𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀢𑀁 𑀓𑀢𑀫𑀁, 𑀢𑀁 𑀓𑀣𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀲𑀭𑀽𑀧𑁂𑀦 𑀦𑀺𑀬𑀫𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀢𑀻𑀢𑀺 𑀦𑀺𑀬𑀫𑀦𑀺𑀤𑁆𑀤𑁂𑀲𑁄, 𑀦 𑀦𑀺𑀬𑀫𑀦𑀺𑀤𑁆𑀤𑁂𑀲𑁄 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄. 𑀲𑁄𑀯 𑀯𑀼𑀘𑁆𑀘𑀢𑁂 𑀅𑀦𑁂𑀦𑀸𑀢𑀺 𑀯𑀘𑀦𑀦𑁆𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁. 𑀢𑀲𑁆𑀲𑀸𑀢𑀺 𑀢𑁂𑀦𑀸𑀢𑀺𑀧𑀤𑀲𑁆𑀲. 𑀧𑀭𑀺𑀯𑀺𑀢𑀓𑁆𑀓𑁄𑀢𑀺 ‘‘𑀓𑀢𑀫𑁂𑀲𑀸𑀦𑀁 𑀔𑁄 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁧𑁮) 𑀧𑀯𑀢𑁆𑀢𑁄. 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸𑀢𑀺 𑀢𑁂𑀦𑀸𑀢𑀺𑀧𑀤𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀸𑀞𑁂 𑀯𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀧𑀸𑀞𑁂 𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦𑀸𑀢𑀺 𑀲𑀸𑀫𑀢𑁆𑀣𑀺𑀬𑀢𑁄 𑀲𑀺𑀤𑁆𑀥𑁂𑀦. 𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀦𑁆𑀢𑀺 𑀢𑀲𑁆𑀲𑀸 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀬𑀸 𑀧𑀭𑀺𑀤𑀻𑀧𑀦𑁂 𑀇𑀤𑀁 𑀉𑀧𑀸𑀬𑀫𑀢𑁆𑀢𑀦𑀺𑀤𑀲𑁆𑀲𑀦𑀁. 𑀫𑀼𑀔𑀁 𑀤𑁆𑀯𑀸𑀭𑀁 𑀉𑀧𑀸𑀬𑁄𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁.

𑀲𑀫𑀬𑀲𑀤𑁆𑀤𑁄 𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲 𑀲𑀫𑀯𑀸𑀬𑁄 𑀅𑀢𑁆𑀣𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀉𑀧𑀲𑀗𑁆𑀓𑀫𑀦𑀲𑁆𑀲 𑀬𑀼𑀢𑁆𑀢𑀓𑀸𑀮𑁄, 𑀲𑀫𑀬𑁄 𑀦𑀸𑀫 𑀲𑀭𑀻𑀭𑀩𑀮𑀸𑀤𑀺𑀓𑀸𑀭𑀡𑀲𑀫𑀯𑀸𑀬𑁄, 𑀢𑁂 𑀉𑀧𑀸𑀤𑀸𑀬 𑀧𑀝𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. 𑀔𑀡𑁄𑀢𑀺 𑀑𑀓𑀸𑀲𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀸𑀤𑀬𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄. 𑀲𑁄 𑀏𑀯 𑀲𑀫𑀬𑁄. 𑀢𑁂𑀦𑁂𑀯 ‘‘𑀏𑀓𑁄𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀧𑀯𑀦𑀲𑁆𑀫𑀺𑀦𑁆𑀢𑀺 𑀯𑀦𑀲𑀡𑁆𑀟𑁂. 𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀻𑀢𑀺 𑀏𑀢𑁆𑀣 𑀲𑀫𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀸𑀯𑀺𑀮𑀗𑁆𑀖𑀦𑀲𑁆𑀲 𑀳𑁂𑀢𑀼, 𑀓𑁄 𑀲𑁄? 𑀅𑀢𑁆𑀢𑀦𑁄 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀪𑀕𑀯𑀢𑁄 𑀚𑀸𑀦𑀦𑀁, 𑀲𑁄 𑀲𑀫𑀬𑀲𑀗𑁆𑀔𑀸𑀢𑁄 𑀳𑁂𑀢𑀼 𑀢𑀲𑁆𑀲𑀸 𑀅𑀧𑁆𑀧𑀝𑀺𑀯𑀺𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺𑀆𑀤𑀺 𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀸𑀓𑀸𑀭𑀤𑀲𑁆𑀲𑀦𑀁. 𑀉𑀕𑁆𑀕𑀳𑀫𑀸𑀦𑁄𑀢𑀺 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀉𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 𑀉𑀕𑁆𑀕𑀳𑀫𑀸𑀦𑁄, 𑀲𑀼𑀫𑀦𑀧𑀭𑀺𑀩𑁆𑀩𑀸𑀚𑀓𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀲𑀫𑀬𑀁 𑀤𑀺𑀝𑁆𑀞𑀺𑀁 𑀧𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑁄, 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁄. 𑀲𑁆𑀯𑁂𑀯 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀼𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀢𑀺𑀦𑁆𑀤𑀼𑀓𑀸𑀘𑀻𑀭’’𑀦𑁆𑀢𑀺 𑀘, 𑀏𑀓𑀸𑀯 𑀦𑀺𑀯𑀸𑀲𑀸 𑀲𑀸𑀮𑀸 𑀏𑀢𑁆𑀣𑀸𑀢𑀺 ‘‘𑀏𑀓𑀲𑀸𑀮𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀅𑀢𑁆𑀣𑀲𑁆𑀲 𑀳𑀺𑀢𑀲𑁆𑀲 𑀧𑀝𑀺𑀮𑀸𑀪𑀢𑁄. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀧𑁆𑀧𑀳𑀸𑀦𑀸. 𑀧𑀻𑀴𑀦𑀝𑁆𑀞𑁄𑀢𑀺 𑀧𑀻𑀴𑀦𑀁 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁, 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁, 𑀧𑀻𑀴𑀦𑀫𑁂𑀯 𑀅𑀢𑁆𑀣𑁄 𑀧𑀻𑀴𑀦𑀝𑁆𑀞𑁄. 𑀲𑀦𑁆𑀢𑀸𑀧𑁄𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁. 𑀯𑀺𑀧𑀭𑀺𑀡𑀸𑀫𑁄𑀢𑀺 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀢𑀸 𑀅𑀪𑀺𑀲𑀫𑁂𑀢𑀩𑁆𑀩𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀲𑁄𑀯 𑀅𑀪𑀺𑀲𑀫𑀬𑀝𑁆𑀞𑁄, 𑀧𑀻𑀴𑀦𑀸𑀤𑀻𑀦𑀺.

𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀲𑀉𑀧𑀲𑀕𑁆𑀕𑁄 𑀅𑀪𑀺𑀲𑀫𑀬𑀲𑀤𑁆𑀤𑁄 𑀉𑀤𑁆𑀥𑀝𑁄. 𑀢𑀢𑁆𑀣 𑀲𑀗𑁆𑀕𑀫𑀯𑀲𑁂𑀦 𑀧𑀘𑁆𑀘𑀬𑀸𑀦𑀁 𑀨𑀮𑀼𑀧𑁆𑀧𑀸𑀤𑀦𑀁 𑀧𑀝𑀺 𑀅𑀬𑀦𑀁 𑀏𑀓𑀢𑁄 𑀧𑀯𑀢𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀲𑀗𑁆𑀕𑀫𑁂 𑀲𑀢𑀺 𑀏𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀢𑀺 𑀏𑀢𑁆𑀣 𑀲𑀗𑁆𑀔𑀢𑀥𑀫𑁆𑀫𑁄, 𑀲𑀬𑀁 𑀯𑀸 𑀏𑀢𑀺 𑀆𑀕𑀘𑁆𑀙𑀢𑀺 𑀯𑀺𑀕𑀘𑁆𑀙𑀢𑀺 𑀘𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀲𑀫𑁂𑀦𑁆𑀢𑀺 𑀅𑀯𑀬𑀯𑀸 𑀏𑀢𑀲𑁆𑀫𑀺𑀁, 𑀲𑀬𑀁 𑀯𑀸 𑀢𑁂𑀲𑀽𑀢𑀺 𑀲𑀫𑀬𑁄, 𑀲𑀫𑀽𑀳𑁄. 𑀧𑀘𑁆𑀘𑀬𑀦𑁆𑀢𑀭𑀲𑀗𑁆𑀕𑀫𑁂 𑀏𑀢𑀺 𑀆𑀕𑀘𑁆𑀙𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀲𑀫𑀬𑁄, 𑀳𑁂𑀢𑀼. 𑀲𑀜𑁆𑀜𑀸𑀯𑀲𑁂𑀦 𑀯𑀺𑀧𑀮𑁆𑀮𑀸𑀲𑀢𑁄 𑀥𑀫𑁆𑀫𑁂𑀲𑀼 𑀏𑀢𑀺 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀲𑀫𑀻𑀧𑀁 𑀅𑀬𑀦𑀁 𑀉𑀧𑀕𑀫𑀦𑀁 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑁆𑀫𑀤𑁂𑀯 𑀲𑀳𑀺𑀢𑀸𑀦𑀁 𑀯𑀸𑀘𑀸𑀦𑀁 𑀅𑀬𑀦𑀁 𑀯𑀺𑀕𑀫𑁄𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀲𑀫𑁆𑀫𑀤𑁂𑀯, 𑀲𑀳𑀺𑀢𑀸𑀦𑀁 𑀯𑀸 𑀲𑀘𑁆𑀘𑀸𑀦𑀁 𑀅𑀬𑀦𑀁 𑀚𑀸𑀦𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀯𑁂𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 𑀲𑀫𑀬𑀲𑀤𑁆𑀤𑀲𑁆𑀲 𑀲𑀸𑀫𑀜𑁆𑀜𑁂𑀦 𑀅𑀦𑁂𑀓𑀢𑁆𑀣𑀢𑀸 𑀯𑀼𑀢𑁆𑀢𑀸. 𑀦 𑀳𑀺 𑀏𑀓𑀲𑁆𑀫𑀺𑀁 𑀅𑀢𑁆𑀣𑀯𑀺𑀲𑁂𑀲𑁂 𑀯𑀢𑁆𑀢𑀫𑀸𑀦𑁄 𑀲𑀤𑁆𑀤𑁄 𑀢𑀤𑀜𑁆𑀜𑁂𑀧𑀺 𑀯𑀢𑁆𑀢𑀢𑀺. 𑀢𑀲𑁆𑀫𑀸 𑀅𑀢𑁆𑀣𑀸 𑀯𑀺𑀬 𑀢𑀁𑀢𑀁𑀯𑀸𑀘𑀓𑀸 𑀲𑀫𑀬𑀲𑀤𑁆𑀤𑀸𑀧𑀺 𑀪𑀺𑀦𑁆𑀦𑀸 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁂𑀲𑀼.

𑀢𑀢𑁆𑀣 𑀢𑀣𑀸𑀢𑀺 𑀢𑁂𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀉𑀧𑀬𑁄𑀕𑀪𑀼𑀫𑁆𑀫𑀯𑀘𑀦𑁂𑀳𑀺. 𑀇𑀥𑀸𑀢𑀺 𑀯𑀺𑀦𑀬𑁂, 𑀅𑀜𑁆𑀜𑀣𑀸𑀢𑀺 𑀓𑀭𑀡𑀯𑀘𑀦𑁂𑀦. 𑀅𑀘𑁆𑀘𑀦𑁆𑀢𑀫𑁂𑀯𑀸𑀢𑀺 𑀦𑀺𑀭𑀦𑁆𑀢𑀭𑀫𑁂𑀯. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀸, 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀽𑀧𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁, 𑀬𑀣𑀸 𑀉𑀤𑀬𑁂 𑀲𑀢𑀺 𑀘𑀦𑁆𑀤𑁂 𑀚𑀸𑀢𑁄 𑀭𑀸𑀚𑀧𑀼𑀢𑁆𑀢𑁄𑀢𑀺. 𑀅𑀥𑀺𑀓𑀭𑀡𑀜𑁆𑀳𑀻𑀢𑀺𑀆𑀤𑀺 𑀅𑀪𑀺𑀥𑀫𑁆𑀫𑁂 𑀲𑀫𑀬𑀲𑀤𑁆𑀤𑁄 𑀓𑀸𑀮𑀲𑀫𑀽𑀳𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑁂𑀲𑀼 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺, 𑀦 𑀯𑀺𑀦𑀬𑁂 𑀯𑀺𑀬 𑀓𑀸𑀮𑁂 𑀏𑀯, 𑀢𑁂𑀲𑀼 𑀘 𑀓𑀸𑀮𑀲𑀫𑀽𑀳𑀢𑁆𑀣𑀸 𑀤𑁆𑀯𑁂 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀁 𑀬𑀼𑀢𑁆𑀢𑀸. 𑀔𑀡𑀲𑀫𑀯𑀸𑀬𑀳𑁂𑀢𑀼𑀅𑀢𑁆𑀣𑀸 𑀧𑀦 𑀢𑀬𑁄𑀧𑀺 𑀅𑀢𑁆𑀢𑀦𑁄 𑀪𑀸𑀯𑁂𑀦 𑀨𑀲𑁆𑀲𑀸𑀤𑀻𑀦𑀁 𑀪𑀸𑀯𑀲𑁆𑀲 𑀉𑀧𑀮𑀓𑁆𑀔𑀡𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀁 𑀬𑀼𑀢𑁆𑀢𑀸𑀢𑀺 𑀯𑀺𑀪𑀸𑀯𑀦𑀫𑀼𑀔𑁂𑀦 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀺𑀜𑁆𑀳𑀺 𑀓𑀸𑀮𑁂, 𑀥𑀫𑁆𑀫𑀲𑀫𑀽𑀳𑁂 𑀯𑀸 𑀲𑀫𑀬𑁂 𑀅𑀥𑀺𑀓𑀭𑀡𑀪𑀽𑀢𑁂 𑀓𑀼𑀲𑀮𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀜𑁆𑀜𑁂𑀯 𑀓𑀸𑀮𑁂, 𑀥𑀫𑁆𑀫𑀲𑀫𑀽𑀳𑁂 𑀯𑀸 𑀲𑀫𑀬𑁂 𑀨𑀲𑁆𑀲𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀅𑀥𑀺𑀓𑀭𑀡𑀢𑁆𑀣𑀬𑁄𑀚𑀦𑀸, 𑀬𑀲𑁆𑀫𑀺𑀁 𑀧𑀦 𑀔𑀡𑁂, 𑀲𑀫𑀯𑀸𑀬𑁂 𑀳𑁂𑀢𑀼𑀫𑁆𑀳𑀺 𑀯𑀸 𑀲𑀫𑀬𑁂 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂 𑀓𑀼𑀲𑀮𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀜𑁆𑀜𑁂𑀯 𑀔𑀡𑀸𑀤𑀺𑀫𑁆𑀳𑀺 𑀲𑀫𑀬𑁂𑀧𑀺 𑀯𑀺𑀚𑁆𑀚𑀫𑀸𑀦𑁂 𑀨𑀲𑁆𑀲𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀬𑁄𑀚𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀳𑁄𑀢𑀺 𑀘𑁂𑀢𑁆𑀣𑀸𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀺𑀲𑀬𑁂 𑀲𑀗𑁆𑀕𑀳𑀕𑀸𑀣𑀸 𑀳𑁄𑀢𑀺. 𑀅𑀜𑁆𑀜𑀢𑁆𑀭𑀸𑀢𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀲𑀤𑁆𑀤𑀫𑀢𑁆𑀢𑁂𑀦𑁂𑀯 𑀪𑁂𑀤𑁄, 𑀦 𑀅𑀢𑁆𑀣𑀢𑁄.

𑀅𑀯𑀺𑀲𑁂𑀲𑁂𑀦𑀸𑀢𑀺 𑀲𑀸𑀫𑀜𑁆𑀜𑁂𑀦. 𑀇𑀭𑀺𑀬𑀸𑀧𑀣𑁄𑀢𑀺𑀆𑀤𑀻𑀲𑀼 𑀇𑀭𑀺𑀬𑀸𑀬 𑀲𑀩𑁆𑀩𑀤𑁆𑀯𑀸𑀭𑀺𑀓𑀓𑀺𑀭𑀺𑀬𑀸𑀬 𑀧𑀣𑁄 𑀧𑀯𑀢𑁆𑀢𑀦𑀝𑁆𑀞𑀸𑀦𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀓𑀫𑁆𑀫𑀲𑁆𑀲 𑀅𑀪𑀸𑀯𑀸𑀢𑀺 𑀞𑀸𑀦𑀸𑀤𑀬𑁄 𑀇𑀭𑀺𑀬𑀸𑀧𑀣𑁄, 𑀲𑁄𑀯 𑀯𑀺𑀳𑀸𑀭𑁄. 𑀩𑁆𑀭𑀳𑁆𑀫𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸 𑀧𑀭𑀳𑀺𑀢𑀘𑀺𑀢𑁆𑀢𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀺𑀢𑁄 𑀫𑁂𑀢𑁆𑀢𑀸𑀤𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀦𑀸𑀫. 𑀢𑀤𑀯𑀲𑁂𑀲𑀸 𑀧𑀦 𑀫𑀳𑀕𑁆𑀕𑀢𑀸 𑀲𑀩𑁆𑀩𑀦𑀻𑀯𑀭𑀡𑀯𑀺𑀕𑀫𑀦𑀸𑀤𑀺𑀲𑀺𑀤𑁆𑀥𑁂𑀦 𑀚𑁄𑀢𑀦𑀸𑀤𑀺𑀅𑀢𑁆𑀣𑁂𑀦 𑀤𑀺𑀩𑁆𑀩𑀯𑀺𑀳𑀸𑀭𑁄 𑀦𑀸𑀫. 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑁂𑀦 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀫𑁂𑀢𑁆𑀢𑀸𑀤𑀬𑁄 𑀇𑀥 𑀅𑀲𑀗𑁆𑀕𑀳𑀺𑀢𑀸. 𑀅𑀭𑀺𑀬𑀸𑀦𑀫𑁂𑀯 𑀯𑀺𑀳𑀸𑀭𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀅𑀭𑀺𑀬𑀯𑀺𑀳𑀸𑀭𑁄 𑀦𑀸𑀫.

𑀭𑀼𑀓𑁆𑀔𑀸𑀤𑀺𑀫𑀽𑀮𑁂𑀬𑁂𑀯 𑀫𑀽𑀮𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀅𑀧𑀭𑁂𑀦 𑀫𑀽𑀮𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀫𑀽𑀮𑀫𑀽𑀮𑁂’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀤𑀼𑀓𑁆𑀔𑀤𑀼𑀓𑁆𑀔𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑁧𑁯𑁦). 𑀮𑁄𑀪𑀸𑀤𑀻𑀦𑀁 𑀤𑁄𑀲𑀫𑀽𑀮𑀸𑀤𑀺𑀘𑀺𑀢𑁆𑀢𑀸𑀲𑀸𑀥𑀸𑀭𑀡𑀢𑁆𑀢𑀸 ‘‘𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀺𑀬𑀸𑀢𑀺 𑀢𑀢𑁆𑀣 𑀯𑁂𑀭𑀜𑁆𑀚𑀸𑀬𑀦𑁆𑀢𑀺𑀆𑀤𑀻𑀲𑀼 𑀧𑀤𑁂𑀲𑀼 𑀓𑀲𑁆𑀲𑀘𑀺 𑀘𑁄𑀤𑀦𑀸 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀉𑀪𑀬𑀣𑀸 𑀦𑀺𑀤𑀸𑀦𑀓𑀺𑀢𑁆𑀢𑀦𑀲𑁆𑀲 𑀧𑀦 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺? 𑀆𑀳 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄.

𑀓𑀺𑀮𑀫𑁄𑀯 𑀓𑀺𑀮𑀫𑀣𑁄, 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑁆𑀲 𑀓𑀺𑀮𑀫𑀣𑁄 𑀅𑀢𑁆𑀢𑀓𑀺𑀮𑀫𑀣𑁄, 𑀢𑀲𑁆𑀲 𑀅𑀦𑀼 𑀅𑀦𑀼 𑀬𑁄𑀕𑁄 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀦𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄. 𑀯𑀢𑁆𑀣𑀼𑀓𑀸𑀫𑀸𑀭𑀫𑁆𑀫𑀡𑁂 𑀲𑀼𑀔𑁂 𑀲𑀫𑁆𑀧𑀬𑁄𑀕𑀯𑀲𑁂𑀦 𑀮𑀻𑀦𑀸 𑀬𑀼𑀢𑁆𑀢𑀸, 𑀓𑀸𑀫𑀢𑀡𑁆𑀳𑀸, 𑀢𑀁𑀲𑀳𑀘𑀭𑀺𑀢𑁂 𑀓𑀸𑀫𑁂 𑀲𑀼𑀔𑁂 𑀯𑀸 𑀆𑀭𑀫𑁆𑀫𑀡𑀪𑀽𑀢𑁂 𑀅𑀮𑁆𑀮𑀻𑀦𑀸 𑀧𑀯𑀢𑁆𑀢𑀢𑀻𑀢𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸 𑀢𑀡𑁆𑀳𑀸, 𑀢𑀲𑁆𑀲𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀬 𑀅𑀦𑀼 𑀅𑀦𑀼 𑀬𑁄𑀕𑁄 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄. 𑀮𑁄𑀓𑁂 𑀲𑀁𑀯𑀟𑁆𑀠𑀪𑀸𑀯𑀦𑁆𑀢𑀺 𑀆𑀫𑀺𑀲𑁄𑀧𑀪𑁄𑀕𑁂𑀦 𑀲𑀁𑀯𑀟𑁆𑀠𑀺𑀢𑀪𑀸𑀯𑀁. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀩𑀳𑀼𑀚𑀦𑀳𑀺𑀢𑀸𑀤𑀺𑀅𑀢𑁆𑀣𑀸𑀬𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀲𑀗𑁆𑀖𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 𑀤𑀺𑀝𑁆𑀞𑀻𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸. ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀜𑁆𑀘 𑀲𑀻𑀮𑀸𑀦𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑁂𑀦 𑀲𑀗𑁆𑀖𑀸𑀢𑁄 𑀲𑀗𑁆𑀖𑀝𑀺𑀢𑁄 𑀲𑀫𑀡𑀕𑀡𑁄, 𑀢𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑀲𑀗𑁆𑀖𑀸𑀢𑁂𑀦𑀸’’𑀢𑀺 𑀯𑀸 𑀧𑀸𑀞𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀲 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀪𑀽𑀢𑁂𑀦 𑀲𑀁𑀳𑀦𑀦𑁂𑀦 𑀲𑀗𑁆𑀖𑀸𑀢𑁄 𑀲𑀫𑀡𑀕𑀡𑁄, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀧𑀸𑀞𑁂 𑀲𑀤𑁆𑀤𑀢𑁄 𑀅𑀢𑁆𑀣𑁄 𑀬𑀼𑀢𑁆𑀢𑀢𑀭𑁄 𑀳𑁄𑀢𑀺. 𑀅𑀲𑁆𑀲𑀸𑀢𑀺 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲.

𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫-𑀲𑀤𑁆𑀤𑁂𑀦 𑀯𑁂𑀤𑁄 𑀯𑀼𑀘𑁆𑀘𑀢𑀺, 𑀲𑁄 𑀫𑀦𑁆𑀢𑀩𑁆𑀭𑀳𑁆𑀫𑀓𑀧𑁆𑀧𑀯𑀲𑁂𑀦 𑀢𑀺𑀯𑀺𑀥𑁄. 𑀢𑀢𑁆𑀣 𑀇𑀭𑀼𑀯𑁂𑀤𑀸𑀤𑀬𑁄 𑀢𑀬𑁄 𑀯𑁂𑀤𑀸 𑀫𑀦𑁆𑀢𑀸, 𑀢𑁂 𑀘 𑀧𑀥𑀸𑀦𑀸, 𑀇𑀢𑀭𑁂 𑀧𑀦 𑀲𑀦𑁆𑀦𑀺𑀲𑁆𑀲𑀺𑀢𑀸, 𑀢𑁂𑀦 𑀧𑀥𑀸𑀦𑀲𑁆𑀲𑁂𑀯 𑀕𑀳𑀡𑀁. 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀇𑀭𑀼𑀯𑁂𑀤𑀸𑀤𑀺𑀓𑁂 𑀫𑀦𑁆𑀢𑀲𑀢𑁆𑀣𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀭𑀼𑀯𑁂𑀤𑀸𑀤𑀬𑁄 𑀳𑀺 𑀕𑀼𑀢𑁆𑀢𑀪𑀸𑀲𑀺𑀢𑀩𑁆𑀩𑀢𑀸𑀬 ‘‘𑀫𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄, 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄’’𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀤𑁆𑀯𑀬𑀁 𑀉𑀤𑀸𑀳𑀭𑀡𑀤𑁆𑀯𑀬𑁂𑀦 𑀯𑀺𑀪𑀸𑀯𑁂𑀢𑀼𑀁 𑀯𑀼𑀢𑁆𑀢𑀜𑁆𑀳𑁂𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁 ‘𑀲𑀫𑀡𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 𑀳𑀺 𑀇𑀤𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 ‘‘𑀲𑀫𑀺𑀢𑀧𑀸𑀧𑀢𑁆𑀢𑀸 ‘𑀲𑀫𑀡𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, 𑀩𑀸𑀳𑀺𑀢𑀧𑀸𑀧𑁄𑀢𑀺 𑀇𑀤𑀁 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀕𑀸𑀣𑀸𑀩𑀦𑁆𑀥𑁂 𑀯𑀼𑀢𑁆𑀢𑀯𑀘𑀦𑀁. 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑀦𑁆𑀢𑀺 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀢𑀁. 𑀲𑀓𑀺𑀜𑁆𑀘𑀦𑁄𑀢𑀺 𑀲𑀤𑁄𑀲𑁄.

𑀕𑁄𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁, 𑀕𑁄-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺 𑀘 𑀯𑀼𑀘𑁆𑀘𑀢𑀺. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦𑀸𑀢𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦, 𑀧𑀭𑀺𑀳𑀸𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀭𑀦𑁆𑀢𑀺 𑀯𑁂𑀭𑀜𑁆𑀚𑀸𑀬𑀦𑁆𑀢𑀺𑀆𑀤𑀺𑀯𑀘𑀦𑀁. 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀇𑀢𑁆𑀣𑀁 𑀇𑀫𑀁 𑀧𑀓𑀸𑀭𑀁 𑀪𑀽𑀢𑁄 𑀆𑀧𑀦𑁆𑀦𑁄𑀢𑀺 𑀇𑀢𑁆𑀣𑀫𑁆𑀪𑀽𑀢𑁄, 𑀢𑀲𑁆𑀲 𑀆𑀔𑁆𑀬𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁, 𑀲𑁄𑀬𑁂𑀯𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄. 𑀅𑀣 𑀯𑀸 ‘‘𑀇𑀢𑁆𑀣𑀁 𑀏𑀯𑀁𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄’’𑀢𑀺 𑀏𑀯𑀁 𑀓𑀣𑀦𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄, 𑀢𑀲𑁆𑀫𑀺𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀧𑁆𑀧𑀓𑀸𑀭𑀲𑁆𑀲 𑀤𑀻𑀧𑀦𑀢𑁄, 𑀢𑁂𑀦 𑀬𑁄𑀕𑀢𑁄 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀦𑁆𑀢𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁 𑀲𑀸𑀫𑀺𑀅𑀢𑁆𑀣𑁂𑀧𑀺 𑀲𑀫𑀸𑀦𑁂 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀤𑀻𑀧𑀦𑀢𑁄 ‘‘𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀺 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀢𑁄𑀢𑀺 𑀅𑀪𑀺𑀲𑀤𑁆𑀤𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺. 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻𑀢𑀺 𑀏𑀢𑁆𑀣 𑀳𑀺 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀺 𑀫𑀸𑀢𑀭𑀺 𑀯𑀺𑀲𑀬𑁂 𑀫𑀸𑀢𑀼𑀬𑀸 𑀯𑀸 𑀲𑀸𑀥𑀽’’𑀢𑀺 𑀏𑀯𑀁 𑀅𑀥𑀺𑀓𑀭𑀡𑀢𑁆𑀣𑁂 𑀯𑀸 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀲𑁆𑀲 𑀲𑀸𑀫𑀺𑀯𑀘𑀦𑀲𑁆𑀲 𑀯𑀸 𑀧𑀲𑀗𑁆𑀕𑁂 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁂𑀦 𑀅𑀪𑀺𑀲𑀤𑁆𑀤𑁂𑀦 𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀬𑀣𑀸 𑀘𑁂𑀢𑁆𑀣 𑀤𑁂𑀯𑀤𑀢𑁆𑀢𑁄 𑀫𑀸𑀢𑀼𑀯𑀺𑀲𑀬𑁂 𑀫𑀸𑀢𑀼𑀲𑀫𑁆𑀩𑀦𑁆𑀥𑀻 𑀯𑀸 𑀲𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀫𑀺𑀥𑀸𑀧𑀺 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀫𑁆𑀩𑀦𑁆𑀥𑀻 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀧𑀓𑀸𑀭𑀧𑁆𑀧𑀢𑁆𑀢𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀳𑀺 𑀤𑁂𑀯𑀤𑀢𑁆𑀢𑀕𑁆𑀕𑀳𑀡𑀁 𑀯𑀺𑀬 𑀇𑀥 𑀓𑀺𑀢𑁆𑀢𑀺𑀲𑀤𑁆𑀤𑀕𑁆𑀕𑀳𑀡𑀁, 𑀢𑀢𑁆𑀣 𑀫𑀸𑀢𑀭𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀇𑀥 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀦𑁆𑀢𑀺 𑀯𑀘𑀦𑀁, 𑀢𑀢𑁆𑀣 𑀲𑀸𑀥𑀼𑀲𑀤𑁆𑀤𑀕𑁆𑀕𑀳𑀡𑀁 𑀯𑀺𑀬 𑀇𑀥 𑀉𑀕𑁆𑀕𑀢𑀲𑀤𑁆𑀤𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀪𑀽𑀢𑁄 𑀲𑀤𑁆𑀤𑁄, 𑀦 𑀓𑁂𑀯𑀮𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑁂𑀲𑀺𑀢𑀦𑁆𑀢𑀺 𑀆𑀳 ‘‘𑀓𑀺𑀢𑁆𑀢𑀺 𑀏𑀯𑀸’’𑀢𑀺. 𑀢𑀢𑁄 𑀓𑀺𑀢𑁆𑀢𑀻𑀢𑀺 𑀣𑀼𑀢𑀺, 𑀢𑀲𑁆𑀲𑀸 𑀧𑀓𑀸𑀲𑀓𑁄 𑀲𑀤𑁆𑀤𑁄 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀣𑀼𑀢𑀺𑀖𑁄𑀲𑁄 𑀯𑀸’’𑀢𑀺 𑀯𑀼𑀢𑁆𑀢𑀁.

𑀲𑁄 𑀪𑀕𑀯𑀸𑀢𑀺 𑀏𑀢𑁆𑀣 𑀲𑁄𑀢𑀺 𑀧𑀲𑀺𑀤𑁆𑀥𑀺𑀬𑀁, 𑀬𑁄 𑀲𑁄 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀓𑀫𑁆𑀧𑁂𑀦𑁆𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀲𑁄 𑀮𑁄𑀓𑁂 𑀅𑀢𑀺𑀧𑀸𑀓𑀝𑁄𑀢𑀺 ‘‘𑀲𑁄 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀸𑀢𑀺 𑀘 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁, 𑀦 𑀕𑀼𑀡𑀓𑀺𑀢𑁆𑀢𑀦𑀁. 𑀧𑀭𑀢𑁄 𑀧𑀦 𑀪𑀕𑀯𑀸𑀢𑀺 𑀕𑀼𑀡𑀓𑀺𑀢𑁆𑀢𑀦𑀫𑁂𑀯. 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘𑀸𑀢𑀺 𑀏𑀢𑁂𑀦 𑀅𑀭𑀳𑀦𑁆𑀢𑀺𑀆𑀤𑀺𑀧𑀤𑀸𑀦𑀁 𑀧𑀘𑁆𑀘𑁂𑀓𑀁 𑀅𑀦𑁂𑀓𑀕𑀼𑀡𑀕𑀡𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂𑀢𑀺 𑀤𑁆𑀯𑀻𑀳𑀺 𑀲𑀤𑁆𑀤𑁂𑀳𑀺 𑀅𑀢𑀺𑀯𑀺𑀬 𑀤𑀽𑀭𑁂𑀢𑀺 𑀤𑀲𑁆𑀲𑁂𑀢𑀺, 𑀲𑀼𑀯𑀺𑀤𑀽𑀭𑀢𑀸 𑀏𑀯 𑀳𑀺 𑀯𑀺𑀤𑀽𑀭𑀢𑀸. 𑀲𑀯𑀸𑀲𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀅𑀭𑀳𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 𑀢𑁂𑀲𑀁 𑀯𑀸𑀲𑀦𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀯𑀸𑀲𑀦𑀸 𑀘 𑀦𑀸𑀫 𑀦𑀺𑀓𑁆𑀓𑀺𑀮𑁂𑀲𑀲𑁆𑀲𑀸𑀧𑀺 𑀲𑀓𑀮𑀜𑁂𑀬𑁆𑀬𑀸𑀦𑀯𑀩𑁄𑀥𑀸𑀤𑀺𑀤𑁆𑀯𑀸𑀭𑀢𑁆𑀢𑀬𑀧𑁆𑀧𑀬𑁄𑀕𑀯𑀺𑀕𑀼𑀡𑀢𑀸𑀳𑁂𑀢𑀼𑀪𑀽𑀢𑁄 𑀓𑀺𑀮𑁂𑀲𑀦𑀺𑀳𑀺𑀢𑁄 𑀆𑀓𑀸𑀭𑁄 𑀘𑀺𑀭𑀦𑀺𑀕𑀴𑀺𑀢𑀧𑀸𑀤𑀸𑀦𑀁 𑀦𑀺𑀕𑀴𑀫𑁄𑀓𑁆𑀔𑁂𑀧𑀺 𑀲𑀗𑁆𑀓𑀼𑀘𑀺𑀢𑀢𑀸𑀕𑀫𑀦𑀳𑁂𑀢𑀼𑀓𑁄 𑀦𑀺𑀕𑀴𑀦𑀺𑀳𑀺𑀢𑁄 𑀆𑀓𑀸𑀭𑁄 𑀯𑀺𑀬. 𑀬𑀸𑀬 𑀧𑀺𑀮𑀺𑀦𑁆𑀤𑀯𑀘𑁆𑀙𑀸𑀤𑀻𑀦𑀁 𑀯𑀲𑀮𑀯𑁄𑀳𑀸𑀭𑀸𑀤𑀺𑀯𑀺𑀕𑀼𑀡𑀢𑀸 𑀳𑁄𑀢𑀺, 𑀅𑀬𑀁 𑀯𑀸𑀲𑀦𑀸𑀢𑀺 𑀕𑀳𑁂𑀢𑀩𑁆𑀩𑀸. 𑀆𑀭𑀓𑀸𑀢𑀺 𑀏𑀢𑁆𑀣 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓-𑀓𑀸𑀭𑀲𑁆𑀲 𑀘 𑀳-𑀓𑀸𑀭𑀁 𑀲𑀸𑀦𑀼𑀲𑁆𑀲𑀭𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀅𑀭𑀳’’𑀦𑁆𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀉𑀧𑀭𑀺𑀧𑀺 𑀬𑀣𑀸𑀭𑀳𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀜𑁆𑀘𑁂𑀢𑀁 𑀲𑀁𑀲𑀸𑀭𑀘𑀓𑁆𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀜𑁆𑀜𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀲𑀯𑀸 𑀏𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀲𑀫𑀼𑀤𑀬𑁄𑀢𑀺 𑀆𑀳 ‘‘𑀆𑀲𑀯𑀲𑀫𑀼𑀤𑀬𑀫𑀬𑁂𑀦𑀸’’𑀢𑀺. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀳𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀓𑀝𑀢𑁆𑀢𑀸𑀭𑀽𑀧𑀧𑁆𑀧𑀪𑁂𑀤𑁄 𑀢𑀺𑀪𑀯𑁄 𑀏𑀯 𑀭𑀣𑁄, 𑀢𑀲𑁆𑀫𑀺𑀁 𑀢𑀺𑀪𑀯𑀭𑀣𑁂. 𑀲𑀁𑀲𑀸𑀭𑀘𑀓𑁆𑀓𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀲𑀫𑀼𑀤𑀬𑁄.

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, ‘𑀲𑀁𑀲𑀸𑀭𑁄’𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁬𑁧𑁮; 𑀤𑀻. 𑀦𑀺. 𑀅𑀝𑁆𑀞. 𑁨.𑁯𑁫 𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁬𑁦; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁯; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲; 𑀲𑀼. 𑀦𑀺. 𑀅𑀝𑁆𑀞. 𑁨.𑁫𑁨𑁩; 𑀉𑀤𑀸. 𑀅𑀝𑁆𑀞. 𑁩𑁯; 𑀇𑀢𑀺𑀯𑀼. 𑀅𑀝𑁆𑀞. 𑁧𑁪, 𑁫𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁬𑁭, 𑁯𑁯; 𑀩𑀼. 𑀯𑀁. 𑀅𑀝𑁆𑀞. 𑁫𑁮; 𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁭; 𑀘𑀽𑀴𑀦𑀺. 𑀅𑀝𑁆𑀞. 𑁬) 𑁋

𑀏𑀯𑀁 𑀯𑀼𑀢𑁆𑀢𑁄 𑀲𑀁𑀲𑀸𑀭𑁄𑀯 𑀘𑀓𑁆𑀓𑀁 𑀯𑀺𑀬 𑀧𑀭𑀺𑀩𑁆𑀪𑀫𑀦𑀢𑁄 𑀘𑀓𑁆𑀓𑀁, 𑀢𑀲𑁆𑀲 𑀘𑀓𑁆𑀓𑀲𑁆𑀲 𑀲𑀩𑁆𑀩𑁂 𑀅𑀭𑀸 𑀳𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁂𑀦𑀸𑀢𑀺 𑀪𑀕𑀯𑀢𑀸. 𑀩𑁄𑀥𑀻𑀢𑀺 𑀜𑀸𑀡𑀁, 𑀢𑀁 𑀏𑀢𑁆𑀣 𑀫𑀡𑁆𑀟𑀁 𑀧𑀲𑀦𑁆𑀦𑀁 𑀚𑀸𑀢𑀦𑁆𑀢𑀺 𑀩𑁄𑀥𑀺𑀫𑀡𑁆𑀟𑁄. 𑀓𑀫𑁆𑀫𑀓𑁆𑀔𑀬𑀓𑀭𑀁 𑀜𑀸𑀡𑀨𑀭𑀲𑀼𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀯𑀼𑀢𑁆𑀢𑀁, 𑀢𑀁 𑀙𑀺𑀦𑁆𑀤𑀺𑀢𑀩𑁆𑀩𑀁 𑀅𑀪𑀺𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀁 𑀓𑀫𑁆𑀫𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀓𑀫𑁆𑀫𑀓𑁆𑀔𑀬𑀓𑀭𑀯𑀺𑀲𑁂𑀲𑀦𑀯𑀺𑀲𑀺𑀝𑁆𑀞𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 𑀓𑀢𑀺𑀧𑀬𑀗𑁆𑀕𑁂𑀳𑀺 𑀲𑀁𑀲𑀸𑀭𑀘𑀓𑁆𑀓𑀁 𑀢𑀤𑀯𑀲𑁂𑀲𑀗𑁆𑀕𑁂𑀳𑀺 𑀨𑀮𑀪𑀽𑀢𑀦𑀸𑀫𑀭𑀽𑀧𑀥𑀫𑁆𑀫𑁂𑀳𑀺 𑀢𑀺𑀪𑀯𑀭𑀣𑀜𑁆𑀘 𑀢𑀲𑁆𑀫𑀺𑀁 𑀭𑀣𑁂 𑀬𑁄𑀚𑀺𑀢𑀲𑀁𑀲𑀸𑀭𑀘𑀓𑁆𑀓𑀸𑀭𑀸𑀦𑀁 𑀳𑀦𑀦𑀧𑁆𑀧𑀓𑀸𑀭𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀩𑁆𑀩𑁂𑀳𑀺𑀧𑀺 𑀤𑁆𑀯𑀸𑀤𑀲𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀳𑀺 𑀭𑀣𑀯𑀺𑀭𑀳𑀺𑀢𑀫𑁂𑀯 𑀓𑁂𑀯𑀮𑀁 𑀲𑀁𑀲𑀸𑀭𑀘𑀓𑁆𑀓𑀁, 𑀢𑀲𑁆𑀲 𑀅𑀭𑀖𑀸𑀢𑀦𑀧𑁆𑀧𑀓𑀸𑀭𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 𑀅𑀣𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀫𑀢𑀕𑁆𑀕𑀦𑁆𑀢𑀺 𑀅𑀦𑀼 𑀅𑀦𑀼 𑀅𑀫𑀢𑀕𑁆𑀕𑀁, 𑀲𑀩𑁆𑀩𑀣𑀸 𑀅𑀦𑀼𑀕𑀘𑁆𑀙𑀦𑁆𑀢𑁂𑀳𑀺𑀧𑀺 𑀅𑀯𑀺𑀜𑁆𑀜𑀸𑀢𑀓𑁄𑀝𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑁄𑀲𑀸𑀦𑀢𑁆𑀢𑀸𑀢𑀺 𑀇𑀤𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀤𑀲𑀦𑁆𑀦𑀁 𑀅𑀭𑀪𑀸𑀯𑁂𑀦 𑀏𑀓𑀢𑁆𑀢𑀁 𑀲𑀫𑀸𑀭𑁄𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑁂𑀲𑀁 𑀧𑀘𑁆𑀘𑁂𑀓𑀁 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑀸 𑀚𑀭𑀸𑀫𑀭𑀡𑀧𑀭𑀺𑀬𑁄𑀲𑀸𑀦𑀢𑀸 𑀘 𑀅𑀢𑁆𑀣𑀺 𑀢𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸. 𑀅𑀣 𑀯𑀸 𑀢𑁂𑀲𑀫𑁆𑀧𑀺 𑀬𑀣𑀸𑀭𑀳𑀁 𑀅𑀢𑁆𑀣𑀢𑁄 𑀅𑀯𑀺𑀚𑁆𑀚𑀸𑀫𑀽𑀮𑀓𑀢𑁆𑀢𑀁, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀮𑀓𑁆𑀔𑀡𑀪𑀽𑀢𑀔𑀡𑀺𑀓𑀚𑀭𑀸𑀫𑀭𑀡𑀯𑀲𑁂𑀦 𑀢𑀧𑁆𑀧𑀭𑀺𑀬𑁄𑀲𑀸𑀦𑀢𑀜𑁆𑀘 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀢𑁂𑀲𑀁 𑀧𑀘𑁆𑀘𑁂𑀓𑀁 𑀅𑀭𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺.

𑀏𑀯𑀁 𑀲𑀩𑁆𑀩𑀸𑀓𑀸𑀭𑀁 𑀲𑀁𑀲𑀸𑀭𑀘𑀓𑁆𑀓𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀦 𑀜𑀸𑀡𑁂𑀦 𑀇𑀫𑀲𑁆𑀲 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁 𑀙𑁂𑀤𑁄 𑀪𑀕𑀯𑀢𑁄 𑀲𑀺𑀤𑁆𑀥𑁄, 𑀢𑀲𑁆𑀲 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀲𑁆𑀲 ‘‘𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁪; 𑁧.𑁪𑁫) 𑀫𑀸𑀢𑀺𑀓𑀸 𑀯𑀼𑀢𑁆𑀢𑀢𑁆𑀢𑀸 𑀪𑀯𑀘𑀓𑁆𑀓𑀸𑀯𑀬𑀯𑁂𑀲𑀼 𑀅𑀯𑀺𑀚𑁆𑀚𑀸𑀤𑀻𑀲𑀼 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀧𑀭𑀺𑀕𑁆𑀕𑀳𑀯𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀢𑁄 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀯𑀼𑀢𑁆𑀢𑁂𑀦 𑀏𑀯𑀫𑀬𑀁 𑀅𑀯𑀺𑀚𑁆𑀚𑀸𑀳𑁂𑀢𑀽𑀢𑀺𑀆𑀤𑀺𑀓𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀲𑀳𑀺𑀢𑁂𑀦 (𑀧𑀝𑀺. 𑀫. 𑁧.𑁪𑁫) 𑀧𑀸𑀞𑁂𑀦 𑀲𑀭𑀽𑀧𑀢𑁄 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀲𑁆𑀲 𑀘 𑀢𑁂𑀲𑀼𑀬𑁂𑀯 𑀅𑀯𑀺𑀚𑁆𑀚𑀸𑀤𑀻𑀲𑀼 𑀘𑀢𑀼𑀲𑀗𑁆𑀔𑁂𑀧𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀯𑀺𑀪𑀸𑀕𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀇𑀢𑀺 𑀪𑀕𑀯𑀸𑀢𑀺𑀆𑀤𑀺𑀧𑀸𑀞𑁂𑀦 𑀪𑀕𑀯𑀢𑁄 𑀢𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀲𑀩𑁆𑀩𑀸𑀓𑀸𑀭𑀢𑁄 𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀇𑀫𑀺𑀦𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦𑀸𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀢𑁂𑀦 𑀜𑀸𑀡𑁂𑀦 𑀲𑀁𑀲𑀸𑀭𑀘𑀓𑁆𑀓𑀸𑀭𑀸𑀦𑀁 𑀯𑀺𑀤𑁆𑀥𑀁𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀺𑀡𑁆𑀡𑀁 𑀆𑀬𑀢𑀦𑀸𑀦𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀫𑀦𑀸𑀬𑀢𑀦𑀸𑀦𑀁 𑀢𑀺𑀡𑁆𑀡𑀁. 𑀏𑀲 𑀦𑀬𑁄 𑀢𑀺𑀡𑁆𑀡𑀁 𑀨𑀲𑁆𑀲𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺. 𑀭𑀽𑀧𑀢𑀡𑁆𑀳𑀸𑀤𑀺𑀯𑀲𑁂𑀦 𑀙 𑀢𑀡𑁆𑀳𑀸𑀓𑀸𑀬𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸.

𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀓𑀸𑀫𑀲𑀼𑀕𑀢𑀻𑀲𑀼 𑀲𑀫𑁆𑀧𑀢𑁆𑀢𑀺𑀁. 𑀢𑀣𑁂𑀯𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯. 𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑀫𑁆𑀧𑀢𑁆𑀢𑀺𑀁. 𑀢𑁂𑀪𑀽𑀫𑀓𑀥𑀫𑁆𑀫𑀯𑀺𑀲𑀬𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀭𑀸𑀕𑀲𑁆𑀲 𑀓𑀺𑀮𑁂𑀲𑀓𑀸𑀫𑀪𑀸𑀯𑀢𑁄 𑀪𑀯𑀭𑀸𑀕𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸𑀬𑁂𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑀻’’𑀢𑀺. 𑀲𑁂𑀲𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀫𑀽𑀮𑀺𑀓𑀸𑀲𑀼𑀧𑀺 𑀬𑁄𑀚𑀦𑀸𑀲𑀼. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸𑀦𑀬𑁄 𑁋 𑀇𑀥𑁂𑀓𑀘𑁆𑀘𑁄 ‘‘𑀦𑀢𑁆𑀣𑀺 𑀧𑀭𑀮𑁄𑀓𑁄 𑀉𑀘𑁆𑀙𑀺𑀚𑁆𑀚𑀢𑀺 𑀅𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑁧.𑁮𑁫-𑁮𑁬 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀲𑁄 𑀤𑀺𑀝𑁆𑀞𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺𑀦𑀸, 𑀅𑀧𑀭𑁄 ‘‘𑀅𑀲𑀼𑀓𑀲𑁆𑀫𑀺𑀁 𑀪𑀯𑁂 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸 𑀢𑀁 𑀢𑀁 𑀓𑀼𑀲𑀮𑀁 𑀓𑀭𑁄𑀢𑀻𑀢𑀺𑀆𑀤𑀺𑀦𑀸 𑀘 𑀤𑀺𑀝𑁆𑀞𑀼𑀧𑀸𑀤𑀸𑀦𑀫𑀽𑀮𑀺𑀓𑀸 𑀬𑁄𑀚𑀦𑀸, 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀫𑀽𑀮𑀺𑀓𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑁄 ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀻’’𑀢𑀺 𑀅𑀲𑀼𑀤𑁆𑀥𑀺𑀫𑀕𑁆𑀕𑀁 ‘‘𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀧𑀭𑀸𑀫𑀲𑀦𑁆𑀢𑁄 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀻𑀢𑀺𑀆𑀤𑀺𑀦𑀸 𑀲𑀩𑁆𑀩𑀪𑀯𑁂𑀲𑀼 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀫𑀽𑀮𑀺𑀓𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀬𑀲𑁆𑀲 𑀲𑀁𑀲𑀸𑀭𑀘𑀓𑁆𑀓𑀸𑀭𑀸𑀦𑀁 𑀖𑀸𑀢𑀦𑀲𑀫𑀢𑁆𑀣𑀲𑁆𑀲 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀧𑀅𑀕𑁆𑀕𑀳𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀢𑀫𑁂𑀯 𑀜𑀸𑀡𑀁 𑀅𑀯𑀺𑀚𑁆𑀚𑀸𑀤𑀻𑀲𑀼 𑀧𑀯𑀢𑁆𑀢𑀺𑀆𑀓𑀸𑀭𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀬𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀧𑀦 ‘‘𑀇𑀤𑀸𑀦𑀺 𑀬𑁆𑀯𑀸𑀬𑀁 𑀲𑀁𑀲𑀸𑀭𑀘𑀓𑁆𑀓𑀁 𑀤𑀲𑁆𑀲𑁂𑀦𑁆𑀢𑁂𑀦 𑀓𑀸𑀫𑀪𑀯𑁂 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀢𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀬𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀸 𑀯𑀺𑀦𑀬𑀝𑀻𑀓𑀸𑀬𑀧𑀺 𑀅𑀬𑀫𑁂𑀯 𑀧𑀸𑀞𑁄 𑀮𑀺𑀔𑀺𑀢𑁄. 𑀢𑀢𑁆𑀣 𑀘 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁄 𑀲𑀁𑀲𑀸𑀭𑀘𑀓𑁆𑀓𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀼𑀢𑁆𑀢𑁄 𑀦 𑀳𑁄𑀢𑀺 𑀢𑀲𑁆𑀲 𑀘 𑀅𑀯𑀺𑀚𑁆𑀚𑀸 𑀦𑀸𑀪𑀺, 𑀫𑀽𑀮𑀢𑁆𑀢𑀸𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂𑀯 𑀤𑀲𑁆𑀲𑀺𑀢𑀢𑁆𑀢𑀸 𑀉𑀧𑀭𑀺 𑀘𑀓𑁆𑀓𑀭𑀽𑀧𑀢𑁄 𑀧𑀬𑁄𑀕𑀢𑁆𑀢𑁂𑀦 𑀉𑀧𑀲𑀁𑀳𑀸𑀭𑀸𑀪𑀸𑀯𑀸 𑀘. ‘‘𑀅𑀧𑀺 𑀘 𑀢𑀫𑁂𑀯 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀘𑁂𑀢𑁆𑀣 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁄 𑀦𑀺𑀕𑀫𑀦𑀯𑀲𑁂𑀦 𑀧𑀥𑀸𑀦𑀢𑁆𑀢𑁂𑀦 𑀤𑀲𑁆𑀲𑀺𑀢𑁄, 𑀅𑀣 𑀔𑁄 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀲𑀧𑁆𑀧𑀯𑀢𑁆𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀫𑁂𑀯 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀸𑀓𑀸𑀭𑀲𑁆𑀲 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑀺𑀢𑀁. 𑀢𑀣𑀸 𑀳𑀺 ‘‘𑀏𑀯𑀫𑀬𑀁 𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁. 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸 𑀳𑁂𑀢𑀼…𑀧𑁂… 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁪𑁬) 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀫𑁂𑀯 𑀧𑀥𑀸𑀦𑀢𑁆𑀢𑁂𑀦 𑀤𑀲𑁆𑀲𑀺𑀢𑀁. ‘‘𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺 𑀧𑀦 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁪; 𑁧.𑁪𑁫) 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀢𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀸𑀓𑀸𑀭𑀧𑀭𑀺𑀤𑀻𑀧𑀦𑀢𑁆𑀣𑀁 𑀯𑀺𑀲𑀬𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀦 𑀧𑀥𑀸𑀦𑀢𑁆𑀢𑁂𑀦.

𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀏𑀯𑀦𑁆𑀢𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦 𑀅𑀬𑀁 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀘 𑀢𑁂𑀦 𑀳𑁂𑀢𑀼𑀦𑀸 𑀲𑀫𑀼𑀧𑁆𑀧𑀦𑁆𑀦𑀸. 𑀉𑀪𑁄𑀧𑁂𑀢𑁂𑀢𑀺 𑀬𑀲𑁆𑀫𑀸 𑀅𑀬𑀁 𑀅𑀯𑀺𑀚𑁆𑀚𑀸 𑀧𑀭𑀧𑀭𑀺𑀓𑀧𑁆𑀧𑀺𑀢𑀧𑀓𑀢𑀺𑀇𑀲𑁆𑀲𑀭𑀸𑀤𑀺 𑀯𑀺𑀬 𑀅𑀳𑁂𑀢𑀼𑀓𑀸 𑀦𑀺𑀘𑁆𑀘𑀸 𑀥𑀼𑀯𑀸 𑀦 𑀳𑁄𑀢𑀺, 𑀅𑀣 𑀔𑁄 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀘𑀦𑀢𑁄 𑀲𑀬𑀫𑁆𑀧𑀺 𑀲𑀳𑁂𑀢𑀼𑀓𑀸 𑀲𑀗𑁆𑀔𑀢𑀸 𑀅𑀦𑀺𑀘𑁆𑀘𑀸𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀉𑀪𑁄𑀧𑁂𑀢𑁂 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸𑀬𑁂𑀯. 𑀇𑀢𑀻𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀘𑁆𑀘𑀬𑀧𑀭𑀺𑀕𑁆𑀕𑀡𑁆𑀳𑀦𑁂 𑀬𑀸 𑀧𑀜𑁆𑀜𑀸, 𑀢𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀲𑀗𑁆𑀔𑀸𑀢𑁂 𑀓𑀸𑀭𑀡𑁂 𑀬𑀸𑀣𑀸𑀯𑀢𑁄 𑀧𑀯𑀢𑁆𑀢𑀢𑁆𑀢𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀦𑀸𑀫𑀸𑀢𑀺.

𑀏𑀢𑁆𑀣 𑀳𑀺 𑀜𑀸𑀡𑀲𑁆𑀲 𑀯𑀺𑀲𑀬𑀯𑀺𑀪𑀸𑀯𑀦𑀯𑀲𑁂𑀦𑁂𑀯 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀦 𑀧𑀥𑀸𑀦𑀢𑁆𑀢𑁂𑀦, 𑀜𑀸𑀡𑀫𑁂𑀯 𑀧𑀦𑁂𑀢𑁆𑀣 𑀧𑀥𑀸𑀦𑀢𑁄 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀢𑀲𑁆𑀲 𑀜𑀸𑀡𑀲𑁆𑀲 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑁂𑀝𑁆𑀞𑀸𑀧𑀺 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀥𑀸𑀧𑀺 𑀦𑀺𑀕𑀫𑀦𑀯𑀲𑁂𑀦 𑀉𑀧𑀲𑀁𑀳𑀝𑁄, 𑀦 𑀪𑀯𑀘𑀓𑁆𑀓𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀢𑀦𑁄 𑀫𑀢𑀺.

𑀢𑀢𑁆𑀣 𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂𑀲𑀼 𑀅𑀤𑀺𑀝𑁆𑀞𑁂𑀲𑀼 𑀳𑁂𑀢𑀽𑀦𑀁 𑀧𑀘𑁆𑀘𑀬𑀪𑀸𑀯𑁄𑀧𑀺 𑀦 𑀲𑀓𑁆𑀓𑀸 𑀤𑀝𑁆𑀞𑀼𑀦𑁆𑀢𑀺 ‘‘𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀜𑀸𑀡𑀦𑀺𑀤𑁆𑀤𑁂𑀲𑁂 (𑀧𑀝𑀺. 𑀫. 𑁧.𑁪𑁫) 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁂𑀦 𑀦𑀬𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀲𑀗𑁆𑀔𑀸𑀭𑀸 𑀳𑁂𑀢𑀼, 𑀯𑀺𑀜𑁆𑀜𑀸𑀡𑀁 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀸𑀦𑀺 𑀚𑀸𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀺 𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀲𑁆𑀲 𑀅𑀯𑀺𑀚𑁆𑀚𑀸𑀤𑀻𑀲𑀼 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀅𑀜𑁆𑀜𑁂𑀳𑀺𑀧𑀺 𑀆𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼. 𑀲𑀗𑁆𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀳𑁂𑀢𑀼𑀲𑀸𑀫𑀜𑁆𑀜𑁂𑀦 𑀨𑀮𑀲𑀸𑀫𑀜𑁆𑀜𑁂𑀦 𑀯𑀸𑀢𑀺 𑀲𑀗𑁆𑀔𑁂𑀧𑁄, 𑀲𑀗𑁆𑀕𑀳𑁄, 𑀓𑁄𑀝𑁆𑀞𑀸𑀲𑁄 𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀚𑀸𑀢𑀺𑀢𑁄 𑀤𑀼𑀯𑀺𑀥𑁄𑀧𑀺 𑀓𑀸𑀮𑀪𑁂𑀤𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀚𑀸𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸𑀢𑀺 𑀅𑀦𑀼𑀯𑀢𑁆𑀢𑀢𑀺. 𑀢𑀡𑁆𑀳𑀼𑀧𑀸𑀤𑀸𑀦𑀪𑀯𑀸 𑀕𑀳𑀺𑀢𑀸 𑀓𑀺𑀮𑁂𑀲𑀓𑀫𑁆𑀫𑀲𑀸𑀫𑀜𑁆𑀜𑀢𑁄 𑀢𑀤𑀯𑀺𑀦𑀸𑀪𑀸𑀯𑀢𑁄 𑀘. 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀯𑀝𑁆𑀝𑀫𑁆𑀧𑀺 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀢𑀸𑀲𑀭𑀺𑀓𑁆𑀔𑀢𑀸𑀬 𑀇𑀥 𑀓𑀫𑁆𑀫𑀯𑀝𑁆𑀝𑀫𑁂𑀯𑀸𑀢𑀺 𑀆𑀳 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸𑀢𑀺𑀆𑀤𑀺. 𑀯𑀺𑀧𑀸𑀓𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀓𑀫𑁆𑀫𑀚𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀫𑁂𑀯 𑀯𑀺𑀧𑀸𑀓𑀲𑀤𑁆𑀤𑀯𑀘𑀦𑀻𑀬𑀢𑁆𑀢𑁂𑀧𑀺 𑀦𑀸𑀫𑀭𑀽𑀧𑀸𑀤𑀺𑀧𑀤𑁂𑀲𑀼 𑀭𑀽𑀧𑀫𑀺𑀲𑁆𑀲𑀫𑁆𑀧𑀺 𑀨𑀮𑀧𑀜𑁆𑀘𑀓𑀁 𑀅𑀭𑀽𑀧𑀧𑁆𑀧𑀥𑀸𑀦𑀢𑀸𑀬 𑀘 𑀢𑀩𑁆𑀩𑀳𑀼𑀮𑀢𑀸𑀬 𑀘 ‘‘𑀯𑀺𑀧𑀸𑀓𑀯𑀝𑁆𑀝’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀧𑁆𑀧𑀥𑀸𑀦𑀁 𑀯𑀝𑁆𑀝𑀁, 𑀯𑀺𑀧𑀸𑀓𑀩𑀳𑀼𑀮𑀁 𑀯𑀸 𑀯𑀝𑁆𑀝𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀚𑀧𑀭𑀺𑀬𑀸𑀬𑁄 𑀯𑀸 𑀏𑀢𑁆𑀣 𑀯𑀺𑀧𑀸𑀓-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀚𑀸𑀢𑀺𑀚𑀭𑀸𑀫𑀭𑀡𑀸𑀧𑀤𑁂𑀲𑁂𑀦𑀸𑀢𑀺 𑀧𑀭𑀫𑀢𑁆𑀣𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀚𑀸𑀢𑀺𑀚𑀭𑀸𑀫𑀭𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀢𑀤𑀧𑀤𑁂𑀲𑁂𑀦 𑀢𑁂𑀲𑀁 𑀓𑀣𑀦𑁂𑀦 𑀢𑀁𑀫𑀼𑀔𑁂𑀦𑀸𑀢𑀺 𑀅𑀢𑁆𑀣𑁄. 𑀆𑀓𑀺𑀭𑀻𑀬𑀦𑁆𑀢𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀯𑀺𑀚𑁆𑀚𑀸𑀤𑀺𑀲𑀭𑀽𑀧𑀸, 𑀢𑀢𑁄 𑀧𑀘𑁆𑀘𑀬𑀸𑀓𑀸𑀭𑀢𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀲𑀦𑁆𑀥𑀻𑀢𑀺 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀳𑁂𑀢𑀼𑀨𑀮𑀲𑀦𑁆𑀥𑀺, 𑀤𑀼𑀢𑀺𑀬𑁄 𑀨𑀮𑀳𑁂𑀢𑀼𑀲𑀦𑁆𑀥𑀺, 𑀢𑀢𑀺𑀬𑁄 𑀳𑁂𑀢𑀼𑀨𑀮𑀲𑀦𑁆𑀥𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀲𑁆𑀲 𑀅𑀯𑀺𑀚𑁆𑀚𑀸𑀤𑀻𑀲𑀼 𑀅𑀦𑁂𑀓𑁂𑀳𑀺 𑀧𑀓𑀸𑀭𑁂𑀳𑀺 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀳𑀺, 𑀅𑀯𑀼𑀢𑁆𑀢𑁂𑀳𑀺 𑀘 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀝𑀺𑀯𑀺𑀤𑁆𑀥𑀪𑀸𑀯𑀁, 𑀢𑀲𑁆𑀲 𑀘 𑀜𑀸𑀡𑀲𑁆𑀲 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 𑀉𑀧𑀲𑀁𑀳𑀸𑀭𑀯𑀲𑁂𑀦 𑀇𑀢𑀺 𑀪𑀕𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁, 𑀢𑁂𑀦𑀸𑀳 𑀘𑀢𑀼𑀲𑀗𑁆𑀔𑁂𑀧𑀦𑁆𑀢𑀺𑀆𑀤𑀺. 𑀲𑀩𑁆𑀩𑀸𑀓𑀸𑀭𑀢𑁄𑀢𑀺 𑀇𑀥 𑀓𑀸𑀫𑀪𑀯𑁂 𑀘 𑀅𑀯𑀺𑀚𑁆𑀚𑀸 𑀓𑀸𑀫𑀪𑀯𑁂 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄𑀢𑀺𑀆𑀤𑀺𑀦𑀸 𑀇𑀥 𑀯𑀼𑀢𑁆𑀢𑁂𑀳𑀺 𑀘 𑀅𑀯𑀼𑀢𑁆𑀢𑁂𑀳𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁨𑁨𑁫 𑀆𑀤𑀬𑁄) 𑀆𑀕𑀢𑁂𑀳𑀺 𑀲𑀩𑁆𑀩𑁂𑀳𑀺 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀢𑀦𑁆𑀢𑀺 𑀬𑁂𑀦 𑀜𑀸𑀡𑁂𑀦 𑀪𑀕𑀯𑀸 𑀏𑀯𑀁 𑀚𑀸𑀦𑀸𑀢𑀺, 𑀢𑀁 𑀜𑀸𑀡𑀁. 𑀜𑀸𑀢𑀝𑁆𑀞𑁂𑀦𑀸𑀢𑀺 𑀚𑀸𑀦𑀦𑀝𑁆𑀞𑁂𑀦. 𑀧𑀚𑀸𑀦𑀦𑀝𑁆𑀞𑁂𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀦𑀝𑁆𑀞𑁂𑀦.

𑀇𑀤𑀸𑀦𑀺 𑀬𑀫𑀺𑀤𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀸𑀓𑀸𑀭𑀪𑁂𑀤𑁂𑀳𑀺 𑀲𑀤𑁆𑀥𑀺𑀁 𑀧𑀧𑀜𑁆𑀘𑀢𑁄 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀺𑀁 𑀅𑀭𑀖𑀸𑀢𑁂 𑀏𑀢𑀲𑁆𑀲 𑀉𑀧𑀬𑁄𑀕𑀺𑀢𑀁 𑀤𑀲𑁆𑀲𑁂𑀢𑀼𑀁 𑀇𑀫𑀺𑀦𑀸 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀅𑀭𑁂 𑀳𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀦𑁆𑀢𑀺? 𑀆𑀳 ‘‘𑀢𑁂 𑀥𑀫𑁆𑀫𑁂’’𑀢𑀺𑀆𑀤𑀺. 𑀢𑁂 𑀅𑀯𑀺𑀚𑁆𑀚𑀸𑀤𑀺𑀓𑁂 𑀥𑀫𑁆𑀫𑁂 𑀫𑀳𑀸𑀯𑀚𑀺𑀭𑀜𑀸𑀡𑀸𑀯𑀼𑀥𑁂𑀦 𑀢𑁂𑀦 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑁂𑀦 𑀬𑀣𑀸𑀪𑀽𑀢𑀁 𑀜𑀢𑁆𑀯𑀸 𑀢𑁂𑀦 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀼𑀥𑁂𑀦 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑀸𑀯𑀼𑀥𑁂𑀦 𑀯𑀺𑀭𑀚𑁆𑀚𑀦𑁆𑀢𑁄 𑀯𑀺𑀫𑀼𑀘𑁆𑀘𑀦𑁆𑀢𑁄 𑀅𑀭𑁂 𑀳𑀦𑀻𑀢𑀺 𑀬𑁄𑀚𑀦𑀸. 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑁆𑀧𑀺 𑀳𑀺 𑀓𑀺𑀘𑁆𑀘𑀢𑁄 𑀲𑀫𑀼𑀤𑀬𑀲𑀘𑁆𑀘𑀸𑀤𑀺𑀩𑁄𑀥𑀢𑁄 ‘‘𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀏𑀓𑁂𑀓𑀁 𑀥𑀫𑁆𑀫𑀓𑁆𑀔𑀦𑁆𑀥𑀁 𑀏𑀓𑁂𑀓𑀯𑀺𑀳𑀸𑀭𑁂𑀦 𑀧𑀽𑀚𑁂𑀫𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀁 𑀆𑀭𑀩𑁆𑀪 𑀧𑀯𑀢𑁆𑀢𑀸𑀧𑀺 𑀯𑀺𑀳𑀸𑀭𑀓𑀭𑀡𑀧𑀽𑀚𑀸 𑀪𑀕𑀯𑀢𑀺 𑀧𑁂𑀫𑁂𑀦𑁂𑀯 𑀧𑀯𑀢𑁆𑀢𑀢𑁆𑀢𑀸 𑀲𑀥𑀸𑀢𑀼𑀓𑀸𑀤𑀺𑀘𑁂𑀢𑀺𑀬𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀘 𑀪𑀕𑀯𑀢𑁄𑀯 𑀧𑀽𑀚𑀸𑀢𑀺 𑀆𑀳 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲𑀸𑀢𑀺𑀆𑀤𑀺. 𑀓𑀺𑀮𑁂𑀲𑀸𑀭𑀻𑀦 𑀲𑁄 𑀫𑀼𑀦𑀻𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀸𑀤𑀻𑀦 𑀘𑀸𑀭𑀳𑁄𑀢𑀺 𑀏𑀢𑁆𑀣𑀸𑀧𑀺 𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀤𑀝𑁆𑀞𑀩𑁆𑀩𑁄.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀲𑀁-𑀲𑀤𑁆𑀤𑁄 𑀲𑀬𑀦𑁆𑀢𑀺 𑀅𑀢𑁆𑀣𑁂 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀸𑀫’’𑀦𑁆𑀢𑀺, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀇𑀤𑀁 𑀓𑀲𑁆𑀲𑀘𑀺 𑀯𑀺𑀲𑀬𑀯𑀺𑀲𑁂𑀲𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀲𑀺𑀤𑁆𑀥𑀁. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸𑀯 𑀯𑀺𑀜𑁆𑀜𑀸𑀬𑀢𑀺, 𑀬𑀣𑀸 𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑁆𑀣𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑀸 𑀓𑀢𑁆𑀢𑀭𑀺𑀬𑁂𑀯 𑀩𑀼𑀤𑁆𑀥-𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄. ‘‘𑀲𑀫𑁆𑀫𑀸 𑀲𑀸𑀫𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀇𑀥 𑀲𑀤𑁆𑀤𑀢𑁄 𑀮𑀩𑁆𑀪𑀢𑀺. 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀇𑀤𑀁 𑀧𑀦 𑀅𑀢𑁆𑀣𑀢𑁄 𑀮𑀩𑁆𑀪𑀫𑀸𑀦𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀳𑀺 𑀩𑀼𑀚𑁆𑀛𑀦𑀓𑀺𑀭𑀺𑀬𑀸 𑀅𑀯𑀺𑀲𑀬𑀸 𑀬𑀼𑀚𑁆𑀚𑀢𑀺. 𑀅𑀪𑀺𑀜𑁆𑀜𑁂𑀬𑁆𑀬𑁂𑀢𑀺 𑀮𑀓𑁆𑀔𑀡𑀸𑀤𑀺𑀢𑁄 𑀅𑀦𑀺𑀘𑁆𑀘𑀸𑀤𑀺𑀢𑁄 𑀘 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑁂. 𑀧𑀭𑀺𑀜𑁆𑀜𑁂𑀬𑁆𑀬𑁂𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀫𑀸𑀳. 𑀧𑀳𑀸𑀢𑀩𑁆𑀩𑁂𑀢𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀧𑀦𑁂𑀢𑁆𑀣 𑀲𑁄𑀧𑀸𑀤𑀺𑀲𑁂𑀲𑀸𑀤𑀺𑀓𑀁 𑀧𑀭𑀺𑀬𑀸𑀬𑀲𑀺𑀤𑁆𑀥𑀁 𑀪𑁂𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁄.

𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀕𑀸𑀣𑀸𑀬 𑀧𑀳𑀸𑀢𑀩𑁆𑀩𑀪𑀸𑀯𑁂𑀢𑀩𑁆𑀩𑀸𑀦𑀁 𑀲𑀫𑀼𑀤𑀬𑀫𑀕𑁆𑀕𑀲𑀘𑁆𑀘𑀸𑀦𑀁 𑀳𑁂𑀢𑀼𑀥𑀫𑁆𑀫𑀸𑀦𑀁 𑀕𑀳𑀡𑁂𑀦𑁂𑀯 𑀢𑀧𑁆𑀨𑀮𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀦𑀺𑀭𑁄𑀥𑀲𑀘𑁆𑀘𑀸𑀦𑀫𑁆𑀧𑀺 𑀲𑀺𑀤𑁆𑀥𑀺𑀢𑁄 𑀧𑀭𑀺𑀜𑁆𑀜𑀸𑀢𑀩𑁆𑀩𑀜𑁆𑀘 𑀧𑀭𑀺𑀜𑁆𑀜𑀸𑀢𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀜𑁆𑀘 𑀲𑀘𑁆𑀙𑀺𑀓𑀢𑀦𑁆𑀢𑀺 𑀇𑀤𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀻’’𑀢𑀺. 𑀬𑀲𑁆𑀫𑀸 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀫𑀬𑀸 𑀩𑀼𑀤𑁆𑀥𑀸𑀦𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀁 𑀩𑀼𑀤𑁆𑀥𑁄𑀲𑁆𑀫𑀺, 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀘𑀺𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀢𑀡𑁆𑀳𑀸 𑀤𑀼𑀓𑁆𑀔𑀯𑀺𑀘𑀺𑀢𑁆𑀢𑀢𑀸𑀬 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀫𑀽𑀮𑀓𑀸𑀭𑀡𑀪𑀸𑀯𑁂𑀦𑀸’’𑀢𑀺. 𑀉𑀪𑀺𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀲𑁆𑀲 𑀢𑀁𑀲𑀫𑀼𑀤𑀬𑀲𑁆𑀲 𑀘. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀦 𑀅𑀪𑀸𑀯𑀫𑀢𑁆𑀢𑀁. 𑀢𑀲𑁆𑀲 𑀅𑀯𑀢𑁆𑀣𑀼𑀢𑁆𑀢𑀸 𑀲𑀧𑁆𑀧𑀘𑁆𑀘𑀬𑀢𑁆𑀢𑀸𑀤𑀺𑀅𑀦𑁂𑀓𑀪𑁂𑀤𑀸 𑀲𑀩𑁆𑀩𑀲𑀗𑁆𑀕𑀳𑀺𑀢𑀸. 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀭𑁄𑀥𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀸. 𑀏𑀓𑁂𑀓𑀧𑀤𑀼𑀤𑁆𑀥𑀸𑀭𑁂𑀦𑀸𑀧𑀻𑀢𑀺 𑀘𑀓𑁆𑀔𑀼 𑀘𑀓𑁆𑀔𑀼𑀲𑀫𑀼𑀤𑀬𑁄𑀢𑀺𑀆𑀤𑀺𑀦𑀸 𑀏𑀓𑁂𑀓𑀓𑁄𑀝𑁆𑀞𑀸𑀲𑀦𑀺𑀤𑁆𑀥𑀸𑀭𑀡𑁂𑀦𑀸𑀧𑀺, 𑀦 𑀤𑀼𑀓𑁆𑀔𑀲𑀘𑁆𑀘𑀸𑀤𑀺𑀲𑀸𑀫𑀜𑁆𑀜𑀢𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀡𑁆𑀳𑀸𑀬𑀧𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀤𑀼𑀓𑁆𑀔𑀲𑀘𑁆𑀘𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀙 𑀢𑀡𑁆𑀳𑀸𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀧𑀦 𑀅𑀢𑁆𑀢𑀪𑀸𑀯𑁂 𑀲𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑁂𑀦 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀪𑀯𑀲𑀺𑀤𑁆𑀥𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀕𑀳𑁂𑀢𑀩𑁆𑀩𑀸. 𑀓𑀲𑀺𑀡𑀸𑀦𑀻𑀢𑀺 𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑀺 𑀛𑀸𑀦𑀸𑀦𑀺. 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸𑀢𑀺 𑀓𑁂𑀲𑀸𑀤𑀬𑁄 𑀢𑀤𑀸𑀭𑀫𑁆𑀫𑀡𑀚𑁆𑀛𑀸𑀦𑀸𑀦𑀺 𑀘. 𑀦𑀯 𑀪𑀯𑀸𑀢𑀺 𑀓𑀸𑀫𑀪𑀯𑀸𑀤𑀬𑁄 𑀢𑀬𑁄 𑀲𑀜𑁆𑀜𑀻𑀪𑀯𑀸𑀤𑀬𑁄 𑀢𑀬𑁄 𑀏𑀓𑀯𑁄𑀓𑀸𑀭𑀪𑀯𑀸𑀤𑀬𑁄 𑀢𑀬𑁄 𑀘𑀸𑀢𑀺 𑀦𑀯 𑀪𑀯𑀸. 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀆𑀭𑀫𑁆𑀫𑀡𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀯𑀺𑀧𑀸𑀓𑀓𑀺𑀭𑀺𑀬𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀲𑀩𑁆𑀩𑀢𑁆𑀣 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀢𑀡𑁆𑀳𑀸𑀲𑀫𑀼𑀝𑁆𑀞𑀸𑀧𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀓𑀺𑀭𑀺𑀬𑀥𑀫𑁆𑀫𑀸𑀦𑀁 𑀧𑀦 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀸 𑀢𑀡𑁆𑀳𑀸. 𑀅𑀦𑀼𑀮𑁄𑀫𑀢𑁄𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀆𑀲𑀯𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀗𑁆𑀔𑀸𑀭𑀸𑀤𑀻𑀲𑀼 𑀧𑀦 𑀅𑀯𑀺𑀚𑁆𑀚𑀸𑀤𑀬𑁄𑀯 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀢𑁂𑀦𑀸𑀢𑀺 𑀢𑀲𑁆𑀫𑀸.

𑀯𑀺𑀚𑁆𑀚𑀸𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀯𑀺𑀚𑁆𑀚𑀸. 𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀯𑀸. 𑀢𑀢𑁆𑀭𑀸𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂. 𑀫𑀦𑁄𑀫𑀬𑀺𑀤𑁆𑀥𑀺𑀬𑀸𑀢𑀺 𑀏𑀢𑁆𑀣 ‘‘𑀇𑀥 𑀪𑀺𑀓𑁆𑀔𑀼 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁩𑁬) 𑀯𑀼𑀢𑁆𑀢𑀢𑁆𑀢𑀸 𑀲𑀭𑀻𑀭𑀩𑁆𑀪𑀦𑁆𑀢𑀭𑀛𑀸𑀦𑀫𑀦𑁂𑀦 𑀅𑀜𑁆𑀜𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀸 𑀫𑀦𑁄𑀫𑀬𑀺𑀤𑁆𑀥𑀺 𑀦𑀸𑀫, 𑀲𑀸 𑀅𑀢𑁆𑀣𑀢𑁄 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸𑀬𑁂𑀯. 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀦𑀸𑀫 𑀲𑀤𑁆𑀥𑀸 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁 𑀩𑀸𑀳𑀼𑀲𑀘𑁆𑀘𑀁 𑀯𑀻𑀭𑀺𑀬𑀁 𑀲𑀢𑀺 𑀧𑀜𑁆𑀜𑀸 𑀘. 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀦𑁆𑀢𑀺 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀤𑀝𑁆𑀞𑀩𑁆𑀩𑀢𑁄 𑀅𑀫𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀤𑀺𑀲𑀁 𑀕𑀘𑁆𑀙𑀢𑀺, 𑀇𑀫𑀺𑀦𑀸 𑀘 𑀘𑀭𑀡𑀸𑀦𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀅𑀭𑀺𑀬𑀫𑀕𑁆𑀕𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀏𑀓𑀁𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺𑀲𑁆𑀲𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀸𑀯𑀓𑀸𑀤𑀺𑀅𑀲𑀸𑀥𑀸𑀭𑀡𑀢𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀲𑀯𑀓𑁆𑀔𑀬𑀯𑀺𑀚𑁆𑀚𑀸𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀸 𑀲𑀺𑀚𑁆𑀛𑀢𑀺, 𑀘𑀭𑀡𑀥𑀫𑁆𑀫𑀪𑀽𑀢𑁂𑀲𑀼 𑀛𑀸𑀦𑁂𑀲𑀼 𑀅𑀦𑁆𑀢𑁄𑀕𑀥𑀸𑀬 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀯𑀲𑁂𑀦 𑀫𑀳𑀸𑀓𑀸𑀭𑀼𑀡𑀺𑀓𑀢𑀸 𑀲𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀯𑀺𑀚𑁆𑀚𑀸…𑀧𑁂… 𑀫𑀳𑀸𑀓𑀸𑀭𑀼𑀡𑀺𑀓𑀢’’𑀦𑁆𑀢𑀺. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀅𑀜𑁆𑀜𑁄𑀧𑀺 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑁄 𑀦𑀺𑀬𑁄𑀚𑁂𑀢𑀺, 𑀢𑀣𑀸 𑀅𑀬𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀅𑀦𑀢𑁆𑀣𑀧𑀭𑀺𑀯𑀚𑁆𑀚𑀦𑀅𑀢𑁆𑀣𑀦𑀺𑀬𑁄𑀚𑀦𑁂𑀦. 𑀅𑀢𑁆𑀢𑀦𑁆𑀢𑀧𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀦𑁆𑀢𑀧𑀉𑀪𑀬𑀦𑁆𑀢𑀧𑀸 𑀕𑀳𑀺𑀢𑀸. 𑀅𑀲𑀚𑁆𑀚𑀫𑀸𑀦𑁄 𑀪𑀯𑁂𑀲𑀼 𑀅𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄𑀢𑀺 𑀧𑀳𑀻𑀦𑀸𑀦𑀁 𑀧𑀼𑀦𑀸𑀦𑀼𑀧𑁆𑀧𑀢𑁆𑀢𑀺𑀢𑁄 𑀦 𑀧𑀼𑀦 𑀉𑀧𑀕𑀘𑁆𑀙𑀦𑁆𑀢𑁄.

𑀢𑀢𑁆𑀭𑀸𑀢𑀺 𑀬𑀼𑀢𑁆𑀢𑀯𑀸𑀘𑀸𑀪𑀸𑀲𑀦𑁂 𑀲𑀸𑀥𑁂𑀢𑀩𑁆𑀩𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀢𑁆𑀣𑀁. 𑀅𑀢𑀘𑁆𑀙𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀧𑀺𑀲𑀼𑀡𑀸𑀤𑀺𑀤𑁄𑀲𑀬𑀼𑀢𑁆𑀢𑀁. 𑀲𑀫𑁆𑀫𑀸𑀕𑀤𑀢𑁆𑀢𑀸𑀢𑀺 𑀲𑀼𑀦𑁆𑀤𑀭𑀯𑀘𑀦𑀢𑁆𑀢𑀸, 𑀕𑀤𑀦𑀁 𑀕𑀤𑁄, 𑀓𑀣𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀦𑁆𑀤𑀭𑁄 𑀕𑀤𑁄 𑀯𑀘𑀦𑀫𑀲𑁆𑀲𑀸𑀢𑀺 ‘‘𑀲𑀼𑀕𑀤𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀼𑀕𑀢𑁄’’𑀢𑀺 𑀯𑀼𑀢𑁆𑀢𑀁.

𑀲𑀪𑀸𑀯𑀢𑁄𑀢𑀺 𑀤𑀼𑀓𑁆𑀔𑀲𑀪𑀸𑀯𑀢𑁄. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑀁. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑀢𑁄 𑀆𑀳 𑀬𑀢𑁆𑀣𑀸𑀢𑀺𑀆𑀤𑀺. 𑀢𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀮𑁄𑀓𑀦𑁆𑀢𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂. 𑀢𑀦𑁆𑀢𑀺 𑀮𑁄𑀓𑀲𑁆𑀲𑀦𑁆𑀢𑀁, 𑀑𑀓𑀸𑀲𑀮𑁄𑀓𑁂 𑀓𑀸𑀬𑀕𑀫𑀦𑁂𑀦 𑀜𑀸𑀢𑀩𑁆𑀩𑀁 𑀧𑀢𑁆𑀢𑀩𑁆𑀩𑀦𑁆𑀢𑀺 𑀦𑀸𑀳𑀁 𑀯𑀤𑀸𑀫𑀻𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀘 𑀭𑁄𑀳𑀺𑀢𑀤𑁂𑀯𑀧𑀼𑀢𑁆𑀢𑁂𑀦 𑀮𑁄𑀓𑀲𑁆𑀲 𑀓𑀸𑀬𑀕𑀢𑀺𑀯𑀲𑁂𑀦 𑀅𑀦𑁆𑀢𑀕𑀫𑀦𑀲𑁆𑀲 𑀧𑀼𑀘𑁆𑀙𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀧𑁆𑀧𑀢𑁆𑀯𑀸 𑀮𑁄𑀓𑀲𑁆𑀲𑀦𑁆𑀢𑀦𑁆𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀓𑀺𑀦𑁆𑀢𑁂 𑀧𑀤𑀲𑀸 𑀑𑀓𑀸𑀲𑀮𑁄𑀓𑀧𑀭𑀺𑀩𑁆𑀪𑀫𑀦𑁂𑀦, 𑀧𑀭𑀺𑀫𑀺𑀢𑀝𑁆𑀞𑀸𑀦𑁂 𑀏𑀯 𑀢𑀁 𑀜𑀸𑀡𑀕𑀫𑀦𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀤𑀲𑁆𑀲𑁂𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀧𑀺 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂𑀢𑀺 𑀲𑀭𑀻𑀭𑁂. 𑀢𑁂𑀦 𑀭𑀽𑀧𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀲𑀲𑀜𑁆𑀜𑀺𑀫𑁆𑀳𑀻𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑁂. 𑀲𑀫𑀦𑀓𑁂𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀁. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀸𑀤𑀺𑀮𑁄𑀓𑀁, 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑁂𑀦 𑀮𑁄𑀓𑀲𑁆𑀲 𑀦𑀺𑀭𑀼𑀚𑁆𑀛𑀦𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸. 𑀅𑀤𑁂𑀲𑀫𑁆𑀧𑀺 𑀳𑀺 𑀦𑀺𑀩𑁆𑀩𑀸𑀦𑀁 𑀬𑁂𑀲𑀁 𑀦𑀺𑀭𑁄𑀥𑀸𑀬 𑀳𑁄𑀢𑀺, 𑀉𑀧𑀘𑀸𑀭𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀮𑁄𑀓𑀦𑀺𑀭𑁄𑀥𑀫𑁆𑀧𑀺 𑀧𑀜𑁆𑀜𑀧𑁂𑀫𑀻’’𑀢𑀺 𑀯𑀼𑀢𑁆𑀢𑀁, 𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁, 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁪𑁦𑁧; 𑀯𑀺𑀪. 𑁨𑁦𑁪) 𑀯𑀺𑀬. 𑀓𑀼𑀤𑀸𑀘𑀦𑀦𑁆𑀢𑀺 𑀓𑀤𑀸𑀘𑀺𑀧𑀺. 𑀅𑀧𑁆𑀧𑀢𑁆𑀯𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀅𑀦𑀥𑀺𑀕𑀦𑁆𑀢𑁆𑀯𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀁 𑀕𑀫𑀦𑁂𑀦 𑀧𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸. 𑀳𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀁𑀲𑀢𑁆𑀣𑁂 𑀯𑀸. 𑀮𑁄𑀓𑀯𑀺𑀤𑀽𑀢𑀺 𑀲𑀪𑀸𑀯𑀸𑀤𑀺𑀢𑁄 𑀔𑀦𑁆𑀥𑀸𑀤𑀺𑀚𑀸𑀦𑀦𑀓𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀅𑀪𑀺𑀲𑀫𑀺𑀢𑀢𑁆𑀢𑀸 𑀲𑀫𑀺𑀢𑀸𑀯𑀻, 𑀲𑀫𑀺𑀢𑀓𑀺𑀮𑁂𑀲𑁄𑀢𑀺 𑀯𑀸 𑀅𑀢𑁆𑀣𑁄. 𑀦𑀸𑀲𑀻𑀲𑀢𑀺 𑀦 𑀧𑀢𑁆𑀣𑁂𑀢𑀺 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸.

𑀏𑀯𑀁 𑀲𑀗𑁆𑀔𑁂𑀧𑀢𑁄 𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀧𑀺 𑀘 𑀢𑀬𑁄 𑀮𑁄𑀓𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑀲𑀦𑁆𑀢𑀸𑀦𑀪𑀽𑀢𑁄 𑀲𑀢𑁆𑀢𑀮𑁄𑀓𑁄. 𑀲𑁄 𑀳𑀺 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 ‘‘𑀲𑀢𑁆𑀢𑁄’’𑀢𑀺 𑀘, 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀓𑀺𑀮𑁂𑀲𑀸 𑀢𑀩𑁆𑀩𑀺𑀧𑀸𑀓𑀸 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀉𑀢𑀼𑀚𑀭𑀽𑀧𑀸𑀦𑀁 𑀲𑀫𑀽𑀳𑀲𑀦𑁆𑀢𑀸𑀦𑀪𑀽𑀢𑁄 𑀑𑀓𑀸𑀲𑀮𑁄𑀓𑁄. 𑀲𑁄 𑀳𑀺 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀆𑀥𑀸𑀭𑀢𑁄 ‘‘𑀑𑀓𑀸𑀲𑁄’’𑀢𑀺 𑀘, 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀢𑀲𑁆𑀲𑀸𑀥𑀸𑀭𑀸 𑀘 𑀆𑀥𑁂𑀬𑁆𑀬𑀪𑀽𑀢𑀸𑀢𑀺 ‘‘𑀮𑁄𑀓𑁄’’𑀢𑀺 𑀘 𑀧𑀯𑀼𑀘𑁆𑀘𑀢𑀺. 𑀇𑀦𑁆𑀤𑁆𑀭𑀺𑀬𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀧𑀦 𑀲𑀩𑁆𑀩𑁂𑀯 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀢𑀝𑁆𑀞𑁂𑀦 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀘 ‘‘𑀲𑀗𑁆𑀔𑀸𑀭𑀮𑁄𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀆𑀳𑀭𑀢𑀺 𑀅𑀢𑁆𑀢𑀦𑁄 𑀨𑀮𑀦𑁆𑀢𑀺 𑀆𑀳𑀸𑀭𑁄, 𑀧𑀘𑁆𑀘𑀬𑁄. 𑀢𑁂𑀦 𑀢𑀺𑀝𑁆𑀞𑀦𑀲𑀻𑀮𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀬𑀸𑀯 𑀪𑀗𑁆𑀕𑀸 𑀧𑀯𑀢𑁆𑀢𑀦𑀲𑀻𑀮𑀸𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸, 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑀸. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀘 𑀇𑀫𑀺𑀦𑀸𑀧𑀺 𑀯𑁂𑀦𑁂𑀬𑁆𑀬𑀸𑀦𑀼𑀭𑀽𑀧𑀢𑁄 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀤𑁂𑀲𑀦𑀸𑀬 𑀲𑀗𑁆𑀔𑀸𑀭𑀸𑀯 𑀕𑀳𑀺𑀢𑀸.

𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 𑀬𑀢𑁆𑀢𑀓𑁂 𑀞𑀸𑀦𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀯𑀺𑀭𑁄𑀘𑀦𑀸𑀢𑀺 𑀢𑁂𑀲𑀁 𑀯𑀺𑀭𑁄𑀘𑀦𑀳𑁂𑀢𑀼 𑀑𑀪𑀸𑀲𑀦𑀳𑁂𑀢𑀽𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀤𑀺𑀲𑀸 𑀪𑀦𑁆𑀢𑀻𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀬𑀸𑀯𑀢𑀸 𑀯𑀺𑀕𑀢𑀦𑁆𑀥𑀓𑀸𑀭𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀣 𑀯𑀸 𑀤𑀺𑀲𑀸𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀢𑀲𑁆𑀫𑀸 𑀯𑀺𑀭𑁄𑀘𑀫𑀸𑀦𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀬𑀢𑁆𑀢𑀓𑀸 𑀤𑀺𑀲𑀸 𑀪𑀦𑁆𑀢𑀺 𑀑𑀪𑀸𑀲𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄𑀢𑀺 𑀢𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀲𑀳𑀲𑁆𑀲𑀧𑁆𑀧𑀓𑀸𑀭𑁄 𑀑𑀓𑀸𑀲𑀮𑁄𑀓𑁄, 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂. 𑀯𑀲𑁄𑀢𑀺 𑀇𑀤𑁆𑀥𑀺𑀲𑀗𑁆𑀔𑀸𑀢𑁄 𑀯𑀲𑁄 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀢𑀫𑁆𑀧𑀻𑀢𑀺 𑀢𑀺𑀯𑀺𑀥𑀫𑁆𑀧𑀺 𑀮𑁄𑀓𑀁. 𑀅𑀲𑁆𑀲𑀸𑀢𑀺 𑀅𑀦𑁂𑀦 𑀪𑀕𑀯𑀢𑀸 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀲𑀩𑁆𑀩𑀣𑀸 𑀯𑀺𑀤𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄 𑀮𑁄𑀓𑁄𑀢𑀺 𑀬𑁆𑀯𑀸𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑁄 𑀢𑁂𑀦 𑀲𑀸𑀫𑀜𑁆𑀜𑁂𑀦 𑀲𑀗𑁆𑀔𑀸𑀭𑀮𑁄𑀓𑁄 𑀏𑀓𑁄 𑀏𑀓𑀯𑀺𑀥𑁄, 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀩𑁆𑀩𑀢𑁆𑀣𑀸𑀧𑀺 𑀮𑁄𑀓𑀺𑀬𑀥𑀫𑁆𑀫𑀸𑀯 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑀸 𑀮𑁄𑀓𑀼𑀢𑁆𑀢𑀭𑀸𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀢𑁆𑀢𑀸𑀪𑀸𑀯𑀸. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀢𑀣𑀸 𑀢𑀣𑀸 𑀲𑀫𑀼𑀧𑁆𑀧𑀦𑁆𑀦𑀸 𑀧𑀚𑀸𑀬𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀳𑁂𑀝𑁆𑀞𑀺𑀫𑀸 𑀘 𑀢𑀬𑁄 𑀆𑀭𑀼𑀧𑁆𑀧𑀸𑀢𑀺 𑀇𑀫𑀸 𑀲𑀢𑁆𑀢𑀯𑀺𑀥𑀸 𑀧𑀚𑀸𑀬𑁂𑀯 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀦𑀸𑀫. 𑀢𑀢𑁆𑀣 𑀦𑀸𑀦𑀢𑁆𑀢𑀁 𑀓𑀸𑀬𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀦𑀸𑀦𑀢𑁆𑀢𑀓𑀸𑀬𑀸. 𑀦𑀸𑀦𑀢𑁆𑀢𑀁 𑀲𑀜𑁆𑀜𑀸 𑀏𑀢𑁂𑀲𑀦𑁆𑀢𑀺 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄. 𑀲𑀜𑁆𑀜𑀸𑀲𑀻𑀲𑁂𑀦𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀕𑀳𑀺𑀢𑀁, 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀢𑀢𑁆𑀣 𑀲𑀩𑁆𑀩𑀫𑀦𑀼𑀲𑁆𑀲𑀸 𑀘 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸 𑀘 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫. 𑀢𑁂𑀲𑀜𑁆𑀳𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀢𑀸𑀬 𑀦𑀸𑀦𑀸 𑀓𑀸𑀬𑁄, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀘 𑀦𑀯𑀯𑀺𑀥𑀢𑀸𑀬 𑀦𑀸𑀦𑀸. 𑀢𑀻𑀲𑀼 𑀧𑀞𑀫𑀚𑁆𑀛𑀸𑀦𑀪𑀽𑀫𑀻𑀲𑀼 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀘𑁂𑀯 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸 𑀘 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫. 𑀢𑁂𑀲𑀼 𑀳𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀲𑀭𑀻𑀭𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀁, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀧𑀞𑀫𑀚𑁆𑀛𑀸𑀦𑀯𑀺𑀧𑀸𑀓𑀯𑀲𑁂𑀦 𑀏𑀓𑀸𑀯, 𑀢𑀣𑀸 𑀆𑀧𑀸𑀬𑀺𑀓𑀸𑀦𑀫𑁆𑀧𑀺, 𑀢𑁂𑀲𑀁 𑀧𑀦 𑀲𑀩𑁆𑀩𑁂𑀲𑀁 𑀅𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀸𑀯 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸. 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸 𑀘 𑀧𑀭𑀺𑀢𑁆𑀢𑀸𑀪 𑀅𑀧𑁆𑀧𑀫𑀸𑀡𑀸𑀪 𑀆𑀪𑀲𑁆𑀲𑀭𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀲𑀁 𑀏𑀓𑀧𑁆𑀧𑀫𑀸𑀡𑁄𑀯 𑀓𑀸𑀬𑁄, 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀯𑀺𑀧𑀸𑀓𑀯𑀲𑁂𑀦 𑀦𑀸𑀦𑀸 𑀳𑁄𑀢𑀺. 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁 𑀧𑀭𑀺𑀢𑁆𑀢𑀲𑀼𑀪𑀸𑀤𑀬𑁄 𑀢𑀬𑁄, 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑀁 𑀅𑀲𑀜𑁆𑀜𑀲𑀢𑁆𑀢𑀯𑀚𑁆𑀚𑀺𑀢𑀸 𑀯𑁂𑀳𑀧𑁆𑀨𑀮𑀸, 𑀧𑀜𑁆𑀘 𑀘 𑀲𑀼𑀤𑁆𑀥𑀸𑀯𑀸𑀲𑀸𑀢𑀺 𑀦𑀯𑀲𑀼 𑀪𑀽𑀫𑀻𑀲𑀼 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀦𑀸𑀫. 𑀆𑀪𑀸𑀦𑀸𑀦𑀢𑁆𑀢𑁂𑀦 𑀧𑀦 𑀲𑀩𑁆𑀩𑀢𑁆𑀣 𑀓𑀸𑀬𑀦𑀸𑀦𑀢𑁆𑀢𑀁 𑀦 𑀕𑀬𑁆𑀳𑀢𑀺, 𑀲𑀡𑁆𑀞𑀸𑀦𑀦𑀸𑀦𑀢𑁆𑀢𑁂𑀦𑁂𑀯 𑀕𑀬𑁆𑀳𑀢𑀻𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀸𑀪𑀸𑀯𑁂𑀦 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀦𑁆𑀢𑀺. 𑀦𑁂𑀯𑀲𑀜𑁆𑀜𑀸 𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀦 𑀬𑀣𑀸 𑀲𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀲𑀼𑀔𑀼𑀫𑀢𑁆𑀢𑀸 𑀦𑁂𑀯𑀯𑀺𑀜𑁆𑀜𑀸𑀡𑀁 𑀦𑀸𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀧𑀭𑀺𑀩𑁆𑀬𑀢𑁆𑀢𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀦𑁆𑀢𑁂𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦 𑀕𑀬𑁆𑀳𑀢𑀺. 𑀢𑀲𑁆𑀫𑀸 𑀲𑁂𑀲𑀸𑀦𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀦𑀺 𑀢𑀻𑀡𑀺𑀬𑁂𑀯 𑀕𑀳𑀺𑀢𑀸𑀦𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀇𑀫𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀝𑁆𑀞 𑀮𑁄𑀓𑀥𑀫𑁆𑀫𑀸𑀢𑀺 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀲𑀼𑀔𑀁 𑀤𑀼𑀓𑁆𑀔𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀮𑁄𑀓𑀲𑁆𑀲 𑀲𑀪𑀸𑀯𑀢𑁆𑀢𑀸 𑀮𑁄𑀓𑀥𑀫𑁆𑀫𑀸. 𑀮𑀸𑀪𑀸𑀮𑀸𑀪𑀸𑀤𑀺𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀸 𑀧𑀦𑁂𑀢𑁆𑀣 𑀅𑀦𑀼𑀭𑁄𑀥𑀯𑀺𑀭𑁄𑀥𑀸 𑀯𑀸 𑀮𑀸𑀪𑀸𑀤𑀺𑀲𑀤𑁆𑀤𑁂𑀳𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀯 𑀲𑀢𑁆𑀢𑀸𑀯𑀸𑀲𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀏𑀯 𑀅𑀲𑀜𑁆𑀜𑀲𑀢𑁆𑀢𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑁂𑀳𑀺 𑀲𑀤𑁆𑀥𑀺𑀁 ‘‘𑀦𑀯 𑀲𑀢𑁆𑀢𑀸𑀯𑀸𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀢𑁆𑀢𑀸 𑀆𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀢𑁆𑀢𑀸𑀯𑀸𑀲𑀸, 𑀲𑀢𑁆𑀢𑀦𑀺𑀓𑀸𑀬𑁄, 𑀅𑀢𑁆𑀣𑀢𑁄 𑀢𑀣𑀸 𑀧𑀯𑀢𑁆𑀢𑀸 𑀧𑀚𑀸 𑀏𑀯 𑀇𑀥 𑀲𑀗𑁆𑀔𑀸𑀭𑀮𑁄𑀓𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀸𑀬𑀢𑀦𑀸𑀦𑀻𑀢𑀺 𑀥𑀫𑁆𑀫𑀸𑀬𑀢𑀦𑀫𑀦𑀸𑀬𑀢𑀦𑀯𑀚𑁆𑀚𑀺𑀢𑀸𑀦𑀺 𑀤𑀲.

𑀏𑀢𑁆𑀣 𑀘 𑀢𑀻𑀲𑀼 𑀪𑀯𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀯𑀲𑁂𑀦 𑀢𑀺𑀲𑁆𑀲𑁄 𑀯𑁂𑀤𑀦𑀸𑀯 𑀮𑁄𑀓𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀣𑀸 𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀆𑀳𑀸𑀭𑀸. 𑀅𑀢𑁆𑀢𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀯𑀲𑁂𑀦 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑁂𑀯 𑀆𑀬𑀢𑀦𑀸𑀦𑀺. 𑀣𑀽𑀮𑀲𑀜𑁆𑀜𑀻𑀪𑀯𑀤𑀲𑁆𑀲𑀦𑀯𑀲𑁂𑀦 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀯, 𑀅𑀦𑀼𑀭𑁄𑀥𑀯𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀯𑀸, 𑀣𑀽𑀮𑀸𑀬𑀢𑀦𑀤𑀲𑁆𑀲𑀦𑀯𑀲𑁂𑀦 𑀤𑀲𑀸𑀬𑀢𑀦𑀸𑀦𑁂𑀯 𑀮𑁄𑀓𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀕𑀳𑀡𑁂𑀦𑁂𑀯 𑀢𑀦𑁆𑀦𑀺𑀲𑁆𑀲𑀬𑀢𑀧𑁆𑀧𑀝𑀺𑀩𑀤𑁆𑀥𑀸 𑀢𑀤𑀸𑀭𑀫𑁆𑀫𑀡𑀸 𑀲𑀩𑁆𑀩𑁂 𑀢𑁂𑀪𑀽𑀫𑀓𑀸 𑀦𑀸𑀫𑀭𑀽𑀧𑀥𑀫𑁆𑀫𑀸 𑀅𑀢𑁆𑀣𑀢𑁄 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀲𑁂𑀲𑁂𑀳𑀺 𑀧𑀦 𑀏𑀓𑀯𑀺𑀥𑀸𑀤𑀺𑀓𑁄𑀝𑁆𑀞𑀸𑀲𑁂𑀳𑀺 𑀲𑀭𑀽𑀧𑁂𑀦𑁂𑀯 𑀢𑁂 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀲𑀬𑀁 𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼 𑀆𑀳𑀘𑁆𑀘 𑀘𑀺𑀢𑁆𑀢𑀁 𑀏𑀢𑁆𑀣 𑀲𑁂𑀢𑀻𑀢𑀺 𑀆𑀲𑀬𑁄, 𑀅𑀜𑁆𑀜𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀺𑀢𑁆𑀯𑀸𑀧𑀺 𑀘𑀺𑀢𑁆𑀢𑀁 𑀬𑀢𑁆𑀣 𑀲𑀭𑀲𑁂𑀦 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀯𑀝𑁆𑀝𑀸𑀲𑀬𑁄 𑀯𑀺𑀯𑀝𑁆𑀝𑀸𑀲𑀬𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀯𑀝𑁆𑀝𑀸𑀲𑀬𑁄𑀧𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀯𑀲𑁂𑀦 𑀤𑀼𑀯𑀺𑀥𑁄. 𑀯𑀺𑀯𑀝𑁆𑀝𑀸𑀲𑀬𑁄 𑀧𑀦 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸 𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀺, 𑀫𑀕𑁆𑀕𑀲𑀗𑁆𑀔𑀸𑀢𑀁 𑀬𑀣𑀸𑀪𑀽𑀢𑀜𑀸𑀡𑀜𑁆𑀘𑀸𑀢𑀺 𑀤𑀼𑀯𑀺𑀥𑁄. 𑀬𑀣𑀸𑀳 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀁;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀤𑁆𑀤𑀺𑀢’’𑀦𑁆𑀢𑀺. (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸);

𑀏𑀢𑀁 𑀤𑀼𑀯𑀺𑀥𑀫𑁆𑀧𑀺 𑀆𑀲𑀬𑀁 𑀲𑀢𑁆𑀢𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀪𑀕𑀯𑀸 𑀲𑀩𑁆𑀩𑀣𑀸 𑀚𑀸𑀦𑀸𑀢𑀺. 𑀅𑀦𑀼𑀲𑀬𑀦𑁆𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀁 𑀅𑀦𑀼𑀲𑀬𑀁. 𑀘𑀭𑀺𑀢𑀦𑁆𑀢𑀺 ‘‘𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢’’𑀦𑁆𑀢𑀺 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁. 𑀅𑀣 𑀯𑀸 𑀘𑀭𑀺𑀢𑀦𑁆𑀢𑀺 𑀘𑀭𑀺𑀬𑀸, 𑀢𑁂 𑀭𑀸𑀕𑀸𑀤𑀬𑁄 𑀙 𑀫𑀽𑀮𑀘𑀭𑀺𑀬𑀸, 𑀲𑀁𑀲𑀕𑁆𑀕𑀲𑀦𑁆𑀦𑀺𑀧𑀸𑀢𑀯𑀲𑁂𑀦 𑀅𑀦𑁂𑀓𑀯𑀺𑀥𑀸 𑀳𑁄𑀦𑁆𑀢𑀺. 𑀅𑀥𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼𑀁, 𑀢𑀢𑁆𑀣 𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑀼𑀘𑀺𑀯𑀲𑁂𑀦 𑀦𑀺𑀦𑁆𑀦𑀢𑀸, 𑀲𑀸 𑀤𑀼𑀯𑀺𑀥𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀻𑀢𑀺. 𑀬𑀸𑀬 𑀤𑀼𑀲𑁆𑀲𑀻𑀮𑀸𑀤𑀺𑀓𑁂 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂 𑀲𑁂𑀯𑀦𑁆𑀢𑀺, 𑀲𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺. 𑀬𑀸𑀬 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂 𑀲𑁂𑀯𑀦𑁆𑀢𑀺, 𑀲𑀸 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺. 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀅𑀥𑀺𑀫𑀼𑀢𑁆𑀢𑀺𑀁 𑀪𑀕𑀯𑀸 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺. 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀭𑀚𑀓𑁆𑀔𑀸, 𑀅𑀦𑀼𑀲𑁆𑀲𑀤𑀭𑀸𑀕𑀸𑀤𑀺𑀤𑁄𑀲𑀸. 𑀉𑀲𑁆𑀲𑀤𑀭𑀸𑀕𑀸𑀤𑀺𑀤𑁄𑀲𑀸 𑀫𑀳𑀸𑀭𑀚𑀓𑁆𑀔𑀸. 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀳𑀺 𑀢𑀺𑀓𑁆𑀔𑁂𑀳𑀺 𑀲𑀤𑁆𑀥𑀸𑀤𑀺𑀇𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀓𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸 𑀫𑀼𑀤𑀺𑀦𑁆𑀤𑁆𑀭𑀺𑀬𑀸 𑀘. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀆𑀲𑀬𑀸𑀤𑀻𑀳𑀺 𑀲𑀼𑀦𑁆𑀤𑀭𑁂𑀳𑀺 𑀅𑀲𑀼𑀦𑁆𑀤𑀭𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀸 𑀲𑁆𑀯𑀸𑀓𑀸𑀭𑀸 𑀤𑁆𑀯𑀸𑀓𑀸𑀭𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀼𑀓𑀭𑀸 𑀲𑀼𑀯𑀺𑀜𑁆𑀜𑀸𑀧𑀬𑀸, 𑀯𑀺𑀧𑀭𑀻𑀢𑀸 𑀤𑀼𑀯𑀺𑀜𑁆𑀜𑀸𑀧𑀬𑀸. 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀪𑀩𑁆𑀩𑀸, 𑀯𑀺𑀧𑀭𑀻𑀢𑀸 𑀅𑀪𑀩𑁆𑀩𑀸. 𑀏𑀯𑀁 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀥𑀫𑁆𑀫𑀯𑀺𑀲𑁂𑀲𑀚𑀸𑀦𑀦𑁂𑀦𑁂𑀯 𑀲𑀢𑁆𑀢𑀮𑁄𑀓𑁄𑀧𑀺 𑀯𑀺𑀤𑀺𑀢𑁄 𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀅𑀪𑀸𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀓𑀁 𑀘𑀓𑁆𑀓𑀯𑀸𑀴𑀁…𑀧𑁂… 𑀧𑀜𑁆𑀜𑀸𑀲𑀜𑁆𑀘 𑀬𑁄𑀚𑀦𑀸𑀦𑀻𑀢𑀺 𑀏𑀢𑁆𑀣 𑀳𑁄𑀢𑀻𑀢𑀺 𑀲𑁂𑀲𑁄. 𑀧𑀭𑀺𑀓𑁆𑀔𑁂𑀧𑀢𑁄 𑀧𑀫𑀸𑀡𑀁 𑀯𑀼𑀘𑁆𑀘𑀢𑀻𑀢𑀺 𑀲𑁂𑀲𑁄. 𑀘𑀓𑁆𑀓𑀯𑀸𑀴𑀲𑁆𑀲 𑀲𑀩𑁆𑀩𑀁 𑀧𑀭𑀺𑀫𑀡𑁆𑀟𑀮𑀁 𑀙𑀢𑁆𑀢𑀺𑀁𑀲 𑀲𑀢𑀲𑀳𑀲𑁆𑀲𑀸𑀦𑀺…𑀧𑁂… 𑀲𑀢𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀘𑀓𑁆𑀓𑀯𑀸𑀴𑁂, 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘 𑀬𑁄𑀚𑀦𑀸𑀦𑀺 𑀬𑀸𑀦𑀺 𑀏𑀢𑁆𑀢𑀓𑀁 𑀏𑀢𑁆𑀢𑀓𑀧𑁆𑀧𑀫𑀸𑀡𑀁 𑀩𑀳𑀮𑀢𑁆𑀢𑁂𑀦 𑀅𑀬𑀁 𑀯𑀲𑀼𑀦𑁆𑀥𑀭𑀸 𑀲𑀗𑁆𑀔𑀸𑀢𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀏𑀢𑁆𑀢𑀓𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀦𑁆𑀥𑀸𑀭𑀓𑀁 𑀚𑀮𑀁 𑀏𑀢𑁆𑀢𑀓𑀁 𑀏𑀢𑁆𑀢𑀓𑀧𑁆𑀧𑀫𑀸𑀡𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀘𑀓𑁆𑀓𑀯𑀸𑀴𑁂. 𑀅𑀚𑁆𑀛𑁄𑀕𑀸𑀴𑁆𑀳𑀼𑀕𑁆𑀕𑀢𑀸𑀢𑀺 𑀅𑀚𑁆𑀛𑁄𑀕𑀸𑀴𑁆𑀳𑀸 𑀘 𑀉𑀕𑁆𑀕𑀢𑀸 𑀘. 𑀩𑁆𑀭𑀳𑀸𑀢𑀺 𑀫𑀳𑀦𑁆𑀢𑀸. 𑀬𑁄𑀚𑀦𑀸𑀦𑀁 𑀲𑀢𑀸𑀦𑀼𑀘𑁆𑀘𑁄, 𑀳𑀺𑀫𑀯𑀸 𑀧𑀜𑁆𑀘𑀸𑀢𑀺 𑀬𑁄𑀚𑀦𑀸𑀦𑀁 𑀧𑀜𑁆𑀘𑀲𑀢𑀸𑀦𑀺 𑀉𑀘𑁆𑀘𑁄 𑀉𑀩𑁆𑀩𑁂𑀥𑁄. 𑀢𑀺𑀧𑀜𑁆𑀘𑀬𑁄𑀚𑀦𑀓𑁆𑀔𑀦𑁆𑀥𑀧𑀭𑀺𑀓𑁆𑀔𑁂𑀧𑀸𑀢𑀺 𑀧𑀦𑁆𑀦𑀭𑀲𑀬𑁄𑀚𑀦𑀧𑁆𑀧𑀫𑀸𑀡𑀓𑁆𑀔𑀦𑁆𑀥𑀧𑀭𑀺𑀡𑀸𑀳𑀸. 𑀦𑀕𑀯𑁆𑀳𑀬𑀸𑀢𑀺 𑀭𑀼𑀓𑁆𑀔𑀸𑀪𑀺𑀥𑀸𑀦𑀸 𑀚𑀫𑁆𑀩𑀽𑀢𑀺 𑀬𑁄𑀚𑀦𑀸. 𑀲𑀫𑀦𑁆𑀢𑀢𑁄𑀢𑀺 𑀲𑀩𑁆𑀩𑀲𑁄𑀪𑀸𑀕𑁂𑀦, 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀲𑀢𑀬𑁄𑀚𑀦𑀯𑀺𑀢𑁆𑀣𑀸𑀭𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲𑀸𑀦𑀼𑀪𑀸𑀯𑁂𑀦𑀸𑀢𑀺 𑀬𑀲𑁆𑀲𑀸 𑀫𑀳𑀦𑁆𑀢𑀢𑀸𑀓𑀧𑁆𑀧𑀝𑁆𑀞𑀸𑀬𑀺𑀓𑀸𑀤𑀺𑀧𑁆𑀧𑀓𑀸𑀭𑁂𑀦 𑀧𑀪𑀸𑀯𑁂𑀦. 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀩𑁆𑀩𑀁, 𑀮𑁄𑀓𑀥𑀸𑀢𑀼𑀫𑀬𑀁 𑀞𑀺𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄 𑀞𑀺𑀢𑁄, 𑀅𑀬𑀁 𑀏𑀓𑀸 𑀮𑁄𑀓𑀥𑀸𑀢𑀼 𑀦𑀸𑀫𑀸𑀢𑀺 𑀅𑀢𑁆𑀣𑁄, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀣 𑀯𑀸 𑀢𑀁 𑀲𑀩𑁆𑀩𑀁 𑀮𑁄𑀓𑀥𑀸𑀢𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀬𑀁 𑀘𑀓𑁆𑀓𑀯𑀸𑀴𑀲𑀺𑀮𑀼𑀘𑁆𑀘𑀬𑁄 𑀞𑀺𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀮𑁄𑀓𑀥𑀸𑀢𑀼𑀬𑀁. 𑀢𑀸𑀯𑀢𑀺𑀁𑀲𑀪𑀯𑀦𑀦𑁆𑀢𑀺 𑀢𑀺𑀤𑀲𑀧𑀼𑀭𑀁. 𑀅𑀲𑀼𑀭𑀪𑀯𑀦𑀦𑁆𑀢𑀺 𑀅𑀲𑀼𑀭𑀧𑀼𑀭𑀁. 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀘 𑀢𑀣𑀸 𑀤𑀲𑀲𑀳𑀲𑁆𑀲𑀬𑁄𑀚𑀦𑁄, 𑀲𑁄 𑀧𑀦 𑀘𑀢𑀼𑀦𑁆𑀦𑀁 𑀮𑁄𑀳𑀪𑀺𑀢𑁆𑀢𑀻𑀦𑀫𑀦𑁆𑀢𑀭𑀸 𑀬𑁄𑀚𑀦𑀲𑀢𑀸𑀬𑀸𑀫𑀯𑀺𑀢𑁆𑀣𑀸𑀭𑁄𑀧𑀺 𑀲𑀫𑀦𑁆𑀢𑀸 𑀲𑁄𑀴𑀲𑀳𑀺 𑀉𑀲𑁆𑀲𑀤𑀦𑀺𑀭𑀬𑁂𑀳𑀺 𑀲𑀤𑁆𑀥𑀺𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀤𑀦𑀦𑁆𑀢𑀭𑁂𑀲𑀽𑀢𑀺 𑀢𑁂𑀲𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂𑀲𑀼. 𑀮𑁄𑀓𑀸𑀦𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂 𑀯𑀺𑀯𑀭𑁂 𑀪𑀯𑀢𑁆𑀢𑀸 𑀮𑁄𑀓𑀦𑁆𑀢𑀭𑀺𑀓𑀸. 𑀢𑀺𑀡𑁆𑀡𑀜𑁆𑀳𑀺 𑀲𑀓𑀝𑀘𑀓𑁆𑀓𑀸𑀦𑀁 𑀧𑀢𑁆𑀢𑀸𑀦𑀁 𑀯𑀸 𑀆𑀲𑀦𑁆𑀦𑀝𑁆𑀞𑀧𑀺𑀢𑀸𑀦𑀁 𑀅𑀦𑁆𑀢𑀭𑀲𑀤𑀺𑀲𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂𑀲𑀼 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁄 𑀲𑀻𑀢𑀦𑀭𑀓𑁄 𑀲𑀢𑁆𑀢𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀦𑀦𑁆𑀢𑀸𑀦𑀻𑀢𑀺 𑀢𑀺𑀭𑀺𑀬𑀁 𑀅𑀝𑁆𑀞𑀲𑀼 𑀤𑀺𑀲𑀸𑀲𑀼 𑀘𑀓𑁆𑀓𑀯𑀸𑀴𑀸𑀦𑀺 𑀆𑀓𑀸𑀲𑁄 𑀯𑀺𑀬 𑀅𑀦𑀦𑁆𑀢𑀸𑀦𑀺. 𑀉𑀤𑁆𑀥𑀁 𑀧𑀦 𑀅𑀥𑁄 𑀘 𑀅𑀦𑁆𑀢𑀸𑀦𑁂𑀯. 𑀅𑀦𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑁂𑀦𑀸𑀢𑀺 𑀏𑀢𑁆𑀣 𑀅𑀦𑀦𑁆𑀢𑀜𑁂𑀬𑁆𑀬𑀧𑀝𑀺𑀯𑁂𑀥𑀲𑀸𑀫𑀢𑁆𑀣𑀺𑀬𑀬𑁄𑀕𑀢𑁄𑀯 𑀜𑀸𑀡𑀁 ‘‘𑀅𑀦𑀦𑁆𑀢’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀢𑀦𑁄𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀸𑀫𑀺𑀯𑀘𑀦𑀫𑁂𑀢𑀁, 𑀅𑀢𑁆𑀢𑀢𑁄𑀢𑀺 𑀅𑀢𑁆𑀣𑁄. 𑀕𑀼𑀡𑁂𑀳𑀺 𑀅𑀢𑁆𑀢𑀦𑁄 𑀯𑀺𑀲𑀺𑀝𑁆𑀞𑀢𑀭𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀭𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀅𑀦𑀼𑀢𑁆𑀢𑀭𑁄𑀢𑀺 𑀧𑀤𑀲𑁆𑀲 𑀅𑀢𑁆𑀣𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑀁, 𑀦 𑀯𑀺𑀲𑀺𑀝𑁆𑀞𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀺𑀢𑀸𑀬. 𑀲𑀤𑁂𑀯𑀓𑁂 𑀳𑀺 𑀮𑁄𑀓𑁂 𑀲𑀤𑀺𑀲𑀓𑀧𑁆𑀧𑁄𑀧𑀺 𑀦𑀸𑀫 𑀓𑁄𑀘𑀺 𑀢𑀣𑀸𑀕𑀢𑀲𑁆𑀲 𑀦𑀢𑁆𑀣𑀺, 𑀓𑀼𑀢𑁄 𑀲𑀤𑀺𑀲𑁄, 𑀢𑁂𑀦𑀸𑀳 𑀲𑀻𑀮𑀕𑀼𑀡𑁂𑀦𑀸𑀧𑀺 𑀅𑀲𑀫𑁄𑀢𑀺𑀆𑀤𑀺. 𑀢𑀢𑁆𑀣 𑀅𑀲𑀫𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀲𑀫𑁄 𑀅𑀲𑀫𑀲𑀫𑁄. 𑀦𑀢𑁆𑀣𑀺 𑀧𑀝𑀺𑀫𑀸 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀫𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀉𑀧𑀫𑀸𑀫𑀢𑁆𑀢𑀁 𑀧𑀝𑀺𑀫𑀸, 𑀲𑀤𑀺𑀲𑀽𑀧𑀫𑀸 𑀧𑀝𑀺𑀪𑀸𑀕𑁄. 𑀬𑀼𑀕𑀕𑁆𑀕𑀸𑀳𑀯𑀲𑁂𑀦 𑀞𑀺𑀢𑁄 𑀧𑀝𑀺𑀫𑁄 𑀧𑀼𑀕𑁆𑀕𑀮𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀢𑁄. 𑀧𑀼𑀭𑀺𑀲𑀤𑀫𑁆𑀫𑁂𑀢𑀺𑀆𑀤𑀻𑀲𑀼 𑀤𑀫𑀺𑀢𑀩𑁆𑀩𑀸 𑀤𑀫𑁆𑀫𑀸, ‘‘𑀤𑀫𑁆𑀫𑀧𑀼𑀭𑀺𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑀁 𑀓𑀢𑁆𑀯𑀸 ‘‘𑀧𑀼𑀭𑀺𑀲𑀤𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁, 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀯𑀲𑁂𑀦 𑀇𑀢𑁆𑀣𑀻𑀦𑀫𑁆𑀧𑀺 𑀤𑀫𑁂𑀢𑀩𑁆𑀩𑀢𑁄. 𑀦𑀺𑀩𑁆𑀩𑀺𑀲𑀸 𑀓𑀢𑀸 𑀤𑁄𑀲𑀯𑀺𑀲𑀲𑁆𑀲 𑀯𑀺𑀦𑁄𑀤𑀦𑁂𑀦. 𑀅𑀢𑁆𑀣𑀧𑀤𑀦𑁆𑀢𑀺 𑀅𑀢𑁆𑀣𑀸𑀪𑀺𑀩𑁆𑀬𑀜𑁆𑀚𑀦𑀓𑀁 𑀧𑀤𑀁, 𑀯𑀸𑀓𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀧𑀤𑀪𑀸𑀯𑁂𑀦 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀢𑁆𑀣𑀼 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀢𑁂𑀦𑀸𑀳 𑀪𑀕𑀯𑀸 𑀳𑀻𑀢𑀺𑀆𑀤𑀺. 𑀅𑀝𑁆𑀞 𑀤𑀺𑀲𑀸𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀅𑀲𑀚𑁆𑀚𑀫𑀸𑀦𑀸𑀢𑀺 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀦𑀺𑀲𑁆𑀲𑀗𑁆𑀕𑀘𑀸𑀭𑀸.

𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁄, 𑀇𑀥𑀮𑁄𑀓𑀢𑁆𑀣𑁄. 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑀸𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑁄, 𑀧𑀭𑀮𑁄𑀓𑀢𑁆𑀣𑁄. 𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀦𑀺𑀩𑁆𑀩𑀸𑀦𑀁. 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀢𑁆𑀣𑁄, 𑀪𑀡𑁆𑀟𑀫𑀽𑀮𑁂𑀦 𑀯𑀸𑀡𑀺𑀚𑁆𑀚𑀸𑀬 𑀤𑁂𑀲𑀦𑁆𑀢𑀭𑀁 𑀕𑀘𑁆𑀙𑀦𑁆𑀢𑁄 𑀚𑀦𑀲𑀫𑀽𑀳𑁄. 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀢𑁆𑀣𑀸, 𑀲𑀢𑁆𑀣𑀯𑀸𑀳𑁄𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀲𑁄 𑀯𑀺𑀬 𑀪𑀕𑀯𑀸𑀢𑀺 𑀆𑀳 ‘‘𑀲𑀢𑁆𑀣𑀸, 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀦𑀺𑀤𑁆𑀤𑁂𑀲𑀧𑀸𑀴𑀺𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 𑀬𑀣𑀸 𑀲𑀢𑁆𑀣𑀯𑀸𑀳𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑁆𑀣𑁂𑀢𑀺 𑀲𑀢𑁆𑀣𑀺𑀓𑁂 𑀚𑀦𑁂. 𑀓𑀁 𑀉𑀤𑀓𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑁄 𑀅𑀭𑀜𑁆𑀜𑀧𑁆𑀧𑀤𑁂𑀲𑁄. 𑀘𑁄𑀭𑀸𑀤𑀻𑀳𑀺 𑀅𑀥𑀺𑀝𑁆𑀞𑀺𑀢𑀅𑀭𑀜𑁆𑀜𑀧𑁆𑀧𑀤𑁂𑀲𑀸𑀧𑀺 𑀤𑀼𑀕𑁆𑀕𑀫𑀦𑀝𑁆𑀞𑁂𑀦 𑀢𑀁𑀲𑀤𑀺𑀲𑀢𑀸𑀬 𑀓𑀦𑁆𑀢𑀸𑀭𑀸𑀢𑁆𑀯𑁂𑀯 𑀦𑀺𑀭𑀼𑀴𑁆𑀳𑀸𑀢𑀺 𑀲𑀸𑀫𑀜𑁆𑀜𑀢𑁄 ‘‘𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀯𑀭𑀦𑁆𑀢𑁄 𑀘𑁄𑀭𑀓𑀦𑁆𑀢𑀸𑀭𑀦𑁆𑀢𑀺𑀆𑀤𑀺𑀫𑀸𑀳.

𑀪𑀕𑀯𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀸𑀫𑀺𑀯𑀘𑀦𑀁, 𑀪𑀕𑀯𑀦𑁆𑀢𑀢𑁄 𑀥𑀫𑁆𑀫𑀲𑁆𑀲𑀯𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸 ‘‘𑀉𑀧𑀚𑁆𑀛𑀸𑀬𑀢𑁄 𑀅𑀚𑁆𑀛𑁂𑀢𑀻’’𑀢𑀺, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂𑀢𑀺 𑀯𑀸 𑀅𑀢𑁆𑀣𑁄. 𑀲𑀭𑁂 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀻𑀢𑀺 𑀧𑀼𑀩𑁆𑀩𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀲𑀼 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀧𑀭𑀺𑀘𑀬𑁂𑀦 ‘‘𑀥𑀫𑁆𑀫𑁄 𑀏𑀲𑁄 𑀯𑀼𑀘𑁆𑀘𑀢𑀻’’𑀢𑀺 𑀲𑀭𑁂 𑀆𑀓𑀸𑀭𑀁 𑀕𑀡𑁆𑀳𑀺. 𑀧𑀼𑀩𑁆𑀩𑀸𑀪𑀺𑀬𑁄𑀕𑀯𑀲𑁂𑀦𑁂𑀯 𑀳𑀺 𑀈𑀤𑀺𑀲𑀸𑀦𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀲𑀼 𑀧𑀲𑀸𑀤𑁄 𑀉𑀧𑁆𑀧𑀚𑁆𑀚𑀢𑀺 𑀯𑀕𑁆𑀕𑀼𑀮𑀺𑀆𑀤𑀻𑀦𑀁 𑀯𑀺𑀬. 𑀇𑀢𑀭𑀣𑀸 𑀲𑀩𑁆𑀩𑀢𑀺𑀭𑀘𑁆𑀙𑀸𑀦𑀸𑀦𑀫𑁆𑀧𑀺 𑀢𑀣𑀸 𑀧𑀲𑀸𑀤𑀼𑀧𑁆𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄. 𑀬𑀤𑀺 𑀳𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀪𑀕𑀯𑀸 𑀅𑀦𑀦𑁆𑀢𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀲𑀢𑁆𑀢𑀸𑀦𑀫𑁆𑀧𑀺 𑀏𑀓𑀓𑁆𑀔𑀡𑁂 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀥𑀫𑁆𑀫𑀁 𑀲𑀸𑀯𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀫𑁆𑀧𑀺 𑀇𑀢𑁄 𑀧𑀼𑀩𑁆𑀩𑁂𑀯 𑀯𑀺𑀫𑀼𑀢𑁆𑀢𑀺𑀧𑁆𑀧𑀲𑀗𑁆𑀕𑁄 𑀲𑀺𑀬𑀸. 𑀬𑁂 𑀧𑀦 𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀧𑀓𑀢𑀺𑀬𑀸𑀯 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀸𑀤𑀺𑀬𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀢𑁂𑀬𑁂𑀯 𑀧𑀼𑀩𑁆𑀩𑁂 𑀅𑀦𑀼𑀧𑀦𑀺𑀲𑁆𑀲𑀬𑀸𑀧𑀺 𑀪𑀕𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀦𑀸 𑀧𑀞𑀫𑀁 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀇𑀢𑀭𑁂𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀭𑁂 𑀅𑀳𑀫𑁆𑀧𑀺 𑀦𑀸𑀫𑀸𑀢𑀺 𑀏𑀢𑁆𑀣 ‘‘𑀓𑀼𑀢𑁄𑀳𑀁 𑀇𑀥 𑀦𑀺𑀩𑁆𑀩𑀢𑁆𑀢𑁄𑀢𑀺 𑀑𑀮𑁄𑀓𑁂𑀢𑁆𑀯𑀸 𑀫𑀡𑁆𑀟𑀽𑀓𑀪𑀸𑀯𑀢𑁄𑀢𑀺 𑀜𑀢𑁆𑀯𑀸’’𑀢𑀺 𑀇𑀤𑀁 𑀏𑀢𑁆𑀢𑀓𑀫𑁆𑀧𑀺 𑀅𑀭𑁂 𑀅𑀳𑀫𑁆𑀧𑀺 𑀦𑀸𑀫𑀸𑀢𑀺 𑀯𑀺𑀫𑁆𑀳𑀬𑀯𑀘𑀦𑁂𑀦𑁂𑀯 𑀲𑀺𑀚𑁆𑀛𑀢𑀻𑀢𑀺 𑀅𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀮𑀦𑁆𑀢𑀺 𑀚𑀮𑀦𑁆𑀢𑁄 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀫𑀡𑁆𑀟𑀽𑀓𑁄𑀳𑀦𑁆𑀢𑀺 𑀕𑀸𑀣𑀸𑀬 𑀉𑀤𑀓𑁂𑀢𑀺 𑀲𑀜𑁆𑀚𑀸𑀢𑀝𑁆𑀞𑀸𑀦𑀤𑀲𑁆𑀲𑀦𑀁, 𑀢𑁂𑀦 𑀣𑀮𑀫𑀡𑁆𑀟𑀽𑀓𑀢𑀸 𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺. 𑀉𑀤𑀓𑁂 𑀚𑀸𑀢𑀸𑀦𑀫𑁆𑀧𑀺 𑀓𑀘𑁆𑀙𑀧𑀸𑀤𑀻𑀦𑀁 𑀣𑀮𑀕𑁄𑀘𑀭𑀢𑀸𑀧𑀺 𑀅𑀢𑁆𑀣𑀻𑀢𑀺 𑀢𑀁 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀸𑀭𑀺𑀕𑁄𑀘𑀭𑁄’’𑀢𑀺 𑀯𑀼𑀢𑁆𑀢𑀁, 𑀉𑀤𑀓𑀲𑀜𑁆𑀘𑀸𑀭𑀻𑀢𑀺 𑀅𑀢𑁆𑀣𑁄.

𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀜𑀸𑀡𑀯𑀲𑁂𑀦𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑁄 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑁄𑀓𑁆𑀔𑁄, 𑀅𑀕𑁆𑀕𑀫𑀕𑁆𑀕𑁄, 𑀢𑀲𑁆𑀲 𑀅𑀦𑁆𑀢𑁄, 𑀅𑀕𑁆𑀕𑀨𑀮𑀁, 𑀢𑀢𑁆𑀣 𑀪𑀯𑀁 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀜𑀸𑀡𑀁. 𑀇𑀤𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑀢𑁄 𑀩𑀼𑀤𑁆𑀥𑀧𑀤𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀬𑀲𑁆𑀫𑀸 𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀤𑁂𑀦 𑀳𑀺 𑀲𑀢𑁆𑀣𑀼 𑀧𑀝𑀺𑀯𑁂𑀥𑀜𑀸𑀡𑀸𑀦𑀼𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀧𑀦 𑀩𑀼𑀤𑁆𑀥𑀧𑀤𑁂𑀦 𑀤𑁂𑀲𑀦𑀸𑀜𑀸𑀡𑀸𑀦𑀼𑀪𑀸𑀯𑁄𑀧𑀺, 𑀢𑁂𑀦𑀸𑀳 𑀅𑀜𑁆𑀜𑁂𑀧𑀺 𑀲𑀢𑁆𑀢𑁂 𑀩𑁄𑀥𑁂𑀲𑀻𑀢𑀺𑀆𑀤𑀺.

𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀲𑁆𑀲 𑀢𑀢𑁄 𑀏𑀯 𑀲𑀩𑁆𑀩𑀲𑀢𑁆𑀢𑁂𑀳𑀺 𑀉𑀢𑁆𑀢𑀫𑀲𑁆𑀲 𑀕𑀭𑀼𑀦𑁄 𑀕𑀸𑀭𑀯𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀯𑀘𑀦𑀫𑀺𑀤𑀁 𑀪𑀕𑀯𑀸𑀢𑀺. 𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀭𑀼𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀏𑀢𑁆𑀣 𑀕𑀭𑀼𑀪𑀸𑀯𑁄 𑀕𑀸𑀭𑀯𑀁, 𑀕𑀭𑀼𑀕𑀼𑀡𑀬𑁄𑀕𑀢𑁄 𑀕𑀭𑀼𑀓𑀭𑀡𑀁 𑀯𑀸 𑀕𑀸𑀭𑀯𑀁, 𑀢𑁂𑀦 𑀲𑀸𑀯𑀓𑀸𑀤𑀻𑀦𑀁 𑀅𑀲𑀸𑀥𑀸𑀭𑀡𑀢𑀸𑀬 𑀕𑀭𑀼𑀪𑀽𑀢𑁂𑀦 𑀫𑀳𑀦𑁆𑀢𑁂𑀦 𑀕𑀸𑀭𑀯𑁂𑀦 𑀬𑀼𑀢𑁆𑀢𑁄𑀢𑀺 𑀕𑀭𑀼𑀕𑀸𑀭𑀯𑀬𑀼𑀢𑁆𑀢𑁄. 𑀅𑀣 𑀯𑀸 𑀕𑀭𑀼 𑀘 𑀲𑀩𑁆𑀩𑀮𑁄𑀓𑀲𑁆𑀲 𑀲𑀺𑀓𑁆𑀔𑀓𑀢𑁆𑀢𑀸 𑀢𑁂𑀦𑁂𑀯 𑀕𑀸𑀭𑀯𑀬𑀼𑀢𑁆𑀢𑁄 𑀘𑀸𑀢𑀺𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀅𑀯𑀢𑁆𑀣𑀸𑀬 𑀯𑀺𑀤𑀺𑀢𑀁 𑀆𑀯𑀢𑁆𑀣𑀺𑀓𑀁. 𑀏𑀯𑀁 𑀮𑀺𑀗𑁆𑀕𑀺𑀓𑀁. 𑀦𑀺𑀫𑀺𑀢𑁆𑀢𑀢𑁄 𑀆𑀕𑀢𑀁 𑀦𑁂𑀫𑀺𑀢𑁆𑀢𑀺𑀓𑀁. 𑀅𑀥𑀺𑀘𑁆𑀘 𑀬𑀁𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀅𑀥𑀺𑀯𑀘𑀦𑀯𑀲𑁂𑀦 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀢𑁂𑀦𑀸𑀳 ‘‘𑀯𑀘𑀦𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺. 𑀬𑀤𑀺𑀘𑁆𑀙𑀸𑀬 𑀆𑀕𑀢𑀁 𑀬𑀸𑀤𑀺𑀘𑁆𑀙𑀓𑀁. 𑀏𑀢𑁆𑀣 𑀘 𑀩𑀸𑀳𑀺𑀭𑀁 𑀤𑀡𑁆𑀟𑀸𑀤𑀺 𑀮𑀺𑀗𑁆𑀕𑀁, 𑀅𑀩𑁆𑀪𑀦𑁆𑀢𑀭𑀁 𑀢𑁂𑀯𑀺𑀚𑁆𑀚𑀸𑀤𑀺 𑀦𑀺𑀫𑀺𑀢𑁆𑀢𑀁. 𑀧𑀘𑀼𑀭𑀚𑀦𑀯𑀺𑀲𑀬𑀁 𑀯𑀸 𑀤𑀺𑀲𑁆𑀲𑀫𑀸𑀦𑀁 𑀮𑀺𑀗𑁆𑀕𑀁, 𑀢𑀩𑁆𑀩𑀺𑀧𑀭𑀻𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁆𑀙𑀺𑀓𑀸𑀧𑀜𑁆𑀜𑀢𑁆𑀢𑀻𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀸 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀲𑀘𑁆𑀙𑀺𑀓𑀸𑀧𑀜𑁆𑀜𑀢𑁆𑀢𑀻𑀢𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀸 𑀧𑀜𑁆𑀜𑀢𑁆𑀢𑀺. 𑀬𑀁𑀕𑀼𑀡𑀦𑀺𑀫𑀺𑀢𑁆𑀢𑀸 𑀳𑀺 𑀲𑀸, 𑀢𑁂 𑀕𑀼𑀡𑀸 𑀲𑀢𑁆𑀣𑀼 𑀧𑀘𑁆𑀘𑀓𑁆𑀔𑀪𑀽𑀢𑀸𑀢𑀺 𑀕𑀼𑀡𑀸 𑀯𑀺𑀬 𑀲𑀸𑀧𑀺 𑀲𑀘𑁆𑀙𑀺𑀓𑀢𑀸 𑀏𑀯 𑀦𑀸𑀫 𑀳𑁄𑀢𑀺, 𑀦 𑀧𑀭𑁂𑀲𑀁, 𑀯𑁄𑀳𑀸𑀭𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀦𑁆𑀢𑀺 𑀬𑁂𑀳𑀺 𑀕𑀼𑀡𑁂𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀳𑀺 𑀏𑀢𑀁 𑀦𑀸𑀫𑀁 𑀦𑁂𑀫𑀺𑀢𑁆𑀢𑀺𑀓𑀜𑁆𑀘 𑀚𑀸𑀢𑀁. 𑀯𑀤𑀦𑁆𑀢𑀻𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀕𑀭𑀼𑀪𑀸𑀯𑀢𑁄 𑀩𑀳𑀼𑀯𑀘𑀦𑁂𑀦𑀸𑀳, 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀸 𑀓𑀢𑀫𑀦𑀼𑀯𑀸𑀤𑀁 𑀲𑀦𑁆𑀥𑀸𑀬.

𑀇𑀲𑁆𑀲𑀭𑀺𑀬𑀸𑀤𑀺𑀪𑁂𑀤𑁄 𑀪𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀪𑀕𑀻. 𑀫𑀕𑁆𑀕𑀨𑀮𑀸𑀤𑀺𑀅𑀭𑀺𑀬𑀕𑀼𑀡𑀁 𑀅𑀭𑀜𑁆𑀜𑀸𑀤𑀺𑀯𑀺𑀯𑁂𑀓𑀝𑁆𑀞𑀸𑀦𑀜𑁆𑀘 𑀪𑀚𑀺 𑀲𑁂𑀯𑀺 𑀲𑀻𑀮𑁂𑀦𑀸𑀢𑀺 𑀪𑀚𑀻. 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀁 𑀅𑀢𑁆𑀣𑀭𑀲𑀸𑀤𑀻𑀦𑀜𑁆𑀘 𑀲𑀻𑀮𑀸𑀤𑀺𑀕𑀼𑀡𑀸𑀦𑀜𑁆𑀘 𑀪𑀸𑀕𑀻, 𑀤𑀸𑀬𑀸𑀤𑁄𑀢𑀺 𑀅𑀢𑁆𑀣𑁄. 𑀯𑀺𑀪𑀚𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀸𑀤𑀺𑀧𑁆𑀧𑀓𑀸𑀭𑁂𑀳𑀺 𑀥𑀫𑁆𑀫𑀭𑀢𑀦𑀁 𑀧𑀯𑀺𑀪𑀚𑀻𑀢𑀺 𑀯𑀺𑀪𑀢𑁆𑀢𑀯𑀸. 𑀭𑀸𑀕𑀸𑀤𑀺𑀧𑀸𑀧𑀥𑀫𑁆𑀫𑀁 𑀪𑀕𑁆𑀕𑀁 𑀅𑀓𑀸𑀲𑀻𑀢𑀺 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀕𑀭𑀼𑀧𑀺 𑀮𑁄𑀓𑁂 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀕𑀭𑀽’’𑀢𑀺, 𑀬𑀲𑁆𑀫𑀸 𑀕𑀭𑀼, 𑀢𑀲𑁆𑀫𑀸𑀧𑀺 𑀪𑀕𑀯𑀸𑀢𑀺 𑀅𑀢𑁆𑀣𑁄. 𑀧𑀸𑀭𑀫𑀺𑀢𑀸𑀲𑀗𑁆𑀔𑀸𑀢𑀁 𑀪𑀕𑁆𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 𑀪𑀕𑁆𑀬𑀯𑀸. 𑀩𑀳𑀽𑀳𑀺 𑀜𑀸𑀬𑁂𑀳𑀻𑀢𑀺 𑀓𑀸𑀬𑀪𑀸𑀯𑀦𑀸𑀤𑀺𑀓𑁂𑀳𑀺 𑀅𑀦𑁂𑀓𑁂𑀳𑀺 𑀪𑀸𑀯𑀦𑀸𑀓𑁆𑀓𑀫𑁂𑀳𑀺. 𑀲𑀼𑀪𑀸𑀯𑀺𑀢𑀢𑁆𑀢𑀦𑁄𑀢𑀺 𑀧𑀘𑁆𑀘𑀢𑁆𑀢𑁂 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀢𑁂𑀦 𑀲𑀼𑀪𑀸𑀯𑀺𑀢𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀪𑀯𑀸𑀦𑀁 𑀅𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀪𑀯𑀦𑁆𑀢𑀕𑁄. 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀸𑀢𑀺 𑀲𑀤𑁆𑀤𑀲𑀺𑀤𑁆𑀥𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀪𑀕𑀻 𑀪𑀚𑀻𑀢𑀺 𑀦𑀺𑀤𑁆𑀤𑁂𑀲𑀕𑀸𑀣𑀸𑀬 𑀦𑀯𑀳𑀺 𑀧𑀤𑁂𑀳𑀺 𑀤𑀲𑁆𑀲𑀺𑀢𑀫𑀢𑁆𑀣𑀁 𑀪𑀕𑁆𑀬𑀯𑀸𑀢𑀺 𑀕𑀸𑀣𑀸𑀬 𑀙𑀳𑀺 𑀧𑀤𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀧𑀤𑀲𑀺𑀤𑁆𑀥𑀺𑀁 𑀅𑀢𑁆𑀣𑀬𑁄𑀚𑀦𑀸𑀦𑀬𑀪𑁂𑀤𑁂𑀳𑀺 𑀲𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀡𑁆𑀡𑀯𑀺𑀧𑀭𑀺𑀬𑀬𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦𑁂𑀯 𑀯𑀡𑁆𑀡𑀯𑀺𑀓𑀸𑀭𑁄 𑀯𑀡𑁆𑀡𑀮𑁄𑀧𑁄 𑀥𑀸𑀢𑀼𑀅𑀢𑁆𑀣𑁂𑀦 𑀦𑀺𑀬𑁄𑀚𑀦𑀜𑁆𑀘𑀸𑀢𑀺 𑀇𑀫𑀁 𑀢𑀺𑀯𑀺𑀥𑀁 𑀮𑀓𑁆𑀔𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀤𑁆𑀤𑀦𑀬𑁂𑀦𑀸𑀢𑀺 𑀲𑀤𑁆𑀤𑀮𑀓𑁆𑀔𑀡𑀦𑀬𑁂𑀦. 𑀧𑀺𑀲𑁄𑀤𑀭𑀸𑀤𑀻𑀦𑀁 𑀲𑀤𑁆𑀤𑀸𑀦𑀁 𑀆𑀓𑀢𑀺𑀕𑀡𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸’’𑀢𑀺. 𑀧𑀓𑁆𑀔𑀺𑀧𑀦𑀫𑁂𑀯 𑀮𑀓𑁆𑀔𑀡𑀁. 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀓𑀭𑀡𑀜𑁆𑀳𑀺 𑀧𑀓𑁆𑀔𑀺𑀧𑀦𑀁. 𑀪𑀕𑁆𑀬𑀦𑁆𑀢𑀺 𑀓𑀼𑀲𑀮𑀁.

𑀮𑁄𑀪𑀸𑀤𑀬𑁄 𑀘𑀢𑁆𑀢𑀸𑀭𑁄 𑀤𑁄𑀲𑀸 𑀏𑀓𑀓𑀯𑀲𑁂𑀦 𑀕𑀳𑀺𑀢𑀸. 𑀅𑀳𑀺𑀭𑀺𑀓𑀸𑀤𑀬𑁄 𑀤𑀼𑀓𑀯𑀲𑁂𑀦. 𑀅𑀓𑁆𑀓𑁄𑀘𑁆𑀙𑀺𑀫𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁩-𑁪) 𑀧𑀼𑀦𑀧𑁆𑀧𑀼𑀦𑀁 𑀓𑀼𑀚𑁆𑀛𑀦𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀬𑁄𑀦𑀦𑁆𑀥𑀦𑁄 𑀓𑁄𑀥𑁄𑀯 𑀉𑀧𑀦𑀸𑀳𑁄. 𑀧𑀭𑁂𑀲𑀁 𑀧𑀼𑀩𑁆𑀩𑀓𑀸𑀭𑀺𑀢𑀸𑀮𑀓𑁆𑀔𑀡𑀲𑁆𑀲 𑀕𑀼𑀡𑀲𑁆𑀲 𑀦𑀺𑀧𑀼𑀜𑁆𑀙𑀦𑁄 𑀫𑀓𑁆𑀔𑁄 𑀦𑀸𑀫. 𑀩𑀳𑀼𑀲𑁆𑀲𑀼𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑁄 𑀅𑀢𑁆𑀢𑀦𑁄 𑀲𑀫𑀓𑀭𑀡𑀁 𑀧𑀮𑀸𑀲𑁄. 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀸 𑀫𑀸𑀬𑀸. 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀁 𑀲𑀸𑀞𑁂𑀬𑁆𑀬𑀁. 𑀕𑀭𑀽𑀲𑀼𑀧𑀺 𑀣𑀤𑁆𑀥𑀢𑀸 𑀅𑀦𑁄𑀦𑀢𑀢𑀸 𑀣𑀫𑁆𑀪𑁄. 𑀢𑀤𑀼𑀢𑁆𑀢𑀭𑀺𑀓𑀭𑀡𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄. 𑀚𑀸𑀢𑀺𑀆𑀤𑀺𑀁 𑀦𑀺𑀲𑁆𑀲𑀸𑀬 𑀉𑀦𑁆𑀦𑀢𑀺𑀮𑀓𑁆𑀔𑀡𑁄 𑀫𑀸𑀦𑁄. 𑀅𑀩𑁆𑀪𑀼𑀦𑁆𑀦𑀢𑀺𑀮𑀓𑁆𑀔𑀡𑁄 𑀅𑀢𑀺𑀫𑀸𑀦𑁄. 𑀚𑀸𑀢𑀺𑀆𑀤𑀺𑀁 𑀦𑀺𑀲𑁆𑀲𑀸𑀬 𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀫𑀸𑀦𑁄𑀯 𑀫𑀤𑁄 𑀦𑀸𑀫. 𑀲𑁄 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑁄. 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄 𑀧𑀫𑀸𑀤𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀸𑀦𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀢𑀺𑀯𑀺𑀥𑀲𑀁𑀓𑀺𑀮𑁂𑀲𑀸. 𑀭𑀸𑀕𑀤𑁄𑀲𑀫𑁄𑀳𑀸𑀯 𑀫𑀮𑀸𑀦𑀺. 𑀢𑁂𑀬𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀬𑁄 𑀘 𑀢𑀺𑀯𑀺𑀥𑀯𑀺𑀲𑀫𑀸𑀦𑀺. 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀢𑀺𑀯𑀺𑀥𑀲𑀜𑁆𑀜𑀸 𑀦𑀸𑀫. 𑀢𑁂𑀬𑁂𑀯 𑀯𑀺𑀢𑀓𑁆𑀓𑀸. 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸 𑀧𑀧𑀜𑁆𑀘𑀸. 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀯𑀺𑀧𑀭𑀺𑀬𑁂𑀲𑀸 𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀸. 𑀙𑀦𑁆𑀤𑀸𑀤𑀬𑁄 𑀅𑀕𑀢𑀺. 𑀘𑀻𑀯𑀭𑀸𑀤𑀻𑀲𑀼 𑀧𑀘𑁆𑀘𑀬𑁂𑀲𑀼 𑀮𑁄𑀪𑀸 𑀘𑀢𑁆𑀢𑀸𑀭𑁄 𑀢𑀡𑁆𑀳𑀼𑀧𑀸𑀤𑀸. 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀺𑀓𑁆𑀔𑀸𑀲𑀼 𑀓𑀗𑁆𑀔𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑁄𑀧𑁄 𑀘 𑀧𑀜𑁆𑀘 𑀘𑁂𑀢𑁄𑀔𑀻𑀮𑀸. 𑀓𑀸𑀫𑁂 𑀓𑀸𑀬𑁂 𑀭𑀽𑀧𑁂 𑀘 𑀅𑀯𑀻𑀢𑀭𑀸𑀕𑀢𑀸, 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀸𑀤𑀺𑀅𑀦𑀼𑀬𑁄𑀕𑁄, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀘𑀭𑀡𑀜𑁆𑀘 𑀧𑀜𑁆𑀘 𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀸. 𑀭𑀽𑀧𑀸𑀪𑀺𑀦𑀦𑁆𑀤𑀦𑀸𑀤𑀬𑁄 𑀧𑀜𑁆𑀘 𑀅𑀪𑀺𑀦𑀦𑁆𑀤𑀦𑀸. 𑀓𑁄𑀥𑀫𑀓𑁆𑀔𑀇𑀲𑁆𑀲𑀸𑀲𑀸𑀞𑁂𑀬𑁆𑀬𑀧𑀸𑀧𑀺𑀘𑁆𑀙𑀢𑀸𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀸 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀭𑀽𑀧𑀢𑀡𑁆𑀳𑀸𑀤𑀬𑁄 𑀙 𑀢𑀡𑁆𑀳𑀸𑀓𑀸𑀬𑀸. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞𑀫𑀕𑁆𑀕𑀗𑁆𑀕𑀧𑀝𑀺𑀧𑀓𑁆𑀔𑀸 𑀫𑀺𑀘𑁆𑀙𑀢𑁆𑀢𑀸. 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀢𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀢𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀢𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀢𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀢𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑀸, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀸𑀤𑀺𑀅𑀦𑁂𑀓𑀸𑀓𑀼𑀲𑀮𑀭𑀸𑀲𑀻𑀢𑀺 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸 𑀢𑀣𑀸 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀭𑀽𑀧𑀢𑀡𑁆𑀳𑀸𑀤𑀺𑀙𑀢𑀡𑁆𑀳𑀸 𑀏𑀯 𑀧𑀘𑁆𑀘𑁂𑀓𑀁 𑀓𑀸𑀫𑀢𑀡𑁆𑀳𑀸𑀪𑀯𑀢𑀡𑁆𑀳𑀸𑀯𑀺𑀪𑀯𑀢𑀡𑁆𑀳𑀸𑀯𑀲𑁂𑀦 𑀅𑀝𑁆𑀞𑀸𑀭𑀲 𑀳𑁄𑀦𑁆𑀢𑀺, 𑀢𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀺𑀯𑀲𑁂𑀦 𑀙𑀢𑁆𑀢𑀺𑀁𑀲, 𑀧𑀼𑀦 𑀓𑀸𑀮𑀢𑁆𑀢𑀬𑀯𑀲𑁂𑀦 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀪𑁂𑀤-𑀲𑀤𑁆𑀤𑀁 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀮𑁄𑀪𑀧𑁆𑀧𑀪𑁂𑀤𑁄𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀲𑀢𑁆𑀢𑀸𑀦𑀁 𑀤𑀭𑀣𑀲𑀗𑁆𑀔𑀸𑀢𑀧𑀭𑀺𑀴𑀸𑀳𑀓𑀭𑀸𑀦𑀺 𑀓𑀺𑀮𑁂𑀲𑀸𑀦𑀁 𑀅𑀦𑁂𑀓𑀸𑀦𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑀢𑁄 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀪𑀸𑀕𑀢𑁄 𑀘 𑀦𑁂𑀲𑀁 𑀏𑀯𑀁 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀘 𑀫𑀸𑀭𑁂 𑀅𑀪𑀜𑁆𑀚𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀲𑁆𑀲𑀬𑀸𑀦𑀦𑁆𑀢𑀺 𑀉𑀧𑀤𑁆𑀤𑀯𑀸𑀦𑀁.

𑀏𑀯𑀁 𑀪𑀕𑁆𑀬𑀯𑀸 𑀪𑀕𑁆𑀕𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑁂𑀳𑀺 𑀤𑁆𑀯𑀻𑀳𑀺 𑀕𑀳𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀪𑀕𑁆𑀬𑀯𑀦𑁆𑀢𑀢𑀸𑀬 𑀘𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑀧𑀼𑀜𑁆𑀜𑀚𑀮𑀓𑁆𑀔𑀡𑀥𑀭𑀲𑁆𑀲𑀸𑀢𑀺 𑀅𑀦𑁂𑀓𑀲𑀢𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀥𑀭𑀲𑁆𑀲 𑀪𑀕𑀯𑀢𑁄. 𑀲𑀓𑀘𑀺𑀢𑁆𑀢𑁂 𑀇𑀲𑁆𑀲𑀭𑀺𑀬𑀁 𑀦𑀸𑀫 𑀧𑀝𑀺𑀓𑁆𑀓𑀽𑀮𑀸𑀤𑀻𑀲𑀼 𑀅𑀧𑁆𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀢𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀺𑀬𑀸 𑀘𑁂𑀯 𑀘𑁂𑀢𑁄𑀲𑀫𑀸𑀥𑀺𑀯𑀲𑁂𑀦 𑀘 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀯𑀲𑀻𑀪𑀸𑀯𑀸𑀧𑀸𑀤𑀦𑀫𑁂𑀯. 𑀅𑀡𑀺𑀫𑀸 𑀮𑀖𑀺𑀫𑀸𑀤𑀺𑀓𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀳𑀺𑀫𑀸 𑀧𑀢𑁆𑀢𑀺 𑀧𑀸𑀓𑀫𑁆𑀫𑀁 𑀈𑀲𑀺𑀢𑀸 𑀯𑀲𑀺𑀢𑀸 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀸𑀢𑀺 𑀇𑀫𑁂 𑀙𑀧𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀓𑀸𑀬𑀲𑁆𑀲 𑀅𑀡𑀼𑀪𑀸𑀯𑀓𑀭𑀡𑀁 𑀅𑀡𑀺𑀫𑀸. 𑀆𑀓𑀸𑀲𑁂 𑀧𑀤𑀲𑀸 𑀕𑀫𑀦𑀸𑀤𑀺𑀅𑀭𑀳𑀪𑀸𑀯𑁂𑀦 𑀮𑀳𑀼𑀪𑀸𑀯𑁄 𑀮𑀖𑀺𑀫𑀸. 𑀓𑀸𑀬𑀲𑁆𑀲 𑀫𑀳𑀦𑁆𑀢𑀢𑀸𑀧𑀸𑀤𑀦𑀁 𑀫𑀳𑀺𑀫𑀸. 𑀇𑀝𑁆𑀞𑀤𑁂𑀲𑀲𑁆𑀲 𑀧𑀸𑀧𑀼𑀡𑀦𑀁 𑀧𑀢𑁆𑀢𑀺. 𑀅𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀁 𑀧𑀸𑀓𑀫𑁆𑀫𑀁. 𑀲𑀬𑀁𑀯𑀲𑀺𑀢𑀸 𑀇𑀲𑁆𑀲𑀭𑀪𑀸𑀯𑁄 𑀈𑀲𑀺𑀢𑀸. 𑀇𑀤𑁆𑀥𑀺𑀯𑀺𑀥𑁂 𑀯𑀲𑀻𑀪𑀸𑀯𑁄 𑀯𑀲𑀺𑀢𑀸. 𑀆𑀓𑀸𑀲𑁂𑀦 𑀯𑀸 𑀕𑀘𑁆𑀙𑀢𑁄, 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀓𑀭𑁄𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀯𑁄𑀲𑀸𑀦𑀧𑁆𑀧𑀢𑁆𑀢𑀺 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀸, ‘‘𑀓𑀼𑀫𑀸𑀭𑀓𑀭𑀽𑀧𑀸𑀤𑀺𑀤𑀲𑁆𑀲𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀲𑀺𑀭𑀻𑀢𑀺 𑀲𑀩𑁆𑀩𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑁄𑀪𑀸. 𑀅𑀢𑁆𑀣𑀻𑀢𑀺 𑀅𑀦𑀼𑀯𑀢𑁆𑀢𑀢𑀺. 𑀮𑀳𑀼𑀲𑀸𑀥𑀦𑀁 𑀢𑀁 𑀢𑀁 𑀓𑀸𑀮𑀺𑀓𑀁 𑀇𑀘𑁆𑀙𑀺𑀢𑀁, 𑀕𑀭𑀼𑀲𑀸𑀥𑀦𑀁 𑀘𑀺𑀭𑀓𑀸𑀮𑀺𑀓𑀁 𑀩𑀼𑀤𑁆𑀥𑀢𑁆𑀢𑀸𑀤𑀺𑀧𑀢𑁆𑀣𑀺𑀢𑀁. 𑀪𑀕𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀪𑀕𑀯𑀸𑀢𑀺 𑀇𑀤𑀁 𑀲𑀤𑁆𑀤𑀲𑀢𑁆𑀣𑀦𑀬𑁂𑀦 𑀲𑀺𑀤𑁆𑀥𑀁, 𑀲𑁂𑀲𑀁 𑀲𑀩𑁆𑀩𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀺𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦𑀸𑀢𑀺𑀆𑀤𑀻𑀲𑀼 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄𑀢𑀺𑀆𑀤𑀺𑀦𑀸 𑀅𑀢𑁆𑀣-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀧𑀻𑀴𑀦𑀮𑀓𑁆𑀔𑀡𑀁 𑀤𑀼𑀓𑁆𑀔𑀁. 𑀢𑀲𑁆𑀲 𑀬𑁄 𑀧𑀻𑀴𑀦𑀫𑁂𑀯 𑀅𑀢𑁆𑀣𑁄 ‘‘𑀧𑀻𑀴𑀦𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀲𑀪𑀸𑀯𑁄. 𑀬𑀲𑁆𑀫𑀸 𑀧𑀦 𑀢𑀁𑀲𑀫𑀼𑀤𑀬𑁂𑀦 𑀲𑀗𑁆𑀔𑀢𑀁, 𑀢𑀲𑁆𑀫𑀸 𑀲𑀗𑁆𑀔𑀢𑀝𑁆𑀞𑁄 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀆𑀯𑀺𑀪𑀽𑀢𑁄. 𑀬𑀲𑁆𑀫𑀸 𑀘 𑀫𑀕𑁆𑀕𑁄 𑀓𑀺𑀮𑁂𑀲𑀲𑀦𑁆𑀢𑀸𑀧𑀳𑀭𑀢𑁆𑀢𑀸 𑀲𑀼𑀲𑀻𑀢𑀮𑁄, 𑀢𑀲𑁆𑀫𑀸𑀲𑁆𑀲 𑀫𑀕𑁆𑀕𑀤𑀲𑁆𑀲𑀦𑁂𑀦 𑀲𑀦𑁆𑀢𑀸𑀧𑀝𑁆𑀞𑁄 𑀆𑀯𑀺𑀪𑀽𑀢𑁄 𑀢𑀧𑁆𑀧𑀝𑀺𑀬𑁄𑀕𑀢𑁆𑀢𑀸. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀲𑁆𑀲 𑀧𑀦 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀆𑀯𑀺𑀪𑀽𑀢𑁄𑀢𑀺. 𑀏𑀓𑀲𑁆𑀲𑁂𑀯 𑀲𑀪𑀸𑀯𑀥𑀫𑁆𑀫𑀲𑁆𑀲 𑀲𑀓𑀪𑀸𑀯𑀢𑁄 𑀇𑀢𑀭𑀲𑀘𑁆𑀘𑀢𑁆𑀢𑀬𑀦𑀺𑀯𑀢𑁆𑀢𑀺𑀢𑁄 𑀘 𑀧𑀭𑀺𑀓𑀧𑁆𑀧𑁂𑀢𑀩𑁆𑀩𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀲𑀫𑀼𑀤𑀬𑀲𑁆𑀲 𑀧𑀦 𑀭𑀸𑀲𑀺𑀓𑀭𑀡𑀢𑁄 𑀆𑀬𑀽𑀳𑀦𑀝𑁆𑀞𑁄 𑀲𑀪𑀸𑀯𑁄, 𑀢𑀲𑁆𑀲𑁂𑀯 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀦𑀺𑀤𑀸𑀦𑀝𑁆𑀞𑁄 𑀆𑀯𑀺𑀪𑀽𑀢𑁄. 𑀯𑀺𑀲𑀁𑀬𑁄𑀕𑀪𑀽𑀢𑀲𑁆𑀲 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀲𑀁𑀬𑁄𑀕𑀝𑁆𑀞𑁄. 𑀦𑀺𑀬𑁆𑀬𑀸𑀦𑀪𑀽𑀢𑀲𑁆𑀲 𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑁂𑀦 𑀧𑀮𑀺𑀩𑁄𑀥𑀝𑁆𑀞𑁄 𑀆𑀯𑀺𑀪𑀽𑀢𑁄.

𑀦𑀺𑀭𑁄𑀥𑀲𑁆𑀲 𑀧𑀦 𑀦𑀺𑀲𑁆𑀲𑀭𑀡𑀝𑁆𑀞𑁄 𑀲𑀪𑀸𑀯𑁄, 𑀢𑀲𑁆𑀲𑁂𑀯 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀯𑀺𑀯𑁂𑀓𑀝𑁆𑀞𑁄 𑀆𑀯𑀺𑀪𑀽𑀢𑁄. 𑀲𑀗𑁆𑀔𑀢𑀲𑁆𑀲 𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑁂𑀦 𑀅𑀲𑀗𑁆𑀔𑀢𑀝𑁆𑀞𑁄, 𑀯𑀺𑀲𑀬𑀪𑀽𑀢𑀲𑁆𑀲 𑀫𑀭𑀡𑀥𑀫𑁆𑀫𑀲𑁆𑀲 𑀯𑀸 𑀤𑀼𑀓𑁆𑀔𑀲𑁆𑀲 𑀤𑀲𑁆𑀲𑀦𑁂𑀦 𑀅𑀫𑀢𑀝𑁆𑀞𑁄. 𑀫𑀕𑁆𑀕𑀲𑁆𑀲 𑀧𑀦 𑀦𑀺𑀬𑁆𑀬𑀸𑀦𑀝𑁆𑀞𑁄 𑀲𑀪𑀸𑀯𑁄, 𑀢𑀲𑁆𑀲𑁂𑀯 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀤𑀼𑀓𑁆𑀔𑀲𑁆𑀲𑁂𑀯𑀸𑀬𑀁 𑀳𑁂𑀢𑀼, 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀧𑀦 𑀅𑀬𑀫𑁂𑀯 𑀳𑁂𑀢𑀽𑀢𑀺 𑀳𑁂𑀢𑁆𑀯𑀝𑁆𑀞𑁄, 𑀅𑀢𑀺𑀲𑀼𑀔𑀼𑀫𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀇𑀥𑀫𑁂𑀯 𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑀦𑀝𑁆𑀞𑁄, 𑀅𑀥𑀺𑀓𑀧𑀡𑀲𑁆𑀲 𑀤𑀼𑀓𑁆𑀔𑀲𑁆𑀲 𑀤𑀲𑁆𑀲𑀦𑁂𑀦 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀆𑀯𑀺𑀪𑀽𑀢𑁄. 𑀏𑀢𑁂 𑀏𑀯 𑀘 𑀧𑀻𑀴𑀦𑀸𑀤𑀬𑁄 𑀲𑁄𑀴𑀲 𑀆𑀓𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀓𑀸𑀫𑁂𑀳𑀺 𑀯𑀺𑀯𑁂𑀓𑀝𑁆𑀞𑀓𑀸𑀬𑀢𑀸 𑀓𑀸𑀬𑀯𑀺𑀯𑁂𑀓𑁄. 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀯𑀺𑀢𑁆𑀢𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘𑀺𑀢𑁆𑀢𑀯𑀺𑀯𑁂𑀓𑁄. 𑀉𑀧𑀥𑀻𑀬𑀦𑁆𑀢𑀺 𑀏𑀢𑁆𑀣 𑀬𑀣𑀸𑀲𑀓𑀁 𑀨𑀮𑀸𑀦𑀻𑀢𑀺 𑀉𑀧𑀥𑀬𑁄, 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀓𑀸𑀫𑀔𑀦𑁆𑀥𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀸, 𑀢𑁂𑀳𑀺 𑀘𑀢𑀽𑀳𑀺 𑀯𑀺𑀯𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀯𑀺𑀯𑁂𑀓𑁄 𑀦𑀸𑀫.

𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀧𑀝𑀺𑀮𑀤𑁆𑀥𑁄 𑀤𑀼𑀓𑁆𑀔𑀸𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀳𑀺 𑀘 𑀧𑀝𑀺𑀮𑀤𑁆𑀥𑁄 𑀅𑀭𑀺𑀬𑀫𑀕𑁆𑀕𑁄 𑀆𑀕𑀫𑀦𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀲𑀼𑀜𑁆𑀜𑀢𑀅𑀧𑁆𑀧𑀡𑀺𑀳𑀺𑀢𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀲𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀳𑀺 𑀏𑀲 𑀯𑀺𑀫𑁄𑀓𑁆𑀔𑁄𑀢𑀺.

𑀬𑀣𑀸 𑀮𑁄𑀓𑁂 𑀏𑀓𑁂𑀓𑀧𑀤𑀢𑁄 𑀏𑀓𑁂𑀓𑀫𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 ‘‘𑀫𑁂𑀔𑀮𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀻𑀢𑀺 𑀅𑀢𑁆𑀣𑁄. 𑀫𑁂𑀳𑀦𑀲𑁆𑀲𑀸𑀢𑀺 𑀕𑀼𑀬𑁆𑀳𑀧𑁆𑀧𑀤𑁂𑀲𑀲𑁆𑀲. 𑀔𑀲𑁆𑀲𑀸𑀢𑀺 𑀑𑀓𑀸𑀲𑀲𑁆𑀲.

𑀲𑀳 𑀤𑁂𑀯𑁂𑀳𑀻𑀢𑀺𑀆𑀤𑀻𑀲𑀼 𑀲𑀳 𑀤𑁂𑀯𑁂𑀳𑀺 𑀯𑀢𑁆𑀢𑀢𑀻𑀢𑀺 𑀲𑀤𑁂𑀯𑀓𑁄 𑀮𑁄𑀓𑁄. 𑀢𑀁 𑀲𑀤𑁂𑀯𑀓𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁂𑀯𑀓𑀯𑀘𑀦𑁂𑀦𑀸𑀢𑀺 𑀲𑀤𑁂𑀯𑀓-𑀲𑀤𑁆𑀤𑁂 𑀯𑀺𑀲𑁂𑀲𑀦𑀪𑀸𑀯𑁂𑀦 𑀞𑀺𑀢𑀤𑁂𑀯𑀯𑀘𑀦𑁂𑀦. 𑀢𑀲𑁆𑀲𑀸𑀧𑀺 𑀲𑀤𑁂𑀯𑀓𑀧𑀤𑁂 𑀅𑀦𑁆𑀢𑁄𑀪𑀽𑀢𑀢𑁆𑀢𑀸 𑀅𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀯𑀲𑁂𑀦 𑀯𑁄𑀳𑀸𑀭𑁄 𑀓𑀢𑁄. 𑀇𑀢𑀭𑀣𑀸 𑀢𑁂𑀦 𑀤𑁂𑀯𑀯𑀺𑀲𑀺𑀝𑁆𑀞𑀮𑁄𑀓𑀲𑁆𑀲𑁂𑀯 𑀕𑀳𑀡𑀢𑁄 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀦 𑀲𑀺𑀬𑀸, 𑀏𑀯𑀁 𑀉𑀧𑀭𑀺𑀧𑀺. 𑀲𑀫𑀸𑀭𑀓𑀯𑀘𑀦𑁂𑀦 𑀫𑀸𑀭𑀲𑀤𑁆𑀤𑁂𑀦 𑀢𑁂𑀦 𑀲𑀳𑀘𑀭𑀺𑀢𑀸 𑀲𑀩𑁆𑀩𑁂 𑀯𑀲𑀯𑀢𑁆𑀢𑀺𑀤𑁂𑀯𑀸 𑀘 𑀕𑀳𑀺𑀢𑀸𑀢𑀺 𑀆𑀳 ‘‘𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡’’𑀦𑁆𑀢𑀺. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀦𑀸𑀫 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀓𑀸. 𑀢𑁂 𑀆𑀤𑀺 𑀬𑁂𑀲𑀁 𑀆𑀭𑀼𑀧𑁆𑀧𑀧𑀭𑀺𑀬𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀸𑀦𑀁 𑀢𑁂𑀲𑀁 𑀩𑁆𑀭𑀳𑁆𑀫𑀸𑀦𑀁 𑀕𑀳𑀡𑀁 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁. 𑀮𑁄𑀓-𑀲𑀤𑁆𑀤𑀲𑁆𑀲 𑀑𑀓𑀸𑀲𑀮𑁄𑀓𑀸𑀤𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 𑀲𑀢𑁆𑀢𑀮𑁄𑀓𑀸𑀯𑁂𑀡𑀺𑀓𑀫𑁂𑀯 𑀧𑀚𑀸𑀕𑀳𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺. 𑀲𑀤𑁂𑀯𑀓𑀸𑀤𑀺𑀯𑀘𑀦𑁂𑀦 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁, 𑀲𑀲𑁆𑀲𑀫𑀡𑀯𑀘𑀦𑁂𑀦 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀜𑁆𑀘 𑀕𑀳𑀺𑀢𑀢𑁆𑀢𑀸 𑀆𑀳 ‘‘𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡’’𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀤𑁂𑀯𑀸 𑀭𑀸𑀚𑀸𑀦𑁄, 𑀅𑀯𑀲𑁂𑀲𑀫𑀦𑀼𑀲𑁆𑀲𑀸 𑀲𑀫𑁆𑀫𑀼𑀢𑀺𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀯𑀲𑀺𑀝𑁆𑀞𑀸. 𑀲𑀢𑁆𑀢𑀮𑁄𑀓𑀸𑀯𑁂𑀡𑀺𑀓𑀲𑁆𑀲 𑀧𑀚𑀸𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀲𑀤𑁂𑀯𑀓𑀁 𑀮𑁄𑀓𑀦𑁆𑀢𑀺 𑀏𑀢𑁆𑀣 𑀮𑁄𑀓𑀲𑀤𑁆𑀤𑀕𑁆𑀕𑀳𑀡𑀁 𑀑𑀓𑀸𑀲𑀮𑁄𑀓𑀫𑁂𑀯 𑀦𑀺𑀬𑀫𑁂𑀢𑀻𑀢𑀺 𑀆𑀳 ‘‘𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁄’’𑀢𑀺. 𑀇𑀤𑀜𑁆𑀘 𑀲𑀤𑁂𑀯𑀓𑀸𑀤𑀺𑀧𑀤𑀢𑁆𑀢𑀬𑀯𑀘𑀦𑀻𑀬𑀲𑁆𑀲 𑀧𑀥𑀸𑀦𑀢𑁆𑀣𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀑𑀓𑀸𑀲𑀮𑁄𑀓𑀯𑀺𑀲𑁂𑀲𑀦𑀲𑁆𑀲 𑀧𑀦𑁂𑀢𑁆𑀣 𑀤𑁂𑀯𑀫𑀸𑀭𑀸𑀤𑀺𑀲𑀢𑁆𑀢𑀮𑁄𑀓𑀲𑁆𑀲𑀸𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁 𑀲𑀸𑀫𑀢𑁆𑀣𑀺𑀬𑀢𑁄 𑀕𑀫𑁆𑀬𑀫𑀸𑀦𑀢𑁆𑀢𑀸 𑀲𑀧𑀼𑀢𑁆𑀢𑁄 𑀆𑀕𑀢𑁄𑀢𑀺𑀆𑀤𑀻𑀲𑀼 𑀧𑀼𑀢𑁆𑀢𑀸𑀤𑀻𑀦𑀁 𑀯𑀺𑀬. 𑀇𑀫𑀲𑁆𑀫𑀺𑀜𑁆𑀘 𑀦𑀬𑁂 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀑𑀓𑀸𑀲𑀮𑁄𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀧𑀚𑀜𑁆𑀘𑀸𑀢𑀺 𑀘-𑀓𑀸𑀭𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁, 𑀑𑀓𑀸𑀲𑀲𑀢𑁆𑀢𑀮𑁄𑀓𑀸𑀦𑀁 𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑀼𑀪𑀬𑀲𑀫𑁆𑀫𑀼𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑁄 𑀲𑀗𑁆𑀔𑀸𑀭𑀮𑁄𑀓𑁄𑀧𑀺 𑀢𑀤𑀯𑀺𑀦𑀸𑀪𑀸𑀯𑀢𑁄 𑀕𑀳𑀺𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀧𑀭𑁂 𑀧𑀦 ‘‘𑀲𑀤𑁂𑀯𑀓𑀦𑁆𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀲𑀢𑁆𑀢𑀮𑁄𑀓𑁄𑀯 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀤𑁂𑀯𑀸𑀤𑀺𑀯𑀺𑀲𑁂𑀲𑀦𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑁄, 𑀢𑀕𑁆𑀕𑀳𑀡𑁂𑀦 𑀢𑀤𑀸𑀥𑀸𑀭𑁄 𑀑𑀓𑀸𑀲𑀮𑁄𑀓𑁄, 𑀢𑀤𑀼𑀪𑀬𑀧𑀜𑁆𑀜𑀢𑁆𑀢𑀺𑀯𑀺𑀲𑀬𑁄 𑀲𑀗𑁆𑀔𑀸𑀭𑀮𑁄𑀓𑁄 𑀘 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀜𑁆𑀘 𑀧𑀚𑀦𑁆𑀢𑀺 𑀇𑀤𑀁 𑀮𑁄𑀓𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑀁 𑀓𑀢𑁆𑀯𑀸 𑀲𑀤𑁂𑀯𑀓𑀁 𑀧𑀚𑀁 𑀮𑁄𑀓𑀁…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀁 𑀧𑀚𑀁 𑀮𑁄𑀓𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀕𑀳𑀺𑀢𑀢𑁆𑀢𑀸. 𑀫𑀸𑀭𑀕𑁆𑀕𑀳𑀡𑁂𑀦 𑀢𑀧𑁆𑀧𑀥𑀸𑀦𑀸 𑀢𑀁𑀲𑀤𑀺𑀲𑀸 𑀘 𑀉𑀧𑀧𑀢𑁆𑀢𑀺𑀤𑁂𑀯𑀸 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀆𑀳 ‘‘𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄’’𑀢𑀺. 𑀔𑀢𑁆𑀢𑀺𑀬𑀧𑀭𑀺𑀲𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀫𑀸𑀭𑀩𑁆𑀭𑀳𑁆𑀫𑀧𑀭𑀺𑀲𑀸𑀢𑀺 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀲𑀤𑁂𑀯𑀓𑀸𑀤𑀺𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀇𑀥 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀦𑁆𑀢𑀺 𑀇𑀫𑀺𑀦𑀸 𑀲𑀫𑀡𑀧𑀭𑀺𑀲𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸 𑀘, 𑀲𑀤𑁂𑀯𑀫𑀦𑀼𑀲𑁆𑀲𑀦𑁆𑀢𑀺 𑀇𑀫𑀺𑀦𑀸 𑀔𑀢𑁆𑀢𑀺𑀬𑀧𑀭𑀺𑀲𑀸 𑀕𑀳𑀧𑀢𑀺𑀧𑀭𑀺𑀲𑀸 𑀘 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀘𑀢𑀼𑀧𑀭𑀺𑀲𑀯𑀲𑁂𑀦𑀸’’𑀢𑀺. 𑀢𑀲𑁆𑀲 𑀫𑀦𑀼𑀲𑁆𑀲𑀮𑁄𑀓𑁄 𑀕𑀳𑀺𑀢𑁄𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀫𑀦𑀼𑀲𑁆𑀲𑀮𑁄𑀓𑁄𑀢𑀺 𑀫𑀦𑀼𑀲𑁆𑀲𑀲𑀫𑀽𑀳𑁄, 𑀢𑁂𑀦𑀸𑀳 ‘‘𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸’’𑀢𑀺.

𑀯𑀺𑀓𑀧𑁆𑀧𑀦𑁆𑀢𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄’’𑀢𑀺. 𑀤𑁂𑀯𑀧𑀤𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀸, 𑀲𑀫𑀡𑀩𑁆𑀭𑀸𑀳𑁆𑀫𑀡𑀫𑀦𑀼𑀲𑁆𑀲𑀧𑀤𑁂𑀳𑀺 𑀲𑁂𑀲𑀫𑀦𑀼𑀲𑁆𑀲𑀸 𑀘 𑀕𑀳𑀺𑀢𑀸𑀢𑀺 𑀏𑀯𑀁 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀫𑀦𑀼𑀲𑁆𑀲𑀁 𑀧𑀚𑀁 𑀫𑀦𑀼𑀲𑁆𑀲𑀺𑀁 𑀧𑀚𑀦𑁆𑀢𑀺 𑀧𑀚𑀸-𑀲𑀤𑁆𑀤𑀁 𑀫𑀦𑀼𑀲𑁆𑀲-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀢𑀁 𑀧𑀼𑀦 𑀲𑀳 𑀤𑁂𑀯𑁂𑀳𑀺 𑀯𑀢𑁆𑀢𑀢𑀻𑀢𑀺 𑀲𑀤𑁂𑀯𑀸, 𑀧𑀚𑀸. 𑀲𑀤𑁂𑀯𑀸 𑀘 𑀲𑀸 𑀫𑀦𑀼𑀲𑁆𑀲𑀸 𑀘𑀸𑀢𑀺 𑀲𑀤𑁂𑀯𑀫𑀦𑀼𑀲𑁆𑀲𑀸, 𑀢𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀧𑀚𑀁. 𑀧𑀼𑀦 𑀓𑀺𑀁 𑀪𑀽𑀢𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀦𑁆𑀢𑀺 𑀏𑀯𑀁 𑀬𑀣𑀸 𑀧𑀚𑀸𑀲𑀤𑁆𑀤𑁂𑀦 𑀫𑀦𑀼𑀲𑁆𑀲𑀸𑀦𑀜𑁆𑀜𑁂𑀯 𑀕𑀳𑀡𑀁 𑀲𑀺𑀬𑀸, 𑀢𑀣𑀸 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁, 𑀇𑀢𑀭𑀣𑀸 𑀫𑀦𑀼𑀲𑁆𑀲𑀸𑀦𑀜𑁆𑀜𑁂𑀯 𑀕𑀳𑀡𑀁 𑀦 𑀲𑀫𑁆𑀧𑀚𑁆𑀚𑀢𑀺 𑀲𑀩𑁆𑀩𑀫𑀦𑀼𑀲𑁆𑀲𑀸𑀦𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀅𑀜𑁆𑀜𑀧𑀤𑀢𑁆𑀣𑀪𑀽𑀢𑀲𑁆𑀲 𑀓𑀲𑁆𑀲𑀘𑀺 𑀫𑀦𑀼𑀲𑁆𑀲𑀲𑁆𑀲 𑀅𑀪𑀸𑀯𑀸. 𑀇𑀤𑀸𑀦𑀺 𑀧𑀚𑀦𑁆𑀢𑀺 𑀇𑀫𑀺𑀦𑀸 𑀅𑀯𑀲𑁂𑀲𑀦𑀸𑀕𑀸𑀤𑀺𑀲𑀢𑁆𑀢𑁂𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 𑀆𑀳 ‘‘𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸’’𑀢𑀺. 𑀏𑀢𑁆𑀣𑀸𑀧𑀺 𑀘𑀢𑀼𑀧𑀭𑀺𑀲𑀯𑀲𑁂𑀦 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀲𑀫𑁆𑀫𑀼𑀢𑀺𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀯𑀸 𑀲𑀳 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀢𑁆𑀢𑀸𑀯𑀢𑀸 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀏𑀓𑁂𑀓𑀧𑀤𑁂𑀦 𑀅𑀪𑀸𑀕𑀲𑁄 𑀲𑀩𑁆𑀩𑀮𑁄𑀓𑀸𑀦𑀁 𑀕𑀳𑀡𑀧𑀓𑁆𑀔𑁂𑀧𑀺 𑀢𑀲𑁆𑀲 𑀢𑀲𑁆𑀲 𑀯𑀺𑀲𑁂𑀲𑀦𑀲𑁆𑀲 𑀲𑀧𑁆𑀨𑀮𑀢𑀁 𑀤𑀲𑁆𑀲𑁂𑀢𑀼𑀁 𑀅𑀧𑀺 𑀘𑁂𑀢𑁆𑀣𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀉𑀓𑁆𑀓𑀝𑁆𑀞𑀸𑀦𑀁 𑀤𑁂𑀯𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀦𑀯𑀲𑁂𑀦 𑀚𑀸𑀦𑀦𑀯𑀲𑁂𑀦 𑀓𑀺𑀢𑁆𑀢𑀺𑀲𑀤𑁆𑀤𑁄 𑀲𑀬𑀁 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑁂𑀦 𑀲𑀤𑁂𑀯𑀓𑀯𑀘𑀦𑁂𑀦 𑀢𑀁 𑀲𑀼𑀡𑀦𑁆𑀢𑀸𑀦𑀁 𑀲𑀸𑀯𑁂𑀦𑁆𑀢𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀬𑁄𑀚𑀦𑀸. 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑁄𑀢𑀺 𑀅𑀢𑁆𑀣𑀸𑀦𑀜𑁆𑀘𑁂𑀯 𑀧𑀤𑀸𑀦𑀜𑁆𑀘 𑀅𑀦𑀼𑀲𑀦𑁆𑀥𑀸𑀦𑀓𑁆𑀓𑀫𑁄, 𑀚𑀸𑀦𑀦𑀓𑁆𑀓𑀫𑁄𑀢𑀺 𑀅𑀢𑁆𑀣𑁄.

𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀬𑀸’’𑀢𑀺. 𑀲𑀫𑀦𑁆𑀢𑀪𑀤𑁆𑀭𑀓𑀢𑁆𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀲𑀼𑀦𑁆𑀤𑀭𑀢𑁆𑀢𑀸. 𑀲𑀸𑀲𑀦𑀥𑀫𑁆𑀫𑁄𑀢𑀺 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀸𑀲𑀦𑀲𑁆𑀲 𑀧𑀓𑀸𑀲𑀓𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑀢𑀸𑀬𑀸𑀢𑀺 𑀇𑀤𑀁 𑀢𑀺𑀓𑀁 𑀥𑀫𑁆𑀫𑀲𑁆𑀲 𑀳𑁂𑀢𑀼𑀲𑀭𑀽𑀧𑀨𑀮𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸 𑀦𑀸𑀣𑀧𑀪𑀯𑀢𑁆𑀢𑀺𑀓𑀫𑁆𑀧𑀺. 𑀫𑀚𑁆𑀛𑁂 𑀢𑀺𑀓𑀤𑁆𑀯𑀬𑀁 𑀨𑀮𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸𑀢𑀺 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑀣𑀸𑀲𑀼𑀢𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸.

𑀇𑀤𑀸𑀦𑀺 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀪𑀕𑀯𑀸 𑀲𑁄𑀢𑀽𑀦𑀁 𑀬𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀧𑀓𑀸𑀲𑁂𑀢𑀺, 𑀢𑀧𑁆𑀧𑀓𑀸𑀲𑀓𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀧𑀤𑀲𑁆𑀲 𑀲𑀸𑀢𑁆𑀣𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀦 𑀥𑀫𑁆𑀫𑀧𑀤𑀲𑁆𑀲𑀸𑀢𑀺 𑀤𑀲𑁆𑀲𑀦𑀫𑀼𑀔𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀓𑀸𑀫𑁄 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀓𑀮𑁄 𑀘 𑀢𑀦𑁆𑀢𑀺𑀥𑀫𑁆𑀫𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀻𑀮𑀸𑀤𑀺𑀓𑁂 𑀯𑀺𑀬 𑀢𑀧𑁆𑀧𑀓𑀸𑀲𑀓𑀁 𑀢𑀦𑁆𑀢𑀺𑀥𑀫𑁆𑀫𑀫𑁆𑀧𑀺 𑀧𑀓𑀸𑀲𑁂𑀢𑀺 𑀏𑀯 𑀲𑀤𑁆𑀤𑀢𑁆𑀣𑀲𑀫𑀼𑀤𑀸𑀬𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲. 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀬𑀣𑀸𑀭𑀳𑀁. 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀜𑁆𑀳𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀢𑁆𑀣𑀢𑀸𑀬, 𑀉𑀧𑀭𑀽𑀧𑀭𑀺 𑀅𑀥𑀺𑀕𑀦𑁆𑀢𑀩𑁆𑀩𑀯𑀺𑀲𑁂𑀲𑀲𑀗𑁆𑀔𑀸𑀢𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀳 𑀅𑀢𑁆𑀣𑁂𑀦 𑀧𑀬𑁄𑀚𑀦𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀫𑁂𑀯, 𑀦 𑀢𑀼 𑀲𑀩𑁆𑀬𑀜𑁆𑀚𑀦𑀁, 𑀢𑀦𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀜𑁆𑀘. 𑀓𑀺𑀭𑀸𑀢𑀸𑀤𑀺𑀫𑀺𑀮𑀓𑁆𑀔𑀯𑀘𑀦𑀸𑀦𑀫𑁆𑀧𑀺 𑀲𑀸𑀢𑁆𑀣𑀲𑀩𑁆𑀬𑀜𑁆𑀚𑀦𑀢𑁆𑀢𑁂 𑀲𑀫𑀸𑀦𑁂𑀧𑀺 𑀯𑀺𑀲𑀺𑀝𑁆𑀞𑀢𑁆𑀣𑀩𑁆𑀬𑀜𑁆𑀚𑀦𑀬𑁄𑀕𑀁 𑀲𑀦𑁆𑀥𑀸𑀬 𑀲𑀳𑀢𑁆𑀣𑁄 𑀤𑁂𑀯𑀤𑀢𑁆𑀢𑁄 𑀲𑀯𑀺𑀢𑁆𑀢𑁄𑀢𑀺𑀆𑀤𑀺 𑀯𑀺𑀬 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁, 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺. 𑀢𑀢𑁆𑀣 𑀬𑀁 𑀅𑀢𑁆𑀣𑀁 𑀲𑀼𑀢𑁆𑀯𑀸 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀸 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀲 𑀢𑀸𑀤𑀺𑀲𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀲𑀫𑁆𑀧𑀢𑁆𑀢𑀺 𑀦𑀸𑀫, 𑀲𑀫𑁆𑀧𑀦𑁆𑀦𑀢𑁆𑀣𑀢𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺 𑀦𑀸𑀫 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀸𑀬 𑀫𑀸𑀕𑀥𑀺𑀓𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀕𑀫𑁆𑀪𑀻𑀭𑀫𑁆𑀧𑀺 𑀅𑀢𑁆𑀣𑀁 𑀉𑀢𑁆𑀢𑀸𑀦𑀁 𑀓𑀢𑁆𑀯𑀸 𑀤𑀲𑁆𑀲𑀦𑀲𑀫𑀢𑁆𑀣𑀢𑀸 𑀲𑀫𑁆𑀧𑀦𑁆𑀦𑀩𑁆𑀬𑀜𑁆𑀚𑀦𑀢𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀦𑀬𑁂𑀦𑀸𑀧𑀺 (𑀦𑁂𑀢𑁆𑀢𑀺 𑁪 𑀤𑁆𑀯𑀸𑀤𑀲𑀧𑀤) 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀓𑀸𑀲𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑁂𑀧𑀢𑁄 𑀓𑀸𑀲𑀻𑀬𑀢𑀺 𑀤𑀻𑀧𑀻𑀬𑀢𑀻𑀢𑀺 𑀲𑀗𑁆𑀓𑀸𑀲𑀦𑀦𑁆𑀢𑀺 𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀧𑀞𑀫𑀁 𑀓𑀸𑀲𑀦𑀁 𑀧𑀓𑀸𑀲𑀦𑀁. 𑀉𑀪𑀬𑀫𑁆𑀧𑁂𑀢𑀁 𑀉𑀤𑁆𑀤𑁂𑀲𑀢𑁆𑀣𑀯𑀘𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀢𑁆𑀣𑀸𑀭𑀯𑀘𑀦𑀁. 𑀲𑀓𑀺𑀁 𑀯𑀼𑀢𑁆𑀢𑀲𑁆𑀲 𑀧𑀼𑀦 𑀯𑀘𑀦𑀜𑁆𑀘 𑀯𑀺𑀯𑀭𑀡𑀯𑀺𑀪𑀚𑀦𑀸𑀦𑀺. 𑀉𑀪𑀬𑀫𑁆𑀧𑁂𑀢𑀁 𑀦𑀺𑀤𑁆𑀤𑁂𑀲𑀢𑁆𑀣𑀯𑀘𑀦𑀁. 𑀯𑀺𑀯𑀝𑀲𑁆𑀲 𑀯𑀺𑀢𑁆𑀣𑀸𑀭𑀢𑀭𑀸𑀪𑀺𑀥𑀸𑀦𑀁 𑀯𑀺𑀪𑀢𑁆𑀢𑀲𑁆𑀲 𑀘 𑀧𑀓𑀸𑀭𑁂𑀳𑀺 𑀜𑀸𑀧𑀦𑀁 𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀬𑁄. 𑀉𑀪𑀬𑀫𑁆𑀧𑁂𑀢𑀁 𑀧𑀝𑀺𑀦𑀺𑀤𑁆𑀤𑁂𑀲𑀢𑁆𑀣𑀯𑀘𑀦𑀲𑀗𑁆𑀔𑀸𑀢𑀲𑁆𑀲 𑀯𑀺𑀢𑁆𑀣𑀸𑀭𑀯𑀘𑀦𑀁. 𑀅𑀢𑁆𑀣𑀧𑀤𑀲𑀫𑀸𑀬𑁄𑀕𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀏𑀯 𑀙 𑀧𑀤𑀸𑀦𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀢𑁆𑀣𑀯𑀺𑀪𑀸𑀕𑀢𑁆𑀢𑀸 𑀅𑀢𑁆𑀣𑀧𑀤𑀸𑀦𑀺, 𑀢𑁂𑀳𑀺 𑀲𑀳𑀺𑀢𑀢𑀸𑀬 𑀅𑀢𑁆𑀣𑀓𑁄𑀝𑁆𑀞𑀸𑀲𑀬𑀼𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀬𑁄𑀲𑀺𑀢𑁂 𑀧𑀤𑁂 𑀆𑀤𑀺𑀫𑀚𑁆𑀛𑀕𑀢𑀯𑀡𑁆𑀡𑁄 𑀅𑀓𑁆𑀔𑀭𑀁, 𑀏𑀓𑀓𑁆𑀔𑀭𑀁, 𑀧𑀤𑀁 𑀯𑀸 𑀅𑀓𑁆𑀔𑀭𑀁. 𑀯𑀺𑀪𑀢𑁆𑀢𑀺𑀬𑀦𑁆𑀢𑀁 𑀧𑀤𑀁. 𑀧𑀤𑀸𑀪𑀺𑀳𑀺𑀢𑀁 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. 𑀓𑀣𑀺𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀅𑀦𑁂𑀓𑀯𑀺𑀥𑁂𑀦 𑀯𑀺𑀪𑀸𑀕𑀓𑀭𑀡𑀁 𑀆𑀓𑀸𑀭𑁄 𑀦𑀸𑀫. 𑀆𑀓𑀸𑀭𑀸𑀪𑀺𑀳𑀺𑀢𑀲𑁆𑀲 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀺. 𑀦𑀺𑀩𑁆𑀩𑀘𑀦𑀢𑁆𑀣𑀯𑀺𑀢𑁆𑀣𑀸𑀭𑁄 𑀦𑀺𑀤𑁆𑀤𑁂𑀲𑁄. 𑀅𑀣 𑀯𑀸 ‘‘𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑁂𑀢𑀺, 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺, 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺, 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀲𑀗𑁆𑀔𑀆𑀢𑀉𑀤𑁆𑀤𑁂𑀲𑀢𑁆𑀣𑀯𑀸𑀘𑀓𑀸𑀦𑀺 𑀯𑀘𑀦𑀸𑀦𑀺 𑀅𑀓𑁆𑀔𑀭𑀧𑀤𑀸𑀦𑀺 𑀦𑀸𑀫. 𑀯𑀺𑀯𑀭𑀡𑀯𑀺𑀪𑀚𑀦𑀲𑀗𑁆𑀔𑀸𑀢𑀦𑀺𑀤𑁆𑀤𑁂𑀲𑀢𑁆𑀣𑀯𑀸𑀘𑀓𑀸𑀦𑀺 𑀯𑀘𑀦𑀸𑀦𑀺 𑀩𑁆𑀬𑀜𑁆𑀚𑀦𑀸𑀓𑀸𑀭𑀸 𑀦𑀸𑀫. 𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀧𑀝𑀺𑀦𑀺𑀤𑁆𑀤𑁂𑀲𑀢𑁆𑀣𑀯𑀸𑀘𑀓𑀸𑀦𑀺 𑀯𑀘𑀦𑀸𑀦𑀺 𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀸 𑀦𑀸𑀫, 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀅𑀢𑁆𑀣𑁄, 𑀳𑁂𑀢𑀼𑀨𑀮𑀁 𑀯𑀸. 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺, 𑀳𑁂𑀢𑀼 𑀯𑀸. 𑀤𑁂𑀲𑀦𑀸 𑀦𑀸𑀫 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄. 𑀧𑀝𑀺𑀯𑁂𑀥𑁄 𑀦𑀸𑀫 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀸𑀤𑀻𑀦𑀁 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑁄. 𑀢𑁂 𑀧𑀦𑁂𑀢𑁂 𑀅𑀢𑁆𑀣𑀸𑀤𑀬𑁄 𑀬𑀲𑁆𑀫𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀲𑀼 𑀧𑀝𑀺𑀯𑁂𑀥𑀲𑁆𑀲𑀸𑀧𑀺 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀢𑁆𑀣𑀲𑀪𑀸𑀕𑀢𑁆𑀢𑀸 𑀘 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣’’𑀦𑁆𑀢𑀺. 𑀥𑀫𑁆𑀫𑀤𑁂𑀲𑀦𑀸𑀦𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑁂𑀧𑀺 𑀲𑀬𑀁 𑀩𑁆𑀬𑀜𑁆𑀚𑀦𑀭𑀽𑀧𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀳𑀺 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀸𑀤𑀻𑀲𑀼 𑀧𑀪𑁂𑀤𑀕𑀢𑀸𑀦𑀺 𑀜𑀸𑀡𑀸𑀦𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄. 𑀢𑀢𑁆𑀣 𑀦𑀺𑀭𑀼𑀢𑁆𑀢𑀻𑀢𑀺 𑀢𑀦𑁆𑀢𑀺𑀧𑀤𑀸𑀦𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀘𑀦𑀁, 𑀦𑀺𑀩𑁆𑀩𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀻𑀲𑀼 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸. 𑀮𑁄𑀓𑀺𑀬𑀸 𑀲𑀤𑁆𑀥𑁂𑀬𑁆𑀬𑀯𑀘𑀦𑀫𑀼𑀔𑁂𑀦𑁂𑀯 𑀅𑀢𑁆𑀣𑁂𑀲𑀼 𑀧𑀲𑀻𑀤𑀦𑁆𑀢𑀺, 𑀦 𑀅𑀢𑁆𑀣𑀫𑀼𑀔𑁂𑀦𑀸𑀢𑀺 𑀆𑀳 𑀲𑀤𑁆𑀥𑁂𑀬𑁆𑀬𑀢𑁄𑀢𑀺𑀆𑀤𑀺. 𑀓𑁂𑀯𑀮𑀲𑀤𑁆𑀤𑁄 𑀲𑀓𑀮𑀸𑀥𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀓𑀮𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦𑀸’’𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬-𑀲𑀤𑁆𑀤𑁄 𑀇𑀥 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀁 𑀲𑀸𑀲𑀦𑀁 𑀤𑀻𑀧𑁂𑀢𑀻𑀢𑀺 𑀆𑀳 𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺𑀆𑀤𑀺.

𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀅𑀧𑀭𑁂𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀢𑀼𑀁 𑀅𑀧𑀺 𑀘𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀦𑀺𑀤𑀸𑀦𑀦𑁆𑀢𑀺 𑀤𑁂𑀲𑀓𑀸𑀮𑀸𑀤𑀺𑀤𑀻𑀧𑀓𑁂𑀦 𑀦𑀺𑀤𑀸𑀦𑀯𑀘𑀦𑁂𑀦 𑀲𑀦𑀺𑀤𑀸𑀦𑀁. 𑀲𑀉𑀧𑁆𑀧𑀢𑁆𑀢𑀺𑀓𑀦𑁆𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀆𑀤𑀺𑀬𑀼𑀢𑁆𑀢𑀺𑀬𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀧𑀸𑀴𑀺𑀬𑁄𑀚𑀦𑀸𑀓𑁆𑀓𑀫𑁄 𑁋 ‘‘𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁄 𑀔𑀮𑀼 𑀪𑁄…𑀧𑁂… 𑀯𑀺𑀳𑀭𑀢𑀻’’𑀢𑀺 𑀘, ‘‘𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 ‘𑀇𑀢𑀺𑀧𑀺 𑀲𑁄…𑀧𑁂… 𑀧𑀯𑁂𑀤𑁂𑀢𑀻’𑀢𑀺 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀘, ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀤𑁂𑀲𑁂𑀦𑁆𑀢𑁄 𑀘 𑀲𑀸𑀢𑁆𑀣𑀲𑀩𑁆𑀬𑀜𑁆𑀚𑀦𑀸𑀤𑀺𑀕𑀼𑀡𑀲𑀁𑀬𑀼𑀢𑁆𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀘, ‘‘𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺 𑀘 𑀅𑀲𑁆𑀲𑁄𑀲𑀺, 𑀲𑀼𑀢𑁆𑀯𑀸 𑀘 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑀺𑀜𑁆𑀘𑀸𑀧𑀺 ‘‘𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸 𑀅𑀣 𑀔𑁄 𑀯𑁂𑀭𑀜𑁆𑀚𑁄…𑀧𑁂… 𑀉𑀧𑀲𑀗𑁆𑀓𑀫𑀻’’𑀢𑀺 𑀏𑀯𑀁 𑀲𑀸𑀥𑀼 𑀔𑁄 𑀧𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀧𑀤𑀸𑀦𑀦𑁆𑀢𑀭𑀫𑁂𑀯 𑀅𑀲𑁆𑀲𑁄𑀲𑀻𑀢𑀺 𑀧𑀤𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺, 𑀢𑀣𑀸𑀧𑀺 ‘‘𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀺𑀤𑀲𑁆𑀲𑀦𑀢𑁆𑀣𑁂𑀦 𑀇𑀢𑀺-𑀲𑀤𑁆𑀤𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀅𑀜𑁆𑀜𑀢𑁆𑀣 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀢𑁄 𑀘 𑀅𑀣 𑀔𑁄 𑀯𑁂𑀭𑀜𑁆𑀚𑁄𑀢𑀺𑀆𑀤𑀺𑀦𑀸 𑀓𑀢𑁆𑀢𑀩𑁆𑀩𑀦𑁆𑀢𑀭𑀤𑀲𑁆𑀲𑀦𑀫𑀼𑀔𑁂𑀦 𑀧𑀸𑀴𑀺𑀬𑀸 𑀧𑀓𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑀺𑀢𑁄 𑀘 𑀬𑀣𑀸𑀯𑀼𑀢𑁆𑀢𑀯𑀲𑁂𑀦𑁂𑀯 ‘‘𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺 𑀯𑀘𑀦𑀸𑀦𑀦𑁆𑀢𑀭𑀫𑁂𑀯 𑀅𑀲𑁆𑀲𑁄𑀲𑀻𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀦𑀁 𑀬𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀢𑁆𑀢𑀦𑀸 𑀲𑀼𑀢𑀯𑀲𑁂𑀦𑁂𑀯 𑀅𑀚𑁆𑀛𑀸𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑀲𑀗𑁆𑀓𑀫𑀦𑀳𑁂𑀢𑀼𑀤𑀲𑁆𑀲𑀦𑀫𑀼𑀔𑁂𑀦 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑁨. 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦𑀸𑀢𑀺 𑀇𑀤𑀁 𑀉𑀓𑁆𑀓𑀫𑁂𑀦 𑀫𑀼𑀔𑀸𑀭𑀼𑀴𑁆𑀳𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀢𑀸𑀬 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀉𑀡𑁆𑀳𑁄𑀤𑀓𑀁 𑀯𑀺𑀬 𑀲𑀻𑀢𑁄𑀤𑀓𑁂𑀦𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀜𑀸𑀡𑀢𑁂𑀚𑀬𑀼𑀢𑁆𑀢𑀢𑀸𑀬 𑀯𑀸 𑀪𑀕𑀯𑀸 𑀉𑀡𑁆𑀳𑁄𑀤𑀓𑁄𑀧𑀫𑁄𑀢𑀺 𑀓𑀢𑁆𑀯𑀸 𑀢𑀩𑁆𑀩𑀺𑀭𑀳𑀺𑀢𑀁 𑀩𑁆𑀭𑀸𑀳𑁆𑀫𑀡𑀁 𑀲𑀻𑀢𑁄𑀤𑀓𑀁 𑀯𑀺𑀬 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀏𑀓𑀭𑀽𑀧𑀢𑀁. 𑀬𑀸𑀬𑀸𑀢𑀺𑀆𑀤𑀻𑀲𑀼 𑀬𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺 𑀩𑁆𑀭𑀸𑀳𑁆𑀫𑀡𑁄, 𑀢𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀔𑀫𑀦𑀻𑀬𑀦𑁆𑀢𑀺 𑀤𑀼𑀓𑁆𑀔𑀩𑀳𑀼𑀮𑀁 𑀇𑀤𑀁 𑀲𑀭𑀻𑀭𑀁, 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀬𑀸𑀧𑀦𑀻𑀬𑀦𑁆𑀢𑀺 𑀘𑀺𑀭𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀭𑁄𑀕𑀸𑀪𑀸𑀯𑁂𑀦 𑀅𑀧𑁆𑀧𑀸𑀩𑀸𑀥𑀁. 𑀤𑀼𑀓𑁆𑀔𑀚𑀻𑀯𑀺𑀢𑀸𑀪𑀸𑀯𑁂𑀦 𑀅𑀧𑁆𑀧𑀸𑀢𑀗𑁆𑀓𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀢𑁆𑀣𑀸𑀬 𑀮𑀳𑀼𑀁 𑀅𑀓𑀺𑀘𑁆𑀙𑁂𑀦 𑀉𑀝𑁆𑀞𑀸𑀢𑀼𑀁 𑀬𑁄𑀕𑁆𑀕𑀢𑀸𑀬 𑀮𑀳𑀼𑀝𑁆𑀞𑀸𑀦𑀁. 𑀩𑀮𑀦𑁆𑀢𑀺 𑀲𑀭𑀻𑀭𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀓𑁆𑀔𑀫𑀁 𑀩𑀮𑀁 𑀓𑀘𑁆𑀘𑀺 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑀲𑀼𑀔𑀯𑀺𑀳𑀸𑀭𑁄. 𑀲𑀭𑀡𑀻𑀬𑀫𑁂𑀯 𑀤𑀻𑀖𑀁 𑀓𑀢𑁆𑀯𑀸 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬’’𑀦𑁆𑀢𑀺. 𑀧𑀭𑀺𑀬𑀸𑀬𑁂𑀳𑀻𑀢𑀺 𑀓𑀸𑀭𑀡𑁂𑀳𑀺.

𑀪𑀸𑀯𑁄𑀢𑀺 𑀓𑀺𑀭𑀺𑀬𑀸, 𑀢𑀲𑁆𑀫𑀺𑀁 𑀯𑀢𑁆𑀢𑀫𑀸𑀦𑁄 𑀦𑀧𑀼𑀁𑀲𑀓-𑀲𑀤𑁆𑀤𑁄 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀦𑀸𑀫, 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀲𑀤𑁆𑀤𑁄𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑁂 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀬𑀼𑀢𑁆𑀢𑀧𑁆𑀧𑀤𑁂𑀲𑁂𑀢𑀺 𑀅𑀢𑁆𑀣𑁄. 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀦𑁆𑀢𑀺 𑀔𑀡𑁆𑀟𑀺𑀢𑀤𑀦𑁆𑀢𑀧𑀮𑀺𑀢𑀓𑁂𑀲𑀸𑀤𑀺𑀪𑀸𑀯𑀁. 𑀭𑀸𑀚𑀧𑀭𑀺𑀯𑀝𑁆𑀝𑁂𑀢𑀺 𑀭𑀸𑀚𑀽𑀦𑀁 𑀧𑀭𑀺𑀯𑀢𑁆𑀢𑀦𑀁, 𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. 𑀧𑀼𑀭𑀸𑀢𑀦𑀼𑀘𑁆𑀘𑀓𑀼𑀮𑀧𑁆𑀧𑀲𑀼𑀢𑀢𑀸𑀬 𑀚𑀺𑀡𑁆𑀡𑀢𑀸, 𑀦 𑀯𑀬𑀲𑀸𑀢𑀺 𑀆𑀳 ‘‘𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀓𑀼𑀮𑀦𑁆𑀯𑀬𑁂’’𑀢𑀺. 𑀯𑀺𑀪𑀯𑀸𑀦𑀁 𑀫𑀳𑀦𑁆𑀢𑀢𑁆𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀳𑀮𑁆𑀮𑀓𑁄𑀢𑀺 𑀆𑀳 ‘‘𑀯𑀺𑀪𑀯𑀫𑀳𑀢𑁆𑀢𑀢𑀸𑀬 𑀲𑀫𑀦𑁆𑀦𑀸𑀕𑀢𑁂’’𑀢𑀺. 𑀯𑀺𑀪𑀸𑀯𑀦𑁂 𑀦𑀸𑀫 𑀅𑀢𑁆𑀣𑁂𑀢𑀺 𑀧𑀓𑀢𑀺𑀯𑀺𑀪𑀸𑀯𑀦𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. 𑀦 𑀅𑀪𑀺𑀯𑀸𑀤𑁂𑀢𑀺 𑀯𑀸𑀢𑀺 𑀅𑀪𑀺𑀯𑀸𑀤𑁂𑀢𑀩𑁆𑀩𑀦𑁆𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀏𑀯𑀁 𑀅𑀲𑀮𑁆𑀮𑀓𑁆𑀔𑀡𑀧𑀓𑀢𑀺𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺 𑀏𑀢𑁆𑀣𑀸𑀧𑀺 𑀦𑀺𑀘𑁆𑀘𑀧𑀓𑀢𑀺𑀓𑀁 𑀅𑀦𑀺𑀘𑁆𑀘𑀧𑀓𑀢𑀺𑀓𑀁 𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄.

𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑀚𑀸𑀢𑁄, 𑀚𑀸𑀢𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸…𑀧𑁂… 𑀑𑀮𑁄𑀓𑁂𑀲𑀻𑀢𑀺 𑀏𑀢𑁆𑀣 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀓𑁆𑀔𑀦𑁆𑀢𑁄𑀢𑀺𑀆𑀤𑀻𑀲𑀼 𑀯𑀺𑀬 𑀕𑀫𑀦𑀢𑁄 𑀧𑀼𑀭𑁂 𑀓𑀢𑀫𑁆𑀧𑀺 𑀑𑀮𑁄𑀓𑀦𑀁 𑀧𑀘𑁆𑀙𑀸 𑀓𑀢𑀁 𑀯𑀺𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀑𑀮𑁄𑀓𑁂𑀲𑀺𑀦𑁆𑀢𑀺 𑀘 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑁂 𑀚𑀸𑀢𑁂 𑀫𑀁𑀲𑀘𑀓𑁆𑀔𑀼𑀦𑀸 𑀯𑁄𑀮𑁄𑀓𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑁄𑀢𑀺 𑀧𑀲𑀢𑁆𑀣𑀢𑀭𑁄. 𑀧𑀢𑀺𑀫𑀸𑀦𑁂𑀲𑀻𑀢𑀺 𑀧𑀽𑀚𑁂𑀲𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁.

𑁩. 𑀢𑀁 𑀯𑀘𑀦𑀦𑁆𑀢𑀺 𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺𑀆𑀤𑀺𑀯𑀘𑀦𑀁. 𑀅𑀜𑁆𑀜𑀸𑀬 𑀲𑀡𑁆𑀞𑀳𑁂𑀬𑁆𑀬𑀸𑀢𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀚𑀸𑀢𑀺𑀯𑀲𑁂𑀦. 𑀉𑀧𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺𑀯𑀲𑁂𑀦. 𑀆𑀯𑀺𑀜𑁆𑀙𑀦𑁆𑀢𑀻𑀢𑀺 𑀆𑀓𑀟𑁆𑀠𑀦𑁆𑀢𑀺. 𑀬𑀲𑁆𑀲 𑀅𑀪𑀺𑀯𑀸𑀤𑀸𑀤𑀺𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀲𑀸𑀫𑀕𑁆𑀕𑀺𑀭𑀲𑀲𑁆𑀲 𑀪𑀕𑀯𑀢𑀺 𑀅𑀪𑀸𑀯𑀁 𑀫𑀜𑁆𑀜𑀫𑀸𑀦𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀭𑀲𑀭𑀽𑀧𑁄’’𑀢𑀺 𑀆𑀳, 𑀢𑀩𑁆𑀩𑀺𑀥𑀼𑀭𑀲𑁆𑀲 𑀭𑀽𑀧𑀢𑀡𑁆𑀳𑀸𑀤𑀺𑀓𑀲𑁆𑀲𑁂𑀯 𑀲𑀸𑀫𑀕𑁆𑀕𑀺𑀭𑀲𑀲𑁆𑀲 𑀅𑀪𑀸𑀯𑁂𑀦 𑀪𑀕𑀯𑀸 ‘‘𑀅𑀭𑀲𑀭𑀽𑀧𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀲𑀸𑀫𑀕𑁆𑀕𑀺𑀭𑀲𑀲𑀤𑁆𑀤𑀲𑁆𑀲 𑀭𑀽𑀧𑀭𑀲𑀸𑀤𑀻𑀲𑀼 𑀯𑀢𑁆𑀢𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀯𑀢𑁆𑀣𑀸𑀭𑀫𑁆𑀫𑀡𑀸𑀤𑀻𑀢𑀺𑀆𑀤𑀺.

𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸𑀦𑀁 𑀢𑀸𑀮𑀸𑀦𑀁 𑀯𑀢𑁆𑀣𑀼 𑀯𑀺𑀬 𑀦𑁂𑀲𑀁 𑀭𑀽𑀧𑀭𑀲𑀸𑀤𑀻𑀦𑀁 𑀯𑀢𑁆𑀣𑀼 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀓𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀫𑀚𑁆𑀛𑁂𑀧𑀤𑀮𑁄𑀧𑀁 𑀤𑀻𑀖𑀜𑁆𑀘 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 𑀢𑀸𑀮𑀯𑀢𑁆𑀣𑀼 𑀯𑀺𑀬𑀸𑀢𑀺𑀆𑀤𑀺. 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀬𑁂𑀲𑀁 𑀯𑀢𑁆𑀣𑀼 𑀓𑀢𑀁 𑀢𑁂 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄, 𑀓𑀢𑀢𑀸𑀮𑀯𑀢𑁆𑀣𑀼𑀓𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄𑀬𑁂𑀯 𑀧𑀢𑁆𑀢𑀨𑀮𑀸𑀤𑀻𑀦𑀁 𑀅𑀓𑀸𑀭𑀡𑀢𑀸𑀬 𑀅𑀯𑀢𑁆𑀣𑀽𑀢𑀺 𑀢𑀸𑀮𑀸𑀯𑀢𑁆𑀣𑀼, 𑀢𑀁 𑀯𑀺𑀬 𑀬𑁂𑀲𑀁 𑀯𑀢𑁆𑀣𑀼 𑀓𑀢𑀁 𑀢𑁂 𑀭𑀽𑀧𑀭𑀲𑀸𑀤𑀬𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑀸, 𑀅𑀬𑀁 𑀅𑀜𑁆𑀜𑀧𑀤𑀢𑁆𑀣𑀯𑀲𑁂𑀦 𑀅𑀢𑁆𑀣𑀕𑁆𑀕𑀸𑀳𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀲𑀼𑀕𑀫𑁄𑀢𑀺 𑀯𑀺𑀲𑁂𑀲𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸’’𑀢𑀺. 𑀏𑀯𑀜𑁆𑀘 𑀫𑀢𑁆𑀣𑀓𑀲𑀤𑀺𑀲𑁂𑀲𑀼 𑀭𑀽𑀧𑀭𑀲𑀸𑀤𑀻𑀲𑀼 𑀭𑀸𑀕𑁂𑀲𑀼 𑀙𑀺𑀦𑁆𑀦𑁂𑀲𑀼𑀧𑀺 𑀢𑀩𑁆𑀩𑀢𑁆𑀣𑀼𑀪𑀽𑀢𑀲𑁆𑀲 𑀢𑀸𑀮𑀸𑀯𑀢𑁆𑀣𑀼𑀲𑀤𑀺𑀲𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀉𑀧𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀬𑀣𑀸𑀭𑀼𑀢𑀢𑁄 𑀧𑀦 𑀯𑀺𑀲𑁂𑀲𑀦𑀲𑀫𑀸𑀲𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀭𑀽𑀧𑀭𑀲𑀸𑀤𑀻𑀦𑀁 𑀢𑀸𑀮𑀸𑀯𑀢𑁆𑀣𑀼𑀲𑀤𑀺𑀲𑀢𑀸𑀬 𑀞𑀸𑀦𑀁 𑀆𑀧𑀚𑁆𑀚𑀢𑀺. 𑀬𑀁 𑀧𑀦 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁩) 𑀏𑀢𑀁 𑀤𑁄𑀲𑀁 𑀧𑀭𑀺𑀳𑀭𑀺𑀢𑀼𑀁 𑀭𑀽𑀧𑀭𑀲𑀸𑀤𑀻𑀦𑀁 𑀓𑀼𑀲𑀮𑀸𑀓𑀼𑀲𑀮𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺𑀆𑀤𑀺𑀧𑀸𑀴𑀺𑀬𑀸, 𑀓𑀸𑀫𑀲𑀼𑀔𑀲𑁆𑀲𑀸𑀤𑀲𑀗𑁆𑀔𑀸𑀢𑀸 𑀭𑀽𑀧𑀭𑀲𑀸𑀢𑀺𑀆𑀤𑀺𑀅𑀝𑁆𑀞𑀓𑀣𑀸𑀬 𑀘 𑀦 𑀲𑀫𑁂𑀢𑀺, 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀨𑀮𑀼𑀧𑁆𑀧𑀢𑁆𑀢𑀺𑀢𑁄 𑀢𑁂𑀲𑀁 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑀲𑀤𑀺𑀲𑀢𑀸𑀧𑀺 𑀦 𑀬𑀼𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀣 𑀯𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑀲𑁆𑀲 𑀞𑀺𑀢𑀁 𑀅𑀝𑁆𑀞𑀺𑀢𑀜𑁆𑀘 𑀅𑀫𑀦𑀲𑀺𑀓𑀢𑁆𑀯𑀸 𑀧𑀼𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀲𑀤𑀺𑀲𑀫𑀢𑁆𑀢𑀁 𑀉𑀧𑀫𑁂𑀢𑁆𑀯𑀸 𑀢𑀸𑀮𑀸𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑀯𑀲𑁂𑀦 𑀅𑀢𑁆𑀣𑀕𑁆𑀕𑀳𑀡𑁂𑀧𑀺 𑀦 𑀓𑁄𑀘𑀺 𑀤𑁄𑀲𑁄. 𑀅𑀦𑀼-𑀲𑀤𑁆𑀤𑁄 𑀧𑀘𑁆𑀙𑀸𑀢𑀺 𑀅𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀆𑀳 𑀧𑀘𑁆𑀙𑀸𑀪𑀸𑀯𑁄 𑀦 𑀳𑁄𑀢𑀻𑀢𑀺𑀆𑀤𑀺. 𑀅𑀦𑀼 𑀅𑀪𑀸𑀯𑀁 𑀕𑀢𑀸𑀢𑀺 𑀧𑀘𑁆𑀙𑀸 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀯𑀲𑁂𑀦 𑀅𑀪𑀸𑀯𑀁 𑀕𑀢𑀸. 𑀅𑀦𑀘𑁆𑀙𑀭𑀺𑀬𑀸𑀢𑀺 𑀅𑀦𑀼 𑀅𑀦𑀼 𑀉𑀧𑀭𑀽𑀧𑀭𑀺 𑀯𑀺𑀫𑁆𑀳𑀬𑀓𑀢𑀸𑀢𑀺 𑀅𑀢𑁆𑀣𑁄. 𑀬𑀜𑁆𑀘 𑀔𑁄 𑀢𑁆𑀯𑀁 𑀯𑀤𑁂𑀲𑀻𑀢𑀺 𑀬𑀁 𑀯𑀦𑁆𑀤𑀦𑀸𑀤𑀺𑀲𑀸𑀫𑀕𑁆𑀕𑀻𑀭𑀲𑀸𑀪𑀸𑀯𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀅𑀭𑀲𑀭𑀽𑀧𑀢𑀸𑀬 𑀯𑀤𑁂𑀲𑀺, 𑀢𑀁 𑀓𑀸𑀭𑀡𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁪. 𑀲𑀦𑁆𑀥𑀸𑀬 𑀪𑀸𑀲𑀺𑀢𑀫𑀢𑁆𑀣𑀦𑁆𑀢𑀺 𑀬𑀁 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀩𑁆𑀭𑀸𑀳𑁆𑀫𑀡𑁄 𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳, 𑀪𑀕𑀯𑀸 𑀘 𑀬𑀁 𑀲𑀦𑁆𑀥𑀸𑀬 𑀦𑀺𑀩𑁆𑀪𑁄𑀕𑀢𑀸𑀤𑀺𑀁 𑀅𑀢𑁆𑀢𑀦𑀺 𑀅𑀦𑀼𑀚𑀸𑀦𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀫𑀢𑁆𑀣𑀁.

𑁫. 𑀓𑀼𑀮𑀲𑀫𑀼𑀤𑀸𑀘𑀸𑀭𑀓𑀫𑁆𑀫𑀦𑁆𑀢𑀺 𑀓𑀼𑀮𑀸𑀘𑀸𑀭𑀓𑀫𑁆𑀫𑀁. 𑀓𑀸𑀬𑀢𑁄 𑀓𑀸𑀬𑀤𑁆𑀯𑀸𑀭𑀢𑁄 𑀧𑀯𑀢𑁆𑀢𑀁 𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀅𑀦𑁂𑀓𑀯𑀺𑀳𑀺𑀢𑀸𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸.

𑁬. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑀸𑀢𑀺 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼 𑀅𑀢𑀺𑀯𑀺𑀬 𑀲𑀗𑁆𑀕𑀯𑀲𑁂𑀦 𑀦𑀺𑀬𑀼𑀢𑁆𑀢𑀲𑁆𑀲 𑀓𑀸𑀫𑀭𑀸𑀕𑀲𑁆𑀲, 𑀏𑀢𑁂𑀦 𑀅𑀦𑀸𑀕𑀸𑀫𑀻𑀦𑀁 𑀯𑀢𑁆𑀣𑀸𑀪𑀭𑀡𑀸𑀤𑀻𑀲𑀼 𑀲𑀗𑁆𑀕𑀦𑀺𑀓𑀦𑁆𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀸𑀫𑀭𑀸𑀕𑀲𑁆𑀲 𑀓𑀸𑀫𑀭𑀸𑀕𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺 𑀢𑀲𑁆𑀲 𑀭𑀽𑀧𑀭𑀸𑀕𑀸𑀤𑀻𑀲𑀼 𑀲𑀗𑁆𑀕𑀳𑀢𑁄. 𑀅𑀯𑀲𑁂𑀲𑀸𑀦𑀦𑁆𑀢𑀺 𑀏𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀁 𑀧𑀞𑀫𑁂𑀦 𑀫𑀕𑁆𑀕𑁂𑀦, 𑀲𑁂𑀲𑀸𑀦𑀁 𑀘𑀢𑀽𑀳𑀺𑀧𑀺 𑀉𑀘𑁆𑀙𑁂𑀤𑀁 𑀯𑀤𑀢𑀺, 𑀢𑁂𑀦𑀸𑀳 ‘‘𑀬𑀣𑀸𑀦𑀼𑀭𑀽𑀧’’𑀦𑁆𑀢𑀺.

𑁭. 𑀚𑀺𑀕𑀼𑀘𑁆𑀙𑀢𑀺 𑀫𑀜𑁆𑀜𑁂𑀢𑀺 𑀚𑀺𑀕𑀼𑀘𑁆𑀙𑀢𑀺 𑀯𑀺𑀬, ‘‘𑀚𑀺𑀕𑀼𑀘𑁆𑀙𑀢𑀻’’𑀢𑀺 𑀯𑀸 𑀲𑀮𑁆𑀮𑀓𑁆𑀔𑁂𑀫𑀺. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦𑀸𑀢𑀺 𑀅𑀜𑁆𑀜𑀸𑀡𑀲𑀫𑁆𑀪𑀽𑀢𑀝𑁆𑀞𑁂𑀦.

𑁮-𑁧𑁦. 𑀢𑀢𑁆𑀭𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼. 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀸𑀬𑁄𑀧𑀺 𑀇𑀥 𑀕𑀩𑁆𑀪𑀲𑀤𑁆𑀤𑁄𑀢𑀺 𑀆𑀳 ‘‘𑀤𑁂𑀯𑀮𑁄𑀓𑀧𑀝𑀺𑀲𑀦𑁆𑀥𑀺𑀧𑀝𑀺𑀮𑀸𑀪𑀸𑀬𑀸’’𑀢𑀺. 𑀅𑀧𑀼𑀦𑀩𑁆𑀪𑀯𑀪𑀽𑀢𑀸𑀢𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺.

𑁧𑁧. 𑀥𑀫𑁆𑀫𑀥𑀸𑀢𑀼𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀥𑀸𑀭𑁂𑀢𑀺 𑀉𑀧𑀥𑀸𑀭𑁂𑀢𑀻𑀢𑀺 ‘‘𑀥𑀫𑁆𑀫𑀥𑀸𑀢𑀽’’𑀢𑀺 𑀯𑀼𑀘𑁆𑀘𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄𑀢𑀺 𑀅𑀪𑀺𑀭𑀼𑀘𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑁄, 𑀢𑀁 𑀧𑀢𑁆𑀢𑁄. 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀨𑀭𑀡𑀁. 𑀢𑀸𑀤𑀺𑀕𑀼𑀡𑀮𑀓𑁆𑀔𑀡𑀫𑁂𑀯 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀧𑀣𑀯𑀻𑀲𑀫𑀘𑀺𑀢𑁆𑀢𑀢’’𑀦𑁆𑀢𑀺. 𑀢𑀢𑁄𑀬𑁂𑀯 𑀅𑀓𑀼𑀚𑁆𑀛𑀦𑀲𑀪𑀸𑀯𑀢𑁄 𑀅𑀓𑀼𑀧𑁆𑀧𑀥𑀫𑁆𑀫𑀢𑀸. 𑀚𑀸𑀢𑀺𑀬𑀸 𑀅𑀦𑀼𑀕𑀢𑀦𑁆𑀢𑀺 𑀚𑀸𑀢𑀺𑀬𑀸 𑀅𑀦𑀼𑀩𑀤𑁆𑀥𑀁. 𑀚𑀭𑀸𑀬 𑀅𑀦𑀼𑀲𑀝𑀦𑁆𑀢𑀺 𑀚𑀭𑀸𑀬 𑀧𑀮𑀺𑀯𑁂𑀞𑀺𑀢𑀁. 𑀯𑀝𑁆𑀝𑀔𑀸𑀡𑀼𑀪𑀽𑀢𑀦𑁆𑀢𑀺 𑀯𑀝𑁆𑀝𑀢𑁄 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀝𑁆𑀝𑁂 𑀦𑀺𑀘𑁆𑀘𑀮𑀪𑀸𑀯𑁂𑀦 𑀞𑀺𑀢𑀁 𑀔𑀸𑀡𑀼 𑀯𑀺𑀬 𑀪𑀽𑀢𑀁. 𑀚𑀸𑀢𑀸𑀦𑀁 𑀫𑀘𑁆𑀘𑀸𑀦𑀁 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀦𑁆𑀢𑀺 𑀆𑀳 𑀅𑀚𑁆𑀚 𑀫𑀭𑀺𑀢𑁆𑀯𑀸𑀢𑀺𑀆𑀤𑀺. 𑀅𑀧𑁆𑀧𑀝𑀺𑀲𑀫𑀁 𑀧𑀼𑀭𑁂𑀚𑀸𑀢𑀪𑀸𑀯𑀦𑁆𑀢𑀺 𑀅𑀲𑀤𑀺𑀲𑀁 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀧𑀞𑀫𑀚𑀸𑀢𑀪𑀸𑀯𑀁, 𑀲𑀩𑁆𑀩𑀚𑁂𑀝𑁆𑀞𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

‘‘𑀅𑀧𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀻’’𑀢𑀺 𑀯𑀤𑀦𑁆𑀢𑁄 𑀧𑀺-𑀲𑀤𑁆𑀤𑁄 𑀯𑀺𑀲𑀼𑀁 𑀅𑀢𑁆𑀣𑀺 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀧𑀸𑀤𑀸𑀤𑀻𑀳𑀺 𑀉𑀧𑀖𑀸𑀢𑀁 𑀅𑀓𑀭𑁄𑀦𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀉𑀧𑀭𑀺 𑀲𑀬𑀺𑀢𑀸𑀦𑀺, 𑀅𑀓𑀫𑁆𑀫𑀓𑀲𑁆𑀲𑀸𑀧𑀺 𑀲𑀬𑀢𑀺𑀥𑀸𑀢𑀼𑀦𑁄 𑀅𑀥𑀺𑀧𑀼𑀩𑁆𑀩𑀢𑀸𑀬 𑀲𑀓𑀫𑁆𑀫𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀦𑀔𑀲𑀺𑀔𑀸𑀢𑀺 𑀦𑀔𑀕𑁆𑀕𑀸𑀦𑀺. 𑀲𑀓𑀼𑀡𑀸𑀦𑀁 𑀧𑀓𑁆𑀔𑀸 𑀳𑀢𑁆𑀣𑀧𑀸𑀤𑀝𑁆𑀞𑀸𑀦𑀺𑀬𑀸𑀢𑀺 𑀆𑀳 ‘‘𑀲𑀗𑁆𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸’’𑀢𑀺. 𑀏𑀢𑁆𑀣𑀸𑀢𑀺 𑀆𑀮𑁄𑀓𑀝𑁆𑀞𑀸𑀦𑁂. 𑀦𑀺𑀓𑁆𑀔𑀫𑀦𑁆𑀢𑀸𑀦𑀦𑁆𑀢𑀺 𑀦𑀺𑀓𑁆𑀔𑀫𑀦𑁆𑀢𑁂𑀲𑀼, 𑀦𑀺𑀤𑁆𑀥𑀸𑀭𑀡𑁂 𑀳𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀡𑁆𑀟𑀓𑁄𑀲𑀦𑁆𑀢𑀺 𑀅𑀡𑁆𑀟𑀓𑀧𑀸𑀮𑀁.

𑀮𑁄𑀓𑁄𑀬𑁂𑀯 𑀮𑁄𑀓𑀲𑀦𑁆𑀦𑀺𑀯𑀸𑀲𑁄. 𑀅𑀩𑀼𑀚𑁆𑀛𑀺 𑀏𑀢𑁆𑀣𑀸𑀢𑀺 𑀭𑀼𑀓𑁆𑀔𑁄 𑀩𑁄𑀥𑀺, 𑀲𑀬𑀁 𑀩𑀼𑀚𑁆𑀛𑀢𑀺, 𑀩𑀼𑀚𑁆𑀛𑀦𑁆𑀢𑀺 𑀯𑀸 𑀢𑁂𑀦𑀸𑀢𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀩𑁄𑀥𑀺. 𑀩𑀼𑀚𑁆𑀛𑀻𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀩𑁄𑀥𑀺. 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀦𑁆𑀢𑀺 𑀤𑀼𑀢𑀺𑀬𑀫𑀼𑀤𑀸𑀳𑀭𑀡𑀁 𑀯𑀺𑀦𑀸𑀧𑀺 𑀭𑀼𑀓𑁆𑀔-𑀲𑀤𑁆𑀤𑁂𑀦 𑀩𑁄𑀥𑀺-𑀲𑀤𑁆𑀤𑀲𑁆𑀲 𑀭𑀼𑀓𑁆𑀔𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀯𑀭𑀪𑀽𑀭𑀺𑀫𑁂𑀥𑀲𑁄𑀢𑀺 𑀫𑀳𑀸𑀧𑀣𑀯𑀻 𑀯𑀺𑀬 𑀧𑀢𑁆𑀣𑀝𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀢𑁆𑀢𑀦𑀸 𑀲𑀳 𑀯𑀢𑁆𑀢𑀫𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀆𑀲𑀯𑀓𑁆𑀔𑀬𑀜𑀸𑀡𑀜𑁆𑀘𑁂𑀯 𑀇𑀢𑀭𑀸 𑀤𑁆𑀯𑁂 𑀫𑀳𑀕𑁆𑀕𑀢𑀯𑀺𑀚𑁆𑀚𑀸 𑀘 𑀢𑀩𑁆𑀩𑀺𑀦𑀺𑀩𑀦𑁆𑀥𑀓𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀉𑀧𑁆𑀧𑀸𑀤𑀦𑀢𑁄 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸’’𑀢𑀺 𑀯𑀼𑀘𑁆𑀘𑀢𑀺. 𑀙 𑀅𑀪𑀺𑀜𑁆𑀜𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀦𑁆𑀢𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀧𑀝𑀺𑀮𑀪𑀺𑀢𑀩𑁆𑀩𑀁 𑀲𑀩𑁆𑀩𑀫𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁. 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀦𑁆𑀢𑀺 𑀑𑀧𑀫𑁆𑀫𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑁂𑀦 𑀲𑀫𑀁 𑀧𑀝𑀺𑀧𑀸𑀤𑀦𑀁. 𑀅𑀢𑁆𑀣𑁂𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑁂𑀦. 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦𑀲𑀽𑀭𑀪𑀸𑀯𑁄𑀢𑀺 𑀇𑀫𑀺𑀦𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀧𑀢𑁆𑀢𑀢𑀁 𑀯𑀺𑀧𑀲𑁆𑀲𑀦𑀸𑀬 𑀤𑀲𑁆𑀲𑁂𑀢𑀺. 𑀧𑀭𑀺𑀡𑀸𑀫𑀓𑀸𑀮𑁄𑀢𑀺 𑀇𑀫𑀺𑀦𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀸𑀧𑀢𑁆𑀢𑀺𑀁. 𑀢𑀤𑀸 𑀘 𑀲𑀸 𑀫𑀕𑁆𑀕𑀜𑀸𑀡𑀕𑀩𑁆𑀪𑀁 𑀥𑀸𑀭𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄’’𑀢𑀺. 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦𑀸𑀢𑀺 𑀧𑀞𑀫𑀫𑀕𑁆𑀕𑀸𑀤𑀺𑀧𑀝𑀺𑀧𑀸𑀝𑀺𑀬𑀸 𑀅𑀥𑀺𑀕𑀢𑁂𑀦. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬), 𑀲𑀭𑀻𑀭𑁂 𑀉𑀧𑀲𑀼𑀲𑁆𑀲𑀢𑀼 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁.

𑀙𑀦𑁆𑀤𑁄 𑀓𑀸𑀫𑁄𑀢𑀺𑀆𑀤𑀻𑀲𑀼 𑀧𑀢𑁆𑀣𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀤𑀼𑀩𑁆𑀩𑀮𑁄 𑀮𑁄𑀪𑁄 𑀇𑀘𑁆𑀙𑀦𑀝𑁆𑀞𑁂𑀦 𑀙𑀦𑁆𑀤𑁄. 𑀢𑀢𑁄 𑀩𑀮𑀯𑀸 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀙𑀦𑁆𑀤𑀭𑀸𑀕𑁄. 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀲𑀗𑁆𑀓𑀧𑁆𑀧𑀯𑀲𑁂𑀦 𑀧𑀯𑀢𑁆𑀢𑁄 𑀲𑀗𑁆𑀓𑀧𑁆𑀧𑁄. 𑀢𑀢𑁄𑀧𑀺 𑀩𑀮𑀯𑀲𑀗𑁆𑀓𑀧𑁆𑀧𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀭𑀸𑀕𑁄. 𑀢𑀢𑁄𑀧𑀺 𑀩𑀮𑀯𑀢𑀭𑁄 𑀲𑀗𑁆𑀓𑀧𑁆𑀧𑀭𑀸𑀕𑁄. 𑀲𑁆𑀯𑀸𑀬𑀁 𑀧𑀪𑁂𑀤𑁄 𑀏𑀓𑀲𑁆𑀲𑁂𑀯 𑀮𑁄𑀪𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀅𑀯𑀢𑁆𑀣𑀸𑀪𑁂𑀤𑁂𑀦 𑀘 𑀯𑀼𑀢𑁆𑀢𑁄.

𑀧𑀞𑀫𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀢𑀁 𑀓𑀣𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀧𑀼𑀩𑁆𑀩𑀧𑀤𑁂𑀬𑁂𑀯 𑀅𑀯𑀥𑀸𑀭𑀡𑀓𑀭𑀡𑀁, 𑀏𑀢𑀁 𑀅𑀢𑁆𑀣𑀚𑀸𑀢𑀁 𑀯𑀸. 𑀢𑀦𑁆𑀦𑀺𑀲𑁆𑀲𑀭𑀡𑀢𑁄𑀢𑀺 𑀢𑁂𑀲𑀁 𑀓𑀸𑀫𑀸𑀦𑀁 𑀦𑀺𑀲𑁆𑀲𑀭𑀡𑀢𑁆𑀢𑀸. 𑀏𑀲𑀸𑀢𑀺 𑀏𑀯-𑀓𑀸𑀭𑁄. 𑀓𑀸𑀫𑀥𑀸𑀢𑀼 𑀦𑀸𑀫 𑀓𑀸𑀫𑀪𑀯𑁄, 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀁. 𑀏𑀲𑀸𑀢𑀺 𑀦𑀺𑀬𑀫𑁄. 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀬𑁄. 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑀸 𑀓𑀸𑀬𑀯𑀺𑀯𑁂𑀓𑀸𑀤𑀬𑁄, 𑀢𑀬𑁄 𑀏𑀯 𑀇𑀥 𑀛𑀸𑀦𑀓𑀣𑀸𑀬, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀸𑀤𑀻𑀦𑀁 𑀅𑀲𑀫𑁆𑀪𑀯𑀸. 𑀦𑀺𑀤𑁆𑀤𑁂𑀲𑁂𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂. 𑀢𑀢𑁆𑀣𑁂𑀯𑀸𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑁂 𑀏𑀯. 𑀯𑀺𑀪𑀗𑁆𑀕𑁂𑀢𑀺 𑀛𑀸𑀦𑀯𑀺𑀪𑀗𑁆𑀕𑁂. 𑀏𑀯𑀜𑁆𑀳𑀺 𑀲𑀢𑀻𑀢𑀺 𑀉𑀪𑀬𑁂𑀲𑀫𑁆𑀧𑀺 𑀓𑀸𑀫𑀸𑀦𑀁 𑀲𑀗𑁆𑀕𑀳𑁂 𑀲𑀢𑀺.

𑀧𑀼𑀭𑀺𑀫𑁂𑀦𑀸𑀢𑀺 𑀓𑀸𑀬𑀯𑀺𑀯𑁂𑀓𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀓𑀸𑀬𑀘𑀺𑀢𑁆𑀢𑀯𑀺𑀯𑁂𑀓𑀤𑁆𑀯𑀬𑁂. 𑀤𑀼𑀢𑀺𑀬𑁂𑀦𑀸𑀢𑀺 𑀘𑀺𑀢𑁆𑀢𑀯𑀺𑀯𑁂𑀓𑁂𑀦. 𑀏𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀯𑀺𑀯𑁂𑀓𑀤𑁆𑀯𑀬𑀲𑁆𑀲 𑀯𑀸𑀘𑀓𑀪𑀽𑀢𑀸𑀦𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀩𑀸𑀮𑀪𑀸𑀯𑀲𑁆𑀲 𑀳𑁂𑀢𑀼𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀦𑀼𑀯𑀢𑁆𑀢𑀢𑀺. 𑀅𑀓𑀼𑀲𑀮𑀥𑀫𑁆𑀫𑁄 𑀳𑀺 𑀩𑀸𑀮𑀪𑀸𑀯𑀲𑁆𑀲 𑀳𑁂𑀢𑀼. 𑀆𑀲𑀬𑀧𑁄𑀲𑀦𑀦𑁆𑀢𑀺 𑀆𑀲𑀬𑀲𑁆𑀲 𑀯𑀺𑀲𑁄𑀥𑀦𑀁 𑀯𑀟𑁆𑀠𑀦𑀜𑁆𑀘. 𑀯𑀺𑀪𑀗𑁆𑀕𑁂 𑀦𑀻𑀯𑀭𑀡𑀸𑀦𑁂𑀯 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀉𑀧𑀭𑀺𑀛𑀸𑀦𑀗𑁆𑀕𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺. 𑀢𑀢𑁆𑀣 𑀉𑀧𑀭𑀺 𑀲𑀯𑀺𑀢𑀓𑁆𑀓𑀦𑁆𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀸𑀦𑀺 𑀛𑀸𑀦𑀗𑁆𑀕𑀸𑀦𑀺, 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀭𑀺𑀛𑀸𑀦𑀗𑁆𑀕𑀸𑀦𑀁 𑀧𑀘𑁆𑀘𑀦𑀻𑀓𑀧𑀝𑀺𑀧𑀓𑁆𑀔𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 ‘‘𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀛𑀸𑀦𑀗𑁆𑀕𑀸𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀲𑁂𑀦 𑀧𑀝𑀺𑀧𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺 ‘‘𑀦𑀻𑀯𑀭𑀡𑀸𑀦𑀁 𑀢𑀸𑀦𑁂𑀯 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸𑀦𑀻’’𑀢𑀺𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀧𑁂𑀝𑀓𑁂𑀢𑀺 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁂𑀦 𑀓𑀢𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀦𑀬𑀸𑀦𑀼𑀲𑀸𑀭𑀺𑀧𑀓𑀭𑀡𑀁, 𑀢𑀁 𑀧𑀦 𑀧𑀺𑀝𑀓𑀸𑀦𑀁 𑀯𑀡𑁆𑀡𑀦𑀸𑀪𑀽𑀢𑀢𑁆𑀢𑀸 ‘‘𑀧𑁂𑀝𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀢𑀓𑁆𑀓𑀦𑀁 𑀦𑀸𑀫 𑀆𑀭𑀫𑁆𑀫𑀡𑀧𑀭𑀺𑀓𑀧𑁆𑀧𑀦𑀦𑁆𑀢𑀺 𑀆𑀳 ‘‘𑀊𑀳𑀦’’𑀦𑁆𑀢𑀺. 𑀭𑀽𑀧𑀁 𑀭𑀽𑀧𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑀬𑁂 𑀆𑀓𑁄𑀝𑁂𑀦𑁆𑀢𑀲𑁆𑀲 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀆𑀳𑀦𑀦𑀁 𑀉𑀧𑀭𑀺 𑀆𑀳𑀦𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀦𑀬𑀦𑀁 𑀦𑀸𑀫 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀓𑀭𑀡𑀁. 𑀅𑀦𑀼𑀲𑀜𑁆𑀘𑀭𑀡𑀦𑁆𑀢𑀺 𑀅𑀦𑀼𑀧𑀭𑀺𑀩𑁆𑀪𑀫𑀦𑀁, 𑀢𑀜𑁆𑀘 𑀔𑀡𑀦𑁆𑀢𑀭𑀲𑁆𑀲 𑀢𑀣𑀸𑀓𑀸𑀭𑁂𑀦 𑀉𑀧𑁆𑀧𑀸𑀤𑀦𑀫𑁂𑀯, 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀏𑀓𑀲𑁆𑀲 𑀲𑀜𑁆𑀘𑀭𑀡𑀫𑀢𑁆𑀣𑀺, 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀈𑀤𑀺𑀲𑁂𑀲𑀼. 𑀅𑀦𑀼𑀫𑀚𑁆𑀚𑀦𑀦𑁆𑀢𑀺 𑀧𑀭𑀺𑀫𑀚𑁆𑀚𑀦𑀁. 𑀢𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑁂. 𑀲𑀳𑀚𑀸𑀢𑀸𑀦𑀼𑀬𑁄𑀚𑀦𑀁 𑀲𑀓𑀺𑀘𑁆𑀘𑀸𑀦𑀼𑀯𑀢𑁆𑀢𑀺𑀢𑀸𑀓𑀭𑀡𑁂𑀦. 𑀓𑀢𑁆𑀣𑀘𑀻𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀯𑀺𑀭𑀳𑀺𑀢𑁂𑀲𑀼 𑀲𑀯𑀺𑀘𑀸𑀭𑀘𑀺𑀢𑁆𑀢𑁂𑀲𑀼 𑀲𑀩𑁆𑀩𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀯𑀺𑀘𑀸𑀭𑁂𑀦 𑀲𑀳 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀯𑀺𑀢𑀓𑁆𑀓𑁄 𑀆𑀭𑀫𑁆𑀫𑀡𑁂 𑀅𑀪𑀺𑀦𑀺𑀭𑁄𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀧𑀞𑀫𑀸𑀪𑀺𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑁄. 𑀯𑀺𑀧𑁆𑀨𑀸𑀭𑀯𑀸𑀢𑀺 𑀅𑀯𑀽𑀧𑀲𑀦𑁆𑀢𑀲𑀪𑀸𑀯𑀢𑀸𑀬 𑀯𑁂𑀕𑀯𑀸, 𑀢𑁂𑀦𑁂𑀯𑁂𑀲 𑀤𑀼𑀢𑀺𑀬𑀚𑁆𑀛𑀸𑀦𑁂 𑀧𑀳𑀸𑀦𑀗𑁆𑀕𑀁 𑀚𑀸𑀢𑀁. 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑁂𑀲𑀽𑀢𑀺 𑀧𑀜𑁆𑀘𑀓𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀛𑀸𑀦𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀼𑀓𑁆𑀔𑁄 𑀯𑀺𑀬𑀸𑀢𑀺𑀆𑀤𑀺𑀫𑀸𑀳.

𑀯𑀺𑀯𑁂𑀓-𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀧𑀓𑁆𑀔𑁂 ‘‘𑀢𑀲𑁆𑀫𑀸 𑀯𑀺𑀯𑁂𑀓𑀸’’𑀢𑀺 𑀯𑀼𑀢𑁆𑀢𑀁, 𑀇𑀢𑀭𑀧𑀓𑁆𑀔𑁂 ‘‘𑀢𑀲𑁆𑀫𑀺𑀁 𑀯𑀺𑀯𑁂𑀓𑁂’’𑀢𑀺. 𑀧𑀺𑀦𑀬𑀢𑀻𑀢𑀺 𑀢𑀧𑁆𑀧𑁂𑀢𑀺, 𑀯𑀟𑁆𑀠𑁂𑀢𑀺 𑀯𑀸. 𑀨𑀭𑀡𑀭𑀲𑀸𑀢𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑁂 𑀩𑁆𑀬𑀸𑀧𑀦𑀭𑀲𑀸. 𑀲𑀸𑀢𑀮𑀓𑁆𑀔𑀡𑀦𑁆𑀢𑀺 𑀇𑀝𑁆𑀞𑀲𑀪𑀸𑀯𑀁, 𑀫𑀥𑀼𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀻𑀴𑀦𑀚𑁆𑀛𑀼𑀧𑁂𑀓𑁆𑀔𑀦𑀁 𑀅𑀓𑀢𑁆𑀯𑀸 𑀅𑀦𑀼 𑀅𑀦𑀼 𑀕𑀡𑁆𑀳𑀦𑀁 𑀉𑀧𑀓𑀸𑀭𑀺𑀢𑀸 𑀯𑀸 𑀅𑀦𑀼𑀕𑁆𑀕𑀳𑁄. 𑀯𑀦𑀫𑁂𑀯 𑀯𑀦𑀦𑁆𑀢𑀁. 𑀉𑀤𑀓𑀫𑁂𑀯 𑀉𑀤𑀓𑀦𑁆𑀢𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀸𑀓𑀝𑀪𑀸𑀯𑀢𑁄𑀢𑀺 𑀇𑀫𑀺𑀦𑀸 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀺𑀧𑀝𑀺𑀮𑀸𑀪𑀲𑀫𑀬𑁂𑀧𑀺 𑀲𑀼𑀔𑀁 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀧𑀸𑀓𑀝𑀁, 𑀧𑀻𑀢𑀺𑀬𑁂𑀯 𑀢𑀢𑁆𑀣 𑀧𑀸𑀓𑀝𑀸, 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀲𑀫𑀬𑁂 𑀘 𑀯𑀺𑀚𑁆𑀚𑀫𑀸𑀦𑀧𑀻𑀢𑀺𑀢𑁄𑀧𑀺 𑀲𑀼𑀔𑀫𑁂𑀯 𑀧𑀸𑀓𑀝𑀢𑀭𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀘𑁂𑀢𑀲𑀺𑀓𑀲𑀼𑀔𑀯𑀲𑁂𑀦𑁂𑀯 𑀧𑀝𑀺𑀮𑀤𑁆𑀥𑀭𑀲𑀸𑀦𑀼𑀪𑀯𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀓𑀸𑀬𑀺𑀓𑀲𑀼𑀔𑀯𑀲𑁂𑀦 𑀢𑀲𑁆𑀲 𑀧𑀻𑀢𑀺𑀲𑀫𑁆𑀧𑀬𑁄𑀕𑀲𑁆𑀲𑁂𑀯 𑀅𑀪𑀸𑀯𑁂𑀦 𑀇𑀥𑀸𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀬𑀜𑁆𑀘 𑀧𑀻𑀢𑀻𑀢𑀺𑀆𑀤𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀆𑀲𑀤𑀲𑁆𑀲𑀦𑀁, 𑀅𑀲𑁆𑀲𑀢𑁆𑀣𑀺𑀧𑀓𑁆𑀔𑁂 𑀢𑀤𑁆𑀥𑀺𑀢𑀧𑀘𑁆𑀘𑀬𑀤𑀲𑁆𑀲𑀦𑀁 𑀯𑀸. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂𑀦 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀯𑀲𑁂𑀦𑁂𑀯 ‘‘𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔’’𑀦𑁆𑀢𑀺 𑀇𑀤𑀁 𑀏𑀓𑀁 𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀯𑀺𑀪𑀢𑁆𑀢𑀺𑀬𑀸 𑀘 𑀅𑀮𑁄𑀧𑀁.

𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀢𑀺 𑀤𑁂𑀲𑀦𑀸𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀞𑀫𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀇𑀤𑀁 𑀆𑀤𑀺𑀓𑀫𑁆𑀫𑀺𑀓𑀯𑀲𑁂𑀦 𑀯𑀼𑀢𑁆𑀢𑀁, 𑀘𑀺𑀡𑁆𑀡𑀯𑀲𑀻𑀦𑀁 𑀧𑀦 𑀬𑁄𑀕𑀻𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀧𑀺 𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑁂𑀯. 𑀛𑀸𑀧𑁂𑀢𑀻𑀢𑀺 𑀤𑀳𑀢𑀺. 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀯𑀺𑀲𑀬𑀸𑀬 𑀯𑀺𑀧𑀲𑁆𑀲𑀦𑀸𑀬 𑀉𑀧𑀦𑀺𑀚𑁆𑀛𑀸𑀬𑀦𑀁 𑀓𑀣𑀁 𑀦𑀺𑀩𑁆𑀩𑀸𑀦𑀸𑀮𑀫𑁆𑀩𑀦𑀲𑁆𑀲 𑀫𑀕𑁆𑀕𑀲𑁆𑀲 𑀳𑁄𑀢𑀻𑀢𑀺 𑀆𑀳 𑀯𑀺𑀧𑀲𑁆𑀲𑀦𑀸𑀬𑀸𑀢𑀺𑀆𑀤𑀺. 𑀢𑀢𑁆𑀣 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀻𑀢𑀺 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀬𑀓𑁂𑀦 𑀲𑀳 𑀫𑀕𑁆𑀕𑁂𑀦𑁂𑀯 𑀢𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀅𑀲𑀫𑁆𑀫𑁄𑀳𑀢𑁄 𑀅𑀢𑁆𑀢𑀦𑁄 𑀲𑀺𑀚𑁆𑀛𑀢𑀺. 𑀅𑀣 𑀯𑀸 𑀫𑀕𑁆𑀕𑁂𑀦𑀸𑀢𑀺 𑀫𑀕𑁆𑀕𑀓𑀺𑀘𑁆𑀘𑁂𑀦, 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀜𑁆𑀜𑁄𑀢𑀺 𑀲𑀢𑁆𑀢𑁄. 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 ‘‘𑀲𑀘𑀺𑀢𑁆𑀢𑁂𑀓𑀕𑁆𑀕𑀢’’𑀦𑁆𑀢𑀺 𑀛𑀸𑀦𑀧𑀸𑀴𑀺𑀬𑀁 (𑀯𑀺𑀪. 𑁫𑁦𑁮 𑀆𑀤𑀬𑁄) 𑀅𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀢𑁆𑀢𑀸𑀢𑀺 𑀢𑀲𑁆𑀲𑀸 𑀛𑀸𑀦𑀧𑀸𑀴𑀺𑀬𑀸 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀢𑁆𑀢𑀸.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑀅𑀚𑁆𑀛𑀢𑁆𑀢𑀦𑁆𑀢𑀺 𑀛𑀸𑀦𑀯𑀺𑀲𑁂𑀲𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀫𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀛𑀸𑀦𑀜𑁆𑀳𑀺 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 𑀦 𑀳𑁄𑀢𑀺 𑀙𑀴𑀺𑀦𑁆𑀤𑁆𑀭𑀺𑀬𑀸𑀦𑀫𑁂𑀯 𑀢𑀩𑁆𑀪𑀸𑀯𑀢𑁄. 𑀔𑀼𑀤𑁆𑀤𑀓𑀸 𑀊𑀫𑀺𑀬𑁄 𑀯𑀻𑀘𑀺𑀬𑁄. 𑀫𑀳𑀢𑀺𑀬𑁄 𑀢𑀭𑀗𑁆𑀕𑀸. 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸𑀢𑀺𑀆𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺, 𑀛𑀸𑀦𑀩𑀮𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑀺𑀢𑀸𑀢𑀺 𑀕𑀫𑀺𑀢𑀸 𑀯𑀺𑀦𑀸𑀲𑀁 𑀧𑀸𑀧𑀺𑀢𑀸. 𑀧𑀭𑀺𑀬𑀸𑀬𑁄𑀢𑀺 𑀛𑀸𑀦𑀧𑀭𑀺𑀓𑁆𑀔𑀸𑀭𑁂 𑀛𑀸𑀦𑀯𑁄𑀳𑀸𑀭𑀢𑁆𑀢𑀸 𑀅𑀧𑀭𑀫𑀢𑁆𑀣𑀢𑁄.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑀢𑀤𑀥𑀺𑀕𑀫𑀸𑀬𑀸𑀢𑀺 𑀢𑀢𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬. 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀧𑀜𑁆𑀜𑀸𑀬 𑀲𑀳𑀘𑀭𑀡𑀧𑀭𑀺𑀘𑀬𑁂𑀦 𑀬𑀣𑀸 𑀲𑀫𑀯𑀸𑀳𑀺𑀪𑀸𑀯𑁄 𑀳𑁄𑀢𑀺, 𑀏𑀯𑀁 𑀬𑀼𑀢𑁆𑀢𑀺𑀢𑁄 𑀧𑀲𑁆𑀲𑀢𑀺. 𑀯𑀺𑀧𑀼𑀮𑀸𑀬𑀸𑀢𑀺 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀬. 𑀣𑀸𑀫𑀕𑀢𑀸𑀬𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀯𑀺𑀕𑀫𑁂𑀦 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀻𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸’’𑀢𑀺𑀆𑀤𑀺. (𑀧𑀸𑀭𑀸. 𑀅𑀝𑁆𑀞. 𑁧.𑁧𑁧 𑀢𑀢𑀺𑀬𑀚𑁆𑀛𑀸𑀦𑀓𑀣𑀸). 𑀉𑀧𑁂𑀓𑁆𑀔𑀸𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀉𑀧𑁂𑀓𑁆𑀔𑀁 𑀧𑀓𑀸𑀲𑁂𑀢𑀼𑀁 𑀉𑀧𑁂𑀓𑁆𑀔𑀸 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀯 𑀔𑀻𑀡𑀸𑀲𑀯𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀸𑀓𑀸𑀭𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸’’𑀢𑀺 𑀘, 𑀲𑀢𑁆𑀢𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀢𑁆𑀢𑀸 ‘‘𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸’’𑀢𑀺 𑀘, 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 ‘‘𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸’’𑀢𑀺 𑀘, 𑀓𑁂𑀯𑀮𑀸 ‘‘𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸’’𑀢𑀺 𑀘, 𑀢𑀢𑀺𑀬𑀚𑁆𑀛𑀸𑀦𑀲𑀳𑀕𑀢𑀸 𑀅𑀕𑁆𑀕𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀧𑀓𑁆𑀔𑀧𑀸𑀢𑀪𑀽𑀢𑀸 ‘‘𑀛𑀸𑀦𑀼𑀧𑁂𑀓𑁆𑀔𑀸’’𑀢𑀺 𑀘, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀳𑀕𑀢𑀸 𑀲𑀩𑁆𑀩𑀧𑀘𑁆𑀘𑀦𑀻𑀓𑀧𑀭𑀺𑀲𑀼𑀤𑁆𑀥𑀺𑀢𑀸𑀬 ‘‘𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸’’𑀢𑀺 𑀘 𑀢𑁂𑀦 𑀢𑁂𑀦 𑀅𑀯𑀢𑁆𑀣𑀸𑀪𑁂𑀤𑁂𑀦 𑀙𑀥𑀸 𑀯𑀼𑀢𑁆𑀢𑀸.

𑀯𑀻𑀭𑀺𑀬𑀫𑁂𑀯 𑀧𑀦 𑀅𑀦𑀘𑁆𑀘𑀸𑀭𑀤𑁆𑀥𑀅𑀦𑀢𑀺𑀲𑀺𑀣𑀺𑀮𑁂𑀲𑀼 𑀲𑀳𑀚𑀸𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀉𑀧𑁂𑀓𑁆𑀔𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 ‘‘𑀯𑀻𑀭𑀺𑀬𑀼𑀧𑁂𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀦𑁆𑀦𑀁 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀢𑁄 𑀧𑀼𑀩𑁆𑀩𑀪𑀸𑀕𑁂 𑀏𑀯 𑀦𑀻𑀯𑀭𑀡𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀻𑀦𑀁 𑀧𑀳𑀸𑀦𑀸𑀪𑀺𑀫𑀼𑀔𑀻𑀪𑀽𑀢𑀢𑁆𑀢𑀸 𑀢𑁂𑀲𑀁 𑀧𑀳𑀸𑀦𑁂𑀧𑀺 𑀅𑀩𑁆𑀬𑀸𑀧𑀸𑀭𑀪𑀸𑀯𑀽𑀧𑀕𑀫𑀦𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀲𑀫𑀸𑀥𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀅𑀝𑁆𑀞 𑀧𑀜𑁆𑀜𑀸 𑀘𑁂𑀯 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀪𑀽𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑁂 𑀢𑀲𑁆𑀲 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀘𑀢𑀲𑁆𑀲𑁄 𑀘𑀢𑀼𑀦𑁆𑀦𑀁 𑀨𑀮𑀲𑀫𑀸𑀧𑀢𑁆𑀢𑀻𑀦𑀁 𑀧𑀼𑀩𑁆𑀩𑀪𑀸𑀕𑁂 𑀢𑀲𑁆𑀲 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀯𑀲𑁂𑀦 𑀧𑀯𑀢𑁆𑀢𑀸 𑀘𑀢𑀲𑁆𑀲𑁄 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀯𑀲𑁂𑀦 𑀤𑁆𑀯𑁂𑀢𑀺 𑀤𑀲 𑀧𑀜𑁆𑀜𑀸 𑀘𑀸𑀢𑀺 𑀇𑀫𑁂 𑀅𑀝𑁆𑀞𑀸𑀭𑀲 𑀧𑀜𑁆𑀜𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀦𑀸𑀫. 𑀬𑀣𑀸𑀯𑀼𑀢𑁆𑀢𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯 𑀮𑀓𑁆𑀔𑀡𑀯𑀺𑀘𑀺𑀦𑀦𑁂𑀧𑀺 𑀫𑀚𑁆𑀛𑀢𑁆𑀢𑀪𑀽𑀢𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀦𑀸𑀫. 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸 𑀯𑁂𑀤𑀦𑀼𑀧𑁂𑀓𑁆𑀔𑀸 𑀦𑀸𑀫. 𑀇𑀫𑀸𑀲𑀁 𑀧𑀦 𑀤𑀲𑀦𑁆𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀦𑀁 ‘‘𑀢𑀢𑁆𑀣 𑀢𑀢𑁆𑀣 𑀆𑀕𑀢𑀦𑀬𑀢𑁄 𑀯𑀺𑀪𑀸𑀕𑁄 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀏𑀯𑀫𑀬𑀁 𑀤𑀲𑀯𑀺𑀥𑀸𑀧𑀻𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀦𑀬𑀢𑁄𑀢𑀺 𑀇𑀤𑀫𑁆𑀧𑀺 𑀳𑀺 𑀢𑀸𑀲𑀁 𑀯𑀺𑀪𑀸𑀕𑀤𑀲𑁆𑀲𑀦𑀲𑁆𑀲 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀧𑀤𑀁 𑀯𑀺𑀬 𑀯𑀺𑀲𑀼𑀁 𑀫𑀸𑀢𑀺𑀓𑀸𑀧𑀤𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑀤𑀲𑁆𑀲𑀦𑀲𑁆𑀲 𑀆𑀕𑀢𑀝𑁆𑀞𑀸𑀦𑀧𑀭𑀸𑀫𑀲𑀦𑀁 𑀆𑀕𑀢𑀝𑁆𑀞𑀸𑀦𑀲𑁆𑀲 𑀅𑀝𑁆𑀞𑀲𑀸𑀮𑀺𑀦𑀺𑀬𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁧 𑀢𑀢𑀺𑀬𑀚𑁆𑀛𑀸𑀦𑀓𑀣𑀸) 𑀬𑀁 𑀯𑀼𑀢𑁆𑀢𑀁 ‘‘𑀇𑀫𑀸𑀲𑀁 𑀧𑀦 𑀤𑀲𑀦𑁆𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀦𑀁 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀯𑀲𑁂𑀦 𑀯𑀺𑀪𑀸𑀕𑁄 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀏𑀯𑀫𑀬𑀁 𑀤𑀲𑀯𑀺𑀥𑀸𑀢𑀺𑀆𑀤𑀻’’𑀢𑀺, 𑀢𑀁 𑀅𑀫𑀦𑀲𑀺𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀦𑀬𑀢𑁄𑀢𑀺 ‘‘𑀇𑀥 (𑀔𑀻𑀡𑀸𑀲𑀯𑁄) 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺, 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁪𑁮; 𑀅. 𑀦𑀺. 𑁬.𑁧) 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀆𑀕𑀢𑀸, ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁮; 𑀫. 𑀦𑀺. 𑁧.𑁭𑁭; 𑁨.𑁩𑁦𑁯; 𑁩.𑁨𑁩𑁦) 𑀏𑀯𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀆𑀕𑀢𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀤𑀲𑀦𑁆𑀦𑀫𑁆𑀧𑀺 𑀉𑀧𑁂𑀓𑁆𑀔𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀧𑀤𑁂𑀲𑁂𑀲𑀼 𑀆𑀕𑀢𑀦𑀬𑀤𑀲𑁆𑀲𑀦𑀢𑁄 𑀘 𑀅𑀬𑀁 𑀤𑀲𑀯𑀺𑀥𑀸𑀧𑀺 𑀉𑀧𑁂𑀓𑁆𑀔𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀪𑀽𑀫𑀻𑀢𑀺𑀆𑀤𑀻𑀲𑀼 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀓𑀸𑀫𑀸𑀯𑀘𑀭𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀭𑀽𑀧𑀸𑀯𑀘𑀭𑀸𑀢𑀺𑀆𑀤𑀺𑀦𑀸 𑀪𑀽𑀫𑀺𑀢𑁄 𑀘, 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀅𑀲𑁂𑀓𑁆𑀔𑀸𑀦𑀫𑁂𑀯, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀧𑀼𑀕𑁆𑀕𑀮𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀢𑁄 𑀘, 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀢𑁄 𑀘, 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀙𑀴𑀸𑀭𑀫𑁆𑀫𑀡𑀸𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀢𑁄 𑀘, ‘‘𑀯𑁂𑀤𑀦𑀼𑀧𑁂𑀓𑁆𑀔𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸, 𑀇𑀢𑀭𑀸 𑀦𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦𑀸’’𑀢𑀺 𑀔𑀦𑁆𑀥𑀲𑀗𑁆𑀕𑀳𑀯𑀲𑁂𑀦 𑀘, ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀩𑁄𑀚𑁆𑀛𑀗𑁆𑀕𑀛𑀸𑀦 𑀧𑀸𑀭𑀺𑀲𑀼𑀤𑁆𑀥𑀺𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘 𑀅𑀢𑁆𑀣𑀢𑁄 𑀏𑀓𑀸. 𑀢𑀲𑁆𑀫𑀸 𑀏𑀓𑀓𑁆𑀔𑀡𑁂 𑀘 𑀢𑀸𑀲𑀼 𑀏𑀓𑀸𑀬 𑀲𑀢𑀺 𑀇𑀢𑀭𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀤𑀦𑀸𑀯𑀻𑀭𑀺𑀬𑀼𑀧𑁂𑀓𑁆𑀔𑀸𑀦𑀫𑁂𑀓𑀓𑁆𑀔𑀡𑁂 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀏𑀓𑀓𑁆𑀔𑀡𑀯𑀲𑁂𑀦 𑀘, ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀅𑀩𑁆𑀬𑀸𑀓𑀢𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸, 𑀢𑀣𑀸 𑀲𑁂𑀲𑀸. 𑀯𑁂𑀤𑀦𑀼𑀧𑁂𑀓𑁆𑀔𑀸 𑀧𑀦 𑀲𑀺𑀬𑀸 𑀅𑀓𑀼𑀲𑀮𑀸𑀧𑀻’’𑀢𑀺 𑀏𑀯𑀁 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦 𑀘, ‘‘𑀲𑀗𑁆𑀔𑁂𑀧𑀢𑁄 𑀘𑀢𑁆𑀢𑀸𑀭𑁄 𑀘 𑀥𑀫𑁆𑀫𑀸 𑀯𑀻𑀭𑀺𑀬𑀯𑁂𑀤𑀦𑀸𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀜𑀸𑀡𑀯𑀲𑁂𑀦𑀸’’𑀢𑀺 𑀏𑀯𑀁 𑀲𑀗𑁆𑀔𑁂𑀧𑀯𑀲𑁂𑀦 𑀘 𑀅𑀬𑀁 𑀤𑀲𑀯𑀺𑀥𑀸𑀧𑀺 𑀉𑀧𑁂𑀓𑁆𑀔𑀸 𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸.

𑀏𑀢𑁆𑀣 𑀘𑁂𑀢𑀸 𑀓𑀺𑀜𑁆𑀘𑀸𑀧𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀯𑀲𑁂𑀦 𑀲𑀭𑀽𑀧𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀦 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀢𑀢𑁆𑀣 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑁂𑀯 𑀢𑀸𑀲𑀁 𑀪𑀽𑀫𑀺𑀧𑀼𑀕𑁆𑀕𑀮𑀸𑀤𑀺𑀯𑀺𑀪𑀸𑀕𑁄 𑀦𑀬𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀢𑀢𑁆𑀣 𑀲𑀭𑀽𑀧𑀢𑁄 𑀯𑀼𑀢𑁆𑀢𑀜𑁆𑀘 𑀅𑀯𑀼𑀢𑁆𑀢𑀜𑁆𑀘 𑀏𑀓𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀦𑀬𑀢𑁄𑀢𑀺𑀆𑀤𑀻𑀳𑀺 𑀦𑀯𑀳𑀺 𑀧𑀓𑀸𑀭𑁂𑀳𑀺 𑀅𑀢𑀺𑀤𑁂𑀲𑁄 𑀓𑀢𑁄, 𑀢𑁂𑀦𑁂𑀯 ‘‘𑀥𑀫𑁆𑀫𑀲𑀗𑁆𑀕𑀳𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀲𑁂𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸𑀳𑀺 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁂 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑀸𑀬 𑀪𑀽𑀫𑀺𑀢𑁄 𑀓𑀸𑀫𑀸𑀯𑀘𑀭𑀸 𑀘 𑀧𑀼𑀕𑁆𑀕𑀮𑀢𑁄 𑀅𑀲𑁂𑀓𑁆𑀔𑀸𑀦𑀫𑁂𑀯 𑀘 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀢𑁄 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀆𑀭𑀫𑁆𑀫𑀡𑀢𑁄 𑀙𑀴𑀸𑀭𑀫𑁆𑀫𑀡𑀸, 𑀓𑀼𑀲𑀮𑀢𑁆𑀢𑀺𑀓𑀢𑁄 𑀅𑀩𑁆𑀬𑀸𑀓𑀢𑀸 𑀘𑀸𑀢𑀺 𑀧𑀡𑁆𑀟𑀺𑀢𑁂𑀳𑀺 𑀲𑀓𑁆𑀓𑀸 𑀜𑀸𑀢𑀼𑀁, 𑀢𑀣𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀘 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀘 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘 𑀛𑀸𑀦𑀼𑀧𑁂𑀓𑁆𑀔𑀸 𑀘 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸 𑀘 𑀅𑀢𑁆𑀣𑀢𑁄 𑀏𑀓𑀸𑀢𑀺𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑁂 𑀧𑀦𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀢𑁆𑀢𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸𑀤𑀻𑀳𑀺 𑀲𑀳 𑀏𑀓𑀓𑁆𑀔𑀡𑁂 𑀅𑀦𑀼𑀧𑁆𑀧𑀢𑁆𑀢𑀺𑀆𑀤𑀬𑁄 𑀘 𑀲𑀓𑁆𑀓𑀸 𑀜𑀸𑀢𑀼𑀁, 𑀬𑀣𑀸 𑀘 𑀙𑀴𑀗𑁆𑀕𑀼𑀧𑁂𑀓𑁆𑀔𑀸, 𑀏𑀯𑀁 𑀲𑁂𑀲𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀦𑀬𑀢𑁄 𑀪𑀽𑀫𑀺𑀆𑀤𑀺𑀯𑀺𑀪𑀸𑀕𑀼𑀤𑁆𑀥𑀸𑀭𑀦𑀬𑁄 𑀜𑀸𑀢𑀩𑁆𑀩𑁄. 𑀅𑀦𑀸𑀪𑁄𑀕𑀭𑀲𑀸𑀢𑀺 𑀧𑀡𑀻𑀢𑀲𑀼𑀔𑁂𑀧𑀺 𑀢𑀲𑁆𑀫𑀺𑀁 𑀅𑀯𑀦𑀢𑀺𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁄.

𑀧𑀼𑀕𑁆𑀕𑀮𑁂𑀦𑀸𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦. 𑀓𑀺𑀮𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀆𑀭𑀓𑁆𑀔𑀸. 𑀢𑀻𑀭𑀡𑀁 𑀓𑀺𑀘𑁆𑀘𑀲𑁆𑀲 𑀧𑀸𑀭𑀕𑀫𑀦𑀁. 𑀧𑀯𑀺𑀘𑀬𑁄 𑀯𑀻𑀫𑀁𑀲𑀸. 𑀇𑀤𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀬𑀲𑁆𑀫𑀸 𑀢𑀲𑁆𑀲 𑀦𑀸𑀫𑀓𑀸𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀦𑁆𑀢𑀺 𑀇𑀫𑀲𑁆𑀲 𑀢𑀲𑁆𑀫𑀸 𑀏𑀢𑀫𑀢𑁆𑀣𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀛𑀸𑀦𑀲𑀫𑀗𑁆𑀕𑀺𑀦𑁄. 𑀢𑀁𑀲𑀫𑀼𑀝𑁆𑀞𑀸𑀦𑁂𑀦𑀸𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁 𑀲𑀫𑀼𑀝𑁆𑀞𑀸𑀦𑀁 𑀓𑀸𑀭𑀡𑀁 𑀬𑀲𑁆𑀲 𑀭𑀽𑀧𑀲𑁆𑀲 𑀢𑁂𑀦 𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀭𑀽𑀧𑁂𑀦. 𑀅𑀲𑁆𑀲𑀸𑀢𑀺 𑀬𑁄𑀕𑀺𑀦𑁄. 𑀬𑀲𑁆𑀲𑀸𑀢𑀺 𑀭𑀽𑀧𑀓𑀸𑀬𑀲𑁆𑀲. 𑀨𑀼𑀝𑀢𑁆𑀢𑀸𑀢𑀺 𑀅𑀢𑀺𑀧𑀡𑀻𑀢𑁂𑀦 𑀭𑀽𑀧𑁂𑀦 𑀨𑀼𑀝𑀢𑁆𑀢𑀸. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀓𑀸𑀬𑀺𑀓𑀲𑀼𑀔𑀳𑁂𑀢𑀼𑀪𑀽𑀢𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀦𑀸𑀫𑀓𑀸𑀬𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀺𑀬𑀫𑀸𑀦𑁄 𑀏𑀯 𑀛𑀸𑀦𑀲𑀫𑀗𑁆𑀕𑀺𑀢𑀸𑀓𑀭𑀡𑁂 𑀓𑀸𑀭𑀺𑀬𑁄𑀧𑀘𑀸𑀭𑀢𑁄 ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀬𑀁𑀛𑀸𑀦𑀳𑁂𑀢𑀽’’𑀢𑀺. 𑀲𑀼𑀔𑀧𑀸𑀭𑀫𑀺𑀧𑁆𑀧𑀢𑁆𑀢𑁂𑀢𑀺 𑀲𑀼𑀔𑀲𑁆𑀲 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀁 𑀧𑀢𑁆𑀢𑁂. 𑀏𑀯𑀫𑁂𑀢𑁂𑀲𑀁 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀓𑀲𑁆𑀫𑀸 𑀛𑀸𑀦𑁂𑀲𑁆𑀯𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀓𑀢𑁆𑀣𑀸𑀢𑀺 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀁, 𑀓𑀲𑁆𑀫𑀺𑀁 𑀳𑁂𑀢𑀼𑀫𑁆𑀳𑀺 𑀲𑀢𑀻𑀢𑀺 𑀅𑀢𑁆𑀣𑁄. 𑀦𑀸𑀦𑀸𑀯𑀚𑁆𑀚𑀦𑁂𑀢𑀺 𑀅𑀧𑁆𑀧𑀦𑀸𑀯𑀻𑀣𑀺𑀆𑀯𑀚𑁆𑀚𑀦𑀢𑁄 𑀦𑀸𑀦𑀸 𑀪𑀺𑀦𑁆𑀦𑀁 𑀧𑀼𑀭𑀺𑀫𑀯𑀻𑀣𑀻𑀲𑀼 𑀆𑀯𑀚𑁆𑀚𑀦𑀁 𑀬𑀲𑁆𑀲 𑀉𑀧𑀘𑀸𑀭𑀲𑁆𑀲, 𑀢𑀲𑁆𑀫𑀺𑀁 𑀦𑀸𑀦𑀸𑀯𑀚𑁆𑀚𑀦𑁂. 𑀯𑀺𑀲𑀫𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑁄 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁄. 𑀉𑀧𑀘𑀸𑀭𑁂 𑀯𑀸𑀢𑀺𑀆𑀤𑀺 𑀧𑀓𑁆𑀔𑀦𑁆𑀢𑀭𑀤𑀲𑁆𑀲𑀦𑀁 𑀏𑀓𑀸𑀯𑀚𑁆𑀚𑀦𑀽𑀧𑀘𑀸𑀭𑁂𑀧𑀺 𑀯𑀸𑀢𑀺 𑀅𑀢𑁆𑀣𑁄. 𑀧𑀻𑀢𑀺𑀨𑀭𑀡𑁂𑀦𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑀦𑀸𑀯𑀻𑀣𑀺𑀬𑀸 𑀯𑀺𑀬 𑀏𑀓𑀯𑀻𑀣𑀺𑀬𑀫𑁆𑀧𑀺 𑀓𑀸𑀫𑀸𑀯𑀘𑀭𑀧𑀻𑀢𑀺𑀬𑀸 𑀨𑀭𑀡𑀫𑀢𑁆𑀢𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑁆𑀧𑀘𑁆𑀘𑀬𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄. 𑀲𑁄 ‘‘𑀧𑀳𑀻𑀦𑀲𑁆𑀲𑀸’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀤𑀸𑀦𑀦𑁆𑀢𑀭𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀧𑀳𑀻𑀦𑀲𑁆𑀲𑀸𑀧𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲𑀸’’𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂𑀢𑀺 𑀏𑀢𑁆𑀣 ‘‘𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀢𑀲𑁆𑀫𑀸𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑁄, 𑀢𑁂𑀦 𑀬𑀲𑁆𑀫𑀸 𑀏𑀢𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑁂…𑀧𑁂… 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀬𑀢𑁆𑀣 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀲𑁆𑀫𑀸 𑀘 𑀅𑀧𑁆𑀧𑀳𑀻𑀦𑀸𑀬𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸, 𑀢𑀲𑁆𑀫𑀸 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣𑀸𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀽𑀧𑀘𑀸𑀭𑁂. 𑀅𑀲𑁆𑀲𑀸𑀢𑀺 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲. 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺 𑀇𑀤𑀜𑁆𑀘 𑀧𑀘𑁆𑀘𑀬𑀫𑀢𑁆𑀢𑀤𑀲𑁆𑀲𑀦𑁂𑀦 𑀲𑀫𑁆𑀪𑀸𑀯𑀦𑀫𑀢𑁆𑀢𑀢𑁄 𑀯𑀼𑀢𑁆𑀢𑀁. 𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀲𑀫𑁆𑀪𑀸𑀯𑀦𑀸𑀧𑀺 𑀳𑀺 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀓𑀸𑀢𑀼𑀁 𑀬𑀼𑀢𑁆𑀢𑀸, 𑀯𑀺𑀢𑀓𑁆𑀓𑀯𑀺𑀘𑀸𑀭𑀭𑀳𑀺𑀢𑁂 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀢𑀤𑀼𑀧𑁆𑀧𑀢𑁆𑀢𑀺𑀲𑀫𑁆𑀪𑀸𑀯𑀦𑀸𑀧𑀺 𑀦 𑀬𑀼𑀢𑁆𑀢𑀸 𑀓𑀸𑀢𑀼𑀦𑁆𑀢𑀺. 𑀇𑀢𑀭𑀣𑀸 𑀓𑀼𑀲𑀮𑀘𑀺𑀢𑁆𑀢𑀓𑁆𑀔𑀡𑁂 𑀅𑀓𑀼𑀲𑀮𑀤𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄 ‘‘𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀲𑀫𑀻𑀧𑀢𑁆𑀣𑁂 𑀯𑀸 𑀏𑀢𑀁 𑀪𑀼𑀫𑁆𑀫𑀁, 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀦𑁆𑀢𑀭𑀯𑀻𑀣𑀻𑀲𑀽𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀚𑁆𑀛𑀸𑀦𑁂𑀢𑀺 𑀏𑀢𑁆𑀣𑀸𑀧𑀺 𑀅𑀦𑀦𑁆𑀢𑀭𑀯𑀻𑀣𑀻𑀲𑀼𑀧𑀺 𑀦 𑀢𑁆𑀯𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄, 𑀏𑀯𑀁 𑀉𑀧𑀭𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑁂𑀧𑀺. 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑁆𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀸𑀢𑀺 𑀇𑀤𑀁 ‘‘𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀸𑀪𑀸𑀯𑁂𑀦𑀸𑀢𑀺 𑀤𑀼𑀓𑁆𑀔𑀢𑀸𑀪𑀸𑀯𑁂𑀦. 𑀏𑀯𑀁 𑀲𑀼𑀔𑀸𑀪𑀸𑀯𑁂𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀏𑀢𑁂𑀦𑀸𑀢𑀺 𑀤𑀼𑀓𑁆𑀔𑀲𑀼𑀔𑀧𑀝𑀺𑀓𑁆𑀔𑁂𑀧𑀯𑀘𑀦𑁂𑀦. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀦𑀼𑀪𑀯𑀦𑀮𑀓𑁆𑀔𑀡𑀸𑀢𑀺 𑀅𑀢𑀺𑀇𑀝𑁆𑀞𑀅𑀢𑀺𑀅𑀦𑀺𑀝𑁆𑀞𑀸𑀦𑀁 𑀯𑀺𑀧𑀭𑀻𑀢𑀲𑁆𑀲 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀅𑀦𑀼𑀪𑀯𑀦𑀮𑀓𑁆𑀔𑀡𑀸, 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀏𑀯 𑀧𑀯𑀺𑀝𑁆𑀞𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀅𑀪𑀸𑀯𑀸.

𑀛𑀸𑀦𑀘𑀢𑀼𑀓𑁆𑀓𑀓𑀣𑀸𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁨. 𑀅𑀭𑀽𑀧𑀚𑁆𑀛𑀸𑀦𑀸𑀦𑀫𑁆𑀧𑀺 𑀅𑀗𑁆𑀕𑀲𑀫𑀢𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀗𑁆𑀕𑀳𑁄𑀢𑀺 𑀆𑀳 𑀓𑁂𑀲𑀜𑁆𑀘𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀻𑀢𑀺𑀆𑀤𑀺, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁨). 𑀢𑁂𑀲𑀼 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀦𑀺𑀭𑁄𑀥𑀧𑀸𑀤𑀓𑀁 𑀳𑁄𑀢𑀺, 𑀦 𑀇𑀢𑀭𑀸𑀦𑀺. 𑀤𑀽𑀭𑀓𑀸𑀭𑀡𑀢𑀁 𑀧𑀦 𑀲𑀦𑁆𑀥𑀸𑀬 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺 𑀦𑁂𑀲𑀫𑁆𑀧𑀺 𑀏𑀓𑀢𑁄 𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀻𑀢𑀺 𑀇𑀤𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀔𑀻𑀡𑀸𑀲𑀯𑀸𑀦𑀦𑁆𑀢𑀺𑀆𑀤𑀺. 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀦𑁆𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀺𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀲𑀸𑀥𑀓𑀁. 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸𑀤𑀺𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀇𑀤𑀜𑁆𑀳𑀺 𑀛𑀸𑀦𑀁 𑀪𑀕𑀯𑀢𑁄 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀤𑀸𑀬𑀓𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀬𑀺𑀤𑀦𑁆𑀢𑀺 𑀬𑀣𑀸 𑀇𑀤𑀁. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀸𑀤𑀺𑀅𑀢𑁆𑀣𑀁 𑀢𑀤𑀪𑀺𑀫𑀼𑀔𑀁 𑀦𑀻𑀳𑀭𑀡𑀬𑁄𑀕𑁆𑀕𑀁.

𑀛𑀸𑀦𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀦𑁆𑀢𑀺 𑀛𑀸𑀦𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀓𑀸𑀦𑀁 𑀛𑀸𑀦𑀧𑁆𑀧𑀝𑀺𑀮𑀸𑀪𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀸𑀦𑀁. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 𑀦𑀻𑀯𑀭𑀡𑀪𑀸𑀯𑀁 𑀢𑀤𑁂𑀓𑀝𑁆𑀞𑀢𑀜𑁆𑀘 𑀅𑀧𑁆𑀧𑀢𑁆𑀢𑀸𑀦𑀁 𑀅𑀢𑁆𑀢𑀼𑀓𑁆𑀓𑀁𑀲𑀦𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑀸𑀦𑀁 𑀅𑀳𑁄 𑀯𑀢 𑀫𑀫𑁂𑀯 𑀲𑀢𑁆𑀣𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀯𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀁 𑀫𑀸𑀦𑀸𑀤𑀻𑀦𑀁. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀛𑀸𑀦𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦’’𑀦𑁆𑀢𑀺𑀧𑀺 𑀧𑀸𑀞𑀁 𑀮𑀺𑀔𑀦𑁆𑀢𑀺, 𑀲𑁄 𑀧𑀫𑀸𑀤𑀧𑀸𑀞𑁄𑀢𑀺 𑀕𑀳𑁂𑀢𑀩𑁆𑀩𑁄 ‘‘𑀛𑀸𑀦𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦𑀁 𑀦𑀻𑀯𑀭𑀡𑀸𑀦𑀁 𑀅𑀪𑀸𑀯𑀲𑁆𑀲 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁄’’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀧𑀭𑀺𑀲𑀼𑀤𑁆𑀥𑀧𑀤𑁂𑀬𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁨) 𑀧𑀦 ‘‘𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀑𑀢𑀺𑀡𑁆𑀡𑀸𑀦𑀁 𑀧𑀯𑀢𑁆𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀢𑁆𑀣𑁄𑀢𑀺 𑀅𑀬𑀫𑁆𑀧𑀺 𑀧𑀸𑀞𑁄 𑀅𑀬𑀼𑀢𑁆𑀢𑁄 𑀏𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁄 𑀏𑀯 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀬𑀁 𑀧𑀸𑀞𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀤𑀲𑁆𑀲𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀦𑀦𑁆𑀢𑀺 𑀏𑀯𑀁 𑀦𑀻𑀯𑀭𑀡𑀪𑀸𑀯𑀧𑁆𑀧𑀢𑁆𑀢𑀤𑁄𑀲𑀸𑀦𑀁 𑀧𑀭𑀸𑀫𑀝𑁆𑀞𑀢𑁆𑀢𑀸 𑀅𑀬𑀁 𑀧𑀸𑀞𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀪𑀺𑀚𑁆𑀛𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀅𑀪𑀺𑀚𑁆𑀛𑀸-𑀲𑀤𑁆𑀤𑁂𑀦 𑀘 𑀅𑀦𑀻𑀯𑀭𑀡𑀲𑀪𑀸𑀯𑀲𑁆𑀲𑁂𑀯 𑀮𑁄𑀪𑀲𑁆𑀲 𑀫𑀸𑀦𑀸𑀤𑀻𑀦𑀜𑁆𑀘 𑀕𑀳𑀡𑀁 𑀛𑀸𑀦𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸. 𑀉𑀪𑀬𑀫𑁆𑀧𑀻𑀢𑀺 𑀅𑀦𑀗𑁆𑀕𑀡𑀢𑁆𑀢𑀁 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀢𑁆𑀢𑀜𑁆𑀘𑀸𑀢𑀺 𑀏𑀢𑀁 𑀉𑀪𑀬𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀢𑁆𑀣𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀼 𑀘 𑀲𑀼𑀢𑁆𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀦𑀻𑀯𑀭𑀡𑀲𑀪𑀸𑀯𑀧𑁆𑀧𑀢𑁆𑀢𑀸 𑀣𑀽𑀮𑀤𑁄𑀲𑀸𑀧𑀺 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀅𑀥𑀺𑀕𑀢𑀘𑀢𑀉𑀢𑁆𑀣𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀲𑀼𑀔𑀼𑀫𑀸 𑀏𑀯 𑀢𑁂 𑀕𑀳𑀺𑀢𑀸. 𑀅𑀗𑁆𑀕𑀡𑀼𑀧𑀓𑁆𑀓𑀺𑀮𑁂𑀲𑀲𑀸𑀫𑀜𑁆𑀜𑁂𑀦 𑀧𑀦𑁂𑀢𑁆𑀣 𑀲𑀼𑀢𑁆𑀢𑀸𑀦𑀁 𑀅𑀧𑀤𑀺𑀲𑀦𑀁. 𑀢𑀣𑀸 𑀳𑀺 ‘‘𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀼𑀢𑁆𑀢𑀯𑀲𑁂𑀦𑀸𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀫𑁆𑀳𑀻𑀢𑀺𑀆𑀤𑀺. 𑀇𑀤𑀸𑀦𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀁 𑀢𑀢𑁆𑀣 𑀜𑀸𑀡𑀜𑁆𑀘 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩-𑀲𑀤𑁆𑀤𑁄 𑀅𑀢𑀻𑀢𑀪𑀯𑀯𑀺𑀲𑀬𑁄, 𑀦𑀺𑀯𑀸𑀲-𑀲𑀤𑁆𑀤𑁄 𑀘 𑀓𑀫𑁆𑀫𑀲𑀸𑀥𑀦𑁄𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸’’𑀢𑀺. 𑀦𑀺𑀯𑀼𑀢𑁆𑀣𑀢𑀸 𑀘𑁂𑀢𑁆𑀣 𑀲𑀓𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀢𑀸, 𑀢𑁂𑀦𑀸𑀳 𑀅𑀦𑀼𑀪𑀽𑀢𑀸𑀢𑀺𑀆𑀤𑀺. 𑀇𑀤𑀸𑀦𑀺 𑀲𑀧𑀭𑀲𑀦𑁆𑀢𑀸𑀦𑀲𑀸𑀥𑀦𑀯𑀲𑁂𑀦 𑀦𑀺𑀯𑀸𑀲-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸 𑀦𑀺𑀯𑀼𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀯𑀭𑀺𑀢𑀼𑀁 𑀕𑁄𑀘𑀭𑀦𑀺𑀯𑀸𑀲𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑁄𑀘𑀭𑀪𑀽𑀢𑀸𑀧𑀺 𑀳𑀺 𑀥𑀫𑁆𑀫𑀸 𑀜𑀸𑀡𑁂𑀦 𑀦𑀺𑀯𑀼𑀢𑁆𑀣𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂 𑀧𑀦 𑀲𑀧𑀭𑀯𑀺𑀜𑁆𑀜𑀸𑀡𑀕𑁄𑀘𑀭𑀢𑀸𑀬 𑀤𑀼𑀯𑀺𑀥𑀸𑀢𑀺 𑀤𑀲𑁆𑀲𑁂𑀢𑀼𑀁 𑀅𑀢𑁆𑀢𑀦𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀦𑀺𑀯𑀼𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀥𑀸𑀧𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀦𑀫𑀢𑀕𑁆𑀕𑁂𑀧𑀺 𑀳𑀺 𑀲𑀁𑀲𑀸𑀭𑁂 𑀅𑀢𑁆𑀢𑀦𑀸 𑀅𑀯𑀺𑀜𑁆𑀜𑀸𑀢𑀧𑀼𑀩𑁆𑀩𑀸𑀦𑀁 𑀲𑀢𑁆𑀢𑀸𑀦𑀁 𑀔𑀦𑁆𑀥𑀸 𑀧𑀭𑁂𑀳𑁂𑀯 𑀓𑁂𑀳𑀺𑀘𑀺 𑀯𑀺𑀜𑁆𑀜𑀸𑀢𑀢𑁆𑀢𑀸 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸 𑀦𑀸𑀫 𑀯𑀼𑀢𑁆𑀢𑀸, 𑀢𑁂𑀲𑀁 𑀅𑀦𑀼𑀲𑁆𑀲𑀭𑀡𑀁 𑀧𑀼𑀭𑀺𑀫𑀢𑁄 𑀤𑀼𑀓𑁆𑀓𑀭𑀁 𑀬𑁂𑀳𑀺 𑀧𑀭𑁂𑀳𑀺 𑀯𑀺𑀜𑁆𑀜𑀸𑀢𑀢𑀸𑀬 𑀢𑁂 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸 𑀦𑀸𑀫 𑀚𑀸𑀢𑀸, 𑀢𑁂𑀲𑀁 𑀯𑀢𑁆𑀢𑀫𑀸𑀦𑀲𑀦𑁆𑀢𑀸𑀦𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀢𑁄. 𑀢𑁂 𑀘 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸 𑀤𑀼𑀯𑀺𑀥𑀸 𑀧𑀭𑀺𑀦𑀺𑀩𑁆𑀩𑀼𑀢𑀸 𑀅𑀧𑀭𑀺𑀦𑀺𑀩𑁆𑀩𑀼𑀢𑀸𑀢𑀺. 𑀢𑁂𑀲𑀼 𑀘 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀼𑀲𑁆𑀲𑀭𑀡𑀁 𑀤𑀼𑀓𑁆𑀓𑀭𑀁 𑀲𑀩𑁆𑀩𑀲𑁄 𑀲𑀼𑀲𑀫𑀼𑀘𑁆𑀙𑀺𑀦𑁆𑀦𑀲𑀦𑁆𑀢𑀸𑀦𑀢𑁆𑀢𑀸. 𑀢𑀁 𑀧𑀦 𑀲𑀺𑀔𑀸𑀧𑁆𑀧𑀢𑁆𑀢𑀧𑀭𑀯𑀺𑀜𑁆𑀜𑀸𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀙𑀺𑀦𑁆𑀦𑀯𑀝𑀼𑀫𑀓𑀸 𑀅𑀢𑀻𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑀸 𑀔𑀻𑀡𑀸𑀲𑀯𑀸 𑀙𑀺𑀦𑁆𑀦𑀲𑀁𑀲𑀸𑀭𑀫𑀕𑁆𑀕𑀢𑁆𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀅𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀦𑀫𑁆𑀧𑀺 𑀲𑀻𑀳𑁄𑀓𑁆𑀓𑀦𑁆𑀢𑀺𑀓𑀯𑀲𑀏𑀦 𑀅𑀦𑀼𑀲𑁆𑀲𑀭𑀡𑀁 𑀕𑀳𑀺𑀢𑀁. 𑀬𑀸𑀬 𑀲𑀢𑀺𑀬𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀯𑀺𑀳𑀺𑀢-𑀲𑀤𑁆𑀤𑁄 𑀯𑀺𑀥-𑀲𑀤𑁆𑀤𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀅𑀦𑁂𑀓𑀯𑀺𑀥’’𑀦𑁆𑀢𑀺, 𑀪𑀯𑀬𑁄𑀦𑀺𑀆𑀤𑀺𑀯𑀲𑁂𑀦 𑀩𑀳𑀼𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑀺𑀢𑀦𑁆𑀢𑀺 𑀯𑀸 𑀧𑀬𑀼𑀢𑁆𑀢𑀁 𑀯𑀡𑁆𑀡𑀺𑀢𑀦𑁆𑀢𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀅𑀦𑁂𑀓𑁂𑀳𑀺 𑀧𑀓𑀸𑀭𑁂𑀳𑀺 𑀯𑀺𑀳𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀫𑀚𑁆𑀛𑁂𑀧𑀤𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀅𑀦𑁂𑀓𑁂𑀳𑀺…𑀧𑁂… 𑀲𑀁𑀯𑀡𑁆𑀡𑀺𑀢’’𑀦𑁆𑀢𑀺. 𑀧𑀓𑀸𑀭𑁂𑀳𑀻𑀢𑀺 𑀦𑀸𑀫𑀕𑁄𑀢𑁆𑀢𑀸𑀤𑀺𑀧𑀓𑀸𑀭𑁂𑀳𑀺. 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀓𑀣𑀺𑀢𑀁. 𑀅𑀦𑀼-𑀲𑀤𑁆𑀤𑁄 𑀅𑀦𑀦𑁆𑀢𑀭𑀢𑁆𑀣𑀤𑀻𑀧𑀓𑁄𑀢𑀺 𑀆𑀳 ‘‘𑀅𑀪𑀺𑀦𑀺𑀦𑁆𑀦𑀸𑀫𑀺𑀢𑀫𑀢𑁆𑀢𑁂 𑀏𑀯𑀸’’𑀢𑀺, 𑀏𑀢𑁂𑀦 𑀘 𑀧𑀭𑀺𑀓𑀫𑁆𑀫𑀲𑁆𑀲 𑀆𑀭𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀧𑀽𑀭𑀺𑀢𑀧𑀸𑀭𑀫𑀻𑀦𑀜𑁆𑀳𑀻𑀢𑀺𑀆𑀤𑀺𑀦𑀸 𑀧𑀭𑀺𑀓𑀫𑁆𑀫𑀁 𑀯𑀺𑀦𑀸𑀧𑀺 𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑀆𑀭𑀤𑁆𑀥𑀧𑁆𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑁂𑀢𑀺 𑀅𑀦𑀼𑀲𑁆𑀲𑀭𑀺𑀢𑀼𑀁 𑀆𑀭𑀤𑁆𑀥𑀸𑀦𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸𑀦𑀁 𑀤𑀲𑁆𑀲𑀦𑀢𑁆𑀣𑁂. 𑀚𑀸𑀬𑀢𑀻𑀢𑀺 𑀚𑀸𑀢𑀺, 𑀪𑀯𑁄. 𑀲𑁄 𑀏𑀓𑀓𑀫𑁆𑀫𑀫𑀽𑀮𑀓𑁄 𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑁄 𑀔𑀦𑁆𑀥𑀧𑁆𑀧𑀩𑀦𑁆𑀥𑁄 𑀇𑀥 ‘‘𑀚𑀸𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑀏𑀓𑀫𑁆𑀧𑀻𑀢𑀺𑀆𑀤𑀺. 𑀓𑀧𑁆𑀧𑁄𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄, 𑀲𑁄 𑀧𑀦 𑀅𑀢𑁆𑀣𑀢𑁄 𑀓𑀸𑀮𑁄 𑀢𑀣𑀸𑀧𑀯𑀢𑁆𑀢𑀥𑀫𑁆𑀫𑀫𑀼𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄, 𑀢𑁂𑀲𑀁 𑀯𑀲𑁂𑀦𑀲𑁆𑀲 𑀧𑀭𑀺𑀳𑀸𑀦𑀺 𑀘 𑀯𑀟𑁆𑀠𑀺 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀁𑀯𑀝𑁆𑀝𑁄 𑀲𑀁𑀯𑀝𑁆𑀝𑀦𑀁 𑀯𑀺𑀦𑀸𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀁𑀯𑀝𑁆𑀝𑁄, 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄. 𑀲𑀁𑀯𑀝𑁆𑀝𑁂𑀦 𑀯𑀺𑀦𑀸𑀲𑁂𑀦 𑀲𑀳 𑀢𑀺𑀝𑁆𑀞𑀢𑀺 𑀲𑀻𑀮𑁂𑀦𑀸𑀢𑀺 𑀲𑀁𑀯𑀝𑁆𑀝𑀝𑁆𑀞𑀸𑀬𑀻. 𑀏𑀯𑀁 𑀯𑀺𑀯𑀝𑁆𑀝𑁄𑀢𑀺𑀆𑀤𑀻𑀲𑀼𑀧𑀺. 𑀢𑀢𑁆𑀣 𑀯𑀺𑀯𑀝𑁆𑀝𑀦𑀁 𑀯𑀺𑀯𑀝𑁆𑀝𑁄, 𑀉𑀧𑁆𑀧𑀢𑁆𑀢𑀺, 𑀯𑀟𑁆𑀠𑀺 𑀯𑀸. 𑀢𑁂𑀚𑁂𑀦 𑀯𑀺𑀦𑀸𑀲𑁄 𑀢𑁂𑀚𑁄𑀲𑀁𑀯𑀝𑁆𑀝𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑀸𑀢𑀺 𑀧𑀼𑀣𑀼𑀮𑀢𑁄 𑀧𑀦 𑀲𑀁𑀯𑀝𑁆𑀝𑀲𑀻𑀫𑀸𑀪𑁂𑀤𑁄 𑀦𑀢𑁆𑀣𑀺, 𑀢𑁂𑀦𑀸𑀳 ‘‘𑀲𑀤𑀸𑀧𑀻’’𑀢𑀺. 𑀏𑀓𑀦𑀕𑀭𑀺𑀬𑀸 𑀯𑀺𑀬 𑀅𑀲𑁆𑀲 𑀚𑀸𑀢𑀓𑁆𑀔𑀡𑁂 𑀯𑀺𑀓𑀸𑀭𑀸𑀧𑀚𑁆𑀚𑀦𑀢𑁄 𑀚𑀸𑀢𑀺𑀓𑁆𑀔𑁂𑀢𑁆𑀢𑀯𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀲𑀦𑁆𑀥𑀺𑀆𑀤𑀻𑀲𑀼 𑀓𑀫𑁆𑀧𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀻𑀢𑀺 𑀢𑀤𑀦𑁆𑀢𑁄𑀕𑀥𑀸𑀦𑀁 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀭𑁄𑀕𑀸𑀤𑀺𑀉𑀧𑀤𑁆𑀤𑀯𑁄 𑀯𑀽𑀧𑀲𑀫𑁆𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑀁 𑀯𑀺𑀲𑀬𑀓𑁆𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀏𑀓𑀲𑁆𑀫𑀺𑀁 𑀏𑀯 𑀔𑀡𑁂 𑀲𑀩𑁆𑀩𑀢𑁆𑀣 𑀲𑀭𑁂𑀦 𑀅𑀪𑀺𑀯𑀺𑀜𑁆𑀜𑀸𑀧𑀦𑀁, 𑀅𑀢𑁆𑀢𑀦𑁄 𑀭𑀽𑀧𑀓𑀸𑀬𑀤𑀲𑁆𑀲𑀦𑀜𑁆𑀘 𑀧𑀝𑀺𑀚𑀸𑀦𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁.

𑀏𑀢𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀧𑀯𑀢𑁆𑀢𑀨𑀮𑀪𑁄𑀚𑀦𑁄𑀢𑀺 𑀲𑀬𑀁𑀧𑀢𑀺𑀢𑀨𑀮𑀸𑀳𑀸𑀭𑁄, 𑀇𑀤𑀜𑁆𑀘 𑀢𑀸𑀧𑀲𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀥𑀽𑀧𑀧𑀢𑁆𑀢𑀺𑀬𑀸𑀢𑀺 𑀇𑀥 𑀘𑀭𑀺𑀫𑀪𑀯𑁂 𑀉𑀧𑀧𑀢𑁆𑀢𑀺𑀬𑀸. 𑀏𑀓𑀕𑁄𑀢𑁆𑀢𑁄𑀢𑀺 𑀢𑀼𑀲𑀺𑀢𑀕𑁄𑀢𑁆𑀢𑁂𑀦 𑀏𑀓𑀕𑁄𑀢𑁆𑀢𑁄. 𑀇𑀢𑀭𑁂𑀢𑀺 𑀯𑀡𑁆𑀡𑀸𑀤𑀬𑁄. 𑀢𑀺𑀢𑁆𑀣𑀺𑀬𑀸𑀢𑀺 𑀓𑀫𑁆𑀫𑀨𑀮𑀯𑀸𑀤𑀺𑀦𑁄. 𑀅𑀪𑀺𑀦𑀻𑀳𑀸𑀭𑁄𑀢𑀺 𑀅𑀪𑀺𑀦𑀻𑀳𑀸𑀭𑁄𑀧𑀮𑀓𑁆𑀔𑀺𑀢𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀭𑀡𑀓𑀸𑀮𑁄 𑀯𑀼𑀢𑁆𑀢𑁄. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀅𑀦𑁆𑀢𑀭𑀸 𑀓𑀺𑀜𑁆𑀘𑀺 𑀅𑀦𑀸𑀫𑀲𑀺𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀸 𑀏𑀯 𑀕𑀳𑀡𑀯𑀲𑁂𑀦 𑀏𑀯𑀁 𑀚𑀸𑀦𑀦𑀁 𑀇𑀘𑁆𑀙𑀺𑀢𑀧𑁆𑀧𑀤𑁂𑀲𑁄𑀓𑁆𑀓𑀫𑀦𑀦𑁆𑀢𑀺 𑀆𑀳 𑀢𑁂𑀲𑀜𑁆𑀳𑀻𑀢𑀺𑀆𑀤𑀺. 𑀉𑀪𑀬𑀣𑀸𑀧𑀻𑀢𑀺 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀧𑀺. 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦𑀧𑀻𑀢𑀺 𑀲𑀻𑀳𑀦𑀺𑀧𑀸𑀢𑀯𑀲𑁂𑀦𑀧𑀺. 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀝𑁆𑀞𑁂𑀦 𑀯𑀻𑀭𑀺𑀬𑀁 𑀆𑀢𑀸𑀧𑁄𑀢𑀺 𑀆𑀳 ‘‘𑀯𑀻𑀭𑀺𑀬𑀸𑀢𑀸𑀧𑁂𑀦𑀸’’𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁧𑁩. 𑀤𑀺𑀯𑀺 𑀪𑀯𑀢𑁆𑀢𑀸 𑀤𑀺𑀩𑁆𑀩𑀦𑁆𑀢𑀺 𑀤𑁂𑀯𑀸𑀦𑀁 𑀧𑀲𑀸𑀤𑀘𑀓𑁆𑀔𑀼 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑀺𑀩𑁆𑀩𑀲𑀤𑀺𑀲𑀢𑁆𑀢𑀸’’𑀢𑀺. 𑀤𑀽𑀭𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀲𑀼𑀔𑀼𑀫𑀲𑁆𑀲𑀸𑀧𑀺 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀁. 𑀯𑀻𑀭𑀺𑀬𑀸𑀭𑀫𑁆𑀪𑀯𑀲𑁂𑀦 𑀇𑀚𑁆𑀛𑀦𑀢𑁄 𑀲𑀩𑁆𑀩𑀸𑀧𑀺 𑀪𑀸𑀯𑀦𑀸, 𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀯𑀸 𑀇𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀯𑀺𑀲𑁂𑀲𑀢𑁄 𑀯𑀻𑀭𑀺𑀬𑀪𑀸𑀯𑀦𑀸𑀢𑀺 𑀆𑀳 ‘‘𑀯𑀻𑀭𑀺𑀬𑀪𑀸𑀯𑀦𑀸𑀩𑀮𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀤𑀺𑀩𑁆𑀩𑀯𑀺𑀳𑀸𑀭𑀯𑀲𑁂𑀦𑀸𑀢𑀺 𑀓𑀲𑀺𑀡𑀸𑀤𑀺𑀚𑁆𑀛𑀸𑀦𑀘𑀢𑀉𑀓𑁆𑀓𑀯𑀲𑁂𑀦. 𑀇𑀫𑀺𑀦𑀸 𑀤𑀽𑀭𑀓𑀸𑀭𑀡𑀢𑁆𑀣𑁂 𑀅𑀲𑁆𑀲 𑀤𑀺𑀩𑁆𑀩𑀪𑀸𑀯𑀫𑀸𑀳. 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀆𑀲𑀦𑁆𑀦𑀓𑀸𑀭𑀡𑀪𑀽𑀢𑀧𑀸𑀤𑀓𑀚𑁆𑀛𑀸𑀦𑀢𑁄 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀇𑀫𑀲𑁆𑀲 𑀤𑀺𑀩𑁆𑀩𑀯𑀺𑀳𑀸𑀭𑀧𑀅𑀬𑀸𑀧𑀦𑁆𑀦𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀁 𑀦𑀺𑀲𑁆𑀲𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑁆𑀲 𑀧𑀯𑀢𑁆𑀢𑀢𑁆𑀢𑀸𑀢𑀺𑀧𑀺 𑀅𑀢𑁆𑀣𑁄. 𑀤𑀺𑀯𑀼𑀥𑀸𑀢𑀼𑀲𑁆𑀲 𑀚𑀼𑀢𑀺𑀕𑀢𑀺𑀬𑁄𑀕𑀁 𑀲𑀦𑁆𑀥𑀸𑀬 𑀆𑀮𑁄𑀓𑀧𑀅𑀕𑁆𑀕𑀳𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀮𑁄𑀓𑀧𑀭𑀺𑀕𑁆𑀕𑀳𑁂𑀦𑀸𑀢𑀺 𑀓𑀲𑀺𑀡𑀸𑀮𑁄𑀓𑀧𑀭𑀺𑀕𑁆𑀕𑀳𑀯𑀲𑁂𑀦. 𑀤𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀭𑀽𑀧𑀤𑀲𑁆𑀲𑀦𑀪𑀸𑀯𑁂𑀦, 𑀇𑀫𑀺𑀦𑀸 ‘‘𑀘𑀓𑁆𑀔𑀢𑀺 𑀭𑀽𑀧𑀁 𑀯𑀺𑀪𑀸𑀯𑁂𑀢𑀻’’𑀢𑀺 𑀦𑀺𑀩𑁆𑀩𑀘𑀦𑀢𑁄 𑀘𑀓𑁆𑀔𑀼𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀘𑀓𑁆𑀔𑀼𑀓𑀺𑀘𑁆𑀘𑀓𑀭𑀡𑁂𑀦𑀸𑀢𑀺 𑀇𑀤𑀁 𑀘𑀓𑁆𑀔𑀼𑀫𑀺𑀯 𑀘𑀓𑁆𑀔𑀽𑀢𑀺 𑀉𑀧𑀫𑀸𑀬 𑀲𑀤𑀺𑀲𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀁, 𑀲𑀫𑀯𑀺𑀲𑀫𑀸𑀤𑀺𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀘𑀓𑁆𑀔𑀼𑀓𑀺𑀘𑁆𑀘𑀲𑁆𑀲 𑀓𑀭𑀡𑀢𑁄𑀢𑀺 𑀅𑀢𑁆𑀣𑁄.

𑀬𑀣𑀸𑀳𑀸𑀢𑀺 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀧𑁆𑀧𑀤𑁂𑀲𑀁 (𑀫. 𑀦𑀺. 𑁩.𑁨𑁪𑁨) 𑀦𑀺𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀢𑀺𑀆𑀤𑀻𑀲𑀼 𑀪𑀕𑀯𑀢𑁄 𑀩𑁄𑀥𑀺𑀫𑀽𑀮𑁂 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀲𑁆𑀲 ‘‘𑀇𑀤𑀁 𑀦𑀼 𑀔𑁄 𑀓𑀺𑀁, 𑀇𑀤𑀁 𑀦𑀼 𑀔𑁄 𑀓𑀺’’𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀦𑁆𑀦𑀸, 𑀢𑀢𑁄 𑀧𑀦 𑀯𑀺𑀘𑀺𑀓𑀺𑀘𑁆𑀙𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀢𑀸𑀦𑀺 𑀭𑀽𑀧𑀸𑀦𑀺 𑀅𑀫𑀦𑀲𑀺𑀓𑀭𑁄𑀢𑁄 𑀅𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀼𑀦 𑀲𑀩𑁆𑀩𑀭𑀽𑀧𑀸𑀦𑀺 𑀫𑀦𑀲𑀺𑀓𑀭𑁄𑀢𑁄 𑀭𑀓𑁆𑀔𑀲𑀸𑀤𑀻𑀲𑀼 𑀙𑀫𑁆𑀪𑀺𑀢𑀢𑁆𑀢𑀁 𑀉𑀧𑁆𑀧𑀦𑁆𑀦𑀁, ‘‘𑀓𑀺𑀫𑁂𑀢𑁆𑀣 𑀪𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀪𑀬𑀯𑀺𑀦𑁄𑀤𑀦𑀯𑀲𑁂𑀦 𑀫𑀦𑀲𑀺𑀓𑀭𑁄𑀢𑁄 𑀅𑀢𑁆𑀢𑀦𑁄 𑀫𑀦𑀲𑀺𑀓𑀸𑀭𑀓𑁄𑀲𑀮𑁆𑀮𑀁 𑀧𑀝𑀺𑀘𑁆𑀘 𑀉𑀧𑁆𑀧𑀺𑀮𑀲𑀗𑁆𑀔𑀸𑀢𑀸 𑀲𑀫𑀸𑀥𑀺𑀤𑀽𑀲𑀺𑀓𑀸 𑀕𑁂𑀳𑀲𑀺𑀢𑀧𑀻𑀢𑀺 𑀉𑀧𑁆𑀧𑀦𑁆𑀦𑀸, 𑀢𑀦𑁆𑀦𑀺𑀲𑁂𑀥𑀸𑀬 𑀫𑀦𑀲𑀺𑀓𑀸𑀭𑀯𑀻𑀭𑀺𑀬𑀁 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀸𑀮𑀲𑀺𑀬𑀲𑀗𑁆𑀔𑀸𑀢𑀁 𑀤𑀼𑀝𑁆𑀞𑀼𑀮𑁆𑀮𑀁, 𑀢𑀦𑁆𑀦𑀺𑀲𑁂𑀥𑀸𑀬 𑀧𑀼𑀦 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁, 𑀧𑀼𑀦 𑀢𑀦𑁆𑀦𑀺𑀲𑁂𑀥𑀸𑀬 𑀯𑀻𑀭𑀺𑀬𑀁 𑀲𑀺𑀣𑀺𑀮𑀬𑀢𑁄 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀉𑀧𑁆𑀧𑀦𑁆𑀦𑀁, 𑀢𑀦𑁆𑀦𑀺𑀲𑁂𑀥𑁂𑀢𑁆𑀯𑀸 𑀤𑀺𑀩𑁆𑀩𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀅𑀪𑀺𑀚𑀧𑁆𑀧𑀸𑀲𑀗𑁆𑀔𑀸𑀢𑀸 𑀢𑀡𑁆𑀳𑀸 𑀉𑀧𑁆𑀧𑀦𑁆𑀦𑀸, 𑀢𑀦𑁆𑀦𑀺𑀲𑁂𑀥𑀸𑀬 𑀳𑀻𑀦𑀸𑀤𑀺𑀦𑀸𑀦𑀸𑀭𑀽𑀧𑀸𑀦𑀺 𑀫𑀦𑀲𑀺𑀓𑀭𑁄𑀢𑁄 𑀦𑀸𑀦𑀸𑀭𑀫𑁆𑀫𑀡𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀸 𑀦𑀸𑀦𑀢𑁆𑀢𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀸. 𑀧𑀼𑀦 𑀢𑀁 𑀯𑀺𑀳𑀸𑀬 𑀏𑀓𑀫𑁂𑀯 𑀫𑀦𑀲𑀺𑀓𑀭𑁄𑀢𑁄 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀅𑀢𑀺𑀯𑀺𑀬 𑀘𑀺𑀦𑁆𑀢𑀦𑀁 𑀉𑀧𑁆𑀧𑀦𑁆𑀦𑀁. 𑀑𑀪𑀸𑀲𑀦𑁆𑀢𑀺 𑀧𑀭𑀺𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁 𑀑𑀪𑀸𑀲𑀁. 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀻𑀢𑀺 ‘‘𑀧𑀭𑀺𑀓𑀫𑁆𑀫𑁄𑀪𑀸𑀲𑀫𑀦𑀲𑀺𑀓𑀸𑀭𑀧𑀲𑀼𑀢𑀢𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺 𑀦 𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀲𑀳𑀺𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀫𑀦𑀼𑀲𑁆𑀲𑀸𑀦𑀁 𑀇𑀤𑀦𑁆𑀢𑀺 𑀫𑀸𑀦𑀼𑀲𑀓𑀁 𑀫𑀸𑀦𑀼𑀲𑀓𑀘𑀓𑁆𑀔𑀼𑀕𑁄𑀘𑀭𑀁 𑀣𑀽𑀮𑀭𑀽𑀧𑀁 𑀯𑀼𑀘𑁆𑀘𑀢𑀺. 𑀢𑀤𑁂𑀯 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑀽𑀧𑀘𑀸𑀭𑀢𑁆𑀢𑀸 𑀫𑀦𑀼𑀲𑁆𑀲𑀽𑀧𑀘𑀸𑀭𑁄𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀽𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺. 𑀭𑀽𑀧𑀤𑀲𑁆𑀲𑀦𑁂𑀦𑀸𑀢𑀺 𑀤𑀽𑀭𑀲𑀼𑀔𑀼𑀫𑀸𑀤𑀺𑀭𑀽𑀧𑀤𑀲𑁆𑀲𑀦𑁂𑀦.

𑀬𑀲𑁆𑀫𑀸 𑀦𑀺𑀬𑀫𑁂𑀦 𑀧𑀼𑀭𑁂𑀚𑀸𑀢𑀝𑁆𑀞𑀺𑀢𑀭𑀽𑀧𑀸𑀭𑀫𑁆𑀫𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑁂𑀳𑀺 𑀯𑀺𑀦𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀦 𑀘 𑀉𑀧𑁆𑀧𑀚𑁆𑀚𑀫𑀸𑀦𑀁 𑀪𑀺𑀚𑁆𑀚𑀫𑀸𑀦𑀁 𑀭𑀽𑀧𑀫𑀲𑁆𑀲 𑀆𑀭𑀫𑁆𑀫𑀡𑀁 𑀳𑁄𑀢𑀺 𑀤𑀼𑀩𑁆𑀩𑀮𑀢𑁆𑀢𑀸, 𑀘𑀼𑀢𑀺𑀘𑀺𑀢𑁆𑀢𑀜𑁆𑀘 𑀓𑀫𑁆𑀫𑀚𑀭𑀽𑀧𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀜𑁆𑀘 𑀉𑀧𑀧𑀢𑁆𑀢𑀺𑀓𑁆𑀔𑀡𑁂, 𑀢𑀲𑁆𑀫𑀸 𑀆𑀳 𑀘𑀼𑀢𑀺𑀓𑁆𑀔𑀡𑁂𑀢𑀺𑀆𑀤𑀺. 𑀭𑀽𑀧𑀤𑀲𑁆𑀲𑀦𑀫𑁂𑀯𑁂𑀢𑁆𑀣 𑀲𑀢𑁆𑀢𑀤𑀲𑁆𑀲𑀦𑀦𑁆𑀢𑀺 𑀘𑀯𑀫𑀸𑀦𑁂𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀯𑀼𑀢𑁆𑀢𑀁. 𑀅𑀪𑀺𑀭𑀽𑀧𑁂 𑀯𑀺𑀭𑀽𑀧𑁂𑀢𑀺𑀧𑀻𑀢𑀺 𑀇𑀤𑀁 𑀯𑀡𑁆𑀡-𑀲𑀤𑁆𑀤𑀲𑁆𑀲 𑀲𑀡𑁆𑀞𑀸𑀦𑀯𑀸𑀘𑀓𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀯𑀺𑀬. 𑀲𑀼𑀦𑁆𑀤𑀭𑀁 𑀕𑀢𑀺𑀁 𑀕𑀢𑀸 𑀲𑀼𑀕𑀢𑀸𑀢𑀺 𑀆𑀳 ‘‘𑀲𑀼𑀕𑀢𑀺𑀕𑀢𑁂’’𑀢𑀺. 𑀇𑀫𑀺𑀦𑀸 𑀧𑀦 𑀧𑀤𑁂𑀦𑀸𑀢𑀺 𑀬𑀣𑀸𑀓𑀫𑁆𑀫𑀼𑀧𑀕𑁂𑀢𑀺 𑀇𑀫𑀺𑀦𑀸 𑀧𑀤𑁂𑀦.

𑀦𑁂𑀭𑀬𑀺𑀓𑀸𑀦𑀁 𑀅𑀕𑁆𑀕𑀺𑀚𑀸𑀮𑀲𑀢𑁆𑀣𑀦𑀺𑀧𑀸𑀢𑀸𑀤𑀻𑀳𑀺 𑀯𑀺𑀪𑀺𑀦𑁆𑀦𑀲𑀭𑀻𑀭𑀯𑀡𑁆𑀡𑀁 𑀤𑀺𑀲𑁆𑀯𑀸 𑀢𑀤𑀦𑀦𑁆𑀢𑀭𑁂𑀳𑀺 𑀓𑀸𑀫𑀸𑀯𑀘𑀭𑀚𑀯𑀦𑁂𑀳𑁂𑀯 𑀜𑀸𑀢𑀁 𑀢𑁂𑀲𑀁 𑀤𑀼𑀓𑁆𑀔𑀸𑀦𑀼𑀪𑀯𑀦𑀫𑁆𑀧𑀺 𑀤𑀲𑁆𑀲𑀦𑀨𑀮𑀸𑀬𑀢𑁆𑀢𑀢𑀸𑀬 ‘‘𑀤𑀺𑀩𑁆𑀩𑀘𑀓𑁆𑀔𑀼𑀓𑀺𑀘𑁆𑀘𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀫𑀦𑀲𑀺𑀓𑀭𑁄𑀢𑀻𑀢𑀺 𑀢𑁂𑀲𑀁 𑀓𑀫𑁆𑀫𑀲𑁆𑀲 𑀜𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑀫𑁆𑀫𑀯𑀲𑁂𑀦 𑀓𑀺𑀦𑁆𑀦𑀼 𑀔𑁄𑀢𑀺𑀆𑀤𑀺𑀦𑀸 𑀫𑀦𑀲𑀺𑀓𑀭𑁄𑀢𑀺. 𑀅𑀣𑀲𑁆𑀲 𑀢𑀁 𑀓𑀫𑁆𑀫𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀉𑀧𑀭𑀺 𑀉𑀧𑁆𑀧𑀦𑁆𑀦𑁂𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀬𑀁 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀤𑁂𑀯𑀸𑀦𑀁 𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀦𑀁 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀧𑀭𑀺𑀓𑀫𑁆𑀫𑀁 𑀯𑀺𑀦𑀸 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀢𑁆𑀣𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀧𑀭𑀺𑀓𑀫𑁆𑀫𑁂𑀳𑀺 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀓𑀺𑀦𑁆𑀦𑀼 𑀔𑁄 𑀓𑀫𑁆𑀫𑀦𑁆𑀢𑀺𑀆𑀤𑀺𑀫𑀦𑀲𑀺𑀓𑀸𑀭𑀸𑀦𑀦𑁆𑀢𑀭𑀫𑁂𑀯 𑀓𑀫𑁆𑀫𑀁. 𑀓𑀫𑁆𑀫𑀲𑀻𑀲𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀘 𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀧𑁆𑀧𑀦𑀸𑀯𑀻𑀣𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑀦𑀸𑀕𑀢𑀁𑀲𑀜𑀸𑀡𑁂𑀧𑀺, 𑀢𑁂𑀦𑁂𑀯 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺…𑀧𑁂… 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀳𑁂𑀯 𑀇𑀚𑁆𑀛𑀦𑁆𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀯𑀲𑀻𑀪𑀽𑀢𑀸𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀧𑀭𑀺𑀓𑀫𑁆𑀫𑀁 𑀯𑀺𑀦𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀧𑀸𑀤𑀓𑀚𑁆𑀛𑀸𑀦𑀸𑀤𑀺𑀫𑀢𑁆𑀢𑁂𑀦 𑀘 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀯 𑀏𑀢𑀸𑀦𑀺 𑀜𑀸𑀡𑀸𑀦𑀺 𑀲𑀺𑀤𑁆𑀥𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀸𑀧𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀲𑁆𑀲 𑀲𑀢𑁆𑀢𑀲𑁆𑀲 𑀅𑀦𑀸𑀕𑀢𑁂 𑀧𑀯𑀢𑁆𑀢𑀺𑀁 𑀜𑀸𑀢𑀼𑀓𑀸𑀫𑀢𑀸𑀬 𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀦𑀫𑀦𑀦𑁆𑀢𑀭𑀁 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀅𑀦𑀸𑀕𑀢𑁂𑀲𑀼 𑀅𑀦𑁂𑀓𑀓𑀧𑁆𑀧𑁂𑀲𑀼 𑀉𑀧𑁆𑀧𑀚𑁆𑀚𑀦𑀸𑀭𑀳𑁂 𑀧𑀼𑀩𑁆𑀩𑁂 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀧𑁆𑀧𑀝𑀺𑀩𑀤𑁆𑀥𑁂 𑀢𑀤𑀸𑀭𑀫𑁆𑀫𑀡𑁂 𑀘 𑀲𑀩𑁆𑀩𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀲𑀫𑁆𑀫𑀼𑀢𑀺𑀜𑁆𑀘 𑀏𑀓𑀓𑁆𑀔𑀡𑁂 𑀆𑀮𑀫𑁆𑀩𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀅𑀦𑀸𑀕𑀢𑀁𑀲𑀜𑀆𑀡𑀲𑁆𑀲𑀸𑀧𑀺 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸.

𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀁 𑀯𑀺𑀬 𑀦𑀸𑀫𑀕𑁄𑀢𑁆𑀢𑀸𑀤𑀺𑀕𑀳𑀡𑀫𑁆𑀧𑀺 𑀅𑀢𑁆𑀣𑁂𑀯, 𑀢𑀜𑁆𑀘 𑀦 𑀅𑀪𑀺𑀜𑁆𑀜𑀸𑀓𑁆𑀔𑀡𑁂, 𑀅𑀣 𑀔𑁄 𑀢𑀤𑀦𑀦𑁆𑀢𑀭𑁂𑀲𑀼 𑀓𑀸𑀫𑀸𑀯𑀘𑀭𑀚𑀯𑀦𑀓𑁆𑀔𑀡𑁂𑀲𑀼 𑀏𑀯 𑀳𑁄𑀢𑀺 𑀦𑀸𑀫𑀧𑀭𑀺𑀓𑀧𑁆𑀧𑀓𑀸𑀮𑁂 𑀇𑀢𑀭𑀧𑀭𑀺𑀓𑀧𑁆𑀧𑀸𑀲𑀫𑁆𑀪𑀯𑀸 𑀓𑀫𑁆𑀫𑁂𑀦𑀼𑀧𑁆𑀧𑀢𑁆𑀢𑀺𑀬𑀜𑁆𑀘 𑀧𑀭𑀺𑀬𑀦𑁆𑀢𑀸𑀪𑀸𑀯𑀸. 𑀲𑀩𑁆𑀩𑀧𑀭𑀺𑀓𑀫𑁆𑀫𑀦𑀺𑀫𑀺𑀢𑁆𑀢𑁂𑀲𑀼 𑀧𑀦 𑀥𑀫𑁆𑀫𑁂𑀲𑀼 𑀅𑀢𑁆𑀣𑁂𑀲𑀼𑀧𑀺 𑀏𑀓𑀓𑁆𑀔𑀡𑁂 𑀅𑀪𑀺𑀜𑁆𑀜𑀸𑀬 𑀤𑀺𑀝𑁆𑀞𑁂𑀲𑀼 𑀬𑀣𑀸𑀭𑀼𑀘𑀺𑀯𑀲𑁂𑀦 𑀧𑀘𑁆𑀙𑀸 𑀏𑀯𑀁𑀦𑀸𑀫𑁄𑀢𑀺𑀆𑀤𑀺𑀦𑀸 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀯𑀺𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂𑀲𑀼 𑀩𑀳𑀽𑀲𑀼 𑀭𑀽𑀧𑁂𑀲𑀼 𑀣𑀫𑁆𑀪𑀓𑀼𑀫𑁆𑀪𑀸𑀤𑀺𑀯𑀺𑀓𑀧𑁆𑀧𑁄 𑀯𑀺𑀬. 𑀬𑀜𑁆𑀘 𑀓𑀢𑁆𑀣 𑀅𑀯𑀺𑀓𑀧𑁆𑀧𑀺𑀢𑀁, 𑀢𑀫𑁆𑀧𑀺 𑀯𑀺𑀓𑀧𑁆𑀧𑀦𑀸𑀭𑀳𑀦𑁆𑀢𑀺 𑀲𑀩𑁆𑀩𑀁 𑀦𑀸𑀫𑀕𑁄𑀢𑁆𑀢𑀸𑀤𑀺𑀢𑁄 𑀯𑀺𑀓𑀧𑁆𑀧𑀺𑀢𑀫𑁂𑀯 𑀳𑁄𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀫𑁆𑀧𑀺 𑀧𑀭𑀺𑀓𑀧𑁆𑀧𑀸𑀭𑀳𑀢𑀫𑁆𑀧𑀺 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 𑀏𑀯𑀁𑀦𑀸𑀫𑁄𑀢𑀺𑀆𑀤𑀺𑀦𑀸 𑀅𑀧𑀤𑁂𑀲𑀲𑀳𑀺𑀢𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘‘𑀦𑀸𑀫𑀕𑁄𑀢𑁆𑀢𑀸𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀏𑀓𑀓𑁆𑀔𑀡𑁂 𑀧𑀜𑁆𑀜𑀸𑀬𑀢𑀺, 𑀅𑀪𑀺𑀭𑀼𑀘𑀺𑀢𑀁 𑀧𑀦 𑀯𑀘𑀲𑀸 𑀯𑁄𑀳𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀧𑀺 𑀅𑀢𑁆𑀣𑀢𑁄 𑀧𑀼𑀭𑀺𑀫𑁂𑀳𑀺 𑀲𑀤𑀺𑀲𑀸 𑀏𑀯, 𑀧𑀼𑀩𑁆𑀩𑁂 𑀤𑀺𑀝𑁆𑀞𑀲𑁆𑀲 𑀧𑀼𑀦 𑀯𑁄𑀳𑀸𑀭𑀓𑀸𑀮𑁂𑀧𑀺 𑀧𑀭𑀺𑀓𑀧𑁆𑀧𑁂𑀢𑀩𑁆𑀩𑀢𑁄 𑀧𑀭𑀺𑀓𑀧𑁆𑀧𑀸𑀭𑀳𑀥𑀫𑁆𑀫𑀤𑀲𑁆𑀲𑀦𑀫𑁂𑀯 𑀢𑁂𑀳𑀺𑀧𑀺 𑀅𑀢𑁆𑀣𑀢𑁄 𑀉𑀧𑀕𑀢𑀁. 𑀏𑀓𑁂 𑀧𑀦 ‘‘𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀓𑀫𑁂𑀦𑁂𑀯 𑀅𑀢𑀻𑀢𑀸𑀦𑀸𑀕𑀢𑀥𑀫𑁆𑀫𑀚𑀸𑀦𑀦𑁂𑀦 𑀦𑀸𑀫𑀕𑁄𑀢𑁆𑀢𑀸𑀤𑀻𑀳𑀺 𑀲𑀤𑁆𑀥𑀺𑀁 𑀕𑀳𑀡𑀁 𑀲𑀼𑀓𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀫𑁂𑀯 𑀩𑀼𑀤𑁆𑀥𑀸𑀦𑀫𑁆𑀧𑀺 𑀲𑀩𑁆𑀩𑀁 𑀜𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀳𑀸𑀦𑀺𑀧𑁆𑀧𑀲𑀗𑁆𑀕𑀢𑁄. 𑀧𑀸𑀴𑀺𑀬𑀁 𑀇𑀫𑁂 𑀯𑀢 𑀪𑁄𑀦𑁆𑀢𑁄𑀢𑀺𑀆𑀤𑀺 𑀬𑀣𑀸𑀓𑀫𑁆𑀫𑀼𑀧𑀕𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀓𑀸𑀬𑀯𑀸𑀘𑀸𑀤𑀺 𑀘𑁂𑀢𑁆𑀣 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄.

𑀪𑀸𑀭𑀺𑀬𑀦𑁆𑀢𑀺 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀔𑀫𑀸𑀧𑀦𑁂 𑀳𑀺 𑀅𑀲𑀢𑀺 𑀆𑀦𑀦𑁆𑀢𑀭𑀺𑀬𑀫𑁂𑀯. 𑀢𑀲𑁆𑀲𑀸𑀢𑀺 𑀪𑀸𑀭𑀺𑀬𑀲𑀪𑀸𑀯𑀲𑁆𑀲 𑀉𑀧𑀯𑀸𑀤𑀲𑁆𑀲. 𑀫𑀳𑀮𑁆𑀮𑀓𑁄𑀢𑀺 𑀓𑁂𑀯𑀮𑀁 𑀯𑀬𑀲𑀸𑀯 𑀫𑀳𑀮𑁆𑀮𑀓𑁄, 𑀦 𑀜𑀸𑀡𑁂𑀦, ‘‘𑀦𑀸𑀬𑀁 𑀓𑀺𑀜𑁆𑀘𑀺 𑀮𑁄𑀓𑀯𑁄𑀳𑀸𑀭𑀫𑀢𑁆𑀢𑀫𑁆𑀧𑀺 𑀚𑀸𑀦𑀸𑀢𑀺, 𑀧𑀭𑀺𑀲𑀤𑀽𑀲𑀓𑁄 𑀏𑀯 𑀅𑀫𑁆𑀳𑀸𑀓𑀁 𑀮𑀚𑁆𑀚𑀺𑀢𑀩𑁆𑀩𑀲𑁆𑀲 𑀓𑀭𑀡𑀢𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀳𑀻𑀴𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀉𑀧𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀯𑀼𑀲𑁄𑀢𑀺𑀆𑀤𑀺𑀦𑀸 𑀣𑁂𑀭𑁄 𑀉𑀧𑀭𑀺𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀫𑀲𑁆𑀲 𑀆𑀓𑀗𑁆𑀔𑀦𑁆𑀢𑁄 𑀓𑀭𑀼𑀡𑀸𑀬 𑀅𑀢𑁆𑀢𑀸𑀦𑀫𑀸𑀯𑀺𑀓𑀸𑀲𑀺. 𑀧𑀸𑀓𑀢𑀺𑀓𑀁 𑀅𑀳𑁄𑀲𑀻𑀢𑀺 𑀫𑀕𑁆𑀕𑀸𑀯𑀭𑀡𑀁 𑀦𑀸𑀳𑁄𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀦𑀸 𑀯𑀼𑀟𑁆𑀠𑀢𑀭𑁄𑀢𑀺 𑀲𑀬𑀫𑁆𑀧𑀺 𑀯𑀼𑀟𑁆𑀠𑁄. 𑀏𑀢𑁆𑀣𑀸𑀧𑀺 ‘‘𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀅𑀦𑀸𑀕𑀸𑀫𑀻 𑀅𑀭𑀳𑀸 𑀘 𑀆𑀬𑀢𑀺𑀁 𑀲𑀁𑀯𑀭𑀢𑁆𑀣𑀸𑀬 𑀦 𑀔𑀫𑁂𑀬𑁆𑀬𑀼𑀁, 𑀲𑁂𑀲𑀸 𑀤𑁄𑀲𑁂𑀦𑀧𑀻𑀢𑀺 𑀆𑀳 ‘‘𑀲𑀘𑁂 𑀲𑁄 𑀦 𑀔𑀫𑀢𑀻’’𑀢𑀺.

𑀬𑁂 𑀘…𑀧𑁂… 𑀲𑀫𑀸𑀤𑀧𑁂𑀦𑁆𑀢𑀺, 𑀢𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀲𑀼 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀕𑁆𑀕𑀫𑀕𑁆𑀕𑀝𑁆𑀞𑁄 𑀅𑀥𑀺𑀧𑁆𑀧𑁂𑀢𑁄 𑀢𑀲𑁆𑀲𑁂𑀯 𑀅𑀜𑁆𑀜𑀸𑀭𑀸𑀥𑀦𑀸 𑀦𑀺𑀬𑀫𑀢𑁄, 𑀲𑁂𑀲𑀸𑀧𑀺 𑀯𑀸 𑀧𑀘𑁆𑀙𑀺𑀫𑀪𑀯𑀺𑀓𑀸 𑀲𑀻𑀮𑀸𑀤𑀻𑀲𑀼 𑀞𑀺𑀢𑀸 𑀢𑁂𑀲𑀫𑁆𑀧𑀺 𑀅𑀜𑁆𑀜𑀼𑀧𑁆𑀧𑀢𑁆𑀢𑀺𑀦𑀺𑀬𑀫𑀢𑁄. 𑀅𑀜𑁆𑀜𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀏𑀯𑀁 𑀲𑀫𑁆𑀧𑀤𑀦𑁆𑀢𑀺 𑀏𑀯𑀁 𑀦𑀺𑀩𑁆𑀩𑀢𑁆𑀢𑀺𑀓𑀁. 𑀬𑀣𑀸 𑀢𑀁 𑀅𑀯𑀺𑀭𑀚𑁆𑀛𑀦𑀓𑀦𑀺𑀩𑁆𑀩𑀢𑁆𑀢𑀺𑀓𑀁, 𑀏𑀯𑀫𑀺𑀤𑀫𑁆𑀧𑀺 𑀏𑀢𑀲𑁆𑀲 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀲𑀦𑁆𑀥𑀸𑀬 ‘‘𑀏𑀯𑀁𑀲𑀫𑁆𑀧𑀤𑀫𑀺𑀤’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀢𑀁 𑀯𑀸𑀘𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀯𑀸𑀘𑀦𑁆𑀢𑀺 𑀅𑀭𑀺𑀬𑀽𑀧𑀯𑀸𑀤𑀁. 𑀘𑀺𑀢𑁆𑀢𑀦𑁆𑀢𑀺 𑀅𑀭𑀺𑀬𑀽𑀧𑀯𑀸𑀤𑀓𑀘𑀺𑀢𑁆𑀢𑀁. 𑀤𑀺𑀝𑁆𑀞𑀺𑀦𑁆𑀢𑀺 𑀅𑀭𑀺𑀬𑀽𑀧𑀯𑀸𑀤𑁂 𑀤𑁄𑀲𑀸𑀪𑀸𑀯𑀤𑀲𑁆𑀲𑀦𑀤𑀺𑀝𑁆𑀞𑀺𑀁. ‘‘𑀲𑀩𑁆𑀩𑀫𑁂𑀢𑀁 𑀧𑀚𑀳𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀔𑀫𑀸𑀧𑀦𑀯𑀲𑁂𑀦 𑀅𑀧𑁆𑀧𑀳𑀸𑀬 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂𑀢𑀺 𑀬𑀣𑀸 𑀦𑀺𑀭𑀬𑀧𑀸𑀮𑁂𑀳𑀺 𑀆𑀳𑀭𑀺𑀢𑁆𑀯𑀸 𑀦𑀺𑀭𑀬𑁂 𑀞𑀧𑀺𑀢𑁄, 𑀏𑀯𑀁 𑀦𑀺𑀭𑀬𑁂 𑀞𑀧𑀺𑀢𑁄 𑀏𑀯, 𑀅𑀭𑀺𑀬𑀽𑀧𑀯𑀸𑀤𑁂𑀦𑁂𑀯𑀲𑁆𑀲 𑀇𑀤𑀁 𑀦𑀺𑀬𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀁 𑀬𑀣𑀸 𑀫𑀕𑁆𑀕𑁂𑀦 𑀨𑀮𑀁 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀫𑁆𑀧𑀚𑁆𑀚𑀦𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀩𑁆𑀩𑀧𑀸𑀧𑀫𑀽𑀮𑀢𑁆𑀢𑀸 𑀧𑀭𑀫𑀸 𑀧𑀥𑀸𑀦𑀸 𑀬𑁂𑀲𑀁 𑀯𑀚𑁆𑀚𑀸𑀦𑀁 𑀢𑀸𑀦𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺 𑀯𑀚𑁆𑀚𑀸𑀦𑀺, 𑀲𑀩𑁆𑀩𑀯𑀚𑁆𑀚𑁂𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁂𑀯 𑀧𑀭𑀫𑀁 𑀯𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀻𑀢𑀭𑀸𑀕𑀲𑁆𑀲 𑀫𑀭𑀡𑀢𑁄 𑀧𑀭𑀁 𑀦𑀸𑀫 𑀪𑀯𑀦𑁆𑀢𑀭𑀼𑀧𑀸𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀭𑀁 𑀫𑀭𑀡𑀸𑀢𑀺 𑀢𑀤𑀦𑀦𑁆𑀢𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀕𑁆𑀕𑀳𑀡𑁂’’𑀢𑀺. 𑀬𑁂𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀉𑀧𑀘𑁆𑀙𑁂𑀤𑁂𑀦𑁂𑀯 𑀓𑀸𑀬𑁄 𑀪𑀺𑀚𑁆𑀚𑀢𑀻𑀢𑀺 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑀸’’𑀢𑀺. 𑀏𑀢𑀺 𑀏𑀢𑀲𑁆𑀫𑀸 𑀲𑀼𑀔𑀦𑁆𑀢𑀺 𑀅𑀬𑁄, 𑀧𑀼𑀜𑁆𑀜𑀁. 𑀆𑀬𑀲𑁆𑀲𑀸𑀢𑀺 𑀆𑀕𑀫𑀦𑀲𑁆𑀲, 𑀳𑁂𑀢𑀼𑀲𑁆𑀲 𑀯𑀸. 𑀅𑀬𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀳𑀺 𑀧𑀯𑀢𑁆𑀢𑀢𑀻𑀢𑀺 𑀆𑀬𑁄, 𑀅𑀲𑁆𑀲𑀸𑀤𑁄. 𑀅𑀲𑀼𑀭𑀲𑀤𑀺𑀲𑀦𑁆𑀢𑀺 𑀧𑁂𑀢𑀸𑀲𑀼𑀭𑀲𑀤𑀺𑀲𑀁.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁧𑁪. 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀦𑀺𑀩𑁆𑀩𑀢𑁆𑀢𑀺𑀓𑀦𑁆𑀢𑀺 𑀦𑀺𑀧𑁆𑀨𑀸𑀤𑀦𑀁. 𑀬𑀁 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀞𑀸𑀦𑀁 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫. 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀁. 𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀬𑁂𑀲𑀁 𑀆𑀲𑀯𑀸𑀦𑀁 𑀔𑁂𑀧𑀦𑁂𑀦 𑀇𑀤𑀁 𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀁 𑀚𑀸𑀢𑀁, 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀯𑀲𑁂𑀦, 𑀢𑁂𑀲𑀁 𑀆𑀲𑀯𑀸𑀦𑀁 𑀯𑀲𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀗𑁆𑀕𑀳𑀡𑀢𑁄 𑀧𑀭𑀺𑀬𑀸𑀬𑀢𑁄 𑀧𑀓𑀸𑀭𑀦𑁆𑀢𑀭𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀅𑀢𑀻𑀢𑀓𑀸𑀮𑀯𑀲𑁂𑀦 ‘‘𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸𑀧𑀺 𑀅𑀪𑀺𑀲𑀫𑀬𑀓𑀸𑀮𑁂 𑀢𑀲𑁆𑀲 𑀢𑀲𑁆𑀲 𑀚𑀸𑀦𑀦𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀁 𑀉𑀧𑀸𑀤𑀸𑀬 ‘‘𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀓𑀸𑀫𑀸𑀲𑀯𑀸𑀤𑀻𑀦𑀁 𑀯𑀺𑀫𑀼𑀘𑁆𑀘𑀦𑁂𑀦𑁂𑀯 𑀢𑀤𑀯𑀺𑀦𑀸𑀪𑀸𑀯𑀢𑁄 𑀤𑀺𑀝𑁆𑀞𑀸𑀲𑀯𑀲𑁆𑀲𑀸𑀧𑀺 𑀯𑀺𑀫𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀔𑀻𑀡𑀸 𑀚𑀸𑀢𑀻’’𑀢𑀺 𑀚𑀸𑀦𑀦𑀁 𑀓𑀺𑀮𑁂𑀲𑀓𑁆𑀔𑀬𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺𑀆𑀤𑀺𑀚𑀸𑀦𑀦𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀢𑀲𑁆𑀲 𑀪𑀽𑀫𑀺’’𑀦𑁆𑀢𑀺. 𑀢𑀢𑁆𑀣 𑀪𑀽𑀫𑀺𑀦𑁆𑀢𑀺 𑀯𑀺𑀲𑀬𑀁, 𑀢𑀻𑀲𑀼 𑀓𑀸𑀮𑁂𑀲𑀼𑀧𑀺 𑀚𑀸𑀢𑀺𑀓𑁆𑀔𑀬𑀁 𑀧𑀢𑀺 𑀉𑀚𑀼𑀓𑀫𑁂𑀯 𑀯𑀸𑀬𑀸𑀫𑀸𑀲𑀫𑁆𑀪𑀯𑁂𑀧𑀺 𑀢𑀁 𑀧𑀢𑀺 𑀯𑀸𑀬𑀸𑀫𑀓𑀭𑀡𑀲𑁆𑀲 𑀲𑀸𑀢𑁆𑀣𑀓𑀢𑀁, 𑀢𑀲𑁆𑀲 𑀅𑀦𑀸𑀕𑀢𑀓𑁆𑀔𑀦𑁆𑀥𑀸𑀦𑀼𑀧𑁆𑀧𑀢𑁆𑀢𑀺𑀨𑀮𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 𑀬𑀸 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸𑀢𑀺𑀆𑀤𑀺𑀦𑀸 𑀳𑀺 𑀫𑀕𑁆𑀕𑁂𑀦𑀸𑀯𑀺𑀳𑀢𑀓𑀺𑀮𑁂𑀲𑁂𑀳𑁂𑀯 𑀆𑀬𑀢𑀺𑀁 𑀔𑀦𑁆𑀥𑀸𑀦𑀁 𑀚𑀸𑀢𑀺 𑀳𑁂𑀲𑁆𑀲𑀢𑀺, 𑀢𑁂𑀲𑀜𑁆𑀘 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀯𑀺𑀦𑀸𑀲𑁂 𑀲𑀢𑀺 𑀔𑀦𑁆𑀥𑀸 𑀦 𑀚𑀸𑀬𑀺𑀲𑁆𑀲𑀦𑁆𑀢𑀺, 𑀓𑀺𑀮𑁂𑀲𑀸𑀦𑀜𑁆𑀘 𑀢𑁂𑀓𑀸𑀮𑀺𑀓𑀢𑀸𑀬 𑀚𑀸𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀯𑀺𑀦𑀸𑀲𑀬𑁄𑀕𑁂𑀧𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀓𑀺𑀮𑁂𑀲𑀯𑀺𑀭𑀼𑀤𑁆𑀥𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑀼𑀧𑁆𑀧𑀸𑀤𑀦𑀫𑁂𑀯 𑀢𑀩𑁆𑀩𑀺𑀦𑀸𑀲𑁄 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑁄𑀧𑀦𑀺𑀧𑀸𑀢𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀩𑀻𑀚𑀲𑀦𑁆𑀢𑀸𑀦𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀦𑀺𑀧𑀸𑀢𑁂𑀦 𑀆𑀬𑀢𑀺𑀁 𑀩𑀻𑀚𑀢𑁆𑀢𑀸𑀦𑀼𑀧𑁆𑀧𑀢𑁆𑀢𑀺 𑀯𑀺𑀬, 𑀇𑀢𑀺 𑀫𑀕𑁆𑀕𑀓𑁆𑀔𑀡𑀼𑀧𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀓𑀺𑀮𑁂𑀲𑀸𑀪𑀸𑀯𑁂𑀦 𑀓𑀺𑀮𑁂𑀲𑀨𑀮𑀸𑀦𑀁 𑀔𑀦𑁆𑀥𑀸𑀦𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑁂𑀯 𑀚𑀸𑀢𑀺𑀓𑁆𑀔𑀬𑁄𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀻𑀬𑀢𑀺, 𑀢𑁂𑀦𑀸𑀳 ‘‘𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸’’𑀢𑀺. 𑀏𑀢𑁆𑀣 𑀘𑀸𑀬𑀫𑀢𑁆𑀣𑁄 𑀓𑀺𑀮𑁂𑀲𑀸𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀸𑀤𑀺𑀢𑀢𑁆𑀢𑀸 𑀧𑀘𑁆𑀘𑀬𑀸𑀪𑀸𑀯𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑀻 𑀔𑀦𑁆𑀥𑀸𑀦𑀁 𑀚𑀸𑀢𑀺 𑀢𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀯𑁄𑀳𑀸𑀭𑀢𑁄 𑀔𑀻𑀡𑀸 𑀫𑁂 𑀚𑀸𑀢𑀻𑀢𑀺. 𑀦 𑀳𑀺 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑁂𑀦 𑀯𑀺𑀦𑀸𑀲𑁄 𑀲𑀫𑁆𑀪𑀯𑀢𑀺, 𑀲𑀫𑁆𑀪𑀯𑁂 𑀘 𑀢𑀲𑁆𑀲 𑀧𑀘𑁆𑀘𑀬𑀦𑁆𑀢𑀭𑀢𑀸𑀤𑀺𑀧𑁆𑀧𑀲𑀗𑁆𑀕𑀢𑁄. 𑀢𑀩𑁆𑀩𑀺𑀭𑀼𑀤𑁆𑀥𑀓𑁆𑀔𑀡𑀼𑀧𑁆𑀧𑀸𑀤𑀦𑀫𑁂𑀯 𑀢𑀩𑁆𑀩𑀺𑀦𑀸𑀲𑀼𑀧𑁆𑀧𑀸𑀤𑀦𑀁. 𑀢𑀦𑁆𑀢𑀺 𑀔𑀻𑀡𑀚𑀸𑀢𑀺𑀁 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀫𑁂 𑀧𑀓𑀸𑀭𑀸 𑀇𑀢𑁆𑀣𑀁, 𑀢𑀩𑁆𑀪𑀸𑀯𑁄 𑀇𑀢𑁆𑀣𑀢𑁆𑀢𑀁, 𑀢𑀤𑀢𑁆𑀣𑀸𑀬. 𑀤𑀲𑁆𑀲𑁂𑀦𑁆𑀢𑁄𑀢𑀺 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄𑀢𑀺.

𑀯𑀺𑀚𑁆𑀚𑀸𑀢𑁆𑀢𑀬𑀓𑀣𑀸𑀯𑀡𑁆𑀡𑀦𑀸𑀦𑀬𑁄 𑀦𑀺𑀝𑁆𑀞𑀺𑀢𑁄.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁧𑁫. 𑀅𑀜𑁆𑀜𑀸𑀡𑀦𑁆𑀢𑀺 𑀥𑀺-𑀲𑀤𑁆𑀤𑀬𑁄𑀕𑁂𑀦 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀬𑀲𑀲𑀸𑀢𑀺 𑀧𑀭𑀺𑀯𑀸𑀭𑁂𑀦. 𑀓𑁄𑀢𑀽𑀳𑀮𑀘𑁆𑀙𑀭𑁂𑀢𑀺 𑀓𑁄𑀢𑀽𑀳𑀮𑁂 𑀅𑀘𑁆𑀙𑀭𑁂 𑀘. 𑀅𑀬𑀦𑁆𑀢𑀺 𑀅𑀫𑀺𑀓𑁆𑀓𑀦𑁆𑀢-𑀲𑀤𑁆𑀤𑁄. 𑀦𑀬𑀺𑀤𑀁 𑀆𑀫𑁂𑀟𑀺𑀢𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁, 𑀅𑀣 𑀔𑁄 𑀅𑀢𑁆𑀣𑀤𑁆𑀯𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀣 𑀯𑀸𑀢𑀺𑀆𑀤𑀺𑀫𑀸𑀳. 𑀅𑀯𑀺𑀲𑁂𑀲𑁂𑀦 𑀅𑀢𑁆𑀣𑀲𑀸𑀫𑀜𑁆𑀜𑁂𑀦 𑀦𑀺𑀧𑁆𑀨𑀦𑁆𑀦𑁄 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀤𑁂𑀲𑀦𑀸𑀧𑀲𑀸𑀤𑀸𑀤𑀺𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬𑀧𑀺 𑀢𑀣𑁂𑀯 𑀢𑀺𑀝𑁆𑀞𑀢𑀺 𑀧𑀼𑀩𑁆𑀩𑁂 𑀦𑀺𑀧𑁆𑀨𑀦𑁆𑀦𑀢𑁆𑀢𑀸𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀦𑁆𑀢𑀁…𑀧𑁂… 𑀧𑀲𑀸𑀤𑁄’’𑀢𑀺. 𑀅𑀥𑁄𑀫𑀼𑀔𑀞𑀧𑀺𑀢𑀁 𑀓𑁂𑀦𑀘𑀺. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀲𑀬𑀫𑁂𑀯. 𑀧𑀭𑀺𑀬𑀸𑀬𑁂𑀳𑀻𑀢𑀺 𑀧𑀓𑀸𑀭𑁂𑀳𑀺, 𑀅𑀭𑀲𑀭𑀽𑀧𑀢𑁆𑀢𑀸𑀤𑀺𑀧𑀝𑀺𑀧𑀸𑀤𑀓𑀓𑀸𑀭𑀡𑁂𑀳𑀺 𑀯𑀸.

𑀕𑀫𑀼𑀥𑀸𑀢𑀼𑀲𑁆𑀲 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸𑀪𑀸𑀯𑀸 𑀕𑁄𑀢𑀫𑀁 𑀲𑀭𑀡𑀦𑁆𑀢𑀺 𑀇𑀤𑀁 𑀧𑀤𑀤𑁆𑀯𑀬𑀫𑁆𑀧𑀺 𑀦 𑀉𑀧𑀬𑁄𑀕𑀯𑀘𑀦𑀁. 𑀅𑀧𑀺 𑀘 𑀔𑁄 𑀧𑀼𑀭𑀺𑀫𑀫𑁂𑀯, 𑀧𑀘𑁆𑀙𑀺𑀫𑀁 𑀧𑀦 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑁄𑀢𑀫𑀁 𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀘 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀖𑀲𑁆𑀲𑀸𑀢𑀺 𑀅𑀖𑀢𑁄 𑀧𑀸𑀧𑀢𑁄. 𑀢𑀸𑀢𑀸𑀢𑀺 𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀺𑀲𑁆𑀲𑀓𑁆𑀓𑀲𑁆𑀲𑁂𑀯 𑀬𑀼𑀢𑁆𑀢𑀢𑁆𑀢𑀸. 𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂𑀢𑀺 𑀧𑀤𑀤𑁆𑀯𑀬𑁂𑀦𑀸𑀧𑀺 𑀨𑀮𑀝𑁆𑀞𑀸 𑀏𑀯 𑀤𑀲𑁆𑀲𑀺𑀢𑀸, 𑀦 𑀫𑀕𑁆𑀕𑀝𑁆𑀞𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀸’’𑀢𑀺 𑀆𑀳. 𑀯𑀺𑀢𑁆𑀣𑀸𑀭𑁄𑀢𑀺 𑀇𑀫𑀺𑀦𑀸 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑀯𑀼𑀢𑁆𑀢𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁂𑀚𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁. 𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺 𑀅𑀯𑀺𑀭𑁄𑀥𑀢𑁆𑀣𑀤𑀻𑀧𑀦𑀢𑁄 𑀅𑀯𑀺𑀭𑀼𑀤𑁆𑀥𑀲𑀼𑀘𑀺𑀁 𑀧𑀡𑀻𑀢𑀁 𑀯𑀸. 𑀯𑀸𑀘𑀸𑀬 𑀧𑀕𑀼𑀡𑀻𑀓𑀢𑁆𑀢𑀩𑁆𑀩𑀢𑁄, 𑀧𑀓𑀝𑁆𑀞𑁂𑀳𑀺 𑀲𑀤𑁆𑀤𑀢𑁆𑀣𑀕𑀼𑀡𑁂𑀳𑀺 𑀬𑁄𑀕𑀢𑁄 𑀯𑀸 𑀧𑀕𑀼𑀡𑀁. 𑀲𑀁𑀳𑀢𑁄𑀢𑀺 𑀖𑀝𑀺𑀢𑁄 𑀲𑀫𑁂𑀢𑁄. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀧𑀼𑀭𑀺𑀲𑀬𑀼𑀕𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀝𑁆𑀞 𑀘 𑀧𑀼𑀕𑁆𑀕𑀮𑀥𑀫𑁆𑀫𑀤𑀲𑀸 𑀢𑁂𑀢𑀺 𑀢𑁂 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀥𑀫𑁆𑀫𑀤𑀲𑀸.

𑀲𑀭𑀡𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀬𑀳𑀺𑀁𑀲𑀦𑀸𑀤𑀺𑀅𑀢𑁆𑀣𑁂𑀦 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀦𑀸𑀫, 𑀢𑀤𑁂𑀯 𑀫𑁂 𑀭𑀢𑀦𑀢𑁆𑀢𑀬𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀦𑁆𑀢𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀤𑀺𑀕𑀼𑀡𑀯𑀲𑁂𑀦 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁 𑀦𑀸𑀫. 𑀬𑀣𑀸𑀯𑀼𑀢𑁆𑀢𑁂𑀦 𑀇𑀫𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀭𑀡𑀁 𑀕𑀘𑁆𑀙𑀢𑀺 𑀦𑀸𑀫. 𑀏𑀢𑀲𑁆𑀲 𑀘 𑀲𑀭𑀡𑀕𑀫𑀦𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀤𑀼𑀯𑀺𑀥𑁄 𑀧𑀪𑁂𑀤𑁄. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀁 𑀲𑀭𑀡𑀕𑀫𑀦𑀽𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦 𑀫𑀕𑁆𑀕𑀓𑁆𑀔𑀡𑁂𑀬𑁂𑀯 𑀲𑀺𑀚𑁆𑀛𑀢𑀺. 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀘𑀢𑀼𑀥𑀸 𑀧𑀯𑀢𑁆𑀢𑀢𑀺 𑀅𑀳𑀁 𑀅𑀢𑁆𑀢𑀸𑀦𑀁 𑀩𑀼𑀤𑁆𑀥𑀲𑁆𑀲 𑀧𑀭𑀺𑀘𑁆𑀘𑀚𑀸𑀫𑀻𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀺𑀬𑁆𑀬𑀸𑀢𑀦𑁂𑀦, 𑀬𑀣𑀸𑀯𑀼𑀢𑁆𑀢𑀢𑀧𑁆𑀧𑀭𑀸𑀬𑀡𑀢𑀸𑀬, 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑁂𑀦, 𑀧𑀡𑀺𑀧𑀸𑀢𑁂𑀦 𑀘𑀸𑀢𑀺. 𑀲𑀩𑁆𑀩𑀢𑁆𑀣𑀸𑀧𑀺 𑀘𑁂𑀢𑁆𑀣 𑀲𑁂𑀝𑁆𑀞𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀯𑀲𑁂𑀦𑁂𑀯 𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀦 𑀜𑀸𑀢𑀺𑀪𑀬𑀸𑀘𑀭𑀺𑀬𑀸𑀤𑀺𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀜𑀸𑀢𑀺𑀆𑀤𑀺𑀯𑀲𑁂𑀦 𑀢𑀺𑀢𑁆𑀣𑀺𑀬𑀁 𑀯𑀦𑁆𑀤𑀢𑁄 𑀲𑀭𑀡𑀁 𑀦 𑀪𑀺𑀚𑁆𑀚𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂𑀦 𑀅𑀜𑁆𑀜𑀁 𑀯𑀦𑁆𑀤𑀢𑁄 𑀲𑀭𑀡𑀁 𑀪𑀺𑀚𑁆𑀚𑀢𑀺. 𑀮𑁄𑀓𑀺𑀬𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀦𑀺𑀬𑀫𑀁 𑀲𑀤𑀺𑀲𑀨𑀮𑀁 𑀲𑀭𑀡𑀕𑀢𑀲𑁆𑀲 𑀅𑀦𑀸𑀕𑀢𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀦𑀺𑀬𑀫𑀢𑁄. 𑀲𑀩𑁆𑀩𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀲𑀫𑀥𑀺𑀕𑀫𑁄 𑀧𑀦 𑀅𑀧𑀸𑀬𑀤𑀼𑀓𑁆𑀔𑀸𑀤𑀺𑀲𑀫𑀢𑀺𑀓𑁆𑀓𑀫𑁄 𑀘 𑀆𑀦𑀺𑀲𑀁𑀲𑀨𑀮𑀁. 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀘𑀲𑁆𑀲 𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀸𑀤𑀺 𑀲𑀁𑀓𑀺𑀮𑁂𑀲𑁄. 𑀪𑁂𑀤𑁄𑀧𑀺𑀲𑁆𑀲 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀯𑀲𑁂𑀦 𑀤𑀼𑀯𑀺𑀥𑁄. 𑀢𑀢𑁆𑀣 𑀧𑀞𑀫𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀼𑀩𑁆𑀩𑀓𑁂𑀳𑀺 𑀢𑀺𑀢𑁆𑀣𑀺𑀬𑀧𑀡𑀺𑀧𑀸𑀢𑀸𑀤𑀻𑀳𑀺 𑀳𑁄𑀢𑀺, 𑀲𑁄 𑀘 𑀅𑀦𑀺𑀝𑁆𑀞𑀨𑀮𑀢𑁆𑀢𑀸 𑀲𑀸𑀯𑀚𑁆𑀚𑁄. 𑀅𑀦𑀯𑀚𑁆𑀚𑁄 𑀧𑀦 𑀓𑀸𑀮𑀓𑀺𑀭𑀺𑀬𑀸𑀬 𑀳𑁄𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑁆𑀲 𑀲𑀩𑁆𑀩𑀣𑀸 𑀲𑀁𑀓𑀺𑀮𑁂𑀲𑁄 𑀯𑀸 𑀪𑁂𑀤𑁄 𑀯𑀸 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁄 𑀉𑀧𑀸𑀲𑀓𑁄𑀢𑀺𑀆𑀤𑀺 𑀉𑀧𑀸𑀲𑀓𑀢𑁆𑀢𑀲𑀭𑀽𑀧𑀓𑀸𑀭𑀡𑀸𑀤𑀺𑀧𑀼𑀘𑁆𑀙𑀸. 𑀢𑀢𑁆𑀣 𑀬𑁄 𑀕𑀳𑀝𑁆𑀞𑁄 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀢𑀺𑀲𑀭𑀡𑀁 𑀕𑀢𑁄, 𑀅𑀬𑀁 𑀉𑀧𑀸𑀲𑀓𑁄. 𑀬𑁄 𑀘 𑀲𑀭𑀡𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀬 𑀭𑀢𑀦𑀢𑁆𑀢𑀬𑀁 𑀉𑀧𑀸𑀲𑀦𑀢𑁄 ‘‘𑀉𑀧𑀸𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀘 𑀯𑁂𑀭𑀫𑀡𑀺𑀬𑁄 𑀘𑀲𑁆𑀲 𑀲𑀻𑀮𑀁. 𑀧𑀜𑁆𑀘𑀫𑀺𑀘𑁆𑀙𑀸𑀯𑀸𑀡𑀺𑀚𑁆𑀚𑀸𑀤𑀺𑀧𑀸𑀧𑀸𑀚𑀻𑀯𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀚𑀻𑀯𑀺𑀢𑀓𑀧𑁆𑀧𑀦𑀫𑀲𑁆𑀲 𑀆𑀚𑀻𑀯𑁄. 𑀅𑀲𑁆𑀲𑀤𑁆𑀥𑀺𑀬𑀤𑀼𑀲𑁆𑀲𑀻𑀮𑀢𑀸𑀤𑀬𑁄 𑀉𑀧𑀸𑀲𑀓𑀢𑁆𑀢𑀲𑁆𑀲 𑀯𑀺𑀧𑀢𑁆𑀢𑀺, 𑀢𑀤𑀪𑀸𑀯𑁄 𑀲𑀫𑁆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀳𑀸𑀭𑀕𑁆𑀕𑁂𑀦𑀸𑀢𑀺 𑀑𑀯𑀭𑀓𑀸𑀤𑀺𑀯𑀲𑀦𑀝𑁆𑀞𑀸𑀦𑀓𑁄𑀝𑁆𑀞𑀸𑀲𑁂𑀦. 𑀅𑀚𑁆𑀚𑀪𑀸𑀯𑀦𑁆𑀢𑀺 𑀅𑀲𑁆𑀫𑀺𑀁 𑀅𑀳𑀦𑀺 𑀧𑀯𑀢𑁆𑀢𑀁 𑀧𑀲𑀸𑀤𑀸𑀤𑀺𑀁. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀳𑁂𑀢𑀼𑀓𑁄 𑀲𑀭𑀻𑀭𑀸𑀯𑀬𑀯𑁄 𑀓𑀸𑀬𑀗𑁆𑀕𑀁. 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀳𑁂𑀢𑀼𑀓𑀁 𑀑𑀝𑁆𑀞𑀚𑀺𑀯𑁆𑀳𑀸𑀤𑀺 𑀯𑀸𑀘𑀗𑁆𑀕𑀁. 𑀅𑀘𑁄𑀧𑁂𑀢𑁆𑀯𑀸𑀢𑀺 𑀅𑀘𑀸𑀮𑁂𑀢𑁆𑀯𑀸. 𑀏𑀢𑁂𑀦 𑀘 𑀯𑀘𑀻𑀧𑀯𑀢𑁆𑀢𑀺𑀬𑀸 𑀧𑀼𑀩𑁆𑀩𑀪𑀸𑀕𑁂 𑀞𑀸𑀦𑀓𑀭𑀡𑀸𑀦𑀁 𑀘𑀮𑀦𑀧𑀘𑁆𑀘𑀬𑁄 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀓𑀸𑀭𑀸𑀓𑀸𑀭𑁄 𑀯𑀺𑀲𑀼𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺, 𑀢𑁂𑀦 𑀯𑀺𑀲𑀼𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀅𑀪𑀸𑀯𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀫𑁂𑀯 𑀲𑀗𑁆𑀕𑀬𑁆𑀳𑀢𑀺 𑀢𑀤𑀼𑀧𑀓𑀸𑀭𑀢𑁆𑀢𑀸. 𑀬𑀣𑀸 𑀓𑀸𑀬𑁂𑀦 𑀓𑀸𑀬𑀓𑀡𑁆𑀟𑀼𑀬𑀦𑀸𑀤𑀻𑀲𑀼 𑀲𑀤𑁆𑀤𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑁄 𑀧𑀣𑀯𑀻𑀥𑀸𑀢𑀼𑀬𑀸 𑀆𑀓𑀸𑀭𑀯𑀺𑀓𑀸𑀭𑁄 𑀯𑀺𑀲𑀼𑀁 𑀅𑀥𑀺𑀧𑁆𑀧𑀸𑀬𑀲𑁆𑀲 𑀅𑀯𑀺𑀜𑁆𑀜𑀸𑀧𑀦𑀢𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀦 𑀳𑁄𑀢𑀺, 𑀏𑀯𑀫𑀬𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀢𑁄 𑀳𑁂𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁄 𑀦𑀸𑀫 𑀚𑀸𑀢𑀸, 𑀦 𑀓𑁂𑀯𑀮𑀁 𑀯𑀸𑀬𑀼𑀧𑀣𑀯𑀻𑀦𑀁 𑀘𑀮𑀦𑀲𑀤𑁆𑀤𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀽𑀢𑀯𑀺𑀓𑀸𑀭𑀸𑀓𑀸𑀭𑀫𑀢𑁆𑀢𑀢𑀸𑀬. 𑀏𑀯𑀜𑁆𑀘 𑀩𑀳𑀺𑀤𑁆𑀥𑀸 𑀭𑀼𑀓𑁆𑀔𑀸𑀤𑀻𑀲𑀼 𑀘𑀮𑀦𑀲𑀤𑁆𑀤𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀯𑀺𑀓𑀸𑀭𑀸𑀓𑀸𑀭𑀸𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀢𑀸 𑀲𑀫𑀢𑁆𑀣𑀺𑀢𑀸 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 𑀯𑀸𑀘𑀗𑁆𑀕𑀦𑁆𑀢𑀺 ‘‘𑀳𑁄𑀢𑀼 𑀲𑀸𑀥𑀽’’𑀢𑀺 𑀏𑀯𑀫𑀸𑀤𑀺𑀯𑀸𑀘𑀸𑀬 𑀅𑀯𑀬𑀯𑀦𑁆𑀢𑀺𑀆𑀤𑀺𑀁 𑀯𑀤𑀦𑁆𑀢𑀺, 𑀢𑀁 𑀅𑀘𑁄𑀧𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺. 𑀔𑀦𑁆𑀢𑀺𑀁 𑀘𑀸𑀭𑁂𑀢𑁆𑀯𑀸𑀢𑀺 𑀅𑀦𑀼𑀫𑀢𑀺𑀁 𑀧𑀯𑀢𑁆𑀢𑁂𑀢𑁆𑀯𑀸. ‘‘𑀔𑀦𑁆𑀢𑀺𑀁 𑀥𑀸𑀭𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀩𑀳𑀺 𑀅𑀦𑀺𑀓𑁆𑀔𑀫𑀦𑀯𑀲𑁂𑀦 𑀕𑀡𑁆𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀫𑀼𑀔𑁄𑀢𑀺 𑀪𑀕𑀯𑀢𑀺 𑀧𑀝𑀺𑀦𑀺𑀯𑀢𑁆𑀢𑀫𑀼𑀔𑁄, 𑀢𑁂𑀦𑀸𑀳 ‘‘𑀅𑀧𑀓𑁆𑀓𑀫𑀺𑀢𑁆𑀯𑀸’’𑀢𑀺.

𑁧𑁬. 𑀬𑀸𑀘𑀥𑀸𑀢𑀼𑀲𑁆𑀲 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 ‘‘𑀪𑀕𑀯𑀸 𑀯𑀲𑁆𑀲𑀸𑀯𑀸𑀲𑀁 𑀬𑀸𑀘𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀲𑀲𑁆𑀲𑀓𑀸𑀮𑁂𑀧𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀅𑀢𑀺𑀲𑀫𑀕𑁆𑀖𑁂𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀯𑀺𑀬 𑀅𑀧𑁆𑀧𑀕𑁆𑀖𑁂𑀧𑀺 𑀬𑀤𑀸 𑀓𑀺𑀜𑁆𑀘𑀺𑀤𑁂𑀯 𑀤𑀢𑁆𑀯𑀸 𑀩𑀳𑀼𑀁 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀁 𑀕𑀡𑁆𑀳𑀦𑁆𑀢𑀺, 𑀢𑀸𑀤𑀺𑀲𑁂 𑀓𑀸𑀮𑁂𑀧𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀫𑀸𑀦𑀸𑀢𑀺 𑀬𑀸𑀘𑀫𑀸𑀦𑀸. 𑀯𑀼𑀢𑁆𑀢𑀲𑀲𑁆𑀲𑀦𑁆𑀢𑀺 𑀯𑀧𑀺𑀢𑀲𑀲𑁆𑀲𑀁. 𑀢𑀢𑁆𑀣𑀸𑀢𑀺 𑀯𑁂𑀭𑀜𑁆𑀚𑀸𑀬𑀁, 𑀏𑀢𑁂𑀦 ‘‘𑀯𑀼𑀢𑁆𑀢𑀁 𑀲𑀮𑀸𑀓𑀸 𑀏𑀯 𑀳𑁄𑀢𑀺 𑀏𑀢𑁆𑀣𑀸𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸’’𑀢𑀺 𑀯𑀺𑀲𑁂𑀲𑀦𑀲𑁆𑀲 𑀧𑀭𑀦𑀺𑀧𑀸𑀢𑁂𑀦 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 ‘‘𑀲𑀩𑁆𑀩𑀁 𑀲𑀲𑁆𑀲𑀁 𑀲𑀮𑀸𑀓𑀸𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀁 𑀲𑀫𑁆𑀧𑀦𑁆𑀦𑀁 𑀏𑀢𑁆𑀣𑀸𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸’’𑀢𑀺𑀧𑀺 𑀦𑀺𑀩𑁆𑀩𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀢𑁂𑀦𑀸𑀳 ‘‘𑀲𑀮𑀸𑀓𑀸 𑀏𑀯 𑀲𑀫𑁆𑀧𑀚𑁆𑀚𑀢𑀻’’𑀢𑀺. ‘‘𑀲𑀮𑀸𑀓𑀸𑀬 𑀯𑀼𑀢𑁆𑀢𑀁 𑀚𑀻𑀯𑀺𑀓𑀸 𑀏𑀢𑀺𑀲𑁆𑀲𑀦𑁆𑀢𑀺 𑀲𑀮𑀸𑀓𑀸𑀯𑀼𑀢𑁆𑀢𑀸’’𑀢𑀺𑀧𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀼𑀁 𑀲𑀮𑀸𑀓𑀸𑀬 𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂𑀢𑀺 𑀥𑀜𑁆𑀜𑀫𑀺𑀦𑀦𑀝𑁆𑀞𑀸𑀦𑁂. 𑀯𑀡𑁆𑀡𑀚𑁆𑀛𑀓𑁆𑀔𑀦𑁆𑀢𑀺 𑀓𑀳𑀸𑀧𑀡𑀧𑀭𑀺𑀓𑁆𑀔𑀓𑀁.

𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦𑀸𑀢𑀺 𑀏𑀢𑁆𑀣 𑀧𑀕𑁆𑀕𑀳𑁂𑀦𑀸𑀢𑀺 𑀧𑀢𑁆𑀢𑁂𑀦, 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀕𑁆𑀕𑀬𑁆𑀳𑀢𑀺 𑀏𑀢𑁂𑀦 𑀪𑀺𑀓𑁆𑀔𑀸𑀢𑀺 𑀳𑀺 𑀧𑀕𑁆𑀕𑀳𑁄, 𑀧𑀢𑁆𑀢𑁄. 𑀢𑁂𑀦𑀸𑀳 𑀧𑀕𑁆𑀕𑀳𑁂𑀦 𑀬𑁄 𑀉𑀜𑁆𑀙𑁄𑀢𑀺𑀆𑀤𑀺. 𑀅𑀣 𑀯𑀸 𑀧𑀕𑁆𑀕𑀳𑁂𑀦𑀸𑀢𑀺 𑀕𑀳𑀡𑁂𑀦, 𑀉𑀜𑁆𑀙𑀢𑁆𑀣𑀸𑀬 𑀕𑀳𑁂𑀢𑀩𑁆𑀩𑁄 𑀧𑀢𑁆𑀢𑁄𑀢𑀺 𑀲𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀧𑀢𑁆𑀢𑀁 𑀕𑀳𑁂𑀢𑁆𑀯𑀸’’𑀢𑀺.

𑀕𑀗𑁆𑀕𑀸𑀬 𑀉𑀢𑁆𑀢𑀭𑀤𑀺𑀲𑀸𑀧𑀤𑁂𑀲𑁄 𑀉𑀢𑁆𑀢𑀭𑀸𑀧𑀣𑁄, 𑀲𑁄 𑀦𑀺𑀯𑀸𑀲𑁄 𑀏𑀢𑁂𑀲𑀁, 𑀢𑀢𑁄 𑀯𑀸 𑀆𑀕𑀢𑀸𑀢𑀺 𑀉𑀢𑁆𑀢𑀭𑀸𑀧𑀣𑀓𑀸, 𑀢𑁂𑀦𑀸𑀳 𑀉𑀢𑁆𑀢𑀭𑀸𑀧𑀣𑀯𑀸𑀲𑀺𑀓𑀸𑀢𑀺𑀆𑀤𑀺. ‘‘𑀉𑀢𑁆𑀢𑀭𑀸𑀳𑀓𑀸’’𑀢𑀺𑀧𑀺 𑀧𑀸𑀞𑁄, 𑀲𑁄 𑀏𑀯 𑀅𑀢𑁆𑀣𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀫𑀦𑁆𑀤𑀺𑀭𑀦𑁆𑀢𑀺 𑀅𑀲𑁆𑀲𑀲𑀸𑀮𑀁. ‘‘𑀫𑀦𑁆𑀤𑀭’’𑀦𑁆𑀢𑀺𑀧𑀺 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀲𑀸 𑀘 𑀫𑀦𑁆𑀤𑀺𑀭𑀸 𑀬𑀲𑁆𑀫𑀸 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀩𑀳𑀼𑀯𑀺𑀥𑀸 𑀘 𑀓𑀢𑀸, 𑀢𑀲𑁆𑀫𑀸 ‘‘𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀸.

𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀤𑁂𑀲𑁄 𑀤𑀓𑁆𑀔𑀺𑀡𑀸𑀧𑀣𑁄, 𑀢𑀢𑁆𑀣 𑀚𑀸𑀢𑀸 𑀫𑀦𑀼𑀲𑁆𑀲𑀸 𑀤𑀓𑁆𑀔𑀺𑀡𑀸𑀧𑀣𑀫𑀦𑀼𑀲𑁆𑀲𑀸. 𑀩𑀼𑀤𑁆𑀥𑀁 𑀫𑀫𑀸𑀬𑀦𑁆𑀢𑀺 𑀫𑀫𑁂𑀯𑀸𑀬𑀦𑁆𑀢𑀺 𑀕𑀡𑁆𑀳𑀦𑀲𑀻𑀮𑀸 𑀩𑀼𑀤𑁆𑀥𑀫𑀸𑀫𑀓𑀸, 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀏𑀯𑀦𑁆𑀢𑀺 𑀧𑀘𑁆𑀙𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂. 𑀧𑀝𑀺𑀯𑀻𑀲𑀦𑁆𑀢𑀺 𑀓𑁄𑀝𑁆𑀞𑀸𑀲𑀁. 𑀢𑀤𑀼𑀧𑀺𑀬𑀦𑁆𑀢𑀺 𑀢𑀤𑀦𑀼𑀭𑀽𑀧𑀁 𑀢𑀧𑁆𑀧𑀳𑁄𑀦𑀓𑀁. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸 𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀮𑀤𑁆𑀥𑁄’’𑀢𑀺 𑀯𑀸 𑀧𑀸𑀞𑁄, 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀦𑁂𑀯 𑀮𑀪𑀺𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀢𑀺 𑀘 𑀧𑀲𑀢𑁆𑀣𑀢𑀫𑀕𑀼𑀡𑀬𑁄𑀕𑀢𑁄 𑀲𑁂𑀝𑁆𑀞𑁄 𑀘𑀸𑀢𑀺 𑀜𑀸𑀢𑀺𑀲𑁂𑀝𑁆𑀞𑁄. 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀬𑀫𑁂𑀯 𑀧𑀢𑀺𑀭𑀽𑀧𑁄𑀢𑀺 𑀆𑀫𑀺𑀲𑀲𑁆𑀲 𑀤𑀼𑀮𑁆𑀮𑀪𑀓𑀸𑀮𑁂𑀲𑀼 𑀧𑀭𑀺𑀓𑀣𑁄𑀪𑀸𑀲𑀸𑀤𑀺𑀁 𑀅𑀓𑀢𑁆𑀯𑀸 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀬𑀸 𑀆𑀚𑀻𑀯𑀲𑀼𑀤𑁆𑀥𑀺𑀬𑀁 𑀞𑀢𑁆𑀯𑀸 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀕𑀼𑀡𑀁 𑀆𑀫𑀺𑀲𑀁 𑀯𑀺𑀘𑀸𑀭𑁂𑀦𑁆𑀢𑁂𑀦 𑀦𑀸𑀫 𑀜𑀸𑀢𑀺𑀲𑀺𑀦𑁂𑀳𑀬𑀼𑀢𑁆𑀢𑁂𑀦 𑀅𑀭𑀺𑀬𑀲𑀸𑀯𑀓𑁂𑀦𑁂𑀯 𑀓𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀭𑀸𑀯𑀝𑁆𑀝𑀦𑀸𑀬𑀸𑀢𑀺 𑀫𑀸𑀭𑁂𑀦 𑀓𑀢𑀘𑀺𑀢𑁆𑀢𑀧𑀭𑀺𑀯𑀝𑁆𑀝𑀦𑁂𑀦, 𑀘𑀺𑀢𑁆𑀢𑀲𑀫𑁆𑀫𑁄𑀳𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀻𑀢𑀺 𑀉𑀢𑁆𑀢𑀭𑀓𑀼𑀭𑀼𑀁 𑀯𑀸 𑀢𑀺𑀤𑀲𑀧𑀼𑀭𑀁 𑀯𑀸 𑀆𑀯𑀝𑁆𑀝𑁂𑀬𑁆𑀬.

‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀬𑀺𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸 𑀘 𑀪𑀼𑀜𑁆𑀚𑀣 𑀲𑀸𑀮𑀬𑁄’’𑀢𑀺. (𑀅𑀧. 𑀣𑁂𑀭 𑁧.𑁩𑁯.𑁮𑁮) 𑁋

𑀅𑀧𑀤𑀸𑀦𑁂 𑀯𑀼𑀢𑁆𑀢𑀲𑁆𑀲 𑀅𑀓𑀼𑀲𑀮𑀲𑁆𑀲 𑀢𑀤𑀸 𑀑𑀓𑀸𑀲𑀓𑀢𑀢𑁆𑀢𑀸. 𑀦𑀺𑀩𑀤𑁆𑀥𑀤𑀸𑀦𑀲𑁆𑀲𑀸𑀢𑀺 ‘‘𑀤𑀲𑁆𑀲𑀸𑀫𑀸’’𑀢𑀺 𑀯𑀸𑀘𑀸𑀬 𑀦𑀺𑀬𑀫𑀺𑀢𑀤𑀸𑀦𑀲𑁆𑀲. 𑀅𑀧𑁆𑀧𑀺𑀢𑀯𑀢𑁆𑀢𑀲𑁆𑀲𑀸𑀢𑀺 𑀓𑀸𑀬𑁂𑀦 𑀅𑀢𑀺𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀯𑀢𑁆𑀣𑀼𑀦𑁄𑀧𑀺. 𑀯𑀺𑀲𑀳𑀢𑀻𑀢𑀺 𑀲𑀓𑁆𑀓𑁄𑀢𑀺. 𑀲𑀗𑁆𑀔𑁂𑀧𑁂𑀦𑀸𑀢𑀺 𑀦𑀻𑀳𑀸𑀭𑁂𑀦. 𑀩𑁆𑀬𑀸𑀫𑀧𑁆𑀧𑀪𑀸𑀬𑀸𑀢𑀺 𑀲𑀫𑀦𑁆𑀢𑀢𑁄 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑁂 𑀞𑀸𑀦𑁂 𑀖𑀦𑀻𑀪𑀽𑀢𑀸𑀬 𑀙𑀩𑁆𑀩𑀡𑁆𑀡𑀸𑀬 𑀧𑀪𑀸𑀬, 𑀬𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀢𑀴𑀸𑀓𑀢𑁄 𑀫𑀸𑀢𑀺𑀓𑀸𑀬𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀲𑀲𑀼 𑀤𑀺𑀲𑀸𑀲𑀼 𑀥𑀸𑀯𑀦𑁆𑀢𑀺, 𑀲𑀸 𑀬𑀲𑁆𑀫𑀸 𑀩𑁆𑀬𑀸𑀫𑀫𑀢𑁆𑀢𑀸 𑀯𑀺𑀬 𑀔𑀸𑀬𑀢𑀺, 𑀢𑀲𑁆𑀫𑀸 ‘‘𑀩𑁆𑀬𑀸𑀫𑀧𑁆𑀧𑀪𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀘 𑀧𑀘𑁆𑀘𑁂𑀓𑀁 𑀪𑀕𑀯𑀢𑁄 𑀲𑀭𑀻𑀭𑁂 𑀧𑀪𑀸𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸 𑀆𑀓𑀸𑀲𑁂 𑀘𑀦𑁆𑀤𑀲𑀽𑀭𑀺𑀬𑀸𑀤𑀬𑁄 𑀯𑀺𑀬 𑀯𑀺𑀪𑀸𑀢𑀸 𑀯𑀺𑀭𑁄𑀘𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀩𑁆𑀬𑀸𑀫𑀧𑁆𑀧𑀪𑀸𑀬 𑀲𑀳 𑀓𑁂𑀦𑀘𑀺 𑀅𑀦𑀪𑀺𑀪𑀯𑀦𑀻𑀬𑀸𑀦𑀺 𑀯𑀼𑀢𑁆𑀢𑀸𑀦𑀺.

𑀅𑀦𑀢𑁆𑀣𑀲𑀜𑁆𑀳𑀺𑀢𑁂𑀢𑀺 𑀖𑀸𑀢𑀸𑀧𑁂𑀓𑁆𑀔𑀁 𑀲𑀸𑀫𑀺𑀅𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀢𑁂𑀦𑀸𑀳 ‘‘𑀢𑀸𑀤𑀺𑀲𑀲𑁆𑀲 𑀯𑀘𑀦𑀲𑁆𑀲 𑀖𑀸𑀢𑁄’’𑀢𑀺. 𑀅𑀢𑁆𑀣𑁄 𑀥𑀫𑁆𑀫𑀤𑁂𑀲𑀦𑀸𑀬 𑀳𑁂𑀢𑀼 𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣, 𑀥𑀫𑁆𑀫𑀤𑁂𑀲𑀦𑀸𑀤𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀧𑁆𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀢𑁆𑀣𑀼.

𑀏𑀓𑀁 𑀕𑀳𑁂𑀢𑁆𑀯𑀸𑀢𑀺 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑀤𑁂𑀲𑀦𑀸𑀓𑀸𑀭𑀡𑀁 𑀕𑀳𑁂𑀢𑁆𑀯𑀸. 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸𑀢𑀺 𑀲𑀢𑁆𑀢𑀸𑀳𑀓𑀭𑀡𑀻𑀬𑀯𑀲𑁂𑀦 𑀕𑀦𑁆𑀢𑁆𑀯𑀸 𑀩𑀳𑀺 𑀅𑀭𑀼𑀡𑀼𑀝𑁆𑀞𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑁄, 𑀦 𑀯𑀲𑁆𑀲𑀘𑁆𑀙𑁂𑀤𑀯𑀲𑁂𑀦 𑀢𑀲𑁆𑀲 𑀯𑀺𑀲𑀼𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀏𑀢𑁂𑀦 𑀘 𑀯𑀲𑁆𑀲𑀘𑁆𑀙𑁂𑀤𑀧𑀘𑁆𑀘𑀬𑁂 𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀫𑀦𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀓𑀺𑀲𑁆𑀫𑀺𑀜𑁆𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀕𑀼𑀡𑁂 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀦 𑀫𑀜𑁆𑀜𑀦𑁆𑀢𑀺. 𑀧𑀘𑁆𑀙𑀸 𑀲𑀻𑀮𑀁 𑀅𑀥𑀺𑀝𑁆𑀞𑀳𑁂𑀬𑁆𑀬𑀸𑀫𑀸𑀢𑀺 𑀆𑀚𑀻𑀯𑀳𑁂𑀢𑀼 𑀲𑀦𑁆𑀢𑀕𑀼𑀡𑀧𑁆𑀧𑀓𑀸𑀲𑀦𑁂𑀦 𑀆𑀚𑀻𑀯𑀯𑀺𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻𑀢𑀺 𑀅𑀯𑀫𑀜𑁆𑀜𑀺𑀲𑁆𑀲𑀢𑀺.

𑁧𑁭. ‘‘𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢’’𑀦𑁆𑀢𑀺 𑀉𑀘𑁆𑀘𑀦𑀻𑀘𑀚𑀦𑀲𑀸𑀫𑀜𑁆𑀜𑀯𑀲𑁂𑀦 𑀯𑀢𑁆𑀯𑀸 𑀧𑀼𑀦 𑀉𑀘𑁆𑀘𑀚𑀦𑀸𑀯𑁂𑀡𑀺𑀓𑀯𑀲𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀭𑀼𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀸𑀥𑀺𑀯𑀘𑀦’’𑀦𑁆𑀢𑀺 𑀆𑀳. 𑀢𑀢𑁆𑀣 𑀲𑀳 𑀧𑀢𑀺𑀲𑁆𑀲𑀬𑁂𑀦 𑀦𑀺𑀲𑁆𑀲𑀬𑁂𑀦𑀸𑀢𑀺 𑀲𑀧𑁆𑀧𑀢𑀺𑀲𑁆𑀲𑁄, 𑀲𑀦𑀺𑀲𑁆𑀲𑀬𑁄, 𑀢𑀲𑁆𑀲 𑀕𑀭𑀼𑀕𑀼𑀡𑀬𑀼𑀢𑁆𑀢𑁂𑀲𑀼 𑀕𑀸𑀭𑀯𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀯𑀘𑀦𑀫𑁂𑀯 𑀅𑀥𑀺𑀯𑀘𑀦𑀁. 𑀧𑀧𑁆𑀧𑀝𑀓𑁄𑀚𑀦𑁆𑀢𑀺 𑀆𑀤𑀺𑀓𑀧𑁆𑀧𑁂 𑀉𑀤𑀓𑀽𑀧𑀭𑀺 𑀧𑀞𑀫𑀁 𑀧𑀣𑀯𑀻𑀪𑀸𑀯𑁂𑀦 𑀲𑀜𑁆𑀚𑀸𑀢𑀁 𑀦𑀯𑀦𑀻𑀢𑀧𑀺𑀡𑁆𑀟𑀲𑀤𑀺𑀲𑀁 𑀉𑀤𑀓𑁂𑀧𑀺 𑀉𑀧𑁆𑀧𑀺𑀮𑀦𑀲𑀪𑀸𑀯𑀁 𑀅𑀯𑀺𑀮𑀻𑀬𑀦𑀓𑀁 𑀅𑀢𑀺𑀲𑀺𑀦𑀺𑀤𑁆𑀥𑀫𑀥𑀼𑀭𑀁 𑀅𑀦𑁂𑀓𑀬𑁄𑀚𑀦𑀲𑀳𑀲𑁆𑀲𑀩𑀳𑀮𑀁 𑀭𑀲𑀸𑀢𑀮𑀲𑀗𑁆𑀔𑀸𑀢𑀁 𑀧𑀣𑀯𑁄𑀚𑀁. 𑀬𑀁 𑀆𑀤𑀺𑀓𑀧𑁆𑀧𑀺𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀭𑀲𑀢𑀡𑁆𑀳𑀸𑀬 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀁 𑀢𑁂𑀲𑀁 𑀓𑀫𑁆𑀫𑀩𑀮𑁂𑀦 𑀉𑀧𑀭𑀺𑀪𑀸𑀕𑁂 𑀓𑀓𑁆𑀔𑀴𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀳𑁂𑀝𑁆𑀞𑀸 𑀧𑀼𑀭𑀺𑀫𑀸𑀓𑀸𑀭𑁂𑀦𑁂𑀯 𑀞𑀺𑀢𑀁, 𑀬𑀲𑁆𑀲 𑀘 𑀩𑀮𑁂𑀦 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀧𑀩𑁆𑀩𑀢𑀲𑀫𑀼𑀤𑁆𑀤𑀓𑀸𑀦𑀦𑀸 𑀳𑁂𑀝𑁆𑀞𑀸𑀉𑀤𑀓𑁂 𑀅𑀦𑀺𑀫𑀼𑀚𑁆𑀚𑀫𑀸𑀦𑀸 𑀅𑀯𑀺𑀓𑀺𑀭𑀺𑀬𑀫𑀸𑀦𑀸 𑀓𑀼𑀮𑁆𑀮𑀼𑀧𑀭𑀺 𑀯𑀺𑀬 𑀦𑀺𑀘𑁆𑀘𑀮𑀸 𑀢𑀺𑀝𑁆𑀞𑀢𑀺, 𑀢𑀁 𑀧𑀣𑀯𑀻𑀲𑀸𑀭𑀫𑀡𑁆𑀟𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 𑀧𑀣𑀯𑀻𑀫𑀡𑁆𑀟𑁄𑀢𑀺𑀆𑀤𑀺. 𑀲𑀫𑁆𑀧𑀦𑁆𑀦𑀦𑁆𑀢𑀺 𑀫𑀥𑀼𑀭𑀭𑀲𑁂𑀦 𑀉𑀧𑁂𑀢𑀁, 𑀢𑁂𑀦𑀸𑀳 ‘‘𑀲𑀸𑀤𑀼𑀭𑀲’’𑀦𑁆𑀢𑀺. 𑀉𑀧𑀧𑀦𑁆𑀦𑀨𑀮𑁄𑀢𑀺 𑀩𑀳𑀼𑀨𑀮𑁄. ‘‘𑀦𑀺𑀫𑁆𑀫𑀓𑁆𑀔𑀺𑀓’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦𑀺𑀫𑁆𑀫𑀓𑁆𑀔𑀺𑀓𑀡𑁆𑀟’’𑀦𑁆𑀢𑀺 𑀫𑀓𑁆𑀔𑀺𑀓𑀡𑁆𑀟𑀸𑀦𑀫𑁆𑀧𑀺 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑁂 𑀧𑀣𑀯𑀻𑀦𑀺𑀲𑁆𑀲𑀺𑀢𑀸 𑀧𑀸𑀡𑀸, 𑀢𑁂 𑀢𑀢𑁆𑀣 𑀲𑀗𑁆𑀓𑀸𑀫𑁂𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀫𑁆𑀧𑀺 𑀳𑀢𑁆𑀣𑀲𑀗𑁆𑀓𑀸𑀫𑀦𑁂 𑀓𑀺𑀁 𑀅𑀦𑀸𑀫𑀸𑀲𑀤𑁄𑀲𑁄 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀓𑀲𑁆𑀫𑀸? ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀫𑀲𑁆𑀲 𑀇𑀤𑁆𑀥𑀺𑀯𑀺𑀲𑀬𑁂’’𑀢𑀺 (𑀧𑀸𑀭𑀸. 𑁧𑁫𑁯) 𑀯𑀘𑀦𑀢𑁄, 𑀢𑁂𑀦𑁂𑀯 𑀪𑀕𑀯𑀸𑀧𑀺 𑀅𑀦𑀸𑀫𑀸𑀲𑀤𑁄𑀲𑀁 𑀅𑀤𑀲𑁆𑀲𑁂𑀢𑁆𑀯𑀸 ‘‘𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺 𑀆𑀳, 𑀔𑀼𑀤𑁆𑀤𑀓𑁄 𑀕𑀸𑀫𑁄. 𑀫𑀳𑀦𑁆𑀢𑁄 𑀲𑀸𑀧𑀡𑁄 𑀦𑀺𑀕𑀫𑁄. 𑀧𑀤𑀯𑀻𑀢𑀺𑀳𑀸𑀭𑁂𑀦𑀸𑀢𑀺 𑀧𑀤𑀦𑀺𑀓𑁆𑀔𑁂𑀧𑁂𑀦.

𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁧𑁮. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀫𑀽𑀮𑀢𑁄 𑀧𑀪𑀼𑀢𑀻𑀢𑀺 𑀧𑀸𑀭𑀸𑀚𑀺𑀓𑀸𑀤𑀺𑀕𑀭𑀼𑀓𑀸𑀦𑀁, 𑀢𑀤𑀜𑁆𑀜𑁂𑀲𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁆𑀓𑀫𑁂𑀦 𑀬𑁂𑀪𑀼𑀬𑁆𑀬𑁂𑀦 𑀅𑀧𑀜𑁆𑀜𑀢𑁆𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑀜𑁆𑀜𑀢𑁆𑀢𑀢𑀸𑀬. 𑀢𑁂𑀦𑁂𑀯 𑀣𑁂𑀭𑁄 𑀪𑀕𑀯𑀦𑁆𑀢𑀁 ‘‘𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬 𑀉𑀤𑁆𑀤𑀺𑀲𑁂𑀬𑁆𑀬 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀦 𑀲𑀳 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀁 𑀬𑀸𑀘𑀺. 𑀔𑀦𑁆𑀥𑀓𑁂 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑀸𑀤𑀻𑀦𑀁 𑀧𑀩𑁆𑀩𑀚𑁆𑀚𑀢𑁄 𑀧𑀼𑀭𑁂𑀢𑀭𑀫𑁂𑀯 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀦𑀼𑀜𑁆𑀜𑀸𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁦𑁫) 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀤𑀺𑀲𑁆𑀲𑀢𑀺. 𑀇𑀥𑁂𑀯 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀲𑀸𑀫𑀫𑁆𑀧𑀺 𑀧𑀘𑀦𑀁…𑀧𑁂… 𑀦 𑀯𑀝𑁆𑀝𑀢𑀻’’𑀢𑀺 𑀘, ‘‘𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀦 𑀓𑀢𑁄’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑁂𑀯 𑀲𑀸𑀫𑀧𑀸𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀅𑀢𑁆𑀣𑀻𑀢𑀺 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀓𑀢𑀺𑀧𑀬𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀺𑀲𑀩𑁆𑀪𑀸𑀯𑁂𑀧𑀺 𑀅𑀧𑀜𑁆𑀜𑀢𑁆𑀢𑀧𑀸𑀭𑀸𑀚𑀺𑀓𑀸𑀤𑀺𑀓𑁂 𑀲𑀦𑁆𑀥𑀸𑀬 ‘‘𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀲𑀫𑁆𑀫𑀤𑁂𑀯 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑁂𑀦 𑀮𑀻𑀦𑁄 𑀧𑀝𑀺𑀲𑀮𑁆𑀮𑀻𑀦𑁄 𑀦𑀸𑀫𑀸𑀢𑀺 𑀆𑀳 ‘‘𑀏𑀓𑀻𑀪𑀸𑀯𑀁 𑀕𑀢𑀲𑁆𑀲𑀸’’𑀢𑀺, 𑀘𑀺𑀢𑁆𑀢𑀯𑀺𑀯𑁂𑀓𑀁 𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀘𑀺𑀭𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁.

𑀲𑁄𑀴𑀲𑀯𑀺𑀥𑀸𑀬 𑀧𑀜𑁆𑀜𑀸𑀬𑀸𑀢𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀅𑀦𑀼𑀧𑀤𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬𑀁 ‘‘𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄’’𑀢𑀺 𑀆𑀕𑀢𑀸 𑀙 𑀧𑀜𑁆𑀜𑀸 𑀘 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀧𑀜𑁆𑀜𑀸 𑀘 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸 𑀘𑀸𑀢𑀺 𑀏𑀯𑀁 𑀲𑁄𑀴𑀲𑀯𑀺𑀥𑁂𑀦 𑀆𑀕𑀢𑀸𑀬 𑀧𑀜𑁆𑀜𑀸𑀬. 𑀬𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀢𑁂𑀬𑁂𑀯 𑀮𑁄𑀓𑁂 𑀧𑀸𑀓𑀝𑀸𑀢𑀺 𑀯𑀺𑀧𑀲𑁆𑀲𑀻𑀆𑀤𑀬𑁄𑀯 𑀇𑀥 𑀉𑀤𑁆𑀥𑀝𑀸, 𑀦 𑀇𑀢𑀭𑁂 𑀧𑀼𑀩𑁆𑀩𑀩𑀼𑀤𑁆𑀥𑀸. 𑀢𑁂𑀦𑁂𑀯 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁨𑁭𑁫 𑀆𑀤𑀬𑁄) 𑀤𑁂𑀯𑀸𑀧𑀺 𑀅𑀢𑁆𑀢𑀦𑁄 𑀧𑀸𑀓𑀝𑀸𑀦𑀁 𑀢𑁂𑀲𑀜𑁆𑀜𑁂𑀯 𑀕𑀳𑀡𑀁 𑀅𑀓𑀁𑀲𑀼, 𑀦𑀸𑀜𑁆𑀜𑁂𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.