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀲𑀩𑁆𑀩𑁂𑀧𑀺 𑀲𑀫𑀁 𑀑𑀓𑁆𑀓𑀦𑁆𑀢𑀸, 𑀓𑁂𑀘𑀺 𑀮𑀪𑀦𑁆𑀢𑀺, 𑀓𑁂𑀘𑀺 𑀦 𑀮𑀪𑀦𑁆𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀤𑀺𑀲𑀸𑀦𑀁 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸𑀧𑀺 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁧) 𑀯𑀘𑀦𑀢𑁄 𑀲𑀫𑀁 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸𑀧𑀺 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀮𑀤𑁆𑀥𑀁 𑀧𑀁𑀲𑀼𑀓𑀽𑀮𑀁 𑀲𑀩𑁆𑀩𑁂 𑀪𑀸𑀚𑁂𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀩𑀳𑀺𑀫𑁂𑀯 𑀓𑀢𑀺𑀓𑀁 𑀓𑀢𑁆𑀯𑀸 𑀲𑀼𑀲𑀸𑀦𑀁 𑀑𑀓𑁆𑀓𑀦𑁆𑀢𑀸 𑀓𑁂𑀘𑀺 𑀮𑀪𑀦𑁆𑀢𑀺, 𑀓𑁂𑀘𑀺 𑀦 𑀮𑀪𑀦𑁆𑀢𑀺, ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀢𑀺𑀓𑀁 𑀓𑀢𑁆𑀯𑀸 𑀑𑀓𑁆𑀓𑀦𑁆𑀢𑀸𑀦𑀁 𑀅𑀓𑀸𑀫𑀸 𑀪𑀸𑀕𑀁 𑀤𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁧) 𑀯𑀘𑀦𑀢𑁄 𑀓𑀢𑀺𑀓𑀁 𑀓𑀢𑁆𑀯𑀸 𑀑𑀓𑁆𑀓𑀦𑁆𑀢𑀸𑀦𑀫𑁆𑀧𑀺 𑀅𑀓𑀸𑀫𑀸 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀅𑀬𑀁 𑀢𑀸𑀯 𑀘𑀻𑀯𑀭𑀪𑀸𑀚𑀦𑀻𑀬𑀓𑀣𑀸.

𑁨𑁦𑁯. 𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑁂 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓’’𑀦𑁆𑀢𑀺 (𑀘𑀽𑀴𑀯. 𑁩𑁨𑁫) 𑀏𑀯𑀁 𑀅𑀦𑀼𑀜𑁆𑀜𑀸𑀢𑁂𑀲𑀼 𑀲𑀗𑁆𑀖𑀪𑀢𑁆𑀢𑀸𑀤𑀻𑀲𑀼 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫) 𑁋

𑀲𑀗𑁆𑀖𑀪𑀢𑁆𑀢𑀁 𑀦𑀸𑀫 𑀲𑀓𑀮𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁. 𑀢𑀲𑁆𑀫𑀸 𑀲𑀗𑁆𑀖𑀪𑀢𑁆𑀢𑁂 𑀞𑀺𑀢𑀺𑀓𑀸 𑀦𑀸𑀫 𑀦𑀢𑁆𑀣𑀺, 𑀢𑀢𑁄𑀬𑁂𑀯 𑀘 ‘‘𑀅𑀫𑁆𑀳𑀸𑀓𑀁 𑀅𑀚𑁆𑀚 𑀤𑀲 𑀤𑁆𑀯𑀸𑀤𑀲 𑀤𑀺𑀯𑀲𑀸 𑀪𑀼𑀜𑁆𑀚𑀦𑁆𑀢𑀸𑀦𑀁, 𑀇𑀤𑀸𑀦𑀺 𑀅𑀜𑁆𑀜𑀢𑁄 𑀪𑀺𑀓𑁆𑀔𑀽 𑀆𑀦𑁂𑀣𑀸’’𑀢𑀺 𑀦 𑀏𑀯𑀁 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁, ‘‘𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀅𑀫𑁆𑀳𑁂𑀳𑀺 𑀦 𑀮𑀤𑁆𑀥𑀁, 𑀇𑀤𑀸𑀦𑀺 𑀢𑀁 𑀅𑀫𑁆𑀳𑀸𑀓𑀁 𑀕𑀸𑀳𑁂𑀣𑀸’’𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀦 𑀮𑀪𑀢𑀺. 𑀢𑀜𑁆𑀳𑀺 𑀆𑀕𑀢𑀸𑀕𑀢𑀸𑀦𑀁 𑀧𑀸𑀧𑀼𑀡𑀸𑀢𑀺𑀬𑁂𑀯.

𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀲𑀼 𑀧𑀦 𑀅𑀬𑀁 𑀦𑀬𑁄 𑁋 𑀭𑀜𑁆𑀜𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁂𑀦 𑀯𑀸 ‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀆𑀦𑁂𑀣𑀸’’𑀢𑀺 𑀧𑀳𑀺𑀢𑁂 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀞𑀺𑀢𑀺𑀓𑀸 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀲𑀘𑁂 𑀅𑀢𑁆𑀣𑀺, 𑀢𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀦𑁄 𑀘𑁂, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀉𑀤𑁆𑀤𑁂𑀲𑀓𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀦 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀁. 𑀢𑁂 𑀧𑀦 𑀥𑀼𑀢𑀗𑁆𑀕𑀁 𑀭𑀓𑁆𑀔𑀦𑁆𑀢𑀸 𑀲𑀬𑀫𑁂𑀯 𑀅𑀢𑀺𑀓𑁆𑀓𑀫𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀕𑀸𑀳𑀺𑀬𑀫𑀸𑀦𑁂 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀕𑀸𑀳𑀻𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀕𑀸𑀳𑁂𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. ‘‘𑀅𑀲𑀼𑀓𑀯𑀺𑀳𑀸𑀭𑁂 𑀩𑀳𑀼 𑀉𑀤𑁆𑀤𑁂𑀲𑀪𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁, 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀕𑀸𑀳𑁂𑀢𑀩𑁆𑀩𑀫𑁂𑀯. ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀸𑀦𑀁 𑀕𑀸𑀳𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀕𑀸𑀳𑁂𑀢𑀩𑁆𑀩𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀕𑀸𑀳𑁂𑀢𑀩𑁆𑀩𑀫𑁂𑀯. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀧𑀼𑀦 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀕𑀸𑀳𑁂𑀢𑀩𑁆𑀩𑀁.

𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀓𑀁 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀸𑀬𑀧𑀺 𑀉𑀧𑀘𑀸𑀭𑀲𑀻𑀫𑀸𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀆𑀭𑁄𑀘𑀺𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀢𑀲𑁆𑀫𑀺𑀁𑀬𑁂𑀯 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑁂 𑀕𑀸𑀳𑁂𑀢𑀩𑁆𑀩𑀁. 𑀏𑀓𑁄 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀺𑀡𑀢𑀺 ‘‘𑀲𑁆𑀯𑁂 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀲 𑀪𑀺𑀓𑁆𑀔𑀽 𑀧𑀳𑀺𑀡𑀣𑀸’’𑀢𑀺, 𑀢𑁂𑀦 𑀲𑁄 𑀅𑀢𑁆𑀣𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑁄. 𑀲𑀘𑁂 𑀢𑀁 𑀤𑀺𑀯𑀲𑀁 𑀧𑀫𑀼𑀲𑁆𑀲𑀢𑀺, 𑀤𑀼𑀢𑀺𑀬𑀤𑀺𑀯𑀲𑁂 𑀧𑀸𑀢𑁄𑀯 𑀆𑀭𑁄𑀘𑁂𑀢𑀩𑁆𑀩𑁄, 𑀅𑀣 𑀧𑀫𑀼𑀲𑁆𑀲𑀺𑀢𑁆𑀯𑀸𑀯 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀲𑀭𑀢𑀺, 𑀬𑀸𑀯 𑀉𑀧𑀘𑀸𑀭𑀲𑀻𑀫𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀬𑀸 𑀪𑁄𑀚𑀦𑀲𑀸𑀮𑀸𑀬 𑀧𑀓𑀢𑀺𑀞𑀺𑀢𑀺𑀓𑀸, 𑀢𑀲𑁆𑀲𑀸𑀬𑁂𑀯 𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀉𑀧𑀘𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀦𑁆𑀢𑁄, 𑀪𑀺𑀓𑁆𑀔𑀽 𑀘 𑀉𑀧𑀘𑀸𑀭𑀲𑀻𑀫𑀝𑁆𑀞𑀓𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀤𑁆𑀯𑀸𑀤𑀲𑀳𑀢𑁆𑀣𑀦𑁆𑀢𑀭𑀁 𑀅𑀯𑀺𑀚𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀧𑀓𑀢𑀺𑀞𑀺𑀢𑀺𑀓𑀸𑀬 𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀪𑀺𑀓𑁆𑀔𑀽𑀦𑀁 𑀧𑀦 𑀢𑀸𑀤𑀺𑀲𑁂 𑀏𑀓𑀸𑀩𑀤𑁆𑀥𑁂 𑀅𑀲𑀢𑀺 𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀬𑀲𑁆𑀫𑀺𑀁 𑀞𑀸𑀦𑁂 𑀲𑀭𑀢𑀺, 𑀢𑀢𑁆𑀣 𑀦𑀯𑀁 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀅𑀦𑁆𑀢𑁄𑀕𑀸𑀫𑁂 𑀆𑀲𑀦𑀲𑀸𑀮𑀸𑀬 𑀲𑀭𑀦𑁆𑀢𑁂𑀦 𑀆𑀲𑀦𑀲𑀸𑀮𑀸𑀬 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀭𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀫𑁂𑀯, 𑀅𑀕𑀸𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀦 𑀳𑀺 𑀏𑀢𑀁 𑀤𑀼𑀢𑀺𑀬𑀤𑀺𑀯𑀲𑁂 𑀮𑀩𑁆𑀪𑀢𑀻𑀢𑀺.

𑀲𑀘𑁂 𑀲𑀓𑀯𑀺𑀳𑀸𑀭𑀢𑁄 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀓𑁄𑀘𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀉𑀤𑁆𑀤𑀺𑀲𑀸𑀧𑁂𑀢𑀺, 𑀬𑀸𑀯 𑀅𑀦𑁆𑀢𑁄𑀉𑀧𑀘𑀸𑀭𑁂 𑀯𑀸 𑀉𑀧𑀘𑀸𑀭𑀲𑀻𑀫𑀝𑁆𑀞𑀓𑁂𑀳𑀺 𑀲𑀤𑁆𑀥𑀺𑀁 𑀯𑀼𑀢𑁆𑀢𑀦𑀬𑁂𑀦 𑀏𑀓𑀸𑀩𑀤𑁆𑀥𑀸 𑀯𑀸 𑀳𑁄𑀦𑁆𑀢𑀺, 𑀢𑀸𑀯 𑀲𑀓𑀯𑀺𑀳𑀸𑀭𑁂 𑀞𑀺𑀢𑀺𑀓𑀸𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀩𑀳𑀺𑀉𑀧𑀘𑀸𑀭𑁂 𑀞𑀺𑀢𑀸𑀦𑀁 𑀤𑀺𑀦𑁆𑀦𑀁 𑀧𑀦 ‘‘𑀲𑀗𑁆𑀖𑀢𑁄, 𑀪𑀦𑁆𑀢𑁂, 𑀏𑀢𑁆𑀢𑀓𑁂 𑀦𑀸𑀫 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀁 𑀕𑀸𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀤𑁆𑀯𑀸𑀤𑀲𑀳𑀢𑁆𑀣𑀦𑁆𑀢𑀭𑀁 𑀅𑀯𑀺𑀚𑀳𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑀦𑀬𑁂𑀦 𑀤𑀽𑀭𑁂 𑀞𑀺𑀢𑀸𑀧𑀺 𑀲𑀫𑁆𑀧𑀢𑁆𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁂 𑀬𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀧𑀯𑀺𑀝𑁆𑀞𑀸𑀦𑀁 𑀆𑀭𑁄𑀘𑁂𑀦𑁆𑀢𑀺, 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀞𑀺𑀢𑀺𑀓𑀸𑀯𑀲𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀕𑀸𑀫𑀤𑁆𑀯𑀸𑀭𑁂 𑀯𑀸 𑀯𑀻𑀣𑀺𑀬𑀁 𑀯𑀸 𑀘𑀢𑀼𑀓𑁆𑀓𑁂 𑀯𑀸 𑀅𑀦𑁆𑀢𑀭𑀖𑀭𑁂 𑀯𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀓𑁄𑀘𑀺 𑀲𑀗𑁆𑀖𑀼𑀤𑁆𑀤𑁂𑀲𑀁 𑀆𑀭𑁄𑀘𑁂𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀦𑁆𑀢𑁄𑀉𑀧𑀘𑀸𑀭𑀕𑀢𑀸𑀦𑀁 𑀕𑀸𑀳𑁂𑀢𑀩𑁆𑀩𑀁.

𑀖𑀭𑀽𑀧𑀘𑀸𑀭𑁄 𑀘𑁂𑀢𑁆𑀣 𑀏𑀓𑀖𑀭𑀁 𑀏𑀓𑀽𑀧𑀘𑀸𑀭𑀁, 𑀏𑀓𑀖𑀭𑀁 𑀦𑀸𑀦𑀽𑀧𑀘𑀸𑀭𑀁, 𑀦𑀸𑀦𑀸𑀖𑀭𑀁 𑀏𑀓𑀽𑀧𑀘𑀸𑀭𑀁, 𑀦𑀸𑀦𑀸𑀖𑀭𑀁 𑀦𑀸𑀦𑀽𑀧𑀘𑀸𑀭𑀦𑁆𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀏𑀓𑀓𑀼𑀮𑀲𑁆𑀲 𑀖𑀭𑀁 𑀏𑀓𑀯𑀴𑀜𑁆𑀚𑀁 𑀳𑁄𑀢𑀺, 𑀢𑀁 𑀲𑀼𑀧𑁆𑀧𑀧𑀸𑀢𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑁄 𑀏𑀓𑀽𑀧𑀘𑀸𑀭𑀁 𑀦𑀸𑀫, 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀉𑀤𑁆𑀤𑁂𑀲𑀮𑀸𑀪𑁄 𑀏𑀓𑀲𑁆𑀫𑀺𑀁 𑀉𑀧𑀘𑀸𑀭𑁂 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦𑀧𑀺 𑀞𑀺𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀏𑀢𑀁 𑀏𑀓𑀖𑀭𑀁 𑀏𑀓𑀽𑀧𑀘𑀸𑀭𑀁 𑀦𑀸𑀫. 𑀬𑀁 𑀧𑀦 𑀏𑀓𑀖𑀭𑀁 𑀤𑁆𑀯𑀺𑀦𑁆𑀦𑀁 𑀪𑀭𑀺𑀬𑀸𑀦𑀁 𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀬 𑀫𑀚𑁆𑀛𑁂 𑀪𑀺𑀢𑁆𑀢𑀺𑀁 𑀉𑀝𑁆𑀞𑀧𑁂𑀢𑁆𑀯𑀸 𑀦𑀸𑀦𑀸𑀤𑁆𑀯𑀸𑀭𑀯𑀴𑀜𑁆𑀚𑀁 𑀓𑀢𑀁, 𑀢𑀢𑁆𑀣𑀼𑀧𑁆𑀧𑀦𑁆𑀦𑁄 𑀉𑀤𑁆𑀤𑁂𑀲𑀮𑀸𑀪𑁄 𑀪𑀺𑀢𑁆𑀢𑀺𑀅𑀦𑁆𑀢𑀭𑀺𑀓𑀲𑁆𑀲 𑀦 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺. 𑀏𑀢𑀁 𑀏𑀓𑀖𑀭𑀁 𑀦𑀸𑀦𑀽𑀧𑀘𑀸𑀭𑀁 𑀦𑀸𑀫. 𑀬𑀲𑁆𑀫𑀺𑀁 𑀧𑀦 𑀖𑀭𑁂 𑀩𑀳𑀽 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀢𑁄 𑀧𑀝𑁆𑀞𑀸𑀬 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀧𑀝𑀺𑀯𑀺𑀲𑁆𑀲𑀓𑀖𑀭𑀸𑀦𑀺𑀧𑀺 𑀧𑀽𑀭𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀦𑁆𑀢𑀺, 𑀢𑀢𑁆𑀣 𑀉𑀧𑁆𑀧𑀦𑁆𑀦𑁄 𑀉𑀤𑁆𑀤𑁂𑀲𑀮𑀸𑀪𑁄 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺. 𑀬𑀫𑁆𑀧𑀺 𑀦𑀸𑀦𑀸𑀓𑀼𑀮𑀲𑁆𑀲 𑀦𑀺𑀯𑁂𑀲𑀦𑀁 𑀫𑀚𑁆𑀛𑁂 𑀪𑀺𑀢𑁆𑀢𑀺𑀁 𑀅𑀓𑀢𑁆𑀯𑀸 𑀏𑀓𑀤𑁆𑀯𑀸𑀭𑁂𑀦𑁂𑀯 𑀯𑀴𑀜𑁆𑀚𑀦𑁆𑀢𑀺, 𑀢𑀢𑁆𑀭𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑀁 𑀦𑀸𑀦𑀸𑀖𑀭𑀁 𑀏𑀓𑀽𑀧𑀘𑀸𑀭𑀁 𑀦𑀸𑀫. 𑀬𑁄 𑀧𑀦 𑀦𑀸𑀦𑀸𑀦𑀺𑀯𑁂𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑁂𑀲𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀺𑀜𑁆𑀘𑀸𑀧𑀺 𑀪𑀺𑀢𑁆𑀢𑀺𑀘𑁆𑀙𑀺𑀤𑁆𑀤𑁂𑀦 𑀪𑀺𑀓𑁆𑀔𑀽 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀦𑀺𑀲𑀺𑀦𑁆𑀦𑀸𑀦𑀁𑀬𑁂𑀯 𑀧𑀸𑀧𑀼𑀡𑀸𑀢𑀺. 𑀏𑀢𑀁 𑀦𑀸𑀦𑀸𑀖𑀭𑀁 𑀦𑀸𑀦𑀽𑀧𑀘𑀸𑀭𑀁 𑀦𑀸𑀫.

𑀬𑁄 𑀧𑀦 𑀕𑀸𑀫𑀤𑁆𑀯𑀸𑀭𑀯𑀻𑀣𑀺𑀘𑀢𑀼𑀓𑁆𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀞𑀸𑀦𑁂 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑁆𑀫𑀺𑀁 𑀅𑀲𑀢𑀺 𑀅𑀢𑁆𑀢𑀦𑁄𑀯 𑀧𑀸𑀧𑀼𑀡𑀸𑀧𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀜𑁆𑀜𑀁 𑀮𑀪𑀢𑀺, 𑀢𑁂𑀦 𑀬𑀁 𑀅𑀜𑁆𑀜𑀁 𑀦𑀯𑀓𑀁 𑀯𑀸 𑀯𑀼𑀟𑁆𑀠𑀁 𑀯𑀸 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀓𑁄𑀘𑀺 𑀦𑀢𑁆𑀣𑀺, 𑀅𑀢𑁆𑀢𑀦𑁄𑀯 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀮𑀁 𑀧𑀝𑀺𑀫𑀸𑀦𑁂𑀦𑁆𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 ‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣, 𑀉𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣, 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀧𑀢𑁆𑀢𑀁 𑀤𑁂𑀣, 𑀲𑀗𑁆𑀖𑀺𑀓𑀁 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀸 𑀯𑀤𑀢𑀺, 𑀉𑀤𑁆𑀤𑁂𑀲𑀧𑀢𑁆𑀢𑀁 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. ‘‘𑀲𑀗𑁆𑀖𑀼𑀤𑁆𑀤𑁂𑀲𑀪𑀺𑀓𑁆𑀔𑀼𑀁 𑀤𑁂𑀣, 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀁 𑀤𑁂𑀣, 𑀲𑀗𑁆𑀖𑀺𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀉𑀤𑁆𑀤𑁂𑀲𑀓𑁄 𑀧𑀦𑁂𑀢𑁆𑀣 𑀧𑁂𑀲𑀮𑁄 𑀮𑀚𑁆𑀚𑀻 𑀫𑁂𑀥𑀸𑀯𑀻 𑀇𑀘𑁆𑀙𑀺𑀢𑀩𑁆𑀩𑁄, 𑀢𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀞𑀺𑀢𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀞𑀺𑀢𑀺𑀓𑀁 𑀚𑀸𑀦𑀦𑁆𑀢𑁄 𑀦𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀅𑀳𑀁 𑀚𑀸𑀦𑀸𑀫𑀺, 𑀤𑀲𑀯𑀲𑁆𑀲𑁂𑀦 𑀮𑀤𑁆𑀥’’𑀦𑁆𑀢𑀺 𑀓𑁄𑀘𑀺 𑀪𑀡𑀢𑀺, ‘‘𑀅𑀢𑁆𑀣𑀸𑀯𑀼𑀲𑁄, 𑀤𑀲𑀯𑀲𑁆𑀲𑀸 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀲𑀘𑁂 𑀢𑀲𑁆𑀲 𑀲𑀼𑀢𑁆𑀯𑀸𑀯 ‘‘𑀤𑀲𑀯𑀲𑁆𑀲𑀫𑁆𑀳 𑀤𑀲𑀯𑀲𑁆𑀲𑀫𑁆𑀳𑀸’’𑀢𑀺 𑀩𑀳𑀽 𑀆𑀕𑀘𑁆𑀙𑀦𑁆𑀢𑀺, ‘‘𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀕𑀢𑁆𑀯𑀸 ‘‘𑀲𑀩𑁆𑀩𑁂 𑀅𑀧𑁆𑀧𑀲𑀤𑁆𑀤𑀸 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑀩𑁆𑀩𑀸, 𑀞𑀧𑁂𑀢𑁆𑀯𑀸 ‘‘𑀓𑀢𑀺 𑀪𑀺𑀓𑁆𑀔𑀽 𑀇𑀘𑁆𑀙𑀣𑀸’’𑀢𑀺 𑀉𑀧𑀸𑀲𑀓𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀏𑀢𑁆𑀢𑀓𑁂 𑀦𑀸𑀫, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀦𑀯𑀓𑀲𑁆𑀲 𑀯𑀲𑁆𑀲𑀕𑁆𑀕𑀜𑁆𑀘 𑀉𑀢𑀼 𑀘 𑀤𑀺𑀯𑀲𑀪𑀸𑀕𑁄 𑀘 𑀙𑀸𑀬𑀸 𑀘 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀲𑀘𑁂 𑀙𑀸𑀬𑀸𑀬𑀧𑀺 𑀧𑀼𑀘𑁆𑀙𑀺𑀬𑀫𑀸𑀦𑀸𑀬 𑀅𑀜𑁆𑀜𑁄 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀅𑀣 𑀙𑀸𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀢𑀼𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀯𑀼𑀟𑁆𑀠𑀢𑀭𑁄 𑀆𑀕𑀘𑁆𑀙𑀢𑀺, 𑀦 𑀮𑀪𑀢𑀺. 𑀓𑀣𑀸𑀧𑀧𑀜𑁆𑀘𑁂𑀦 𑀳𑀺 𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀧𑀺 𑀕𑀸𑀳𑀺𑀢𑀁 𑀲𑀼𑀕𑁆𑀕𑀸𑀳𑀺𑀢𑀁, 𑀅𑀢𑀺𑀓𑁆𑀓𑀦𑁆𑀢𑀁 𑀲𑀼𑀅𑀢𑀺𑀓𑁆𑀓𑀦𑁆𑀢𑀁. 𑀪𑀸𑀚𑀦𑀻𑀬𑀪𑀡𑁆𑀟𑀜𑁆𑀳𑀺 𑀦𑀸𑀫𑁂𑀢𑀁 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀲𑀫𑁆𑀧𑀢𑁆𑀢𑀪𑀸𑀯𑁄 𑀉𑀧𑀘𑀸𑀭𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄. 𑀆𑀲𑀦𑀲𑀸𑀮𑀸𑀬 𑀘 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁄 𑀉𑀧𑀘𑀸𑀭𑁄, 𑀢𑀲𑁆𑀫𑀺𑀁 𑀞𑀺𑀢𑀲𑁆𑀲 𑀮𑀸𑀪𑁄 𑀧𑀸𑀧𑀼𑀡𑀸𑀢𑀺.

𑀓𑁄𑀘𑀺 𑀆𑀲𑀦𑀲𑀸𑀮𑀢𑁄 𑀅𑀝𑁆𑀞 𑀉𑀤𑁆𑀤𑁂𑀲𑀧𑀢𑁆𑀢𑁂 𑀆𑀳𑀭𑀸𑀧𑁂𑀢𑁆𑀯𑀸 𑀲𑀢𑁆𑀢 𑀧𑀢𑁆𑀢𑁂 𑀧𑀡𑀻𑀢𑀪𑁄𑀚𑀦𑀸𑀦𑀁, 𑀏𑀓𑀁 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀲𑀦𑀲𑀸𑀮𑀁 𑀧𑀳𑀺𑀡𑀢𑀺, 𑀕𑀳𑁂𑀢𑁆𑀯𑀸 𑀆𑀕𑀢𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀳𑀢𑁆𑀣𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀬𑁂𑀦 𑀬𑀁 𑀮𑀤𑁆𑀥𑀁, 𑀢𑀲𑁆𑀲𑁂𑀯 𑀢𑀁 𑀳𑁄𑀢𑀺. 𑀬𑁂𑀦 𑀧𑀦 𑀉𑀤𑀓𑀁 𑀮𑀤𑁆𑀥𑀁, 𑀢𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁, 𑀢𑀜𑁆𑀘 𑀮𑀽𑀔𑀁 𑀯𑀸 𑀮𑀪𑀢𑀼 𑀧𑀡𑀻𑀢𑀁 𑀯𑀸 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀁 𑀯𑀸, 𑀢𑀲𑁆𑀲𑁂𑀯 𑀢𑀁 𑀳𑁄𑀢𑀺. 𑀈𑀤𑀺𑀲𑁄 𑀳𑀺𑀲𑁆𑀲 𑀧𑀼𑀜𑁆𑀜𑀯𑀺𑀲𑁂𑀲𑁄, 𑀉𑀤𑀓𑀁 𑀧𑀦 𑀬𑀲𑁆𑀫𑀸 𑀆𑀫𑀺𑀲𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀢𑀺. 𑀲𑀘𑁂 𑀧𑀦 𑀢𑁂 𑀕𑀳𑁂𑀢𑁆𑀯𑀸 𑀆𑀕𑀢𑀸 ‘‘𑀇𑀤𑀁 𑀓𑀺𑀭, 𑀪𑀦𑁆𑀢𑁂, 𑀲𑀩𑁆𑀩𑀁 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀣𑀸’’𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀉𑀤𑀓𑀁 𑀧𑀸𑀢𑀩𑁆𑀩𑀁. ‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀝𑁆𑀞 𑀫𑀳𑀸𑀣𑁂𑀭𑁂 𑀤𑁂𑀣, 𑀫𑀚𑁆𑀛𑀺𑀫𑁂 𑀤𑁂𑀣, 𑀦𑀯𑀓𑁂 𑀤𑁂𑀣, 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁂 𑀲𑀸𑀫𑀡𑁂𑀭𑁂 𑀤𑁂𑀣, 𑀫𑀚𑁆𑀛𑀺𑀫𑀪𑀸𑀡𑀓𑀸𑀤𑀬𑁄 𑀤𑁂𑀣, 𑀫𑀬𑁆𑀳𑀁 𑀜𑀸𑀢𑀺𑀪𑀺𑀓𑁆𑀔𑀽 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀲𑁆𑀲 𑀧𑀦 ‘‘𑀉𑀧𑀸𑀲𑀓, 𑀢𑁆𑀯𑀁 𑀏𑀯𑀁 𑀯𑀤𑀲𑀺, 𑀞𑀺𑀢𑀺𑀓𑀸𑀬 𑀧𑀦 𑀢𑁂𑀲𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀞𑀺𑀢𑀺𑀓𑀸𑀯𑀲𑁂𑀦𑁂𑀯 𑀤𑀸𑀢𑀩𑁆𑀩𑀸. 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑁂𑀲𑀼 𑀮𑀤𑁆𑀥𑁂𑀲𑀼 𑀲𑀘𑁂 𑀤𑀸𑀬𑀓𑀸𑀦𑀁 𑀖𑀭𑁂 𑀫𑀗𑁆𑀕𑀮𑀁 𑀳𑁄𑀢𑀺, ‘‘𑀢𑀼𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀧𑁂𑀲𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀲𑁆𑀫𑀺𑀁 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑁂 𑀧𑀞𑀫𑀪𑀸𑀕𑁄 𑀲𑀸𑀫𑀡𑁂𑀭𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀅𑀦𑀼𑀪𑀸𑀕𑁄 𑀫𑀳𑀸𑀣𑁂𑀭𑀸𑀦𑀁, 𑀦 𑀢𑀢𑁆𑀣 𑀲𑀸𑀫𑀡𑁂𑀭𑀸 ‘‘𑀫𑀬𑀁 𑀧𑀞𑀫𑀪𑀸𑀕𑀁 𑀮𑀪𑀺𑀫𑁆𑀳𑀸’’𑀢𑀺 𑀧𑀼𑀭𑀢𑁄 𑀕𑀦𑁆𑀢𑀼𑀁 𑀮𑀪𑀦𑁆𑀢𑀺, 𑀬𑀣𑀸𑀧𑀝𑀺𑀧𑀸𑀝𑀺𑀬𑀸 𑀏𑀯 𑀕𑀦𑁆𑀢𑀩𑁆𑀩𑀁. ‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀼𑀫𑁆𑀳𑁂 𑀏𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀬𑁆𑀳𑀁 𑀅𑀜𑁆𑀜𑀤𑀸𑀧𑀺 𑀚𑀸𑀦𑀺𑀲𑁆𑀲𑀲𑀺, 𑀞𑀺𑀢𑀺𑀓𑀸 𑀧𑀦 𑀏𑀯𑀁 𑀕𑀘𑁆𑀙𑀢𑀻’’𑀢𑀺 𑀞𑀺𑀢𑀺𑀓𑀸𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀅𑀣 ‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀕𑀸𑀳𑀺𑀢𑁂𑀬𑁂𑀯 𑀧𑀢𑁆𑀢𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀆𑀳𑀭𑀢𑀺, 𑀆𑀳𑀝𑀫𑁆𑀧𑀺 𑀞𑀺𑀢𑀺𑀓𑀸𑀬 𑀏𑀯 𑀕𑀸𑀳𑁂𑀢𑀩𑁆𑀩𑀁.

𑀏𑀓𑁄 ‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀧𑁂𑀲𑀺𑀢𑁄 ‘‘𑀪𑀦𑁆𑀢𑁂, 𑀏𑀓𑀁 𑀧𑀢𑁆𑀢𑀁 𑀤𑁂𑀣, 𑀦𑀺𑀫𑀦𑁆𑀢𑀦𑀪𑀢𑁆𑀢𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀺, 𑀲𑁄 𑀘𑁂 ‘‘𑀉𑀤𑁆𑀤𑁂𑀲𑀪𑀢𑁆𑀢𑀖𑀭𑀢𑁄 𑀅𑀬𑀁 𑀆𑀕𑀢𑁄’’𑀢𑀺 𑀜𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 ‘‘𑀦𑀦𑀼 𑀢𑁆𑀯𑀁 𑀅𑀲𑀼𑀓𑀖𑀭𑀢𑁄 𑀆𑀕𑀢𑁄’’𑀢𑀺 𑀯𑀼𑀢𑁆𑀢𑁄 ‘‘𑀆𑀫, 𑀪𑀦𑁆𑀢𑁂, 𑀦 𑀦𑀺𑀫𑀦𑁆𑀢𑀦𑀪𑀢𑁆𑀢𑀁, 𑀉𑀤𑁆𑀤𑁂𑀲𑀪𑀢𑁆𑀢’’𑀦𑁆𑀢𑀺 𑀪𑀡𑀢𑀺, 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀬𑁄 𑀧𑀦 ‘‘𑀏𑀓𑀁 𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀦𑁆𑀢𑀺 𑀯𑀢𑁆𑀯𑀸 𑀆𑀳𑀭𑀸𑀫𑀻’’𑀢𑀺 𑀯𑀢𑁆𑀯𑀸 ‘‘𑀬𑀣𑀸 𑀢𑁂 𑀭𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑁄 𑀆𑀕𑀘𑁆𑀙𑀢𑀺, 𑀅𑀬𑀁 𑀯𑀺𑀲𑁆𑀲𑀝𑁆𑀞𑀤𑀽𑀢𑁄 𑀦𑀸𑀫. 𑀉𑀤𑁆𑀤𑁂𑀲𑀧𑀢𑁆𑀢𑀁 𑀯𑀸 𑀧𑀝𑀺𑀧𑀸𑀝𑀺𑀧𑀢𑁆𑀢𑀁 𑀯𑀸 𑀧𑀼𑀕𑁆𑀕𑀮𑀺𑀓𑀧𑀢𑁆𑀢𑀁 𑀯𑀸 𑀬𑀁 𑀇𑀘𑁆𑀙𑀢𑀺, 𑀢𑀁 𑀏𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀓𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 ‘‘𑀉𑀤𑁆𑀤𑁂𑀲𑀧𑀢𑁆𑀢𑀁 𑀆𑀳𑀭𑀸’’𑀢𑀺 𑀧𑁂𑀲𑀺𑀢𑁄 𑀯𑀢𑁆𑀢𑀼𑀁 𑀦 𑀚𑀸𑀦𑀸𑀢𑀺, 𑀢𑀼𑀡𑁆𑀳𑀻𑀪𑀽𑀢𑁄 𑀢𑀺𑀝𑁆𑀞𑀢𑀺, 𑀲𑁄 ‘‘𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻’’𑀢𑀺 𑀯𑀸 ‘‘𑀓𑀲𑁆𑀲 𑀧𑀢𑁆𑀢𑀁 𑀳𑀭𑀺𑀲𑁆𑀲𑀲𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀯𑀼𑀢𑁆𑀢𑁄 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀤𑁂𑀬𑁆𑀬. 𑀢𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀺𑀕𑀼𑀘𑁆𑀙𑀦𑁆𑀢𑀸 𑀦 𑀑𑀮𑁄𑀓𑁂𑀬𑁆𑀬𑀼𑀁, ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀲 ‘‘𑀉𑀤𑁆𑀤𑁂𑀲𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀕𑀸𑀳𑁂𑀢𑁆𑀯𑀸 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄.

𑀏𑀓𑀸 𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫 𑀳𑁄𑀢𑀺. 𑀭𑀜𑁆𑀜𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀲𑁆𑀲 𑀯𑀸 𑀕𑁂𑀳𑁂 𑀅𑀢𑀺𑀧𑀡𑀻𑀢𑀸𑀦𑀺 𑀅𑀝𑁆𑀞 𑀉𑀤𑁆𑀤𑁂𑀲𑀪𑀢𑁆𑀢𑀸𑀦𑀺 𑀦𑀺𑀘𑁆𑀘𑀁 𑀤𑀻𑀬𑀦𑁆𑀢𑀺, 𑀢𑀸𑀦𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀯𑀺𑀲𑀼𑀁 𑀞𑀺𑀢𑀺𑀓𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘‘𑀲𑁆𑀯𑁂 𑀤𑀸𑀦𑀺 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀞𑀺𑀢𑀺𑀓𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀢𑀸. 𑀢𑁂𑀲𑀼 𑀅𑀦𑀸𑀕𑀢𑁂𑀲𑀼𑀬𑁂𑀯 𑀅𑀜𑁆𑀜𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀦𑀺𑀲𑀻𑀤𑀦𑁆𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀭𑀸𑀚𑀧𑀼𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 ‘‘𑀧𑀡𑀻𑀢𑀪𑀢𑁆𑀢𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀆𑀕𑀦𑁆𑀢𑀼𑀓𑀸 𑀞𑀺𑀢𑀺𑀓𑀁 𑀅𑀚𑀸𑀦𑀦𑁆𑀢𑀸 𑀕𑀸𑀳𑁂𑀦𑁆𑀢𑀺, 𑀢𑀗𑁆𑀔𑀡𑀜𑁆𑀜𑁂𑀯 𑀘 𑀞𑀺𑀢𑀺𑀓𑀁 𑀚𑀸𑀦𑀦𑀓𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀕𑀸𑀳𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀭𑀸𑀚𑀕𑁂𑀳𑁂 𑀧𑀡𑀻𑀢𑀪𑀢𑁆𑀢𑀦𑁆𑀢𑀺. 𑀓𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬𑀸𑀢𑀺. 𑀏𑀢𑁆𑀢𑀓𑀯𑀲𑁆𑀲𑀢𑁄 𑀦𑀸𑀫𑀸𑀢𑀺. ‘‘𑀫𑀸 𑀕𑀸𑀳𑁂𑀣𑀸’’𑀢𑀺 𑀦𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀕𑀸𑀳𑀺𑀢𑁂 𑀆𑀕𑀢𑁂𑀳𑀺𑀧𑀺, 𑀧𑀢𑁆𑀢𑀤𑀸𑀦𑀓𑀸𑀮𑁂 𑀆𑀕𑀢𑁂𑀳𑀺𑀧𑀺, 𑀤𑀺𑀦𑁆𑀦𑀓𑀸𑀮𑁂 𑀆𑀕𑀢𑁂𑀳𑀺𑀧𑀺, 𑀭𑀸𑀚𑀕𑁂𑀳𑀢𑁄 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀆𑀳𑀝𑀓𑀸𑀮𑁂 𑀆𑀕𑀢𑁂𑀳𑀺𑀧𑀺, 𑀭𑀸𑀚𑀸 ‘‘𑀅𑀚𑁆𑀚 𑀪𑀺𑀓𑁆𑀔𑀽𑀬𑁂𑀯 𑀆𑀕𑀘𑁆𑀙𑀦𑁆𑀢𑀽’’𑀢𑀺 𑀧𑁂𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑀢𑁆𑀣𑁂 𑀧𑀺𑀡𑁆𑀟𑀧𑀸𑀢𑀁 𑀤𑁂𑀢𑀺, 𑀏𑀯𑀁 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑀓𑀸𑀮𑁂 𑀆𑀕𑀢𑁂𑀳𑀺𑀧𑀺 𑀞𑀺𑀢𑀺𑀓𑀁 𑀚𑀸𑀦𑀦𑀓𑀪𑀺𑀓𑁆𑀔𑀽𑀳𑀺 ‘‘𑀫𑀸 𑀪𑀼𑀜𑁆𑀚𑀺𑀢𑁆𑀣𑀸’’𑀢𑀺 𑀯𑀸𑀭𑁂𑀢𑁆𑀯𑀸 𑀞𑀺𑀢𑀺𑀓𑀸𑀬𑀫𑁂𑀯 𑀕𑀸𑀳𑁂𑀢𑀩𑁆𑀩𑀁.

𑀅𑀣 𑀦𑁂 𑀭𑀸𑀚𑀸 𑀪𑁄𑀚𑁂𑀢𑁆𑀯𑀸 𑀧𑀢𑁆𑀢𑁂𑀧𑀺 𑀦𑁂𑀲𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀬𑀁 𑀆𑀳𑀝𑀁, 𑀢𑀁 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 ‘‘𑀫𑀸 𑀢𑀼𑀘𑁆𑀙𑀳𑀢𑁆𑀣𑀸 𑀕𑀘𑁆𑀙𑀦𑁆𑀢𑀽’’𑀢𑀺 𑀣𑁄𑀓𑀫𑁂𑀯 𑀧𑀢𑁆𑀢𑁂𑀲𑀼 𑀧𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀁 𑀦 𑀕𑀸𑀳𑁂𑀢𑀩𑁆𑀩𑀁. ‘‘𑀅𑀣 𑀪𑀼𑀜𑁆𑀚𑀺𑀢𑁆𑀯𑀸 𑀢𑀼𑀘𑁆𑀙𑀧𑀢𑁆𑀢𑀸𑀯 𑀆𑀕𑀘𑁆𑀙𑀦𑁆𑀢𑀺, 𑀬𑀁 𑀢𑁂𑀳𑀺 𑀪𑀼𑀢𑁆𑀢𑀁, 𑀢𑀁 𑀦𑁂𑀲𑀁 𑀕𑀻𑀯𑀸 𑀳𑁄𑀢𑀻’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀕𑀻𑀯𑀸𑀓𑀺𑀘𑁆𑀘𑀁 𑀏𑀢𑁆𑀣 𑀦𑀢𑁆𑀣𑀺, 𑀞𑀺𑀢𑀺𑀓𑀁 𑀧𑀦 𑀅𑀚𑀸𑀦𑀦𑁆𑀢𑁂𑀳𑀺 𑀬𑀸𑀯 𑀚𑀸𑀦𑀦𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀦𑀺𑀲𑀻𑀤𑀺𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀺𑀓𑁆𑀔𑀽𑀳𑀺 𑀪𑀼𑀢𑁆𑀢𑀁 𑀲𑀼𑀪𑀼𑀢𑁆𑀢𑀁, 𑀇𑀤𑀸𑀦𑀺 𑀧𑀢𑁆𑀢𑀝𑁆𑀞𑀸𑀦𑁂𑀦 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺.

𑀏𑀓𑁄 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑁄 𑀲𑀢𑀕𑁆𑀖𑀦𑀓𑁄 𑀧𑀺𑀡𑁆𑀟𑀧𑀸𑀢𑁄 𑀅𑀯𑀲𑁆𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁄, 𑀯𑀺𑀳𑀸𑀭𑁂 𑀘 ‘‘𑀏𑀯𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀅𑀯𑀲𑁆𑀲𑀺𑀓𑀲𑁆𑀲 𑀧𑀢𑁆𑀢𑁄’’𑀢𑀺 𑀮𑀺𑀔𑀺𑀢𑁆𑀯𑀸 𑀞𑀧𑁂𑀲𑀼𑀁. 𑀅𑀣 𑀲𑀝𑁆𑀞𑀺𑀯𑀲𑁆𑀲𑀘𑁆𑀘𑀬𑁂𑀦 𑀅𑀜𑁆𑀜𑁄 𑀢𑀣𑀸𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀓𑀺𑀁 𑀅𑀯𑀲𑁆𑀲𑀺𑀓𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑁄, 𑀉𑀤𑀸𑀳𑀼 𑀲𑀝𑁆𑀞𑀺𑀯𑀲𑁆𑀲𑀞𑀺𑀢𑀺𑀓𑀸𑀬𑀸𑀢𑀺? 𑀲𑀝𑁆𑀞𑀺𑀯𑀲𑁆𑀲𑀞𑀺𑀢𑀺𑀓𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀪𑀺𑀓𑁆𑀔𑀼𑀞𑀺𑀢𑀺𑀓𑀁 𑀕𑀳𑁂𑀢𑁆𑀯𑀸𑀬𑁂𑀯 𑀯𑀟𑁆𑀠𑀺𑀢𑁄𑀢𑀺. 𑀏𑀓𑁄 𑀉𑀤𑁆𑀤𑁂𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀫𑀡𑁂𑀭𑁄 𑀚𑀸𑀢𑁄, 𑀧𑀼𑀦 𑀢𑀁 𑀪𑀢𑁆𑀢𑀁 𑀲𑀸𑀫𑀡𑁂𑀭𑀞𑀺𑀢𑀺𑀓𑀸𑀬 𑀧𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀮𑀪𑀢𑀺. 𑀅𑀬𑀁 𑀓𑀺𑀭 𑀅𑀦𑁆𑀢𑀭𑀸𑀪𑀝𑁆𑀞𑀓𑁄 𑀦𑀸𑀫. 𑀬𑁄 𑀧𑀦 𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑁄 𑀲𑀸𑀫𑀡𑁂𑀭𑁄 ‘‘𑀲𑁆𑀯𑁂 𑀉𑀤𑁆𑀤𑁂𑀲𑀪𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀅𑀚𑁆𑀚𑁂𑀯 𑀉𑀧𑀲𑀫𑁆𑀧𑀚𑁆𑀚𑀢𑀺, 𑀅𑀢𑀺𑀓𑁆𑀓𑀦𑁆𑀢𑀸 𑀢𑀲𑁆𑀲 𑀞𑀺𑀢𑀺𑀓𑀸. 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀤𑁆𑀤𑁂𑀲𑀪𑀢𑁆𑀢𑀁 𑀧𑀢𑁆𑀢𑀁, 𑀧𑀢𑁆𑀢𑁄 𑀘𑀲𑁆𑀲 𑀦 𑀢𑀼𑀘𑁆𑀙𑁄 𑀳𑁄𑀢𑀺, 𑀲𑁄 𑀅𑀜𑁆𑀜𑀲𑁆𑀲 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀢𑁆𑀢𑀁 𑀤𑀸𑀧𑁂𑀢𑀺, 𑀢𑀁 𑀘𑁂 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀺, 𑀕𑀻𑀯𑀸 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀪𑀺𑀓𑁆𑀔𑀼 ‘‘𑀫𑀬𑁆𑀳𑀁 𑀧𑀢𑁆𑀢𑀁 𑀤𑀫𑁆𑀫𑀻’’𑀢𑀺 𑀲𑀬𑀫𑁂𑀯 𑀤𑁂𑀢𑀺, 𑀅𑀲𑁆𑀲 𑀕𑀻𑀯𑀸 𑀦 𑀳𑁄𑀢𑀺. 𑀅𑀣𑀸𑀧𑀺 𑀢𑁂𑀦 𑀪𑀢𑁆𑀢𑁂𑀦 𑀅𑀦𑀢𑁆𑀣𑀺𑀓𑁄 𑀳𑀼𑀢𑁆𑀯𑀸 ‘‘𑀅𑀮𑀁 𑀫𑀬𑁆𑀳𑀁, 𑀢𑀯𑁂𑀢𑀁 𑀪𑀢𑁆𑀢𑀁 𑀤𑀫𑁆𑀫𑀺, 𑀧𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀆𑀳𑀭𑀸𑀧𑁂𑀳𑀻’’𑀢𑀺 𑀅𑀜𑁆𑀜𑀁 𑀯𑀤𑀢𑀺, 𑀬𑀁 𑀢𑀢𑁄 𑀆𑀳𑀭𑀻𑀬𑀢𑀺, 𑀲𑀩𑁆𑀩𑀁 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀳𑁄𑀢𑀺. 𑀧𑀢𑁆𑀢𑀁 𑀘𑁂 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀺, 𑀲𑀼𑀳𑀝𑁄, 𑀪𑀢𑁆𑀢𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀕𑀻𑀯𑀸 𑀦 𑀳𑁄𑀢𑀺.

𑀯𑀺𑀳𑀸𑀭𑁂 𑀤𑀲 𑀪𑀺𑀓𑁆𑀔𑀽 𑀳𑁄𑀦𑁆𑀢𑀺, 𑀢𑁂𑀲𑀼 𑀦𑀯 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀏𑀓𑁄 𑀲𑀸𑀤𑀺𑀬𑀦𑀓𑁄, ‘‘𑀤𑀲 𑀉𑀤𑁆𑀤𑁂𑀲𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑀸 𑀕𑀳𑁂𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. 𑀇𑀢𑀭𑁄 𑀪𑀺𑀓𑁆𑀔𑀼 ‘‘𑀲𑀩𑁆𑀩𑀸𑀦𑀺 𑀫𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀞𑀺𑀢𑀺𑀓𑀸 𑀦 𑀳𑁄𑀢𑀺. 𑀏𑀓𑁂𑀓𑀁 𑀘𑁂 𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀞𑀺𑀢𑀺𑀓𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀕𑀸𑀳𑁂𑀢𑁆𑀯𑀸 𑀤𑀲𑀳𑀺𑀧𑀺 𑀧𑀢𑁆𑀢𑁂𑀳𑀺 𑀆𑀳𑀭𑀸𑀧𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀗𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀦𑀯 𑀧𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀤𑁂𑀢𑀺, 𑀪𑀺𑀓𑁆𑀔𑀼𑀤𑀢𑁆𑀢𑀺𑀬𑀁 𑀦𑀸𑀫𑁂𑀢𑀁, 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀲𑁄 𑀉𑀧𑀸𑀲𑀓𑁄 ‘‘𑀪𑀦𑁆𑀢𑁂, 𑀖𑀭𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀤𑀢𑀺, 𑀲𑁄 𑀘 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 ‘‘𑀏𑀣, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀳𑀸𑀬𑀸 𑀳𑁄𑀣𑀸’’𑀢𑀺 𑀢𑀲𑁆𑀲 𑀖𑀭𑀁 𑀕𑀘𑁆𑀙𑀢𑀺, 𑀬𑀁 𑀢𑀢𑁆𑀣 𑀮𑀪𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀳𑁄𑀢𑀺, 𑀇𑀢𑀭𑁂 𑀢𑁂𑀦 𑀤𑀺𑀦𑁆𑀦𑀁 𑀮𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀖𑀭𑁂𑀬𑁂𑀯 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑁂𑀦𑁆𑀢𑀺 ‘‘𑀪𑀦𑁆𑀢𑁂, 𑀬𑀁 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀢𑀁 𑀕𑀡𑁆𑀳𑀣𑀸’’𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀘𑀦𑁂𑀦𑁂𑀯 𑀇𑀢𑀭𑁂𑀲𑀁 𑀯𑀝𑁆𑀝𑀢𑀺. 𑀪𑀼𑀢𑁆𑀢𑀸𑀯𑀻𑀦𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀕𑀫𑀦𑀢𑁆𑀣𑀸𑀬 𑀤𑁂𑀦𑁆𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀳𑁄𑀢𑀺, 𑀢𑁂𑀦 𑀤𑀺𑀦𑁆𑀦𑀁 𑀇𑀢𑀭𑁂𑀲𑀁 𑀯𑀝𑁆𑀝𑀢𑀺. 𑀬𑀤𑀺 𑀧𑀦 𑀢𑁂 𑀯𑀺𑀳𑀸𑀭𑁂𑀬𑁂𑀯 𑀢𑁂𑀦 𑀪𑀺𑀓𑁆𑀔𑀼𑀦𑀸 ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀸 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀬𑀁 𑀪𑀼𑀜𑁆𑀚𑀦𑁆𑀢𑀺 𑀘𑁂𑀯 𑀦𑀻𑀳𑀭𑀦𑁆𑀢𑀺 𑀘, 𑀲𑀩𑁆𑀩𑀁 𑀢𑀁 𑀢𑁂𑀲𑀁𑀬𑁂𑀯 𑀲𑀦𑁆𑀢𑀓𑀁. 𑀅𑀣𑀸𑀧𑀺 ‘‘𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀼𑀢𑁆𑀢𑀸 ‘‘𑀫𑀦𑀼𑀲𑁆𑀲𑀸𑀦𑀁 𑀯𑀘𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀘𑁂 𑀏𑀓𑀲𑁆𑀲 𑀫𑀥𑀼𑀭𑁂𑀦 𑀲𑀭𑁂𑀦 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀣𑁂𑀭𑀸𑀦𑀜𑁆𑀘 𑀉𑀧𑀲𑀫𑁂 𑀧𑀲𑀻𑀤𑀺𑀢𑁆𑀯𑀸 𑀩𑀳𑀼𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀤𑁂𑀦𑁆𑀢𑀺, 𑀅𑀬𑀁 𑀣𑁂𑀭𑁂𑀲𑀼 𑀧𑀲𑀸𑀤𑁂𑀦 𑀉𑀧𑁆𑀧𑀦𑁆𑀦𑁄 𑀅𑀓𑀢𑀪𑀸𑀕𑁄 𑀦𑀸𑀫, 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀧𑀸𑀧𑀼𑀡𑀸𑀢𑀺.

𑀏𑀓𑁄 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀞𑀺𑀢𑀺𑀓𑀸𑀬 𑀕𑀸𑀳𑀺𑀢𑀧𑀢𑁆𑀢𑀁 𑀳𑀭𑀺𑀢𑁆𑀯𑀸 𑀧𑀡𑀻𑀢𑀲𑁆𑀲 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑁆𑀲 𑀧𑀽𑀭𑁂𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀁, 𑀪𑀦𑁆𑀢𑁂, 𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀤𑁂𑀢𑀺, 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀧𑀦 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀅𑀣 𑀧𑀞𑀫𑀁𑀬𑁂𑀯 ‘‘𑀲𑀩𑁆𑀩𑀁 𑀲𑀗𑁆𑀖𑀺𑀓𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀏𑀓𑀲𑁆𑀲 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀓𑁄 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄. 𑀆𑀳𑀭𑀺𑀢𑁆𑀯𑀸 𑀘 ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀯𑀼𑀢𑁆𑀢𑁂 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀏𑀓𑁄 𑀧𑀸𑀢𑀺𑀬𑀸 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀲𑀗𑁆𑀖𑀼𑀤𑁆𑀤𑁂𑀲𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀏𑀓𑁂𑀓𑀁 𑀆𑀮𑁄𑀧𑀁 𑀅𑀤𑀢𑁆𑀯𑀸 𑀞𑀺𑀢𑀺𑀓𑀸𑀬 𑀏𑀓𑀲𑁆𑀲 𑀬𑀸𑀧𑀦𑀫𑀢𑁆𑀢𑀁 𑀓𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀅𑀣 𑀲𑁄 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀚𑀸𑀦𑀦𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑁄 𑀅𑀘𑁆𑀙𑀢𑀺, ‘‘𑀓𑀲𑁆𑀲 𑀢𑁂 𑀆𑀦𑀻𑀢𑀁, 𑀓𑀲𑁆𑀲 𑀤𑀸𑀢𑀼𑀓𑀸𑀫𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑀺 ‘‘𑀢𑀼𑀫𑁆𑀳𑀸𑀓𑀁 𑀆𑀦𑀻𑀢𑀁, 𑀢𑀼𑀫𑁆𑀳𑀸𑀓𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀻’’𑀢𑀺 𑀯𑀤𑁂𑀬𑁆𑀬, 𑀢𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀚𑀺𑀕𑀼𑀘𑁆𑀙𑀦𑁆𑀢𑀸 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀫𑁆𑀧𑀺 𑀦 𑀫𑀜𑁆𑀜𑁂𑀬𑁆𑀬𑀼𑀁. 𑀲𑀘𑁂 𑀧𑀦 ‘‘𑀓𑀼𑀳𑀺𑀁 𑀬𑀸𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀉𑀤𑁆𑀤𑁂𑀲𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀢𑀺, 𑀏𑀓𑁂𑀦 𑀮𑀚𑁆𑀚𑀺𑀪𑀺𑀓𑁆𑀔𑀼𑀦𑀸 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀆𑀪𑀢𑀁 𑀩𑀳𑀼 𑀳𑁄𑀢𑀺, 𑀲𑀩𑁆𑀩𑁂𑀲𑀁 𑀧𑀳𑁄𑀢𑀺, 𑀞𑀺𑀢𑀺𑀓𑀸𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

‘‘𑀲𑀗𑁆𑀖𑀼𑀤𑁆𑀤𑁂𑀲𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀺𑀁 𑀆𑀳𑀭𑀺𑀲𑁆𑀲𑀲𑀻’’𑀢𑀺 𑀅𑀯𑀢𑁆𑀯𑀸 𑀧𑀓𑀢𑀺𑀞𑀺𑀢𑀺𑀓𑀸𑀬 𑀏𑀯 𑀕𑀸𑀳𑁂𑀢𑀩𑁆𑀩𑀁. 𑀬𑁄 𑀧𑀦 𑀧𑀸𑀬𑀸𑀲𑁄 𑀯𑀸 𑀭𑀲𑀧𑀺𑀡𑁆𑀟𑀧𑀸𑀢𑁄 𑀯𑀸 𑀦𑀺𑀘𑁆𑀘𑀁 𑀮𑀩𑁆𑀪𑀢𑀺, 𑀏𑀯𑀭𑀽𑀧𑀸𑀦𑀁 𑀧𑀡𑀻𑀢𑀪𑁄𑀚𑀦𑀸𑀦𑀁 𑀆𑀯𑁂𑀡𑀺𑀓𑀸 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸, 𑀢𑀣𑀸 𑀲𑀧𑀭𑀺𑀯𑀸𑀭𑀸𑀬 𑀬𑀸𑀕𑀼𑀬𑀸 𑀫𑀳𑀕𑁆𑀖𑀸𑀦𑀁 𑀨𑀮𑀸𑀦𑀁 𑀧𑀡𑀻𑀢𑀸𑀦𑀜𑁆𑀘 𑀔𑀚𑁆𑀚𑀓𑀸𑀦𑀁. 𑀧𑀓𑀢𑀺𑀪𑀢𑁆𑀢𑀬𑀸𑀕𑀼𑀨𑀮𑀔𑀚𑁆𑀚𑀓𑀸𑀦𑀁 𑀏𑀓𑀸𑀯 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸. ‘‘𑀲𑀧𑁆𑀧𑀺𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀲𑀧𑁆𑀧𑀻𑀦𑀁 𑀏𑀓𑀸𑀯 𑀞𑀺𑀢𑀺𑀓𑀸 𑀯𑀝𑁆𑀝𑀢𑀺, 𑀢𑀣𑀸 𑀲𑀩𑁆𑀩𑀢𑁂𑀮𑀸𑀦𑀁. ‘‘𑀫𑀥𑀼𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀫𑀥𑀼𑀦𑁄 𑀏𑀓𑀸𑀯 𑀞𑀺𑀢𑀺𑀓𑀸 𑀯𑀝𑁆𑀝𑀢𑀺, 𑀢𑀣𑀸 𑀨𑀸𑀡𑀺𑀢𑀲𑁆𑀲 𑀮𑀝𑁆𑀞𑀺𑀫𑀥𑀼𑀓𑀸𑀤𑀻𑀦𑀜𑁆𑀘 𑀪𑁂𑀲𑀚𑁆𑀚𑀸𑀦𑀁. 𑀲𑀘𑁂 𑀧𑀦 𑀕𑀦𑁆𑀥𑀫𑀸𑀮𑀁 𑀲𑀗𑁆𑀖𑀼𑀤𑁆𑀤𑁂𑀲𑀁 𑀤𑁂𑀦𑁆𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀯𑀝𑁆𑀝𑀢𑀺, 𑀦 𑀯𑀝𑁆𑀝𑀢𑀻𑀢𑀺? 𑀆𑀫𑀺𑀲𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺. ‘‘𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀧𑀦 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁦. 𑀦𑀺𑀫𑀦𑁆𑀢𑀦𑀁 𑀧𑀼𑀕𑁆𑀕𑀮𑀺𑀓𑀁 𑀘𑁂, 𑀲𑀬𑀫𑁂𑀯 𑀇𑀲𑁆𑀲𑀭𑁄. 𑀲𑀗𑁆𑀖𑀺𑀓𑀁 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦𑁂𑀢𑁆𑀣 𑀤𑀽𑀢𑁄 𑀩𑁆𑀬𑀢𑁆𑀢𑁄 𑀳𑁄𑀢𑀺, ‘‘𑀪𑀦𑁆𑀢𑁂, 𑀭𑀸𑀚𑀕𑁂𑀳𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀣 𑀤𑀽𑀢𑁄 𑀅𑀩𑁆𑀬𑀢𑁆𑀢𑁄 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀩𑁆𑀬𑀢𑁆𑀢𑁄 ‘‘𑀪𑀢𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀬𑀸𑀣, 𑀢𑀼𑀫𑁆𑀳𑁂 𑀬𑀸𑀣𑀸’’𑀢𑀺 𑀯𑀤𑀢𑀺, 𑀏𑀯𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺, ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀧𑀝𑀺𑀧𑀸𑀝𑀺𑀬𑀸 𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀯𑀝𑁆𑀝𑀢𑀺. 𑀲𑀘𑁂 𑀦𑀺𑀫𑀦𑁆𑀢𑀺𑀢𑀼𑀁 𑀆𑀕𑀢𑀫𑀦𑀼𑀲𑁆𑀲𑁄 𑀆𑀲𑀦𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀤𑁂𑀣𑀸’’𑀢𑀺 𑀯𑀸 ‘‘𑀅𑀝𑁆𑀞 𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀯𑀸 𑀯𑀤𑀢𑀺, 𑀏𑀯𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺, ‘‘𑀢𑀼𑀫𑁆𑀳𑁂 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀤𑁂𑀣, 𑀪𑀢𑁆𑀢𑀁 𑀕𑀡𑁆𑀳𑀣, 𑀅𑀝𑁆𑀞 𑀧𑀢𑁆𑀢𑁂 𑀤𑁂𑀣, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀸 𑀯𑀤𑀢𑀺, 𑀧𑀝𑀺𑀧𑀸𑀝𑀺𑀬𑀸 𑀕𑀸𑀳𑁂𑀢𑀩𑁆𑀩𑀁. 𑀕𑀸𑀳𑁂𑀦𑁆𑀢𑁂𑀦 𑀧𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀪𑀢𑁆𑀢’’𑀦𑁆𑀢𑀺 𑀅𑀯𑀤𑀦𑁆𑀢𑁂𑀦 ‘‘𑀢𑀼𑀫𑁆𑀳𑁂 𑀘 𑀢𑀼𑀫𑁆𑀳𑁂 𑀘 𑀕𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀤𑁂𑀣, 𑀢𑀼𑀫𑁆𑀳𑁂 𑀏𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀸𑀥𑀼 𑀉𑀧𑀸𑀲𑀓𑀸’’𑀢𑀺 𑀕𑀦𑁆𑀢𑀩𑁆𑀩𑀁. ‘‘𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑀼𑀫𑁆𑀳𑁂 𑀏𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁.

𑀦𑀺𑀫𑀦𑁆𑀢𑀦𑀪𑀢𑁆𑀢𑀖𑀭𑀢𑁄 𑀧𑀦 𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑀲𑁆𑀲 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀞𑀺𑀢𑀺𑀓𑀸𑀬 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄. 𑀏𑀓𑁄 ‘‘𑀲𑀗𑁆𑀖𑀢𑁄 𑀧𑀝𑀺𑀧𑀸𑀝𑀺𑀬𑀸 𑀧𑀢𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 ‘‘𑀏𑀓𑀁 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀕𑀸𑀳𑀺𑀢𑁂𑀬𑁂𑀯 𑀧𑀢𑁆𑀢𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀽𑀭𑁂𑀢𑁆𑀯𑀸 𑀆𑀳𑀭𑀢𑀺, 𑀢𑀁 𑀧𑀢𑁆𑀢𑀲𑀸𑀫𑀺𑀓𑀲𑁆𑀲𑁂𑀯 𑀳𑁄𑀢𑀺. 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀺𑀬 𑀞𑀺𑀢𑀺𑀓𑀸𑀬 𑀦 𑀕𑀸𑀳𑁂𑀢𑀩𑁆𑀩𑀁. 𑀇𑀥𑀸𑀧𑀺 𑀬𑁄 𑀆𑀕𑀦𑁆𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀢𑀺𑀝𑁆𑀞𑀢𑀺, 𑀲𑁄 ‘‘𑀓𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻’’𑀢𑀺 𑀯𑀸 ‘‘𑀓𑀲𑁆𑀲 𑀧𑀢𑁆𑀢𑀁 𑀳𑀭𑀺𑀲𑁆𑀲𑀲𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑁄. 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 𑀳𑀺 ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀤𑁂𑀬𑁆𑀬, 𑀢𑀢𑁄 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀳𑀺 𑀚𑀺𑀕𑀼𑀘𑁆𑀙𑀦𑀻𑀬𑁄 𑀅𑀲𑁆𑀲. ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀧𑀦 𑀯𑀼𑀢𑁆𑀢𑁂 ‘‘𑀢𑀲𑁆𑀲 𑀧𑀢𑁆𑀢𑀢𑁆𑀣𑀸𑀬 𑀆𑀕𑀢𑁄𑀫𑁆𑀳𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀧𑀝𑀺𑀧𑀸𑀝𑀺𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬 𑀕𑀳𑁂𑀢𑁆𑀯𑀸 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄. ‘‘𑀪𑀢𑁆𑀢𑀳𑀭𑀡𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀝𑀺𑀧𑀸𑀝𑀺𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬 𑀏𑀯 𑀤𑀸𑀢𑀩𑁆𑀩𑁄. 𑀲𑀘𑁂 𑀆𑀳𑀭𑀺𑀢𑁆𑀯𑀸 ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀪𑀼𑀜𑁆𑀚𑀢𑀽’’𑀢𑀺 𑀯𑀤𑀢𑀺, 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀝𑀺𑀧𑀸𑀝𑀺𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁.

𑀏𑀓𑁄 𑀧𑀸𑀢𑀺𑀬𑀸 𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀆𑀮𑁄𑀧𑀪𑀢𑁆𑀢𑀝𑁆𑀞𑀺𑀢𑀺𑀓𑀢𑁄 𑀧𑀝𑁆𑀞𑀸𑀬 𑀆𑀮𑁄𑀧𑀲𑀗𑁆𑀔𑁂𑀧𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀼𑀡𑁆𑀳𑀻𑀪𑀽𑀢𑁄 𑀅𑀘𑁆𑀙𑀢𑀺, ‘‘𑀓𑀲𑁆𑀲 𑀢𑁂 𑀆𑀪𑀢𑀁, 𑀓𑀲𑁆𑀲 𑀤𑀸𑀢𑀼𑀓𑀸𑀫𑁄𑀲𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀧𑀦 ‘‘𑀓𑀼𑀳𑀺𑀁 𑀕𑀘𑁆𑀙𑀲𑀺, 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀳𑀺𑀡𑁆𑀟𑀲𑀻’’𑀢𑀺 𑀯𑀼𑀢𑁆𑀢𑁂 𑀧𑀦 ‘‘𑀲𑀗𑁆𑀖𑀲𑁆𑀲 𑀫𑁂 𑀪𑀢𑁆𑀢𑀁 𑀆𑀪𑀢𑀁, 𑀣𑁂𑀭𑀸𑀦𑀁 𑀫𑁂 𑀪𑀢𑁆𑀢𑀁 𑀆𑀪𑀢’’𑀦𑁆𑀢𑀺 𑀯𑀤𑀢𑀺, 𑀕𑀳𑁂𑀢𑁆𑀯𑀸 𑀆𑀮𑁄𑀧𑀪𑀢𑁆𑀢𑀝𑁆𑀞𑀺𑀢𑀺𑀓𑀸𑀬 𑀪𑀸𑀚𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀏𑀯𑀁 𑀆𑀪𑀢𑀁 𑀪𑀢𑁆𑀢𑀁 𑀩𑀳𑀼 𑀳𑁄𑀢𑀺, 𑀲𑀓𑀮𑀲𑀗𑁆𑀖𑀲𑁆𑀲 𑀧𑀳𑁄𑀢𑀺, 𑀅𑀪𑀺𑀳𑀝𑀪𑀺𑀓𑁆𑀔𑀸 𑀦𑀸𑀫, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀞𑀺𑀢𑀺𑀓𑀸𑀧𑀼𑀘𑁆𑀙𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁.

𑀉𑀧𑀸𑀲𑀓𑁄 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀸 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑀲𑁆𑀲 𑀯𑀸 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀯𑀸 𑀧𑀳𑀺𑀡𑀢𑀺 ‘‘𑀅𑀫𑁆𑀳𑀸𑀓𑀁 𑀪𑀢𑁆𑀢𑀕𑀳𑀡𑀢𑁆𑀣𑀸𑀬 𑀅𑀝𑁆𑀞 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’’𑀢𑀺, 𑀲𑀘𑁂𑀧𑀺 𑀜𑀸𑀢𑀺𑀉𑀧𑀝𑁆𑀞𑀸𑀓𑁂𑀳𑀺 𑀧𑁂𑀲𑀺𑀢𑀁 𑀳𑁄𑀢𑀺, 𑀇𑀫𑁂 𑀢𑀬𑁄 𑀚𑀦𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀮𑀪𑀦𑁆𑀢𑀺, 𑀆𑀭𑀼𑀴𑁆𑀳𑀸𑀬𑁂𑀯 𑀫𑀸𑀢𑀺𑀓𑀁. 𑀲𑀗𑁆𑀖𑀢𑁄 𑀅𑀝𑁆𑀞 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀯𑀫𑁂𑀳𑀺 𑀕𑀦𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀺 𑀏𑀢𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀸𑀬 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀕𑀦𑁆𑀣𑀥𑀼𑀢𑀗𑁆𑀕𑀸𑀤𑀻𑀳𑀺 𑀧𑀦 𑀅𑀦𑀪𑀺𑀜𑁆𑀜𑀸𑀢𑁄 𑀆𑀯𑀸𑀲𑀺𑀓𑀪𑀺𑀓𑁆𑀔𑀼 𑀆𑀧𑀼𑀘𑁆𑀙𑀺𑀢𑀼𑀁 𑀮𑀪𑀢𑀺, 𑀢𑀲𑁆𑀫𑀸 𑀢𑁂𑀦 ‘‘𑀓𑀺𑀁 𑀲𑀗𑁆𑀖𑀢𑁄 𑀕𑀡𑁆𑀳𑀸𑀫𑀺, 𑀉𑀤𑀸𑀳𑀼 𑀬𑁂 𑀚𑀸𑀦𑀸𑀫𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀫𑀻’’𑀢𑀺 𑀫𑀸𑀢𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸 𑀤𑀸𑀬𑀓𑀸 𑀯𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. ‘‘𑀢𑀼𑀫𑁆𑀳𑀸𑀓𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸 𑀬𑁂 𑀯𑀸 𑀚𑀸𑀦𑀸𑀣, 𑀢𑁂 𑀕𑀳𑁂𑀢𑁆𑀯𑀸 𑀏𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀬𑁂 𑀇𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀼𑀁 𑀮𑀪𑀢𑀺. 𑀲𑀘𑁂 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀧𑀳𑀺𑀡𑀣𑀸’’𑀢𑀺 𑀧𑁂𑀲𑁂𑀦𑁆𑀢𑀺, 𑀲𑀗𑁆𑀖𑀢𑁄𑀯 𑀧𑁂𑀲𑁂𑀢𑀩𑁆𑀩𑀸. 𑀅𑀢𑁆𑀢𑀦𑀸 𑀲𑀘𑁂 𑀅𑀜𑁆𑀜𑀲𑁆𑀫𑀺𑀁 𑀕𑀸𑀫𑁂 𑀲𑀓𑁆𑀓𑀸 𑀳𑁄𑀢𑀺 𑀪𑀺𑀓𑁆𑀔𑀸 𑀮𑀪𑀺𑀢𑀼𑀁, 𑀅𑀜𑁆𑀜𑁄 𑀕𑀸𑀫𑁄 𑀕𑀦𑁆𑀢𑀩𑁆𑀩𑁄. 𑀦 𑀲𑀓𑁆𑀓𑀸 𑀘𑁂 𑀳𑁄𑀢𑀺 𑀮𑀪𑀺𑀢𑀼𑀁, 𑀲𑁄𑀬𑁂𑀯 𑀕𑀸𑀫𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀩𑁆𑀩𑁄.

𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀽 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑀢𑁆𑀭 𑀘𑁂 𑀫𑀦𑀼𑀲𑁆𑀲𑀸 ‘‘𑀧𑀢𑁆𑀢𑁂 𑀤𑁂𑀣𑀸’’𑀢𑀺 𑀆𑀕𑀘𑁆𑀙𑀦𑁆𑀢𑀺, 𑀅𑀦𑀺𑀫𑀦𑁆𑀢𑀺𑀢𑁂𑀳𑀺 𑀦 𑀤𑀸𑀢𑀩𑁆𑀩𑀸, ‘‘𑀏𑀢𑁂 𑀦𑀺𑀫𑀦𑁆𑀢𑀺𑀢𑀸 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀼𑀫𑁆𑀳𑁂𑀧𑀺 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀉𑀲𑁆𑀲𑀯𑀸𑀤𑀻𑀲𑀼 𑀫𑀦𑀼𑀲𑁆𑀲𑀸 𑀲𑀬𑀫𑁂𑀯 𑀧𑀭𑀺𑀯𑁂𑀡𑀸𑀦𑀺 𑀘 𑀧𑀥𑀸𑀦𑀖𑀭𑀸𑀦𑀺 𑀘 𑀕𑀦𑁆𑀢𑁆𑀯𑀸 𑀢𑀺𑀧𑀺𑀝𑀓𑁂 𑀘 𑀥𑀫𑁆𑀫𑀓𑀣𑀺𑀓𑁂 𑀘 𑀪𑀺𑀓𑁆𑀔𑀼𑀲𑀢𑁂𑀦𑀧𑀺 𑀲𑀤𑁆𑀥𑀺𑀁 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀢𑀤𑀸 𑀢𑁂𑀳𑀺 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀦 𑀳𑀺 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀅𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀸 𑀧𑀭𑀺𑀯𑁂𑀡𑀧𑀥𑀸𑀦𑀖𑀭𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄𑀯 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀪𑀺𑀓𑁆𑀔𑀽 𑀕𑀡𑁆𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺.

𑀲𑀘𑁂 𑀧𑀦 𑀲𑀗𑁆𑀖𑀢𑁆𑀣𑁂𑀭𑁄 𑀯𑀸 𑀕𑀦𑁆𑀣𑀥𑀼𑀢𑀗𑁆𑀕𑀯𑀲𑁂𑀦 𑀅𑀪𑀺𑀜𑁆𑀜𑀸𑀢𑁄 𑀯𑀸 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀯𑀸 𑀅𑀜𑁆𑀜𑀢𑁆𑀭 𑀯𑀸 𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀓𑀢𑁆𑀣𑀘𑀺 𑀯𑀸 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀓𑀝𑁆𑀞𑀸𑀦𑀁 𑀆𑀕𑀘𑁆𑀙𑀢𑀺, 𑀫𑀦𑀼𑀲𑁆𑀲𑀸 𑀘 𑀆𑀕𑀦𑁆𑀢𑀼𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀏𑀓𑀯𑀸𑀭𑀁 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀧𑀝𑀺𑀩𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀼𑀢𑀺𑀬𑀯𑀸𑀭𑁂 𑀆𑀭𑀤𑁆𑀥𑁂 𑀲𑀗𑁆𑀖𑀢𑁄𑀬𑁂𑀯 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀅𑀪𑀺𑀦𑀯𑀆𑀕𑀦𑁆𑀢𑀼𑀓𑀸𑀯 𑀳𑀼𑀢𑁆𑀯𑀸 ‘‘𑀜𑀸𑀢𑀻 𑀯𑀸 𑀉𑀧𑀝𑁆𑀞𑀸𑀓𑁂 𑀯𑀸 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀘𑁂 𑀢𑁂𑀲𑀁 𑀜𑀸𑀢𑀻 𑀘 𑀉𑀧𑀝𑁆𑀞𑀸𑀓𑀸 𑀘 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀏𑀢𑁆𑀣 𑀧𑀦 𑀬𑁂 𑀚𑀸𑀦𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀬𑁄 𑀧𑀦 𑀅𑀢𑀺𑀮𑀸𑀪𑀻 𑀳𑁄𑀢𑀺, 𑀲𑀓𑀝𑁆𑀞𑀸𑀦𑀜𑁆𑀘 𑀆𑀕𑀦𑁆𑀢𑀼𑀓𑀝𑁆𑀞𑀸𑀦𑀜𑁆𑀘 𑀏𑀓𑀲𑀤𑀺𑀲𑀁, 𑀲𑀩𑁆𑀩𑀢𑁆𑀣 𑀫𑀦𑀼𑀲𑁆𑀲𑀸 𑀲𑀗𑁆𑀖𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑁆𑀢𑀺, 𑀢𑁂𑀦 𑀲𑀗𑁆𑀖𑀢𑁄𑀯 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀬𑀁 𑀦𑀺𑀫𑀦𑁆𑀢𑀦𑁂 𑀯𑀺𑀲𑁂𑀲𑁄. 𑀅𑀯𑀲𑁂𑀲𑁄 𑀲𑀩𑁆𑀩𑀧𑀜𑁆𑀳𑁄 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀅𑀝𑁆𑀞 𑀫𑀳𑀸𑀣𑁂𑀭𑁂 𑀤𑁂𑀣𑀸𑀢𑀺 𑀯𑀼𑀢𑁆𑀢𑁂 𑀅𑀝𑁆𑀞 𑀫𑀳𑀸𑀣𑁂𑀭𑀸𑀯 𑀤𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀫𑀚𑁆𑀛𑀺𑀫𑀸𑀤𑀻𑀲𑀼. 𑀲𑀘𑁂 𑀧𑀦 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀅𑀝𑁆𑀞 𑀪𑀺𑀓𑁆𑀔𑀽 𑀤𑁂𑀣𑀸’’𑀢𑀺 𑀯𑀤𑀢𑀺, 𑀲𑀗𑁆𑀖𑀢𑁄 𑀤𑀸𑀢𑀩𑁆𑀩𑀸𑀢𑀺.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁧. 𑀲𑀮𑀸𑀓𑀪𑀢𑁆𑀢𑀁 𑀧𑀦 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀮𑀸𑀓𑀸𑀬 𑀯𑀸 𑀧𑀝𑁆𑀝𑀺𑀓𑀸𑀬 𑀯𑀸 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀑𑀧𑀼𑀜𑁆𑀚𑀺𑀢𑁆𑀯𑀸 𑀪𑀢𑁆𑀢𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁬) 𑀯𑀘𑀦𑀢𑁄 𑀭𑀼𑀓𑁆𑀔𑀲𑀸𑀭𑀫𑀬𑀸𑀬 𑀲𑀮𑀸𑀓𑀸𑀬 𑀯𑀸 𑀯𑁂𑀴𑀼𑀯𑀺𑀮𑀻𑀯𑀢𑀸𑀮𑀧𑀡𑁆𑀡𑀸𑀤𑀺𑀫𑀬𑀸𑀬 𑀧𑀝𑁆𑀝𑀺𑀓𑀸𑀬 𑀯𑀸 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀲𑀮𑀸𑀓𑀪𑀢𑁆𑀢’’𑀦𑁆𑀢𑀺 𑀏𑀯𑀁 𑀅𑀓𑁆𑀔𑀭𑀸𑀦𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀧𑀘𑁆𑀙𑀺𑀬𑀁 𑀯𑀸 𑀘𑀻𑀯𑀭𑀪𑁄𑀕𑁂 𑀯𑀸 𑀓𑀢𑁆𑀯𑀸 𑀲𑀩𑁆𑀩𑀲𑀮𑀸𑀓𑀸𑀬𑁄 𑀑𑀧𑀼𑀜𑁆𑀚𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀆𑀮𑁄𑀴𑁂𑀢𑁆𑀯𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑁂𑀦 𑀲𑀘𑁂 𑀞𑀺𑀢𑀺𑀓𑀸 𑀅𑀢𑁆𑀣𑀺, 𑀞𑀺𑀢𑀺𑀓𑀢𑁄 𑀧𑀝𑁆𑀞𑀸𑀬, 𑀦𑁄 𑀘𑁂 𑀅𑀢𑁆𑀣𑀺, 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀲𑀮𑀸𑀓𑀸 𑀤𑀸𑀢𑀩𑁆𑀩𑀸. 𑀧𑀘𑁆𑀙𑀸 𑀆𑀕𑀢𑀸𑀦𑀫𑁆𑀧𑀺 𑀏𑀓𑀸𑀩𑀤𑁆𑀥𑀯𑀲𑁂𑀦 𑀤𑀽𑀭𑁂 𑀞𑀺𑀢𑀸𑀦𑀫𑁆𑀧𑀺 𑀉𑀤𑁆𑀤𑁂𑀲𑀪𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑀸𑀢𑀩𑁆𑀩𑀸.

𑀲𑀘𑁂 𑀯𑀺𑀳𑀸𑀭𑀲𑁆𑀲 𑀲𑀫𑀦𑁆𑀢𑀢𑁄 𑀩𑀳𑀽 𑀕𑁄𑀘𑀭𑀕𑀸𑀫𑀸, 𑀪𑀺𑀓𑁆𑀔𑀽 𑀧𑀦 𑀦 𑀩𑀳𑀽, 𑀕𑀸𑀫𑀯𑀲𑁂𑀦𑀧𑀺 𑀲𑀮𑀸𑀓𑀸 𑀧𑀸𑀧𑀼𑀡𑀦𑁆𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀅𑀲𑀼𑀓𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀸𑀫𑀯𑀲𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀏𑀯𑀁 𑀕𑀸𑀳𑁂𑀦𑁆𑀢𑁂𑀦 𑀲𑀘𑁂𑀧𑀺 𑀏𑀓𑀫𑁂𑀓𑀲𑁆𑀫𑀺𑀁 𑀕𑀸𑀫𑁂 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀲𑀝𑁆𑀞𑀺 𑀲𑀮𑀸𑀓𑀪𑀢𑁆𑀢𑀸𑀦𑀺, 𑀲𑀩𑁆𑀩𑀸𑀦𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀲𑁆𑀲 𑀧𑀢𑁆𑀢𑀕𑀸𑀫𑀲𑀫𑀻𑀧𑁂 𑀅𑀜𑁆𑀜𑀸𑀦𑀺𑀧𑀺 𑀤𑁆𑀯𑁂 𑀢𑀻𑀡𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀢𑀲𑁆𑀲𑁂𑀯 𑀤𑀸𑀢𑀩𑁆𑀩𑀸𑀦𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀲𑀁 𑀓𑀸𑀭𑀡𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀧𑀳𑀺𑀡𑀺𑀢𑀼𑀦𑁆𑀢𑀺.

𑀲𑀘𑁂 𑀏𑀓𑀘𑁆𑀘𑁂𑀲𑀼 𑀕𑀸𑀫𑁂𑀲𑀼 𑀩𑀳𑀽𑀦𑀺 𑀲𑀮𑀸𑀓𑀪𑀢𑁆𑀢𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀫𑁆𑀧𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩𑀸𑀦𑀺. 𑀤𑁂𑀦𑁆𑀢𑁂𑀦 𑀧𑀦 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀪𑀢𑁆𑀢𑀸𑀦𑀁 𑀲𑀮𑀸𑀓𑀸𑀬𑁄 𑀏𑀓𑀢𑁄 𑀩𑀦𑁆𑀥𑀺𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀢𑀁 𑀕𑀸𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑁄 𑀕𑀸𑀫𑁄 𑀳𑁄𑀢𑀺, 𑀢𑀲𑁆𑀫𑀺𑀜𑁆𑀘 𑀏𑀓𑀫𑁂𑀯 𑀲𑀮𑀸𑀓𑀪𑀢𑁆𑀢𑀁, 𑀢𑀁 𑀧𑀦 𑀧𑀸𑀢𑁄𑀯 𑀤𑁂𑀦𑁆𑀢𑀺, 𑀢𑀫𑁆𑀧𑀺 𑀏𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀲𑁆𑀲 𑀦𑀺𑀕𑁆𑀕𑀳𑁂𑀦 𑀤𑀢𑁆𑀯𑀸 ‘‘𑀧𑀸𑀢𑁄𑀯 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸 𑀑𑀭𑀺𑀫𑀕𑀸𑀫𑁂 𑀇𑀢𑀭𑀸𑀦𑀺 𑀪𑀢𑁆𑀢𑀸𑀦𑀺 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀑𑀭𑀺𑀫𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑁂𑀲𑀼 𑀅𑀕𑁆𑀕𑀳𑀺𑀢𑁂𑀲𑁆𑀯𑁂𑀯 𑀕𑀳𑀺𑀢𑀲𑀜𑁆𑀜𑀸𑀬 𑀕𑀘𑁆𑀙𑀢𑀺, 𑀧𑀭𑀪𑀸𑀕𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀇𑀢𑀭𑀸𑀦𑀺 𑀕𑀳𑁂𑀢𑁆𑀯𑀸 𑀑𑀭𑀺𑀫𑀕𑀸𑀫𑁄 𑀕𑀦𑁆𑀢𑀩𑁆𑀩𑁄. 𑀦 𑀳𑀺 𑀩𑀳𑀺𑀲𑀻𑀫𑀸𑀬 𑀲𑀗𑁆𑀖𑀮𑀸𑀪𑁄 𑀕𑀸𑀳𑁂𑀢𑀼𑀁 𑀮𑀩𑁆𑀪𑀢𑀻𑀢𑀺 𑀅𑀬𑀁 𑀦𑀬𑁄 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑁄. 𑀲𑀘𑁂 𑀧𑀦 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺, 𑀕𑀸𑀫𑀯𑀲𑁂𑀦 𑀲𑀮𑀸𑀓𑀸 𑀦 𑀧𑀸𑀧𑀼𑀡𑀦𑁆𑀢𑀺, 𑀯𑀻𑀣𑀺𑀯𑀲𑁂𑀦 𑀯𑀸 𑀯𑀻𑀣𑀺𑀬𑀁 𑀏𑀓𑀕𑁂𑀳𑀯𑀲𑁂𑀦 𑀯𑀸 𑀏𑀓𑀓𑀼𑀮𑀯𑀲𑁂𑀦 𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀯𑀻𑀣𑀺𑀆𑀤𑀻𑀲𑀼 𑀘 𑀬𑀢𑁆𑀣 𑀩𑀳𑀽𑀦𑀺 𑀪𑀢𑁆𑀢𑀸𑀦𑀺, 𑀢𑀢𑁆𑀣 𑀕𑀸𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀩𑀳𑀽𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀳𑁂𑀢𑀩𑁆𑀩𑀸𑀦𑀺, 𑀲𑀮𑀸𑀓𑀸𑀲𑀼 𑀅𑀲𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀕𑀸𑀳𑁂𑀢𑀩𑁆𑀩𑀸𑀦𑀺.

𑁨𑁧𑁨. 𑀲𑀮𑀸𑀓𑀤𑀸𑀬𑀓𑁂𑀦 𑀧𑀦 𑀯𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀢𑁂𑀦 𑀳𑀺 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀪𑁄𑀚𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀢𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀧𑀞𑀫𑀫𑁂𑀯 𑀯𑀸𑀭𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁, ‘‘𑀢𑀼𑀬𑁆𑀳𑀁 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀯𑀸𑀭𑀕𑀸𑀫𑁂 𑀲𑀮𑀸𑀓𑀸 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀭 𑀕𑀘𑁆𑀙𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀅𑀪𑀺𑀭𑁂𑀓𑀕𑀸𑀯𑀼𑀢𑁂 𑀕𑀸𑀫𑁄 𑀳𑁄𑀢𑀺, 𑀢𑀁 𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑀸 𑀓𑀺𑀮𑀫𑀦𑁆𑀢𑀺, ‘‘𑀲𑁆𑀯𑁂 𑀢𑀼𑀬𑁆𑀳𑀁 𑀯𑀸𑀭𑀕𑀸𑀫𑁂 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀚𑁆𑀚𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀬𑁄 𑀯𑀸𑀭𑀕𑀸𑀫𑀁 𑀧𑁂𑀲𑀺𑀬𑀫𑀸𑀦𑁄 𑀦 𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀲𑀮𑀸𑀓𑀁 𑀫𑀕𑁆𑀕𑀢𑀺, 𑀦 𑀤𑀸𑀢𑀩𑁆𑀩𑀸. 𑀲𑀤𑁆𑀥𑀸𑀦𑀜𑁆𑀳𑀺 𑀫𑀦𑀼𑀲𑁆𑀲𑀸𑀦𑀁 𑀧𑀼𑀜𑁆𑀜𑀳𑀸𑀦𑀺 𑀘 𑀲𑀗𑁆𑀖𑀲𑁆𑀲 𑀘 𑀮𑀸𑀪𑀘𑁆𑀙𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀤𑀼𑀢𑀺𑀬𑁂𑀧𑀺 𑀢𑀢𑀺𑀬𑁂𑀧𑀺 𑀤𑀺𑀯𑀲𑁂 𑀅𑀜𑁆𑀜𑀸 𑀲𑀮𑀸𑀓𑀸 𑀦 𑀤𑀸𑀢𑀩𑁆𑀩𑀸, ‘‘𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀼𑀜𑁆𑀚𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀻𑀡𑀺 𑀧𑀦 𑀤𑀺𑀯𑀲𑀸𑀦𑀺 𑀅𑀕𑀘𑁆𑀙𑀦𑁆𑀢𑀲𑁆𑀲 𑀯𑀸𑀭𑀕𑀸𑀫𑀢𑁄 𑀑𑀭𑀺𑀫𑀯𑀸𑀭𑀕𑀸𑀫𑁂 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸. 𑀢𑀜𑁆𑀘𑁂 𑀦 𑀕𑀡𑁆𑀳𑀸𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲 𑀅𑀜𑁆𑀜𑀁 𑀲𑀮𑀸𑀓𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀤𑀴𑁆𑀳𑀁 𑀓𑀸𑀢𑀩𑁆𑀩𑀁. 𑀲𑀝𑁆𑀞𑀺𑀢𑁄 𑀯𑀸 𑀧𑀡𑁆𑀡𑀸𑀲𑀢𑁄 𑀯𑀸 𑀦 𑀧𑀭𑀺𑀳𑀸𑀧𑁂𑀢𑀩𑁆𑀩𑀁. 𑀯𑀸𑀭𑀕𑀸𑀫𑁂 𑀕𑀸𑀳𑁂𑀢𑁆𑀯𑀸 𑀯𑀺𑀳𑀸𑀭𑀯𑀸𑀭𑁄 𑀕𑀸𑀳𑁂𑀢𑀩𑁆𑀩𑁄, ‘‘𑀢𑀼𑀬𑁆𑀳𑀁 𑀯𑀺𑀳𑀸𑀭𑀯𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀺𑀳𑀸𑀭𑀯𑀸𑀭𑀺𑀓𑀲𑁆𑀲 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀸𑀕𑀼𑀲𑀮𑀸𑀓𑀸𑀬𑁄 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀪𑀢𑁆𑀢𑀲𑀮𑀸𑀓𑀸𑀬𑁄 𑀘 𑀤𑀸𑀢𑀩𑁆𑀩𑀸, 𑀦𑀺𑀩𑀤𑁆𑀥𑀁 𑀓𑀢𑁆𑀯𑀸 𑀧𑀦 𑀦 𑀤𑀸𑀢𑀩𑁆𑀩𑀸. 𑀬𑀸𑀕𑀼𑀪𑀢𑁆𑀢𑀤𑀸𑀬𑀓𑀸 𑀳𑀺 ‘‘𑀅𑀫𑁆𑀳𑀸𑀓𑀁 𑀬𑀸𑀕𑀼𑀪𑀢𑁆𑀢𑀁 𑀯𑀺𑀳𑀸𑀭𑀕𑁄𑀧𑀓𑀸𑀯𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀅𑀜𑁆𑀜𑁂𑀲𑀼 𑀓𑀼𑀮𑁂𑀲𑀼 𑀤𑀸𑀢𑀩𑁆𑀩𑀸.

𑀲𑀘𑁂 𑀯𑀺𑀳𑀸𑀭𑀯𑀸𑀭𑀺𑀓𑀸𑀦𑀁 𑀲𑀪𑀸𑀕𑀸 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂, 𑀯𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀬𑀸𑀕𑀼𑀪𑀢𑁆𑀢𑀁 𑀆𑀳𑀭𑀸𑀧𑁂𑀢𑀩𑁆𑀩𑀁, 𑀢𑀸𑀯 𑀦𑁂𑀲𑀁 𑀲𑀮𑀸𑀓𑀸 𑀨𑀸𑀢𑀺𑀓𑀫𑁆𑀫𑀫𑁂𑀯 𑀪𑀯𑀦𑁆𑀢𑀺. 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀝𑁆𑀞𑀸𑀦𑁂 𑀧𑀦 𑀅𑀜𑁆𑀜𑀫𑁆𑀧𑀺 𑀧𑀡𑀻𑀢𑀪𑀢𑁆𑀢𑀲𑀮𑀸𑀓𑀁 𑀕𑀡𑁆𑀳𑀺𑀢𑀼𑀁 𑀮𑀪𑀦𑁆𑀢𑀺𑀬𑁂𑀯. 𑀅𑀢𑀺𑀭𑁂𑀓𑀉𑀢𑁆𑀢𑀭𑀺𑀪𑀗𑁆𑀕𑀲𑁆𑀲 𑀏𑀓𑀘𑀸𑀭𑀺𑀓𑀪𑀢𑁆𑀢𑀲𑁆𑀲 𑀯𑀺𑀲𑀼𑀁 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀲𑀮𑀸𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀬𑁂𑀦 𑀲𑀮𑀸𑀓𑀸 𑀮𑀤𑁆𑀥𑀸, 𑀲𑁄 𑀢𑀁 𑀤𑀺𑀯𑀲𑀁 𑀢𑀁 𑀪𑀢𑁆𑀢𑀁 𑀦 𑀮𑀪𑀢𑀺, 𑀧𑀼𑀦 𑀤𑀺𑀯𑀲𑁂 𑀕𑀸𑀳𑁂𑀢𑀩𑁆𑀩𑀁. 𑀪𑀢𑁆𑀢𑀜𑁆𑀜𑁂𑀯 𑀮𑀪𑀢𑀺, 𑀦 𑀉𑀢𑁆𑀢𑀭𑀺𑀪𑀗𑁆𑀕𑀁, 𑀏𑀯𑀫𑁆𑀧𑀺 𑀧𑀼𑀦 𑀕𑀸𑀳𑁂𑀢𑀩𑁆𑀩𑀁. 𑀔𑀻𑀭𑀪𑀢𑁆𑀢𑀲𑀮𑀸𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀔𑀻𑀭𑀫𑁂𑀯 𑀮𑀪𑀢𑀺, 𑀦 𑀪𑀢𑁆𑀢𑀁, 𑀔𑀻𑀭𑀮𑀸𑀪𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀦 𑀕𑀸𑀳𑁂𑀢𑀩𑁆𑀩𑀁. 𑀤𑁆𑀯𑁂 𑀢𑀻𑀡𑀺 𑀏𑀓𑀘𑀸𑀭𑀺𑀓𑀪𑀢𑁆𑀢𑀸𑀦𑀺 𑀏𑀓𑀲𑁆𑀲𑁂𑀯 𑀧𑀸𑀧𑀼𑀡𑀦𑁆𑀢𑀺, 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 𑀲𑀗𑁆𑀖𑀦𑀯𑀓𑁂𑀦 𑀮𑀤𑁆𑀥𑀓𑀸𑀮𑁂 𑀯𑀺𑀚𑀝𑁂𑀢𑁆𑀯𑀸 𑀯𑀺𑀲𑀼𑀁 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀧𑀸𑀓𑀢𑀺𑀓𑀲𑀮𑀸𑀓𑀪𑀢𑁆𑀢𑀁 𑀅𑀮𑀤𑁆𑀥𑀲𑁆𑀲𑀧𑀺 𑀧𑀼𑀦𑀤𑀺𑀯𑀲𑁂 𑀕𑀸𑀳𑁂𑀢𑀩𑁆𑀩𑀁.

𑀲𑀘𑁂 𑀔𑀼𑀤𑁆𑀤𑀓𑁄 𑀯𑀺𑀳𑀸𑀭𑁄 𑀳𑁄𑀢𑀺, 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀏𑀓𑀲𑀫𑁆𑀪𑁄𑀕𑀸, 𑀉𑀘𑁆𑀙𑀼𑀲𑀮𑀸𑀓𑀁 𑀕𑀸𑀳𑁂𑀦𑁆𑀢𑁂𑀦 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀧𑀸𑀧𑁂𑀢𑁆𑀯𑀸 𑀫𑀳𑀸𑀣𑁂𑀭𑀸𑀤𑀻𑀦𑀁 𑀤𑀺𑀯𑀸 𑀢𑀘𑁆𑀙𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀭𑀲𑀲𑀮𑀸𑀓𑀁 𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀨𑀸𑀡𑀺𑀢𑀁 𑀯𑀸 𑀓𑀸𑀭𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑀸𑀤𑀻𑀦𑀫𑁆𑀧𑀺 𑀤𑀸𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀸𑀦𑀁 𑀆𑀕𑀢𑀸𑀦𑀸𑀕𑀢𑀪𑀸𑀯𑀁 𑀜𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀸. 𑀫𑀳𑀸𑀆𑀯𑀸𑀲𑁂 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀸. 𑀢𑀓𑁆𑀓𑀲𑀮𑀸𑀓𑀫𑁆𑀧𑀺 𑀲𑀪𑀸𑀕𑀝𑁆𑀞𑀸𑀦𑁂 𑀧𑀸𑀧𑁂𑀢𑁆𑀯𑀸 𑀯𑀸 𑀥𑀽𑀫𑀸𑀧𑁂𑀢𑁆𑀯𑀸 𑀧𑀘𑀸𑀧𑁂𑀢𑁆𑀯𑀸 𑀯𑀸 𑀣𑁂𑀭𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀆𑀯𑀸𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀨𑀮𑀲𑀮𑀸𑀓𑀧𑀽𑀯𑀲𑀮𑀸𑀓𑀪𑁂𑀲𑀚𑁆𑀚𑀕𑀦𑁆𑀥𑀫𑀸𑀮𑀸𑀲𑀮𑀸𑀓𑀸𑀬𑁄𑀧𑀺 𑀯𑀺𑀲𑀼𑀁 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀸. 𑀪𑁂𑀲𑀚𑁆𑀚𑀸𑀤𑀺𑀲𑀮𑀸𑀓𑀸𑀬𑁄 𑀘𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀦𑁆𑀢𑀺, 𑀲𑀮𑀸𑀓𑀯𑀲𑁂𑀦 𑀧𑀦 𑀕𑀸𑀳𑀺𑀢𑀢𑁆𑀢𑀸 𑀦 𑀲𑀸𑀤𑀺𑀢𑀩𑁆𑀩𑀸. 𑀅𑀕𑁆𑀕𑀪𑀺𑀓𑁆𑀔𑀸𑀫𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁 𑀤𑁂𑀦𑁆𑀢𑀺, 𑀞𑀺𑀢𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀅𑀲𑀢𑀺𑀬𑀸 𑀞𑀺𑀢𑀺𑀓𑀸𑀬 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀢𑀸𑀤𑀺𑀲𑀸𑀦𑀺 𑀪𑀢𑁆𑀢𑀸𑀦𑀺 𑀩𑀳𑀽𑀦𑀺 𑀳𑁄𑀦𑁆𑀢𑀺, 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀢𑀻𑀡𑀺 𑀤𑀸𑀢𑀩𑁆𑀩𑀸𑀦𑀺. 𑀦𑁄 𑀘𑁂, 𑀏𑀓𑁂𑀓𑀫𑁂𑀯 𑀤𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀕𑀢𑀸𑀬 𑀧𑀼𑀦 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁. 𑀅𑀣 𑀅𑀦𑁆𑀢𑀭𑀸𑀯 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀞𑀺𑀢𑀺𑀓𑀸 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀬𑀤𑀺 𑀧𑀦 𑀢𑀸𑀤𑀺𑀲𑀁 𑀪𑀢𑁆𑀢𑀁 𑀦𑀺𑀩𑀤𑁆𑀥𑀫𑁂𑀯 𑀳𑁄𑀢𑀺, 𑀬𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸 𑀲𑁆𑀯𑁂𑀧𑀺 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺. 𑀏𑀓𑀁 𑀅𑀦𑀺𑀩𑀤𑁆𑀥𑀁 𑀳𑁄𑀢𑀺, 𑀮𑀪𑀦𑀤𑀺𑀯𑀲𑁂 𑀧𑀦 𑀬𑀸𑀯𑀤𑀢𑁆𑀣𑀁 𑀮𑀪𑀢𑀺. 𑀅𑀮𑀪𑀦𑀤𑀺𑀯𑀲𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀢𑀁 𑀬𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀲𑁄 𑀅𑀮𑀪𑀺𑀢𑁆𑀯𑀸 ‘‘𑀲𑁆𑀯𑁂 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁄.

𑀬𑁄 𑀲𑀮𑀸𑀓𑀸𑀲𑀼 𑀕𑀳𑀺𑀢𑀸𑀲𑀼 𑀧𑀘𑁆𑀙𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀸𑀯 𑀲𑀮𑀸𑀓𑀸 𑀦 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀸. 𑀲𑀮𑀸𑀓𑀁 𑀦𑀸𑀫 𑀖𑀡𑁆𑀝𑀺𑀁 𑀧𑀳𑀭𑀡𑀢𑁄 𑀧𑀝𑁆𑀞𑀸𑀬 𑀆𑀕𑀦𑁆𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄𑀯 𑀮𑀪𑀢𑀺, 𑀅𑀜𑁆𑀜𑀲𑁆𑀲 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑀲𑁆𑀲𑀧𑀺 𑀅𑀢𑀺𑀓𑁆𑀓𑀦𑁆𑀢𑀸 𑀅𑀢𑀺𑀓𑁆𑀓𑀦𑁆𑀢𑀸𑀯 𑀳𑁄𑀢𑀺. 𑀲𑀘𑁂 𑀧𑀦𑀲𑁆𑀲 𑀅𑀜𑁆𑀜𑁄 𑀕𑀡𑁆𑀳𑀦𑁆𑀢𑁄 𑀅𑀢𑁆𑀣𑀺, 𑀲𑀬𑀁 𑀅𑀦𑀸𑀕𑀢𑁄𑀧𑀺 𑀮𑀪𑀢𑀺, 𑀲𑀪𑀸𑀕𑀝𑁆𑀞𑀸𑀦𑁂 ‘‘𑀅𑀲𑀼𑀓𑁄 𑀅𑀦𑀸𑀕𑀢𑁄’’𑀢𑀺 𑀜𑀢𑁆𑀯𑀸 ‘‘𑀅𑀬𑀁 𑀢𑀲𑁆𑀲 𑀲𑀮𑀸𑀓𑀸’’𑀢𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 ‘‘𑀅𑀦𑀸𑀕𑀢𑀲𑁆𑀲 𑀦 𑀤𑀸𑀢𑀩𑁆𑀩𑀸’’𑀢𑀺 𑀓𑀢𑀺𑀓𑀁 𑀓𑀭𑁄𑀦𑁆𑀢𑀺, 𑀅𑀥𑀫𑁆𑀫𑀺𑀓𑀸 𑀳𑁄𑀢𑀺. 𑀅𑀦𑁆𑀢𑁄𑀉𑀧𑀘𑀸𑀭𑁂 𑀞𑀺𑀢𑀲𑁆𑀲 𑀳𑀺 𑀪𑀸𑀚𑀦𑀻𑀬𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀧𑀦 ‘‘𑀅𑀦𑀸𑀕𑀢𑀲𑁆𑀲 𑀤𑁂𑀣𑀸’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀤𑀡𑁆𑀟𑀓𑀫𑁆𑀫𑀁 𑀞𑀧𑁂𑀢𑀩𑁆𑀩𑀁, ‘‘𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀙 𑀧𑀜𑁆𑀘𑀲𑀮𑀸𑀓𑀸 𑀦𑀝𑁆𑀞𑀸 𑀳𑁄𑀦𑁆𑀢𑀺, 𑀪𑀢𑁆𑀢𑀼𑀤𑁆𑀤𑁂𑀲𑀓𑁄 𑀤𑀸𑀬𑀓𑀸𑀦𑀁 𑀦𑀸𑀫𑀁 𑀦 𑀲𑀭𑀢𑀺, 𑀲𑁄 𑀘𑁂 𑀦𑀝𑁆𑀞𑀲𑀮𑀸𑀓𑀸 𑀫𑀳𑀸𑀣𑁂𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸 𑀧𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀯𑀤𑁂𑀬𑁆𑀬 ‘‘𑀫𑀬𑀸 𑀅𑀲𑀼𑀓𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀫𑀬𑁆𑀳𑀁 𑀧𑀸𑀧𑀺𑀢𑀁, 𑀢𑀼𑀫𑁆𑀳𑁂 𑀢𑀢𑁆𑀣 𑀮𑀤𑁆𑀥𑀲𑀮𑀸𑀓𑀪𑀢𑁆𑀢𑀁 𑀪𑀼𑀜𑁆𑀚𑁂𑀬𑁆𑀬𑀸𑀣𑀸’’𑀢𑀺, 𑀯𑀝𑁆𑀝𑀢𑀺, 𑀯𑀺𑀳𑀸𑀭𑁂 𑀅𑀧𑀸𑀧𑀺𑀢𑀁 𑀧𑀦 𑀆𑀲𑀦𑀲𑀸𑀮𑀸𑀬 𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀫𑀬𑁆𑀳𑀁 𑀲𑀮𑀸𑀓𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀭 𑀆𑀲𑀦𑀲𑀸𑀮𑀸𑀬 𑀕𑀸𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. ‘‘𑀲𑁆𑀯𑁂 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀲𑁆𑀯𑁂 𑀧𑀝𑁆𑀞𑀸𑀬 𑀅𑀲𑀼𑀓𑀓𑀼𑀮𑀁 𑀦𑀸𑀫 𑀲𑀮𑀸𑀓𑀪𑀢𑁆𑀢𑀁 𑀤𑁂𑀢𑀺, 𑀲𑀮𑀸𑀓𑀕𑁆𑀕𑀸𑀳𑀡𑀓𑀸𑀮𑁂 𑀲𑀭𑁂𑀬𑁆𑀬𑀸𑀲𑀻’’𑀢𑀺. 𑀤𑀼𑀩𑁆𑀪𑀺𑀓𑁆𑀔𑁂 𑀲𑀮𑀸𑀓𑀪𑀢𑁆𑀢𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀪𑀺𑀓𑁆𑀔𑁂 𑀚𑀸𑀢𑁂 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀲𑀮𑀸𑀓𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀧𑀼𑀦 𑀧𑀝𑁆𑀞𑀧𑁂𑀦𑁆𑀢𑀺, 𑀅𑀦𑁆𑀢𑁄𑀕𑀸𑀫𑁂 𑀅𑀕𑀸𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀲𑀮𑀸𑀓𑀪𑀢𑁆𑀢𑀁 𑀦𑀸𑀫 𑀉𑀤𑁆𑀤𑁂𑀲𑀪𑀢𑁆𑀢𑀲𑀤𑀺𑀲𑀁 𑀦 𑀳𑁄𑀢𑀺, 𑀯𑀺𑀳𑀸𑀭𑀫𑁂𑀯 𑀲𑀦𑁆𑀥𑀸𑀬 𑀤𑀻𑀬𑀢𑀺, 𑀢𑀲𑁆𑀫𑀸 𑀩𑀳𑀺𑀉𑀧𑀘𑀸𑀭𑁂 𑀕𑀸𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀲𑁆𑀯𑁂 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀺𑀳𑀸𑀭𑁂 𑀕𑀸𑀳𑁂𑀢𑀩𑁆𑀩𑀫𑁂𑀯.

𑀕𑀫𑀺𑀓𑁄 𑀪𑀺𑀓𑁆𑀔𑀼 𑀬𑀁 𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑀼𑀓𑀸𑀫𑁄, 𑀢𑀢𑁆𑀣 𑀅𑀜𑁆𑀜𑁂𑀦 𑀯𑀸𑀭𑀕𑀸𑀫𑀲𑀮𑀸𑀓𑀸 𑀮𑀤𑁆𑀥𑀸 𑀳𑁄𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀇𑀢𑀭𑀁 𑀪𑀺𑀓𑁆𑀔𑀼𑀁 ‘‘𑀫𑀬𑁆𑀳𑀁 𑀧𑀢𑁆𑀢𑀲𑀮𑀸𑀓𑀁 𑀢𑁆𑀯𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀅𑀦𑀢𑀺𑀓𑁆𑀓𑀦𑁆𑀢𑁂𑀬𑁂𑀯 𑀢𑀲𑁆𑀫𑀺𑀁 𑀢𑀲𑁆𑀲 𑀲𑀮𑀸𑀓𑀸 𑀕𑀸𑀳𑁂𑀢𑀩𑁆𑀩𑀸. 𑀙𑀟𑁆𑀟𑀺𑀢𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀩𑁄𑀥𑀺𑀘𑁂𑀢𑀺𑀬𑀸𑀤𑀻𑀦𑀺 𑀚𑀕𑁆𑀕𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀲𑀮𑀸𑀓𑀪𑀢𑁆𑀢𑀁 𑀧𑀝𑁆𑀞𑀧𑁂𑀦𑁆𑀢𑀺, 𑀪𑀺𑀓𑁆𑀔𑀽 𑀲𑀪𑀸𑀕𑀝𑁆𑀞𑀸𑀦𑁂𑀲𑀼 𑀯𑀲𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀯𑀢𑁆𑀢𑀁 𑀓𑀭𑀺𑀢𑁆𑀯𑀸 𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺, 𑀯𑀝𑁆𑀝𑀢𑀺. 𑀲𑀘𑁂 𑀢𑁂𑀲𑀼 𑀲𑁆𑀯𑀸𑀢𑀦𑀸𑀬 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀕𑀢𑁂𑀲𑀼 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀙𑀟𑁆𑀟𑀺𑀢𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀓𑀸𑀮𑀲𑁆𑀲𑁂𑀯 𑀯𑀢𑁆𑀢𑀁 𑀓𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀲𑀮𑀸𑀓𑀪𑀢𑁆𑀢𑀁 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀘𑁆𑀙𑀢𑀺, 𑀲𑁄𑀯 𑀢𑀲𑁆𑀲 𑀪𑀢𑁆𑀢𑀲𑁆𑀲 𑀇𑀲𑁆𑀲𑀭𑁄. 𑀬𑁄 𑀧𑀦 𑀪𑀺𑀓𑁆𑀔𑀽𑀲𑀼 𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀲𑀼𑀬𑁂𑀯 𑀪𑀽𑀫𑀺𑀬𑀁 𑀤𑁆𑀯𑁂 𑀢𑀬𑁄 𑀲𑀫𑁆𑀫𑀼𑀜𑁆𑀚𑀦𑀻𑀧𑀳𑀸𑀭𑁂 𑀤𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 ‘‘𑀥𑀼𑀭𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀘𑁄𑀭𑀺𑀓𑀸𑀬 𑀕𑀳𑀺𑀢𑀢𑁆𑀢𑀸 𑀦 𑀧𑀸𑀧𑀼𑀡𑀸𑀢𑀺, 𑀯𑀢𑁆𑀢𑀁 𑀓𑀢𑁆𑀯𑀸 𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀕𑀢𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑁄𑀢𑀺.

𑀏𑀓𑁄 𑀕𑀸𑀫𑁄 𑀅𑀢𑀺𑀤𑀽𑀭𑁂 𑀳𑁄𑀢𑀺, 𑀪𑀺𑀓𑁆𑀔𑀽 𑀦𑀺𑀘𑁆𑀘𑀁 𑀕𑀦𑁆𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, 𑀫𑀦𑀼𑀲𑁆𑀲𑀸 ‘‘𑀫𑀬𑀁 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 𑀳𑁄𑀫𑀸’’𑀢𑀺 𑀯𑀤𑀦𑁆𑀢𑀺, 𑀬𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀆𑀲𑀦𑁆𑀦𑀯𑀺𑀳𑀸𑀭𑁂 𑀲𑀪𑀸𑀕𑀪𑀺𑀓𑁆𑀔𑀽, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀕𑀢𑀤𑀺𑀯𑀲𑁂 𑀢𑀼𑀫𑁆𑀳𑁂 𑀪𑀼𑀜𑁆𑀚𑀣𑀸’’𑀢𑀺, 𑀲𑀮𑀸𑀓𑀸 𑀧𑀦 𑀤𑁂𑀯𑀲𑀺𑀓𑀁 𑀧𑀸𑀧𑁂𑀢𑀩𑁆𑀩𑀸. 𑀢𑀸 𑀘 𑀔𑁄 𑀧𑀦 𑀖𑀡𑁆𑀝𑀺𑀧𑀳𑀭𑀡𑀫𑀢𑁆𑀢𑁂𑀦 𑀯𑀸 𑀧𑀘𑁆𑀙𑀺𑀘𑀸𑀮𑀦𑀫𑀢𑁆𑀢𑁂𑀦 𑀯𑀸 𑀧𑀸𑀧𑀺𑀢𑀸 𑀦 𑀳𑁄𑀦𑁆𑀢𑀺, 𑀧𑀘𑁆𑀙𑀺𑀁 𑀧𑀦 𑀕𑀳𑁂𑀢𑁆𑀯𑀸 𑀲𑀮𑀸𑀓𑀸 𑀧𑀻𑀞𑀓𑁂 𑀆𑀓𑀺𑀭𑀺𑀢𑀩𑁆𑀩𑀸, 𑀧𑀘𑁆𑀙𑀺 𑀧𑀦 𑀫𑀼𑀔𑀯𑀝𑁆𑀝𑀺𑀬𑀁 𑀦 𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀳𑀺 𑀢𑀢𑁆𑀣 𑀅𑀳𑀺 𑀯𑀸 𑀯𑀺𑀘𑁆𑀙𑀺𑀓𑁄 𑀯𑀸 𑀪𑀯𑁂𑀬𑁆𑀬, 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀁 𑀧𑀭𑀫𑁆𑀫𑀼𑀔𑀁 𑀓𑀢𑁆𑀯𑀸 𑀲𑀮𑀸𑀓𑀸 𑀆𑀓𑀺𑀭𑀺𑀢𑀩𑁆𑀩𑀸 ‘‘𑀲𑀘𑁂𑀧𑀺 𑀲𑀧𑁆𑀧𑁄 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑁄𑀯 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀲𑀮𑀸𑀓𑀸 𑀆𑀓𑀺𑀭𑀺𑀢𑁆𑀯𑀸 𑀕𑀸𑀫𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀸𑀳𑁂𑀢𑀩𑁆𑀩𑀸.

𑀅𑀧𑀺𑀘 𑀏𑀓𑀁 𑀫𑀳𑀸𑀣𑁂𑀭𑀲𑁆𑀲 𑀧𑀸𑀧𑁂𑀢𑁆𑀯𑀸 ‘‘𑀅𑀯𑀲𑁂𑀲𑀸 𑀫𑀬𑁆𑀳𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀯𑀢𑁆𑀢𑀁 𑀓𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 ‘‘𑀧𑀸𑀧𑀺𑀢𑀸, 𑀆𑀯𑀼𑀲𑁄, 𑀲𑀮𑀸𑀓𑀸’’𑀢𑀺 𑀯𑀼𑀢𑁆𑀢𑁂 ‘‘𑀆𑀫, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀕𑀢𑀕𑀢𑀕𑀸𑀫𑁂 𑀲𑀮𑀸𑀓𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀧𑀸𑀧𑀺𑀢𑀸𑀧𑀺 𑀲𑀼𑀧𑀸𑀧𑀺𑀢𑀸𑀯 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀅𑀜𑁆𑀜𑀁 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀸 ‘‘𑀫𑀬𑀁 𑀢𑀢𑁆𑀣 𑀤𑀸𑀦𑀁 𑀅𑀕𑁆𑀕𑀳𑁂𑀢𑁆𑀯𑀸𑀯 𑀅𑀫𑁆𑀳𑀸𑀓𑀁 𑀕𑁄𑀘𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀮𑀸𑀓𑀸 𑀅𑀕𑁆𑀕𑀳𑁂𑀢𑁆𑀯𑀸𑀯 𑀕𑀢𑀸 𑀯𑀺𑀳𑀸𑀭𑁂 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺, 𑀯𑀝𑁆𑀝𑀢𑀺. 𑀅𑀣 𑀫𑀳𑀸𑀣𑁂𑀭𑁄𑀧𑀺 ‘‘𑀅𑀳𑀁 𑀇𑀥 𑀓𑀺𑀁 𑀓𑀭𑁄𑀫𑀻’’𑀢𑀺 𑀢𑁂𑀳𑀺𑀬𑁂𑀯 𑀲𑀤𑁆𑀥𑀺𑀁 𑀕𑀘𑁆𑀙𑀢𑀺, 𑀢𑁂𑀳𑀺 𑀕𑀢𑀯𑀺𑀳𑀸𑀭𑁂 𑀅𑀪𑀼𑀜𑁆𑀚𑀺𑀢𑁆𑀯𑀸𑀯 𑀕𑁄𑀘𑀭𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁂𑀳𑀺 ‘‘𑀤𑁂𑀣, 𑀪𑀦𑁆𑀢𑁂, 𑀧𑀢𑁆𑀢𑁂, 𑀲𑀮𑀸𑀓𑀬𑀸𑀕𑀼𑀆𑀤𑀻𑀦𑀺 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀧𑀢𑁆𑀢𑀸 𑀦 𑀤𑀸𑀢𑀩𑁆𑀩𑀸. 𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀤𑁂𑀣𑀸𑀢𑀺. 𑀯𑀺𑀳𑀸𑀭𑀝𑁆𑀞𑀓𑀁 𑀪𑀢𑁆𑀢𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀫𑀬𑀁 𑀅𑀜𑁆𑀜𑀯𑀺𑀳𑀸𑀭𑁂 𑀯𑀼𑀢𑁆𑀣𑀸𑀢𑀺. ‘‘𑀤𑁂𑀣, 𑀪𑀦𑁆𑀢𑁂, 𑀦 𑀫𑀬𑀁 𑀯𑀺𑀳𑀸𑀭𑁂 𑀧𑀸𑀮𑀺𑀓𑀸𑀬 𑀤𑁂𑀫, 𑀢𑀼𑀫𑁆𑀳𑀸𑀓𑀁 𑀤𑁂𑀫, 𑀕𑀡𑁆𑀳𑀣 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺.

𑀲𑀮𑀸𑀓𑀪𑀢𑁆𑀢𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁩. 𑀧𑀓𑁆𑀔𑀺𑀓𑀸𑀤𑀻𑀲𑀼 𑀧𑀦 𑀬𑀁 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀘𑀸𑀢𑀼𑀤𑁆𑀤𑀲𑀻 𑀧𑀜𑁆𑀘𑀤𑀲𑀻 𑀧𑀜𑁆𑀘𑀫𑀻 𑀅𑀝𑁆𑀞𑀫𑀻𑀢𑀺 𑀇𑀫𑁂𑀲𑀼 𑀧𑀓𑁆𑀔𑁂𑀲𑀼 𑀓𑀫𑁆𑀫𑀧𑁆𑀧𑀲𑀼𑀢𑁂𑀳𑀺 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀲𑀢𑀺𑀓𑀭𑀡𑀢𑁆𑀣𑀸𑀬 𑀤𑀻𑀬𑀢𑀺, 𑀢𑀁 𑀧𑀓𑁆𑀔𑀺𑀓𑀁 𑀦𑀸𑀫. 𑀢𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀫𑁂𑀯 𑀳𑁄𑀢𑀺, 𑀕𑀸𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀲𑀮𑀸𑀓𑀪𑀢𑁆𑀢𑀫𑁆𑀧𑀺 𑀧𑀓𑁆𑀔𑀺𑀓𑀪𑀢𑁆𑀢𑀫𑁆𑀧𑀺 𑀩𑀳𑀼𑀁 𑀲𑀩𑁆𑀩𑁂𑀲𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀤𑁆𑀯𑁂𑀧𑀺 𑀪𑀢𑁆𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑀳𑀸, 𑀧𑀓𑁆𑀔𑀺𑀓𑀁 𑀕𑀸𑀳𑁂𑀢𑁆𑀯𑀸 𑀢𑀲𑁆𑀲 𑀞𑀺𑀢𑀺𑀓𑀸𑀬 𑀲𑀮𑀸𑀓𑀪𑀢𑁆𑀢𑀁 𑀕𑀸𑀳𑁂𑀢𑀩𑁆𑀩𑀁, 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀕𑀸𑀳𑀸𑀧𑁂𑀢𑁆𑀯𑀸 𑀢𑀲𑁆𑀲 𑀞𑀺𑀢𑀺𑀓𑀸𑀬 𑀧𑀓𑁆𑀔𑀺𑀓𑀁 𑀕𑀸𑀳𑁂𑀢𑀩𑁆𑀩𑀁. 𑀬𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺. 𑀲𑀘𑁂 𑀤𑁆𑀯𑁂𑀧𑀺 𑀪𑀢𑁆𑀢𑀸𑀦𑀺 𑀩𑀳𑀽𑀦𑀺, 𑀪𑀺𑀓𑁆𑀔𑀽 𑀫𑀦𑁆𑀤𑀸, 𑀲𑀮𑀸𑀓𑀪𑀢𑁆𑀢𑀁 𑀦𑀸𑀫 𑀤𑁂𑀯𑀲𑀺𑀓𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀢𑀁 𑀞𑀧𑁂𑀢𑁆𑀯𑀸 ‘‘𑀧𑀓𑁆𑀔𑀺𑀓𑀁, 𑀆𑀯𑀼𑀲𑁄, 𑀪𑀼𑀜𑁆𑀚𑀣𑀸’’𑀢𑀺 𑀧𑀓𑁆𑀔𑀺𑀓𑀫𑁂𑀯 𑀤𑀸𑀢𑀩𑁆𑀩𑀁. 𑀧𑀓𑁆𑀔𑀺𑀓𑀁 𑀧𑀡𑀻𑀢𑀁 𑀤𑁂𑀦𑁆𑀢𑀺, 𑀯𑀺𑀲𑀼𑀁 𑀞𑀺𑀢𑀺𑀓𑀸 𑀓𑀸𑀢𑀩𑁆𑀩𑀸, ‘‘𑀲𑁆𑀯𑁂 𑀧𑀓𑁆𑀔𑁄’’𑀢𑀺 𑀅𑀚𑁆𑀚 𑀧𑀓𑁆𑀔𑀺𑀓𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀤𑀸𑀬𑀓𑀸 𑀯𑀤𑀦𑁆𑀢𑀺 ‘‘𑀲𑁆𑀯𑁂𑀧𑀺 𑀅𑀫𑁆𑀳𑀸𑀓𑀁 𑀖𑀭𑁂 𑀮𑀽𑀔𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀅𑀚𑁆𑀚𑁂𑀯 𑀧𑀓𑁆𑀔𑀺𑀓𑀪𑀢𑁆𑀢𑀁 𑀉𑀤𑁆𑀤𑀺𑀲𑀣𑀸’’𑀢𑀺, 𑀏𑀯𑀁 𑀯𑀝𑁆𑀝𑀢𑀺.

𑀉𑀧𑁄𑀲𑀣𑀺𑀓𑀁 𑀦𑀸𑀫 𑀅𑀦𑁆𑀯𑀟𑁆𑀠𑀫𑀸𑀲𑁂 𑀉𑀧𑁄𑀲𑀣𑀤𑀺𑀯𑀲𑁂 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀬𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀺, 𑀢𑀤𑁂𑀯 𑀤𑀻𑀬𑀢𑀺. 𑀧𑀸𑀝𑀺𑀧𑀤𑀺𑀓𑀁 𑀦𑀸𑀫 ‘‘𑀉𑀧𑁄𑀲𑀣𑁂 𑀩𑀳𑀽 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀪𑀺𑀓𑁆𑀔𑀽𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀧𑀸𑀝𑀺𑀧𑀤𑁂 𑀧𑀦 𑀪𑀺𑀓𑁆𑀔𑀽 𑀓𑀺𑀮𑀫𑀦𑁆𑀢𑀺, 𑀧𑀸𑀝𑀺𑀧𑀤𑁂 𑀤𑀺𑀦𑁆𑀦𑀁 𑀤𑀼𑀩𑁆𑀪𑀺𑀓𑁆𑀔𑀤𑀸𑀦𑀲𑀤𑀺𑀲𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀉𑀧𑁄𑀲𑀣𑀓𑀫𑁆𑀫𑁂𑀦 𑀯𑀸 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀦𑀁 𑀤𑀼𑀢𑀺𑀬𑀤𑀺𑀯𑀲𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀸𑀝𑀺𑀧𑀤𑁂 𑀤𑀻𑀬𑀫𑀸𑀦𑀓𑀤𑀸𑀦𑀁. 𑀢𑀫𑁆𑀧𑀺 𑀉𑀪𑀬𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀫𑁂𑀯. 𑀇𑀢𑀺 𑀇𑀫𑀸𑀦𑀺 𑀲𑀢𑁆𑀢𑀧𑀺 𑀪𑀢𑁆𑀢𑀸𑀦𑀺 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀦 𑀯𑀝𑁆𑀝𑀦𑁆𑀢𑀺, 𑀥𑀼𑀢𑀗𑁆𑀕𑀪𑁂𑀤𑀁 𑀓𑀭𑁄𑀦𑁆𑀢𑀺𑀬𑁂𑀯.

𑁨𑁧𑁪. 𑀅𑀧𑀭𑀸𑀦𑀺𑀧𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁫𑁦) 𑀯𑀺𑀲𑀸𑀔𑀸𑀬 𑀯𑀭𑀁 𑀬𑀸𑀘𑀺𑀢𑁆𑀯𑀸 𑀤𑀺𑀦𑁆𑀦𑀸𑀦𑀺 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀕𑀫𑀺𑀓𑀪𑀢𑁆𑀢𑀁 𑀕𑀺𑀮𑀸𑀦𑀪𑀢𑁆𑀢𑀁 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀦𑁆𑀢𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑁂𑀯. 𑀢𑀢𑁆𑀣 𑀆𑀕𑀦𑁆𑀢𑀼𑀓𑀸𑀦𑀁 𑀤𑀺𑀦𑁆𑀦𑀁 𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀲𑀘𑁂 𑀧𑀦𑁂𑀢𑁆𑀣 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀦𑀺𑀧𑀺 𑀆𑀕𑀦𑁆𑀢𑀼𑀓𑀸𑀧𑀺 𑀩𑀳𑀽 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀏𑀓𑁂𑀓𑀁 𑀕𑀸𑀳𑁂𑀢𑀩𑁆𑀩𑀁. 𑀪𑀢𑁆𑀢𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀏𑀓𑁄 𑀆𑀕𑀦𑁆𑀢𑀼𑀓𑁄 𑀧𑀞𑀫𑀫𑁂𑀯 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀅𑀢𑁆𑀢𑀦𑁄 𑀕𑀸𑀳𑁂𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀲𑀩𑁆𑀩𑀁 𑀢𑀲𑁆𑀲𑁂𑀯 𑀳𑁄𑀢𑀺. 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀆𑀕𑀦𑁆𑀢𑀼𑀓𑁂𑀳𑀺 𑀢𑁂𑀦 𑀤𑀺𑀦𑁆𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺. 𑀢𑁂𑀦𑀧𑀺 𑀏𑀓𑀁 𑀅𑀢𑁆𑀢𑀦𑁄 𑀕𑀳𑁂𑀢𑁆𑀯𑀸 𑀲𑁂𑀲𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀅𑀬𑀁 𑀉𑀴𑀸𑀭𑀢𑀸. 𑀲𑀘𑁂 𑀧𑀦 𑀧𑀞𑀫𑀁 𑀆𑀕𑀦𑁆𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀅𑀕𑁆𑀕𑀳𑁂𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀲𑀻𑀤𑀢𑀺, 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀧𑀸𑀝𑀺𑀬𑀸 𑀕𑀡𑁆𑀳𑀺𑀢𑀩𑁆𑀩𑀁. 𑀲𑀘𑁂 𑀦𑀺𑀘𑁆𑀘𑀁 𑀆𑀕𑀦𑁆𑀢𑀼𑀓𑀸 𑀆𑀕𑀘𑁆𑀙𑀦𑁆𑀢𑀺, 𑀆𑀕𑀢𑀤𑀺𑀯𑀲𑁂𑀬𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀅𑀦𑁆𑀢𑀭𑀦𑁆𑀢𑀭𑀸 𑀘𑁂 𑀆𑀕𑀘𑁆𑀙𑀦𑁆𑀢𑀺, 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 ‘‘𑀲𑀢𑁆𑀢 𑀤𑀺𑀯𑀲𑀸𑀦𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀯𑀸𑀲𑀺𑀓𑁄 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀆𑀕𑀢𑁄, 𑀢𑁂𑀦𑀧𑀺 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑀁 𑀯𑀺𑀳𑀸𑀭𑁂 𑀦𑀺𑀩𑀦𑁆𑀥𑀸𑀧𑀺𑀢𑀁 𑀳𑁄𑀢𑀺, 𑀯𑀺𑀳𑀸𑀭𑁂 𑀕𑀸𑀳𑁂𑀢𑀩𑁆𑀩𑀁. 𑀅𑀣 𑀯𑀺𑀳𑀸𑀭𑁄 𑀤𑀽𑀭𑁂 𑀳𑁄𑀢𑀺, 𑀆𑀲𑀦𑀲𑀸𑀮𑀸𑀬 𑀦𑀺𑀩𑀦𑁆𑀥𑀸𑀧𑀺𑀢𑀁, 𑀆𑀲𑀦𑀲𑀸𑀮𑀸𑀬 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀤𑀸𑀬𑀓𑀸 ‘‘𑀆𑀕𑀦𑁆𑀢𑀼𑀓𑁂𑀲𑀼 𑀅𑀲𑀢𑀺 𑀆𑀯𑀸𑀲𑀺𑀓𑀸𑀧𑀺 𑀪𑀼𑀜𑁆𑀚𑀦𑁆𑀢𑀽’’𑀢𑀺 𑀯𑀤𑀦𑁆𑀢𑀺, 𑀯𑀝𑁆𑀝𑀢𑀺, 𑀅𑀯𑀼𑀢𑁆𑀢𑁂 𑀧𑀦 𑀦 𑀯𑀝𑁆𑀝𑀢𑀺.

𑀕𑀫𑀺𑀓𑀪𑀢𑁆𑀢𑁂𑀧𑀺 𑀅𑀬𑀫𑁂𑀯 𑀓𑀣𑀸𑀫𑀕𑁆𑀕𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁂𑀯 𑀮𑀪𑀢𑀺, 𑀕𑀫𑀺𑀓𑁄 𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁆𑀧𑀺 𑀕𑀫𑀺𑀓𑀪𑀢𑁆𑀢𑀫𑁆𑀧𑀺. 𑀆𑀯𑀸𑀲𑀺𑀓𑁄𑀧𑀺 𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀕𑀫𑀺𑀓𑁄 𑀳𑁄𑀢𑀺, 𑀕𑀫𑀺𑀓𑀪𑀢𑁆𑀢𑀁 𑀮𑀪𑀢𑀺. 𑀬𑀣𑀸 𑀧𑀦 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀏𑀯𑀫𑀺𑀤𑀁 𑀤𑁆𑀯𑁂 𑀢𑀻𑀡𑀺 𑀯𑀸 𑀲𑀢𑁆𑀢 𑀯𑀸 𑀤𑀺𑀯𑀲𑀸𑀦𑀺 𑀦 𑀮𑀪𑀢𑀺. ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑁄𑀧𑀺 𑀢𑀁 𑀤𑀺𑀯𑀲𑀁 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦 𑀕𑀢𑁄, 𑀧𑀼𑀦𑀤𑀺𑀯𑀲𑁂𑀧𑀺 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀲𑀉𑀲𑁆𑀲𑀸𑀳𑀢𑁆𑀢𑀸. ‘‘𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀼𑀢𑁆𑀢𑀲𑁆𑀲 𑀘𑁄𑀭𑀸 𑀯𑀸 𑀧𑀦𑁆𑀣𑀁 𑀭𑀼𑀦𑁆𑀥𑀦𑁆𑀢𑀺, 𑀉𑀤𑀓𑀁 𑀯𑀸 𑀤𑁂𑀯𑁄 𑀯𑀸 𑀯𑀲𑁆𑀲𑀢𑀺, 𑀲𑀢𑁆𑀣𑁄 𑀯𑀸 𑀦 𑀕𑀘𑁆𑀙𑀢𑀺, 𑀲𑀉𑀲𑁆𑀲𑀸𑀳𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀏𑀢𑁂 𑀉𑀧𑀤𑁆𑀤𑀯𑁂 𑀑𑀮𑁄𑀓𑁂𑀦𑁆𑀢𑁂𑀦 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁. ‘‘𑀕𑀫𑀺𑀲𑁆𑀲𑀸𑀫𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀮𑁂𑀲𑀁 𑀑𑀟𑁆𑀟𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀢𑀺.

𑀕𑀺𑀮𑀸𑀦𑀪𑀢𑁆𑀢𑀫𑁆𑀧𑀺 𑀲𑀘𑁂 𑀲𑀩𑁆𑀩𑁂𑀲𑀁 𑀕𑀺𑀮𑀸𑀦𑀸𑀦𑀁 𑀧𑀳𑁄𑀢𑀺, 𑀢𑀁 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀁. 𑀦𑁄 𑀘𑁂, 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀏𑀓𑁄 𑀕𑀺𑀮𑀸𑀦𑁄 𑀅𑀭𑁄𑀕𑀭𑀽𑀧𑁄 𑀲𑀓𑁆𑀓𑁄𑀢𑀺 𑀅𑀦𑁆𑀢𑁄𑀕𑀸𑀫𑀁 𑀕𑀦𑁆𑀢𑀼𑀁, 𑀏𑀓𑁄 𑀦 𑀲𑀓𑁆𑀓𑁄𑀢𑀺, 𑀅𑀬𑀁 𑀫𑀳𑀸𑀕𑀺𑀮𑀸𑀦𑁄 𑀦𑀸𑀫, 𑀏𑀢𑀲𑁆𑀲 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀤𑁆𑀯𑁂 𑀫𑀳𑀸𑀕𑀺𑀮𑀸𑀦𑀸, 𑀏𑀓𑁄 𑀮𑀸𑀪𑀻 𑀅𑀪𑀺𑀜𑁆𑀜𑀸𑀢𑁄 𑀩𑀳𑀼𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀮𑀪𑀢𑀺, 𑀏𑀓𑁄 𑀅𑀦𑀸𑀣𑁄 𑀅𑀧𑁆𑀧𑀮𑀸𑀪𑀢𑀸𑀬 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀢𑀺, 𑀏𑀢𑀲𑁆𑀲 𑀕𑀺𑀮𑀸𑀦𑀪𑀢𑁆𑀢𑀁 𑀤𑀸𑀢𑀩𑁆𑀩𑀁. 𑀕𑀺𑀮𑀸𑀦𑀪𑀢𑁆𑀢𑁂 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯 𑀭𑁄𑀕𑁄 𑀦 𑀯𑀽𑀧𑀲𑀫𑁆𑀫𑀢𑀺, 𑀲𑀧𑁆𑀧𑀸𑀬𑀪𑁄𑀚𑀦𑀁 𑀅𑀪𑀼𑀜𑁆𑀚𑀦𑁆𑀢𑁄 𑀦 𑀬𑀸𑀧𑁂𑀢𑀺, 𑀢𑀸𑀯 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀬𑀤𑀸 𑀧𑀦 𑀫𑀺𑀲𑁆𑀲𑀓𑀬𑀸𑀕𑀼𑀁 𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑀁 𑀯𑀸 𑀪𑀼𑀢𑁆𑀢𑀲𑁆𑀲𑀧𑀺 𑀭𑁄𑀕𑁄 𑀦 𑀓𑀼𑀧𑁆𑀧𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀦 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀫𑁆𑀧𑀺 𑀬𑀁 𑀲𑀩𑁆𑀩𑁂𑀲𑀁 𑀧𑀳𑁄𑀢𑀺, 𑀢𑀁 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀁. 𑀦𑁄 𑀘𑁂 𑀧𑀳𑁄𑀢𑀺, 𑀞𑀺𑀢𑀺𑀓𑀁 𑀓𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀇𑀤𑀫𑁆𑀧𑀺 𑀤𑁆𑀯𑀻𑀲𑀼 𑀕𑀺𑀮𑀸𑀦𑁂𑀲𑀼 𑀫𑀳𑀸𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲 𑀕𑀸𑀳𑁂𑀢𑀩𑁆𑀩𑀁, 𑀤𑁆𑀯𑀻𑀲𑀼 𑀫𑀳𑀸𑀕𑀺𑀮𑀸𑀦𑁂𑀲𑀼 𑀅𑀦𑀸𑀣𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀲𑁆𑀲. 𑀬𑀁 𑀓𑀼𑀮𑀁 𑀕𑀺𑀮𑀸𑀦𑀪𑀢𑁆𑀢𑀫𑁆𑀧𑀺 𑀤𑁂𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀫𑁆𑀧𑀺, 𑀢𑀢𑁆𑀣 𑀬𑀲𑁆𑀲 𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑀪𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀤𑀼𑀧𑀝𑁆𑀞𑀸𑀓𑀲𑁆𑀲𑀧𑀺 𑀢𑀢𑁆𑀣𑁂𑀯 𑀕𑀸𑀳𑁂𑀢𑀩𑁆𑀩𑀁. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑁂𑀧𑀺 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯 𑀕𑀺𑀮𑀸𑀦𑁄 𑀮𑀪𑀢𑀺, 𑀢𑀸𑀯𑀲𑁆𑀲 𑀉𑀧𑀝𑁆𑀞𑀸𑀓𑁄𑀧𑀺 𑀮𑀪𑀢𑀻𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀲𑀘𑁂 𑀏𑀯𑀁 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 ‘‘𑀆𑀕𑀦𑁆𑀢𑀼𑀓𑀕𑀫𑀺𑀓𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀫𑀫 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀦 ‘‘𑀆𑀕𑀦𑁆𑀢𑀼𑀓𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀪𑀢𑁆𑀢𑀁 𑀦𑀺𑀩𑀦𑁆𑀥𑀸𑀧𑁂𑀫𑀺, 𑀫𑀫 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀯𑀁 𑀤𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀦 𑀯𑀝𑁆𑀝𑀢𑀺.

𑁨𑁧𑁫. 𑀅𑀧𑀭𑀸𑀦𑀺𑀧𑀺 𑀥𑀼𑀭𑀪𑀢𑁆𑀢𑀁 𑀓𑀼𑀝𑀺𑀪𑀢𑁆𑀢𑀁 𑀯𑀸𑀭𑀓𑀪𑀢𑁆𑀢𑀦𑁆𑀢𑀺 𑀢𑀻𑀡𑀺 𑀪𑀢𑁆𑀢𑀸𑀦𑀺. 𑀢𑀢𑁆𑀣 𑀥𑀼𑀭𑀪𑀢𑁆𑀢𑀦𑁆𑀢𑀺 𑀦𑀺𑀘𑁆𑀘𑀪𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀢𑀁 𑀤𑀼𑀯𑀺𑀥𑀁 𑀲𑀗𑁆𑀖𑀺𑀓𑀜𑁆𑀘 𑀧𑀼𑀕𑁆𑀕𑀮𑀺𑀓𑀜𑁆𑀘. 𑀢𑀢𑁆𑀣 𑀬𑀁 ‘‘𑀲𑀗𑁆𑀖𑀲𑁆𑀲 𑀥𑀼𑀭𑀪𑀢𑁆𑀢𑀁 𑀤𑁂𑀫𑀸’’𑀢𑀺 𑀦𑀺𑀩𑀦𑁆𑀥𑀸𑀧𑀺𑀢𑀁, 𑀢𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀁. ‘‘𑀫𑀫 𑀦𑀺𑀩𑀤𑁆𑀥𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀧𑀼𑀕𑁆𑀕𑀮𑀺𑀓𑁂𑀧𑀺 ‘‘𑀢𑀼𑀫𑁆𑀳𑀸𑀓𑀁 𑀥𑀼𑀭𑀪𑀢𑁆𑀢𑀁 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀧𑀺𑀡𑁆𑀟𑀧𑀸𑀢𑀺𑀓𑁄 𑀘𑁂, 𑀦 𑀯𑀝𑁆𑀝𑀢𑀺, ‘‘𑀫𑀫 𑀦𑀺𑀩𑀤𑁆𑀥𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺, 𑀲𑀸𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀘𑁆𑀙𑀸 𑀓𑀢𑀺𑀧𑀸𑀳𑁂 𑀯𑀻𑀢𑀺𑀯𑀢𑁆𑀢𑁂 ‘‘𑀥𑀼𑀭𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀤𑀢𑀺, 𑀫𑀽𑀮𑁂 𑀲𑀼𑀝𑁆𑀞𑀼 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀯𑀝𑁆𑀝𑀢𑀺.

𑀓𑀼𑀝𑀺𑀪𑀢𑁆𑀢𑀁 𑀦𑀸𑀫 𑀬𑀁 𑀲𑀗𑁆𑀖𑀲𑁆𑀲 𑀆𑀯𑀸𑀲𑀁 𑀓𑀸𑀭𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀯𑀸𑀲𑀺𑀦𑁄 𑀅𑀫𑁆𑀳𑀸𑀓𑀁𑀬𑁂𑀯 𑀪𑀢𑁆𑀢𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀏𑀯𑀁 𑀦𑀺𑀩𑀦𑁆𑀥𑀸𑀧𑀺𑀢𑀁, 𑀢𑀁 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀫𑁂𑀯 𑀳𑁄𑀢𑀺, 𑀕𑀸𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀯𑀸𑀲𑀺𑀦𑁄 𑀅𑀫𑁆𑀳𑀸𑀓𑀁𑀬𑁂𑀯 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀬𑀁 𑀧𑀦 𑀧𑀼𑀕𑁆𑀕𑀮𑁂 𑀧𑀲𑀻𑀤𑀺𑀢𑁆𑀯𑀸 𑀢𑀲𑁆𑀲 𑀆𑀯𑀸𑀲𑀁 𑀓𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑀁, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀢𑁆𑀣𑀘𑀺 𑀕𑀢𑁂 𑀦𑀺𑀲𑁆𑀲𑀺𑀢𑀓𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁.

𑀯𑀸𑀭𑀓𑀪𑀢𑁆𑀢𑀁 𑀦𑀸𑀫 𑀤𑀼𑀩𑁆𑀪𑀺𑀓𑁆𑀔𑀲𑀫𑀬𑁂 ‘‘𑀯𑀸𑀭𑁂𑀦 𑀪𑀺𑀓𑁆𑀔𑀽 𑀚𑀕𑁆𑀕𑀺𑀲𑁆𑀲𑀸𑀫𑀸’’𑀢𑀺 𑀥𑀼𑀭𑀕𑁂𑀳𑀢𑁄 𑀧𑀝𑁆𑀞𑀸𑀬 𑀤𑀺𑀦𑁆𑀦𑀁, 𑀢𑀫𑁆𑀧𑀺 𑀪𑀺𑀓𑁆𑀔𑀸𑀯𑀘𑀦𑁂𑀦 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺, ‘‘𑀯𑀸𑀭𑀓𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀁 𑀳𑁄𑀢𑀺. 𑀲𑀘𑁂 𑀢𑀡𑁆𑀟𑀼𑀮𑀸𑀤𑀻𑀦𑀺 𑀧𑁂𑀲𑁂𑀦𑁆𑀢𑀺 ‘‘𑀲𑀸𑀫𑀡𑁂𑀭𑀸 𑀧𑀘𑀺𑀢𑁆𑀯𑀸 𑀤𑁂𑀦𑁆𑀢𑀽’’𑀢𑀺, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. 𑀇𑀢𑀺 𑀇𑀫𑀸𑀦𑀺 𑀘 𑀢𑀻𑀡𑀺, 𑀆𑀕𑀦𑁆𑀢𑀼𑀓𑀪𑀢𑁆𑀢𑀸𑀤𑀻𑀦𑀺 𑀘 𑀘𑀢𑁆𑀢𑀸𑀭𑀻𑀢𑀺 𑀲𑀢𑁆𑀢, 𑀢𑀸𑀦𑀺 𑀲𑀗𑁆𑀖𑀪𑀢𑁆𑀢𑀸𑀤𑀻𑀳𑀺 𑀲𑀳 𑀘𑀼𑀤𑁆𑀤𑀲 𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑁨𑁧𑁬. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀳𑀸𑀭𑀪𑀢𑁆𑀢𑀁 𑀅𑀝𑁆𑀞𑀓𑀪𑀢𑁆𑀢𑀁 𑀘𑀢𑀼𑀓𑁆𑀓𑀪𑀢𑁆𑀢𑀁 𑀕𑀼𑀴𑁆𑀳𑀓𑀪𑀢𑁆𑀢𑀦𑁆𑀢𑀺 𑀅𑀜𑁆𑀜𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀪𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀯𑀺𑀳𑀸𑀭𑀪𑀢𑁆𑀢𑀁 𑀦𑀸𑀫 𑀯𑀺𑀳𑀸𑀭𑁂 𑀢𑀢𑁆𑀭𑀼𑀧𑁆𑀧𑀸𑀤𑀪𑀢𑁆𑀢𑀁, 𑀢𑀁 𑀲𑀗𑁆𑀖𑀪𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀁. 𑀢𑀁 𑀧𑀦 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀘𑀺𑀢𑁆𑀢𑀮𑀧𑀩𑁆𑀩𑀢𑀸𑀤𑀻𑀲𑀼 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀬𑀣𑀸 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀢𑀣𑀸 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. ‘‘𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀤𑁂𑀫, 𑀘𑀢𑀼𑀦𑁆𑀦𑀁 𑀤𑁂𑀫𑀸’’𑀢𑀺 𑀏𑀯𑀁 𑀤𑀺𑀦𑁆𑀦𑀁 𑀧𑀦 𑀅𑀝𑁆𑀞𑀓𑀪𑀢𑁆𑀢𑀜𑁆𑀘𑁂𑀯 𑀘𑀢𑀼𑀓𑁆𑀓𑀪𑀢𑁆𑀢𑀜𑁆𑀘, 𑀢𑀫𑁆𑀧𑀺 𑀪𑀺𑀓𑁆𑀔𑀸𑀯𑀘𑀦𑁂𑀦 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀁 𑀯𑀝𑁆𑀝𑀢𑀺. 𑀫𑀳𑀸𑀪𑀺𑀲𑀗𑁆𑀔𑀸𑀭𑁂𑀦 𑀅𑀢𑀺𑀭𑀲𑀓𑀧𑀽𑀯𑁂𑀦 𑀧𑀢𑁆𑀢𑀁 𑀣𑀓𑁂𑀢𑁆𑀯𑀸 𑀤𑀺𑀦𑁆𑀦𑀁 𑀕𑀼𑀴𑁆𑀳𑀓𑀪𑀢𑁆𑀢𑀁 𑀦𑀸𑀫. 𑀇𑀫𑀸𑀦𑀺 𑀢𑀻𑀡𑀺 𑀲𑀮𑀸𑀓𑀪𑀢𑁆𑀢𑀕𑀢𑀺𑀓𑀸𑀦𑁂𑀯. 𑀅𑀧𑀭𑀫𑁆𑀧𑀺 𑀕𑀼𑀴𑁆𑀳𑀓𑀪𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀇𑀥𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀫𑀳𑀸𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀯𑀺𑀳𑀸𑀭𑀧𑀽𑀚𑀜𑁆𑀘 𑀓𑀸𑀭𑁂𑀢𑁆𑀯𑀸 ‘‘𑀲𑀓𑀮𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫, 𑀤𑁆𑀯𑁂 𑀢𑀻𑀡𑀺 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀪𑀺𑀓𑁆𑀔𑀼𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀢𑁆𑀣𑀁 𑀕𑀼𑀴𑁆𑀳𑀓𑁂 𑀤𑁂𑀦𑁆𑀢𑀺, 𑀇𑀤𑀁 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺.

𑀧𑀺𑀡𑁆𑀟𑀧𑀸𑀢𑀪𑀸𑀚𑀦𑀻𑀬𑀁 𑀦𑀺𑀝𑁆𑀞𑀺𑀢𑀁.

𑁨𑁧𑁭. 𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀻𑀬𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫 𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸) 𑁋 𑀲𑀧𑁆𑀧𑀺𑀆𑀤𑀻𑀲𑀼 𑀪𑁂𑀲𑀚𑁆𑀚𑁂𑀲𑀼 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀲𑀧𑁆𑀧𑀺𑀲𑁆𑀲 𑀢𑀸𑀯 𑀓𑀼𑀫𑁆𑀪𑀲𑀢𑀫𑁆𑀧𑀺 𑀓𑀼𑀫𑁆𑀪𑀲𑀳𑀲𑁆𑀲𑀫𑁆𑀧𑀺 𑀯𑀺𑀳𑀸𑀭𑀁 𑀧𑁂𑀲𑁂𑀦𑁆𑀢𑀺, 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀳𑀺𑀢𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀧𑀺𑀡𑁆𑀟𑀧𑀸𑀢𑀺𑀓𑀸𑀦𑀫𑁆𑀧𑀺 𑀯𑀝𑁆𑀝𑀢𑀺. 𑀲𑀘𑁂 𑀅𑀮𑀲𑀚𑀸𑀢𑀺𑀓𑀸 𑀫𑀳𑀸𑀣𑁂𑀭𑀸 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀺, ‘‘𑀪𑀦𑁆𑀢𑁂, 𑀯𑀻𑀲𑀢𑀺𑀯𑀲𑁆𑀲𑀸𑀦𑀁 𑀤𑀻𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀞𑀺𑀢𑀺𑀓𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸, 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀞𑀺𑀢𑀺𑀓𑀸𑀬 𑀤𑀸𑀢𑀩𑁆𑀩𑀁. ‘‘𑀅𑀲𑀼𑀓𑀯𑀺𑀳𑀸𑀭𑁂 𑀩𑀳𑀼 𑀲𑀧𑁆𑀧𑀺 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀦𑁆𑀢𑀭𑀯𑀺𑀳𑀸𑀭𑀢𑁄𑀧𑀺 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀤𑀸𑀢𑀩𑁆𑀩𑀁. 𑀅𑀲𑀫𑁆𑀧𑀢𑁆𑀢𑀸𑀦𑀫𑁆𑀧𑀺 𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀝𑁆𑀞𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀤𑀻𑀲𑀼 𑀕𑀡𑁆𑀳𑀦𑁆𑀢𑁂𑀲𑀼 𑀤𑀸𑀢𑀩𑁆𑀩𑀫𑁂𑀯. ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀸𑀬 𑀞𑀺𑀢𑀸𑀦𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀉𑀧𑀘𑀸𑀭𑀲𑀻𑀫𑀁 𑀑𑀓𑁆𑀓𑀦𑁆𑀢𑁂𑀳𑀺 𑀏𑀓𑀸𑀩𑀤𑁆𑀥𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀺𑀢𑀸 𑀦𑀸𑀫 𑀲𑀻𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀤𑀸𑀢𑀩𑁆𑀩𑀸. 𑀲𑀗𑁆𑀖𑀦𑀯𑀓𑀲𑁆𑀲 𑀤𑀺𑀦𑁆𑀦𑁂𑀧𑀺 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀤𑀸𑀢𑀩𑁆𑀩𑀫𑁂𑀯. 𑀤𑀼𑀢𑀺𑀬𑀪𑀸𑀕𑁂 𑀧𑀦 𑀣𑁂𑀭𑀸𑀲𑀦𑀁 𑀆𑀭𑀼𑀴𑁆𑀳𑁂 𑀆𑀕𑀢𑀸𑀦𑀁 𑀧𑀞𑀫𑀪𑀸𑀕𑁄 𑀦 𑀧𑀸𑀧𑀼𑀡𑀸𑀢𑀺, 𑀤𑀼𑀢𑀺𑀬𑀪𑀸𑀕𑀢𑁄 𑀯𑀲𑁆𑀲𑀕𑁆𑀕𑁂𑀦 𑀤𑀸𑀢𑀩𑁆𑀩𑀁. 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀁 𑀧𑀯𑀺𑀲𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀺𑀦𑁆𑀦𑀁 𑀳𑁄𑀢𑀺, 𑀲𑀩𑁆𑀩𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂𑀬𑁂𑀯 𑀪𑀸𑀚𑁂𑀢𑀩𑁆𑀩𑀁.

𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑀲 𑀪𑀺𑀓𑁆𑀔𑀽, 𑀤𑀲𑁂𑀯 𑀘 𑀲𑀧𑁆𑀧𑀺𑀓𑀼𑀫𑁆𑀪𑀸 𑀤𑀻𑀬𑀦𑁆𑀢𑀺, 𑀏𑀓𑁂𑀓𑀓𑀼𑀫𑁆𑀪𑀯𑀲𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀏𑀓𑁄 𑀲𑀧𑁆𑀧𑀺𑀓𑀼𑀫𑁆𑀪𑁄 𑀳𑁄𑀢𑀺, 𑀤𑀲𑀪𑀺𑀓𑁆𑀔𑀽𑀳𑀺 𑀪𑀸𑀚𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 ‘‘𑀬𑀣𑀸𑀞𑀺𑀢𑀁𑀬𑁂𑀯 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀕𑀡𑁆𑀳𑀦𑁆𑀢𑀺, 𑀤𑀼𑀕𑁆𑀕𑀳𑀺𑀢𑀁, 𑀢𑀁 𑀕𑀢𑀕𑀢𑀝𑁆𑀞𑀸𑀦𑁂 𑀲𑀗𑁆𑀖𑀺𑀓𑀫𑁂𑀯 𑀳𑁄𑀢𑀺. 𑀓𑀼𑀫𑁆𑀪𑀁 𑀧𑀦 𑀆𑀯𑀚𑁆𑀚𑁂𑀢𑁆𑀯𑀸 𑀣𑀸𑀮𑀓𑁂 𑀣𑁄𑀓𑀁 𑀲𑀧𑁆𑀧𑀺𑀁 𑀓𑀢𑁆𑀯𑀸 ‘‘𑀇𑀤𑀁 𑀫𑀳𑀸𑀣𑁂𑀭𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀅𑀯𑀲𑁂𑀲𑀁 𑀅𑀫𑁆𑀳𑀸𑀓𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁆𑀧𑀺 𑀓𑀼𑀫𑁆𑀪𑁂𑀬𑁂𑀯 𑀆𑀓𑀺𑀭𑀺𑀢𑁆𑀯𑀸 𑀬𑀣𑀺𑀘𑁆𑀙𑀺𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀣𑀺𑀦𑀁 𑀲𑀧𑁆𑀧𑀺 𑀳𑁄𑀢𑀺, 𑀮𑁂𑀔𑀁 𑀓𑀢𑁆𑀯𑀸 ‘‘𑀮𑁂𑀔𑀢𑁄 𑀧𑀭𑀪𑀸𑀕𑁄 𑀫𑀳𑀸𑀣𑁂𑀭𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀅𑀯𑀲𑁂𑀲𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀕𑀳𑀺𑀢𑀫𑁆𑀧𑀺 𑀲𑀼𑀕𑁆𑀕𑀳𑀺𑀢𑀁. 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀊𑀦𑀸𑀥𑀺𑀓𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀧𑁆𑀧𑀺𑀓𑀼𑀫𑁆𑀪𑁂𑀲𑀼 𑀘 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀲𑀘𑁂 𑀧𑀦𑁂𑀓𑁄 𑀪𑀺𑀓𑁆𑀔𑀼, 𑀏𑀓𑁄 𑀓𑀼𑀫𑁆𑀪𑁄 𑀳𑁄𑀢𑀺, 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀻’’𑀢𑀺𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. ‘‘𑀅𑀬𑀁 𑀧𑀞𑀫𑀪𑀸𑀕𑁄 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀤𑀼𑀢𑀺𑀬𑀪𑀸𑀕𑁄’’𑀢𑀺 𑀏𑀯𑀁 𑀣𑁄𑀓𑀁 𑀣𑁄𑀓𑀫𑁆𑀧𑀺 𑀧𑀸𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀏𑀲 𑀦𑀬𑁄 𑀦𑀯𑀦𑀻𑀢𑀸𑀤𑀻𑀲𑀼𑀧𑀺. 𑀬𑀲𑁆𑀫𑀺𑀁 𑀧𑀦 𑀯𑀺𑀧𑁆𑀧𑀲𑀦𑁆𑀦𑀢𑀺𑀮𑀢𑁂𑀮𑀸𑀤𑀺𑀫𑁆𑀳𑀺 𑀮𑁂𑀔𑀸 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁. 𑀲𑀺𑀗𑁆𑀕𑀺𑀯𑁂𑀭𑀫𑀭𑀺𑀘𑀸𑀤𑀺𑀪𑁂𑀲𑀚𑁆𑀚𑀫𑁆𑀧𑀺 𑀅𑀯𑀲𑁂𑀲𑀧𑀢𑁆𑀢𑀣𑀸𑀮𑀓𑀸𑀤𑀺𑀲𑀫𑀡𑀧𑀭𑀺𑀓𑁆𑀔𑀸𑀭𑁄𑀧𑀺 𑀲𑀩𑁆𑀩𑁄 𑀯𑀼𑀢𑁆𑀢𑀸𑀦𑀼𑀭𑀽𑀧𑁂𑀦𑁂𑀯 𑀦𑀬𑁂𑀦 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑁄𑀢𑀺. 𑀅𑀬𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑀸𑀚𑀦𑀻𑀬𑀓𑀣𑀸.

𑁨𑁧𑁮. 𑀇𑀤𑀸𑀦𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑁂 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) 𑁋 𑀅𑀬𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫 𑀤𑀼𑀯𑀺𑀥𑁄 𑀳𑁄𑀢𑀺 𑀉𑀢𑀼𑀓𑀸𑀮𑁂 𑀘 𑀯𑀲𑁆𑀲𑀸𑀯𑀸𑀲𑁂 𑀘. 𑀢𑀢𑁆𑀣 𑀉𑀢𑀼𑀓𑀸𑀮𑁂 𑀢𑀸𑀯 𑀓𑁂𑀘𑀺 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀧𑀼𑀭𑁂𑀪𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀓𑁂𑀘𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀞𑀫𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀁 𑀯𑀸. 𑀬𑁂 𑀬𑀤𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀤𑀸𑀯 𑀪𑀺𑀓𑁆𑀔𑀽 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀅𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁂𑀦 𑀧𑀦 𑀧𑀡𑁆𑀟𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀫𑀜𑁆𑀘𑀝𑁆𑀞𑀸𑀦𑀸𑀦𑀺 𑀞𑀧𑁂𑀢𑀩𑁆𑀩𑀸𑀦𑀺. 𑀲𑀘𑁂 𑀯𑀺𑀓𑀸𑀮𑁂 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀣𑁂𑀭𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀪𑀦𑁆𑀢𑁂, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑁂 𑀲𑀩𑁆𑀩𑁂𑀧𑀺 𑀪𑀺𑀓𑁆𑀔𑀽 𑀉𑀩𑁆𑀪𑀡𑁆𑀟𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑁂 𑀯𑀲𑀣𑀸’’𑀢𑀺.

𑀩𑀳𑀽𑀲𑀼 𑀧𑀦 𑀆𑀕𑀢𑁂𑀲𑀼 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀤𑀸𑀢𑀩𑁆𑀩𑀁. 𑀲𑀘𑁂 𑀏𑀓𑁂𑀓𑀁 𑀧𑀭𑀺𑀯𑁂𑀡𑀁 𑀧𑀳𑁄𑀢𑀺, 𑀏𑀓𑁂𑀓𑀁 𑀧𑀭𑀺𑀯𑁂𑀡𑀁 𑀤𑀸𑀢𑀩𑁆𑀩𑀁. 𑀢𑀢𑁆𑀣 𑀅𑀕𑁆𑀕𑀺𑀲𑀸𑀮𑀸𑀤𑀻𑀖𑀲𑀸𑀮𑀸𑀫𑀡𑁆𑀟𑀮𑀫𑀸𑀴𑀸𑀤𑀬𑁄 𑀲𑀩𑁆𑀩𑁂𑀧𑀺 𑀢𑀲𑁆𑀲𑁂𑀯 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀁 𑀅𑀧𑁆𑀧𑀳𑁄𑀦𑁆𑀢𑁂 𑀧𑀸𑀲𑀸𑀤𑀕𑁆𑀕𑁂𑀦 𑀤𑀸𑀢𑀩𑁆𑀩𑀁, 𑀧𑀸𑀲𑀸𑀤𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀑𑀯𑀭𑀓𑀕𑁆𑀕𑁂𑀦 𑀤𑀸𑀢𑀩𑁆𑀩𑀁, 𑀑𑀯𑀭𑀓𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀲𑁂𑀬𑁆𑀬𑀕𑁆𑀕𑁂𑀦 𑀤𑀸𑀢𑀩𑁆𑀩𑀁, 𑀲𑁂𑀬𑁆𑀬𑀕𑁆𑀕𑁂𑀲𑀼 𑀅𑀧𑁆𑀧𑀳𑁄𑀦𑁆𑀢𑁂𑀲𑀼 𑀫𑀜𑁆𑀘𑀝𑁆𑀞𑀸𑀦𑁂𑀦 𑀤𑀸𑀢𑀩𑁆𑀩𑀁, 𑀫𑀜𑁆𑀘𑀝𑁆𑀞𑀸𑀦𑁂 𑀅𑀧𑁆𑀧𑀳𑁄𑀦𑁆𑀢𑁂 𑀏𑀓𑀧𑀻𑀞𑀓𑀝𑁆𑀞𑀸𑀦𑀯𑀲𑁂𑀦 𑀤𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑁄 𑀧𑀦 𑀞𑀺𑀢𑁄𑀓𑀸𑀲𑀫𑀢𑁆𑀢𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀏𑀢𑀜𑁆𑀳𑀺 𑀲𑁂𑀦𑀸𑀲𑀦𑀁 𑀦𑀸𑀫 𑀦 𑀳𑁄𑀢𑀺. 𑀧𑀻𑀞𑀓𑀝𑁆𑀞𑀸𑀦𑁂 𑀧𑀦 𑀅𑀧𑁆𑀧𑀳𑁄𑀦𑁆𑀢𑁂 𑀏𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀏𑀓𑀁 𑀧𑀻𑀞𑀝𑁆𑀞𑀸𑀦𑀁 𑀯𑀸 ‘‘𑀯𑀸𑀭𑁂𑀦 𑀯𑀸𑀭𑁂𑀦, 𑀪𑀦𑁆𑀢𑁂, 𑀯𑀺𑀲𑁆𑀲𑀫𑀣𑀸’’𑀢𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀤𑀸𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀲𑀻𑀢𑀲𑀫𑀬𑁂 𑀲𑀩𑁆𑀩𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂𑀯 𑀯𑀲𑀺𑀢𑀼𑀁. 𑀫𑀳𑀸𑀣𑁂𑀭𑁂𑀦 𑀧𑀞𑀫𑀬𑀸𑀫𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀼𑀢𑀺𑀬𑀢𑁆𑀣𑁂𑀭𑀲𑁆𑀲 𑀯𑀢𑁆𑀢𑀩𑁆𑀩𑀁 ‘‘𑀆𑀯𑀼𑀲𑁄 𑀇𑀥 𑀧𑀯𑀺𑀲𑀸𑀳𑀻’’𑀢𑀺. 𑀲𑀘𑁂 𑀫𑀳𑀸𑀣𑁂𑀭𑁄 𑀦𑀺𑀤𑁆𑀤𑀸𑀕𑀭𑀼𑀓𑁄 𑀳𑁄𑀢𑀺, 𑀓𑀸𑀮𑀁 𑀦 𑀚𑀸𑀦𑀸𑀢𑀺, 𑀉𑀓𑁆𑀓𑀸𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀆𑀓𑁄𑀝𑁂𑀢𑁆𑀯𑀸 ‘‘𑀪𑀦𑁆𑀢𑁂 𑀓𑀸𑀮𑁄 𑀚𑀸𑀢𑁄, 𑀲𑀻𑀢𑀁 𑀅𑀦𑀼𑀤𑀳𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀑𑀓𑀸𑀲𑁄 𑀤𑀸𑀢𑀩𑁆𑀩𑁄, 𑀅𑀤𑀸𑀢𑀼𑀁 𑀦 𑀮𑀪𑀢𑀺. 𑀤𑀼𑀢𑀺𑀬𑀢𑁆𑀣𑁂𑀭𑁂𑀦𑀧𑀺 𑀫𑀚𑁆𑀛𑀺𑀫𑀬𑀸𑀫𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀢𑀭𑀲𑁆𑀲 𑀤𑀸𑀢𑀩𑁆𑀩𑀁. 𑀦𑀺𑀤𑁆𑀤𑀸𑀕𑀭𑀼𑀓𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀏𑀓𑀭𑀢𑁆𑀢𑀺𑀁 𑀏𑀓𑀫𑀜𑁆𑀘𑀝𑁆𑀞𑀸𑀦𑀁 𑀢𑀺𑀡𑁆𑀡𑀁 𑀤𑀸𑀢𑀩𑁆𑀩𑀁. 𑀚𑀫𑁆𑀩𑀼𑀤𑀻𑀧𑁂 𑀧𑀦 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 ‘‘𑀲𑁂𑀦𑀸𑀲𑀦𑀁 𑀦𑀸𑀫 𑀫𑀜𑁆𑀘𑀝𑁆𑀞𑀸𑀦𑀁 𑀯𑀸 𑀧𑀻𑀞𑀝𑁆𑀞𑀸𑀦𑀁 𑀯𑀸 𑀓𑀺𑀜𑁆𑀘𑀺𑀤𑁂𑀯 𑀓𑀲𑁆𑀲𑀘𑀺 𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀓𑀲𑁆𑀲𑀘𑀺 𑀅𑀲𑀧𑁆𑀧𑀸𑀬’’𑀦𑁆𑀢𑀺 𑀆𑀕𑀦𑁆𑀢𑀼𑀓𑀸 𑀳𑁄𑀦𑁆𑀢𑀼 𑀯𑀸 𑀫𑀸 𑀯𑀸, 𑀤𑁂𑀯𑀲𑀺𑀓𑀁 𑀲𑁂𑀦𑀸𑀲𑀦𑀁 𑀕𑀸𑀳𑁂𑀦𑁆𑀢𑀺. 𑀅𑀬𑀁 𑀉𑀢𑀼𑀓𑀸𑀮𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀦𑀸𑀫.

𑁨𑁧𑁯. 𑀯𑀲𑁆𑀲𑀸𑀯𑀸𑀲𑁂 𑀧𑀦 𑀅𑀢𑁆𑀣𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁, 𑀅𑀢𑁆𑀣𑀺 𑀆𑀯𑀸𑀲𑀺𑀓𑀯𑀢𑁆𑀢𑀁. 𑀆𑀕𑀦𑁆𑀢𑀼𑀓𑁂𑀦 𑀢𑀸𑀯 𑀲𑀓𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀯𑀲𑀺𑀢𑀼𑀓𑀸𑀫𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀫𑁂𑀯 𑀢𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁. 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀳𑀺 𑀢𑀢𑁆𑀭 𑀲𑀫𑁆𑀩𑀸𑀥𑀁 𑀪𑀯𑁂𑀬𑁆𑀬, 𑀪𑀺𑀓𑁆𑀔𑀸𑀘𑀸𑀭𑁄 𑀯𑀸 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬, 𑀢𑁂𑀦 𑀦 𑀨𑀸𑀲𑀼𑀓𑀁 𑀯𑀺𑀳𑀭𑁂𑀬𑁆𑀬, 𑀢𑀲𑁆𑀫𑀸 ‘‘𑀇𑀤𑀸𑀦𑀺 𑀫𑀸𑀲𑀫𑀢𑁆𑀢𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀢𑀢𑁆𑀣 𑀫𑀸𑀲𑀫𑀢𑁆𑀢𑀁 𑀯𑀲𑀦𑁆𑀢𑁄 𑀲𑀘𑁂 𑀉𑀤𑁆𑀤𑁂𑀲𑀢𑁆𑀣𑀺𑀓𑁄, 𑀉𑀤𑁆𑀤𑁂𑀲𑀲𑀫𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀲𑀘𑁂 𑀓𑀫𑁆𑀫𑀝𑁆𑀞𑀸𑀦𑀺𑀓𑁄, 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀲𑀘𑁂 𑀧𑀘𑁆𑀘𑀬𑀢𑁆𑀣𑀺𑀓𑁄, 𑀧𑀘𑁆𑀘𑀬𑀮𑀸𑀪𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂 𑀲𑀼𑀔𑀁 𑀯𑀲𑀺𑀲𑁆𑀲𑀢𑀺. 𑀲𑀓𑀝𑁆𑀞𑀸𑀦𑀢𑁄 𑀘 𑀢𑀢𑁆𑀣 𑀕𑀘𑁆𑀙𑀦𑁆𑀢𑁂𑀦 𑀦 𑀕𑁄𑀘𑀭𑀕𑀸𑀫𑁄 𑀖𑀝𑁆𑀝𑁂𑀢𑀩𑁆𑀩𑁄. 𑀦 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀯𑀢𑁆𑀢𑀩𑁆𑀩𑀸 ‘‘𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀯𑀸 𑀦𑀢𑁆𑀣𑀺, 𑀅𑀬𑀁 𑀘𑁂𑀢𑀺𑀬𑀲𑁆𑀲 𑀧𑀭𑀺𑀓𑁆𑀔𑀸𑀭𑁄, 𑀅𑀬𑀁 𑀉𑀧𑁄𑀲𑀣𑀸𑀕𑀸𑀭𑀲𑁆𑀲, 𑀇𑀤𑀁 𑀢𑀸𑀴𑀜𑁆𑀘𑁂𑀯 𑀲𑀽𑀘𑀺 𑀘, 𑀲𑀫𑁆𑀧𑀝𑀺𑀘𑁆𑀙𑀣 𑀢𑀼𑀫𑁆𑀳𑀸𑀓𑀁 𑀯𑀺𑀳𑀸𑀭’’𑀦𑁆𑀢𑀺. 𑀲𑁂𑀦𑀸𑀲𑀦𑀁 𑀧𑀦 𑀚𑀕𑁆𑀕𑀺𑀢𑁆𑀯𑀸 𑀤𑀸𑀭𑀼𑀪𑀡𑁆𑀟𑀫𑀢𑁆𑀢𑀺𑀓𑀸𑀪𑀡𑁆𑀟𑀸𑀦𑀺 𑀧𑀝𑀺𑀲𑀸𑀫𑁂𑀢𑁆𑀯𑀸 𑀕𑀫𑀺𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁.

𑀏𑀯𑀁 𑀕𑀘𑁆𑀙𑀦𑁆𑀢𑁂𑀦𑀧𑀺 𑀤𑀳𑀭𑁂𑀳𑀺 𑀧𑀢𑁆𑀢𑀘𑀻𑀯𑀭𑀪𑀡𑁆𑀟𑀺𑀓𑀸𑀬𑁄 𑀉𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑁂𑀮𑀦𑀸𑀴𑀺𑀓𑀢𑁆𑀢𑀭𑀤𑀡𑁆𑀟𑀸𑀤𑀻𑀦𑀺 𑀕𑀸𑀳𑁂𑀢𑁆𑀯𑀸 𑀙𑀢𑁆𑀢𑀁 𑀧𑀕𑁆𑀕𑀬𑁆𑀳 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀕𑀸𑀫𑀤𑁆𑀯𑀸𑀭𑁂𑀦𑁂𑀯 𑀦 𑀕𑀦𑁆𑀢𑀩𑁆𑀩𑀁, 𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀝𑀯𑀺𑀫𑀕𑁆𑀕𑁂𑀦 𑀕𑀦𑁆𑀢𑀩𑁆𑀩𑀁. 𑀅𑀝𑀯𑀺𑀫𑀕𑁆𑀕𑁂 𑀅𑀲𑀢𑀺 𑀕𑀼𑀫𑁆𑀩𑀸𑀤𑀻𑀦𑀺 𑀫𑀤𑁆𑀤𑀦𑁆𑀢𑁂𑀦 𑀦 𑀕𑀦𑁆𑀢𑀩𑁆𑀩𑀁, 𑀕𑀫𑀺𑀓𑀯𑀢𑁆𑀢𑀁 𑀧𑀦 𑀧𑀽𑀭𑁂𑀢𑁆𑀯𑀸 𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀫𑀦𑀯𑀢𑁆𑀢𑁂𑀦𑁂𑀯 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀧𑀦 𑀕𑀸𑀫𑀤𑁆𑀯𑀸𑀭𑁂𑀦 𑀫𑀕𑁆𑀕𑁄 𑀳𑁄𑀢𑀺, 𑀕𑀘𑁆𑀙𑀦𑁆𑀢𑀜𑁆𑀘 𑀦𑀁 𑀲𑀧𑀭𑀺𑀯𑀸𑀭𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑀸𑀓𑀁 𑀣𑁂𑀭𑁄 𑀯𑀺𑀬𑀸’’𑀢𑀺 𑀉𑀧𑀥𑀸𑀯𑀺𑀢𑁆𑀯𑀸 ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀲𑀩𑁆𑀩𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀼 𑀘𑁂 𑀏𑀓𑁄 𑀏𑀯𑀁 𑀯𑀤𑀢𑀺 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀸𑀮𑁄 𑀦𑀸𑀫𑀸𑀬𑀁, 𑀬𑀢𑁆𑀣 𑀅𑀦𑁆𑀢𑁄𑀯𑀲𑁆𑀲𑁂𑀦𑀺𑀩𑀤𑁆𑀥𑀪𑀺𑀓𑁆𑀔𑀸𑀘𑀸𑀭𑁄 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀜𑁆𑀘 𑀮𑀩𑁆𑀪𑀢𑀺, 𑀢𑀢𑁆𑀣 𑀪𑀺𑀓𑁆𑀔𑀽 𑀕𑀘𑁆𑀙𑀦𑁆𑀢𑀻’’𑀢𑀺, 𑀢𑀲𑁆𑀲 𑀘𑁂 𑀲𑀼𑀢𑁆𑀯𑀸 𑀢𑁂 𑀫𑀦𑀼𑀲𑁆𑀲𑀸 ‘‘𑀪𑀦𑁆𑀢𑁂, 𑀇𑀫𑀲𑁆𑀫𑀺𑀫𑁆𑀧𑀺 𑀕𑀸𑀫𑁂 𑀚𑀦𑁄 𑀪𑀼𑀜𑁆𑀚𑀢𑀺 𑀘𑁂𑀯 𑀦𑀺𑀯𑀸𑀲𑁂𑀢𑀺 𑀘, 𑀫𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀣𑀸’’𑀢𑀺 𑀯𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀩𑁆𑀩𑁂 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀯𑀺𑀳𑀸𑀭𑁂 𑀦𑀺𑀩𑀤𑁆𑀥𑀯𑀢𑁆𑀢𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀘 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀞𑀧𑁂𑀢𑁆𑀯𑀸 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣𑀸’’𑀢𑀺 𑀬𑀸𑀘𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀩𑁆𑀩𑀜𑁆𑀘𑁂𑀢𑀁 𑀓𑀧𑁆𑀧𑀺𑀬𑀜𑁆𑀘𑁂𑀯 𑀅𑀦𑀯𑀚𑁆𑀚𑀜𑁆𑀘. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀓𑀼𑀳𑀺𑀁 𑀕𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑁂 ‘𑀅𑀲𑀼𑀓𑀝𑁆𑀞𑀸𑀦’𑀦𑁆𑀢𑀺 𑀯𑀢𑁆𑀯𑀸 ‘𑀓𑀲𑁆𑀫𑀸 𑀢𑀢𑁆𑀣 𑀕𑀘𑁆𑀙𑀣𑀸’𑀢𑀺 𑀯𑀼𑀢𑁆𑀢𑁂 ‘𑀓𑀸𑀭𑀡𑀁 𑀆𑀘𑀺𑀓𑁆𑀔𑀺𑀢𑀩𑁆𑀩’’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸𑀯 𑀅𑀦𑀯𑀚𑁆𑀚𑀁. 𑀇𑀤𑀁 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀦𑀸𑀫.

𑀇𑀤𑀁 𑀧𑀦 𑀆𑀯𑀸𑀲𑀺𑀓𑀯𑀢𑁆𑀢𑀁. 𑀧𑀝𑀺𑀓𑀘𑁆𑀘𑁂𑀯 𑀳𑀺 𑀆𑀯𑀸𑀲𑀺𑀓𑁂𑀳𑀺 𑀯𑀺𑀳𑀸𑀭𑁄 𑀚𑀕𑁆𑀕𑀺𑀢𑀩𑁆𑀩𑁄, 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀧𑀭𑀺𑀪𑀡𑁆𑀟𑀸𑀦𑀺 𑀓𑀸𑀢𑀩𑁆𑀩𑀸𑀦𑀺, 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀯𑀘𑁆𑀘𑀓𑀼𑀝𑀺𑀧𑀲𑁆𑀲𑀸𑀯𑀝𑁆𑀞𑀸𑀦𑀸𑀦𑀺 𑀧𑀥𑀸𑀦𑀖𑀭𑀯𑀺𑀳𑀸𑀭𑀫𑀕𑁆𑀕𑁄𑀢𑀺 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀸𑀦𑀺. 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀁 𑀫𑀼𑀡𑁆𑀟𑀯𑁂𑀤𑀺𑀓𑀸𑀬 𑀢𑁂𑀮𑀫𑀓𑁆𑀔𑀦𑀁 𑀫𑀜𑁆𑀘𑀧𑀻𑀞𑀚𑀕𑁆𑀕𑀦𑀦𑁆𑀢𑀺 𑀇𑀤𑀫𑁆𑀧𑀺 𑀲𑀩𑁆𑀩𑀁 𑀓𑀸𑀢𑀩𑁆𑀩𑀁 ‘‘𑀯𑀲𑁆𑀲𑀁 𑀯𑀲𑀺𑀢𑀼𑀓𑀸𑀫𑀸 𑀆𑀕𑀦𑁆𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀲𑀼𑀔𑀁 𑀯𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀓𑀢𑀧𑀭𑀺𑀓𑀫𑁆𑀫𑁂𑀳𑀺 𑀆𑀲𑀸𑀴𑁆𑀳𑀻𑀚𑀼𑀡𑁆𑀳𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀼𑀘𑁆𑀙𑀺𑀢𑀩𑁆𑀩𑀁. 𑀓𑀢𑁆𑀣 𑀧𑀼𑀘𑁆𑀙𑀺𑀢𑀩𑁆𑀩𑀁? 𑀬𑀢𑁄 𑀧𑀓𑀢𑀺𑀬𑀸 𑀮𑀩𑁆𑀪𑀢𑀺. 𑀬𑁂𑀳𑀺 𑀧𑀦 𑀦 𑀤𑀺𑀦𑁆𑀦𑀧𑀼𑀩𑁆𑀩𑀁, 𑀢𑁂 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸 𑀧𑀼𑀘𑁆𑀙𑀺𑀢𑀩𑁆𑀩𑀁? 𑀓𑀤𑀸𑀘𑀺 𑀳𑀺 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀓𑀤𑀸𑀘𑀺 𑀤𑀼𑀩𑁆𑀪𑀺𑀓𑁆𑀔𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀸 𑀦 𑀤𑁂𑀦𑁆𑀢𑀺, 𑀢𑀢𑁆𑀣 𑀬𑁂 𑀦 𑀤𑀲𑁆𑀲𑀦𑁆𑀢𑀺, 𑀢𑁂 𑀅𑀧𑀼𑀘𑁆𑀙𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑁂 𑀕𑀸𑀳𑀺𑀢𑁂 𑀕𑀸𑀳𑀺𑀢𑀪𑀺𑀓𑁆𑀔𑀽𑀦𑀁 𑀮𑀸𑀪𑀦𑁆𑀢𑀭𑀸𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀺𑀢𑁆𑀯𑀸𑀯 𑀕𑀸𑀳𑁂𑀢𑀩𑁆𑀩𑀁.

𑀧𑀼𑀘𑁆𑀙𑀦𑁆𑀢𑁂𑀦 ‘‘𑀢𑀼𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑀡𑀓𑀸𑀮𑁄 𑀉𑀧𑀓𑀝𑁆𑀞𑁄’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀘𑁂 𑀯𑀤𑀦𑁆𑀢𑀺 ‘‘𑀪𑀦𑁆𑀢𑁂, 𑀇𑀫𑀁 𑀲𑀁𑀯𑀘𑁆𑀙𑀭𑀁 𑀙𑀸𑀢𑀓𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀫𑁆𑀳, 𑀦 𑀲𑀓𑁆𑀓𑁄𑀫 𑀤𑀸𑀢𑀼’’𑀦𑁆𑀢𑀺 𑀯𑀸 ‘‘𑀬𑀁 𑀧𑀼𑀩𑁆𑀩𑁂 𑀤𑁂𑀫, 𑀢𑀢𑁄 𑀊𑀦𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀸 ‘‘𑀇𑀤𑀸𑀦𑀺 𑀓𑀧𑁆𑀧𑀸𑀲𑁄 𑀲𑀼𑀮𑀪𑁄, 𑀬𑀁 𑀧𑀼𑀩𑁆𑀩𑁂 𑀤𑁂𑀫, 𑀢𑀢𑁄 𑀩𑀳𑀼𑀢𑀭𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀸, 𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑁂𑀦 𑀦𑀬𑁂𑀦 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀫𑀦𑀼𑀲𑁆𑀲𑀸 𑀯𑀤𑀦𑁆𑀢𑀺 ‘‘𑀬𑀲𑁆𑀲 𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀢𑁂𑀫𑀸𑀲𑀁 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀼, 𑀯𑀺𑀳𑀸𑀭𑀫𑀕𑁆𑀕𑀁 𑀚𑀕𑁆𑀕𑀢𑀼, 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀸𑀦𑀺 𑀚𑀕𑁆𑀕𑀢𑀼, 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀆𑀲𑀺𑀜𑁆𑀘𑀢𑀽’’𑀢𑀺, 𑀬𑀲𑁆𑀲 𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀬𑁄 𑀧𑀦 𑀕𑀸𑀫𑁄 𑀧𑀝𑀺𑀓𑁆𑀓𑀫𑁆𑀫 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀦𑁆𑀢𑀭𑁂 𑀳𑁄𑀢𑀺, 𑀢𑀢𑁆𑀭 𑀘𑁂 𑀓𑀼𑀮𑀸𑀦𑀺 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸 𑀧𑀳𑀸𑀭𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀦𑁆𑀢𑀺𑀬𑁂𑀯, 𑀢𑀸𑀦𑀺 𑀓𑀼𑀮𑀸𑀦𑀺 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀯𑀢𑁆𑀢𑀁 𑀓𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀢𑀁 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀧𑀦 𑀢𑁂𑀲𑀁 𑀲𑁂𑀦𑀸𑀲𑀦𑁂 𑀧𑀁𑀲𑀼𑀓𑀽𑀮𑀺𑀓𑁄 𑀯𑀲𑀢𑀺, 𑀆𑀕𑀢𑀜𑁆𑀘 𑀢𑀁 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀦 𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀢𑀸𑀦𑀺 𑀓𑀼𑀮𑀸𑀦𑀺 𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, ‘‘𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀲𑀪𑀸𑀕𑁄 𑀪𑀺𑀓𑁆𑀔𑀼 ‘‘𑀯𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀧𑀦𑁂𑀢𑀁 𑀦 𑀯𑀝𑁆𑀝𑀢𑀺. 𑀇𑀢𑀺 𑀲𑀤𑁆𑀥𑀸𑀤𑁂𑀬𑁆𑀬𑀤𑀸𑀬𑀓𑀫𑀦𑀼𑀲𑁆𑀲𑀸 𑀧𑀼𑀘𑁆𑀙𑀺𑀢𑀩𑁆𑀩𑀸.

𑀢𑀢𑁆𑀭𑀼𑀧𑁆𑀧𑀸𑀤𑁂 𑀧𑀦 𑀓𑀧𑁆𑀧𑀺𑀬𑀓𑀸𑀭𑀓𑀸 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀓𑀣𑀁 𑀧𑀼𑀘𑁆𑀙𑀺𑀢𑀩𑁆𑀩𑀸? 𑀓𑀺𑀁, 𑀆𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀪𑀡𑁆𑀟𑀧𑀝𑀺𑀘𑁆𑀙𑀸𑀤𑀦𑀁 𑀪𑀯𑀺𑀲𑁆𑀲𑀢𑀻𑀢𑀺? 𑀲𑀘𑁂 𑀯𑀤𑀦𑁆𑀢𑀺 ‘‘𑀪𑀯𑀺𑀲𑁆𑀲𑀢𑀺, 𑀪𑀦𑁆𑀢𑁂, 𑀏𑀓𑁂𑀓𑀲𑁆𑀲 𑀦𑀯𑀳𑀢𑁆𑀣𑀲𑀸𑀝𑀓𑀁 𑀤𑀲𑁆𑀲𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑁂𑀣𑀸’’𑀢𑀺, 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀯𑀤𑀦𑁆𑀢𑀺 ‘‘𑀲𑀸𑀝𑀓𑀸 𑀦𑀢𑁆𑀣𑀺, 𑀯𑀢𑁆𑀣𑀼 𑀧𑀦 𑀅𑀢𑁆𑀣𑀺, 𑀕𑀸𑀳𑁂𑀣, 𑀪𑀦𑁆𑀢𑁂’’𑀢𑀺, 𑀯𑀢𑁆𑀣𑀼𑀫𑁆𑀳𑀺 𑀲𑀦𑁆𑀢𑁂𑀧𑀺 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀜𑁆𑀳𑀺 𑀳𑀢𑁆𑀣𑁂 ‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀤𑀺𑀦𑁆𑀦𑀯𑀢𑁆𑀣𑀼𑀢𑁄 𑀬𑀁 𑀬𑀁 𑀓𑀧𑁆𑀧𑀺𑀬𑀁, 𑀲𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀜𑁆𑀜𑀸𑀢𑀁. 𑀬𑀁 𑀧𑀦𑁂𑀢𑁆𑀣 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀕𑀺𑀮𑀸𑀦𑀧𑀘𑁆𑀘𑀬𑀢𑁆𑀣𑀸𑀬 𑀘 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀢𑀁 𑀘𑀻𑀯𑀭𑁂 𑀉𑀧𑀦𑀸𑀫𑁂𑀦𑁆𑀢𑁂𑀳𑀺 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀅𑀧𑀮𑁄𑀓𑁂𑀢𑁆𑀯𑀸 𑀉𑀧𑀦𑀸𑀫𑁂𑀢𑀩𑁆𑀩𑀁, 𑀲𑁂𑀦𑀸𑀲𑀦𑀢𑁆𑀣𑀸𑀬 𑀧𑀦 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁 𑀳𑁄𑀢𑀺. 𑀘𑀻𑀯𑀭𑀯𑀲𑁂𑀦𑁂𑀯 𑀧𑀦 𑀘𑀢𑀼𑀧𑀘𑁆𑀘𑀬𑀯𑀲𑁂𑀦 𑀯𑀸 𑀤𑀺𑀦𑁆𑀦𑀁 𑀘𑀻𑀯𑀭𑁂 𑀉𑀧𑀦𑀸𑀫𑁂𑀦𑁆𑀢𑀸𑀦𑀁 𑀅𑀧𑀮𑁄𑀓𑀦𑀓𑀫𑁆𑀫𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀘 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀁, 𑀲𑀗𑁆𑀖𑀯𑀲𑁂𑀦 𑀦 𑀓𑀸𑀢𑀩𑁆𑀩𑀁. 𑀚𑀸𑀢𑀭𑀽𑀧𑀭𑀚𑀢𑀯𑀲𑁂𑀦𑀧𑀺 𑀆𑀫𑀓𑀥𑀜𑁆𑀜𑀯𑀲𑁂𑀦 𑀯𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦 𑀯𑀝𑁆𑀝𑀢𑀺, 𑀓𑀧𑁆𑀧𑀺𑀬𑀪𑀡𑁆𑀟𑀯𑀲𑁂𑀦 𑀘𑀻𑀯𑀭𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦𑁂𑀯 𑀘 𑀯𑀝𑁆𑀝𑀢𑀺. 𑀢𑀁 𑀧𑀦 𑀏𑀯𑀁 𑀓𑀢𑁆𑀢𑀩𑁆𑀩𑀁 ‘‘𑀇𑀤𑀸𑀦𑀺 𑀲𑀼𑀪𑀺𑀓𑁆𑀔𑀁 𑀲𑀼𑀮𑀪𑀧𑀺𑀡𑁆𑀟𑀁, 𑀪𑀺𑀓𑁆𑀔𑀽 𑀘𑀻𑀯𑀭𑁂𑀦 𑀓𑀺𑀮𑀫𑀦𑁆𑀢𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺, ‘‘𑀕𑀺𑀮𑀸𑀦𑀧𑀘𑁆𑀘𑀬𑁄 𑀲𑀼𑀮𑀪𑁄, 𑀕𑀺𑀮𑀸𑀦𑁄 𑀯𑀸 𑀦𑀢𑁆𑀣𑀺, 𑀏𑀢𑁆𑀢𑀓𑀁 𑀦𑀸𑀫 𑀢𑀡𑁆𑀟𑀼𑀮𑀪𑀸𑀕𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀁 𑀓𑀸𑀢𑀼𑀁 𑀭𑀼𑀘𑁆𑀘𑀢𑀻’’𑀢𑀺.

𑀏𑀯𑀁 𑀘𑀻𑀯𑀭𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑁂𑀦𑀸𑀲𑀦𑀲𑁆𑀲 𑀓𑀸𑀮𑁂 𑀖𑁄𑀲𑀺𑀢𑁂 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀲𑀫𑁆𑀫𑀦𑁆𑀦𑀦𑁆𑀢𑁂𑀦 𑀘 𑀤𑁆𑀯𑁂 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀦𑀯𑀓𑁄 𑀯𑀼𑀟𑁆𑀠𑀲𑁆𑀲, 𑀯𑀼𑀟𑁆𑀠𑁄 𑀘 𑀦𑀯𑀓𑀲𑁆𑀲 𑀕𑀸𑀳𑁂𑀲𑁆𑀲𑀢𑀻𑀢𑀺. 𑀫𑀳𑀦𑁆𑀢𑁂 𑀧𑀦 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑁂 𑀯𑀺𑀳𑀸𑀭𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀚𑀦𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀚𑀦𑁂 𑀲𑀫𑁆𑀫𑀦𑁆𑀦𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀲𑀫𑁆𑀫𑀼𑀢𑀺 𑀓𑀫𑁆𑀫𑀯𑀸𑀘𑀸𑀬𑀧𑀺 𑀅𑀧𑀮𑁄𑀓𑀦𑁂𑀦𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀢𑁂𑀳𑀺 𑀲𑀫𑁆𑀫𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑁂𑀦𑀸𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁. 𑀘𑁂𑀢𑀺𑀬𑀖𑀭𑀁 𑀩𑁄𑀥𑀺𑀖𑀭𑀁 𑀆𑀲𑀦𑀖𑀭𑀁 𑀲𑀫𑁆𑀫𑀼𑀜𑁆𑀚𑀦𑀺𑀅𑀝𑁆𑀝𑁄 𑀤𑀸𑀭𑀼𑀅𑀝𑁆𑀝𑁄 𑀯𑀘𑁆𑀘𑀓𑀼𑀝𑀺 𑀇𑀝𑁆𑀞𑀓𑀲𑀸𑀮𑀸 𑀯𑀟𑁆𑀠𑀓𑀺𑀲𑀸𑀮𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀧𑀸𑀦𑀻𑀬𑀫𑀸𑀴𑁄 𑀫𑀕𑁆𑀕𑁄 𑀧𑁄𑀓𑁆𑀔𑀭𑀡𑀻𑀢𑀺 𑀏𑀢𑀸𑀦𑀺 𑀳𑀺 𑀅𑀲𑁂𑀦𑀸𑀲𑀦𑀸𑀦𑀺, 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸 𑀫𑀡𑁆𑀟𑀧𑁄 𑀭𑀼𑀓𑁆𑀔𑀫𑀽𑀮𑀁 𑀯𑁂𑀴𑀼𑀕𑀼𑀫𑁆𑀩𑁄𑀢𑀺 𑀇𑀫𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀢𑀸𑀦𑀺 𑀕𑀸𑀳𑁂𑀢𑀩𑁆𑀩𑀸𑀦𑀺.

𑁨𑁨𑁦. 𑀕𑀸𑀳𑁂𑀦𑁆𑀢𑁂𑀦 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑀼𑀁, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀸 𑀕𑀡𑁂𑀢𑀼𑀁, 𑀲𑁂𑀬𑁆𑀬𑀸 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺(𑀘𑀽𑀴𑀯. 𑁩𑁧𑁮) 𑀆𑀤𑀺𑀯𑀘𑀦𑀢𑁄 𑀧𑀞𑀫𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀫𑀜𑁆𑀘𑀝𑁆𑀞𑀸𑀦𑀸𑀦𑀺 𑀕𑀡𑁂𑀢𑀩𑁆𑀩𑀸𑀦𑀺, 𑀢𑀢𑁄 𑀏𑀓𑁂𑀓𑀁 𑀫𑀜𑁆𑀘𑀝𑁆𑀞𑀸𑀦𑀁 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀫𑀜𑁆𑀘𑀝𑁆𑀞𑀸𑀦𑀸𑀦𑀺 𑀅𑀢𑀺𑀭𑁂𑀓𑀸𑀦𑀺 𑀳𑁄𑀦𑁆𑀢𑀺, 𑀯𑀺𑀳𑀸𑀭𑀕𑁆𑀕𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑀸𑀧𑀺 𑀅𑀢𑀺𑀭𑁂𑀓𑀸 𑀳𑁄𑀦𑁆𑀢𑀺, 𑀧𑀭𑀺𑀯𑁂𑀡𑀕𑁆𑀕𑁂𑀦 𑀕𑀸𑀳𑁂𑀢𑀩𑁆𑀩𑀁. 𑀧𑀭𑀺𑀯𑁂𑀡𑁂𑀲𑀼𑀧𑀺 𑀅𑀢𑀺𑀭𑁂𑀓𑁂𑀲𑀼 𑀧𑀼𑀦 𑀅𑀧𑀭𑁄𑀧𑀺 𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀅𑀢𑀺𑀫𑀦𑁆𑀤𑁂𑀲𑀼 𑀳𑀺 𑀪𑀺𑀓𑁆𑀔𑀽𑀲𑀼 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁆𑀯𑁂 𑀢𑀻𑀡𑀺 𑀧𑀭𑀺𑀯𑁂𑀡𑀸𑀦𑀺 𑀤𑀸𑀢𑀩𑁆𑀩𑀸𑀦𑀺. 𑀕𑀳𑀺𑀢𑁂 𑀧𑀦 𑀤𑀼𑀢𑀺𑀬𑀪𑀸𑀕𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀦 𑀅𑀢𑁆𑀢𑀦𑁄 𑀅𑀭𑀼𑀘𑀺𑀬𑀸 𑀲𑁄 𑀪𑀸𑀕𑁄 𑀢𑀲𑁆𑀲 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀬𑁂𑀦 𑀕𑀳𑀺𑀢𑁄, 𑀲𑁄 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀢𑀁 𑀤𑀼𑀢𑀺𑀬𑀪𑀸𑀕𑀁 𑀯𑀸 𑀧𑀞𑀫𑀪𑀸𑀕𑀁 𑀯𑀸 𑀤𑁂𑀢𑀺, 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀻𑀫𑁂 𑀞𑀺𑀢𑀲𑁆𑀲 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑀩𑁆𑀩𑀁, 𑀬𑁄 𑀕𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁮) 𑀯𑀘𑀦𑀢𑁄 𑀉𑀧𑀘𑀸𑀭𑀲𑀻𑀥𑀢𑁄 𑀩𑀳𑀺 𑀞𑀺𑀢𑀲𑁆𑀲 𑀦 𑀕𑀸𑀳𑁂𑀢𑀩𑁆𑀩𑀁, 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬 𑀧𑀦 𑀤𑀽𑀭𑁂 𑀞𑀺𑀢𑀲𑁆𑀲𑀧𑀺 𑀮𑀩𑁆𑀪𑀢𑀺𑀬𑁂𑀯.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀧𑀢𑀺𑀭𑀽𑀧𑀁 𑀲𑁂𑀬𑁆𑀬𑀁 𑀤𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁧𑁬) 𑀯𑀘𑀦𑀢𑁄 𑀬𑁄 (𑀘𑀽𑀴𑀯. 𑀅𑀝𑁆𑀞. 𑁩𑁧𑁬) 𑀓𑀸𑀲𑀲𑀸𑀲𑀪𑀕𑀦𑁆𑀤𑀭𑀸𑀢𑀺𑀲𑀸𑀭𑀸𑀤𑀻𑀳𑀺 𑀕𑀺𑀮𑀸𑀦𑁄 𑀳𑁄𑀢𑀺, 𑀔𑁂𑀴𑀫𑀮𑁆𑀮𑀓𑀯𑀘𑁆𑀘𑀓𑀧𑀸𑀮𑀸𑀤𑀻𑀦𑀺 𑀞𑀧𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀓𑀼𑀝𑁆𑀞𑀻 𑀯𑀸 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀤𑀽𑀲𑁂𑀢𑀺, 𑀏𑀯𑀭𑀽𑀧𑀲𑁆𑀲 𑀳𑁂𑀝𑁆𑀞𑀸𑀧𑀸𑀲𑀸𑀤𑀧𑀡𑁆𑀡𑀲𑀸𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀏𑀓𑀫𑀦𑁆𑀢𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁. 𑀬𑀲𑁆𑀫𑀺𑀁 𑀯𑀲𑀦𑁆𑀢𑁂 𑀲𑁂𑀦𑀸𑀲𑀦𑀁 𑀦 𑀤𑀼𑀲𑁆𑀲𑀢𑀺, 𑀢𑀲𑁆𑀲 𑀯𑀭𑀲𑁂𑀬𑁆𑀬𑀸𑀧𑀺 𑀤𑀸𑀢𑀩𑁆𑀩𑀸𑀯. 𑀬𑁄𑀧𑀺 𑀲𑀺𑀦𑁂𑀳𑀧𑀸𑀦𑀯𑀺𑀭𑁂𑀘𑀦𑀦𑀢𑁆𑀣𑀼𑀓𑀫𑁆𑀫𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀪𑁂𑀲𑀚𑁆𑀚𑀁 𑀓𑀭𑁄𑀢𑀺, 𑀲𑀩𑁆𑀩𑁄 𑀲𑁄 𑀕𑀺𑀮𑀸𑀦𑁄𑀬𑁂𑀯. 𑀢𑀲𑁆𑀲𑀧𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀢𑀺𑀭𑀽𑀧𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩𑀁.

‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑁂𑀦 𑀤𑁆𑀯𑁂 𑀧𑀝𑀺𑀩𑀸𑀳𑁂𑀢𑀩𑁆𑀩𑀸, 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁧𑁯) 𑀯𑀘𑀦𑀢𑁄 𑀏𑀓𑁂𑀦 𑀤𑁆𑀯𑁂 𑀲𑁂𑀦𑀸𑀲𑀦𑀸𑀦𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀲𑀘𑁂𑀧𑀺 𑀕𑀡𑁆𑀳𑁂𑀬𑁆𑀬, 𑀧𑀘𑁆𑀙𑀺𑀫𑁂𑀦 𑀕𑀳𑀡𑁂𑀦 𑀧𑀼𑀭𑀺𑀫𑀕𑁆𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀕𑀳𑀡𑁂𑀦 𑀳𑀺 𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀕𑀳𑀡𑁂𑀦 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀆𑀮𑀬𑁂𑀦 𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀆𑀮𑀬𑁂𑀦 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀓𑀣𑀁? 𑀇𑀥𑁂𑀓𑀘𑁆𑀘𑁄 (𑀘𑀽𑀴𑀯. 𑀅𑀝𑁆𑀞. 𑁩𑁧𑁯) 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀭𑀸𑀧𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀇𑀫𑀺𑀦𑀸 𑀕𑀳𑀡𑁂𑀦 𑀧𑀼𑀭𑀺𑀫𑀕𑁆𑀕𑀳𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀅𑀧𑀭𑁄 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑀫𑀢𑁆𑀢𑀁 𑀓𑀢𑁆𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀇𑀫𑀺𑀦𑀸 𑀕𑀳𑀡𑁂𑀦𑁂𑀯 𑀧𑀼𑀭𑀺𑀫𑁄 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀏𑀓𑁄 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀆𑀮𑀬𑀁 𑀯𑀸 𑀓𑀢𑁆𑀯𑀸 𑀲𑀸𑀫𑀦𑁆𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀥𑁂𑀯 𑀤𑀸𑀦𑀺 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑀁 𑀓𑀭𑁄𑀢𑀺, 𑀇𑀘𑁆𑀘𑀲𑁆𑀲 𑀆𑀮𑀬𑁂𑀦 𑀯𑀸 𑀕𑀳𑀡𑀁, 𑀆𑀮𑀬𑁂𑀦 𑀯𑀸 𑀆𑀮𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺, 𑀲𑀩𑁆𑀩𑀢𑁆𑀣 𑀧𑀘𑁆𑀙𑀺𑀫𑁂 𑀕𑀳𑀡𑁂 𑀯𑀸 𑀆𑀮𑀬𑁂 𑀯𑀸 𑀢𑀺𑀝𑁆𑀞𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 ‘‘𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀢𑀺, 𑀢𑀲𑁆𑀲 𑀉𑀧𑀘𑀸𑀭𑀲𑀻𑀫𑀸𑀢𑀺𑀓𑁆𑀓𑀫𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺. 𑀬𑀤𑀺 𑀧𑀦 ‘‘𑀢𑀢𑁆𑀣 𑀨𑀸𑀲𑀼 𑀪𑀯𑀺𑀲𑁆𑀲𑀢𑀺, 𑀯𑀲𑀺𑀲𑁆𑀲𑀸𑀫𑀺, 𑀦𑁄 𑀘𑁂, 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀅𑀨𑀸𑀲𑀼𑀓𑀪𑀸𑀯𑀁 𑀜𑀢𑁆𑀯𑀸 𑀧𑀘𑁆𑀙𑀸 𑀯𑀸 𑀕𑀘𑁆𑀙𑀢𑀺, 𑀯𑀝𑁆𑀝𑀢𑀺.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑁂𑀦 𑀘 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑁂𑀢𑀩𑁆𑀩𑀁. 𑀕𑀸𑀳𑁂𑀦𑁆𑀢𑁂𑀦 𑀲𑀘𑁂 𑀲𑀗𑁆𑀖𑀺𑀓𑁄 𑀘 𑀲𑀤𑁆𑀥𑀸𑀤𑁂𑀬𑁆𑀬𑁄 𑀘𑀸𑀢𑀺 𑀤𑁆𑀯𑁂 𑀘𑀻𑀯𑀭𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀬𑀁 𑀪𑀺𑀓𑁆𑀔𑀽 𑀧𑀞𑀫𑀁 𑀕𑀳𑀺𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀞𑀺𑀢𑀺𑀓𑀢𑁄 𑀧𑀝𑁆𑀞𑀸𑀬 𑀇𑀢𑀭𑁄 𑀕𑀸𑀳𑁂𑀢𑀩𑁆𑀩𑁄. ‘‘𑀲𑀘𑁂 𑀪𑀺𑀓𑁆𑀔𑀽𑀦𑀁 𑀅𑀧𑁆𑀧𑀢𑀸𑀬 𑀧𑀭𑀺𑀯𑁂𑀡𑀕𑁆𑀕𑁂𑀦 𑀲𑁂𑀦𑀸𑀲𑀦𑁂 𑀕𑀸𑀳𑀺𑀬𑀫𑀸𑀦𑁂 𑀏𑀓𑀁 𑀧𑀭𑀺𑀯𑁂𑀡𑀁 𑀫𑀳𑀸𑀮𑀸𑀪𑀁 𑀳𑁄𑀢𑀺, 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀦𑁆𑀢𑀺, 𑀢𑀁 𑀯𑀺𑀚𑀝𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀅𑀮𑀸𑀪𑀓𑁂𑀲𑀼 𑀆𑀯𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑁂𑀲𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀦 𑀏𑀯𑀁 𑀓𑀸𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀳𑀺 𑀅𑀢𑁆𑀢𑀦𑁄 𑀆𑀯𑀸𑀲𑀧𑀝𑀺𑀚𑀕𑁆𑀕𑀦𑀢𑁆𑀣𑀸𑀬 𑀧𑀘𑁆𑀘𑀬𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀧𑀯𑀺𑀲𑀺𑀢𑀩𑁆𑀩’’𑀦𑁆𑀢𑀺.

𑁨𑁨𑁧. 𑀲𑀘𑁂 𑀧𑀦𑁂𑀢𑁆𑀣 𑀫𑀳𑀸𑀣𑁂𑀭𑁄 𑀧𑀝𑀺𑀓𑁆𑀓𑁄𑀲𑀢𑀺 ‘‘𑀫𑀸, 𑀆𑀯𑀼𑀲𑁄, 𑀏𑀯𑀁 𑀕𑀸𑀳𑁂𑀣, 𑀪𑀕𑀯𑀢𑁄 𑀅𑀦𑀼𑀲𑀺𑀝𑁆𑀞𑀺𑀁 𑀓𑀭𑁄𑀣. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑁂𑀡𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁧𑁮). 𑀢𑀲𑁆𑀲 𑀧𑀝𑀺𑀓𑁆𑀓𑁄𑀲𑀦𑀸𑀬 𑀅𑀝𑁆𑀞𑀢𑁆𑀯𑀸 ‘‘𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀩𑀳𑀽, 𑀧𑀘𑁆𑀘𑀬𑁄 𑀫𑀦𑁆𑀤𑁄, 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀲𑀜𑁆𑀜𑀸𑀧𑁂𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀫𑁂𑀯. 𑀕𑀸𑀳𑁂𑀦𑁆𑀢𑁂𑀦 𑀘 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀯𑀢𑁆𑀢𑀩𑁆𑀩𑀁 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀧𑀘𑁆𑀘𑀬𑀁 𑀥𑀸𑀭𑁂𑀣𑀸’’𑀢𑀺. 𑀅𑀲𑀼𑀓𑀓𑀼𑀮𑀲𑁆𑀲 𑀧𑀘𑁆𑀘𑀬𑁄 𑀅𑀲𑀼𑀓𑀲𑁂𑀦𑀸𑀲𑀦𑀜𑁆𑀘 𑀫𑀬𑁆𑀳𑀁 𑀧𑀸𑀧𑀼𑀡𑀸𑀢𑀺, 𑀆𑀯𑀼𑀲𑁄𑀢𑀺. 𑀧𑀸𑀧𑀼𑀡𑀸𑀢𑀺 𑀪𑀦𑁆𑀢𑁂, 𑀕𑀡𑁆𑀳𑀣 𑀦𑀦𑁆𑀢𑀺. 𑀕𑀡𑁆𑀳𑀸𑀫𑀺, 𑀆𑀯𑀼𑀲𑁄𑀢𑀺. 𑀕𑀳𑀺𑀢𑀁 𑀳𑁄𑀢𑀺. ‘‘𑀲𑀘𑁂 𑀧𑀦 ‘𑀕𑀳𑀺𑀢𑀁 𑀯𑁄, 𑀪𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂 ‘𑀕𑀳𑀺𑀢𑀁 𑀫𑁂’𑀢𑀺 𑀯𑀸, ‘𑀕𑀡𑁆𑀳𑀺𑀲𑁆𑀲𑀣, 𑀪𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂 ‘𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀯𑀸 𑀯𑀤𑀢𑀺, 𑀅𑀕𑁆𑀕𑀳𑀺𑀢𑀁 𑀳𑁄𑀢𑀻’’𑀢𑀺 𑀫𑀳𑀸𑀲𑀼𑀫𑀢𑁆𑀣𑁂𑀭𑁄 𑀆𑀳. 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀅𑀢𑀻𑀢𑀸𑀦𑀸𑀕𑀢𑀯𑀘𑀦𑀁 𑀯𑀸 𑀳𑁄𑀢𑀼 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑀸, 𑀲𑀢𑀼𑀧𑁆𑀧𑀸𑀤𑀫𑀢𑁆𑀢𑀁 𑀆𑀮𑀬𑀓𑀭𑀡𑀫𑀢𑁆𑀢𑀫𑁂𑀯 𑀘𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀫𑀸 𑀕𑀳𑀺𑀢𑀫𑁂𑀯 𑀳𑁄𑀢𑀻’’𑀢𑀺.

𑀬𑁄𑀧𑀺 𑀧𑀁𑀲𑀼𑀓𑀽𑀮𑀺𑀓𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀫𑁆𑀧𑀺 𑀦 𑀅𑀜𑁆𑀜𑀲𑁆𑀫𑀺𑀁 𑀆𑀯𑀸𑀲𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑁄, 𑀢𑀲𑁆𑀫𑀺𑀁𑀬𑁂𑀯 𑀧𑀭𑀺𑀯𑁂𑀡𑁂 𑀅𑀕𑁆𑀕𑀺𑀲𑀸𑀮𑀸𑀬 𑀯𑀸 𑀤𑀻𑀖𑀲𑀸𑀮𑀸𑀬 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑀅𑀜𑁆𑀜𑀲𑁆𑀲 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄 ‘‘𑀯𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀚𑀕𑁆𑀕𑀺𑀲𑁆𑀲𑀢𑀺, 𑀇𑀢𑀭𑁄 ‘‘𑀧𑀘𑁆𑀘𑀬𑀁 𑀕𑀡𑁆𑀳𑀸𑀫𑀻’’𑀢𑀺 𑀏𑀯𑀁 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑁂𑀦𑀸𑀲𑀦𑀁 𑀲𑀼𑀚𑀕𑁆𑀕𑀺𑀢𑀢𑀭𑀁 𑀪𑀯𑀺𑀲𑁆𑀲𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀧𑀁𑀲𑀼𑀓𑀽𑀮𑀺𑀓𑁂 𑀯𑀸𑀲𑀢𑁆𑀣𑀸𑀬 𑀲𑁂𑀦𑀸𑀲𑀦𑀁 𑀕𑀡𑁆𑀳𑀦𑁆𑀢𑁂 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑁂𑀦 𑀯𑀢𑁆𑀢𑀩𑁆𑀩𑀁, ‘𑀪𑀦𑁆𑀢𑁂 𑀇𑀥 𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀲𑁄 𑀓𑀺𑀁 𑀓𑀸𑀢𑀩𑁆𑀩𑁄’𑀢𑀺. 𑀢𑁂𑀦 ‘𑀳𑁂𑀝𑁆𑀞𑀸 𑀅𑀜𑁆𑀜𑀁 𑀕𑀸𑀳𑀸𑀧𑁂𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀧𑀦 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀯𑀲𑀢𑀺, 𑀯𑀼𑀝𑁆𑀞𑀯𑀲𑁆𑀲𑀲𑁆𑀲 𑀘 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀲𑀸𑀝𑀓𑀁 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. 𑀅𑀣 ‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀫𑀸’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀯𑀲𑁆𑀲𑀁𑀯𑀼𑀝𑁆𑀞𑀪𑀺𑀓𑁆𑀔𑀽𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺. 𑀬𑁂𑀲𑀁 𑀧𑀦 𑀲𑁂𑀦𑀸𑀲𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀘𑁆𑀘𑀬𑀫𑁂𑀯 𑀤𑁂𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀁 𑀅𑀯𑀲𑁆𑀲𑀸𑀯𑀸𑀲𑀺𑀓𑀲𑁂𑀦𑀸𑀲𑀦𑁂 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀫𑀦𑀼𑀲𑁆𑀲𑀸 𑀣𑀽𑀧𑀁 𑀓𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀸𑀳𑀸𑀧𑁂𑀦𑁆𑀢𑀺. 𑀣𑀽𑀧𑁄 𑀦𑀸𑀫 𑀅𑀲𑁂𑀦𑀸𑀲𑀦𑀁, 𑀢𑀲𑁆𑀲 𑀲𑀫𑀻𑀧𑁂 𑀭𑀼𑀓𑁆𑀔𑁂 𑀯𑀸 𑀫𑀡𑁆𑀟𑀧𑁂 𑀯𑀸 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀕𑀸𑀳𑁂𑀢𑀩𑁆𑀩𑀁. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀘𑁂𑀢𑀺𑀬𑀁 𑀚𑀕𑁆𑀕𑀺𑀢𑀩𑁆𑀩𑀁. 𑀩𑁄𑀥𑀺𑀭𑀼𑀓𑁆𑀔𑀩𑁄𑀥𑀺𑀖𑀭𑀆𑀲𑀦𑀖𑀭𑀲𑀫𑁆𑀫𑀼𑀜𑁆𑀚𑀦𑀺𑀅𑀝𑁆𑀝𑀤𑀸𑀭𑀼𑀅𑀝𑁆𑀝𑀯𑀘𑁆𑀘𑀓𑀼𑀝𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀧𑀸𑀦𑀻𑀬𑀓𑀼𑀝𑀺𑀧𑀸𑀦𑀻𑀬𑀫𑀸𑀴𑀓𑀤𑀦𑁆𑀢𑀓𑀝𑁆𑀞𑀫𑀸𑀴𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑁄𑀚𑀦𑀲𑀸𑀮𑀸 𑀧𑀦 𑀲𑁂𑀦𑀸𑀲𑀦𑀫𑁂𑀯, 𑀢𑀲𑁆𑀫𑀸 𑀢𑀁 𑀏𑀓𑀲𑁆𑀲 𑀯𑀸 𑀩𑀳𑀽𑀦𑀁 𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀸𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀩𑁆𑀩𑀫𑀺𑀤𑀁 𑀯𑀺𑀢𑁆𑀣𑀸𑀭𑁂𑀦 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀁.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑁂𑀦 𑀧𑀦 𑀧𑀸𑀝𑀺𑀧𑀤𑀅𑀭𑀼𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀼𑀦 𑀅𑀭𑀼𑀡𑀁 𑀦 𑀪𑀺𑀚𑁆𑀚𑀢𑀺, 𑀢𑀸𑀯 𑀕𑀸𑀳𑁂𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀲𑁂𑀦𑀸𑀲𑀦𑀕𑁆𑀕𑀸𑀳𑀲𑁆𑀲 𑀔𑁂𑀢𑁆𑀢𑀁. 𑀲𑀘𑁂 𑀧𑀸𑀢𑁄𑀯 𑀕𑀸𑀪𑀺𑀢𑁂 𑀲𑁂𑀦𑀸𑀲𑀦𑁂 𑀅𑀜𑁆𑀜𑁄 𑀯𑀺𑀢𑀓𑁆𑀓𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀲𑁂𑀦𑀸𑀲𑀦𑀁 𑀬𑀸𑀘𑀢𑀺, ‘‘𑀕𑀳𑀺𑀢𑀁, 𑀪𑀦𑁆𑀢𑁂, 𑀲𑁂𑀦𑀸𑀲𑀦𑀁, 𑀯𑀲𑁆𑀲𑀽𑀧𑀕𑀢𑁄 𑀲𑀗𑁆𑀖𑁄, 𑀭𑀫𑀡𑀻𑀬𑁄 𑀯𑀺𑀳𑀸𑀭𑁄, 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀬𑀢𑁆𑀣 𑀇𑀘𑁆𑀙𑀣, 𑀢𑀢𑁆𑀣 𑀯𑀲𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀧𑀘𑁆𑀙𑀺𑀫𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦 𑀲𑀘𑁂 𑀓𑀸𑀮𑀁 𑀖𑁄𑀲𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀓𑁄𑀘𑀺 𑀤𑀲𑀳𑀢𑁆𑀣𑀁 𑀯𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀢𑀺, 𑀆𑀕𑀦𑁆𑀢𑀼𑀓𑁄 𑀘𑁂 𑀪𑀺𑀓𑁆𑀔𑀼 𑀲𑀗𑁆𑀖𑀢𑁆𑀣𑁂𑀭𑁄 𑀳𑁄𑀢𑀺, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀦𑀯𑀓𑁄 𑀘𑁂 𑀳𑁄𑀢𑀺, 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀢𑁆𑀣𑁂𑀭𑁄 𑀯𑀢𑁆𑀢𑀩𑁆𑀩𑁄 ‘‘𑀲𑀘𑁂, 𑀪𑀦𑁆𑀢𑁂, 𑀇𑀘𑁆𑀙𑀣, 𑀧𑀞𑀫𑀪𑀸𑀕𑀁 𑀫𑀼𑀜𑁆𑀘𑀺𑀢𑁆𑀯𑀸 𑀇𑀤𑀁 𑀯𑀢𑁆𑀣𑀁 𑀕𑀡𑁆𑀳𑀣𑀸’’𑀢𑀺, 𑀅𑀫𑀼𑀜𑁆𑀘𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀼𑀩𑁆𑀩𑁂 𑀕𑀸𑀳𑀺𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀼𑀢𑀺𑀬𑀢𑁆𑀣𑁂𑀭𑀢𑁄 𑀧𑀝𑁆𑀞𑀸𑀬 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀢𑁆𑀢𑀝𑁆𑀞𑀸𑀦𑁂𑀯 𑀆𑀕𑀦𑁆𑀢𑀼𑀓𑀲𑁆𑀲 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀧𑀞𑀫𑀯𑀲𑁆𑀲𑀽𑀧𑀕𑀢𑀸 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸 𑀯𑀢𑁆𑀣𑀸𑀦𑀺 𑀅𑀮𑀢𑁆𑀣𑀼𑀁, 𑀮𑀤𑁆𑀥𑀁 𑀮𑀤𑁆𑀥𑀁 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀬𑀸𑀯 𑀆𑀕𑀦𑁆𑀢𑀼𑀓𑀲𑁆𑀲 𑀲𑀫𑀓𑀁 𑀳𑁄𑀢𑀺, 𑀢𑀸𑀯 𑀤𑀸𑀢𑀩𑁆𑀩𑀁. 𑀢𑁂𑀦 𑀲𑀫𑀓𑁂 𑀮𑀤𑁆𑀥𑁂 𑀅𑀯𑀲𑀺𑀝𑁆𑀞𑁄 𑀅𑀦𑀼𑀪𑀸𑀕𑁄 𑀣𑁂𑀭𑀸𑀲𑀦𑁂 𑀤𑀸𑀢𑀩𑁆𑀩𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀮𑀸𑀪𑁂 𑀲𑀢𑀺 𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀼𑀁 𑀓𑀢𑀺𑀓𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑀲𑀘𑁂 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺, 𑀤𑁆𑀯𑀻𑀲𑀼𑀧𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀲𑀼 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀸𑀬 𑀓𑀺𑀮𑀫𑀦𑁆𑀢𑀸 ‘‘𑀆𑀯𑀼𑀲𑁄, 𑀇𑀥 𑀯𑀲𑀦𑁆𑀢𑀸 𑀲𑀩𑁆𑀩𑁂𑀯 𑀓𑀺𑀮𑀫𑀸𑀫, 𑀲𑀸𑀥𑀼 𑀯𑀢 𑀤𑁆𑀯𑁂 𑀪𑀸𑀕𑀸 𑀳𑁄𑀫, 𑀬𑁂𑀲𑀁 𑀜𑀸𑀢𑀺𑀧𑀯𑀸𑀭𑀺𑀢𑀝𑁆𑀞𑀸𑀦𑀸𑀦𑀺 𑀅𑀢𑁆𑀣𑀺, 𑀢𑁂 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀬 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀼 𑀬𑁂 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀧𑀯𑀸𑀭𑀡𑀸𑀬 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀅𑀧𑀮𑁄𑀓𑁂𑀢𑁆𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀸𑀢𑀩𑁆𑀩𑀁. 𑀲𑀸𑀤𑀺𑀬𑀦𑁆𑀢𑀸𑀧𑀺 𑀳𑀺 𑀢𑁂𑀦𑁂𑀯 𑀯𑀲𑁆𑀲𑀸𑀯𑀸𑀲𑀺𑀓𑀲𑁆𑀲 𑀲𑀸𑀫𑀺𑀦𑁄, 𑀔𑀻𑀬𑀦𑁆𑀢𑀸𑀧𑀺 𑀘 𑀆𑀯𑀸𑀲𑀺𑀓𑀸 𑀦𑁂𑀯 𑀅𑀤𑀸𑀢𑀼𑀁 𑀮𑀪𑀦𑁆𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀓𑀢𑀺𑀓𑀯𑀢𑁆𑀢𑀁 𑀓𑀸𑀢𑀩𑁆𑀩𑀁 ‘𑀲𑀩𑁆𑀩𑁂𑀲𑀁 𑀦𑁄 𑀇𑀥 𑀬𑀸𑀕𑀼𑀪𑀢𑁆𑀢𑀁 𑀦𑀧𑁆𑀧𑀳𑁄𑀢𑀺, 𑀲𑀪𑀸𑀕𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀆𑀕𑀘𑁆𑀙𑀣, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀪𑀺𑀲𑁆𑀲𑀣𑀸’𑀢𑀺. 𑀢𑀜𑁆𑀘𑁂 𑀏𑀓𑁄 𑀧𑀝𑀺𑀩𑀸𑀳𑀢𑀺, 𑀲𑀼𑀧𑀝𑀺𑀩𑀸𑀳𑀺𑀢𑀁. 𑀦𑁄 𑀘𑁂 𑀧𑀝𑀺𑀩𑀸𑀳𑀢𑀺, 𑀓𑀢𑀺𑀓𑀸 𑀲𑀼𑀓𑀢𑀸. 𑀧𑀘𑁆𑀙𑀸 𑀢𑁂𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀆𑀕𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀸𑀮𑁂 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺. 𑀧𑀼𑀦𑀧𑀺 𑀯𑀼𑀢𑁆𑀢𑀁 ‘‘𑀲𑀘𑁂 𑀯𑀲𑁆𑀲𑀽𑀧𑀕𑀢𑁂𑀲𑀼 𑀏𑀓𑀘𑁆𑀘𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑁂 𑀅𑀧𑀸𑀧𑀼𑀡𑀦𑁆𑀢𑁂 𑀪𑀺𑀓𑁆𑀔𑀽 𑀓𑀢𑀺𑀓𑀁 𑀓𑀭𑁄𑀦𑁆𑀢𑀺 ‘𑀙𑀺𑀦𑁆𑀦𑀯𑀲𑁆𑀲𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀤𑀸𑀦𑀺 𑀉𑀧𑁆𑀧𑀚𑁆𑀚𑀦𑀓𑀯𑀲𑁆𑀲𑀸𑀯𑀸𑀲𑀺𑀓𑀜𑁆𑀘 𑀇𑀫𑁂𑀲𑀁 𑀤𑀸𑀢𑀼𑀁 𑀭𑀼𑀘𑁆𑀘𑀢𑀻’𑀢𑀺, 𑀏𑀯𑀁 𑀓𑀢𑀺𑀓𑀸𑀬 𑀓𑀢𑀸𑀬 𑀕𑀸𑀳𑀺𑀢𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀁 𑀢𑁂𑀲𑀫𑁂𑀯 𑀤𑀸𑀢𑀩𑁆𑀩’’𑀦𑁆𑀢𑀺. 𑀢𑁂𑀫𑀸𑀲𑀁 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀫𑀕𑁆𑀕𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀸𑀦𑀺 𑀚𑀕𑁆𑀕𑀺𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁄𑀧𑀺 𑀯𑀺𑀩𑁆𑀪𑀦𑁆𑀢𑁄𑀧𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀮𑀪𑀢𑀺𑀬𑁂𑀯. 𑀪𑀢𑀺𑀦𑀺𑀯𑀺𑀝𑁆𑀞𑀜𑁆𑀳𑀺 𑀢𑁂𑀦 𑀓𑀢𑀁, 𑀲𑀗𑁆𑀖𑀺𑀓𑀁 𑀧𑀦 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀺𑀩𑁆𑀪𑀦𑁆𑀢𑁄𑀧𑀺 𑀮𑀪𑀢𑁂𑀯, 𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢𑀁 𑀧𑀦 𑀦 𑀮𑀪𑀢𑀻𑀢𑀺 𑀯𑀤𑀦𑁆𑀢𑀺.

𑀲𑀘𑁂 𑀯𑀼𑀝𑁆𑀞𑀯𑀲𑁆𑀲𑁄 𑀤𑀺𑀲𑀁𑀕𑀫𑀺𑀓𑁄 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑀲𑁆𑀲 𑀳𑀢𑁆𑀣𑀢𑁄 𑀓𑀺𑀜𑁆𑀘𑀺𑀤𑁂𑀯 𑀓𑀧𑁆𑀧𑀺𑀬𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 ‘‘𑀅𑀲𑀼𑀓𑀓𑀼𑀮𑁂 𑀫𑀬𑁆𑀳𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢𑀁, 𑀢𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀯𑀺𑀩𑁆𑀪𑀫𑀢𑀺, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺. 𑀲𑀘𑁂 𑀧𑀦 𑀫𑀦𑀼𑀲𑁆𑀲𑁂 𑀲𑀫𑁆𑀫𑀼𑀔𑀸 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀮𑀪𑀢𑀺. ‘‘𑀇𑀤𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑁂 𑀯𑀼𑀢𑁆𑀣𑀪𑀺𑀓𑁆𑀔𑀼𑀦𑁄 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 𑀬𑀲𑁆𑀲 𑀕𑀸𑀳𑀺𑀢𑀁, 𑀢𑀲𑁆𑀲𑁂𑀯 𑀳𑁄𑀢𑀺. 𑀲𑀘𑁂 𑀧𑀦 𑀲𑁂𑀦𑀸𑀲𑀦𑀲𑀸𑀫𑀺𑀓𑀲𑁆𑀲 𑀧𑀺𑀬𑀓𑀫𑁆𑀬𑀢𑀸𑀬 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀩𑀳𑀽𑀦𑀺 𑀯𑀢𑁆𑀣𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑁂 𑀤𑁂𑀫𑀸’’𑀢𑀺 𑀤𑁂𑀦𑁆𑀢𑀺, 𑀢𑀢𑁆𑀣 𑀯𑀲𑁆𑀲𑀽𑀧𑀕𑀢𑀲𑁆𑀲 𑀏𑀓𑀫𑁂𑀯 𑀯𑀢𑁆𑀣𑀁 𑀤𑀸𑀢𑀩𑁆𑀩𑀁, 𑀲𑁂𑀲𑀸𑀦𑀺 𑀲𑀗𑁆𑀖𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀯𑀲𑁆𑀲𑀸𑀯𑀸𑀲𑀺𑀓𑀞𑀺𑀢𑀺𑀓𑀸𑀬 𑀕𑀸𑀳𑁂𑀢𑀩𑁆𑀩𑀸𑀦𑀺, 𑀞𑀺𑀢𑀺𑀓𑀸𑀬 𑀅𑀲𑀢𑀺 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀕𑀸𑀳𑁂𑀢𑀩𑁆𑀩𑀸𑀦𑀺. 𑀲𑁂𑀦𑀸𑀲𑀦𑁂 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀩𑀳𑀽𑀦𑀺 𑀯𑀢𑁆𑀣𑀸𑀦𑀺 𑀆𑀳𑀭𑀺𑀢𑁆𑀯𑀸 ‘‘𑀲𑁂𑀦𑀸𑀲𑀦𑀲𑁆𑀲 𑀤𑁂𑀫𑀸’’𑀢𑀺 𑀤𑀺𑀦𑁆𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 ‘‘𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀲𑁂𑀯 𑀳𑁄𑀦𑁆𑀢𑀺.

𑀏𑀓𑀲𑁆𑀲 𑀕𑁂𑀳𑁂 𑀤𑁆𑀯𑁂 𑀯𑀲𑁆𑀲𑀸𑀯𑀸𑀲𑀺𑀓𑀸𑀦𑀺, 𑀧𑀞𑀫𑀪𑀸𑀕𑁄 𑀲𑀸𑀫𑀡𑁂𑀭𑀲𑁆𑀲 𑀕𑀸𑀳𑀺𑀢𑁄 𑀳𑁄𑀢𑀺, 𑀤𑀼𑀢𑀺𑀬𑁄 𑀣𑁂𑀭𑀸𑀲𑀦𑁂. 𑀲𑁄 𑀏𑀓𑀁 𑀤𑀲𑀳𑀢𑁆𑀣𑀁, 𑀏𑀓𑀁 𑀅𑀝𑁆𑀞𑀳𑀢𑁆𑀣𑀁 𑀲𑀸𑀝𑀓𑀁 𑀧𑁂𑀲𑁂𑀢𑀺 ‘‘𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢𑀪𑀺𑀓𑁆𑀔𑀽𑀦𑀁 𑀤𑁂𑀣𑀸’’𑀢𑀺, 𑀯𑀺𑀘𑀺𑀦𑀺𑀢𑁆𑀯𑀸 𑀯𑀭𑀪𑀸𑀕𑀁 𑀲𑀸𑀫𑀡𑁂𑀭𑀲𑁆𑀲 𑀤𑀢𑁆𑀯𑀸 𑀅𑀦𑀼𑀪𑀸𑀕𑁄 𑀣𑁂𑀭𑀸𑀲𑀦𑁂 𑀤𑀸𑀢𑀩𑁆𑀩𑁄. 𑀲𑀘𑁂 𑀧𑀦 𑀉𑀪𑁄𑀧𑀺 𑀖𑀭𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀲𑀬𑀫𑁂𑀯 𑀧𑀸𑀤𑀫𑀽𑀮𑁂 𑀞𑀧𑁂𑀢𑀺, 𑀬𑀁 𑀬𑀲𑁆𑀲 𑀤𑀺𑀦𑁆𑀦𑀁, 𑀢𑀤𑁂𑀯 𑀢𑀲𑁆𑀲 𑀳𑁄𑀢𑀺. 𑀇𑀢𑁄 𑀧𑀭𑀁 𑀫𑀳𑀸𑀧𑀘𑁆𑀘𑀭𑀺𑀬𑀁 𑀆𑀕𑀢𑀦𑀬𑁄 𑀳𑁄𑀢𑀺 𑁋 𑀏𑀓𑀲𑁆𑀲 𑀖𑀭𑁂 𑀤𑀳𑀭𑀲𑀸𑀫𑀡𑁂𑀭𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀘𑁂 𑀧𑀼𑀘𑁆𑀙𑀢𑀺 ‘‘𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀓𑀲𑁆𑀲 𑀧𑀢𑁆𑀢’’𑀦𑁆𑀢𑀺, ‘‘𑀲𑀸𑀫𑀡𑁂𑀭𑀲𑁆𑀲𑀸’’𑀢𑀺 𑀅𑀯𑀢𑁆𑀯𑀸 ‘‘𑀤𑀸𑀦𑀓𑀸𑀮𑁂 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀤𑀸𑀦𑀤𑀺𑀯𑀲𑁂 𑀏𑀓𑀁 𑀫𑀳𑀸𑀣𑁂𑀭𑀁 𑀧𑁂𑀲𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀲𑁆𑀲 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢𑀁, 𑀲𑁄 𑀯𑀺𑀩𑁆𑀪𑀫𑀢𑀺 𑀯𑀸 𑀓𑀸𑀮𑀁 𑀯𑀸 𑀓𑀭𑁄𑀢𑀺, 𑀫𑀦𑀼𑀲𑁆𑀲𑀸 𑀘𑁂 𑀧𑀼𑀘𑁆𑀙𑀦𑁆𑀢𑀺 ‘‘𑀓𑀲𑁆𑀲 𑀅𑀫𑁆𑀳𑀸𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀢𑁆𑀢’’𑀦𑁆𑀢𑀺, 𑀢𑁂𑀲𑀁 𑀬𑀣𑀸𑀪𑀽𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀲𑀘𑁂 𑀢𑁂 𑀯𑀤𑀦𑁆𑀢𑀺 ‘‘𑀢𑀼𑀫𑁆𑀳𑀸𑀓𑀁 𑀤𑁂𑀫𑀸’’𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀧𑀼𑀡𑀸𑀢𑀺. 𑀅𑀣 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀤𑁂𑀦𑁆𑀢𑀺, 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀸𑀧𑀼𑀡𑀸𑀢𑀺. 𑀲𑀘𑁂 𑀯𑀲𑁆𑀲𑀽𑀧𑀕𑀢𑀸 𑀲𑀼𑀤𑁆𑀥𑀧𑀁𑀲𑀼𑀓𑀽𑀮𑀺𑀓𑀸𑀬𑁂𑀯 𑀳𑁄𑀦𑁆𑀢𑀺, 𑀆𑀦𑁂𑀢𑁆𑀯𑀸 𑀤𑀺𑀦𑁆𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀁 𑀯𑀸 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁, 𑀩𑀺𑀫𑁆𑀩𑁄𑀳𑀦𑀸𑀤𑀻𑀦𑀺 𑀯𑀸 𑀓𑀸𑀢𑀩𑁆𑀩𑀸𑀦𑀻𑀢𑀺.

𑀅𑀬𑀁 𑀢𑀸𑀯 𑀅𑀦𑁆𑀢𑁄𑀯𑀲𑁆𑀲𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀯𑀲𑁂𑀦

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸.

𑁨𑁨𑁨. 𑀅𑀬𑀫𑀧𑀭𑁄𑀧𑀺 𑀉𑀢𑀼𑀓𑀸𑀮𑁂 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀦𑀸𑀫 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀯𑀲𑀯𑀲𑁂𑀦 𑀳𑀺 𑀢𑀺𑀯𑀺𑀥𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑁄 𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀕𑁆𑀕𑀸𑀳𑀸, 𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄. 𑀅𑀧𑀭𑀚𑁆𑀚𑀼𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀼𑀭𑀺𑀫𑀓𑁄 𑀕𑀸𑀳𑁂𑀢𑀩𑁆𑀩𑁄, 𑀫𑀸𑀲𑀕𑀢𑀸𑀬 𑀆𑀲𑀸𑀴𑁆𑀳𑀺𑀬𑀸 𑀧𑀘𑁆𑀙𑀺𑀫𑀓𑁄 𑀕𑀸𑀳𑁂𑀢𑀩𑁆𑀩𑁄, 𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀬 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁩𑁧𑁮).

𑀏𑀢𑁂𑀲𑀼 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) 𑀢𑀻𑀲𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑁂𑀲𑀼 𑀧𑀼𑀭𑀺𑀫𑀓𑁄 𑀧𑀘𑁆𑀙𑀺𑀫𑀓𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀕𑀸𑀳𑀸 𑀣𑀸𑀯𑀭𑀸, 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀧𑀦 𑀲𑁂𑀦𑀸𑀲𑀦𑀧𑀝𑀺𑀚𑀕𑁆𑀕𑀦𑀢𑁆𑀣𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄. 𑀢𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀫𑀳𑀸𑀮𑀸𑀪𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀲𑀸𑀫𑀺𑀓𑀸 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀲𑀩𑁆𑀩𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀯𑀸𑀭𑁂𑀢𑁆𑀯𑀸 𑀕𑀫𑀦𑀓𑀸𑀮𑁂 𑀩𑀳𑀼𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑀁 𑀤𑁂𑀦𑁆𑀢𑀺, 𑀫𑀳𑀸𑀣𑁂𑀭𑀸 𑀤𑀽𑀭𑀢𑁄𑀯 𑀆𑀕𑀦𑁆𑀢𑁆𑀯𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀢𑀁 𑀕𑀳𑁂𑀢𑁆𑀯𑀸 𑀨𑀸𑀲𑀼𑀁 𑀯𑀲𑀺𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑀸 𑀮𑀸𑀪𑀁 𑀕𑀡𑁆𑀳𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀆𑀯𑀸𑀲𑀺𑀓𑀸 ‘‘𑀫𑀬𑀁 𑀏𑀢𑁆𑀣𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀦 𑀮𑀪𑀸𑀫, 𑀦𑀺𑀘𑁆𑀘𑀁 𑀆𑀕𑀦𑁆𑀢𑀼𑀓𑀫𑀳𑀸𑀣𑁂𑀭𑀸𑀯 𑀮𑀪𑀦𑁆𑀢𑀺, 𑀢𑁂𑀬𑁂𑀯 𑀦𑀁 𑀆𑀕𑀦𑁆𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀮𑀼𑀚𑁆𑀚𑀦𑁆𑀢𑀫𑁆𑀧𑀺 𑀦 𑀑𑀮𑁄𑀓𑁂𑀦𑁆𑀢𑀺. 𑀪𑀕𑀯𑀸 𑀢𑀲𑁆𑀲 𑀧𑀝𑀺𑀚𑀕𑁆𑀕𑀦𑀢𑁆𑀣𑀁 ‘‘𑀅𑀧𑀭𑀚𑁆𑀚𑀼𑀕𑀢𑀸𑀬 𑀧𑀯𑀸𑀭𑀡𑀸𑀬 𑀆𑀬𑀢𑀺𑀁 𑀯𑀲𑁆𑀲𑀸𑀯𑀸𑀲𑀢𑁆𑀣𑀸𑀬 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄 𑀕𑀸𑀳𑁂𑀢𑀩𑁆𑀩𑁄’’𑀢𑀺 𑀆𑀳.

𑀢𑀁 𑀕𑀸𑀳𑁂𑀦𑁆𑀢𑁂𑀦 𑀲𑀗𑁆𑀖𑀢𑁆𑀣𑁂𑀭𑁄 𑀯𑀢𑁆𑀢𑀩𑁆𑀩𑁄 ‘‘𑀪𑀦𑁆𑀢𑁂, 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀲𑁂𑀦𑀸𑀲𑀦𑀁 𑀕𑀡𑁆𑀳𑀣𑀸’’𑀢𑀺. 𑀲𑀘𑁂 𑀕𑀡𑁆𑀳𑀸𑀢𑀺, 𑀤𑀸𑀢𑀩𑁆𑀩𑀁. 𑀦𑁄 𑀘𑁂, 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀦𑀼𑀣𑁂𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀬𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀅𑀦𑁆𑀢𑀫𑀲𑁄 𑀲𑀸𑀫𑀡𑁂𑀭𑀲𑁆𑀲𑀧𑀺 𑀤𑀸𑀢𑀩𑁆𑀩𑀁. 𑀢𑁂𑀦 𑀢𑀁 𑀲𑁂𑀦𑀸𑀲𑀦𑀁 𑀅𑀝𑁆𑀞 𑀫𑀸𑀲𑁂 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀁, 𑀙𑀤𑀦𑀪𑀺𑀢𑁆𑀢𑀺𑀪𑀽𑀫𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀔𑀡𑁆𑀟𑀁 𑀯𑀸 𑀨𑀼𑀮𑁆𑀮𑀁 𑀯𑀸 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀧𑀝𑀺𑀲𑀗𑁆𑀔𑀭𑀺𑀢𑀩𑁆𑀩𑀁. 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀤𑀺𑀯𑀲𑀁 𑀔𑁂𑀧𑁂𑀢𑁆𑀯𑀸 𑀭𑀢𑁆𑀢𑀺𑀁 𑀢𑀢𑁆𑀣 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀭𑀢𑁆𑀢𑀺𑀁 𑀧𑀭𑀺𑀯𑁂𑀡𑁂 𑀯𑀲𑀺𑀢𑁆𑀯𑀸 𑀢𑀢𑁆𑀣 𑀤𑀺𑀯𑀲𑀁 𑀔𑁂𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁆𑀣𑁂𑀯 𑀯𑀲𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀉𑀢𑀼𑀓𑀸𑀮𑁂 𑀆𑀕𑀢𑀸𑀦𑀁 𑀯𑀼𑀟𑁆𑀠𑀸𑀦𑀁 𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀲𑀘𑁂 𑀲𑀗𑁆𑀖𑀢𑁆𑀣𑁂𑀭𑁄 ‘‘𑀫𑀬𑁆𑀳𑀁 𑀇𑀤𑀁 𑀧𑀦 𑀲𑁂𑀦𑀸𑀲𑀦𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀦 𑀮𑀪𑀢𑀺. ‘‘𑀪𑀦𑁆𑀢𑁂, 𑀇𑀤𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀚𑀕𑁆𑀕𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀦 𑀤𑀸𑀢𑀩𑁆𑀩𑀁, 𑀅𑀝𑁆𑀞 𑀫𑀸𑀲𑁂 𑀧𑀝𑀺𑀚𑀕𑁆𑀕𑀺𑀢𑀪𑀺𑀓𑁆𑀔𑀼𑀲𑁆𑀲𑁂𑀯 𑀕𑀸𑀳𑀺𑀢𑀁 𑀳𑁄𑀢𑀺. 𑀬𑀲𑁆𑀫𑀺𑀁 𑀧𑀦 𑀲𑁂𑀦𑀸𑀲𑀦𑁂 𑀏𑀓𑀲𑀁𑀯𑀘𑁆𑀙𑀭𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺 𑀙𑀫𑀸𑀲𑀘𑁆𑀘𑀬𑁂𑀦 𑀙𑀫𑀸𑀲𑀘𑁆𑀘𑀬𑁂𑀦, 𑀢𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀬𑀲𑁆𑀫𑀺𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀤𑁂𑀦𑁆𑀢𑀺 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀘𑀢𑀼𑀫𑀸𑀲𑀘𑁆𑀘𑀬𑁂𑀦, 𑀬𑀲𑁆𑀫𑀺𑀁 𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀤𑁂𑀦𑁆𑀢𑀺 𑀢𑁂𑀫𑀸𑀲𑀘𑁆𑀘𑀬𑁂𑀦 𑀢𑁂𑀫𑀸𑀲𑀘𑁆𑀘𑀬𑁂𑀦, 𑀢𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀦 𑀕𑀸𑀳𑁂𑀢𑀩𑁆𑀩𑀁. 𑀧𑀘𑁆𑀘𑀬𑁂𑀦𑁂𑀯 𑀳𑀺 𑀢𑀁 𑀧𑀝𑀺𑀚𑀕𑁆𑀕𑀦𑀁 𑀮𑀪𑀺𑀲𑁆𑀲𑀢𑀺. 𑀬𑀲𑁆𑀫𑀺𑀁 𑀧𑀦 𑀏𑀓𑀲𑀁𑀯𑀘𑁆𑀙𑀭𑁂 𑀲𑀓𑀺𑀤𑁂𑀯 𑀩𑀳𑀽 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺, 𑀏𑀢𑀁 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑀁 𑀕𑀸𑀳𑁂𑀢𑀩𑁆𑀩𑀦𑁆𑀢𑀺.

𑁨𑁨𑁩. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀓𑀢𑀁 𑀯𑀸 𑀯𑀺𑀳𑀸𑀭𑀁 𑀯𑀺𑀧𑁆𑀧𑀓𑀢𑀁 𑀯𑀸 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁, 𑀔𑀼𑀤𑁆𑀤𑀓𑁂 𑀯𑀺𑀳𑀸𑀭𑁂 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀙𑀧𑁆𑀧𑀜𑁆𑀘𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁, 𑀅𑀟𑁆𑀠𑀬𑁄𑀕𑁂 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀲𑀢𑁆𑀢𑀝𑁆𑀞𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁, 𑀫𑀳𑀮𑁆𑀮𑀓𑁂 𑀯𑀺𑀳𑀸𑀭𑁂 𑀧𑀸𑀲𑀸𑀤𑁂 𑀯𑀸 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁩𑁨𑁩) 𑀯𑀘𑀦𑀢𑁄 𑀅𑀓𑀢𑀁 𑀯𑀺𑀧𑁆𑀧𑀓𑀢𑀁 𑀯𑀸 𑀲𑁂𑀦𑀸𑀲𑀦𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀮𑁄𑀓𑀦𑁂𑀦 𑀯𑀸 𑀓𑀫𑁆𑀫𑀯𑀸𑀘𑀸𑀬 𑀯𑀸 𑀲𑀸𑀯𑁂𑀢𑁆𑀯𑀸 𑀦𑀯𑀓𑀫𑁆𑀫𑀁 𑀓𑀢𑁆𑀯𑀸 𑀯𑀲𑀺𑀢𑀼𑀁 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀤𑀸𑀢𑀩𑁆𑀩𑀁. 𑀦𑀯𑀓𑀫𑁆𑀫𑀺𑀓𑁄 𑀪𑀺𑀓𑁆𑀔𑀼 𑀅𑀦𑁆𑀢𑁄𑀯𑀲𑁆𑀲𑁂 𑀢𑀁 𑀆𑀯𑀸𑀲𑀁 𑀮𑀪𑀢𑀺, 𑀉𑀢𑀼𑀓𑀸𑀮𑁂 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀮𑀪𑀢𑀺. 𑀮𑀤𑁆𑀥𑀦𑀯𑀓𑀫𑁆𑀫𑁂𑀦 𑀧𑀦 𑀪𑀺𑀓𑁆𑀔𑀼𑀦𑀸 𑀯𑀸𑀲𑀺𑀨𑀭𑀲𑀼𑀦𑀺𑀔𑀸𑀤𑀦𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀲𑀬𑀁 𑀦 𑀓𑀸𑀢𑀩𑁆𑀩𑀁, 𑀓𑀢𑀸𑀓𑀢𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀆𑀯𑀸𑀲𑁄 𑀚𑀻𑀭𑀢𑀺, 𑀆𑀯𑀸𑀲𑀲𑀸𑀫𑀺𑀓𑀲𑁆𑀲 𑀯𑀸 𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀓𑀣𑁂𑀢𑀩𑁆𑀩𑀁 ‘‘𑀆𑀯𑀸𑀲𑁄 𑀢𑁂 𑀦𑀲𑁆𑀲𑀢𑀺, 𑀚𑀕𑁆𑀕𑀣 𑀏𑀢𑀁 𑀆𑀯𑀸𑀲’’𑀦𑁆𑀢𑀺. 𑀲𑀘𑁂 𑀲𑁄 𑀦 𑀲𑀓𑁆𑀓𑁄𑀢𑀺, 𑀪𑀺𑀓𑁆𑀔𑀽𑀳𑀺 𑀜𑀸𑀢𑀻𑀳𑀺 𑀯𑀸 𑀉𑀧𑀝𑁆𑀞𑀸𑀓𑁂𑀳𑀺 𑀯𑀸 𑀲𑀫𑀸𑀤𑀸𑀧𑁂𑀢𑁆𑀯𑀸 𑀚𑀕𑁆𑀕𑀺𑀢𑀩𑁆𑀩𑁄. 𑀲𑀘𑁂 𑀢𑁂𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑀗𑁆𑀖𑀺𑀓𑁂𑀦 𑀧𑀘𑁆𑀘𑀬𑁂𑀦 𑀚𑀕𑁆𑀕𑀺𑀢𑀩𑁆𑀩𑁄, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀏𑀓𑀁 𑀆𑀯𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀯𑀲𑁂𑀲𑀸 𑀚𑀕𑁆𑀕𑀺𑀢𑀩𑁆𑀩𑀸, 𑀩𑀳𑀽 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀓𑀁 𑀲𑀡𑁆𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑀤𑀼𑀩𑁆𑀪𑀺𑀓𑁆𑀔𑁂 𑀪𑀺𑀓𑁆𑀔𑀽𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀲𑀩𑁆𑀩𑁂 𑀆𑀯𑀸𑀲𑀸 𑀦𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀆𑀯𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄 𑀬𑀸𑀕𑀼𑀪𑀢𑁆𑀢𑀘𑀻𑀯𑀭𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁂𑀳𑀺 𑀲𑁂𑀲𑀸𑀯𑀸𑀲𑀸 𑀚𑀕𑁆𑀕𑀺𑀢𑀩𑁆𑀩𑀸𑀬𑁂𑀯.

𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀺𑀓𑁂 𑀧𑀘𑁆𑀘𑀬𑁂 𑀅𑀲𑀢𑀺 𑀏𑀓𑁄 𑀪𑀺𑀓𑁆𑀔𑀼 ‘𑀢𑀼𑀬𑁆𑀳𑀁 𑀏𑀓𑀫𑀜𑁆𑀘𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀚𑀕𑁆𑀕𑀸𑀳𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀩𑀳𑀼𑀢𑀭𑀁 𑀇𑀘𑁆𑀙𑀢𑀺, 𑀢𑀺𑀪𑀸𑀕𑀁 𑀯𑀸 𑀉𑀧𑀟𑁆𑀠𑀪𑀸𑀕𑀁 𑀯𑀸 𑀤𑀢𑁆𑀯𑀸𑀧𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑀁. 𑀅𑀣 𑀣𑀫𑁆𑀪𑀫𑀢𑁆𑀢𑀫𑁂𑀯𑁂𑀢𑁆𑀣 𑀅𑀯𑀲𑀺𑀝𑁆𑀞𑀁, 𑀩𑀳𑀼𑀓𑀫𑁆𑀫𑀁 𑀓𑀸𑀢𑀩𑁆𑀩𑀦𑁆𑀢𑀺 𑀦 𑀇𑀘𑁆𑀙𑀢𑀺, ‘𑀢𑀼𑀬𑁆𑀳𑀁 𑀧𑀼𑀕𑁆𑀕𑀮𑀺𑀓𑀫𑁂𑀯 𑀓𑀢𑁆𑀯𑀸 𑀚𑀕𑁆𑀕𑀸𑀳𑀻’𑀢𑀺 𑀤𑀸𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀳𑀺 ‘𑀲𑀗𑁆𑀖𑀲𑁆𑀲 𑀪𑀡𑁆𑀟𑀓𑀞𑀧𑀦𑀝𑁆𑀞𑀸𑀦𑀜𑁆𑀘 𑀦𑀯𑀓𑀸𑀦𑀜𑁆𑀘 𑀯𑀲𑀦𑀝𑁆𑀞𑀸𑀦𑀁 𑀮𑀪𑀺𑀲𑁆𑀲𑀢𑀻’𑀢𑀺 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀚𑀕𑁆𑀕𑀺𑀢𑁄 𑀧𑀦 𑀢𑀲𑁆𑀫𑀺𑀁 𑀚𑀻𑀯𑀦𑁆𑀢𑁂 𑀧𑀼𑀕𑁆𑀕𑀮𑀺𑀓𑁄 𑀳𑁄𑀢𑀺, 𑀫𑀢𑁂 𑀲𑀗𑁆𑀖𑀺𑀓𑁄𑀯. 𑀲𑀘𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀢𑀺𑀪𑀸𑀕𑀁 𑀯𑀸 𑀉𑀧𑀟𑁆𑀠𑀁 𑀯𑀸 𑀧𑀼𑀕𑁆𑀕𑀮𑀺𑀓𑀁 𑀓𑀢𑁆𑀯𑀸 𑀚𑀕𑁆𑀕𑀸𑀧𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀦𑀁 𑀤𑀸𑀢𑀼𑀁 𑀮𑀪𑀢𑀺. 𑀏𑀯𑀁 𑀚𑀕𑁆𑀕𑀦𑀓𑁂 𑀧𑀦 𑀅𑀲𑀢𑀺 𑀏𑀓𑀁 𑀆𑀯𑀸𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀚𑀕𑁆𑀕𑀸𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀘 𑀅𑀜𑁆𑀜𑀁 𑀢𑀢𑁆𑀣𑁂𑀯 𑀯𑀼𑀢𑁆𑀢𑀁.

𑀤𑁆𑀯𑁂 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀪𑀽𑀫𑀺𑀁 𑀕𑀳𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺, 𑀬𑁂𑀦 𑀲𑀸 𑀪𑀽𑀫𑀺 𑀧𑀞𑀫𑀁 𑀕𑀳𑀺𑀢𑀸, 𑀲𑁄 𑀲𑀸𑀫𑀻. 𑀉𑀪𑁄𑀧𑀺 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀦𑁆𑀢𑀺, 𑀲𑁄𑀬𑁂𑀯 𑀲𑀸𑀫𑀻. 𑀲𑁄 𑀲𑀗𑁆𑀖𑀺𑀓𑀁 𑀓𑀭𑁄𑀢𑀺, 𑀇𑀢𑀭𑁄 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀢𑀺, 𑀅𑀜𑁆𑀜𑀁 𑀘𑁂 𑀩𑀳𑀼 𑀲𑁂𑀦𑀸𑀲𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀧𑀼𑀕𑁆𑀕𑀮𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀦 𑀯𑀸𑀭𑁂𑀢𑀩𑁆𑀩𑁄. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀢𑀸𑀤𑀺𑀲𑁂 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀅𑀲𑀢𑀺 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀗𑁆𑀖𑀺𑀓𑀁 𑀓𑀭𑁄𑀦𑁆𑀢𑁂𑀦𑁂𑀯 𑀓𑀸𑀢𑀩𑁆𑀩𑀁. 𑀬𑀁 𑀧𑀦 𑀢𑀲𑁆𑀲 𑀢𑀢𑁆𑀣 𑀯𑀬𑀓𑀫𑁆𑀫𑀁 𑀓𑀢𑀁, 𑀢𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑀢𑀸𑀯𑀸𑀲𑁂 𑀯𑀸 𑀆𑀯𑀸𑀲𑀓𑀭𑀡𑀝𑁆𑀞𑀸𑀦𑁂 𑀯𑀸 𑀙𑀸𑀬𑀽𑀧𑀕𑀨𑀮𑀽𑀧𑀕𑀸 𑀭𑀼𑀓𑁆𑀔𑀸 𑀳𑁄𑀦𑁆𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀳𑀸𑀭𑁂𑀢𑀩𑁆𑀩𑀸. 𑀧𑀼𑀕𑁆𑀕𑀮𑀺𑀓𑀸 𑀘𑁂 𑀳𑁄𑀦𑁆𑀢𑀺, 𑀲𑀸𑀫𑀺𑀓𑀸 𑀆𑀧𑀼𑀘𑁆𑀙𑀺𑀢𑀩𑁆𑀩𑀸. 𑀦𑁄 𑀘𑁂 𑀤𑁂𑀦𑁆𑀢𑀺, 𑀬𑀸𑀯𑀢𑀢𑀺𑀬𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀼𑀓𑁆𑀔𑀅𑀕𑁆𑀖𑀦𑀓𑀫𑀽𑀮𑀁 𑀤𑀲𑁆𑀲𑀸𑀫𑀸’’𑀢𑀺 𑀳𑀸𑀭𑁂𑀢𑀩𑁆𑀩𑀸.

𑁨𑁨𑁪. 𑀬𑁄 𑀧𑀦 𑀲𑀗𑁆𑀖𑀺𑀓𑀁 𑀯𑀮𑁆𑀮𑀺𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀆𑀳𑀭𑀺𑀫𑁂𑀦 𑀉𑀧𑀓𑀭𑀡𑁂𑀦 𑀲𑀗𑁆𑀖𑀺𑀓𑀸𑀬 𑀪𑀽𑀫𑀺𑀬𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀁 𑀓𑀸𑀭𑁂𑀢𑀺, 𑀉𑀧𑀟𑁆𑀠𑀁 𑀲𑀗𑁆𑀖𑀺𑀓𑀁 𑀳𑁄𑀢𑀺, 𑀉𑀧𑀟𑁆𑀠𑀁 𑀧𑀼𑀕𑁆𑀕𑀮𑀺𑀓𑀁. 𑀧𑀸𑀲𑀸𑀤𑁄 𑀘𑁂 𑀳𑁄𑀢𑀺, 𑀳𑁂𑀝𑁆𑀞𑀸𑀧𑀸𑀲𑀸𑀤𑁄 𑀲𑀗𑁆𑀖𑀺𑀓𑁄, 𑀉𑀧𑀭𑀺 𑀧𑀼𑀕𑁆𑀕𑀮𑀺𑀓𑁄. 𑀲𑀘𑁂 𑀬𑁄 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀇𑀘𑁆𑀙𑀢𑀺, 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀢𑀲𑁆𑀲 𑀳𑁄𑀢𑀺. 𑀅𑀣 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀇𑀘𑁆𑀙𑀢𑀺, 𑀉𑀪𑀬𑀢𑁆𑀣 𑀉𑀧𑀟𑁆𑀠𑀁 𑀮𑀪𑀢𑀺. 𑀤𑁆𑀯𑁂 𑀲𑁂𑀦𑀸𑀲𑀦𑀸𑀦𑀺 𑀓𑀸𑀭𑁂𑀢𑀺, 𑀏𑀓𑀁 𑀲𑀗𑁆𑀖𑀺𑀓𑀁, 𑀏𑀓𑀁 𑀧𑀼𑀕𑁆𑀕𑀮𑀺𑀓𑀁. 𑀲𑀘𑁂 𑀯𑀺𑀳𑀸𑀭𑁂 𑀉𑀝𑁆𑀞𑀺𑀢𑁂𑀦 𑀤𑀩𑁆𑀩𑀲𑀫𑁆𑀪𑀸𑀭𑁂𑀦 𑀓𑀸𑀭𑁂𑀢𑀺, 𑀢𑀺𑀪𑀸𑀕𑀁 𑀮𑀪𑀢𑀺. 𑀲𑀘𑁂 𑀅𑀓𑀢𑀝𑁆𑀞𑀸𑀦𑁂 𑀘𑀬𑀁 𑀯𑀸 𑀧𑀫𑀼𑀔𑀁 𑀯𑀸 𑀓𑀭𑁄𑀢𑀺 𑀩𑀳𑀺𑀓𑀼𑀝𑁆𑀝𑁂, 𑀉𑀧𑀟𑁆𑀠𑀁 𑀲𑀗𑁆𑀖𑀲𑁆𑀲, 𑀉𑀧𑀟𑁆𑀠𑀁 𑀢𑀲𑁆𑀲. 𑀅𑀣 𑀫𑀳𑀦𑁆𑀢𑀁 𑀯𑀺𑀲𑀫𑀁 𑀧𑀽𑀭𑁂𑀢𑁆𑀯𑀸 𑀅𑀧𑀤𑁂 𑀧𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀦𑀺𑀲𑁆𑀲𑀭𑁄 𑀢𑀢𑁆𑀣 𑀲𑀗𑁆𑀖𑁄.

𑀲𑀘𑁂 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀯𑀺𑀳𑀸𑀭𑀢𑁄 𑀕𑁄𑀧𑀸𑀦𑀲𑀺𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀫𑀺𑀁 𑀲𑀗𑁆𑀖𑀺𑀓𑀸𑀯𑀸𑀲𑁂 𑀬𑁄𑀚𑁂𑀢𑀺, 𑀲𑀼𑀬𑁄𑀚𑀺𑀢𑀸𑀦𑀺. 𑀧𑀼𑀕𑁆𑀕𑀮𑀺𑀓𑀸𑀯𑀸𑀲𑁂 𑀬𑁄𑀚𑁂𑀦𑁆𑀢𑁂𑀳𑀺 𑀧𑀦 𑀫𑀽𑀮𑀁 𑀯𑀸 𑀤𑀸𑀢𑀩𑁆𑀩𑀁, 𑀧𑀝𑀺𑀧𑀸𑀓𑀢𑀺𑀓𑀁 𑀯𑀸 𑀓𑀸𑀢𑀩𑁆𑀩𑀁. 𑀙𑀟𑁆𑀟𑀺𑀢𑀯𑀺𑀳𑀸𑀭𑀢𑁄 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀉𑀤𑁆𑀥𑀸𑀭𑁂𑀬𑁂𑀯 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. ‘‘𑀧𑀼𑀦 𑀆𑀯𑀸𑀲𑀺𑀓𑀓𑀸𑀮𑁂 𑀤𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀲𑀼𑀦𑀝𑁆𑀞𑀁, 𑀚𑀺𑀡𑁆𑀡𑀁 𑀲𑀼𑀚𑀺𑀡𑁆𑀡𑀁. 𑀅𑀭𑁄𑀕𑀁 𑀘𑁂, 𑀧𑀸𑀓𑀢𑀺𑀓𑀁 𑀓𑀸𑀢𑀩𑁆𑀩𑀁, 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀯𑀸 𑀚𑀺𑀡𑁆𑀡𑀁 𑀯𑀸 𑀕𑀻𑀯𑀸 𑀳𑁄𑀢𑀺. 𑀢𑀢𑁄 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀻𑀦𑀺 𑀲𑀗𑁆𑀖𑀺𑀓𑀸𑀯𑀸𑀲𑁂 𑀯𑀸 𑀧𑀼𑀕𑁆𑀕𑀮𑀺𑀓𑀸𑀯𑀸𑀲𑁂 𑀯𑀸 𑀬𑁄𑀚𑀺𑀢𑀸𑀦𑀺, 𑀧𑀝𑀺𑀤𑀸𑀢𑀩𑁆𑀩𑀸𑀦𑀺𑀬𑁂𑀯. 𑀲𑀘𑁂 𑀓𑁄𑀘𑀺 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄 𑀉𑀦𑁆𑀤𑁆𑀭𑀺𑀬𑀢𑀺, 𑀬𑀁 𑀢𑀢𑁆𑀣 𑀫𑀜𑁆𑀘𑀧𑀻𑀞𑀸𑀤𑀺𑀓𑀁, 𑀢𑀁 𑀕𑀼𑀢𑁆𑀢𑀢𑁆𑀣𑀸𑀬 𑀅𑀜𑁆𑀜𑀢𑁆𑀭 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀢𑁆𑀭 𑀳𑀭𑀺𑀢𑁆𑀯𑀸 𑀲𑀗𑁆𑀖𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀦𑀝𑁆𑀞𑀁 𑀲𑀼𑀦𑀝𑁆𑀞𑀁, 𑀚𑀺𑀡𑁆𑀡𑀁 𑀲𑀼𑀚𑀺𑀡𑁆𑀡𑀁. 𑀲𑀘𑁂 𑀅𑀭𑁄𑀕𑀁, 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀝𑀺𑀲𑀗𑁆𑀔𑀢𑁂 𑀧𑀼𑀦 𑀧𑀸𑀓𑀢𑀺𑀓𑀁 𑀓𑀸𑀢𑀩𑁆𑀩𑀁. 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀢𑁄 𑀦𑀝𑁆𑀞𑀁 𑀯𑀸 𑀚𑀺𑀡𑁆𑀡𑀁 𑀯𑀸 𑀕𑀻𑀯𑀸 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀲𑀗𑁆𑀔𑀢𑁂 𑀤𑀸𑀢𑀩𑁆𑀩𑀫𑁂𑀯. 𑀅𑀬𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸.

𑁨𑁨𑁫. 𑀅𑀬𑀁 𑀧𑀦𑁂𑀢𑁆𑀣 𑀘𑀢𑀼𑀧𑀘𑁆𑀘𑀬𑀲𑀸𑀥𑀸𑀭𑀡𑀓𑀣𑀸 (𑀘𑀽𑀴𑀯. 𑀅𑀝𑁆𑀞. 𑁩𑁨𑁫 𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀺𑀓𑀣𑀸) 𑁋 𑀲𑀫𑁆𑀫𑀢𑁂𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁂𑀦 𑀪𑀺𑀓𑁆𑀔𑀼𑀦𑀸 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 ‘‘𑀲𑀽𑀘𑀺𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀏𑀓𑀸 𑀤𑀻𑀖𑀸, 𑀏𑀓𑀸 𑀭𑀲𑁆𑀲𑀸𑀢𑀺 𑀤𑁆𑀯𑁂 𑀲𑀽𑀘𑀺𑀬𑁄 𑀤𑀸𑀢𑀩𑁆𑀩𑀸. ‘‘𑀅𑀯𑀺𑀪𑀢𑁆𑀢𑀁 𑀲𑀗𑁆𑀖𑀺𑀓𑀪𑀡𑁆𑀟’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀺𑀧𑁆𑀨𑀮𑀢𑁆𑀣𑀺𑀓𑀲𑁆𑀲 𑀏𑀓𑁄 𑀧𑀺𑀧𑁆𑀨𑀮𑀓𑁄, 𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑀲𑁆𑀲 𑀉𑀧𑀸𑀳𑀦𑀬𑀼𑀕𑀴𑀁, 𑀓𑀸𑀬𑀩𑀦𑁆𑀥𑀦𑀢𑁆𑀣𑀺𑀓𑀲𑁆𑀲 𑀓𑀸𑀬𑀩𑀦𑁆𑀥𑀦𑀁, ‘‘𑀅𑀁𑀲𑀩𑀤𑁆𑀥𑀓𑁄 𑀫𑁂 𑀚𑀺𑀡𑁆𑀡𑁄’’𑀢𑀺 𑀆𑀕𑀢𑀲𑁆𑀲 𑀅𑀁𑀲𑀩𑀤𑁆𑀥𑀓𑁄, 𑀧𑀭𑀺𑀲𑁆𑀲𑀸𑀯𑀦𑀢𑁆𑀣𑀺𑀓𑀲𑁆𑀲 𑀧𑀭𑀺𑀲𑁆𑀲𑀸𑀯𑀦𑀁 𑀤𑀸𑀢𑀩𑁆𑀩𑀁, 𑀥𑀫𑁆𑀫𑀓𑀭𑀡𑀢𑁆𑀣𑀺𑀓𑀲𑁆𑀲 𑀥𑀫𑁆𑀫𑀓𑀭𑀡𑁄. 𑀲𑀘𑁂 𑀧𑀝𑁆𑀝𑀓𑁄 𑀦 𑀳𑁄𑀢𑀺, 𑀥𑀫𑁆𑀫𑀓𑀭𑀡𑁄 𑀧𑀝𑁆𑀝𑀓𑁂𑀦 𑀲𑀤𑁆𑀥𑀺𑀁 𑀤𑀸𑀢𑀩𑁆𑀩𑁄. ‘‘𑀆𑀕𑀦𑁆𑀢𑀼𑀓𑀧𑀢𑁆𑀢𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀘𑀦𑁆𑀢𑀲𑁆𑀲 𑀓𑀼𑀲𑀺𑀬𑀸 𑀘 𑀅𑀟𑁆𑀠𑀓𑀼𑀲𑀺𑀬𑀸 𑀘 𑀧𑀳𑁄𑀦𑀓𑀁 𑀤𑀸𑀢𑀩𑁆𑀩𑀁. ‘‘𑀫𑀡𑁆𑀟𑀮𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀆𑀕𑀢𑀲𑁆𑀲 𑀫𑀡𑁆𑀟𑀮𑀁 𑀏𑀓𑀁 𑀤𑀸𑀢𑀩𑁆𑀩𑀁, 𑀅𑀟𑁆𑀠𑀫𑀡𑁆𑀟𑀮𑀸𑀦𑀺 𑀤𑁆𑀯𑁂 𑀤𑀸𑀢𑀩𑁆𑀩𑀸𑀦𑀺, 𑀤𑁆𑀯𑁂 𑀫𑀡𑁆𑀟𑀮𑀸𑀦𑀺 𑀬𑀸𑀘𑀦𑁆𑀢𑀲𑁆𑀲 𑀦 𑀤𑀸𑀢𑀩𑁆𑀩𑀸𑀦𑀺. 𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀢𑁆𑀣𑀺𑀓𑀲𑁆𑀲 𑀏𑀓𑀲𑁆𑀲 𑀘𑀻𑀯𑀭𑀲𑁆𑀲 𑀧𑀳𑁄𑀦𑀓𑀁 𑀤𑀸𑀢𑀩𑁆𑀩𑀁, 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺𑀅𑀢𑁆𑀣𑀺𑀓𑀲𑁆𑀲 𑀕𑀺𑀮𑀸𑀦𑀲𑁆𑀲 𑀏𑀓𑀁 𑀪𑁂𑀲𑀚𑁆𑀚𑀁 𑀦𑀸𑀴𑀺𑀫𑀢𑁆𑀢𑀁 𑀓𑀢𑁆𑀯𑀸 𑀢𑀢𑁄 𑀢𑀢𑀺𑀬𑀓𑁄𑀝𑁆𑀞𑀸𑀲𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀤𑀢𑁆𑀯𑀸 𑀦𑀸𑀴𑀺𑀬𑀸 𑀧𑀭𑀺𑀧𑀼𑀡𑁆𑀡𑀸𑀬 𑀘𑀢𑀼𑀢𑁆𑀣𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀕𑀼𑀴𑀧𑀺𑀡𑁆𑀟𑁂𑀧𑀺 𑀏𑀓𑀤𑀺𑀯𑀲𑀁 𑀢𑀢𑀺𑀬𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀏𑀯𑀁 𑀢𑀻𑀳𑀺 𑀤𑀺𑀯𑀲𑁂𑀳𑀺 𑀦𑀺𑀝𑁆𑀞𑀺𑀢𑁂 𑀧𑀺𑀡𑁆𑀟𑁂 𑀢𑀢𑁄 𑀧𑀭𑀁 𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑀺𑀢𑀬𑀸𑀕𑀼𑀪𑀸𑀚𑀓𑀸𑀤𑀻𑀳𑀺 𑀘 𑀪𑀸𑀚𑀦𑀻𑀬𑀝𑁆𑀞𑀸𑀦𑀁 𑀆𑀕𑀢𑀫𑀦𑀼𑀲𑁆𑀲𑀸𑀦𑀁 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀉𑀧𑀟𑁆𑀠𑀪𑀸𑀕𑁄 𑀤𑀸𑀢𑀩𑁆𑀩𑁄. 𑀅𑀲𑀫𑁆𑀫𑀢𑁂𑀳𑀺 𑀧𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩𑁄𑀢𑀺.

𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁 𑀲𑀫𑁆𑀫𑀢𑁂𑀦 𑀯𑀸 𑀆𑀡𑀢𑁆𑀢𑁂𑀳𑀺 𑀯𑀸 𑀆𑀭𑀸𑀫𑀺𑀓𑀸𑀤𑀻𑀳𑀺 𑀤𑀻𑀬𑀫𑀸𑀦𑀁, 𑀕𑀺𑀳𑀻𑀦𑀜𑁆𑀘 𑀲𑀦𑁆𑀢𑀓𑀁 𑀲𑀸𑀫𑀺𑀓𑁂𑀦 𑀯𑀸 𑀆𑀡𑀢𑁆𑀢𑁂𑀦 𑀯𑀸 𑀤𑀻𑀬𑀫𑀸𑀦𑀁 ‘‘𑀅𑀧𑀭𑀲𑁆𑀲 𑀪𑀸𑀕𑀁 𑀤𑁂𑀳𑀻’’𑀢𑀺 𑀅𑀲𑀦𑁆𑀢𑀁 𑀧𑀼𑀕𑁆𑀕𑀮𑀁 𑀯𑀢𑁆𑀯𑀸 𑀕𑀡𑁆𑀳𑀢𑁄 𑀪𑀡𑁆𑀟𑀸𑀤𑁂𑀬𑁆𑀬𑀁. 𑀅𑀜𑁆𑀜𑁂𑀦 𑀤𑀻𑀬𑀫𑀸𑀦𑀁 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀲𑀫𑁆𑀫𑀢𑁂𑀦 𑀯𑀸 𑀅𑀦𑀸𑀡𑀢𑁆𑀢𑁂𑀦 𑀯𑀸 𑀤𑀻𑀬𑀫𑀸𑀦𑁂 ‘‘𑀅𑀧𑀭𑀫𑁆𑀧𑀺 𑀪𑀸𑀕𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀯𑀸 𑀓𑀽𑀝𑀯𑀲𑁆𑀲𑀸𑀦𑀺 𑀕𑀡𑁂𑀢𑁆𑀯𑀸 𑀯𑀸 𑀕𑀡𑁆𑀳𑀦𑁆𑀢𑁄 𑀉𑀤𑁆𑀥𑀸𑀭𑁂𑀬𑁂𑀯 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀇𑀢𑀭𑁂𑀳𑀺 𑀤𑀻𑀬𑀫𑀸𑀦𑀁 𑀏𑀯𑀁 𑀕𑀡𑁆𑀳𑀢𑁄 𑀪𑀡𑁆𑀟𑀸𑀤𑁂𑀬𑁆𑀬𑀁 𑀲𑀸𑀫𑀺𑀓𑁂𑀦 𑀧𑀦 ‘‘𑀇𑀫𑀲𑁆𑀲 𑀤𑁂𑀳𑀻’’𑀢𑀺 𑀤𑀸𑀧𑀺𑀢𑀁 𑀯𑀸 𑀲𑀬𑀁 𑀤𑀺𑀦𑁆𑀦𑀁 𑀯𑀸 𑀲𑀼𑀤𑀺𑀦𑁆𑀦𑀦𑁆𑀢𑀺 𑀅𑀬𑀁 𑀲𑀩𑁆𑀩𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑀢𑁄 𑀲𑀸𑀭𑁄.

𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀲𑁆𑀲𑀧𑀺 𑀑𑀤𑀦𑀧𑀝𑀺𑀯𑀻𑀲𑁄 𑀅𑀦𑁆𑀢𑁄𑀉𑀧𑀘𑀸𑀭𑀲𑀻𑀫𑀸𑀬𑀁 𑀞𑀺𑀢𑀲𑁆𑀲𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀬𑀤𑀺 𑀧𑀦 𑀤𑀸𑀬𑀓𑀸 ‘‘𑀩𑀳𑀺𑀉𑀧𑀘𑀸𑀭𑀲𑀻𑀫𑀝𑁆𑀞𑀸𑀦𑀫𑁆𑀧𑀺, 𑀪𑀦𑁆𑀢𑁂, 𑀕𑀡𑁆𑀳𑀣, 𑀆𑀕𑀦𑁆𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀅𑀦𑁆𑀢𑁄𑀕𑀸𑀫𑀝𑁆𑀞𑀸𑀦𑀫𑁆𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺.

𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀑𑀮𑁄𑀓𑁂𑀢𑁆𑀯𑀸 𑀯𑀺𑀘𑀓𑁆𑀔𑀡𑁄;

𑀲𑀗𑁆𑀖𑀺𑀓𑁂 𑀧𑀘𑁆𑀘𑀬𑁂 𑀏𑀯𑀁, 𑀅𑀧𑁆𑀧𑀫𑀢𑁆𑀢𑁄𑀯 𑀪𑀸𑀚𑀬𑁂𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂 𑀲𑀩𑁆𑀩𑀸𑀓𑀸𑀭𑀢𑁄

𑀘𑀢𑀼𑀧𑀘𑁆𑀘𑀬𑀪𑀸𑀚𑀦𑀻𑀬𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.