𑁭. 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀁

𑁧. 𑀘𑀸𑀧𑀸𑀮𑀯𑀕𑁆𑀕𑁄

𑁧. 𑀅𑀧𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁩. 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀲𑀫𑀸𑀥𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀙𑀦𑁆𑀥𑀲𑀫𑀸𑀥𑀺. 𑀧𑀥𑀸𑀦𑀲𑀗𑁆𑀔𑀸𑀭𑀸𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀳𑀻𑀢𑀺 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺. 𑀇𑀤𑁆𑀥𑀺𑀬𑀸 𑀧𑀸𑀤𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀇𑀚𑁆𑀛𑀦𑀝𑁆𑀞𑁂𑀦, 𑀇𑀚𑁆𑀛𑀦𑁆𑀢𑀺 𑀏𑀢𑀸𑀬 𑀲𑀤𑁆𑀥𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀭𑀺𑀬𑀸𑀬𑁂𑀦 ‘‘𑀇𑀤𑁆𑀥𑀻’’𑀢𑀺 𑀲𑀗𑁆𑀔𑀸𑀢𑀸𑀦𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀺𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀪𑀽𑀢𑀁, 𑀲𑁂𑀲𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀏𑀯 𑀘 𑀬𑀣𑀸𑀯𑀼𑀢𑁆𑀢𑀇𑀤𑁆𑀥𑀺 𑀬𑀲𑁆𑀫𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀉𑀧𑀭𑀺𑀫𑀸𑀬 𑀉𑀧𑀭𑀺𑀫𑀸𑀬 𑀧𑀸𑀤𑀪𑀽𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤𑀦𑁆𑀢𑀺 𑀇𑀤𑁆𑀥𑀺𑀧𑀸𑀤’’𑀦𑁆𑀢𑀺. 𑀲𑁂𑀲𑁂𑀲𑀽𑀢𑀺 𑀯𑀻𑀭𑀺𑀬𑀲𑀫𑀸𑀥𑀺𑀆𑀤𑀻𑀲𑀼. 𑀢𑀢𑁆𑀣 𑀳𑀺 𑀯𑀻𑀭𑀺𑀬𑀁 𑀘𑀺𑀢𑁆𑀢𑀁 𑀯𑀻𑀫𑀁𑀲𑀁 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑁂. 𑀏𑀓𑀧𑀭𑀺𑀘𑁆𑀙𑁂𑀤𑁄𑀯 𑀅𑀢𑁆𑀣𑀦𑀺𑀤𑁆𑀤𑁂𑀲𑁄.

𑁫. 𑀇𑀤𑁆𑀥𑀺𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁭. 𑀇𑀤𑁆𑀥𑀺𑀧𑀤𑁂𑀲𑀦𑁆𑀢𑀺 𑀇𑀤𑁆𑀥𑀺𑀬𑀸 𑀏𑀓𑀤𑁂𑀲𑀁. 𑀓𑁄 𑀧𑀦 𑀲𑁄𑀢𑀺 𑀆𑀳 𑁋 ‘‘𑀢𑀬𑁄 𑀘 𑀫𑀕𑁆𑀕𑁂 𑀢𑀻𑀡𑀺 𑀘 𑀨𑀮𑀸𑀦𑀻’’𑀢𑀺.

𑁬. 𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁮. 𑀲𑀫𑀢𑁆𑀢𑀦𑁆𑀢𑀺 𑀲𑀸𑀫𑀜𑁆𑀜𑀲𑁆𑀲 𑀲𑀫𑀁 𑀅𑀢𑁆𑀢𑀦𑀁 𑀇𑀚𑁆𑀛𑀦𑀁 𑀲𑀫𑀢𑁆𑀢𑀁 𑀧𑀭𑀺𑀧𑀼𑀡𑁆𑀡𑀁. 𑀯𑀺𑀯𑀝𑁆𑀝𑀧𑀸𑀤𑀓𑀸 𑀏𑀯 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸 ‘‘𑀅𑀧𑀸𑀭𑀸 𑀧𑀸𑀭𑀁 𑀕𑀫𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄.

𑁧𑁦. 𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁨. 𑀉𑀤𑁂𑀦𑀬𑀓𑁆𑀔𑀲𑁆𑀲 𑀘𑁂𑀢𑀺𑀬𑀝𑁆𑀞𑀸𑀦𑁂𑀢𑀺 𑀉𑀤𑁂𑀦𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀤𑁂𑀯𑀸𑀬𑀢𑀦𑀲𑀗𑁆𑀔𑁂𑀧𑁂𑀦 𑀇𑀝𑁆𑀞𑀓𑀸𑀳𑀺 𑀓𑀢𑁂 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀻𑀓𑀢𑀝𑁆𑀞𑀸𑀦𑁂. 𑀓𑀢𑀯𑀺𑀳𑀸𑀭𑁄𑀢𑀺 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀢𑀢𑁆𑀣 𑀓𑀢𑀯𑀺𑀳𑀸𑀭𑁄. 𑀯𑀼𑀘𑁆𑀘𑀢𑀻𑀢𑀺 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 ‘‘𑀉𑀤𑁂𑀦𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀢𑀫𑀓𑀸𑀤𑀻𑀲𑀼𑀧𑀻𑀢𑀺 𑀕𑁄𑀢𑀫𑀓𑀘𑁂𑀢𑀺𑀬𑀦𑁆𑀢𑀺 𑀏𑀯𑀫𑀸𑀤𑀻𑀲𑀼𑀧𑀺. 𑀏𑀲𑁂𑀯 𑀦𑀬𑁄𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑀪𑀸𑀯𑀁 𑀅𑀢𑀺𑀤𑀺𑀲𑀢𑀺. 𑀯𑀟𑁆𑀠𑀺𑀢𑀸𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀩𑁆𑀭𑀽𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑀯𑀲𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸 𑀆𑀦𑀻𑀢𑀸. 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀢𑀺 𑀬𑀣𑀸 𑀬𑀼𑀢𑁆𑀢𑀫𑀸𑀚𑀜𑁆𑀜𑀬𑀸𑀦𑀁 𑀙𑁂𑀓𑁂𑀦 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀫𑀭𑀳𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀦𑀸𑀭𑀳𑀢𑀁 𑀕𑀫𑀺𑀢𑀸. 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀯𑀢𑁆𑀣𑀼 𑀯𑀺𑀬 𑀓𑀢𑀸𑀢𑀺 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑁂𑀦 𑀇𑀤𑁆𑀥𑀺𑀯𑀺𑀲𑁂𑀲𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀼𑀯𑀺𑀲𑁄𑀥𑀺𑀢𑀧𑀭𑀺𑀲𑁆𑀲𑀬𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀢𑀁𑀢𑀁𑀅𑀥𑀺𑀝𑁆𑀞𑀸𑀦𑀬𑁄𑀕𑁆𑀬𑀢𑀸𑀬 𑀞𑀧𑀺𑀢𑀸. 𑀲𑀫𑀦𑁆𑀢𑀢𑁄 𑀘𑀺𑀢𑀸𑀢𑀺 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀼𑀧𑀘𑀬𑀁 𑀕𑀫𑀺𑀢𑀸. 𑀢𑁂𑀦𑀸𑀳 ‘‘𑀲𑀼𑀯𑀟𑁆𑀠𑀺𑀢𑀸’’𑀢𑀺. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀢𑀺 𑀇𑀤𑁆𑀥𑀺𑀪𑀸𑀯𑀦𑀸𑀬 𑀲𑀺𑀔𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀲𑀁𑀲𑁂𑀯𑀺𑀢𑀸.

𑀅𑀦𑀺𑀬𑀫𑁂𑀦𑀸𑀢𑀺 ‘‘𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺 𑀅𑀦𑀺𑀬𑀢𑀯𑀘𑀦𑁂𑀦. 𑀦𑀺𑀬𑀫𑁂𑀢𑁆𑀯𑀸𑀢𑀺 ‘‘𑀢𑀣𑀸𑀕𑀢𑀲𑁆𑀲𑀸’’𑀢𑀺 𑀲𑀭𑀽𑀧𑀕𑁆𑀕𑀳𑀡𑁂𑀦 𑀦𑀺𑀬𑀫𑁂𑀢𑁆𑀯𑀸. 𑀆𑀬𑀼𑀧𑁆𑀧𑀫𑀸𑀡𑀦𑁆𑀢𑀺 𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑀁 𑀯𑀤𑀢𑀺. 𑀢𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀤𑀸𑀬𑀺𑀦𑁄 𑀓𑀫𑁆𑀫𑀲𑁆𑀲 𑀅𑀲𑀗𑁆𑀔𑁂𑀬𑁆𑀬𑀸𑀬𑀼𑀓𑀢𑀸𑀲𑀁𑀯𑀢𑁆𑀢𑀦𑀲𑀫𑀢𑁆𑀣𑀢𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀧𑀭𑀺𑀲𑁆𑀲𑀬𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸 𑀧𑀸𑀴𑀺𑀬𑀁 𑀆𑀕𑀢𑀸 𑀏𑀯𑀸𑀢𑀺 𑀇𑀫𑀁 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀅𑀯𑁄𑀘.

𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀲𑀼𑀬𑁆𑀬𑀢𑀻𑀢𑀺 𑀏𑀢𑁂𑀦 𑀬𑀣𑀸 𑀇𑀤𑁆𑀥𑀺𑀩𑀮𑁂𑀦 𑀚𑀭𑀸𑀬 𑀦 𑀧𑀝𑀺𑀖𑀸𑀢𑁄, 𑀏𑀯𑀁 𑀢𑁂𑀦 𑀫𑀭𑀡𑀲𑁆𑀲𑀧𑀺 𑀦 𑀧𑀝𑀺𑀖𑀸𑀢𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺. ‘‘𑀓𑁆𑀯 𑀲𑀭𑁄 𑀔𑀺𑀢𑁆𑀢𑁄, 𑀓𑁆𑀯𑀘𑀦𑀺 𑀧𑀢𑀺𑀢𑁄’’𑀢𑀺 𑀅𑀜𑁆𑀜𑀣𑀸 𑀯𑀼𑀝𑁆𑀞𑀺𑀢𑁂𑀦𑀧𑀺 𑀣𑁂𑀭𑀯𑀸𑀤𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀲𑀫𑀢𑁆𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑁄 𑀧𑀦 𑀦 𑀭𑀼𑀘𑁆𑀘𑀢𑀺…𑀧𑁂… 𑀦𑀺𑀬𑀫𑀺𑀢’’𑀦𑁆𑀢𑀺.

𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀬𑀣𑀸 𑀓𑀺𑀜𑁆𑀘𑀺 𑀅𑀢𑁆𑀣𑀸𑀦𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀁 𑀅𑀪𑀺𑀪𑀽𑀢𑀘𑀺𑀢𑁆𑀢𑁄. 𑀲𑁄 𑀧𑀦 𑀅𑀪𑀺𑀪𑀯𑁄 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀅𑀧𑁆𑀧𑀓𑀲𑁆𑀲 𑀉𑀤𑀓𑀲𑁆𑀲 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀺𑀬 𑀅𑀳𑁄𑀲𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄’’𑀢𑀺. 𑀅𑀜𑁆𑀜𑁄𑀢𑀺 𑀣𑁂𑀭𑀢𑁄, 𑀅𑀭𑀺𑀬𑁂𑀳𑀺 𑀯𑀸 𑀅𑀜𑁆𑀜𑁄 𑀬𑁄 𑀓𑁄𑀘𑀺 𑀧𑀭𑁄 𑀧𑀼𑀣𑀼𑀚𑁆𑀚𑀦𑁄. 𑀧𑀼𑀣𑀼𑀚𑁆𑀚𑀦𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀬𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀓𑀺𑀜𑁆𑀘𑀺 𑀅𑀢𑁆𑀣𑀸𑀦𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀣𑁂𑀭𑁄 𑀪𑀕𑀯𑀢𑀸 𑀓𑀢𑀁 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀲𑀩𑁆𑀩𑀲𑁄 𑀦 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀫𑀸𑀭𑁄 𑀳𑀻’’𑀢𑀺𑀆𑀤𑀺. 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸𑀢𑀺 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄, 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀢𑁂𑀦𑀸𑀢𑀺 𑀬𑀤𑀺𑀧𑀺 𑀇𑀢𑀭𑁂 𑀅𑀝𑁆𑀞 𑀯𑀺𑀧𑀮𑁆𑀮𑀸𑀲𑀸 𑀧𑀳𑀻𑀦𑀸, 𑀬𑀣𑀸𑀯𑀼𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀦. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲.

𑀫𑀤𑁆𑀤𑀢𑀻𑀢𑀺 𑀨𑀼𑀲𑀦𑀫𑀢𑁆𑀢𑁂𑀦 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀅𑀜𑁆𑀜𑀣𑀸 𑀢𑁂𑀦 𑀫𑀤𑁆𑀤𑀺𑀢𑁂 𑀲𑀢𑁆𑀢𑀸𑀦𑀁 𑀫𑀭𑀡𑀫𑁂𑀯 𑀲𑀺𑀬𑀸, 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸 𑀦 𑀲𑀓𑁆𑀔𑀺𑀲𑁆𑀲𑀢𑀺? 𑀦𑀦𑀼 𑀏𑀲 𑀅𑀕𑁆𑀕𑀲𑀸𑀯𑀓𑀲𑁆𑀲 𑀫𑀳𑀺𑀤𑁆𑀥𑀺𑀓𑀲𑁆𑀲 𑀫𑀳𑀸𑀦𑀼𑀪𑀸𑀯𑀲𑁆𑀲 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑁄𑀢𑀺? 𑀲𑀘𑁆𑀘𑀁 𑀧𑀯𑀺𑀝𑁆𑀞𑁄, 𑀢𑀜𑁆𑀘 𑀔𑁄 𑀅𑀢𑁆𑀢𑀦𑁄 𑀫𑀳𑀸𑀦𑀼𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁆𑀣𑀁, 𑀦 𑀯𑀺𑀩𑀸𑀥𑀦𑀸𑀥𑀺𑀧𑁆𑀧𑀸𑀬𑁂𑀦. 𑀯𑀺𑀩𑀸𑀥𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦 𑀇𑀥 ‘‘𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁 𑀳𑀤𑀬𑀫𑀤𑁆𑀤𑀦𑀲𑁆𑀲 𑀅𑀥𑀺𑀓𑀢𑀢𑁆𑀢𑀸. 𑀦𑀺𑀫𑀺𑀢𑁆𑀢𑁄𑀪𑀸𑀲𑀦𑁆𑀢𑀺 𑀏𑀢𑁆𑀣 ‘‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧’’𑀦𑁆𑀢𑀺 𑀲𑀓𑀮𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀬𑀸𑀘𑀦𑀸𑀬 ‘‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀓𑀧𑁆𑀧𑀁 𑀅𑀯𑀝𑁆𑀞𑀸𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀲𑀜𑁆𑀜𑀼𑀧𑁆𑀧𑀸𑀤𑀦𑀁 𑀦𑀺𑀫𑀺𑀢𑁆𑀢𑀁. 𑀢𑀣𑀸 𑀧𑀦 𑀧𑀭𑀺𑀬𑀸𑀬𑀕𑁆𑀕𑀳𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀚𑀼𑀓𑀁𑀬𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁 𑀑𑀪𑀸𑀲𑁄. 𑀚𑀸𑀦𑀦𑁆𑀢𑁄𑀬𑁂𑀯𑀸𑀢𑀺 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀪𑀸𑀯𑀁 𑀚𑀸𑀦𑀦𑁆𑀢𑁄 𑀏𑀯. 𑀅𑀢𑁆𑀢𑀦𑁄 𑀅𑀧𑀭𑀸𑀥𑀳𑁂𑀢𑀼𑀓𑁄 𑀲𑀢𑁆𑀢𑀸𑀦𑀁 𑀲𑁄𑀓𑁄 𑀢𑀦𑀼𑀓𑁄 𑀳𑁄𑀢𑀺, 𑀦 𑀩𑀮𑀯𑀸𑀢𑀺 𑀆𑀳 𑁋 ‘‘𑀤𑁄𑀲𑀸𑀭𑁄𑀧𑀦𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣’’𑀦𑁆𑀢𑀺. 𑀓𑀺𑀁 𑀧𑀦 𑀣𑁂𑀭𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀺𑀁 𑀧𑀘𑁆𑀙𑀸 𑀚𑀸𑀦𑀸𑀢𑀻𑀢𑀺? 𑀦 𑀚𑀸𑀦𑀸𑀢𑀺 𑀲𑀪𑀸𑀯𑁂𑀦, 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀧𑀦 𑀚𑀸𑀦𑀸𑀢𑀺.

𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀕𑀼𑀡𑀫𑀸𑀭𑀡𑁂𑀦 𑀫𑀸𑀭𑁂𑀢𑀺, 𑀯𑀺𑀭𑀸𑀕𑀯𑀺𑀩𑀦𑁆𑀥𑀦𑁂𑀦 𑀯𑀸 𑀚𑀸𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀁 𑀫𑀸𑀭𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀫𑀸𑀭𑁂𑀢𑀻𑀢𑀺 𑀫𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀧𑀸𑀧𑀢𑁆𑀢𑀸 𑀧𑀸𑀧𑀺𑀫𑀸. 𑀓𑀡𑁆𑀳𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀓𑀡𑁆𑀳𑁄. 𑀯𑀺𑀭𑀸𑀕𑀸𑀤𑀺𑀕𑀼𑀡𑀸𑀦𑀁 𑀅𑀦𑁆𑀢𑀓𑀭𑀡𑀢𑁄 𑀅𑀦𑁆𑀢𑀓𑁄. 𑀲𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀁 𑀧𑀝𑀺𑀧𑀢𑁆𑀢𑀺𑀁 𑀦 𑀫𑀼𑀜𑁆𑀘𑀢𑀻𑀢𑀺 𑀦𑀫𑀼𑀘𑀺. 𑀅𑀢𑁆𑀢𑀦𑁄 𑀫𑀸𑀭𑀧𑀸𑀲𑁂𑀦 𑀧𑀫𑀢𑁆𑀢𑁂 𑀩𑀦𑁆𑀥𑀢𑀺, 𑀧𑀫𑀢𑁆𑀢𑀸 𑀯𑀸 𑀩𑀦𑁆𑀥𑀽 𑀏𑀢𑀲𑁆𑀲𑀸𑀢𑀺 𑀧𑀫𑀢𑁆𑀢𑀩𑀦𑁆𑀥𑀼. 𑀲𑀢𑁆𑀢𑀫𑀲𑀢𑁆𑀢𑀸𑀳𑀢𑁄 𑀧𑀭𑀁 𑀲𑀢𑁆𑀢 𑀅𑀳𑀸𑀦𑀺 𑀲𑀦𑁆𑀥𑀸𑀬𑀸𑀳 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺, 𑀦 𑀧𑀦 𑀧𑀮𑁆𑀮𑀗𑁆𑀓𑀲𑀢𑁆𑀢𑀸𑀳𑀸𑀤𑀺 𑀯𑀺𑀬 𑀦𑀺𑀬𑀢𑀓𑀺𑀘𑁆𑀘𑀲𑁆𑀲 𑀅𑀝𑁆𑀞𑀫𑀲𑀢𑁆𑀢𑀸𑀳𑀲𑁆𑀲 𑀦𑀸𑀫 𑀮𑀩𑁆𑀪𑀦𑀢𑁄. 𑀲𑀢𑁆𑀢𑀫𑀲𑀢𑁆𑀢𑀸𑀳𑀲𑁆𑀲 𑀳𑀺 𑀧𑀭𑀢𑁄 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀩𑁆𑀭𑀳𑁆𑀫𑀼𑀦𑁄 𑀲𑀓𑁆𑀓𑀲𑁆𑀲 𑀘 𑀧𑀝𑀺𑀜𑁆𑀜𑀸𑀢𑀥𑀫𑁆𑀫𑀤𑁂𑀲𑀦𑀁 𑀪𑀕𑀯𑀦𑁆𑀢𑀁 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀲𑀢𑁆𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀫𑀫 𑀯𑀺𑀲𑀬𑀁 𑀅𑀢𑀺𑀓𑁆𑀓𑀸𑀫𑁂𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀤𑁄𑀫𑀦𑀲𑁆𑀲𑁄 𑀳𑀼𑀢𑁆𑀯𑀸 𑀞𑀺𑀢𑁄 𑀘𑀺𑀦𑁆𑀢𑁂𑀲𑀺, ‘‘𑀳𑀦𑁆𑀤𑀸𑀳𑀁 𑀤𑀸𑀦𑀺 𑀦𑀁 𑀉𑀧𑀸𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀧𑁂𑀲𑁆𑀲𑀸𑀫𑀺, 𑀏𑀯𑀫𑀲𑁆𑀲 𑀫𑀦𑁄𑀭𑀣𑁄 𑀅𑀜𑁆𑀜𑀣𑀢𑁆𑀢𑀁 𑀕𑀫𑀺𑀲𑁆𑀲𑀢𑀺, 𑀫𑀫 𑀫𑀦𑁄𑀭𑀣𑁄 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀬𑀸𑀘𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺𑀆𑀤𑀺. 𑀢𑀢𑁆𑀣 𑀅𑀚𑁆𑀚𑀸𑀢𑀺 𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑀤𑀺𑀯𑀲𑀁 𑀲𑀦𑁆𑀥𑀸𑀬𑀸𑀳. 𑀪𑀕𑀯𑀸 𑀘𑀲𑁆𑀲 𑀅𑀢𑀺𑀩𑀦𑁆𑀥𑀦𑀸𑀥𑀺𑀧𑁆𑀧𑀸𑀬𑀁 𑀚𑀸𑀦𑀦𑁆𑀢𑁄𑀧𑀺 𑀢𑀁 𑀅𑀦𑀸𑀯𑀺𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀅𑀓𑀸𑀮𑀪𑀸𑀯𑀫𑁂𑀯 𑀧𑀓𑀸𑀲𑁂𑀦𑁆𑀢𑁄 𑀬𑀸𑀘𑀦𑀁 𑀧𑀝𑀺𑀓𑁆𑀔𑀺𑀧𑀺. 𑀢𑁂𑀦𑀸𑀳 ‘‘𑀦 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀺.

𑀫𑀕𑁆𑀕𑀯𑀲𑁂𑀦 𑀩𑁆𑀬𑀢𑁆𑀢𑀸𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀩𑁆𑀬𑀢𑁆𑀢𑀸. 𑀢𑀣𑁂𑀯 𑀯𑀺𑀦𑀻𑀢𑀸𑀢𑀺 𑀫𑀕𑁆𑀕𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑁂𑀦 𑀯𑀺𑀦𑀻𑀢𑀸. 𑀢𑀣𑀸 𑀯𑀺𑀲𑀸𑀭𑀤𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀲𑀢𑁆𑀣𑀼𑀲𑀸𑀲𑀦𑁂 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀸𑀭𑀤𑀸, 𑀲𑀸𑀭𑀚𑁆𑀚𑀓𑀭𑀸𑀦𑀁 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀕𑀫𑁂𑀦 𑀯𑀺𑀲𑀸𑀭𑀤𑀪𑀸𑀯𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀲𑀼𑀢𑀲𑁆𑀲 𑀯𑀲𑁂𑀦 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀁 𑀲𑀫𑁆𑀪𑀯𑀢𑀺, 𑀢𑀁 𑀇𑀥 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 ‘‘𑀲𑀼𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀢𑁂𑀧𑀺𑀝𑀓𑀯𑀲𑁂𑀦𑀸’’𑀢𑀺. 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀲𑀫𑀽𑀳𑁄 𑀢𑁂𑀧𑀺𑀝𑀓𑀁, 𑀢𑀻𑀡𑀺 𑀯𑀸 𑀧𑀺𑀝𑀓𑀸𑀦𑀺 𑀢𑀺𑀧𑀺𑀝𑀓𑀁, 𑀢𑀺𑀧𑀺𑀝𑀓𑀫𑁂𑀯 𑀢𑁂𑀧𑀺𑀝𑀓𑀁, 𑀢𑀲𑁆𑀲 𑀯𑀲𑁂𑀦. 𑀢𑀤𑁂𑀯𑀸𑀢𑀺 𑀬𑀁 𑀢𑀁 𑀢𑁂𑀧𑀺𑀝𑀓𑀁 𑀲𑁄𑀢𑀩𑁆𑀩𑀪𑀸𑀯𑁂𑀦 𑀲𑀼𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁂𑀯. 𑀥𑀫𑁆𑀫𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁. 𑀥𑀸𑀭𑁂𑀦𑁆𑀢𑀻𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀁 𑀯𑀺𑀬 𑀅𑀯𑀺𑀦𑀲𑁆𑀲𑀦𑁆𑀢𑀁 𑀓𑀢𑁆𑀯𑀸 𑀲𑀼𑀧𑁆𑀧𑀕𑀼𑀡𑀲𑀼𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀥𑀸𑀭𑁂𑀦𑁆𑀢𑀺 𑀳𑀤𑀬𑁂 𑀞𑀧𑁂𑀦𑁆𑀢𑀺. 𑀇𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀥𑀫𑁆𑀫𑀥𑀭𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀯𑁂𑀥𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀥𑀫𑁆𑀫𑀲𑁆𑀲𑀸𑀢𑀺 𑀫𑀕𑁆𑀕𑀨𑀮𑀥𑀫𑁆𑀫𑀲𑁆𑀲, 𑀦𑀯𑀯𑀺𑀥𑀲𑁆𑀲 𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲. 𑀅𑀦𑀼𑀥𑀫𑁆𑀫𑀪𑀽𑀢𑀦𑁆𑀢𑀺 𑀅𑀥𑀺𑀕𑀫𑀸𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀪𑀽𑀢𑀁. 𑀅𑀦𑀼𑀘𑁆𑀙𑀯𑀺𑀓𑀧𑀝𑀺𑀧𑀤𑀦𑁆𑀢𑀺 𑀢𑀫𑁂𑀯 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀫𑀸𑀳, 𑀙𑀩𑁆𑀩𑀺𑀥𑀸 𑀯𑀺𑀲𑀼𑀤𑁆𑀥𑀺𑀬𑁄 𑀯𑀸. 𑀅𑀦𑀼𑀥𑀫𑁆𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑁄, 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀸, 𑀢𑀲𑁆𑀲𑀸𑀦𑀼𑀭𑀽𑀧𑀁 𑀅𑀪𑀺𑀲𑀮𑁆𑀮𑁂𑀔𑀺𑀢𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀥𑀫𑁆𑀫𑀁. 𑀘𑀭𑀡𑀲𑀻𑀮𑀸𑀢𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑀲𑀻𑀮𑀸. 𑀅𑀦𑀼𑀫𑀕𑁆𑀕𑀨𑀮𑀥𑀫𑁆𑀫𑁄 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀅𑀦𑀼𑀥𑀫𑁆𑀫𑀸, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲 𑀘𑀭𑀡𑀲𑀻𑀮𑀸. 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀸𑀤𑀁. 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀆𑀘𑀭𑀺𑀬𑁄, 𑀪𑀕𑀯𑀸, 𑀢𑀲𑁆𑀲 𑀯𑀸𑀤𑁄, 𑀘𑀢𑀼𑀲𑀘𑁆𑀘𑀤𑁂𑀲𑀦𑀸.

𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀆𑀤𑀺𑀢𑁄 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦 𑀧𑀭𑁂 𑀉𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑁂𑀲𑁂𑀲𑁆𑀲𑀦𑁆𑀢𑀻𑀢𑀺 𑀯𑀸𑀘𑁂𑀲𑁆𑀲𑀦𑁆𑀢𑀺, 𑀧𑀸𑀴𑀺𑀁 𑀲𑀫𑁆𑀫𑀸 𑀧𑀩𑁄𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀚𑀸𑀦𑀸𑀧𑁂𑀲𑁆𑀲𑀦𑁆𑀢𑀺, 𑀲𑀗𑁆𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀧𑀓𑀸𑀭𑁂𑀳𑀺 𑀞𑀧𑁂𑀲𑁆𑀲𑀦𑁆𑀢𑀺, 𑀧𑀓𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀯𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀺𑀪𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀏𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀯𑀺𑀬𑀸𑀢𑀺 𑀆𑀳 ‘‘𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦𑀸’’𑀢𑀺.

𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀲𑀦𑀺𑀲𑁆𑀲𑀭𑀡𑀁. 𑀬𑀣𑀸 𑀧𑀭𑀯𑀸𑀤𑀁 𑀪𑀜𑁆𑀚𑀺𑀢𑁆𑀯𑀸 𑀲𑀓𑀯𑀸𑀤𑁄 𑀧𑀢𑀺𑀝𑁆𑀞𑀳𑀢𑀺, 𑀏𑀯𑀁 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 𑀬𑀣𑀸𑀥𑀺𑀕𑀢𑀫𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺, 𑀦𑀯𑀯𑀺𑀥𑀁 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀧𑀩𑁄𑀥𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 ‘‘𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀳𑀺 𑀙𑀳𑀺 𑀧𑀤𑁂𑀳𑀺 𑀙 𑀅𑀢𑁆𑀣𑀧𑀤𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀆𑀤𑀺𑀢𑁄 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀙 𑀩𑁆𑀬𑀜𑁆𑀚𑀦𑀧𑀤𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭) ‘‘𑀤𑁆𑀯𑀸𑀤𑀲 𑀧𑀤𑀸𑀦𑀺 𑀲𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀁 𑀩𑁆𑀬𑀜𑁆𑀚𑀦𑀜𑁆𑀘 𑀅𑀢𑁆𑀣𑁄 𑀘𑀸’’𑀢𑀺.

𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀦𑁆𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁. 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀦𑀯𑀲𑁂𑀲𑀁 𑀲𑀢𑁆𑀣𑀼𑀲𑀸𑀲𑀦𑀪𑀽𑀢𑀁 𑀲𑁂𑀝𑁆𑀞𑀘𑀭𑀺𑀬𑀁. 𑀲𑀫𑀺𑀤𑁆𑀥𑀦𑁆𑀢𑀺 𑀲𑀫𑁆𑀫𑀤𑁂𑀯 𑀯𑀟𑁆𑀠𑀺𑀢𑀁. 𑀛𑀸𑀦𑀲𑁆𑀲𑀸𑀤𑀯𑀲𑁂𑀦𑀸𑀢𑀺 𑀢𑁂𑀳𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑀥𑀺𑀕𑀢𑀛𑀸𑀦𑀲𑀼𑀔𑀯𑀲𑁂𑀦. 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀦𑁆𑀢𑀺 𑀉𑀴𑀸𑀭𑀧𑀡𑀻𑀢𑀪𑀸𑀯𑀽𑀧𑀕𑀫𑀦𑁂𑀦 𑀲𑀩𑁆𑀩𑀲𑁄 𑀧𑀭𑀺𑀯𑀼𑀟𑁆𑀠𑀺𑀫𑀼𑀧𑀕𑀢𑀁. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀅𑀪𑀺𑀜𑁆𑀜𑀸𑀲𑀫𑁆𑀧𑀤𑀸𑀳𑀺 𑀲𑀸𑀲𑀦𑀸𑀪𑀺𑀯𑀼𑀟𑁆𑀠𑀺𑀬𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀢𑁄. 𑀧𑀢𑀺𑀝𑁆𑀞𑀺𑀢𑀯𑀲𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀦𑀯𑀲𑁂𑀦, 𑀧𑀢𑀺𑀝𑁆𑀞𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀯𑁂𑀥𑀯𑀲𑁂𑀦 𑀩𑀳𑀼𑀦𑁄 𑀚𑀦𑀲𑁆𑀲 𑀳𑀺𑀢𑀁 𑀩𑀸𑀳𑀼𑀚𑀜𑁆𑀜𑀁. 𑀢𑁂𑀦𑀸𑀳 ‘‘𑀫𑀳𑀸𑀚𑀦𑀸𑀪𑀺𑀲𑀫𑀬𑀯𑀲𑁂𑀦𑀸’’𑀢𑀺. 𑀧𑀼𑀣𑀼 𑀧𑀼𑀣𑀼𑀮𑀁 𑀪𑀽𑀢𑀁 𑀚𑀸𑀢𑀁, 𑀧𑀼𑀣𑀼𑀢𑁆𑀢𑀁 𑀪𑀽𑀢𑀁 𑀧𑀢𑁆𑀢𑀦𑁆𑀢𑀺 𑀯𑀸 𑀧𑀼𑀣𑀼𑀪𑀽𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀓𑀸𑀭𑁂𑀦 𑀧𑀼𑀣𑀼𑀮𑀪𑀸𑀯𑀧𑁆𑀧𑀢𑁆𑀢’’𑀦𑁆𑀢𑀺. 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀲𑀫𑁆𑀫𑀤𑁂𑀯 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁂𑀦 𑀧𑀯𑁂𑀤𑀺𑀢𑀁.

𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸𑀢𑀺 𑀅𑀬𑀁 𑀓𑀸𑀬𑀸𑀤𑀺𑀯𑀺𑀪𑀸𑀕𑁄 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀤𑀼𑀓𑁆𑀔𑀪𑀸𑀭𑁄 𑀫𑀬𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀯𑀳𑀺𑀢𑁄, 𑀇𑀤𑀸𑀦𑀺 𑀧𑀦 𑀦 𑀯𑀳𑀺𑀢𑀩𑁆𑀩𑁄, 𑀏𑀢𑀲𑁆𑀲 𑀅𑀯𑀳𑀦𑀢𑁆𑀣𑀁 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀭𑀺𑀬𑀫𑀕𑁆𑀕𑀲𑀫𑁆𑀪𑀸𑀭𑁄 𑀲𑀫𑁆𑀪𑀢𑁄, 𑀲𑁆𑀯𑀸𑀬𑀁 𑀅𑀭𑀺𑀬𑀫𑀕𑁆𑀕𑁄 𑀧𑀝𑀺𑀯𑀺𑀤𑁆𑀥𑁄, 𑀬𑀢𑁄 𑀇𑀫𑁂 𑀓𑀸𑀬𑀸𑀤𑀬𑁄 𑀅𑀲𑀼𑀪𑀸𑀤𑀺𑀢𑁄 𑀲𑀪𑀸𑀯𑀸𑀤𑀺𑀢𑁄 𑀲𑀫𑁆𑀫𑀤𑁂𑀯 𑀧𑀭𑀺𑀜𑁆𑀜𑀸𑀢𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀲𑀢𑀺𑀁 𑀬𑀣𑀸𑀢𑀣𑀁 𑀯𑀺𑀲𑀬𑁂 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀁 𑀓𑀢𑁆𑀯𑀸. 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀬𑀲𑁆𑀫𑀸 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀲𑁆𑀲 𑀤𑀼𑀓𑁆𑀔𑀪𑀸𑀭𑀲𑁆𑀲 𑀯𑀳𑀦𑁂 𑀧𑀬𑁄𑀚𑀦𑀪𑀽𑀢𑀁 𑀅𑀢𑁆𑀢𑀳𑀺𑀢𑀁 𑀩𑁄𑀥𑀺𑀫𑀽𑀮𑁂 𑀏𑀯 𑀧𑀭𑀺𑀲𑀫𑀸𑀧𑀺𑀢𑀁, 𑀧𑀭𑀳𑀺𑀢𑀁 𑀧𑀦 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀁 𑀧𑀭𑀺𑀲𑀫𑀸𑀧𑀺𑀢𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁, 𑀢𑀁 𑀤𑀸𑀦𑀺 𑀫𑀸𑀲𑀢𑁆𑀢𑀬𑁂𑀦𑁂𑀯 𑀧𑀭𑀺𑀲𑀫𑀸𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀆𑀳 ‘‘𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺, 𑀏𑀯𑀁 𑀩𑀼𑀤𑁆𑀥𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀘𑁆𑀘𑀪𑀸𑀕𑁂𑀦 𑀯𑀺𑀦𑀺𑀘𑁆𑀙𑀬𑀁 𑀓𑀢𑁆𑀯𑀸. 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑀻𑀢𑀺 𑀆𑀬𑀼𑀦𑁄 𑀚𑀻𑀯𑀺𑀢𑀲𑁆𑀲 𑀅𑀪𑀺𑀲𑀗𑁆𑀔𑀭𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀁 𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀺𑀲𑁆𑀲𑀚𑀺, 𑀢𑀁 𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀢𑁂𑀦 𑀅𑀪𑀺𑀲𑀗𑁆𑀔𑀭𑀻𑀬𑀫𑀸𑀦𑀁 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 𑀦 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀯𑀺𑀲𑁆𑀲𑀚𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀞𑀸𑀦𑀫𑀳𑀦𑁆𑀢𑀢𑀸𑀬𑀧𑀺 𑀧𑀯𑀢𑁆𑀢𑀺𑀆𑀓𑀸𑀭𑀫𑀳𑀦𑁆𑀢𑀢𑀸𑀬𑀧𑀺 𑀫𑀳𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑁄. 𑀢𑀢𑁆𑀣 𑀞𑀸𑀦𑀫𑀳𑀦𑁆𑀢𑀢𑀸𑀬 𑀪𑀽𑀫𑀺𑀘𑀸𑀮𑀲𑁆𑀲 𑀫𑀳𑀦𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸…𑀧𑁂… 𑀅𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁, 𑀲𑀸 𑀧𑀦 𑀚𑀸𑀢𑀺𑀔𑁂𑀢𑁆𑀢𑀪𑀽𑀢𑀸 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀯, 𑀦 𑀬𑀸 𑀓𑀸𑀘𑀺. 𑀬𑀸 𑀫𑀳𑀸𑀪𑀺𑀦𑀻𑀳𑀸𑀭𑀫𑀳𑀸𑀚𑀸𑀢𑀺𑀆𑀤𑀻𑀲𑀼𑀧𑀺 𑀅𑀓𑀫𑁆𑀧𑀺𑀢𑁆𑀣, 𑀢𑀤𑀸𑀧𑀺 𑀢𑀢𑁆𑀢𑀓𑀸𑀬 𑀏𑀯 𑀓𑀫𑁆𑀧𑀦𑁂 𑀓𑀺𑀁 𑀓𑀸𑀭𑀡𑀁? 𑀚𑀸𑀢𑀺𑀔𑁂𑀢𑁆𑀢𑀪𑀸𑀯𑁂𑀦 𑀢𑀲𑁆𑀲𑁂𑀯 𑀆𑀤𑀺𑀢𑁄 𑀧𑀭𑀺𑀕𑁆𑀕𑀳𑀲𑁆𑀲 𑀓𑀢𑀢𑁆𑀢𑀸, 𑀧𑀭𑀺𑀕𑁆𑀕𑀳𑀡𑀜𑁆𑀘𑀲𑁆𑀲 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀢𑀢𑁆𑀢𑀓𑀫𑁂𑀯 𑀚𑀸𑀢𑀺𑀔𑁂𑀢𑁆𑀢𑀁 𑀅𑀳𑁄𑀲𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀦𑀺𑀲𑁆𑀲𑀤𑁆𑀤𑀸 𑀳𑁄𑀢𑀺 𑀦𑀺𑀭𑀸𑀓𑀼𑀮𑀸…𑀧𑁂… 𑀫𑀳𑀸𑀲𑀫𑀼𑀤𑁆𑀤𑁄 𑀆𑀪𑀼𑀚𑀢𑀺, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀢𑀻’’𑀢𑀺 𑀘 𑀆𑀤𑀺. 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀙𑀧𑁆𑀧𑀓𑀸𑀭𑀧𑁆𑀧𑀯𑁂𑀥𑀦𑁂𑀦. 𑀅𑀯𑀻𑀢𑀭𑀸𑀕𑁂 𑀪𑀺𑀁𑀲𑁂𑀢𑀻𑀢𑀺 𑀪𑀺𑀁𑀲𑀦𑁄, 𑀲𑁄 𑀏𑀯 𑀪𑀺𑀁𑀲𑀦𑀓𑁄𑀢𑀺 𑀆𑀳 ‘‘𑀪𑀬𑀚𑀦𑀓𑁄’’𑀢𑀺. 𑀤𑁂𑀯𑀪𑁂𑀭𑀺𑀬𑁄𑀢𑀺 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀫𑀢𑁆𑀢𑀁, 𑀦 𑀘𑁂𑀢𑁆𑀣 𑀓𑀸𑀘𑀺 𑀪𑁂𑀭𑀻 𑀤𑁂𑀯𑀤𑀼𑀦𑁆𑀤𑀼𑀪𑀻𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀅𑀣 𑀔𑁄 𑀉𑀧𑁆𑀧𑀸𑀢𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑁄 𑀆𑀓𑀸𑀲𑀢𑁄 𑀦𑀺𑀕𑁆𑀖𑁄𑀲𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀤𑁂𑀯𑁄’’𑀢𑀺𑀆𑀤𑀺. 𑀤𑁂𑀯𑁄𑀢𑀺 𑀫𑁂𑀖𑁄. 𑀢𑀲𑁆𑀲 𑀳𑀺 𑀢𑀤𑀸 𑀅𑀘𑁆𑀙𑀪𑀸𑀯𑁂𑀦 𑀆𑀓𑀸𑀲𑀲𑁆𑀲 𑀯𑀲𑁆𑀲𑀸𑀪𑀸𑀯𑁂𑀦 𑀲𑀼𑀓𑁆𑀔𑀕𑀚𑁆𑀚𑀺𑀢𑀲𑀜𑁆𑀜𑀺𑀢𑁂 𑀲𑀤𑁆𑀤𑁂 𑀦𑀺𑀘𑁆𑀙𑀭𑀦𑁆𑀢𑁂 𑀤𑁂𑀯𑀤𑀼𑀦𑁆𑀤𑀼𑀪𑀺𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀻’’𑀢𑀺.

𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀦𑁆𑀢𑀺 ‘‘𑀏𑀯𑀁 𑀘𑀺𑀭𑀢𑀭𑀓𑀸𑀮𑀁 𑀯𑀳𑀺𑀢𑁄 𑀅𑀬𑀁 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑁄 𑀤𑀼𑀓𑁆𑀔𑀪𑀸𑀭𑁄, 𑀤𑀸𑀦𑀺 𑀦 𑀘𑀺𑀭𑀲𑁆𑀲𑁂𑀯 𑀦𑀺𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄 𑀪𑀕𑀯𑀸 𑀲𑀪𑀸𑀯𑁂𑀦𑁂𑀯 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀢𑀺, 𑀏𑀯𑀁 𑀉𑀤𑀸𑀦𑁂𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀼𑀮𑀻𑀬𑀢𑀻𑀢𑀺 𑀢𑀼𑀮𑀦𑁆𑀢𑀺 𑀢𑀼𑀮-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀮𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀣𑀸 𑀳𑀺 𑀢𑀁 𑀧𑀝𑀺𑀧𑀓𑁆𑀔𑁂𑀦 𑀧𑀭𑀺𑀢𑁄 𑀔𑀡𑁆𑀟𑀺𑀢𑀪𑀸𑀯𑁂𑀦 𑀧𑀭𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀢𑁄 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀯𑀺𑀧𑀼𑀮𑀨𑀮𑀢𑀸𑀬 𑀘 𑀦 𑀢𑀼𑀮𑀁 𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀧𑀼𑀩𑁆𑀩𑁂 𑀅𑀯𑀺𑀲𑁂𑀲𑀢𑁄 ‘‘𑀫𑀳𑀕𑁆𑀕𑀢𑀁 𑀅𑀢𑀼𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀭𑀽𑀧𑀸𑀯𑀘𑀭𑀢𑁄 𑀆𑀭𑀼𑀧𑁆𑀧𑀲𑁆𑀲 𑀲𑀸𑀢𑀺𑀲𑀬𑀁 𑀯𑀺𑀚𑁆𑀚𑀦𑁆𑀢𑀻𑀢𑀺 𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀢𑀭𑀜𑁆𑀘 𑀢𑀼𑀮𑀦𑁆𑀢𑀺. 𑀅𑀧𑁆𑀧𑀯𑀺𑀧𑀸𑀓𑀦𑁆𑀢𑀺 𑀢𑀻𑀲𑀼𑀧𑀺 𑀓𑀫𑁆𑀫𑁂𑀲𑀼 𑀬𑀁 𑀅𑀧𑁆𑀧𑀯𑀺𑀧𑀸𑀓𑀁 𑀳𑀻𑀦𑀁, 𑀢𑀁 𑀢𑀼𑀮𑀁. 𑀩𑀳𑀼𑀯𑀺𑀧𑀸𑀓𑀦𑁆𑀢𑀺 𑀬𑀁 𑀫𑀳𑀸𑀯𑀺𑀧𑀸𑀓𑀁 𑀧𑀡𑀻𑀢𑀁, 𑀢𑀁 𑀅𑀢𑀼𑀮𑀁. 𑀬𑀁 𑀧𑀦𑁂𑀢𑁆𑀣 𑀫𑀚𑁆𑀛𑀺𑀫𑀁, 𑀢𑀁 𑀳𑀻𑀦𑀁 𑀉𑀓𑁆𑀓𑀝𑁆𑀞𑀦𑁆𑀢𑀺 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑀻𑀲𑀼 𑀪𑀸𑀕𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀁. 𑀳𑀻𑀦𑀢𑁆𑀢𑀺𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀧𑁆𑀧𑀩𑀳𑀼𑀯𑀺𑀧𑀸𑀓𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 𑀢𑀼𑀮𑀸𑀢𑀼𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀲𑀫𑁆𑀪𑀯^ 𑀳𑁂𑀢𑀼𑀪𑀽𑀢’’𑀦𑁆𑀢𑀺. 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄𑀢𑀺 𑀲𑀲𑀦𑁆𑀢𑀸𑀦𑀥𑀫𑁆𑀫𑁂𑀲𑀼 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑁄𑀘𑀭𑀸𑀲𑁂𑀯𑀦𑀸𑀬 𑀘 𑀭𑀢𑁄. 𑀲𑀯𑀺𑀧𑀸𑀓𑀁 𑀲𑀫𑀸𑀦𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀤𑀸𑀬𑀺𑀓𑀫𑁆𑀫𑀁 𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁, 𑀦 𑀘 𑀢𑀁 𑀓𑀸𑀫𑀸𑀤𑀺^ 𑀪𑀯𑀸𑀪𑀺𑀲𑀗𑁆𑀔𑀸𑀭𑀓𑀦𑁆𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 𑀲𑀫𑁆𑀪𑀯𑀦𑁆𑀢𑀺 𑀯𑀢𑁆𑀯𑀸 ‘‘𑀪𑀯𑀲𑀗𑁆𑀔𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀑𑀲𑁆𑀲𑀚𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑀺. 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀢𑁆𑀢𑀸 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀪𑀺𑀦𑁆𑀤𑀻𑀢𑀺 𑀓𑀺𑀮𑁂𑀲𑀪𑁂𑀤𑀲𑀳𑀪𑀸𑀯𑀺𑀓𑀫𑁆𑀫𑁄𑀲𑁆𑀲𑀚𑁆𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀢𑀤𑀼𑀪𑀬𑀲𑁆𑀲 𑀓𑀸𑀭𑀡𑀫𑀸𑀳 ‘‘𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄’’𑀢𑀺.

𑀧𑀞𑀫𑀯𑀺𑀓𑀧𑁆𑀧𑁂 𑀅𑀯𑀲𑀚𑁆𑀚𑀦𑀫𑁂𑀯 𑀯𑀼𑀢𑁆𑀢𑀁. 𑀏𑀢𑁆𑀣 𑀅𑀯𑀲𑀚𑁆𑀚𑀦𑀸𑀓𑀸𑀭𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀻𑀭𑁂𑀦𑁆𑀢𑁄𑀢𑀺 ‘‘𑀉𑀧𑁆𑀧𑀸𑀤𑁄 𑀪𑀬𑀁, 𑀅𑀦𑀼𑀧𑁆𑀧𑀸𑀤𑁄 𑀔𑁂𑀫’’𑀦𑁆𑀢𑀺𑀆𑀤𑀺𑀦𑀸 𑀯𑀻𑀫𑀁𑀲𑀦𑁆𑀢𑁄. 𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀪𑀯𑀲𑀗𑁆𑀔𑀸𑀭𑀲𑁆𑀲 𑀅𑀯𑀲𑀚𑁆𑀚𑀦𑀸𑀓𑀸𑀭𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀏𑀯𑀦𑁆𑀢𑀺𑀆𑀤𑀺𑀦𑀸 𑀧𑀦 𑀉𑀤𑀸𑀦𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀆𑀤𑀺𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀅𑀪𑀻𑀢𑀪𑀸𑀯𑀜𑀸𑀧𑀦𑀢𑁆𑀣𑀜𑁆𑀘𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀘𑀸𑀧𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑁄

𑁧-𑁨. 𑀧𑀼𑀩𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁨𑁩-𑁮𑁨𑁪. 𑀧𑀭𑀢𑁄 𑀇𑀫𑀲𑁆𑀫𑀺𑀁 𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑁂 𑀤𑀲𑀫𑀲𑀼𑀢𑁆𑀢𑁂 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀙𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀢𑀺 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀧𑀸𑀤𑀓𑀪𑀽𑀢𑀸 𑀧𑀥𑀸𑀦𑀪𑀽𑀢𑀸. 𑀬𑀣𑀸 𑀧𑀞𑀫𑀲𑀼𑀢𑁆𑀢𑁂, 𑀢𑀣𑀸 𑀤𑀼𑀢𑀺𑀬𑀢𑀢𑀺𑀬𑀲𑀼𑀢𑁆𑀢𑁂𑀲𑀼𑀧𑀺 𑀘 𑀙𑀅𑀪𑀺𑀜𑁆𑀜𑀸𑀧𑀸𑀤𑀓𑀸 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄.

𑁩. 𑀙𑀦𑁆𑀤𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁫. 𑀬𑁄 𑀲𑀫𑀸𑀥𑀺𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁄 𑀙𑀦𑁆𑀤𑁄, 𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀙𑀦𑁆𑀤𑀦𑁆𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤’’𑀦𑁆𑀢𑀺. 𑀢𑀲𑁆𑀲 𑀘 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀦𑀺𑀲𑁆𑀲𑀬𑀝𑁆𑀞𑁄, 𑀦 𑀯𑀺𑀦𑀸 𑀢𑀁 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀆𑀳 𑁋 ‘‘𑀦𑀺𑀲𑁆𑀲𑀸𑀬𑀸𑀢𑀺 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸, 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀧𑀥𑀸𑀦𑀪𑀽𑀢𑀸𑀢𑀺 𑀲𑁂𑀝𑁆𑀞𑀪𑀽𑀢𑀸, 𑀲𑁂𑀝𑁆𑀞𑀪𑀸𑀯𑁄 𑀘 𑀏𑀓𑀲𑁆𑀲𑀧𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸, 𑀢𑀢𑁄 𑀏𑀯 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄, 𑀧𑀥𑀸𑀦𑀲𑀗𑁆𑀔𑀸𑀭𑀝𑁆𑀞𑁂𑀦 𑀧𑀥𑀸𑀦𑀲𑀗𑁆𑀔𑀭𑀡𑀢𑁄. ‘‘𑀙𑀦𑁆𑀤𑀁 𑀘𑁂 𑀦𑀺𑀲𑁆𑀲𑀸𑀬…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀙𑀦𑁆𑀤𑀸𑀥𑀺𑀧𑀢𑀺 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀅𑀥𑀺𑀧𑀢𑀺𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 𑀲𑀫𑀸𑀲𑁄 𑀯𑀼𑀢𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀅𑀥𑀺𑀧𑀢𑀺𑀲𑀤𑁆𑀤𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀯𑀸 𑀙𑀦𑁆𑀤𑀳𑁂𑀢𑀼𑀓𑁄, 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺. 𑀢𑁂𑀦 ‘‘𑀙𑀦𑁆𑀤𑀲𑀫𑀸𑀥𑀺𑀦𑀸 𑀘𑁂𑀯 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀧𑀥𑀸𑀦𑀪𑀽𑀢𑀲𑀗𑁆𑀔𑀸𑀭𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀸’’𑀢𑀺 𑀯𑀓𑁆𑀔𑀢𑀺, 𑀢𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀥𑀸𑀦𑀪𑀽𑀢𑀸𑀢𑀺 𑀯𑀻𑀭𑀺𑀬𑀪𑀽𑀢𑀸. 𑀓𑁂𑀘𑀺 𑀯𑀤𑀦𑁆𑀢𑀺 𑁋 ‘‘𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡’’𑀦𑁆𑀢𑀺. 𑀅𑀣 𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀲𑀩𑁆𑀩𑀫𑁆𑀧𑀺 𑀯𑀻𑀭𑀺𑀬𑀁. 𑀢𑀢𑁆𑀣 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁄 𑀢𑀤𑀜𑁆𑀜𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺. 𑀬𑀣𑀸 𑀙𑀦𑁆𑀤𑁄 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘𑁂𑀯 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄, 𑀏𑀯𑀁 𑀙𑀦𑁆𑀤𑀲𑀫𑀸𑀥𑀺 𑀙𑀦𑁆𑀤𑁂𑀦 𑀘𑁂𑀯 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑁄. 𑀧𑀥𑀸𑀦𑀲𑀗𑁆𑀔𑀸𑀭𑀸𑀧𑀺 𑀙𑀦𑁆𑀤𑁂𑀦 𑀘𑁂𑀯 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘 𑀲𑀫𑀦𑁆𑀦𑀸𑀕𑀢𑀸𑀢𑀺 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀲𑀫𑀦𑁆𑀦𑀸𑀕𑀢𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀬𑁄𑀧𑀺 𑀙𑀦𑁆𑀤𑀸𑀤𑀬𑁄 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸, 𑀢𑀲𑁆𑀫𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀏𑀓𑀢𑁄 𑀓𑀢𑁆𑀯𑀸 ‘‘𑀅𑀬𑀁 𑀯𑀼𑀘𑁆𑀘𑀢𑀺…𑀧𑁂… 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀯𑀁 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀘𑁂𑀢𑁆𑀣 𑀇𑀤𑁆𑀥𑀺𑀧𑀸𑀤𑀪𑀸𑀯𑁄 𑀯𑀼𑀢𑁆𑀢𑁄, 𑀯𑀺𑀪𑀗𑁆𑀕𑁂 𑀧𑀦 𑀢𑁂𑀲𑀁 𑀇𑀤𑁆𑀥𑀺𑀪𑀸𑀯𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀇𑀤𑁆𑀥𑀺𑀧𑀸𑀤𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀇𑀤𑀸𑀦𑀺 𑀦𑁂𑀲𑀁 𑀇𑀤𑁆𑀥𑀺𑀧𑀸𑀤𑀢𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀦𑁆𑀤𑀜𑁆𑀳𑀺 𑀪𑀸𑀯𑀬𑀢𑁄 𑀧𑀥𑀸𑀦𑀁 𑀓𑀢𑁆𑀯𑀸 𑀪𑀸𑀯𑁂𑀦𑁆𑀢𑀲𑁆𑀲 𑀢𑀣𑀸 𑀧𑀯𑀢𑁆𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀇𑀚𑁆𑀛𑀫𑀸𑀦𑁄 𑀙𑀦𑁆𑀤𑁄 𑀇𑀤𑁆𑀥𑀺 𑀦𑀸𑀫, 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀧𑀥𑀸𑀦𑀲𑀗𑁆𑀔𑀸𑀭𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀪𑀸𑀯𑀬𑀦𑁆𑀢𑀲𑁆𑀲 𑀫𑀼𑀔𑁆𑀬𑀢𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀚𑁆𑀛𑀦𑀢𑁆𑀣𑁄 𑀧𑀦 𑀲𑀩𑁆𑀩𑁂𑀲𑀁 𑀲𑀫𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀧𑀬𑀼𑀢𑁆𑀢…𑀧𑁂… 𑀇𑀚𑁆𑀛𑀦𑁆𑀢𑀺𑀬𑁂𑀯𑀸’’𑀢𑀺 𑀆𑀳.

𑀇𑀤𑁆𑀥𑀺𑀧𑀸𑀤𑁂 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀙𑀦𑁆𑀤𑀸𑀤𑀬𑁄𑀢𑀺 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸. 𑀲𑁂𑀲𑀺𑀤𑁆𑀥𑀺𑀧𑀸𑀤𑁂𑀲𑀽𑀢𑀺 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀸𑀤𑀻𑀲𑀼. 𑀢𑀢𑁆𑀣 𑀯𑀻𑀭𑀺𑀬𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀻𑀭𑀺𑀬𑀁 𑀆𑀕𑀢𑀁, 𑀢𑀢𑁆𑀣 𑀧𑀼𑀭𑀺𑀫𑀁 𑀲𑀫𑀸𑀥𑀺𑀯𑀺𑀲𑁂𑀲𑀁, 𑀯𑀻𑀭𑀺𑀬𑀸𑀥𑀺𑀧𑀢𑀺𑀲𑀫𑀸𑀥𑀺 𑀏𑀯 𑀯𑀻𑀭𑀺𑀬𑀲𑀫𑀸𑀥𑀻𑀢𑀺 𑀤𑀼𑀢𑀺𑀬𑀁 𑀲𑀫𑀦𑁆𑀦𑀸𑀕𑀫𑀗𑁆𑀕𑀤𑀲𑁆𑀲𑀦𑀁. 𑀤𑁆𑀯𑁂𑀬𑁂𑀯 𑀳𑀺 𑀲𑀩𑁆𑀩𑀢𑁆𑀣 𑀲𑀫𑀦𑁆𑀦𑀸𑀕𑀫𑀗𑁆𑀕𑀸𑀦𑀺 𑀲𑀫𑀸𑀥𑀺 𑀧𑀥𑀸𑀦𑀲𑀗𑁆𑀔𑀸𑀭𑁄 𑀘, 𑀙𑀦𑁆𑀤𑀸𑀤𑀬𑁄 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀺, 𑀧𑀥𑀸𑀦𑀲𑀗𑁆𑀔𑀸𑀭𑁄 𑀧𑀦 𑀧𑀥𑀸𑀦𑀯𑀘𑀦𑁂𑀦𑁂𑀯 𑀯𑀺𑀲𑁂𑀲𑀺𑀢𑁄, 𑀦 𑀙𑀦𑁆𑀤𑀸𑀤𑀻𑀳𑀻𑀢𑀺 𑀦 𑀇𑀥 𑀯𑀻𑀭𑀺𑀬𑀸𑀥𑀺𑀧𑀢𑀺𑀢𑀸 𑀧𑀥𑀸𑀦𑀲𑀗𑁆𑀔𑀸𑀭𑀲𑁆𑀲 𑀯𑀼𑀢𑁆𑀢𑀸 𑀳𑁄𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀁 𑀯𑀺𑀲𑁂𑀲𑁂𑀢𑁆𑀯𑀸 𑀞𑀺𑀢𑀫𑁂𑀯 𑀲𑀫𑀦𑁆𑀦𑀸𑀕𑀫𑀗𑁆𑀕𑀯𑀲𑁂𑀦 𑀧𑀥𑀸𑀦𑀲𑀗𑁆𑀔𑀸𑀭𑀯𑀘𑀦𑁂𑀦 𑀯𑀼𑀢𑁆𑀢𑀦𑁆𑀢𑀺 𑀦𑀸𑀧𑀺 𑀤𑁆𑀯𑀻𑀳𑀺 𑀯𑀻𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀫𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄 𑀲𑀫𑀸𑀥𑀺, 𑀢𑀣𑀸𑀧𑀺 𑀯𑀺𑀲𑀺𑀝𑁆𑀞𑁂𑀦𑁂𑀯 𑀘 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀧𑀥𑀸𑀦𑀲𑀗𑁆𑀔𑀸𑀭𑁄 𑀲𑁂𑀲𑀥𑀫𑁆𑀫𑀸 𑀘, 𑀢𑀲𑁆𑀫𑀸 𑀲𑀫𑀸𑀥𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀯𑀼𑀢𑁆𑀢𑀸, 𑀯𑀺𑀲𑁂𑀲𑀦𑀪𑀸𑀯𑁄 𑀘 𑀙𑀦𑁆𑀤𑀸𑀤𑀻𑀦𑀁 𑀢𑀁𑀢𑀁𑀅𑀯𑀲𑁆𑀲𑀬𑀤𑀲𑁆𑀲𑀦𑀯𑀲𑁂𑀦 𑀳𑁄𑀢𑀻𑀢𑀺 ‘‘𑀙𑀦𑁆𑀤𑀲𑀫𑀸𑀥𑀺…𑀧𑁂… 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀢𑁆𑀣𑁂𑀧𑀺 𑀧𑀸𑀤-𑀲𑀤𑁆𑀤𑁂 𑀉𑀧𑀸𑀤𑀸𑀬𑀝𑁆𑀞𑁂𑀦 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺, 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑁂 𑀉𑀢𑁆𑀢𑀭𑀘𑀽𑀴𑀪𑀸𑀚𑀦𑀺𑀬𑁂 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁫𑁭) 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀇𑀤𑁆𑀥𑀺𑀧𑀸𑀤𑀢𑀸 𑀯𑀼𑀢𑁆𑀢𑀸, 𑀧𑀜𑁆𑀳𑀧𑀼𑀘𑁆𑀙𑀓𑁂 𑀘 𑁋 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀻’’𑀢𑀺𑀆𑀤𑀺𑀦𑀸𑀯 (𑀯𑀺𑀪. 𑁪𑁩𑁧) 𑀉𑀤𑁆𑀤𑁂𑀲𑀁 𑀓𑀢𑁆𑀯𑀸𑀧𑀺 𑀧𑀼𑀦 𑀙𑀦𑁆𑀤𑀸𑀤𑀻𑀦𑀁𑀬𑁂𑀯 𑀓𑀼𑀲𑀮𑀸𑀤𑀺𑀪𑀸𑀯𑁄 𑀯𑀺𑀪𑀢𑁆𑀢𑁄. 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯 𑀳𑀺 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁, 𑀅𑀜𑁆𑀜𑀣𑀸 𑀘𑀢𑀼𑀩𑁆𑀩𑀺𑀥𑀢𑀸 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀲𑁂𑀦 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑁄. 𑀢𑀢𑁆𑀣 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀢𑀺 𑀙𑀦𑁆𑀤𑀸𑀤𑀺𑀓𑁂 𑀥𑀼𑀭𑁂 𑀚𑁂𑀝𑁆𑀞𑀓𑁂 𑀧𑀼𑀩𑁆𑀩𑀗𑁆𑀕𑀫𑁂 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀲𑀫𑀸𑀥𑀺 𑀙𑀦𑁆𑀤𑀸𑀥𑀺𑀧𑀢𑀺𑀲𑀫𑀸𑀥𑀻𑀢𑀺 𑀙𑀦𑁆𑀤𑀸𑀤𑀻𑀦𑀁 𑀇𑀤𑁆𑀥𑀺𑀬𑀸 𑀅𑀥𑀺𑀕𑀫𑀽𑀧𑀸𑀬𑀤𑀲𑁆𑀲𑀦𑀁 𑀉𑀧𑀸𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁, 𑀢𑀤𑀢𑁆𑀣𑀫𑁂𑀯 ‘‘𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀬𑀁 𑀦𑀺𑀲𑁆𑀲𑀬𑀺𑀤𑁆𑀥𑀺𑀧𑀸𑀤𑀤𑀲𑁆𑀲𑀦𑀁 𑀓𑀢𑀁 𑀙𑀦𑁆𑀤𑀸𑀤𑀺𑀯𑀺𑀲𑀺𑀝𑁆𑀞𑀸𑀦𑀁𑀬𑁂𑀯 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀓𑁂𑀯𑀮𑀁 𑀇𑀤𑁆𑀥𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀁𑀬𑁂𑀯 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀇𑀤𑁆𑀥𑀺𑀧𑀸𑀤𑀪𑀸𑀯𑁂 𑀕𑀬𑁆𑀳𑀫𑀸𑀦𑁂 𑀢𑁂𑀲𑀁 𑀘𑀢𑀼𑀩𑁆𑀩𑀺𑀥𑀢𑀸 𑀦 𑀳𑁄𑀢𑀺 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀅𑀦𑀺𑀩𑁆𑀩𑀢𑁆𑀢𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀦 𑀦𑀺𑀩𑁆𑀩𑀢𑁆𑀢𑁄, 𑀦 𑀲𑀪𑀸𑀯𑀥𑀫𑁆𑀫𑁄, 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀸𑀤𑀫𑀤𑁆𑀤𑀦𑀢𑁆𑀣𑀸𑀬 𑀳𑁄𑀢𑀺, 𑀅𑀪𑀺𑀥𑀫𑁆𑀫𑁂 𑀘 𑀆𑀕𑀢𑁄 𑀉𑀢𑁆𑀢𑀭𑀘𑀽𑀴𑀯𑀸𑀭𑁄𑀢𑀺 𑀬𑁄𑀚𑀦𑀸. 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺𑀆𑀤𑀺 𑀉𑀢𑁆𑀢𑀭𑀘𑀽𑀴𑀯𑀸𑀭𑀤𑀲𑁆𑀲𑀦𑀁. 𑀇𑀫𑁂 𑀧𑀦 𑀉𑀢𑁆𑀢𑀭𑀘𑀽𑀴𑀯𑀸𑀭𑁂 𑀆𑀕𑀢𑀸 𑀇𑀤𑁆𑀥𑀺𑀧𑀸𑀤𑀸.

𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀙𑀦𑁆𑀤𑁂 𑀲𑀢𑀺 𑀓𑀣𑀁 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀲𑀢𑁆𑀢𑀸𑀳𑀸𑀦𑀺 𑀪𑀢𑁆𑀢𑀸𑀦𑀺 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙𑀦𑁆𑀤𑀫𑁂𑀯 𑀦𑀺𑀲𑁆𑀲𑀸𑀬 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀆𑀳 𑁋 ‘‘𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺. 𑀲𑁄𑀡𑀢𑁆𑀣𑁂𑀭𑁄𑀢𑀺 𑀲𑀼𑀔𑀼𑀫𑀸𑀮𑀲𑁄𑀡𑀢𑁆𑀣𑁂𑀭𑁄. 𑀲𑁄 𑀳𑀺 𑀆𑀬𑀲𑁆𑀫𑀸 𑀅𑀢𑁆𑀢𑀦𑁄 𑀲𑀼𑀔𑀼𑀫𑀸𑀮𑀪𑀸𑀯𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑀺𑀯𑁂𑀮𑀁 𑀘𑀗𑁆𑀓𑀫𑀦𑁂𑀦 𑀧𑀸𑀤𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀉𑀲𑁆𑀲𑀸𑀳𑀁 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀯𑀻𑀭𑀺𑀬𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑀫𑁆𑀪𑀼𑀢𑀢𑁆𑀣𑁂𑀭𑁄 ‘‘𑀘𑀺𑀢𑁆𑀢𑀯𑀢𑁄 𑀘𑁂 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀇𑀚𑁆𑀛𑁂𑀬𑁆𑀬, 𑀫𑀬𑁆𑀳𑀁 𑀇𑀚𑁆𑀛𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀫𑁄𑀖𑀭𑀸𑀚𑀸 ‘‘𑀧𑀜𑁆𑀜𑀯𑀢𑁄 𑀘𑁂 𑀫𑀕𑁆𑀕𑀪𑀸𑀯𑀦𑀸 𑀇𑀚𑁆𑀛𑁂𑀬𑁆𑀬, 𑀫𑀬𑁆𑀳𑀁 𑀇𑀚𑁆𑀛𑁂𑀬𑁆𑀬𑀸’’𑀢𑀺 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀜𑁆𑀜𑀸𑀥𑀼𑀭𑀁 𑀧𑀜𑁆𑀜𑀸𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀆𑀳 ‘‘𑀫𑁄𑀖𑀭𑀸𑀚𑀸 𑀯𑀻𑀫𑀁𑀲𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺. 𑀇𑀤𑀸𑀦𑀺 𑀦𑁂𑀲𑀁 𑀅𑀭𑀺𑀬𑀸𑀦𑀁 𑀉𑀧𑀝𑁆𑀞𑀸𑀦𑀼𑀲𑁆𑀲𑀸𑀳𑀫𑀦𑁆𑀢𑀚𑀸𑀢𑀺𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀮𑀤𑁆𑀥𑀯𑀺𑀲𑁂𑀲𑁂 𑀅𑀫𑀘𑁆𑀘𑀧𑀼𑀢𑁆𑀢𑁂 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀧𑀼𑀦𑀧𑁆𑀧𑀼𑀦𑀁 𑀙𑀦𑁆𑀤𑀼𑀧𑁆𑀧𑀸𑀤𑀦𑀁 𑀢𑁄𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀙𑀦𑁆𑀤𑀲𑁆𑀲 𑀉𑀧𑀝𑁆𑀞𑀸𑀦𑀲𑀤𑀺𑀲𑀢𑀸 𑀯𑀼𑀢𑁆𑀢𑀸, 𑀣𑀸𑀫𑀪𑀸𑀯𑀢𑁄 𑀘 𑀯𑀻𑀭𑀺𑀬𑀲𑁆𑀲 𑀲𑀽𑀭𑀢𑁆𑀢𑀲𑀤𑀺𑀲𑀢𑀸, 𑀘𑀺𑀦𑁆𑀢𑀦𑀧𑁆𑀧𑀥𑀸𑀦𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀫𑀦𑁆𑀢𑀲𑀁𑀯𑀺𑀥𑀸𑀦𑀲𑀤𑀺𑀲𑀢𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭-𑀲𑀫𑁆𑀪𑀽𑀢𑁂𑀲𑀼 𑀓𑀼𑀲𑀮𑀥𑀫𑁆𑀫𑁂𑀲𑀼 𑀧𑀜𑁆𑀜𑀸 𑀲𑁂𑀝𑁆𑀞𑀸𑀢𑀺 𑀯𑀻𑀫𑀁𑀲𑀸𑀬 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀢𑀸 𑀯𑀼𑀢𑁆𑀢𑀸.

𑁪. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁬. 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑀸𑀢𑀺 𑀯𑀺𑀓𑁆𑀔𑀺𑀢𑁆𑀢𑀲𑀪𑀸𑀯𑀸, 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀯𑀝𑁆𑀞𑀺𑀢𑀢𑀸𑀬 𑀯𑀺𑀧𑁆𑀨𑀦𑁆𑀤𑀺𑀢𑀘𑀺𑀢𑁆𑀢𑀢𑀸𑀬 𑀯𑀺𑀧𑁆𑀨𑀦𑁆𑀤𑀫𑀸𑀦𑀘𑀺𑀢𑁆𑀢𑀸. 𑀢𑀼𑀘𑁆𑀙𑀢𑀸𑀬 𑀦𑀴𑁄 𑀯𑀺𑀬𑀸𑀢𑀺 𑀦𑀴𑁄, 𑀫𑀸𑀦𑁄, 𑀉𑀕𑁆𑀕𑀢𑁄 𑀦𑀴𑁄 𑀏𑀢𑁂𑀲𑀦𑁆𑀢𑀺 𑀉𑀦𑁆𑀦𑀴𑀸𑀢𑀺 𑀆𑀳 𑁋 ‘‘𑀉𑀦𑁆𑀦𑀴𑀸𑀢𑀺…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀘𑀧𑀮𑀸𑀢𑀺 𑀘𑀸𑀧𑀮𑁆𑀬𑀢𑀸 𑀦𑀸𑀫 𑀮𑁄𑀮𑀪𑀸𑀯𑁄. 𑀫𑀼𑀭𑀸𑀢𑀺 𑀔𑀭𑀯𑀘𑀦𑀸, 𑀨𑀭𑀼𑀲𑀯𑀘𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀓𑀺𑀡𑁆𑀡𑀯𑀸𑀘𑀸 𑀦𑀸𑀫 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀲𑀁𑀬𑀢𑀯𑀘𑀦𑀸’’𑀢𑀺𑀆𑀤𑀺. 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂 𑀧𑀫𑀼𑀝𑁆𑀞𑀸 𑀯𑀺𑀦𑀝𑁆𑀞𑀸 𑀧𑀝𑀺𑀯𑀺𑀦𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀫𑀼𑀝𑁆𑀞𑀲𑀢𑀻𑀢𑀺 𑀆𑀳 𑁋 ‘‘𑀦𑀝𑁆𑀞𑀲𑁆𑀲𑀢𑀺𑀦𑁄’’𑀢𑀺. 𑀉𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀲𑀫𑀸𑀥𑀺𑀦𑁄 𑀅𑀪𑀸𑀯𑁂𑀦 𑀉𑀤𑁆𑀥𑀘𑁆𑀘𑁂𑀦𑁂𑀯 𑀉𑀧𑀭𑀽𑀧𑀭𑀺 𑀪𑀦𑁆𑀢𑀘𑀺𑀢𑁆𑀢𑀸. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸 𑀅𑀪𑀸𑀯𑀺𑀢𑀓𑀸𑀬𑀢𑀸𑀬 𑀕𑀸𑀫𑀤𑀸𑀭𑀓𑀸 𑀯𑀺𑀬 𑀧𑀓𑀢𑀺𑀪𑀽𑀢𑀇𑀦𑁆𑀤𑁆𑀭𑀺𑀬𑀸. 𑀦𑁂𑀫𑁄 𑀯𑀼𑀘𑁆𑀘𑀢𑀺 𑀪𑀽𑀫𑀺𑀬𑀸 𑀩𑀤𑁆𑀥𑀪𑀸𑀯𑀦𑀺𑀫𑀺𑀢𑁆𑀢𑀧𑀤𑁂𑀲𑁄, 𑀕𑀫𑁆𑀪𑀻𑀭𑁄 𑀦𑁂𑀫𑁄 𑀏𑀢𑀲𑁆𑀲𑀸𑀢𑀺 𑀕𑀫𑁆𑀪𑀻𑀭𑀦𑁂𑀫𑁄. 𑀲𑀼𑀝𑁆𑀞𑀼 𑀦𑀺𑀔𑀸𑀢𑁄𑀢𑀺𑀆𑀤𑀺 𑀢𑀲𑁆𑀲 𑀧𑀸𑀤𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀤𑀲𑁆𑀲𑀦𑀁.

𑁫. 𑀉𑀡𑁆𑀡𑀸𑀪𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁭. 𑀧𑀳𑀸𑀦𑀢𑁆𑀣𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀧𑀳𑀸𑀦𑀢𑁆𑀣𑀁.

𑁯. 𑀇𑀤𑁆𑀥𑀸𑀤𑀺𑀤𑁂𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁧. 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀇𑀤𑁆𑀥𑀺𑀮𑀸𑀪𑀸𑀬 𑀧𑀯𑀢𑁆𑀢𑀢𑀻’’𑀢𑀺 𑀯𑀘𑀦𑀢𑁄.

𑁧𑁦. 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁨. 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀪𑀸𑀯𑀦𑀸𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀮𑀻𑀦𑀸𑀓𑀸𑀭𑁄𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀮𑀬𑀸𑀧𑀢𑁆𑀢𑀺. 𑀓𑁄𑀲𑀚𑁆𑀚𑁂𑀦 𑀯𑁄𑀓𑀺𑀡𑁆𑀡𑀸𑀧𑀚𑁆𑀚𑀦𑀁 𑀯𑀼𑀢𑁆𑀢𑀁.

𑀏𑀯𑀁 𑀧𑀲𑀸𑀤𑀸𑀪𑀸𑀯𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀓𑁆𑀔𑁂𑀧𑀸𑀧𑀢𑁆𑀢𑀺, 𑀢𑀢𑁆𑀣 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀬𑀁 𑀲𑀫𑁆𑀧𑀳𑀁𑀲𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀲𑁆𑀲 𑀉𑀧𑁆𑀧𑀸𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑁄 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸’’𑀢𑀺𑀆𑀤𑀺. 𑀯𑀢𑁆𑀣𑀼𑀓𑀸𑀫𑁂 𑀆𑀭𑀩𑁆𑀪 𑀯𑀺𑀓𑁆𑀔𑀺𑀢𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀯𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑁄’’𑀢𑀺. 𑀉𑀧𑁆𑀧𑀣𑀁 𑀧𑀝𑀺𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀤𑀡𑁆𑀟𑀦𑀝𑁆𑀞𑁂𑀦 𑀦𑀺𑀕𑁆𑀕𑀡𑁆𑀳𑀦𑀝𑁆𑀞𑁂𑀦 𑀲𑀼𑀢𑁆𑀢𑀸𑀦𑀺 𑀏𑀯 𑀤𑀡𑁆𑀟𑁄𑀢𑀺 𑀲𑀼𑀢𑁆𑀢𑀤𑀡𑁆𑀟𑁄, 𑀢𑁂𑀦 𑀲𑀼𑀢𑁆𑀢𑀤𑀡𑁆𑀟𑁂𑀦 𑀘𑀺𑀢𑁆𑀢𑀁 𑀢𑀚𑁆𑀚𑁂𑀢𑁆𑀯𑀸. 𑀧𑀜𑁆𑀘𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑁄 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑁄 𑀅𑀦𑀼𑀯𑀺𑀲𑀝𑁄’’𑀢𑀺.

𑀧𑀼𑀭𑁂𑀧𑀘𑁆𑀙𑀸𑀪𑀸𑀯𑁄 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀫𑀦𑀲𑀺𑀓𑀸𑀭𑀯𑀲𑁂𑀦 𑀉𑀕𑁆𑀕𑀳𑀯𑀲𑁂𑀦 𑀯𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀺𑀮𑀻𑀦𑀸𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀽𑀢𑀺 𑀅𑀢𑀺𑀮𑀻𑀦𑀸𑀢𑀺𑀧𑀕𑁆𑀕𑀳𑀺𑀢𑀲𑀁𑀔𑀺𑀢𑁆𑀢𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑀲𑀜𑁆𑀜𑀺𑀢𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼. 𑀢𑀢𑁆𑀣 𑀪𑀸𑀯𑀦𑀁 𑀅𑀦𑀚𑁆𑀛𑁄𑀕𑀸𑀳𑁂𑀢𑁆𑀯𑀸𑀯 𑀲𑀗𑁆𑀓𑁄𑀘𑁄 𑀅𑀢𑀺𑀮𑀻𑀦𑀢𑀸, 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀦𑁆𑀢𑁄 𑀲𑀗𑁆𑀓𑁄𑀘𑁄 𑀲𑀁𑀔𑀺𑀢𑁆𑀢𑀢𑀸, 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀢𑀺𑀧𑀕𑁆𑀕𑀳𑀺𑀢𑀢𑀸, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸 𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑀢𑀸. 𑀩𑀳𑀺𑀤𑁆𑀥𑀸 𑀯𑀺𑀲𑀫𑀯𑀺𑀢𑀓𑁆𑀓𑀸𑀦𑀼𑀪𑀸𑀯𑀦𑀁 𑀆𑀧𑀚𑁆𑀚𑀦𑁆𑀢𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦 𑀅𑀝𑁆𑀞𑀺𑀓𑀲𑀜𑁆𑀜𑀸𑀯𑀲𑁂𑀦 𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀲𑀭𑀻𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑀸𑀳 ‘‘𑀉𑀤𑁆𑀥𑀁 𑀧𑀸𑀤𑀢𑀮𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦).

𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀆𑀓𑀺𑀭𑀻𑀬𑀦𑁆𑀢𑀺 𑀧𑀓𑀸𑀭𑀢𑁄 𑀞𑀧𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀪𑀸𑀕𑀸𑀢𑀺 𑀆𑀳 𑁋 ‘‘𑀬𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀬𑁂𑀳𑀺 𑀓𑁄𑀝𑁆𑀞𑀸𑀲𑁂𑀳𑀻’’𑀢𑀺. 𑀮𑀺𑀗𑁆𑀕𑀻𑀬𑀢𑀺 𑀲𑀮𑁆𑀮𑀓𑁆𑀔𑀻𑀬𑀢𑀻𑀢𑀺 𑀮𑀺𑀗𑁆𑀕𑀁, 𑀲𑀡𑁆𑀞𑀸𑀦𑀁. 𑀦𑀺𑀫𑀻𑀬𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀻𑀬𑀢𑀻𑀢𑀺 𑀦𑀺𑀫𑀺𑀢𑁆𑀢𑀁, 𑀉𑀧𑀝𑁆𑀞𑀸𑀦𑀁. 𑀬𑁄 𑀪𑀺𑀓𑁆𑀔𑀽𑀢𑀺𑀆𑀤𑀺 𑀆𑀮𑁄𑀓𑀲𑀜𑁆𑀜𑀁 𑀬𑁄 𑀉𑀕𑁆𑀕𑀡𑁆𑀳𑀸𑀢𑀺, 𑀢𑀁 𑀤𑀲𑁆𑀲𑀦𑀁. 𑀅𑀗𑁆𑀕𑀡𑁂𑀢𑀺 𑀯𑀺𑀯𑀝𑀗𑁆𑀕𑀡𑁂. 𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺𑀓𑀭𑁄𑀢𑀺 𑀭𑀢𑁆𑀢𑀺𑀬𑀁. 𑀯𑀻𑀭𑀺𑀬𑀸𑀤𑀻𑀲𑀼𑀧𑀻𑀢𑀺 𑀬𑀣𑀸 ‘‘𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺 𑀙𑀦𑁆𑀤𑁂 𑀯𑀺𑀢𑁆𑀣𑀸𑀭𑀦𑀬𑁄 𑀯𑀼𑀢𑁆𑀢𑁄, 𑀯𑀻𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁄 𑀏𑀯 𑀯𑀺𑀢𑁆𑀣𑀸𑀭𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀬𑁄𑀕𑀼𑀴𑀯𑀕𑁆𑀕𑁄

𑁨. 𑀅𑀬𑁄𑀕𑀼𑀴𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁪. 𑀇𑀫𑀺𑀦𑀸 𑀘𑀢𑀼𑀫𑀳𑀸𑀪𑀽𑀢𑀫𑀬𑁂𑀦𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑀮𑁄𑀓𑀧𑀘𑁆𑀘𑀓𑁆𑀔𑁂𑀦 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀦 𑀘𑀢𑀼𑀫𑀳𑀸𑀪𑀽𑀢𑀫𑀬𑁂𑀦. 𑀫𑀦𑁄𑀫𑀬𑁄 𑀧𑀦 𑀦𑀺𑀫𑁆𑀫𑀺𑀢𑀓𑀸𑀬𑁄 𑀪𑀕𑀯𑀢𑁄 𑀭𑀼𑀘𑀺𑀯𑀲𑁂𑀦 𑀧𑀭𑁂𑀲𑀁 𑀧𑀘𑁆𑀘𑀓𑁆𑀔𑁄 𑀳𑁄𑀢𑀺. 𑀑𑀫𑀸𑀢𑀻𑀢𑀺 𑀅𑀯𑀫𑀸𑀢𑀺. 𑀅𑀯-𑀧𑀼𑀩𑁆𑀩𑁄 𑀳𑀺 𑀫𑀸-𑀲𑀤𑁆𑀤𑁄 𑀲𑀢𑁆𑀢𑀺𑀅𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 ‘‘𑀧𑀳𑁄𑀢𑀺 𑀲𑀓𑁆𑀓𑁄𑀢𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀲𑀫𑁆𑀪𑀺𑀦𑁆𑀦𑀧𑀤𑀦𑁆𑀢𑀺 𑀅𑀲𑀸𑀥𑀸𑀭𑀡𑀧𑀤𑀁 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸. 𑀓𑀸𑀬𑀲𑁆𑀲 𑀘𑀺𑀢𑁆𑀢𑁂 𑀲𑀫𑁄𑀤𑀳𑀦𑀁 𑀆𑀭𑁄𑀧𑀦𑀁 𑀢𑀦𑁆𑀦𑀺𑀲𑁆𑀲𑀺𑀢𑀢𑀸𑀓𑀭𑀡𑀜𑁆𑀘 𑀅𑀢𑁆𑀣𑀢𑁄 𑀘𑀺𑀢𑁆𑀢𑀕𑀢𑀺𑀬𑀸 𑀧𑀯𑀢𑁆𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀘𑀺𑀢𑁆𑀢𑀕𑀢𑀺𑀬𑀸 𑀧𑁂𑀲𑁂𑀢𑀻’’𑀢𑀺.

𑀢𑀢𑁆𑀣 𑀘𑀺𑀢𑁆𑀢𑀕𑀢𑀺𑀕𑀫𑀦𑀁 𑀦𑀸𑀫 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀲𑁆𑀲 𑀧𑀭𑀺𑀡𑀸𑀫𑀦𑁂𑀦 ‘‘𑀅𑀬𑀁 𑀓𑀸𑀬𑁄 𑀇𑀫𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀓𑀸𑀬𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑀸𑀞𑀧𑀦𑀁. 𑀓𑀣𑀁 𑀧𑀦 𑀓𑀸𑀬𑁄 𑀤𑀦𑁆𑀥𑀧𑀯𑀢𑁆𑀢𑀺𑀓𑁄 𑀮𑀳𑀼𑀧𑀯𑀢𑁆𑀢𑀺𑀦𑀸 𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑁄 𑀳𑁄𑀢𑀻𑀢𑀺? 𑀦 𑀲𑀩𑁆𑀩𑀣𑀸 𑀲𑀫𑀸𑀦𑀕𑀢𑀺𑀓𑁄. 𑀬𑀣𑁂𑀯 𑀳𑀺 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑁂 𑀘𑀺𑀢𑁆𑀢𑀁 𑀲𑀩𑁆𑀩𑀣𑀸 𑀓𑀸𑀬𑁂𑀦 𑀲𑀫𑀸𑀦𑀕𑀢𑀺𑀓𑀁 𑀦 𑀳𑁄𑀢𑀺. 𑀦 𑀳𑀺 𑀓𑀤𑀸𑀘𑀺 𑀢𑀁 𑀲𑀪𑀸𑀯𑀲𑀺𑀤𑁆𑀥𑁂𑀦 𑀅𑀢𑁆𑀢𑀦𑁄 𑀔𑀡𑁂𑀦 𑀅𑀯𑀢𑁆𑀢𑀺𑀢𑁆𑀯𑀸 𑀤𑀦𑁆𑀥𑀯𑀼𑀢𑁆𑀢𑀺𑀓𑀲𑁆𑀲 𑀭𑀽𑀧𑀥𑀫𑁆𑀫𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺, ‘‘𑀇𑀤𑀁 𑀘𑀺𑀢𑁆𑀢𑀁 𑀅𑀬𑀁 𑀓𑀸𑀬𑁄 𑀯𑀺𑀬 𑀳𑁄𑀢𑀽’’𑀢𑀺 𑀧𑀦 𑀅𑀥𑀺𑀝𑁆𑀞𑀸𑀦𑁂𑀦 𑀤𑀦𑁆𑀥𑀕𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀯𑀢𑁆𑀢𑀦𑀢𑁄 𑀬𑀸𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺, 𑀢𑀸𑀯 𑀓𑀸𑀬𑀕𑀢𑀺𑀅𑀦𑀼𑀮𑁄𑀫𑁂𑀦𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀓𑀸𑀬𑀕𑀢𑀺𑀬𑀸 𑀧𑀭𑀺𑀡𑀸𑀫𑀺𑀢𑀁 𑀦𑀸𑀫 𑀳𑁄𑀢𑀺. 𑀏𑀯𑀁 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀧𑀕𑁂𑀯 𑀲𑀼𑀔𑀮𑀳𑀼𑀲𑀜𑁆𑀜𑀸𑀬 𑀲𑀫𑁆𑀧𑀸𑀤𑀺𑀢𑀢𑁆𑀢𑀸 𑀅𑀪𑀸𑀯𑀺𑀢𑀺𑀤𑁆𑀥𑀺𑀧𑀸𑀤𑀸𑀦𑀁 𑀯𑀺𑀬 𑀤𑀦𑁆𑀥𑀁 𑀅𑀯𑀢𑁆𑀢𑀺𑀢𑁆𑀯𑀸 𑀬𑀣𑀸 𑀮𑀳𑀼𑀓𑀁 𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑁂𑀦𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄 𑀓𑀸𑀬𑁄 𑀘𑀺𑀢𑁆𑀢𑀕𑀢𑀺𑀬𑀸 𑀧𑀭𑀺𑀡𑀸𑀫𑀺𑀢𑁄 𑀦𑀸𑀫 𑀳𑁄𑀢𑀺, 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀬𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀩𑀸𑀳𑀸𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀽𑀧𑀫𑀸𑀧𑀺 𑀉𑀧𑀘𑀸𑀭𑁂𑀦 𑀯𑀺𑀦𑀸 𑀲𑀼𑀝𑁆𑀞𑀼𑀢𑀭𑀁 𑀬𑀼𑀢𑁆𑀢𑀸 𑀳𑁄𑀢𑀻𑀢𑀺. 𑀅𑀜𑁆𑀜𑀣𑀸 𑀥𑀫𑁆𑀫𑀢𑀸𑀯𑀺𑀮𑁄𑀫𑀢𑀸 𑀲𑀺𑀬𑀸, 𑀦𑀸𑀧𑀺 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀇𑀤𑁆𑀥𑀺𑀩𑀮𑁂𑀦 𑀓𑀸𑀢𑀼𑀁 𑀲𑀓𑁆𑀓𑀸, 𑀪𑀸𑀯𑀜𑁆𑀜𑀣𑀢𑁆𑀢𑀫𑁂𑀯 𑀧𑀦 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺.

𑁩-𑁧𑁦. 𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁩𑁫-𑁮𑁪𑁨. ‘‘𑀤𑁆𑀯𑀺𑀦𑁆𑀦𑀁 𑀨𑀮𑀸𑀦’’𑀦𑁆𑀢𑀺 𑀆𑀕𑀢𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀤𑁆𑀯𑁂 𑀨𑀮𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀬𑁄𑀕𑀼𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.