𑁨-𑁪. 𑀏𑀢𑀁𑀫𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁯. 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀦𑀸 𑀤𑀝𑁆𑀞𑀩𑁆𑀩𑀢𑁄. 𑀲𑀼𑀢𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑁂𑀦 𑀲𑁄𑀢𑀩𑁆𑀩𑀢𑁄. 𑀫𑀼𑀢𑀁 𑀕𑀦𑁆𑀥𑀸𑀬𑀢𑀦𑀸𑀤𑀺 𑀢𑀺𑀯𑀺𑀥𑀁 𑀲𑀫𑁆𑀧𑀢𑁆𑀢𑀕𑀸𑀳𑀻𑀳𑀺 𑀖𑀸𑀦𑀸𑀤𑀻𑀳𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄. 𑀅𑀯𑀲𑁂𑀲𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀓𑁂𑀯𑀮𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀢𑁄. 𑀧𑀢𑁆𑀢𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀁, 𑀬𑀁 𑀓𑀺𑀜𑁆𑀘𑀺 𑀧𑀸𑀧𑀼𑀡𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀕𑀯𑁂𑀲𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀭𑀺𑀬𑀺𑀝𑁆𑀞𑀁. 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀦𑁆𑀢𑀺 𑀫𑀦𑀲𑀸 𑀘𑀺𑀦𑁆𑀢𑀺𑀢𑀁. ‘‘𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 𑀘𑀢𑀼𑀓𑁆𑀓𑀁 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 𑀧𑀢𑁆𑀢𑀧𑀭𑀺𑀬𑁂𑀲𑀺𑀢𑀧𑀤𑀸𑀦𑀺, 𑀢𑀢𑁄 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀁 𑀦𑀸𑀫 𑀧𑀭𑀺𑀬𑁂𑀲𑀦𑀸𑀬 𑀧𑀭𑀺𑀕𑁆𑀕𑀸𑀳𑀪𑀸𑀯𑀢𑁄. 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫 𑀓𑁂𑀯𑀮𑀁 𑀧𑀭𑀺𑀬𑁂𑀲𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀲𑁆𑀲 𑀫𑀦𑀼𑀲𑁆𑀲𑀸𑀦𑀼𑀯𑀺𑀘𑀭𑀺𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀧𑀞𑀫𑀯𑀺𑀓𑀧𑁆𑀧𑁂 𑀲𑀗𑁆𑀓𑀭𑁄 𑀅𑀢𑁆𑀣𑀻𑀢𑀺 𑀅𑀲𑀗𑁆𑀓𑀭𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀢𑀸𑀤𑀺. 𑀢𑀜𑁆𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑀢𑁆𑀢𑀸 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀁 𑀦𑀸𑀫 𑀦 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁.

𑀏𑀢𑀁𑀫𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.