𑁧. 𑀏𑀓𑀥𑀫𑁆𑀫𑀯𑀕𑁆𑀕𑁄

𑁧. 𑀏𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭𑁭. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀞𑀫𑀲𑀼𑀢𑁆𑀢𑁂. 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬. 𑀅𑀭𑀺𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁨. 𑀦𑁄-𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁, 𑀢𑀲𑁆𑀫𑀸 𑀦𑀽𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀪𑀸𑀯𑁂𑀣 𑀦𑀽’’𑀢𑀺. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀇𑀘𑁆𑀙𑀸𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄’’𑀢𑀺. 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑀥𑀫𑁆𑀫𑁂𑀲𑀼 𑀲𑀧𑀭𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀲𑀼. 𑀇𑀫𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀧𑁆𑀧𑀳𑀸𑀦𑀓𑀺𑀢𑁆𑀢𑀦𑁂𑀦 𑀧𑀝𑀺𑀖𑀲𑀜𑁆𑀜𑀸𑀧𑀝𑀺𑀯𑀺𑀦𑀬𑀓𑀺𑀢𑁆𑀢𑀦𑁂𑀦 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀓𑀣𑁂𑀢𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀜𑁆𑀜𑁄𑀚𑀦𑀲𑀫𑀼𑀘𑁆𑀙𑁂𑀤𑀲𑁆𑀲 𑀩𑁆𑀬𑀸𑀓𑀢𑀢𑁆𑀢𑀸. 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 ‘‘𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄.

𑁮. 𑀧𑀤𑀻𑀧𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁪. ‘‘𑀦𑁂𑀯 𑀓𑀸𑀬𑁄𑀧𑀺 𑀓𑀺𑀮𑀫𑀢𑀺 𑀦 𑀘𑀓𑁆𑀔𑀽𑀦𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄. ‘‘𑀓𑀸𑀬𑁄𑀧𑀺 𑀓𑀺𑀮𑀫𑀢𑀺, 𑀘𑀓𑁆𑀔𑀽𑀦𑀺𑀧𑀺 𑀯𑀺𑀳𑀜𑁆𑀜𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀬𑀢𑁆𑀣 𑀬𑀣𑀸 𑀳𑁄𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀽𑀦𑀺 𑀨𑀦𑁆𑀤𑀦𑁆𑀢𑀺 𑀓𑀺𑀮𑀫𑀦𑁆𑀢𑀻𑀢𑀺𑀆𑀤𑀺 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀦𑁂 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂𑀢𑀺 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑁂. 𑀏𑀯𑀫𑀸𑀳𑀸𑀢𑀺 ‘‘𑀪𑀺𑀓𑁆𑀔𑀼 𑀘𑁂𑀧𑀺 𑀆𑀓𑀗𑁆𑀔𑁂𑀬𑁆𑀬, 𑀦𑁂𑀯 𑀓𑀸𑀬𑁄 𑀓𑀺𑀮𑀫𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀳.

𑀮𑀩𑁆𑀪𑀢𑀻𑀢𑀺 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀯𑀼𑀢𑁆𑀢𑀁, 𑀧𑀭𑀢𑁄 𑀆𑀕𑀢𑁂𑀦 𑀣𑁂𑀭𑀯𑀸𑀤𑁂𑀦 𑀲𑁄 𑀅𑀦𑀺𑀘𑁆𑀙𑀺𑀢𑁄. 𑀦 𑀳𑀺 𑀢𑀸𑀭𑀓𑀭𑀽𑀧𑀫𑀼𑀢𑁆𑀢𑀸𑀯𑀴𑀺𑀓𑀸𑀤𑀺𑀲𑀤𑀺𑀲𑀁 𑀦𑀺𑀫𑀺𑀢𑁆𑀢𑀽𑀧𑀝𑁆𑀞𑀸𑀦𑀸𑀓𑀸𑀭𑀫𑀢𑁆𑀢𑀁 𑀔𑀡𑀫𑀢𑁆𑀢𑀝𑁆𑀞𑀸𑀬𑀺𑀦𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑁂𑀲𑀼 𑀯𑀺𑀬 𑀉𑀕𑁆𑀖𑀸𑀝𑀦𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 ‘‘𑀦 𑀮𑀩𑁆𑀪𑀢𑁂𑀯𑀸’’𑀢𑀺. 𑀆𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑁄, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀫𑀺𑀁 𑀲𑀺𑀤𑁆𑀥𑁂 𑀅𑀬𑀁 𑀕𑀼𑀡𑁄 𑀲𑀼𑀔𑁂𑀦𑁂𑀯 𑀇𑀚𑁆𑀛𑀢𑀻𑀢𑀺. 𑀬𑀲𑁆𑀫𑀸 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦𑀸𑀕𑀢𑀦𑁆𑀢𑀺 𑀬𑀣𑀸 𑀧𑀼𑀭𑀺𑀫𑀯𑀸𑀭𑁂 ‘‘𑀪𑀺𑀓𑁆𑀔𑀼 𑀘𑁂𑀧𑀺 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 𑀆𑀕𑀢𑀁, 𑀏𑀯𑀁 𑀇𑀥 ‘‘𑀪𑀸𑀯𑀺𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀫𑁆𑀳𑀻’’𑀢𑀺 𑀆𑀕𑀢𑀯𑀸𑀭𑁂 𑀪𑀺𑀓𑁆𑀔𑀼𑀕𑁆𑀕𑀳𑀡𑀫𑀓𑀢𑀁, 𑀢𑀲𑁆𑀫𑀸 ‘‘𑀲𑁄’’𑀢𑀺 𑀦 𑀯𑀼𑀢𑁆𑀢𑀁.

𑁯. 𑀯𑁂𑀲𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁫. 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦𑀸𑀢𑀺 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁂𑀦 𑀪𑀽𑀫𑀺𑀬𑀸 𑀯𑀟𑁆𑀠𑀦𑁂𑀦. 𑀭𑀸𑀚𑀕𑀳𑀲𑀸𑀯𑀢𑁆𑀣𑀺𑀬𑁄 𑀯𑀺𑀬 𑀇𑀤𑀫𑁆𑀧𑀺 𑀘 𑀦𑀕𑀭𑀁…𑀧𑁂… 𑀲𑀩𑁆𑀩𑀸𑀓𑀸𑀭𑀯𑁂𑀧𑀼𑀮𑁆𑀮𑀢𑀁 𑀧𑀢𑁆𑀢𑀁. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬𑀲𑀤𑁆𑀤𑁄 𑀓𑀸𑀭𑀡𑀯𑀘𑀦𑁄𑀢𑀺 𑀆𑀳 ‘‘𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀻’’𑀢𑀺, 𑀅𑀬𑀁 𑀓𑀸𑀬𑁄 𑀅𑀯𑀺𑀜𑁆𑀜𑀸𑀡𑀓𑁄𑀧𑀺 𑀲𑀯𑀺𑀜𑁆𑀜𑀸𑀡𑀓𑁄𑀧𑀺 𑀏𑀯𑀫𑁆𑀧𑀺 𑀅𑀲𑀼𑀪𑁄 𑀏𑀯𑀫𑁆𑀧𑀺 𑀅𑀲𑀼𑀪𑁄𑀢𑀺 𑀦𑀸𑀦𑀸𑀯𑀺𑀥𑁂𑀳𑀺 𑀓𑀸𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀲𑀼𑀪𑀸𑀓𑀸𑀭𑀲𑀦𑁆𑀤𑀲𑁆𑀲𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀓𑁂𑀲𑀸𑀤𑀺𑀯𑀲𑁂𑀦 𑀢𑀢𑁆𑀣𑀸𑀧𑀺 𑀯𑀡𑁆𑀡𑀸𑀤𑀺𑀢𑁄 𑀅𑀲𑀼𑀪𑀸𑀓𑀸𑀭𑀲𑁆𑀲 𑀲𑀩𑁆𑀩𑀲𑁄 𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀁. 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀻𑀬𑀓𑀣𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀓𑀭𑀚𑀓𑀸𑀬𑁂 𑀯𑀺𑀘𑁆𑀙𑀦𑁆𑀤𑀦𑀼𑀧𑁆𑀧𑀸𑀤𑀦𑀓𑀣𑀁. 𑀫𑀼𑀢𑁆𑀢𑀁 𑀯𑀸𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀓𑀸𑀬𑀲𑁆𑀲 𑀅𑀫𑀦𑀼𑀜𑁆𑀜𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀆𑀤𑀺𑀢𑁄 𑀢𑀻𑀳𑀺 𑀧𑀤𑁂𑀳𑀺 𑀅𑀤𑀲𑁆𑀲𑀦𑀻𑀬𑀢𑀸𑀬 𑀅𑀲𑀸𑀭𑀓𑀢𑀸𑀬 𑀘, 𑀫𑀚𑁆𑀛𑁂 𑀘𑀢𑀽𑀳𑀺 𑀤𑀼𑀕𑁆𑀕𑀦𑁆𑀥𑀢𑀸𑀬, 𑀅𑀦𑁆𑀢𑁂 𑀏𑀓𑁂𑀦 𑀮𑁂𑀲𑀫𑀢𑁆𑀢𑁂𑀦𑀧𑀺 𑀫𑀦𑀼𑀜𑁆𑀜𑀢𑀸𑀪𑀸𑀯𑀫𑀲𑁆𑀲 𑀤𑀲𑁆𑀲𑁂𑀢𑀺. 𑀅𑀣 𑀔𑁄𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄 𑀲𑀭𑀽𑀧𑁂𑀦𑁂𑀯 𑀅𑀫𑀦𑀼𑀜𑁆𑀜𑀢𑀸𑀬 𑀤𑀲𑁆𑀲𑀦𑀁. ‘‘𑀓𑁂𑀲𑀮𑁄𑀫𑀸𑀤𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀡𑁆𑀡𑁂𑀦𑁆𑀢𑁄𑀢𑀺 𑀯𑀺𑀢𑁆𑀣𑀸𑀭𑁂𑀦𑁆𑀢𑁄. 𑀅𑀲𑀼𑀪𑀸𑀬𑀸𑀢𑀺 𑀅𑀲𑀼𑀪𑀫𑀸𑀢𑀺𑀓𑀸𑀬. 𑀨𑀸𑀢𑀺𑀓𑀫𑁆𑀫𑀦𑁆𑀢𑀺 𑀩𑀳𑀼𑀮𑀻𑀓𑀸𑀭𑁄. 𑀓𑀺𑀮𑁂𑀲𑀘𑁄𑀭𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁆𑀢𑀸 𑀛𑀸𑀦𑀁 ‘‘𑀘𑀺𑀢𑁆𑀢𑀫𑀜𑁆𑀚𑀽𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀸𑀬𑀸𑀢𑀺 𑀧𑀸𑀤𑀓𑀁 𑀓𑀢𑁆𑀯𑀸.

𑀅𑀧𑀭𑁂 𑀧𑀦 ‘‘𑀢𑀲𑁆𑀫𑀺𑀁 𑀓𑀺𑀭 𑀅𑀤𑁆𑀥𑀫𑀸𑀲𑁂 𑀦 𑀓𑁄𑀘𑀺 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀫𑀸𑀳 𑁋 ‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂’𑀢𑀺𑀆𑀤𑀻’’𑀢𑀺 𑀯𑀤𑀦𑁆𑀢𑀺. 𑀧𑀭𑁂 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀁𑀲𑀽𑀘𑀦𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀤𑀁 𑀧𑀦 𑀇𑀘𑁆𑀙𑀸𑀫𑀢𑁆𑀢’’𑀦𑁆𑀢𑀺.

𑀅𑀦𑁂𑀓𑀓𑀸𑀭𑀡𑀲𑀫𑁆𑀫𑀺𑀲𑁆𑀲𑁄𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀦𑀸𑀫 𑀓𑀸𑀬𑀲𑁆𑀲 𑀅𑀲𑀼𑀘𑀺𑀤𑀼𑀕𑁆𑀕𑀦𑁆𑀥𑀚𑁂𑀕𑀼𑀘𑁆𑀙𑀧𑀝𑀺𑀓𑀽𑀮𑀢𑀸𑀯. 𑀲𑀩𑁆𑀩𑀫𑀓𑀁𑀲𑀽𑀢𑀺 𑀧𑀼𑀣𑀼𑀚𑁆𑀚𑀦𑀸 𑀦𑀸𑀫 𑀲𑀸𑀯𑀚𑁆𑀚𑁂𑀧𑀺 𑀢𑀢𑁆𑀣 𑀅𑀦𑀯𑀚𑁆𑀚𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀓𑀭𑀡𑀓𑀸𑀭𑀸𑀧𑀦𑀲𑀫𑀦𑀼𑀜𑁆𑀜𑀢𑀸𑀪𑁂𑀤𑀁 𑀲𑀩𑁆𑀩𑀁 𑀧𑀸𑀧𑀁 𑀅𑀓𑀁𑀲𑀼. 𑀓𑀸𑀫𑀁 𑀤𑀲𑀸𑀦𑀼𑀲𑁆𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀆𑀦𑀸𑀧𑀸𑀦𑀲𑁆𑀲𑀢𑀺 𑀕𑀳𑀺𑀢𑀸, 𑀲𑀸 𑀧𑀦 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀲𑀼 𑀩𑀳𑀽𑀦𑀁 𑀲𑀧𑁆𑀧𑀸𑀬𑀸 𑀲𑀸𑀢𑁆𑀣𑀺𑀓𑀸 𑀘, 𑀢𑀲𑁆𑀫𑀸 𑀧𑀼𑀦 𑀕𑀳𑀺𑀢𑀸. 𑀢𑀣𑀸 𑀳𑀺 𑀪𑀕𑀯𑀸 𑀢𑀫𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀣𑁂𑀲𑀺. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀲𑀤𑀺𑀲𑀸, 𑀘𑀢𑁆𑀢𑀸𑀭𑁄 𑀧𑀦 𑀆𑀭𑀼𑀧𑁆𑀧𑀸 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀬𑁄𑀕𑁆𑀬𑀸𑀢𑀺 𑀢𑁂𑀲𑀁 𑀇𑀥 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀯𑁂𑀲𑀸𑀮𑀻𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀫𑀼𑀳𑀼𑀢𑁆𑀢𑁂𑀦𑁂𑀯𑀸𑀢𑀺 𑀲𑀢𑁆𑀣𑀭𑀺 𑀲𑀤𑁆𑀥𑀫𑁆𑀫𑁂 𑀘 𑀕𑀸𑀭𑀯𑁂𑀦 𑀉𑀧𑀕𑀢𑀪𑀺𑀓𑁆𑀔𑀽𑀦𑀁 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀉𑀝𑁆𑀞𑀳𑀺𑀁𑀲𑀽𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀤𑁂𑀲𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀑𑀳𑀺𑀢𑀲𑁄𑀢𑀸 𑀯𑀺𑀳𑀭𑀦𑁆𑀢𑀺.

𑀆𑀦𑀸𑀧𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀧𑀯𑀢𑁆𑀢𑀸𑀬 𑀲𑀢𑀺𑀬𑀸. 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀻𑀢𑀺 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑀸𑀬 𑀉𑀧𑁆𑀧𑀦𑁆𑀦𑁄 𑀲𑀫𑀸𑀥𑀺. 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀁 𑀯𑀸 𑀲𑀫𑀸𑀥𑀻𑀢𑀺 𑀇𑀫𑀺𑀦𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀲𑀪𑀸𑀯𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀉𑀪𑀬𑀢𑁆𑀣𑀸𑀧𑀺 𑀲𑀳𑀚𑀸𑀢𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀬𑀣𑀸𑀧𑀝𑀺𑀧𑀦𑁆𑀦𑀸 𑀫𑁂 𑀲𑀸𑀯𑀓𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀸𑀯𑀺𑀢𑁄𑀢𑀺 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀯𑀸’’𑀢𑀺 𑀆𑀳. 𑀢𑀢𑁆𑀣 𑀪𑀸𑀯𑀁 𑀯𑀺𑀚𑁆𑀚𑀫𑀸𑀦𑀢𑀁 𑀇𑀢𑁄 𑀕𑀢𑁄𑀢𑀺 𑀪𑀸𑀯𑀺𑀢𑁄, 𑀉𑀧𑁆𑀧𑀸𑀤𑀺𑀢𑁄 𑀧𑀝𑀺𑀮𑀤𑁆𑀥𑀫𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀦𑁆𑀦𑁄 𑀧𑀦 𑀮𑀤𑁆𑀥𑀸𑀲𑁂𑀯𑀦𑁄 𑀪𑀸𑀯𑀺𑀢𑁄, 𑀧𑀕𑀼𑀡𑀪𑀸𑀯𑀁 𑀆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀩𑀳𑀼𑀮𑀻𑀓𑀢𑁄𑀢𑀺 𑀩𑀳𑀼𑀮𑀁 𑀧𑀯𑀢𑁆𑀢𑀺𑀢𑁄. 𑀢𑁂𑀦 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀫𑀸𑀳. 𑀬𑁄 𑀳𑀺 𑀯𑀲𑀻𑀪𑀸𑀯𑀫𑀸𑀧𑀸𑀤𑀺𑀢𑁄, 𑀲𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀢𑁄’’𑀢𑀺. 𑀬𑀣𑀸 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄 (𑀫. 𑀦𑀺. 𑁧.𑁧𑁩𑁯; 𑀅. 𑀦𑀺. 𑁪.𑁨𑁪𑁧), 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁨𑁭𑁧; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀘 𑀏𑀯𑀫𑀸𑀤𑀻𑀲𑀼 𑀧𑀞𑀫𑀧𑀤𑁂 𑀯𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀻𑀢𑀺 𑀆𑀳 ‘‘𑀉𑀪𑀬𑀢𑁆𑀣 𑀏𑀯𑀲𑀤𑁆𑀤𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀉𑀪𑀬𑀢𑁆𑀣 𑀦𑀺𑀬𑀫𑁂𑀦 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑀁 𑀛𑀸𑀦𑀫𑀸𑀳. 𑀢𑀜𑁆𑀳𑀺 𑀅𑀲𑀼𑀪𑁂𑀲𑀼 𑀬𑁄𑀕𑀓𑀫𑁆𑀫𑀪𑀸𑀯𑀢𑁄 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀘 ‘‘𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀯𑀮𑀦𑁆𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀛𑀸𑀦𑀧𑀝𑀺𑀯𑁂𑀥𑀯𑀲𑁂𑀦. 𑀛𑀸𑀦𑀜𑁆𑀳𑀺 𑀪𑀸𑀯𑀦𑀸𑀯𑀺𑀲𑁂𑀲𑁂𑀦 𑀇𑀚𑁆𑀛𑀦𑁆𑀢𑀁 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀺 𑀬𑀣𑀸𑀲𑀪𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀺𑀬𑀢𑀺 𑀘𑀸𑀢𑀺 𑀧𑀝𑀺𑀯𑁂𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀩𑀻𑀪𑀘𑁆𑀙𑀸𑀭𑀫𑁆𑀫𑀡𑀢𑁆𑀢𑀸. 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦, 𑀮𑁂𑀲𑀦𑁆𑀢𑀭𑁂𑀦 𑀯𑀸. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀯𑀺𑀘𑀺𑀢𑀩𑁆𑀩𑀢𑀁 𑀧𑀢𑁆𑀢𑀸𑀭𑀫𑁆𑀫𑀡𑀲𑁆𑀲 𑀧𑀭𑀫𑀲𑀼𑀔𑀼𑀫𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀦𑁆𑀢𑁂𑀳𑀺 𑀲𑀦𑁆𑀦𑀺𑀲𑀺𑀦𑁆𑀦𑁂 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑁄 𑀥𑀫𑁆𑀫𑁄 𑀲𑀬𑀫𑁆𑀧𑀺 𑀲𑀦𑁆𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄’’𑀢𑀺, 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀢𑀤𑀸𑀭𑀫𑁆𑀫𑀡𑀸𑀦𑀁 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀸𑀲𑁆𑀲 𑀲𑀦𑁆𑀢𑀧𑀡𑀻𑀢𑀪𑀸𑀯𑀸𑀯𑀳𑀁 𑀓𑀺𑀜𑁆𑀘𑀺 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑁄. 𑀅𑀲𑁂𑀘𑀦𑀓𑀢𑁆𑀢𑀸 𑀅𑀦𑀸𑀲𑀺𑀢𑁆𑀢𑀓𑁄, 𑀅𑀦𑀸𑀲𑀺𑀢𑁆𑀢𑀓𑀢𑁆𑀢𑀸 𑀏𑀯 𑀅𑀩𑁆𑀩𑁄𑀓𑀺𑀡𑁆𑀡𑁄, 𑀅𑀲𑀫𑁆𑀫𑀺𑀲𑁆𑀲𑁄 𑀧𑀭𑀺𑀓𑀫𑁆𑀫𑀸𑀤𑀺𑀦𑀸. 𑀢𑀢𑁄 𑀏𑀯 𑀧𑀸𑀝𑀺𑀬𑁂𑀓𑁆𑀓𑁄 𑀯𑀺𑀲𑀼𑀁𑀬𑁂𑀯𑁂𑀓𑁄. 𑀆𑀯𑁂𑀡𑀺𑀓𑁄 𑀅𑀲𑀸𑀥𑀸𑀭𑀡𑁄. 𑀲𑀩𑁆𑀩𑀫𑁂𑀢𑀁 𑀲𑀭𑀲𑀢𑁄 𑀏𑀯 𑀲𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀧𑀭𑀺𑀓𑀫𑁆𑀫𑀁 𑀯𑀸 𑀲𑀦𑁆𑀢𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀘 𑀓𑀲𑀺𑀡𑀓𑀭𑀡𑀸𑀤𑀺𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀁, 𑀢𑀸𑀤𑀺𑀲𑀁 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀭𑀲𑁆𑀲𑀸𑀤𑀢𑁆𑀢𑀸 𑀅𑀲𑀦𑁆𑀢𑀁 𑀅𑀧𑁆𑀧𑀡𑀻𑀢𑀁 𑀲𑀺𑀬𑀸. 𑀉𑀧𑀘𑀸𑀭𑁂 𑀯𑀸 𑀦𑀢𑁆𑀣𑀺 𑀏𑀢𑁆𑀣 𑀲𑀦𑁆𑀢𑀢𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀉𑀧𑀘𑀸𑀭𑀓𑁆𑀔𑀡𑁂 𑀦𑀻𑀯𑀭𑀡𑀸𑀤𑀺𑀯𑀺𑀕𑀫𑁂𑀦 𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀘 𑀧𑀭𑁂𑀲𑀁 𑀲𑀦𑁆𑀢𑀢𑀸 𑀳𑁄𑀢𑀺, 𑀦 𑀏𑀯𑀫𑀺𑀫𑀲𑁆𑀲. 𑀅𑀬𑀁 𑀧𑀦 𑀆𑀤𑀺𑀲𑀫𑀦𑁆𑀦𑀸…𑀧𑁂… 𑀧𑀡𑀻𑀢𑁄 𑀘𑀸𑀢𑀺 𑀬𑁄𑀚𑀦𑀸. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀅𑀦𑀸𑀲𑀺𑀢𑁆𑀢𑀓𑁄𑀢𑀺 𑀉𑀧𑀲𑁂𑀘𑀦𑁂𑀦 𑀅𑀦𑀸𑀲𑀺𑀢𑁆𑀢𑀓𑁄. 𑀢𑁂𑀦𑀸𑀳 𑁋 ‘‘𑀑𑀚𑀯𑀦𑁆𑀢𑁄’’𑀢𑀺 𑀑𑀚𑀯𑀦𑁆𑀢𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀫𑀥𑀼𑀭𑁄𑀢𑀺 𑀇𑀝𑁆𑀞𑁄. 𑀘𑁂𑀢𑀲𑀺𑀓𑀲𑀼𑀔𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀁 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦, 𑀉𑀧𑁂𑀓𑁆𑀔𑀸𑀬 𑀯𑀸 𑀲𑀦𑁆𑀢𑀪𑀸𑀯𑁂𑀦 𑀲𑀼𑀔𑀕𑀢𑀺𑀓𑀢𑁆𑀢𑀸 𑀲𑀩𑁆𑀩𑁂𑀲𑀫𑁆𑀧𑀺 𑀛𑀸𑀦𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀛𑀸𑀦𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑁆𑀞𑀲𑀭𑀻𑀭𑀢𑀸𑀯𑀲𑁂𑀦 𑀧𑀦 𑀓𑀸𑀬𑀺𑀓𑀲𑀼𑀔𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀁 𑀤𑀝𑁆𑀞𑀩𑁆𑀩𑀁, 𑀢𑀜𑁆𑀘 𑀔𑁄 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀓𑀸𑀮𑁂. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂’’𑀢𑀺 𑀇𑀤𑀁 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀯𑀺𑀓𑁆𑀔𑀫𑁆𑀪𑀺𑀢𑁂𑀢𑀺 𑀛𑀸𑀦𑁂𑀦 𑀲𑀓𑀲𑀦𑁆𑀢𑀸𑀦𑀢𑁄 𑀅𑀦𑀻𑀳𑀢𑁂 𑀅𑀧𑁆𑀧𑀳𑀻𑀦𑁂. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂𑀢𑀺 𑀅𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀅𑀯𑀺𑀚𑁆𑀚𑀸, 𑀢𑀢𑁄 𑀲𑀫𑁆𑀪𑀽𑀢𑁂. 𑀅𑀯𑀺𑀚𑁆𑀚𑀸𑀧𑀼𑀩𑁆𑀩𑀗𑁆𑀕𑀫𑀸 𑀳𑀺 𑀲𑀩𑁆𑀩𑁂 𑀧𑀸𑀧𑀥𑀫𑁆𑀫𑀸. 𑀔𑀡𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀓𑁆𑀔𑀡𑁂𑀦𑁂𑀯. 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀏𑀢𑁆𑀣 𑀅𑀦𑁆𑀢𑀭𑀥𑀸𑀧𑀦𑀁 𑀯𑀺𑀦𑀸𑀲𑀦𑀁, 𑀢𑀁 𑀧𑀦 𑀛𑀸𑀦𑀓𑀢𑁆𑀢𑀼𑀓𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀯𑀺𑀓𑁆𑀔𑀫𑁆𑀪𑁂𑀢𑀻’’𑀢𑀺. 𑀯𑀽𑀧𑀲𑀫𑁂𑀢𑀻𑀢𑀺 𑀯𑀺𑀲𑁂𑀲𑁂𑀦 𑀉𑀧𑀲𑀫𑁂𑀢𑀺. 𑀯𑀺𑀲𑁂𑀲𑁂𑀦 𑀉𑀧𑀲𑀫𑀦𑀁 𑀧𑀦 𑀲𑀫𑁆𑀫𑀤𑁂𑀯 𑀉𑀧𑀲𑀫𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀉𑀧𑀲𑀫𑁂𑀢𑀻’’𑀢𑀺. 𑀲𑀸𑀲𑀦𑀺𑀓𑀲𑁆𑀲 𑀛𑀸𑀦𑀪𑀸𑀯𑀦𑀸 𑀬𑁂𑀪𑀼𑀬𑁆𑀬𑁂𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸’’𑀢𑀺. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀧𑀸𑀤𑀓𑀪𑀽𑀢𑁄 𑀅𑀬𑀁 𑀲𑀫𑀸𑀥𑀺 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀺𑀬𑀫𑀕𑁆𑀕𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄’’𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀲𑀫𑁆𑀫𑀤𑁂𑀯 𑀬𑀼𑀚𑁆𑀚𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁦. 𑀓𑀺𑀫𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁬. 𑀣𑁂𑀭𑁄𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁄. 𑀅𑀬𑀁 𑀤𑁂𑀲𑀦𑀸𑀢𑀺 ‘‘𑀓𑀣𑀁 𑀯𑀺𑀪𑀸𑀯𑀺𑀢𑁄 𑀦𑀼 𑀔𑁄 𑀓𑀺𑀫𑀺𑀮𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸 𑀤𑁂𑀲𑀦𑀸. 𑀓𑀸𑀬𑀜𑁆𑀜𑀢𑀭𑀦𑁆𑀢𑀺 𑀭𑀽𑀧𑀓𑀸𑀬𑁂 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑁂. 𑀏𑀯𑀦𑁆𑀢𑀺 𑀬𑀣𑀸 𑀆𑀦𑀸𑀧𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀚𑀸𑀢𑁄, 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀸𑀭𑁂𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀲𑀦𑀸𑀲𑀻𑀲𑀦𑁆𑀢𑀺 𑀤𑁂𑀲𑀦𑀸𑀧𑀤𑁂𑀲𑀁. 𑀫𑀦𑀲𑀺𑀓𑀸𑀭𑀧𑀤𑁂𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀢𑀁 𑀲𑀩𑁆𑀩𑀁 𑀲𑀭𑀽𑀧𑀢𑁄 𑀅𑀜𑁆𑀜𑀸𑀧𑀤𑁂𑀲𑀢𑁄 𑀅𑀧𑀤𑀺𑀲𑀢𑀺. 𑀬𑀣𑁂𑀯 𑀳𑀻𑀢𑀺𑀆𑀤𑀺𑀦𑀸 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑀤𑁆𑀯𑀬𑁂𑀢𑀺 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂.

𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀧𑀻𑀢𑀺𑀫𑀦𑀲𑀺𑀓𑀸𑀭𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑁂𑀲𑁂𑀦 𑀬𑀤𑀺 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺. 𑀏𑀲𑀸 𑀬𑀣𑀸𑀯𑀼𑀢𑁆𑀢𑀸 𑀯𑁂𑀤𑀦𑀸 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺. 𑀯𑁂𑀤𑀦𑀸𑀭𑀫𑁆𑀫𑀡𑀸 𑀘 𑀅𑀦𑀼𑀧𑀲𑁆𑀲𑀦𑀸, 𑀢𑀲𑁆𑀫𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦 𑀬𑀼𑀚𑁆𑀚𑀢𑀺. 𑀬𑀤𑀺 𑀏𑀯𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 ‘‘𑀯𑁂𑀤𑀦𑀸 𑀯𑁂𑀤𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀣𑀦𑁆𑀢𑀺 𑀆𑀳 𑁋 ‘‘𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀦𑁆𑀢𑀺 𑀲𑀼𑀔𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀯𑀢𑁆𑀣𑀼𑀪𑀽𑀢𑀁 𑀭𑀽𑀧𑀲𑀤𑁆𑀤𑀸𑀤𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸 𑀯𑁂𑀤𑀺𑀬𑀢𑀺, 𑀦 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀯𑁂𑀤𑀦𑀸𑀧𑁆𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀬𑀣𑀸 ‘‘𑀧𑀼𑀕𑁆𑀕𑀮𑁄 𑀯𑁂𑀤𑀦𑀁 𑀯𑁂𑀤𑀺𑀬𑀢𑀻’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀇𑀥𑀸𑀧𑀺 𑀯𑁂𑀤𑀦𑀸𑀬 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀆𑀭𑀩𑁆𑀪 𑀧𑀯𑀢𑁆𑀢𑀺, 𑀢𑀣𑀸 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑀲𑀻𑀲𑁂𑀦 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑁄. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀪𑀸𑀯𑀁 𑀲𑀦𑁆𑀥𑀸𑀬. 𑀆𑀤𑀻𑀦𑀁 𑀧𑀤𑀸𑀦𑀁. 𑀏𑀢𑀲𑁆𑀲 ‘‘𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦 𑀬𑀼𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀅𑀦𑀼𑀬𑁄𑀕𑀲𑁆𑀲.

𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀻𑀢𑀺 𑀧𑀻𑀢𑀺𑀲𑀳𑀕𑀢𑀸𑀦𑀺 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀦𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀢𑀺. 𑀢𑀲𑁆𑀲𑀸𑀢𑀺 𑀢𑁂𑀦. 𑀧𑀝𑀺𑀲𑀁𑀯𑀺𑀤𑀺𑀢𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀳𑀺 𑀓𑀢𑁆𑀢𑀼𑀅𑀢𑁆𑀣𑁂 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂𑀢𑀺 𑀲𑀫𑀸𑀧𑀚𑁆𑀚𑀦𑀓𑁆𑀔𑀡𑁂. 𑀛𑀸𑀦𑀧𑀝𑀺𑀮𑀸𑀪𑁂𑀦𑀸𑀢𑀺 𑀛𑀸𑀦𑁂𑀦 𑀲𑀫𑀗𑁆𑀕𑀻𑀪𑀸𑀯𑁂𑀦. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀫𑀼𑀔𑁂𑀦 𑀢𑀤𑀸𑀭𑀫𑁆𑀫𑀡𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺, 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀦𑀸𑀫 𑀲𑀧𑁆𑀧𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑁂𑀦 𑀢𑀲𑁆𑀲 𑀆𑀲𑀬𑁂 𑀧𑀝𑀺𑀲𑀁𑀯𑀺𑀤𑀺𑀢𑁂 𑀲𑁄𑀧𑀺 𑀧𑀝𑀺𑀲𑀁𑀯𑀺𑀤𑀺𑀢𑁄 𑀳𑁄𑀢𑀺 𑀫𑀦𑁆𑀢𑀸𑀕𑀤𑀩𑀮𑁂𑀦 𑀢𑀲𑁆𑀲 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸, 𑀏𑀯𑀁 𑀧𑀻𑀢𑀺𑀬𑀸 𑀆𑀲𑀬𑀪𑀽𑀢𑁂 𑀆𑀭𑀫𑁆𑀫𑀡𑁂 𑀧𑀝𑀺𑀲𑀁𑀯𑀺𑀤𑀺𑀢𑁂 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸𑀯 𑀳𑁄𑀢𑀺 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀢𑀲𑁆𑀲𑀸 𑀕𑀳𑀡𑀲𑁆𑀲 𑀲𑀼𑀓𑀭𑀢𑁆𑀢𑀸. 𑀯𑀺𑀧𑀲𑁆𑀲𑀦𑀓𑁆𑀔𑀡𑁂𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀸𑀬 𑀯𑀺𑀲𑀬𑀢𑁄 𑀤𑀲𑁆𑀲𑀦𑀓𑁆𑀔𑀡𑁂. 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁂𑀦𑀸𑀢𑀺 𑀧𑀻𑀢𑀺𑀬𑀸 𑀲𑀮𑀓𑁆𑀔𑀡𑀲𑁆𑀲 𑀲𑀸𑀫𑀜𑁆𑀜𑀮𑀓𑁆𑀔𑀡𑀲𑁆𑀲 𑀘 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀬𑀜𑁆𑀳𑀺 𑀧𑀻𑀢𑀺𑀬𑀸 𑀯𑀺𑀲𑁂𑀲𑀢𑁄 𑀲𑀸𑀫𑀜𑁆𑀜𑀢𑁄 𑀘 𑀮𑀓𑁆𑀔𑀡𑀁, 𑀢𑀲𑁆𑀫𑀺𑀁 𑀯𑀺𑀤𑀺𑀢𑁂 𑀲𑀸 𑀬𑀸𑀣𑀸𑀯𑀢𑁄 𑀯𑀺𑀤𑀺𑀢𑀸 𑀏𑀯 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻’’𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀏𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦𑀸𑀢𑀺 𑀤𑀻𑀖𑀲𑁆𑀲 𑀅𑀲𑁆𑀲𑀸𑀲𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀯𑀲𑁂𑀦. 𑀧𑀚𑀸𑀦𑀢𑁄 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄𑀢𑀺 𑀛𑀸𑀦𑀧𑀭𑀺𑀬𑀸𑀧𑀦𑁆𑀦𑀁 ‘‘𑀅𑀯𑀺𑀓𑁆𑀔𑁂𑀧𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 𑀧𑀚𑀸𑀦𑀢𑁄. 𑀬𑀣𑀸 𑀳𑀺 𑀆𑀭𑀫𑁆𑀫𑀡𑀫𑀼𑀔𑁂𑀦 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺, 𑀏𑀯𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀆𑀭𑀫𑁆𑀫𑀡𑀫𑀼𑀔𑁂𑀦 𑀧𑀝𑀺𑀲𑀁𑀯𑀺𑀤𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀻𑀢𑀺 𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑀝𑁆𑀞𑀺𑀢𑀸 𑀆𑀭𑀫𑁆𑀫𑀡𑀫𑀼𑀔𑁂𑀦 𑀛𑀸𑀦𑁂𑀧𑀺 𑀉𑀧𑀝𑁆𑀞𑀺𑀢𑀸 𑀦𑀸𑀫 𑀳𑁄𑀢𑀺. 𑀢𑀸𑀬 𑀲𑀢𑀺𑀬𑀸𑀢𑀺 𑀏𑀯𑀁 𑀉𑀧𑀝𑁆𑀞𑀺𑀢𑀸𑀬 𑀢𑀸𑀬 𑀲𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑁂𑀦 𑀢𑁂𑀦 𑀜𑀸𑀡𑁂𑀦 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲 𑀢𑀲𑁆𑀲 𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀸 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀤𑀻𑀖𑀁 𑀧𑀲𑁆𑀲𑀸𑀲𑀯𑀲𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁂𑀦𑁂𑀯 𑀦𑀬𑁂𑀦 𑀅𑀯𑀲𑁂𑀲𑀧𑀤𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑀬𑀣𑁂𑀯𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀛𑀸𑀦𑀧𑀝𑀺𑀮𑀸𑀪𑁂𑀦 𑀬𑀣𑀸 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺𑀆𑀤𑀬𑁄 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀦𑁆𑀢𑀺 𑀢𑁂𑀦 𑀯𑀺𑀦𑀸 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀏𑀯𑀁 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑁂𑀦 𑀢𑀁𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑁂𑀤𑀦𑀸𑀲𑀗𑁆𑀔𑀸𑀢𑀫𑀦𑀲𑀺𑀓𑀸𑀭𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀅𑀭𑀼𑀡𑀼𑀕𑁆𑀕𑀫𑁂𑀦 𑀯𑀺𑀬 𑀲𑀽𑀭𑀺𑀬𑀲𑁆𑀲 𑀢𑁂𑀦 𑀯𑀺𑀦𑀸 𑀯𑁂𑀤𑀦𑀸𑀬 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑀺𑀲𑀬𑀧𑁆𑀧𑀯𑀢𑁆𑀢𑀺 𑀯𑁂𑀤𑀦𑀸 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑁄𑀤𑀦𑀁 𑀦𑀺𑀭𑀸𑀓𑀭𑁄𑀢𑀺.

𑀆𑀭𑀫𑁆𑀫𑀡𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀁 𑀯𑀤𑀢𑀺. 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻𑀬𑁂𑀯 𑀦𑀸𑀫𑁂𑀲 𑀳𑁄𑀢𑀺 𑀅𑀲𑀫𑁆𑀫𑁄𑀳𑀢𑁄 𑀘𑀺𑀢𑁆𑀢𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑀧𑀝𑀺𑀲𑀁𑀯𑀺𑀤𑀺𑀢𑀯𑀲𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀢𑀭𑀸 𑀢𑀺𑀲𑁆𑀲𑁄𑀧𑀺 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀲𑀗𑁆𑀕𑀡𑁆𑀳𑀸𑀢𑀺.

𑀲𑁄𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼. 𑀬𑀁 𑀢𑀁 𑀧𑀳𑀸𑀦𑀁 𑀧𑀳𑀸𑀬𑀓𑀜𑀸𑀡𑀁. 𑀧𑀜𑁆𑀜𑀸𑀬𑀸𑀢𑀺 𑀅𑀧𑀭𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀦𑀺𑀘𑁆𑀘𑀯𑀺𑀭𑀸𑀕𑀸𑀤𑀺𑀢𑁄 𑀤𑀺𑀲𑁆𑀯𑀸 𑀤𑀼𑀯𑀺𑀥𑀸𑀬𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺. 𑀇𑀤𑀜𑁆𑀳𑀺 𑀘𑀢𑀼𑀓𑁆𑀓𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀓𑁆𑀓𑀁. 𑀢𑀲𑁆𑀲𑀸𑀧𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬. 𑀧𑀚𑀳𑀢𑀻𑀢𑀺 𑀧𑀳𑀸𑀦𑀦𑁆𑀢𑀺 𑀆𑀳 ‘‘𑀦𑀺𑀘𑁆𑀘𑀲𑀜𑁆𑀜𑀁…𑀧𑁂… 𑀧𑀳𑀸𑀦𑀓𑀭𑀜𑀸𑀡𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸𑀧𑀭𑀫𑁆𑀧𑀭𑀦𑁆𑀢𑀺 𑀧𑀝𑀺𑀧𑀸𑀝𑀺𑀬𑀸 𑀯𑀺𑀧𑀲𑁆𑀲𑀦𑀫𑀸𑀳. 𑀧𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀪𑀸𑀯𑀦𑀸𑀘𑀺𑀢𑁆𑀢𑀁 𑀧𑀕𑁆𑀕𑀳𑀦𑀺𑀕𑁆𑀕𑀳𑀸𑀦𑀁 𑀅𑀓𑀭𑀡𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀏𑀓𑀢𑁄 𑀉𑀧𑀝𑁆𑀞𑀸𑀦𑀦𑁆𑀢𑀺 𑀬𑀲𑁆𑀫𑀸 𑀫𑀚𑁆𑀛𑀺𑀫𑀲𑀫𑀣𑀯𑀻𑀣𑀺𑀦𑀸𑀢𑀺𑀯𑀢𑁆𑀢𑀺𑀬𑀸 𑀢𑀢𑁆𑀣 𑀘 𑀧𑀓𑁆𑀔𑀦𑁆𑀤𑀦𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀭𑀲𑀪𑀸𑀯𑁂𑀦, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀪𑀸𑀯𑀢𑁄 𑀅𑀯𑀺𑀲𑁂𑀲𑀁 𑀏𑀓𑀕𑁆𑀕𑀪𑀸𑀯𑀽𑀧𑀕𑀫𑀦𑁂𑀦 𑀏𑀓𑀦𑁆𑀢𑀢𑁄 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀓𑀸𑀢𑀩𑁆𑀩𑀦𑁆𑀢𑀺 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀢𑀢𑁆𑀣𑀸𑀢𑀺 𑀏𑀯𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑁂. 𑀲𑀳𑀚𑀸𑀢𑀸𑀦𑀫𑁆𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀳𑁄𑀢𑀺 𑀢𑁂𑀲𑀁 𑀧𑀯𑀢𑁆𑀢𑀦𑀸𑀓𑀸𑀭𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄. ‘‘𑀧𑀜𑁆𑀜𑀸𑀬 𑀤𑀺𑀲𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀦 𑀓𑁂𑀯𑀮𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑁂 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸, 𑀅𑀣 𑀔𑁄 𑀅𑀪𑀺𑀚𑁆𑀛𑀸 …𑀧𑁂… 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀧𑀁𑀲𑀼𑀧𑀼𑀜𑁆𑀚𑀝𑁆𑀞𑀸𑀦𑀺𑀬𑀲𑁆𑀲 𑀓𑀺𑀮𑁂𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 ‘‘𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀙 𑀆𑀬𑀢𑀦𑀸𑀦𑀺’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀸𑀬𑀸𑀤𑀬𑁄 𑀘𑀢𑁆𑀢𑀸𑀭𑁄 𑀆𑀭𑀫𑁆𑀫𑀡𑀲𑀢𑀺𑀧𑀝𑁆𑀞𑀸𑀦𑀸. 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀁𑀲𑀼𑀧𑀼𑀜𑁆𑀚𑀝𑁆𑀞𑀸𑀦𑀺𑀬𑀲𑁆𑀲 𑀓𑀺𑀮𑁂𑀲𑀲𑁆𑀲 𑀉𑀧𑀳𑀦𑀦𑀢𑁄.

𑀏𑀓𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.