𑁩-𑁫. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁫𑁫-𑁩𑁫𑁭. 𑀬𑀼𑀚𑁆𑀛𑀦𑀁 𑀬𑁄𑀥𑁄, 𑀲𑁄 𑀆𑀚𑀻𑀯𑁄 𑀏𑀢𑀲𑁆𑀲𑀸𑀢𑀺 𑀬𑁄𑀥𑀸𑀚𑀻𑀯𑁄. 𑀢𑁂𑀦𑀸𑀳 𑁋 ‘‘𑀬𑀼𑀤𑁆𑀥𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑀦𑀓𑁄’’𑀢𑀺, 𑀉𑀲𑁆𑀲𑀸𑀳𑀁 𑀯𑀸𑀬𑀸𑀫𑀁 𑀓𑀭𑁄𑀢𑀻𑀢𑀺 𑀬𑀼𑀚𑁆𑀛𑀦𑀯𑀲𑁂𑀦 𑀉𑀲𑁆𑀲𑀸𑀳𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀻𑀢𑀺 𑀫𑀭𑀡𑀧𑀭𑀺𑀬𑀦𑁆𑀢𑀺𑀓𑀁 𑀆𑀧𑀤𑀁 𑀧𑀸𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀫𑀭𑀡𑀁 𑀧𑀝𑀺𑀧𑀚𑁆𑀚𑀸𑀧𑁂𑀦𑁆𑀢𑀻’’𑀢𑀺. 𑀤𑀼𑀝𑁆𑀞𑀼 𑀞𑀧𑀺𑀢𑀦𑁆𑀢𑀺 𑀤𑀼𑀝𑁆𑀞𑀸𑀓𑀸𑀭𑁂𑀦 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀢𑁆𑀣𑀸𑀯𑀳𑀪𑀸𑀯𑀁 𑀦 𑀕𑀢𑀁 𑀧𑀝𑀺𑀧𑀦𑁆𑀦𑀁. 𑀧𑀭𑁂𑀳𑀺 𑀲𑀗𑁆𑀕𑀸𑀫𑁂 𑀚𑀺𑀢𑀸 𑀳𑀢𑀸 𑀏𑀢𑁆𑀣 𑀚𑀸𑀬𑀦𑁆𑀢𑀻𑀢𑀺 𑀧𑀭𑀚𑀺𑀢𑁄 𑀦𑀸𑀫 𑀦𑀺𑀭𑀬𑁄. 𑀅𑀲𑀺𑀥𑀦𑀼𑀕𑀤𑀸𑀬𑀲𑀗𑁆𑀓𑀼𑀘𑀓𑁆𑀓𑀸𑀦𑀺 𑀧𑀜𑁆𑀘𑀸𑀯𑀼𑀥𑀸𑀦𑀺. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀬𑁄𑀥𑀸𑀚𑀻𑀯𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬. 𑀏𑀢𑀁 ‘‘𑀬𑁄 𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀽𑀢𑀺 𑀳𑀢𑁆𑀣𑀸𑀭𑁄𑀳𑀅𑀲𑁆𑀲𑀸𑀭𑁄𑀳𑀲𑀼𑀢𑁆𑀢𑁂𑀲𑀼. 𑀏𑀲𑁂𑀯 𑀦𑀬𑁄𑀢𑀺 𑀏𑀲𑁄 𑀢𑀢𑀺𑀬𑁂 𑀯𑀼𑀢𑁆𑀢𑁄 𑀏𑀯 𑀅𑀢𑁆𑀣𑀢𑁄 𑀯𑀺𑀲𑁂𑀲𑀸𑀪𑀸𑀯𑀢𑁄.

𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.