𑀏𑀓𑀼𑀢𑁆𑀢𑀭𑀺𑀓𑀦𑀬𑀁

𑀏𑀓𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁧. 𑀏𑀓𑀼𑀢𑁆𑀢𑀭𑀺𑀓𑀦𑀬𑁂 𑀧𑀦 𑀅𑀚𑀸𑀦𑀦𑁆𑀢𑁂𑀦 𑀯𑀻𑀢𑀺𑀓𑁆𑀓𑀦𑁆𑀢𑀸𑀢𑀺 𑀧𑀡𑁆𑀡𑀢𑁆𑀢𑀺𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀅𑀚𑀸𑀦𑀦𑁆𑀢𑁂𑀦 𑀯𑀻𑀢𑀺𑀓𑁆𑀓𑀦𑁆𑀢𑀸 𑀧𑀣𑀯𑀻𑀔𑀡𑀦𑀲𑀳𑀲𑁂𑀬𑁆𑀬𑀸𑀤𑀺𑀓𑀸, 𑀲𑀸𑀧𑀺 𑀧𑀘𑁆𑀙𑀸 𑀆𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀧𑀝𑀺𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀬𑀺𑀓𑀸𑀯 𑀳𑁄𑀢𑀺.

𑀧𑀸𑀭𑀺𑀯𑀸𑀲𑀺𑀓𑀸𑀤𑀻𑀳𑀺 𑀧𑀘𑁆𑀙𑀸 𑀆𑀧𑀦𑁆𑀦𑀸𑀢𑀺 𑀯𑀢𑁆𑀢𑀪𑁂𑀤𑁂𑀲𑀼 𑀤𑀼𑀓𑁆𑀓𑀝𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀔𑀡𑁂 𑀆𑀧𑀚𑁆𑀚𑀺𑀢𑀩𑁆𑀩𑀅𑀦𑁆𑀢𑀭𑀸𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀲𑁆𑀲 𑀧𑀼𑀩𑁆𑀩𑀸𑀧𑀢𑁆𑀢𑀻𑀦𑀁𑀅𑀦𑁆𑀢𑀭𑀸𑀧𑀢𑁆𑀢𑀺-𑀧𑀤𑁂𑀦𑁂𑀯 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀼𑀭𑀺𑀫𑀫𑁂𑀯 𑀬𑀼𑀢𑁆𑀢𑀢𑀭𑀁. 𑀫𑀽𑀮𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀤𑀻𑀦𑀺 𑀅𑀓𑀢𑁆𑀯𑀸 𑀲𑀩𑁆𑀩𑀧𑀞𑀫𑀁 𑀤𑀺𑀦𑁆𑀦𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀘𑀭𑀡𑀓𑀸𑀮𑁂 𑀆𑀧𑀦𑁆𑀦𑀅𑀦𑁆𑀢𑀭𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀕𑁆𑀖𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀦𑁆𑀦𑀲𑁆𑀲 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀺𑀢𑁆𑀯𑀸 𑀑𑀥𑀸𑀦𑀲𑀫𑁄𑀥𑀸𑀦𑀯𑀲𑁂𑀦 𑀑𑀥𑀼𑀦𑀺𑀢𑁆𑀯𑀸 𑀧𑀼𑀭𑀺𑀫𑀸𑀧𑀢𑁆𑀢𑀺𑀬𑀸 𑀲𑀫𑁄𑀥𑀸𑀬 𑀢𑀤𑀕𑁆𑀖𑀯𑀲𑁂𑀦 𑀧𑀼𑀦 𑀤𑀺𑀦𑁆𑀦𑀧𑀭𑀺𑀯𑀸𑀲𑀸𑀤𑀺𑀲𑀼𑀤𑁆𑀥𑀺𑀬𑀸 𑀘𑀭𑀡𑀓𑀸𑀮𑁂 𑀧𑀼𑀦 𑀆𑀧𑀦𑁆𑀦𑀸 𑀅𑀦𑁆𑀢𑀭𑀸𑀧𑀢𑁆𑀢𑀺.

𑀲𑀉𑀲𑁆𑀲𑀸𑀳𑁂𑀦𑁂𑀯𑀸𑀢𑀺 𑀧𑀼𑀦𑀧𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑁂𑀦, 𑀏𑀯𑀁 𑀤𑁂𑀲𑀺𑀢𑀸𑀧𑀺 𑀆𑀧𑀢𑁆𑀢𑀺 𑀦 𑀯𑀼𑀝𑁆𑀞𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀆𑀧𑀚𑁆𑀚𑀦𑁂 𑀲𑀺𑀔𑀸𑀧𑁆𑀧𑀢𑁆𑀢𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺. 𑀦 𑀓𑁂𑀯𑀮𑀜𑁆𑀘 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯, 𑀪𑀺𑀓𑁆𑀔𑀽𑀦𑀫𑁆𑀧𑀺 𑀥𑀼𑀭𑀦𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀣𑁄𑀓𑀁 𑀣𑁄𑀓𑀁 𑀲𑀧𑁆𑀧𑀺𑀆𑀤𑀺𑀓𑀁 𑀣𑁂𑀬𑁆𑀬𑀸𑀬 𑀕𑀡𑁆𑀳𑀦𑁆𑀢𑀸𑀦𑀁 𑀧𑀸𑀤𑀕𑁆𑀖𑀦𑀓𑁂 𑀧𑀼𑀡𑁆𑀡𑁂 𑀧𑀸𑀭𑀸𑀚𑀺𑀓𑀫𑁂𑀯. 𑀓𑁂𑀘𑀺 𑀧𑀦 ‘‘𑀅𑀝𑁆𑀞𑀫𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀯𑀢𑁆𑀣𑀼𑀓𑀫𑁂𑀯𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲𑀸𑀢𑀺 ‘‘𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀕𑀺𑀳𑀻𑀦𑀁 𑀲𑀫𑁆𑀫𑀼𑀔𑀸 𑀓𑀢𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲, 𑀅𑀥𑀫𑁆𑀫𑀺𑀓𑀲𑁆𑀲 𑀧𑀦 ‘‘𑀅𑀲𑀼𑀓𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂𑀦 𑀆𑀧𑀢𑁆𑀢𑀺 𑀦𑀢𑁆𑀣𑀺.

𑀢𑀣𑀸 𑀘𑁄𑀤𑀺𑀢𑁄𑀢𑀺 𑀅𑀥𑀫𑁆𑀫𑁂𑀦 𑀘𑁄𑀤𑀺𑀢𑁄, 𑀲𑀬𑀁 𑀲𑀘𑁆𑀘𑁂, 𑀅𑀓𑀼𑀧𑁆𑀧𑁂 𑀘 𑀅𑀝𑁆𑀞𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄𑀧𑀺 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀏𑀯. 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁂𑀯 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀦𑀸𑀫. 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀲𑀫𑁆𑀫𑀢𑁆𑀢𑀦𑀺𑀬𑀢𑀸 𑀦𑀸𑀫.

𑀏𑀓𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁨. 𑀤𑀼𑀓𑁂𑀲𑀼 𑀲𑀬𑀫𑁂𑀯 𑀲𑀧𑀼𑀕𑁆𑀕𑀮𑁄𑀢𑀺 𑀆𑀳 ‘‘𑀫𑀼𑀤𑀼𑀧𑀺𑀝𑁆𑀞𑀺𑀓𑀲𑁆𑀲𑀸’’𑀢𑀺𑀆𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀗𑁆𑀕𑀚𑀸𑀢𑀘𑁆𑀙𑁂𑀤𑀅𑀢𑁆𑀢𑀖𑀸𑀢𑀸𑀤𑀺𑀆𑀧𑀢𑁆𑀢𑀺𑀬𑁄 𑀲𑀗𑁆𑀕𑀳𑀺𑀢𑀸.

𑀪𑀡𑁆𑀟𑀸𑀕𑀸𑀭𑀺𑀓𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀯𑀸𑀢𑀺 𑀕𑀳𑀝𑁆𑀞𑀸𑀦𑀁 𑀪𑀡𑁆𑀟𑀧𑀝𑀺𑀲𑀸𑀫𑀦𑀁, 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀯𑀸. ‘‘𑀘𑀻𑀯𑀭𑀸𑀤𑀻𑀦𑀺 𑀅𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺 𑀇𑀤𑀁 ‘‘𑀉𑀧𑀚𑁆𑀛𑀸𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄…𑀧𑁂… 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄’’𑀢𑀺𑀆𑀤𑀺 (𑀫𑀳𑀸𑀯. 𑁬𑁭) 𑀯𑀘𑀦𑀢𑁄 𑀅𑀦𑀸𑀤𑀭𑀺𑀬𑁂𑀦 𑀆𑀫𑀺𑀲𑀲𑀗𑁆𑀕𑀳𑀁 𑀅𑀓𑀭𑁄𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀸𑀤𑀻𑀦𑀁 𑀅𑀤𑀸𑀦𑀆𑀧𑀢𑁆𑀢𑀺𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀸.

𑀧𑀸𑀴𑀺𑀬𑀁 𑀤𑁂𑀲𑁂𑀦𑁆𑀢𑁄𑀢𑀺 𑀲𑀪𑀸𑀕𑀸𑀧𑀢𑁆𑀢𑀺𑀁, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀆𑀤𑀺𑀜𑁆𑀘 𑀤𑁂𑀲𑁂𑀦𑁆𑀢𑁄. 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀆𑀧𑀢𑁆𑀢𑀺𑀁 𑀅𑀦𑀸𑀯𑀺𑀓𑀭𑁄𑀦𑁆𑀢𑁄, 𑀦 𑀤𑁂𑀲𑁂𑀦𑁆𑀢𑁄 𑀘 𑀆𑀧𑀚𑁆𑀚𑀢𑀺 𑀦𑀸𑀫. 𑀑𑀯𑀸𑀤𑀁 𑀅𑀕𑀡𑁆𑀳𑀦𑁆𑀢𑁄𑀢𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀺𑀑𑀯𑀸𑀤𑀢𑁆𑀣𑀸𑀬 𑀯𑀼𑀢𑁆𑀢𑀁 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑁄 𑀩𑀸𑀮𑀕𑀺𑀮𑀸𑀦𑀕𑀫𑀺𑀬𑀯𑀺𑀯𑀚𑁆𑀚𑀺𑀢𑁄. 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀁 𑀤𑀺𑀦𑁆𑀦𑀁 𑀅𑀜𑁆𑀜𑀲𑁆𑀲 𑀤𑀸𑀦𑁂, 𑀲𑀗𑁆𑀖𑀸𑀝𑀺𑀁 𑀅𑀧𑀸𑀭𑀼𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀲𑀼 𑀘 𑀆𑀧𑀢𑁆𑀢𑀺𑀬𑁄𑀧𑀺 𑀅𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑁄𑀯. 𑀧𑀫𑀸𑀡𑀦𑁆𑀢𑀺 𑀲𑀗𑁆𑀖𑀪𑁂𑀤𑀸𑀦𑀦𑁆𑀢𑀭𑀺𑀬𑀦𑀺𑀧𑁆𑀨𑀢𑁆𑀢𑀺𑀬𑀸 𑀮𑀓𑁆𑀔𑀡𑀁. 𑀩𑀸𑀮𑀲𑁆𑀲𑀸𑀢𑀺 𑀦𑀺𑀲𑁆𑀲𑀬𑀕𑁆𑀕𑀳𑀡𑀯𑀺𑀥𑀺𑀁 𑀅𑀚𑀸𑀦𑀦𑁆𑀢𑀲𑁆𑀲 𑀮𑀚𑁆𑀚𑀺𑀩𑀸𑀮𑀲𑁆𑀲𑁂𑀯. 𑀮𑀚𑁆𑀚𑀺𑀲𑁆𑀲𑀸𑀢𑀺 𑀩𑁆𑀬𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀤𑀸𑀬𑀓𑀲𑀪𑀸𑀕𑀢𑀁 𑀧𑀭𑀺𑀯𑀻𑀫𑀁𑀲𑀦𑁆𑀢𑀲𑁆𑀲. 𑀯𑀺𑀦𑀬𑁂 𑀆𑀕𑀢𑀸 𑀅𑀢𑁆𑀣𑀸 𑀯𑁂𑀦𑀬𑀺𑀓𑀸𑀢𑀺 𑀆𑀳 ‘‘𑀤𑁆𑀯𑁂 𑀅𑀢𑁆𑀣𑀸 𑀯𑀺𑀦𑀬𑀲𑀺𑀤𑁆𑀥𑀸’’𑀢𑀺.

𑀧𑀸𑀴𑀺𑀬𑀁 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀦𑁆𑀢𑀺 𑀏𑀢𑁆𑀣 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀯𑀺𑀳𑀸𑀭𑀢𑁄 𑀦𑀺𑀲𑁆𑀲𑀸𑀭𑀡𑀢𑁆𑀢𑀸 𑀦𑀺𑀲𑁆𑀲𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀬𑀲𑁆𑀫𑀸 𑀓𑀼𑀮𑀤𑀽𑀲𑀓𑀁 𑀅𑀓𑀭𑁄𑀦𑁆𑀢𑁄 𑀧𑀼𑀕𑁆𑀕𑀮𑁄 𑀆𑀧𑀢𑁆𑀢𑀺𑀩𑀳𑀼𑀮𑁄𑀧𑀺 𑀆𑀯𑁂𑀡𑀺𑀓𑀮𑀓𑁆𑀔𑀡𑁂𑀦 𑀅𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁. 𑀬𑀲𑁆𑀫𑀸 𑀧𑀦 𑀆𑀧𑀢𑁆𑀢𑀸𑀤𑀺𑀩𑀳𑀼𑀮𑀲𑁆𑀲𑀸𑀧𑀺 ‘‘𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁨𑁭) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀼𑀦𑀺𑀲𑁆𑀲𑀸𑀭𑀺𑀢𑁄, 𑀲𑀩𑁆𑀩𑀣𑀸 𑀧𑀦 𑀲𑀼𑀤𑁆𑀥𑁄 𑀦𑀺𑀭𑀸𑀧𑀢𑁆𑀢𑀺𑀓𑁄 𑀤𑀼𑀦𑁆𑀦𑀺𑀲𑁆𑀲𑀸𑀭𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀦𑁆𑀢𑀺𑀆𑀤𑀻𑀲𑀼 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀏𑀢𑁆𑀣 𑀑𑀲𑀸𑀭𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀳𑀢𑁆𑀣𑀘𑁆𑀙𑀺𑀦𑁆𑀦𑀸𑀤𑀺𑀓𑁄 𑀏𑀓𑀘𑁆𑀘𑁄 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀧𑁆𑀧𑀢𑁆𑀢𑁄𑀧𑀺 𑀲𑁄𑀲𑀸𑀭𑀺𑀢𑁄, 𑀧𑀡𑁆𑀟𑀓𑀸𑀤𑀺𑀓𑁄 𑀤𑁄𑀲𑀸𑀭𑀺𑀢𑁄𑀢𑀺 𑀅𑀢𑁆𑀣𑁄.

𑀤𑀼𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁩. 𑀢𑀺𑀓𑁂𑀲𑀼 𑀮𑁄𑀳𑀺𑀢𑀼𑀧𑁆𑀧𑀸𑀤𑀸𑀧𑀢𑁆𑀢𑀺𑀦𑁆𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁. 𑀆𑀯𑀼𑀲𑁄𑀯𑀸𑀤𑁂𑀦𑀸𑀢𑀺 ‘‘𑀆𑀯𑀼𑀲𑁄’’𑀢𑀺 𑀆𑀮𑀧𑀦𑁂𑀦. 𑀆𑀧𑀢𑁆𑀢𑀺𑀦𑁆𑀢𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁. 𑀲𑁂𑀲𑀸 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘𑀸𑀢𑀺 𑀏𑀢𑁆𑀣 𑀅𑀭𑀼𑀡𑀼𑀕𑁆𑀕𑀫𑀦𑁂 𑀆𑀧𑀚𑁆𑀚𑀺𑀢𑀩𑁆𑀩𑀸 𑀧𑀞𑀫𑀓𑀣𑀺𑀦𑀸𑀤𑀻 (𑀧𑀸𑀭𑀸. 𑁪𑁫𑁯) 𑀲𑀩𑁆𑀩𑀸 𑀆𑀧𑀢𑁆𑀢𑀺𑀬𑁄𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀁 𑀯𑁂𑀫𑀚𑁆𑀛𑁂𑀬𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀢𑀢𑀺𑀬𑀓𑁄𑀝𑁆𑀞𑀸𑀲𑀜𑁆𑀜𑁂𑀯 𑀧𑀯𑀺𑀝𑁆𑀞𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀆𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀤𑀺𑀯𑀸 𑀆𑀧𑀚𑁆𑀚𑀺𑀢𑀩𑁆𑀩𑁂𑀲𑀼 𑀏𑀯 𑀧𑀯𑀺𑀝𑁆𑀞𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀦𑀸𑀧𑀢𑁆𑀢𑀺𑀬𑁄, 𑀧𑀦 𑀭𑀢𑁆𑀢𑀦𑁆𑀥𑀓𑀸𑀭𑁂 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀦𑁆𑀢𑀺𑀝𑁆𑀞𑀦𑀸𑀧𑀢𑁆𑀢𑀺 𑀘 𑀭𑀢𑁆𑀢𑀺𑀬𑀜𑁆𑀜𑁂𑀯 𑀆𑀧𑀚𑁆𑀚𑀺𑀢𑀩𑁆𑀩𑀸.

𑀧𑀼𑀭𑁂𑀪𑀢𑁆𑀢𑀁 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀦𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀸𑀤𑀻𑀦𑀺 𑀤𑀺𑀯𑀸 𑀏𑀯 𑀆𑀧𑀚𑁆𑀚𑀺𑀢𑀩𑁆𑀩𑀸𑀦𑀺. 𑀓𑁂𑀘𑀺 𑀧𑀦 ‘‘𑀪𑁄𑀚𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑁂𑀔𑀺𑀬𑀸𑀦𑀺, 𑀕𑀡𑀪𑁄𑀚𑀦𑀸𑀤𑀻𑀦𑀺 𑀘 𑀤𑀺𑀯𑀸 𑀏𑀯 𑀆𑀧𑀚𑁆𑀚𑀺𑀢𑀩𑁆𑀩𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀈𑀤𑀺𑀲𑀸 𑀆𑀧𑀢𑁆𑀢𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀲𑁂𑀲𑀸𑀯 𑀢𑀢𑀺𑀬𑀓𑁄𑀝𑁆𑀞𑀸𑀲𑀁 𑀪𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦 𑀊𑀦𑀤𑀲𑀯𑀲𑁆𑀲𑁄𑀢𑀺 𑀤𑀲𑀯𑀲𑁆𑀲𑀲𑁆𑀲 𑀩𑀸𑀮𑀲𑁆𑀲𑁂𑀯 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀅𑀲𑀫𑁆𑀫𑀸𑀯𑀢𑁆𑀢𑀦𑀸𑀧𑀢𑁆𑀢𑀺𑀁, 𑀅𑀮𑀚𑁆𑀚𑀻𑀦𑀁 𑀦𑀺𑀲𑁆𑀲𑀬𑀤𑀸𑀦𑀸𑀤𑀺𑀫𑁆𑀧𑀺 𑀤𑀲𑀯𑀲𑁆𑀲𑁄𑀯 𑀆𑀧𑀚𑁆𑀚𑀢𑀺, 𑀯𑀼𑀝𑁆𑀞𑀸𑀧𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀦𑀼𑀩𑀦𑁆𑀥𑀸𑀤𑀺𑀫𑁆𑀧𑀺 𑀊𑀦𑀤𑀲𑀯𑀲𑁆𑀲𑀸 𑀆𑀧𑀚𑁆𑀚𑀦𑁆𑀢𑀺. 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄𑀢𑀺 𑀲𑀼𑀧𑀦𑁆𑀢𑀲𑁆𑀲 𑀪𑀯𑀗𑁆𑀕𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀅𑀧𑁆𑀧𑀯𑀸𑀭𑁂𑀦𑁆𑀢𑁄𑀢𑀺 𑀅𑀦𑀸𑀤𑀭𑀺𑀬𑁂𑀦 𑀅𑀧𑁆𑀧𑀯𑀸𑀭𑁂𑀦𑁆𑀢𑁄 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀅𑀧𑁆𑀧𑀯𑀸𑀭𑁂𑀢𑁆𑀯𑀸 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑁂 𑀲𑀗𑁆𑀖𑁂 𑀧𑀯𑀸𑀭𑁂𑀦𑁆𑀢𑁂 𑀢𑀢𑁆𑀣 𑀅𑀦𑀸𑀤𑀭𑀺𑀬𑁂𑀦 𑀅𑀧𑁆𑀧𑀯𑀸𑀭𑁂𑀦𑁆𑀢𑁄 𑀢𑀫𑁂𑀯 𑀆𑀧𑀢𑁆𑀢𑀺𑀁 𑀓𑀸𑀴𑁂𑀧𑀺 𑀆𑀧𑀚𑁆𑀚𑀢𑀻𑀢𑀺 𑀚𑀼𑀡𑁆𑀳𑁂 𑀏𑀯𑀸𑀢𑀺 𑀦𑀺𑀬𑀫𑁄 𑀦 𑀤𑀺𑀲𑁆𑀲𑀢𑀺, 𑀧𑀘𑁆𑀙𑀺𑀫𑀯𑀲𑁆𑀲𑀁𑀯𑀼𑀢𑁆𑀣𑁄 𑀧𑀦 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀺𑀬𑀫𑁂𑀯 𑀧𑀯𑀸𑀭𑁂𑀢𑀼𑀁 𑀮𑀩𑁆𑀪𑀢𑀻𑀢𑀺 𑀢𑀢𑁆𑀣 𑀅𑀧𑁆𑀧𑀯𑀸𑀭𑀡𑀸𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀏𑀯 𑀚𑀼𑀡𑁆𑀳𑁂 𑀆𑀧𑀚𑁆𑀚𑀢𑀻𑀢𑀺 𑀦𑀺𑀬𑀫𑁂𑀢𑀩𑁆𑀩𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀼𑀡𑁆𑀳𑁂 𑀓𑀧𑁆𑀧𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

‘‘𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’’𑀢𑀺 𑀇𑀫𑀺𑀦𑀸 ‘‘𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 𑀦𑀺𑀬𑀫𑀯𑀘𑀦𑁂𑀦𑁂𑀯 𑀅𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀲𑁆𑀲𑀸𑀦𑀼𑀧𑀕𑀫𑀦𑀅𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀸𑀤𑀬𑁄𑀧𑀺 𑀯𑀲𑁆𑀲𑁂 𑀏𑀯 𑀆𑀧𑀚𑁆𑀚𑀢𑀺. 𑀯𑀢𑁆𑀣𑀺𑀓𑀫𑁆𑀫𑀸𑀤𑀺𑀫𑁆𑀧𑀺 𑀕𑀺𑀮𑀸𑀦𑁄 𑀏𑀯. 𑀅𑀥𑁄𑀢𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑀸𑀤𑀻𑀦𑀺𑀧𑀺 𑀅𑀦𑁆𑀢𑁄 𑀏𑀯 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀸𑀧𑀼𑀘𑁆𑀙𑀸 𑀆𑀭𑀸𑀫𑀧𑁆𑀧𑀯𑁂𑀲𑀦𑀸𑀤𑀺 𑀘 𑀅𑀦𑁆𑀢𑁄𑀲𑀻𑀫𑀸𑀬𑀫𑁂𑀯. 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀲𑁆𑀲 𑀅𑀦𑀸𑀧𑀼𑀘𑁆𑀙𑀸𑀤𑀺𑀲𑀸𑀧𑀓𑁆𑀓𑀫𑀦𑀸𑀤𑀺 𑀘 𑀩𑀳𑀺𑀲𑀻𑀫𑀸𑀬𑀫𑁂𑀯. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀲𑀦𑁆𑀢𑀺𑀬𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀯𑀺𑀓𑀭𑀡𑀸𑀧𑀢𑁆𑀢𑀺𑀲𑀫𑀦𑀼𑀪𑀸𑀲𑀦𑀊𑀦𑀯𑀻𑀲𑀢𑀺𑀯𑀲𑁆𑀲𑀽𑀧𑀲𑀫𑁆𑀧𑀸𑀤𑀦𑀸𑀤𑀺𑀲𑀩𑁆𑀩𑀅𑀥𑀫𑁆𑀫𑀓𑀫𑁆𑀫𑀸𑀧𑀢𑁆𑀢𑀺𑀬𑁄𑀧𑀺 𑀲𑀗𑁆𑀖𑁂 𑀏𑀯. 𑀅𑀥𑀫𑁆𑀫𑁂𑀦 𑀕𑀡𑀼𑀧𑁄𑀲𑀣𑀸𑀤𑀻𑀲𑀼𑀧𑀺 𑀕𑀡𑀸𑀤𑀺𑀫𑀚𑁆𑀛𑁂 𑀏𑀯. 𑀅𑀮𑀚𑁆𑀚𑀺𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀕𑁆𑀕𑀳𑀡𑀸𑀤𑀺𑀧𑀺 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀏𑀯 𑀆𑀧𑀚𑁆𑀚𑀢𑀺.

𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀻𑀢𑀺 𑀬𑁄 𑀉𑀫𑁆𑀫𑀢𑁆𑀢𑀓𑁄𑀧𑀺 𑀯𑀻𑀢𑀺𑀓𑁆𑀓𑀫𑀓𑀸𑀮𑁂, 𑀅𑀦𑀼𑀫𑁆𑀫𑀢𑁆𑀢𑁄 𑀲𑀜𑁆𑀘𑀺𑀘𑁆𑀘𑁂𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀽𑀳𑀺 𑀧𑀘𑁆𑀙𑀸 𑀘𑁄𑀤𑀺𑀢𑁄 𑀲𑀭𑀫𑀸𑀦𑁄 𑀏𑀯 ‘‘𑀦 𑀲𑀭𑀸𑀫𑀻’’𑀢𑀺 𑀯𑀤𑀢𑀺, 𑀬𑁄 𑀘 ‘‘𑀲𑀼𑀧𑀺𑀦𑀁 𑀯𑀺𑀬 𑀲𑀭𑀸𑀫𑀻’’𑀢𑀺 𑀯𑀸 𑀫𑀼𑀲𑀸 𑀯𑀤𑀢𑀺, 𑀬𑁄 𑀘 𑀉𑀫𑁆𑀫𑀢𑁆𑀢𑀓𑀓𑀸𑀮𑁂 𑀓𑀢𑀁 𑀲𑀩𑁆𑀩𑀫𑁆𑀧𑀺 𑀲𑀩𑁆𑀩𑁂𑀲𑀁 𑀯𑀝𑁆𑀝𑀢𑀻𑀢𑀺 𑀯𑀤𑀢𑀺, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀤𑀺𑀦𑁆𑀦𑀸𑀦𑀺 𑀢𑀻𑀡𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺 𑀅𑀥𑀫𑁆𑀫𑀺𑀓𑀸𑀦𑀺.

𑀅𑀧𑀓𑀢𑀢𑁆𑀢𑁄𑀢𑀺 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀽. 𑀢𑁂𑀦𑀸𑀳 ‘‘𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’’𑀢𑀺 (𑀧𑀭𑀺. 𑁩𑁨𑁫). ‘‘𑀤𑀺𑀝𑁆𑀞𑀺𑀜𑁆𑀘 𑀅𑀦𑀺𑀲𑁆𑀲𑀚𑁆𑀚𑀦𑁆𑀢𑀸𑀦𑀁𑀬𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀪𑀺𑀓𑁆𑀔𑀽𑀳𑀺 𑀑𑀯𑀤𑀺𑀬𑀫𑀸𑀦𑀲𑁆𑀲 𑀤𑀺𑀝𑁆𑀞𑀺𑀬𑀸 𑀅𑀦𑀺𑀲𑁆𑀲𑀚𑁆𑀚𑀦𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁, 𑀧𑀸𑀘𑀺𑀢𑁆𑀢𑀺𑀬𑀫𑁆𑀧𑀺 𑀯𑀸 𑀅𑀯𑀲𑁆𑀲𑀫𑁂𑀯 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁.

𑀫𑀼𑀔𑀸𑀮𑀫𑁆𑀩𑀭𑀓𑀭𑀡𑀸𑀤𑀺𑀪𑁂𑀤𑁄𑀢𑀺 𑀫𑀼𑀔𑀪𑁂𑀭𑀻𑀯𑀸𑀤𑀦𑀸𑀤𑀺𑀧𑁆𑀧𑀪𑁂𑀤𑁄. 𑀉𑀧𑀖𑀸𑀢𑁂𑀢𑀻𑀢𑀺 𑀯𑀺𑀦𑀸𑀲𑁂𑀢𑀺. 𑀩𑀻𑀚𑀦𑀺𑀕𑁆𑀕𑀸𑀳𑀸𑀤𑀺𑀓𑁂𑀢𑀺 𑀘𑀺𑀢𑁆𑀢𑀁 𑀩𑀻𑀚𑀦𑀺𑀁 𑀕𑀸𑀳𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀸𑀤𑀺𑀓𑀭𑀡𑁂𑀢𑀺 𑀅𑀢𑁆𑀣𑁄.

𑀢𑀺𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁪. 𑀘𑀢𑀼𑀓𑁆𑀓𑁂𑀲𑀼 𑀲𑁄𑀢𑀺 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁄. 𑀅𑀯𑀸𑀧𑀼𑀭𑀡𑀁 𑀤𑀸𑀢𑀼𑀦𑁆𑀢𑀺 𑀕𑀩𑁆𑀪𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀭𑀺𑀓𑁆𑀔𑀸𑀭𑀝𑁆𑀞𑀧𑀦𑀢𑁆𑀣𑀸𑀬 𑀯𑀺𑀯𑀭𑀡𑀓𑀼𑀜𑁆𑀘𑀺𑀓𑀁 𑀤𑀸𑀢𑀼𑀁. 𑀲𑀗𑁆𑀖𑀢𑁆𑀣𑀸𑀬 𑀉𑀧𑀦𑀻𑀢𑀁 𑀲𑀬𑀫𑁂𑀯 𑀅𑀦𑁆𑀢𑁄 𑀧𑀝𑀺𑀲𑀸𑀫𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑁂𑀦𑀸𑀳 ‘‘𑀅𑀦𑁆𑀢𑁄 𑀞𑀧𑀸𑀧𑁂𑀢𑀼𑀜𑁆𑀘 𑀯𑀝𑁆𑀝𑀢𑀻’’𑀢𑀺.

𑀆𑀤𑀺𑀓𑀫𑁆𑀫𑀺𑀓𑁂𑀲𑀼 𑀧𑀞𑀫𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀧𑀞𑀫𑀁 𑀉𑀧𑁆𑀧𑀦𑁆𑀦𑀯𑀲𑁂𑀦𑀸’’𑀢𑀺. 𑀧𑀸𑀴𑀺𑀬𑀁 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲𑀸𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑀫𑁆𑀩𑀦𑁆𑀥𑀺𑀦𑀺𑀬𑀸 𑀅𑀦𑀸𑀧𑀢𑁆𑀢𑀺𑀬𑀸 𑀏𑀯𑀫𑀢𑁆𑀣𑁄. 𑀫𑀦𑁆𑀢𑀪𑀸𑀲𑀸𑀢𑀺 𑀫𑀦𑁆𑀢𑀸𑀬 𑀧𑀜𑁆𑀜𑀸𑀬 𑀓𑀣𑀦𑀁. ‘‘𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀇𑀤𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀬𑀣𑀸𑀯𑀼𑀟𑁆𑀠𑀁 𑀅𑀯𑀲𑁂𑀲𑀸𑀦𑀁 𑀬𑀣𑀸𑀓𑀢𑀺𑀓’’𑀦𑁆𑀢𑀺 (𑀘𑀽𑀴𑀯. 𑁪𑁨𑁬) 𑀯𑀘𑀦𑀢𑁄 𑀆𑀤𑀺𑀢𑁄 𑀅𑀝𑁆𑀞𑀦𑁆𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁.

‘‘𑀇𑀥 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀯𑀤𑀦𑁆𑀢𑁄𑀧𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀲𑀜𑁆𑀘𑀺𑀘𑁆𑀘 𑀓𑀧𑁆𑀧𑀺𑀬𑀁 𑀅𑀓𑀧𑁆𑀧𑀺𑀬𑀦𑁆𑀢𑀺 𑀯𑀸 𑀅𑀓𑀧𑁆𑀧𑀺𑀬𑀁 𑀓𑀧𑁆𑀧𑀺𑀬𑀦𑁆𑀢𑀺 𑀯𑀸 𑀓𑀣𑁂𑀦𑁆𑀢𑀲𑁆𑀲 𑀲𑀩𑁆𑀩𑀢𑁆𑀣 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀩𑁆𑀩𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀸𑀦𑀺 𑀇𑀥 𑀧𑀭𑀺𑀯𑀸𑀭𑁂 𑀉𑀤𑁆𑀥𑀝𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀻’’𑀢𑀺𑀆𑀤𑀺𑀫𑀸𑀳.

𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸

𑁩𑁨𑁫. 𑀧𑀜𑁆𑀘𑀓𑁂𑀲𑀼 𑀆𑀧𑀼𑀘𑁆𑀙𑀺𑀢𑁆𑀯𑀸 𑀘𑀸𑀭𑀲𑁆𑀲 𑀅𑀪𑀸𑀯𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 ‘‘𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄’’𑀢𑀺 𑀇𑀫𑀲𑁆𑀲 𑀅𑀗𑁆𑀕𑀲𑁆𑀲 𑀅𑀪𑀸𑀯𑀸 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀢𑀲𑁆𑀲 𑀲𑀩𑁆𑀩𑀣𑀸 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀲𑀸𑀦𑀁 𑀦𑁂𑀢𑁆𑀯𑀸 𑀧𑀼𑀦 𑀆𑀦𑀻𑀢𑀓𑀦𑁆𑀢𑀺 𑀲𑀼𑀲𑀸𑀦𑁂 𑀧𑁂𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁂𑀳𑀺 𑀦𑁆𑀳𑀢𑁆𑀯𑀸 𑀙𑀟𑁆𑀟𑀺𑀢𑀸𑀦𑀺 𑀦𑀺𑀯𑀢𑁆𑀣𑀧𑀸𑀭𑀼𑀢𑀯𑀢𑁆𑀣𑀸𑀦𑀺 𑀏𑀯𑀁 𑀯𑀼𑀘𑁆𑀘𑀦𑁆𑀢𑀺.

𑀧𑀸𑀴𑀺𑀬𑀁 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺 𑀧𑀜𑁆𑀘𑀳𑀺 𑀅𑀯𑀳𑀸𑀭𑀗𑁆𑀕𑁂𑀳𑀺. 𑀯𑀢𑁆𑀣𑀼𑀢𑁄 𑀧𑀦 𑀕𑀭𑀼𑀓𑀮𑀳𑀼𑀓𑀪𑁂𑀤𑁂𑀦 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀢𑁆𑀣𑀺𑀧𑀼𑀭𑀺𑀲𑀲𑀁𑀬𑁄𑀕𑀸𑀤𑀺𑀓𑀁 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀳𑁂𑀢𑀼𑀓𑀁 𑀧𑀝𑀺𑀪𑀸𑀦𑀘𑀺𑀢𑁆𑀢𑀓𑀫𑁆𑀫𑀁 𑀦𑀸𑀫. 𑀧𑀜𑁆𑀳𑀸𑀲𑀳𑀲𑁆𑀲𑀁 𑀧𑀼𑀘𑁆𑀙𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀧𑀜𑁆𑀳𑀸𑀲𑀳𑀲𑁆𑀲𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀞𑀺𑀢𑀁 𑀤𑀳𑀭𑀁 𑀧𑀼𑀘𑁆𑀙𑀺. 𑀇𑀢𑀭𑁄𑀧𑀺 𑀤𑀳𑀭𑁄 𑀅𑀢𑁆𑀢𑀦𑁄 𑀕𑀢𑀫𑀕𑁆𑀕𑀢𑁆𑀢𑀸 𑀲𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑁂𑀦 𑀣𑁂𑀭𑁄 𑀧𑀲𑀻𑀤𑀺. 𑀯𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀻𑀢𑀺 𑀯𑀢𑁆𑀢𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀓𑀺𑀁 𑀢𑁆𑀯𑀁 𑀆𑀯𑀼𑀲𑁄𑀢𑀺𑀆𑀤𑀺𑀓𑀁 𑀣𑁂𑀭𑁄 𑀔𑀻𑀡𑀸𑀲𑀯𑁄 𑀲𑀫𑁆𑀫𑀚𑁆𑀚𑀦𑀸𑀦𑀺𑀲𑀁𑀲𑀁 𑀲𑀩𑁆𑀩𑁂𑀲𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀅𑀯𑁄𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀝𑁆𑀞𑀸𑀬 𑀧𑀤𑀘𑁂𑀢𑀺𑀬’’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀘𑁄𑀤𑀦𑀁 𑀓𑀸𑀭𑁂𑀲𑁆𑀲𑀸𑀫𑀻𑀢𑀺 𑀪𑀕𑀯𑀢𑀸 𑀅𑀢𑁆𑀢𑀸𑀦𑀁 𑀘𑁄𑀤𑀸𑀧𑁂𑀲𑁆𑀲𑀸𑀫𑀺, 𑀅𑀢𑁆𑀢𑀸𑀦𑀁 𑀦𑀺𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀓𑀁 𑀕𑀬𑁆𑀳𑀽𑀧𑀕𑀦𑁆𑀢𑀺 𑀏𑀢𑁆𑀢𑀓𑀁 𑀅𑀥𑀺𑀓𑀭𑀡𑀯𑀽𑀧𑀲𑀫𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑀯𑀘𑀦𑀦𑁆𑀢𑀺 𑀬𑀣𑀸 𑀲𑀼𑀢𑁆𑀯𑀸 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 ‘‘𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀪𑀸𑀲𑀧𑀭𑀺𑀬𑀦𑁆𑀢𑀁 𑀅𑀦𑀼𑀕𑁆𑀕𑀳𑁂𑀢𑁆𑀯𑀸’’𑀢𑀺 𑀏𑀓𑀁, ‘‘𑀅𑀥𑀫𑁆𑀫𑁂𑀦 𑀓𑀭𑁄𑀢𑀻’’𑀢𑀺 𑀏𑀓𑀁, ‘‘𑀅𑀧𑁆𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀏𑀓𑀜𑁆𑀘 𑀓𑀢𑁆𑀯𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀢𑁆𑀣𑀼𑀦𑁆𑀢𑀺 𑀫𑁂𑀣𑀼𑀦𑀸𑀤𑀺𑀯𑀻𑀢𑀺𑀓𑁆𑀓𑀫𑀁. 𑀓𑀣𑀸𑀦𑀼𑀲𑀦𑁆𑀥𑀺𑀯𑀺𑀦𑀺𑀘𑁆𑀙𑀬𑀸𑀦𑀼𑀮𑁄𑀫𑀲𑀦𑁆𑀥𑀺𑀯𑀲𑁂𑀦 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀻𑀢𑀺 𑀘𑁄𑀤𑀓𑁂𑀦 𑀯𑀸 𑀘𑀼𑀤𑀺𑀢𑀓𑁂𑀦 𑀯𑀸 𑀯𑀼𑀢𑁆𑀢𑀓𑀣𑀸𑀦𑀼𑀲𑀦𑁆𑀥𑀺𑀦𑀸 𑀢𑁂𑀲𑀁 𑀯𑀘𑀦𑀧𑀝𑀺𑀯𑀘𑀦𑀸𑀦𑀼𑀭𑀽𑀧𑁂𑀦 𑀯𑀤𑀦𑁆𑀢𑁄 𑀓𑀣𑀸𑀦𑀼𑀲𑀦𑁆𑀥𑀺𑀦𑀸 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺 𑀦𑀸𑀫, 𑀢𑀜𑁆𑀘 𑀲𑀼𑀢𑁆𑀢𑀯𑀺𑀪𑀗𑁆𑀕𑁂 𑀯𑀺𑀦𑀻𑀢𑀯𑀢𑁆𑀣𑀼𑀲𑀗𑁆𑀔𑀸𑀢𑁂𑀦 𑀯𑀺𑀦𑀺𑀘𑁆𑀙𑀬𑀸𑀦𑀼𑀮𑁄𑀫𑁂𑀦𑁂𑀯 𑀯𑀤𑀦𑁆𑀢𑁄 𑀯𑀺𑀦𑀺𑀘𑁆𑀙𑀬𑀸𑀦𑀼𑀮𑁄𑀫𑀲𑀦𑁆𑀥𑀺𑀯𑀲𑁂𑀦 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺 𑀦𑀸𑀫. 𑀜𑀢𑁆𑀢𑀺𑀓𑀫𑁆𑀫𑀁 𑀦𑀸𑀫 𑀳𑁄𑀢𑀻𑀢𑀺 𑀜𑀢𑁆𑀢𑀺𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀦 𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀜𑀢𑁆𑀢𑀺𑀬𑀸 𑀓𑀫𑁆𑀫𑀧𑁆𑀧𑀢𑁆𑀢𑁄𑀢𑀺 𑀜𑀢𑁆𑀢𑀺𑀬𑀸 𑀦𑀺𑀝𑁆𑀞𑀺𑀢𑀸𑀬𑀧𑀺 𑀓𑀫𑁆𑀫𑀧𑁆𑀧𑀢𑁆𑀢𑁄 𑀏𑀯 𑀳𑁄𑀢𑀺. 𑀅𑀦𑀼𑀲𑁆𑀲𑀸𑀯𑀦𑀝𑁆𑀞𑀸𑀦𑁂 𑀏𑀯 𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀳𑁄𑀢𑀻𑀢𑀺 𑀜𑀢𑁆𑀢𑀺𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀁 𑀜𑀢𑁆𑀢𑀺𑀬𑀸 𑀓𑀸𑀭𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

𑀧𑀸𑀴𑀺𑀬𑀁 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄𑀢𑀺 𑀆𑀧𑀢𑁆𑀢𑀺𑀢𑁄 𑀯𑀺𑀲𑀼𑀤𑁆𑀥𑀺𑀳𑁂𑀢𑀼𑀢𑁆𑀢𑀸, 𑀯𑀺𑀲𑀼𑀤𑁆𑀥𑁂𑀳𑀺 𑀓𑀢𑁆𑀢𑀩𑁆𑀩𑀢𑁄 𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑀯𑀼𑀢𑁆𑀢𑀸.

𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀓𑁆𑀓𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁨𑁬. 𑀙𑀓𑁆𑀓𑀸𑀤𑀻𑀲𑀼 𑀧𑀸𑀴𑀺𑀬𑀁 𑀙 𑀅𑀕𑀸𑀭𑀯𑀸𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀼, 𑀅𑀧𑁆𑀧𑀫𑀸𑀤𑁂, 𑀧𑀝𑀺𑀲𑀦𑁆𑀣𑀸𑀭𑁂 𑀘 𑀙 𑀅𑀕𑀸𑀭𑀯𑀸, 𑀢𑁂𑀲𑀼 𑀏𑀯 𑀘 𑀙 𑀕𑀸𑀭𑀯𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀙𑀩𑁆𑀩𑀲𑁆𑀲𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀯𑀺𑀪𑀗𑁆𑀕𑁂 𑀆𑀕𑀢𑀲𑁆𑀲 𑀧𑀭𑀫𑀲𑁆𑀲 𑀤𑀲𑁆𑀲𑀦𑀁.

𑁩𑁨𑁮. 𑀧𑀸𑀴𑀺𑀬𑀁 𑀆𑀕𑀢𑁂𑀳𑀺 𑀲𑀢𑁆𑀢𑀳𑀻𑀢𑀺 ‘‘𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁪) 𑀆𑀕𑀢𑁂𑀳𑀺 𑀲𑀢𑁆𑀢𑀳𑀺.

𑁩𑁨𑁯. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀢𑀁 𑀅𑀦𑀢𑁆𑀣𑀲𑁆𑀲 𑀅𑀘𑀭𑀡𑀁 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂, 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀯𑀸 𑀓𑀼𑀢𑁄 𑀓𑁂𑀦 𑀓𑀸𑀭𑀡𑁂𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺 𑀆𑀖𑀸𑀢𑀁 𑀧𑀝𑀺𑀯𑀺𑀦𑁂𑀢𑀺.

𑁩𑁩𑁦. 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺𑀆𑀤𑀺𑀦𑀸 𑀯𑀲𑁂𑀦𑀸𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀅𑀲𑀲𑁆𑀲𑀢𑁄 𑀮𑁄𑀓𑁄. 𑀅𑀦𑁆𑀢𑀯𑀸 𑀮𑁄𑀓𑁄, 𑀅𑀦𑀦𑁆𑀢𑀯𑀸 𑀮𑁄𑀓𑁄. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀯𑀸, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸. 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀫𑁆𑀫𑀭𑀡𑀸, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀫𑁆𑀫𑀭𑀡𑀸. 𑀳𑁄𑀢𑀺 𑀘 𑀦 𑀳𑁄𑀢𑀺 𑀘 𑀢𑀣𑀸𑀕𑀢𑁄 𑀧𑀭𑀫𑁆𑀫𑀭𑀡𑀸, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀫𑁆𑀫𑀭𑀡𑀸’’𑀢𑀺 (𑀫. 𑀦𑀺. 𑁧.𑁨𑁬𑁯) 𑀏𑀯𑀁 𑀆𑀕𑀢𑀸 𑀤𑀲 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀅𑀝𑁆𑀞𑀫𑀺𑀘𑁆𑀙𑀸𑀜𑀸𑀡𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀳𑀺 𑀲𑀤𑁆𑀥𑀺𑀁 𑀤𑀲 𑀫𑀺𑀘𑁆𑀙𑀢𑁆𑀢𑀸. 𑀢𑀢𑁆𑀣 𑀫𑀺𑀘𑁆𑀙𑀸𑀜𑀸𑀡𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁄 𑀫𑁄𑀳𑁄. 𑀅𑀯𑀺𑀫𑀼𑀢𑁆𑀢𑀲𑁆𑀲𑁂𑀯 𑀯𑀺𑀫𑀼𑀢𑁆𑀢𑀲𑀜𑁆𑀜𑀺𑀢𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀦𑀸𑀫.

𑀯𑀺𑀧𑀭𑀻𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀲𑀫𑁆𑀫𑀸𑀜𑀸𑀡𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸 𑀤𑀲. 𑀢𑀢𑁆𑀣 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀧𑀦 𑀜𑀸𑀡𑀁 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀸 𑀲𑀫𑁆𑀫𑀸𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀓𑀼𑀢𑁆𑀢𑀭𑀺𑀓𑀦𑀬𑁄 𑀦𑀺𑀝𑁆𑀞𑀺𑀢𑁄.