𑁧𑁦. 𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁧𑁦. 𑀤𑀲𑀫𑁂 𑀩𑀳𑀽𑀦𑀦𑁆𑀢𑀺 𑀤𑀼𑀩𑁆𑀩𑀮𑀢𑀸𑀬 𑀅𑀭𑀜𑁆𑀜𑀸𑀤𑀺𑀲𑁂𑀯𑀸𑀬 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁. 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑀯𑀘𑀦𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀲𑀗𑁆𑀔𑀸𑀢𑀁 𑀩𑁆𑀬𑀜𑁆𑀚𑀦𑀧𑀤𑀫𑁂𑀯 𑀧𑀭𑀫𑀁 𑀅𑀲𑁆𑀲, 𑀦 𑀫𑀕𑁆𑀕𑀮𑀸𑀪𑁄𑀢𑀺 𑀧𑀤𑀧𑀭𑀫𑁄. 𑀅𑀪𑀺𑀲𑀫𑁆𑀪𑀼𑀡𑀺𑀢𑁆𑀯𑀸𑀢𑀺 𑀦𑀺𑀧𑁆𑀨𑀸𑀤𑁂𑀢𑁆𑀯𑀸. 𑀥𑀫𑁆𑀫𑀢𑁄 𑀅𑀧𑁂𑀢𑀁 𑀉𑀤𑁆𑀥𑀫𑁆𑀫𑀁. 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯𑀸𑀢𑀺 ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁦𑁪) 𑀯𑀘𑀦𑀢𑁄 𑀯𑀼𑀢𑁆𑀢𑀁, 𑀇𑀤𑀫𑁂𑀯 𑀯𑀘𑀦𑀁 𑀲𑀦𑁆𑀥𑀸𑀬 𑀧𑀸𑀴𑀺𑀬𑀫𑁆𑀧𑀺 ‘‘𑀅𑀝𑁆𑀞 𑀫𑀸𑀲𑁂’’𑀢𑀺𑀆𑀤𑀺 (𑀧𑀸𑀭𑀸. 𑁪𑁦𑁯) 𑀯𑀼𑀢𑁆𑀢𑀁.

𑀢𑀻𑀳𑀺 𑀓𑁄𑀝𑀻𑀳𑀻𑀢𑀺 𑀅𑀲𑀼𑀤𑁆𑀥𑀫𑀽𑀮𑁂𑀳𑀺. 𑀏𑀢𑁆𑀣 𑀘 𑀪𑀺𑀓𑁆𑀔𑀽𑀦𑀁 𑀘𑀢𑀽𑀲𑀼 𑀓𑀼𑀮𑁂𑀲𑀼 𑀧𑀓𑁆𑀓𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀦𑀺𑀲𑁆𑀲𑀺𑀢𑀢𑀸𑀬, 𑀫𑀘𑁆𑀙𑀫𑀁𑀲𑀪𑁄𑀚𑀦𑀯𑀺𑀭𑀳𑀺𑀢𑀲𑁆𑀲 𑀘 𑀓𑀼𑀮𑀲𑁆𑀲 𑀤𑀼𑀮𑁆𑀮𑀪𑀢𑀸𑀬 𑀢𑀢𑁆𑀣 𑀮𑀤𑁆𑀥𑁂𑀲𑀼 𑀪𑀢𑁆𑀢𑀩𑁆𑀬𑀜𑁆𑀚𑀦𑁂𑀲𑀼 𑀫𑀘𑁆𑀙𑀫𑀁𑀲𑀲𑀁𑀲𑀕𑁆𑀕𑀲𑀗𑁆𑀓𑀸𑀬, 𑀤𑀼𑀦𑁆𑀦𑀺𑀯𑀸𑀭𑀡𑀢𑀸𑀬 𑀘 𑀪𑀺𑀓𑁆𑀔𑀽𑀦𑀁 𑀲𑀭𑀻𑀭𑀬𑀸𑀧𑀦𑀫𑁆𑀧𑀺 𑀦 𑀲𑀺𑀬𑀸𑀢𑀺 𑀪𑀕𑀯𑀢𑀸 𑀫𑀘𑁆𑀙𑀫𑀁𑀲𑀁 𑀲𑀩𑁆𑀩𑀣𑀸 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀻𑀳𑀺 𑀓𑁄𑀝𑀻𑀳𑀺 𑀅𑀧𑀭𑀺𑀲𑀼𑀤𑁆𑀥𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀬𑀤𑀺 𑀳𑀺 𑀢𑀁 𑀪𑀕𑀯𑀸 𑀲𑀩𑁆𑀩𑀣𑀸 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀪𑀺𑀓𑁆𑀔𑀽 𑀫𑀭𑀫𑀸𑀦𑀸𑀧𑀺 𑀫𑀘𑁆𑀙𑀸𑀤𑀺𑀲𑀁𑀲𑀕𑁆𑀕𑀲𑀗𑁆𑀓𑀺𑀢𑀁 𑀪𑀢𑁆𑀢𑀁 𑀦 𑀪𑀼𑀜𑁆𑀚𑁂𑀬𑁆𑀬𑀼𑀁, 𑀢𑀢𑁄 𑀢𑀡𑁆𑀟𑀼𑀮𑀥𑀜𑁆𑀜𑀸𑀤𑀺𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀤𑀳𑀺𑀢𑁆𑀯𑀸 𑀲𑀬𑀁 𑀧𑀘𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀢𑀤𑀼𑀧𑀓𑀭𑀡𑀪𑀽𑀢𑀁 𑀤𑀸𑀲𑀺𑀤𑀸𑀲𑀁, 𑀉𑀤𑀼𑀓𑁆𑀔𑀮𑀫𑀼𑀲𑀮𑀸𑀤𑀺𑀓𑀜𑁆𑀘 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀸𑀤𑀺 𑀯𑀺𑀬 𑀅𑀯𑀲𑁆𑀲𑀁 𑀕𑀳𑁂𑀢𑀼𑀁 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀯𑀺𑀬 𑀕𑀳𑀝𑁆𑀞𑀸𑀯𑀸𑀲𑁄 𑀏𑀯 𑀲𑀺𑀬𑀸, 𑀦 𑀪𑀺𑀓𑁆𑀔𑀼𑀆𑀯𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀮𑀁 𑀫𑀘𑁆𑀙𑀩𑀦𑁆𑀥𑀦𑀁. 𑀯𑀸𑀕𑀼𑀭𑀸 𑀫𑀺𑀕𑀩𑀦𑁆𑀥𑀦𑀻. 𑀓𑀧𑁆𑀧𑀢𑀻𑀢𑀺 𑀬𑀤𑀺 𑀢𑁂𑀲𑀁 𑀯𑀘𑀦𑁂𑀦 𑀲𑀗𑁆𑀓𑀸 𑀦 𑀯𑀢𑁆𑀢𑀢𑀺, 𑀯𑀝𑁆𑀝𑀢𑀺, 𑀦 𑀢𑀁 𑀯𑀘𑀦𑀁 𑀮𑁂𑀲𑀓𑀧𑁆𑀧𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀬𑀢𑁆𑀣 𑀘 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀓𑀧𑁆𑀧𑀢𑀻’’𑀢𑀺.

𑀧𑀯𑀢𑁆𑀢𑀫𑀁𑀲𑀦𑁆𑀢𑀺 𑀆𑀧𑀡𑀸𑀤𑀻𑀲𑀼 𑀧𑀯𑀢𑁆𑀢𑀁 𑀯𑀺𑀓𑁆𑀓𑀸𑀬𑀺𑀓𑀁 𑀫𑀢𑀫𑀁𑀲𑀁. 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀅𑀓𑀢𑀦𑁆𑀢𑀺 𑀏𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀅𑀓𑀢𑀫𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀪𑀺𑀓𑁆𑀔𑀽𑀦𑀜𑁆𑀘 𑀫𑀗𑁆𑀕𑀮𑀸𑀤𑀻𑀦𑀜𑁆𑀘𑀸𑀢𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀘𑀺 𑀧𑀦 𑀬𑀣𑀸𑀞𑀺𑀢𑀯𑀲𑁂𑀦 𑀅𑀯𑀥𑀸𑀭𑀡𑀁 𑀕𑀳𑁂𑀢𑁆𑀯𑀸 ‘‘𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. ‘‘𑀯𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀆𑀧𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀧𑁆𑀧𑀦𑁆𑀢𑀺 𑀅𑀲𑀗𑁆𑀔𑁂𑀬𑁆𑀬𑀓𑀧𑁆𑀧𑀁, ‘‘𑀆𑀬𑀼𑀓𑀧𑁆𑀧’’𑀦𑁆𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁪𑁧𑁦) 𑀓𑁂𑀘𑀺. 𑀫𑀳𑀸𑀓𑀧𑁆𑀧𑀲𑁆𑀲 𑀳𑀺 𑀘𑀢𑀼𑀢𑁆𑀣𑀪𑀸𑀕𑁄 𑀅𑀲𑀗𑁆𑀔𑁂𑀬𑁆𑀬𑀓𑀧𑁆𑀧𑁄, 𑀢𑀢𑁄 𑀯𑀻𑀲𑀢𑀺𑀫𑁄 𑀪𑀸𑀕𑁄 𑀲𑀗𑁆𑀖𑀪𑁂𑀤𑀓𑀲𑁆𑀲 𑀆𑀬𑀼𑀓𑀧𑁆𑀧𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀲𑀼 𑀓𑀧𑁆𑀧𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺 ‘‘𑀓𑀧𑁆𑀧𑀯𑀺𑀦𑀸𑀲𑁂 𑀏𑀯 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺 (𑀯𑀺𑀪. 𑀅𑀝𑁆𑀞. 𑁮𑁦𑁯) 𑀯𑀘𑀦𑀢𑁄. 𑀩𑁆𑀭𑀳𑁆𑀫𑀁 𑀧𑀼𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀁 𑀧𑀼𑀜𑁆𑀜𑀁. 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀻𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀧𑀭𑀫𑁆𑀧𑀭𑀸𑀬 𑀓𑀧𑁆𑀧𑀝𑁆𑀞𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁧. 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁂𑀦𑀸𑀢𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀪𑀸𑀯𑁂𑀦 𑀪𑀸𑀯𑀧𑁆𑀧𑀥𑀸𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑀲𑁆𑀲. 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑁂𑀦𑀸𑀢𑀺 𑀉𑀓𑁆𑀔𑀺𑀢𑁆𑀢𑀪𑀸𑀯𑁂𑀦. ‘‘𑀪𑁂𑀤𑀸𑀬 𑀧𑀭𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀪𑁂𑀤𑀦𑀲𑀁𑀯𑀢𑁆𑀢𑀦𑀺𑀓𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀲𑀫𑀸𑀤𑀸𑀬 𑀧𑀕𑁆𑀕𑀡𑁆𑀳𑀦𑀢𑁄 𑀧𑀼𑀩𑁆𑀩𑁂𑀧𑀺 𑀧𑀓𑁆𑀔𑀧𑀭𑀺𑀬𑁂𑀲𑀦𑀸𑀤𑀺𑀯𑀲𑁂𑀦 𑀲𑀗𑁆𑀖𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑁆𑀢𑀲𑁆𑀲 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄𑀧𑀺 𑀘𑀸𑀬𑀁 𑀲𑀗𑁆𑀖𑀪𑁂𑀤𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀺𑀦𑀸. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀦. 𑀯𑁄𑀳𑀸𑀭𑁂𑀦𑀸𑀢𑀺 𑀢𑀸𑀳𑀺 𑀢𑀸𑀳𑀺 𑀉𑀧𑀧𑀢𑁆𑀢𑀻𑀳𑀺 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁩.𑁧𑁦-𑁩𑁯, 𑁪𑁨; 𑀘𑀽𑀴𑀯. 𑁩𑁫𑁨) 𑀯𑁄𑀳𑀸𑀭𑁂𑀦, 𑀧𑀭𑁂𑀲𑀁 𑀧𑀜𑁆𑀜𑀸𑀧𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀲𑀸𑀯𑀦𑀸𑀬𑀸𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀕𑀳𑀡𑀢𑁆𑀣𑀫𑁂𑀯 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑀲𑀸𑀯𑀦𑀸𑀬, 𑀓𑀣𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑀸𑀯𑀦𑀸𑀬 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑁆𑀔𑁂 𑀧𑀯𑀺𑀝𑁆𑀞𑀪𑀸𑀯𑀲𑁆𑀲 𑀲𑀜𑁆𑀜𑀸𑀡𑀢𑁆𑀣𑀁 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦. 𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯, 𑀉𑀤𑁆𑀤𑁂𑀲𑁄 𑀯𑀸 𑀲𑀗𑁆𑀖𑀪𑁂𑀤𑁂 𑀧𑀥𑀸𑀦𑀁 𑀓𑀸𑀭𑀡𑀁, 𑀯𑁄𑀳𑀸𑀭𑀸𑀤𑀬𑁄 𑀧𑀦 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀩𑁆𑀪𑀼𑀲𑁆𑀲𑀺𑀢𑀦𑁆𑀢𑀺 𑀅𑀩𑁆𑀪𑀼𑀕𑁆𑀕𑀢𑀁. 𑀅𑀘𑁆𑀙𑁂𑀬𑁆𑀬𑀸𑀢𑀺 𑀯𑀺𑀳𑀭𑁂𑀬𑁆𑀬.

‘‘𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁨; 𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀯𑀘𑀦𑀢𑁄 𑀆𑀧𑀢𑁆𑀢𑀺𑀪𑀬𑁂𑀦 𑀆𑀭𑁄𑀘𑀦𑀁 𑀮𑀚𑁆𑀚𑀻𑀦𑀁 𑀏𑀯 𑀪𑀸𑀭𑁄𑀢𑀺 𑀆𑀳 ‘‘𑀮𑀚𑁆𑀚𑀻𑀳𑀺 𑀪𑀺𑀓𑁆𑀔𑀽𑀳𑀻’’𑀢𑀺, 𑀅𑀮𑀚𑁆𑀚𑀺𑀲𑁆𑀲𑀧𑀺 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯. 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑁄 𑀤𑀼𑀓𑁆𑀓𑀝𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀤𑀦𑁆𑀢𑀸𑀦𑀁 𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀧𑀳𑁄𑀦𑁆𑀢𑁂𑀦𑀸𑀢𑀺 𑀕𑀦𑁆𑀢𑀼𑀁 𑀲𑀫𑀢𑁆𑀣𑁂𑀦, 𑀇𑀘𑁆𑀙𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀧𑀢𑁆𑀢𑀺 𑀧𑀦 𑀅𑀟𑁆𑀠𑀬𑁄𑀚𑀦𑀩𑁆𑀪𑀦𑁆𑀢𑀭𑁂𑀦𑁂𑀯 𑀅𑀕𑀺𑀮𑀸𑀦𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁬. 𑀜𑀢𑁆𑀢𑀺𑀬𑀸𑀤𑀻𑀳𑀺 𑀤𑀼𑀓𑁆𑀓𑀝𑀸𑀤𑀺𑀲𑀩𑁆𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀲𑁆𑀲. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀲𑁆𑀲𑁂𑀯 𑀅𑀪𑀸𑀯𑀢𑁄 ‘‘𑀦 𑀳𑀺 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁂𑀦𑁂𑀯 𑀳𑀺 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁄𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀭𑁄𑀫𑀦𑁆𑀣𑀓𑀲𑁆𑀲 𑀭𑁄𑀫𑀦𑁆𑀣𑀦’’𑀦𑁆𑀢𑀺𑀆𑀤𑀺𑀁 (𑀘𑀽𑀴𑀯. 𑁨𑁭𑁩) 𑀉𑀤𑁆𑀤𑀺𑀲𑁆𑀲𑀸𑀦𑀼𑀜𑁆𑀜𑀸𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀦𑀸𑀧𑀢𑁆𑀢𑀺𑀬𑀦𑁆𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂. 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑁄𑀢𑀺 𑀲𑀫𑀦𑀼𑀪𑀸𑀲𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑀩𑁆𑀩𑁄. 𑀆𑀧𑀢𑁆𑀢𑀺𑀬𑁂𑀯 𑀦 𑀚𑀸𑀢𑀸𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺 𑀦 𑀚𑀸𑀢𑀸 𑀏𑀯.

‘‘𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀲𑀜𑁆𑀜𑀸𑀬 𑀅𑀪𑀸𑀯𑁂𑀦 𑀫𑀼𑀘𑁆𑀘𑀦𑀢𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀁. 𑀲𑀘𑀺𑀢𑁆𑀢𑀓𑀦𑁆𑀢𑀺 ‘‘𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺 𑀚𑀸𑀦𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁. 𑀬𑁄 𑀯𑀺𑀲𑀜𑁆𑀜𑀻 𑀯𑀸 𑀪𑀻𑀢𑁄 𑀯𑀸 𑀯𑀺𑀓𑁆𑀔𑀺𑀢𑁆𑀢𑁄 𑀯𑀸 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺𑀧𑀺, ‘‘𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀪𑁂𑀤𑀸𑀬 𑀧𑀭𑀓𑁆𑀓𑀫𑀦𑀁, 𑀥𑀫𑁆𑀫𑀓𑀫𑁆𑀫𑁂𑀦 𑀲𑀫𑀦𑀼𑀪𑀸𑀲𑀦𑀁, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑀁, 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺 𑀘𑀺𑀢𑁆𑀢𑁂𑀦 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀇𑀫𑀸𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺.

𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.