𑁮. 𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁦. 𑀅𑀝𑁆𑀞𑀫𑁂 𑀧𑀸𑀓𑀸𑀭𑁂𑀦 𑀘 𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀸𑀓𑀸𑀭𑁂𑀲𑀼 𑀬𑀼𑀤𑁆𑀥𑀢𑁆𑀣𑀸𑀬 𑀓𑀢𑁄 𑀯𑀗𑁆𑀓𑀲𑀡𑁆𑀞𑀸𑀦𑁄 𑀲𑀭𑀓𑁆𑀔𑁂𑀧𑀙𑀺𑀤𑁆𑀤𑀲𑀳𑀺𑀢𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄 𑀅𑀝𑁆𑀝𑀸𑀮𑀓𑁄 𑀦𑀸𑀫.

𑀲𑁄𑀴𑀲𑀯𑀺𑀥𑀲𑁆𑀲𑀸𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀘𑁆𑀘𑁂𑀓𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀢𑁆𑀢𑀩𑁆𑀩𑀲𑁆𑀲 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀲𑁆𑀲 𑀲𑁄𑀴𑀲𑀯𑀺𑀥𑀲𑁆𑀲. 𑀢𑁂 𑀕𑀸𑀭𑀯𑁂𑀦𑀸𑀢𑀺 𑀢𑁂 𑀓𑀺𑀮𑀦𑁆𑀢𑀭𑀽𑀧𑀸 𑀪𑀺𑀓𑁆𑀔𑀽 𑀪𑀢𑁆𑀢𑀼𑀤𑁆𑀤𑁂𑀲𑀓𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀅𑀢𑁆𑀢𑀦𑁄 𑀓𑀺𑀮𑀦𑁆𑀢𑀲𑀭𑀻𑀭𑀁 𑀤𑀲𑁆𑀲𑁂𑀢𑁆𑀯𑀸 𑀉𑀤𑁆𑀤𑀺𑀲𑀸𑀧𑀦𑁂 𑀕𑀸𑀭𑀯𑁂𑀦, 𑀮𑀚𑁆𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀭𑀲𑀧𑀻𑀢𑀺 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁂𑀦𑀸𑀲𑀦𑀕𑀸𑀳𑀸𑀧𑀓𑀪𑀡𑁆𑀟𑀸𑀕𑀸𑀭𑀺𑀓𑀘𑀻𑀯𑀭𑀧𑀝𑀺𑀕𑁆𑀕𑀸𑀳𑀓𑀘𑀻𑀯𑀭𑀪𑀸𑀚𑀓𑀬𑀸𑀕𑀼𑀪𑀸𑀚𑀓𑀨𑀮𑀪𑀸𑀚𑀓𑀔𑀚𑁆𑀚𑀪𑀸𑀚𑀓𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀸𑀝𑀺𑀬𑀕𑀸𑀳𑀸𑀧𑀓𑀧𑀢𑁆𑀢𑀕𑀸𑀳𑀸𑀧𑀓𑀆𑀭𑀸𑀫𑀺𑀓𑀧𑁂𑀲𑀓𑀲𑀸𑀫𑀡𑁂𑀭𑀧𑁂𑀲𑀓𑀲𑀫𑁆𑀫𑀼𑀢𑀻𑀦𑀁 𑀯𑀲𑁂𑀦 𑀢𑁂𑀭𑀲𑀧𑀺.

𑀧𑀸𑀴𑀺𑀬𑀁 ‘‘𑀅𑀧𑀺𑀲𑀽’’𑀢𑀺 𑀇𑀤𑀁 ‘‘𑀅𑀧𑀺𑀘𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀽𑀢𑀺 𑀧𑀻𑀞𑀸𑀤𑀻𑀲𑀼 𑀲𑁂𑀦𑀸𑀲𑀦𑀲𑀸𑀥𑀸𑀭𑀡𑁂𑀲𑀼, 𑀓𑀢𑀺𑀓𑀲𑀡𑁆𑀞𑀸𑀦𑀧𑀯𑁂𑀲𑀦𑀺𑀓𑁆𑀔𑀫𑀦𑀓𑀸𑀮𑀸𑀤𑀻𑀲𑀼 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀓𑀣𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀦𑀺𑀫𑁆𑀫𑀺𑀢𑀸𑀦𑀁 𑀥𑀫𑁆𑀫𑀢𑀸𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀦𑀺𑀫𑁆𑀫𑀺𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀺𑀬𑀫𑁂𑀢𑁆𑀯𑀸 𑀧𑀦 ‘‘𑀏𑀢𑁆𑀢𑀓𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀣𑁂𑀦𑁆𑀢𑀼, 𑀏𑀢𑁆𑀢𑀓𑀸 𑀢𑀼𑀡𑁆𑀳𑀻 𑀪𑀯𑀦𑁆𑀢𑀼, 𑀦𑀸𑀦𑀸𑀧𑁆𑀧𑀓𑀸𑀭𑀁 𑀇𑀭𑀺𑀬𑀸𑀧𑀣𑀁, 𑀓𑀺𑀭𑀺𑀬𑀜𑁆𑀘 𑀓𑀧𑁆𑀧𑁂𑀦𑁆𑀢𑀼, 𑀦𑀸𑀦𑀸𑀯𑀡𑁆𑀡𑀲𑀡𑁆𑀞𑀸𑀦𑀯𑀬𑁄𑀦𑀺𑀬𑀫𑀸 𑀘 𑀳𑁄𑀦𑁆𑀢𑀽’’𑀢𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀺𑀢𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀓𑀸𑀭𑀸 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀯𑀺𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀅𑀯𑀢𑁆𑀣𑀼𑀓𑀯𑀘𑀦𑀦𑁆𑀢𑀺 𑀦𑀺𑀭𑀢𑁆𑀣𑀓𑀯𑀘𑀦𑀁.

𑁩𑁮𑁩. 𑀏𑀓𑀘𑀸𑀭𑀺𑀓𑀪𑀢𑁆𑀢𑀦𑁆𑀢𑀺 𑀅𑀢𑀺𑀫𑀦𑀸𑀧𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀺𑀲𑀼𑀁 𑀞𑀺𑀢𑀺𑀓𑀸𑀬 𑀧𑀸𑀧𑁂𑀢𑀩𑁆𑀩𑀪𑀢𑁆𑀢𑀁. 𑀢𑀤𑁆𑀥𑀺𑀢𑀯𑁄𑀳𑀸𑀭𑁂𑀦𑀸𑀢𑀺 𑀘𑀢𑁆𑀢𑀸𑀭𑀺 𑀧𑀫𑀸𑀡𑀫𑀲𑁆𑀲 𑀘𑀢𑀼𑀓𑁆𑀓𑀦𑁆𑀢𑀺 𑀏𑀯𑀁 𑀢𑀤𑁆𑀥𑀺𑀢𑀯𑁄𑀳𑀸𑀭𑁂𑀦. 𑀪𑀯𑁄𑀢𑀺 𑀪𑀯𑀺𑀢𑀩𑁆𑀩𑁄. 𑀅𑀢𑀻𑀢𑀁 𑀤𑀺𑀯𑀲𑀪𑀸𑀕𑀦𑁆𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀤𑀺𑀯𑀲𑁂 𑀲𑀮𑀸𑀓𑀤𑀸𑀦𑀓𑁆𑀔𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀺𑀬𑁆𑀬𑁄𑀢𑀺 𑀇𑀫𑀲𑁆𑀲 𑀅𑀚𑁆𑀚 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳𑀁𑀲𑀼 ‘‘𑀲𑁆𑀯𑁂 𑀅𑀫𑁆𑀳𑁂’’𑀢𑀺𑀆𑀤𑀺. 𑀧𑀥𑀽𑀧𑀸𑀬𑀦𑁆𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀓𑁄𑀥𑀯𑀲𑁂𑀦 𑀧𑀥𑀽𑀧𑀸𑀬𑀦𑁆𑀢𑀸. 𑀧𑀸𑀴𑀺𑀬𑀁 𑀓𑀺𑀲𑁆𑀲 𑀫𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀫𑀬𑀸𑀢𑀺 𑀅𑀢𑁆𑀣𑁄.

𑁩𑁮𑁪. ‘‘𑀲𑀭𑀲𑀺 𑀢𑁆𑀯’’𑀦𑁆𑀢𑀺 𑀇𑀤𑀁 𑀏𑀓𑀁 𑀯𑀸𑀓𑁆𑀬𑀁 𑀓𑀢𑁆𑀯𑀸, ‘‘𑀓𑀢𑁆𑀢𑀸’’𑀢𑀺 𑀇𑀤𑀜𑁆𑀘 𑀓𑀢𑁆𑀢𑀭𑀺 𑀭𑀺𑀢𑀼𑀧𑀘𑁆𑀘𑀬𑀦𑁆𑀢𑀁 𑀓𑀢𑁆𑀯𑀸, ‘‘𑀅𑀲𑀻’’𑀢𑀺 𑀅𑀚𑁆𑀛𑀸𑀳𑀸𑀭𑀧𑀤𑁂𑀦 𑀲𑀳 𑀏𑀓𑀯𑀸𑀓𑁆𑀬𑀁 𑀓𑀢𑁆𑀯𑀸, ‘‘𑀏𑀯𑀭𑀽𑀧’’𑀦𑁆𑀢𑀺 𑀇𑀤𑀁, ‘‘𑀬𑀣𑀸𑀬𑀁 𑀪𑀺𑀓𑁆𑀔𑀼𑀦𑀻 𑀆𑀳𑀸’’𑀢𑀺 𑀇𑀤𑀜𑁆𑀘 𑀤𑁆𑀯𑀻𑀲𑀼 𑀯𑀸𑀓𑁆𑀬𑁂𑀲𑀼 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀉𑀚𑀼𑀓𑀫𑁂𑀯𑀸𑀢𑀺 𑀢𑁆𑀯𑀸-𑀧𑀘𑁆𑀘𑀬𑀦𑁆𑀢𑀯𑀲𑁂𑀦 𑀧𑀞𑀫𑀁 𑀅𑀢𑁆𑀣𑀕𑁆𑀕𑀳𑀡𑀁 𑀉𑀚𑀼𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀼𑀢𑀺𑀬𑁄 𑀤𑀩𑁆𑀩-𑀲𑀤𑁆𑀤𑁄 𑀧𑀡𑁆𑀟𑀺𑀢𑀸𑀤𑀺𑀯𑀘𑀦𑁄𑀢𑀺 𑀆𑀳 ‘‘𑀦 𑀔𑁄 𑀤𑀩𑁆𑀩 𑀤𑀩𑁆𑀩𑀸 𑀧𑀡𑁆𑀟𑀺𑀢𑀸’’𑀢𑀺. 𑀦𑀺𑀩𑁆𑀩𑁂𑀞𑁂𑀦𑁆𑀢𑀻𑀢𑀺 𑀤𑁄𑀲𑀢𑁄 𑀫𑁄𑀘𑁂𑀦𑁆𑀢𑀺. 𑀯𑀺𑀦𑀬𑀮𑀓𑁆𑀔𑀡𑁂 𑀢𑀦𑁆𑀢𑀺𑀦𑁆𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑀯𑀺𑀲𑀬𑁂 𑀆𑀕𑀫𑀁 𑀞𑀧𑁂𑀦𑁆𑀢𑁄. 𑀧𑀸𑀴𑀺𑀬𑀁 𑀬𑀢𑁄 𑀅𑀳𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀳𑀁 𑀚𑀸𑀢𑁄, 𑀢𑀢𑁄 𑀧𑀪𑀼𑀢𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀦 𑀘 𑀢𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀝𑀺𑀲𑁂𑀯𑀺𑀢𑀸 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑀼𑀧𑀺𑀦𑀦𑁆𑀢𑁂𑀦𑀧𑀻’’𑀢𑀺𑀆𑀤𑀺. 𑀇𑀤𑀸𑀦𑀺 𑀏𑀓𑀯𑀸𑀓𑁆𑀬𑀯𑀲𑁂𑀦 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀖𑀝𑀢𑀻𑀢𑀺 𑀬𑀲𑁆𑀫𑀸 𑀔𑀻𑀡𑀸𑀲𑀯𑀲𑁆𑀲 𑀯𑀘𑀦𑁂𑀦 𑀏𑀢𑀺𑀲𑁆𑀲𑀸 𑀯𑀘𑀦𑀁 𑀦 𑀲𑀫𑁂𑀢𑀺, 𑀢𑀜𑁆𑀘 𑀦 𑀖𑀝𑀦𑀁 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽𑀲𑀼 𑀧𑀲𑀺𑀤𑁆𑀥𑀸𑀬 𑀏𑀯 𑀅𑀘𑁆𑀘𑀦𑁆𑀢𑀤𑀼𑀲𑁆𑀲𑀻𑀮𑀢𑀸𑀬 𑀏𑀯 𑀅𑀳𑁄𑀲𑀺, 𑀢𑀲𑁆𑀫𑀸 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀭 𑀧𑀺𑀭𑁂𑀢𑀺 𑀘𑀭 𑀕𑀘𑁆𑀙 𑀧𑀺𑀭𑁂 𑀧𑀭 𑀅𑀫𑀸𑀫𑀓 𑀢𑁆𑀯𑀁. 𑀯𑀺𑀦𑀲𑁆𑀲𑀸𑀢𑀺 𑀅𑀤𑀲𑁆𑀲𑀦𑀁 𑀕𑀘𑁆𑀙. 𑀅𑀓𑀸𑀭𑀺𑀓𑀸𑀢𑀺 𑀅𑀫𑀽𑀮𑀓𑁂𑀦 𑀘𑁄𑀤𑀦𑀸𑀬 𑀦 𑀓𑀸𑀭𑀺𑀓𑀸. 𑀓𑀸𑀭𑀓𑁄 𑀳𑁄𑀢𑀻𑀢𑀺 ‘‘𑀅𑀬𑁆𑀬𑁂𑀦𑀫𑁆𑀳𑀺 𑀤𑀽𑀲𑀺𑀢𑀸’’𑀢𑀺 𑀇𑀫𑀸𑀬 𑀧𑀝𑀺𑀜𑁆𑀜𑀸𑀬 𑀬𑀤𑀺 𑀦𑀸𑀲𑀺𑀢𑀸, 𑀢𑀤𑀸 𑀣𑁂𑀭𑁄 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀢𑁆𑀢𑀲𑀺𑀤𑁆𑀥𑀺𑀢𑁄 𑀢𑀲𑁆𑀲 𑀤𑁄𑀲𑀲𑁆𑀲 𑀓𑀸𑀭𑀓𑁄 𑀳𑁄𑀢𑀺. 𑀅𑀓𑀸𑀭𑀓𑁄 𑀳𑁄𑀢𑀻𑀢𑀺 𑀢𑀸𑀬 𑀓𑀢𑀧𑀝𑀺𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀢𑁆𑀢𑀸 𑀅𑀓𑀸𑀭𑀓𑁄 𑀳𑁄𑀢𑀺. 𑀬𑀤𑀺 𑀳𑀺 𑀣𑁂𑀭𑁄 𑀓𑀸𑀭𑀓𑁄 𑀪𑀯𑁂𑀬𑁆𑀬, 𑀅𑀯𑀲𑁆𑀲𑀁 𑀢𑀫𑁂𑀯 𑀤𑁄𑀲𑀁 𑀅𑀧𑀤𑀺𑀲𑀺𑀢𑁆𑀯𑀸 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸, ‘‘𑀤𑀩𑁆𑀩𑀜𑁆𑀘 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀅𑀯𑀢𑁆𑀯𑀸 ‘‘𑀇𑀫𑁂 𑀘 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀲𑀸𑀫𑀢𑁆𑀣𑀺𑀬𑀢𑁄 𑀫𑁂𑀢𑁆𑀢𑀺𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀜𑁆𑀜𑁂𑀦 𑀤𑁄𑀲𑁂𑀦 𑀦𑀸𑀲𑀦𑀸𑀭𑀳𑀢𑀸, 𑀯𑀢𑁆𑀣𑀼𑀲𑁆𑀲 𑀘 𑀅𑀫𑀽𑀮𑀓𑀪𑀸𑀯𑁄, 𑀣𑁂𑀭𑀲𑁆𑀲 𑀅𑀓𑀸𑀭𑀓𑀪𑀸𑀯𑁄 𑀘 𑀲𑀺𑀤𑁆𑀥𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀢𑁆𑀢𑀦𑁄 𑀲𑀼𑀢𑁆𑀢𑀦𑁆𑀢𑀺 ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀓𑁆𑀔𑁂𑀧𑀯𑀘𑀦𑁂𑀦 𑀲𑀳𑀺𑀢𑀁 𑀓𑀽𑀝𑀲𑀼𑀢𑁆𑀢𑀁. 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀅𑀯𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 ‘‘𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸’’𑀢𑀺 𑀑𑀢𑀺𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀢𑀲𑁆𑀲𑀸 𑀦𑀸𑀲𑀦𑀸 𑀯𑀺𑀳𑀺𑀢𑀸𑀢𑀺 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺, ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀧𑀦 𑀯𑀼𑀢𑁆𑀢𑁂 𑀧𑀼𑀩𑁆𑀩𑁂𑀬𑁂𑀯 𑀲𑀺𑀤𑁆𑀥𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀲𑀼𑀘𑀺𑀓𑀸𑀬 𑀅𑀲𑁆𑀲𑀸 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀣𑀸𑀢𑀺 𑀲𑀺𑀚𑁆𑀛𑀦𑀢𑁄 𑀅𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀻𑀢𑀺. 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀫𑁆𑀧𑀺 𑀧𑀦 ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀑𑀢𑀺𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀢𑀲𑁆𑀲𑀸 𑀦𑀸𑀲𑀦𑀸 𑀯𑀺𑀳𑀺𑀢𑀸 𑀳𑁄𑀢𑀺, 𑀦 𑀲𑀸𑀫𑀜𑁆𑀜𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀸𑀤𑁂𑀲𑀼, 𑀲𑀼𑀢𑁆𑀢𑁂𑀲𑀼 𑀯𑀸. 𑀬𑀁 𑀧𑀘𑁆𑀙𑀸 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀘𑀸𑀭𑀺𑀢𑀁 𑀳𑁂𑀢𑀦𑁆𑀢𑀺 𑀏𑀢𑀁 𑀧𑀘𑁆𑀙𑀺𑀫𑀲𑁆𑀲 𑀬𑀼𑀢𑁆𑀢𑀢𑁆𑀢𑀁 𑀯𑀺𑀘𑀸𑀭𑀺𑀢𑀁, ‘‘𑀢𑀢𑁆𑀭 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻…𑀧𑁂… 𑀅𑀲𑀼𑀤𑁆𑀥𑀢𑀸𑀬𑁂𑀯 𑀦𑀸𑀲𑁂𑀲𑀻’’𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀢𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁄 𑀤𑀲𑁆𑀲𑀺𑀢𑁄.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑁂𑀲𑀼. 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀧𑀯𑀢𑁆𑀢𑀲𑁆𑀲 𑀓𑀼𑀭𑀼𑀦𑁆𑀤𑀺𑀯𑀸𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀙𑀺𑀫𑀦𑀬𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀘𑀦𑀧𑁆𑀧𑀫𑀸𑀡𑀢𑁄𑀢𑀺 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂 𑀲𑀫𑀸𑀦𑁂𑀧𑀺 𑀅𑀦𑀼𑀤𑁆𑀥𑀁𑀲𑀦𑀸𑀤𑀺𑀯𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀦𑁄 𑀯𑀺𑀥𑀸𑀬𑀓𑀯𑀘𑀦𑀩𑀮𑁂𑀦𑀸𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀁 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁.

𑀏𑀯𑀁 𑀤𑁆𑀯𑀻𑀲𑀼𑀧𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀲𑀼 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀙𑀺𑀫𑁂 𑀧𑀸𑀘𑀺𑀢𑁆𑀢𑀺𑀬𑀯𑀸𑀤𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀭𑀺𑀫𑀤𑀼𑀓𑁆𑀓𑀝𑀯𑀸𑀤𑀫𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 ‘‘𑀢𑀢𑁆𑀭 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀲𑀼𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀢𑁄 (𑀧𑀸𑀘𑀺. 𑁧) 𑀯𑀺𑀲𑀼𑀁 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀦𑀦𑁆𑀢𑁄𑀕𑀥𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀫𑀽𑀮𑀓𑀸𑀦𑀼𑀤𑁆𑀥𑀁𑀲𑀦𑁂 𑀯𑀺𑀲𑀼𑀜𑁆𑀜𑁂𑀯 𑀧𑀸𑀘𑀺𑀢𑁆𑀢𑀺𑀬𑀁 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀧𑀼𑀭𑀺𑀫𑀦𑀬𑁄𑀢𑀺 𑀤𑀼𑀓𑁆𑀓𑀝𑀯𑀸𑀤𑁄. 𑀏𑀯𑀁 𑀅𑀦𑁆𑀢𑀭𑀸 𑀧𑀯𑀺𑀝𑁆𑀞𑀁 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀓𑀝𑀫𑁂𑀯 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀣𑀸 𑀪𑀺𑀓𑁆𑀔𑀼𑀦𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀣𑀸𑀢𑀺 𑀬𑀣𑀸 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀼𑀁, 𑀪𑀺𑀓𑁆𑀔𑀼𑀦𑀺𑀜𑁆𑀘 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀤𑀼𑀓𑁆𑀓𑀝𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀣𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀳𑀺 𑀦𑀸𑀲𑀦𑀸 𑀦𑀢𑁆𑀣𑀻𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀤𑀼𑀓𑁆𑀓𑀝𑁂𑀦 𑀇𑀫𑀺𑀲𑁆𑀲𑀸 𑀧𑀦 𑀦𑀸𑀲𑀦𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀲𑁆𑀲𑀻𑀮𑀸𑀢𑀺 𑀧𑀸𑀭𑀸𑀚𑀺𑀓𑀸.

𑁩𑁮𑁬. 𑀆𑀓𑀸𑀭𑀦𑀸𑀦𑀢𑁆𑀢𑁂𑀦𑀸𑀢𑀺 𑀤𑀽𑀲𑀺𑀢𑀸𑀓𑀸𑀭𑀲𑁆𑀲, 𑀤𑀽𑀲𑀓𑀸𑀓𑀸𑀭𑀲𑁆𑀲 𑀘 𑀦𑀸𑀦𑀢𑁆𑀢𑁂𑀦. 𑀅𑀦𑀪𑀺𑀭𑀤𑁆𑀥𑁄𑀢𑀺 𑀅𑀢𑀼𑀝𑁆𑀞𑁄. 𑀢𑁂𑀦𑀸𑀳 ‘‘𑀦 𑀲𑀼𑀔𑀺𑀢𑁄’’𑀢𑀺. 𑀦 𑀧𑀲𑀸𑀤𑀺𑀢𑁄𑀢𑀺 𑀅𑀦𑀼𑀧𑁆𑀧𑀸𑀤𑀺𑀢𑀧𑁆𑀧𑀲𑀸𑀤𑁄. 𑀔𑀻𑀮-𑀲𑀤𑁆𑀤𑁄 𑀣𑀤𑁆𑀥𑀪𑀸𑀯𑀯𑀘𑀦𑁄, 𑀓𑀘𑀯𑀭𑀧𑀭𑀺𑀬𑀸𑀬𑁄 𑀘 𑀳𑁄𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢…𑀧𑁂… 𑀔𑀻𑀮’’𑀦𑁆𑀢𑀺. 𑀦𑀧𑁆𑀧𑀢𑀻𑀢𑁄𑀢𑀺 𑀧𑀻𑀢𑀺𑀲𑀼𑀔𑀸𑀤𑀻𑀳𑀺 𑀦 𑀅𑀪𑀺𑀕𑀢𑁄 𑀦 𑀉𑀧𑀕𑀢𑁄. 𑀢𑁂𑀦𑀸𑀳 ‘‘𑀦 𑀅𑀪𑀺𑀲𑀝𑁄’’𑀢𑀺.

𑀬𑁂𑀦 𑀤𑀼𑀝𑁆𑀞𑁄𑀢𑀺 𑀘 𑀓𑀼𑀧𑀺𑀢𑁄𑀢𑀺 𑀘 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣 𑀬𑁂𑀦 𑀤𑀼𑀝𑁆𑀞𑁄𑀢𑀺 𑀘 𑀯𑀼𑀢𑁆𑀢𑁄 𑀬𑁂𑀦 𑀓𑀼𑀧𑀺𑀢𑁄𑀢𑀺 𑀘 𑀯𑀼𑀢𑁆𑀢𑁄, 𑀢𑀁 𑀫𑀸𑀢𑀺𑀓𑀸𑀬𑀜𑁆𑀘 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁮𑁬) 𑀘 𑀯𑀼𑀢𑁆𑀢𑀁 𑀉𑀪𑀬𑀫𑁆𑀧𑁂𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑁆𑀯𑀻𑀳𑀻𑀢𑀺 ‘‘𑀢𑁂𑀦 𑀘 𑀓𑁄𑀧𑁂𑀦, 𑀢𑁂𑀦 𑀘 𑀤𑁄𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀓𑁄𑀧𑀤𑁄𑀲𑀧𑀤𑁂𑀳𑀺 𑀤𑁆𑀯𑀻𑀳𑀺, 𑀅𑀢𑁆𑀣𑀢𑁄 𑀧𑀦 𑀤𑁆𑀯𑀻𑀳𑀺𑀧𑀺 𑀤𑁄𑀲𑁄𑀯 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀫𑁂𑀯 𑀤𑀲𑁆𑀲𑁂𑀢𑀻’’𑀢𑀺. 𑀬𑀸𑀬𑀸𑀢𑀺 𑀅𑀦𑀢𑁆𑀢𑀫𑀦𑀢𑀸𑀬.

𑀦 𑀘𑀼𑀤𑀺𑀢𑀓𑀯𑀲𑁂𑀦𑀸𑀢𑀺 𑀬𑀤𑀺 𑀘𑀼𑀤𑀺𑀢𑀓𑀯𑀲𑁂𑀦𑀸𑀧𑀺 𑀅𑀫𑀽𑀮𑀓𑀁 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, 𑀅𑀫𑀽𑀮𑀓𑀁 𑀦𑀸𑀫 𑀅𑀦𑀚𑁆𑀛𑀸𑀧𑀦𑁆𑀦𑀦𑁆𑀢𑀺 𑀧𑀤𑀪𑀸𑀚𑀦𑀁 𑀯𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀧𑀸𑀭𑀸𑀚𑀺𑀓𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑁂𑀲𑀼 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼 𑀅𑀜𑁆𑀜𑀢𑀭𑀁. 𑀧𑀤𑀪𑀸𑀚𑀦𑁂 (𑀧𑀸𑀭𑀸. 𑁩𑁮𑁬) 𑀧𑀦 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁂 𑀆𑀕𑀢𑀸𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑀁 𑀇𑀥 𑀅𑀧𑁆𑀧𑀫𑀸𑀡𑀦𑁆𑀢𑀺 𑀏𑀢𑀁 𑀆𑀧𑀦𑁆𑀦𑀸𑀦𑀸𑀧𑀦𑁆𑀦𑀢𑀁 𑀇𑀥𑀸𑀦𑀼𑀤𑁆𑀥𑀁𑀲𑀦𑁂 𑀆𑀧𑀢𑁆𑀢𑀺𑀬𑀸 𑀅𑀦𑀗𑁆𑀕𑀁, 𑀆𑀧𑀢𑁆𑀢𑀺𑀁 𑀧𑀦 𑀆𑀧𑀦𑁆𑀦𑁂 𑀯𑀸 𑀅𑀦𑀸𑀧𑀦𑁆𑀦𑁂 𑀯𑀸 𑀧𑀼𑀕𑁆𑀕𑀮𑁂 ‘‘𑀅𑀦𑀸𑀧𑀦𑁆𑀦𑁄 𑀏𑀲𑁄 𑀲𑀼𑀤𑁆𑀥𑁄’’𑀢𑀺 𑀲𑀼𑀤𑁆𑀥𑀲𑀜𑁆𑀜𑀸𑀬 𑀯𑀸 𑀯𑀺𑀫𑀢𑀺𑀬𑀸 𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄𑀯 𑀇𑀥 𑀅𑀗𑁆𑀕𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀣𑁂𑀯𑀸𑀢𑀺 𑀧𑀲𑀸𑀤𑀲𑁄𑀢𑁂𑀦, 𑀤𑀺𑀩𑁆𑀩𑀲𑁄𑀢𑁂𑀦 𑀯𑀸𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀤𑀺𑀝𑁆𑀞𑀸𑀦𑀼𑀲𑀸𑀭𑁂𑀦𑁂𑀯 𑀲𑀫𑀼𑀧𑁆𑀧𑀦𑁆𑀦𑀸 𑀧𑀭𑀺𑀲𑀗𑁆𑀓𑀸𑀯 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀯𑀁 𑀲𑁂𑀲𑁂𑀲𑀼𑀧𑀺. ‘‘𑀅𑀤𑀺𑀲𑁆𑀯𑀸 𑀯𑀸’’𑀢𑀺 𑀇𑀤𑀁 𑀉𑀓𑁆𑀓𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀺𑀲𑁆𑀯𑀸 𑀧𑀓𑁆𑀓𑀦𑁆𑀢𑁂𑀲𑀼𑀧𑀺 𑀤𑁄𑀲𑁄 𑀦𑀢𑁆𑀣𑀺𑀬𑁂𑀯. 𑀇𑀫𑁂𑀲𑀦𑁆𑀢𑀺 𑀇𑀫𑁂𑀳𑀺. 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁, 𑀧𑀘𑁆𑀙𑀸 𑀧𑀦 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀓𑀢𑀁 𑀯𑀸𑀢𑀺 𑀲𑀗𑁆𑀓𑀸𑀬 𑀘𑁄𑀤𑁂𑀢𑀺. 𑀦 𑀳𑀺 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀘𑁄𑀤𑀦𑀸 𑀅𑀢𑁆𑀣𑀺. ‘‘𑀅𑀭𑀺𑀝𑁆𑀞𑀁 𑀧𑀻𑀢’’𑀦𑁆𑀢𑀺 𑀇𑀤𑀁 𑀫𑀼𑀔𑁂 𑀲𑀼𑀭𑀸𑀕𑀦𑁆𑀥𑀯𑀸𑀬𑀦𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀁. 𑀅𑀭𑀺𑀝𑁆𑀞𑀜𑁆𑀳𑀺 𑀲𑀼𑀭𑀸𑀲𑀤𑀺𑀲𑀯𑀡𑁆𑀡𑀕𑀦𑁆𑀥𑀁 𑀓𑀧𑁆𑀧𑀺𑀬𑀪𑁂𑀲𑀚𑁆𑀚𑀁.

𑀤𑀺𑀝𑁆𑀞𑀁 𑀅𑀢𑁆𑀣𑀺 𑀲𑀫𑀽𑀮𑀓𑀦𑁆𑀢𑀺𑀆𑀤𑀻𑀲𑀼 𑀅𑀚𑁆𑀛𑀸𑀘𑀸𑀭𑀲𑁆𑀲 𑀲𑀫𑁆𑀪𑀯𑀸𑀲𑀫𑁆𑀪𑀯𑀸𑀦𑀁 𑀫𑀽𑀮𑀸𑀫𑀽𑀮𑀪𑀸𑀯𑀤𑀲𑁆𑀲𑀦𑀁. 𑀅𑀢𑁆𑀣𑀺 𑀲𑀜𑁆𑀜𑀸𑀲𑀫𑀽𑀮𑀓𑀦𑁆𑀢𑀺𑀆𑀤𑀺 𑀧𑀦 𑀤𑀺𑀝𑁆𑀞𑀲𑀜𑁆𑀜𑀸𑀬 𑀲𑀫𑁆𑀪𑀯𑀸𑀲𑀫𑁆𑀪𑀯𑀸𑀦𑀁 𑀫𑀽𑀮𑀸𑀫𑀽𑀮𑀪𑀸𑀯𑀤𑀲𑁆𑀲𑀦𑀁. 𑀤𑀺𑀲𑁆𑀯𑀸𑀯 𑀤𑀺𑀝𑁆𑀞𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑁄𑀤𑁂𑀢𑀻𑀢𑀺 𑀏𑀢𑁆𑀣 𑀬𑀁 𑀘𑁄𑀤𑁂𑀢𑀺, 𑀢𑀢𑁄 𑀅𑀜𑁆𑀜𑀁 𑀧𑀼𑀕𑁆𑀕𑀮𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀁, 𑀧𑀝𑀺𑀘𑁆𑀙𑀦𑁆𑀦𑁄𑀓𑀸𑀲𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑁄’’𑀢𑀺 𑀲𑀜𑁆𑀜𑀸𑀬 𑀘𑁄𑀤𑁂𑀦𑁆𑀢𑁄𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀏𑀲 𑀦𑀬𑁄 𑀲𑀼𑀢𑀸𑀤𑀻𑀲𑀼𑀧𑀺. 𑀲𑀫𑀽𑀮𑀓𑁂𑀦 𑀯𑀸 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀯𑀸𑀢𑀺 𑀏𑀢𑁆𑀣 𑀧𑀸𑀭𑀸𑀚𑀺𑀓𑀫𑀸𑀧𑀦𑁆𑀦𑀁 𑀤𑀺𑀝𑁆𑀞𑀸𑀤𑀺𑀫𑀽𑀮𑀓𑁂𑀦 𑀘 ‘‘𑀅𑀬𑀁 𑀆𑀧𑀦𑁆𑀦𑁄’’𑀢𑀺 𑀅𑀲𑀼𑀤𑁆𑀥𑀲𑀜𑁆𑀜𑀸𑀬 𑀘𑁄𑀤𑁂𑀦𑁆𑀢𑁄 𑀲𑀫𑀽𑀮𑀓𑁂𑀦 𑀘𑁄𑀤𑁂𑀢𑀺 𑀦𑀸𑀫. 𑀲𑀜𑁆𑀜𑀸𑀲𑀫𑀽𑀮𑀓𑀢𑁆𑀢𑁂 𑀏𑀯 𑀅𑀦𑀸𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀆𑀧𑀦𑁆𑀦𑁂 𑀯𑀸 𑀅𑀦𑀸𑀧𑀦𑁆𑀦𑁂 𑀯𑀸 𑀧𑀼𑀕𑁆𑀕𑀮𑁂 𑀆𑀧𑀦𑁆𑀦𑀲𑀜𑁆𑀜𑀻 𑀤𑀺𑀝𑁆𑀞𑀸𑀤𑀻𑀲𑀼, 𑀅𑀤𑀺𑀝𑁆𑀞𑀸𑀤𑀻𑀲𑀼 𑀯𑀸 𑀫𑀽𑀮𑁂𑀲𑀼 𑀤𑀺𑀝𑁆𑀞𑀲𑀼𑀢𑀸𑀤𑀺𑀲𑀜𑁆𑀜𑀻 𑀢𑁂𑀦 𑀤𑀺𑀝𑁆𑀞𑀸𑀤𑀺𑀫𑀽𑀮𑀓𑁂𑀦 𑀢𑀁 𑀧𑀼𑀕𑁆𑀕𑀮𑀁 𑀘𑁄𑀤𑁂𑀦𑁆𑀢𑁄 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀘𑁄𑀤𑁂𑀢𑀺 𑀦𑀸𑀫. 𑀇𑀫𑁂𑀲𑀁 𑀅𑀦𑀸𑀧𑀢𑁆𑀢𑀺, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀆𑀧𑀢𑁆𑀢𑀺𑀯𑀸𑀭𑁂 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀻𑀧𑁂 𑀞𑀢𑁆𑀯𑀸𑀢𑀺 𑀳𑀢𑁆𑀣𑀯𑀺𑀓𑀸𑀭𑀯𑀘𑀻𑀖𑁄𑀲𑀸𑀦𑀁 𑀘𑁄𑀤𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸𑀦𑀁 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑁂 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀤𑁆𑀯𑀸𑀤𑀲𑀳𑀢𑁆𑀣𑀩𑁆𑀪𑀦𑁆𑀢𑀭𑁂 𑀞𑀢𑁆𑀯𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁮𑁫-𑁩𑁮𑁬) 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀧𑀭𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀤𑀽𑀢𑀁 𑀯𑀸 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 ‘‘𑀤𑁆𑀯𑀸𑀤𑀲𑀳𑀢𑁆𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀻𑀲𑀁 𑀦 𑀏𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀸𑀘𑀸𑀬 𑀯𑀸𑀘𑀸𑀬𑀸𑀢𑀺 𑀲𑀓𑀺𑀁 𑀆𑀡𑀢𑁆𑀢𑀲𑁆𑀲 𑀲𑀓𑀮𑀫𑁆𑀧𑀺 𑀤𑀺𑀯𑀲𑀁 𑀯𑀤𑀢𑁄 𑀯𑀸𑀘𑀸𑀬 𑀯𑀸𑀘𑀸𑀬 𑀘𑁄𑀤𑀸𑀧𑀓𑀲𑁆𑀲𑁂𑀯 𑀆𑀧𑀢𑁆𑀢𑀺. 𑀲𑁄𑀧𑀻𑀢𑀺 𑀆𑀡𑀢𑁆𑀢𑁄𑀧𑀺. 𑀢𑀲𑁆𑀲 𑀘 ‘‘𑀫𑀬𑀸𑀧𑀺 𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀁 𑀅𑀯𑀢𑁆𑀯𑀸𑀧𑀺 ‘‘𑀅𑀫𑀽𑀮𑀓’’𑀦𑁆𑀢𑀺 𑀲𑀜𑁆𑀜𑀸𑀬 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀢𑁆𑀯𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’’𑀢𑀺 𑀇𑀤𑀫𑁂𑀯 𑀯𑀸𑀘𑀁 𑀧𑀭𑀲𑁆𑀲 𑀯𑀘𑀦𑀁 𑀯𑀺𑀬 𑀅𑀓𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀯𑀤𑀦𑁆𑀢𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀏𑀯. 𑀲𑀢𑀺𑀧𑀺 𑀧𑀦 𑀅𑀦𑀼𑀤𑁆𑀥𑀁𑀲𑀦𑀸𑀥𑀺𑀧𑁆𑀧𑀸𑀬𑁂 ‘‘𑀅𑀲𑀼𑀓𑁂𑀦 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀧𑀭𑁂𑀦 𑀯𑀼𑀢𑁆𑀢𑀫𑁂𑀯 𑀯𑀤𑀦𑁆𑀢𑀲𑁆𑀲 𑀦𑀢𑁆𑀣𑀺 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀲𑀘𑁂 𑀧𑀦 𑀧𑀭𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀢𑀺, 𑀆𑀧𑀢𑁆𑀢𑀺 𑀏𑀯.

𑀲𑀫𑁆𑀩𑀳𑀼𑀮𑀸 𑀲𑀫𑁆𑀩𑀳𑀼𑀮𑁂 𑀲𑀫𑁆𑀩𑀳𑀼𑀮𑁂𑀳𑀺 𑀯𑀢𑁆𑀣𑀽𑀳𑀻𑀢𑀺 𑀏𑀢𑁆𑀣 𑀲𑀫𑁆𑀩𑀳𑀼𑀮𑁂𑀢𑀺 𑀘𑀼𑀤𑀺𑀢𑀓𑀩𑀳𑀼𑀢𑁆𑀢𑀦𑀺𑀤𑁆𑀤𑁂𑀲𑁂𑀦 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼 𑀘𑀼𑀤𑀺𑀢𑀓𑀩𑀳𑀼𑀢𑁆𑀢𑁂𑀦𑀸𑀧𑀺 𑀯𑀸𑀭𑀪𑁂𑀤𑀲𑀩𑁆𑀪𑀸𑀯𑀁 𑀜𑀸𑀧𑁂𑀢𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀘𑀼𑀤𑀺𑀢𑀓𑀯𑀢𑁆𑀣𑀼𑀘𑁄𑀤𑀓𑀪𑁂𑀤𑁂𑀦 𑀇𑀤𑀁 𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀁, 𑀘𑀼𑀤𑀺𑀢𑀓𑀩𑀳𑀼𑀢𑁆𑀢𑁂𑀦𑀸𑀧𑀺 𑀘𑀢𑀼𑀓𑁆𑀓𑀦𑁆𑀢𑀭𑀁 𑀮𑀩𑁆𑀪𑀢𑀻𑀢𑀺 𑀅𑀝𑁆𑀞𑀓𑀁 𑀳𑁄𑀢𑀺 𑀏𑀯.

𑀅𑀫𑀽𑀮𑀓𑀘𑁄𑀤𑀦𑀸𑀧𑀲𑀗𑁆𑀕𑁂𑀦 𑀲𑀫𑀽𑀮𑀓𑀘𑁄𑀤𑀦𑀸𑀮𑀓𑁆𑀔𑀡𑀸𑀤𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑁄𑀤𑁂𑀢𑀼𑀁 𑀧𑀦 𑀓𑁄 𑀮𑀪𑀢𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀪𑀺𑀓𑁆𑀔𑀼𑀲𑁆𑀲 𑀲𑀼𑀢𑁆𑀯𑀸 𑀘𑁄𑀤𑁂𑀢𑀻𑀢𑀺𑀆𑀤𑀺 𑀲𑀼𑀢𑁆𑀢𑀁 𑀬𑀲𑁆𑀫𑀸 𑀬𑁂 𑀘𑁄𑀤𑀓𑀲𑁆𑀲 𑀅𑀜𑁆𑀜𑁂𑀲𑀁 𑀯𑀺𑀧𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑀺, 𑀢𑁂𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀘𑁄𑀤𑀓𑀪𑀸𑀯𑁂 𑀞𑀢𑁆𑀯𑀸𑀯 𑀧𑀓𑀸𑀲𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀇𑀢𑀭𑁄𑀧𑀺 𑀬𑀲𑁆𑀫𑀸 𑀘𑁄𑀤𑁂𑀢𑀼𑀜𑁆𑀘 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀁 𑀢𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀧𑀭𑀺𑀬𑁄𑀲𑀸𑀦𑁂𑀳𑀺 𑀧𑀞𑀫𑀘𑁄𑀤𑀓𑁂𑀳𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀜𑁆𑀘 𑀮𑀪𑀢𑀺, 𑀢𑀲𑁆𑀫𑀸 𑀇𑀥 𑀲𑀸𑀯𑀓𑀪𑀸𑀯𑁂𑀦 𑀉𑀤𑁆𑀥𑀝𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀽𑀢𑀁 𑀯𑀸𑀢𑀺𑀆𑀤𑀻𑀲𑀼 ‘‘𑀢𑁆𑀯𑀁 𑀏𑀯𑀁 𑀕𑀦𑁆𑀢𑁆𑀯𑀸 𑀘𑁄𑀤𑁂𑀳𑀻’’𑀢𑀺 𑀤𑀽𑀢𑀁 𑀯𑀸 𑀧𑁂𑀲𑁂𑀢𑁆𑀯𑀸 𑀬𑁄 𑀘𑁄𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀧𑀡𑁆𑀡𑀁, 𑀫𑀽𑀮𑀲𑀸𑀲𑀦𑀁 𑀯𑀸 𑀧𑁂𑀲𑁂𑀢𑁆𑀯𑀸. 𑀲𑀫𑀬𑁂𑀦𑀸𑀢𑀺 𑀧𑀓𑀢𑀺𑀬𑀸 𑀚𑀸𑀦𑀦𑀓𑁆𑀔𑀡𑁂.

𑀕𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀸𑀫 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀫. 𑀦𑀺. 𑁧.𑁪𑁪𑁫; 𑁨.𑁯𑁪, 𑁯𑁫, 𑁨𑁨𑁫; 𑁩.𑁯𑁧, 𑁧𑁧𑁬, 𑁧𑁩𑁬; 𑀲𑀁. 𑀦𑀺. 𑁩.𑁨𑁧𑁦) 𑀤𑀲𑀯𑀢𑁆𑀣𑀼𑀓𑀸 𑀤𑀺𑀝𑁆𑀞𑀺, 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀕𑀡𑁆𑀳𑀸𑀧𑀓𑀤𑀺𑀝𑁆𑀞𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀦𑀸𑀫. 𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀁 𑀙𑀦𑁆𑀦𑀦𑁆𑀢𑀺 𑀆𑀚𑀻𑀯𑀳𑁂𑀢𑀼𑀧𑀺 𑀆𑀧𑀚𑁆𑀚𑀺𑀢𑀩𑁆𑀩𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀁 (𑀧𑀸𑀭𑀸. 𑁧𑁯𑁫), 𑀲𑀜𑁆𑀘𑀭𑀺𑀢𑁆𑀢𑁂 (𑀧𑀸𑀭𑀸. 𑁩𑁦𑁧, 𑁩𑁦𑁨) 𑀲𑀗𑁆𑀖𑀸𑀤𑀺𑀲𑁂𑀲𑁄, ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀅𑀭𑀳𑀸’’𑀢𑀺 (𑀧𑀸𑀭𑀸. 𑁨𑁨𑁦) 𑀧𑀭𑀺𑀬𑀸𑀬𑁂𑀦 𑀣𑀼𑀮𑁆𑀮𑀘𑁆𑀘𑀬𑀁, 𑀪𑀺𑀓𑁆𑀔𑀼𑀲𑁆𑀲 𑀧𑀡𑀻𑀢𑀪𑁄𑀚𑀦𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁨𑁫𑁭), 𑀪𑀺𑀓𑁆𑀔𑀼𑀦𑀺𑀬𑀸𑀧𑀡𑀻𑀢𑀪𑁄𑀚𑀦𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀸𑀝𑀺𑀤𑁂𑀲𑀦𑀻𑀬𑀁 (𑀧𑀸𑀘𑀺. 𑁧𑁨𑁩𑁬), 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀬𑀸 (𑀧𑀸𑀘𑀺. 𑁬𑁧𑁨-𑁬𑁧𑁩) 𑀤𑀼𑀓𑁆𑀓𑀝𑀦𑁆𑀢𑀺 𑀇𑀫𑁂𑀲𑀁 𑀧𑀭𑀺𑀯𑀸𑀭𑁂 (𑀧𑀭𑀺. 𑁨𑁮𑁭) 𑀯𑀼𑀢𑁆𑀢𑀸𑀦𑀁 𑀙𑀦𑁆𑀦𑀁. 𑀦 𑀳𑁂𑀢𑀸 𑀆𑀧𑀢𑁆𑀢𑀺𑀬𑁄 𑀆𑀚𑀻𑀯𑀳𑁂𑀢𑀼 𑀏𑀯 𑀧𑀜𑁆𑀜𑀢𑁆𑀢𑀸 𑀲𑀜𑁆𑀘𑀭𑀺𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀣𑀸𑀧𑀺 𑀆𑀧𑀚𑁆𑀚𑀺𑀢𑀩𑁆𑀩𑀢𑁄. 𑀆𑀚𑀻𑀯𑀳𑁂𑀢𑀼𑀧𑀺 𑀏𑀢𑀸𑀲𑀁 𑀆𑀧𑀚𑁆𑀚𑀦𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁, 𑀆𑀚𑀻𑀯𑀳𑁂𑀢𑀼𑀧𑀺 𑀧𑀜𑁆𑀜𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀜𑁆𑀘 𑀏𑀢𑀸 𑀏𑀯, 𑀅𑀜𑁆𑀜𑀸𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀓𑀼𑀮𑀤𑀽𑀲𑀦𑀧𑀸𑀡𑀯𑀥𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀆𑀚𑀻𑀯𑀳𑁂𑀢𑀼 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀺 𑀲𑀦𑁆𑀢𑀺, 𑀢𑀸 𑀧𑀦 𑀆𑀧𑀢𑁆𑀢𑀺𑀲𑀪𑀆𑀕𑀢𑀸𑀬 𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀙𑀲𑀼 𑀏𑀯 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀢𑀸𑀯𑀢𑀸 𑀧𑀦 𑀲𑀻𑀲𑀁 𑀦 𑀏𑀢𑀻𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀘𑁄𑀤𑀦𑀸 𑀧𑀦 𑀓𑀢𑀸 𑀏𑀯 𑀳𑁄𑀢𑀺. 𑀢𑀺𑀁𑀲𑀸𑀦𑀻𑀢𑀺 𑀢𑀺𑀁𑀲𑀁 𑀏𑀢𑁂𑀲𑀫𑀢𑁆𑀣𑀻𑀢𑀺 𑀢𑀺𑀁𑀲𑀸𑀦𑀺, 𑀢𑀺𑀁𑀲𑀸𑀥𑀺𑀓𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀯𑀼𑀢𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑀸 𑀆𑀤𑀸𑀢𑀩𑁆𑀩𑀢𑁄 𑀤𑀺𑀝𑁆𑀞𑀸𑀤𑀺𑀫𑀽𑀮𑀓𑁂𑀳𑀺 𑀕𑀳𑁂𑀢𑀩𑁆𑀩𑀢𑁄 𑀧𑀭𑀲𑁆𑀲 𑀯𑀺𑀧𑁆𑀨𑀦𑁆𑀤𑀺𑀢𑀼𑀁 𑀅𑀤𑀢𑁆𑀯𑀸 𑀧𑀕𑁆𑀕𑀡𑁆𑀳𑀦𑀢𑁄 𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀘𑁄𑀤𑀦𑀸 𑀯𑀼𑀘𑁆𑀘𑀢𑀺, 𑀢𑀁 𑀆𑀤𑀸𑀢𑀼𑀓𑀸𑀫𑁂𑀦, 𑀘𑁄𑀤𑀦𑀁 𑀓𑀢𑁆𑀢𑀼𑀓𑀸𑀫𑁂𑀦𑀸𑀢𑀺 𑀅𑀢𑁆𑀣𑁄.

𑀉𑀩𑁆𑀩𑀸𑀳𑀺𑀓𑀸𑀬𑀸𑀢𑀺 𑀉𑀩𑁆𑀩𑀳𑀦𑁆𑀢𑀺 𑀯𑀺𑀬𑁄𑀚𑁂𑀦𑁆𑀢𑀺 𑀏𑀢𑀸𑀬 𑀅𑀮𑀚𑁆𑀚𑀻𑀦𑀁 𑀢𑀚𑁆𑀚𑀦𑀺𑀁 𑀯𑀸 𑀓𑀮𑀳𑀁 𑀯𑀸𑀢𑀺 𑀉𑀩𑁆𑀩𑀸𑀳𑀺𑀓𑀸, 𑀲𑀗𑁆𑀖𑀲𑀫𑁆𑀫𑀼𑀢𑀺, 𑀢𑀸𑀬. 𑀯𑀺𑀦𑀺𑀘𑁆𑀙𑀺𑀦𑀦𑀁 𑀦𑀸𑀫 𑀢𑀸𑀬 𑀲𑀫𑁆𑀫𑀢𑀪𑀺𑀓𑁆𑀔𑀽𑀳𑀺 𑀯𑀺𑀦𑀺𑀘𑁆𑀙𑀦𑀦𑀫𑁂𑀯. 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀳𑀺 𑀧𑀭𑀺𑀲𑀸𑀬 𑀲𑀫𑀣𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁨𑁨𑁭) 𑀆𑀕𑀢𑁂𑀳𑀺 𑀤𑀲𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀯𑀼𑀢𑁆𑀢𑀸𑀬 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸, 𑀢𑁂𑀳𑀺 𑀘 𑀲𑀫𑁆𑀫𑀢𑁂𑀳𑀺 𑀯𑀺𑀲𑀼𑀁 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀲𑁆𑀲𑀸 𑀏𑀯 𑀯𑀸 𑀧𑀭𑀺𑀲𑀸𑀬 ‘‘𑀅𑀜𑁆𑀜𑁂𑀳𑀺 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀲𑀸𑀯𑁂𑀢𑁆𑀯𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁.

𑀓𑀺𑀫𑁆𑀳𑀻𑀢𑀺 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁, 𑀓𑀢𑀭𑀯𑀺𑀧𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀓𑀺𑀫𑁆𑀳𑀺 𑀦𑀁 𑀦𑀸𑀫𑀸’’𑀢𑀺 𑀇𑀤𑀁 ‘‘𑀓𑀢𑀭𑀸𑀬 𑀯𑀺𑀧𑀢𑁆𑀢𑀺𑀬𑀸 𑀏𑀢𑀁 𑀘𑁄𑀤𑁂𑀲𑀻’’𑀢𑀺 𑀬𑀸𑀬 𑀓𑀸𑀬𑀘𑀺 𑀯𑀺𑀜𑁆𑀜𑀸𑀬𑀫𑀸𑀦𑀸𑀬 𑀪𑀸𑀲𑀸𑀬 𑀯𑀼𑀢𑁆𑀢𑁂𑀧𑀺 𑀘𑁄𑀤𑀓𑀲𑁆𑀲 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀢𑀸𑀬 ‘‘𑀲𑀻𑀮𑀸𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀻𑀲𑀼 𑀓𑀢𑀭𑀸𑀬𑀸𑀢𑀺 𑀫𑀁 𑀧𑀼𑀘𑁆𑀙𑀢𑀻’’𑀢𑀺 𑀜𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀼𑀘𑁆𑀙𑀸, 𑀦 𑀧𑀦 𑀓𑀺𑀫𑁆𑀳𑀻𑀢𑀺𑀆𑀤𑀺𑀧𑀤𑀢𑁆𑀣𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑀲𑁆𑀲. 𑀦 𑀳𑀺 𑀅𑀦𑀼𑀯𑀺𑀚𑁆𑀚𑀓𑁄 𑀘𑁄𑀤𑀓𑀁 𑀩𑀸𑀮𑀁 𑀅𑀧𑀭𑀺𑀘𑀺𑀢𑀪𑀸𑀲𑀸𑀬 ‘‘𑀓𑀺𑀫𑁆𑀳𑀺 𑀦’’𑀦𑁆𑀢𑀺 𑀧𑀼𑀘𑁆𑀙𑀢𑀺. ‘‘𑀓𑀺𑀫𑁆𑀳𑀺 𑀦𑀫𑁆𑀧𑀺 𑀦 𑀚𑀸𑀦𑀸𑀲𑀻’’𑀢𑀺 𑀇𑀤𑀫𑁆𑀧𑀺 𑀯𑀘𑀦𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦 𑀳𑁄𑀢𑀺, ‘‘𑀓𑀢𑀭𑀯𑀺𑀧𑀢𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀅𑀲𑀼𑀓𑀸𑀬 𑀯𑀺𑀧𑀢𑁆𑀢𑀺𑀬𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀚𑀸𑀦𑀸𑀲𑀻𑀢𑀺 𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀩𑀸𑀮𑀲𑁆𑀲 𑀮𑀚𑁆𑀚𑀺𑀲𑁆𑀲 𑀦𑀬𑁄 𑀤𑀸𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀘 ‘‘𑀓𑀺𑀫𑁆𑀳𑀺 𑀦𑀁 𑀘𑁄𑀤𑁂𑀲𑀻𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸’’𑀢𑀺𑀆𑀤𑀺 𑀅𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀫𑁂𑀯 𑀦𑀬𑀤𑀸𑀦𑀁 𑀯𑀼𑀢𑁆𑀢𑀁, 𑀦 𑀧𑀦 𑀓𑀺𑀫𑁆𑀳𑀺-𑀦𑀁-𑀧𑀤𑀸𑀦𑀁 𑀧𑀭𑀺𑀬𑀸𑀬𑀫𑀢𑁆𑀢𑀤𑀲𑁆𑀲𑀦𑀁. 𑀦 𑀳𑀺 𑀩𑀸𑀮𑁄 ‘‘𑀓𑀢𑀭𑀯𑀺𑀧𑀢𑁆𑀢𑀺𑀬𑀁 𑀦𑀁 𑀘𑁄𑀤𑁂𑀲𑀻’’𑀢𑀺 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀅𑀢𑁆𑀣𑁂 𑀜𑀸𑀢𑁂𑀧𑀺 𑀯𑀺𑀧𑀢𑁆𑀢𑀺𑀧𑁆𑀧𑀪𑁂𑀤𑀦𑀁, 𑀅𑀢𑁆𑀢𑀦𑀸 𑀘𑁄𑀤𑀺𑀬𑀫𑀸𑀦𑀁 𑀯𑀺𑀧𑀢𑁆𑀢𑀺𑀲𑀭𑀽𑀧𑀜𑁆𑀘 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑁂𑀦𑁂𑀯 𑀅𑀚𑀸𑀦𑀦𑁂𑀦 𑀅𑀮𑀚𑁆𑀚𑀻 𑀅𑀧𑀲𑀸𑀤𑁂𑀢𑀩𑁆𑀩𑁄. ‘‘𑀓𑀺𑀫𑁆𑀳𑀺 𑀦’’𑀦𑁆𑀢𑀺 𑀇𑀤𑀫𑁆𑀧𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀁, 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀯𑀺𑀜𑁆𑀜𑀼𑀢𑀁 𑀧𑀓𑀸𑀲𑁂𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀯.

‘‘𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁩𑁯; 𑀧𑀭𑀺. 𑁨) ‘‘𑀅𑀮𑀚𑁆𑀚𑀻𑀦𑀺𑀕𑁆𑀕𑀳𑀢𑁆𑀣𑀸𑀬…𑀧𑁂… 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀳𑀺𑀢𑀻𑀢𑀺 𑀳𑀺-𑀓𑀸𑀭𑁄 𑀏𑀢𑁆𑀣 𑀆𑀕𑀫𑁄 𑀤𑀝𑁆𑀞𑀩𑁆𑀩𑁄, 𑀆𑀕𑀫𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀲𑀦𑁆𑀢𑀸𑀦𑁂𑀦𑀸𑀢𑀺 𑀤𑀺𑀝𑁆𑀞𑀦𑀺𑀬𑀸𑀫𑁂𑀦. 𑀅𑀮𑀚𑁆𑀚𑀺𑀲𑁆𑀲 𑀧𑀝𑀺𑀜𑁆𑀜𑀸𑀬 𑀏𑀯 𑀓𑀸𑀢𑀩𑁆𑀩𑀦𑁆𑀢𑀺 𑀯𑀘𑀦𑀧𑀝𑀺𑀯𑀘𑀦𑀓𑁆𑀓𑀫𑁂𑀦𑁂𑀯 𑀤𑁄𑀲𑁂 𑀆𑀯𑀺𑀪𑀽𑀢𑁂𑀧𑀺 𑀅𑀮𑀚𑁆𑀚𑀺𑀲𑁆𑀲 ‘‘𑀅𑀲𑀼𑀤𑁆𑀥𑁄𑀳’’𑀦𑁆𑀢𑀺 𑀤𑁄𑀲𑀲𑀫𑁆𑀧𑀝𑀺𑀘𑁆𑀙𑀦𑀧𑀅𑀜𑁆𑀜𑀸𑀬 𑀏𑀯 𑀆𑀧𑀢𑁆𑀢𑀺𑀬𑀸 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀅𑀮𑀚𑁆𑀚𑀺𑀲𑁆𑀲 𑀏𑀢𑀁 𑀦𑀢𑁆𑀣𑀻𑀢𑀺 𑀲𑀼𑀤𑁆𑀥𑀧𑀝𑀺𑀜𑁆𑀜𑀸𑀬 𑀏𑀯 𑀅𑀦𑀸𑀧𑀢𑁆𑀢𑀺𑀬𑀸 𑀓𑀸𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀅𑀦𑀼𑀯𑀺𑀚𑁆𑀚𑀓𑀲𑁆𑀲𑁂𑀯 𑀦𑀺𑀭𑀢𑁆𑀣𑀓𑀢𑁆𑀢𑀸𑀧𑀢𑁆𑀢𑀺𑀢𑁄 𑀘𑁄𑀤𑀓𑁂𑀦𑁂𑀯 𑀅𑀮𑀚𑁆𑀚𑀺𑀧𑀝𑀺𑀜𑁆𑀜𑀸𑀬 𑀞𑀸𑀢𑀩𑁆𑀩𑀢𑁄. 𑀤𑁄𑀲𑀸𑀧𑀕𑀫𑀧𑀝𑀺𑀜𑁆𑀜𑀸 𑀏𑀯 𑀳𑀺 𑀇𑀥 𑀧𑀝𑀺𑀜𑁆𑀜𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀏𑀢𑀫𑁆𑀧𑀺 𑀦𑀢𑁆𑀣𑀻𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀻’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬).

𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀦𑁆𑀢𑀺 𑀅𑀮𑀚𑁆𑀚𑀺𑀲𑁆𑀲 𑀤𑁄𑀲𑁂 𑀆𑀯𑀺𑀪𑀽𑀢𑁂𑀧𑀺 𑀢𑀲𑁆𑀲 𑀤𑁄𑀲𑀸𑀧𑀕𑀫𑀧𑀝𑀺𑀜𑁆𑀜𑀸𑀬 𑀏𑀯 𑀓𑀸𑀢𑀩𑁆𑀩𑀢𑀸𑀤𑀻𑀧𑀦𑀢𑁆𑀣𑀁. 𑀯𑀺𑀯𑀸𑀤𑀯𑀢𑁆𑀣𑀼𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸. 𑀲𑀜𑁆𑀜𑀁 𑀤𑀢𑁆𑀯𑀸𑀢𑀺 𑀦𑁂𑀲𑀁 𑀓𑀣𑀸𑀧𑀘𑁆𑀙𑁂𑀤𑀢𑁆𑀣𑀁, 𑀅𑀪𑀺𑀫𑀼𑀔𑀓𑀭𑀡𑀢𑁆𑀣𑀜𑁆𑀘 𑀲𑀤𑁆𑀤𑀁 𑀓𑀢𑁆𑀯𑀸. 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓𑁄𑀢𑀺 ‘‘𑀅𑀲𑀼𑀤𑁆𑀥𑁄’’𑀢𑀺 𑀲𑀜𑁆𑀜𑀸𑀬 𑀘𑁄𑀤𑀓𑀧𑀓𑁆𑀔𑁂 𑀧𑀯𑀺𑀝𑁆𑀞𑀢𑁆𑀢𑀸 𑀅𑀦𑀼𑀯𑀺𑀚𑁆𑀚𑀓𑀪𑀸𑀯𑀢𑁄 𑀩𑀳𑀺𑀪𑀽𑀢𑀢𑁆𑀢𑀸 𑀅𑀦𑀼𑀯𑀺𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀦𑁆𑀤𑁂𑀳𑁂 𑀏𑀯 𑀳𑀺 𑀲𑀢𑀺 𑀅𑀦𑀼𑀯𑀺𑀚𑁆𑀚𑀺𑀢𑀼𑀁 𑀲𑀓𑁆𑀓𑀸, 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀬𑀸 𑀧𑀦 𑀲𑀢𑀺 𑀘𑀼𑀤𑀺𑀢𑀓𑁂𑀦 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀅𑀲𑀘𑁆𑀘𑀢𑁄𑀧𑀺 𑀧𑀝𑀺𑀪𑀸𑀢𑀺, 𑀓𑀣𑀁 𑀢𑀢𑁆𑀣 𑀅𑀦𑀼𑀯𑀺𑀚𑁆𑀚𑀦𑀸 𑀲𑀺𑀬𑀸𑀢𑀺.

‘‘𑀢𑀣𑀸 𑀦𑀸𑀲𑀺𑀢𑀓𑁄𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀦𑀺𑀘𑁆𑀙𑀬𑀁 𑀅𑀤𑀢𑁆𑀯𑀸 𑀲𑀗𑁆𑀖𑀢𑁄 𑀯𑀺𑀬𑁄𑀚𑀦𑀁 𑀦𑀸𑀫 𑀮𑀺𑀗𑁆𑀕𑀦𑀸𑀲𑀦𑀸 𑀯𑀺𑀬 𑀅𑀬𑀫𑁆𑀧𑀺 𑀏𑀓𑁄 𑀦𑀸𑀲𑀦𑀧𑁆𑀧𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀭𑀤𑁆𑀥𑀁 𑀳𑁄𑀢𑀻𑀢𑀺 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀲𑀳𑀲𑀸 𑀆𑀧𑀦𑁆𑀦𑁄 𑀳𑁄𑀢𑀺. ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀤𑀁 ‘‘𑀧𑀓𑁆𑀔𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀻’’𑀢𑀺 𑀇𑀫𑀲𑁆𑀲 𑀅𑀮𑀚𑁆𑀚𑀺𑀮𑀓𑁆𑀔𑀡𑀲𑀫𑁆𑀪𑀯𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀧𑀝𑀺𑀘𑁆𑀙𑀸𑀤𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀮𑀚𑁆𑀚𑀻 𑀦𑀸𑀫 𑀏𑀯, 𑀧𑀼𑀭𑀺𑀫𑁄 𑀮𑀚𑁆𑀚𑀺𑀪𑀸𑀯𑁄 𑀦 𑀭𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀻𑀢𑀺 𑀲𑀘𑁂 𑀫𑀬𑀸 𑀓𑀢𑀤𑁄𑀲𑀁 𑀯𑀓𑁆𑀔𑀸𑀫𑀺, 𑀫𑀬𑁆𑀳𑀁 𑀅𑀦𑀼𑀯𑀢𑁆𑀢𑀓𑀸 𑀪𑀺𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀧𑀝𑀺𑀜𑁆𑀜𑀁 𑀦 𑀤𑁂𑀢𑀺. 𑀞𑀸𑀦𑁂 𑀦 𑀢𑀺𑀝𑁆𑀞𑀢𑀻𑀢𑀺 𑀮𑀚𑁆𑀚𑀺𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀓𑀸𑀬𑀯𑀸𑀘𑀸𑀲𑀼 𑀯𑀻𑀢𑀺𑀓𑁆𑀓𑀫𑁄 𑀳𑁄𑀢𑀺 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀯𑀺𑀦𑀺𑀘𑁆𑀙𑀬𑁄 𑀦 𑀤𑀸𑀢𑀩𑁆𑀩𑁄’’𑀢𑀺, 𑀧𑀼𑀩𑁆𑀩𑁂 𑀧𑀓𑁆𑀔𑀺𑀓𑀸𑀦𑀁 𑀧𑀝𑀺𑀜𑁆𑀜𑀸𑀬 𑀯𑀽𑀧𑀲𑀫𑀺𑀢𑀲𑁆𑀲𑀸𑀧𑀺 𑀅𑀥𑀺𑀓𑀭𑀡𑀲𑁆𑀲 𑀤𑀼𑀯𑀽𑀧𑀲𑀦𑁆𑀢𑀢𑀸𑀬 𑀅𑀬𑀫𑁆𑀧𑀺 𑀢𑀣𑀸 𑀦𑀸𑀲𑀺𑀢𑀓𑁄𑀯 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀼𑀤𑀺𑀢𑀓𑀘𑁄𑀤𑀓𑁂𑀲𑀼 𑀧𑀝𑀺𑀧𑀢𑁆𑀢𑀺𑀁 𑀜𑀢𑁆𑀯𑀸𑀢𑀺 ‘‘𑀢𑀼𑀫𑁆𑀳𑁂 𑀅𑀫𑁆𑀳𑀸𑀓𑀁 𑀯𑀺𑀦𑀺𑀘𑁆𑀙𑀬𑁂𑀦 𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀣𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀘𑀼𑀤𑀺𑀢𑀓𑀘𑁄𑀤𑀓𑁂𑀲𑀼 𑀅𑀦𑀼𑀯𑀺𑀚𑁆𑀚𑀓𑁂𑀦 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀓𑀫𑁆𑀫𑀁 𑀜𑀢𑁆𑀯𑀸. 𑀯𑀺𑀦𑀺𑀘𑁆𑀙𑀬𑁄 𑀫𑀚𑁆𑀛𑁂𑀢𑀺 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀦𑀸𑀧𑀢𑁆𑀢𑀻𑀢𑀺 𑀯𑀸 𑀯𑀺𑀦𑀺𑀘𑁆𑀙𑀬𑀧𑀭𑀺𑀬𑁄𑀲𑀸𑀦𑀅𑀦𑀼𑀯𑀺𑀚𑁆𑀚𑀦𑀸𑀦𑀁 𑀫𑀚𑁆𑀛𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀅𑀫𑀽𑀮𑀓𑀫𑁆𑀧𑀺 𑀲𑀫𑀽𑀮𑀓𑀁 𑀓𑀢𑁆𑀯𑀸 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀤𑁆𑀯𑁂 𑀫𑀽𑀮𑀸𑀦𑀻’’𑀢𑀺. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀻𑀢𑀺𑀆𑀤𑀻𑀲𑀼 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀤𑀦𑁆𑀢𑁄 𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀲𑀮𑀸𑀓𑀕𑁆𑀕𑀬𑀸𑀕𑀼𑀅𑀕𑁆𑀕𑀪𑀺𑀓𑁆𑀔𑀸𑀘𑀸𑀭𑀝𑁆𑀞𑀸𑀦𑀸𑀤𑀻𑀲𑀼 𑀘𑁄𑀤𑁂𑀦𑁆𑀢𑁄 𑀅𑀓𑀸𑀮𑁂𑀦 𑀯𑀤𑀢𑀺 𑀦𑀸𑀫. 𑀤𑁄𑀲𑀢𑁄 𑀯𑀼𑀝𑁆𑀞𑀸𑀧𑁂𑀢𑀼𑀓𑀸𑀫𑀢𑀸𑀬 𑀯𑀤𑀦𑁆𑀢𑁄 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀤𑀢𑀺 𑀦𑀸𑀫. 𑀤𑁄𑀲𑀦𑁆𑀢𑀭𑁄𑀢𑀺 𑀤𑁄𑀲𑀘𑀺𑀢𑁆𑀢𑁄. 𑀧𑀦𑁆𑀦𑀭𑀲𑀲𑀼 𑀥𑀫𑁆𑀫𑁂𑀲𑀽𑀢𑀺 ‘‘𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀆𑀘𑀸𑀭𑀢𑀸, 𑀢𑀣𑀸 𑀯𑀘𑀻𑀲𑀫𑀸𑀘𑀸𑀭𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀢𑀸, 𑀩𑀳𑀼𑀲𑁆𑀲𑀼𑀢𑀢𑀸, 𑀉𑀪𑀺𑀦𑁆𑀦𑀁 𑀧𑀸𑀢𑀺𑀫𑁄𑀓𑁆𑀔𑀸𑀦𑀁 𑀲𑁆𑀯𑀸𑀕𑀢𑀸𑀤𑀺𑀢𑀸, 𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁬𑁨) 𑀯𑀼𑀢𑁆𑀢𑀧𑀜𑁆𑀘𑀥𑀫𑁆𑀫𑀸 𑀘 𑀓𑀸𑀭𑀼𑀜𑁆𑀜𑀢𑀸, 𑀳𑀺𑀢𑁂𑀲𑀺𑀢𑀸, 𑀅𑀦𑀼𑀓𑀫𑁆𑀧𑀢𑀸, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸, 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸𑀢𑀺 (𑀘𑀽𑀴𑀯. 𑁪𑁦𑁧) 𑀇𑀫𑁂𑀲𑀼 𑀧𑀦𑁆𑀦𑀭𑀲𑀲𑀼. 𑀢𑀢𑁆𑀣 ‘‘𑀓𑀸𑀭𑀼𑀜𑁆𑀜𑀢𑀸’’𑀢𑀺 𑀇𑀫𑀺𑀦𑀸 𑀓𑀭𑀼𑀡𑀸 𑀤𑀲𑁆𑀲𑀺𑀢𑀸. 𑀳𑀺𑀢𑁂𑀲𑀺𑀢𑀸𑀢𑀺 𑀳𑀺𑀢𑀕𑀯𑁂𑀲𑀦𑀢𑀸. 𑀅𑀦𑀼𑀓𑀫𑁆𑀧𑀢𑀸𑀢𑀺 𑀢𑁂𑀦 𑀳𑀺𑀢𑁂𑀦 𑀲𑀁𑀬𑁄𑀚𑀦𑀢𑀸, 𑀇𑀫𑁂𑀳𑀺 𑀤𑁆𑀯𑀻𑀳𑀺𑀧𑀺 𑀫𑁂𑀢𑁆𑀢𑀸 𑀤𑀲𑁆𑀲𑀺𑀢𑀸. 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸𑀢𑀺 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑀦𑀢𑀸. 𑀯𑀢𑁆𑀣𑀼𑀁 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀫𑁆𑀫𑀓𑀭𑀡𑀁 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸 𑀦𑀸𑀫.

𑀅𑀥𑀺𑀓𑀭𑀡𑀝𑁆𑀞𑁂𑀦𑀸𑀢𑀺 𑀅𑀥𑀺𑀓𑀸𑀢𑀩𑁆𑀩𑀝𑁆𑀞𑁂𑀦, 𑀲𑀫𑀣𑁂𑀳𑀺 𑀯𑀽𑀧𑀲𑀫𑁂𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀇𑀥 𑀅𑀦𑀥𑀺𑀧𑁆𑀧𑁂𑀢𑀫𑁆𑀧𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀢𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑁂𑀲𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁩𑁮𑁫-𑁩𑁮𑁬). 𑀬𑀁 𑀅𑀥𑀺𑀓𑀺𑀘𑁆𑀘𑀸𑀢𑀺𑀆𑀤𑀺𑀦𑀸 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑀸 𑀯𑀼𑀢𑁆𑀢𑀸.

𑀕𑀸𑀳𑀦𑁆𑀢𑀺 ‘‘𑀅𑀲𑀼𑀓𑀁 𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀫𑀦𑀲𑀸 𑀘𑁄𑀤𑀦𑀸𑀓𑀸𑀭𑀲𑁆𑀲 𑀕𑀳𑀡𑀁. 𑀘𑁂𑀢𑀦𑀦𑁆𑀢𑀺 ‘‘𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀩𑁆𑀬𑀸𑀧𑀸𑀭𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀓𑀫𑁆𑀫𑀁. 𑀅𑀓𑁆𑀔𑀦𑁆𑀢𑀺𑀦𑁆𑀢𑀺 𑀘𑀼𑀤𑀺𑀢𑀓𑀲𑁆𑀲 𑀯𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀉𑀧𑁆𑀧𑀦𑁆𑀦𑀁 𑀓𑁄𑀥𑀁 𑀅𑀲𑀳𑀦𑀁, 𑀢𑀣𑀸 𑀧𑀯𑀢𑁆𑀢𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀁. 𑀯𑁄𑀳𑀸𑀭𑀦𑁆𑀢𑀺 𑀘𑁄𑀤𑀦𑀸𑀯𑀲𑀧𑁆𑀧𑀯𑀢𑁆𑀢𑀯𑀘𑀦𑀁. 𑀧𑀡𑁆𑀡𑀢𑁆𑀢𑀺𑀦𑁆𑀢𑀺 𑀘𑁄𑀤𑀦𑀸𑀯𑀲𑀧𑁆𑀧𑀯𑀢𑁆𑀢𑀁 𑀫𑀦𑀲𑀸 𑀧𑀭𑀺𑀓𑀧𑁆𑀧𑀺𑀢𑀁 𑀦𑀸𑀫𑀧𑀡𑁆𑀡𑀢𑁆𑀢𑀺𑀁. 𑀅𑀢𑁆𑀢𑀸𑀤𑀸𑀦𑀁 𑀕𑀳𑁂𑀢𑁆𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀸 𑀕𑀳𑁂𑀢𑁆𑀯𑀸. 𑀢𑀁 𑀅𑀥𑀺𑀓𑀭𑀡𑀦𑁆𑀢𑀺 𑀢𑀁 𑀕𑀸𑀳𑀮𑀓𑁆𑀔𑀡𑀁 𑀅𑀥𑀺𑀓𑀭𑀡𑀁. 𑀦𑀺𑀭𑀼𑀚𑁆𑀛𑀢𑀺 𑀘𑁂𑀢𑀦𑀸𑀬 𑀔𑀡𑀺𑀓𑀢𑁆𑀢𑀸, 𑀲𑀸 𑀘 𑀲𑀫𑀣𑀧𑁆𑀧𑀢𑁆𑀢𑀸 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀉𑀧𑀭𑀺𑀧𑀺 ‘‘𑀢𑀼𑀡𑁆𑀳𑀻 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑁄𑀳𑀸𑀭𑀯𑀘𑀦𑀲𑁆𑀲 𑀦𑀺𑀭𑁄𑀥𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀁 𑀅𑀥𑀺𑀓𑀭𑀡𑀁 𑀲𑀫𑀣𑀧𑁆𑀧𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀢𑀲𑁆𑀫𑀸 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀸𑀧𑀺 𑀏𑀓𑀘𑁆𑀘𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀫𑁆𑀧𑀺 𑀧𑀝𑀺𑀲𑁂𑀥𑁂𑀢𑁆𑀯𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀧𑀡𑁆𑀡𑀢𑁆𑀢𑀺𑀬𑀸 𑀏𑀯 𑀅𑀥𑀺𑀓𑀭𑀡𑀢𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀁 𑀧𑀦𑁂𑀢𑀦𑁆𑀢𑀺 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀦𑁆𑀢𑀺 𑀏𑀢𑀁 𑀕𑀳𑀡𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺 𑀏𑀓𑀦𑁆𑀢𑀅𑀓𑀼𑀲𑀮𑀲𑀪𑀸𑀯𑀸 𑀯𑀸 𑀅𑀩𑁆𑀬𑀸𑀓𑀢𑀲𑀪𑀸𑀯𑀸 𑀯𑀸 𑀳𑁄𑀢𑀻𑀢𑀺 𑀲𑀜𑁆𑀜𑀸𑀬 ‘‘𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻’’𑀢𑀺𑀆𑀤𑀺𑀓𑀁 𑀲𑀼𑀢𑁆𑀢𑀁 𑀧𑀡𑁆𑀡𑀢𑁆𑀢𑀺𑀅𑀥𑀺𑀓𑀭𑀡𑀯𑀸𑀤𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀉𑀤𑁆𑀥𑀝𑀁. 𑀢𑁂𑀦𑀸𑀳 ‘‘𑀦 𑀳𑀺 𑀢𑁂…𑀧𑁂… 𑀅𑀘𑁆𑀘𑀦𑁆𑀢𑀅𑀓𑀼𑀲𑀮𑀢𑁆𑀢𑀸’’𑀢𑀺𑀆𑀤𑀺. 𑀢𑁂𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸.

𑀅𑀫𑀽𑀮𑀓𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀦𑁆𑀢𑀺 𑀏𑀢𑁆𑀣 𑀅𑀫𑀽𑀮𑀓𑀧𑀸𑀭𑀸𑀚𑀺𑀓𑀫𑁂𑀯 𑀅𑀥𑀺𑀓𑀭𑀡-𑀲𑀤𑁆𑀤𑁂𑀦 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀸𑀬 𑀅𑀫𑀽𑀮𑀓𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀏𑀯 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀸𑀬 𑀧𑀡𑁆𑀡𑀢𑁆𑀢𑀺𑀬𑀸𑀢𑀺 𑀲𑀪𑀸𑀯𑀢𑁄 𑀧𑀭𑀺𑀲𑀼𑀤𑁆𑀥𑁂𑀧𑀺 𑀧𑀼𑀕𑁆𑀕𑀮𑁂 ‘‘𑀧𑀸𑀭𑀸𑀚𑀺𑀓𑁄’’𑀢𑀺𑀆𑀤𑀺𑀦𑀸 𑀘𑁄𑀤𑀓𑁂𑀦 𑀧𑀯𑀢𑁆𑀢𑀺𑀢𑀁 𑀦𑀸𑀫𑀧𑀡𑁆𑀡𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀜𑁆𑀜𑀢𑁆𑀢𑁄𑀢𑀺 𑀓𑀣𑀺𑀢𑁄. 𑀅𑀥𑀺𑀓𑀭𑀡𑁂 𑀧𑀯𑀢𑁆𑀢𑀢𑁆𑀢𑀸𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀫𑀦𑀲𑀸 𑀆𑀭𑁄𑀧𑀺𑀢𑀫𑀢𑁆𑀢𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀯𑀸𑀘𑀓𑀪𑀸𑀯𑁂𑀦 𑀧𑀯𑀢𑁆𑀢𑀢𑁆𑀢𑀸.

𑀏𑀯𑀁 𑀦𑀸𑀫𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀧𑀡𑁆𑀡𑀢𑁆𑀢𑀺𑀯𑀲𑁂𑀦𑀸𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀯𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑁂𑀦 𑀫𑀦𑀲𑀸 𑀆𑀭𑁄𑀧𑀺𑀢𑀅𑀢𑁆𑀣𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀜𑁆𑀘 𑀔𑁄 𑀇𑀥𑁂𑀯𑀸𑀢𑀺 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀧𑀡𑁆𑀡𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀢𑁆𑀢𑀁 𑀇𑀥𑁂𑀯 𑀇𑀫𑀲𑁆𑀫𑀺𑀁 𑀏𑀯 𑀲𑀺𑀓𑁆𑀔𑀸𑀧𑀤𑁂. 𑀏𑀓𑁂𑀢𑀺 𑀓𑁂𑀘𑀺. 𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀬𑀁 𑀏𑀓𑀘𑁆𑀘𑁂𑀳𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀅𑀥𑀺𑀓𑀭𑀡𑀲𑁆𑀲 𑀧𑀡𑁆𑀡𑀢𑁆𑀢𑀺𑀪𑀸𑀯𑀁 𑀦𑀺𑀲𑁂𑀥𑁂𑀢𑁆𑀯𑀸 𑀓𑀼𑀲𑀮𑀸𑀤𑀺𑀧𑀭𑀫𑀢𑁆𑀣𑀪𑀸𑀯𑀁 𑀲𑀸𑀥𑁂𑀢𑀼𑀁 ‘‘𑀢𑀁 𑀧𑀦𑁂𑀢𑀁 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀧𑀧𑀜𑁆𑀘𑀢𑁄 𑀤𑀲𑁆𑀲𑀺𑀢𑁄, 𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸, 𑀢𑁂𑀦 𑀘 𑀢𑀲𑁆𑀫𑀺𑀁 𑀯𑀸𑀤𑁂 𑀬𑀤𑀺 𑀆𑀧𑀢𑁆𑀢𑀺 𑀦𑀸𑀫 𑀅𑀓𑀼𑀲𑀮𑀸 𑀯𑀸 𑀅𑀩𑁆𑀬𑀸𑀓𑀢𑀸 𑀯𑀸 𑀪𑀯𑁂𑀬𑁆𑀬, 𑀓𑀣𑀁 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀦𑀸𑀧𑀢𑁆𑀢𑀺 𑀪𑀯𑁂𑀬𑁆𑀬? 𑀢𑀲𑁆𑀲𑀸𑀧𑀺 𑀅𑀓𑀼𑀲𑀮𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀪𑀕𑀯𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀧𑀢𑁆𑀢𑀻𑀢𑀺𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀫𑁂𑀣𑀼𑀦𑀸𑀤𑀻𑀲𑀼 𑀅𑀓𑀼𑀲𑀮𑀸𑀤𑀻𑀦𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀢𑁄 𑀧𑀼𑀩𑁆𑀩𑁂𑀧𑀺 𑀲𑀫𑀼𑀧𑁆𑀧𑀢𑁆𑀢𑀺𑀢𑁄. 𑀢𑀢𑁄 𑀏𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀫𑁆𑀧𑀺 𑀆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑁄, 𑀕𑀺𑀮𑀸𑀦𑀸𑀤𑀻𑀦𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀅𑀦𑀸𑀧𑀢𑁆𑀢𑀺𑀅𑀪𑀸𑀯𑀧𑁆𑀧𑀲𑀗𑁆𑀕𑁄 𑀘 𑀲𑀺𑀬𑀸. 𑀅𑀣 𑀫𑀢𑀁 ‘‘𑀦 𑀓𑁂𑀯𑀮𑀁 𑀅𑀓𑀼𑀲𑀮𑀸𑀤𑀺 𑀏𑀯, 𑀅𑀣 𑀔𑁄 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀚𑀸𑀦𑀦𑁆𑀢𑀲𑁆𑀲 𑀲𑀫𑀼𑀧𑁆𑀧𑀚𑁆𑀚𑀫𑀸𑀦𑀸 𑀏𑀯 𑀅𑀓𑀼𑀲𑀮𑀸𑀤𑀬𑁄 𑀆𑀧𑀢𑁆𑀢𑀻’’𑀢𑀺, 𑀢𑀫𑁆𑀧𑀺 𑀅𑀲𑀸𑀭𑀁, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀫𑁂𑀣𑀼𑀦𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄, 𑀅𑀓𑀼𑀲𑀮𑀸𑀤𑀺𑀲𑀪𑀸𑀯𑀸𑀬 𑀘 𑀆𑀧𑀢𑁆𑀢𑀺𑀬𑀸 𑀏𑀓𑀧𑀬𑁄𑀕𑀸𑀤𑀻𑀲𑀼 𑀏𑀓𑀢𑁆𑀢𑀸𑀤𑀺𑀧𑀺 𑀦 𑀲𑀺𑀬𑀸. 𑀦 𑀳𑀺 𑀲𑀓𑀮𑀫𑁆𑀧𑀺 𑀤𑀺𑀯𑀲𑀁 𑀇𑀢𑁆𑀣𑀺𑀁 𑀓𑀸𑀬𑀢𑁄 𑀅𑀫𑁄𑀘𑁂𑀢𑁆𑀯𑀸 𑀨𑀼𑀲𑀦𑁆𑀢𑀲𑁆𑀲 𑀏𑀓𑀫𑁂𑀯𑀸𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀩𑀳𑀽 𑀯𑀸 𑀇𑀢𑁆𑀣𑀺𑀬𑁄 𑀨𑀼𑀲𑀺𑀢𑁆𑀯𑀸 𑀅𑀧𑀕𑀘𑁆𑀙𑀦𑁆𑀢𑀲𑁆𑀲 𑀩𑀳𑀽𑀦𑀺, 𑀬𑁂𑀦𑀸𑀧𑀢𑁆𑀢𑀺𑀬𑀸 𑀏𑀓𑀢𑁆𑀢𑀁, 𑀩𑀳𑀼𑀢𑁆𑀢𑀁 𑀯𑀸 𑀲𑀺𑀬𑀸𑀢𑀺 𑀏𑀯𑀫𑀸𑀤𑀺𑀓𑀁 𑀅𑀬𑀼𑀢𑁆𑀢𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀯𑀢𑁆𑀣𑀼𑀜𑁆𑀘𑀸𑀢𑀺 𑀯𑀻𑀢𑀺𑀓𑁆𑀓𑀫𑁄. 𑀢𑀜𑁆𑀳𑀺 𑀆𑀧𑀢𑁆𑀢𑀺𑀲𑀫𑁆𑀫𑀼𑀢𑀺𑀧𑀜𑁆𑀜𑀸𑀧𑀦𑀲𑁆𑀲 𑀑𑀓𑀸𑀲𑀝𑁆𑀞𑁂𑀦 ‘‘𑀯𑀢𑁆𑀣𑀽’’𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀢𑁆𑀢𑀦𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀢𑁄 𑀩𑀼𑀤𑁆𑀥𑀺𑀲𑀤𑁆𑀤𑀦𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀺𑀓𑀧𑁆𑀧𑀺𑀢𑀲𑀸𑀫𑀜𑁆𑀜𑀸𑀓𑀸𑀭𑁄 𑀕𑁄𑀢𑁆𑀢𑀁. 𑀦𑀸𑀫𑀦𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀦𑀸𑀫𑀧𑀜𑁆𑀜𑀢𑁆𑀢𑀺. 𑀢𑀲𑁆𑀲 𑀧𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀲𑁆𑀲 𑀅𑀢𑁆𑀣𑀪𑀽𑀢𑀸 𑀆𑀧𑀢𑁆𑀢𑀺 𑀅𑀢𑁆𑀣𑀧𑀜𑁆𑀜𑀢𑁆𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺𑀆𑀤𑀺 (𑀘𑀽𑀴𑀯. 𑁨𑁨𑁦; 𑀧𑀭𑀺. 𑁩𑁦𑁩), ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮’’𑀦𑁆𑀢𑀺𑀆𑀤𑀺 (𑀘𑀽𑀴𑀯. 𑁨𑁨𑁨) 𑀘 𑀲𑀼𑀢𑁆𑀢𑀁 𑀢𑁂𑀳𑀺 𑀲𑀫𑀼𑀤𑁆𑀥𑀝𑀁, 𑀢𑀫𑁆𑀧𑀺 𑀦 𑀯𑀺𑀯𑀸𑀤𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑀲𑁆𑀲 𑀧𑀭𑀺𑀬𑀸𑀬𑀤𑁂𑀲𑀺𑀢𑀢𑁆𑀢𑀸𑀢𑀺 𑀬𑀁 𑀏𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀡𑁆𑀡𑀦𑀸𑀬 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀭𑀤𑁆𑀥𑀝𑁆𑀞𑀸𑀦𑀲𑁄𑀥𑀦𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀦𑁆𑀢𑀺 𑀢𑀢𑁆𑀣𑁂𑀯 𑀢𑀁 𑀕𑀳𑁂𑀢𑀩𑁆𑀩𑀁, 𑀲𑀸𑀭𑀢𑁆𑀣𑀤𑀻𑀧𑀦𑀻𑀓𑀸𑀭𑀓𑀲𑁆𑀲 𑀅𑀓𑀼𑀲𑀮𑀸𑀤𑀺𑀭𑀽𑀧𑀸𑀯 𑀆𑀧𑀢𑁆𑀢𑀻𑀢𑀺 𑀮𑀤𑁆𑀥𑀺, 𑀢𑁂𑀦𑁂𑀯 𑀲𑁄 𑀇𑀥𑀸𑀧𑀺 ‘‘𑀢𑀲𑁆𑀫𑀸 𑀧𑀡𑁆𑀡𑀢𑁆𑀢𑀺𑀅𑀥𑀺𑀓𑀭𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘𑀢𑀁 𑀧𑀦𑁂𑀢’𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁩𑁮𑁫-𑁩𑁮𑁬) 𑀏𑀯𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀲𑁆𑀲𑀧𑀺 𑀮𑀤𑁆𑀥𑀺𑀁 𑀓𑀢𑁆𑀯𑀸 𑀕𑀦𑁆𑀣𑀯𑀺𑀭𑁄𑀥𑀫𑁆𑀧𑀺 𑀅𑀦𑁄𑀮𑁄𑀓𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀦 𑀳𑁂𑀢𑁆𑀣 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄 𑀅𑀝𑁆𑀞𑀓𑀣𑀸𑀯𑀸𑀤𑀁 𑀅𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀭𑀪𑀺 ‘‘𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀫𑁂𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀲𑀬𑀫𑁂𑀯 𑀉𑀧𑀭𑀺 𑀓𑀣𑀦𑀢𑁄, 𑀅𑀣 𑀔𑁄 𑀤𑀼𑀮𑁆𑀮𑀤𑁆𑀥𑀺𑀓𑀸𑀦𑀁 𑀏𑀓𑀘𑁆𑀘𑀸𑀦𑀁 𑀢𑀢𑁆𑀣 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀧𑀝𑀺𑀲𑁂𑀥𑁂𑀢𑀼𑀓𑀸𑀫𑁄 𑀆𑀭𑀪𑀺, 𑀢𑁂𑀦𑁂𑀯 𑀅𑀦𑁆𑀢𑁂 ‘‘𑀏𑀓𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀯𑀸𑀤𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀓𑀢𑁆𑀢𑁂 𑀢𑀁𑀲𑀫𑀣𑀸𑀦𑀫𑁆𑀧𑀺 𑀢𑀩𑁆𑀪𑀸𑀯𑁄 𑀆𑀧𑀚𑁆𑀚𑀢𑀺 𑀧𑀭𑀫𑀢𑁆𑀣𑁂𑀲𑀼 𑀧𑀡𑁆𑀡𑀢𑁆𑀢𑀺𑀬𑀸 𑀲𑀫𑀣𑀸𑀬𑁄𑀕𑀸𑀢𑀺 𑀆𑀳 ‘‘𑀓𑀼𑀲𑀮𑀸𑀤𑀺𑀲𑀫𑀣𑁂𑀳𑀻’’𑀢𑀺. 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸𑀦𑀫𑁂𑀯 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸, 𑀦 𑀧𑀦 𑀓𑀼𑀲𑀮𑀸𑀤𑀺𑀧𑀭𑀫𑀢𑁆𑀣𑀭𑀽𑀧𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀔𑀡𑀺𑀓𑀢𑀸𑀬 𑀲𑀬𑀫𑁂𑀯 𑀲𑀫𑀣𑀧𑁆𑀧𑀢𑁆𑀢𑀺𑀢𑁄𑀢𑀺 𑀳𑁂𑀝𑁆𑀞𑀸 𑀲𑀫𑀢𑁆𑀣𑀺𑀢𑀫𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀇𑀢𑀺 𑀇𑀫𑀺𑀦𑀸 𑀅𑀥𑀺𑀓𑀭𑀡𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. ‘‘𑀇𑀥𑁂𑀓𑀘𑁆𑀘𑁄’’𑀢𑀺 𑀇𑀫𑀺𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀯𑀺𑀯𑀸𑀤𑀁 𑀦𑀺𑀯𑀢𑁆𑀢𑁂𑀢𑀺.

𑀅𑀦𑀼𑀯𑀸𑀤𑁄𑀢𑀺 𑀯𑀺𑀧𑀢𑁆𑀢𑀻𑀳𑀺 𑀉𑀧𑀯𑀤𑀦𑀸 𑀘𑁂𑀯 𑀘𑁄𑀤𑀦𑀸 𑀘. 𑀢𑀢𑁆𑀣 𑀉𑀧𑀯𑀤𑀦𑀸 𑀦𑀸𑀫 𑀕𑀭𑀳𑀸, 𑀅𑀓𑁆𑀓𑁄𑀲𑁄 𑀘. 𑀧𑀜𑁆𑀘𑀧𑀻𑀢𑀺 𑀫𑀸𑀢𑀺𑀓𑀸𑀧𑀭𑀺𑀬𑀸𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀘𑁆𑀘𑀬𑀢𑀸𑀢𑀺 𑀓𑀢𑁆𑀢𑀩𑁆𑀩𑀢𑀸. 𑀲𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑀲𑁆𑀲𑀸𑀢𑀺 𑀏𑀢𑁆𑀣 𑀧𑀤𑀸𑀦𑀼𑀓𑁆𑀓𑀫𑀦𑀺𑀤𑁆𑀤𑁂𑀲𑁄𑀢𑀺 𑀧𑀤𑀪𑀸𑀚𑀦𑀁 𑀯𑀼𑀘𑁆𑀘𑀢𑀺, 𑀢𑁂𑀦 𑀲𑀳𑀺𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁩𑁮𑁭. 𑀅𑀲𑁆𑀲𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀏𑀢𑁂𑀦 𑀘𑁄𑀤𑀓𑁂𑀦𑀸’’𑀢𑀺𑀆𑀤𑀺. 𑀤𑀺𑀝𑁆𑀞𑀫𑀽𑀮𑀓𑁂 𑀧𑀦𑀸𑀢𑀺 ‘‘𑀤𑀺𑀝𑁆𑀞𑀲𑁆𑀲 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄’’𑀢𑀺𑀆𑀤𑀺 (𑀧𑀸𑀭𑀸. 𑁩𑁮𑁭) 𑀧𑀸𑀴𑀺𑀯𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄𑀦𑀺𑀲𑀚𑁆𑀚𑀸𑀤𑀺𑀤𑀲𑁆𑀲𑀦𑀫𑀢𑁆𑀢𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀧𑀼𑀕𑁆𑀕𑀮𑁄 𑀢𑁂𑀦 𑀤𑀺𑀝𑁆𑀞𑁄, 𑀦 𑀧𑀦 𑀫𑀕𑁆𑀕𑁂𑀦 𑀫𑀕𑁆𑀕𑀧𑁆𑀧𑀝𑀺𑀧𑀸𑀤𑀦𑀸𑀤𑀺𑀤𑀲𑁆𑀲𑀦𑀯𑀲𑁂𑀦. 𑀬𑀤𑀺 𑀳𑀺 𑀢𑁂𑀦 𑀲𑁄 𑀢𑀣𑀸 𑀤𑀺𑀝𑁆𑀞𑁄 𑀪𑀯𑁂𑀬𑁆𑀬, 𑀅𑀲𑀼𑀤𑁆𑀥𑀲𑀜𑁆𑀜𑀻 𑀏𑀯𑀸𑀬𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀺𑀬𑀸, 𑀅𑀲𑀼𑀤𑁆𑀥𑀲𑀜𑁆𑀜𑀸𑀬 𑀘 𑀲𑀼𑀤𑁆𑀥𑀁 𑀯𑀸 𑀅𑀲𑀼𑀤𑁆𑀥𑀁 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄 𑀦 𑀲𑀺𑀬𑀸 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲, 𑀅𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀭𑀸. 𑁩𑁯𑁦). 𑀢𑀲𑁆𑀫𑀸 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀭𑀳𑁄𑀦𑀺𑀲𑀚𑁆𑀚𑀸𑀤𑀺𑀫𑀢𑁆𑀢𑀫𑁂𑀯 𑀤𑀺𑀲𑁆𑀯𑀸𑀧𑀺 ‘‘𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄, 𑀦𑀸𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀢𑀻’’𑀢𑀺 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀲𑁆𑀲 𑀯𑀸 𑀯𑁂𑀫𑀢𑀺𑀓𑀲𑁆𑀲 𑀯𑀸 ‘‘𑀲𑀼𑀢𑁄 𑀫𑀬𑀸 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀺𑀬𑀫𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀦 𑀅𑀲𑀼𑀤𑁆𑀥𑀲𑀜𑁆𑀜𑀺𑀲𑁆𑀲, 𑀢𑀲𑁆𑀲 𑀧𑀦 𑀤𑀺𑀝𑁆𑀞𑀁 𑀲𑀼𑀢𑀦𑁆𑀢𑀺 𑀫𑀼𑀲𑀸𑀯𑀸𑀤𑀸𑀤𑀺𑀧𑀘𑁆𑀘𑀬𑀸 𑀮𑀳𑀼𑀓𑀸𑀧𑀢𑁆𑀢𑀺 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀲𑁄 𑀢𑀲𑁆𑀫𑀺𑀁 𑀲𑀼𑀤𑁆𑀥𑀤𑀺𑀝𑁆𑀞𑀺𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄𑀧𑀺 𑀤𑀺𑀝𑁆𑀞𑀁 𑀭𑀳𑁄𑀦𑀺𑀲𑀚𑁆𑀚𑀸𑀤𑀺𑀫𑀢𑁆𑀢𑀫𑁂𑀯 𑀯𑀤𑀢𑀺, 𑀅𑀤𑀺𑀝𑁆𑀞𑀁 𑀧𑀦 𑀫𑀕𑁆𑀕𑁂𑀦𑀫𑀕𑁆𑀕𑀧𑁆𑀧𑀝𑀺𑀧𑀸𑀤𑀦𑀸𑀤𑀺𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀁 𑀯𑀸 ‘‘𑀅𑀲𑁆𑀲𑀫𑀡𑁄𑀲𑀻’’𑀢𑀺𑀆𑀤𑀺𑀓𑀁 𑀯𑀸 𑀦 𑀯𑀤𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀅𑀥𑀺𑀓𑀁 𑀯𑀤𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺𑀬𑁂𑀯 ‘‘𑀅𑀤𑀺𑀝𑁆𑀞𑀁 𑀤𑀺𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑁩𑁮𑁬-𑁩𑁮𑁭) 𑀯𑀼𑀢𑁆𑀢𑀢𑁆𑀢𑀸. 𑀬𑁄 𑀧𑀦 𑀤𑀺𑀝𑁆𑀞𑁂𑀦 𑀭𑀳𑁄𑀦𑀺𑀲𑀚𑁆𑀚𑀸𑀤𑀺𑀦𑀸 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀅𑀲𑀼𑀤𑁆𑀥𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 ‘‘𑀤𑀺𑀝𑁆𑀞𑁄’’𑀢𑀺 𑀯𑀸 ‘‘𑀲𑀼𑀢𑁄’’𑀢𑀺 𑀯𑀸 𑀆𑀤𑀺𑀁 𑀯𑀤𑀢𑀺, 𑀢𑀲𑁆𑀲𑀸𑀧𑀺 𑀦 𑀲𑀗𑁆𑀖𑀸𑀤𑀺𑀲𑁂𑀲𑁄 𑀅𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸𑀬𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑁂𑀦 𑀲𑀼𑀤𑁆𑀥𑀲𑀜𑁆𑀜𑀸𑀪𑀸𑀯𑀸 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺, 𑀇𑀤𑀁 𑀬𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀁 ‘𑀅𑀬𑀁 𑀅𑀦𑀚𑁆𑀛𑀸𑀧𑀦𑁆𑀦𑁄’𑀢𑀺 𑀜𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦…𑀧𑁂… 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀼𑀢𑀸𑀤𑀺𑀫𑀽𑀮𑀓𑁂𑀲𑀼𑀧𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀢𑁆𑀭 𑀆𑀕𑀢𑁂𑀲𑀽𑀢𑀺 𑀑𑀫𑀲𑀯𑀸𑀤𑀸𑀤𑀻𑀲𑀼 𑀆𑀕𑀢𑁂𑀲𑀼. 𑀅𑀯𑀲𑁆𑀲𑀼𑀢𑁄𑀢𑀺 𑀢𑀻𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀤𑀼𑀘𑁆𑀘𑀭𑀺𑀢𑀸𑀦𑀼𑀯𑀲𑁆𑀲𑀦𑁂𑀦 𑀢𑀺𑀦𑁆𑀢𑁄. 𑀓𑀲𑀫𑁆𑀩𑀼𑀚𑀸𑀢𑁄𑀢𑀺 𑀓𑀘𑀯𑀭𑀪𑀽𑀢𑁄, 𑀦𑀺𑀲𑁆𑀲𑀸𑀭𑁄𑀢𑀺 𑀅𑀢𑁆𑀣𑁄.

𑀓𑁄𑀡𑁆𑀞𑁄𑀢𑀺 𑀘𑁄𑀭𑁄, 𑀤𑀼𑀲𑁆𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀚𑁂𑀝𑁆𑀞𑀩𑁆𑀩𑀢𑀺𑀓𑁄𑀢𑀺 𑀓𑀸𑀴𑀓𑀡𑁆𑀡𑀺𑀤𑁂𑀯𑀻𑀯𑀢𑁂 𑀦𑀺𑀬𑀼𑀢𑁆𑀢𑁄 𑀢𑀺𑀢𑁆𑀣𑀺𑀬𑁄𑀢𑀺 𑀯𑀤𑀢𑀺, 𑀲𑀸 𑀓𑀺𑀭 𑀓𑀸𑀴𑀓𑀡𑁆𑀡𑀺𑀲𑀺𑀭𑀺𑀤𑁂𑀯𑀺𑀬𑀸 𑀚𑁂𑀝𑁆𑀞𑀸𑀢𑀺 𑀯𑀼𑀢𑁆𑀢𑀸. 𑀬𑀤𑀕𑁆𑀕𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦, 𑀬𑀢𑁆𑀢𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀤𑀕𑁆𑀕𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑁄 𑀓𑀧𑁆𑀧𑁂𑀢𑀻𑀢𑀺𑀆𑀤𑀺 𑀯𑁂𑀫𑀢𑀺𑀓𑀪𑀸𑀯𑀤𑀻𑀧𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄.

𑁩𑁮𑁯. 𑀏𑀢𑁆𑀣𑀸𑀢𑀺 𑀘𑁄𑀤𑀦𑀸𑀬𑀁. 𑀢𑀚𑁆𑀚𑀦𑀻𑀬𑀸𑀤𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀓𑀫𑁆𑀫𑀸𑀥𑀺𑀧𑁆𑀧𑀸𑀬𑁄 𑀦𑀸𑀫. 𑀧𑀭𑀺𑀯𑀸𑀲𑀤𑀸𑀦𑀸𑀤𑀺𑀓𑁆𑀓𑀫𑁂𑀦 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑁂𑀢𑀼𑀁 𑀆𑀧𑀢𑁆𑀢𑀺𑀬𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀯𑀼𑀝𑁆𑀞𑀸𑀦𑀸𑀥𑀺𑀧𑁆𑀧𑀸𑀬𑁄. 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁 𑀯𑀸 𑀲𑀗𑁆𑀖𑁂 𑀓𑀸𑀢𑀼𑀁 𑀅𑀤𑀸𑀦𑀢𑁆𑀣𑀸𑀬 𑀆𑀧𑀢𑁆𑀢𑀺𑀬𑀸 𑀘𑁄𑀤𑀬𑀢𑁄 𑀅𑀥𑀺𑀧𑁆𑀧𑀸𑀬𑁄 𑀉𑀧𑁄𑀲𑀣𑀧𑀯𑀸𑀭𑀡𑀝𑁆𑀞𑀧𑀦𑀸𑀥𑀺𑀧𑁆𑀧𑀸𑀬𑁄. 𑀅𑀲𑀫𑁆𑀫𑀼𑀔𑀸…𑀧𑁂… 𑀤𑀼𑀓𑁆𑀓𑀝𑀦𑁆𑀢𑀺 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲𑀧𑀺 𑀅𑀓𑁆𑀓𑁄𑀲𑀦𑁆𑀢𑀲𑁆𑀲𑀧𑀺 𑀤𑀼𑀓𑁆𑀓𑀝𑀁.

𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀸𑀲𑀼 𑀅𑀝𑁆𑀞𑀓𑀣𑀸𑀲𑀼. 𑀉𑀧𑁄𑀲𑀣𑀧𑀯𑀸𑀭𑀡𑀸𑀦𑀁 𑀜𑀢𑁆𑀢𑀺𑀓𑀫𑁆𑀫𑀪𑀸𑀯𑀢𑁄 𑀜𑀢𑁆𑀢𑀺𑀬𑀸 𑀯𑀢𑁆𑀢𑀫𑀸𑀦𑀸𑀬 𑀏𑀯 𑀉𑀧𑁄𑀲𑀣𑀧𑀯𑀸𑀭𑀡𑀝𑁆𑀞𑀧𑀦𑀁 𑀳𑁄𑀢𑀺, 𑀦 𑀦𑀺𑀝𑁆𑀞𑀺𑀢𑀸𑀬, 𑀲𑀸 𑀘 𑀬𑁆𑀬-𑀓𑀸𑀭𑁂 𑀧𑀢𑁆𑀢𑁂 𑀦𑀺𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀬𑁆𑀬-𑀓𑀸𑀭𑁂 𑀧𑀢𑁆𑀢𑁂 𑀦 𑀮𑀩𑁆𑀪𑀢𑀻’’𑀢𑀺.

𑀅𑀦𑀼𑀧𑀸𑀲𑀓𑁄𑀢𑀺 𑀉𑀧𑀸𑀲𑀓𑁄𑀧𑀺 𑀲𑁄 𑀪𑀺𑀓𑁆𑀔𑀼 𑀦 𑀳𑁄𑀢𑀺 𑀲𑀭𑀡𑀕𑀫𑀦𑀲𑁆𑀲𑀸𑀧𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. ‘‘𑀅𑀦𑁄𑀤𑀺𑀲𑁆𑀲 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀑𑀤𑀺𑀲𑁆𑀲 𑀓𑀣𑁂𑀦𑁆𑀢𑁂𑀦 𑀑𑀓𑀸𑀲𑀁 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸𑀢𑀺 𑀑𑀓𑀸𑀲𑀸𑀓𑀸𑀭𑀸𑀧𑀦𑀸𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸. 𑀬𑀁 𑀘𑁄𑀤𑁂𑀢𑀺, 𑀢𑀲𑁆𑀲 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀗𑁆𑀔𑁆𑀬𑀼𑀧𑀕𑀫𑀦𑀁, 𑀢𑀲𑁆𑀫𑀺𑀁 𑀲𑀼𑀤𑁆𑀥𑀲𑀜𑁆𑀜𑀺𑀢𑀸 𑀯𑁂𑀫𑀢𑀺𑀓𑀢𑀸 𑀯𑀸, 𑀬𑁂𑀦 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺, 𑀢𑀲𑁆𑀲 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀫𑀽𑀮𑀓𑀢𑀸, 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀢𑁆𑀯𑀁 𑀧𑀸𑀭𑀸𑀚𑀺𑀓𑁄’’𑀢𑀺𑀆𑀤𑀺𑀦𑀸 𑀦𑀺𑀬𑀫𑁂𑀢𑁆𑀯𑀸 𑀲𑀫𑁆𑀫𑀼𑀔𑀸 𑀘𑁄𑀤𑀦𑀸 𑀘𑁄𑀤𑀸𑀧𑀦𑀸, 𑀢𑀲𑁆𑀲 𑀢𑀗𑁆𑀔𑀡𑀯𑀺𑀚𑀸𑀦𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀧𑀜𑁆𑀘 𑀅𑀗𑁆𑀕𑀸𑀦𑀺.

𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.