𑁧𑁦. 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀆𑀩𑀸𑀥𑀝𑁆𑀞𑁂𑀦𑀸𑀢𑀺 𑀆𑀤𑀺𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀩𑀸𑀥𑀦𑀝𑁆𑀞𑁂𑀦 𑀭𑀼𑀚𑀦𑀝𑁆𑀞𑁂𑀦. 𑀅𑀦𑁆𑀢𑁄𑀤𑁄𑀲𑀝𑁆𑀞𑁂𑀦𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀤𑀼𑀲𑁆𑀲𑀦𑀝𑁆𑀞𑁂𑀦 𑀓𑀼𑀧𑁆𑀧𑀦𑀝𑁆𑀞𑁂𑀦. 𑀔𑀡𑀦𑀝𑁆𑀞𑁂𑀦𑀸𑀢𑀺 𑀲𑀲𑀦𑀝𑁆𑀞𑁂𑀦. 𑀤𑀼𑀓𑁆𑀔𑀝𑁆𑀞𑁂𑀦𑀸𑀢𑀺 𑀤𑀼𑀓𑁆𑀔𑀫𑀢𑁆𑀢𑀸 𑀤𑀼𑀓𑁆𑀔𑀪𑀸𑀯𑁂𑀦. 𑀤𑀼𑀓𑁆𑀔𑀜𑁆𑀳𑀺 𑀮𑁄𑀓𑁂 ‘‘𑀅𑀖’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀢𑀺𑀯𑀺𑀬 𑀳𑀦𑀦𑀢𑁄. 𑀯𑀺𑀲𑀪𑀸𑀕𑀁 …𑀧𑁂… 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀬𑀣𑀸𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀸𑀢𑀸𑀤𑀻𑀦𑀁 𑀯𑀺𑀲𑀪𑀸𑀕𑀪𑀽𑀢𑀫𑀳𑀸𑀪𑀽𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀆𑀩𑀸𑀥𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦. 𑀅𑀲𑀓𑀝𑁆𑀞𑁂𑀦𑀸𑀢𑀺 𑀅𑀦𑀢𑁆𑀢𑀦𑀺𑀬𑀢𑁄. 𑀧𑀮𑀼𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀧𑀓𑀸𑀭𑀢𑁄 𑀪𑀺𑀚𑁆𑀚𑀦𑀝𑁆𑀞𑁂𑀦. 𑀲𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦𑀸𑀢𑀺 𑀲𑀢𑁆𑀢𑀲𑀗𑁆𑀔𑀸𑀢𑀅𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦. 𑀅𑀢𑁆𑀢𑀸𑀪𑀸𑀯𑁂𑀦𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑁂𑀦. 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄𑀢𑀺 𑀏𑀢𑁆𑀣 ‘‘𑀧𑀭𑀢𑁄’’𑀢𑀺 𑀧𑀤𑀲𑁆𑀲 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀤𑁆𑀯𑀻𑀳𑀺 𑀅𑀦𑀢𑁆𑀢𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.