𑁩. 𑀧𑀞𑀫𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀲𑀫𑁆𑀫𑀼𑀤𑀺𑀢𑀸 𑀲𑀫𑁆𑀫𑁄𑀤𑀧𑁆𑀧𑀢𑁆𑀢𑀸, 𑀧𑀫𑁄𑀤𑀺𑀢𑀸 𑀲𑀜𑁆𑀚𑀸𑀢𑀧𑀫𑁄𑀤𑀸. 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀯𑀦𑁆𑀢𑁄 𑀲𑀜𑁆𑀚𑀸𑀢𑀤𑀼𑀓𑁆𑀔𑀸. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀺𑀢𑀸’’𑀢𑀺. 𑀲𑀼𑀔𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀔𑁄, 𑀲𑀼𑀔𑀻. 𑀢𑁂𑀦𑀸𑀳 ‘‘𑀲𑀼𑀔𑀺𑀢𑁄’’𑀢𑀺. 𑀬𑀢𑁆𑀢𑀓𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀮𑁄𑀓𑁂 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀲𑀫𑁆𑀫𑀤𑁂𑀯 𑀧𑀲𑁆𑀲𑀦𑁆𑀢𑀸𑀦𑀁. ‘‘𑀧𑀘𑁆𑀘𑀦𑀻𑀓𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀧𑀘𑁆𑀘𑀦𑀻𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀼𑀪𑀸𑀢𑀺 ‘‘𑀆𑀳𑀽’’𑀢𑀺𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀫𑁂𑀢𑀦𑁆𑀢𑀺 ‘‘𑀲𑀼𑀔𑀁 𑀤𑀺𑀝𑁆𑀞𑀫𑀭𑀺𑀬𑁂𑀪𑀺…𑀧𑁂… 𑀢𑀤𑀭𑀺𑀬𑀸 𑀲𑀼𑀔𑀢𑁄 𑀯𑀺𑀤𑀽’’𑀢𑀺 𑀘 𑀯𑀼𑀢𑁆𑀢𑀁. 𑀲𑀩𑁆𑀩𑀫𑁂𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀫𑁂𑀯 𑀳𑀺 𑀏𑀓𑀦𑁆𑀢𑀢𑁄 𑀲𑀼𑀔𑀁 𑀦𑀸𑀫.

𑀧𑀜𑁆𑀘𑀦𑀯𑀼𑀢𑀺𑀧𑀸𑀲𑀡𑁆𑀟𑀺𑀦𑁄 𑀢𑁂𑀲𑀜𑁆𑀘 𑀧𑀸𑀲𑀡𑁆𑀟𑀺𑀪𑀸𑀯𑁄 𑀧𑀧𑀜𑁆𑀘𑀲𑀽𑀤𑀦𑀺𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑁄 𑀏𑀯. 𑀓𑀺𑀮𑁂𑀲𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑀸𑀦𑀦𑁆𑀢𑀺 𑀓𑀺𑀮𑁂𑀲𑀔𑀦𑁆𑀥𑀸 𑀓𑀺𑀮𑁂𑀲𑀦𑀻𑀯𑀭𑀡𑀁, 𑀢𑁂𑀦 𑀦𑀺𑀯𑀸𑀭𑀺𑀢𑀸𑀦𑀁. 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀜𑁆𑀘 𑀓𑀸𑀴𑀫𑁂𑀖𑀅𑀯𑀘𑁆𑀙𑀸𑀤𑀺𑀢𑀁 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑀁.

𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀲𑀼𑀪𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀦 𑀲𑀫𑁆𑀫𑀸𑀯𑀺𑀜𑁆𑀜𑀸𑀡𑀤𑀲𑁆𑀲𑀦𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀫𑀕𑁆𑀕𑀥𑀫𑁆𑀫𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀲𑁆𑀲.

𑀅𑀦𑀼𑀧𑀦𑁆𑀦𑁂𑀳𑀻𑀢𑀺 𑀅𑀦𑀼 𑀅𑀦𑀼 𑀅𑀯𑀺𑀳𑀸𑀬 𑀧𑀝𑀺𑀧𑀦𑁆𑀦𑁂𑀳𑀺. 𑀓𑁄 𑀦𑀼 𑀅𑀜𑁆𑀜𑁄 𑀚𑀸𑀦𑀺𑀢𑀼𑀁 𑀅𑀭𑀳𑀢𑀺, 𑀅𑀜𑁆𑀜𑁄 𑀦 𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀞𑀫𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.