𑁨𑁬. 𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸

𑁧𑁭𑁯. 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀏𑀢𑁆𑀣 𑀧𑀼𑀭𑀺𑀫𑀺𑀓𑀸 𑀧𑀘𑁆𑀙𑀺𑀫𑀺𑀓𑀸𑀢𑀺 𑀤𑀼𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸. 𑀢𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁮𑁪 𑀆𑀤𑀬𑁄) 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀧𑀼𑀭𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸, 𑀧𑀘𑁆𑀙𑀺𑀫𑀺𑀓𑀸 𑀧𑀦 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀢𑁄 𑀅𑀧𑀭𑀸𑀬 𑀧𑀼𑀡𑁆𑀡𑀫𑀸𑀬 𑀅𑀦𑀦𑁆𑀢𑀭𑁂 𑀧𑀸𑀝𑀺𑀧𑀤𑀤𑀺𑀯𑀲𑁂. 𑀉𑀧𑀕𑀘𑁆𑀙𑀦𑁆𑀢𑁂𑀦 𑀘 𑀯𑀺𑀳𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀇𑀫𑀁 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀲𑀓𑀺𑀁 𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀲𑀘𑁂𑀧𑀺 ‘‘𑀇𑀥 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀮𑀬𑁄 𑀅𑀢𑁆𑀣𑀺, 𑀅𑀲𑀢𑀺𑀬𑀸 𑀧𑀦 𑀯𑀲𑁆𑀲𑀁 𑀦 𑀉𑀧𑁂𑀢𑀺, 𑀕𑀳𑀺𑀢𑀲𑁂𑀦𑀸𑀲𑀦𑀁 𑀲𑀼𑀕𑁆𑀕𑀳𑀺𑀢𑀁, 𑀙𑀺𑀦𑁆𑀦𑀯𑀲𑁆𑀲𑁄 𑀦 𑀳𑁄𑀢𑀺, 𑀧𑀯𑀸𑀭𑁂𑀢𑀼𑀁 𑀮𑀪𑀢𑀺𑀬𑁂𑀯. 𑀯𑀺𑀦𑀸𑀧𑀺 𑀳𑀺 𑀯𑀘𑀻𑀪𑁂𑀤𑀁 𑀆𑀮𑀬𑀓𑀭𑀡𑀫𑀢𑁆𑀢𑁂𑀦𑀧𑀺 𑀯𑀲𑁆𑀲𑀁 𑀉𑀧𑀕𑀢𑀫𑁂𑀯 𑀳𑁄𑀢𑀺. ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀬𑁂𑀯𑁂𑀢𑁆𑀣 𑀆𑀮𑀬𑁄 𑀦𑀸𑀫.

‘‘𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑁂𑀦 𑀲𑀜𑁆𑀘𑀺𑀘𑁆𑀘 𑀆𑀯𑀸𑀲𑁄 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄, 𑀬𑁄 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁮𑁬) 𑀯𑀘𑀦𑀢𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀯𑀲𑁆𑀲𑀁 𑀅𑀦𑀼𑀧𑀕𑀦𑁆𑀢𑀼𑀓𑀸𑀫𑁄 𑀯𑀺𑀳𑀸𑀭𑀲𑀻𑀫𑀁 𑀅𑀢𑀺𑀓𑁆𑀓𑀫𑀢𑀺, 𑀯𑀺𑀳𑀸𑀭𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀲𑀘𑁂 𑀳𑀺 𑀢𑀁 𑀤𑀺𑀯𑀲𑀁 𑀯𑀺𑀳𑀸𑀭𑀲𑀢𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀢𑀺, 𑀲𑀢𑀁 𑀆𑀧𑀢𑁆𑀢𑀺𑀬𑁄. 𑀲𑀘𑁂 𑀧𑀦 𑀯𑀺𑀳𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀯𑀺𑀳𑀸𑀭𑀲𑁆𑀲 𑀉𑀧𑀘𑀸𑀭𑀁 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀯 𑀦𑀺𑀯𑀢𑁆𑀢𑀢𑀺, 𑀏𑀓𑀸𑀯 𑀆𑀧𑀢𑁆𑀢𑀺. 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁂𑀦 𑀧𑀼𑀭𑀺𑀫𑀺𑀓𑀁 𑀅𑀦𑀼𑀧𑀕𑀢𑁂𑀦 𑀧𑀘𑁆𑀙𑀺𑀫𑀺𑀓𑀸 𑀉𑀧𑀕𑀦𑁆𑀢𑀩𑁆𑀩𑀸.

‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁, 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁪) 𑀯𑀘𑀦𑀢𑁄 𑀬𑀲𑁆𑀲 𑀧𑀜𑁆𑀘𑀦𑁆𑀦𑀁 𑀙𑀤𑀦𑀸𑀦𑀁 𑀅𑀜𑁆𑀜𑀢𑀭𑁂𑀦 𑀙𑀦𑁆𑀦𑀁 𑀬𑁄𑀚𑀺𑀢𑀤𑁆𑀯𑀸𑀭𑀩𑀦𑁆𑀥𑀦𑀁 𑀲𑁂𑀦𑀸𑀲𑀦𑀁 𑀦𑀢𑁆𑀣𑀺, 𑀢𑁂𑀦 𑀦 𑀉𑀧𑀕𑀦𑁆𑀢𑀩𑁆𑀩𑀁. ‘‘𑀦, 𑀪𑀺𑀓𑁆𑀔𑀯𑁂, 𑀙𑀯𑀓𑀼𑀝𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁, 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺(𑀫𑀳𑀸𑀯. 𑁨𑁦𑁪) 𑀆𑀤𑀺𑀯𑀘𑀦𑀢𑁄 𑀙𑀯𑀓𑀼𑀝𑀺𑀓𑀸𑀬𑀁 𑀙𑀢𑁆𑀢𑁂 𑀘𑀸𑀝𑀺𑀬𑀜𑁆𑀘 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀙𑀯𑀓𑀼𑀝𑀺𑀓𑀸 𑀦𑀸𑀫 𑀝𑀗𑁆𑀓𑀺𑀢𑀫𑀜𑁆𑀘𑀸𑀤𑀺𑀪𑁂𑀤𑀸 𑀓𑀼𑀝𑀺. 𑀢𑀢𑁆𑀣𑁂𑀯 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀼𑀲𑀸𑀦𑁂 𑀧𑀦 𑀅𑀜𑁆𑀜𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀙𑀢𑁆𑀢𑁂𑀧𑀺 𑀘𑀢𑀽𑀲𑀼 𑀣𑀫𑁆𑀪𑁂𑀲𑀼 𑀙𑀢𑁆𑀢𑀁 𑀞𑀧𑁂𑀢𑁆𑀯𑀸 𑀆𑀯𑀭𑀡𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀙𑀢𑁆𑀢𑀓𑀼𑀝𑀺 𑀦𑀸𑀫𑁂𑀲𑀸 𑀳𑁄𑀢𑀺. 𑀘𑀸𑀝𑀺𑀬𑀸𑀧𑀺 𑀫𑀳𑀦𑁆𑀢𑁂𑀦 𑀓𑀧𑀮𑁆𑀮𑁂𑀦 𑀙𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀲𑀼𑀲𑀺𑀭𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩𑀁, 𑀬𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁨𑁦𑁪) 𑀯𑀘𑀦𑀢𑁄 𑀲𑀼𑀤𑁆𑀥𑁂 𑀭𑀼𑀓𑁆𑀔𑀲𑀼𑀲𑀺𑀭𑁂 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀫𑀳𑀦𑁆𑀢𑀲𑁆𑀲 𑀧𑀦 𑀭𑀼𑀓𑁆𑀔𑀲𑀼𑀲𑀺𑀭𑀲𑁆𑀲 𑀅𑀦𑁆𑀢𑁄 𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀧𑀯𑀺𑀲𑀦𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀡𑀼𑀓𑀫𑀢𑁆𑀣𑀓𑁂 𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. ‘‘𑀦, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀯𑀺𑀝𑀪𑀺𑀬𑀸’’𑀢𑀺(𑀫𑀳𑀸𑀯. 𑁨𑁦𑁪) 𑀆𑀤𑀺𑀯𑀘𑀦𑀢𑁄 𑀲𑀼𑀤𑁆𑀥𑁂 𑀯𑀺𑀝𑀪𑀺𑀫𑀢𑁆𑀢𑁂 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀫𑀳𑀸𑀯𑀺𑀝𑀧𑁂 𑀧𑀦 𑀅𑀝𑁆𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀢𑀢𑁆𑀣 𑀧𑀤𑀭𑀘𑁆𑀙𑀤𑀦𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀉𑀧𑀕𑀦𑁆𑀢𑀩𑁆𑀩𑀁.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀚𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀯𑀚𑁂 𑀲𑀢𑁆𑀣𑁂 𑀦𑀸𑀯𑀸𑀬𑀜𑁆𑀘 𑀉𑀧𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀣 𑀯𑀚𑁄𑀢𑀺 𑀕𑁄𑀧𑀸𑀮𑀓𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀁. 𑀯𑀚𑁂 𑀯𑀼𑀝𑁆𑀞𑀺𑀢𑁂 𑀯𑀚𑁂𑀦 𑀲𑀤𑁆𑀥𑀺𑀁 𑀕𑀢𑀲𑁆𑀲 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀯𑀚𑁄, 𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁨𑁦𑁩) 𑀯𑀼𑀢𑁆𑀢𑀢𑁆𑀢𑀸. 𑀲𑀢𑁆𑀣𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦 𑀧𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀉𑀧𑀸𑀲𑀓𑀸 𑀯𑀢𑁆𑀢𑀩𑁆𑀩𑀸 ‘‘𑀓𑀼𑀝𑀺𑀓𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑀘𑁂 𑀓𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 ‘‘𑀇𑀥 𑀯𑀲𑁆𑀲𑀁 𑀉𑀧𑁂𑀫𑀻’’𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀢𑀩𑁆𑀩𑀁. 𑀦𑁄 𑀘𑁂 𑀤𑁂𑀦𑁆𑀢𑀺, 𑀲𑀸𑀮𑀸𑀲𑀗𑁆𑀔𑁂𑀧𑁂𑀦 𑀞𑀺𑀢𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀉𑀧𑀕𑀦𑁆𑀢𑀩𑁆𑀩𑀁. 𑀢𑀫𑁆𑀧𑀺 𑀅𑀮𑀪𑀦𑁆𑀢𑁂𑀦 𑀆𑀮𑀬𑁄 𑀓𑀸𑀢𑀩𑁆𑀩𑁄, 𑀲𑀢𑁆𑀣𑁂 𑀧𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀆𑀮𑀬𑁄 𑀦𑀸𑀫 ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀁. 𑀲𑀘𑁂 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁂𑀬𑁂𑀯 𑀲𑀢𑁆𑀣𑁂 𑀧𑀯𑀸𑀭𑀡𑀸𑀤𑀺𑀯𑀲𑁄 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀯𑀸𑀭𑁂𑀢𑀩𑁆𑀩𑀁. 𑀅𑀣 𑀲𑀢𑁆𑀣𑁄 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀪𑀺𑀓𑁆𑀔𑀼𑀦𑀸 𑀧𑀢𑁆𑀣𑀺𑀢𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀢𑀺𑀓𑁆𑀓𑀫𑀢𑀺, 𑀧𑀢𑁆𑀣𑀺𑀢𑀝𑁆𑀞𑀸𑀦𑁂 𑀯𑀲𑀺𑀢𑁆𑀯𑀸 𑀢𑀢𑁆𑀣 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀅𑀣𑀸𑀧𑀺 𑀲𑀢𑁆𑀣𑁄 𑀅𑀦𑁆𑀢𑁄𑀯𑀲𑁆𑀲𑁂𑀬𑁂𑀯 𑀅𑀦𑁆𑀢𑀭𑀸 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀢𑀺𑀝𑁆𑀞𑀢𑀺 𑀯𑀸 𑀯𑀺𑀧𑁆𑀧𑀓𑀺𑀭𑀢𑀺 𑀯𑀸, 𑀢𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀺𑀢𑁆𑀯𑀸 𑀧𑀯𑀸𑀭𑁂𑀢𑀩𑁆𑀩𑀁, 𑀅𑀧𑁆𑀧𑀯𑀸𑀭𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀦𑀸𑀯𑀸𑀬 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑁂𑀦𑀧𑀺 𑀓𑀼𑀝𑀺𑀬𑀁𑀬𑁂𑀯 𑀉𑀧𑀕𑀦𑁆𑀢𑀩𑁆𑀩𑀁, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑁂𑀦 𑀆𑀮𑀬𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀅𑀦𑁆𑀢𑁄𑀢𑁂𑀫𑀸𑀲𑀁 𑀦𑀸𑀯𑀸 𑀲𑀫𑀼𑀤𑁆𑀤𑁂𑀬𑁂𑀯 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀯𑀸𑀭𑁂𑀢𑀩𑁆𑀩𑀁. 𑀅𑀣 𑀦𑀸𑀯𑀸 𑀓𑀽𑀮𑀁 𑀮𑀪𑀢𑀺, 𑀅𑀬𑀜𑁆𑀘 𑀧𑀭𑀢𑁄 𑀕𑀦𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀦𑀸𑀯𑀸𑀬 𑀮𑀤𑁆𑀥𑀕𑀸𑀫𑁂𑀬𑁂𑀯 𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀲𑀘𑁂𑀧𑀺 𑀦𑀸𑀯𑀸 𑀅𑀦𑀼𑀢𑀻𑀭𑀫𑁂𑀯 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼 𑀘 𑀧𑀞𑀫𑀁 𑀮𑀤𑁆𑀥𑀕𑀸𑀫𑁂𑀬𑁂𑀯 𑀯𑀲𑀺𑀢𑀼𑀓𑀸𑀫𑁄, 𑀦𑀸𑀯𑀸 𑀕𑀘𑁆𑀙𑀢𑀼, 𑀪𑀺𑀓𑁆𑀔𑀼𑀦𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀯𑀸𑀭𑁂𑀢𑀩𑁆𑀩𑀁. 𑀇𑀢𑀺 𑀯𑀚𑁂 𑀲𑀢𑁆𑀣𑁂 𑀦𑀸𑀯𑀸𑀬𑀦𑁆𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀺, 𑀧𑀯𑀸𑀭𑁂𑀢𑀼𑀜𑁆𑀘 𑀮𑀪𑀢𑀺.

‘‘𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀧𑀘𑁆𑀙𑀺𑀫𑀁 𑀯𑀸 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀧𑀓𑁆𑀓𑀫𑀺𑀢𑀩𑁆𑀩𑀸, 𑀬𑁄 𑀧𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁮𑁬) 𑀯𑀘𑀦𑀢𑁄 𑀧𑀼𑀭𑀺𑀫𑀺𑀓𑀸𑀬 𑀯𑀲𑁆𑀲𑀁 𑀉𑀧𑀕𑀢𑁂𑀦 𑀧𑀼𑀭𑀺𑀫𑀁 𑀢𑁂𑀫𑀸𑀲𑀁, 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑁂𑀦 𑀧𑀘𑁆𑀙𑀺𑀫𑀁 𑀢𑁂𑀫𑀸𑀲𑀁 𑀅𑀯𑀲𑀺𑀢𑁆𑀯𑀸 𑀘𑀸𑀭𑀺𑀓𑀸 𑀦 𑀧𑀓𑁆𑀓𑀫𑀺𑀢𑀩𑁆𑀩𑀸, 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 𑀧𑀦 𑀅𑀭𑀼𑀡𑀁 𑀅𑀦𑀼𑀝𑁆𑀞𑀸𑀧𑁂𑀢𑁆𑀯𑀸𑀧𑀺 𑀢𑀤𑀳𑁂𑀯 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀦𑁆𑀢𑀲𑁆𑀲𑀧𑀺 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀓𑁄 𑀧𑀦 𑀯𑀸𑀤𑁄 𑀤𑁆𑀯𑀻𑀳𑀢𑀻𑀳𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀦𑁆𑀢𑀲𑁆𑀲 𑀅𑀦𑁆𑀢𑁄𑀲𑀢𑁆𑀢𑀸𑀳𑁂 𑀦𑀺𑀯𑀢𑁆𑀢𑀦𑁆𑀢𑀲𑁆𑀲.

𑁧𑁮𑁦. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀧𑀳𑀺𑀢𑁂 𑀕𑀦𑁆𑀢𑀼𑀁, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀉𑀧𑀸𑀲𑀓𑀲𑁆𑀲 𑀉𑀧𑀸𑀲𑀺𑀓𑀸𑀬𑀸’’𑀢𑀺 (𑀫𑀳𑀸𑀯. 𑁧𑁮𑁭) 𑀯𑀘𑀦𑀢𑁄 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂 𑀉𑀤𑁆𑀤𑀺𑀲𑁆𑀲 𑀅𑀢𑁆𑀢𑀦𑁄 𑀯𑀸 𑀅𑀢𑁆𑀣𑀸𑀬 𑀯𑀺𑀳𑀸𑀭𑀁 𑀅𑀟𑁆𑀠𑀬𑁄𑀕𑀁 𑀧𑀸𑀲𑀸𑀤𑀁 𑀳𑀫𑁆𑀫𑀺𑀬𑀁 𑀕𑀼𑀳𑀁 𑀧𑀭𑀺𑀯𑁂𑀡𑀁 𑀓𑁄𑀝𑁆𑀞𑀓𑀁 𑀉𑀧𑀝𑁆𑀞𑀸𑀦𑀲𑀸𑀮𑀁 𑀅𑀕𑁆𑀕𑀺𑀲𑀸𑀮𑀁 𑀓𑀧𑁆𑀧𑀺𑀬𑀓𑀼𑀝𑀺𑀁 𑀯𑀘𑁆𑀘𑀓𑀼𑀝𑀺𑀁 𑀘𑀗𑁆𑀓𑀫𑀁 𑀘𑀗𑁆𑀓𑀫𑀦𑀲𑀸𑀮𑀁 𑀉𑀤𑀧𑀸𑀦𑀁 𑀉𑀤𑀧𑀸𑀦𑀲𑀸𑀮𑀁 𑀚𑀦𑁆𑀢𑀸𑀖𑀭𑀁 𑀚𑀦𑁆𑀢𑀸𑀖𑀭𑀲𑀸𑀮𑀁 𑀧𑁄𑀓𑁆𑀔𑀭𑀡𑀺𑀁 𑀫𑀡𑁆𑀟𑀧𑀁 𑀆𑀭𑀸𑀫𑀁 𑀆𑀭𑀸𑀫𑀯𑀢𑁆𑀣𑀼𑀁 𑀯𑀸 𑀓𑀸𑀭𑁂𑀢𑁆𑀯𑀸 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀏𑀯𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀧𑁂𑀲𑀺𑀢𑁂 𑀕𑀦𑁆𑀢𑀩𑁆𑀩𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀢𑀣𑁂𑀯 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑁂 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸 𑀅𑀢𑁆𑀣𑀸𑀬 𑀦𑀺𑀯𑁂𑀲𑀦𑀲𑀬𑀦𑀺𑀖𑀭𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀘𑁆𑀘𑀓𑀭𑀡𑀻𑀬𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀕𑀺𑀮𑀸𑀦𑁄 𑀯𑀸 𑀳𑀼𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 ‘‘𑀆𑀕𑀘𑁆𑀙𑀦𑁆𑀢𑀼 𑀪𑀤𑀦𑁆𑀢𑀸, 𑀇𑀘𑁆𑀙𑀸𑀫𑀺 𑀤𑀸𑀦𑀜𑁆𑀘 𑀤𑀸𑀢𑀼𑀁 𑀥𑀫𑁆𑀫𑀜𑁆𑀘 𑀲𑁄𑀢𑀼𑀁 𑀪𑀺𑀓𑁆𑀔𑀽 𑀘 𑀧𑀲𑁆𑀲𑀺𑀢𑀼’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂.

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀧𑀳𑀺𑀢𑁂. 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀫𑀸𑀢𑀼𑀬𑀸 𑀘 𑀧𑀺𑀢𑀼𑀲𑁆𑀲 𑀘𑀸’’𑀢𑀺 (𑀫𑀳𑀸𑀯. 𑁧𑁯𑁮) 𑀯𑀘𑀦𑀢𑁄 ‘‘𑀕𑀺𑀮𑀸𑀦𑀸𑀦𑀁 𑀏𑀢𑁂𑀲𑀁 𑀪𑀺𑀓𑁆𑀔𑀼𑀆𑀤𑀻𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀜𑁆𑀘 𑀕𑀺𑀮𑀸𑀦𑀸𑀦𑀁𑀬𑁂𑀯 𑀕𑀺𑀮𑀸𑀦𑀪𑀢𑁆𑀢𑀁 𑀯𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀪𑀢𑁆𑀢𑀁 𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁, 𑀧𑀕𑁂𑀯 𑀧𑀳𑀺𑀢𑁂. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁂 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀓𑀸 𑀜𑀸𑀢𑀓𑀸 𑀯𑀸 𑀅𑀜𑁆𑀜𑀸𑀢𑀓𑀸 𑀯𑀸, 𑀢𑁂𑀲𑀫𑁆𑀧𑀺 𑀅𑀧𑁆𑀧𑀳𑀺𑀢𑁂 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑁂𑀯 𑀅𑀝𑁆𑀞𑀓𑀣𑀸𑀬𑀁, 𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁.

𑀲𑀘𑁂 𑀧𑀦 𑀪𑀺𑀓𑁆𑀔𑀼𑀦𑁄 𑀪𑀸𑀢𑀸 𑀯𑀸 𑀅𑀜𑁆𑀜𑁄 𑀯𑀸 𑀜𑀸𑀢𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀲𑁄 𑀘𑁂 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 ‘‘𑀅𑀳𑀁 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀢𑀼 𑀪𑀤𑀦𑁆𑀢𑁄, 𑀇𑀘𑁆𑀙𑀸𑀫𑀺 𑀪𑀤𑀦𑁆𑀢𑀲𑁆𑀲 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂. 𑀲𑀘𑁂 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀲𑀦𑁆𑀢𑁄 𑀪𑀺𑀓𑁆𑀔𑀼𑀪𑀢𑁆𑀢𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀲𑁄 𑀘𑁂 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑁂𑀬𑁆𑀬 ‘‘𑀅𑀳𑀁 𑀕𑀺𑀮𑀸𑀦𑁄, 𑀆𑀕𑀘𑁆𑀙𑀦𑁆𑀢𑀼 𑀪𑀺𑀓𑁆𑀔𑀽, 𑀇𑀘𑁆𑀙𑀸𑀫𑀺 𑀪𑀺𑀓𑁆𑀔𑀽𑀦𑀁 𑀆𑀕𑀢’’𑀦𑁆𑀢𑀺, 𑀕𑀦𑁆𑀢𑀩𑁆𑀩𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦, 𑀦 𑀢𑁆𑀯𑁂𑀯 𑀅𑀧𑁆𑀧𑀳𑀺𑀢𑁂.

𑀲𑀘𑁂 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀲𑁆𑀲 𑀲𑀸𑀫𑀡𑁂𑀭𑀺𑀬𑀸 𑀅𑀦𑀪𑀺𑀭𑀢𑀺 𑀯𑀸 𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀤𑀺𑀝𑁆𑀞𑀺𑀕𑀢𑀁 𑀯𑀸 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀕𑀦𑁆𑀢𑀩𑁆𑀩𑀁 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀅𑀧𑁆𑀧𑀳𑀺𑀢𑁂𑀧𑀺 ‘‘𑀅𑀦𑀪𑀺𑀭𑀢𑀺𑀁 𑀯𑀽𑀧𑀓𑀸𑀲𑁂𑀲𑁆𑀲𑀸𑀫𑀺 𑀯𑀸 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀸𑀫𑀺 𑀯𑀸 𑀓𑀼𑀫𑁆𑀓𑀼𑀘𑁆𑀘𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀺 𑀯𑀸 𑀯𑀺𑀦𑁄𑀤𑀸𑀧𑁂𑀲𑁆𑀲𑀸𑀫𑀺 𑀯𑀸 𑀤𑀺𑀝𑁆𑀞𑀺𑀕𑀢𑀁 𑀯𑀺𑀯𑁂𑀘𑁂𑀲𑁆𑀲𑀸𑀫𑀺 𑀯𑀸 𑀯𑀺𑀯𑁂𑀘𑀸𑀧𑁂𑀲𑁆𑀲𑀸𑀫𑀺 𑀯𑀸 𑀥𑀫𑁆𑀫𑀓𑀣𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺, 𑀧𑀕𑁂𑀯 𑀧𑀳𑀺𑀢𑁂. 𑀲𑀘𑁂 𑀓𑁄𑀘𑀺 𑀪𑀺𑀓𑁆𑀔𑀼 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀫𑀸𑀦𑀢𑁆𑀢𑀸𑀭𑀳𑁄 𑀅𑀩𑁆𑀪𑀸𑀦𑀸𑀭𑀳𑁄 𑀯𑀸, 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁 ‘‘𑀧𑀭𑀺𑀯𑀸𑀲𑀤𑀸𑀦𑀸𑀤𑀻𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀲𑁆𑀲𑀸𑀫𑀺, 𑀅𑀦𑀼𑀲𑁆𑀲𑀸𑀯𑁂𑀲𑁆𑀲𑀸𑀫𑀺, 𑀕𑀡𑀧𑀽𑀭𑀓𑁄 𑀯𑀸 𑀪𑀯𑀺𑀲𑁆𑀲𑀸𑀫𑀻’’𑀢𑀺, 𑀧𑀕𑁂𑀯 𑀧𑀳𑀺𑀢𑁂. 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀫𑀸𑀦𑀢𑁆𑀢𑀸𑀭𑀳𑀸𑀬 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀸𑀬 𑀅𑀩𑁆𑀪𑀸𑀦𑀸𑀭𑀳𑀸𑀬 𑀯𑀸 𑀏𑀲𑁂𑀯 𑀦𑀬𑁄. 𑀲𑀘𑁂 𑀲𑀸𑀫𑀡𑁂𑀭𑁄 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀯𑀲𑁆𑀲𑀁 𑀯𑀸 𑀧𑀼𑀘𑁆𑀙𑀺𑀢𑀼𑀓𑀸𑀫𑁄, 𑀲𑀺𑀓𑁆𑀔𑀫𑀸𑀦𑀸 𑀯𑀸 𑀉𑀧𑀲𑀫𑁆𑀧𑀚𑁆𑀚𑀺𑀢𑀼𑀓𑀸𑀫𑀸 𑀳𑁄𑀢𑀺, 𑀲𑀺𑀓𑁆𑀔𑀸 𑀯𑀸𑀲𑁆𑀲𑀸 𑀓𑀼𑀧𑀺𑀢𑀸, 𑀲𑀸𑀫𑀡𑁂𑀭𑀻 𑀯𑀸 𑀲𑀺𑀓𑁆𑀔𑀸 𑀲𑀫𑀸𑀤𑀺𑀬𑀺𑀢𑀼𑀓𑀸𑀫𑀸 𑀳𑁄𑀢𑀺, 𑀯𑀲𑁆𑀲𑀁 𑀯𑀸 𑀧𑀼𑀘𑁆𑀙𑀺𑀢𑀼𑀓𑀸𑀫𑀸, 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁, 𑀧𑀕𑁂𑀯 𑀧𑀳𑀺𑀢𑁂.

𑀲𑀘𑁂 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁, 𑀧𑀕𑁂𑀯 𑀧𑀳𑀺𑀢𑁂 ‘‘𑀓𑀺𑀁 𑀦𑀼 𑀔𑁄 𑀲𑀗𑁆𑀖𑁄 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸’’𑀢𑀺. 𑀲𑀘𑁂𑀧𑀺 𑀓𑀢𑀁𑀬𑁂𑀯 𑀳𑁄𑀢𑀺 𑀓𑀫𑁆𑀫𑀁, 𑀅𑀧𑁆𑀧𑀳𑀺𑀢𑁂𑀧𑀺 𑀕𑀦𑁆𑀢𑀩𑁆𑀩𑀁 ‘‘𑀓𑀺𑀁 𑀦𑀼 𑀔𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸’’𑀢𑀺.

𑁧𑁮𑁧. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀓𑀭𑀡𑀻𑀬𑁂𑀦 𑀕𑀦𑁆𑀢𑀼’’𑀦𑁆𑀢𑀺 (𑀫𑀳𑀸𑀯. 𑁧𑁯𑁯) 𑀯𑀘𑀦𑀢𑁄 𑀲𑁂𑀦𑀸𑀲𑀦𑀧𑀝𑀺𑀩𑀤𑁆𑀥𑀲𑀗𑁆𑀖𑀓𑀭𑀡𑀻𑀬𑁂𑀦𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 (𑀫𑀳𑀸𑀯. 𑀅𑀝𑁆𑀞. 𑁧𑁯𑁯) 𑀳𑀺 𑀬𑀁 𑀓𑀺𑀜𑁆𑀘𑀺 𑀉𑀧𑁄𑀲𑀣𑀸𑀕𑀸𑀭𑀸𑀤𑀻𑀲𑀼 𑀲𑁂𑀦𑀸𑀲𑀦𑁂𑀲𑀼 𑀘𑁂𑀢𑀺𑀬𑀙𑀢𑁆𑀢𑀯𑁂𑀤𑀺𑀓𑀸𑀤𑀻𑀲𑀼 𑀯𑀸 𑀓𑀢𑁆𑀢𑀩𑁆𑀩𑀁, 𑀅𑀦𑁆𑀢𑀫𑀲𑁄 𑀪𑀺𑀓𑁆𑀔𑀼𑀦𑁄 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑀫𑁆𑀧𑀺 𑀲𑀩𑁆𑀩𑀁 𑀲𑀗𑁆𑀖𑀓𑀭𑀡𑀻𑀬𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀤𑀩𑁆𑀩𑀲𑀫𑁆𑀪𑀸𑀭𑀸𑀤𑀻𑀦𑀺 𑀯𑀸 𑀆𑀳𑀭𑀺𑀢𑀼𑀁 𑀯𑀟𑁆𑀠𑀓𑀻𑀧𑀪𑀼𑀢𑀻𑀦𑀁 𑀪𑀢𑁆𑀢𑀯𑁂𑀢𑀦𑀸𑀤𑀻𑀦𑀺 𑀯𑀸 𑀤𑀸𑀢𑀼𑀁 𑀕𑀦𑁆𑀢𑀩𑁆𑀩𑀁. 𑀅𑀧𑀺𑀘𑁂𑀢𑁆𑀣 𑀅𑀬𑀫𑁆𑀧𑀺 𑀧𑀸𑀴𑀺𑀫𑀼𑀢𑁆𑀢𑀓𑀦𑀬𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀅𑀦𑀺𑀫𑀦𑁆𑀢𑀺𑀢𑁂𑀦 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀘𑁂 𑀏𑀓𑀲𑁆𑀫𑀺𑀁 𑀫𑀳𑀸𑀯𑀸𑀲𑁂 𑀧𑀞𑀫𑀁𑀬𑁂𑀯 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺 ‘‘𑀅𑀲𑀼𑀓𑀤𑀺𑀯𑀲𑀁 𑀦𑀸𑀫 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺, 𑀦𑀺𑀫𑀦𑁆𑀢𑀺𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺, 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀪𑀡𑁆𑀟𑀓𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀧𑀳𑀺𑀡𑀦𑁆𑀢𑀺, 𑀯𑀝𑁆𑀝𑀢𑀺. 𑀦𑀸𑀢𑀺𑀤𑀽𑀭𑁂 𑀯𑀺𑀳𑀸𑀭𑁄 𑀳𑁄𑀢𑀺, ‘‘𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀚𑁆𑀚𑁂𑀯 𑀆𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀝𑁆𑀝𑀢𑀺. 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀅𑀢𑁆𑀣𑀸𑀬𑀧𑀺 𑀕𑀦𑁆𑀢𑀼𑀁 𑀦 𑀮𑀪𑀢𑀺, ‘‘𑀆𑀘𑀭𑀺𑀬𑀁 𑀧𑀦 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑀼𑀁 𑀮𑀪𑀢𑀺. 𑀲𑀘𑁂 𑀦𑀁 𑀆𑀘𑀭𑀺𑀬𑁄 ‘‘𑀅𑀚𑁆𑀚 𑀫𑀸 𑀕𑀘𑁆𑀙𑀸’’𑀢𑀺 𑀯𑀤𑀢𑀺, 𑀯𑀝𑁆𑀝𑀢𑀺, 𑀉𑀧𑀝𑁆𑀞𑀸𑀓𑀓𑀼𑀮𑀁 𑀯𑀸 𑀜𑀸𑀢𑀺𑀓𑀼𑀮𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀦𑁆𑀢𑀼𑀁 𑀦 𑀮𑀪𑀢𑀺.

𑀲𑀘𑁂 𑀪𑀺𑀓𑁆𑀔𑀽𑀲𑀼 𑀯𑀲𑁆𑀲𑀽𑀧𑀕𑀢𑁂𑀲𑀼 𑀕𑀸𑀫𑁄 𑀘𑁄𑀭𑁂𑀳𑀺 𑀯𑀼𑀝𑁆𑀞𑀸𑀢𑀺, 𑀢𑀢𑁆𑀣 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀬𑁂𑀦 𑀕𑀸𑀫𑁄, 𑀢𑁂𑀦 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀕𑀸𑀫𑁄 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺, 𑀬𑀢𑁆𑀣 𑀩𑀳𑀼𑀢𑀭𑀸 𑀫𑀦𑀼𑀲𑁆𑀲𑀸, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀲𑀘𑁂 𑀩𑀳𑀼𑀢𑀭𑀸 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸, 𑀬𑀢𑁆𑀣 𑀲𑀤𑁆𑀥𑀸 𑀧𑀲𑀦𑁆𑀦𑀸, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀏𑀢𑁆𑀣 𑀘 𑀲𑀘𑁂 𑀕𑀸𑀫𑁄 𑀅𑀯𑀺𑀤𑀽𑀭𑀕𑀢𑁄 𑀳𑁄𑀢𑀺, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀤𑀽𑀭𑀁 𑀕𑀢𑁄, 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑁄 𑀉𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀲𑀓𑁆𑀓𑀸 𑀘𑁂 𑀳𑁄𑀢𑀺, 𑀢𑀢𑁆𑀣𑁂𑀯 𑀲𑀪𑀸𑀕𑀝𑁆𑀞𑀸𑀦𑁂 𑀯𑀲𑀺𑀢𑀩𑁆𑀩𑀁. 𑀲𑀘𑁂 𑀫𑀦𑀼𑀲𑁆𑀲𑀸 𑀬𑀣𑀸𑀧𑀯𑀢𑁆𑀢𑀸𑀦𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑁂𑀦𑁆𑀢𑀺, ‘‘𑀦 𑀫𑀬𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀫𑁆𑀳𑀸’’𑀢𑀺 𑀯𑀢𑁆𑀢𑀩𑁆𑀩𑀸. ‘‘𑀫𑀬𑀁 𑀯𑀺𑀳𑀸𑀭𑀲𑁆𑀲 𑀯𑀸 𑀧𑀸𑀲𑀸𑀤𑀲𑁆𑀲 𑀯𑀸 𑀦 𑀤𑁂𑀫, 𑀢𑀼𑀫𑁆𑀳𑀸𑀓𑀁 𑀤𑁂𑀫, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀺𑀢𑁆𑀯𑀸 𑀪𑀼𑀜𑁆𑀚𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀬𑀣𑀸𑀲𑀼𑀔𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀢𑁂𑀲𑀁𑀬𑁂𑀯 𑀢𑀁 𑀧𑀸𑀧𑀼𑀡𑀸𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑁂 𑀧𑀸𑀧𑀼𑀡𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀬𑀢𑁆𑀣 𑀯𑀲𑀦𑁆𑀢𑀺, 𑀢𑀢𑁆𑀣 𑀦𑁂𑀢𑁆𑀯𑀸 𑀯𑀲𑁆𑀲𑀕𑁆𑀕𑁂𑀦 𑀧𑀸𑀧𑀼𑀡𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀯𑀸𑀭𑀺𑀢𑀓𑀸𑀮𑁂 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑁂𑀦𑁆𑀢𑀺, 𑀬𑀤𑀺 𑀲𑀢𑁆𑀢𑀸𑀳𑀯𑀸𑀭𑁂𑀦 𑀅𑀭𑀼𑀡𑀁 𑀉𑀝𑁆𑀞𑀸𑀧𑀬𑀺𑀁𑀲𑀼, 𑀕𑀳𑁂𑀢𑀩𑁆𑀩𑀁. 𑀙𑀺𑀦𑁆𑀦𑀯𑀲𑁆𑀲𑁂𑀳𑀺 𑀧𑀦 ‘‘𑀦 𑀫𑀬𑀁 𑀢𑀢𑁆𑀣 𑀯𑀲𑀺𑀫𑁆𑀳, 𑀙𑀺𑀦𑁆𑀦𑀯𑀲𑁆𑀲𑀸 𑀫𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀤𑀺 ‘‘𑀬𑁂𑀲𑀁 𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀁 𑀧𑀸𑀧𑀺𑀢𑀁, 𑀢𑁂 𑀕𑀡𑁆𑀳𑀦𑁆𑀢𑀽’’𑀢𑀺 𑀯𑀤𑀦𑁆𑀢𑀺, 𑀕𑀳𑁂𑀢𑀩𑁆𑀩𑀁. 𑀬𑀁 𑀧𑀦 ‘‘𑀯𑀺𑀳𑀸𑀭𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀓𑀁 𑀫𑀸 𑀯𑀺𑀦𑀲𑁆𑀲𑀻’’𑀢𑀺 𑀇𑀥 𑀆𑀳𑀝𑀁 𑀘𑀻𑀯𑀭𑀸𑀤𑀺𑀯𑁂𑀪𑀗𑁆𑀕𑀺𑀬𑀪𑀡𑁆𑀟𑀁, 𑀢𑀁 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀪𑀸𑀚𑁂𑀢𑀩𑁆𑀩𑀁. ‘‘𑀇𑀢𑁄 𑀅𑀬𑁆𑀬𑀸𑀦𑀁 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑁂𑀣𑀸’’𑀢𑀺 𑀓𑀧𑁆𑀧𑀺𑀬𑀓𑀸𑀭𑀓𑀸𑀦𑀁 𑀤𑀺𑀦𑁆𑀦𑁂 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀓𑁂 𑀢𑀢𑁆𑀭𑀼𑀧𑁆𑀧𑀸𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀖𑀺𑀓𑀜𑁆𑀳𑀺 𑀯𑁂𑀪𑀗𑁆𑀕𑀺𑀬𑀪𑀡𑁆𑀟𑀁 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀸 𑀩𑀳𑀺𑀲𑀻𑀫𑀸𑀬 𑀯𑀸 𑀳𑁄𑀢𑀼, 𑀩𑀳𑀺𑀲𑀻𑀫𑀸𑀬 𑀞𑀺𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀪𑀸𑀚𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀉𑀪𑀬𑀢𑁆𑀣 𑀞𑀺𑀢𑀫𑁆𑀧𑀺 𑀧𑀦 𑀅𑀦𑁆𑀢𑁄𑀲𑀻𑀫𑀸𑀬 𑀞𑀺𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀪𑀸𑀚𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀲𑀘𑁂 𑀧𑀦 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀯𑀸𑀴𑁂𑀳𑀺 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺, 𑀕𑀡𑁆𑀳𑀦𑁆𑀢𑀺𑀧𑀺 𑀧𑀭𑀺𑀧𑀸𑀢𑁂𑀦𑁆𑀢𑀺𑀧𑀺, 𑀲𑀭𑀻𑀲𑀧𑁂𑀳𑀺 𑀯𑀸 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺, 𑀟𑀁𑀲𑀦𑁆𑀢𑀺𑀧𑀺 𑀧𑀭𑀺𑀧𑀸𑀢𑁂𑀦𑁆𑀢𑀺𑀧𑀺, 𑀘𑁄𑀭𑁂𑀳𑀺 𑀯𑀸 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺, 𑀯𑀺𑀮𑀼𑀫𑁆𑀧𑀦𑁆𑀢𑀺𑀧𑀺 𑀆𑀓𑁄𑀝𑁂𑀦𑁆𑀢𑀺𑀧𑀺, 𑀧𑀺𑀲𑀸𑀘𑁂𑀳𑀺 𑀯𑀸 𑀉𑀩𑁆𑀩𑀸𑀴𑁆𑀳𑀸 𑀳𑁄𑀦𑁆𑀢𑀺, 𑀆𑀯𑀺𑀲𑀦𑁆𑀢𑀺𑀧𑀺 𑀳𑀦𑀦𑁆𑀢𑀺𑀧𑀺, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀺. 𑀲𑀘𑁂 𑀕𑀸𑀫𑁄 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑁄 𑀳𑁄𑀢𑀺, 𑀉𑀤𑀓𑁂𑀦 𑀯𑀸 𑀯𑀼𑀴𑁆𑀳𑁄. 𑀪𑀺𑀓𑁆𑀔𑀽 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀦𑁆𑀢𑀺, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺. 𑀲𑁂𑀦𑀸𑀲𑀦𑀁 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑀁 𑀳𑁄𑀢𑀺, 𑀉𑀤𑀓𑁂𑀦 𑀯𑀸 𑀯𑀼𑀴𑁆𑀳𑀁, 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑁂𑀦 𑀓𑀺𑀮𑀫𑀦𑁆𑀢𑀺, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀦 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀦 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂𑀧𑀺 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, 𑀦 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀮𑀪𑀦𑁆𑀢𑀺 𑀮𑀽𑀔𑀲𑁆𑀲 𑀯𑀸 𑀧𑀡𑀻𑀢𑀲𑁆𑀲 𑀯𑀸 𑀪𑁄𑀚𑀦𑀲𑁆𑀲 𑀬𑀸𑀯𑀤𑀢𑁆𑀣𑀁 𑀧𑀸𑀭𑀺𑀧𑀽𑀭𑀺𑀁, 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁄𑀚𑀦𑀸𑀦𑀺, 𑀮𑀪𑀦𑁆𑀢𑀺 𑀲𑀧𑁆𑀧𑀸𑀬𑀸𑀦𑀺 𑀪𑁂𑀲𑀚𑁆𑀚𑀸𑀦𑀺, 𑀦 𑀮𑀪𑀦𑁆𑀢𑀺 𑀧𑀢𑀺𑀭𑀽𑀧𑀁 𑀉𑀧𑀝𑁆𑀞𑀸𑀓𑀁, ‘‘𑀏𑀲𑁂𑀯 𑀅𑀦𑁆𑀢𑀭𑀸𑀬𑁄’’𑀢𑀺 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀲𑀩𑁆𑀩𑀢𑁆𑀣 𑀯𑀲𑁆𑀲𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺.

𑀲𑀘𑁂 𑀧𑀦 𑀯𑀲𑁆𑀲𑀽𑀧𑀕𑀢𑀁 𑀪𑀺𑀓𑁆𑀔𑀼𑀁 𑀇𑀢𑁆𑀣𑀻 𑀦𑀺𑀫𑀦𑁆𑀢𑁂𑀢𑀺 ‘‘𑀏𑀳𑀺, 𑀪𑀦𑁆𑀢𑁂, 𑀳𑀺𑀭𑀜𑁆𑀜𑀁 𑀯𑀸 𑀢𑁂 𑀤𑁂𑀫𑀺, 𑀲𑀼𑀯𑀡𑁆𑀡𑀁 𑀯𑀸 𑀔𑁂𑀢𑁆𑀢𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀕𑀸𑀯𑀼𑀁 𑀯𑀸 𑀕𑀸𑀯𑀺𑀁 𑀯𑀸 𑀤𑀸𑀲𑀁 𑀯𑀸 𑀤𑀸𑀲𑀺𑀁 𑀯𑀸 𑀢𑁂 𑀤𑁂𑀫𑀺, 𑀥𑀻𑀢𑀭𑀁 𑀯𑀸 𑀢𑁂 𑀤𑁂𑀫𑀺 𑀪𑀭𑀺𑀬𑀢𑁆𑀣𑀸𑀬, 𑀅𑀳𑀁 𑀯𑀸 𑀢𑁂 𑀪𑀭𑀺𑀬𑀸 𑀳𑁄𑀫𑀺, 𑀅𑀜𑁆𑀜𑀁 𑀯𑀸 𑀢𑁂 𑀪𑀭𑀺𑀬𑀁 𑀆𑀦𑁂𑀫𑀻’’𑀢𑀺, 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 ‘‘𑀮𑀳𑀼𑀧𑀭𑀺𑀯𑀢𑁆𑀢𑀁 𑀔𑁄 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀲𑀺𑀬𑀸𑀧𑀺𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀸𑀬𑁄’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀦𑀢𑁆𑀣𑀺 𑀯𑀲𑁆𑀲𑀘𑁆𑀙𑁂𑀤𑁂 𑀆𑀧𑀢𑁆𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀲𑀻 𑀯𑀸 𑀦𑀺𑀫𑀦𑁆𑀢𑁂𑀢𑀺, 𑀣𑀼𑀮𑁆𑀮𑀓𑀼𑀫𑀸𑀭𑀻 𑀯𑀸 𑀦𑀺𑀫𑀦𑁆𑀢𑁂𑀢𑀺, 𑀧𑀡𑁆𑀟𑀓𑁄 𑀯𑀸 𑀦𑀺𑀫𑀦𑁆𑀢𑁂𑀢𑀺, 𑀜𑀸𑀢𑀓𑀸 𑀯𑀸 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀭𑀸𑀚𑀸𑀦𑁄 𑀯𑀸 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀘𑁄𑀭𑀸 𑀯𑀸 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀥𑀼𑀢𑁆𑀢𑀸 𑀯𑀸 𑀦𑀺𑀫𑀦𑁆𑀢𑁂𑀦𑁆𑀢𑀺, 𑀏𑀲𑁂𑀯 𑀦𑀬𑁄. 𑀲𑀘𑁂 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺 𑀅𑀲𑀸𑀫𑀺𑀓𑀁 𑀦𑀺𑀥𑀺𑀁, 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 ‘‘𑀮𑀳𑀼𑀧𑀭𑀺𑀯𑀢𑁆𑀢𑀁 𑀔𑁄 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸, 𑀲𑀺𑀬𑀸𑀧𑀺 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀸𑀬𑁄’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑁂.

𑀲𑀘𑁂 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑁂, 𑀲𑀼𑀡𑀸𑀢𑀺 𑀯𑀸 ‘‘𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺, 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 ‘‘𑀕𑀭𑀼𑀓𑁄 𑀔𑁄 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀫𑀸 𑀫𑀬𑀺 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑁂. 𑀲𑀘𑁂 𑀯𑀲𑁆𑀲𑀽𑀧𑀕𑀢𑁄 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀓𑀺𑀭 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀻’’𑀢𑀺, 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 ‘‘𑀢𑁂 𑀘 𑀔𑁄 𑀫𑁂 𑀪𑀺𑀓𑁆𑀔𑀽 𑀫𑀺𑀢𑁆𑀢𑀸, 𑀢𑁆𑀬𑀸𑀳𑀁 𑀯𑀓𑁆𑀔𑀸𑀫𑀺 ‘𑀕𑀭𑀼𑀓𑁄 𑀔𑁄, 𑀆𑀯𑀼𑀲𑁄, 𑀲𑀗𑁆𑀖𑀪𑁂𑀤𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀫𑀸 𑀆𑀬𑀲𑁆𑀫𑀦𑁆𑀢𑀸𑀦𑀁 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣𑀸’𑀢𑀺, 𑀓𑀭𑀺𑀲𑁆𑀲𑀦𑁆𑀢𑀺 𑀫𑁂 𑀯𑀘𑀦𑀁 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺, 𑀧𑀓𑁆𑀓𑀫𑀺𑀢𑀩𑁆𑀩𑀁, 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑁂, 𑀪𑀺𑀦𑁆𑀦𑁂 𑀧𑀦 𑀲𑀗𑁆𑀖𑁂 𑀕𑀦𑁆𑀢𑁆𑀯𑀸 𑀓𑀭𑀡𑀻𑀬𑀁 𑀦𑀢𑁆𑀣𑀺.

𑀲𑀘𑁂 𑀧𑀦 𑀓𑁄𑀘𑀺 𑀪𑀺𑀓𑁆𑀔𑀼 ‘‘𑀇𑀫𑀁 𑀢𑁂𑀫𑀸𑀲𑀁 𑀇𑀥 𑀯𑀲𑁆𑀲𑀁 𑀯𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀢𑀺, 𑀤𑀼𑀓𑁆𑀓𑀝𑀁. 𑀦 𑀓𑁂𑀯𑀮𑀁 𑀢𑀲𑁆𑀲𑁂𑀯 𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑁂 𑀤𑀼𑀓𑁆𑀓𑀝𑀁, ‘‘𑀇𑀫𑀁 𑀢𑁂𑀫𑀸𑀲𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀉𑀪𑁄𑀧𑀺 𑀫𑀬𑀁 𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫, 𑀏𑀓𑀢𑁄 𑀉𑀤𑁆𑀤𑀺𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀯𑀺𑀲𑀁𑀯𑀸𑀤𑁂 𑀤𑀼𑀓𑁆𑀓𑀝𑀁. 𑀢𑀜𑁆𑀘 𑀔𑁄 𑀧𑀞𑀫𑀁 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀘𑁆𑀙𑀸 𑀯𑀺𑀲𑀁𑀯𑀸𑀤𑀦𑀧𑀘𑁆𑀘𑀬𑀸, 𑀧𑀞𑀫𑀫𑁆𑀧𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀦 𑀧𑀝𑀺𑀲𑁆𑀲𑀯𑁂 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀺𑀲𑀁𑀯𑀸𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑁂𑀦 𑀲𑀤𑁆𑀥𑀺𑀁 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀺.

𑁧𑁮𑁨. 𑀯𑀲𑁆𑀲𑀽𑀧𑀕𑀢𑁂𑀳𑀺 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) 𑀅𑀦𑁆𑀢𑁄𑀯𑀲𑁆𑀲𑁂 𑀦𑀺𑀩𑀤𑁆𑀥𑀯𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 ‘‘𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀩𑀦𑁆𑀥𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀸. 𑀲𑀼𑀮𑀪𑀸 𑀘𑁂 𑀤𑀡𑁆𑀟𑀓𑀸 𑀘𑁂𑀯 𑀲𑀮𑀸𑀓𑀸𑀬𑁄 𑀘 𑀳𑁄𑀦𑁆𑀢𑀺, 𑀏𑀓𑀓𑁂𑀦 𑀙 𑀧𑀜𑁆𑀘 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀤𑁆𑀯𑁂 𑀢𑀺𑀲𑁆𑀲𑁄 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀯𑀸 𑀩𑀦𑁆𑀥𑀺𑀢𑀩𑁆𑀩𑀸. 𑀤𑀼𑀮𑁆𑀮𑀪𑀸 𑀳𑁄𑀦𑁆𑀢𑀺, 𑀤𑁆𑀯𑁂 𑀢𑀺𑀲𑁆𑀲𑁄 𑀫𑀼𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀺𑀬𑁄 𑀏𑀓𑀸 𑀬𑀝𑁆𑀞𑀺𑀲𑀫𑁆𑀫𑀼𑀜𑁆𑀚𑀦𑀻 𑀩𑀦𑁆𑀥𑀺𑀢𑀩𑁆𑀩𑀸. 𑀲𑀸𑀫𑀡𑁂𑀭𑁂𑀳𑀺 𑀧𑀜𑁆𑀘 𑀧𑀜𑁆𑀘 𑀉𑀓𑁆𑀓𑀸 𑀯𑀸 𑀓𑁄𑀝𑁆𑀝𑁂𑀢𑀩𑁆𑀩𑀸, 𑀯𑀲𑀦𑀝𑁆𑀞𑀸𑀦𑁂𑀲𑀼 𑀓𑀲𑀸𑀯𑀧𑀭𑀺𑀪𑀡𑁆𑀟𑀁 𑀓𑀸𑀢𑀩𑁆𑀩𑀁. 𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀳𑀺 𑀘 𑀦 𑀉𑀤𑁆𑀤𑀺𑀲𑀺𑀢𑀩𑁆𑀩𑀁 𑀦 𑀉𑀤𑁆𑀤𑀺𑀲𑀸𑀧𑁂𑀢𑀩𑁆𑀩𑀁, 𑀦 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄, 𑀦 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀢𑀩𑁆𑀩𑀁. 𑀲𑀩𑁆𑀩𑁂𑀯 𑀳𑀺 𑀏𑀢𑁂 𑀧𑀧𑀜𑁆𑀘𑀸, 𑀦𑀺𑀧𑁆𑀧𑀧𑀜𑁆𑀘𑀸 𑀳𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀫𑁂𑀯 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀸 𑀲𑀩𑁆𑀩𑁂 𑀢𑁂𑀭𑀲 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀼, 𑀲𑁂𑀬𑁆𑀬𑀁 𑀅𑀓𑀧𑁆𑀧𑁂𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑁂𑀳𑀺 𑀯𑀻𑀢𑀺𑀦𑀸𑀫𑁂𑀦𑁆𑀢𑀼, 𑀫𑀽𑀕𑀩𑁆𑀩𑀢𑀁 𑀕𑀡𑁆𑀳𑀦𑁆𑀢𑀼, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀸𑀧𑀺 𑀪𑀸𑀚𑀦𑀻𑀬𑀪𑀡𑁆𑀟𑀁 𑀮𑀪𑀦𑁆𑀢𑀽𑀢𑀺 𑀯𑀸 𑀏𑀯𑀭𑀽𑀧𑀁 𑀅𑀥𑀫𑁆𑀫𑀺𑀓𑀯𑀢𑁆𑀢𑀁 𑀦 𑀓𑀸𑀢𑀩𑁆𑀩𑀁. 𑀏𑀯𑀁 𑀧𑀦 𑀓𑀸𑀢𑀩𑁆𑀩𑀁 𑁋 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀦𑀸𑀫 𑀢𑀺𑀯𑀺𑀥𑀫𑁆𑀧𑀺 𑀲𑀤𑁆𑀥𑀫𑁆𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀣 𑀉𑀤𑁆𑀤𑀺𑀲𑀸𑀧𑁂𑀣, 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀧𑀥𑀸𑀦𑀖𑀭𑁂 𑀯𑀲𑀦𑁆𑀢𑀸𑀦𑀁 𑀲𑀗𑁆𑀖𑀝𑁆𑀝𑀦𑀁 𑀅𑀓𑀢𑁆𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑁆𑀤𑀺𑀲𑀣 𑀉𑀤𑁆𑀤𑀺𑀲𑀸𑀧𑁂𑀣, 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀥𑀫𑁆𑀫𑀲𑁆𑀲𑀯𑀦𑀁 𑀲𑀫𑀺𑀤𑁆𑀥𑀁 𑀓𑀭𑁄𑀣, 𑀧𑀩𑁆𑀩𑀸𑀚𑁂𑀦𑁆𑀢𑀸 𑀲𑁄𑀥𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀣, 𑀲𑁄𑀥𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀣, 𑀲𑁄𑀥𑁂𑀢𑁆𑀯𑀸 𑀦𑀺𑀲𑁆𑀲𑀬𑀁 𑀤𑁂𑀣. 𑀏𑀓𑁄𑀧𑀺 𑀳𑀺 𑀓𑀼𑀮𑀧𑀼𑀢𑁆𑀢𑁄 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀲𑀓𑀮𑀁 𑀲𑀸𑀲𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀬𑀢𑁆𑀢𑀓𑀸𑀦𑀺 𑀲𑀓𑁆𑀓𑁄𑀣, 𑀢𑀢𑁆𑀢𑀓𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀣, 𑀅𑀦𑁆𑀢𑁄𑀯𑀲𑁆𑀲𑀁 𑀦𑀸𑀫𑁂𑀢𑀁 𑀲𑀓𑀮𑀤𑀺𑀯𑀲𑀁 𑀭𑀢𑁆𑀢𑀺𑀬𑀸 𑀘 𑀧𑀞𑀫𑀬𑀸𑀫𑀧𑀘𑁆𑀙𑀺𑀫𑀬𑀸𑀫𑁂𑀲𑀼 𑀅𑀧𑁆𑀧𑀫𑀢𑁆𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀯𑀻𑀭𑀺𑀬𑀁 𑀆𑀭𑀪𑀺𑀢𑀩𑁆𑀩𑀁. 𑀧𑁄𑀭𑀸𑀡𑀓𑀫𑀳𑀸𑀣𑁂𑀭𑀸𑀧𑀺 𑀲𑀩𑁆𑀩𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀯𑀲𑁆𑀲𑁂 𑀏𑀓𑀘𑀸𑀭𑀺𑀬𑀯𑀢𑁆𑀢𑀁 𑀧𑀽𑀭𑀬𑀺𑀁𑀲𑀼, 𑀪𑀲𑁆𑀲𑁂 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀤𑀲𑀯𑀢𑁆𑀣𑀼𑀓𑀣𑀁 𑀤𑀲𑀅𑀲𑀼𑀪𑀤𑀲𑀸𑀦𑀼𑀲𑁆𑀲𑀢𑀺𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀓𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀯𑀢𑁆𑀢𑀁 𑀓𑀸𑀢𑀼𑀁, 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀢𑀸𑀦𑀁 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀭𑀽𑀧𑀁 𑀯𑀢𑁆𑀢𑀁 𑀓𑀸𑀢𑀩𑁆𑀩𑀁.

𑀅𑀧𑀺𑀘 𑀪𑀺𑀓𑁆𑀔𑀽 𑀑𑀯𑀤𑀺𑀢𑀩𑁆𑀩𑀸 ‘‘𑀯𑀺𑀕𑁆𑀕𑀸𑀳𑀺𑀓𑀧𑀺𑀲𑀼𑀡𑀨𑀭𑀼𑀲𑀯𑀘𑀦𑀸𑀦𑀺 𑀫𑀸 𑀯𑀤𑀣, 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀻𑀮𑀸𑀦𑀺 𑀆𑀯𑀚𑁆𑀚𑁂𑀦𑁆𑀢𑀸 𑀘𑀢𑀼𑀭𑀸𑀭𑀓𑁆𑀔𑀁 𑀅𑀳𑀸𑀧𑁂𑀦𑁆𑀢𑀸 𑀫𑀦𑀲𑀺𑀓𑀸𑀭𑀩𑀳𑀼𑀮𑀸 𑀯𑀺𑀳𑀭𑀣𑀸’’𑀢𑀺. 𑀤𑀦𑁆𑀢𑀓𑀝𑁆𑀞𑀔𑀸𑀤𑀦𑀯𑀢𑁆𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀯𑀦𑁆𑀤𑀦𑁆𑀢𑁂𑀦 𑀕𑀦𑁆𑀥𑀫𑀸𑀮𑀁 𑀯𑀸 𑀧𑀽𑀚𑁂𑀦𑁆𑀢𑁂𑀦 𑀧𑀢𑁆𑀢𑀁 𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀦𑁆𑀢𑁂𑀦 𑀦 𑀓𑀣𑁂𑀢𑀩𑁆𑀩𑀁, 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁, 𑀅𑀦𑁆𑀢𑁄𑀕𑀸𑀫𑁂 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀬𑀲𑀜𑁆𑀜𑀼𑀢𑁆𑀢𑀓𑀣𑀸 𑀯𑀸 𑀯𑀺𑀲𑀪𑀸𑀕𑀓𑀣𑀸 𑀯𑀸 𑀦 𑀓𑀣𑁂𑀢𑀩𑁆𑀩𑀸, 𑀭𑀓𑁆𑀔𑀺𑀢𑀺𑀦𑁆𑀤𑁆𑀭𑀺𑀬𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀔𑀦𑁆𑀥𑀓𑀯𑀢𑁆𑀢𑀜𑁆𑀘 𑀲𑁂𑀔𑀺𑀬𑀯𑀢𑁆𑀢𑀜𑁆𑀘 𑀧𑀽𑀭𑁂𑀢𑀩𑁆𑀩𑀦𑁆𑀢𑀺 𑀏𑀯𑀭𑀽𑀧𑀸 𑀩𑀳𑀼𑀓𑀸𑀧𑀺 𑀦𑀺𑀬𑁆𑀬𑀸𑀦𑀺𑀓𑀓𑀣𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀢𑀺.

𑀇𑀢𑀺 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀲𑀗𑁆𑀕𑀳𑁂

𑀯𑀲𑁆𑀲𑀽𑀧𑀦𑀸𑀬𑀺𑀓𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀢𑁆𑀢𑀸.