𑁧. 𑀲𑀫𑀸𑀥𑀺𑀫𑀽𑀮𑀓𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬𑁨. 𑀲𑀫𑀸𑀥𑀺𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀓𑀼𑀲𑀮𑁄. 𑀢𑀬𑀺𑀤𑀁 𑀲𑀫𑀸𑀥𑀺𑀓𑁄𑀲𑀮𑁆𑀮𑀢𑁆𑀢𑀁 𑀲𑀳 𑀛𑀸𑀦𑀗𑁆𑀕𑀬𑁄𑀕𑁂𑀦 𑀘𑀢𑀼𑀩𑁆𑀩𑀺𑀥𑁄 𑀛𑀸𑀦𑀲𑀫𑀸𑀥𑀺, 𑀢𑀲𑁆𑀫𑀸 𑀢𑀁 𑀢𑀁 𑀯𑀺𑀪𑀸𑀕𑀁 𑀚𑀸𑀦𑀦𑁆𑀢𑀲𑁆𑀲 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀧𑀞𑀫𑀁 𑀧𑀜𑁆𑀘𑀗𑁆𑀕𑀺𑀓𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑀼𑀢𑀺𑀬𑀁 𑀢𑀺𑀯𑀗𑁆𑀕𑀺𑀓𑀁, 𑀲𑀼𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀢𑀢𑀺𑀬𑀁 𑀤𑀼𑀯𑀗𑁆𑀕𑀺𑀓𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀘𑀢𑀼𑀢𑁆𑀣𑀁 𑀤𑀼𑀯𑀗𑁆𑀕𑀺𑀓𑀫𑁂𑀯𑀸𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀛𑀸𑀦𑁂 𑀢𑀁𑀢𑀁𑀅𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑁂 𑀓𑀼𑀲𑀮𑁄. 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄𑀢𑀺 𑀲𑀫𑀸𑀧𑀚𑁆𑀚𑀦𑁂 𑀓𑀼𑀲𑀮𑁄. 𑀳𑀸𑀲𑁂𑀢𑁆𑀯𑀸𑀢𑀺 𑀢𑁄𑀲𑁂𑀢𑁆𑀯𑀸. 𑀓𑀮𑁆𑀮𑀁 𑀓𑀢𑁆𑀯𑀸𑀢𑀺 𑀲𑀫𑀸𑀥𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀓𑀭𑀡𑁂𑀦 𑀲𑀳𑀓𑀸𑀭𑀻𑀓𑀸𑀭𑀡𑀜𑁆𑀘 𑀲𑀫𑀸𑀥𑀸𑀦𑁂𑀦 𑀲𑀫𑀸𑀧𑀚𑁆𑀚𑀦𑁂 𑀘𑀺𑀢𑁆𑀢𑀁 𑀲𑀫𑀢𑁆𑀣𑀁 𑀓𑀢𑁆𑀯𑀸. 𑀲𑁂𑀲𑀧𑀤𑀸𑀦𑀻𑀢𑀺 𑀲𑁂𑀲𑀸 𑀢𑀬𑁄 𑀓𑁄𑀝𑁆𑀞𑀸𑀲𑀸. 𑀢𑀢𑀺𑀬𑀸𑀤𑀻𑀲𑀼 𑀦𑀬𑁂𑀲𑀼 𑀅𑀓𑀼𑀲𑀮𑁄𑀧𑀺 𑀛𑀸𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 ‘‘𑀛𑀸𑀬𑀻𑀢𑁂𑀯𑀸’’𑀢𑀺 𑀯𑀼𑀢𑁆𑀢𑁄.

𑀲𑀫𑀸𑀥𑀺𑀫𑀽𑀮𑀓𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.