𑁬-𑁭. 𑀅𑀦𑁆𑀢𑁂𑀯𑀸𑀲𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁧-𑁧𑁫𑁨. 𑀅𑀦𑁆𑀢-𑀲𑀤𑁆𑀤𑁄 𑀲𑀫𑀻𑀧𑀢𑁆𑀣𑁂 𑀯𑀢𑁆𑀢𑀢𑀺 ‘‘𑀉𑀤𑀓𑀦𑁆𑀢𑀁 𑀯𑀦𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼, 𑀓𑀺𑀮𑁂𑀲𑁄 𑀧𑀦 𑀅𑀢𑀺𑀆𑀲𑀦𑁆𑀦𑁂 𑀯𑀲𑀢𑀺 𑀅𑀩𑁆𑀪𑀦𑁆𑀢𑀭𑀯𑀼𑀢𑁆𑀢𑀺𑀢𑀸𑀬𑀸𑀢𑀺 ‘‘𑀅𑀦𑁆𑀢𑁂𑀯𑀸𑀲𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁄 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀬𑀣𑀸 ‘‘𑀯𑀦𑁂𑀓𑀼𑀲𑀮𑁄, 𑀓𑀽𑀮𑁂𑀭𑀼𑀓𑁆𑀔𑀸’’𑀢𑀺. 𑀢𑁂𑀦𑀸𑀳 𑁋 ‘‘𑀅𑀦𑀦𑁆𑀢𑁂𑀯𑀸𑀲𑀺𑀓𑀦𑁆𑀢𑀺 𑀅𑀦𑁆𑀢𑁄𑀯𑀲𑀦𑀓𑀺𑀮𑁂𑀲𑀯𑀺𑀭𑀳𑀺𑀢’’𑀦𑁆𑀢𑀺. 𑀆𑀘𑀭𑀡𑀓𑀓𑀺𑀮𑁂𑀲𑀯𑀺𑀭𑀳𑀺𑀢𑀦𑁆𑀢𑀺 𑀲𑀫𑀼𑀤𑀸𑀘𑀭𑀡𑀓𑀺𑀮𑁂𑀲𑀭𑀳𑀺𑀢𑀁. 𑀅𑀦𑁆𑀢𑁄 𑀅𑀲𑁆𑀲 𑀯𑀲𑀦𑁆𑀢𑀻𑀢𑀺 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑁂 𑀘𑀺𑀢𑁆𑀢𑁂 𑀯𑀲𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀢𑁂 𑀏𑀢𑀁 𑀅𑀥𑀺𑀪𑀯𑀦𑁆𑀢𑀻𑀢𑀺 𑀢𑁂 𑀓𑀺𑀮𑁂𑀲𑀸 𑀏𑀢𑀁 𑀧𑀼𑀕𑁆𑀕𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 𑀯𑀸’’𑀢𑀺. 𑀢𑁂𑀳𑀺 𑀆𑀘𑀭𑀺𑀬𑁂𑀳𑀻𑀢𑀺 𑀢𑁂𑀳𑀺 𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀳𑀺 𑀲𑀢𑁆𑀢𑁂 𑀅𑀢𑁆𑀢𑀦𑁄 𑀕𑀢𑀺𑀬𑀁 𑀞𑀧𑁂𑀦𑁆𑀢𑁂𑀳𑀺 𑀆𑀘𑀭𑀺𑀬𑁂𑀳𑀺. 𑀲𑀢𑁆𑀢𑀫𑀁 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑀫𑁂𑀯𑀸𑀢𑀺 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀔𑀦𑁆𑀥𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀇𑀥 𑀆𑀬𑀢𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀅𑀦𑁆𑀢𑁂𑀯𑀸𑀲𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.