𑁩. 𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁮𑁧. 𑀢𑀢𑀺𑀬𑁂 𑀧𑀸𑀴𑀺𑀬𑀁 𑀔𑀼𑀤𑁆𑀤𑀓𑁂 𑀖𑀭𑁂𑀢𑀺 𑀏𑀢𑁆𑀣 𑀔𑀼𑀤𑁆𑀤𑀓𑀁 𑀖𑀭𑀁 𑀦𑀸𑀫 𑀧𑀜𑁆𑀘𑀳𑀢𑁆𑀣𑀢𑁄 𑀊𑀦𑀓𑀯𑀺𑀢𑁆𑀣𑀸𑀭𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀘 𑀧𑀺𑀝𑁆𑀞𑀲𑀗𑁆𑀖𑀸𑀝𑀢𑁄 𑀳𑀢𑁆𑀣𑀧𑀸𑀲𑁂 𑀅𑀯𑀺𑀚𑀳𑀺𑀢𑁂𑀧𑀺 𑀧𑀺𑀝𑁆𑀞𑀺𑀯𑀁𑀲𑀸𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀺𑀝𑁆𑀞𑀺𑀯𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺. 𑀬𑀣𑀸 𑀢𑀣𑀸 𑀯𑀸 𑀓𑀢𑀲𑁆𑀲𑀸𑀢𑀺 𑀧𑀺𑀝𑁆𑀞𑀺𑀯𑀁𑀲𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸 𑀅𑀦𑀸𑀭𑁄𑀧𑁂𑀢𑁆𑀯𑀸 𑀯𑀸 𑀓𑀢𑀲𑁆𑀲.

𑁨𑁮𑁩. 𑀧𑀸𑀴𑀺𑀬𑀁 𑀯𑀻𑀢𑀭𑀸𑀕𑀸𑀢𑀺 𑀅𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑀸𑀦𑀁, 𑀅𑀦𑀸𑀕𑀸𑀫𑀻𑀦𑀜𑁆𑀘 𑀲𑀗𑁆𑀕𑀳𑁄. 𑀲𑀘𑀺𑀢𑁆𑀢𑀓𑀦𑁆𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁. 𑀧𑀭𑀺𑀬𑀼𑀝𑁆𑀞𑀺𑀢𑀭𑀸𑀕𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀲𑀦𑁆𑀦𑀺𑀳𑀺𑀢𑀢𑀸, 𑀲𑀬𑀦𑀺𑀖𑀭𑀢𑀸, 𑀤𑀼𑀢𑀺𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀸𑀯𑁄, 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀲𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁮𑁪-𑁨𑁮𑁯. 𑀘𑀢𑀼𑀢𑁆𑀣𑀧𑀜𑁆𑀘𑀫𑀸𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑀺.