𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁨𑁮. 𑀙𑀝𑁆𑀞𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀸𑀴𑀺𑀬𑀁 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸𑀢𑀺 𑀧𑀺𑀝𑁆𑀞𑀧𑀽𑀯𑀸𑀤𑀺𑀁 𑀅𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀺𑀡𑁆𑀡𑀲𑀗𑁆𑀔𑀸𑀢𑀁 𑀥𑀜𑁆𑀜𑀗𑁆𑀓𑀼𑀭𑀸𑀤𑀺𑀲𑀼𑀭𑀸𑀩𑀻𑀚𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀢𑀸. 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀲𑀸𑀲𑀧𑀸𑀤𑀺𑀅𑀦𑁂𑀓𑀲𑀫𑁆𑀪𑀸𑀭𑁂𑀳𑀺 𑀲𑀜𑁆𑀜𑀼𑀢𑁆𑀢𑀸.

𑀫𑀥𑀼𑀓𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺𑀧𑀼𑀧𑁆𑀨𑀸𑀤𑀺𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀧𑀼𑀧𑁆𑀨𑀸𑀲𑀯𑁄 𑀦𑀸𑀫. 𑀢𑀣𑀸 𑀧𑀦𑀲𑀸𑀤𑀺 𑀨𑀮𑀸𑀲𑀯𑁄. 𑀫𑀼𑀤𑁆𑀤𑀺𑀓𑀭𑀲𑁄 𑀫𑀥𑁆𑀯𑀸𑀲𑀯𑁄. 𑀉𑀘𑁆𑀙𑀼𑀭𑀲𑁄 𑀕𑀼𑀴𑀸𑀲𑀯𑁄. 𑀢𑀺𑀨𑀮𑀢𑀺𑀓𑀝𑀼𑀓𑀸𑀤𑀺𑀦𑀸𑀦𑀸𑀲𑀫𑁆𑀪𑀸𑀭𑀸𑀦𑀁 𑀭𑀲𑁄 𑀘𑀺𑀭𑀧𑀭𑀺𑀯𑀸𑀲𑀺𑀢𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄. 𑀩𑀻𑀚𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀺𑀝𑁆𑀞𑀸𑀤𑀻𑀦𑀁 𑀫𑀚𑁆𑀚𑀢𑁆𑀣𑀸𑀬 𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬.

𑁩𑁨𑁯. 𑀮𑁄𑀡𑀲𑁄𑀯𑀻𑀭𑀓𑀁 𑀲𑀼𑀢𑁆𑀢𑀜𑁆𑀘 𑀅𑀦𑁂𑀓𑁂𑀳𑀺 𑀤𑀩𑁆𑀩𑀲𑀫𑁆𑀪𑀸𑀭𑁂𑀳𑀺 𑀅𑀪𑀺𑀲𑀗𑁆𑀔𑀢𑁄 𑀪𑁂𑀲𑀚𑁆𑀚𑀯𑀺𑀲𑁂𑀲𑁄. 𑀉𑀬𑁆𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀘𑀺𑀢𑁆𑀢𑀓𑀮𑁄𑀓𑀯𑀚𑁆𑀚𑁂𑀲𑀼 𑀮𑁄𑀓𑀯𑀚𑁆𑀚𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀯𑀸𑀢𑀺 𑀢𑀢𑁆𑀣 𑀓𑀺𑀜𑁆𑀘𑀺𑀧𑀺 𑀅𑀯𑀢𑁆𑀯𑀸 𑀇𑀥 𑀢𑁂𑀳𑀺 𑀅𑀲𑀸𑀥𑀸𑀭𑀡𑀯𑀢𑁆𑀣𑀼𑀯𑀺𑀲𑁂𑀲𑀲𑀺𑀤𑁆𑀥𑀸𑀬 𑀅𑀘𑀺𑀢𑁆𑀢𑀓𑀧𑀓𑁆𑀔𑁂𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀢𑀸𑀬 𑀢𑀁 𑀮𑁄𑀓𑀯𑀚𑁆𑀚𑀢𑀸𑀤𑀺𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀫𑁂𑀯 ‘‘𑀯𑀢𑁆𑀣𑀼𑀅𑀚𑀸𑀦𑀦𑀢𑀸𑀬 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸𑀬𑀁 𑀯𑀺𑀢𑁆𑀣𑀸𑀭𑀢𑁄 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀭𑀤𑁆𑀥𑀝𑁆𑀞𑀸𑀦𑀯𑀺𑀲𑁄𑀥𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀁. 𑀫𑀚𑁆𑀚𑀪𑀸𑀯𑁄, 𑀢𑀲𑁆𑀲 𑀧𑀸𑀦𑀜𑁆𑀘𑀸𑀢𑀺 𑀇𑀫𑀸𑀦𑁂𑀢𑁆𑀣 𑀤𑁆𑀯𑁂 𑀅𑀗𑁆𑀕𑀸𑀦𑀺.

𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.